នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ប្រជាពលរដ្ឋត្រេកអរនឹងសមិទ្ធផលអាកាសយានដ្ឋានថ្មីដែលត្រៀមបើកដំណើរការ
ពុទ្ធបដិមាធ្វើអំពីស្ពាន់ទម្ងន់៩តោន ត្រៀមធ្វើពុទ្ធាភិសេកនៅរសៀលថ្ងៃនេះ
សម្ដេចធិបតីបញ្ជាក់ជាថ្មីទៅប្រធានអាស៊ានប្តូរវេនចំពោះការប្ដេជ្ញាចិត្តរបស់កម្ពុជាលើការដោះស្រាយបញ្ហាជម្លោះព្រំដែនទាំងអស់ជាមួយប្រទេសជិតខាងដោយសន្តិភាព និងច្បាប់អន្តរជាតិ
គណៈកម្មាធិការអន្តរក្រសួងចុះពិនិត្យ និងវាយតម្លៃការស្ថាបនាផ្លូវក្រួសក្រហម១ខ្សែ ក្នុង​ស្រុកបាកាន ខេត្តពោធិ៍សាត់

នយោបាយ​ និង ការអភិវឌ្ឍន៍

សហភាពអឺរ៉ុប គំរាមផ្អាកមុខងាររង្វាន់របស់កម្មវិធីវីដេអូខ្លី TikTok Lite

2024/04/23 11:57:55 am        146
Facebook Telegram Linkin
សហភាពអឺរ៉ុប បានចាប់ផ្តើមការស៊ើបអង្កេតលើកម្មវិធីវីដេអូខ្លីមួយរបស់ ទីកតុក (TikTok) ឈ្មោះថា ទីកតុក ឡៃត៍ (TikTok Lite) ហើយបានគំរាមផ្អាកមុខងារ ដែលផ្តល់រង្វាន់ដល់អ្នកប្រើប្រាស់សម្រាប់ការមើល និងចុចប៊ូតុងចូលចិត្តលើវីដេអូ «ព្រោះធ្វើឱ្យអ្នកប្រើប្រាស់ញៀននឹងលេងអេបនេះ» ស្របពេលមានការព្រួយបារម្ភអំពីសុវត្ថិភាពកុមារ។អេប TikTok Lite បានទៅដល់ប្រទេសបារាំង និងអេស្ប៉ាញ ក្នុងខែមីនា ដែលអនុញ្ញាតឱ្យអ្នកប្រើប្រាស់ដែលមានអាយុចាប់ពី ១៨ ឆ្នាំឡើងទៅ ទទួលបានពិន្ទុដែលអាចប្តូរជាទំនិញ ដូចជាប័ណ្ណ ឬកាតចាប់រង្វាន់តាមរយៈមុខងាររង្វាន់របស់កម្មវិធីនេះ។ គណៈកម្មការអឺរ៉ុបបាននិយាយនៅក្នុងសេចក្តីថ្លែងការណ៍មួយកាលពីថ្ងៃចន្ទថា ខ្លួនមានការព្រួយបារម្ភអំពី «ហានិភ័យនៃការខូចខាតធ្ងន់ធ្ងរសម្រាប់សុខភាពផ្លូវចិត្តរបស់អ្នកប្រើប្រាស់» របស់អេបនេះ រួមទាំងអនីតិជនផងដែរ។អេប TikTok Lite គឺជាកំណែតូច ឬជាបណ្ដាញរបស់កម្មវិធី TikTok ដ៏ពេញនិយម ដោយប្រើអង្គចងចាំតិចជាងមុននៅក្នុងស្មាតហ្វូន និងដំណើរការបានល្អទោះជាអ៊ីនធឺណិតយឺតក៏ដោយ។ គណៈកម្មការអឺរ៉ុបនិយាយថា TikTok កាលពីសប្តាហ៍មុនបានបរាជ័យក្នុងការផ្តល់នូវការវាយតម្លៃហានិភ័យត្រឹមថ្ងៃផុតកំណត់ទី១៨ ខែមេសា ដោយទាមទារឱ្យក្រុមហ៊ុនផ្តល់របាយកាណ៍ត្រឹមថ្ងៃអង្គារ (២៣ មេសា) នេះ។គណកម្មការកំពុងគំរាមដាក់វិធានការបណ្ដោះអាសន្នរួមទាំងការផ្អាកមុខងារផ្តល់រង្វាន់ក្នុងសហភាពអឺរ៉ុប «ដោយរង់ចាំការវាយតម្លៃសុវត្ថិភាពរបស់ខ្លួន»។ TikTok ដែលជាកម្មសិទ្ធិរបស់ក្រុមហ៊ុន បៃឌែនត៍ (ByteDance) របស់ប្រទេសចិន មានពេលរហូតដល់ថ្ងៃពុធ ដើម្បីដាក់ការការពារជាផ្លូវការប្រឆាំងនឹងវិធានការបែបនេះ៕

លោក Blinken បដិសេធស្តង់ដារពីររបស់សហរដ្ឋអាមេរិក ជុំវិញការរំលោភសិទ្ធិរបស់អ៊ីស្រាអែល

2024/04/23 11:54:45 am        232
Facebook Telegram Linkin
រដ្ឋមន្ត្រីការបរទេសអាមេរិក លោក អាន់តូនី ប្លីងខិន (Antony Blinken) កាលពីថ្ងៃចន្ទ (២២ មេសា) បានច្រានចោលការលើកឡើងដែលថា ទីក្រុង វ៉ាស៊ីនតោន អាចមាន «ស្តង់ដារពីរ» នៅពេលអនុវត្តច្បាប់របស់សហរដ្ឋអាមេរិក លើការចោទប្រកាន់ពីបទរំលោភបំពានដោយយោធាអ៊ីស្រាអែល នៅតំបន់ហ្កាហ្សា ហើយនិយាយថា ការពិនិត្យលើការចោទប្រកាន់បែបនេះកំពុងបន្ត។លោក ប្លីងខិន បាននិយាយក្នុងសន្និសីទសារព័ត៌មានមួយថា «អាមេរិក ពុំមានស្តង់ដារពីរទេ ហើយជាទូទៅដូចដែលយើងកំពុងឃ្លាំមើលស្ថានភាពសិទ្ធិមនុស្សជុំវិញពិភពលោក យើងអនុវត្តស្តង់ដារដូចគ្នាចំពោះអ្នកគ្រប់គ្នា មិនថាប្រទេសនោះជាសត្រូវ គូប្រជែង មិត្ត ឬសម្ព័ន្ធមិត្តនោះទេ»។ការប្រព្រឹត្តផ្នែកយោធារបស់អ៊ីស្រាអែល បានស្ថិតនៅក្រោមការត្រួតពិនិត្យកាន់តែខ្លាំងឡើង ខណៈកងកម្លាំងរបស់ខ្លួនបានសម្លាប់ជនជាតិប៉ាឡេស្ទីនជាង ៣៤.០០០ នាក់នៅហ្កាហ្សា ដែលភាគច្រើនជាជនស៊ីវិល និងកុមារ។ តំបន់ហ្កាហ្សាស្ទ្រីប ត្រូវបានបំផ្លាញទៅជាវាលរហោស្ថាន ហើយកង្វះខាតស្បៀងអាហារយ៉ាងខ្លាំងបានជំរុញឱ្យមានការភ័យខ្លាចថាមានទុរ្ភិក្ស។ក្រុមសិទ្ធិមនុស្ស លើកឡើងថាមានឧប្បត្តិហេតុជាច្រើននៃការបង្កគ្រោះថ្នាក់ដល់ជនស៊ីវិលក្នុងពេលការវាយលុករបស់កងទ័ពអ៊ីស្រាអែល នៅហ្កាហ្សា ក៏ដូចជាបានព្រមានពីកំណើននៃអំពើហិង្សានៅតំបន់កាន់កាប់ វេសបែង (West Bank) ប៉ុន្តែរហូតមកដល់ពេលនេះ រដ្ឋបាលលោកប្រធានាធិបតី ចូ បៃដិន និយាយថា ខ្លួនមិនបានរកឃើញថាអ៊ីស្រាអែលបំពានច្បាប់អន្តរជាតិទេ៕

ប្រព័ន្ធផ្សព្វផ្សាយរដ្ឋ៖ កូរ៉េខាងជើង ធ្វើសមយុទ្ធប្រឆាំងនុយក្លេអ៊ែរជាលើកដំបូង

2024/04/23 11:49:08 am        250
Facebook Telegram Linkin
ទីភ្នាក់ងារសារព័ត៌មានរដ្ឋ KCNA បាននិយាយនៅថ្ងៃអង្គារ (២៣ មេសា) នេះថា ប្រទេសកូរ៉េខាងជើង បានធ្វើសមយុទ្ធប្រឆាំងនុយក្លេអ៊ែរជាលើកដំបូងរបស់ខ្លួន ក្នុងការនិមិត្តបើកប្រព័ន្ធគ្រប់គ្រង «បញ្ចេញនុយក្លេអ៊ែរ» ដែលដឹកនាំដោយមេដឹកនាំ លោក គីម ជុងអ៊ុន (Kim Jong Un) ដើម្បីជាការព្រមានយ៉ាងច្បាស់ដល់សត្រូវរបស់ខ្លួន។យោធាកូរ៉េខាងត្បូងបាននិយាយថា កូរ៉េខាងជើងបានបាញ់មីស៊ីលបាលិស្ទិករយៈចម្ងាយខ្លីជាច្រើនគ្រាប់កាលពីថ្ងៃចន្ទ ឆ្ពោះទៅកាន់សមុទ្រ ពីឆ្នេរសមុទ្រភាគខាងកើតរបស់ខ្លួន។KCNA រាយការណ៍ថា ជាផ្នែកមួយនៃការសាកល្បងប្រព័ន្ធគ្រប់គ្រងនុយក្លេអ៊ែរទូទាំងប្រទេស ដែលឈ្មោះថា «បញ្ចេញនុយក្លេអ៊ែរ» កងកម្លាំងកាំភ្លើងធំរបស់ខ្លួនបានចូលរួមក្នុងសមយុទ្ធបែបនេះជាលើកដំបូង កាលពីថ្ងៃចន្ទ ក្នុងការបង្ហាញពីសមត្ថភាពនុយក្លេអ៊ែរចម្រុះ និងការតវ៉ាប្រឆាំងនឹងសមយុទ្ធយោធា «បង្កហេតុ និងឈ្លានពាន» របស់សហរដ្ឋអាមេរិក និងកូរ៉េខាងត្បូង។យោងតាម KCNA បានឱ្យដឹងថា លោក គីម បានត្រួតពិនិត្យសមយុទ្ធនិមិត្តនេះដែលពាក់ព័ន្ធនឹងការធ្វើសមយុទ្ធកងទ័ពនៅក្នុងឥរិយាបថប្រឆាំងនុយក្លេអ៊ែរ និងការបាញ់កាំភ្លើងធំផ្ទុកក្បាលគ្រាប់នុយក្លេអ៊ែរ នៅក្នុងករណីដែលការជូនដំណឹងអំពីវិបត្តិនុយក្លេអ៊ែរត្រូវបានដាក់ចេញ។ ជាមួយគ្នានេះ រដ្ឋផ្តាច់ខ្លួនមួយនេះ ត្រូវបានគេជឿថា កំពុងរៀបចំបាញ់បង្ហោះផ្កាយរណបចារកម្មមួយផ្សេងទៀត បន្ទាប់ពីទទួលបានជោគជ័យក្នុងការដាក់ផ្កាយរណបឈ្លបយកការណ៍នៅក្នុងគន្លងគោចរកាលពីខែវិច្ឆិកា៕

ប្រមុខរដ្ឋឡាវចាប់ផ្តើមបំពេញទស្សនកិច្ចផ្លូវរដ្ឋនៅកម្ពុជាតបតាមការអញ្ជើញរបស់ព្រះមហាក្សត្រ

2024/04/23 11:33:25 am        152
Facebook Telegram Linkin
ប្រមុខរដ្ឋ នៃសាធារណរដ្ឋប្រជាមានិតឡាវ ឯកឧត្តម ថងលុន ស៊ីសុលីត និងលោកជំទាវទី១ ចាប់​ផ្តើម​អញ្ជើញ​បំពេញទស្សនកិច្ចផ្លូវរដ្ឋនៅកម្ពុជា រយៈពេលពីរថ្ងៃ គឺចាប់ពីថ្ងៃទី២៣ ដល់ថ្ងៃទី២៤ ខែមេសា ឆ្នាំ២០២៤ ដែលទស្សនកិច្ចនេះធ្វើឡើងតបតាមការអញ្ជើញរបស់ព្រះករុណាព្រះបាទ សម្តេច​ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា។ជាក់ស្តែង ការចាប់ផ្តើមបំពេញទស្សនកិច្ចផ្លូវរដ្ឋរបស់ប្រមុខរដ្ឋឡាវ ឯកឧត្តម ថងលុន ស៊ីសុលីត និង​លោកជំទាវទី១ ដែលបានអញ្ជើញដល់កម្ពុជានៅថ្ងៃនេះ បានទទួល​បដិសណ្ឋាកិច្ច​ស្វាគមន៍​ពី​សំណាក់​ឯកឧត្តម គុយ សុផល ឧត្តមប្រឹក្សាផ្ទាល់ព្រះមហាក្សត្រ និងជាទេសរដ្ឋមន្រ្តី​ទទួល​បន្ទុក​កិច្ច​ការទូទៅអមក្រសួងព្រះបរមរាជវាំង និងឯកឧត្តម ចាយ បូរិន រដ្ឋមន្រ្តីក្រសួងធម្មការ និង​សាសនា ក៏ដូចជាមហាជននៃប្រទេសទាំងពីរ នៅអាកាសយានដ្ឋានអន្តរជាតិភ្នំពេញ។ បន្ទាប់​ពីអញ្ជើញដល់ប្រទេសកម្ពុជា ប្រមុខរដ្ឋឡាវ និងលោកជំទាវទី១ បានអញ្ជើញ​ក្រាប​បង្គំ​គាល់​ និងទទួលជួបសវនាការក្រោមព្រះរាជវត្តមានដ៏ខ្ពង់ខ្ពស់របស់ព្រះករុណព្រះបាទ សម្តេច​ព្រះ​បរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជានៅព្រះបរមរាជវាំង។ ក្រៅ​ពី​នោះ​ឯកឧត្តម ថងលុន ស៊ីសុលីត បានបន្តអញ្ជើញដាក់កម្រងផ្កានៅវិមានឯករាជ្យ និង​ដាក់​កម្រង​ផ្កា គោរពព្រះវិញ្ញាណក្ខន្ធ ព្រះបរមរូបព្រះបរមរតនកោដ្ឋផងដែរ។ការបំពេញទស្សនកិច្ចផ្លូវរដ្ឋរបស់ ឯកឧត្តម ថងលុន ស៊ីសុលីត ប្រធារដ្ឋឡាវ និងលោកជំទាវទី១ គឺ​ជា​ទស្សន​កិច្ច លើកទី១ សម្រាប់ឆ្នាំ២០២៤ ខណៈមុនការបំពេញ​ទស្សនកិច្ច​ផ្លូវ​រដ្ឋ​របស់​ប្រមុ​ខរដ្ឋឡាវ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី បានដឹកនាំ​គណៈប្រតិភូទៅ​កាន់​ប្រទេស​ឡាវ និងបានជួបសម្តែងការគួរសមជាមួយប្រមុខរដ្ឋឡាវ កាលពីអំឡុងពីខែមីនា ឆ្នាំ​២០២៤។ សូមជម្រាបថា កម្ពុជា-ឡាវ បានបង្កើតទំនាក់ទំនងការទូតជាផ្លូវការនៅថ្ងៃទី១៥ ខែមិថុនា ឆ្នាំ​១៩៥៦ ដែលទំនាក់ទំនងប្រទេសទាំងពីរត្រូវបានលើកកម្ពស់ជាដៃគូយុទ្ធសាស្ត្រគ្រប់ជ្រុងជ្រោយ និង​យូរ​អង្វែង៕ អត្ថបទ សេក ឧត្តម 

ចិនប្រកាន់យកជំហរដ៏តឹងរ៉ឹងលើកោះតៃវ៉ាន់ និងជម្លោះផ្សេងទៀតនៅឯការប្រមូលផ្តុំកងទ័ពជើងទឹកអន្តរជាតិ

2024/04/23 10:37:14 am        155
Facebook Telegram Linkin
មេដឹកនាំយោធាជាន់ខ្ពស់មួយរូបរបស់ប្រទេសចិនបានប្រកាន់ជំហរដ៏តឹងរ៉ឹងលើជម្លោះទឹកដីក្នុងតំបន់ ដោយប្រាប់ព្រឹត្តិការណ៍ប្រមូលផ្តុំកងទ័ពជើងទឹកអន្តរជាតិនៅភាគឦសានប្រទេសចិនកាលពីថ្ងៃចន្ទទី២២មេសាសប្ដាហ៍នេះថា ប្រទេសនេះនឹងវាយបកវិញដោយកម្លាំង ប្រសិនបើផលប្រយោជន៍របស់ខ្លួនស្ថិតនៅក្រោមការគំរាមកំហែងណាមួយនោះ។ កិច្ចប្រជុំប្រចាំឆ្នាំលើកទី១៩នៃសន្និសិទកងទ័ពជើងទឹកប៉ាស៊ីហ្វិកខាងលិច បានបើកនៅក្នុងទីក្រុង កំពង់ផែឈីងតាវ(Qingdao)ជាមូលដ្ឋានទ័ពកងកម្លាំងទ័ពជើងទឹកភាគខាងជើង របស់ប្រទេសចិន ដែលកំពុងធ្វើសកម្មភាពដ៏រស់រវើកក្នុងការពង្រីកយោធាដ៏ធំរបស់ប្រទេសចិនក្នុងរយៈពេលពីរទស្សវត្សកន្លងមក ដែលបានមើលឃើញថាខ្លួនសាងសង់ឬជួសជុលនាវាផ្ទុកយន្តហោះចំនួនបី។កិច្ចពិភាក្សារយៈពេលពីរថ្ងៃបានទាក់ទាញតំណាងមកពីដៃគូ និងដៃគូប្រកួតប្រជែង រួមមាន អូស្ត្រាលី កម្ពុជា ឈីលី បារាំង ឥណ្ឌា និងសហរដ្ឋអាមេរិក ហើយកើតឡើងស្របពេលមានភាពតានតឹងកាន់តែខ្លាំងឡើងលើសកម្មភាពអះអាងសិទ្ធិគ្រប់គ្រងរបស់ចិននៅច្រកសមុទ្រតៃវ៉ាន់ សមុទ្រចិនខាងកើត និងខាងត្បូង ខណៈកងទ័ពជើងទឹករបស់ចិន បានរីកចម្រើនទៅជាអង្គភាពកងទ័ពដ៏ធំបំផុតរបស់ពិភពលោកតាមរយៈចំនួនអង្គភាពរួមរបស់ខ្លួន ។ លោក ចាង យ៉ូស្ហា (Zhang Youxia) អនុប្រធានគណៈកម្មការយោធាមជ្ឈិមបក្សកុម្មុយនិស្តកំពុងកាន់អំណាចដែលគ្រប់គ្រងកងកម្លាំងប្រដាប់អាវុធបាននិយាយអំពី ការអភិវឌ្ឍន៍រួម ហើយបាននិយាយថា ការបំបែកបំបាក់គ្នា ការប៉ះទង្គិចគ្នា និងការប្រឈមដាក់គ្នា នឹងបានត្រឹមតែធ្វើឲ្យពិភពលោកបែកបាក់ទៅជាប្រជុំកោះដាច់ពីគ្នាដោយព្យាយាមប្រជែងគ្នាទៅវិញទៅមកព្រោះតែការសង្ស័យ។បន្ទាប់មកលោកបានងាកទៅរកការអះអាងសិទ្ធិគ្រប់គ្រងទឹកដីរបស់ប្រទេសចិនដែលមិនត្រូវបានទទួលស្គាល់នៅក្រោមច្បាប់អន្តរជាតិ ហើយក្នុងករណីខ្លះត្រូវបានបដិសេធ។ទីក្រុងប៉េកាំងពុំអើពើរ សេចក្តីសម្រេចដែលខ្លួនមិនពេញចិត្ត ជាពិសេសនៅក្នុងសមុទ្រចិនខាងត្បូង កំពុងមានជម្លោះជាមួយភាគី៥ប្រទេសផ្សេងទៀតលើកោះ ផ្លូវទឹក និងធនធានបាតសមុទ្រ៕

បេសកជនរបស់ប្រទេសចិន អំពាវនាវឲ្យសហរដ្ឋអាមេរិករិះរកវិធីត្រឹមត្រូវដើម្បីចុះសម្រុងជាមួយចិន

2024/04/23 09:29:24 am        178
Facebook Telegram Linkin
បេសកជនមួយរូបរបស់ប្រទេសចិន បានអំពាវនាវឱ្យសហរដ្ឋអាមេរិកធ្វើការជាមួយប្រទេសចិន និងស្វែងរកមធ្យោបាយត្រឹមត្រូវដើម្បីឲ្យចុះសម្រុងគ្នាជាមួយចិន ក្នុងយុគសម័យថ្មី ដោយផ្អែកលើគោលការណ៍នៃការគោរពគ្នាទៅវិញទៅមក ការរួមរស់ដោយសន្តិភាព និងកិច្ចសហប្រតិបត្តិការឈ្នះ-ឈ្នះ។លោកបាននិយាយថា សម្រាប់ការបន្តធ្វើទំនើបកម្មរបស់ចិន និងការកសាងសហគមន៍មួយដែលមានអនាគតរួមគ្នាសម្រាប់មនុស្សជាតិ បរិយាកាសអន្តរជាតិប្រកបដោយសន្តិភាព គឺជាកត្តាចាំបាច់ និងទំនាក់ទំនងប្រកបដោយស្ថិរភាពរវាងប្រទេសចិន និងសហរដ្ឋអាមេរិក គឺជារឿងសំខាន់ណាស់។ បេសកជនរូបនេះបាននិយាយថា ប្រទេសចិនបានត្រៀមខ្លួនរួចជាស្រេចក្នុងកិច្ចខិតខំប្រឹងប្រែងរួមគ្នាជាមួយភាគីសហរដ្ឋអាមេរិក និងចាត់វិធានការជាក់ស្តែងដើម្បីអនុវត្តការឯកភាពដ៏សំខាន់ដែលសម្រេចបានរវាងប្រមុខរដ្ឋទាំងពីរ ដើម្បីប្រែក្លាយ ចក្ខុវិស័យទីក្រុងសាន់ហ្វ្រាន់ស៊ីស្កូ "San Francisco Vision" ឱ្យក្លាយជាការពិត និងដឹកនាំទំនាក់ទំនងឆ្ពោះទៅមុខតាមគន្លងនៃការអភិវឌ្ឍន៍ប្រកបដោយស្ថិរភាព និងនិរន្តរភាព។ លោក Xie បានលើកឡើង៥ចំណុចទាក់ទងទំនាក់ទំនងរវាងចិន-អាមេរិក ដោយនិយាយថា ភាគីទាំងពីរគួរតែរួមគ្នាអភិវឌ្ឍការយល់ឃើញត្រឹមត្រូវចំពោះគ្នាទៅវិញទៅមក គ្រប់គ្រងការខ្វែងគំនិតគ្នាប្រកបដោយប្រសិទ្ធភាព ជំរុញកិច្ចសហប្រតិបត្តិការដែលមានផលប្រយោជន៍ទៅវិញទៅមកប្រកបដោយទំនួលខុសត្រូវ ជាប្រទេសមហាអំណាច និងជំរុញការផ្លាស់ប្តូរប្រជាជនទៅប្រជាជន។ លោក ហ្វឹងស៊ី ( Feng Xie)និយាយថា ទំនាក់ទំនងចិន-អាមេរិក មិនអាចត្រលប់ទៅអតីតកាលបានទេ ប៉ុន្តែប្រទេសទាំងពីរអាចរួមគ្នាឆ្ពោះទៅអនាគតដ៏ត្រចះត្រចង់។ ក្តីសង្ឃឹមស្ថិតនៅលើយុវជន ដែលត្រូវបានគេស្គាល់ថាមានភាពរឹងមាំ ភាពច្នៃប្រឌិត និងឆន្ទៈក្នុងការធ្វើសកម្មភាព។លោកបានលើកទឹកចិត្តយុវជនអាមេរិកឱ្យធ្វើដំណើរទៅកាន់ប្រទេសចិន រួមចំណែកប្រកបដោយប្រាជ្ញាឈ្លាសវៃអំពីរបៀបដែលប្រទេសទាំងពីរអាចចុះសម្រុងគ្នា និងជំរុញការផ្លាស់ប្តូរ ព្រមទាំងកិច្ចសហប្រតិបត្តិការរវាងប្រទេសទាំងពីរ ដើម្បីបង្កើតអនាគតមួយដែលមានសន្តិភាព និងវិបុលភាពយូរអង្វែងសម្រាប់យើងទាំងអស់គ្នា៕

សម្ដេចធិបតី ហ៊ុន ម៉ាណែត៖ កម្ពុជានៅតែមានការប្តេជ្ញាចិត្តខ្ពស់ក្នុងការអនុវត្តកាតព្វកិច្ច អនុសញ្ញាអូតាវ៉ា

2024/04/22 03:49:53 pm        128
Facebook Telegram Linkin
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា មាន​ប្រសាសន៍​បញ្ជាក់​ថា​កម្ពុជានៅតែមានការប្តេជ្ញាចិត្តខ្ពស់ នៅក្នុងការអនុវត្តកាតព្វកិច្ច ដែលមានចែង​ក្នុង​អនុសញ្ញា​ស្តីពី​ការហាមការប្រើប្រាស់ ការរក្សាទុក ការផលិត និងការផ្ទេរគ្រាប់មីនប្រឆាំងមនុស្ស និង​ការបំផ្លាញគ្រាប់មីន ឬ ហៅកាត់ថា អនុសញ្ញាអូតាវ៉ា។ សម្ដេចធិបតី នាយករដ្ឋមន្រ្ដី បានថ្លែងបញ្ជាក់បែបនេះ ក្នុងឱកាសអញ្ជើញថ្លែងសុន្ទរកថា ក្នុងពិធីបើកសន្និបាតប្រចាំឆ្នាំលើកទី៨០ របស់គណៈកម្មការសេដ្ឋកិច្ច និងសង្គមកិច្ចសម្រាប់អាស៊ី-ប៉ាស៊ីហ្វិក (ESCAP) ក្រោមប្រធានបទ “ការប្រើប្រាស់ នវានុវត្តន៍ឌីជីថល សម្រាប់ការអភិវឌ្ឍប្រកបដោយចីរភាពនៅអាស៊ី-ប៉ាស៊ីហ្វិក” នាព្រឹកថ្ងៃទី២២ ខែមេសា ឆ្នាំ២០២៤ នៅរាជធានីបាងកក ប្រទេសថៃ។ក្នុងឱកាសនោះ សម្ដេចធិបតី នាយករដ្ឋមន្រ្ដីមានប្រសាសន៍ ពាក់ព័ន្ធនឹងបញ្ហាប្រឈមរួមនៃតំបន់ និងសកល ដោយសម្តេចបានលើកឡើងអំពី បញ្ហានៃការបោសសម្អាតមីន និងសំណល់ជាតិផ្ទុះពីសង្គ្រាមនៅកម្ពុជា ដែលនៅតែជាឧបសគ្គដ៏ធំមួយ សម្រាប់ការអភិវឌ្ឍជារួម បូករួមទាំងការបង្រួមគម្លាតឌីជីថល និងការទទួលបាននូវសេវាអ៊ីនធឺណិត ដែលមានគុណភាព។ សម្ដេចនាយករដ្ឋមន្រ្ដីបានថ្លែងបញ្ជាក់ថា ដោយទទួលស្គាល់នូវភាពចាំបាច់នៃបញ្ហានេះសកម្មភាពមីនត្រូវបានបញ្ចូលទៅជា គោលដៅទី១៨ នៃគោលដៅអភិវឌ្ឍន៍ប្រកបដោយចីរភាពរបស់កម្ពុជា។ កម្ពុជានៅតែមានការប្តេជ្ញាចិត្តខ្ពស់នៅក្នុងការអនុវត្តកាតព្វកិច្ច ដែលមានចែងក្នុងអនុសញ្ញាស្តីពីការហាមការប្រើប្រាស់ ការរក្សាទុក ការផលិត និងការផ្ទេរគ្រាប់មីនប្រឆាំងមនុស្ស និងការបំផ្លាញគ្រាប់មីនឬហៅកាត់ថា អនុសញ្ញាអូតាវ៉ា។ សម្ដេចធិបតី ថ្លែងបញ្ជាក់ថា ក្នុងនាមជាប្រធានអនុសញ្ញាអូតាវ៉ា សម្រាប់ឆ្នាំនេះកម្ពុជានឹងធ្វើជាម្ចាស់ផ្ទះរៀបចំកិច្ចប្រជុំត្រួតពិនិត្យ ឡើងវិញលើកទី ៥ ក្រោមប្រធាបទ កិច្ចប្រជុំកំពូលសៀមរាប-អង្គរ ស្តីអំពីពិភពលោកមួយដែលគ្មានមីន ដែលនឹងប្រព្រឹត្តទៅនៅថ្ងៃទី២៥ ដល់ ថ្ងៃ២៩ ខែ វិច្ឆិកា ឆ្នាំ២០២៤។ សម្តេចធិបតីបានអំពាវនាវឱ្យមានកិច្ចខិតខំប្រឹងប្រែងរួមគ្នា ដើម្បីលុបបំបាត់នូវអាវុធដ៏សាហាវនេះ ក៏ដូចជាគាំទ្រ និងចូលរួមនៅក្នុងព្រឹត្តិការណ៍ជាប្រវត្តិសាស្ត្រនេះព្រមទាំងបានថ្លែងអំណរគុណចំពោះគណ:កម្មការ ESCAP ដែលបាន ជួយគាំទ្រដល់កម្ពុជាក្នុងការរៀបចំសេចក្តីព្រាងគោលនយោបាយជាតិសកម្មភាពមីន ដែលជាលើកដំបូង សម្រាប់គណ:កម្មការ ESCAP ចូលរួមក្នុងសកម្មភាពពាក់ព័ន្ធនឹងមីន៕ អត្ថបទ៖ វ៉ន ដារ៉ា

សម្ដេចធិបតី៖ នវានុវត្តន៍ឌីជីថលមានសារៈសំខាន់សម្រាប់ការអភិវឌ្ឍប្រកបដោយចីរភាព បរិយាបន្ន និងភាពធន់

2024/04/22 03:39:18 pm        120
Facebook Telegram Linkin
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បាន​ថ្លែង​បញ្ជាក់​ថា នវានុវត្តន៍ឌីជីថល មានសារៈសំខាន់សម្រាប់ការអភិវឌ្ឍប្រកបដោយចីរភាព បរិយាបន្ន និង​ភាពធន់ ជាពិសេស នៅក្នុងការដោះស្រាយបញ្ហាវិសមភាព ដែលបានបង្កឡើងដោយជំងឺកូវីដ-១៩ ក៏ដូចជាការឆ្លើយតបឱ្យទាន់ពេល ទៅនឹងកំណើននៃតម្រូវការថ្មីរបស់ប្រជាពលរដ្ឋ។សម្ដេចធិបតី នាយករដ្ឋមន្រ្ដីបានថ្លែងបញ្ជាក់បែបនេះ ក្នុងឱកាសអញ្ជើញថ្លែងសុន្ទរកថា ក្នុងពិធី​បើក​សន្និបាត​ប្រចាំឆ្នាំលើកទី៨០ របស់គណៈកម្មការសេដ្ឋកិច្ច និងសង្គមកិច្ចសម្រាប់អាស៊ី-ប៉ាស៊ីហ្វិក (ESCAP) ក្រោមប្រធានបទ “ការប្រើប្រាស់ នវានុវត្តន៍ឌីជីថល សម្រាប់​ការ​អភិវឌ្ឍ​ប្រកប​ដោយ​ចីរភាពនៅអាស៊ី-ប៉ាស៊ីហ្វិក” នាព្រឹកថ្ងៃទី២២ ខែមេសា ឆ្នាំ២០២៤ នៅរាជធានី​បាងកក ប្រទេសថៃ។សម្តេចធិបតីនាយករដ្ឋមន្ត្រី បានគូសបញ្ជាក់ថា តាមរយៈការប្រើប្រាស់បច្ចេកវិទ្យា ទាំង​អស់​គ្នា​អាច​បង្រួម​គម្លាត ក្នុងការទទួលបានឱកាស និងសេវាកម្មសំខាន់ៗ ពោលគឺអាច​ចែក​រំលែក​បាន​នូវ​ផ្លែផ្កា​នៃការអភិវឌ្ឍ ដល់ប្រជាពលរដ្ឋគ្រប់ៗរូបស្មើៗគ្នា។ ដូចបណ្តាប្រទេសនានាដែរ កម្ពុជា​បាន​ចាត់​ទុកបច្ចេកវិទ្យាឌីជីថល ជាចលករដ៏សំខាន់ក្នុងដំណើរការអភិវឌ្ឍសង្គម-សេដ្ឋកិច្ច ក្នុង​បរិបទ​បដិវត្តន៍ឧស្សាហកម្ម ៤.០ ដោយសារ បច្ចេកវិទ្យាឌីជីថល អាចបង្កើត​ក្បាលម៉ា​ស៊ីន​ជំរុញ​កំណើន​សេដ្ឋកិច្ចថ្មីៗ និងបង្កើនការទទួលបានសេវាសាធារណៈ ចាំបាច់ក៏ដូច​ជា​កសាង​សង្គម​ទំនើប និងស៊ីវីល័យមួយ ដែលពលរដ្ឋអាចទទួលបាននូវផលប្រយោជន៍ ប្រកបដោយបរិយាបន្ន ភាព​ជឿ​ទុកចិត្តបាន និងសុវត្ថិភាពខ្ពស់។ សម្ដេចធិបតីមានប្រសាសន៍ថា បច្ចេកវិទ្យាឌីជីថល អាចជួយរក្សាបាននូវអត្តសញ្ញាណ និង​វប្បធម៌​ជាតិ។ ក្នុងន័យនេះ រាជរដ្ឋាភិបាល នីតិកាលទី៧ នៃរដ្ឋសភានេះ បានប្រកាស​ដាក់​ឱ្យ​អនុវត្ត «យុទ្ធសាស្ត្របញ្ចកោណ-ដំណាក់កាលទី១» ដោយបានកំណត់អាទិភាពចំនួន ៥ គឺ ៖ មនុស្ស, ផ្លូវ, ទឹក, ភ្លើង និងបច្ចេកវិទ្យា, ពោលគឺបច្ចេកវិទ្យាឌីជីថល ដែលជាអាទិភាពថ្មីមួយ កំណត់នៅក្នុងបញ្ចកោណទី៥ គឺ «ការកសាងសេដ្ឋកិច្ច និងសង្គមឌីជីថល»។ បន្ថែមលើនេះ រាជរដ្ឋាភិបាល ក៏បានដាក់ឱ្យអនុវត្ត «ក្របខ័ណ្ឌគោលនយោបាយសេដ្ឋកិច្ច និង​សង្គម​ឌីជីថល​កម្ពុជា ២០២១-២០៣៥», «គោលនយោបាយរដ្ឋាភិបាលឌីជីថលកម្ពុជា ២០២២-២០៣៥» «គោលនយោបាយអភិវឌ្ឍបច្ចេកវិទ្យា ហិរញ្ញវត្ថុកម្ពុជា ២០២៣-២០២៨» និង «គោល​នយោបាយ​ជាតិ​ស្តីពីវិទ្យាសាស្ត្រ បច្ចេកវិទ្យា និង នវានុវត្តន៍ឆ្នាំ ២០២០-២០៣០» ។ល។សម្ដេច​ធិបតីនាយករដ្ឋមន្រ្ដីបន្តថាក្នុងបរិបទសកល និងតំបន់, កម្ពុជា បាននិង​កំពុង​ចូល​រួម​យ៉ាង​បុរេស​កម្ម ក្នុងការអនុវត្តរបៀបវារៈគោលនយោបាយ ឌីជីថល សំដៅសម្រេច​ឱ្យ​បាន​គោល​ដៅ​អភិវឌ្ឍន៍​ឌីជីថលក្នុងតំបន់ និងសកលរួមមានដូចជា «ផែនការមេ ឌីជីថលអាស៊ាន២០២៥» និង«យុទ្ធសាស្ត្រឌីជីថល២០២២-២០២៥» របស់អង្គការ សហប្រជាជាតិ។ ទន្ទឹមនេះ​កម្ពុជា​បាន​និង​កំពុងចូលរួមក្នុងគំនិតផ្តួចផ្តើមឌីជីថលអាស៊ានផ្សេងៗ ជាពិសេសការរៀបចំ កិច្ចព្រមព្រៀង​ក្រប​ខ័ណ្ឌ​សេដ្ឋកិច្ចឌីជីថលអាស៊ាន (DEFA) ដែលមានគោលបំណង ក្នុងការផ្តល់ជាអភិក្រម យុទ្ធសាស្ត្រ និងពេញលេញកម្រិតតំបន់ ក្នុងការលើកកម្ពស់ការធ្វើឌីជីថលូបនីយកម្ម ក្នុងតំបន់ ប្រកប​ដោយ បរិយាបន្ន និងទាន់ពេល។ លើសពីនេះ អាស៊ានក៏បានចាត់ទុកសេដ្ឋកិច្ចឌីជីថល ជា​ជំពូក​អាទិភាពមួយ នៅក្នុង កិច្ចព្រមព្រៀងនានា ដូចជា កិច្ចព្រមព្រៀងពាណិជ្ជកម្មសេរី អាស៊ាន-អូស្ត្រាលី-ណូវែលហ្សេឡង់ (AANZFTA) និងកិច្ចព្រមព្រៀងពាណិជ្ជកម្មសេរីអាស៊ាន-ចិន (ACFTA 3.0) ក៏ដូចជា កិច្ចព្រមព្រៀងភាពជាដៃគូយុទ្ធសាស្ត្រ គ្រប់ជ្រុងជ្រោយតំបន់ (RCEP) ។សម្តេចធិបតីបានបង្ហាញនូវក្តីសង្ឃឹមជឿជាក់ថា តាមរយៈវេទិកានេះនឹង​អាច​រួម​គ្នា​ដោះ​ស្រាយ​បាន​នូវបញ្ហាប្រឈមមួយចំនួន ដូចជា គម្លាតឌីជីថលទាំងរវាងប្រទេស និង ប្រទេស និងរវាង​ទីក្រុង និងជនបទ កង្វះហេដ្ឋារចនាសម្ព័ន្ធ និង ការទទួលបាន​សេវា​អ៊ីន​ធឺណិត​ដែល​មាន​គុណភាព, អក្ខរកម្មឌីជីថលរបស់ ប្រជាពលរដ្ឋនៅមានកម្រិត កង្វះការចាប់យក និងប្រើប្រាស់​បច្ចេក​វិទ្យា​ឌីជីថល, កង្វះការធ្វើពាណិជ្ជកម្ម និង សេវាកម្មឌីជីថល បញ្ហាសន្តិសុខសាយប័រ និង បទ​ល្មើសតាមប្រព័ន្ធបច្ចេកវិទ្យា ។ល។ ដើម្បីឆ្លើយតប ឱ្យទាន់ពេល​ទៅ​នឹង​កំណើន​នៃ​តម្រូ​វ​កា​រ​ថ្មី​របស់​ប្រជាពលរដ្ឋក្នុងអាស៊ី-ប៉ាស៊ីហ្វិក ក្នុងដំណើរឆ្ពោះទៅកាន់ សេដ្ឋកិច្ច និងសង្គម​ឌីជីថល​ពេញ​លេញ​៕ អត្ថបទ៖ វ៉ន ដារ៉ា

រាជរដ្ឋាភិបាលកម្ពុជា និងគណៈកម្មការ ESCAP បន្តពង្រឹងកិច្ចសហប្រតិបត្តិការជំរុញ​នវានុវត្តន៍ឌីជីថល

2024/04/22 03:17:24 pm        64
Facebook Telegram Linkin
នាព្រឹកថ្ងៃទី២២ ខែមេសា ឆ្នាំ២០២៤ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃ​ព្រះរាជាណាចក្រកម្ពុជា បានជួបពិភាក្សាការងារជាមួយ លោកជំទាវបណ្ឌិត អាមីដា សាលស៊ី​យ៉ាអាលីស​ចាបាណា (Armida Salsiah Alisjahbana) អគ្គលេខាធិការរង នៃអង្គការ​សហ​ប្រជាជាតិ និងជាលេខាធិការប្រតិបត្តិ នៃគណៈកម្មការសេដ្ឋកិច្ច និងសង្គមកិច្ច សម្រាប់អាស៊ី-ប៉ាស៊ីហ្វិក (ESCAP) ក្នុងឱកាសនៃការអញ្ជើញចូលរួមសន្និបាតលើកទី៨០ របស់គណៈកម្មការ ESCAP នៅរាជធានីបាងកក នៃព្រះរាជាណាចក្រថៃ។ក្នុងជំនួបនេះ លោកជំទាវបណ្ឌិត អាមីដា បានថ្លែងអំណរគុណយ៉ាងជ្រាលជ្រៅចំពោះ សម្តេច​ធិបតី ដែលបានចំណាយពេលដ៏មមាញឹកចូលរួម និងថ្លែងសន្ទរកថាគន្លឹះក្នុងសន្និបាតលើកទី៨០ របស់​គណៈកម្មការ ESCAP។ ឆ្លៀតក្នុងឱកាសនេះដែរ លោកជំទាវបណ្ឌិត ក៏បានវាយ​តម្លៃ​ខ្ពស់​ចំពោះ​រាជ​រដ្ឋាភិបាលកម្ពុជា ដែលបានដាក់ចេញនូវយុទ្ធសាស្រ្តបញ្ចកោណ-ដំណាក់កាលទី១ ដែល​ផ្តល់​អាទិភាពលើបច្ចេកវិទ្យាឌីជីថល ព្រមទាំង​បាន​សម្ដែង​នូវ​ការ​អរគុណ​ចំពោះ​រាជ​រដ្ឋាភិបាល​កម្ពុជា ដែលបានផ្ដល់នូវកិច្ចសហប្រតិបត្តិការយ៉ាងល្អជាមួយគណ:កម្មការ ESCAP។ជាការឆ្លើយតប សម្តេចធិបតី បានថ្លែងអំណរគុណ និងវាយតម្លៃខ្ពស់ចំពោះកិច្ចសហប្រតិបត្តិការ និ​ង​ការគាំទ្ររបស់គណ:កម្មការ ESCAP ដែលបានរួម​ចំណែក​យ៉ាង​សំខាន់​ក្នុង​ដំណើរ​ការ​នៃ​ការ​អភិវឌ្ឍ​សង្គម-សេដ្ឋកិច្ចរបស់កម្ពុជានាពេលកន្លងមក ដោយគណ:កម្មការ ESCAP គឺជាដៃគូ​ដ៏​សំខាន់​មួយ​របស់កម្ពុជាដែលបានផ្តល់នូវជំនួយបច្ចេកទេស និងការបណ្ដុះបណ្ដាល​ជំនាញ​លើ​វិស័យ​នានា រួមមាន ដូចជា៖ ការអភិវឌ្ឍន៍សេដ្ឋកិច្ច, និរន្តរភាពបរិស្ថាន, ការជំរុញបរិយាប័ន្នសង្គម និងអភិបាលកិច្ច ជាដើម។បន្ថែមលើនេះ សម្តេចធិបតី បានថ្លែងអំណរគុណចំពោះគណ:កម្មការ ESCAP ក្នុងការ​ជួយ​គាំទ្រ​ដល់​ក្នុង​ការរៀបចំសេចក្តីព្រាងគោលនយោបាយជាតិសកម្មភាពមីន ដែលគោលនយោបាយនេះ គឺ​ជា​លើកដំបូងក្នុងប្រវត្តិសាស្ត្រ ESCAP ក្នុងការចូលរួមក្នុងសកម្មភាពពាក់ព័ន្ធនឹងមីន។ ទន្ទឹមនោះ សម្តេចធិបតី បានបង្ហាញ​នូវ​ការ​ប្ដេជា្ញ​ចិត្ត​របស់​កម្ពុជា​ក្នុង​ការ​ពង្រឹង​កិច្ច​សហ​ប្រតិបត្តិការ​ និងភាពជាដៃគូរវាងកម្ពុជា និង គណ:កម្មការ ESCAP បន្ថែមទៀត ដើម្បីជំរុញ​ការ​អភិវឌ្ឍ​សង្គម-សេដ្ឋកិច្ច ឆ្ពោះទៅសម្រេចបានគោលដៅអភិវឌ្ឍន៍ប្រកបដោយចីរភាព និងការ​កសាង​អនាគតដ៏ល្អប្រសើរមួយសម្រាប់ទាំងអស់គ្នា។សម្តេចធិបតី ក៏បានជម្រាបជូនលោកជំទាវបណ្ឌិតអំពីក្របខ័ណ្ឌគោលនយោបាយ និងក្រប​ខ័ណ្ឌ​យុទ្ធ​សាស្រ្ត​របស់រាជរដ្ឋាភិបាលនីតិកាលទី៧ នៃរដ្ឋសភា ជាពិសេសការដាក់​ចេញ​នូវ​យុទ្ធ​សាស្រ្ត​បញ្ច​កោណ-ដំណាក់កាលទី១ ដែលផ្តល់អាទិភាពលើបច្ចេកវិទ្យាឌីជីថល ដែលជាសមាសធាតុ​ដ៏​សំខាន់​នៃ​ការជំរុញប្រភពកំណើនសេដ្ឋកិច្ចថ្មី ព្រមទាំងសម្រេចបាន​ចក្ខុ​វិស័យ​នៃ​ការ​ប្រែក្លាយ​ប្រទេស​កម្ពុជា​ទៅជាប្រទេសចំណូលខ្ពស់នៅឆ្នាំ២០៥០៕

ឯកអគ្គរដ្ឋទូតប្រទេសចិន ប្រចាំនៅកាណាដា ចាកចេញពីមុខតំណែង

2024/04/22 02:57:55 pm        64
Facebook Telegram Linkin
ឯកអគ្គរដ្ឋទូតចិន ប្រចាំប្រទេសកាណាដា លោក ខុង ភៃអ៊ូ (Cong Peiwu) ដែលបានបម្រើការតាំងពីឆ្នាំ ២០១៩ បានចាកចេញពីមុខតំណែង ហើយបានត្រឡប់ទៅប្រទេសចិនវិញហើយ នេះបើយោងតាមប្រភពដែលដឹងពីបញ្ហានេះបាននិយាយកាលពីថ្ងៃអាទិត្យ (២១ មេសា) ដោយព័ត៌មាននេះបានលេចចេញក្នុងអំឡុងពេលដំណើរទស្សនកិច្ចរបស់អ្នកការទូតជាន់ខ្ពស់កាណាដាម្នាក់ទៅកាន់ប្រជាជាតិអាស៊ីមួយនេះ។ព័ត៌មានលម្អិតបន្ថែមអំពីមូលហេតុដែលលោកចាកចេញពីមុខតំណែងមិនទាន់មាននៅឡើយទេ ហើយស្ថានទូតចិន នៅទីក្រុងអូតាវ៉ា ក៏មិនបានឆ្លើយតបភ្លាមៗចំពោះសំណើសុំការអត្ថាធិប្បាយដែរ។ការចាកចេញរបស់ឯកអគ្គរដ្ឋទូតចិនរូបនេះត្រូវបានរាយការណ៍ជាលើកដំបូងដោយសារព័ត៌មាន គ្លូប អ៊ែន មែល (Globe and Mail)។ ព័ត៌មាននេះរាយការណ៍ដោយដកស្រង់ពីប្រភពថា មុខតំណែងរបស់លោក ខុង បានបញ្ចប់កាលពីថ្ងៃទី០៩ ខែមេសា ហើយបានធ្វើឱ្យមានការភ្ញាក់ផ្អើលដល់មនុស្សមួយចំនួននៅក្នុងស្ថាប័នការទូត ដោយសារតែលឿនខ្លាំងពេក។ទំនាក់ទំនងរវាងទីក្រុងអូតាវ៉ា និងទីក្រុងប៉េកាំង មានភាពតានតឹងចាប់តាំងពីឆ្នាំ២០១៨ មកនៅពេលដែលនគរបាលកាណាដាបានឃុំខ្លួនលោក ម៉េង វ័នចូវ (Meng Wanzhou) ដែលជាប្រធានផ្នែកហិរញ្ញវត្ថុនៃក្រុមហ៊ុនទូរគមនាគមន៍យក្សរបស់ចិន ហ័រវ៉ី តិចណូឡូជីស៍ (Huawei Technologies) តាមដីការបស់សហរដ្ឋអាមេរិក ហើយក្រោយមកជនជាតិកាណាដាពីរនាក់ត្រូវបានចិនចាប់ឃុំខ្លួនវិញ ដែលបង្កជាភាពរកាំរកូសរវាងប្រទេសទាំងពីរ៕

បណ្ដាញសង្គម

ព័ត៌មានថ្មីៗ

សម្តេច ម៉ែន សំអន ប្រារព្ធកិច្ចបួងសួងសុំសេចក្តីសុខ សេចក្តីចម្រើនជូនប្រទេសជាតិ នៅប្រាសាទនាគព័ន្ធ
09/07/2025 08:09 PM
Facebook Telegram Linkin
សម្តេចធិបតី៖ សុខុមាលភាពកងទ័ពទាំង១៨នាក់ ដែលថៃចាប់ទៅគឺជាបញ្ហានៃសេចក្តីថ្លៃថ្នូររបស់ជាតិ
09/07/2025 08:09 PM
Facebook Telegram Linkin
រដ្ឋបាលខណ្ឌ៧មករា បានរៀបចំពិធីសូត្រមន្តកាន់បិណ្ឌទី១ នៅវត្តព្រះពុទ្ធមានបុណ្យ
09/07/2025 07:09 PM
Facebook Telegram Linkin
លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត អញ្ជើញក្នុងពិធីសូត្រមន្ត កាន់បិណ្ឌវេនទី១ នៅវត្តបទុមវតី
09/07/2025 06:09 PM
Facebook Telegram Linkin
ថ្នាក់ដឹកនាំ និងមន្ត្រីជំនាញ ក្រសួងមុខងារសាធារណៈបង្ហាញស្មារតីទទួលខុសត្រូវខ្ពស់ និងត្រៀមលក្ខណៈរួចរាល់ធ្វើប្រតិបត្តិការជំរឿនមន្ត្រីជាក់ស្តែងសម្រេចលទ្ធផលជូនរាជរដ្ឋាភិបាល
09/07/2025 05:09 PM
Facebook Telegram Linkin
ទឹកជំនន់នៅនីហ្សេរីយ៉ា បានសម្លាប់មនុស្សលើសពី ២៣០នាក់ ដោយជាង ១០០នាក់ នៅតែបាត់ខ្លួន
09/07/2025 05:09 PM
Facebook Telegram Linkin
ប្រធានក្រុមការងារចុះជួយឃុំទួលសាលា អំពាវនាវពលរដ្ឋជឿជាក់លើរាជរដ្ឋាភិបាល ស្វែងរកសន្តិភាពជូនប្រទេសជាតិ ជុំវិញជម្លោះព្រំដែន
09/07/2025 05:09 PM
Facebook Telegram Linkin
ពលរដ្ឋអាមេរិកជាង ២៥លាននាក់ ស្ថិតក្រោមការព្រមាន ខណៈអាកាសធាតុធ្ងន់ធ្ងរវាយប្រហារភាគឦសាន
09/07/2025 05:09 PM
Facebook Telegram Linkin
សម្ដេចធិបតី អបអរលោក Anutin ក្លាយជានាយករដ្ឋមន្ត្រីថៃថ្មី ខណៈកម្ពុជារងចាំធ្វើការជាមួយគ្នាស្ដារទំនាក់ទំនង និងសន្តិភាពប្រទេសទាំងពីរឡើងវិញ
09/07/2025 04:09 PM
Facebook Telegram Linkin
[UPDATE] នាយករដ្ឋមន្ត្រីជប៉ុន Ishiba បានចេញមកប្រកាសថា លោកសម្រេចចិត្តចុះពីតំណែងហើយ
09/07/2025 04:09 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.