នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចធិបតី អំពាវនាវដល់ជនរួមជាតិជឿទុកចិត្តលើរាជរដ្ឋាភិបាល​ដែលកំពុង​ធ្វើកិច្ច​ការងារ​យ៉ាង​សកម្ម​ស្វែង​រក​ដំណោះស្រាយបញ្ចប់បញ្ហាព្រំដែនកម្ពុជា-ថៃ ឱ្យបានឆាប់រហ័ស
សម្ដេចធិបតីផ្ដល់អនុសាសន៍៧ចំណុច ដល់ក្រសួង-ស្ថាប័នពាក់ព័ន្ធឱ្យយកចិត្តទុកដាក់ក្នុងឱកាសទិវាអក្ខរកម្មអន្តរជាតិ ៨ កញ្ញា ២០២៥
សម្ដេចធិបតី៖ រាជរដ្ឋាភិបាលប្តេជ្ញាចិត្តយ៉ាងមុតមាំលើកកម្ពស់ការងារអក្ខរកម្ម និងបំពាក់បំប៉ន ជំនាញ និងឱកាសសិក្សាពេញមួយជីវិត ជាពិសេសជំនាញឌីជីថល
ប្រជាពលរដ្ឋត្រេកអរនឹងសមិទ្ធផលអាកាសយានដ្ឋានថ្មីដែលត្រៀមបើកដំណើរការ

នយោបាយ​ និង ការអភិវឌ្ឍន៍

មន្ត្រីចិន៖ ទំនាក់ទំនងចិន-អាមេរិក មានស្ថិរភាព ទោះជាអាមេរិក ជ្រៀតជ្រែកក្នុងបញ្ហាចិនក៏ដោយ

2024/04/24 12:15:31 pm        179
Facebook Telegram Linkin
ទំនាក់ទំនងរវាងទីក្រុងប៉េកាំង និងទីក្រុងវ៉ាស៊ីនតោន កំពុងមានស្ថិរភាព បើទោះបីជាមានសកម្មភាពរបស់សហរដ្ឋអាមេរិក ដែលបង្កផលប៉ះពាល់ដល់ផលប្រយោជន៍របស់ប្រទេសចិនក៏ដោយ នេះបើយោងតាមមន្ត្រីក្រសួងការបរទេសចិន ម្នាក់បាននិយាយនៅមុនពេលដំណើរទស្សនកិច្ចរបស់រដ្ឋមន្ត្រីការបរទេសសហរដ្ឋអាមេរិក លោក អាន់តូនី ប្លីងខិន (Antony Blinken)។ក្នុងការដាក់ចេញនូវគោលដៅសម្រាប់ដំណើរទស្សនកិច្ចនេះ មន្ត្រីដែលត្រូវបានពិពណ៌នាថាជាអគ្គនាយកនៃមន្ទីរកិច្ចការអាមេរិកខាងជើង និងទ្វីបអូសេអានី របស់ក្រសួងការបរទេសចិនរូបនោះបាននិយាយថា ទំនាក់ទំនងគួរតែមានស្ថិរភាព និងឆ្ពោះទៅរកផ្លូវប្រកបដោយនិរន្តរភាព ប៉ុន្តែផលប្រយោជន៍របស់ចិន និង «ដែនកំណត់» របស់ខ្លួនក៏ត្រូវតែបានការពារផងដែរ។ ដំណើរទស្សនកិច្ច ដែលមន្ត្រីជាន់ខ្ពស់ក្រសួងការបរទេសអាមេរិក និយាយថាធ្វើឡើងថ្ងៃទី២៤ ដល់ទី២៦ ខែមេសានេះ នឹងជាដំណើរលើកដំបូងរបស់លោក ប្លីងខិន ទៅកាន់ប្រទេសចិន ចាប់តាំងពីខែមិថុនា នៅពេលដែលសហរដ្ឋអាមេរិក កំពុងព្យាយាមស្តារឡើងវិញនូវទំនាក់ទំនងកម្រិតខ្ពស់បន្ទាប់ពីឧប្បត្តិហេតុ «បាឡុងចារកម្ម» និងកំណើនភាពតានតឹងជុំវិញកោះតៃវ៉ាន់ ដែលធ្វើឱ្យប៉ះពាល់ដល់ទំនាក់ទំនងភាគីទាំងពីរ។ចាប់តាំងពីពេលនោះមក ភាពតានតឹងបានធូរស្រាលខ្លះ ប៉ុន្តែលោក ប្លីងខិន ត្រូវបានគេរំពឹងថានឹងលើកឡើងពីកង្វល់មួយចំនួនទាក់ទងនឹងសមុទ្រចិនខាងត្បូង សង្គ្រាមរុស្ស៊ី-អ៊ុយក្រែន និងវិបត្តិនៅមជ្ឈិមបូព៌ា ក្នុងចំណោមបញ្ហាផ្សេងៗទៀត៕

អ៊ីរ៉ង់ថ្កោលទោសការដាក់ទណ្ឌកម្មរបស់សហភាពអឺរ៉ុបថា «ខុសច្បាប់»

2024/04/24 10:38:32 am        176
Facebook Telegram Linkin
រដ្ឋមន្ត្រីការបរទេសអ៊ីរ៉ង់លោក ហ៊ូសេន អាមីរ៉ាប់ឌូឡាហៀន (Hussein Amirabdollahian) បានថ្កោលទោសការដាក់ទណ្ឌកម្មដែលបានគ្រោងទុកប្រឆាំងនឹងប្រទេសរបស់លោក ជុំវិញការវាយប្រហារដោយយានដ្រូន និងមីស៊ីលដ៏ធំលើអ៊ីស្រាអែល កាលពីដើមខែនេះថា «ខុសច្បាប់» និង «គួរឲ្យសោកស្តាយ»។លោកអាមីរ៉ាប់ឌូឡាហៀន បានសរសេរនៅលើបណ្តាញសង្គមX កាលពីថ្ងៃអង្គារថា អ៊ីរ៉ង់បានប្រើសិទ្ធិការពារខ្លួនដោយការវាយប្រហារនេះ។ លោកបានអំពាវនាវឲ្យមានការដាក់ទណ្ឌកម្មប្រឆាំងនឹងអ៊ីស្រា អែល។នៅក្នុងកិច្ចប្រជុំមួយក្នុងប្រទេសលុចសំបួ កាលពីថ្ងៃចន្ទ រដ្ឋមន្ត្រីការបរទេសនៃរដ្ឋសមាជិកសហភាពអឺរ៉ុបទាំង២៧ បានជំរុញឲ្យប្រមុខការទូតសហភាពអឺរ៉ុប លោក ចូសិប បូរ៉ែល (Josep Borrell) ដាក់សំណើជាក់ស្តែងសម្រាប់ការដាក់ទណ្ឌកម្ម។ទណ្ឌកម្មទាំងនេះ គួរតែធ្វើឲ្យវាអាចដាក់កំហិតពាណិជ្ជកម្មបន្ថែមទៀតលើប្រទេសអ៊ីរ៉ង់ ដើម្បីធ្វើឲ្យប្រទេសនេះ កាន់តែលំបាកក្នុងការស្ថាបនា និងផលិតយានដ្រូននិងមីស៊ីល។ពួកគេក៏មានផែនការដាក់ទណ្ឌកម្មលើបុគ្គល អង្គការ និងបណ្តាក្រុមហ៊ុនដែលពាក់ព័ន្ធក្នុងការផលិតយានដ្រូន និងមីស៊ីល និងការបញ្ជូនពួកវាទៅឲ្យសម្ព័ន្ធមិត្តរបស់អ៊ីរ៉ង់ នៅមជ្ឈិមបូព៌ា។ចំណាត់ការនេះ គឺដើម្បីឆ្លើយតបទៅនឹងការវាយប្រហារដោយមីស៊ីលផ្ទាល់ ដែលមិនធ្លាប់មានពីមុនមករបស់អ៊ីរ៉ង់ទៅលើអ៊ីស្រាអែល កាលពី១០ថ្ងៃមុន។ ការវាយប្រហារនេះ បានធ្វើឡើង បន្ទាប់ពីការវាយប្រហាររបស់អ៊ីស្រាអែលលើស្ថានទូតអ៊ីរ៉ង់ នៅក្នុងរដ្ឋធានីដាម៉ាសនៃប្រទេសស៊ីរី កាលពីដើមខែ។នៅក្នុងឧប្បត្តិហេតុចុងក្រោយនេះ ឧត្តមសេនីយ៍ពីរនាក់ និងសមាជិក ៧នាក់ផ្សេងទៀតនៃឆ្មាំបដិវត្តន៍ដ៏មានឥទ្ធិពល (IRGC) ស្ថិតក្នុងចំណោមអ្ន ដែលត្រូវបានសម្លាប់។

ព្រឹទ្ធសភាអាមេរិក អនុម័តកញ្ចប់ជំនួយថវិកា៩៥ ពាន់លានដុល្លារសម្រាប់អ៊ុយក្រែន អ៊ីស្រាអែល និងតៃវ៉ាន់

2024/04/24 10:24:43 am        168
Facebook Telegram Linkin
ព្រឹទ្ធសភាសហរដ្ឋអាមេរិក កាលពីថ្ងៃអង្គារទី២៣មេសា សប្ដាហ៍នេះ បានអនុម័តកញ្ចប់ថវិកាចំនួន ៩៥ពាន់លានដុល្លារដែលបានពន្យារពេលជាយូរមកហើយដោយមានការគាំទ្រពីបក្សទាំង២ បន្ទាប់ពីបក្សទាំង២ នៃវិមាន កាពីតូល បានព្យាយាមជាច្រើនខែក្នុងការបញ្ជូនជំនួយទៅអ៊ុយក្រែន អ៊ីស្រាអែល និងកោះតៃវ៉ាន់។ការបោះឆ្នោតចុងក្រោយគឺសំឡេងគាំទ្រ៧៩ទល់នឹងប្រឆាំង១៨សំឡេង។ សមាជិកគណបក្សសាធារណរដ្ឋចំនួន ១៥រូប បានបោះឆ្នោតចូលរួមជាមួយគណបក្សប្រជាធិបតេយ្យបីរូបប្រឆាំងនឹងច្បាប់នេះ។ សមាជិកគណបក្សប្រជាធិបតេយ្យចំនួន ៤៨ នាក់ និងសមាជិកគណបក្សសាធារណរដ្ឋ ៣១រូប បានបោះឆ្នោតគាំទ្រច្បាប់នេះ។ ច្បាប់បន្ទាប់នឹងបញ្ជូនទៅតុលោកប្រធានាធិបតី Joe Biden ដើម្បីចុះហត្ថលេខាឲ្យក្លាយជាច្បាប់ ដែលបាននិយាយថាលោកនឹងចុះហត្ថលេខាលើកញ្ចប់នេះនៅថ្ងៃពុធសប្ដាហ៍នេះ។ ការអនុម័តរបស់ខ្លួន គឺជាជ័យជម្នះដ៏សំខាន់មួយសម្រាប់ប្រធានាធិបតីសហរដ្ឋអាមេរិក សមាជិកសភាគណបក្សប្រជាធិបតេយ្យ និងមេដឹកនាំព្រឹទ្ធសភាគមកពីណបក្សសាធារណរដ្ឋ (GOP) លោកមីជ ម៉ាក់ខូណេល (Mitch McConnell) ដែលបានជំរុញជាយូរមកហើយដើម្បីបញ្ជូនជំនួយទៅប្រទេសអ៊ុយក្រែន ទោះបីជាក្រុមស្តាំនិយមនៃគណបក្សរបស់លោកបានព្យាយាមយ៉ាងជូរចត់ដើម្បីបង្កើនការគាំទ្រសម្រាប់ទីក្រុង Kyiv ក៏ដោយ។នៅមុនការអនុម័តចុងក្រោយ មេដឹកនាំសំឡេងភាគច្រើននៃព្រឹទ្ធសភា មកពីគណបក្សប្រជាធិបតេយ្យ លោក ឆាក់ ស៊ូម័រ (Chuck Schumer) បានចាប់ផ្តើមសុន្ទរកថាខ្លីរបស់លោកដោយប្រើពាក្យថា "ទីបំផុតៗ "ឆ្លងផុតហើយ។ លោកបាននិយាយថា យប់នេះ ប្រហែលជាលោក Vladimir Putin សោកស្ដាយនៅថ្ងៃដែលលោកសួរពីដំណោះស្រាយរបស់អាមេរិក។ កញ្ចប់នេះភ្ជាប់ជាមួយសេចក្ដីព្រាងច្បាប់ចំនួនបួនដែលសភាបានបោះឆ្នោតដោយឡែកពីគ្នានៅក្នុងសម័យប្រជុំកាលពីថ្ងៃសៅរ៍ដ៏កម្រ ដោយផ្តល់ជំនួយជិត ៦១ ពាន់លានដុល្លារសម្រាប់អ៊ុយក្រែន ជាង ២៦ ពាន់លានដុល្លារសម្រាប់អ៊ីស្រាអែល និងជាង៨ ពាន់លានដុល្លារសម្រាប់ឥណ្ឌូប៉ាស៊ីហ្វិក។ សេចក្ដីសព្រាងច្បាប់ចំនួនបីដំបូងគឺស្រដៀងទៅនឹងកញ្ចប់ថវិកាដែលព្រឹទ្ធសភាបានអនុម័តកាលពីដើមឆ្នាំនេះដែល ដើមឡើយលោកប្រធានសភា Mike Johnson បានបដិសេធមិននាំទៅអនុម័តនៅសភា។ សំណើសេចក្ដីសម្រេចលើកទី៤ បង្កើនទណ្ឌកម្ម លើទ្រព្យសម្បត្តិ រុស្ស៊ី និងមានភាសា ដែលអាចនាំឲ្យមានការដាក់បម្រាមលើបណ្ដាញសង្គម TikTok ឬ app ដែលត្រូវបានហាមប្រាមមិនឲ្យមាននៅលើ app stores របស់អាមេរិក៕

ប្អូនស្រីរបស់លោក គីម ជុងអ៊ុន៖ កូរ៉េខាងជើង នឹងកសាងអំណាចយោធាដ៏លើសលប់

2024/04/24 09:18:45 am        124
Facebook Telegram Linkin
ទីភ្នាក់ងារសារព័ត៌មាន KCNA របស់កូរ៉េខាងជើង បានរាយការណ៍នៅថ្ងៃពុធ (២៤ មេសា) នេះថា លោកស្រី គីម យូជុង (Kim Yo Jong) ដែលជាប្អូនស្រីដ៏មានឥទ្ធិពលរបស់មេដឹកនាំកូរ៉េខាងជើង លោក គីម ជុងអ៊ុន (Kim Jong Un) បាននិយាយថា ប្រទេសនេះនឹងបន្តកសាងអំណាចយោធាដ៏លើសលប់ និងដ៏រឹងមាំបំផុតដើម្បីការពារអធិបតេយ្យភាព និងសន្តិភាពក្នុងតំបន់របស់ខ្លួន។លោកស្រី គីម បាននិយាយថា សមយុទ្ធយោធាជាបន្តបន្ទាប់ដោយយោធាអាមេរិក នៅក្នុងតំបន់នៅឆ្នាំនេះ ដោយចាប់ផ្តើមពីសមយុទ្ធបាញ់គ្រាប់ពិតដែលធ្វើឡើងជាមួយ «ក្រុមយោធាអាយ៉ងកូរ៉េខាងត្បូង» កំពុងជំរុញបរិយាកាសសន្តិសុខក្នុងតំបន់ទៅជាចលាចលដ៏គ្រោះថ្នាក់។យោធាអាមេរិក និងកូរ៉េខាងត្បូង បានធ្វើសមយុទ្ធជាទ្រង់ទ្រាយធំ និងកាន់តែខ្លាំងក្នុងរយៈពេលប៉ុន្មានខែថ្មីៗនេះ ក្រោមការសន្យារបស់មេដឹកនាំប្រទេសទាំងពីរ ដើម្បីបង្កើនការត្រៀមលក្ខណៈយោធាប្រឆាំងនឹងការគំរាមកំហែងផ្នែកយោធារបស់កូរ៉េខាងជើង។យោធាកូរ៉េខាងត្បូងនិយាយថា យន្តហោះយោធាប្រហែល ១០០ គ្រឿងបានធ្វើសមយុទ្ធលើអាកាសរយៈពេលពីរសប្តាហ៍ក្នុងខែនេះ។ កូរ៉េខាងជើងនិយាយថា សមយុទ្ធយោធារបស់អាមេរិក គឺជាការត្រៀមខ្លួនសម្រាប់សង្គ្រាមនុយក្លេអ៊ែរប្រឆាំងនឹងខ្លួន ប៉ុន្តែទីក្រុងវ៉ាស៊ីនតោន និងទីក្រុងសេអ៊ូល និយាយថា សមយុទ្ធនេះគឺជាការការពារធម្មតាប៉ុណ្ណោះ ហើយធ្វើឡើងជាទៀងទាត់ដើម្បីរក្សាការត្រៀមខ្លួន៕

រដ្ឋាភិបាលសហរដ្ឋអាមេរិកប្រគល់វត្ថុបុរាណចំនួន ២៧ ដុំ ជូនរាជរដ្ឋាភិបាល និងប្រជាជនកម្ពុជា

2024/04/24 08:11:37 am        147
Facebook Telegram Linkin
ឯកឧត្តម ម៉ៅ ទិត្យារុណ ភារធារីស្តីទីកម្ពុជាប្រចាំអង្គការសហប្រជាជាតិ និងសហការីបានចូលរួមជាមួយ ឯកឧត្តម កែវ ឈា ឯកអគ្គរាជទូតកម្ពុជាប្រចាំសហរដ្ឋអាមេរិក ក្នុងពិធីចុះហត្ថលេខាលើកិច្ចព្រមព្រៀងប្រគល់-ទទួលវត្ថុបុរាណខ្មែរចំនួន ២៧ ដុំ ជូនប្រជាជនកម្ពុជា នៅការិយាល័យរដ្ឋអាជ្ញាទីក្រុងញូយ៉ក កាលពីថ្ងៃទី១៩ ខែមេសា ឆ្នាំ២០២៤ កន្លងទៅថ្មីៗនេះ។ 

អាមេរិក និងរុស្ស៊ី គ្រោងនឹងប្រឈមដាក់គ្នានៅអង្គការសហប្រជាជាតិ ជុំវិញអាវុធនុយក្លេអ៊ែរនៅលើទីអវកាស

2024/04/24 08:11:27 am        183
Facebook Telegram Linkin
សហរដ្ឋអាមេរិក និងប្រទេសរុស្ស៊ី គ្រោងនឹងប្រឈមដាក់គ្នាជុំវិញការដាក់ពង្រាយអាវុធនុយក្លេអ៊ែរនៅក្នុងទីអវកាស នៅថ្ងៃពុធសប្ដាហ៍នេះ នៅឯក្រុមប្រឹក្សាសន្តិសុខអង្គការសហប្រជាជាតិ ដែលគ្រោងនឹងបោះឆ្នោតលើសេចក្ដីសម្រេចពង្រាងរបស់សហរដ្ឋអាមេរិក ដែលកំពុងអំពាវនាវឲ្យបណ្ដាប្រទេសទាំងឡាយ ជួយទប់ស្កាត់ការរត់ប្រណាំងអាវុធនៅខាងក្រៅទីអវកាស។ ក្រុមអ្នកការទូតមួយចំនួននិយាយថា គេរំពឹងថា រុស្ស៊ី នឹងរារាំងសេចក្ដីសម្រេចព្រាងនេះ ។វិធានការរបស់សហរដ្ឋអាមេរិកនៅពេលនេះ កើតឡើង បន្ទាប់ពីខ្លួនបានចោទប្រកាន់ក្រុងមូស្គូ ពីបទអភិវឌ្ឍអាវុធនុយក្លេអ៊ែរប្រឆាំងផ្កាយរណប ដើម្បីដាក់ពង្រាយនៅក្នុងទីអវកាស ជាការចោទប្រកាន់មួយដែលរដ្ឋមន្ត្រីការពារជាតិរបស់រុស្ស៊ី បានច្រានចោលយ៉ាងដាច់អហង្ការ។លោកស្រី Linda Thomas-Greenfield ឯកអគ្គរដ្ឋទូតសហរដ្ឋអាមេរិក ប្រចាំនៅអង្គការសហប្រជាជាតិ និងឯកអគ្គរដ្ឋទូតជប៉ុនប្រចាំនៅអង្គការសហប្រជាជាតិ លោក យ៉ាម៉ាហ្សាគី កាហ្ស៊ូយូគិ (Yamazaki Kazuyuki) បាននិយាយនៅក្នុងសេចក្ដីថ្លែងការណ៍រួមគ្នាកាលពីថ្ងៃសុក្រសប្ដាហ៍មុនថា ខ្លួនកំពុងចរចាជាមួយក្រុមសមាជិកក្រុមប្រឹក្សាសន្តិសុខអង្គការសហប្រជាជាតិ លើពង្រាងសេចក្ដីសម្រេចនេះរយៈពេល៦សប្ដាហ៍ហើយ ។ពង្រាយនេះ បញ្ជាក់ពីកាតាព្វកិច្ចរបស់បណ្ដារដ្ឋ ក្នុងការយល់ស្របជាមួយសន្ធិសញ្ញាអវកាសខាងក្រៅ (Outer Space Treaty ) និងបានអំពាវនាវឲ្យប្រទេសនានា ចូលរួមយ៉ាងផុសផុលចំពោះកម្មវត្ថុនៃការប្រើប្រាស់ប្រកបដោយសន្តិភាព នៃទីអវកាសខាងក្រៅ និងការទប់ស្កាត់ការរត់ប្រណាំងអាវុធក្នុងទីអវកាសខាងក្រៅ។សន្ធិសញ្ញាស្ដីពីការប្រើប្រាស់ទីអវកាសខាងក្រៅឆ្នាំ១៩៦៧ ហាមប្រាមប្រទេសម្ចាស់ហត្ថលេខី រួមទាំងរុស្ស៊ី និងសហរដ្ឋអាមេរិក មិនឲ្យដាក់នៅក្នុងគន្លងតារាវិថីជុំវិញផែនដី រាល់វត្ថុណាមួយដែលផ្ទុកអាវុធនុយក្លេអ៊ែរ ឬ ប្រភេទអាវុធមហាប្រល័យផ្សេងទៀត៕

ភាពស្អាតនៃយុទ្ធសាស្រ្តចក្រាវិស័យបរិស្ថានបានផ្សព្វផ្សាយដល់ទីតាំងវប្បធម៌ និងធម្មជាតិ

2024/04/24 07:45:38 am        92
Facebook Telegram Linkin
ភ្នំពេញ៖ ឧកញ៉ាមហាឧបាសិកាធម្មបណ្ឌិត ញឹក ប៊ុនថា ក៏ដូចជាពុទ្ធបរិស័ទ នៃមជ្ឈមណ្ឌលវប្បធម៌ព្រះពុទ្ធសាសនាកម្ពុជា ដែលមានទីតាំងនៅក្នុងឧទ្យានជាតិព្រះសុរាម្រិតកុសមៈ «គីរីរម្យ» បានថ្លែងអំណរគុណ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន ដែលបានផ្តួចផ្តើម និងបានកសាងកន្លែងវិបស្សនាទំនើប និងមានភាពស្រស់ស្អាតជាទីផុត ហើយសាកសមនឹងកន្លែងដែលអ្នកគោរពប្រតិបត្តិយ៉ាងខ្ជាប់ខ្ជួននៃធម៌របស់ព្រះពុទ្ធព្រះបរមគ្រូនៃយើង។ នៅថ្ងៃអង្គារ ទី២៣ ខែមេសា ឆ្នាំ២០២៤ ឧកញ៉ាមហាឧបាសិកាធម្មបណ្ឌិត ញឹក ប៊ុនថា បានលើកឡើងថា កន្លែងវិបស្សនា ដែលជាអំណោយរបស់ ឯកឧត្តមរដ្ឋមន្រ្តីនាពេលនេះ បានបង្ហាញពីគុណធម៌ ដែលឯកឧត្តម បានផ្តល់ជូនមជ្ឍមណ្ឌល គឺបានជំរុញឱ្យចិត្តស្អាត បរិស្ថានស្អាត គឺមានន័យថាបរិស្ថានផ្លូវចិត្តស្អាត ដោយសារការចម្រើនសមាធិ នាំឱ្យបរិស្ថាននៅក្រៅស្អាត និងធ្វើឱ្យមានសុខុដុមរមនា ក្នុងការចម្រើនព្រះធម៌។ ឯកឧត្តមបណ្ឌិត អ៊ាង សុផល្លែត បានគាំទ្រគម្រោងរៀបចំទីតាំងធ្វើសមាធិ និងវិបស្សនា របស់មជ្ឈមណ្ឌលវប្បធម៌ព្រះពុទ្ធសាសនាកម្ពុជា នៅក្នុងតំបន់ឧទ្យានជាតិព្រះកុសុមៈគីរីរម្យ យោងតាមទស្សនៈ និងការណែនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា។ ឯកឧត្តមរដ្ឋមន្រ្តីក្រសួងបរិស្ថាន បានថ្លែងថា ការរៀបចំសាងសង់ទីកន្លែងសមាធិនេះឡើង គឺដើម្បីផ្សព្វផ្សាយ ពីមាគ៌ាព្រះពុទ្ធសាសនា វប្បធម៌ និងបង្ហាញអំពីធនធានធម្មជាតិ ផ្សារភ្ជាប់នឹងជីវិតប្រចាំថ្ងៃ ដែលប្រកបដោយធម៌សន្តោស កសាងសន្តិភាពផ្លូវចិត្តឱ្យរឹងមាំ តាមរយៈការសិក្សាធម៌វិន័យរបស់ព្រះពុទ្ធ ដែលផ្តោតសំខាន់លើភាពល្អបរិសុទ្ធ ភាពស្អាតនៃចិត្ត ស្របតាមយុទ្ធសាស្រ្តចក្រាវិស័យបរិស្ថាន ឆ្នាំ២០២៣-២០២៨។សូមបញ្ជាក់ថា កន្លែងសមាធិដ៏ទំនើបមួយនៅកម្ពុជានេះ បានរចនាឡើងតាមរចនាបទខ្មែរ តាមគំនិតច្នៃប្រឌិតនិងបង្កើតឡើងដោយឯកឧត្តមបណ្ឌិត អ៊ាង សុផល្លែត និងបានសង់ឡើងជាតង់សម្រាក តាមស្ថាបត្យកម្មខ្មែរ ដោយបានគិតគូរយ៉ាងល្អិតល្អន់ សម្រាប់កន្លែងសមាធិ បរិស្ថានជុំវិញ និងមានមុងការពារការរំខានពីសត្វល្អិត តាមរយៈភាពស្ងប់ ងាយស្រួលដល់ការស្វាធ្យាយ និងសម្អាតចិត្តឱ្យស្អាតផូរផង់ល្អ។ តាមគម្រោងកន្លែងសមាធិ នឹងត្រូវសាងសង់ចំនួន ៥០ទីតាំង ផ្សេងគ្នាជាបន្តបន្ទាប់ ដើម្បីទទួលពុទ្ធបរិស័ទ ឬភ្ញៀវទេសចរជាតិ អន្តរជាតិ ដែលអញ្ជើញមកកម្សាន្តឧទ្យានជាតិ«គីរីរម្យ» បានចូលរួមទស្សនាទេសភាពធម្មជាតិ ស្រូបយកខ្លយល់អកាសបរិសុទ្ធ ស្វែងយល់ពីវប្បធម៌ ប្រវត្តិសាស្រ្ត និងធ្វើសមាធិ សិក្សាធម៌វិន័យរបស់ព្រះពុទ្ធសាសនា ដែលជាទំនៀមទម្លាប់របស់ប្រជាពលរដ្ឋតពីដូនតា៕

យុទ្ធសាស្រ្តចក្រាវិស័យបរិស្ថានមានភាពច្បាស់លាស់ ជួយឲ្យប្រជាជនមានជីវភាពប្រសើរ និងការអភិវឌ្ឍប្រទេសថែមទៀត

2024/04/24 07:39:54 am        134
Facebook Telegram Linkin
ភ្នំពេញ៖ អនុលោមតាមយុទ្ធសាស្រ្តបញ្ចកោណ ដំណាក់កាលទី១ របស់រាជរដ្ឋាភិបាល យុទ្ធសាស្រ្តចក្រាវិស័យបរិស្ថាន ឆ្នាំ២០២៣ ២០២៨ បានដាក់ចេញ ដោយមានភាពច្បាស់លាស់ និងជួយឲ្យប្រជាជនមានជីវភាពប្រសើរ និងការអភិវឌ្ឍរបស់កម្ពុជា ឆ្ពោះទៅសម្រេចគោលដៅជាប្រទេសអព្យាក្រឹតកាបូន។ នេះជាការលើកឡើងរបស់ ឯកឧត្តម ខ្វៃ អាទិត្យា អនុរដ្ឋលេខាធិការ និងជាអ្នកនាំពាក្យក្រសួងបរិស្ថាន ក្នុងឱកាសផ្សព្វផ្សាយក្នុងអង្គប្រជុំបូកសរុបការងារត្រីមាសទី១ ឆ្នាំ២០២៤ នៃវេទិការអង្គការក្រៅរដ្ឋាភិបាល (The NGO Forum) នៅរាជធានីភ្នំពេញ នាថ្ងៃអង្គារ ទី២៣ ខែមេសា ឆ្នាំ២០២៤។ឯកឧត្តម បានលើកឡើងបន្ថែមថា យុទ្ធសាស្រ្តចក្រា ជាត្រីវិស័យ ចង្អុលបង្ហាញផ្លូវឆ្ពោះទៅ ចីរភាពនៃការអភិវឌ្ឍសង្គម-សេដ្ឋកិច្ច និងកសាងភាពធន់ទៅនឹងការប្រែប្រួលអាកាសធាតុ តាមរយៈកិច្ចសហប្រតិបត្តិការ និងការវិនិយោគ លើការអភិវឌ្ឍហេដ្ឋារចនាសម្ព័ន្ធបៃតង។ឯកឧត្តម បានគូសបញ្ជាក់ទៀតថាយុទ្ធសាស្រ្តចក្រាបានរចនាឡើងជារូបរង្វង់ ដោយមានយុទ្ធសាស្រ្តស្នូល ផ្តោតលើមុំចំនួន៣ រួមមាន៖ ពង្រឹងគោលនយោបាយ កសាងរដ្ឋបាល ឌីជីថល និងពង្រីកការផ្សព្វផ្សាយ ដែលមុំទាំងបីនេះ ជាកម្លាំងចលករដ៏សំខាន់ក្នុងការរុញបង្វិលយុទ្ធសាស្រ្ត បីផ្សេងទៀត ឱ្យដំណើរការដោយជោគជ័យ គឺយុទ្ធសាស្រ្តទី១ ភាពស្អាត ដែលផ្តោតលើមុំ គ្រប់គ្រងការបំពុល ធ្វើទំនើបកម្ម សមត្ថភាពវិនិច្ឆ័យការបំពុល និងលើកកម្ពស់ការវាយតម្លៃហេតុប៉ះពាល់បរិស្ថាន យុទ្ធសាស្រ្តទី២ ភាពបៃតង ផ្តោតលើមុំ ពង្រីកចលនាដាំដើមឈើ ជំរុញការគ្រប់គ្រងតំបន់ការពារ ធម្មជាតិ និងលើកកម្ពស់ជីវភាពសហគមន៍មូលដ្ឋាន និង យុទ្ធសាស្រ្តទី៣ ចីរភាព ផ្តោតលើមុំ ធ្វើអនុលោមភាព ពង្រីកសហប្រតិបត្តិការ និងពង្រឹងការសម្របសម្រួល។សូមបញ្ចាក់ថា ឈរលើភាពស្អាត ដោយផ្តើមចេញពីការគាំទ្ររបស់សិស្សានុសិស្ស លោកគ្រូ អ្នកគ្រូ ព្រះសង្ឃ កម្មករ កម្មការនី ប្រជាពលរដ្ឋកម្ពុជា ដៃគូអភិវឌ្ឍន៍ និងស្ថាប័នពាក់ព័ន្ធទាំងអស់ ចំនួនជាង៧លាននាក់ ដែលបានរួមចំណែកដោយបេះដូង ធ្វើឱ្យសាលារៀនស្អាត វត្តអារាមស្អាត ភូមិឋានស្អាត សហគមន៍ស្អាត និងទីក្រុងស្អាត គឺជាភាពជោគជ័យរបស់យើងទាំងអស់គ្នា។ យុទ្ធនាការនេះ បានជួយឱ្យយើងមានភាពស្អាតទាំងក្នុង និងក្រៅ ប្រៀបដូចជាភាពស្រស់ស្អាត ក្នុងការទាក់ទាញភ្ញៀវទេសចរណ៍ និងអ្នកវិនិយោគឱ្យមកប្រទេសរបស់យើង។ លើសពីភាពស្អាត ការដាំ និងស្តារព្រៃឈើ ដើម្បីភាពបៃតង នឹងរក្សាបាននូវអព្យាក្រឹតកាបូន ដែលជាចំណែកនៃការរកប្រាក់ចំណូលបន្ថែមរបស់ប្រជាសហគមន៍ នឹងជួយឱ្យមានការអភិវឌ្ឍដោយចីរភាព។ ជាមួយគ្នានេះ ឯកឧត្តមបានសំដែងការីករាយ និងស្វាគមន៍ចំពោះបណ្តាដៃគូសហការ និងអភិវឌ្ឍន៍ ចូលរួមលើអាទិភាពការងាររបស់ក្រសួងបរិស្ថាន ឆ្លើយតបយុទ្ធសាស្រ្តចក្រា ដែលបានដាក់ចេញ ជាពិសេសគ្រប់គម្រោងអភិវឌ្ឍន៍ ដែលបានគាំទ្រ ដល់ការលើកស្ទួយជីវភាពប្រជាពលរដ្ឋ នៅតាមសហគមន៍ ដើម្បីទទួលបានភាពជោគជ័យជាមួយគ្នា ឆ្ពោះទៅគោលដៅសម្រេចបានកម្ពុជាជាប្រទេសអព្យាក្រឹតកាបូន និងមានគម្របព្រៃ៦០% នៅឆ្នាំ២០៥០៕

ឯកឧត្តមប្រធានរដ្ឋឡាវ ប្តេជ្ញាពង្រឹង និងពង្រីកកិច្ចសហប្រតិបត្តិការរវាងឡាវ-កម្ពុជា ដើម្បីផលប្រយោជន៍ប្រជាជន និងប្រទេសទាំងពីរ

2024/04/24 07:22:54 am        127
Facebook Telegram Linkin
នារសៀលថ្ងៃទី២៣ ខែមេសា ឆ្នាំ២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញជួប ឯកឧត្តម ថងលុន ស៊ីសុលីត (Thongloun Sisoulith) ប្រធានរដ្ឋ នៃសាធារណរដ្ឋប្រជាធិបតេយ្យប្រជាមានិតឡាវ និងគណៈប្រតិភូ ដើម្បីពិភាក្សាការងារនៅវិមានសន្តិភាព។ក្នុងឱកាសនៃជំនួប ឯកឧត្តមប្រធានរដ្ឋ ថងលុន ស៊ីសុលីត បានថ្លែងអំណរគុណចំពោះ សម្តេចធិបតី ដែលបានឆ្លៀតពេលវេលាដ៏មមាញឹកទទួលជំនួបពិភាក្សាការងារ ព្រមទាំងបានវាយតម្លៃខ្ពស់ចំពោះទំនាក់ទំនងឡាវ-កម្ពុជា ជាពិសេសចំពោះការរៀបចំផ្លាស់ប្ដូរថ្នាក់ដឹកនាំនៅក្នុងប្រទេសកម្ពុជាពីជំនាន់មុន មកជំនាន់ថ្មី ដែលបានដំណើរការយ៉ាងរលូន និងប្រកបដោយលទ្ធផលល្អប្រសើរ។ ជាមួយគ្នានេះ ឯកឧត្តមប្រធានរដ្ឋ បានកត់សម្គាល់ឃើញថា ក្នុងរយៈពេលនៃការដឹកនាំរបស់សម្ដេចធិបតី ប្រមាណ៨ខែមកនេះ កម្ពុជាមានស្ថិរភាពនយោបាយ និងកំពុងបោះជំហានទៅមុខ ទាំងទិដ្ឋភាពសន្តិសុខ សន្តិភាព កំណើនសេដ្ឋកិច្ច និង ទាំងការកែលម្អជីវភាពរស់នៅរបស់ប្រជាពលរដ្ឋ។ បន្ថែមលើនេះ ឯកឧត្តមប្រធានរដ្ឋ ក៏បានថ្លែងអំណរគុណចំពោះភាគីកម្ពុជា ដែលបានជួយគាំទ្រដល់ភាគីឡាវ ជាប្រធានអាស៊ានប្តូរវេនក្នុងឆ្នាំ២០២៤ ដោយឡាវនឹងខិតខំរៀនសូត្រពីជោគជ័យរបស់កម្ពុជា ដែលបានដឹកនាំជាប្រធានអាស៊ាននៅឆ្នាំ២០២២។ ប្រទេសឡាវក៏នឹងរង់ចាំទទួលស្វាគមន៍ជានិច្ចចំពោះវត្តមានដ៏ខ្ពង់ខ្ពស់របស់សម្ដេចធិបតី នៅប្រទេសឡាវនាពេលខាងមុខ ជាពិសេសក្នុងខណ:នៃការអញ្ជើញមកចូលរួមកិច្ចប្រជុំកំពូលអាស៊ាន របស់សម្តេចធិបតី នៅក្នុងខែតុលា ឆ្នាំ២០២៤ ខាងមុខ។ជាការឆ្លើយតប សម្ដេចធិបតី បានថ្លែងអំណរគុណចំពោះប្រទេសឡាវ ដែលតែងតែចាត់ទុកកម្ពុជាជាមិត្តដ៏ល្អ ជាអ្នកជិតខាងដ៏ប្រពៃ ជាមួយនឹងមិត្តភាព និងសាមគ្គីភាពជាប្រពៃណី និងខិតខំបន្តពង្រឹង និងពង្រីកទំនាក់ទំនងនេះឱ្យកាន់តែរីកចម្រើន និងទទួលបានលទ្ធផលផ្លែផ្កាថែមទៀតក្នុងក្របខ័ណ្ឌ នៃកិច្ចសហប្រតិបត្តិការទ្វេភាគី លើវិស័យសំខាន់ៗមួយចំនួន រួមមាន៖ វិស័យថាមពល ការតភ្ជាប់ កិច្ចការព្រំដែន ការប្រយុទ្ធប្រឆាំងនឹងឧក្រិដ្ឋកម្មឆ្លងដែន កិច្ចការការពារជាតិ និងសន្តិសុខ ក៏ដូចជាទំនាក់ទំនងរវាងប្រជាជន និងប្រជាជននៃប្រទេសទាំងពីរ។ ពាក់ព័ន្ធនឹងវិស័យថាមពល សម្តេចធិបតី បានគូសបញ្ជាក់ថា វិស័យថាមពល មានសារៈសំខាន់សម្រាប់ប្រទេសកម្ពុជា ជាពិសេសដើម្បីធានាឱ្យបាននូវសន្តិសុខថាមពល និងធានាបាននូវភាពប្រកួតប្រជែងរបស់កម្ពុជានៅក្នុងតំបន់ និងពិភពលោក ហើយសម្តេចធិបតី ក៏បានស្នើឱ្យភាគីឡាវពិចារណា និងរិះរកដំណោះស្រាយសមស្របនានា ដើម្បីធ្វើយ៉ាងណាអាចធានាបាននូវការផ្គត់ផ្គង់អគ្គិសនីមកកម្ពុជាប្រកបដោយនិរន្តរភាព និងទាន់ពេល។ ចំពោះកិច្ចការព្រំដែន ឯកឧត្តមប្រធានរដ្ឋឡាវ ក៏បានបញ្ជាក់ជូនសម្តេចធិបតីថា ប្រទេសឡាវត្រៀមខ្លួនជាស្រេចក្នុងការដោះស្រាយជាមួយកម្ពុជា ដោយឈរលើសទ្ធិសញ្ញាកំណត់ព្រំដែនរដ្ឋកម្ពុជា-ឡាវ ឆ្នាំ២០២៣ ដែលបានចូលជាធរមាន។ចំពោះមុខសម្តេចធិបតី ឯកឧត្តមប្រធានរដ្ឋបានគូសបញ្ជាក់ថា ទោះបីជាមានបញ្ហាប្រឈមនានា ដែលកើតមានឡើងក្នុងតំបន់ និងពិភពលោកយ៉ាងណាក៏ដោយ ក៏ប្រទេសឡាវនឹងបន្តប្តេជ្ញារក្សាទំនាក់ទំនងដ៏ល្អរវាងឡាវ-កម្ពុជា និងខិតខំរកដំណោះស្រាយ ក្នុងគោលដៅបន្តចំណងមិត្តភាព សាមគ្គីភាពដ៏ស្អិតរមួត និងយូរអង្វែង ព្រមទាំងជំរុញបន្ថែមទៀតដល់ការលើកកម្ពស់កម្រិតទំនាក់ទំនងទ្វេភាគី ដែលនឹងនាំមកនូវផលប្រយោជន៍រួមជូនប្រជាជន និងប្រទេសទាំងពីរ។ជាទីបញ្ចប់ សម្ដេចធិបតី ក៏បានថ្លែងអំណរគុណ និងជូនពរមហាប្រសើរដល់ឯកឧត្ដមប្រធានរដ្ឋ និងគណៈប្រតិភូ ជាមួយនឹងការស្វាគមន៍ និងបដិសណ្ឋារកិច្ចដ៏កក់ក្តៅ ក្នុងដំណើរបំពេញទស្សនកិច្ចផ្លូវរដ្ឋនៅព្រះរាជាណាចក្រកម្ពុជា ៕

បណ្តុំអង្គការសង្គមស៊ីវិលប្រកាសថ្កោលទោសចំពោះសកម្មភាពរបស់គណបក្សកម្លាំងជាតិដែលបង្ករភាពវឹកវរដោយចេតនាចំពោះជាតិ

2024/04/23 05:31:49 pm        296
Facebook Telegram Linkin
ភ្នំពេញ៖បណ្តុំអង្គការសង្គមស៊ីវិល នៅរសៀលថ្ងៃទី២៣ ខែមេសា ឆ្នាំ ២០២៤នេះ បាន​ចេញសេចក្ដីថ្លែងការណ៍ ប្រកាសថ្កោលទោស ចំពោះសកម្មភាពរបស់ គណបក្សកម្លាំងជាតិ ដែលបង្ករភាពវឹកវរ ដោយចេតនា។ក្រុមយុវជន​បានលើកឡើងថា ពួកគេធ្លាប់ឃើញសកម្មភាព និងមានបទពិសោធន៍នៃការបង្ករភាពវឹកវរដល់សង្គមជាតិ របស់ក្រុមជ្រុលនិយមនាពេលកន្លងមក។ ការរៀបចំយុទ្ធសាស្រ្តបំបែកកបំបាក់កម្លាំងសាមគ្គីភាព ដែលប្រទេសកម្ពុជាកំពុងតែមានសេចក្តីសុខក្សេមក្សាន្ត​ និងការអភិវឌ្ឍន៍យ៉ាងឆាប់រហ័ស។ សេចក្ដីថ្លែងការណ៍ ប្រកាសថ្កោលទោសរបស់ក្រុមយុវជន​បានលើកឡើងថា ជាការពិតណាស់ការដឹកនាំប្រទេសដើម្បីឱ្យមានការអភិវឌ្ឍន៍ និងជឿនលឿន តែងតែមានការពង្រឹងការអនុវត្តច្បាប់     ជនណាដែលបង្កររឿងផ្ទុយនឹងច្បាប់គួរតែទុកឱ្យច្បាប់ជាកំណត់។ បើការរស់នៅក្នុងប្រទេសដែលគ្មានច្បាប់ ជនបំពានច្បាប់ចេះតែកើតមាន តើយើងអាចបើកភ្នែកមើលប្រទេសជាតិរបស់ខ្លួនក្នុងភាពវឹកវរបានដែលឬទេ? ប្រទេសកម្ពុជាធ្លាប់ឆ្លងកាត់ការឈ្លានពានពីបរទេសដោយការសាបព្រោះមនោគមន៍វិជ្ជានយោបាយខ្មៅកខ្វក់ លាប់ពណ៌ ញុះញង់ បំបែកបំបាក់ រហូតដល់កម្ពុជាសឹងបាត់បង់ប្រទេសទាំងមូល តើប្រជាពលរដ្ឋខ្មែរគ្រប់រូបនៅចាំបានទេ?ក្រុមយុវជនបានរម្លឹកថា កម្ពុជាត្រូវបានចាប់ផ្តើមកសាងឡើងវិញចាប់ពីបាតដៃទទេ រហូតមានការរីកចម្រើនលើគ្រប់វិស័យ ការបូជាសាច់ស្រស់ឈាមស្រស់ របស់ប្រមុខថា្នក់ដឹកនាំ ដើម្បីតែបុព្វហេតុជាតិ និងបូរណភាពទឹកដី និងអធិបតេយ្យភាពពេញលេញ។ បច្ចុប្បន្នកម្ពុជា ក្លាយជាប្រទេសស្មើមុខស្មើមាត់នៅលើសាកលលោក និងមានការអភិវឌ្ឍន៍ជឿនលឿនឆាប់រហ័សជាងគេបំផុតនៅក្នុងតំបន់។ក្រុមយុវជនមើលឃើញថា ការសម្ដែងការមិនពេញចិត្តជាមួយនឹងភាពរីកចម្រើនរបស់ប្រទេសជាតិខ្លួន និងការប្រឆាំងទៅលើចំណាត់ការរបស់   តុលាការ ដើម្បីរក្សាសុខសន្តិភាពរបស់ប្រទេសជាតិគឺជាទង្វើរក្បត់ជាតិកំណើតខ្លួន។ ក្នុងនាមយើងខ្ញុំជាថ្នាក់ដឹកនាំបណ្តុំអង្គការសង្គមស៊ីវិល សូមថ្កោលទោស និងប្រឆាំងយ៉ាងដាច់អហង្ការ ចំពោះទង្វើលដល់គឃ្លើញរបស់គណបក្សនយោបាយដែលមានឈាមជាខ្មែរ តែទទួលមនោគមពីក្រៅប្រទេសចង់បំផ្លាញ់ សុខសន្តិភាព និងការអភិឌ្ឍន៍របស់សង្គមជាតិខ្មែរបច្ចុប្បន្ន។ទោះក្នុងរូបភាព និងតម្លៃណាក៏ដោយក្នុងនាមជាជាតិសាសន៍ខ្មែរ គួរតែគិតគូរពី សន្តិភាព ឯករាជ្យ អធិបតេយ្យ និង​បូរណភាពទឹកដី របស់ជាតិខ្លួនទាំងអស់គ្នា។ យ៉ាងណាមិញរាល់សកម្មភាពទាំងឡាយណាដែលបានបង្ករ និងប៉ះពាល់ដល់ការពារសន្ដិសុខជាតិ សណ្ដាប់ធ្នាប់សង្គម យើងត្រូវរួមគ្នាដាច់ខាតកម្ចាត់នយោបាយជ្រុលនិយមឱ្យចេញផុតពីកម្ពុជា​។ តាមរយៈសេចក្ដីថ្លែងការ បណ្តុំអង្គការសង្គមស៊ីវិល បានអំពាវនាវដល់ប្រជាជនខ្មែរគ្រប់រូប គួរគិតគូរពីមនសិកាជាតិនិយម ឈប់ចាញ់កលមនោគមវិជ្ជាខ្មៅកខ្វក់ របស់ក្រុមនយោបាយក្រុមជ្រុលនិយមក្រៅប្រទេស។ សូមកុំចូលរួមជាមួយនូវសកម្មភាពដែលបង្ហាញពីភាពបែកបាក់សាមគ្គី តាមការញុះញង់របស់ក្រុមនយោបាយជ្រុលនិយមមួយចំនួនតូច ដែលមានចេតនាចង់បង្ករភាពវឹកវរដល់សង្គមជាតិខ្លួនឱ្យសោះ។ យើងខ្ញុំសង្ឃឹមនិងជឿរជាក់ថា បេះដូងនៃបុព្វបុរសខ្មែរគ្រប់ជំនាន់ពិតជាបានដាស់តឿនប្រជាពលរដ្ឋខ្មែរគ្រប់រូបកុំឱ្យដើរជាន់ដានចាស់ដែលធ្វើឱ្យខ្មែរមានការឈឺចាប់តទៅទៀតទេ។ ខ្មែរត្រូវតែរឹងមាំទាំងកម្លាំកាយនិងប្រាជ្ញាស្មារតី រួមគ្នាលុបបំបាត់នយោបាយខ្មៅកខ្វក់ជ្រុលនិយមឲ្យចេញផុតពីកម្ពុជាចាប់ពីពេលនេះតទៅ៕ 

បណ្ដាញសង្គម

ព័ត៌មានថ្មីៗ

រដ្ឋមន្ត្រីកសិកម្មកម្ពុជា ជូនដំណើរ រដ្ឋមន្ត្រីកសិកម្មហ្វីលីពីន បំពេញទស្សនកិច្ច សហគមន៍កសិកម្មទំនើប
09/09/2025 09:09 PM
Facebook Telegram Linkin
សម្តេចតេជោ ហ៊ុន សែន បញ្ជាក់ថា បញ្ហាជម្លោះព្រំដែនកម្ពុជាថៃ ជាជម្លោះរវាងប្រទេស និងប្រទេស មិនមែនជម្លោះព្រំដីរវាងប្រជាជននិងប្រជាជនទេ សូមមើលអោយទូលាយបន្តិច
09/09/2025 09:09 PM
Facebook Telegram Linkin
កម្ពុជា នឹងធ្វើជាម្ចាស់រៀបចំកិច្ចប្រជុំថ្នាក់រដ្ឋមន្ត្រីអាស៊ាន ស្តីពីការគ្រប់គ្រងគ្រោះមហន្តរាយ លើកទី១៣ (13th AMMDM)
09/09/2025 08:09 PM
Facebook Telegram Linkin
សេចក្តីព្រាងរបាយការណ៍ យន្តការវេទិការាជរដ្ឋាភិបាល-ផ្នែកឯកជន គ្រោងដាក់ជូន ទីស្តីការគណៈរដ្ឋមន្ត្រី នាពេលឆាប់ខាងមុខ
09/09/2025 08:09 PM
Facebook Telegram Linkin
ឯកឧត្តម ហ៊ុន ម៉ានី អំពាវនាវជនរួមជាតិ បន្តជឿជាក់រាជរដ្ឋាភិបាលលើការដោះស្រាយរឿងព្រំដែន និងវីរកងទ័ព
09/09/2025 08:09 PM
Facebook Telegram Linkin
រដ្ឋមន្ត្រីសុខាភិបាល ជំរុញមន្រ្តីរំលឹកដល់សហភាតរៈ កំពុងបម្រើសេវាសុខាភិបាល ក្នុងវិស័យឯកជន ឱ្យចូលរួមជាមួយសេវាសាធារណៈ ក្នុងការលើកកំពស់គុណភាពសេវាថែទាំ និងព្យាបាលឱ្យបានជាប្រយោជន៍ច្រើនបំផុតដល់ប្រជាជនកម្ពុជា
09/09/2025 08:09 PM
Facebook Telegram Linkin
អេស្ប៉ាញដាក់ទណ្ឌកម្មលើរដ្ឋមន្ត្រីស្តាំនិយមជ្រុលរបស់អ៊ីស្រាអែល ២រូប
09/09/2025 08:09 PM
Facebook Telegram Linkin
ប្រធានាធិបតី៖ រុស្សីកំពុងប្រឹងប្រែង «មានឥទ្ធិពល» លើម៉ុលដាវី អំឡុងការបោះឆ្នោតដ៏សំខាន់
09/09/2025 07:09 PM
Facebook Telegram Linkin
អេត្យូពីបើកសម្ពោធន៍ឲ្យប្រើប្រាស់ទំនប់វារីអគ្គិសនីធំបំផុតប្រចាំនៅអាហ្វ្រិក
09/09/2025 07:09 PM
Facebook Telegram Linkin
ប្រជាពលរដ្ឋរត់គេចខ្លួនស៊ូដង់រៀបរាប់ពីការឡោមព័ទ្ធទីក្រុង al-Fashirពីសំណាក់កងកម្លាំង RSF
09/09/2025 07:09 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.