នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ប្រធានគណៈកម្មាធិការគណបក្សខេត្តតាកែវ ណែនាំសមាជិកមូលដ្ឋានឱ្យយកចិត្ត​ទុកដាក់​បម្រើ​ពលរដ្ឋ
សម្ដេចតេជោ ណែនាំឱ្យដាក់បេក្ខភាពស្រ្ដីជាប់ឆ្នោតយ៉ាងតិចមួយឃុំមួយរូប និងមានស្ត្រីធ្វើស្មៀនឃុំ
សម្ដេចតេជោស្នើស្ថាប័នពាក់ព័ន្ធចាត់វិធានការភ្លាមៗចំពោះអ្នកប្រព្រឹត្តទង្វើអសីលធម៌លើបណ្ដាញសង្គម
សម្ដេចតេជោ អំពាវនាវដល់រាជរដ្ឋាភិបាលយកចិត្តទុកដាក់សាងសង់កន្លែងស្នាក់នៅសម្រាប់សិស្សជាស្ត្រី

នយោបាយ​ និង ការអភិវឌ្ឍន៍

អ្នកប្រើប្រាស់ប័ណ្ណ ប.ស.ស. ក្នុងមន្ទីរពេទ្យព្រះអង្គឌួងកើនឡើងជិត ១,២លាននាក់

2023/10/09 09:19:58 pm        1168
Facebook Telegram Linkin
ភ្នំពេញ៖ ការិយាល័យផ្នែកបេឡាជាតិសន្តិសុខសង្គម (ប.ស.ស.) នៃមន្ទីរពេទ្យព្រះអង្គឌួង លើកឡើងថា គិតចាប់តាំងពីឆ្នាំ២០១៧ រហូតមកត្រឹមខែកញ្ញា ឆ្នាំ២០២៣នេះ មានអ្នកជម្ងឺចំនួនជិត ១,២លាននាក់ បានមកទទួលសេវាពិនិត្យ និងព្យាបាលជម្ងឺ នៅមន្ទីរពេទ្យព្រះអង្គឌួង។ តាមក្រសួងការងារ និងបណ្តុះបណ្តាលវិជ្ជាជីវៈ នៅព្រឹកថ្ងៃទី៩ ខែតុលានេះ លោកស្រី ឃួន វ៉ាន់ឌី អនុប្រធានការិយាល័យផ្នែក ប.ស.ស. នៃមន្ទីរពេទ្យព្រះអង្គឌួង ចាត់ទុកថា ទោះបីជាប្រជាពលរដ្ឋដែលប្រើប័ណ្ណ ប.ស.ស. រឺ ប័ណ្ណសមធម៌ រឺអ្នកត្រូវបង់លុយដើម្បីទទួលសេវាពិនិត្យ និងព្យាបាលជម្ងឺក្តី គឺសុទ្ធតែជាអ្នកជម្ងឺរបស់មន្ទីរពេទ្យដូចគ្នាទាំងអស់។ ដូចនេះ សម្រាប់អ្នកជម្ងឺដែលប្រើប័ណ្ណ ប.ស.ស. ក៏ទទួលបានការយកចិត្តទុកដាក់ដូចគ្នាពីក្រុមគ្រូពេទ្យ។ លោកស្រី បញ្ជាក់ថា គ្រូពេទ្យនៃមន្ទីរពេទ្យព្រះអង្គឌួង និងមន្ត្រីផ្នែក ប.ស.ស. ដែលប្រចាំការក្នុងមន្ទីរពេទ្យនេះ សហការគ្នាយ៉ាងល្អក្នុងការសម្របសម្រួលឲ្យមានភាពងាយស្រួល និងរហ័ស សម្រាប់អ្នកជម្ងឺមកទទួលសេវាពិនិត្យសុខភាព និងព្យាបាលជម្ងឺ។ លោកស្រី បានលើកទឹកចិត្តដល់អ្នកមានប័ណ្ណ ប.ស.ស. ទាំងអស់មកទទួលសេវាពិនិត្យ និងព្យាបាលជម្ងឺ នៅមន្ទីរពេទ្យព្រះអង្គឌួង សម្រាប់គ្រប់ផ្នែកទាំងអស់ រួមមាន ផ្នែកច្រមុះ បំពង់ក ផ្នែកភ្នែក ផ្នែកសម្ភព និងរោគស្ត្រី ផ្នែកមាត់ធ្មេញ និងផ្នែកជម្ងឺទូទៅជាដើម។ ដោយឡែក លោក ម៉ៅ សុភក្តី ប្រធានក្រុមភ្នាក់ងារ ប.ស.ស. ប្រចាំមន្ទីរពេទ្យព្រះអង្គឌួង បានបញ្ជាក់ថា ជាមធ្យមក្នុងថ្ងៃធម្មតា មានអ្នកជម្ងឺប្រមាណ ៦០០នាក់ មកទទួលសេវាពិនិត្យ និងព្យាបាលជម្ងឺ នៅក្នុងមន្ទីរពេទ្យនេះ ដោយប្រើប្រាស់ប័ណ្ណ ប.ស.ស.។ ដោយឡែក សម្រាប់ថ្ងៃអាទិត្យ អាចកើនដល់ជាង ១ ០០០នាក់។ លោក មើលឃើញថា ពីមួយឆ្នាំទៅមួយឆ្នាំ អ្នកប្រើប័ណ្ណ ប.ស.ស. មកទទួលសេវាពិនិត្យ និងព្យាបាលជម្ងឺនៅមន្ទីរពេទ្យនេះ កាន់តែកើនឡើង ដោយជាមធ្យមក្នុងមួយខែមានប្រហែលជា ៣ម៉ឺននាក់។គួរបញ្ជាក់ថា រាជរដ្ឋាភិបាលកម្ពុជា បានដាក់ឲ្យដំណើរការរបបសន្តិសុខសង្គមផ្នែកថែទាំសុខភាព សម្រាប់វិស័យឯកជន (កម្មករនិយោជិត) ចាប់ពីឆ្នាំ២០១៦ និងសម្រាប់វិស័យសាធារណៈ (មន្ត្រីសាធារណៈ អតីតមន្ត្រីរាជការ អតីតយុទ្ធជន) ចាប់ពីឆ្នាំ២០១៨។ របាយការណ៍របស់ក្រសួងការងារ និង បណ្តុះបណ្តាលវិជ្ជាជីវៈ បង្ហាញថាគិតត្រឹមឆមាសទី១ ឆ្នាំ២០២៣ សមាជិកដែលប្រើប្រាស់របបសន្តិសុខសង្គមផ្នែកថែទាំសុខភាព មានសរុបចំនួនជាង ៣,២លាននាក់។ គិតត្រឹមខែកញ្ញា ឆ្នាំ២០២៣ មានមូលដ្ឋានសុខាភិបាលចំនួន ១ ៥១៨ បានចុះកិច្ចព្រមព្រៀងជាមួយ ប.ស.ស. នៅទូទាំងប្រទេសកម្ពុជា ដែលរួមមានទាំងមន្ទីរពេទ្យថ្នាក់ជាតិ មន្ទីរពេទ្យបង្អែក មណ្ឌលសុខភាព និងមូលដ្ឋានសុខាភិបាលឯកជន៕អត្ថបទ ឈិត បូរ៉ាវី 

ប្រមុខការពារជាតិថ្មី អំពាវនាវឲ្យមានជំហរត្រៀមខ្លួនដ៏ម៉ឺងម៉ាត់ប្រឆាំងនឹងកូរ៉េខាងជើង

2023/10/09 09:07:58 pm        530
Facebook Telegram Linkin
រដ្ឋមន្ត្រីក្រសួងការពារជាតិកូរ៉េខាងត្បូង លោក ស៊ីន វ៉ុង ស៊ីក (Shin Won-sik) នៅពីថ្ងៃចន្ទនេះ បានអំពាវនាវឲ្យមានកាតត្រៀមខ្លួនដ៏រឹងមាំប្រឆាំងនឹងប្រទេសកូរ៉េខាងជើង ខណៈដែលលោក បានធ្វើទស្សនកិច្ចលើកដំបូងទៅកាន់អង្គភាពយោធាជួរមុខក្នុងតួនាទីថ្មីរបស់ខ្លួន។លោកស៊ីន ដែលចូលកាន់តំណែង កាលពីថ្ងៃសៅរ៍ ត្រូវបានគេរាយការណ៍ជូនដោយសង្ខេបអំពីប្រតិបត្តិការព្រំដែននៅកងពលធំថ្មើរជើងលេខ១របស់កងទ័ពនៅទីក្រុងប៉ាជូ ( Paju) ភាគខាងត្បូងនៃតំបន់គ្មានយោធា ហើយបានបញ្ជាឲ្យមានជំហរត្រៀមលក្ខណៈយោធាដ៏ម៉ឺងមាត់។លោកត្រូវបានដកស្រង់សម្តី ដោយនិយាយថា៖«កន្លងទៅ ប្រទេសកូរ៉េខាងជើង បានធ្វើការបង្កហេតុទ្រង់ទ្រាយធំ បន្ទាប់ពីរដ្ឋាភិបាលរបស់យើងចូលកាន់តំណែងបានរយៈពេលពីរទៅបីឆ្នាំ»។ប្រសិនបើកូរ៉េខាងជើងបង្កហេតុ លោកបាននិយាយថា៖«ទីមួយ សងសឹកភ្លាមៗ ទីពីរសងសឹកយ៉ាងខ្លាំងនិង ទីបី សងសឹករហូតដល់ទីបញ្ចប់»។កាលពីសប្តាហ៍មុន ប្រធានាធិបតី Yoon Suk Yeol បានប្តេជ្ញាការពារប្រទេសពីការបង្កហេតុរបស់កូរ៉េខាងជើង ដោយពង្រឹងសមត្ថភាពរបស់ខ្លួនក្នុងការឆ្លើយតប «ភ្លាមៗ និងយ៉ាងលើសលប់» ។ភាពតានតឹងនៅឧបទ្វីបកូរ៉េ នៅតែបន្ត បន្ទាប់ការគំរាមកំហែងដោយនុយក្លេអ៊ែរនិងមីស៊ីល ដែលកំពុងកើនឡើងរបស់កូរ៉េខាងជើង។

អាល្លឺម៉ង់ និង បារាំង រៀបចំកិច្ចប្រជុំគណៈរដ្ឋមន្ត្រីដែលមិនធ្លាប់មានពីមុនមក អំពីគោលនយោបាយថាមពល ឧស្សាហកម្ម និងការពារជាតិរបស់EU

2023/10/09 08:28:32 pm        463
Facebook Telegram Linkin
រដ្ឋាភិបាលរបស់ប្រទេសបារាំង និងអាល្លឺម៉ង់ ចាប់ផ្តើមកិច្ចប្រជុំរយៈពេលពីរថ្ងៃដែលមិនធ្លាប់មានពីមុនមកនៅទីក្រុងហាំប៊ឺក (Hamburg) នៅថ្ងៃចន្ទនេះ ក្នុងគោលបំណង ដើម្បីស្តារទំនាក់ទំនងឡើងវិញរវាងមហាអំណាចទាំងពីររបស់សហភាពអឺរ៉ុប ចំពេលមានការខ្វែងគំនិតគ្នាជាច្រើនស្តីពីគោលនយោបាយថាមពល ឧស្សាហកម្ម និងការពារជាតិ។ក្រុមអ្នកវិភាគ និងសមាជិកសភា បាននិយាយថា កិច្ចសហការបារាំង-អាល្លឺម៉ង់ ដែលបានជំរុញគោលនយោបាយរបស់សហភាពអឺរ៉ុបអស់រយៈពេលជាច្រើនទស្សវត្សរ៍ បានបង្ហាញឲ្យឃើញថា វាមិនធ្លាប់មាន បើទោះបីជាវាមានភាពចាំបាច់ជាងពេលណាៗទាំងអស់ ដោយសារវិបត្តិជាច្រើនដែលប្លុកនេះ កំពុងប្រឈមមុខ។អឺរ៉ុបកំពុងប្រឈមមុខនឹងការកើនឡើងនៃការធ្វើអន្តោប្រវេសន៍មិនទៀងទាត់ ការផ្លាស់ប្តូរទៅរកសេដ្ឋកិច្ច អព្យាក្រឹតកាបូន សង្រ្គាមអ៊ុយក្រែន ការផ្លាស់ប្តូរទំនាក់ទំនងជាមួយដៃគូពាណិជ្ជកម្មសំខាន់របស់ចិន ហើយឥឡូវនេះ ក៏មានជម្លោះ នៅមជ្ឈិមបូព៌ាផងដែរ។លោក Jacob Ross បាននិយាយនៅឯក្រុមប្រឹក្សាអាល្លឺម៉ង់ទទួលបន្ទុកកិច្ចការបរទេសថា៖«ដោយសារទំនាក់ទំនងបារាំង-អាល្លឺម៉ង់ ដោយសារបញ្ហាអឺរុប មិនស្របតាមនឹងបញ្ហាប្រឈម ដែលយើងកំពុងជួបប្រទះ នាពេលបច្ចុប្បន្ននេះទេ» ។

អ្នកទេសចរចិននៅក្នុងប្រទេសជប៉ុន នៅតែទទួលទានអាហារសមុទ្រ ខណៈភាពតានតឹងជុំវិញបញ្ហាបង្ហូរទឹកនុយក្លេអ៊ែរ

2023/10/09 08:24:24 pm        425
Facebook Telegram Linkin
ភ្ញៀវទេសចរណ៍ជនជាតិចិន ដែលទៅលេងនៅប្រទេសជប៉ុនបាននិយាយថា ពួកគេកំពុងរីករាយនឹងការទទួលទានអាហារសមុទ្រស៊ូស៊ី ស្របពេលទីក្រុងប៉េកាំងបានហាមឃាត់ការនាំចូលអាហារសមុទ្ររបស់ប្រទេសជប៉ុន ដែលត្រូវបានដាក់ចេញបន្ទាប់ពីការបញ្ចេញទឹកវិទ្យុសកម្មធ្វើប្រព្រឹត្តកម្មរួច ចេញពីបរិវេណរោងចក្រនុយក្លេអ៊ែរហ្វ៊ូគូស៊ីម៉ា ដែលត្រូវបានបំផ្លាញ ចូលទៅក្នុងសមុទ្រ។ អ្នកទេសចរជាច្រើនបាននិយាយថា «ពួកយើងញ៉ាំស៊ូស៊ីជារៀងរាល់ថ្ងៃ ហើយយើងមិនខ្វល់ថាត្រីទាំងនោះត្រូវបានចាប់ពីសមុទ្រប្រទេសណានោះទេ»។ចាប់តាំងពីប្រទេសជប៉ុនបានចាប់ផ្តើមបញ្ចេញទឹកវិទ្យុសកម្ម លើកទី១ ចូលទៅក្នុងសមុទ្រពីរោងចក្រ ហ្វ៊ូគូស៊ីម៉ា កាលពីចុងខែសីហាមក ប្រព័ន្ធផ្សព្វផ្សាយរបស់ចិនជាច្រើន បានរាយការណ៍អំពីការលុបចោលដំណើរកម្សាន្តទៅប្រទេសជប៉ុន និងការព្រួយបារម្ភរបស់អ្នកប្រើប្រាស់ចិន អំពីសុវត្ថិភាពនៃផលិតផលសមុទ្រជប៉ុន។ទីក្រុងប៉េកាំងដែលបានជំរុញប្រទេសជប៉ុនម្តងហើយម្តងទៀត ឱ្យបញ្ឈប់ការបញ្ចេញទឹកនេះ និងហៅទឹកនោះថាជា «ទឹកកខ្វក់ដោយនុយក្លេអ៊ែរ» បានដាក់បម្រាមលើការនាំចូលអាហារសមុទ្ររបស់ជប៉ុន បន្ទាប់ពីការបង្ហូរទឹកបានចាប់ផ្តើមមក។ ទោះជាយ៉ាងណាក៏ដោយ ប្រជាជនចិនជាច្រើននាក់នៅខេត្តជឺជាំង (Zhejiang) បាននិយាយថា ប្រព័ន្ធផ្សព្វផ្សាយក្នុងស្រុករបស់ចិន ដែលសង្កត់ធ្ងន់លើគ្រោះថ្នាក់នៃទឹកពីរោងចក្រហ្វ៊ូគូស៊ីម៉ា កំពុងមានភាព «លំអៀង» ហើយមិនមានប្រជាជនចិនច្រើនទេ ដែលអាចធ្វើការសម្រេចចិត្តដោយផ្អែកលើព័ត៌មានដែលទទួលបានពីក្រៅប្រទេសនោះ៕

អ្នកទេសចរចាប់អារម្មណ៍ខ្លោងទ្វារតាកាវ នៃក្រុងអង្គរធំ បន្ទាប់ពីជួសជុលរួចរាល់

2023/10/09 08:16:48 pm        1255
Facebook Telegram Linkin
សៀមរាប៖ ពីមួយថ្ងៃទៅមួយថ្ងៃ មានអ្នកទេសចរជាតិ -អន្តរជាតិកាន់តែច្រើនឡើងៗទៅទស្សនា និងថតរូបនៅខ្លោងទ្វារតាកាវ បន្ទាប់ពីក្រុមការងារនៃអាជ្ញាធរជាតិអប្សរាបានជួសជុល​តួខ្លោងទ្វាររួចរាល់ រួមទាំងចម្លាក់ទេវតា និងអសុរៈទាញព្រ័ត្របានមួយចំនួន ហើយកែលម្អផ្លូវផង ងាយស្រួលភ្ញៀវទេសចរអាចឆ្លងកាត់ និងមានសុវត្ថិភាព។អ្នកទេសចរពីររូប មកតាំងពីខេត្តកំពត និងភ្នំពេញ មានប្រសាសន៍ថា ខ្លោងទ្វារតាកាវ ស្ថិតនៅទិសខាងលិចនៃក្រុងអង្គរធំ មានចំណុចពិសេសជាងខ្លោងទ្វារផ្សេងៗទៀត ដោយសារតែខ្លោងទ្វារនេះ មានពន្លឺព្រះអាទិត្យរៀបលិចចាំងលើ ធ្វើឱ្យសម្រស់ខ្លោងទ្វារកាន់តែស្រស់ស្អាត។ខ្លោងទ្វារតាកាវមិនត្រឹមតែជាកេរដំណែលរបស់បុព្វបុរសខ្មែរប៉ុណ្ណោះទេ ថែមទាំងអាចទស្សនា​ថ្ងៃរៀបលិច កសិន្ធុព័ទ្ធជុំវិញ ថតរូបជាមួយនិងប្លង់ស្អាតៗផង។ក្រៅតែពីការថតរូប ទេសចរចំណាយពេល ​ចំណាយអារម្មណ៍ជាមួយទិដ្ឋភាពថ្ងៃរៀបលិច នឹងទទួល​បានអារម្មណ៍ស្រស់ស្រាយទៅតាមធម្មជាតិ ផ្ទៃមេឃ ពន្លឺព្រះ អាទិត្យរៀបអស្តង្គត បូកជាមួយ​ស្ថាបត្យកម្មដ៏អស្ចារ្យរបស់ដូនតា ដែលនេះជាការចងចាំដ៏ល្អ ​និងមានក្តីសុខផ្លូវចិត្ត។ខ្លោងទ្វារតាកាវបច្ចុប្បន្ន​ បានបង្ហាញសម្រស់ និងភាពរឹងមាំ ត្រចះត្រចង់ឡើងវិញ​ឈរបង្អួត​ភ្ញៀវទេសចរយ៉ាងមោទកភាព ​ហើយប្រជាពលរដ្ឋក៏នឹងអាចធ្វើដំណើរឆ្លងកាត់​ទីនេះដោយ​សុខសុវត្ថិភាព​លែងមានការលំបាកដូចមុនទៀតហើយ។អ្នកទេសចរក៏បានបង្ហាញចំណាប់អារម្មណ៍ភ្ញាក់ផ្អើលថា ​ពេលឃើញខ្លោងទ្វារតាកាវ បន្ទាប់ពី​អាជ្ញាធរជាតិអប្សរាបានជួសជុលតួខ្លោងទ្វាររួចរាល់នេះ​ មានភាពរឹងមាំ ​និងស្រស់ស្អាតខ្លាំងណាស់ ហើយលោកក៏មិនធ្លាប់បានឃើញ ឬស្គាល់ពីមុនសោះឡើយ។នេះជាមោទកភាពរបស់ខ្មែរសម្រាប់ឱ្យក្មេងជំនាន់ក្រោយបានសិក្សាស្វែងយល់ ក៏ដូចជាចង់ឱ្យភ្ញៀវទេសចរគ្រប់រូបបានទៅទស្សនាទីនេះ ព្រមទាំង​ថតរូបភាពស្អាតៗ យកទៅចូលរួម​ផ្សព្វផ្សាយពីសក្កានុពលនៃកន្លែងទេសចរណ៍ថ្មីនេះ៕

ក្នុងការប្រណាំងសព្វាវុធនៅអាស៊ី ចិនជិតឈានដល់ដំណាក់កាលថ្មី ជាមួយនាវាមុជទឹកបំពាក់នុយក្លេអ៊ែរ

2023/10/09 07:42:05 pm        291
Facebook Telegram Linkin
ការរត់ប្រណាំងសព្វាវុធនាវាមុជទឹក កំពុងកើនឡើងខ្លាំងខណៈប្រទេសចិន ចាប់ផ្តើមដំណើរការផលិតនាវាមុជទឹកបំពាក់អាវុធនុយក្លេអ៊ែរជំនាន់ថ្មី ដែលនោះគឺជាលើកដំបូងត្រូវបានគេរំពឹងថា នឹងដាក់បញ្ហាប្រឈមចំពោះការកើនឡើងកិច្ចប្រឹងប្រែងរបស់សហរដ្ឋអាមេរិក និងសម្ព័ន្ធមិត្តក្នុងការតាមដានពួកវា។ អ្នកវិភាគ និងអ្នកតំណាងការពារជាតិប្រចាំតំបន់ និយាយថាភស្តុតាងបង្ហាញថាប្រទេសចិន កំពុងដំណើរការឲ្យមាននាវាមុជទឹកបំពាក់មីស៊ីលបាលីស្ទីក ប្រភេទ096 ធ្វើប្រតិបត្តិការ មុនចុងទសវត្សរ៍នេះ ដោយឈានដល់ដំណាក់កាលថ្មី ក្នុងភាពស្ងប់ស្ងាត់របស់ខ្លួន ដែលផ្តល់ជំនួយមួយផ្នែកដោយ បច្ចេកវិទ្យារបស់រុស្ស៊ី។ ការស្រាវជ្រាវត្រូវបានពិភាក្សានៅក្នុងសន្និសីទមួយ កាលពីខែឧសភា នៅហាវិទ្យាល័យសង្គ្រាមកងទ័ពជើងទឹកសហរដ្ឋអាមេរិក និងត្រូវបានចេញផ្សាយកាលពីខែសីហា ដោយវិទ្យាស្ថានសិក្សាសមុទ្រប្រទេសចិន ដែលព្យាករណ៍ថានាវាថ្មី នឹងធ្វើឲ្យពិបាកកាន់តែខ្លាំងក្នុងការតាមដាន។ យោងតាមអ្នកវិភាគចំនួន៧នាក់ និងមន្ត្រីយោធាមានមូលដ្ឋាននៅអាស៊ី៣នាក់ បានឲ្យដឹងថា ការសន្និដ្ឋាននោះ គឺអាចជឿទុកចិត្តបាន។ អ្នកវិភាគការស៊ើបអង្កេតបច្ចេកវិទ្យាកងទ័ពជើងទឹក និងជាសមាជិកនាវាមុជទឹកដែលបានចូលនិវត្តន៍ លោក Christopher Carlson ជាអ្នកស្រាវជ្រាវម្នាក់ក្នុងចំណោមអ្នកស្រាវជ្រាវជាច្រើន បាននិយាយថានាវាមុជទឹកប្រភេទ096 នឹងក្លាយជាសុបិន្តអាក្រក់។ ពួកវានឹងក្លាយជានាវាដែលពិបាកខ្លាំងក្នុងការរកឃើញ។ កិច្ចប្រឹងប្រែងមិនបានបង្ហាញឲ្យដឹង ក្នុងការបន្តផលិតនាវាមុជទឹកបំពាក់មីស៊ីលបាលីស្ទីកមានអាវុធនុយក្លេអ៊ែរ និងដើរដោយថាមពលនុយក្លេអ៊ែររបស់ចិន ដែលគេស្គាល់ថាSSBNs នឹងជាអ្នកជំរុញមួយដ៏សំខាន់ ចំពោះការដាក់ពង្រាយដែលកើនឡើងនិងផែនការរៀបចំទុកជាមុនរបស់កងទ័ពជើងទឹកអាមេរិក និងកងទ័ពផ្សេងទៀត នៅទូទាំងតំបន់ឥណ្ឌូ-ប៉ាស៊ីហ្វិក។ ការជំរុញនេះត្រូវបានគេរំពឹងថា នឹងកើនឡើង នៅពេលនាវាប្រភេទ096s ដាក់ចូលក្នុងប្រតិបត្តិការ។

ប្រធានសម្ព័ន្ធអារ៉ាប់ ធ្វើដំណើរទៅកាន់ទីក្រុងម៉ូស្គូ ដើម្បីពិភាក្សាបន្ទាប់ពីក្រុមហាម៉ាស់ វាយប្រហារលើអ៊ីស្រាអែល

2023/10/09 07:01:06 pm        439
Facebook Telegram Linkin
ប្រធានសម្ព័ន្ធអារ៉ាប់ លោក អាម៉េដ អាបូល ហ្គេត (Ahmed Aboul Gheit) បានធ្វើដំណើរទៅកាន់ទីក្រុងម៉ូស្គូកាលពីថ្ងៃអាទិត្យ ដើម្បីពិភាក្សាជាមួយរដ្ឋមន្ត្រីការបរទេសរុស្ស៊ី លោក សឺហ្គេ ឡាវរ៉ូវ (Sergei Lavrov) អំពីស្ថានភាពនៅតំបន់ហ្គាហ្សា បន្ទាប់ពីក្រុមឥស្លាមនិយមប៉ាឡេស្ទីនហាម៉ាស់ (Hamas) បានបើកការវាយប្រហារដ៏ធំបំផុតលើអ៊ីស្រាអែលក្នុងរយៈពេលជាច្រើនឆ្នាំ។អ្នកនាំពាក្យសម្រាប់សម្ព័ន្ធអារ៉ាប់ដែលមានមូលដ្ឋាននៅទីក្រុងគែរ បាននិយាយថា លោកអាបូល ហ្គេត ដែលបានបម្រើការជារដ្ឋមន្ត្រីការបរទេសរបស់ប្រទេសអេហ្ស៊ីប ក្នុងអំឡុងពេល៧ឆ្នាំចុងក្រោយនៃការគ្រប់គ្រងរបស់លោក ហូស្នី មូបារ៉ាក់ (Hosni Mubarak) នឹងពិភាក្សាអំពី«ការកើនឡើងនៃភាពតានតឹងដែលកំពុងបន្ត នៅក្នុងតំបន់ហ្គាហ្សាស្ទ្រីប»។ បន្ទាប់ពីការវាយប្រហាររបស់ក្រុមហាម៉ាស់ កាលពីថ្ងៃសៅរ៍ ប្រទេសរុស្ស៊ីបានសម្តែងការព្រួយបារម្ភយ៉ាងខ្លាំង ដោយបានអំពាវនាវឲ្យភាគីប៉ាឡេស្ទីន និងអ៊ីស្រាអែល បញ្ឈប់អំពើហិង្សា ហើយបានស្តីបន្ទោស លោកខាងលិចចំពោះការរារាំងក្រុមមជ្ឈិមបូព៌ា។ទីក្រុងម៉ូស្គូ បាននិយាយថា ការចរចាត្រឹមត្រូវ គឺចាំបាច់ដើម្បីផ្តល់សម្រាប់ការបង្កើតរដ្ឋប៉ាឡេស្ទីនឯករាជ្យមួយនៅក្នុងព្រំដែននៃឆ្នាំ ១៩៦៧ជាមួយនឹងរដ្ឋធានីមួយនៅហ្ស៊េរុយសាឡឹមខាងកើត។

សង្គ្រាមនៅអ៊ីស្រាអែល បានបន្ថែមភាពបន្ទាន់ដល់វិបត្តិប្រធានសភាសាធារណរដ្ឋរបស់អាមេរិកបន្ថែមទៀត

2023/10/09 06:57:25 pm        289
Facebook Telegram Linkin
សមាជិកគណបក្សសាធារណរដ្ឋ នៅក្នុងសភាតំណាងរាស្រ្តអាមេរិក ប្រឈមមុខនឹងសម្ពាធថ្មីក្នុងការជ្រើសរើសប្រធានសភា បន្ទាប់ពីអ៊ីស្រាអែលបានប្រកាសសង្រ្គាមកាលពីថ្ងៃអាទិត្យ បន្ទាប់ពីការវាយប្រហារដ៏កម្រមួយដោយក្រុមសកម្មប្រយុទ្ធហាម៉ាស់ ដែលបានជំរុញឱ្យមានការអំពាវនាវឱ្យមានជំនួយយោធាបន្ថែមទៀត របស់សហរដ្ឋអាមេរិក។សមាជិកគណបក្សសាធារណរដ្ឋមួយចំនួន រួមទាំងអ្នកតំណាងលោក Jim Jordan ដែលជាបេក្ខជនលេចធ្លោសម្រាប់តំណែងប្រធានសភានេះ ក៏ចង់ឱ្យសមាជិកសភាយល់ព្រមលើវិធីឆ្ពោះទៅមុខ លើបញ្ហាដ៏អាក្រក់បំផុតដែលសភាកំពុងប្រឈមមុខ គឺការចំណាយសហព័ន្ធសម្រាប់ឆ្នាំបច្ចុប្បន្ន នៅពេលពួកគេជ្រើសរើសប្រធានសភាថ្មី។សមាជិកសភាមកពីគណបក្សសាធារណរដ្ឋ ត្រូវបានគេរំពឹងថា នឹងចូលរួមស្ដាប់ការជជែកដេញដោលពីបណ្ដាបេក្ខជនប្រធានសភា ក្នុងការជជែកបិទទ្វារនៅថ្ងៃអង្គារ (១០ តុលា) ខាងមុខនេះ ហើយនឹងបោះឆ្នោតជ្រើសរើសអ្នកទទួលការតែងតាំងថ្មីរបស់ពួកគេនៅថ្ងៃពុធ (១១ តុលា)។ ការបោះឆ្នោតជាន់ខ្ពស់ក្នុងសភា ដើម្បីជ្រើសរើសអ្នកជំនួសតំណែងអតីតប្រធានសភាបក្សសាធារណរដ្ឋ លោក Kevin McCarthy អាចនឹងមកដល់នៅចុងសប្តាហ៍នេះ។ក្រុមអ្នកនយោបាយប្រកាន់ជំហរតឹង ដែលជំរុញឱ្យមានការកាត់បន្ថយ ដោយអាចនឹងបន្ថយការផ្តល់មូលនិធិរបស់រដ្ឋាភិបាល ដល់កម្រិតសារពើពន្ធឆ្នាំ២០២២ បានមានការខ្វែងគំនិតគ្នាក្នុងចំណោមសមាជិកសភាមកពីគណបក្សសាធារណរដ្ឋ អស់រយៈពេលជាច្រើនខែ ហើយបានធ្វើឲ្យសភាឈានជិតទៅដល់ការបិទរដ្ឋាភិបាល កាលពីជាងមួយសប្តាហ៍មុន។ សេចក្តីព្រាងច្បាប់ណាមួយរបស់សភា ដែលរួមបញ្ចូលការកាត់បន្ថយការចំណាយធ្ងន់ធ្ងរ ទំនងជាមិនអាចឆ្លងផុតព្រឹទ្ធសភា ដែលគ្រប់គ្រងដោយគណបក្សប្រជាធិបតេយ្យ របស់សហរដ្ឋអាមេរិកនោះទេ៕

ពលរដ្ឋថ្លែងអំណរគុណសម្តេចធិបតី នាយករដ្ឋមន្ដ្រី ដែលអនុញ្ញាតឱ្យប្រើប្រាស់ស្ពានកោះពេជ្រ-កោះនរា ក្នុងឱកាសភ្ជុំបិណ្ឌ

2023/10/09 06:44:35 pm        1075
Facebook Telegram Linkin
ភ្នំពេញ៖ ប្រជាពលរដ្ឋធ្វើដំណើរ បានថ្លែងអំណរគុណដល់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដែលសម្តេចបានគិតគូរអនុញ្ញាតឱ្យបើកស្ពានឆ្លងទន្លេ ពីតំបន់អភិវឌ្ឍន៍កោះពេជ្រ-កោះនរា សម្រាប់ប្រជាពលរដ្ឋប្រើប្រាស់ជាបណ្តោះអាសន្ន ក្នុងឱកាសបុណ្យភ្ជុំបិណ្ឌខាងមុខនេះ ពោលគឺនៅថ្ងៃទី១៣ ដល់ថ្ងៃទី១៥ ខែតុលា ឆ្នាំ២០២៣ ។ ពលរដ្ឋលើកឡើងថា ការគិតគូរយកចិត្តទុកដាក់របស់សម្តេចធិបតី គឺបានជួយ​សម្រួលការចរាចរណ៍​ធ្វើដំណើរទៅមកបានកាន់តែប្រសើរឡើង​ ពិសេសនោះ ​គឺក្នុងរដូវការបុណ្យភ្ជុំបិណ្ឌខាងមុខ ព្រោះនៅ​រៀងរាល់មានបុណ្យទាន​ ពលរដ្ឋជាច្រើន ប្រាកដជាធ្វើដំណើរចាកចេញ​ពីរាជធានី​ភ្នំពេញទៅកាន់ស្រុកកំណើត ដូច្នោះហើយស្ពានខាងលើនេះ ​វានឹង​ជួយ​បញ្ចៀស​បាន​ពី​ការកកស្ទះ ហើយក៏កាត់បន្ថយពេលវេលាក្នុងការធ្វើដំណើរបានច្រើនផងដែរ ។សូមបញ្ជាក់ថា ស្ពានកោះពេជ្រ - កោះនរា នឹងត្រូវបានអនុញ្ញាតឲ្យប្រើប្រាស់ជាបណ្តោះអាសន្ន តែមួយស្ពាននោះទេ សម្រាប់ការធ្វើចរាចរណ៍ទ្វេទិស ពោលទាំងទៅ និងមក ។ ក្រោយផុតកំណត់រយៈពេល០៣ថ្ងៃហើយនោះ​ ស្ពានខាងលើនេះ​នឹង​ត្រូវផ្អាកចរាចរណ៍​ជា​បណ្តោះអាសន្នវិញសិន​ រងចាំការសាងសង់រួចរាល់ ១០០ភាគរយ នឹងបើកឱ្យប្រើប្រាស់ជាផ្លូវការណ៍ នៅ​ចុងខែតុលា ឆ្នាំ២០២៣នេះ ៕អត្ថបទ ៖ លីហេង 

ការជួយមនុស្សវ័យចាស់គឺជួយយើងទាំងអស់គ្នា គឺជាប្រធានបទទិវាមនុស្សចាស់កម្ពុជាឆ្នាំ២០២៣

2023/10/09 06:32:31 pm        239
Facebook Telegram Linkin
ភ្នំពេញ៖ ការជួយមនុស្សវ័យចាស់ ប្រៀបបានទៅនឹងការជួយខ្លួនឯង ដែលយើងត្រូវមានការតបស្នងសងគុណចំពោះមនុស្សវ័យចាស់ ឱ្យសក្តិសមទៅនឹងគុណបំណាច់របស់គាត់ដែលបានខិតខំប្រឹងប្រែងសម្រាប់ជាតិមាតុភូមិកន្លងមក។ នេះជាការលើកឡើងរបស់ ឯកឧត្ដម ឃួង ស្រេង អភិបាលរាជធានីភ្នំពេញ និងជាប្រធានកិត្តិយស សមាគមមនុស្សចាស់កម្ពុជារាជធានីភ្នំពេញបានលើកឡើង ក្នុងពិធីសំណេះសំណាល និងសាកសួរសុខទុក្ខមនុស្សវ័យចាស់ ក្នុងពិធីបុណ្យភ្ជុំបិណ្ឌ និងចូលរួមអបអរសាទរទិវាមនុស្សចាស់កម្ពុជា និងទិវាមនុស្សចាស់អន្តរជាតិ ថ្ងៃទី១ ខែតុលា ឆ្នាំ២០២៣ នាព្រឹកថ្ងៃទី៩ ខែតុលា ឆ្នាំ២០២៣ នៅសាលារាជធានីភ្នំពេញ ។ឯកឧត្ដម ឃួង ស្រេង មានប្រសាសន៍ថា ទិវាមនុស្សចាស់អន្តរជាតិ ថ្ងៃទី១ ខែតុលា ឆ្នាំ២០២៣នេះ ធ្វើឡើងក្រោមប្រធានបទ ការជួយមនុស្សវ័យចាស់គឺជួយយើងទាំងអស់គ្នា ។ ប្រធានបទនេះ ពិតជាបានបង្ហាញឱ្យឃើញកាន់តែច្បាស់អំពីតម្លៃនៃអំពើល្អ ចំពោះមនុស្សវ័យចាស់ ក្នុងវប្បធម៌​ដ៏ល្អផូរផង់នៃសង្គមជាតិខ្មែរ ​ពោលគឺការជួយមនុស្សវ័យចាស់ ​ប្រៀបដូចជាការជួយខ្លួនឯង។ ដូច្នេះត្រូវមានការ​តបស្នងសងគុណចំពោះមនុស្សវ័យចាស់ ឱ្យសក្តិសមទៅនឹងគុណបំណាច់​របស់គាត់។ឯកឧត្ដម បន្តថា សម្តេចអគ្គមហាសនាបតីតេជោ ហ៊ុន សែន ប្រធានឧត្ដមក្រុមប្រឹក្សាព្រះមហាក្សត្រ និងជាប្រធានកិតិ្តយសគណៈកម្មាធិការជាតិកម្ពុជាដើម្បីមនុស្សចាស់ និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី តែងបានផ្ដល់ក្ដីអាណិតស្រឡាញ់ យកចិត្តទុកដាក់ ផ្តល់តម្លៃ និង​គិតគូរពីសុខទុក្ខរបស់មន្ត្រីរាជការ និវត្តន៍ជនជារៀមច្បង និងមនុស្សវ័យចាស់ទាំងអស់ ដោយ​បានផ្តល់តម្លៃយ៉ាងធំធេង តាមរយៈការកំណត់យកថ្ងៃទី១ ខែតុលា ជាថ្ងៃប្រារព្ធទិវាមនុស្សចាស់​កម្ពុជា និងទិវាមនុស្សចាស់អន្តរជាតិ ជារៀងរាល់ឆ្នាំ។ មនុស្សចាស់ ជាប្រភព នៃបទពិសោធន៍មិនចេះរីងស្ងួត សម្រាប់មនុស្សវ័យក្មេងជំនាន់បច្ចុប្បន្ន និងតទៅជំនាន់ក្រោយៗទៀត។ អត្ថន័យនៃការប្រារព្ធទិវានេះ ក៏ជាការរំលឹកដល់គុណូបការៈចំពោះមន្ត្រីរាជការ និវត្តន៍ជនទាំងអស់ ដែលធ្លាប់បានចូលរួមចំណែកស្តារ កសាង និងអភិវឌ្ឍន៍រាជធានីភ្នំពេញក្នុងរយៈពេលជាច្រើនឆ្នាំកន្លងមក រហូតសម្រេចបាននូវស្នាដៃ និងសមិទ្ធផលជាច្រើនឥតគណនា។បើតាមស្ថិតិរបស់ក្រសួងផែនការ បានបង្ហាញឱ្យឃើញថា ចំនួនមនុស្សវ័យចាស់កម្ពុជា នៅចន្លោះឆ្នាំ២០២០ ដល់ឆ្នាំ២០៣០ មាននិន្នាការកើនឡើងក្នុងអត្រាប្រមាណ ៤% ក្នុងមួយឆ្នាំ ខណៈពេលដែលមនុស្សវ័យក្មេង ​មានអត្រាកើនឡើងត្រឹមតែ ១% ក្នុងមួយឆ្នាំតែប៉ុណ្ណោះ ហើយតាម​ការព្យាករណ៍ចំនួនមនុស្សវ័យចាស់នៅកម្ពុជានឹងកើនឡើងដល់ប្រមាណ ២លាននាក់ ស្មើនឹង ១១% នៃចំនួនប្រជាជនសរុប ១៨លាននាក់ នៅឆ្នាំ២០៣០៕អត្ថបទ ៖ ប្រាក់ វ៉ាន់ដា

បណ្ដាញសង្គម

ព័ត៌មានថ្មីៗ

ករណីលិចទូកនៅកោះប្រាក់៖ មនុស្ស ៣នាក់បាត់ខ្លួន រកមិនទាន់ឃើញ
08/16/2026 05:08 PM
Facebook Telegram Linkin
ប្រធានក្រុមការងារចុះមូលសង្កាត់ដង្កោ ជំរុញដល់អាជ្ញាធរមូលដ្ឋាន ផ្ដល់​សេវា​ឱ្យ​បាន​ល្អ​ដល់​ប្រជាពលរដ្ឋ
08/16/2026 04:08 PM
Facebook Telegram Linkin
ប្រជានេសាទអេក្វាឌ័រ ប្រឈមគ្រោះថ្នាក់២ គឺក្រុមជួយដូរគ្រឿងញៀន និងការវាយប្រហាររបស់អាមេរិក
08/16/2026 04:08 PM
Facebook Telegram Linkin
បញ្ជូនជនជាតិចិន ៤នាក់ទៅសាលាដំបូងខេត្តព្រះសីហនុ ពាក់ព័ន្ធករណី ONLINE SCAMS
08/16/2026 04:08 PM
Facebook Telegram Linkin
ចំនួនមនុស្សស្លាប់សរុបដោយសារគ្រោះមហន្តរាយលិចនាវាចម្លងនៅហ្ស៊ីមបាវ៉េ កើនឡើងដល់ ៧២នាក់
08/16/2026 04:08 PM
Facebook Telegram Linkin
យន្តហោះចម្បាំងរបស់អង្គការណាតូបាញ់ទម្លាក់យានដ្រូនដែលរំលោភលើដែនអាកាសរបស់ប្រទេសរ៉ូម៉ានី
08/16/2026 04:08 PM
Facebook Telegram Linkin
កាតាច្រានចោលការអះអាងរបស់ទីក្រុងតេអេរ៉ង់ថា ពួកគេបានឃាត់ខ្លួនអ្នកបើកបរយន្តហោះទម្លាក់គ្រាប់បែកអ៊ីរ៉ង់
08/16/2026 04:08 PM
Facebook Telegram Linkin
មេដឹកនាំក្រុមហាម៉ាស ធ្វើដំណើរទៅកាន់ទីក្រុងគែ ប្រទេសអេហ្ស៊ីប សម្រាប់កិច្ចប្រជុំស្តីពីតំបន់ហ្កាហ្សា
08/16/2026 03:08 PM
Facebook Telegram Linkin
សម្ដេចតេជោ ហ៊ុន សែន សរសើរ​លោកស្រី កឹម មនោវិទ្យា ថាពិតជាធនធានដ៏ល្អសម្រាប់ជាតិ
08/16/2026 03:08 PM
Facebook Telegram Linkin
នាយករដ្ឋមន្រ្តីជប៉ុន សន្យាមិនឲ្យកើតមានម្តងទៀតជាដាច់ខាតសោកនាដកម្មសង្រ្គាម
08/16/2026 02:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.