នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
TOP STORY | មន្រ្ដីនាំពាក្យក្រសួងការបរទេសកម្ពុជាទាត់ចោលការចោទប្រកាន់ផ្ទុយពីការពិតថា កងទ័ពព្រំដែនកម្ពុជា បានរំលោភបំពានទៅលើអធិបតេយ្យភាពរបស់ប្រទេសថៃ
TOP STORY | ប្រមុខការពារជាតិកម្ពុជាបដិសេធចំពោះថៃដែលស្នើឲ្យកម្ពុជាដកកងទ័ពចេញពីទីតាំងតំបន់មុំបី
ឯកអគ្គរដ្ឋទូតបារាំងប្រចាំកម្ពុជាកោតសរសើរចំពោះរចនាបថ និងសមត្ថភាពព្រលានយន្តហោះអន្តរជាតិតេជោ
សម្តេចធិបតី និងលោកជំទាវបណ្ឌិតនឹងអញ្ជើញចូលរួមសន្និសីទអង្គការសហប្រជាជាតិ ស្តីពីមហាសមុទ្រ លើកទី៣ នៅទីក្រុងនីស នៅថ្ងៃទី៩-១១ ខែមិថុនា ខាងមុខនេះ

នយោបាយ​ និង ការអភិវឌ្ឍន៍

ខេត្តព្រះវិហារប្រារព្ធទិវាពិភពលោកប្រយុទ្ធ នឹងជំងឺអេដស៍ ១ធ្នូ ឆ្នាំ២០២៣ ក្រោមប្រធានបទ “សហគមន៍តែមួយ ដឹកនាំឆ្ពោះទៅបញ្ចប់ជំងឺអេដស៍”

2023/12/08 02:57:10 pm        120
Facebook Telegram Linkin
ព្រះវិហារ៖ នៅរសៀលថ្ងៃទី០៧ ខែធ្នូ ឆ្នាំ២០២៣ ឯកឧត្តម គីម រិទ្ធី អភិបាលនៃគណៈអភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជា ​ខេត្តព្រះវិហារ បានអញ្ជើញអធិបតីភាពក្នុងទិវាពិភពលោកប្រយុទ្ធនឹងជំងឺអេដស៍១ធ្នូ ឆ្នាំ២០២៣ ក្រោម​ប្រធានបទ“សហគមន៍តែមួយ ដឹកនាំឆ្ពោះទៅបញ្ចប់ជំងឺអេដស៍” និង​រួម​បញ្ចូល​ទិវាអន្តជាតិនៃជនពិការ ​៣ធ្នូ ទិវាអ្នកស្ម័គ្រចិត្ត ​៥ធ្នូ នៅបរិវេណសាខាកាកបាទក្រហមកម្ពុជាខេត្តព្រះវិហារ។មានវត្តមានចូលរួមនាឱកាសនោះ មានសមាជិក សមាជិកា គណៈកម្មាធិការសាខា ក្រុមប្រតិបត្តសាខា អ្នកស្ម័គ្រចិត្ត យុវជនកាកបាទក្រហមកម្ពុជា​ អ្នករស់នៅជាមួយមេរោគអេដស៍ និងជំងឺអេដស៍ ​ជនមានពិការ មកពីក្រុង-ស្រុកទាំង៧​ ក្នុងខេត្តព្រះវិហារ និងអ្នកពាក់ព័ន្ធជាច្រើន​រូបទៀត។ លោក ពឹង ទ្រីដា អនុប្រធានគណៈកម្មាធិការសាខា បានអានសារលិខិតសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ​ប្រធានកាកបាទក្រហមកម្ពុជា និងជាឥស្សរជន​ឆ្នើមថ្នាក់​ជាតិនៃវេទិកា​ភាព​ជាអ្នកដឹកនាំតំបន់អាស៊ី-ប៉ាស៊ីហ្វិក​ ឆ្លើយតបមេរោគអេដស៍ ជំងឺអេដស៍ និងការអភិវឌ្ឍនៅកម្ពុជា។ មានមតិសំណេះសំណាលនាឱកាសនោះ​ ឯកឧត្តម គីម រិទ្ធី ប្រធានគណៈកម្មាធិការសាខា បាន​ពាំនាំនូវប្រសាសន៍ផ្ដាំផ្ញើសួរសុខទុក្ខពីសំណាក់​ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហមកម្ពុជា ដែលបានយកចិត្តទុកដាក់នូវសុខទុក្ខប្រជាពលរដ្ឋ ទៅលើការឈាន​ឆ្ពោះទៅ​ការ​បញ្ចប់អេដស៍ នៅឆ្នាំ២០២៥ ក្នុងន័យនេះ​មានគោលបំណងទាញការយកចិត្តទុក​ដាក់​របស់បងប្អូន និងក្មួយៗយុវជន ឱ្យបន្តការប្រុងប្រយ័ត្នក្នុងការទប់ស្កាត់ការចម្លងមេរោគ​អេដស៍/ជំងឺអេដស៍។​ ហើយត្រូវចូលរួមអនុវត្តតាមរយៈសារលិខិតសំខាន់ៗទាំង ៦ចណុច របស់​សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់​ជាតិនៃវេទិកាភាពជាអ្នកដឹកនាំតំបន់អាស៊ី-ប៉ាស៊ីហ្វិក ​ឆ្លើយតបមេរោគអេដស៍ ជំងឺអេដស៍ និងការអភិវឌ្ឍនៅកម្ពុជា។ក្នុងឱកាសនោះដែរ ឯកឧត្តម បានថ្លែងកោតសរសើរដល់អ្នកស្ម័គ្រចិត្ត ​និងយុវជនកាកបាទក្រហម ដែលតែងតែ​ខិតខំបំពេញតួនាទីរបស់ខ្លួននាពេលកន្លងមក​បានយ៉ាងល្អប្រសើរ ព្រមទាំង​ផ្ដាំផ្ញើ​ជម្រុញដល់បងប្អូនជនពិការភាព និងអ្នករស់នៅជាមួយមេ​រោគអេដស៍​ទាំងអស់ ថែរក្សា​សុខភាព​អោយបានល្អ ឧស្សាហ៍ហាត់ប្រាណ​ ហូបស្អាត ​ផឹកស្អាត លាងដៃជាមួយសាប៊ូជាប្រចាំ។ ក្នុងពិធីនេះ ក៏មានការផ្តល់អំណោយមនុស្សធម៌ ដល់គ្រួសារអ្នករស់នៅជាមួយមេរោគអេដស៍ ​ចំនួន ៥២គ្រួសារ ​និងជនមានពិការភាព ចំនួន ១៥គ្រួសារ ក្នុងមួយ​គ្រួសារទទួលបាន៖ អង្ករ ២៥គីឡូក្រាម មី ១កេស ត្រីខ ១យួរ ​ទឹកស៊ីអ៊ីវ ១យួរ និងថវិកាចំនួន ៥០,០០០រៀល។ បន្ថែមពីនេះ ​សាខាក៏បានឧបត្ថម្ភដល់អ្នកស្ម័គ្រចិត្ត​ ចំនួន ២៥នាក់ ​នូវថវិកាចំនួន ​២០,០០០រៀល ប័ណ្ណសរសើរ១ សាប៊ូម្សៅ ១គីឡូ, យុវជនកាកបាទក្រហមកម្ពុជា ​ចំនួន ២៥នាក់ ថវិកាចំនួន ២០,០០០រៀល ប័ណ្ណសរសើរ១ ​សៀវភៅ២ក្បាល និងប៊ិច ១ដើម៕

អាជ្ញាធរខណ្ឌដូនពេញ ចែកអំណោយដល់ពលរដ្ឋមានភាពខ្វះខាត ក្នុងមូលដ្ឋានចំនួន៥០គ្រួសារ

2023/12/08 02:40:02 pm        80
Facebook Telegram Linkin
ភ្នំពេញ៖ អាជ្ញាធរខណ្ឌដូនពេញ ចែកអំណោយមនុស្សធម៌របស់កាកបាទក្រហមកម្ពុជា តាមរយៈ ឯកឧត្តម ឃួង ស្រេង ប្រធានសាខាកាកបាទក្រហមកម្ពុជារាជធានីភ្នំពេញ ជូនដល់បងប្អូនប្រជាពលរដ្ឋក្រីក្រ, ជនងាយរងគ្រោះ, ជនពិការ និងអ្នកផ្ទុកកើតមេរោគអេដស៍ សរុបចំនួន ៥០គ្រួសារ ដែលមកពីសង្កាត់ទាំង១១ នៃខណ្ឌដូនពេញ រាជធានីភ្នំពេញ។ពិធីចែកអំណោយ បានធ្វើឡើង នៅព្រឹកថ្ងៃសុក្រ ទី០៨ ខែធ្នូ ឆ្នាំ២០២៣ លោក ជា ខេមា អភិបាល នៃគណៈអភិបាលខណ្ឌដូនពេញ និងជាប្រធានកិត្តិយសអនុសាខាកាកបាទក្រហមកម្ពុជា​ខណ្ឌដូនពេញ​ ព្រមទាំងមន្រ្ដីរាជការនៃរដ្ឋបាលខណ្ឌ បាននាំយកអំណោយមនុស្សធម៌របស់​កាកបាទ​ក្រហមកម្ពុជា ​ប្រគល់ជូនប្រជាពលរដ្ឋក្រីក្រ, ជនងាយរងគ្រោះ, ជនពិការ និងអ្នកផ្ទុកកើតមេរោគអេដស៍ សរុបចំនួន ៥០គ្រួសារ ដែលមកពីសង្កាត់ទាំង១១ នៃខណ្ឌដូនពេញ ដោយក្នុងម្នាក់ៗទទួលបានរួមមាន៖ អង្ករ ០១បាវ, មី ០១កេស, ទឹកស៊ីអ៊ីវ ០១យួរ, ឃីត ១កញ្ចប់ និងថវិកាចំនួន ២០,០០០រៀល។ក្នុងនោះផងដែរ លោក ជា ខេមា ប្រធានកិត្តិយសអនុសាខា ក៏បានពាំនាំប្រសាសន៍សួរសុខ​ទុក្ខរបស់ ​សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ​ប្រធានកាកបាទក្រហមកម្ពុជា​ និងឯកឧត្តម ឃួង ស្រេង អភិបាល ​ប្រធានសាខាកាកបាទក្រហមកម្ពុជារាជធានីភ្នំពេញ សូមគោរពជូនពរ​បងប្អូនប្រជាពលរដ្ឋ អុំពូមីង ​បងប្អូនទាំងអស់ សូមជួបតែសេចក្ដីសុខ ​សុភមង្គលក្នុងក្រុមគ្រួសារ ។ តាមរយៈកាយវិការដ៏ល្អប្រពៃនេះ ​សបញ្ជាក់ឲ្យឃើញថា ​សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាក​បាទ​ក្រហមកម្ពុជា បានគិតគូយ៉ាងយកចិត្តទុកដាក់​បំផុត​អំពីសុខទុក្ខរបស់​បងប្អូន​ប្រជាពលរដ្ឋក្នុងក្របខណ្ឌទូទាំងប្រទេស​ និងក្នុងក្របខណ្ឌរាជធានីភ្នំពេញផងដែរ ដែលសម្ដេចទាំងទ្វេរ ​៕ អត្ថបទ៖ កុម្ភៈ

សម្ដេចធិបតី ហ៊ុន ម៉ាណែត៖ «មួយជីវិតសម្តេចតេជោ គឺតស៊ូដើម្បីជាតិ និងប្រជាជន»

2023/12/08 02:31:36 pm        151
Facebook Telegram Linkin
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងថា មួយជីវិតសម្តេចតេជោ ហ៊ុន សែន អតីតនាយករដ្ឋមន្រ្ដីនៃកម្ពុជា គឺបានតស៊ូដើម្បីជាតិ និងប្រជាជន។ ដូច្នេះគំនិតផ្ដួចផ្ដើមអភិវឌ្ឍន៍តំបន់រុនតាឯក និងតំបន់ពាក់ស្នែងរបស់សម្ដេចតេជោ គឺមិនមែនយកដីនៅរមណីយដ្ឋានអង្គរនេះ ទៅវិនិយោគឱ្យក្រុមហ៊ុនឯកជនមកធ្វើអគារ ១០០ ជាន់នោះទេ ប៉ុន្ដែគឺខិតខំថែរក្សាប្រាង្គប្រាសាទសម្បត្តិវប្បធម៌កេរ្តិ៍ដំណែលដូនតាខ្មែរ សម្រាប់កូនចៅជំនាន់ក្រោយ ជាពិសេសពលរដ្ឋនៅខេត្តសៀមរាប។សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានឱកាសអញ្ជើញសំណេះសំណាលជាមួយប្រជាពលរដ្ឋ រស់នៅភូមិធម្មជាតិរុនតាឯក និងតំបន់ពាក់ស្នែងសរុបជិត៣ពាន់នាក់ នៅព្រឹកថ្ងៃទី៨ ខែធ្នូ ឆ្នាំ២០២៣នេះដោយបានចោទជាសំណួរថា ក្រុមប្រឆាំងមួយចំនួនពួកគេសួរថា តើរវាងប្រសាទអង្គរវត្ត និងប្រជាជនជ្រើសរើសយកមួយណា? ចម្លើយ របស់សម្ដេចគឺរាជរដ្ឋាភិបាល ជ្រើសរើសយកទាំងពីរ ដោយមិនទុកមួយណាចោលឡើយ។ក្នុងឱកាសនោះសម្ដេចធិបតី បានថ្លែងអំណរគុណដល់គណៈកម្មការអន្តរក្រសួង ដែលបាន​រួមគ្នាស្ថាបនា ហេដ្ឋារចនាសម្ព័ន្ធនានាក្នុងភូមិធម្មជាតិរុនតាឯក និងតំបន់ពាក់ស្នែងជូន​ដល់​ប្រជាពលរដ្ឋសរុបជាង ៤ ពាន់គ្រួសារ។សម្ដេចធិបតីជំរុញដល់ក្រុមការងារអន្តរក្រសួងខិតខំបន្តអនុវត្តការងារអភិវឌ្ឍន៍តំបន់នេះឱ្យសម្រេចបានជោគជ័យនាពេលខាងមុខ។ក្នុងឱកាសនោះសម្ដេចធិបតី ហ៊ុន ម៉ាណែត ក៏បានបញ្ជាក់ថា ការអភិវឌ្ឍភូមិធម្មជាតិរុនតាឯក និងតំបន់ពាក់ស្នែង អាចសម្រេចទៅបាន គឺត្រូវមានការចូលរួមពីប្រជាពលរដ្ឋទាំងអស់​នៅក្នុងតំបន់នេះ​មិនអាចអភិវឌ្ឍន៍ទៅបានដោយគ្មានការចូលរួមពីសំណាក់ប្រជាពលរដ្ឋនោះទេ។ សម្ដេចធិបតីបានថ្លែងអំណរគុណដល់ប្រជាពលរដ្ឋដែលបានស្ម័គ្រចិត្តចាកចេញពីតំបន់រមណីយដ្ឋានអង្គរមករស់នៅតំបន់នេះ៕អត្ថបទ៖ វ៉ន ដារ៉ា

សម្ដេចធិបតីផ្ដល់ក្របខណ្ឌដល់មន្រ្ដីកិច្ចសន្យានៅមណ្ឌលសុខភាព និងសាលារៀននៅតំបន់រុនតាឯក

2023/12/08 02:21:22 pm        166
Facebook Telegram Linkin
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានប្រកាសផ្ដល់ក្របខណ្ឌដល់ គ្រូពេទ្យ និងគ្រូបង្រៀនជាប់កិច្ចសន្យា ដែលបានស្ម័គ្រចិត្តមកបម្រើការងារនៅ មណ្ឌលសុខភាព និងសាលាបឋមសិក្សានៅតំបន់រុនតាឯក ដើម្បីធ្វើយ៉ាងណាឱ្យតំបន់នេះ មានគ្រូពេទ្យ និងគ្រូបង្រៀនគ្រប់គ្រាន់បម្រើសេវាដល់ប្រជាពលរដ្ឋ ខណៈតំបន់កំពុងពង្រីកទៅជាទីក្រុងដ៏ធំមួយទៀតនៃខេត្តសៀមរាប។ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានប្រកាសផ្ដល់ក្របខណ្ឌដល់មន្រ្ដីជាប់កិច្ចសន្យានៃមណ្ឌលសុខភាព និងសាលារៀន នៅតំបន់រុនតាឯកនេះ ក្នុងឱកាសអញ្ជើញសំណេះសំណាលជាមួយប្រជាពលរដ្ឋ រស់នៅភូមិធម្មជាតិរុនតាឯក និងតំបន់ពាក់ស្នែងសរុបជិត៣ពាន់នាក់ នៅព្រឹកថ្ងៃទី៨ ខែធ្នូ ឆ្នាំ២០២៣នេះ។ក្នុងឱកាសនោះសម្តេចធិបតី បានសម្រេចឱ្យបុគ្គលិកស្ម័គ្រចិត្តនៅមណ្ឌល សុខភាពរុនតាឯកចំនួន ៨ នាក់ បានចូលក្នុងក្របខណ្ឌមន្ត្រីរាជការពេញសិទ្ធិ។ គ្រូស្ម័គ្រចិត្តនៅសាលាបឋមសិ ក្សារុនតាឯកចំនួន ១០នាក់ និងគ្រូស្ម័គ្រចិត្តនៅវិទ្យាល័យរុនតា ឯកចំនួន ១៤ នាក់ បានចូលក្នុងក្របខណ្ឌមន្ត្រីរាជការពេញសិទ្ធិរបស់ក្រសួងអប់រំ យុវជន និងកីឡា។ក្រៅពីនេះសម្ដេចធិបតីនាយករដ្ឋមន្រ្ដីក៏បានប្រកាសផ្ដល់អគារសិក្សាចំនួន ២ ខ្នង កម្ពស់ ២ ជាន់ ស្មើ នឹង ២៤ បន្ទប់ជូនដល់សាលាបឋមសិក្សារុនតាឯកចំនួន ២ និង​បានសម្រេចផ្ដល់ដីសម្រាប់​សាងសង់សាលាបឋមសិក្សាបន្ថែមចំពោះសាលាដែលមានផ្ទៃដីតូចចង្អៀតនៅតំបន់រុនតាឯកនេះផងដែរ។សូមជម្រាបថា ដើម្បីផ្ដល់ភាពងាយស្រួល និងជួយសម្រួលដល់ការរស់នៅប្រចាំថ្ងៃរបស់បងប្អូន​ប្រជាពលេរដ្ឋនៅក្នុងតំបន់រុនតាឯក ​សម្តេចធិបតី ហ៊ុន ម៉ាណែត នាយករដ្ឋមន្ត្រី ក៏បាន​សម្រេចដាក់ឱ្យដំណើរការរថយន្តក្រុងចំនួន ១០ គ្រឿង ​សម្រាប់ដឹកពលរដ្ឋនៅតំបន់រុនតាឯក ទៅកាន់ទីរួមខេត្តសៀមរាប ទាំងទៅទាំងមកដោយមិនគិតប្រាក់ផងដែរ៕អត្ថបទ៖ វ៉ន ដារ៉ា

សម្ដេចធិបតី៖ អង្គរជាព្រលឹងជាសម្បត្តិបេតិកភណ្ឌ និងវប្បធម៌របស់មនុស្សជាតិតែមួយគត់​នៅលើផែនដី

2023/12/08 01:59:52 pm        168
Facebook Telegram Linkin
សៀមរាប៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានមានប្រសាសន៍ថា អង្គរជាព្រលឹង ជាសម្បត្តិបេតិកភណ្ឌជាតិ និងជាវប្បធម៌របស់មនុស្សជាតិ ដែល​មាន​តែមួយ​គត់​នៅ​លើ​ផែនដី តំណាងឱ្យវប្បធម៌អរិយធម៌ដ៏រុងរឿងនៃប្រជាជាតិខ្មែរ រីឯប្រជាជនជាអាយុជីវិតជាតិ ដែល​រាជរដ្ឋាភិបាលមានកាតព្វកិច្ចបម្រើ និងការពារ។សម្ដេចធិបតីនាយករដ្ឋមន្រ្ដីបានបញ្ជាក់បែបនេះ នាព្រឹកថ្ងៃទី៨ ខែធ្នូ ឆ្នាំ២០២៣ ក្នុង​ឱកាស​អញ្ជើញ​ជា​អធិបតី​ក្នុង​ពិធី​សំណេះសំណាល​ជាមួយ​ប្រជាពលរដ្ឋ​ដែល​បាន​ស្ម័គ្រចិត្ត​មក​រស់​នៅ​ភូមិតានី ឃុំរុនតាឯក ស្រុកបន្ទាយស្រី ខេត្តសៀមរាប ។មានប្រសាសន៍នៅក្នុងពិធីដ៏អធិកអធមនេះ សម្តេចនាយករដ្ឋមន្ត្រី បានលើកទើ្បងថា កន្លងមក មាន​សំណួរ «រវាងប្រាសាទអង្គរ និងប្រជាជន ដែលកំពុងរស់នៅក្នុងឧទ្យានអង្គរ, តើ​រាជ​រាដ្ឋាភិបាល​ជ្រើស​រើសយកមួយណា?» ជាចម្លើយ, រាជរដ្ឋាភិបាលពុំចាំបាច់​ត្រូវធ្វើការ​ជ្រើសរើស​យក​មួយ​ណានោះ​ទេ គឺយកទាំងពីរ ព្រោះថា៖ អង្គរជាព្រលឹង, ជាសម្បត្តិបេតិកភណ្ឌជាតិ និងជា​វប្បធម៌​របស់មនុស្សជាតិ ដែលមានតែមួយគត់នៅលើផែនដី តំណាងឱ្យ​វប្បធម៌​អរិយធម៌​ដ៏រុងរឿង​នៃ​ប្រជាជាតិ​ខ្មែរយើង។ ចំពោះប្រជាជន គឺជាអាយុជីវិតជាតិ ដែលរាជរដ្ឋាភិបាល​មាន​កាតព្វ​កិច្ច​បម្រើ និង ការពារផលប្រយោជន៍ដ៏ឧត្តុង្គឧត្តម្ភរបស់ប្រជាពលរដ្ឋគ្រប់រូប, គ្រប់ក្រុមគ្រួសារ, គ្រប់​និន្នា​ការនយោបាយ, និងជំនឿសាសនា ដោយមិនរើសអើងពណ៌សម្បុរ ។ បើមិនមានប្រជាជន គឺ​មិន​មានប្រជាជាតិដ៏ឧត្តុង្គឧត្តមភរបស់យើងនោះទេ ។សូមបញ្ជាក់ផងដែរថា នៅខែកញ្ញា ឆ្នាំ១៩៩១ សម្តេចព្រះនរោត្តម សីហនុ ព្រះបរមរតនកោដ្ឋ បាន​ស្នើ​ដល់សហគមន៍អន្តរជាតិឱ្យជួយស្តារ និងអភិរក្សតំបន់អង្គរ ។ ឆ្លើយតប​នឹង​សេចក្តី​អំពាវ​នាវ​របស់​សម្តេចព្រះបរមរតនកោដ្ឋ, អង្គការយូណេស្កូ​បាន​បញ្ជូន​ក្រុម​ការងារ​ជំនាញ​ជា​បន្ត​បន្ទាប់​មក​កម្ពុជា ដើម្បីធ្វើការវាយតម្លៃអំពីស្ថានភាពពិតជាក់ស្តែងរបស់អង្គរ និងបាន​សម្រេច​​ដាក់​បញ្ចូល​អង្គរ​ទៅ​ក្នុងបញ្ជីបេតិកភណ្ឌពិភពលោកដែលប្រឈមនឹងគ្រោះថ្នាក់ នៅថ្ងៃទី១៤ ខែធ្នូ ឆ្នាំ​១៩៩២ ។ បន្ទាប់មក, យន្តការ ICC-Angkor ត្រូវបានបង្កើតឡើង ហើយ​រាជ​រដ្ឋាភិបាល​កម្ពុជា​បាន​សហការ​យ៉ាងស្និទ្ធជាមួយបណ្តាប្រទេសមួយចំនួន ក្នុងការរៀបចំ​អនុវត្ត​គម្រោង​ជួសជុល​ប្រាសាទ​មួយ​ចំនួនជាបន្ទាន់ និងជាបន្តបន្ទាប់ ដើម្បីធ្វើការអភិរក្ស និងរក្សានិរន្តភាពនៃប្រាសាទ ឱ្យ​នៅ​ឈរត្រដែតបង្ហាញនូវភាពអស្ចារ្យនៃស្នាដៃបុព្វបុរសខ្មែរ និងវប្បធម៌ដ៏សម្បូរបែបរបស់កម្ពុជា ។ ក្រោមកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ដោយមាន​ការ​ជួយ​ជ្រោម​ជ្រែង​ពី​គណៈកម្មាធិការ​អាយ​ស៊ីស៊ីអង្គរ (ICC-Angkor), រមណីយដ្ឋានអង្គរត្រូវ​បាន​ស្រោច​ស្រង់​ឱ្យ​រួច​ផុត​ពី​ស្ថានភាពគ្រោះថ្នាក់ និងត្រូវបានដកចេញ​ពី​បញ្ជីបេតិកភណ្ឌ​ពិភព​លោក​ប្រឈម​នឹង​គ្រោះ​ថ្នាក់​នៅ​ខែកក្កដាឆ្នាំ២០០៤, ហើយបន្ទាប់មក ឧទ្យានអង្គរត្រូវ​បាន​ចារឹក​ក្នុង​បញ្ជី​បេតិក​ភណ្ឌ​ពិភពលោក មកដល់ពេលនេះ ៕

តំបន់​អភិវឌ្ឍន៍រុនតាឯក ផ្តល់ការរស់នៅសមរម្យដល់បងប្អូន ពូមីង តាយាយ

2023/12/08 01:49:50 pm        642
Facebook Telegram Linkin
សៀមរាប៖ វឌ្ឍនភាព នៃការស្ថាបនាហេដ្ឋរចនាសម្ព័ន្ធ និងសំណង់ចាំបាច់នានា នៅ​តំបន់​អភិវឌ្ឍន៍​រុនតាឯក បាននិងកំពុងដំណើរការជាមួយលទ្ធផលល្អប្រសើរ ដែលគិតមកដល់​ពេល​នេះ​បាន​សម្រេច​តាម​ផែនការ១០០% លើការងារអាទិភាពមួយចំនួនដូចជា៖ ការ​តភ្ជាប់​បំពង់​មេ​បញ្ជូន​ទឹកស្អាត ការតភ្ជាប់បណ្តាញមេផ្គត់ផ្គង់អគ្គិសនី ការស្ថាបនាផ្លូវក្រួសក្រហម ការ​កសាង​សាលា​រៀន​ពីបឋមដល់វិទ្យាល័យ ការសាងសង់មណ្ឌលសុខភាព ដែលមានអគារជំងឺទូទៅ អគារ​សម្ភព និងអគារស្នាក់នៅគ្រូពេទ្យ ព្រមទាំងការដំឡើងបង្គោលអង់តែនទូរស័ព្ទផងដែរ។ជាមួយគ្នានេះ បាននិងកំពុងបន្តអនុវត្តតាមផែនការ នូវការងារចម្បងៗមួយចំនួនទៀត ជា​អាទិ៍​សាង​សង់​ផ្លូវបេតុងលើផ្លូវក្រួសក្រហមសម្រេចបាន ៧៤, ៣៦% ការសាងសង់ផ្សារ ៨ខ្នង លើ​ផ្ទៃដី ៤,២៤ហិកតា សម្រេចបាន ៨០% ការកសាងវត្តរុនតាឯក លើផ្ទៃដី ៣ហិកតា សម្រេចបាន ៩៥% រួមមាន ព្រះវិហារ, ឧបដ្ឋានសាលា និងកុដិ ការសាងសង់មណ្ឌលរដ្ឋបាលស្រុកបន្ទាយស្រី លើ​ផ្ទៃដី៤,៣៨ហ.ត សម្រេចបាន ៨៥% ការតភ្ជាប់បណ្តាញអគ្គិសនីតាមផ្ទះជូនប្រជាពលរដ្ឋ ចំនួន ៤ ៤៤២ គ្រួសារស្នើ ៧៥, ៧៣% ។ សមិទ្ធផលទាំងនេះបានបង្ហាញយ៉ាងច្បាស់ពីការយកចិត្តទុកដាក់ពីរាជរដ្ឋាភិបាលអាណត្តិមុន និង​ត្រូវ​បានពូនជ្រុំបន្តទៀតដោយរាជរដ្ឋាភិបាលអាណត្តិថ្មី ក្រោមការដឹកនាំដ៏ ឈ្លាសវៃ ប្រកប​ដោយ​ចក្ខុ​វិស័យ​វែងឆ្ងាយរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះ​រា​ជា​ណា​ចក្រ​កម្ពុជា ដែលនឹងធ្វើឱ្យតំបន់អភិវឌ្ឍន៍ថ្មីនេះ ក្លាយជាសមិទ្ធផលជាប្រវត្តិសាស្ត្រ និង ជាមរតក​ដ៏​ថ្លៃថ្លា ហើយនឹងក្លាយជាបុរីជនបទគំរូ ដែលប្រជាពលរដ្ឋ​អាច​ទទួល​បាន​សិទ្ធិ​លើ​កម្ម​សិទ្ធិ​ដីធ្លី​ស្រប​ច្បាប់ មានឱកាសសេដ្ឋកិច្ចច្រើន ជាងមុន និងជីវភាពរស់នៅល្អប្រសើរជាងមុន៕

ប្រទេសអាស៊ានបូក៣ នឹងបង្កើតបណ្តាញសុវត្ថិភាពហិរញ្ញវត្ថុប្រចាំតំបន់ថ្មី

2023/12/08 01:49:08 pm        68
Facebook Telegram Linkin
ប្រទេសជប៉ុន កូរ៉េខាងត្បូង ចិន និងសមាគមប្រជាជាតិអាស៊ីអាគ្នេយ៍ បានព្រមព្រៀងគ្នាបង្កើត អង្គភាពផ្តល់ហិរញ្ញវត្ថុថ្មី ដើម្បីដោះស្រាយភាពអាសន្ននានានៅក្នុងតំបន់។កិច្ចប្រជុំរបស់អ្នកតំណាងធនាគារកណ្តាល និងអ្នកតំណាងស្ថាប័នហិរញ្ញវត្ថុរបស់ប្រទេសអាស៊ានបូក៣ បានធ្វើឡើងនៅទីក្រុង Kanazawa ប្រទេសជប៉ុនភាគកណ្តាល កាលពីថ្ងៃព្រហស្បតិ៍។ លោក Kanda Masato អនុរដ្ឋមន្ត្រីក្រសួងហិរញ្ញវត្ថុជប៉ុន ទទួលបន្ទុកកិច្ចការអន្តរជាតិ បានចូលរួមក្នុងកិច្ចប្រជុំនេះ។នៅក្នុងសន្និសីទសារព័ត៌មាន បន្ទាប់ពីកិច្ចប្រជុំ លោក Kanda បាននិយាយថា ក្រុមអ្នកតំណាងបាន ព្រមព្រៀង ចាប់ផ្តើមបណ្តាញសុវត្ថិភាពហិរញ្ញវត្ថុប្រចាំតំបន់ថ្មីមួយ ដើម្បីឆ្លើយតបទៅនឹងភាពអាសន្ន រួមទាំងជំងឺរាតត្បាត និងគ្រោះមហន្តរាយធម្មជាតិនៅពេលអនាគត។កម្មវិធីនេះ នឹងត្រូវបានដាក់នៅក្រោមក្របខណ្ឌហិរញ្ញវត្ថុមួយហៅថាពហុភាគីគំនិតផ្តួចផ្តើម Chiang Mai ដែលត្រូវបានបង្កើតឡើង បន្ទាប់ពីមានវិបត្តិរូបិយប័ណ្ណអាស៊ីក្នុងឆ្នាំ១៩៩៧។ក្រុមអ្នកតំណាង បានព្រមព្រៀងបន្តការពិភាក្សាដើម្បីដាក់ចេញព័ត៌មានលម្អិតនៃកម្មវិធី មុនកិច្ចប្រជុំថ្នាក់រដ្ឋមន្ត្រីដែលគ្រោងធ្វើនៅឆ្នាំក្រោយ។លោក Kanda និយាយថា តំបន់នេះងាយនឹងជួបគ្រោះមហន្តរាយធម្មជាតិ ហើយកម្មវិធីប្រភេទថ្មីនេះ គឺត្រូវការជាចាំបាច់ ហើយលោកនឹងធ្វើការសម្រាប់ការអនុវត្តកម្មវិធីឲ្យបានឆាប់។

អាមេនី គាំទ្រអាស៊ែបៃហ្សង់ ធ្វើជាម្ចាស់ផ្ទះសន្និសីទអាកាសធាតុ COP29

2023/12/08 01:30:38 pm        56
Facebook Telegram Linkin
ប្រទេសអាមេនី បានយល់ព្រមកាលពីថ្ងៃព្រហស្បតិ៍ (០៧ ធ្នូ) ថានឹងមិនរារាំងបេក្ខភាពរបស់អាស៊ែបៃហ្សង់ ក្នុងការធ្វើជាម្ចាស់ផ្ទះនៃសន្និសីទអាកាសធាតុ COP29 របស់អង្គការសហប្រជាជាតិនៅឆ្នាំក្រោយនោះទេ ជាផ្នែកមួយនៃកាយវិការសុច្ឆន្ទៈចំពោះគ្នាទៅវិញទៅមកដែលមានបំណងលើកកម្ពស់ការផ្សះផ្សារវាងប្រទេសជិតខាងក្នុងតំបន់កូកាសខាងត្បូង ដែលដាច់ឆ្ងាយពីគ្នាទាំងពីរនេះ។វិធានការនេះមិនត្រឹមតែអាចដោះស្រាយបញ្ហាដែលព្យួរនៅលើវេទិកា COP28 ដែលកំពុងដំណើរការនៅក្នុងទីក្រុងឌុយបៃ ប៉ុណ្ណោះទេ ប៉ុន្តែថែមទាំងចង្អុលបង្ហាញពីការជឿទុកចិត្តកាន់តែខ្លាំងរវាងរដ្ឋធានីយ៉េរ៉េវ៉ាន់ និងរដ្ឋធានីបាគូ បន្ទាប់ពីអាស៊ែបៃហ្សង់ កាលពីខែកញ្ញា បានដណ្តើមយកតំបន់ផ្ដាច់ខ្លួន ណាហ្គ័រណូ-ការ៉ាបាក់ ចេញពីជនជាតិអាមេនីដែលបានគ្រប់គ្រងលើទីនោះ។សេចក្តីថ្លែងការណ៍រួមមួយពីរដ្ឋបាលទាំងពីរបាននិយាយថា អាស៊ែបៃហ្សង់ នឹងដោះលែងសមាជិកសេវាកម្មអាមេនី ៣២នាក់ ដែលត្រូវបានចាប់ខ្លួន ហើយអាមេនី នឹងដោះលែងទាហានអាស៊ែបៃហ្សង់ ពីរនាក់។ ប្រទេសទាំងពីរបញ្ជាក់ឡើងវិញនូវចេតនាក្នុងការធ្វើប្រក្រតីភាពទំនាក់ទំនង និងឈានដល់សន្ធិសញ្ញាសន្តិភាព ដោយឈរលើការគោរពគោលការណ៍អធិបតេយ្យភាព និងបូរណភាពទឹកដី។អាមេនី និងអាស៊ែបៃហ្សង់ មានជម្លោះអស់រយៈពេលជាង ៣ទស្សវត្សរ៍មកហើយលើតំបន់ណាហ្គ័រណូ-ការ៉ាបាក់ ដែលបានរំដោះខ្លួនចេញពីការគ្រប់គ្រងរបស់រដ្ឋធានីបាគូ នៅក្នុងជម្លោះជនជាតិភាគតិចដ៏បង្ហូរឈាមដែលអមនឹងការដួលរលំនៃសហភាពសូវៀតឆ្នាំ១៩៩១ ដោយបានរស់រានមានជីវិតជាមួយនឹងការគាំទ្រផ្នែកហិរញ្ញវត្ថុ យោធា និងការទូតពីរដ្ឋធានីយ៉េរ៉េវាន់៕

ប្រទេសដាណឺម៉ាក អនុម័តច្បាប់ដើម្បីហាមប្រាមការដុតគម្ពីរកូរ៉ាន

2023/12/08 01:16:14 pm        48
Facebook Telegram Linkin
សភារបស់ប្រទេសដាណឺម៉ាក កាលពីថ្ងៃព្រហស្បតិ៍ (០៧ ធ្នូ) បានអនុម័តច្បាប់ដើម្បីផ្ដល់ភាពខុសច្បាប់ដល់ការដុតគម្ពីរកូរ៉ាននៅកន្លែងសាធារណៈ ដោយស្វះស្វែងរកការបន្ថយភាពតានតឹងជាមួយបណ្តាប្រទេសមូស្លីម បន្ទាប់ពីជម្លោះនៃការតវ៉ារបស់ដាណឺម៉ាកក្នុងអំឡុងពេលដែលគម្ពីរបរិសុទ្ធរបស់សាសនាអ៊ីស្លាមនេះត្រូវបានដុត និងបង្កឱ្យមានកំហឹង។ប្រទេសដាណឺម៉ាក និងស៊ុយអែត បានជួបប្រទះការតវ៉ាជាសាធារណៈជាបន្តបន្ទាប់នៅឆ្នាំនេះ ដែលសកម្មជនប្រឆាំងអ៊ីស្លាមបានដុតបំផ្លាញ ឬធ្វើឲ្យខូចច្បាប់ចម្លងនៃគម្ពីរកូរ៉ាន ដែលបង្កឱ្យមានការទាមទារឱ្យរដ្ឋាភិបាលប្រទេសអឺរ៉ុបខាងជើងទាំងនេះ ហាមឃាត់ការអនុវត្តបែបនោះ។ប្រទេសដាណឺម៉ាក បានព្យាយាមធ្វើឱ្យមានតុល្យភាពរវាងសេរីភាពនៃការបញ្ចេញមតិ ដែលត្រូវបានការពារដោយរដ្ឋធម្មនុញ្ញ រួមទាំងសិទ្ធិក្នុងការរិះគន់សាសនា និងសន្តិសុខជាតិ ស្របពេលមានការភ័យខ្លាចថា ការដុតគម្ពីរកូរ៉ាននឹងបង្កឱ្យមានការវាយប្រហារដោយពួកអ៊ីស្លាម។ក្រុមអ្នករិះគន់ក្នុងស្រុកនៅប្រទេសស៊ុយអែត និងដាណឺម៉ាកបានអះអាងថា ការកំណត់ណាមួយលើការរិះគន់សាសនា រួមទាំងការដុតគម្ពីរកូរ៉ាន ធ្វើឱ្យប៉ះពាល់ដល់សេរីភាពនៃសេរីនិយមដែលតស៊ូយ៉ាងមកបានលំបាកនៅក្នុងតំបន់។ រដ្ឋាភិបាលចម្រុះកណ្តាលនិយមរបស់ដាណឺម៉ាកបានអះអាងថា ច្បាប់ថ្មីនេះនឹងមានឥទ្ធិពលតិចតួចប៉ុណ្ណោះលើសេរីភាពនៃការបញ្ចេញមតិ ហើយថាការរិះគន់សាសនាតាមមធ្យោបាយផ្សេងទៀតនៅតែមានភាពស្របច្បាប់៕

បន្ទាប់ពីការបោះឆ្នោតសាកល្បងបរាជ័យក្នុងសភាអាមេរិក ការរំពឹងទុកបានថយចុះសម្រាប់ជំនួយអ៊ុយក្រែនថ្មី

2023/12/08 12:12:57 pm        169
Facebook Telegram Linkin
មេដឹកនាំព្រឹទ្ធសភាសហរដ្ឋអាមេរិក បានប្តេជ្ញាកាលពីថ្ងៃព្រហស្បតិ៍ថា នឹងបន្តព្យាយាមដើម្បីឲ្យឈានដល់កិច្ចព្រមព្រៀងមួយ ក្នុងការផ្តល់ជំនួយសន្តិសុខថ្មីរាប់ពាន់លានដុល្លារដល់ប្រទេសអ៊ុយក្រែន ប៉ុន្តែបានប្រឈមមុខភាពមិនច្បាស់លាស់អំពីការធ្វើដូច្នេះ ភ្លាមៗបន្ទាប់ពីសមាជិកគណបក្សសាធារណរដ្ឋបានរារាំងសេចក្តីស្នើច្បាប់ផ្តល់ជំនួយសន្តិសុខបរទេសដ៏ទូលំទូលាយ។ សមាជិកព្រឹទ្ធសភាគណបក្សសាធារណរដ្ឋ បានបោះឆ្នោតជាឯកច្ឆ័ន្ទកាលពីថ្ងៃពុធ ដើម្បីរារាំងសេចក្តីស្នើច្បាប់ចំណាយបន្ទាន់ ក្នុងការផ្តល់មូលនិធិចំនួន ១១០,៥ ពាន់លានដុល្លារសម្រាប់ប្រទេសអ៊ុយក្រែន អ៊ីស្រាអែល និងតម្រូវការសន្តិសុខផ្សេងៗទៀត ដើម្បីជំរុញតម្រូវការរបស់ពួកគេសម្រាប់ការគ្រប់គ្រងបន្ថែមទៀតនៃការធ្វើអន្តោប្រវេសន៍តាមព្រំដែនសហរដ្ឋអាមេរិកជាមួយប្រទេសម៉ិកស៊ិក។ លទ្ធផល ដែលត្រូវបានរំពឹងទុក បានគំរាមកំហែងដល់កិច្ចខិតខំប្រឹងប្រែងរបស់ប្រធានាធិបតីគណបក្សប្រជាធិបតេយ្យ លោក Joe Biden ក្នុងការផ្តល់ជំនួយថ្មីនៅមុនដំណាច់ឆ្នាំ ២០២៣។ បញ្ហានេះ បានកើតឡើងបន្ទាប់ពីសមាជិកគណបក្សប្រជាធិបតេយ្យ និងសមាជិកគណបក្សសាធារណរដ្ឋ បានចរចាគ្នាជាច្រើនសប្តាហ៍ ដើម្បីបន្ថែមការផ្លាស់ប្តូរគោលនយោបាយអន្តោប្រវេសន៍ទៅក្នុងសេចក្តីស្នើច្បាប់សន្តិសុខ ក្នុងការទទួលបានសំឡេងឆ្នោតពីគណបក្សសាធារណរដ្ឋគ្រប់គ្រាន់ ដើម្បីអនុម័ត។ នាយកទទួលបន្ទុកថវិការបស់សហរដ្ឋអាមេរិក លោក Shalanda Young បាននិយាយថា ក្រសួងការពារជាតិសហរដ្ឋអាមេរិក បានប្រើប្រាស់ ៩៧ភាគរយនៃថវិកាចំនួន ៦២,៣ពាន់លានដុល្លារអាមេរិកក្នុងមូលនិធិបន្ថែម ដែលខ្លួនបានទទួលសម្រាប់អ៊ុយក្រែន ហើយក្រសួងការបរទេស បានប្រើប្រាស់មូលនិធិជំនួយយោធាទាំងអស់ចំនួន ៤,៧ពាន់លានដុល្លារ ដែលក្រសួងត្រូវបានបែងចែកដើម្បីជួយដល់ទីក្រុងគីវ ខណៈទីក្រុងនេះប្រយុទ្ធជាមួយអ្នកឈ្លានពានរុស្ស៊ី។ ប្រសិនបើសភា មិនបានផ្តល់មូលនិធិថ្មីដើម្បីទិញយុទ្ធោបករណ៍ជំនួសនោះទេ សហរដ្ឋអាមេរិក អ៊ុយក្រែន និងក្រុមហ៊ុនផលិតសព្វាវុធ ប្រហែលជាត្រូវចាត់វិធានការផ្សេងទៀតដើម្បីបំពេញបន្ថែមស្តុក។

បណ្ដាញសង្គម

ព័ត៌មានថ្មីៗ

កិច្ចប្រជុំក្រុមប្រឹក្សាទំនាក់ទំនង ក្នុងការពិនិត្យវឌ្ឍនភាពឆ្នាំ២០២៤ នៃវិទ្យាស្ថានប៉ាស្ទ័រកម្ពុជា - សម័យប្រជុំឆ្នាំ ២០២៥
06/06/2025 09:06 PM
Facebook Telegram Linkin
ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ចុះពិនិត្យ ព្យាបាលជំងឺ និងចាក់វ៉ាក់សាំងកូវីដ-១៩ ដូសជំរុញ ជូនពលរដ្ឋដោយឥតគិតថ្លៃ ចំនួន២ឃុំ ក្នុងស្រុកសាមគ្គីមានជ័យ ខេត្តកំពង់ឆ្នាំង
06/06/2025 09:06 PM
Facebook Telegram Linkin
កុងហ្គោប្រឈមនឹងកង្វះខាតសណ្តែក ស្របពេលកសិករបោះបង់ចោលចម្ការដំណាំរបស់ពួកគេ
06/06/2025 08:06 PM
Facebook Telegram Linkin
លោក Zelenskiy ៖ សហរដ្ឋអាមេរិក និងអឺរ៉ុប គួរតែបង្កើនសម្ពាធលើរុស្ស៊ី ក្រោយការវាយប្រហារទ្រង់ទ្រាយធំ
06/06/2025 08:06 PM
Facebook Telegram Linkin
កងទ័ពអ៊ីស្រាអែលចេញការព្រមានជម្លៀស សម្រាប់ផ្នែកខ្លះនៃទីក្រុងហ្កាហ្សា
06/06/2025 08:06 PM
Facebook Telegram Linkin
ទាហានអាមេរិកទៅដល់ប៉ាណាម៉ា ដើម្បីធ្វើសមយុទ្ធយោធា
06/06/2025 07:06 PM
Facebook Telegram Linkin
​​កម្ពុជាបញ្ជាក់ជូនប្រធានអាស៊ានថា ការសម្រេចយកបញ្ហាព្រំដែនទៅ ICJ គឺដើម្បីបញ្ចប់ជម្លោះដោយសន្តិវិធី
06/06/2025 07:06 PM
Facebook Telegram Linkin
វិមានក្រឹមឡាំង៖ សង្រ្គាមអ៊ុយក្រែន គឺជាអត្ថិភាព ក្រោយលោក Trump ប្រៀបប្រដូចនឹង «ការវាយគ្នារបស់ក្មេងៗ»
06/06/2025 07:06 PM
Facebook Telegram Linkin
រដ្ឋមន្ត្រីការបរទេសអ៊ីរ៉ង់ព្រមានមហាអំណាចអឺរ៉ុបកុំបង្កើត «កំហុសធ្ងន់ធ្ងរ» នៅស្ថាប័នឃ្លាំមើលនុយក្លេអ៊ែរ
06/06/2025 07:06 PM
Facebook Telegram Linkin
កម្ពុជាបដិសេធចំពោះថៃ ដែលស្នើឱ្យកម្ពុជាដកកងទ័ពចេញពីទីតាំងតំបន់មុំបី
06/06/2025 07:06 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.