នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ប្រធានក្រុមការងារគណបក្សចុះមូលដ្ឋាន អញ្ជើញបើកការដ្ឋានសាងសង់​ផ្លូវលំ​ប្រវែង ៥.៧០០​ម៉ែត្រ ស្ថិតក្នុងស្រុកប្រាសាទបល្ល័ង្ក ខេត្តកំពង់ធំ
សម្ដេចតេជោ ចាត់ទុក អតីតរដ្ឋមន្ត្រីការពារជាតិវៀតណាម ជាមិត្តចាស់របស់កម្ពុជា
ឯកឧត្តម ចាយ បូរិន អញ្ជើញចុះសួរសុខទុក្ខនិងនាំយកអំណោយដ៏ថ្លៃថ្លារបស់ សម្តេចមហាបរធិបតី ហ៊ុន ម៉ាណែត និង លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជូនឯកឧត្តម កង ណម នៅគេហដ្ឋាន
មន្ត្រីជាន់ខ្ពស់ក្រសួងអភិវឌ្ឍន៍ជនបទ ចុះត្រួតពិនិត្យ និងវាយតម្លៃលើ​ការងារ​ស្ថាបនា​ផ្លូវ នៅ​ទីតាំង​ដីសម្បទានសង្គមកិច្ច ខេត្តឧត្តរមានជ័យ

នយោបាយ​ និង ការអភិវឌ្ឍន៍

កម្ពុជា និងអូស្រ្តាលីបានចុះកិច្ចព្រមព្រៀងជាមួយគ្នាក្នុងសេវាដឹកជញ្ជូនតាមផ្លូវអាកាស

2024/03/07 08:37:57 am        165
Facebook Telegram Linkin
កម្ពុជា និងអូស្រ្តាលី បានសម្រេចចុះកិច្ចព្រមព្រៀងជាមួយគ្នាក្នុងការដឹកជញ្ជូនតាមផ្លូវអាកាស ហើយតាមរយៈកិច្ចព្រមព្រៀងនេះ ក៏ដើម្បីលើកម្ពស់កិច្ចសហប្រតិបត្តិការទ្វេភាគីរវាងប្រទេសទាំងពីរឲ្យកាន់តែល្អប្រសើរ បន្ថែមទៀតផងដែរ។ នេះបើតាមការលើកឡើងរបស់ឯកឧត្តម ហ្សង់ ហ្វ្រង់ស្វ័រតាន់ រដ្ឋមន្រ្តីប្រតិភូអមនាយករដ្ឋមន្រ្តី។ថ្លែងប្រាប់អ្នកសារព័ត៌មាន នាយប់ថ្ងៃទី៦ ខែមីនា ឆ្នាំ២០២៤នេះ ស្តីពីលទ្ធផលនៃដំណើរទស្សនកិច្ចរបស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជានៅប្រទេសអូស្រ្តាលី ចាប់ពីថ្ងៃទី១ដល់ថ្ងៃទី៦ ខែមីនា ឆ្នាំ២០២៤ ដើម្បីចូលរួមកិច្ចប្រជុំកំពូលពិសេសអាស៊ាន-អូស្ត្រាលី និងដើម្បីអបអរសាទរខួបអនុស្សាវរីយ៍លើកទី៥០ នៃទំនាក់ទំនងដៃគូសន្ទនាអាស៊ានអូស្រ្តាលី ឯកឧត្តម ហ្សង់ ហ្វ្រង់ស្វ័រតាន់ បានបញ្ជាក់ថា នៅក្នុងកិច្ចជំនួបរវាងសម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ជាមួយលោក អេនថូនី អាល់បានីស៊ី នាយករដ្ឋមន្រ្តីអូស្រ្តាលីនោះ ថ្នាក់ដឹកនាំនៃប្រទេសទាំងពីរបានពិភាក្សាការងារជា មួយគ្នាជាច្រើនទាក់ទងនឹងការបង្កើនកិច្ច​សហប្រតិបត្តិការទ្វេភាគី ដោយក្នុងនោះថ្នាក់ដឹកនាំ​ប្រទេសទាំងពីរក៏បានសម្តែងការគាំទ្រ និងស្វាគមន៍ចំពោះប្រមុខការទូត​ប្រទេសទាំងពីរ ដែលបានសម្រេចចុះកិច្ចព្រមព្រៀង​សេវាដឹកជញ្ជូនតាមផ្លូវអាកាសរបស់ប្រទេសទាំងពីរ(កម្ពុជា-អូស្រ្តាលី)ផងដែរ។បើតាមឯកឧត្តម ហ្សង់ ហ្វ្រង់ស្វ័រតាន់ ក៏បានឲ្យដឹងផងដែរថា នៅចំពោះមុខសម្តេចធិបតី ហ៊ុន ម៉ាណែត លោកនាយក រដ្ឋមន្រ្តីអូស្ត្រាលី ក៏បានចាត់ទុកកម្ពុជាថា ជាប្រទេសមួយដ៏អស្ចារ្យប្រកបដោយ ភាពធន់ទោះបីកម្ពុជាមានរបបប្រល័យពូជាសាសន៍ក៏ដោយ ហើយលោកនាយករដ្ឋមន្រ្តីក៏បានសម្តែងនូវ ការគាំទ្រ និងបង្ហាញពីការពេញចិត្តក្នុងការពិភាក្សាលើការបន្តពង្រឹង និងពង្រីកកិច្ចសហប្រតិបត្តិការរវាង ប្រទេសទាំងពីរឲ្យកាន់តែរឹងមាំបន្ថែមទៀតផងដែរ។នៅក្នុងកិច្ចជំនួបទ្វេភាគីជាមួយនាយករដ្ឋមន្រ្តីអូស្រ្តាលីនោះដែរ សម្តេចធិបតី ហ៊ុន ម៉ាណែត ក៏ បានប្រកាសថ្លែងអំណរគុណដល់ប្រជាជន និងរដ្ឋាភិបាលអូស្រ្តាលី ដែលបានជួយគាំទ្រទាំងក្នុងអំឡុង ពេលស្វែងរកសន្តិភាពនៅទសវត្សន៍១៩៩០ និងការអភិវឌ្ឍសង្គម-សេដ្ឋកិច្ច ជាពិសេសគាំទ្រពីអូស្រ្តាលី លើវិស័យកសិកម្ម សុខាភិបាល បោសសម្អាតមីន សន្តិសុខ និងការពារជាតិជាដើម។ នេះបើតាមការលើកឡើងរបស់ឯកឧត្តម ហ្សង់ ហ្វ្រង់ស្វ័រតាន់ដដែល៕អត្ថបទបាន ចក់

ចិន ជំរុញឲ្យសហរដ្ឋអាមេរិក ឈប់ប្រើប្រាស់ហ្វីលីពីនជាកូនអុក នៅសមុទ្រចិនខាងត្បូង

2024/03/07 08:10:56 am        152
Facebook Telegram Linkin
កាលពីថ្ងៃពុធទី៦មីនា ប្រទេសចិន បានជំរុញឱ្យសហរដ្ឋអាមេរិក ឈប់ប្រើប្រាស់ប្រទេសហ្វីលីពីនជា «កូនអុក»នៅសមុទ្រចិនខាងត្បូង។លោកស្រីម៉ៅនីង(Mao Ning) អ្នកនាំពាក្យក្រសួងការបរទេសចិន បាននិយាយនៅក្នុងសន្និសីទសារព័ត៌មានមួយឆ្លើយតបទៅនឹងសំណួរ ថាតើការថ្កោលទោសរបស់សហរដ្ឋអាមេរិកចំពោះសកម្មភាពរបស់ចិនគឺការបង្កហេតុឬយ៉ាងណា ថាប្រទេសចិនជំរុញឱ្យសហរដ្ឋអាមេរិកកុំឱ្យប្រើប្រាស់ប្រទេសហ្វីលីពីនធ្វើជាកូនអុក ដើម្បីបង្កបញ្ហានៅក្នុងសមុទ្រចិនខាងត្បូងទៀត។ ហ្វីលីពីន មិនគួរបណ្ដោយខ្លួនតាមតែការចង្អុលរបស់សហរដ្ឋអាមេរិកនោះទេ។ យោងតាមអ្នកនាំពាក្យអង្គភាពឆ្មាំសមុទ្រកាលពីថ្ងៃអង្គារ នាវាហ្វីលីពីន៤គ្រឿងកាលពីថ្ងៃអង្គារបានឆ្លងចូលទៅក្នុងដែនទឹកដែលនៅជាប់នឹងតំបន់ថ្មប៉ប្រះទឹក រិន អាយ ជីអាវ(Ren'ai Jiao)មានជម្លោះ ដែលជាផ្នែកនៃតំបន់ ណានសា កាន់តាវ(Nansha Qundao)ក្នុងតំបន់កោះ ស្រ្ពាតលី (Spratly) របស់ប្រទេសចិនក្នុងសមុទ្រចិនខាងត្បូងដើម្បីបញ្ជូនសម្ភារៈសំណង់ទៅកាន់នាវាយោធាដែលបានចុះចដោយខុសច្បាប់នៅលើកោះនេះ។ ជាការឆ្លើយតប ឆ្មាំសមុទ្រចិនបានចាត់វិធានការចាំបាច់ប្រឆាំងនឹងនាវាហ្វីលីពីន ស្របតាមច្បាប់ដូចជាការប្រើការណុងបាញ់ជាដើម។ លោកស្រីម៉ៅ បាននិយាយថា តំបន់ជម្លោះ ថ្មប៉ប្រះទឹក រិនអាយ ជីអាវ គឺជាបញ្ហាទ្វេភាគីរវាងចិន និងហ្វីលីពីន ដោយបន្ថែមថា ភាគីទីបីណាមួយ រួមទាំងសហរដ្ឋអាមេរិក គួរតែជៀសវាងពីការញុះញង់បង្ករឿង ដោយបើកដៃឱ្យមានអន្តរាគមន៍។ អ្នកនាំពាក្យរូបនេះ បាននិយាយថា ការតាំងចិត្តរបស់ប្រទេសចិន ដើម្បីការពារសិទ្ធិ និងផលប្រយោជន៍ស្របច្បាប់របស់ខ្លួន គឺគ្មានការផ្លាស់ប្តូរឡើយ ហើយការប៉ុនប៉ងរំលោភសិទ្ធិ និងការបង្កហេតុរបស់ហ្វីលីពីន នឹងមិនជោគជ័យជាដាច់ខាត ៕

ប្រធានសភាតង់ហ្សានី និងជាប្រធានសហភាពអន្តរសភា (IPU) វាយតម្លៃខ្ពស់ ចំពោះសមិទ្ធផលកម្ពុជាសម្រេចបាន និងការចូលរួមយ៉ាងសកម្មរបស់កម្ពុជាក្នុងក្របខណ្ឌ IPU

2024/03/07 08:03:59 am        162
Facebook Telegram Linkin
លោកជំទាវ ទូលៀ អ៊ែកសិន (Tulia Acson) ប្រធានសភាតង់ហ្សានី និងជាប្រធានសហភាពអន្តរសភា (IPU) បានអបអរសាទរ និងវាយតម្លៃខ្ពស់ ចំពោះសមិទ្ធផលនានាដែលកម្ពុជាសម្រេចបាន និងការចូលរួមយ៉ាងសកម្មរបស់កម្ពុជាក្នុងក្របខណ្ឌ IPU ហើយជឿជាក់ថា កម្ពុជានឹងបន្តលើមាគ៌ាដ៏ត្រឹមត្រូវ ដើម្បីអនាគតមួយដ៏ប្រសើរ សម្រាប់ប្រជាជន និងប្រទេសជាតិ។លោកជំទាវប្រធានសភាតង់ហ្សានី បានលើកឡើងដូចនេះ នៅក្នុងជំនួបទ្វេរភាគីរវាងសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា និងលោកជំទាវ ទូលៀ អ៊ែកសិន ប្រធានសភាតង់ហ្សានី និងជាប្រធានសហភាពអន្តរសភា (IPU) នារសៀលថ្ងៃទី៧ ខែមីនា ឆ្នាំ២០២៤ ក្នុងអំឡុងពេលនៃដំណើរបំពេញទស្សនកិច្ចផ្លូវការនិងចូលរួមកិច្ចប្រជុំកំពូលប្រធានសភាជាស្រ្តីរបស់គណៈប្រតិភូជាន់ខ្ពស់រដ្ឋសភាកម្ពុជា នៅសាធារណរដ្ឋបារាំង។ក្នុងជំនួបទ្វេរភាគីនេះ ភាគីទាំងពីរបានផ្លាស់ប្តូរយោបល់ទាក់ទងនឹងស្ថានការណ៍តំបន់ និងអន្តរជាតិ ជាពិសេសទំនាក់ទំនងរវាងកម្ពុជា-តង់ហ្សានី និងកិច្ចសហការក្រោមក្របខណ្ឌ IPU។ភាគីទាំងពីរបានយល់ស្របគ្នាថា ពិភពលោកកំពុងស្ថិតក្នុងរបត់មួយដ៏គ្រោះថ្នាក់ ពិបាកទាយទុកជាមុន ប្រកបដោយហានិភ័យខ្ពស់។ អភិបាលកិច្ចសកល ប្រព័ន្ធពហុភាគីនិយម និងរបបពិភពលោក ដែលផ្អែកលើវិធានច្បាប់ដែលមានការធ្លាក់ចុះគួរឱ្យបារម្ភ ចាប់តាំងពីសង្រ្គាមលើកលើកទី២ ដោយសារតែការប្រកួតប្រជែងអំណាចដ៏ស្មុគ្រស្មាញរវាងប្រទេសមហាអំណាច ការកើនឡើងនូវជម្លោះ បម្រែបម្រួលអាកាសធាតុ និងគ្រោះមហន្តរាយ។ ក្នុងបរិបទនេះ ការទូតសភាដើរតួនាទីយ៉ាងសំខាន់ ក្នុងការកសាងសន្តិភាព តាមរយៈការគ្រប់គ្រងជម្លោះ និងការបង្ការជម្លោះ។ សភា ដែលជាតំណាងប្រជាពលរដ្ឋ យល់ច្បាស់ពីតម្រូវការ និងក្តីប្រាថ្នារបស់ប្រជាជន នោះគឺសន្តិភាព និងការអភិវឌ្ឍ។បន្ថែមទៅទៀត សម្តេចរដ្ឋសភាធិបតី បានបង្ហាញការគាំទ្រចំពោះលោកជំទាវ ទូលៀ អ៊ែកសិន ក្នុងតួនាទីធ្វើជាប្រធាន IPU។ទន្ទឹមគ្នានេះ ភាគីសភាកម្ពុជាបានលើកនូវសំណើ ៥ ដើម្បីពង្រឹងទំនាក់ទំនងទ្វេរភាគី និងពហុភាគី រួមមាន (១) ពង្រឹងកិច្ចសហប្រតិបត្តិការ ដើម្បីធានាកសាង និងថែរក្សាសន្តិភាព និងសម្រេចបាននូវគោលដៅអភិវឌ្ឍន៍ដោយចីរភាព រួមទាំងការលើកកម្ពស់សមភាពយេនឌ័រ និងការផ្តល់ភាពអង់អាចដល់ស្រ្តី។ (២) ពង្រឹងទំនាក់ទំនងរវាងអាស៊ាន និងសហភាពអាហ្រ្វិច ទាំងក្នុងក្របខណ្ឌរដ្ឋាភិបាល សភា វិស័យឯកជន និងទំនាក់ទំនងប្រជាជននិងប្រជាជន។ សម្តេចរដ្ឋសភាធិបតីបានគូសបញ្ជាក់ថា កម្ពុជា និងតង់ហ្សានី អាចជាស្ពានតភ្ជាប់គ្នារវាងតំបន់ទាំងពីរអាស៊ីអាគ្នេយ៍-អាហ្វ្រិក។ (៣) ក្នុងបរិបទ នៃការប្រកួតប្រជែងអំណាច និងការបែកខ្ញែកសេដ្ឋកិច្ចអន្តរជាតិ យើងត្រូវតែពង្រឹងកិច្ចសហប្រតិបត្តិការអន្តរជាតិ តាមរយៈយន្តការពហុភាគីនិយម ដែលមានភាពបើកចំហរ និងបរិយាបន្ន ដោយផ្អែកលើការគោរពច្បាប់អន្តរជាតិ។ (៤) ពិនិត្យមើលឱកាស សម្រាប់កិច្ចសហប្រតិបត្តិការសេដ្ឋកិច្ចរវាងប្រទេសទាំងពីរ ជាពិសេសសេដ្ឋកិច្ចបៃតង និងសេដ្ឋកិច្ចឌីជីថល និង (៥) ពង្រឹងកិច្ចសហប្រតិបត្តិការលើសភាឌីជីថល។ជាការឆ្លើយតប លោកជំទាវគាំទ្រចំពោះការលើកឡើងរបស់ភាគីកម្ពុជា ហើយប្តេជ្ញាពង្រឹងកិច្ចសហប្រតិបត្តិការ នៃសភាទាំងពីរ តាមរយៈការបង្កើតក្រុមមិត្តភាពសភាទាំងពីរ ដែលនឹងបើកទំព័រថ្មីមួយ នៃកិច្ចសហប្រតិបត្តិការរវាងប្រទេសទាំងពីរ ដោយមានការចូលរួមទាំងវិស័យសាធារណៈ និងវិស័យឯកជន។ លោកជំទាវបញ្ជាក់ថា សភាតង់ហ្សានី រីករាយចែករំលែកបទពិសោធន៍បន្ថែមទៀតលើការអភិវឌ្ឍសភាឌីជីថល សន្តិសុខសង្គម ក៏ដូចជាការចូលរួមរបស់ស្រ្តី ក្នុងនយោបាយ។ លើសពីនេះ លោកជំទាវក៏បានសង្កត់ធ្ងន់ថា ស្រ្តីដើរតួនាទីយ៉ាងសំខាន់ ក្នុងការស្វែងរកដំណោះស្រាយសកល។លោកជំទាវក៏បានអញ្ជើញសម្តេចរដ្ឋសភាធិការធិបតីធ្វើទស្សនកិច្ចនៅប្រទេសតង់ហ្សានី នៅពេលវេលាសមស្របណាមួយ ដើម្បីពង្រឹង និងពង្រីកកិច្ចសហប្រតិបត្តិការរវាងសភា និងប្រជាជន នៃប្រទេសទាំងពីរឱ្យកាន់តែស៊ីជម្រៅថែមទៀត៕

ប៉ូឡូញនិយាយថា សហភាពអឺរ៉ុប យល់ព្រមកែប្រែកិច្ចព្រមព្រៀងដឹកជញ្ជូនជាមួយអ៊ុយក្រែន

2024/03/06 02:58:13 pm        77
Facebook Telegram Linkin
ក្រសួងហេដ្ឋារចនាសម្ព័ន្ធរបស់ប៉ូឡូញ បាននិយាយកាលពីថ្ងៃអង្គារ (០៥ មីនា) ថាគណៈកម្មការអឺរ៉ុបបានយល់ព្រមធ្វើការដើម្បីផ្លាស់ប្តូរកិច្ចព្រមព្រៀងរបស់សហភាពអឺរ៉ុប ជាមួយអ៊ុយក្រែន លើការដឹកជញ្ជូនទំនិញតាមផ្លូវគោក ដែលអ្នកដឹកទំនិញប៉ូឡូញបានទាមទារ។ការពិនិត្យឡើងវិញនៃកិច្ចព្រមព្រៀង ដែលបានដកចេញការរឹតបន្តឹងភាគច្រើនសម្រាប់អ្នកបើកបរដឹកជញ្ជូនទំនិញរវាងអ៊ុយក្រែន និងសហភាពអឺរ៉ុបនេះ គឺស្ថិតក្នុងចំណោមការទាមទារសំខាន់ៗរបស់អ្នកដឹកទំនិញប៉ូឡូញ ដែលបានបិទច្រកព្រំដែនមួយចំនួនជាមួយអ៊ុយក្រែន ដើម្បីតវ៉ាអស់រយៈពេលជាច្រើនសប្តាហ៍។កាលពីខែវិច្ឆិកា ក្រុមអ្នកដឹកជញ្ជូនប៉ូឡូញបានបិទច្រកព្រំដែនជាមួយអ៊ុយក្រែន ដោយតវ៉ាលើអ្វីដែលពួកគេនិយាយថាជាការប្រកួតប្រជែងមិនយុត្តិធម៌ពីសមភាគីអ៊ុយក្រែនរបស់ពួកគេ។ការតវ៉ានេះត្រូវបានផ្អាកក្នុងខែមករា បន្ទាប់ពីរដ្ឋាភិបាលនៅទីក្រុងវ៉ាសូវី បានសន្យាគាំទ្រការទាមទាររបស់ពួកគេនៅក្នុងកិច្ចពិភាក្សាជាមួយទីក្រុងព្រុចសែល និងពិភាក្សាអំពីការគាំទ្រផ្នែកហិរញ្ញវត្ថុរបស់សហភាពអឺរ៉ុប សម្រាប់ក្រុមហ៊ុនដឹកជញ្ជូនប៉ូឡូញដែលរងផលប៉ះពាល់៕

បារាំងនឹងចូលរួមជាមួយផែនការរបស់សាធារណរដ្ឋឆេក ដើម្បីទិញគ្រាប់កាំភ្លើងធំ៨០ម៉ឺនគ្រាប់ឲ្យអ៊ុយក្រែន

2024/03/06 02:21:13 pm        126
Facebook Telegram Linkin
ប្រធានាធិបតីបារាំងលោក អាម៉ានុយអែល ម៉ាក្រុង (Emmanuel Macron) បានគាំទ្រផែនការរបស់សារធារណរដ្ឋឆេក ក្នុងការបញ្ជូនគ្រាបកាំភ្លើងធំចំនួន ៨00.000 គ្រាប់ ទៅកាន់ប្រទេសអ៊ុយក្រែនពីបណ្តាប្រទេសនៅក្រៅសហភាពអឺរ៉ុប ដើម្បីជួយប្រទេសនេះ ទប់ទល់នឹងការឈ្លានពានពេញទំហឹងរបស់រុស្ស៊ី។លោកប្រធានាធិបតីបារាំង បានថ្លែងថា គំនិតផ្តួចផ្តើមរបស់ឆេក «មានប្រយោជន៍ខ្លាំងណាស់ យើងគាំទ្រវា យើងនឹងចូលរួមក្នុងផែនការនេះ»។លោក បានបន្ថែមថា៖ «ប្រទេសនេះ បានស្វែងរកគ្រាប់រំសេវនៅគ្រប់ទីកន្លែងដែលមាន ហើយត្រូវគ្នាជាមួយនឹងឧបករណ៍ ដែលយើងបានបញ្ជូន [ទៅអ៊ុយក្រែន]»។និយាយអំពីមធ្យោបាយក្នុងការស្វែងរកមូលនិធិ ដើម្បីផ្តល់ហិរញ្ញប្បទានដល់ផែនការរបស់ប្រទេសឆេក លោកម៉ាក្រុង បានស្នើថា វាអាចជា «ការប្រមូលផ្តុំទ្វេភាគី វាអាចជាកិច្ចសហប្រតិបត្តិការជាមួយភាគីទីបី និងការផ្តល់ហិរញ្ញប្បទានទ្វេភាគី»។ប្រធានាធិបតីបារាំងរូបនេះ បានស្នើថា៖«វាអាចជាការផ្តល់ហិរញ្ញប្បទានរបស់អឺរ៉ុប ដែលជាឧបករណ៍សន្តិភាពអឺរ៉ុប ដែលអាចត្រូវបានប្រមូលផ្តុំជាផ្នែកសម្រាប់គំនិតផ្តួចផ្តើមនេះ»។នៅក្នុងសន្និសិទសន្តិសុខទីក្រុងមុយនិច (Munich) ប្រធានាធិបតីឆេក លោក Petr Pavel បាននិយាយថា ប្រទេសនេះ បានរកឃើញវិធី ដើម្បីទទួលបានគ្រាប់កាំភ្លើងចំនួន ៨០០.000 ដែលខ្លួនអាចបញ្ជូនទៅកាន់អ៊ុយក្រែន ក្នុងរយៈពេលប៉ុន្មានសប្តាហ៍ ប្រសិនបើការផ្តល់មូលនិធិដឹកជញ្ជូន ត្រូវបានផ្តល់ឲ្យនោះ។ក្រសួងការពារជាតិឆេក បាននិយាយកាលពីមុនថា ខ្លួនកំពុងសម្របសម្រួលកិច្ចខិតខំប្រឹងប្រែងនេះ ហើយបានទទួលការប្តេជ្ញាចិត្តពីមុនពីប្រទេសកាណាដា ដាណឺម៉ាក និងប្រទេសផ្សេងទៀតដែលមិនមានបំណងចង់បង្ហាញអត្តសញ្ញាណ។ប្រទេសហូឡង់ ដែលបានផ្តល់២៥០លានអឺរ៉ូរួចហើយក្នុងការទិញគ្រាប់រំសេវ ហើយបែលហ្ស៊ិកដែលនឹងបរិច្ចាគ ២០០ លានអឺរ៉ូ បានប្រកាសជាសាធារណៈអំពីការចូលរួមរបស់ពួកគេ។

សហភាពអឺរ៉ុប បង្ហាញផែនការថ្មី ដើម្បីជំរុញឧស្សាហកម្មការពារជាតិ

2024/03/06 02:13:09 pm        97
Facebook Telegram Linkin
សហភាពអឺរ៉ុប បានបង្ហាញផែនការថ្មី ដើម្បីពង្រឹងឧស្សាហកម្មការពារជាតិរបស់ប្លុកនេះ បន្ទាប់ពីការវាយលុករបស់រុស្ស៊ីលើអ៊ុយក្រែន។ គណៈកម្មការអឺរ៉ុប ដែលជាស្ថាប័នប្រតិបត្តិរបស់សហភាពអឺរ៉ុប កាលពីថ្ងៃអង្គារ បានចេញផ្សាយយុទ្ធសាស្ត្រឧស្សាហកម្មការពារជាតិលើកដំបូងរបស់ខ្លួនមិនធ្លាប់មាន និងកម្មវិធីឧស្សាហកម្មការពារជាតិថ្មី ដើម្បីធ្វើឲ្យប្រសើរឡើងការត្រៀមខ្លួន និងសន្តិសុខរបស់សហភាពអឺរ៉ុប។ផែនការនេះ អំពាវនាវឱ្យរដ្ឋជាសមាជិក ទិញយុទ្ធោបករណ៍ការពារជាតិយ៉ាងហោចណាស់ ៤០ភាគរយទាំងអស់គ្នា ក្នុង «លក្ខណៈសហការ» នៅឆ្នាំ ២០៣០។ ផែនការនេះ ក៏និយាយផងដែរថា បណ្តាប្រទេសសហភាពអឺរ៉ុប គួរតែមានគោលបំណងចំណាយយ៉ាងហោចណាស់ ៥០ ភាគរយនៃថវិកាលទ្ធកម្មការពារជាតិថ្មីរបស់ពួកគេ នៅក្នុងប្លុក នៅឆ្នាំដដែលនេះ។ សហភាពអឺរ៉ុប និយាយថា ខ្លួននឹងគៀងគរថវិកាចំនួន ១,៥ពាន់លានអឺរ៉ូ ឬប្រហែល ១,៦ ពាន់លានដុល្លារ នៃថវិការបស់ខ្លួន ក្នុងរយៈពេលឆ្នាំ ២០២៥ ដល់ឆ្នាំ២០២៧។ ផែនការនេះ ក៏អំពាវនាវឱ្យមានការបង្កើតការិយាល័យនៅទីក្រុងគីវ ប្រទេសអ៊ុយក្រែន ដើម្បីអភិវឌ្ឍបច្ចេកវិទ្យា និងធ្វើឲ្យប្រសើរកិច្ចសហប្រតិបត្តិការរវាងយោធា និងផ្នែកធុរកិច្ច របស់ប្រទេសអ៊ុយក្រែន និងក្រុមហ៊ុនសហភាពអឺរ៉ុប។ ប្រទេសជាសមាជិកសហភាពអឺរ៉ុប បាននឹងកំពុងកាត់បន្ថយការវិនិយោគក្នុងវិស័យការពារជាតិ ចាប់តាំងពីចុងបញ្ចប់នៃសង្គ្រាមត្រជាក់។ អតីតប្រធានាធិបតីសហរដ្ឋអាមេរិក លោក ដូណាល់ ត្រាំ បានបង្ហាញការព្រួយបារម្ភថា ការចំណាយយោធានៅអឺរ៉ុប មិនគ្រប់គ្រាន់។ អនុប្រធានគណៈកម្មការអឺរ៉ុប លោកស្រី ម៉ាហ្គ្រេត វ៉េស្តាជឺ(Margrethe Vestager) បាននិយាយកាលពីថ្ងៃអង្គារថា ប្រទេសជាសមាជិកសហភាពអឺរ៉ុប ត្រូវតែទទួលខុសត្រូវបន្ថែមទៀតសម្រាប់សន្តិសុខរបស់ពួកគេ ដោយមិនគិតពីសក្ដានុពលនៃការបោះឆ្នោត នៅក្នុងសហរដ្ឋអាមេរិក។ លោកស្រី បានបញ្ជាក់ ពីសារៈសំខាន់របស់សហភាពអឺរ៉ុប ដែលមានយុទ្ធសាស្ត្រក្នុងវិស័យការពារជាតិរបស់ខ្លួន។

យោធាអាមេរិកទម្លាក់ជំនួយបន្ថែមដល់តំបន់ហ្កាហ្សា នឹងមិនដាក់ពង្រាយកងទ័ពទេ

2024/03/06 02:10:14 pm        116
Facebook Telegram Linkin
យោធាអាមេរិក បានអនុវត្តការទម្លាក់ជំនួយមនុស្សធម៌ផ្លូវអាកាសថ្មីដល់ប្រជាជនប៉ាឡេស្ទីន នៅតំបន់ហ្កា ហ្សាកាលពីថ្ងៃអង្គារ ដោយទម្លាក់តាមឆ័ត្រយោងនូវអាហារជាង ៣៦.៨០០កញ្ចប់ ខណៈដែលរដ្ឋបាល លោកបៃដិន បានជំរុញមន្ត្រីជាន់ខ្ពស់អ៊ីស្រាអែលឲ្យទទួលបានជំនួយកាន់តែច្រើន ក្នុងអំឡុងពេលកិច្ចពិភាក្សា នៅទីក្រុងវ៉ាស៊ីនតោន។ការវាយលុករបស់អ៊ីស្រាអែល នៅតំបន់ហ្កាហ្សា ដែលត្រូវបានគាំទ្រដោយសហរដ្ឋអាមេរិក បានផ្លាស់ប្តូរទីលំនៅភាគច្រើននៃប្រជាជន ២,៣លាននាក់ និងនាំឲ្យមានការខ្វះខាតស្បៀងអាហារ ទឹក និងថ្នាំពេទ្យ។ស្ថានភាពនេះ គឺអាក្រក់បំផុតនៅភាគខាងជើងនៃតំបន់ហ្កាហ្សា ដែលហួសពីលទ្ធភាពនៃភ្នាក់ងារជំនួយ ឬកាមេរ៉ាព័ត៌មាន ហើយជាគោលដៅនៃការធ្លាក់ចុះ កាលពីថ្ងៃអង្គារ។ អាជ្ញាធរសុខាភិបាលតំបន់ហ្កាហ្សា បាននិយាយថា កុមារចំនួន ១៥នាក់ បានស្លាប់ ដោយសារកង្វះអាហារូបត្ថម្ភ ឬខ្វះជាតិទឹក នៅក្នុងមន្ទីរពេទ្យតែមួយ។មន្ត្រីអាមេរិក បាននិយាយថា ជំនួយដែលទម្លាក់តាមអាកាស គឺជាជម្រើសដ៏ថ្លៃ និងមិនគ្រប់គ្រាន់សម្រាប់ជំនួយដែលដឹកជញ្ជូនមក ដោយសារទំហំនៃវិបត្តិមនុស្សធម៌។ រដ្ឋបាលរបស់ប្រធានាធិបតី ចូ បៃដិន កំពុងជំរុញឲ្យមានជំនួយចូលកាន់តែច្រើនឡើងតាមផ្លូវគោក។រដ្ឋមន្ត្រីការពារជាតិអាមេរិក លោក Lloyd Austinកាលពីថ្ងៃអង្គារ បានជួបជាមួយលោក Benny Gantz សមាជិកនៃគណៈរដ្ឋមន្ត្រីរបស់អ៊ីស្រាអែល នៅមន្ទីរបញ្ចកោណ ហើយបានជំរុញឲ្យមានការគាំទ្ររបស់លោកសម្រាប់អ៊ីស្រាអែល ក្នុងការធ្វើការបន្ថែមទៀត ដើម្បីជួយជនស៊ីវិល។

រដ្ឋបាលរាជធានីភ្នំពេញ ចុះចែកបណ្ណកម្មសិទ្ធិជូនប្រជាពលរដ្ឋចំនួន២៦គ្រួសារ

2024/03/06 01:53:28 pm        113
Facebook Telegram Linkin
រដ្ឋបាលរាជធានីភ្នំពេញក្រោមការដឹកនាំឯកឧត្តម ឃួង ស្រេង បានចាត់អោយលោក ធឹម សំអាន អភិបាលព្រែកព្នៅ និងប្រធានភូមិបាលខណ្ឌ ចុះចែកបណ្ណកម្មសិទ្ធិ ជូនប្រជាពលរដ្ឋដែលរស់ នៅលើដី មិនស្របច្បាប់នៅភូមិសំរោងត្បូង អោយរស់នៅលើដីស្របច្បាប់ ដែលរដ្ឋបាលរាជធានី ភ្នំពេញ បានរៀបចំជូនប្រជាពលរដ្ឋចំនួនសរុប២៦គ្រួសារ នៅព្រឹកថ្ងៃទី០៦ខែមីនា ឆ្នាំ២០២៤ នេះ។ក្នុងកម្មវីធីចែកបណ្ណកម្មសិទ្ធិ លោក ធឹម សំអាន អភិបាលព្រែកព្នៅ បានអំពាវនាវ ដល់ប្រជាពលរដ្ឋ រស់នៅតាមបណ្ដោយផ្លូវលេខ១៥១ លើដី កម្មសិទ្ធិរដ្ឋ ចំនួនប្រមាណ៧០គ្រួសារ សុំមកទទួល យកដី ខាងរដ្ឋបាលរាជធានី និង រដ្ឋបាលខណ្ឌរៀបចំជូនដោយក្នុងមួយគ្រួសារទទួលបានដីចំនួន ០១ឡូត៍ ទំហំ៤ម៉ែត្រកន្លះ គុណនិង១៨ម៉ែត្រ មានបណ្ណកម្មសិទ្ធិស្របច្បាប់ ។ក្នុងពិធីនោះ លោកអភិបាលខណ្ឌ សំណូមពរដល់ប្រជាពលរដ្ឋដែលរស់នៅលើដីរដ្ឋគ្មាន​បណ្ឌកម្មសិទ្ធិត្រឹមត្រូវនោះ ចូលរួមជាមួយអាជ្ញាធរ ក្នុងការដោះស្រាយ ​ដើម្បីផលប្រយោជន៍រួម ដោយឈរលើគោលនយោបាយឈ្នះឈ្នះ របស់ប្រមុខរដ្ឋាភិបាល៕អត្ថបទ៖ កុម្ភៈ

ឯកឧត្តម អ៊ិន ចន្ថា ចុះផ្សព្វផ្សាយ​កម្មវិធី​អាទិភាពរបស់ក្រសួង ដល់មន្ត្រី នៃ​មន្ទីរ​អភិវឌ្ឍន៍​ជនបទ​ ខេត្តពោធិ៍សាត់

2024/03/06 01:35:26 pm        67
Facebook Telegram Linkin
ខេត្តពោធិ៍សាត់ ៖ មន្ទីរអភិវឌ្ឍន៍ជនបទខេត្តពោធិ៍សាត់ បានរៀបចំ​កិច្ច​ប្រជុំ​ផ្សព្វផ្សាយ​កម្ម​វិធី​អាទិភាព​ទាំង​បួន របស់ក្រសួងអភិវឌ្ឍន៍ជនបទ ជូនដល់ថ្នាក់ដឹកនាំ និ​ង​មន្ត្រី​រាជការ នៃ​មន្ទីរ​អភិវឌ្ឍន៍​ជន​បទខេត្តពោធិ៍សាត់ ក្រោមអធិបតីភាព ឯកឧត្តម អ៊ិន ចន្ថា រដ្ឋលេខាធិការ តំណាង​ដ៏ខ្ពង់ខ្ពស់ ឯកឧត្តម ឆាយ ប្ញទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ។លោក ធីម សុធារ៉ា ប្រធានមន្ទីរ បានឡើងមានមតិស្វាគមន៍ និងថ្លែងអំណរគុណ ជូន​ចំពោះ ឯកឧត្តម​រដ្ឋមន្ត្រី តាមរយៈឯកឧត្តម រដ្ឋលេខាធិការ ដែលកន្លងមក តែងតែយកចិត្តទុកដាក់ខ្ពស់ ដល់​មន្ត្រីរាជការរបស់មន្ទីរ តាមរយៈការចុះមកសំណេៈសំណាលដោយផ្ទាល់ និងបើក​កិច្ច​ប្រជុំ​ផ្សព្វផ្សាយ​កម្មវិធីនានារបស់ក្រសួង ដល់មន្ត្រីរាជការ ពិសេសការផ្សព្វ​ផ្សាយ​កម្ម​វិធី​អាទិភាព​ទាំង​បួន​របស់ក្រសួងនាពេលនេះ។ចំពោះខ្លឹមសារស្តីពីកម្មវិធីអាទិភាពទាំងបួន របស់ក្រសួងអភិវឌ្ឍន៍ជនបទរួមមាន៖ ១-ការ​អភិវឌ្ឍ​ហេដ្ឋា​រចនាសម្ព័ន្ធរូបវន្ត និងគមនាគមន៍ ២-ការកែលម្អ​លក្ខខណ្ឌ​នៃ​ការ​រស់​នៅ​របស់​សហគមន៍​ជន​បទ ៣-ការធ្វើពិពិធកម្មសកម្មភាពសេដ្ឋកិច្ចជនបទ និង៤-ពង្រឹងសេវាគាំទ្ររដ្ឋបាល និង​កិច្ចការ​ទូទៅ និងផែនការសកម្មភាពរបស់មន្ទីរអភិវឌ្ឍន៍ជនបទខេត្ត សម្រាប់ឆ្នាំ២០២៤ ។ ឯកឧត្តម អ៊ិន ចន្ថា បានវាយតម្លៃខ្ពស់ចំពោះថ្នាក់ដឹកនាំ និងមន្ត្រីរាជការរបស់មន្ទីរ ដែល​បាន​ខិតខំ​យក​ចិត្តទុកដាក់ស្តាប់ និងចូលរួមជាមតិយោបល់យ៉ាងផុសផុល ដែលអាច​ស​បញ្ជាក់​ថា​មន្ត្រី​ជំនាញ​តាម​ការិយាល័យនីមួយៗ កាន់តែបានយល់ច្បាស់អំពី ផែនការ​សកម្មភាព​របស់​ខ្លួន​ដែល​ត្រូវ​អនុវត្ត​ក្នុងឆ្នាំ២០២៤នេះតទៅ។ ជាមួយគ្នានោះដែរ ឯកឧត្តម បានបន្តលើក​ឡើង​អំពី​យុទ្ធ​សាស្ត្រ​បញ្ចកោណ ដំណាក់កាលទី១ របស់រាជរដ្ឋាភិបាល អាណត្តិទី៧ ក្រោមការដឹកនាំ​ប្រកប​ដោយ​កិត្តិ​បណ្ឌិត របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជា​ណា​ចក្រ​កម្ពុជា​ ដែលបានដាក់ចេញនូវបេសកកម្មជាប្រវត្តិសាស្ត្រ ដើម្បីពន្លឿន​ការ​អភិវឌ្ឍ​ឈាន​ឆ្ពោះ​ទៅ​កាន់​ចក្ខុ​វិស័យកម្ពុជា ជាប្រទេសមានចំណូលកម្រិតខ្ពស់នៅឆ្នាំ២០៥០ តាមរយៈ​ការ​ដាក់​ចេញ​នូវ​យុទ្ធសាស្រ្ត​បញ្ចកោណដំណាក់កាលទី១ ដែលមានបាវចនា ៥ គឺ កំណើន ការងារ សមធម៌ ប្រសិទ្ធ​ភាព និងចីរភាព ដោយផ្អែកលើអាទិភាពគន្លឹះចំនួន ៥ មនុស្ស ផ្លូវ ទឹក ភ្លើង និងបច្ចេក​វិទ្យា​ឌីជីថល។ ក្នុងនោះដែរឯកឧត្តម អ៊ិន ចន្ថា សូមឲ្យមន្ត្រីរាជ​ការ​គ្រប់​ជាន់​ថ្នាក់​នៃ​មន្ទីរ​អភិវឌ្ឍន៍​ជន​បទ​ខេត្ត​ពោធិ៍សាត់ ត្រូវបំពេញការងារតួនាទីប្រកបដោយភាពប្តូរផ្តាច់ សាមគ្គិភាព វិន័យ ឆន្ទះ បូករួម និងការលើកទឹកចិត្ត ដើម្បីបម្រើផលប្រយោជន៍ជូនជាតិមាតុភូមិនិងប្រជាជន ។ក្រោយបញ្ចប់កិច្ចប្រជុំ ឯកឧត្តម អ៊ិន ចន្ថា រួមនិងលោក ធីម សុធារ៉ា និងមន្ត្រីជំនាញ បាន​អញ្ជើញ​ចុះ​ទៅ​ពិនិត្យការដ្ឋានស្ថាបនាផ្លូវបេតុងប្រវែង១២០០ម៉ែត្រ និងលូកាត់ផ្លូវប្រវែង៨ម៉ែត្រ១កន្លែង ដែល​កំពុង​ស្ថាបនានៅលើកំណាត់ផ្លូវត្រពាំងជង-បត់រំដួល ក្នុងស្រុកបាកាន ដែល​ស្ថិត​ក្នុង​គម្រោង​គ្រោះ​ទឹកជំនន់ឆ្នាំ២០២៣ ដោយបច្ចុប្បន្នសម្រេចបាន៧៥ភាគរយ៕ អត្ថបទ៖ ភិរុណ ពៅ 

នាយករដ្ឋមន្ត្រីលីបង់៖ ការចរចាបញ្ចប់ការប្រយុទ្ធគ្នាតាមព្រំដែនលីបង់និងអ៊ីស្រាអែល នឹងចាប់ផ្តើមក្នុងខែរ៉ាម៉ាដាន

2024/03/06 01:33:09 pm        83
Facebook Telegram Linkin
នាយករដ្ឋមន្ត្រីចាំផ្ទះរបស់ប្រទេសលីបង់ លោក ណាជីព មីកាទី (Najib Mikati) បាននិយាយកាលពីថ្ងៃអង្គារថា កិច្ចចរចាដោយប្រយោល ដើម្បីបញ្ចប់អរិភាពនៅតាមព្រំដែនប្រទេសលីបង់ និងអ៊ីស្រាអែល នឹងចាប់ផ្តើមក្នុងអំឡុងខែដ៏បរិសុទ្ធរបស់ពលរដ្ឋមូស្លីមនៃខែបុណ្យរ៉ាម៉ាដាន ដែលចាប់ផ្តើមនៅសប្តាហ៍ក្រោយ។ លោក Mikati បាននិយាយថា ប្រធានសភារបស់ប្រទេសលីបង់ លោក Nabih Berri ដែលស្និទ្ធស្នាលជាមួយក្រុម ហេសបូឡា កំពុងសិក្សាពីសំណើ ដែលស្នើដោយបេសកជនពិសេសសហរដ្ឋអាមេរិក លោក អាម៉ូស ហូចស្តេន(Amos Hochstein) ដែលបានទៅដល់ទីក្រុងបេរូត កាលពីថ្ងៃ ចន្ទ។ ប្រទេសលីបង់ បានចោទប្រកាន់អ៊ីស្រាអែល ពីបទ រំលោភលើសេចក្តីសម្រេចជាង ៣០.០០០ដង និងបាននិយាយថា ប្រទេសលីបង់ត្រៀមខ្លួនជាស្រេចដើម្បីអនុវត្តសេចក្តីសម្រេចឱ្យបានពេញលេញ។ លោក Mikati បាននិយាយថា សំណើរបស់លោក Hochstein ក៏រួមបញ្ចូលផងដែរនូវ ផែនការអភិវឌ្ឍន៍សម្រាប់ប្រទេសលីបង់ភាគខាងត្បូង ដែលនឹងត្រូវបានគាំទ្រដោយរដ្ឋអារ៉ាប់ និងប្រទេសផ្សេងទៀតនៅខាងក្រៅតំបន់។ ក្រុមប្រដាប់អាវុធហេសបូឡា ដ៏មានឥទ្ធិពលនៅប្រទេសលីបង់ និងអ៊ីស្រាអែល បាននិងកំពុងប្រយុទ្ធគ្នា រយៈពេលជិត ៥ ខែមកហើយ ស្របគ្នាជាមួយសង្រ្គាមនៅតំបន់ហ្កាហ្សា ដែលជំរុញឱ្យមានកិច្ចខិតខំប្រឹងប្រែងផ្នែកការទូត ក្នុងគោលបំណងទប់ស្កាត់ការរីកជម្លោះកាន់តែធំ។ក្រុមហេសបូឡា ដែលជាសម្ព័ន្ធមិត្តរបស់ក្រុមហាម៉ាស គឺជាក្រុមមួយក្នុងចំណោមក្រុមសម្ព័ន្ធមិត្តអ៊ីរ៉ង់ ជាច្រើន នៅជុំវិញតំបន់មជ្ឈិមបូព៌ា ដែលបានឈានចូលដល់ការប្រយុទ្ធគ្នាចាប់តាំងពីថ្ងៃទី ៧ ខែតុលា នៅពេលដែលក្រុមសកម្មប្រយុទ្ធហាម៉ាស បានវាយលុកអ៊ីស្រាអែលពីតំបន់ហ្កាហ្សាស្ទ្រីប ដោយបង្កឱ្យមានការវាយលុកជើងគោក ដែនអាកាស និងតាមសមុទ្រ យ៉ាងខ្លាំងក្លារបស់អ៊ីស្រាអែល លើតំបន់ហ្កាហ្សា។

បណ្ដាញសង្គម

ព័ត៌មានថ្មីៗ

គ្រូជំនាញ កំពុងផ្ទេរចំណេះដឹងផ្នែកចម្លាក់ពុម្ពទៅកាន់ពលរដ្ឋនៅក្រុងរុនតាឯកតេជោសែន ក្នុងគម្រោងបណ្តុះបណ្តាលជំនាញមរតកដូនតា
05/02/2026 11:05 AM
Facebook Telegram Linkin
សហជីព ប្តេជ្ញារួមគ្នាលើកកម្ពស់វិស័យការងារ និងជំរុញសហគ្រាសមួយ ជាសហគមន៍​សុខសាន្ត​មួយ​កាន់តែប្រសើរថែមទៀត
05/02/2026 10:05 AM
Facebook Telegram Linkin
ការស្ទង់មតិ បានរកឃើញថាពលរដ្ឋអាមេរិក៦១ភាគរយ ជឿថាការវាយប្រហារលើអ៊ីរ៉ង់ គឺជាកំហុស
05/02/2026 10:05 AM
Facebook Telegram Linkin
លោក Trump ប្រកាសដំឡើងពន្ធ២៥ភាគរយលើរថយន្ត និងរថយន្តដឹកទំនិញរបស់សហភាពអឺរ៉ុប
05/02/2026 10:05 AM
Facebook Telegram Linkin
សម្តេចតេជោ ហ៊ុន សែន កោតសរសើរពីការរីកចម្រើនក្នុងខេត្តកំពង់ស្ពឺ ចូលរួម​រុញ​កំណើន​សេដ្ឋកិច្ច​ឡើង
05/02/2026 10:05 AM
Facebook Telegram Linkin
សហរដ្ឋអាមេរិក កំណត់គោលដៅលើស្ថានីយប្រេងរបស់ចិន ក្នុងទណ្ឌកម្មថ្មីលើអ៊ីរ៉ង់
05/02/2026 09:05 AM
Facebook Telegram Linkin
ប្រមុខការទូតកម្ពុជាថ្លែងថា ការលុបអនុស្សរណៈយោគយល់គ្នាឆ្នាំ២០០១ ពីសំណាក់ភាគីថៃ នឹង​ធ្វើ​ឲ្យប៉ះពាល់ដល់ទំនាក់ទំនងរវាងកម្ពុជា និងថៃ
05/02/2026 09:05 AM
Facebook Telegram Linkin
សហរដ្ឋអាមេរិក នឹងដកកងទ័ពប្រហែល ៥.០០០នាក់ ចេញពីប្រទេសអាល្លឺម៉ង់
05/02/2026 09:05 AM
Facebook Telegram Linkin
លោក Trump និយាយថា លោក «មិនពេញចិត្ត» ជាមួយនឹងសំណើចរចាថ្មីរបស់អ៊ីរ៉ង់ទេ
05/02/2026 09:05 AM
Facebook Telegram Linkin
សម្តេចតេជោ ណែនាំដល់មន្ត្រីរាជការ ក្រុមប្រឹក្សាខេត្ត ឃុំ សង្កាត់ បន្តយកចិត្តទុក​ដាក់​បំពេញ​តួនាទី​ភារកិច្ច​បម្រើជាតិ និងប្រជាជនឱ្យបានល្អប្រសើរ
05/02/2026 09:05 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.