នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ក្រុមហ៊ុន TH Automotive Manufacturing Co., Ltd​ នឹង​សម្ពោធជាផ្លូវការ​ រោងចក្រផ្គុំ និងដំឡើងរថយន្តរបស់ខ្លួន​នៅកម្ពុជា​ ក្នុងឆ្នាំ២០២៦នេះ
ប្រធានគណៈកម្មាធិការគណបក្សខេត្តតាកែវ ណែនាំសមាជិកមូលដ្ឋានឱ្យយកចិត្ត​ទុកដាក់​បម្រើ​ពលរដ្ឋ
សម្ដេចតេជោ ណែនាំឱ្យដាក់បេក្ខភាពស្រ្ដីជាប់ឆ្នោតយ៉ាងតិចមួយឃុំមួយរូប និងមានស្ត្រីធ្វើស្មៀនឃុំ
សម្ដេចតេជោស្នើស្ថាប័នពាក់ព័ន្ធចាត់វិធានការភ្លាមៗចំពោះអ្នកប្រព្រឹត្តទង្វើអសីលធម៌លើបណ្ដាញសង្គម

នយោបាយ​ និង ការអភិវឌ្ឍន៍

ចិនបាញ់បង្ហោះផ្កាយរណបសម្រាប់តាមដានគ្រោះមហន្តរាយថ្មី

2023/08/09 07:28:36 pm        272
Facebook Telegram Linkin
ចិន៖ ប្រទេសចិនបានបាញ់បង្ហោះផ្កាយរណបថ្មីមួយ សម្រាប់តាមដានគ្រោះមហន្តរាយនៅថ្ងៃពុធនេះ។ ផ្កាយរណបឈ្មោះ HJ-2 06 ត្រូវបានបង្ហោះចូលទៅក្នុងគន្លងដែលបានកំណត់ជាមុន ដោយយានចម្លងឈ្មោះ Long March-2C ដែលបានបាញ់បង្ហោះនៅម៉ោង ៦:៥៣នាទីព្រឹក (ម៉ោងនៅទីក្រុងប៉េកាំង) ពីមជ្ឈមណ្ឌលបាញ់បង្ហោះផ្កាយរណប Taiyuan ក្នុងខេត្តសានស៊ី ភាគខាងជើងប្រទេសចិន។ផ្កាយរណបដែលទើបនឹងបាញ់បង្ហោះនេះ មានការកំណត់រចនាសម្ព័ន្ធដូចគ្នានឹងផ្កាយរណបឈ្មោះ HJ-2 05 ក្នុងគន្លងបច្ចុប្បន្ន ដែលមានប្រព័ន្ធរូបភាពពីរគឺ គុណភាពបង្ហាញទំហំ៥ម៉ែត្រ និងកម្រិតរូបភាព២៥ម៉ែត្រ។ផ្កាយរណបនេះ នឹងត្រូវបានប្រើប្រាស់សម្រាប់ការត្រួតពិនិត្យគ្រោះមហន្តរាយដូចជាទឹកជំនន់ ព្យុះទីហ្វុង និងបំណាក់ដី ព្រមទាំងផ្តល់ការគាំទ្រទិន្នន័យសម្រាប់ការគ្រប់គ្រងគ្រាអាសន្ន បរិស្ថានអេកូឡូស៊ី ធនធានធម្មជាតិ ការអភិរក្សទឹក កសិកម្ម និងឧស្សាហកម្មផ្សេងៗទៀត។ បេសកកម្មនេះបានកត់ត្រាជាការហោះហើរលើកទី៤៨២ នៃប្រភេទគ្រាប់រ៉ុក្កែតឈ្មោះ Long March៕

បណ្ដារដ្ឋសមាជិកអង្គការសហប្រជាជាតិ ជំរុញឱ្យស៊ីរី គោរពតាមអនុសញ្ញាអាវុធគីមី

2023/08/09 07:25:54 pm        337
Facebook Telegram Linkin
UN៖ កាលពីថ្ងៃអង្គារ (៨ សីហា) បណ្ដារដ្ឋជាសមាជិកនៃអង្គការសហប្រជាជាតិ បានអំពាវនាវឱ្យប្រទេសស៊ីរីគោរពតាមអនុសញ្ញាអាវុធគីមី បន្ទាប់ពីមន្ត្រីអង្គការសហប្រជាជាតិមួយរូបបានប្រាប់ក្រុមប្រឹក្សាសន្តិសុខថា មានកង្វះព័ត៌មានអំពីអាវុធគីមីរបស់ស៊ីរី។លោក Adedeji Ebo អនុប្រធានតំណាងជាន់ខ្ពស់នៃការិយាល័យកិច្ចការរំសាយអាវុធរបស់អង្គការសហប្រជាជាតិ បានប្រាប់ក្រុមប្រឹក្សាថា ការប្រកាសរបស់ស៊ីរីដោយអនុលោមតាមអនុសញ្ញាអាវុធគីមី មិនអាចចាត់ទុកថាត្រឹមត្រូវ និងពេញលេញនោះឡើយ។ការស៊ើបអង្កេតរួមគ្នារបស់អង្គការសហប្រជាជាតិ និងអង្គការសម្រាប់ការហាមឃាត់អាវុធគីមី (OPCW) បានកំណត់ថា រដ្ឋាភិបាលស៊ីរីបានប្រើប្រាស់សារធាតុ សារីន (sarin) នៅក្នុងការវាយប្រហារកាលពីថ្ងៃទី៤ ខែមេសា ឆ្នាំ២០១៧ ហើយក៏បានប្រើប្រាស់សារធាតុក្លរជាច្រើន ជាអាវុធផងដែរ។ បណ្ដាប្រទេសលោកខាងលិចបានអំពាវនាវឱ្យស៊ីរីបំផ្លាញឃ្លាំងអាវុធគីមីរបស់ខ្លួនចោល។ប្រទេសស៊ីរី និងសម្ព័ន្ធមិត្តជិតស្និទ្ធរបស់ខ្លួនគឺប្រទេស រុស្ស៊ី ដែលផ្តល់ការគាំទ្រផ្នែកយោធាដល់កងកម្លាំងរបស់លោកប្រធានាធិបតី Assad បានបដិសេធការប្រើប្រាស់អាវុធគីមី និងស្តីបន្ទោសលើពួកបះបោរវិញ។ រដ្ឋធានី ដាម៉ាស ចោទលោកខាងលិចថា បានប្រើបញ្ហាអាវុធគីមីជាមធ្យោបាយដើម្បីរិះគន់ស៊ីរី៕

ក្រុមមេដឹកនាំរដ្ឋប្រហារនីហ្សេ បានច្រានចោលបេសកម្មការទូតរបស់សហភាពអាហ្វ្រិក និងប្លុក ECOWAS

2023/08/09 07:22:43 pm        341
Facebook Telegram Linkin
នីហ្សេ៖ រដ្ឋាភិបាលយោធារបស់ប្រទេសនីហ្សេ បានច្រានចោលបេសកកម្មការទូតចុងក្រោយបង្អស់ពីបណ្តាប្រទេសនៅទ្វីបអាហ្រ្វិក ក្នុងគោលបំណងស្តារសណ្តាប់ធ្នាប់រដ្ឋធម្មនុញ្ញឡើងវិញ បន្ទាប់ពីរដ្ឋប្រហារថ្ងៃទី២៦ ខែកក្កដា ដោយទប់ទល់នឹងសម្ពាធពីសហរដ្ឋអាមេរិក ព្រមទាំងអង្គការសហប្រជាជាតិ ក្នុងការចូលរួមតុចរចា។ទស្សនាវដ្តីបារាំង Jeune Afrique (ហ្ស៊ើន អាហ្វ្រិក) បានរាយការណ៍ថា សហភាពអាហ្វ្រិក (AU) គ្រោងនឹងបញ្ជូនបេសកកម្មរួមមួយជាមួយក្រុមអ្នកតំណាងអង្គការសហប្រជាជាតិ និងប្លុកអាហ្វ្រិកខាងលិច ECOWAS ទៅកាន់ប្រទេសនីហ្សេ នៅថ្ងៃអង្គារ ប៉ុន្តែគម្រោងនោះត្រូវបានបដិសេធពីរដ្ឋាភិបាលយោធានីហ្សេ ដែលបានបិទដែនអាកាសរបស់ខ្លួន។មេដឹកនាំនៃប្លុក ECOWAS ឬសហគមន៍សេដ្ឋកិច្ចនៃបណ្តារដ្ឋអាហ្រ្វិកខាងលិច កំពុងរៀបចំកិច្ចប្រជុំកំពូលមួយនៅថ្ងៃព្រហស្បតិ៍ខាងមុខនេះ ដើម្បីពិភាក្សាអំពីការប្រឈមមុខជាមួយបណ្ដាឧត្តមសេនីយរដ្ឋប្រហាររបស់នីហ្សេ ដែលបានផ្គើននឹងកាលបរិច្ឆេទកំណត់កាលពីថ្ងៃអាទិត្យក្នុងការប្រគល់អំណាចជាថ្មីទៅឲ្យលោកប្រធានាធិបតី Mohamed Bazoum ដែលត្រូវបានផ្តួលរំលំក្នុងរដ្ឋប្រហារនោះ។លទ្ធភាពនៃការធ្វើអន្តរាគមន៍យោធានឹងត្រូវបានពិភាក្សា ប៉ុន្តែប្លុក ECOWAS បាននិយាយថា វាជាមធ្យោបាយចុងក្រោយ។ ប្លុកនេះបានផ្តល់ឱសានវាទឲ្យក្រុមទាហានដែលបានដណ្តើមអំណាចនៅរដ្ឋធានី ណៃអាម៉ី កាលពីថ្ងៃទី២៦ ខែកក្កដា រយៈពេល៧ថ្ងៃដើម្បីដាក់លោកប្រធានាធិបតី Bazoum ឲ្យកាន់អំណាចឡើងវិញ បើមិនដូចច្នោះទេពួកគេងាចប្រឈមមុខនឹងការប្រើប្រាស់កម្លាំង ប៉ុន្តែមេដឹកនាំរដ្ឋប្រហារមិនបានអើពើនឹងការព្រមាននេះនោះទេ៕

កិច្ចព្រមព្រៀងបានឈានដល់ការបញ្ជូនរថក្រោះឡេភឺតជំនាន់ទី១ ផលិតនៅអាល្លឺម៉ង់ពីបែលហ្ស៊ិកទៅអ៊ុយក្រែន

2023/08/09 07:20:16 pm        419
Facebook Telegram Linkin
អ៊ុយក្រែន៖ យោងតាមឈ្មួញអាវុធដែលបានធ្វើកិច្ចព្រមព្រៀងកាលពីថ្ងៃអង្គារ ទី៨ ខែសីហា បានឲ្យដឹងថា រថក្រោះឡេភឺតជំនាន់ទី១(Leopard 1) ដែលប្រើប្រាស់រួចរាប់សិបគ្រឿង ដែលនៅពេលនោះធ្លាប់ជាកម្មសិទ្ធិរបស់ប្រទេសបែលហ្សិក ត្រូវបានទិញដោយប្រទេសអ៊ឺរ៉ុបមួយផ្សេងទៀតសម្រាប់ផ្តល់ឲ្យកងកម្លាំងអ៊ុយក្រែន ប្រយុទ្ធប្រឆាំងការឈ្លានពានរបស់រុស្ស៊ី ។លោក Freddy Versluys នាយកប្រតិបត្តិនៃក្រុមហ៊ុនការពារជាតិ OIP Land Systems បានទិញរថក្រោះផលិតនៅអាល្លឺម៉ង់ពីរដ្ឋាភិបាលប្រទេសបែលហ្ស៊ិកកាលពីជាងប្រាំឆ្នាំមុន។ លោកបានប្រាប់សារព័ត៌មាន Reuters ថាបច្ចុប្បន្ននេះលោកបានលក់រថក្រោះទាំង៥០ គ្រឿងទៅឲ្យរដ្ឋាភិបាលអឺរ៉ុបមួយផ្សេងទៀត ដែលលោកពុំអាចបញ្ចេញឈ្មោះនោះទេ ដោយសារមានខសន្យាសម្ងាត់។ លោកនិយាយថា លោកក៏មិនអាចបង្ហាញពីតម្លៃបានដែរ។សារព័ត៌មាន Handelsblatt( ហែបដលស្ព្លែត) របស់អាល្លឺម៉ង់ បានរាយការណ៍កាលពីល្ងាចថ្ងៃអង្គារថាក្រុមហ៊ុនផលិត អាវុធ Rheinmetall ( រ៉ាញម៉ែតតាល់) បានទទួលរថក្រោះហើយនឹងរៀបចំរថក្រោះភាគច្រើនសម្រាប់ការនាំចេញទៅកាន់ប្រទេសអ៊ុយក្រែន។ក្រុមហ៊ុនបានបដិសេធមិនធ្វើអត្ថាធិប្បាយនោះទេ។ រថក្រោះ Leopard ជំនាន់ទី១ ត្រូវបានផលិតដោយក្រុមហ៊ុនអាល្លឺម៉ង់ Krauss-Maffei ដែលបានចាប់ផ្តើមនៅទសវត្សរ៍ឆ្នាំ ១៩៦០ ។ វាមានទម្ងន់ស្រាលជាងរថក្រោះ Leopard 2( ឡេភឺតជំនាន់ទី២) និងមានកាំភ្លើងធំប្រភេទផ្សេងគ្នា។ ម៉ូឌែលដែលលក់ដោយ លោក Versluys ត្រូវបានធ្វើឱ្យប្រសើរឡើងចុងក្រោយនៅក្នុងទសវត្សរ៍ឆ្នាំ ១៩៩០៕

ក្រសួងប្រៃសណីយ៍ ចាប់ផ្ដើមដំណើរការកសាងមជ្ឈមណ្ឌលបច្ចេកវិទ្យាសហគមន៍នៅតាមវិទ្យាល័យ

2023/08/09 07:19:32 pm        509
Facebook Telegram Linkin
ភ្នំពេញ៖ ក្រសួងប្រៃសណីយ៍ និងទូរគមនាគមន៍ បានចាប់ផ្ដើមសាងសង់មជ្ឈមណ្ឌល​បច្ចេកវិទ្យា​សហគមន៍ (Community Tech Center) នៅតាមវិទ្យាល័យ ដើម្បីជំរុញការអភិវឌ្ឍជំនាញ និង​ការបង្កើនសមត្ថភាព ផ្នែកឌីជីថល ​ទៅដល់គ្រូបង្រៀន សិស្សានុសិស្ស និងប្រជាពលរដ្ឋទូទៅ ។ឯកឧត្តម សូ វិសុទ្ធី អ្នកនាំពាក្យក្រសួងប្រៃសណីយ៍ និងទូរគមនាគមន៍ បានប្រាប់BTV នៅថ្ងៃទី៩ ខែសីហា នេះថា ចំពោះគម្រោងសាសងសង់នូវមជ្ឈមណ្ឌលបច្ចេកវិទ្យា​សហគមន៍នេះ គឺត្រូវ​អនុវត្តនៅ គ្រប់វិទ្យាល័យ ទាំង៥៥៨នៅទូទាំងប្រទេស​ ខណៈគម្រោងនេះ​ ត្រូវបានផ្ដើមអនុវត្តហើយ គឺជាដំបូងនៅ ក្នុងខេត្តតាកែវ ។ឯកឧត្តម បានបន្តថា ការសាងសង់នូវមជ្ឈមណ្ឌលនេះ ដើម្បីជំរុញឲ្យសិស្សបានសិក្សាតាម​អនឡាញ ពីគ្រូបង្រៀន​ក្នុងសាលាខ្លួនឯងផ្ទាល់ ឬនៅរាជធានីភ្នំពេញ និងតាមបណ្ដាខេត្តផ្សេងៗ​បាន​ផងដែរ ហើយក៏អាចជួយពង្រឹងចំណេះដឹង ​ដល់លោកគ្រូ អ្នកគ្រូក្នុងមូលដ្ឋាន និងអាចដក​ស្រងយកចំណេះដឹងល្អៗ ពីគ្រូបង្រៀនពូកែ និងល្បីៗ ​ដែលជាគោលដៅរួម គឺការជួយ​ពង្រឹង​បន្ថែមដល់វិស័យអប់រំ និងផ្នែកបច្ចេកវិទ្យាឌីជីថល ។ឯកឧត្តម សូ វិសុទ្ធី បានបន្ថែមថា មជ្ឈមណ្ឌលបច្ចេកវិទ្យាសហគមន៍ នឹងមានរៀបចំនូវសាល​បំពាក់នូវកុំព្យូទ័រ និ​ងសម្ភារផ្សេងៗ ក៏ដូចជារៀបចំនូវប្រព័ន្ធអ៊ីធឺណេត រួមទាំងមានគ្រូជំនាញ​ចាំ​ជួយបង្រៀនផ្នែកបច្ចេកវិទ្យានេះ ​ហើយការបង្កើតមជ្ឈមណ្ឌលនេះ ក៏ជាឱកាសផងដែរដល់​សិស្សានុសិស្ស អាចមានការប្រកួតប្រជែងនៅទូទាំងប្រទេស ។គួរបញ្ជាក់ថា សម្រាប់មជ្ឈមណ្ឌលបច្ចេកវិទ្យាសហគមន៍នេះ ​បាននិងកំពុងសាងសង់មុនគេនៅក្នុង នៅវិទ្យាល័យ​ហ៊ុនសែន១មិថុនា​ ស្ថិតនៅឃុំពារាម ស្រុកបាទី​ ខេត្តតាកែវ ត្រូវបានបើកការដ្ឋាន​សាងសង់កាលពីថ្ងៃទី៩ ខែកក្កដា ឆ្នាំ២០២៣ ដោយ​ឯកឧត្តមបណ្ឌិត ជា វ៉ាន់ដេត រដ្ឋមន្ត្រីក្រសួង​ប្រៃសណីយ៍ និងទូរគមនាគមន៍ ។ មជ្ឈមណ្ឌលនេះមានទំហំ ៣០ម៉ែត្រ គុណនឹង១២ម៉ែត្រ មាន​បន្ទប់កំព្យូទ័រ (Computer Lab) បន្ទប់បណ្តុះបណ្តាល​ (Training Room) បន្ទប់អ៊ីនធឺណិត និងហាងកាហ្វេ (Internet Kiosk and Cafe) ​និងប៉ុស្តិ៍ប្រៃសណីយ៍ ៕អត្ថបទ បាន សុខរិទ្ធិ

អាមេរិក និយាយថា ក្រុមទាហានស៊ីឈ្នួលរុស្ស៊ី វ៉េកណា កំពុងទាញយកផលប្រយោជន៍ពីអស្ថិរភាពក្នុងរដ្ឋប្រហារនៅនីហ្សេ

2023/08/09 07:16:05 pm        80
Facebook Telegram Linkin
អាមេរិក៖ ប្រមុខការបរទេសសហរដ្ឋអាមេរិក លោក អង់តូនី ប្លីនខិន(Antony Blinken) បានប្រាប់សារព័ត៌មាន BBC ថា ក្រុមទាហានស៊ីឈ្នួលវ៉េកណា(Wagner) របស់រុស្ស៊ីកំពុងទាញយកផលប្រយោជន៍ ពីអស្ថិរភាពនៅក្នុងប្រទេសនីហ្សេ។ប្រទេសនេះត្រូវបានគ្រប់គ្រងដោយរបបយោធាបន្ទាប់ពីការទម្លាក់លោកប្រធានាធិបតី ម៉ូហាម៉េដ បាហ្សូម (Mohamed Bazoum )រយៈពេលជិតពីរសប្តាហ៍មកនេះ។  មានការលើកឡើងថា ក្រុមមេដឹកនាំរដ្ឋប្រហារបានសុំជំនួយពីក្រុមទាហានស៊ីឈ្នួលវ៉េកណា ដែលត្រូវបានគេដឹងថាមានវត្តមាននៅក្នុងប្រទេស ជិតខាងម៉ាលី។ លោក Blinken បាននិយាយថា លោកមិនគិតថា រុស្ស៊ី ឬក្រុមទាហានស៊ីឈ្នួល បានញុះញង់ឲ្យមានរដ្ឋប្រហាររបស់នីហ្សេនោះទេ។លោកបានប្រាប់កម្មវិធី Focus on Africa របស់សារព័ត៌មាន BBC ថា ទោះបីជាយ៉ាងណាក៏ដោយ សហរដ្ឋអាមេរិកមានការព្រួយបារម្ភអំពីក្រុមនេះ លើលទ្ធភាពនៃការបង្ហាញខ្លួន នៅក្នុងផ្នែកខ្លះនៃតំបន់     សាហេល (Sahel) ។លោកគិតថាអ្វីដែលបានកើតឡើង ហើយអ្វីដែលនៅតែបន្តកើតឡើងនៅក្នុងប្រទេសនីហ្សេ មិនត្រូវបានជំរុញដោយរុស្ស៊ី ឬដោយក្រុមវ៉េកណានោះទេ ប៉ុន្តែ ពួកគេព្យាយាមទាញយកប្រយោជន៍ពីរដ្ឋប្រហារនេះ៕

កម្មករនៅទីក្រុងឡូសអេនជឺលេស សហរដ្ឋអាមេរិក ចេញតវ៉ាជុំវិញកិច្ចសន្យាការងារ

2023/08/09 07:08:24 pm        120
Facebook Telegram Linkin
អាមេរិក៖ បុគ្គលិកនៅទីក្រុងឡូសអេនជឺលេស របស់សហរដ្ឋអាមេរិក បានធ្វើកូដកម្មរយៈពេល២៤ម៉ោងកាលពីថ្ងៃអង្គារ ដើម្បីតវ៉ាចំពោះអ្វីដែលសហជីពរបស់ពួកគេហៅថា ការចរចាដោយជំនឿអាក្រក់ដោយមន្ត្រីរដ្ឋាភិបាលជុំវិញកិច្ចសន្យាថ្មី ដែលជាការតវ៉ាចុងក្រោយបំផុតនៃសកម្មភាពការងារដែលប៉ះពាល់ដល់ទីក្រុង។កម្មករទីក្រុងរាប់រយនាក់ រួមទាំងជាងក្រុមការងាររោងជាង ឆ្មាំសមុទ្រ និងក្រុមមន្ត្រីចរាចរណ៍ជាច្រើន បានដើរដង្ហែក្បួននៅសាលាក្រុង និងអាកាសយានដ្ឋានអន្តរជាតិ ឡូសអេនជឺលេស ដោយនិយាយថា ការគ្រប់គ្រងទីក្រុងបានរួមចំណែកក្នុងការអនុវត្តការងារមិនយុត្តិធម៌ អំឡុងពេលចរចាលើបញ្ហាជ្រើសរើសបុគ្គលិក ការរក្សាទុក និងការជួលបុគ្គលិកជាដើម។ក្រុមមន្ត្រីនៅទីក្រុង ឡូសអេនជឺលេស បានបដិសេធមិនគោរពកិច្ចព្រមព្រៀងពីមុនៗ ហើយបានបញ្ជូនក្រុមអ្នកចរចាទៅកាន់តុចរចាដោយគ្មានសិទ្ធិអំណាច និងបានរឹតបន្តឹងការចូលទៅកាន់កន្លែងធ្វើការរបស់សហជីព។អភិបាលក្រុង ឡូសអេនជឺលេស លោកស្រី Karen Bass បាននិយាយនៅក្នុងសេចក្តីថ្លែងការណ៍មួយថា សេវាកម្មទីក្រុងមួយចំនួន នឹងមិនអាចប្រើប្រាស់បានទេក្នុងអំឡុងពេលធ្វើកូដកម្មរយៈពេលមួយថ្ងៃនេះ។ អាងហែលទឹកចំនួន៥៥កន្លែង របស់ទីក្រុងនឹងត្រូវបិទ ការយកសំរាមនឹងមិនដំណើរការរយៈពេលមួយថ្ងៃ ហើយមជ្ឈមណ្ឌលហៅទូរសព្ទសម្រាប់ព័ត៌មាន លេខ ៣១១ របស់ទីក្រុង អាចនឹងមានការពន្យារពេលផងដែរ៕

កម្ពុជា-ថៃ នឹងជំរុញសហប្រតិបត្តិការគ្នាលើជំនាញគ្រោះមហន្តរាយ

2023/08/09 07:04:19 pm        287
Facebook Telegram Linkin
ភ្នំពេញ៖ នៅថ្ងៃទី៨ខែសីហា ឆ្នាំ២០២៣ម្សិលមិញ ឯកឧត្តម គីម វីរៈ អគ្គលេខាធិការនៃ គណៈកម្មាធិការ​ជាតិគ្រប់គ្រោះមហន្តរាយ បានជួបពិភាក្សាជាមួយគណៈប្រតិភូក្រុមការងារកង​ទ័ពជើងគោកភូមិន្ទថៃ ដែលដឹកនាំ​ដោយ​ឧត្តមសេនីយ៍​ឯក ភីផាត ជោវ៉ាតានាភីសា (PHIPAT JONGWATTANAPAISAL) និងអង្គភាពកិច្ចការសាធារណនៃកងទ័ពជើងគោកភូមិន្ទថៃ ដើម្បីសិក្សាស្វែងយល់ ​និងផ្តល់បទពិសោធន៍​រវាង​ប្រទេស​ទាំង​ពីរ​លើ​ការ​គ្រប់គ្រង​គ្រោះមហន្តរាយ។ ឯកឧត្តម គីម វីរៈ មានប្រសាសន៍ថា ប្រព័ន្ធការងាររបស់គណៈកម្មាធិការជាតិគ្រប់គ្រោះមហន្តរាយ មានតួនាទី និងភារកិច្ចឆ្លើយតបចំពោះគ្រោះមហន្តរាយកើតឡើង​ដោយយថា​ហេតុបង្ក​ដោយធម្មជាតិ និងមនុស្ស។ ឯកឧត្តម បន្តថា គណៈកម្មាធិការជាតិគ្រប់គ្រោះមហន្តរាយថ្នាក់ជាតិ​ជាសេនាធិការ​របស់​នាយក​រដ្ឋមន្រ្តី ដែលជាប្រធាន ​និងសម្របសម្រួលជាមួយក្រសួងស្ថាប័នពាក់ព័ន្ធនានារួមទាំងកង​កម្លាំង​ប្រដាប់អាវុធរហូតទៅដល់ថ្នាក់ក្រោមជាតិ និងមូលដ្ឋានផងដែរ។ នាឱកាសនោះ ឯកឧត្តម​ បានស្នើឲ្យមានការសហការនិងបន្តនៃកិច្ចសហប្រតិបត្តិការក្នុងការ​ទំនាក់ទំនង​នៃប្រទេសជាមិត្តឲ្យកាន់ជិតស្និត ​ក៏ដូចកងទ័ពនិងកងទ័ព​ ប្រជាជននិងប្រជាជន​ឲ្យអោយកាន់ស៊ីជម្រៅបន្ថែមទៀត ​ដើម្បីជួយគ្នាទៅវិញទៅមកក្នុងគ្រាអាសន្ន ឬ​មាន​ឧបទ្ទវហេតុ​ដោយគ្រោះធម្មជាតិ ​និងមនុស្សបង្កឡើង ។ឧត្តមសេនីយ៏ឯក តំណាងកងទ័ពជើងគោកថៃ ​បានកោតសសើរ ​និងវាយតម្លៃខ្ពស់​ចំពោះ​គណៈកម្មាធិការជាតិ​គ្រប់គ្រោះមហន្តរាយ​ ដែលកន្លងមកដោយសង្កេតឃើញថា បាន​សម្រប​សម្រួល​ទាន់ពេលវេលា​ ក្នុងកាលៈទេសៈណាក៏ដោយ ថែមទាំងបានចូលរួមលើការងារ​សមយុទ្ធ​គ្រោះមហន្តរាយអាស៊ានជាមួយបណ្តាលប្រទេសជាមិត្តទៀតផង។ ភាគីទាំងពីរបាន​ សម្តែងនូវការគាទ្រនិងត្រៀមខ្លួនរួចជាស្រេច ដើម្បីបង្កើនកិច្ចសហប្រតិបត្តិការ​ទ្វេភាគី តាមរយៈការរៀបចំ​អនុស្សរណៈនៃការយោគយល់គ្នា ​ស្តីពីការផ្តល់ជំនួយសង្គ្រោះគ្រោះ​មហន្តរាយ, ​ការត្រៀមបង្ការពហុមុខសញ្ញាគ្រោះថ្នាក់, ​ការកាត់បន្ថយ និងប្រតិបត្តិការឆ្លើយ​តប​គ្រោះអាសន្ននាពេលខាងមុខ។ ​ភាគីថៃ ក៏បានសម្តែងនូវឆន្ទៈ ក្នុងកិច្ចសហប្រតិបត្តិការយ៉ាងជិតស្និទ្ធ​ជាមួយភាគីកម្ពុជា ក្នុងការពង្រឹងកិច្ចសហប្រតិបត្តិការរួមគ្នា ​សម្រាប់ភាពធន់នឹង​គ្រោះ​មហន្តរាយឆ្លងដែន​តាមរយៈកិច្ចព្រមព្រៀងអាស៊ានស្តីពីការគ្រប់គ្រងគ្រោះមហន្តរាយ និង​ការឆ្លើយតបសង្គ្រោះបន្ទាន់ (អាត់ម៉ែ) ឆ្នាំ២០២១-២០២៥៕ 

មនុស្ស៥នាក់បានស្លាប់ ខណៈកូដកម្មរថយន្តស៊ីឈ្នួលខ្នាតតូចរបស់ប្រទេសអាហ្រ្វិកខាងត្បូង នៅតែបន្ត

2023/08/09 07:01:16 pm        136
Facebook Telegram Linkin
អាហ្រ្វិកខាងត្បូង៖ នគរបាលបានប៉ះទង្គិចជាមួយក្រុមបាតុករនៅទីក្រុង Cape Town កាលពីថ្ងៃអង្គារ (៨ សីហា) ខណៈការធ្វើកូដកម្មបន្តរំខានដល់ការរស់នៅប្រចាំថ្ងៃនៅក្នុងទីក្រុងទេសចរណ៍របស់អាហ្វ្រិកខាងត្បូងមួយនេះ។ ការប៉ះទង្គិចគ្នានៅពេលព្រឹក បានកើតឡើងនៅក្នុងសង្កាត់ Masiphumelele ជាទីដែលអ្នកស្រុកមួយចំនួនបានដំឡើងរបាំងដែក មនុស្សជាច្រើនបានដុតភ្លើង ដើម្បីរារាំងអ្នកស្រុកផ្សេងទៀតនៅក្នុងសង្កាត់នេះមិនឱ្យចាកចេញ។បណ្ដាអង្គការប្រតិបត្តិកររថយន្តស៊ីឈ្នួលខ្នាតតូច ស្ថិតក្នុងភាពជាប់គាំងជាមួយរដ្ឋាភិបាលក្រុង Cape Town បន្ទាប់ពីបានបរាជ័យក្នុងការដោះស្រាយសោកនាដកម្មផ្សេងៗ រួមទាំងការរឹបអូសរថយន្តតាក់ស៊ី ដែលរដ្ឋាភិបាលអះអាងថាមិនសក្តិសមក្នុងការប្រើប្រាស់ផងដែរ។ អង្គការរថយន្តស៊ីឈ្នួលទាំងនោះបានអំពាវនាវឱ្យមានការធ្វើកូដកម្ម និងបិទប្រតិបត្តិការកាលពីសប្តាហ៍មុន ដែលបណ្តាលឱ្យបុគ្គលិកខកខានមិនបានបំពេញការងារ និងអាជីវកម្មជាច្រើនត្រូវបិទ។យោងតាមសេចក្តីថ្លែងការណ៍របស់ក្រសួងនគរបាលអាហ្វ្រិកខាងត្បូង មនុស្សចំនួន៥នាក់បានស្លាប់ (រួមទាំងជនជាតិអង់គ្លេសម្នាក់) ដោយសារតែកូដកម្មនេះ ហើយមនុស្សចំនួន១២០នាក់ត្រូវបានចាប់ខ្លួនចាប់តាំងពីថ្ងៃទី៣ ខែសីហា មក នៅពេលដែលកូដកម្មបានចាប់ផ្តើម និងមានឧប្បត្តិហេតុនៃការលួចរបស់របរពីហាង ការគប់ដុំថ្ម ការបិទផ្លូវ ការដុតដោយចេតនា និងអំពើហិង្សាសាធារណៈជាច្រើនទៀតក៏បានកើតឡើងផងដែរ៕

ជនជាតិដើមភាគតិចចេញតវ៉ាក្នុងទីក្រុងបេឡេម ប្រទេសប្រេស៊ីល ខណៈកិច្ចប្រជុំកំពូលអាម៉ាហ្សូនចាប់ផ្តើម

2023/08/09 06:58:18 pm        124
Facebook Telegram Linkin
ប្រេស៊ីល៖ ជនជាតិដើមភាគតិចបានដើរដង្ហែតាមដងផ្លូវក្នុងទីក្រុងបេឡេម ប្រទេសប្រេស៊ីល ដើម្បីតវ៉ា ខណៈដែលបណ្ដាមេដឹកនាំនៃក្រុមប្រទេសតំបន់ព្រៃអាម៉ាហ្សូន ចំនួនប្រាំបី បានជួបប្រជុំគ្នានៅថ្ងៃដំបូងនៃកិច្ចប្រជុំកំពូលអាម៉ាហ្សូន កាលពីថ្ងៃអង្គារ (៨ សីហា)។ក្រុមបាតុករបានដើរដង្ហែតាមដងផ្លូវដោយគ្រវីទង់ជាតិ និងស្រែកពាក្យស្លោកប្រឆាំងនឹងការជីកយករ៉ែ ការខួងយកប្រេង និងអ្វីដែលពួកគេហៅថា "គម្រោងជីកយកធនធានធម្មជាតិ" នៅក្នុងតំបន់ព្រៃអាម៉ាហ្សូន ដោយកាន់ផ្លាកសញ្ញាទាមទារការការពារទឹកដីរបស់ពួកគេ។ ក្រុមប្រទេសតំបន់ព្រៃអាម៉ាហ្សូនទាំងប្រាំបីត្រូវបានគេរំពឹងថា នឹងប្រឈមមុខនឹងការខ្វែងគំនិតគ្នាជុំវិញសំណើទប់ស្កាត់ការខួងយកប្រេងថ្មី និងបញ្ចប់ការកាប់បំផ្លាញព្រៃឈើ នៅពេលដែលពួកគេជួបគ្នាសម្រាប់កិច្ចប្រជុំកំពូលលើកដំបូងរបស់ពួកគេក្នុងរយៈពេល១៤ឆ្នាំនោះ។កិច្ចប្រជុំរបស់អង្គការសន្ធិសញ្ញាសហប្រតិបត្តិការព្រៃអាម៉ាហ្សូន (ACTO) ប្រមូលផ្តុំប្រមុខរដ្ឋមកពីប្រទេសបូលីវី ប្រេស៊ីល កូឡុំប៊ី អេក្វាឌ័រ ហ្គីយ៉ាណា ប៉េរូ ស៊ូរីណាម និងវេណេហ្ស៊ុយអេឡា រយៈពេលពីរថ្ងៃនៅទីក្រុងបេឡេមភាគខាងជើងនៃប្រទេសប្រេស៊ីល។ពួកគេមានបំណងបង្កើតគោលនយោបាយ គោលដៅ និងមុខតំណែងបង្រួបបង្រួមក្នុងការចរចាអន្តរជាតិលើបញ្ហាចំនួន១៣០ករណី រាប់ចាប់ពីការផ្តល់ហិរញ្ញប្បទានសម្រាប់ការអភិវឌ្ឍប្រកបដោយចីរភាពរហូតដល់ការដាក់បញ្ចូលជនជាតិដើមភាគតិចផងដែរ៕

បណ្ដាញសង្គម

ព័ត៌មានថ្មីៗ

ជនជាតិអាមេរិកប៉ាឡេស្ទីចំណាយពេលពេញមួយយប់ជាមួយគ្រួសារក្នុងផ្ទះដែលឡោមព័ទ្ធដោយក្រុមតាំងលំនៅនិគមន៍អ៊ីស្រាអែល
08/18/2026 09:08 PM
Facebook Telegram Linkin
កាតានិយាយថា កិច្ចព្រមព្រៀងច្រកសមុទ្រ Hormuz អាចនឹងជួយឲ្យវិលត្រឡប់ទៅរកកិច្ចប្រជុំអាមេរិក-អ៊ីរ៉ង់
08/18/2026 08:08 PM
Facebook Telegram Linkin
ប្រធានាធិបតីចិន លោក Xi ជំរុញកុំ​ឱ្យ​ «បំផ្លាញ» ឋានៈជា «តំបន់សន្តិភាព» របស់អាមេរិកឡាទីន
08/18/2026 08:08 PM
Facebook Telegram Linkin
បេសកជន៖ អាមេរិក​បារម្ភយ៉ាងខ្លាំង ចំពោះការវាយប្រហារតាមអាកាសរបស់អ៊ីស្រាអែលលើមូលដ្ឋានទ័ពអាកាសស៊ីរី
08/18/2026 08:08 PM
Facebook Telegram Linkin
មនុស្សយ៉ាង​តចិច​ ២៥នាក់ ត្រូវបានសម្លាប់ អំឡុង​ការវាយប្រហារនៅរដ្ឋ​ Plateau របស់នីហ្សេរីយ៉ា
08/18/2026 07:08 PM
Facebook Telegram Linkin
មនុស្ស ៣នាក់ រងរបួស ហើយអគាររងការខូចខាតក្នុងការរញ្ជួយដីនៅភាគខាងត្បូងអេស្ប៉ាញ
08/18/2026 07:08 PM
Facebook Telegram Linkin
ពលរដ្ឋរស់នៅទីក្រុងម៉ានីល ដើរលុកទឹកតាមផ្លូវ ស្របពេលភ្លៀងវស្សាវាយប្រហារដ្ឋធានីហ្វីលីពីនមួយនេះ
08/18/2026 07:08 PM
Facebook Telegram Linkin
ទឹកជំនន់បង្ខំឲ្យមនុស្សរាប់ម៉ឺននាក់ជម្លៀសខ្លួននៅរដ្ឋ Odisha និងរដ្ឋ Assam ប្រទេសឥណ្ឌា
08/18/2026 07:08 PM
Facebook Telegram Linkin
មនុស្សម្នាក់ស្លាប់ និងច្រើននាក់ទៀតជាប់ខ្លួន ក្រោយផ្ទះចាស់បាក់រលំនៅទីក្រុង Kolkata ប្រទេសឥណ្ឌា
08/18/2026 07:08 PM
Facebook Telegram Linkin
សាកសពជនអន្តោប្រវេសន៍ ៩នាក់ ត្រូវបានរកឃើញនៅជិតតំបន់ឆ្នេរភាគខាងកើតទីក្រុង Tripoli ប្រទេសលីប៊ី
08/18/2026 07:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.