នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ប្រធានគណៈកម្មាធិការគណបក្សខេត្តតាកែវ ណែនាំសមាជិកមូលដ្ឋានឱ្យយកចិត្ត​ទុកដាក់​បម្រើ​ពលរដ្ឋ
សម្ដេចតេជោ ណែនាំឱ្យដាក់បេក្ខភាពស្រ្ដីជាប់ឆ្នោតយ៉ាងតិចមួយឃុំមួយរូប និងមានស្ត្រីធ្វើស្មៀនឃុំ
សម្ដេចតេជោស្នើស្ថាប័នពាក់ព័ន្ធចាត់វិធានការភ្លាមៗចំពោះអ្នកប្រព្រឹត្តទង្វើអសីលធម៌លើបណ្ដាញសង្គម
សម្ដេចតេជោ អំពាវនាវដល់រាជរដ្ឋាភិបាលយកចិត្តទុកដាក់សាងសង់កន្លែងស្នាក់នៅសម្រាប់សិស្សជាស្ត្រី

នយោបាយ​ និង ការអភិវឌ្ឍន៍

លោក Trump និយាយវាយប្រហារគូប្រជែងលោក DeSantis ក្នុងការជួបជុំគ្នានៅទីក្រុងវ៉ាស៊ីនតោនថា «លោកបរាជ័យហើយ»

2023/09/16 06:39:46 pm        430
Facebook Telegram Linkin
អតីតប្រធានាធិបតីសហរដ្ឋអាមេរិក លោក Donald Trump បាននិយាយវាយប្រហារបេក្ខជនប្រធានាធិបតីមកពីគណបក្សសាធារណៈរដ្ឋ Ron DeSantis ដោយហៅលោកថា «បេក្ខជនបរាជ័យ» នៅក្នុងព្រឹត្តិការណ៍មួយដែលរៀបចំដោយក្រុមអភិរក្សនិយម Concerned Women for America កាលពីថ្ងៃសុក្រ ទី១៥ ខែកញ្ញា។ លោក Trump និងអភិបាលរដ្ឋ Florida លោក Ron DeSantis បានលើករឿងរ៉ាវរបស់ពួកគេ ទៅកាន់អ្នកបោះឆ្នោតដែលសម្តែងការសាទរ បានប្រមូលផ្តុំគ្នានៅទីក្រុងវ៉ាស៊ីនតោនសម្រាប់ព្រឹត្តិការណ៍ចំនួនពីរកាលពីថ្ងៃសុក្រ ដោយស្វែងរកកាគាំទ្ររឹងមាំជាមួយប្លុកបោះឆ្នោតដែលទំនងជាដើរតួយ៉ាងសំខាន់ក្នុងការជ្រើសរើសបេក្ខភាពប្រធានាធិបតីនៅឆ្នាំ ២០២៤ ។បេក្ខជនទាំងពីរ បាននិយាយនៅក្នុងកិច្ចប្រជុំកំពូលថ្នាក់ជាតិចំនួនពីរ ដែលបានកោះប្រជុំដោយ ក្រុម Concerned Women of America និងក្រុមប្រឹក្សាស្រាវជ្រាវគ្រួសារ ក្រុមអ្នកគាំទ្រសាទរដែលគាំទ្រច្បាប់រឹតបន្តឹងការរំលូតកូន ក្នុងចំណោមបញ្ហាផ្សេងៗទៀត។ យោងតាមការស្ទង់មតិរបស់សារព័ត៌មាន Reuters ឬ Ipsos ដែលបានបិទកាលពីថ្ងៃព្រហស្បតិ៍ ទី ១៤ ខែកញ្ញាបានឲ្យដឹងថា លោក Trump ទទួលបានពិន្ទុនាំមុខប្រហែល ៣៥ ភាគរយលើលោក DeSantis និងលោក Vivek Ramaswamy ក្នុងចំណោមគ្រឹស្តសាសនិកដ៏ស្មោះស្ម័គ្រ។

ការធ្វើសមយុទ្ធសុខាភិបាលជាមួយចិន គឺដើម្បីបង្កើនសមត្ថភាពផ្នែកសង្រ្គោះ ដល់កងទ័ពកម្ពុជាបន្ថែមទៀត

2023/09/16 06:25:40 pm        424
Facebook Telegram Linkin
ភ្នំពេញ៖ នាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចម្រុះ នៃកង​យោធពលខេមរភូមិន្ទ ​និងជាប្រធានគណៈកម្មការដឹកនាំធ្វើលំហាត់ ​និងសមយុទ្ធរវាងកង​យោធពលខេមរភូមិន្ទ ​ជាមួយបណ្តាប្រទេសជាមិត្ត ​និងការចាត់តាំងសមយុទ្ធនានា​ក្នុងកង​យោធពលខេមរភូមិន្ទ បានថ្លែងថា ការធ្វើសមយុទ្ធផ្នែក ​សុខាភិបាលជាមួយកងទ័ពចិននាពេលនេះ គឺដើម្បីបង្កើន​សមត្ថភាពផ្នែកសង្រ្គោះដល់​កងទ័ពកម្ពុជាបន្ថែមទៀត។ថ្លែងប្រាប់អ្នកសារព័ត៌មានក្រោយអញ្ជើញចូលរួមក្នុងពិធីបើកជាផ្លូវការនៃការធ្វើសមយុទ្ធ រវាងកងទ័ពកម្ពុជា-ចិនផ្នែកសុខាភិបាលដែលមានឈ្មោះថា«ទេវតាសន្តិភាពឆ្នាំ២០២៣» ​នាថ្ងៃទី១៦ ខែ​កញ្ញានេះ នៅបញ្ជាការដ្ឋានទ័ពពិសេសកងទ័ពជើងគោក ​នាសង្កាត់កំបូល ខណ្ឌកំបូល រាជធានី​ភ្នំពេញនេះ ​នាយឧត្តមសេនីយ៍ ឥត សារ៉ាត់ ​បានបញ្ជាក់ថា ​ការធ្វើសមយុទ្ធរួមគ្នារវាង​កងទ័ពកម្ពុជា និងចិន ក្រៅពី​ផ្លាស់ប្តូរ​បទពិសោធន៍គ្នា​ផ្នែកសង្រ្គោះគ្រោះមហន្តរាយ ក៏ដើម្បីអបអរសាទរខួប​លើកទី៦៥ឆ្នាំ ​នៃការបង្កើតចំណងការទូតរវាងកម្ពុជា-ចិនផងដែរ។នាយឧត្តមសេនីយ៍ ឥត​ សារ៉ាត់ បានបញ្ជាក់បន្ថែមទៀតថា ​សមយុទ្ធនេះគឺនឹងធ្វើឡើងចាប់ពីថ្ងៃទី ១៦ ដល់ថ្ងៃទី២៦ ខែកញ្ញា ឆ្នាំ២០២៣នេះ ក៏ដើម្បីលើកកម្ពស់​សមត្ថភាព,ការផ្លាស់ប្តូរបទ​ពិសោធន៍​ក្នុងកិច្ចសហប្រតិបត្តិការផ្នែកសុខាភិបាល, ប្រតិបត្តិការសង្រ្គោះគ្រោះមហន្តរាយ និងជំងឺឆ្លងផ្សេងៗ​ឲ្យប្រកបដោយប្រសិទ្ធភាពជាដើម។ សមយុទ្ធរវាងកងទ័ពកម្ពុជា-ចិនជាលើកដំបូងផ្នែកសុខាភិបាលនេះ ​ភាគីទាំងពីរបានកំណត់យក​ប្រធានបទ«ប្រតិបត្តិការសង្គ្រោះសុខាភិបាល ​មនុស្សធម៌អន្តរជាតិរួមគ្នា​ នៅតំបន់គ្រោះមហន្តរាយ ខ្យល់ព្យុះ និងទឹកជំនន់ធ្ងន់ធ្ងរ»ជាដើម។ សមយុទ្ធនេះនឹងធ្វើនៅទីតាំងផ្សេងគ្នា ​ដោយក្នុងនោះនៅទីកន្លែងបញ្ជាការដ្ឋានទ័ពពិសេស កង​ទ័ពជើងគោក(អតីតកងពលតូច 911) ​នៅមន្ទីរពេទ្យព្រះកេតុមាលា ​នៅព្រលានយន្តហោះយោធា និងនៅមន្ទីរពេទ្យ​យោធភូមិភាគទី៤ ខេត្តសៀមរាប៕អត្ថបទ៖ បាន ចក់

អភិបាលស្រុកដំណាក់ចង្អើរ ដឹកនាំកម្លាំងគណៈបញ្ជាការឯកភាពរដ្ឋបាលស្រុក ចុះរុះរើសំណង់របងសាងសង់ខុសច្បាប់

2023/09/16 06:08:46 pm        170
Facebook Telegram Linkin
កែប៖ ដោយអនុវត្តតាមគោលការណ៍ណែនាំដ៏ខ្ពង់ខ្ពស់របស់ឯកឧត្តមបណ្ឌិត សោម ពិសិដ្ឋ អភិបាលនៃគណៈអភិបាលខេត្តកែប និងជាប្រធានគណៈបញ្ជាការឯកភាពរដ្ឋបាលខេត្ត នៅរសៀលថ្ងៃទី១៥ ខែកញ្ញា ឆ្នាំ២០២៣ លោក ឆាង ឆៃ អភិបាលស្រុកដំណាក់ចង្អើរ និងជាប្រធានគណៈបញ្ជាការឯកភាពរដ្ឋបាលស្រុក បានដឹកនាំកម្លាំងគណៈបញ្ជាការឯកភាពរដ្ឋបាលស្រុកចុះអនុវត្តកិច្ចសន្យាក្នុងការត្រួតពិនិត្យ និងរុះរើសំណង់របងដែលបានសាងសង់ខុសច្បាប់០១កន្លែង ធ្វើពីបេតុង ​ជញ្ជាំង​រៀបឥដ្ឋ​ ប្រវែង ១២ម៉ែត្រ ​ស្ថិតនៅភូមិអង្កោល ឃុំអង្កោល ស្រុកដំណាក់ចង្អើរ ខេត្តកែប ដែលបាន​សាងសង់​រំលោភ​លើដីសាធារណៈ។សូមបញ្ជាក់ថា បន្ទាប់ពីទទួលព័ត៌មានអំពីការ​សាងសាង់​របង​រំលោភលើដីសាធារណៈខាងលើ​ភ្លាម លោក ឆាង ឆៃ អភិបាលស្រុកដំណាក់ចង្អើរ ​និងជាប្រធានគណៈបញ្ជាការឯកភាពរដ្ឋបាលស្រុក បាន​អញ្ជើញម្ចាស់សំណង់​ដែលតំណាងដោយឈ្មោះ លឹម ហ៊ត​ រស់នៅភូមិ ឃុំខាងលើ ឲ្យមក​ធ្វើកិច្ច​សន្យាបញ្ឈប់ការសាងសង់​ជាបន្ទាន់ និងត្រូវរុះរើសំណង់របស់ខ្លួន​ដែលបានសាងសង់​ខុសច្បាប់​ទាំងអស់វិញភ្លាមៗដោយខ្លួនឯង ។បន្ទាប់ពីមានការចុះអនុវត្តកិច្ចសន្យា ​និងរុះរើសំណង់របងខុសច្បាប់​ទាំងនោះចេញ ត្រូវបាន​ប្រជាពលរដ្ឋនៅក្នុងតំបន់ និងមជ្ឈដ្ឋានទូទៅ​មានការ​សប្បាយរីករាយ និងសាទរ​ជាខ្លាំងក្នុងការអនុវត្តច្បាប់​ដោយពុំមានការរើសអើង ​ក្រោមការដឹកនាំរបស់ឯកឧត្តមបណ្ឌិត សោម ពិសិដ្ឋ អភិបាលនៃគណៈអភិបាលខេត្តកែប ​និងជាប្រធានគណៈបញ្ជាការឯកភាពរដ្ឋបាលខេត្តកែប ។

រដ្ឋមន្ត្រីក្រសួងការងារ៖ “ខួប៧០ឆ្នាំនៃមិត្តភាពកម្ពុជា-ជប៉ុន ដើម្បីរឹតចំណងសាមគ្គីភាព និងទាក់ទាញប្រជាជន និងអ្នកវិនិយោគជប៉ុនឱ្យមកកម្ពុជាកាន់តែច្រើន”

2023/09/16 06:00:26 pm        520
Facebook Telegram Linkin
ភ្នំពេញ៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ កាលពីល្ងាចថ្ងៃទី១៥ ខែកញ្ញានេះ បានបង្ហាញសារប្រកបដោយក្តីសង្ឃឹម តាមរយៈហ្វេសប៊ុកផ្លូវការថា ខួប៧០ឆ្នាំនៃមិត្តភាពកម្ពុជា-ជប៉ុន មិនត្រឹមតែជាការរឹតចំណងសាមគ្គីភាពរបស់ប្រទេសទាំងពីរនោះទេ ហើយអាចជាការទាក់ទាញភ្ញៀវទេសចរណ៍ និងអ្នកវិនិយោគថែមទៀតផង។ សារប្រកបដោយក្តីសង្ឃឹមនេះ គឺធ្វើឡើងក្រោយពេលដែលឯកឧត្តម បានចូលរួមជាមួយសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា និងឯកឧត្តម អូអេណុ អាត់ស៊ូស៊ី ​ឯកអគ្គរដ្ឋទូតជប៉ុនប្រចាំនៅព្រះរាជាណាចក្រកម្ពុជា ដោយបានទស្សនាការ​ប្រគុំតន្ត្រីអូខេស្ត្រាក្នុងពិធីរំលឹកខួប៧០ឆ្នាំនៃមិត្តភាពកម្ពុជា-ជប៉ុននៅមជ្ឈមណ្ឌល​សហប្រតិបត្តិការ​កម្ពុជា-ជប៉ុន (CJCC)ក្នុងរាជធានីភ្នំពេញ។ ឯកឧត្តម ហេង សួរ បានគូសបញ្ជាក់ថា៖ “ បានមកចូលរួមជាមួយ​សម្តេចរដ្ឋសភាធិបតី ឃួន សុដារី និង ឯកឧត្តម អូអេណុ អាត់ស៊ូស៊ី ឯកអគ្គរដ្ឋទូតជប៉ុនប្រចាំកម្ពុជា ទស្សនាការ ប្រគំតន្ត្រីអូខេស្ត្រា ខួប៧០ឆ្នាំនៃមិត្តភាពកម្ពុជា-ជប៉ុន ​ដើម្បីរឹតចំណងសាមគ្គីភាពកម្ពុជា-ជប៉ុន និងទាក់ទាញការចាប់​អារម្មណ៍​របស់ប្រជាជនជប៉ុន និងអ្នកវិនិយោគជប៉ុនឲ្យមកកម្ពុជាកាន់តែច្រើន”។ សូមបញ្ជាក់ថា កម្ពុជា និងជប៉ុន បានបង្កើតទំនាក់ទំនងការទូតជាផ្លូវការដំបូងនៅឆ្នាំ ​១៩៥៣ ហើយ ៧០ឆ្នាំក្រោយគឺឆ្នាំ២០២៣នេះ​ ប្រទេសទាំងពីរ ​បានដំឡើងកម្រិតទំនាក់ទំនង​ទំនាក់ទំនងទ្វេភាគី ដល់​កម្រិត «ភាពជាដៃគូយុទ្ធសាស្ត្រគ្រប់ជ្រុងជ្រោយ»ដែល​ជាដៃគូយុទ្ធសាស្ត្រកម្រិតខ្ពស់បំផុត​នៃទំនាក់ទំនងរវាងប្រទេសក្នុង​តំបន់អាស៊ីទាំងពីរនេះ។ ក្រៅពីការលើកឡើងក្នុងទិដ្ឋភាព​នយោបាយ និងសេដ្ឋកិច្ចកិច្ច​ ឯកឧត្តម ហេង សួរ ក៏បានសរសើរ​យុវតន្ត្រី​ករជប៉ុនថា​ពិតជាសម្តែងបានល្អ និងថ្លែងអំណរគុណដែលធ្វើដំណើរដ៏សែន​ឆ្ងាយដម្រាប់​ការប្រគំតន្ត្រីនេះ​ ហើយក៏ជូនពរដល់យុវតន្រ្តីករជប៉ុន​មានសុខភាពល្អ និងរីករាយ​ក្នុងការស្នាក់នៅកម្ពុជា។គួររំលឹកផងដែរថា​ ក្នុងរយៈពេល៦ខែដើមឆ្នាំ២០២៣ ​ទំហំពាណិជ្ជកម្មកម្ពុជា-ជប៉ុន មានទំហំ​៨៦០លាន​ដុល្លារអាម៉េរិក ខណៈដែលកម្ពុជា​បាននាំចេញទៅជប៉ុន ៥៤៥លានដុល្លារអាម៉េរិក៕

គម្រោងអាងប្រព្រឹត្តកម្មទឹកកខ្វក់សាងសង់លើផ្ទៃដីជាង១៦ហិកតា ក្នុងខេត្តកំពង់ធំ ត្រូវបានសម្ពោធដាក់ឲ្យប្រើប្រាស់

2023/09/16 05:48:35 pm        737
Facebook Telegram Linkin
កំពង់ធំ៖ អាងប្រព្រឹត្តកម្មទឹកកខ្វក់ សាងសង់លើផ្ទៃដីជាង១៦ហិកតា ក្នុងក្រុងទឹកស្ទឹងសែន ខេត្តកំពង់ធំ ត្រូវបានសម្ពោធដាក់ឲ្យប្រើប្រាស់ជាផ្លូវការ ដើម្បី​បន្សុទ្ធ​ទឹកកខ្វក់តាមផ្ទះ​ ភោជនីយដ្ឋាន សណ្ឋាគារ រោងចក្រ ឧស្សាហកម្ម និងសិប្បកម្ម ​មុនបង្ហូរចេញទៅទីសាធារណៈ និងមិន​អោយប៉ះពាល់​ដល់សុខភាពសាធារណៈ។នៅថ្ងៃទី១៥ ខែកញ្ញា ឆ្នាំ២០២៣, ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន អញ្ជើញសម្ពោធ​ដាក់ឲ្យប្រើប្រាស់ជាផ្លូវការនូវស្ថានីយ ​និង​អាងប្រព្រឹត្តកម្ម​ទឹក​កខ្វក់ក្នុង​ក្រុងស្ទឹងសែន ខេត្តកំពង់ធំ។ក្នុងឱកាសនោះ ឯកឧត្តម មានប្រសាសន៍ថា ​ក្រោមការដឹកនាំប្រកបដោយភាព​វៃឆ្លាត ​និងទស្សន វិស័យ​វែងឆ្ងាយរបស់រាជរដ្ឋាភិបាល ​ដែលមាន​សម្ដេចមហាបវរធិបតី ហ៊ុន ម៉ាណែត ជាប្រមុខដឹកនាំ ក្នុងការលើកកម្ពស់វិស័យអនាម័យ​ដើម្បីធានា​ប្រយោជន៍​សុខភាពសាធារណៈ បានចាត់ការរៀបចំ​ការគ្រប់គ្រង កាកសំណល់រឹងរាវ ជាវិស័យសំខាន់ការថែរក្សាបរិស្ថាន​ និងអនាម័យ។ឯកឧត្តម បន្តថា ក្រសួងសាធារណការ និងដឹកជញ្ជូន​ ប្រគល់សមិទ្ធផលនេះ​ ទៅកាន់រដ្ឋបាលខេត្ត គ្រប់គ្រង និងប្រតិបត្តិបន្ត ​ដើម្បីប្រើប្រាស់ ​ជាប្រយោជន៍​សាធារណៈសម្រាប់ប្រជាពលរដ្ឋ​ក្នុងខេត្ត​កំពង់ធំ ​និងចូលរួមថែរក្សាការពារសំដៅធ្វើយ៉ាងណាឱ្យហេដ្ឋា​រចនា​សម្ព័ន្ធដែលយើង​ទទួលបាននេះ ស្ថិតស្ថេរ គង់វង្សយូរអង្វែងទៅអនាគត។ឯកឧត្តមបន្តថា ​គោលនយោបាយ ​និងយុទ្ធសាស្ត្រសំខាន់ៗជាច្រើនត្រូវបាន ​ដាក់ចេញដើម្បីពន្លឿន​ការ​អភិវឌ្ឍប្រកប ដោយនិរន្តភាព។ ហើយនេះក៏ជាផ្នែកមួយរបស់រាជរដ្ឋាភិបាល នៃព្រះរាជាណា​ចក្រ​កម្ពុជា ចាត់ទុកជាអាទិភាពខ្ពស់ ក្នុងយុទ្ធសាស្ត្របញ្ចកោណ ដំណាក់កាលទី១ របស់រាជ​ដ្ឋាភិបាល នីតិកាលទី៧ នៃរដ្ឋសភា ​ដើម្បីកំណើនការងារ សមធម៌ ប្រសិទ្ធភាព និងចីរភាព កសាងមូលដ្ឋានគ្រឹះឆ្ពោះទៅសម្រេចចក្ខុវិស័យកម្ពុជាឆ្នាំ២០៥០។ជាមួយគ្នានេះផងដែរ ​ឯកឧត្តម ងួន រតនៈ អភិបាលខេត្តកំពង់ធំ លើកឡើងផងដែរថា ដោយ​មានការសហការយ៉ាងល្អ ​រវាងរាជរដ្ឋាភិបាលនៃព្រះរាជាណាចក្រកម្ពុជា ​និង​ធនាគារ​អភិវឌ្ឍន៍​អាស៊ី ហៅកាត់ថា (ADB) ក្នុងក្រុងស្ទឹងសែន ខេត្តកំពង់ធំ ​ទទួលបានការគាំទ្រលើ ​អនុគម្រោង ធំៗចំនួន ៣ ដែល អនុវត្តន៍ការសាងសង់រយៈពេល៣ឆ្នាំ​ចាប់ផ្តើមពីខែកក្កដា ​ឆ្នាំ២០២០ និងបញ្ចប់ការ​សាងសង់ នៅថ្ងៃទី១១ ខែកក្កដា ​ឆ្នាំ២០២៣ កន្លងទៅនេះ។ឯកឧត្តមបន្តថា អនុគម្រោងធំទាំងបីនោះ រួមមាន ​អនុគម្រោង ​រៀបចំប្រព័ន្ធលូញែក ឬអាចហៅបានថា ជាប្រព័ន្ធលូរំដោះទឹកភ្លៀង និងទឹកកខ្វក់ ក្នុងក្រុង ដើម្បីបង្កើនសមត្ថភាព​រំដោះទឹកក្នុងរដូវវស្សា មានប្រវែងសរុប ៣៤ គ.ម និងមានស្ថានីយ បូមចំនួន២កន្លែង, អនុគម្រោងរៀបចំអាងប្រព្រឹត្តិកម្មទឹកកខ្វក់ដែលមានសមត្ថភាពចម្រុះទឹកចំនួន ៣,៥០០ម៉ែត្រគូបក្នុងមួយថ្ងៃ ដែលរៀបចំលើផ្ទៃដីប្រមាណ១៦ ហិកតាដើម្បីបន្សុទ្ធទឹកកខ្វក់តាមផ្ទះ ភោជនីយដ្ឋាន​ សណ្ឋាគារ រោងចក្រ ឧស្សាហកម្ម និងសិប្បកម្ម មុនបង្ហូរចេញទៅទីសាធារណៈ និងមិនអោយ ប៉ះពាល់ដល់ ​សុខភាពសាធារណៈ និងអនុគម្រោងរៀបចំទីលានចាក់សំរាមថ្មី ក្នុងផ្ទៃដីប្រហែល ១៩,៦ ហិកតា ស្ថិតនៅ ឃុំត្រពាំងឬស្សី ស្រុកកំពង់ស្វាយ ឱ្យនៅឆ្ងាយ​ពីទីប្រជុំជនក្រុងស្ទឹងសែន ​ដើម្បីជួយគាំទ្រដល់ការរៀបចំទុកដាក់សំរាមក្នុងក្រុង ស្ទឹងសែន ឱ្យបានល្អប្រសើរ ​និងមិនប៉ះពាល់ដល់សុខភាពរបស់ប្រជាពលរដ្ឋ។គម្រោងទាំងមូលគ្របដណ្តប់លើផ្ទៃដីប្រមាណ ​១៥៩ហិកតា ​ស្ថិតនៅក្នុងសង្កាត់ចំនួន៤ ដែលរួមមាន​សង្កាត់កំពង់ធំ សង្កាត់ដំរីជាន់ខ្លា​ សង្កាត់កំពង់រទេះ និងសង្កាត់អូរគន្ធរ។

អាណតិ្តទី៧នាយកដ្ឋានសិល្បៈទស្សនីយភាព៖ មានទិសដៅសំខាន់៣យ៉ាង ដើម្បីអភិរក្ស អភិវឌ្ឍន៍ និងផ្សព្វផ្សាយ

2023/09/16 05:32:49 pm        511
Facebook Telegram Linkin
ភ្នំពេញ៖លោក ឈាង ឆដាភ័ក្រ្ត ប្រធាននាយកដ្ឋានសិល្បៈទស្សនីយភាព នៃក្រសួងវប្បធម៌ និងវិចិត្រសិល្បៈតាមរយៈBTV ព័ត៌មាន នាថ្ងៃនេះថា ក្នុងអាណតិ្តទី៧នេះ នាយកដ្ឋាន​មានទិសដៅ​សំខាន់ៗ​ចំនួន៣យ៉ាង ​ដើម្បីអភិរក្ស អភិវឌ្ឍន៍​ និងផ្សព្វផ្សាយ ​ដើម្បីឲ្យប្រជាជនស្គាល់ ស្រលាញ់ គាំទ្រ ចូលរួមថែរក្សាការពារ ​និងធ្វើឲ្យសិល្បៈ​រឹងមាំ​ ជឿនលឿន​ដូចបណ្តាប្រទេសផ្សេងៗទៀត។លោក ប្រធាននាយកដ្ឋាន បន្តថា ការងារសំខាន់ៗទាំង៣យ៉ាងនោះ ​គឺទី១៖ ការងារអភិរក្ស ជារឿង​សំខាន់​ចំពោះវិស័យវប្បធម៌ ​ជាក់ស្តែង​នាយកដ្ឋាន​បានដាក់ទិសដៅ​ស្រាវជ្រាវ​ចងក្រង​ទម្រង់សិល្បៈ ដែលយើងហៅថា​ ទម្រង់សិល្បៈមិនមានសកម្មភាព ​ឈានដល់ការបាត់បង់​ និងបាត់ការគាំទ្រ​តែម្តង ដូចជា ល្ខោនកេន ល្ខោនបែបបទ ល្ខោនភ្លេងការ។ ​ទម្រង់ល្ខោនទាំងអស់នេះមិនសូវមានការសម្តែង ឬគ្មានការសម្តែងតែម្តង។ទី២៖ ការងារអភិវឌ្ឍ ទម្រង់សិល្បៈមួយចំនួនត្រូវការអភិវឌ្ឍ យើងមិនអាចនៅឆ្ងាយពីបច្ចេកវិទ្យា ឬក៏នៅទ្រឹងនោះទេ។ ​ដូចជាទម្រង់សិល្បៈល្ខោននិយាយ ​យើងត្រូវផ្សារភ្ជាប់ជាមួយបច្ចេកវិទ្យា មានLED ​បញ្ចាំង​នៅផ្ទាំងខាងក្រោយ​ ដើម្បីឲ្យសោភ័ណ្ឌភាពសម្តែង​នៃសាច់រឿងនេះ កាន់តែប្រសើរឡើង​ថែមមួយកម្រិតទៀត។ទី៣៖ ការងារផ្សព្វផ្សាយ ​យើងមិនអាចធ្វើអ្វីដែលគ្មានការផ្សព្វផ្សាយបាននោះទេ។ មានន័យថា យើងចង់ឲ្យប្រជាជន ស្រលាញ់ គាំទ្រ ​លុះត្រាតែប្រជាជន ​ដឹងថាទម្រង់សិល្បៈនេះ ជាទម្រង់​សិល្បៈរបស់​ជាតិខ្មែរ និងជារបស់គាត់ដែល។ ​នៅពេលខ្លះសិល្បៈយើងសម្បូរបែប មធ្យោបាយ​ក្នុងការផ្សព្វផ្សាយមានតិច មានពេលខ្លះប្រជាជន​ មិនបានដឹង ​មិនបានជ្រាប មានពេលខ្លះយល់ថា​ជាទម្រង់សិល្បៈរបស់បរទេសទៀតផង។ជាចុងក្រោយក្នុងនាមមន្រី្តវប្បធម៌ លោក ឈាង ឆដាភ័ក្រ្ត ​ប្រធាននាយកដ្ឋានសិល្បៈទស្សនីយភាព សូមអំពាវនាវដល់ប្រជាជន ​ជាពិសេសយុវជន ​ងាកមកគាំទ្រវិស័យវប្បធម៌ពិសេសសិល្បៈបុរាណ យើងដឹងហើយថា​ សិល្បៈបុរាណ មានសារ​សំខាន់ខ្លាំង​ណាស់ចំពោះជាតិ​ (វប្បធម៌ រលត់ជាតិរលាយ) ​វប្បធម៌ ជាអត្តសញ្ញាណ ​ដួងព្រលឹងរបស់ជាតិ។ ដូច្នេះបើវប្បធម៌របស់ជាតិសាសន៍មួយ ​មិនមានការគាំទ្រពីប្រជាជនផ្ទាល់នោះទេ គឺគ្មានការរីក​ចម្រើននោះទេ ​ដូចនេះគ្មានអ្នកណា ​ស្រលាញ់វប្បធម៌ជាតិ ជាងប្រជាជនយើងនោះទេ៕អត្ថបទ រដ្ឋា

សមយុទ្ធ«ទេវតាសន្តិភាពឆ្នាំ២០២៣» គឺជាម៉ាកសញ្ញាដែលបង្កើតឡើងដោយកងទ័ពកម្ពុជា-ចិន

2023/09/16 05:23:52 pm        479
Facebook Telegram Linkin
ភ្នំពេញ៖ លោកវរសេនីយ៍ឯកពិសេស ហើ លីនយាន នាយករង នាយកដ្ឋានសុខាភិបាល​អគ្គនាយកដ្ឋានផ្គត់ផ្គង់ភស្តុភា នៃគណៈកម្មាធិការយោធា​មជ្ឈិម នៃសាធារណរដ្ឋប្រជាមានិតចិន បានអះអាងថា សមយុទ្ធយោធាចិន-កម្ពុជា ដែលមាន​ឈ្មោះថា«ទេវតាសន្តិភាពឆ្នាំ២០២៣ ឬPeace Angel-2023» គឺជាម៉ាកសញ្ញាកិច្ចសហប្រតិបត្តិការ​ទ្វេភាគី​ដ៏សំខាន់ ដែលបង្កើតឡើង​ដោយយោធា​ទាំងពីរ ​ខណៈសមយុទ្ធនេះនឹងផ្តល់បទ ពិសោធន៍​ផ្នែកសង្រ្គោះដល់គ្នាទៅវិញ​ទៅមកកាន់តែល្អ​ប្រសើបន្ថែមទៀត។ថ្លែងនៅក្នុងពិធីបើកជាផ្លូវការ នៃការធ្វើសមយុទ្ធរវាងកងទ័ពកម្ពុជា-ចិនផ្នែកសុខាភិបាល នាថ្ងៃទី១៦ ខែកញ្ញា ឆ្នាំ២០២៣នេះ នៅបញ្ជាការដ្ឋានទ័ពពិសេសកងទ័ពជើងគោក នាសង្កាត់កំបូល ខណ្ឌកំបូល​ រាជធានីភ្នំពេញ លោកវរសេនីយ៍ឯកពិសេស ហើ លីនយាន បានបញ្ជាក់ថា« សមយុទ្ធយោធាចិន-កម្ពុជា​ «Peace Angel-2023» គឺជាម៉ាកសញ្ញាកិច្ចសហប្រតិបត្តិការទ្វេភាគី​ដ៏សំខាន់ ដែលបង្កើតឡើងដោយយោធាទាំងពីរ ​ក្នុងគោលបំណង​បង្រួបបង្រួម និងអភិវឌ្ឍន៍​ភាពជាដៃគូយុទ្ធសាស្ត្រគ្រប់​ជ្រុងជ្រោយ​រវាងប្រទេសទាំងពីរ​ និងពង្រីក​ការ​ផ្លាស់ប្តូរយោធា​រវាង​ប្រទេសទាំងពីរ។ ចិនមានឆន្ទៈរក្សាការផ្លាស់ប្តូរយ៉ាង​ជិតស្និទ្ធ​ជាមួយកម្ពុជា ហើយយកលំហាត់​នេះជា​ឱកាសមួយដើម្បីជំរុញកិច្ចសហប្រតិបត្តិការជាក់ស្តែង​រវាងយោធាទាំងពីរក្នុងវិស័យ​សេវាវេជ្ជសាស្រ្ត​ឲ្យកាន់តែខ្លាំងក្លាបន្ថែមទៀត»។លោកវរសេនីយ៍ឯកពិសេស ហើ លីនយាន បានលើកឡើងទៀតថា​ ឆ្នាំនេះគឺជាខួបលើកទី ៦៥ នៃការបង្កើតទំនាក់ទំនង​ការទូតរវាងចិន​ និងកម្ពុជា ​និង «ឆ្នាំនៃមិត្តភាពចិន-កម្ពុជា»ដូចដែលយើង​ដឹងស្រាប់​ហើយថា មិត្តភាពជាប្រពៃណីរវាងចិន​ និងកម្ពុជាកាន់តែរឹងមាំឡើងៗ ក្រោមការណែនាំ​ជាយុទ្ធសាស្ត្ររបស់ មេដឹកនាំនៃប្រទេសទាំងពីរ ទំនាក់ទំនងទៅវិញទៅមក​នាពេលបច្ចុប្បន្ន​បានបន្តធ្វើឱ្យប្រសើរឡើង​នូវគុណភាព ​និងការរីកចម្រើន។ជាក់ស្តែងថ្ងៃនេះ​ សេវាវេជ្ជសាស្រ្ដនៃកងទ័ពទាំងពីរ ​បានរៀបចំសមយុទ្ធរួម សេវាវេជ្ជសាស្រ្ដចិន-កម្ពុជា ​ជាលើកដំបូងនេះមិនត្រឹមតែជាវិធានការជាក់ស្តែងមួយ ​ដើម្បីអនុវត្តការឯកភាពដ៏សំខាន់ ដែលសម្រេចបាន​ដោយថ្នាក់ដឹកនាំប៉ុណ្ណោះទេ។ ប៉ុន្តែក៏ជាការផ្លាស់ប្តូរ ​និងការសិក្សាទៅវិញ​ទៅ​មករវាងកងទ័ពចិន និងកម្ពុជាផងដែរ ​ដែលជាវេទិកាដ៏សំខាន់សម្រាប់សមយុទ្ធប្រយុទ្ធជាក់ស្តែង និងជាព្រឹត្តិការណ៍សំខាន់មួយ។ លោកវរសេនីយ៍ឯកពិសេស ​បានបន្ថែមទៀតថា​ «ខ្យល់ខ្លាំងស្គាល់ស្មៅដ៏រឹងមាំ ហើយមិត្តដែល​ត្រូវការ​គឺជាមិត្តពិតប្រាកដ» ក្នុងរយៈពេលជាង៣ ​ឆ្នាំចាប់តាំងពីការរីករាលដាលនៃជំងឺកូវីដ១៩ ឆ្នាំ ២០២០ ប្រឈមមុខនឹងការសាកល្បងនៃការផ្ទុះឡើងជាសកល ប្រទេសទាំងពីរ និងយោធា​ទាំងពីរ។ បានជួយគ្នាទៅវិញទៅមក ជម្នះការលំបាកជាមួយគ្នា និងឈានដល់ពេល​ដែលពួកគេ​ត្រូវការបំផុត។ ការជួយគ្នាទៅវិញទៅមក ការបរិច្ចាគសម្ភារៈប្រឆាំងនឹងជំងឺរាតត្បាត ចែករំលែក​បទពិសោធន៍​ប្រឆាំងនឹងជំងឺរាតត្បាត និងការចាប់ដៃគ្នាដោះស្រាយបញ្ហាប្រឈមនានា បង្ហាញពីស្មារតីសាមគ្គីភាព និងមិត្តភាពដ៏ខ្ពង់ខ្ពស់។សូមបញ្ជាក់ការធ្វើសមយុទ្ធរួមគ្នារវាងកងទ័ពកម្ពុជា និងចិននេះនឹងធ្វើឡើងចាប់ពីថ្ងៃទី១៦ ដល់​ថ្ងៃទី២៦ ​ខែកញ្ញាឆ្នាំ២០២៣នេះ​ហើយការធ្វើនេះ​គឺដើម្បី​អបអរសាទរ​ខួប​លើកទី៦៥ឆ្នាំ នៃការ​បង្កើត​ចំណងការទូតរវាងកម្ពុជា-ចិន, ​ដើម្បីលើកកម្ពស់សមត្ថភាព,ការផ្លាស់ប្តូរបទពិសោធន៍​ក្នុង​កិច្ចសហប្រតិបត្តិការផ្នែកសុខាភិបាល, ប្រតិបត្តិការសង្រ្គោះគ្រោះមហន្តរាយ និងជំងឺឆ្លងផ្សេងៗ​ឲ្យប្រកប​ដោយប្រសិទ្ធភាពជាដើម៕ អត្ថបទ៖ បាន ចក់

មេដឹកនាំកូរ៉េខាងជើង សរសើរយន្តហោះចម្បាំងរុស្ស៊ី សម្រាប់ការយកឈ្នះការគំរាមដ៏មានសក្តានុពល

2023/09/16 05:01:33 pm        439
Facebook Telegram Linkin
សារព័ត៌មាន KCNA បានរាយការណ៍នៅថ្ងៃសៅរ៍ ទី១៦ ខែកញ្ញានេះថា មេដឹកនាំកូរ៉េខាងជើង លោក Kim Jong Un បានសម្តែងការកោតសរសើរចំពោះបច្ចេកវិទ្យាអាកាសចរណ៍របស់រុស្ស៊ី ដែលកំពុងមានការអភិវឌ្ឍយ៉ាងឆាប់រហ័ស ដែលអាចយកឈ្នះការគំរាមកំហែងដ៏មានសក្តានុពលពីខាងក្រៅ ក្នុងអំឡុងពេលទស្សនកិច្ចរបស់លោកកាលពីថ្ងៃសុក្រ ទៅកាន់រោងចក្រផលិតយន្តហោះចម្បាំងរុស្ស៊ី។ កាលពីថ្ងៃសុក្រ លោក Kim បានពិនិត្យរោងចក្រផលិតយន្តហោះចម្បាំងរបស់រុស្ស៊ី ដែលស្ថិតនៅក្រោមការដាក់ទណ្ឌកម្មរបស់ប្រទេសលោកខាងលិច ជាផ្នែកនៃដំណើរទស្សនកិច្ច ដែលទីក្រុងវ៉ាស៊ីនតោន និងសម្ព័ន្ធមិត្តរបស់ខ្លួន មានការព្រួយបារម្ភថា អាចពង្រឹងយោធារបស់រុស្ស៊ីនៅអ៊ុយក្រែន និងជំរុញកម្មវិធីមីស៊ីល របស់ទីក្រុងព្យុងយ៉ាង។ ប្រធានាធិបតីរុស្ស៊ី លោក Vladimir Putin និងលោក Kim បានពិភាក្សាគ្នាអំពីបញ្ហាយោធា សង្គ្រាមនៅអ៊ុយក្រែន និងការធ្វើឲ្យកាន់តែស៊ីជម្រៅកិច្ចសហប្រតិបត្តិការ នៅពេលមេដឹកនាំទាំងពីរបានជួបគ្នាកាលពីថ្ងៃពុធ។ លោក Kim បានជួបអ្នកបើកយន្តហោះសាកល្បងនៅរោងចក្រដំឡើងតួយន្តហោះចម្បាំង ហើយឡើងលើយន្តហោះ Su-57 ដើម្បីស្តាប់ការពន្យល់លម្អិតអំពីលក្ខណៈបច្ចេកទេស និងដំណើរការហោះហើររបស់យន្តហោះចម្បាំងជំនាន់ទីប្រាំ។ លោក បានឡើងលើយន្តហោះ ដែលផលិតដោយរោងចក្រ ដើម្បីស្វែងយល់ពីដំណើរការរបស់វា និងមើលការហោះហើរសាកល្បងយន្តហោះចម្បាំង Su-35។ ការស្នាក់នៅរបស់មេដឹកនាំកូរ៉េខាងជើង ត្រូវបានគេរំពឹងថានឹងបន្តនៅថ្ងៃសៅរ៍នេះ ដែលអាចមានដំណើរទស្សនកិច្ចទៅកាន់ទីក្រុង វ្លេដឌីវ៉ូស្តុក(Vladivostok) ភាគខាងកើត និងមូលដ្ឋានកងទ័ពជើងទឹកមួយកន្លែង។ វិមានក្រឹមឡាំង បាននិយាយកាលពីថ្ងៃសុក្រថា រុស្ស៊ី និងកូរ៉េខាងជើង ពុំបានចុះហត្ថលេខាលើកិច្ចព្រមព្រៀងណាមួយស្តីពីបញ្ហាយោធា ឬលើវិស័យផ្សេងៗទៀត ក្នុងអំឡុងពេលដំណើរទស្សនកិច្ចរបស់លោក Kim ទៅកាន់ប្រទេសរុស្ស៊ីក្នុងសប្តាហ៍នេះ។ ប្រទេសកូរ៉េខាងត្បូង និងសហរដ្ឋអាមេរិកបាននិយាយកាលពីថ្ងៃសុក្រថា កិច្ចសហប្រតិបត្តិការយោធា រវាងប្រទេសកូរ៉េខាងជើង និងរុស្ស៊ី គឺជាការរំលោភលើការដាក់ទណ្ឌកម្មរបស់អង្គការសហប្រជាជាតិទៅលើទីក្រុងព្យុងយ៉ាង ហើយសម្ព័ន្ធមិត្តនឹងធានាថា នឹងមានការលំបាកសម្រាប់ទង្វើររបស់ខ្លួន។

ប្រជាជនអែលសាលវ៉ាឌ័រ ធ្វើបាតុកម្មនៅថ្ងៃឯករាជ្យប្រឆាំងប្រធានាធិបតី លោក Bukele

2023/09/16 04:36:23 pm        438
Facebook Telegram Linkin
ប្រជាជន ប្រទេសអែលសាលវ៉ាឌ័ររាប់ពាន់នាក់បានចេញធ្វើបាតុកម្មនៅថ្ងៃទិវាឯករាជ្យរបស់ប្រទេស កាលពីថ្ងៃសុក្រ ទី១៥ ខែកញ្ញា ដើម្បីបង្ហាញការឈឺចាប់របស់ពួកគេប្រឆាំងប្រធានាធិបតី លោក ណាយីប ប៊ូកែល(Nayib Bukele) ដោយចោទប្រកាន់លោកថា បានបំពានរដ្ឋធម្មនុញ្ញដោយការស្វែងរកការបោះឆ្នោតជាថ្មី។ លោក Bukele ដែលអាណត្តិដំបូងរបស់លោក បានចាប់ផ្តើមនៅឆ្នាំ ២០១៩ បាននិយាយកាលពីខែកញ្ញា ឆ្នាំមុនថា លោកនឹងស្វែងរកការបោះឆ្នោតជាថ្មី ទោះបីជាមានការហាមឃាត់លើអាណត្តិជាប់ៗគ្នាក៏ដោយ។ កាលពីឆ្នាំ ២០២១ តុលាការកំពូលរបស់ប្រទេស ដែលសមាជិកត្រូវបានតែងតាំងដោយសភាគ្រប់គ្រងដោយគណបក្ស នូវ៉ាស់ អាយឌៀស(Nuevas Ideas) បានសម្រេចថា លោកBukele អាចស្វែងរកអាណត្តិទីពីរបាន។សេចក្តីសម្រេចរបស់តុលាការ ត្រូវបានរិះគន់ដោយក្រុមសិទ្ធិមនុស្ស ព្រមទាំងសហរដ្ឋអាមេរិក ដែលបានចាត់ទុកថា ជាផ្នែកមួយនៃការធ្លាក់ចុះនៃបទដ្ឋានលទ្ធិប្រជាធិបតេយ្យរបស់ប្រទេសអែលសាវ៉ាឌ័រ។ ក្រុមអ្នកតវ៉ា បាននិយាយប្រឆាំងគោលនយោបាយសន្តិសុខរបស់លោក Bukele ។ សង្រ្គាម របស់លោកប្រឆាំងក្រុមជនអន្ធពាលនៅប្រទេសអែលសាវ៉ាឌ័រ បានបណ្តាលឱ្យមនុស្សជាង ៦៦.០០០នាក់ ត្រូវបានចាប់ដាក់ពន្ធនាគារ និងបានធ្វើឲ្យលោក Bukele ទទួលបានប្រជាប្រិយភាពមិនធ្លាប់មានពីមុនមក។ ប៉ុន្តែវាក៏បាននាំមកនូវការចោទប្រកាន់ពីអង្គការក្រៅរដ្ឋាភិបាល ពីបទរំលោភសិទ្ធិមនុស្ស និងការចរចាជាមួយក្រុមឧក្រិដ្ឋជន។

ពលរដ្ឋមូស្លីមនៅប្រទេសនីហ្សេ ធ្វើពិធីអធិដ្ឋានទ្រង់ទ្រាយធំប្រចាំសប្តាហ៍នៅមុខមូលដ្ឋានយោធាបារាំង

2023/09/16 04:03:04 pm        494
Facebook Telegram Linkin
ពលរដ្ឋមូស្លីមនីហ្សេរាប់ពាន់នាក់ បានប្រមូលផ្តុំគ្នានៅមូលដ្ឋានយោធាបារាំងរបស់ប្រទេសនេះកាលពីថ្ងៃសុក្រ ជាអ្វីដែលបានក្លាយជាការអធិដ្ឋានប្រចាំសប្តាហ៍សម្រាប់ការចាកចេញរបស់កងទ័ពបារាំង។ បាតុកររាប់ម៉ឺននាក់ បានប្រមូលផ្តុំគ្នានៅខាងក្រៅមូលដ្ឋានរយៈពេលពីរសប្តាហ៍មកហើយ គឺនៅថ្ងៃទី ២ ខែកញ្ញា ដោយទាមទារឱ្យកងទ័ព ព្រមទាំងឯកអគ្គរដ្ឋទូតបារាំងចាកចេញពីប្រទេសនេះ។ មនុស្សរាប់រយនាក់ នៅតែមាននៅទីនោះតាំងពីពេលនោះមក ដោយប្តេជ្ញាកាន់កាប់ច្រកចូលខាងមុខមូលដ្ឋាន រហូតដល់ការទាមទាររបស់ពួកគេត្រូវបានបំពេញ។ប្រធានាធិបតីបារាំង លោក Emmanuel Macron បាននិយាយកាលពីថ្ងៃសុក្រថា ឯកអគ្គរដ្ឋទូតបារាំងប្រចាំប្រទេសនីហ្សេ កំពុងត្រូវបានចាប់ធ្វើជាចំណាប់ខ្មាំងនៅស្ថានទូតបារាំង ដោយរបបយោធាដែលបានដណ្តើមអំណាចកាលពីខែកក្កដា។ មេដឹកនាំយោធារបស់ប្រទេសនីហ្សេ បានបញ្ជាឱ្យបណ្តេញឯកអគ្គរដ្ឋទូតកាលពីចុងខែមុន ប៉ុន្តែទីក្រុងប៉ារីស បានច្រានចោល ដោយនិយាយថា ខ្លួននៅតែចាត់ទុកប្រធានាធិបតីជាប់ឆ្នោតតាមបែបលទ្ធិប្រជាធិបតេយ្យ លោក Mohamed Bazoum ដែលបច្ចុប្បន្នកំពុងជាប់ជាអ្នកទោស គឺជាមេដឹកនាំស្របច្បាប់តែមួយគត់របស់ប្រទេសនីហ្សេ។

បណ្ដាញសង្គម

ព័ត៌មានថ្មីៗ

ករណីលិចទូកនៅកោះប្រាក់៖ មនុស្ស ៣នាក់បាត់ខ្លួន រកមិនទាន់ឃើញ
08/16/2026 05:08 PM
Facebook Telegram Linkin
ប្រធានក្រុមការងារចុះមូលសង្កាត់ដង្កោ ជំរុញដល់អាជ្ញាធរមូលដ្ឋាន ផ្ដល់​សេវា​ឱ្យ​បាន​ល្អ​ដល់​ប្រជាពលរដ្ឋ
08/16/2026 04:08 PM
Facebook Telegram Linkin
ប្រជានេសាទអេក្វាឌ័រ ប្រឈមគ្រោះថ្នាក់២ គឺក្រុមជួយដូរគ្រឿងញៀន និងការវាយប្រហាររបស់អាមេរិក
08/16/2026 04:08 PM
Facebook Telegram Linkin
បញ្ជូនជនជាតិចិន ៤នាក់ទៅសាលាដំបូងខេត្តព្រះសីហនុ ពាក់ព័ន្ធករណី ONLINE SCAMS
08/16/2026 04:08 PM
Facebook Telegram Linkin
ចំនួនមនុស្សស្លាប់សរុបដោយសារគ្រោះមហន្តរាយលិចនាវាចម្លងនៅហ្ស៊ីមបាវ៉េ កើនឡើងដល់ ៧២នាក់
08/16/2026 04:08 PM
Facebook Telegram Linkin
យន្តហោះចម្បាំងរបស់អង្គការណាតូបាញ់ទម្លាក់យានដ្រូនដែលរំលោភលើដែនអាកាសរបស់ប្រទេសរ៉ូម៉ានី
08/16/2026 04:08 PM
Facebook Telegram Linkin
កាតាច្រានចោលការអះអាងរបស់ទីក្រុងតេអេរ៉ង់ថា ពួកគេបានឃាត់ខ្លួនអ្នកបើកបរយន្តហោះទម្លាក់គ្រាប់បែកអ៊ីរ៉ង់
08/16/2026 04:08 PM
Facebook Telegram Linkin
មេដឹកនាំក្រុមហាម៉ាស ធ្វើដំណើរទៅកាន់ទីក្រុងគែ ប្រទេសអេហ្ស៊ីប សម្រាប់កិច្ចប្រជុំស្តីពីតំបន់ហ្កាហ្សា
08/16/2026 03:08 PM
Facebook Telegram Linkin
សម្ដេចតេជោ ហ៊ុន សែន សរសើរ​លោកស្រី កឹម មនោវិទ្យា ថាពិតជាធនធានដ៏ល្អសម្រាប់ជាតិ
08/16/2026 03:08 PM
Facebook Telegram Linkin
នាយករដ្ឋមន្រ្តីជប៉ុន សន្យាមិនឲ្យកើតមានម្តងទៀតជាដាច់ខាតសោកនាដកម្មសង្រ្គាម
08/16/2026 02:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.