នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ក្រុមហ៊ុន TH Automotive Manufacturing Co., Ltd​ នឹង​សម្ពោធជាផ្លូវការ​ រោងចក្រផ្គុំ និងដំឡើងរថយន្តរបស់ខ្លួន​នៅកម្ពុជា​ ក្នុងឆ្នាំ២០២៦នេះ
ប្រធានគណៈកម្មាធិការគណបក្សខេត្តតាកែវ ណែនាំសមាជិកមូលដ្ឋានឱ្យយកចិត្ត​ទុកដាក់​បម្រើ​ពលរដ្ឋ
សម្ដេចតេជោ ណែនាំឱ្យដាក់បេក្ខភាពស្រ្ដីជាប់ឆ្នោតយ៉ាងតិចមួយឃុំមួយរូប និងមានស្ត្រីធ្វើស្មៀនឃុំ
សម្ដេចតេជោស្នើស្ថាប័នពាក់ព័ន្ធចាត់វិធានការភ្លាមៗចំពោះអ្នកប្រព្រឹត្តទង្វើអសីលធម៌លើបណ្ដាញសង្គម

នយោបាយ​ និង ការអភិវឌ្ឍន៍

នាយករដ្ឋមន្ត្រីប៉ូឡូញចោទប្រកាន់ទាហានស៊ីឈ្នួល Wagnerរបស់រុស្ស៊ីជុំវិញផែនការបង្កអស្ថិរភាពដល់អង្គការណាតូ និងបើកកិច្ចប្រជុំបន្ទាន់នៅតាមព្រំដែន

2023/08/04 09:03:07 pm        80
Facebook Telegram Linkin
ប៉ូឡូញ៖ នាយករដ្ឋមន្ត្រីប៉ូឡូញ លោក ម៉ាទើស ម៉ូរ៉ាវីស្គី (Mateusz Morawiecki) បានចោទប្រកាន់ទាហានស៊ីឈ្នួលWagnerរបស់រុស្ស៊ី នៅប្រទេសបេឡារុសជុំវិញការព្យាយាម«ធ្វើឲ្យអស្ថិរភាពដល់អង្គការណាតូ តាមរយៈ «ការវាយប្រហារកូនកាត់»ដែលបានគ្រោងធ្វើនៅតាមបណ្តោយព្រំដែនភាគខាងកើត។លោកម៉ូរ៉ាវីស្គី និងប្រធានាធិបតីលីទុយអានី លោក នីតាណាស ណូសេដា (Gitanas Nauseda) បានបើកកិច្ចប្រជុំបន្ទាន់មួយកាលពីថ្ងៃព្រហស្បតិ៍ នៅក្នុងតំបន់ស្មុគស្មាញជាយុទ្ធសាស្រ្ត ដែលប្រទេសណាតូរបស់ពួកគេមានព្រំប្រទល់ជាប់ប្រទេសបេឡារុស និងទឹកដីទីក្រុងកាលីនីងរ៉ាដ (Kaliningrad) របស់រុស្ស៊ី ដោយព្រមានថា ពួកគេកំពុងត្រៀមលក្ខណៈសម្រាប់ការបង្កហេតុពីទីក្រុងមូស្គូ និងទីក្រុងមិនស្ក៍  ( Minsk) នៅក្នុងតំបន់។លោកម៉ូរ៉ាវីស្គី និងលោក ណូសេដា បានជួបគ្នានៅស៊ុវ៉ាល់គី (Suwalki) ដែលជាទីក្រុងមួយនៅតំបន់ច្រករបៀងស៊ុវ៉ាល់គី (Suwalki Gap) ដែលជាដីដែលមានប្រជាជនតិចណាស់ ដែលលាតសន្ធឹងចម្ងាយ ៦០ ម៉ាយ តាមព្រំដែនប៉ូឡូញ-លីទុយអានី។ដោយត្រូវបានគេស្គាល់ផងដែរថា ជាច្រករបៀងស៊ូវ៉ាល់គី ទឹកដីដែលលាតសន្ធឹងនេះ ភ្ជាប់រដ្ឋបាល់ទិកទាំងបីនៃប្រទេសលីទុយអានី ឡាតវី និងអេស្តូនីជាមួយនឹងសម្ព័ន្ធភាពណាតូ។ វាបំបែកប្រទេសបេឡារុសដែលជាសម្ព័ន្ធមិត្តរបស់ប្រទសរុស្ស៊ីចេញពីទីក្រុងកាលីនីងរ៉ាដ ដែលជាតំបន់មានយោធាយ៉ាងច្រើនរបស់រុស្ស៊ី មានទីតាំងនៅសមុទ្របាល់ទិក ដែលបំបែកចេញពីដីគោករបស់រុស្ស៊ី៕

អាជីវករអ្នករត់ម៉ូតូកង់បី ម៉ូតូឌុបជាច្រើន បានទៅធ្វើបណ្ណ ប.ស.ស ដើម្បីទទួលសេវាព្យាបាលដោយមិនអស់ថ្លៃ

2023/08/04 08:13:14 pm        1876
Facebook Telegram Linkin
ភ្នំពេញ៖ ជារៀងរាល់ថ្ងៃ វត្តមានប្រជាពលរដ្ឋមានអាជីវកម្មខ្លួនឯង ក៏ដូចជាអ្នកប្រកបរបរ រត់ម៉ូតូកង់បី ម៉ូតូឌុបជាដើម បានទៅធ្វើបណ្ណ ប.ស.ស នៅទីតាំងស្នាក់ការបេឡាជាតិរបប​សន្តិសុខសង្គម។ ការទៅធ្វើបណ្ណ ប.ស.ស គឺក្នុងគោលដៅសំខាន់ ដើម្បីទទួលបានសេវាព្យាបាលដោយមិនគិតថ្លៃ នៅគ្រប់មន្ទីរពេទ្យរដ្ឋ​ និងមន្ទីរពេទ្យឯកជន ជាដៃគូ ​បេឡាជាតិរបបសន្តិសុខសង្គម។បច្ចុប្បន្ន បុគ្គលស្វ័យនិយោជន៍ ​សំដៅលើប្រជាពលរដ្ឋធម្មតា មានមុខរបរជាអាជីវករ ជាអ្នករត់កង់បី ម៉ូតូឌុប និងអ្នករកចំណូលផ្ទាល់ខ្លួនគ្រប់ប្រភេទ​ សុទ្ធតែអាចស្នើសុំធ្វើបណ្ណ ប.ស.ស ដោយខ្លួនឯង។ ការស្នើសុំធ្វើបណ្ណ ប.ស.ស នេះ គឺតម្រូវឱ្យ សាមីខ្លួនភ្ជាប់ជាមួយអត្តសញ្ញាបណ្ណ​សញ្ជាតិខ្មែរ និងមានអាយុមិនលើសពី ៦០ឆ្នាំ។ក្រោយមានការផ្តល់ឱកាសមួយនេះ ​មានប្រជាពលរដ្ឋជាច្រើន បានទៅស្នើសុំធ្វើបណ្ណ ប.ស.ស នេះ។ ជាក់ស្ដែងសម្រាប់ស្នាក់ការបេឡាជាតិរបបសន្តិសុខសង្គម ក្នុងខណ្ឌច្បារអំពៅ ជារៀងរាល់​ថ្ងៃគឺមានអាជីវករ អ្នករត់ម៉ូតូឌុប និងម៉ូតូកង់បី ជាច្រើន បានទៅស្នើសុំធ្វើបណ្ណ ប.ស.ស ជារៀងរាល់ថ្ងៃ។ពួកគេបានលើកឡើងថា ការធ្វើបណ្ណ ប.ស.ស គឺមានសារៈប្រយោជន៍ធំធេងសម្រាប់​ប្រជាពលរដ្ឋ​គ្រប់រូប អាចទទួលបានសេវាព្យាបាលនៅតាមមន្ទីរពេទ្យរដ្ឋ ​និងមន្ទីរពេទ្យឯកជនជាដៃគូ ប.ស.ស ដោយមិនគិតថ្លៃ ​និងការទទួលបានអត្ថប្រយោជន៍ផ្សេងៗទៀត។ ក្នុងនាមជាបុគ្គលស្វ័យនិយោជន៍ ពួកគេក៏មើលឃើញដែរថា ​ការតម្រូវបង់ភាគទានប្រចាំខែ ក្នុងចំនួនទឹកប្រាក់ ​១៥.៦០០រៀល គឺពិតជា​ចំនួនសមរម្យ ដែលមានការគិតគូរខ្ពស់ពីប្រមុខរាជរដ្ឋាភិបាល។ពាក់ព័ន្ធនឹងការធ្វើបណ្ណ ប.ស.ស សម្រាប់បុគ្គលស្វ័យនិយោជន៍នេះ លោក ជា ចិន្តា ប្រធានសាខាបេឡាជាតិរបបសន្តិសុខសង្គម ខណ្ឌមានជ័យ​ និងខណ្ឌច្បារអំពៅ ពន្យល់​លម្អិតបន្ថែមថា អ្នកទទួលផលគឺទទួលបាន ​សេវាព្យាបាលដោយមិនគិតថ្លៃ និងទទួល​បានប្រាក់បំណាច់​មាតុភាពផងដែរសម្រាប់ស្រ្តីមានផ្ទៃពោះ។ ពាក់ព័ន្ធនឹងការផ្ដល់របបសន្តិសុខសង្គមផ្នែកថែទាំសុខភាពសម្រាប់បុគ្គលស្វ័យ​និយោជន៍នេះ ឯកឧត្តម ហេង សុផាន់ណារិទ្ធ​ ជាអ្នកនាំពាក្យ បេឡាជាតិរបបសន្តិសុខសង្គម ធ្លាប់បាន​លើកឡើងថា នេះជាការងារពង្រីកសេវាគាំពារកាន់តែទូលំទូលាយ​បន្ថែមទៀត សម្រាប់​បងប្អូនប្រជាពលរដ្ឋប្រកបការងារ ​ឬមុខរបរផ្ទាល់ខ្លួន៕អត្ថបទ៖ គឹមហុក 

លទ្ធផលបោះឆ្នោតផ្លូវការនឹងត្រូវប្រកាសថ្ងៃស្អែនេះ ក្រោយគ្មានបណ្ដឹងជំទាស់

2023/08/04 08:06:46 pm        311
Facebook Telegram Linkin
ភ្នំពេញ៖ អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) បានឲ្យដឹងថា លទ្ធផល​ផ្លូវការនៃការបោះឆ្នោតជ្រើសតាំងតំណាងរាស្រ្ត នីតិកាលទី៧ ឆ្នាំ២០២៣ នឹងត្រូវប្រកាស​ជាផ្លូវការនៅថ្ងៃទី៥ ខែសីហា ស្អែនេះ ក្រោយគ្មានបណ្ដឹងជំទាស់ណាមួយចំពោះ​លទ្ធផល​បណ្ដោះអាសន្ន។ ឯកឧត្តម ហង្ស ពុទ្ធា អ្នកនាំពាក្យ គ.ជ.ប ថ្លែងប្រាប់ BTV នាថ្ងៃទី៤ ខែសីហា នេះថា បន្ទាប់​ពីនីតិវិធីប្រកាសលទ្ធផលបណ្តោះអាសន្នបានបញ្ចប់ ​និងបានទុករយៈពេល ៧២ ម៉ោងនៃការដាក់​ពាក្យបណ្តឹងជំទាស់ទៅនឹងលទ្ធបណ្តោះអាសន្ន ​ដោយការដាក់បណ្តឹងនោះអាចបញ្ជូនទៅ គ.ជ.ប ឬក្រុមប្រឹក្សាធម្មនុញ្ញ។ ប៉ុន្ដែក្រោយរយៈពេល ៧២ ម៉ោងមកនេះ មិនមានគណបក្សនយោបាយ​ណាបានដាក់ពាក្យបណ្តឹងជំទាស់នោះទេ ដូច្នេះលទ្ធផលផ្លូវការនឹងប្រកាសជាផ្លូវការ​នៅថ្ងៃស្អែកនេះតែម្ដង។ អ្នកនាំពាក្យ គ.ជ.ប បញ្ជាក់ថា ក្នុងពេលប្រកាសលទ្ធផលផ្លូវការនៅថ្ងៃស្អែកនេះ គ.ជ.ប នឹង​ប្រកាសចំនួនអាសនៈតាមមណ្ឌលរាជធានី-ខេត្ត ​និងបេក្ខជនជាប់ឆ្នោតតំណាងរាស្រ្តផងដែរ។ ចំណែក ឯកឧត្តម ព្រហ្ម វិចិត្រអក្ខរា អ្នកនាំអ្នកនាំពាក្យក្រុមប្រឹក្សាធម្មនុញ្ញ បានឲ្យដឹងដែរថា លទ្ធផល​ផ្លូវការនៃការបោះឆ្នោតអាចប្រកាសបាននៅថ្ងៃទី៥ ​ខែសីហា ​ឆ្នាំ២០២៣ តាម​ប្រតិទិន​កំណត់របស់ គ.ជ.ប ដោយសារក្រុមប្រឹក្សាធម្មនុញ្ញ និងគ.ជ.ប ពុំបានទទួលបណ្តឹងណាមួយ បានប្ដឹងតវ៉ានឹងលទ្ធផលបណ្តោះអាសន្ននៃការបោះឆ្នោតនោះទេ៕អត្ថបទ សេក ឧត្តម

យុទ្ធនាការ «អន្ទាក់សូន្យ» បានបំផុសការយល់ដឹងដល់មនុស្សជាង១៤ លាននាក់

2023/08/04 07:51:20 pm        284
Facebook Telegram Linkin
ភ្នំពេញ៖ យុទ្ធនាការ «អន្ទាក់សូន្យ» បានបំផុសការយល់ដឹងដល់មនុស្សជាង ១៤ លាននាក់ ខណៈក្រសួងបរិស្ថាន អាជ្ញាធរមូលដ្ឋាន និងអង្គការដៃគូប្តេជ្ញារួមគ្នាបន្តអនុវត្តយុទ្ធនាការដើម្បីបញ្ចប់វិបត្តិអន្ទាក់នៅកម្ពុជា។ឯកឧត្តម នេត្រ ភក្ត្រា រដ្ឋលេខាធិការក្រសួងបរិស្ថាន និងជាប្រធានយុទ្ធនាការអន្ទាក់សូន្យ ថ្លែងក្នុងកិច្ចប្រជុំបូកសរុបលទ្ធផលនៃការអនុវត្តយុទ្ធនាការអន្ទាក់សូន្យកាលពីថ្ងៃទី៣ ខែសីហា ឆ្នាំ២០២៣ ត្រឹមរយៈពេល ១៣ ខែ គឺក្នុងចន្លោះខែមីនាឆ្នាំ២០២២ ដល់ខែមិថុនាឆ្នាំ២០២៣ ក្រសួងបរិស្ថាន រដ្ឋបាលថ្នាក់ក្រោមជាតិ អាជ្ញាធរមូលដ្ឋាន និងអង្គការដៃគូបានរួមសហការអនុវត្តយុទ្ធនាការអន្ទាក់សូន្យនៅតាមតំបន់ទីប្រជុំជន និងស្រុកក្នុងខេត្តចំនួន ១២ រួមមាន ខេត្តស្ទឹងត្រែង ព្រះវិហារ ក្រចេះ មណ្ឌលគិរី កំពង់ធំ រតនៈគិរី ពោធិ៍សាត់ វាលវែង កំពង់ស្ពឺ កោះកុង សៀមរាម បាត់ដំបង និងប៉ៃលិន។ ឯកឧត្ដមបញ្ជាក់ថា ជាលទ្ធផលរួម យុទ្ធនាការអន្ទាក់សូន្យបានបំផុសការយល់ដឹងដល់មនុស្សជាង ១៤លាននាក់​ ដោយរាប់បញ្ចូលការទទួលបាននូវព័ត៌មាន ​និងចំណេះដឹងពីយុទ្ធនាការ ទាំងតាម​រយៈការចូលរួមក្នុងសកម្មភាពយុទ្ធនាការនេះដោយផ្ទាល់ និងតាមរយៈប្រព័ន្ធសារព័ត៌មានក្នុងស្រុក ក្នុងតំបន់ និងតាមបណ្តាញសង្គមរបស់ក្រសួងបរិស្ថាន​ រដ្ឋបាលថ្នាក់ក្រោមជាតិ អង្គការដៃគូ និងភាគីអនុវត្តយុទ្ធនាការទាំងអស់។របាយការណ៍ស្តីពីលទ្ធផលជាផ្នែកៗនៃការអនុវត្តយុទ្ធនាការទាំងមូល បានបង្ហាញថា មានមនុស្ស​ចំនួនប្រមាណជា ១ ម៉ឺននាក់បានចូលរួមដោយផ្ទាល់ក្នុងសកម្មភាពផ្សេងៗនៃយុទ្ធនាការ និងមាន​អត្ថបទព័ត៌មានសរុបប្រមាណជា ១ ពាន់ ចំណងជើងត្រូវបានផ្សព្វផ្សាយដល់មនុស្សចំនួន​ប្រមាណជា ៥ លាននាក់ ខណៈមនុស្សចំនួន ៧ លាននាក់ ទៀតបានអានសារអប់រំតាមទូរស័ព្ទ​ដៃដែលបានអំពាវនាវឲ្យចូលរួមការពារសត្វព្រៃ​ ដោយបញ្ឈប់ការដាក់អន្ទាក់ និងកុំពាក់ព័ន្ធ នឹងការជួញដូរសត្វព្រៃ។ ខណៈលទ្ធផលទាំងនេះទទួលបានការសាទរយ៉ាងក្រៃលែង​ពី​សំណាក់គ្រប់ភាគីទាំងអស់នៃយុទ្ធនាការ។ឯកឧត្តម បានថ្លែងអំណរគុណដល់គ្រប់ភាគីទាំងអស់ដែលបានចូលរួមរៀបចំ និងអនុវត្តយុទ្ធនាការ​ដ៏មានសារៈសំខាន់នេះយ៉ាង​ខ្ជាប់ខ្ជួន​ និងដោយរលូន​ ដើម្បីលើកកម្ពស់ការយល់ដឹងរបស់​សាធារណៈជនអំពីផលវិបាកបណ្តាលមកពីការដាក់អន្ទាក់​ និងការជួញដូរសត្វព្រៃខុសច្បាប់ សំដៅផ្លាស់ប្តូរផ្នត់គំនិត និងឥរិយាបថខុសឆ្គងទាក់ទង​នឹងការបរិភោគសាច់សត្វព្រៃ និងប្រើប្រាស់​ផលិតពីសត្វព្រៃដែលសង្គមកម្ពុជាមិនផ្តល់តម្លៃសោះ៕អត្ថបទ៖ វ៉ន ដារ៉ា'

អាល្លឺម៉ង់ផ្ដល់ថវិកាប្រមាណជាង២លានដុល្លារ សម្រាប់ការងារបោសសម្អាតមីននៅកម្ពុជា

2023/08/04 07:42:45 pm        344
Facebook Telegram Linkin
ភ្នំពេញ៖ រដ្ឋាភិបាលនៃសហព័ន្ធអាល្លឺម៉ង់ បានផ្ដល់នូវហិរញ្ញប្បទានឥតសំណង ចំនួន២លាន១សែន ដុល្លារអាមេរិកដល់ប្រទេសកម្ពុជា សម្រាប់អនុវត្តការងារបោសសម្អាត និងសកម្មភាពអប់រំ អំពីមីន នៅក្នុងខេត្តចំនួន៣ ។យោងតាមសេចក្តីប្រកាសព័ត៌មានរបស់ស៊ីម៉ាក់ កាលថ្ងៃទី៣ ខែសីហា ឆ្នាំ២០២៣ម្សិលមិញ បានឲ្យដឹងថា ​ការផ្ដល់ជំនួយនេះ នឹងធ្វើឡើងនៅក្នុងពិធីចុះហត្ថលេខា លើកិច្ច​ព្រមព្រៀង​សហប្រតិបត្តិការគម្រោងបោសសំអាតមីនមនុស្សធម៌នៅកម្ពុជា ​រវាងឯកឧត្តម ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (CMAC) និងលោក Rune Kristian Dale-Andresen ប្រធានអង្គការជំនួយរបស់ប្រជាជនណ័រវេស (NPA) នៅសប្ដាហ៍ក្រោយ ។សេចក្តីប្រកាសព័ត៌មាន បានបន្តថា ជំនួយរបស់អាល្លឺម៉ង់ ទាំងជាង២លានដុល្លារនេះ សម្រាប់​អនុវត្តរយៈពេល ១៦ខែ និងត្រូវបញ្ចប់នៅចុងខែសីហា ឆ្នាំ២០២៤ ដែលស៊ីម៉ាក់អនុវត្តកិច្ច​ប្រតិបត្តិការបោសសំអាតមីនផ្ទៃដីចម្ការមីនទំហំប្រមាណ ១ ៦០០ហិកតា និងផ្សព្វផ្សាយអប់រំ​យល់ដឹងពីគ្រោះថ្នាក់ ដោយសារសំណល់យុទ្ធភណ្ឌសង្គ្រាម ព្រមទាំងជួយជន​រងគ្រោះ​ដោយសារមីន សម្រាប់បណ្ដាខេត្តទិសពាយ័ព្យ ក្នុងនោះមានខេត្តបន្ទាយមានជ័យ ឧត្តរមានជ័យ និងខេត្តព្រះវិហារ ។សេចក្តីប្រកាសព័ត៌មានដដែល បន្ថែមថា គម្រោងនេះ ជាការរួមចំណែក ក្នុងការអនុវត្តផែនការយុទ្ធសាស្ត្រជាតិសកម្មភាពមីន សំដៅសម្រេចឲ្យខានតែបាន តាមគោលនយោបាយរបស់រាជរដ្ឋាភិបាល “កម្ពុជាគ្មានមីនឆ្នាំ២០២៥” ។យោងតាមរបាយការណ៍អាជ្ញាធរមីន បានឲ្យដឹងថា ការងារបោសសំអាតមីន និងយុទ្ធភណ្ឌមិនទាន់ផ្ទុះ ក្នុងរយៈពេលមួយឆមាស ឆ្នាំ២០២៣ នៅទូទាំងប្រទេស សម្រេចបានផ្ទៃដីសរុបប្រមាណជាង ២១៥គីឡូម៉ែត្រក្រឡា ។ សម្រាប់រាជធានីខេត្ត បានបោសសំអាតមីនរួចរាល់មានចំនួន១២ ក្នុងនោះគ្រោងដៃគូអភិវឌ្ឍន៍ មាននៅខេត្តស្ទឹងត្រែង កែប ព្រៃវែង ព្រះសីហនុ ខេត្តកណ្ដាល និងរាជធានីភ្នំពេញ។ ចំណែកគម្រោងសម្ដេចតេជោ មានខេត្តត្បូងឃ្មុំ កំពង់ចាម ស្វាយរៀង កំពង់ឆ្នាំង តាកែវ និងខេត្តកពត ហើយផែនការឆ្នាំ២០២៣នេះ ខេត្តចំនួន៦ទៀត គ្រោងប្រកាសជាខេត្តអស់មីន ក្នុងនោះមានខេត្តកំពង់ស្ពឺ ក្រចេះ កំពង់ធំ សៀមរាប មណ្ឌលគិរី និងខេត្តរតនគិរី ៕អត្ថបទ បាន សុខរិទ្ធិ

លោក Navalny ដែលជាសត្រូវរបស់លោក Putin រំពឹងថានឹងត្រូវជាប់ពន្ធនាគារជាច្រើនឆ្នាំទៀត

2023/08/04 07:36:17 pm        266
Facebook Telegram Linkin
រុស្ស៊ី៖ អ្នកនយោបាយប្រឆាំងរបស់រុស្ស៊ី លោក អាឡិច ណាវ៉ាល់នី (Alexei Navalny) រំពឹងថា តុលាការនឹងបន្តការកាត់ទោសឲ្យជាប់ពន្ធនាគារជិតពីរទសវត្សរ៍បន្ថែមទៀត នៅថ្ងៃសុក្រនេះ នៅក្នុងសំណុំរឿងព្រហ្មទណ្ឌ ដែលលោក និងក្រុមអ្នកគាំទ្ររបស់បាននិយាយថា ត្រូវបានបង្កើតឡើង ដើម្បីបន្តឃុំខ្លួនលោកនៅក្នុងពន្ធនាគារ និងក្រៅឆាកនយោបាយកាន់តែយូរ។  លោកNavalny វ័យ ៤៧ ឆ្នាំ ដែលជាអ្នករិះគន់ក្នុងស្រុកគ្មានសំចៃមាត់បំផុតលើលោក ប្រធានាធិបតី Vladimir Putin បានកំពុងជាប់ពន្ធនាគារសរុប ចំនួន១១ឆ្នាំកន្លះរួចទៅហើយពីបទក្លែងបន្លំ និងបទចោទប្រកាន់ផ្សេងទៀតដែលលោកនិយាយថាជារឿងក្លែងក្លាយផងដែរ។ ចលនានយោបាយរបស់លោកត្រូវបានគេដាក់ចេញក្រៅច្បាប់ និងបានប្រកាសថាជនជ្រុលនិយម។  ក្រុមរដ្ឋអាជ្ញាបានស្នើឲ្យតុលាការផ្តន្ទាទោសលើរូបលោកឲ្យជាប់ពន្ធនាគារចំនួន ២០ឆ្នាំ បន្ថែមទៀតនៅក្នុងពន្ធនាគារព្រហ្មទណ្ឌលើបទចោទប្រកាន់ព្រហ្មទណ្ឌចំនួន៦ដាច់ដោយឡែកពីគ្នា រួមទាំងការញុះញង់ និងផ្តល់ហិរញ្ញប្បទានដល់សកម្មភាពជ្រុលនិយម និងការបង្កើតអង្គការជ្រុលនិយម។  នៅក្នុងសារមួយដែលត្រូវបានបង្ហោះនៅលើប្រព័ន្ធផ្សព្វផ្សាយសង្គមកាលពីថ្ងៃព្រហស្បតិ៍ លោក Navalny បាននិយាយថា លទ្ធផលអាចតិចជាងបន្តិចគឺប្រហែល១៨ ឆ្នាំ ប៉ុន្តែគ្មានបញ្ហាអ្វីឡើយ ដោយសារតែលោកក៏ត្រូវបានគំរាមកំហែងជាប់ពាក់ព័ន្ធការចោទប្រកាន់អំពើភេរវកម្មដែលអាចបន្ថែមពេលវេលាមួយទសវត្សរ៍ទៀត។ លោកបាននិយាយថា គោលបំណង នេះ នឹងបំភ័យដល់ជនជាតិរុស្ស៊ី ប៉ុន្តែបានជំរុញពួកគេកុំឲ្យរឿងនោះកើតឡើង ហើយត្រូវគិតឲ្យបានល្អិតល្អន់អំពីរបៀបដែលល្អបំផុតដើម្បីទប់ទល់នឹងអ្វីដែលលោកហៅថា ជនទុច្ចរិត និងចោរ នៅក្នុងវិមានក្រឹមឡាំង៕

អាមេរិក៖ ប្រមុខការពារជាតិរុស៊ីធ្វើទស្សនកិច្ច នៅកូរ៉េខាងជើងស្វែងរកការគាំទ្រផ្នែកយោធា

2023/08/04 07:33:04 pm        237
Facebook Telegram Linkin
អាមេរិក៖ មន្ត្រីជាន់ខ្ពស់សេតវិមានបាននិយាយថា គោលបំណងនៃដំណើរទស្សនកិច្ចរបស់រដ្ឋមន្ត្រីការពារជាតិរុស្ស៊ី លោក Sergei Shoigu ទៅកាន់ប្រទេសកូរ៉េខាងជើងកាលពីខែមុនគឺត្រូវជំរុញឲ្យទីក្រុងព្យុងយ៉ាងលក់អាវុធទៅឲ្យទីក្រុងមូស្គូ។ លោក Shoigu បានដឹកនាំគណៈប្រតិភូរុស្ស៊ី ទៅកាន់ប្រទេសកូរ៉េខាងជើងដើម្បីប្រារព្ធខួបលើកទី៧០នៃបទឈប់បាញ់ក្នុងសង្គ្រាមកូរ៉េ។ លោកបានជួបសន្ទនាដាច់ដោយឡែកជាមួយសមភាគីកូរ៉េខាងជើងរបស់លោក លោក Kang Sun Nam និងមេដឹកនាំប្រទេសលោក Kim Jong Un។និយាយទៅកាន់អ្នកសារព័ត៌មាន នៅក្នុងទីក្រុងវ៉ាស៊ីនតោន កាលពីថ្ងៃព្រហស្បតិ៍ លោក John Kirby អ្នកនាំពាក្យក្រុមប្រឹក្សាសន្តិសុខជាតិរបស់សេតវិមាន បាននិយាយថារុស្ស៊ីកំពុងស្វែងរកការបង្កើនកិច្ចសហប្រតិបត្តិការយោធាជាមួយប្រទេសកូរ៉េខាងជើងតាមរយៈមធ្យោបាយបែបនេះ ខណៈទទួលបានគ្រាប់កាំភ្លើងធំពីទីក្រុងព្យុងយ៉ាង។ លោក Kirby និយាយថាអាមេរិក នៅតែមានការព្រួយបារម្ភថា ប្រទេសកូរ៉េខាងជើង បន្តសំឡឹងមើលការផ្តល់ការគាំទ្រផ្នែកយោធាដល់ប្រតិបត្តិការយោធារបស់រុស្ស៊ីទៅលើប្រទេសអ៊ុយក្រែន។  លោកនិយាយថា កិច្ចព្រមព្រៀងអាវុធណាមួយ រវាងប្រទេសកូរ៉េខាងជើង និងរុស្ស៊ី នឹងបំពានដោយផ្ទាល់លើសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិជាបន្តបន្ទាប់។ លោក Kirby និយាយថា ជាលទ្ធផលដែលរងផលប៉ះពាល់ដោយទណ្ឌកម្ម និងការគ្រប់គ្រងការនាំចេញ ដែលត្រូវបានដាក់ដោយប្រទេសលោកខាងលិច ប្រទេសរុស្ស៊ីកំពុងងាកទៅរកប្រទេសនានាដូចជាប្រទេសកូរ៉េខាងជើង និងប្រទេសអ៊ីរ៉ង់ ដើម្បីទទួលបានការគាំទ្រសម្រាប់សង្គ្រាម។  លោកនិយាយថា សហរដ្ឋអាមេរិក នឹងបន្តកំណត់អត្តសញ្ញាណ លាតត្រដាង និងប្រឆាំងកិច្ចប្រឹងប្រែងរបស់រុស្ស៊ីក្នុងការទទួលបានគ្រាប់រំសេវពីប្រទេសកូរ៉េខាងជើង និងរដ្ឋដ៏ទៃទៀត ដែលអាចត្រូវបានត្រៀមគាំទ្រសង្រ្គាមរបស់ខ្លួននៅអ៊ុយក្រែន៕

ក្រុមហ៊ុន Amazon ព្យាករថា ប្រាក់ចំណូល នៅត្រីមាសទី៣ លើសពីការរំពឹងទុក

2023/08/04 07:26:55 pm        252
Facebook Telegram Linkin
អាមេរិក៖ ក្រុមហ៊ុនពាណិជ្ជកម្មតាមប្រព័ន្ធអេឡិកត្រូនិក Amazon.com ព្យាករណ៍ពីប្រាក់ចំណូលត្រីមាសទី៣ ថា លើសពីការរំពឹងទុករបស់ផ្សារហ៊ុន Wall Street កាលថ្ងៃព្រហស្បតិ៍ (ទី៣ ខែសីហា) ដោយចំណូលនេះ ត្រូវបានជំរុញដោយការលក់ក្នុងព្រឹត្តិការណ៍ Prime Day ដ៏ធំបំផុតរបស់ខ្លួន ក្នុងខែកក្កដា ដែលបានទាក់ទាញអ្នកប្រើប្រាស់ ដែលដឹងពីតម្លៃចូលទៅកាន់វេទិកាពាណិជ្ជកម្មអេឡិចត្រូនិករបស់ខ្លួន។ការលក់បញ្ចុះតម្លៃលើមុខទំនិញនានា និងកូដកិច្ចព្រមព្រៀងលើកដំបូងលើសេវាកម្ម ដូចជាការកក់សណ្ឋាគារ បានជំរុញឲ្យការលក់អនឡាញរបស់សហរដ្ឋអាមេរិក កើនឡើង ៦,១ភាគរយ គឺកើនដល់កំណត់ត្រា ១២,៧ពាន់លានដុល្លារ អំឡុងព្រឹត្តិការណ៍ទិញទំនិញរបស់ក្រុមហ៊ុន Amazon នេះ ខណៈជនជាតិអាមេរិក ដែលរងគ្រោះដោយអតិផរណា ប្រញាប់ប្រញាល់ចាប់យកឱកាសទិញទំនិញបន្ថែមទៀត។សមាជិក Prime ជិត ២០០លាននាក់របស់ក្រុមហ៊ុន Amazon សន្សំបានជាង ២,៥ពាន់លានដុល្លារ លើមុខទំនិញប្រហែល ៣៧៥លាន ដែលត្រូវបានលក់ ក្នុងអំឡុងពេលព្រឹត្តិការណ៍រយៈពេល ២ថ្ងៃ។ អ្នកវិភាគរំពឹងថា ដើម្បីបង្កើនប្រាក់ចំណូលពីការផ្សាយពាណិជ្ជកម្ម និងសេវាកម្មអាជីវករដែរ នៅពេលដែលពាណិជ្ជករភាគីទី៣ ចុះឈ្មោះកាន់តែច្រើន។ក្រុមហ៊ុនបានព្យាករពីការលក់សុទ្ធ ក្នុងត្រីមាសបច្ចុប្បន្ន ចន្លោះ ១៣៨ពាន់លានដុល្លារ និង ១៤៣ពាន់លានដុល្លារ។ អ្នកវិភាគដែលត្រូវបានស្ទង់មតិដោយក្រុមហ៊ុន Refinitiv រំពឹងថា ប្រាក់ចំណូលមានចំនួន ១៣៨,២៥ពាន់លានដុល្លារ៕

សាលារៀន ព្រះវិហារ និងយានយន្តត្រូវបានឆេះបំផ្លាញក្នុងការវាយប្រហារលួចដុត នៅឈីលី

2023/08/04 07:23:17 pm        229
Facebook Telegram Linkin
ឈីលី៖ អគារថែទាំសុខភាពបឋម ព្រះវិហារ សាលារៀន មជ្ឈមណ្ឌលសហគមន៍មួយ និងយានយន្តជាច្រើនគ្រឿង ត្រូវបានឆេះបំផ្លាញនៅក្នុងការវាយប្រហារដោយចេតនាលួចដុតនៅក្នុងតំបន់ Araucania (អារ៉ូកានី) ដែលស្ថិតនៅដាច់ស្រយាលរបស់ប្រទេសឈីលី។យោងតាមប្រព័ន្ធផ្សព្វផ្សាយក្នុងតំបន់បានឲ្យដឹងថាអ្នកវាយប្រហារបានបន្សល់ទុកសារមួយនៅកន្លែងកើតហេតុ មុនពេលភៀសខ្លួនចេញពីតំបន់ ក្នុងពេលការបាញ់កាំភ្លើង។ គ្រូពេទ្យសង្គ្រោះបឋមម្នាក់ បានរងការរលាកស្រាល បន្ទាប់ពីលោកបានព្យាយាមពន្លត់អគ្គិភ័យ។ តំបន់ Araucania ខេត្តBiobio និងខេត្តArauco នៅក្នុងតំបន់ Biobio ស្ថិតនៅក្រោមច្បាប់រដ្ឋក្នុងគ្រាអាសន្នរយៈពេលជាង១ឆ្នាំមកនេះ។ នេះត្រូវបានរង្គោះរង្គើជាយូរមកហើយដោយការបញ្ឆេះជម្លោះរវាងជនជាតិដើមភាគតិច Mapuche(ម៉ាពូឆេ) និងរដ្ឋាភិបាលប្រទេសឈីលី។ជនជាតិដើមភាគតិច Mapuche ប្រមាណ ១,៧ លាននាក់រស់នៅក្នុងប្រទេសឈីលី ភាគច្រើននៅក្នុងតំបន់ Araucania ជាតំបន់ព្រៃភ្នំភ្លើងដែលគ្របដណ្តប់ដោយព្រិល មានចម្ងាយ ៤០០ ម៉ាយ ភាគខាងត្បូងទីក្រុង Santiago របស់ប្រទេស។ តំបន់នេះមានអត្រានៃភាពក្រីក្រខ្ពស់ខ្លាំង។ សកម្មជនជនជាតិដើមភាគតិចនិយាយថា ដែនដីរបស់ពួកគេត្រូវបានគំរាមកំហែងកាន់តែខ្លាំងឡើងដោយវិស័យកសិកម្ម ព្រៃឈើ និងឧស្សាហកម្មផ្សេងទៀត និងបានបន្ទោសរដ្ឋចំពោះការមិនបានគាំទ្រសិទ្ធិជាប្រវត្តិសាស្ត្ររបស់ពួកគេ។

អ្នកគាំទ្រយោធាប្រទេសនីហ្សេ តវ៉ាចំពោះការដាក់ទណ្ឌកម្ម

2023/08/04 07:19:13 pm        240
Facebook Telegram Linkin
នីហ្សេ៖ ក្រុមអ្នកគាំទ្រយោធាប្រទេសនីហ្សេរាប់រយនាក់ បានប្រមូលផ្តុំគ្នានៅក្នុងរដ្ឋធានី Niamey កាលពីថ្ងៃព្រហស្បតិ៍អរបអរសម្រាប់យោធា និងតវ៉ាប្រឆាំងការដាក់ទណ្ឌកម្មរបស់អាហ្វ្រិកខាងលិច។ ស្ត្រីម្នាក់និយាយថា ពលរដ្ឋនីហ្សេ មានសេរីភាពនៅថ្ងៃនេះ ជាថ្ងៃមួយដែលលោកស្រីនិយាយថាលោកស្រីមិនដែលឃើញនោះទេ។ ក្រុមអ្នកតវ៉ាមួយចំនួនទៀត បានរិះគន់ទណ្ឌកម្មដែលបានដាក់ដោយសហគមន៍សេដ្ឋកិច្ចនៃបណ្តារដ្ឋអាហ្វ្រិកខាងលិច ឬ ECOWAS។ ទណ្ឌកម្មត្រូវបានប្រកាសបន្ទាប់ពីប្រធានាធិបតី លោក Mohamed Bazoum ត្រូវបានផ្តួលរំលំកាលពីសប្តាហ៍មុន។ ឧត្តមសេនីយ៍ លោក Abdourahamane Tiani អតីតប្រធានកងអង្គរក្សប្រធានាធិបតីរបស់ប្រទេសនីហ្សេ ចាប់តាំងពីពេលនោះមកបានប្រកាសខ្លួនឯងជាប្រមុខរដ្ឋ។ ប្រមុខការពារជាតិប្រចាំតំបន់ កំពុងពិភាក្សាគ្នាអំពីការធ្វើអន្តរាគមន៍ដែលអាចកើតមានដើម្បីស្តារលទ្ធិប្រជាធិបតេយ្យឡើងវិញ។ នេះគឺជារដ្ឋប្រហារលើកទី៧ នៅប្រទេសអាហ្វ្រិកភាគកណ្តាលនិងភាគខាងលិច ចាប់តាំងពីឆ្នាំ២០២០ ហើយក្រោយមកកាលពីពេលថ្មីៗមានការដណ្តើមអំណាចដោយយោធានៅក្នុងប្រទេសម៉ាលី បួរគីណាហ្វាសូ និងប្រទេសហ្គីណេ។ សហគមន៍សេដ្ឋកិច្ចនៃរដ្ឋអាហ្វ្រិកខាងលិច និយាយថា រដ្ឋប្រហារនឹងលែងត្រូវបានអត់ឱនទៀតហើយនៅក្នុងតំបន់នេះ ហើយខ្លួនអាចអនុញ្ញាតឲ្យមានការប្រើប្រាស់កងកម្លាំងប្រសិនបើទាហានមិនឲ្យលោក Bazoum ចូលកាន់អំណាចវិញនោះទេនៅត្រឹមថ្ងៃអាទិត្យ។ ឧបទ្ទវហេតុហិង្សា នៅក្នុងប្រទេសនីហ្សេ បានធ្លាក់ចុះជិត៤០ភាគរយ នៅក្នុងឆមាសដំបូងនៃឆ្នាំ២០២៣ បើប្រៀបធៀបទៅនឹងឆ្នាំកន្លងទៅ៕

បណ្ដាញសង្គម

ព័ត៌មានថ្មីៗ

ជនជាតិអាមេរិកប៉ាឡេស្ទីចំណាយពេលពេញមួយយប់ជាមួយគ្រួសារក្នុងផ្ទះដែលឡោមព័ទ្ធដោយក្រុមតាំងលំនៅនិគមន៍អ៊ីស្រាអែល
08/18/2026 09:08 PM
Facebook Telegram Linkin
កាតានិយាយថា កិច្ចព្រមព្រៀងច្រកសមុទ្រ Hormuz អាចនឹងជួយឲ្យវិលត្រឡប់ទៅរកកិច្ចប្រជុំអាមេរិក-អ៊ីរ៉ង់
08/18/2026 08:08 PM
Facebook Telegram Linkin
ប្រធានាធិបតីចិន លោក Xi ជំរុញកុំ​ឱ្យ​ «បំផ្លាញ» ឋានៈជា «តំបន់សន្តិភាព» របស់អាមេរិកឡាទីន
08/18/2026 08:08 PM
Facebook Telegram Linkin
បេសកជន៖ អាមេរិក​បារម្ភយ៉ាងខ្លាំង ចំពោះការវាយប្រហារតាមអាកាសរបស់អ៊ីស្រាអែលលើមូលដ្ឋានទ័ពអាកាសស៊ីរី
08/18/2026 08:08 PM
Facebook Telegram Linkin
មនុស្សយ៉ាង​តចិច​ ២៥នាក់ ត្រូវបានសម្លាប់ អំឡុង​ការវាយប្រហារនៅរដ្ឋ​ Plateau របស់នីហ្សេរីយ៉ា
08/18/2026 07:08 PM
Facebook Telegram Linkin
មនុស្ស ៣នាក់ រងរបួស ហើយអគាររងការខូចខាតក្នុងការរញ្ជួយដីនៅភាគខាងត្បូងអេស្ប៉ាញ
08/18/2026 07:08 PM
Facebook Telegram Linkin
ពលរដ្ឋរស់នៅទីក្រុងម៉ានីល ដើរលុកទឹកតាមផ្លូវ ស្របពេលភ្លៀងវស្សាវាយប្រហារដ្ឋធានីហ្វីលីពីនមួយនេះ
08/18/2026 07:08 PM
Facebook Telegram Linkin
ទឹកជំនន់បង្ខំឲ្យមនុស្សរាប់ម៉ឺននាក់ជម្លៀសខ្លួននៅរដ្ឋ Odisha និងរដ្ឋ Assam ប្រទេសឥណ្ឌា
08/18/2026 07:08 PM
Facebook Telegram Linkin
មនុស្សម្នាក់ស្លាប់ និងច្រើននាក់ទៀតជាប់ខ្លួន ក្រោយផ្ទះចាស់បាក់រលំនៅទីក្រុង Kolkata ប្រទេសឥណ្ឌា
08/18/2026 07:08 PM
Facebook Telegram Linkin
សាកសពជនអន្តោប្រវេសន៍ ៩នាក់ ត្រូវបានរកឃើញនៅជិតតំបន់ឆ្នេរភាគខាងកើតទីក្រុង Tripoli ប្រទេសលីប៊ី
08/18/2026 07:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.