នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ក្រុមហ៊ុន TH Automotive Manufacturing Co., Ltd​ នឹង​សម្ពោធជាផ្លូវការ​ រោងចក្រផ្គុំ និងដំឡើងរថយន្តរបស់ខ្លួន​នៅកម្ពុជា​ ក្នុងឆ្នាំ២០២៦នេះ
ប្រធានគណៈកម្មាធិការគណបក្សខេត្តតាកែវ ណែនាំសមាជិកមូលដ្ឋានឱ្យយកចិត្ត​ទុកដាក់​បម្រើ​ពលរដ្ឋ
សម្ដេចតេជោ ណែនាំឱ្យដាក់បេក្ខភាពស្រ្ដីជាប់ឆ្នោតយ៉ាងតិចមួយឃុំមួយរូប និងមានស្ត្រីធ្វើស្មៀនឃុំ
សម្ដេចតេជោស្នើស្ថាប័នពាក់ព័ន្ធចាត់វិធានការភ្លាមៗចំពោះអ្នកប្រព្រឹត្តទង្វើអសីលធម៌លើបណ្ដាញសង្គម

នយោបាយ​ និង ការអភិវឌ្ឍន៍

សម្តេចតេជោ ហ៊ុន​​​ សែន​​ សូមអនុមោទនា ថ្ងៃបុណ្យវិសាខបូជា

2023/05/04 02:50:29 pm        567
Facebook Telegram Linkin
ភ្នំពេញ៖ សម្តេចតេជោ ហ៊ុន​​​ សែន​​ នាយករដ្ឋមន្ត្រី នៅព្រឹកថ្ងៃទី០៤​ ខែឧសភា ឆ្នាំ២០២៣នេះ​ សូមអនុមោទនា ថ្ងៃបុណ្យវិសាខបូជា នៅថ្ងៃ១៥កើត ខែពិសាខ។សម្តេចតេជោ​ ហ៊ុន សែន តាមរយៈFacebookផ្លូវការ​នៅព្រឹកថ្ងៃទី០៤​ ខែឧសភានេះបានបញ្ជាក់ថា មិនថាតែនៅកម្ពុជាទេគឺនៅថ្ងៃនេះពុទ្ធសាសនិកជនទូទាំងពិភពលោក ក៏បាននាំគ្នាប្រារព្ធពិធីបុណ្យសាសនា ដ៏សំខាន់ខាងលើនេះផងដែរ។បុណ្យវិសាខបូជា គឺជាពិធីបុណ្យសាសនាដ៏សំខាន់បំផុត ក្នុងចំណោមបុណ្យសាសនាដទៃៗទៀត ពីព្រោះពិធីបុណ្យនេះ គឺបានបង្ហាញនូវការគោរពរំឭកនឹកដល់ព្រឹត្តិការណ៍ធំៗបី នៃសម័យកាលរបស់ព្រះសម្មា សម្ពុទ្ធសមណគោតម គឺថ្ងៃដែលព្រះអង្គទ្រង់បានប្រសូត បានត្រាស់ដឹង និងជាថ្ងៃចូលបរិនិព្វានផងដែរ។ព្រឹត្តិការណ៍ទាំងបីនេះគឺកើតឡើងចំថ្ងៃ ១៥កើត ខែពេញបូណ៌មី ដែលមានព្រះច័ន្ទពេញវង់ ក្នុងខែពិសាខដូចគ្នាខុសតែឆ្នាំតែប៉ុណ្ណោះ។ នៅថ្ងៃទី១៥ ខែធ្នូ ឆ្នាំ១៩៩៩ អង្គការសហប្រជាជាតិ (UN) ក៏បានប្រកាសទទួលស្គាល់«វិសាខបូជា»ជាពិធីបុណ្យសាសនាអន្តរជាតិដែលបុគ្គលិកធ្វើការ និងសាធារណៈជនអាចប្រារព្ធធ្វើបាននៅទូទាំងពិភពលោកទៀតផង។សម្តេចតេជោ​ ហ៊ុន​ សែន សូមជូនពរបងប្អូនជនរួមជាតិ ព្រមទាំងពុទ្ធបរិស័ទទូទាំងប្រទេស ជួបតែសេចក្តីសុខចម្រើន និងពុទ្ធពរ៥ប្រការគឺ អាយុ វណ្ណៈ សុខៈ ពលៈ និងបដិភាណៈ កុំបីឃ្លៀងឃ្លាតឡើយ៕

សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ព្រមទាំងក្រុមគ្រួសារប្រារព្ធពិធីបុណ្យទក្ខិណានុប្បទានគម្រប់ខួប៣ឆ្នាំ ឧទ្ទិសមហាកុសលជូនដួងវិញ្ញាណក្ខន្ធអ្នកឧកញ៉ាព្រឹទ្ធមហាឧបាសិកាធម្មញ្ញាណវិវឌ្ឍនា ប៊ុន ស៊ាងលី និងមហាឧបាសក លីន គ្រី

2023/05/04 02:35:12 pm        651
Facebook Telegram Linkin
ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រី និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងក្រុមគ្រួសារប្រារព្ធពិធីបុណ្យទក្ខិណានុប្បទានគម្រប់ខួប៣ឆ្នាំ ឧទ្ទិសមហាកុសលជូនដួងវិញ្ញាណក្ខន្ធអ្នកឧកញ៉ាព្រឹទ្ធមហាឧបាសិកាធម្មញ្ញាណវិវឌ្ឍនា ប៊ុន ស៊ាងលី និងមហាឧបាសក លីន គ្រី។ពិធីសាសនានេះ ប្រារព្ធធ្វើឡើងនៅ ថ្ងៃ ទី៣និងទី៤ ខែឧសភា ឆ្នាំ២០២៣ នៅ វត្តមុនីសុវណ្ណ ហៅវត្តចំពុះក្អែក ស្ថិតក្នុងសង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ។ សូមជម្រាបជូនថា អ្នកឧកញ៉ាព្រឹទ្ធមហាឧបាសិកាធម្មញ្ញាណវិវឌ្ឍនា ប៊ុន ស៊ាងលី បានទទួលអនិច្ចធម្មនៅថ្ងៃទី៤ ខែឧសភា ឆ្នាំ២០២០ ដោយជរាពាធ ក្នុងជន្មាយុ ៩៦ឆ្នាំ ។បើទោះបីរយៈកាលនៃការបាត់បង់អ្នក ម្តាយ និងជីដូនជាទីគោរពស្រឡាញ់ស្មើជីវិត ដែលបានរំលងផុតទៅ អស់រយៈកាល៣ឆ្នាំមកហើយក្តី ក៍មនោសញ្ចេតនានៃក្តីគោរពស្រឡាញ់ ពីសំណាក់កូនចៅ ចៅទួតទាំងអស់ នៅតែដក់ជាប់ក្នុងដួងចិត្ត ដោយក្តីនឹករលឹកគ្មានថ្ងៃល្ហែល្ហើយឡើយ។ការប្រារព្ធបុណ្យខួបគម្រប់៣ឆ្នាំនេះ បង្ហាញឲ្យឃើញកាន់តែច្បាស់ថែមទៀតនូវ កតញូតា និងកតវេទីតាធម៍ ដ៏ធំធេង ក្នងមនោសញ្ចេតនា នឹករលឹកដោយក្តីគោរពស្រឡាញ់ពីសំណាក់កូនចៅ ចៅទូត ដល់លោកអ្នកមានគុណ ដែលបានផ្តល់កំណើត ផ្តល់ការចិញ្ចឹមបីបាច់ ថែរក្សា រហូត ប្រែក្លាយជីវិតកូនចៅ បានយ៉ាងគាប់ប្រសើរ ក្នុងភាពថ្លៃថ្នូរខ្ពង់ខ្ពស់ ល្បីល្បាញ ទទួលបានការគោរពស្រឡាញ់ ពីប្រជាពលរដ្ឋខ្មែរគ្រប់មជ្ឈដ្ឋាននៅទូទាំងផ្ទៃប្រទេស។សូមជម្រាបជូនដែរថា ក្នុងពេលដែល ព្រឹទ្ធមហាឧបាសិកាធម្មញ្ញាណវិវឌ្ឍនានៅមានជន្មាយុ ព្រឹទ្ធមហាឧបាសិកា គឺជាពុទ្ធសានិកជនមួយរូបប្រកបដោយសទ្ធាជ្រះថ្លា ក្នុងការរួម ចំណែកទ្រទ្រង់លើកតម្កើង ទំនៀមទំលាប់ប្រពៃណីព្រះពុទ្ធសាសនា ដោយបានចូលរួមកសាងនូវសមិទ្ធផលយ៉ាងច្រើនទុកជាប្រយោជន៍ដល់វិស័យព្រះពុទ្ធសាសនា ក៍ដូចជាផលប្រយោជន៍ដល់សង្គមជាតិទាំងមូលផងដែរ។ ជាងនេះទៅទៀត ព្រឹទ្ធមហាឧបាសិកា នៅបានបរិច្ចាគធនធានយ៉ាងច្រើនផងដែរក្នុងការជួយដល់កិច្ចការមនុស្សធម៌ ក៍ដូចជាកិច្ចការសង្គមនានា តាមរយៈការកសាងសមិទ្ធផលនានាជាច្រើនទៀតក្នុងសង្គមជាតិ៕

សម្ដេចតេជោ អំពាវនាវអ្នកសារព័ត៌មានជាតិ-អន្តរជាតិ គោរពក្រមសីលធម៌វិជ្ជាជីវៈ និងខិតខំអភិវឌ្ឍន៍សមត្ថភាព

2023/05/03 05:51:36 pm        327
Facebook Telegram Linkin
ភ្នំពេញ៖ ក្នុងឱកាស «ទិវាសេរីភាពសារព័ត៌មានសកលលោក» លើកទី៣០ ថ្ងៃទី៣ ខែឧសភា ឆ្នាំ២០២៣ ក្រោមប្រធានបទ«ការកំណត់អនាគតនៃសិទ្ធិ៖ សេរីភាពនៃការបញ្ចេញមតិជាកម្លាំងចលករនៃសិទ្ធិមនុស្សដទៃទៀត» សម្ដេចតេជោ ហ៊ុន សែន នាយករដ្ឋមន្រ្ដីនៃកម្ពុជា បានអំពាវនាវដល់បងប្អូនអ្នកសាររព័ត៌មានជាតិ និងអន្តរជាតិ ដែលកំពុងបំពេញបេសកកម្មលើវិស័យព័ត៌មានទាំងនៅក្នុងព្រះរាជាណាចក្រកម្ពុជា ទាំងនៅលើសកលលោកយកចិត្តទុកដាក់អនុវត្តភារកិច្ចឱ្យបានត្រឹមត្រូវតាមក្រមសីលធម៌វិជ្ជាជីវៈ និងខិតខំអភិវឌ្ឍន៍សមត្ថភាពរបស់ខ្លួនបន្ថែមទៀតទាំងផ្នែកជំនាញបច្ចេកទេស ការផលិត និងផ្សព្វផ្សាយព័ត៌មាន។តាមរយៈសារលិខិតសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ក្នុងឱកាសទិវាសេរីភាពសារព័ត៌មានសកលលោក លើកទី៣០ ថ្ងៃទី៣ ខែឧសភា ឆ្នាំ២០២៣ សម្ដេចតេជោ ហ៊ុន សែន ក្នុងនាមរាជរដ្ឋាភិបាលកម្ពុជា និងខ្លួនសម្ដេចផ្ទាល់បានចូលរួមអបអរសាទរជាមួយបងប្អូនអ្នកសារព័ត៌មានជាតិ និងអន្តរជាតិ ក្នុងឱកាសនេះ។សម្ដេចតេជោ បានមានប្រសាសន៍ថា ទិវាសេរីភាពសារព័ត៌មានសកលលោកឆ្នាំ២០២៣នេះ បាន​លើកយកប្រធានបទស្តីពី «ការកំណត់អនាគតនៃសិទ្ធិ៖ សេរីភាពនៃការបញ្ចេញមតិជាកម្លាំង​ចលករនៃសិទ្ធិមនុស្សដទៃទៀត» ស្របពេលដែលពិភពលោកទាំងមូលកំពុងជួបប្រទះវិបត្តិ​នយោបាយ និងសេដ្ឋកិច្ចសកល បង្កឱ្យកើតមានបង្ហ ជាច្រើន ដូចជា ជម្លោះប្រដាប់អាវុធ អំពើហិង្សា ការដាក់ទណ្ឌកម្មសេដ្ឋកិច្ច ការអនុវត្តស្តង់ដាពីរនូវសិទ្ធិ សេរីភាពនៃការបញ្ចេញមតិ តាមរយៈការបិទប្រព័ន្ធផ្សព្វផ្សាយរុស្សីពីសំណាក់លោកខាងលិចដែលធ្វើឱ្យប៉ះពាល់ដល់សិទ្ធិមនុស្ស វិសមភាពប្រតិបត្តិការពាណិជ្ជកម្មសកល សេរីភាពនៃការបញ្ចេញមតិ ការធ្វើចំណាកស្រុក និង​បញ្ហាប្រឈមជាច្រើនទៀតរបស់ប្រជាជននៅទូទាំងសកលលោក។សម្ដេចតេជោ ថ្លែងថា ការរីកសាយភាយនព័ត៌មានមិនពិត និងព័ត៌មានក្លែងក្លាយដែលធ្វើប៉ះពាល់​ដល់កិត្តិយស ​និងសិទ្ធិបុគ្គលឯកជន ​លិទ្ធិប្រជាធិបតេយ្យ ​ដែលទាមទារឱ្យស្ថាប័នអន្តរជាតិ ស្ថាប័នរដ្ឋ ​ស្ថាប័នសារព័ត៌មាន អ្នកសារព័ត៌មាន និងដៃគូពាក់ព័ន្ធទាំងអស់ស្វែងរកដំណោះ​ស្រាយរួមគ្ន ដើម្បីធានាបាននូវសេរីភាព សារព័ត៌មាន និងសេរីភាពនៃការបញ្ចេញមតិប្រកបដោយចីរភាពសម្រាប់សកលលោកទាំងមូល។សម្ដេចតេជោ បញ្ជាក់ជូនជាថ្មីម្តងទៀតថា រាជរដ្ឋាភិបាលកម្ពុជា នៅតែបន្តការប្ដេជ្ញាចិត្ត ក្នុងការ​គាំពារសិទ្ធិ សេរីភាពនៃការបញ្ចេញមតិ សេរីភាពខាងសារព័ត៌មាន ​ស្របតាមរដ្ឋធម្មនុញ្ញ និង​ច្បាប់ស្តីពីរបបសារព័ត៌មាននៃព្រះរាជាណាចក្រកម្ពុជា តាមរយៈការប្ដេជ្ញាចិត្តនេះបានធ្វើឱ្យវិស័យ​សារព័ត៌មាននៅកម្ពុជា មានការរីកចម្រើនគួរជាទីមោទកៈដោយមធ្យោបាយ​នៃប្រព័ន្ធផ្សព្វផ្សាយកាន់តែទំនើប ​និងសម្បូរបែបដែលអាចឱ្យប្រជាពលរដ្ឋទាំងក្នុង និងក្រៅប្រទេសបានទទួលព័ត៌មានយ៉ាងទូលំទូលាយទាន់ពេលវេលា និងគ្រប់ទីកន្លែង។នៅថ្ងៃទី៥ ខែឧសភា ឆ្នាំ២០២៣ កម្ពុជានឹងរៀបចំពិធីបើកការប្រកួតកីឡាអាស៊ីអាគ្នេយ៍លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ សម្ដេចតេជោ ក៏បានអំពាវនាវដល់បងប្អូនអ្នក​សារព័ត៌មានជាតិ និងអន្តរជាតិដែលនឹងចូលរួមបំពេញការងារក្នុងព្រឹត្តិការណ៍ជាប្រវត្តិសាស្ត្រនេះ សូមគោរពតាមក្រមសីលធម៌ វិជ្ជាជីវៈ បទបញ្ជា និងបទប្បញ្ញត្តិរបស់គណៈកម្មាធិការជាតិរៀបចំការ​ប្រកួត​និងមានការទទួលខុសត្រូវខ្ពស់ក្នុងការចូលយកព័ត៌មាន ​និងផ្សព្វផ្សាយព័ត៌មាន ដោយ​រក្សាសណ្តាប់ធ្នាប់ របៀបរៀបរយនៅតាមទីលានប្រកួត និងតាមទីតាំងផ្សេងៗ ដើម្បីឱ្យការ​រៀបចំ​ការប្រកួតបានប្រព្រឹត្តិទៅដោយភាពលូន ​គ្មានការរំខានដល់ការប្រកួត និងចូលរួមផ្សព្វផ្សាយ​ឱ្យបានទូលំទូលាយនូវព្រឹត្តិការណ៍ជាប្រវត្តិសាស្ត្រនេះ ដែលរាជរដ្ឋាភិបាលបានផ្ដល់​សិទ្ធិជូន​ប្រព័ន្ធផ្សព្វផ្សាយជាតិ និងអន្តរជាតិធ្វើការផ្សព្វផ្សាយ​ដោយឥតគិតថ្លៃ និងចូលទស្សនា​ព្រឹត្តិការណ៍​ពិធីបើក-បិទ និងការប្រកួតកីឡាស៊ីហ្គេម ឆ្នាំ២០២៣ ដោយឥតគិតថ្ល៕អត្ថបទ៖ វ៉ន ដារ៉ា

សហរដ្ឋអាមេរិក នឹងជួយការពារអ្នកសារព័ត៌មាននៅទូទាំងពិភពលោកតតាំងការគំរាមហំហែងផ្លូវច្បាប់

2023/05/03 04:34:44 pm        284
Facebook Telegram Linkin
អាមេរិក៖សហរដ្ឋអាមេរិក កាលពីថ្ងៃអង្គារ បានបង្កើតកម្មវិធីមួយដើម្បីការពារអ្នកសារព័ត៌មានទូទាំងពិភពលោកពីការគំរាមកំហែងផ្លូវច្បាប់ ដែលមានគោលបំណងបិទសំឡេងរិះគន់ ជាតាក់ទិកមួយមានការកើនឡើង ដែលមន្ត្រី ជាន់ខ្ពស់ផ្នែកជំនួយរបស់សហរដ្ឋអាមេរិក លោកស្រី Samantha Power បានហៅថាជា ការយកប្រព័ន្ធច្បាប់បិទសិទ្ធិគូប្រជែង។  លោកស្រី Power ប្រធានរដ្ឋបាលនៃទីភ្នាក់ងារសម្រាប់ការអភិវឌ្ឍន៍ជាអន្តរជាតិរបស់សហរដ្ឋអាមេរិក ហៅកាត់ថា(USAID) បានប្រកាសពីកម្មវិធីការពារអ្នកសារព័ត៌មាននេះ នៅព្រឹត្តិការណ៍ដើម្បីប្រារព្ធទិវាសេរីភាពអ្នកសារព័ត៌មានពិភពលោក នៅអង្គការសហប្រជាជាតិ។   លោកស្រី និយាយថា សារព័ត៌មានឯករាជ្យជាច្រើនមិនអាចគេចផុតពីពាក្យបណ្ដឹង ដើម្បីឲ្យពួកគេត្រូវទាត់ចេញពីវិជ្ជាជីវ ឬ ពួកគេព្យាយាមគ្រប់គ្រងខ្លួនឯងលើការបញ្ចេញមតិ ដើម្បីបង្វែរការទាក់ទាញចំណាប់អារម្មណ៍ចំពោះអ្នកដែលអាចយកពួកគេជាគោលដៅ។ USAID បាននិយាយថា ខ្លួនគ្រោងនឹងធ្វើការជាមួយសភា ដើម្បីផ្ដល់កញ្ចប់ថវិកា៩លានដុល្លារ សម្រាប់កម្មវិធីការពារអ្នកព័ត៌មានដែលនឹងត្រូវរៀបចំរួមគ្នា ដោយគម្រោងរាយការណ៍ឧក្រិដ្ឋកម្មនិងអំពើពុករលួយ និង មជ្ឈមណ្ឌល Cyrus R. Vance សម្រាប់យុត្តធម៌អន្តរជាតិ៕

ប្រធានរដ្ឋឡាវ នឹងមកបំពេញទស្សនកិច្ចផ្លូវរដ្ឋនៅកម្ពុជា ពីថ្ងៃទី០៤-០៦ខែឧសភា

2023/05/02 08:53:25 pm        559
Facebook Telegram Linkin
ភ្នំពេញ៖ តបតាមការយាងរបស់ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជាឯកឧត្តមបណ្ឌិត ថងលុន ស៊ីសុលីត ប្រធានរដ្ឋ នៃសាធារណរដ្ឋប្រជាធិបតេយ្យប្រជាមានិតឡាវ នឹងអញ្ជើញមកបំពេញទស្សនកិច្ចផ្លូវរដ្ឋ នៅព្រះរាជាណាចក្រកម្ពុជាពីថ្ងៃទី ០៤ដល់ទី០៦ខែឧសភា ឆ្នាំ ២០២៣។ក្នុងអំឡុងពេលទស្សនកិច្ចផ្លូវរដ្ឋនេះ ឯកឧត្តមបណ្ឌិត ថងលុន ស៊ីសុលីត នឹងចូលក្រាបបង្គំគាល់ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជានៅព្រះបរមរាជវាំង។ឯកឧត្តមបណ្ឌិត ថងលុន ស៊ីសុលីត ក៏នឹងមានជំនួបដាច់ដោយឡែកពីគ្នាជាមួយសម្តេចវិបុលសេនា​ភក្តី សាយ ឈុំ ប្រធានព្រឹទ្ធសភា និងសម្តេចអគ្គមហាពញាចក្រី ហេង សំរិន ប្រធានរដ្ឋសភា ផងដែរ ។ឯកឧត្តមបណ្ឌិត ថងលុន ស៊ីសុលីត និង សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា នឹងមានកិច្ចប្រជុំទ្វេភាគី ដើម្បីពិភាក្សា​អំពីការ​ធ្វើ​ឱ្យស៊ីជម្រៅ​បន្ថែមទៀតនូវកិច្ចសហប្រតិបត្តិការទ្វេភាគី ក៏ដូចជា​អំពីបញ្ហាតំបន់ និងអន្តរជាតិមួយ ចំនួនដែល ជាក្តីបារម្ភរួម។ឯកឧត្តមបណ្ឌិត ថងលុន ស៊ីសុលីត នឹងអញ្ជើញដាក់កម្រងផ្កាគោរពវិញ្ញាណក្ខន្ធ នៅវិមានឯករាជ្យ និងនៅមណ្ឌបព្រះបរមរូបព្រះករុណា ព្រះបាទសម្តេចព្រះនរោត្តម សីហនុ «ព្រះបរម រតនកោដ្ឋ» អតីតព្រះមហាក្សត្រនៃព្រះរាជាណាចក្រកម្ពុជា។ក្នុងឱកាសស្នាក់នៅរាជធានីភ្នំពេញ នៅថ្ងៃទី ០៥ ខែឧសភា ឆ្នាំ២០២៣ ឯកឧត្តមបណ្ឌិត ថងលុន ស៊ីសុលីត នឹងអញ្ជើញចូលរួមក្នុងពិធីបើកនៃកីឡាអាស៊ីអាគ្នេយ៍លើកទី៣២ និងកីឡាជន ពិការ អាស៊ាន លើកទី១២ នៅពហុកីឡដ្នានជាតិមរតកតេជោ ដែលកម្ពុជាជាម្ចាស់ផ្ទះរៀបចំព្រឹត្តិការណ៍ ជាប្រវត្តិសាស្ត្រនេះ ពីថ្ងៃទី ០៥ដល់ទី ១៧ ខែឧសភា ឆ្នាំ២០២៣។ដំណើរទស្សនកិច្ចផ្លូវរដ្ឋរបស់ឯកឧត្តមបណ្ឌិត ថងលុន ស៊ីសុលីត មកកាន់កម្ពុជា នឹង ពង្រឹង​បន្ថែមទៀត នូវទំនាក់ទំនងដ៏ល្អប្រពៃដែលមានស្រាប់ ភាពជាអ្នកជិតខាងល្អ ចំណង​ភាតរភាព និងភាពជាដៃគូយុទ្ធសាស្រ្តគ្រប់ជ្រុងជ្រោយ និងយូរអង្វែង ដើម្បីផលប្រយោជន៍នៃប្រជាជនទាំងពីរ៕

បម្រាមហាមចាកចេញរបស់ចិន កើនឡើងខណៈការគ្រប់គ្រងគោលនយោបាយត្រូវបានរឹតបន្តឹងក្រោមរបបដឹកនាំរបស់លោក Xi

2023/05/02 05:40:47 pm        109
Facebook Telegram Linkin
ចិន៖ ប្រទេសចិន កំពុងបង្កើនការរារាំងប្រជាជនមិនឲ្យចាកចេញពីប្រទេស រួមទាំងក្រុមនាយកប្រតិបត្តិជាជនបរទេស ជាសារដ៏ភ្ញាក់ផ្អើល ខណៈអាជ្ញាធរនិយាយថា ប្រទេសនេះបើកចំហសម្រាប់ធុរកិច្ច បន្ទាប់ពីរយៈពេល៣ឆ្នាំនៃវិធានការរឹតត្បិតជំងឺ Covid-19។យោងតាមរបាយការណ៍ថ្មីចេញដោយក្រុមសិទ្ធមនុស្ស Safeguard Defenders បានឲ្យដឹងថា ចំនួនប្រជាជនចិន និងជនបរទេសជាច្រើននាក់​ បានជាប់ខ្លួនដោយបម្រាមហាមចាកចេញ ខណៈការវិភាគសារព័ត៌មានរ៉យទ័រ បានរកឃើញការកើនឡើងជាក់ស្តែង នៃករណីតុលាការពាក់ព័ន្ធទៅនឹងបម្រាមបែបនេះក្នុងបណ្តាឆ្នាំថ្មីៗនេះ ហើយការជំរុញពាណិជ្ជកម្មបរទេស កំពុងបង្ហាញការព្រួយបារម្ភអំពីនិន្នាការនេះ។របាយការណ៍របស់អង្គការ The Safeguard Defenders បាននិយាយថា ចាប់តាំងពីលោក Xi Jinping បានឡើងកាន់អំណាចក្នុងឆ្នាំ២០១២ ប្រទេសចិន បានពង្រីកតាមទស្សនៈច្បាប់សម្រាប់បម្រាមហាមចាកចេញ និងបង្កើនការប្រើប្រាស់វិធានការទាំងនេះ ដែលពេលខ្លះនៅក្រៅហេតុផលច្បាប់។ ការយកចិត្តទុកដាក់លើបម្រាមហាមចាកចេញ កើតមានឡើងខណៈភាពតានតឹងរវាងចិន-សហរដ្ឋអាមេ រិក ជុំវិញជម្លោះពាណិជ្ជកម្ម និងសន្តិសុខ។ ភាពផ្ទុយគ្នានេះ ជាមួយសាររបស់ប្រទេសចិន ដែលថាប្រទេសកំពុងបើកចំហចំពោះការវិនិយោគ និងការធ្វើដំណើរពីបរទេស បានលេចឡើងពីភាពឯកោនៃ វិធានការទប់ស្កាត់មួយចំនួនចំពោះជំងឺ Covid-19 ដ៏តឹងតែងបំផុតរបស់ពិភពលោក។ អ្នកវិភាគសារព័ត៌មានរ៉យទ័រចំពោះកំណត់ត្រាលើបម្រាមហាមចាកចេញបានឲ្យដឹងថា ចេញពីមូលដ្ឋានទិន្នន័យតុលាការកំពូលរបស់ប្រទេសចិន បានបង្ហាញពីការកើនឡើង៨ដងក្នុងករណីជាច្រើន ដែលចែងពីបម្រាមនៅចន្លោះឆ្នាំ២០១៦ និងឆ្នាំ២០២២។ កាលពីសប្តាហ៍មុន ប្រទេសចិន បានបង្កើនច្បាប់ប្រឆាំងចារកម្ម ដែលអនុញ្ញាត្តឲ្យបម្រាមហាមចាកចេញត្រូវបានដាក់លើនណាម្នាក់ ជាជនជាតិចិន ឬបរទេស ដែលស្ថិតនៅក្រោមការស៊ើបអង្កេត៕

លោក Biden អំពាវនាវឲ្យមានជំនួបនៅសេតវិមាន ខណៈសហរដ្ឋអាមេរិកនឹងអស់សាច់ប្រាក់សុទ្ធនៅថ្ងៃទី១ខែមិថុនា

2023/05/02 05:29:02 pm        52
Facebook Telegram Linkin
អាមេរិក៖ ក្រសួងរតនាគារសហរដ្ឋអាមេរិកបានព្រមានថា ខ្លួនអាចនឹងអស់សាច់ប្រាក់ក្នុងពេលឆាប់ៗនេះ ដើម្បីទូទាត់ការចំណាយរបស់រដ្ឋាភិបាលទាំងអស់ ដោយគ្មានការដំឡើងកម្រិតបំណុល ដែលជំរុញឲ្យប្រធានាធិបតី Joe Biden កោះអញ្ជើញមេដឹកនាំសភាជាន់ខ្ពស់ទាំង៤រូបទៅកាន់សេតវិមាន ដើម្បីព្យាយាមបញ្ចៀសវិបត្តិសារពើពន្ធ។   បុគ្គលម្នាក់ដែលបានដឹងផែនការនេះ បានប្រាប់សារព័ត៌មាន Reuters ថា លោក Biden បានហៅទូរស័ព្ទទៅកាន់ប្រធានសភាសហរដ្ឋអាមេរិក មកពីគណបក្សសាធារណរដ្ឋ លោក Kevin McCarthy នៅក្នុងទីក្រុងហ្ស៊េរ៉ុយសាឡឹម ព្រមទាំងមេដឹកនាំសភាមកពីគណបក្សប្រជាធិបតេយ្យ លោក Hakeem Jeffries មេដឹកនាំព្រឹទ្ធសភាសំឡេងភាគច្រើន លោក Chuck Schumer និងមេដឹកនាំគណបក្សសាធារណរដ្ឋ លោក Mitch McConnell និងបានអញ្ជើញពួកគេឲ្យចូលរួមកិច្ចប្រជុំនៅថ្ងៃទី៩ខែមិថុនាដើម្បីពិភាក្សាពីប្រាក់កម្ចី និងការចំណាយរបស់សហព័ន្ធ។ រដ្ឋមន្ត្រីក្រសួងរតនាគារសហរដ្ឋអាមេរិក លោកស្រី Janet Yellen បាននិយាយក្នុងលិខិតមួយផ្ញើទៅកាន់សភា ថាទីភ្នាក់ងារនេះទំនងជាមិនអាចបំពេញតាមតម្រូវការការចំណាយជាកាតព្វកិច្ចទាំងអស់របស់រដ្ឋាភិបាលអាមេរិក នៅត្រឹមដើមខែមិថុនា និងឲ្យបានឆាប់នៅថ្ងៃទី១ខែមិថុនាដោយគ្មានចំណាត់ការពីសភា បានទេ។    បន្ទាប់ពីបានឈានដល់កម្រិតនៃការខ្ចីប្រាក់ដល់ ៤៧.៤ សែនកោដិដុល្លារកាលពីថ្ងៃទី ១៩ ខែមករា លោកស្រី Yellen ធ្លាប់បានប្រាប់រតនាគារសភាថានឹងបន្តការទូទាត់លើប្រាក់បំណុល និងអត្ថប្រយោជន៍សហព័ន្ធ និងការចំណាយផ្សេងទៀតដោយប្រើបង្កាន់ដៃសាច់ប្រាក់សុទ្ធ និងវិធានការគ្រប់គ្រងសាច់ប្រាក់ខុសពីធម្មតា៕

UN៖ ជម្លោះនៅស៊ូដង់ អាចជម្រុញឲ្យប្រជាជន៨សែននាក់ភៀសខ្លួន

2023/05/02 05:24:17 pm        59
Facebook Telegram Linkin
ស៊ូដង់៖ វីដេអូថតដោយយានដ្រូន ទទួលបានដោយសារព័ត៌មានរ៉យទ័រ បានបង្ហាញផ្សែងខ្មួលខ្មាញ់ហុយឡើងនៅលើរដ្ឋធានី Khartoum ប្រទេសស៊ូដង់កាលពីថ្ងៃចន្ទ បន្ទាប់ពីការវាយប្រហារតាមអាកាស និងការវាយប្រហារដោយកាំភ្លើងធំ។កាលពីថ្ងៃចន្ទអង្គការសហប្រជាជាតិ បានព្រមានថា ជម្លោះនៅក្នុងប្រទេសដែលមានប្រជាជនច្រើនបំផុតទី៣នៅទ្វីបអាហ្វ្រិក អាចបង្ខំឲ្យប្រជាជន៨សែននាក់រត់ភៀសខ្លួនចូលទៅកាន់ប្រទេសជិតខាង។ អ្នកសម្របសម្រួលមនុស្សធម៌អង្គការសហប្រជាជាតិរបស់ប្រទេសស៊ូដង់ លោក Abdou Dieng បានព្រមានអំពីការបំផ្លាញទាំងស្រុង៕ ដូចអ្នកដឹងហើយ វាមានរយៈពេលជាង២សប្តាហ៍នៃការប្រយុទ្ធគ្នាដ៏មហន្តរាយនៅក្នុងប្រទេសស៊ូដង់ ជាជម្លោះដែលកំពុងតែប្រែក្លាយវិបត្តិមនុស្សធម៌នៅស៊ូដង់ទៅជាការបំផ្លាញទាំងស្រុង។ មនុស្សរាប់រយនាក់បានស្លាប់ និងរាប់ពាន់នាក់រងរបួស ក្នុងការប្រយុទ្ធគ្នា ដែលបានផ្ទុះឡើងរវាងកងទ័ពជាតិស៊ូដង់ និងកងកម្លាំងគាំទ្ររហ័សយោធាប៉ារ៉ា ឬ RSF កាលពីពាក់កណ្តាលខែមេសា។ រដ្ឋាភិបាលបរទេស បានមកជម្លៀសប្រជាជនរបស់ខ្លួនជាង១សប្តាហ៍កន្លងទៅនេះ ក្នុងប្រតិបត្តិការតាមផ្លូវអាកាស តាមសមុទ្រ និងតាមដីគោកជាបន្តបន្ទាប់។ជនស៊ីវិលស៊ូ  ដង់រាប់សែននាក់បានភៀសខ្លួនចូលទៅកាន់ប្រទេសជិតខាង ដែលកំពុងបង្កើនក្តីបារម្ភពីវិបត្តិដែលអាចធ្វើឲ្យមានអស្ថិរភាពធ្ងន់ធ្ងរ។ ជនស៊ីវិលបន្តភៀសខ្លួនពីការប្រយុទ្ធ ហើយភាគច្រើនក្នុងចំណោមអ្នកភៀសខ្លួន បានស្វែងរកទីជម្រកក្នុងតំបន់នានារបស់ប្រទេសនេះក្នុងតំបន់មិនបានទទួលរងផលប៉ះពាល់ច្រើនដោយជម្លោះ។ ផលប៉ះពាល់រាលដាលក្នុងតំបន់ចំពោះវិបត្តិនេះគឺជាក្តីបារម្ភធ្ងន់ធ្ងរ។មេបញ្ជាការកងទ័ពស៊ូដង់ និងប្រមុខកងកម្លាំងគាំទ្ររហ័ស(RSF) បានគ្រប់គ្រងរដ្ឋាភិបាលរួមគ្នា បន្ទាប់ពីរដ្ឋប្រហារឆ្នាំ២០២១ ប៉ុន្តែបានកើតមានជម្លោះការផ្លាស់ប្តូរទៅរកការគ្រប់គ្រងបែបស៊ីវិលតាមផែនការ។ កាលពីថ្ងៃអាទិត្យ ភាគីទាំងពីរ បានព្រមព្រៀង បន្ថែមពេលបទឈប់បាញ់រយៈពេល៧២ម៉ោង ហើយអង្គការសហប្រជាជាតិបានប្រាប់សារព័ត៌មានរ៉យទ័រថា ពួកគេអាចផ្អាកការចរចាបទឈប់បាញ់ នៅក្នុងប្រទេសអារ៉ាប៊ីសាអូឌីត។ ប៉ុន្តែបទឈប់បាញ់នោះ អាចត្រូវបានរំខានដោយការបាញ់កាំភ្លើង និងកាំភ្លើងធំ៕

សម្តេចតេជោ ហ៊ុន សែន៖ ព្រះពុទ្ធសាសនាគឺជាមូលដ្ឋានសម្រាប់ការកសាងសន្តិភាព

2023/05/02 04:39:32 pm        184
Facebook Telegram Linkin
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានមានប្រសាសន៍ថា ព្រះពុទ្ធសាសនាគឺជាមូលដ្ឋាន សម្រាប់ការកសាងសន្តិភាព។សម្តេចតេជោប្រមុខរាជរដ្ឋាភិបាល មានប្រសាសន៍បែបនេះ ខណៈ​សម្ដេចអញ្ជើញ​ទទួល​គោរមងារកិត្តិយស «ពុទ្ធមាមកាភិបាល» របស់អង្គការពុទ្ធសាសនិកពិភពលោក​និង«បណ្ឌិតកិត្តិយស ផ្នែកមនុស្សសាស្ត្រពីសាកលវិទ្យាល័យជាតិ ណេហ្គរី ប៉ាដាង ដែលប្រារព្ធ​ធ្វើឡើង​នៅរមណីដ្ឋានវត្តភ្នំ នាព្រឹកថ្ងៃទី២ ខែឧសភានេះ។សម្តេច បានគូសបញ្ជាក់ថា សម្ដេចមានមោទនភាពក្នុងការនិយាយថា​ព្រះពុទ្ធសាសនាគឺជា​មូលដ្ឋាន​សម្រាប់ការកសាងសន្តិភាព ការបង្រួបបង្រួមជាតិការកសាងជាតិឡើងវិញ ក្រោយ​ជម្លោះក៏ដូចជាការចូលរួមស្ថាបនារបស់យើងក្នុងកិច្ចខិតខំប្រឹងប្រែងមនុស្សធម៌និងការកសាងសន្តិភាពតំបន់និងពិភពលោក។ផ្អែកលើមូលដ្ឋាននេះសម្ដេចតេជោ ហ៊ុន សែន បានសម្ដែងនូវការគាំទ្រអស់ពីចិត្ត ចំពោះបេសកកម្ម និងចក្ខុវិស័យរបស់អង្គការព្រះពុទ្ធសាសនិកពិភពលោកក្នុងការលើកកម្ពស់ការផ្សាយអន្តរជំនឿ​បន្ថែមទៀត ដើម្បីបម្រើផលប្រយោជន៍របស់មនុស្សជាតិ និងភពផែនដីរបស់យើង៕

សម្ដេចតេជោ ហ៊ុន សែន អញ្ជើញទទួលគោរមងារកិត្តិយស «ពុទ្ធមាមកាភិបាល» របស់អង្គការពុទ្ធសាសនិកពិភពលោក និង«បណ្ឌិតកិត្តិយស ផ្នែកមនុស្សសាស្ត្រពីសាកលវិទ្យាល័យជាតិ ណេហ្គរី ប៉ាដាង

2023/05/02 02:39:41 pm        354
Facebook Telegram Linkin
ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញក្នុងពិធីប្រកាស និងប្រគល់ជូនគោរមងារកិត្តិយស«ពុទ្ធមាមកាភិបាល» របស់អង្គការពុទ្ធសាសនិកពិភពលោក និង «បណ្ឌិតកិត្តិយស ផ្នែកមនុស្សសាស្ត្រ ដោយសាកលវិទ្យាល័យជាតិ ណេហ្គរី ប៉ាដាង ជូនសម្តេច និងគោរមងារកិត្តិយស «ទីប្រឹក្សាជាន់ខ្ពស់» របស់អង្គការពុទ្ធសាសនិកពិភពលោកជូនឯកឧត្តមនាយឧត្តមសេនីយ៍បណ្ឌិត ហ៊ុន ម៉ាណែត អគ្គមេបញ្ជាការរងកងយោធពលខេមរភូមិន្ទ មេបញ្ជាការកងទ័ពជើងគោក និងជាប្រធានគ្រូពេទ្យស្ម័គ្រចិត្តយុវជនសម្តេចតេជោ (TYDA) នៅព្រឹកថ្ងៃទី០២ ខែឧសភា ឆ្នាំ២០២៣។ពិធីនេះត្រូវប្រារព្ធធ្វើឡើងនៅរមណីដ្ឋានវប្បធម៌ ប្រវត្តិសាស្ត្រវត្តភ្នំ បរិវេណរូបសំណាកលោកយាយពេញ សង្កាត់វត្តភ្នំ ខណ្ឌដូនពេញ រាជធានីភ្នំពេញ។កត្តាសំខាន់ចំនួន៥នៃការផ្ដល់សញ្ញាបត្រ «បណ្ឌិតកិត្តិយស ផ្នែកមនុស្សសាស្ត្រ» ពីសាកលវិទ្យាល័យជាតិ ណេហ្គរី ប៉ាដាង ដល់សម្ដេចតេជោ ហ៊ុន សែន ។ តាមរយៈសុន្ទរកថារបស់តំណាងសាកលវិទ្យាល័យជាតិ ណេហ្គរី ប៉ាដាង នាព្រឹកថ្ងៃទី២ ខែឧសភានេះ បានឱ្យដឹងថា ការសម្រេចរបស់ក្រុមប្រឹក្សាភិបាលក្នុងការផ្ដល់សញ្ញាបត្របណ្ឌិតជូនសម្ដេចតេជោ ហ៊ុន សែន របស់ក្រុមប្រឹក្សាភិបាលបណ្ឌិត្យសភាសិក្សានៃសាកលវិទ្យាល័យជាតិ ណេហ្គរី ប៉ាដាង តាមរយៈសម័យប្រជុំពេញអង្គលើរបៀបវារៈមួយចំនួនដោយពិចារណាទៅលើការប្រគល់សញ្ញាបត្របណ្ឌិតកិត្តិយស «បណ្ឌិតកិត្តិយស ផ្នែកមនុស្សសាស្ត្រ» ជូនសម្ដេចតេជោ ហ៊ុន សែន នាយករដ្ឋមន្រ្ដីនៃព្រះរាជាណាចក្រកម្ពុជា ដោយផ្អែកទៅលើហេតុផលដូចខាងក្រោម៖ទី១ សម្ដេចតេជោ ហ៊ុន សែន បានលះបង់មួយជីវិតដើម្បីរំដោះប្រជាជនកម្ពុជាចេញពីយុគងងឹត ក្នុងអំឡុង ឆ្នាំ១៩១៥-១៩៧៩ និងសម្រេចបាននូវការកសាងសន្ដិភាព និងការបង្រួបបង្រួមជាតិ ធានាបាននូវការរីកចម្រើន ការផ្លាស់ប្ដូរជាវិជ្ជមាន និងការអភិវឌ្ឍជាបន្តបន្ទាប់នៅកម្ពុជា ធ្វើឱ្យកម្ពុជាមានមុខមាត់នៅលើឆាកអន្តរជាតិ។ អ្វីដែលសំខាន់ដូចគ្នានេះដែរ គឺសម្ដេចបានស្ដារឡើងវិញនូវរបបរាជានិយមនៅក្នុងប្រទេសកម្ពុជាប្រកបដោយជោគជ័យ និងការរស់ឡើងវិញនៃព្រះពុទ្ធសាសនា រួមជាមួយនឹងការដាក់ចេញ និងការអនុវត្តដោយជោគជ័យនូវកម្មវិធីកសាងជាតិដ៏មមាញឹកដូចជាការស្ដារ និងការស្ដារប្រទេសឡើងវិញក្រោយជម្លោះ និងការធ្វើសមាហរណកម្មប្រទេសជាងិទៅក្នុងពហុភាគី និងតំបន់ និងពិភពលោក ដែលធ្វើឱ្យប្រជាពលរដ្ឋមានសេរីភាពឡើងវិញ និងបានលើកតម្លៃប្រជាធិបតេយ្យឱ្យរីកចម្រើនរហូតមកដល់ពេលបច្ចុប្បន្ននេះ។ គោលនយោបាយឈ្នះ  ឈ្នះ របស់សម្ដេច ពិតជាមានឥទ្ធិពលជាវិជ្ជមាន និងបានផ្ដល់ជាមេរៀន នៃភាពជាអ្នកដឹកនាំក្នុងការកសាងសន្ដិភាព។ ទី២ ក្នុងការដឹកនាំសម្ដេចបានពង្រឹងអភិបាលកិច្ច តាមរយៈកំណែទម្រង់ដែលនាំមកនូវផ្លែផ្កាជាច្រើន ហើយសម្ដេចបានផ្ដល់កម្លាំងរុញច្រានជាថ្មីដល់ការអភិវឌ្ឍលទ្ធិប្រជាធិបតេយ្យ ការកសាងនីតិរដ្ឋ។ ផ្ដល់យុត្តិធម៌ រដ្ឋាភិបាលដែលផ្ដោតទៅលើតម្លៃសង្គម និងសេដ្ឋកិច្ច និងការផ្ដល់ឱកាសស្នើៗគ្នាជូនដល់ប្រជាជនកម្ពុជារួមទាំងប្រជាជនកម្ពុជានៅក្រៅប្រទេសផងដែរ។ អ្វីដែលគួរឱ្យកត់សម្គាល់នោះគឺសម្ដេចបានបង្ហាញឱ្យឃើញថា សន្ដិភាពអាចសម្រេចបានតាមរយៈមធ្យោបាយសន្ដិវិធី ដូចជាការចរចា ប្រកបដោយភាពបើកចំហរ បរិយាបន្ន និងឈ្នះ ឈ្នះ និងតាមយៈការស្វែងយល់ឱ្យច្បាស់អំពីបញ្ហាជាតិ និងរកដំណោះស្រាយឱ្យបានសមស្រប។ ជាលទ្ធផលប្រទេសកម្ពុជាមិនត្រឹមតែត្រូវបានគេស្គាល់ថា ជាកោះសន្តិភាពក្នុងតំបន់ទន្លេមេគង្គប៉ុណ្ណោះទេ ប៉ុន្ដែថែមទាំងត្រូវបានត្រូវបានដាក់ឈ្មោះថា «ប្រទេសតូចប៉ុន្ដែមានបេះដូងទូលាយ» ផងដែរ។ ទី៣ សម្ដេចតេជោ ហ៊ុន សែន បានរួមចំណែកយ៉ាងសំខាន់ ក្នុងវិស័យមនុស្សធម៌ និងសាមគ្គីភាព ពោលគឺការយកចិត្តទុកដាក់ខ្លាំងលើជនជាតិភាគតិចនៅកម្ពុជា, ការលើកកម្ពស់ភាពអត់ឱនសាសនា និងគោលនយោបាយស្ដីពីសេរីភាពសាសនា។ទី៤ យោងតាមនីតិវិធីរដ្ឋបាល និងប្រពន្ធសិក្សាអប់រំ សម្ដេចតេជោ ហ៊ុន សែន បានបំពេញលក្ខណ្ឌដូចនៅចែងបទបញ្ញត្ដិរបស់ក្រសួងកិច្ចការស្រាវជ្រាវ បច្ចេកវិទ្យា និងឧត្តមសិក្សាលេខ៦៥ ឆ្នាំ២០១៦ ស្ដីពីសញ្ញាបត្របណ្ឌិតកិត្តិយស និងបទបញ្ញត្តិរបស់សាកលវិទ្យាធិការ នៃសាកលវិទ្យាល័យជាតិ ណេហ្គរី ប៉ាដាងលេខ ០៣ ឆ្នាំ២០១៧ ស្ដីពីនីតិវិធីនៃការផ្ដល់សញ្ញាបត្របណ្ឌិតកិត្តិយសនៃសាកលវិទ្យាល័យជាតិនៃណេហ្គរី ប៉ាដាង។ ទី៥ ការសម្ដេចផ្ដល់សញ្ញាបត្រកិត្តយនេះនឹងត្រូវប្រគល់ជូនសម្ដេចតេជោ ហ៊ុន សែន ដោយផ្ទាល់ ហើយនឹងត្រូវប្រកាសជូនសាធារណៈជនជាតិ និងអន្តរជាតិ។ លើសពីនេះទៀត ពិធីផ្ដល់សញ្ញាបត្របណ្ឌិតកិត្តិយសនេះនឹងត្រូវរៀបចំជាផ្លូវការនៅសាកលវិទ្យាល័យជាតិ ណេហ្គរី ប៉ាដាង ប្រទេសឥណ្ឌូណេស៊ីនាពេលអនាគតដ៏ខ្លីក្នុងឆ្នាំនេះ ដែលនឹងមានការចូលរួមជាសាក្ស៊ីពីមនុស្សប្រមាណ ៣ ០០០ នាក់ និងតំណាងថ្នាក់ដឹកនាំសាកលវិទ្យាល័យរដ្ឋនានានៅទូទាំងប្រទេសឥណ្ឌូណេស៊ីផងដែរ៕

បណ្ដាញសង្គម

ព័ត៌មានថ្មីៗ

មេដឹកនាំ EU បង្ហាញ​ការគាំទ្រ ចំពោះ ICC បន្ទាប់ពីមាន​ទណ្ឌកម្មថ្មីរបស់សហរដ្ឋអាមេរិក
08/19/2026 08:08 PM
Facebook Telegram Linkin
ណាតូបញ្ជាក់​ថា បាន​ត្រៀមសម្រាប់ការវាយប្រហារអាចកើតមានដោយអ៊ីរ៉ង់ លើគោលដៅយោធាអាមេរិក នៅអឺរ៉ុប
08/19/2026 08:08 PM
Facebook Telegram Linkin
មនុស្ស ៧នាក់ រួមទាំងអ្នកទេសចរ ៦នាក់ ស្លាប់នៅក្នុងគ្រោះថ្នាក់ធ្លាក់​ឧទ្ធម្ភាគចក្រ នៅកេនយ៉ា
08/19/2026 08:08 PM
Facebook Telegram Linkin
របាយការណ៍៖ អ៊ីរ៉ង់ពិចារណាវាយប្រហារគោលដៅយោធាអាមេរិក នៅអឺរ៉ុប បើលោក Trump បង្កើនជម្លោះ​
08/19/2026 08:08 PM
Facebook Telegram Linkin
អធិការបតី​អាល្លឺម៉ង់ ថ្កោលទោសការអំពាវនាវរបស់​​រដ្ឋមន្ត្រីអ៊ីស្រាអែល ឲ្យសម្លាប់មនុស្សរាល់ថ្ងៃ នៅតំបន់​ហ្កាហ្សា
08/19/2026 08:08 PM
Facebook Telegram Linkin
ក្រសួងមហាផ្ទៃផ្សព្វផ្សាយប្រកាសចំនួន៣ ស្តីពីការកំណត់ចំនួនមុខតំណែងរងក្នុងរចនាសម្ព័ន្ធអង្គភាពនគរបាលជាតិ និងពន្ធនាគារ
08/19/2026 07:08 PM
Facebook Telegram Linkin
ឯកឧត្តមកិត្តិសេដ្ឋាបណ្ឌិត ជាម យៀប ទទួលជួបសម្តែងការគួរសមជាមួយ ឯកអគ្គរដ្ឋទូតសិង្ហបុរីថ្មី ដើម្បីពង្រឹងកិច្ចសហប្រតិបត្តិការទ្វេភាគី
08/19/2026 07:08 PM
Facebook Telegram Linkin
ក្រសួងបរិស្ថាននៅក្នុងខែកក្កដាឆ្នាំ២០២៦ បន្តសហការជាមួយដៃគូពាក់ព័ន្ធ ចុះពិនិត្យនិងបង្រ្កាបបទល្មើសនៅតាមតំបន់ការពារធម្មជាតិ ដើម្បីបង្កើនភាពបៃតង ធានានិរន្តរភាពបរិស្ថាន និងលើកកម្ពស់ជីវភាពសហគមន៍មូលដ្ឋាន
08/19/2026 07:08 PM
Facebook Telegram Linkin
ក្រសួងអភិវឌ្ឍន៍ជនបទ ចាត់ទុកការស្ថាបនា និងការថែទំាផ្លូវ ជារឿងដ៏ចាំបាច់សម្រាប់ការរស់នៅក្នុងសង្គម
08/19/2026 07:08 PM
Facebook Telegram Linkin
រដ្ឋមន្ត្រីការបរទេសចិន ទៅដល់​​កូរ៉េខាងត្បូង ស្របពេល​លោក Trump ជំរុញការទូតជាមួយ​កូរ៉េខាងជើងឡើង​វិញ​
08/19/2026 07:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.