នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ឯកអគ្គរដ្ឋទូតហុងគ្រីចប់អាណត្តិមើលឃើញថាកម្ពុជាគឺជាដៃគូដ៏ជិតស្និទ្ធរបស់ហុងគ្រី
ឯកអគ្គរដ្ឋទូតបញ្ចប់អាណត្តិស្វីស៖ រដ្ឋាភិបាលស្វីសនឹងបន្តគាំទ្រដល់ការអភិវឌ្ឍសង្គម-សេដ្ឋកិច្ចកម្ពុជា
សម្តេចធិបតីផ្ញើសារច្បាស់លាស់ និងយ៉ាងម៉ឺងម៉ាត់​ដល់អាជ្ញាធរមូលដ្ឋានឱ្យ​បង្ក្រាប​ Online Scams ឱ្យទាល់តែអស់​ជាដាច់ខាត​ប្រកបដោយស្មារតីទទួលខុសត្រូវខ្ពស់បំផុត
គណៈរដ្ឋមន្ត្រី​ អនុម័តលើសេចក្តីព្រាងរបាយការណ៍តាមដាន និងត្រួតពិនិត្យការអនុវត្តយុទ្ធសាស្ត្របញ្ចកោណដំណាក់កាលទី១ ឆ្នាំ២០២៥

នយោបាយ​ និង ការអភិវឌ្ឍន៍

ប្រទេសចិន និងជប៉ុន បានកត់ត្រាខែក្តៅបំផុតក្នុងប្រវត្តិសាស្ត្រថ្មីៗនេះរបស់ខ្លួន

2024/08/02 09:57:12 am        156
Facebook Telegram Linkin
ប្រព័ន្ធផ្សព្វផ្សាយរដ្ឋរបស់ចិន បានរាយការណ៍ថា ប្រទេសចិន មើលឃើញខែដែលមានអាកាសធាតុក្តៅបំផុតក្នុងប្រវត្តិសាស្ត្រទំនើប នៅក្នុងខែកក្កដា ដោយឆ្លុះបញ្ចាំងពីកំណត់ត្រាអាកាសធាតុក្តៅបំផុតដែលបានឃើញនៅជុំវិញពិភពលោកកាលពីខែមុន ខណៈទីភ្នាក់ងារអាកាសធាតុជប៉ុន ក៏បាននិយាយកាលពីថ្ងៃព្រហស្បតិ៍ (០១ សីហា) ថា ខែកក្កដា ជាខែក្តៅបំផុតរបស់ខ្លួនចាប់តាំងពីកំណត់ត្រាបានចាប់ផ្តើមនៅឆ្នាំ១៨៩៨មក។ទូរទស្សន៍ជាតិរបស់ចិន បានរាយការណ៍កាលពីថ្ងៃព្រហស្បតិ៍ថា សីតុណ្ហភាពជាមធ្យមមាន ២៣,២១អង្សាសេ កាលពីខែមុន ពោលគឺកើនឡើងលើសពី ២៣,១៧អង្សាសេក្នុងខែកក្កដា កាលឆ្នាំ២០១៧ ដែលជាកម្រិតមធ្យមប្រចាំខែខ្ពស់បំផុតចាប់តាំងពីប្រទេសនេះបានចាប់ផ្តើមចងក្រងទិន្នន័យដ៏ទូលំទូលាយក្នុងឆ្នាំ១៩៦១។យោងតាមទីភ្នាក់ងារឧតុនិយមជប៉ុន (JMA) បានឱ្យដឹងថា សីតុណ្ហភាពមធ្យមជាតិសម្រាប់ខែកក្កដាគឺ ២,១៦អង្សាសេ លើសពីកម្រិតមធ្យមមូលដ្ឋានដែលបានគណនាពីឆ្នាំ១៩៩១ ដល់ឆ្នាំ២០២០ ដែលជាការកត់ត្រាខ្ពស់បំផុតក្នុងរយៈពេលជាង ១២០ឆ្នាំ។ ក្នុងចំណោមស្ថានីយ៍សង្កេតឧតុនិយមចំនួន ១៥៣នៅទូទាំងជប៉ុន មាន ៦២កន្លែងបានរាយការណ៍ពីសីតុណ្ហភាពជាមធ្យមខ្ពស់បំផុតរបស់ពួកគេសម្រាប់ខែ។ ក្នុងខែកក្កដា ខេត្តទាំងអស់របស់ចិន មានសីតុណ្ហភាពជាមធ្យមខ្ពស់ជាងខែដូចគ្នាកាលពីឆ្នាំមុន។ពិភពលោកបានកត់ត្រាថ្ងៃក្តៅបំផុតក្នុងកំណត់ត្រានៅថ្ងៃទី២២ ខែកក្កដា ដោយសីតុណ្ហភាពមធ្យមលើផ្ទៃផែនដីឡើងដល់ ១៧,១៥អង្សាសេ។ មិនដូចនៅក្នុងឆ្នាំ២០១៣ និង២០១៦នោះទេ អ្វីដែលធ្វើឱ្យកំណត់ត្រាកម្ដៅឆ្នាំនេះមិនធម្មតានោះមកពីគំរូអាកាសធាតុ អ៊ែលនីញ៉ូ (El Nino) ដែលបង្កើនសីតុណ្ហភាពសកលដោយសារទឹកក្តៅជាងធម្មតានៅប៉ាស៊ីហ្វិកខាងកើត ទើបតែបានបញ្ចប់ក្នុងខែមេសា ប៉ុន្តែសីតុណ្ហភាពមិនបានថយចុះនោះទេ៕

នៅព្រំដែនម៉ិកស៊ិក លោក Vance រិះគន់គោលនយោបាយអន្តោប្រវេសន៍ «គ្មានការគិត» របស់ លោកស្រី Harris

2024/08/02 09:54:01 am        136
Facebook Telegram Linkin
នៅព្រំដែនភាគខាងត្បូងសហរដ្ឋអាមេរិករវាងរដ្ឋអារីហ្សូណា និងប្រទេសម៉ិកស៊ិក បេក្ខជនអនុប្រធានមកពីគណបក្សសាធារណរដ្ឋ លោក J.D. Vance កាលពីថ្ងៃព្រហស្បតិ៍ បានរិះគន់ខ្លាំងៗចំពោះគោលនយោបាយអន្តោប្រវេសន៍របស់អនុប្រធានាធិបតី លោកស្រី Kamala Harris ដែលបានចាត់ទុកថា «គួរឱ្យព្រួយបារម្ភ និងគ្មានការគិត» ។លោក Vance និងបេក្ខជនប្រធានាធិបតី មកពីគណបក្សសាធារណរដ្ឋ លោក Donald Trump បានបង្កើនការវាយប្រហារដោយពាក្យសំដីរបស់ពួកគេទៅលើ លោកស្រី Harris ថាជា «អ្នកឲ្យយោបល់ផ្នែកព្រំដែន» បរាជ័យ ជាពិសេសនៅពេលនេះ ដែលលោកស្រីបានក្លាយជាបេក្ខជនគណបក្សប្រជាធិបតេយ្យ បន្ទាប់ពីប្រធានាធិបតី លោក Joe Biden បានបញ្ចប់យុទ្ធនាការរបស់លោកសម្រាប់ការបោះឆ្នោតថ្មី ក្នុងខែនេះ។កាលពីខែមីនា ឆ្នាំ២០២១ លោក Biden បាននិយាយថា លោកស្រី Harris នឹងដឹកនាំកិច្ចខិតខំប្រឹងប្រែងជាមួយប្រទេសម៉ិកស៊ិក និងប្រទេសអាមេរិកកណ្តាល ដើម្បីដោះស្រាយការធ្វើអន្តោប្រវេសន៍ខុសច្បាប់។សមាជិកគណបក្សសាធារណរដ្ឋ បានចាប់យករឿងនេះ ដើម្បីចោទប្រកាន់លោកស្រីពីការបរាជ័យក្នុងការរារាំងលំហូរជនអន្តោប្រវេសន៍រាប់លាននាក់ ដែលឆ្លងកាត់ព្រំដែនដោយខុសច្បាប់ចូលទៅក្នុងសហរដ្ឋអាមេរិក ទោះបីជាលោកស្រី មិនទទួលខុសត្រូវដោយផ្ទាល់ ចំពោះការធានានៅព្រំដែនភាគខាងត្បូងក៏ដោយ។

អ្នកនយោបាយអ៊ុយក្រែន៖ សហរដ្ឋអាមេរិក ចង់ដាក់ជំនួសតំណែងលោក ហ្ស៊េឡិនស្កី ដោយលោក ប៊ូដាណូ

2024/08/01 02:59:37 pm        604
Facebook Telegram Linkin
អ្នកនយោបាយប្រឆាំងអ៊ុយក្រែនលោក វីកទ័រ ម៉េដវ៉េដជុក (Viktor Medvedchuk) បាននិយាយថា សហរដ្ឋអាមេរិក ចង់ដាក់ជំនួសប្រធានាធិបតីអ៊ុយក្រែនលោក វ្ល៉ូឌីមី ហ្ស៊េឡិនស្គី ដោយប្រធានចារកម្មយោធាអ៊ុយក្រែនលោក គីរីល ប៊ូដាណូ ( Kirill Budanov) ដែលត្រូវបានដាក់បញ្ចូលក្នុងបញ្ជីភេរវករ និងក្រុមជ្រុលនិយមរបស់រុស្ស៊ី។នៅក្នុងបទសម្ភាសន៍ជាមួយសារព័ត៌មាន TASS លោកក៏បាននិយាយផងដែរថា ចក្រភពអង់គ្លេស ចង់ឲ្យ លោក វ៉ាលឺរី ហ្សាលូនី (Valery Zaluzhny) អតីតអគ្គមេបញ្ជាការអ៊ុយក្រែន និងបច្ចុប្បន្នជាឯកអគ្គរដ្ឋទូតប្រចាំទីក្រុងឡុងដ៍ ចូលកាន់តំណែងជំនួសលោក ហ្ស៊េឡិនស្គី ។លោក ម៉េដវ៉េដជុក ធ្លាប់ជាមេដឹកនាំគណបក្សវេទិកាដើម្បីជីវិតជាបក្សប្រឆាំង ដែលត្រូវបានហាមឃាត់នៅក្នុងប្រទេសអ៊ុយក្រែន ហើយឥឡូវនេះ ដឹកនាំចលនាអ៊ុយក្រែនផ្សេងទៀត។លោកបាននិយាយថា «ប៊ូដាណូ) ត្រូវបានមើលដោយសេវាស៊ើបការណ៍សម្ងាត់របស់សហរដ្ឋអាមេរិកថាជាឥស្សរជនម្នាក់ ដែលអាចជំនួសលោក ហ្ស៊េឡិនស្គី» ។ «ប៉ុន្តែតើធ្វើដូចម្តេច ដើម្បីជំនួសគាត់បាន? មានតែតាមរយៈរដ្ឋប្រហារយោធាប៉ុណ្ណោះ»។

សម្ដេចធិបតី៖ ស្ត្រីកម្ពុជាតែងរួមចំណែកលើសពីតួនាទីបែបប្រពៃណី និងបង្ហាញពីភាពជាអ្នកដឹកនាំ

2024/08/01 12:26:43 pm        219
Facebook Telegram Linkin
ក្នុងឱកាសអញ្ជើញជាអធិបតីភាពដ៏ខ្ពង់ខ្ពស់បើកវេទិកាស្ត្រីជាសហគ្រិន និងរង្វាន់សហគ្រិនអាស៊ានឆ្នាំ២០២៤ នៅព្រឹកថ្ងៃទី១ ខែសីហានេះដែរសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា មានប្រសាសន៍ថា ស្ត្រីកម្ពុជាតែងរួមចំណែកលើសពីតួនាទីបែបប្រពៃណី និងបង្ហាញពីភាពជាអ្នកដឹកនាំទាំងនៅក្នុងគ្រួសារ សហគមន៍ និងសង្គមជាតិទាំងមូល។ សម្ដេចធិបតីនាយករដ្ឋមន្រ្ដី បានថ្លែងថា ស្ត្រីកម្ពុជា តែងរួមចំណែក លើសពីតួនាទីបែប​ប្រពៃណី​របស់ ស្ត្រី និងបានបង្ហាញពីភាពជាអ្នកដឹកនាំដ៏ពិសេសក្នុងទិដ្ឋភាព ផ្សេងៗ ជាក់ស្ដែងព្រះរាជា ទីមួយរបស់កម្ពុជា គឺព្រះនាងសោមា ឬព្រះនាង លីវយី ដែលបានសោយរាជ្យនៅនគរ ហ្វូណន មុនសម័យអង្គរ។ ភាពជាអ្នកដឹកនាំ និងសមត្ថភាពខាងយោធាដ៏រឹងមាំរបស់ព្រះនាង​បាន​បង្រួបបង្រួម និងពង្រីកឥទ្ធិពលជាតិ តាមរយៈពាណិជ្ជកម្ម និងការទូត ដោយការណ៍នេះ បានធ្វើឱ្យព្រះនាងក្លាយជាគំរូ ​សម្រាប់មេដឹកនាំស្ត្រី ក្នុងជំនាន់ក្រោយៗ។សម្ដេចនាយករដ្ឋមន្រ្ដីបន្តថា កម្ពុជា ក៏មានស្ត្រីដ៏អស្ចារ្យដទៃទៀត ​ដូចជា ព្រះនាងជ័យរាជទេវី, ព្រះនាងសោមា, ព្រះនាងឥន្ទ្រទេវី ជាដើម ​ដែលបានចូលរួមចំណែកកសាងប្រវត្តិសាស្ត្រ​នៃ​ប្រជាជាតិកម្ពុជា។ក្នុងឱកាសនោះសម្តេចធិបតី នាយករដ្ឋមន្រ្ដីបានបញ្ជាក់ថា​ វីរភាពរបស់មេដឹកនាំស្ត្រីគំរូ ទាំងនេះ​តែងផ្តល់ជាការបណ្ដុះគំនិត និងរំឭកអំពីកម្លាំង, ភាពឈ្លាសវៃ និងភាពធន់របស់ស្ត្រី ក្នុងភាពជាអ្នកដឹកនាំ។ ឈរលើកេរ្ដិ៍ដំណែលដ៏សម្បូរបែបនេះ ទាំងអស់គ្នាបានទទួលស្គាល់​ការរួម​ចំណែកដ៏ធំធេងរបស់ស្ត្រីនៅក្នុងប្រវត្តិសាស្ត្រ ​មិនត្រឹមតែជាមហាក្សត្រី ​និងមេដឹកនាំប៉ុណ្ណោះទេ ប៉ុន្តែក៏ជាសហគ្រិន, នវានុវត្តជន, អ្នកផ្តល់ការថែទាំ ​និងអ្នកកសាងសហគមន៍ផងដែរ៕ អត្ថបទ៖ វ៉ន ដារ៉ា

លោកស្រី Kamala Harris ទទួលបានការគាំទ្រពីក្រុមអ្នកបណ្តាក់ទុនធំៗជាង ១០០នាក់

2024/08/01 12:03:56 pm        159
Facebook Telegram Linkin
អ្នកបណ្តាក់ទុនធំៗជាង ១០០នាក់រួមទាំងសហគ្រិនពាន់លាន លោក ម៉ាក ឃ្យូបាន (Mark Cuban) បានគាំទ្រអនុប្រធានាធិបតីសហរដ្ឋអាមេរិក លោកស្រី កាម៉ាឡា ហារីស (Kamala Harris) មកពីបក្សប្រជាធិបតេយ្យ កាលពីថ្ងៃពុធ (៣១ កក្កដា) ដែលជាការប្រឆាំងទៅនឹងបណ្ដាមហាសេដ្ឋីបច្ចេកវិទ្យាដែលគាំទ្រគូប្រជែងគណបក្សសាធារណរដ្ឋ គឺលោក ដូណាល់ ត្រាំ (Donald Trump)។តំបន់ពាណិជ្ជកម្មបច្ចេកវិទ្យា ស៊ីលីខន វ៉ាលី (Silicon Valley) របស់អាមេរិក ជាទម្លាប់ត្រូវបានគេមើលឃើញថាជាបោះឆ្នោតសេរី ប៉ុន្តែពួកសាធារណរដ្ឋបានឈ្នះការគាំទ្រពីតួអង្គក្នុងឧស្សាហកម្មដ៏លេចធ្លោនៅក្នុងវដ្តនៃការបោះឆ្នោតនេះ។ ការគាំទ្រទាំងនោះត្រូវបានជំរុញដោយការជ្រើសរើសព្រឹទ្ធសមាជិក ជេឌី វែនស៍ (JD Vance) ដែលជាអតីតអ្នកបណ្តាក់ទុន ឱ្យធ្វើជាដៃគូបោះឆ្នោតជាមួយលោក Trump ប៉ុន្តែការសម្រេចដកខ្លួនពីការប្រជែងអាណត្តិថ្មីរបស់លោកប្រធានាធិបតី Joe Biden ក៏បានជំរុញឱ្យក្រុមឧស្សាហកម្មបច្ចេកវិទ្យាក្រោកឡើងគាំទ្រលោកស្រី Harris ផងដែរ។ក្រុមនេះបាននិយាយនៅក្នុងញត្តិសាធារណៈមួយដែលត្រូវបានបង្ហោះតាមអ៊ីនធឺណិតថា «យើងជឿជាក់លើលទ្ធិប្រជាធិបតេយ្យដែលជាឆ្អឹងខ្នងរបស់ប្រទេសជាតិ។ យើងជឿថាស្ថាប័នដ៏រឹងមាំ និងគួរឱ្យទុកចិត្តបានគឺជាលក្ខណៈពិសេសមួយសម្រាប់ជាតិ»។ ញត្តិពីក្រុមអ្នកបណ្ដាក់ទុននេះកើតឡើងបន្ទាប់ពីលោក Trump បានទាក់ទាញការគាំទ្រពីបណ្ដាអ្នកមានទ្រព្យ អ្នកបណ្តាក់ទុន និងវិនិយោគិនជាន់ខ្ពស់ផ្សេងទៀត។មហាសេដ្ឋី លោក អ៊ីឡុន ម៉ាស (Elon Musk) នាយកប្រតិបត្តិក្រុមហ៊ុនរថយន្ត តេស្លា (Tesla) បានផ្ដល់ការគាំទ្រជាសាធារណៈចំពោះលោក Trump ខណៈសហគ្រិន និងអ្នកវិនិយោគដទៃទៀតក៏បានជួយរៃអង្គាសប្រាក់សម្រាប់អតីតប្រធានាធិបតីរូបនេះផងដែរ៕

ស្ថានភាពនៅវ៉េណេស៊ុយអេឡា កាន់តែតានតឹងខ្លាំងក្រោយលទ្ធផលឆ្នោតដ៏ចម្រូងចម្រាស

2024/08/01 11:55:13 am        199
Facebook Telegram Linkin
ហាងលក់ទំនិញ និងសេវាដឹកជញ្ជូនសាធារណៈនៅទូទាំងប្រទេសវេណេហ្ស៊ុយអេឡា បានបិទកាលពីថ្ងៃពុធ (៣១ កក្កដា) ដោយសារស្ថានភាពកាន់តែតានតឹងជុំវិញការបោះឆ្នោតប្រធានាធិបតីដ៏ចម្រូងចម្រាស រួមជាមួយមឹងពាក្យចចាមអារ៉ាមអំពីការចាប់ខ្លួនក្រុមប្រឆាំងកាន់តែច្រើន និងអំពើហិង្សាជាបន្តបន្ទាប់ ធ្វើឱ្យមនុស្សសំងំលាក់ខ្លួននៅក្នុងផ្ទះមិនហ៊ានចេញក្រៅ។ប្រធានាធិបតីសង្គមនិយម លោក នីកូឡាស ម៉ាឌូរ៉ូ (Nicolas Maduro) ដែលដឹកនាំតាំងពីឆ្នាំ២០១៣មក ត្រូវបានប្រកាសថាជាអ្នកឈ្នះឆ្នោតម្ដងទៀតដោយក្រុមប្រឹក្សាបោះឆ្នោត ប៉ុន្តែបក្សប្រឆាំងនិយាយថា ចំនួនសន្លឹកឆ្នោតប្រហែល ៩០ភាគរយ បង្ហាញថាបេក្ខជនរបស់ខ្លួនគឺលោក អេដម៉ុនដូ ហ្គនហ្សាលេស (Edmundo Gonzalez) ជាអ្នកឈ្នះ។ខណៈភាពចម្រូងចម្រាសបានឈានចូលដល់ថ្ងៃទីបីរបស់ខ្លួនស្របពេលមានការអំពាវនាវឱ្យមានតម្លាភាពកាន់តែច្រើន រដ្ឋាភិបាលបានទទូចថា ខ្លួនមិនបានបញ្ចេញចំនួនសំឡេងឆ្នោតពេញលេញនៅកម្រិតការិយាល័យបោះឆ្នោតទេ ដោយសារតែចោរកម្មប្រព័ន្ធបច្ចេកទេសដែលមានប្រភពមកពីប្រទេសម៉ាសេដូនីខាងជើង ជំរុញឱ្យមានការពន្យារពេលបន្ថែម ប៉ុន្តែមិនផ្តល់ភស្តុតាងណាមួយដើម្បីគាំទ្រការលើកឡើងនោះឡើយ។ អង្គការគាំទ្រប្រជាធិបតេយ្យ ខាធើ សេនធើ (Carter Center) មានមូលដ្ឋាននៅអាមេរិក ដែលជាអង្គភាពឃ្លាំមើលឯករាជ្យមួយដែលត្រូវបានអនុញ្ញាតឱ្យសង្កេតការណ៍ការបោះឆ្នោត បានប្រកាសនៅក្នុងសេចក្តីថ្លែងការណ៍មួយកាលពីល្ងាចថ្ងៃអង្គារថា ការបោះឆ្នោតនេះ «មិនអាចចាត់ទុកថាជាលទ្ធិប្រជាធិបតេយ្យទេ»។ នៅក្នុងសុន្ទរកថាដែលចាក់ផ្សាយតាមទូរទស្សន៍រដ្ឋកាលពីថ្ងៃពុធ លោក Maduro បានច្រានចោលរាល់ការគំរាមកំហែងទាំងអស់ រួមទាំងលទ្ធភាពនៃទណ្ឌកម្មថ្មីរបស់សហរដ្ឋអាមេរិកផងដែរ៕

ប្រទេសក្រុមប្រឹក្សាសន្តិសុខUN សម្តែងការព្រួយបារម្មណ៍ចំពោះហានិភ័យនៃសង្គ្រាមនៅមជ្ឈិមបូព៌ា

2024/08/01 11:45:47 am        175
Facebook Telegram Linkin
បណ្តាប្រទេសក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃពុធ ទី៣១ ខែកក្កដា បានអំពាវនាវឱ្យបង្កើនកិច្ចខិតខំប្រឹងប្រែងផ្នែកការទូត ដើម្បីបញ្ចៀសជម្លោះនៅមជ្ឈិមបូព៌ា ដែលកាន់តែរីកធំ បន្ទាប់ពីការសម្លាប់មេដឹកនាំសកម្មប្រយុទ្ធពីររូប ធ្វើឲ្យភាពតានតឹងកាន់តែកើនឡើង។មេដឹកនាំក្រុមហាម៉ាស លោក Ismail Haniyeh ត្រូវបានគេធ្វើឃាតនៅក្នុងរដ្ឋធានី តេអេរ៉ង់ ប្រទេសអ៊ីរ៉ង់ កាលពីព្រឹកថ្ងៃពុធ បង្កឱ្យមានការគំរាមកំហែងសងសឹកប្រឆាំងអ៊ីស្រាអែល និងជំរុញឱ្យមានការព្រួយបារម្ភថា ជម្លោះនៅតំបន់ហ្កាហ្សា កំពុងក្លាយជាសង្រ្គាមមជ្ឈិមបូព៌ាពេញបន្ទុក។ការធ្វើឃាតនេះ បានកើតឡើងមិនដល់២៤ម៉ោងនោះទេ បន្ទាប់ពីមេបញ្ជាការយោធាជាន់ខ្ពស់ របស់ ក្រុមហេសបូឡា ត្រូវបានសម្លាប់នៅក្នុងការវាយប្រហាររបស់អ៊ីស្រាអែល ទៅលើរដ្ឋធានី Beirut របស់ប្រទេសលីបង់ ដើម្បីជាការសងសឹកចំពោះការវាយប្រហារដោយគ្រាប់រ៉ុក្កែតដ៏បង្ហូរឈាម នៅក្នុងតំបន់ ខ្ពង់រាប Golan Heights ដែលកាន់កាប់ដោយអ៊ីស្រាអែល។លោក Shino Mitsuko តំណាងរងប្រចាំអង្គការសហប្រជាជាតិរបស់ប្រទេសជប៉ុន បាននិយាយកាលពីថ្ងៃពុធ ដោយជំរុញឱ្យមានកិច្ចខិតខំប្រឹងប្រែងជាអន្តរជាតិក្នុងការការពារជម្លោះ ដោយព្រួយបារម្ភថា តំបន់នេះ ស្ថិតនៅលើមាត់ជ្រោះនៃសង្គ្រាមពេញបន្ទុក។ ប្រទេសចិន រុស្ស៊ី អាល់ហ្សេរី និងប្រទេសដទៃទៀត បានថ្កោលទោសការធ្វើឃាតលោក Haniyeh ដែលឯកអគ្គរដ្ឋទូតអ៊ីរ៉ង់ប្រចាំអង្គការសហប្រជាជាតិ ចាត់ទុកថាជាអំពើភេរវកម្ម ខណៈសហរដ្ឋអាមេរិក ចក្រភពអង់គ្លេស និងបារាំង បានលើកឡើងនូវអ្វីដែលពួកគេនិយាយថា ជាការគាំទ្ររបស់អ៊ីរ៉ង់ចំពោះ តួអង្គសំខាន់ៗដែលបង្កអស្ថិរភាពនៅក្នុងតំបន់។ លោក Fu Cong ឯកអគ្គរដ្ឋទូតចិនប្រចាំអង្គការសហប្រជាជាតិ បាននិយាយថា បណ្តាប្រទេសដែលមានឥទ្ធិពលធំៗ ត្រូវតែដាក់សម្ពាធបន្ថែមទៀត និងធ្វើការឱ្យកាន់តែខ្លាំងក្លា ដើម្បីពន្លត់ភ្លើងសង្រ្គាម នៅក្នុងតំបន់ហ្កាហ្សា។ ឯកអគ្គរដ្ឋទូតរបស់ចក្រភពអង់គ្លេស លោកស្រី Barbara Woodward បានជំរុញឱ្យមានភាពស្ងប់ស្ងាត់ និងភាពអត់ធ្មត់ ដោយបានរំលឹកឡើងវិញនូវការអំពាវនាវឱ្យមានបទឈប់បាញ់ជាបន្ទាន់នៅក្នុងតំបន់ហ្កាហ្សា។ លោក Robert Wood ឯកអគ្គរដ្ឋទូតរងសហរដ្ឋអាមេរិកប្រចាំអង្គការសហប្រជាជាតិ បានអំពាវនាវឱ្យសមាជិកក្រុមប្រឹក្សាសន្តិសុខ ដែលមានឥទ្ធិពលលើប្រទេសអ៊ីរ៉ង់ ឱ្យបង្កើនសម្ពាធលើប្រទេសនេះ ឱ្យបញ្ឈប់ការធ្វើឲ្យរីកធំនៃជម្លោះតំណាងប្រឆាំងអ៊ីស្រាអែល និងប្រទេសដទៃទៀត។

នាវាចម្បាំងកាណាដា ឆ្លងកាត់ច្រកសមុទ្រតៃវ៉ាន់ ដែលទាក់ទាញកំហឹងពីប្រទេសចិន

2024/08/01 10:53:56 am        191
Facebook Telegram Linkin
នាវាចម្បាំងកាណាដាមួយគ្រឿងបានឆ្លងកាត់ច្រកសមុទ្រតៃវ៉ាន់ជាអ្វីដែលទីក្រុងអូតាវ៉ា(Ottawa) ហៅថាការប្តេជ្ញាចិត្តចំពោះឥណ្ឌូ-ប៉ាស៊ីហ្វិកបើកចំហ ដោយទាក់ទាញការស្តីបន្ទោសពីប្រទេសចិនថាសមយុទ្ធកងទ័ពជើងទឹកកាលពីថ្ងៃទី ៣១ ខែកក្កដា បានធ្វើឱ្យប៉ះពាល់ដល់សន្តិភាព។ក្រសួងការពារជាតិរបស់ប្រទេសកាណាដាបាននិយាយថា នាវាចម្បាំង HMCS ម៉ុងរ៉េអាល់ (HMCS Montreal) បានឆ្លងកាត់តាមទម្លាប់ នាពេលថ្មីៗនេះ នៅច្រកសមុទ្រ ជាអ្វីដែលរដ្ឋមន្ត្រីការពារជាតិរបស់ខ្លួនបាននិយាយថា គឺជាការបញ្ជាក់ឡើងវិញនៃការប្តេជ្ញាចិត្តរបស់ប្រទេសកាណាដាចំពោះ "សេរីភាព បើកចំហ និងរួមបញ្ចូល" ឥណ្ឌូ-ប៉ាស៊ីហ្វិក។រដ្ឋមន្ត្រីការពារជាតិលោកកាណាដា លោក ប៊ៀលប្ល៊ែរ( Bill Blair) បាននិយាយថា "ដូចដែលបានគូសបញ្ជាក់នៅក្នុងយុទ្ធសាស្ត្រឥណ្ឌូប៉ាស៊ីហ្វិករបស់យើង កាណាដាកំពុងបង្កើនវត្តមានរបស់កងនាវាជើងទឹកភូមិន្ទកាណាដា នៅក្នុងតំបន់ឥណ្ឌូ-ប៉ាស៊ីហ្វិក" ដោយសំដៅលើផែនការរបស់ប្រទេសកាណាដាសម្រាប់តំបន់ដែលបានប្រកាសនៅឆ្នាំ ២០២២។ លោក Li Xi អ្នកនាំពាក្យនៃបញ្ជាការភូមិភាគខាងកើតនៃកងទ័ពរំដោះប្រជាជនចិន (PLA) បាននិយាយថា ការឆ្លងកាត់នាវាចម្បាំងកាណាដាកាលពីថ្ងៃទី ៣១ ខែកក្កដា បានបៀតបៀន និងរំខានដល់ស្ថានភាព និងធ្វើឱ្យប៉ះពាល់ដល់សន្តិភាព និងស្ថិរភាពនៅទូទាំងច្រកសមុទ្រតៃវ៉ាន់ ។លោកបានបន្ថែមថា កងទ័ពចិនបានប្រុងប្រយ័ត្នខ្ពស់គ្រប់ពេលវេលា ហើយត្រៀមខ្លួនជាស្រេចក្នុងការឆ្លើយតបចំពោះរាល់ការគំរាមកំហែង និងការបង្កហេតុ។នាវាចម្បាំងអាមេរិក ហើយម្តងម្កាល យន្តហោះល្បាតរបស់កងទ័ពជើងទឹកអាមេរិក បានឆ្លងកាត់ ច្រកសមុទ្រ ប្រហែលមួយដងក្នុងមួយខែ ដោយមិនខ្វល់ពីការព្រមាន៕

កងទ័ពជើងទឹកហ្វីលីពីន និងសហរដ្ឋអាមេរិក ធ្វើសមយុទ្ធរួមគ្នានៅសមុទ្រចិនខាងត្បូង

2024/08/01 10:01:28 am        215
Facebook Telegram Linkin
កងកម្លាំងប្រដាប់អាវុធហ្វីលីពីនបាននិយាយថា កងទ័ពជើងទឹកហ្វីលីពីន និងសហរដ្ឋអាមេរិក បានធ្វើសមយុទ្ធដែនសមុទ្ររួមគ្នានៅសមុទ្រចិនខាងត្បូងកាលពីថ្ងៃពុធ (៣១ កក្កដា)។ សម្ព័ន្ធមិត្តទាំងពីរបានចាប់ផ្តើមសកម្មភាពដែនសមុទ្ររួមគ្នានៅក្នុងខែវិច្ឆិកា ដើម្បីជំរុញវិធីសាស្រ្តដែលយោធារបស់ភាគីទាំងពីរអាចប្រតិបត្តិការស្របគ្នានៅពេលដែលមានភាពតានតឹងកើនឡើងជាមួយប្រទេសចិន នៅក្នុងសមុទ្រចិនខាងត្បូង។យោធារបស់ទីក្រុងម៉ានីល បាននិយាយនៅក្នុងសេចក្តីថ្លែងការណ៍មួយថា សមយុទ្ធចុងក្រោយបំផុតដែលបានធ្វើឡើងនៅក្នុងតំបន់សេដ្ឋកិច្ចផ្តាច់មុខរបស់ហ្វីលីពីននេះ រួមមាននាវាចំនួនពីរគ្រឿង ហើយត្រូវបានរៀបចំឡើងដើម្បីបង្កើនទំនាក់ទំនង និងការសម្របសម្រួលប្រតិបត្តិការរវាងកងទ័ពជើងទឹកទាំងពីរ។កាលពីថ្ងៃអង្គារ រដ្ឋមន្ត្រីការបរទេសអាមេរិក លោក អង់តូនី ប្លីងខិន (Antony Blinken) និងរដ្ឋមន្ត្រីក្រសួងការពារជាតិ លោក ឡយដ៍ អស្ទីន (Lloyd Austin) បានជួបពិភាក្សាជាមួយសមភាគីហ្វីលីពីន ដែលទីក្រុងវ៉ាស៊ីនតោន បានសន្យាផ្តល់មូលនិធិចំនួន ៥០០លានដុល្លារ ដើម្បីពង្រឹងកម្លាំងយោធា និងឆ្មាំល្បាតឆ្នេររបស់ទីក្រុងម៉ានីល។ការចូលរួមផ្នែកសន្តិសុខរវាងដៃគូសន្ធិសញ្ញាទាំងពីរបានកើនឡើងក្រោមការដឹកនាំរបស់ប្រធានាធិបតីហ្វីលីពីន លោក ហ្វឺឌីណាន ម៉ាកូស ជូនៀ (Ferdinand Marcos Jr.) ដែលបានជំរុញប្រទេសនេះឱ្យកាន់តែជិតស្និទ្ធជាមួយទីក្រុងវ៉ាស៊ីនតោន និងចាកឆ្ងាយពីគោលជំហរគោលនយោបាយការបរទេសរបស់អ្នកកាន់តំណែងពីមុនរបស់លោកក្នុងការធ្វើឱ្យទំនាក់ទំនងកាន់តែស៊ីជម្រៅជាមួយប្រទេសចិន៕

កូរ៉េខាងជើង ចង់ចាប់ផ្តើមកិច្ចចរចានុយក្លេអ៊ែរឡើងវិញប្រសិនបើ លោក Trump ឈ្នះឆ្នោត

2024/08/01 09:22:02 am        214
Facebook Telegram Linkin
អ្នកការទូតជាន់ខ្ពស់របស់ប្រទេសកូរ៉េខាងជើងម្នាក់ ដែលបានរត់ចូលទៅកាន់ប្រទេសកូរ៉េខាងត្បូង បានប្រាប់សារព័ត៌មាន Reuters ថា កូរ៉េខាងជើង ចង់បើកកិច្ចចរចានុយក្លេអ៊ែរឡើងវិញជាមួយសហរដ្ឋអាមេរិក ប្រសិនបើ លោក ដូណាល់ ត្រាំ ជាប់ឆ្នោតជាប្រធានាធិបតីជាថ្មី ហើយនឹងធ្វើការដើម្បីបង្កើតយុទ្ធសាស្ត្រចរចាថ្មីមួយ ។លោក Ri Il Gyu គឺជាអ្នកការទូតជាន់ខ្ពស់របស់កូរ៉េខាងជើង ដែលរត់ចូលទៅទៅកាន់ប្រទេសកូរ៉េខាងត្បូងចាប់តាំងពីឆ្នាំ២០១៦។ នៅក្នុងបទសម្ភាសន៍លើកដំបូងរបស់លោកជាមួយប្រព័ន្ធផ្សព្វផ្សាយអន្តរជាតិ លោក Ri បាននិយាយថា កូរ៉េខាងជើង បានកំណត់ ប្រទេសរុស្ស៊ី អាមេរិក និងជប៉ុន ជាអាទិភាព គោលនយោបាយការបរទេសរបស់ខ្លួនសម្រាប់ឆ្នាំនេះ និងហួសពីនេះ។លោក Ri បាននិយាយថា ខណៈកំពុងពង្រឹងទំនាក់ទំនងជាមួយរុស្ស៊ី ទីក្រុងព្យុងយ៉ាងមានបំណងបើកការចរចានុយក្លេអ៊ែរឡើងវិញ ប្រសិនបើលោក Trump ទទួលជ័យជម្នះក្នុងការបោះឆ្នោត នៅក្នុងខែវិច្ឆិកា ខាងមុខនេះ។លោក Ri និយាយថា អ្នកការទូតរបស់ទីក្រុងព្យុងយ៉ាង កំពុងដាក់ចេញផែនការយុទ្ធសាស្ត្រសម្រាប់សេណារីយ៉ូនោះ ដោយមានគោលដៅដកចេញទណ្ឌកម្មលើកម្មវិធីសព្វាវុធរបស់ខ្លួន និងដកចេញការចាត់តាំងថាជាអ្នកជួយឧបត្ថម្ភរដ្ឋក្នុងអំពើភេរវកម្ម។ការអត្ថាធិប្បាយរបស់លោក បង្ហាញពីសក្តានុពលនៃការប្រឈមមុខទៅនឹងជំហរបច្ចុប្បន្នរបស់ប្រទេសកូរ៉េខាងជើង បន្ទាប់ពីសេចក្តីថ្លែងការណ៍ថ្មីៗនេះ បានលុបចោលលទ្ធភាពនៃការសន្ទនាជាមួយសហរដ្ឋអាមេរិក និងព្រមានអំពីការប្រឈមមុខដាក់គ្នាដោយអាវុធ។កិច្ចប្រជុំកំពូលរវាងមេដឹកនាំកូរ៉េខាងជើងលោក Kim Jong Un និងលោក Trump នៅក្នុងប្រទេសវៀតណាម ក្នុងឆ្នាំ២០១៩ បានដួលរលំ ជុំវិញការដាក់ទណ្ឌកម្ម ។

បណ្ដាញសង្គម

ព័ត៌មានថ្មីៗ

សំណុំផ្សែងហុយលើអាកាស ក្រោយអគ្គិភ័យឆាបឆេះផ្សារទំនើបជនជាតិជ្វីហ្វនៅអង់គ្លេស
05/27/2026 06:05 PM
Facebook Telegram Linkin
មេដឹកនាំវ៉េណេស៊ុយអេឡាប្រកាសរៀបចំរដ្ឋាភិបាលឡើងវិញ
05/27/2026 06:05 PM
Facebook Telegram Linkin
ប្រមុខការទូតរុស្ស៊ីព្រមានអំពីហានិភ័យនៃសង្គ្រាមកាន់តែខ្លាំងឡើងរវាងមហាអំណាចនុយក្លេអ៊ែរ
05/27/2026 06:05 PM
Facebook Telegram Linkin
BREAKING NEWS | មនុស្ស ៥នាក់ ក្នុងចំណោម ៧នាក់ដែលជាប់ក្នុងរូងភ្នំ នៅ​ឡាវ ត្រូវបានរកឃើញនៅមានជីវិត
05/27/2026 06:05 PM
Facebook Telegram Linkin
ប្រជាជនមូស្លីមនៅទូទាំងអឺរ៉ុប ប្រារព្ធពិធីបុណ្យ Eid al-Adha ដោយ​ការអធិដ្ឋាន​
05/27/2026 05:05 PM
Facebook Telegram Linkin
អង្គការ OPCW៖ អាវុធគីមីដែលមិនបានប្រកាស ត្រូវបានរកឃើញនៅក្នុងប្រទេសស៊ីរី
05/27/2026 05:05 PM
Facebook Telegram Linkin
មន្ត្រីឆ្មាំបដិវត្តន៍អ៊ីរ៉ង់និយាយថា លទ្ធភាពនៃការបន្តសង្គ្រាមជាមួយអាមេរិក ទំនងជាមិនកើតឡើងទេ
05/27/2026 05:05 PM
Facebook Telegram Linkin
ប្រមុខការទូតកម្ពុជា និងថៃ ជួបគ្នាពិភាក្សាទ្វេភាគីផ្តោតយ៉ាងសំខាន់លើវិធានការកសាងទំនុកចិត្តឡើងវិញ បន្ធូរបន្ថយភាពតានតឹងតាមព្រំដែន និងបន្តអនុវត្តយន្តការទ្វេភាគីក្នុងឱកាសចូលរួមកិច្ចប្រជុំបើកចំហកម្រិតខ្ពស់ UNSC
05/27/2026 05:05 PM
Facebook Telegram Linkin
សមាជិកសភា៖ ឥណ្ឌានឹងមិនឈប់នាំចូលអាវុធពីរុស្ស៊ីទេ
05/27/2026 05:05 PM
Facebook Telegram Linkin
វ៉េណេស៊ុយអេឡាដោះលែងមន្ត្រីយោធាដែលត្រូវចោទប្រកាន់ពីបទរៀបចំផែនការរដ្ឋប្រហារផ្តួលរំលំលោក ម៉ាឌូរ៉ូ
05/27/2026 05:05 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.