នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
កម្មករនិយោជិតអរគុណរដ្ឋាភិបាលដែលលើកកម្ពស់បរិយាកាសនៅកន្លែងការងារកាន់តែល្អប្រសើរ
វិស័យឯកជន សាទរចំពោះរដ្ឋាភិបាលសម្រេចមិនយកកម្រៃស្កេនទូកុងតឺដឹកទំនិញ ចាប់អនុវត្តនៅថ្ងៃទី១ឧសភានេះ
កម្ពុជាកំពុងមានសន្ទុះកើនឡើងជាលំដាប់ក្របខណ្ឌ នៃការអភិវឌ្ឍវិស័យដឹកជញ្ជូន តាមផ្លូវទឹក និងកំពង់ផែ
នៅត្រីមាសទី១ ឆ្នាំនេះកម្ពុជានាំចេញផលិតផលសម្លៀកបំពាក់ ស្បែកជើង និងសម្ភារៈធ្វើដំណើរ មាន​ទឹកប្រាក់ជាង ៣.៨០០ លានដុល្លារ

សេដ្ឋកិច្ច និង កសិកម្ម

អូស្ត្រាលី ជួយកម្ពុជា បង្កើតសួនកសិ-ឧស្សាហកម្ម ដើម្បីរួមចំណែកការកែច្នៃកសិផល

2023/05/04 12:20:46 pm        625
Facebook Telegram Linkin
ភ្នំពេញ៖ រដ្ឋាភិបាលអូស្រ្តាលី កំពុងជួយកម្ពុជា ក្នុងការបង្កើតសួនកសិ-ឧស្សាហកម្ម ដើម្បីចូលរួមចំណែក លើកកម្ពស់ការកែច្នៃកសិផលផ្ទាល់ខ្លួន បង្កើនការប្រកួតប្រជែង សម្រាប់ទីផ្សារទាំងក្នុងស្រុក និងនាំចេញ។ស្ថានទូតអូស្រ្តាលី ប្រចាំនៅកម្ពុជា លើកឡើងថា ដើម្បីបង្កើនការប្រកួតប្រជែងកែច្នៃ និងបន្ថែមតម្លៃដល់ដំណាំសំខាន់ៗរបស់ខ្លួន ដូចជា ស្វាយចន្ទី ដំឡូងមី អង្ករ ស្វាយ ចេក និងបន្លែ សម្រាប់ទីផ្សារទាំងក្នុងស្រុក និងនាំចេញ កម្ពុជាចាំបាច់ត្រូវមានកន្លែងកែច្នៃកសិផលផ្ទាល់ខ្លួន។អូស្ត្រាលីកំពុងធ្វើការជាមួយកម្ពុជា ដើម្បីបង្កើតសួនកសិ-ឧស្សាហកម្ម (AIP) ដំបូងគេ ។ សួនកសិ-ឧស្សាហកម្មនេះ នឹងផ្តល់នូវ កន្លែងកែច្នៃកសិ-អាហារ ការស្រាវជ្រាវនិងអភិវឌ្ឍន៍ ការកសាងសមត្ថភាព ព្រមទាំងកន្លែងធ្វើការនិងបរិស្ថានប្រកបដោយសុវត្ថិភាពនិងបរិយាបន្ន ជាពិសេសសម្រាប់បុគ្គលិកជាស្ត្រី និងបុគ្គលិកដែលខ្វះខាត។យោងតាមការសិក្សាលទ្ធភាពឆ្នាំ ២០២២ របស់រដ្ឋាភិបាលកម្ពុជា សួនកសិ-ឧស្សាហកម្ម ត្រូវបានគេរំពឹងថា នឹងរួមចំណែកចំនួន ៥,១ពាន់លានដុល្លាអាមេរិច ដល់សេដ្ឋកិច្ចកម្ពុជា នៅឆ្នាំ២០៤៥ និងបង្កើតការងារថ្មីរហូតដល់ ១០០ ០០០កន្លែង ដែលជាងពាក់កណ្តាលការងារនេះនឹងជារបស់ស្ត្រី។ថ្មីៗនេះ កម្មវិធីអភិវឌ្ឍន៍សេដ្ឋកិច្ចឈានមុខរបស់ប្រទេសអូស្ត្រាលី ហៅថា CAPRED បានរៀបចំដំណើរ​ទស្សនកិច្ចសិក្សានៅប្រទេសអូស្ត្រាលី សម្រាប់គណៈកម្មាធិការ និងសមាជិកលេខាធិការដ្ឋាន សួនកសិ-ឧស្សាហកម្ម។ ពួកគេបានសិក្សាអំពីការគាំទ្ររបស់រដ្ឋាភិបាល ទំនាក់ទំនងសាធារណៈ ឧស្សាហកម្ម និងការស្រាវជ្រាវ សម្រាប់ការកសាងប្រព័ន្ធអេកូឡូស៊ី​ និងបញ្ហាប្រឈមនានាក្នុងការបង្កើត សួនកសិ-ឧស្សាហកម្ម។យោងតាមការសិក្សាដដែល កសិផលកម្ពុជា ៩៥% ត្រូវបានលក់ទៅតាមបណ្តាប្រទេសជិតខាងក្នុងអាស៊ាន ជាកសិផលដើមមិនទាន់កែច្នៃ? ប្រទេសទាំងនោះ បន្ទាប់ពីទិញកសិផលយកទៅ បានកែច្នៃវាទៅ​ជា​ផលិតផលមានតម្លៃជាងកសិផលដើម ដូចជាធ្វើទៅជា តំណាប់និងទឹកផ្លែឈើ នំស្រួយ អាហារទារក ម្សៅ និងជីវឥន្ធនៈជាដើម។អត្ថបទ៖ វណ្ណៈ

ទំហំពាណិជ្ជកម្មរវាងកម្ពុជា និងជប៉ុន សម្រេចបានក្នុងទឹកប្រាក់ជាង ២ ៤០០លានដុល្លារ

2023/05/04 11:32:54 am        415
Facebook Telegram Linkin
ភ្នំពេញ៖ គិតក្នុងឆ្នាំ២០២២ ការដោះដូរពាណិជ្ជកម្មទ្វេភាគី រវាងកម្ពុជា-ជប៉ុន សម្រេចបានក្នុង​ទំហំទឹកប្រាក់​សរុបប្រមាណជាង ២ ៤៥៤លានដុល្លារ ក្នុងនោះការនាំចេញពីកម្ពុជាទៅជប៉ុន មានទឹកប្រាក់ប្រមាណ​ ៥១៥លានដុល្លារ។​ ចំណែកការនាំចូលពីជប៉ុន មកកម្ពុជាវិញ មានទឹកប្រាក់​ប្រមាណជិត ២ ០០០លានដុល្លារ។ ផេកផ្លូវការរបស់ក្រសួងពាណិជ្ជកម្ម បានលើកឡើងថា តាមរយៈការចូលរួមរបស់កម្ពុជា ក្នុងព្រឹត្តិការណ៍ពិព័រណ៍កម្ពុជា​ និងពិព័រណ៍ពិភពលោក២០២៥ នៅក្នុងទីក្រុងតូក្យូ ប្រទេសជប៉ុន កាលពីនៅថ្ងៃទី៣ ឧសភា ឆ្នាំ២០២៣នេះ បានរំពឹងទុកថា​ កិច្ចសហប្រតិបត្តិការវិស័យពាណិជ្ជកម្ម វិនិយោគ និងទេសចរណ៍រវាងកម្ពុជា-ជប៉ុន ​នឹងកាន់តែមានវឌ្ឍភាពល្អឡើងថែមទៀត។តាមឯកឧត្តម ឈួន ដារ៉ា រដ្ឋមន្រ្តីប្រតិភូអមនាយករដ្ឋមន្រ្តី​ និងជារដ្ឋលេខាធិការក្រសួងពាណិជ្ជកម្ម បានចាត់ទុកការចូលរួមពិព័រណ៍​កម្ពុជានៅពេលនេះ ជាការរួមចំណែកដ៏មានសារៈសំខាន់​បំផុត​ក្នុងការផ្សព្វផ្សាយ និងជំរុញផលិតផលខ្មែរ សេវាកម្ម ​គម្រោងវិនិយោគ និងវិស័យទេសចរណ៍កម្ពុជា ឱ្យកាន់តែមានការទទួលស្គាល់ក្នុងទីផ្សារជប៉ុន ​និងទីផ្សារអន្តរជាតិ។ ជាមួយគ្នានេះ ឯកឧត្តម បានជម្រាបជូនអង្គពិធី អំពីការត្រៀមលក្ខណៈរបស់កម្ពុជា ក្នុងការចូលរួម “ពិព័រណ៍ពិភពលោក ២០២៥” រយៈពេល ០៦ខែ នៅទីក្រុងអូសាកា ដែលតាមរយៈការចូលរួម​ពិព័រណ៍​ពិភពលោកនេះ ធ្វើឱ្យកម្ពុជាមានសិទ្ធិ ​ស្មើមុខស្មើមាត់ នៅលើឆាកអន្តរជាតិ ហើយ​ទំនាក់ទំនង​ការទូតរវាងកម្ពុជានិងប្រទេសម្ចាស់ផ្ទះ ​ក៏ដូចជារវាងបណ្តាប្រទេសអ្នកចូលរួម នឹងត្រូវ​បានពង្រឹង និងពង្រីកថែមទៀត។ លើសពីនេះទៀត ពិព័រណ៍ពិភពលោក ក៏នឹងផ្តល់ឱកាសឱ្យពាណិជ្ជករ ក្រុមហ៊ុន សហគ្រាសកម្ពុជា បានជួបចរចាផ្លាស់ប្តូរពាណិជ្ជកម្ម វិនិយោគ និងទេសចរណ៍ទៅវិញទៅមក ជាអន្តរជាតិផងដែរ។ ក្រសួងពាណិជ្ជកម្ម បានបញ្ជាក់ថា នៅក្នុងពិព័រណ៍កម្ពុជាឆ្នាំ២០២៣នេះ មានរៀបចំកម្មវិធីសម្តែង​សិល្បៈបុរាណខ្មែរ និងតន្រ្តីសម័យ ហើយមានស្តង់ប្រមាណ ១០០ស្តង់ បានដាក់តាំងបង្ហាញ​ឯកសារផ្សព្វផ្សាយអំពីវិស័យពាណិជ្ជកម្ម វិនិយោគ វប្បធម៌ប្រពៃណីខ្មែរ និងទេសចរណ៍ ព្រមទាំងផលិតផលកសិកម្ម និងសិប្បកម្មខ្មែរ ដូចជា៖ អង្ករ ម្រេច ស្ករត្នោត កាហ្វេ នំស្រួយ សូត្រខ្មែរ ក្រម៉ាខ្មែរ ម្ហូបអាហារ និងវត្ថុអនុស្សាវរីយ៍ជាច្រើនទៀត ដើម្បីបង្ហាញដល់ភ្ញៀវជាតិ និងអន្តរជាតិ មកចូលរួមទស្សនា។ ក្នុងនោះ ទំនិញអង្ករ ម្រេច និងសូត្រខ្មែរ គឺជាផលិតផលដែលទទួលបានការចាប់អារម្មណ៍ខ្ពស់ និងការបញ្ជាទិញជាបន្តបន្ទាប់ ពីភ្ញៀវទេសចរ និងប្រជាជនជប៉ុន៕

ក្រសួងពាណិជ្ជកម្មបើកកិច្ចប្រជុំផ្ទៃក្នុង ដើម្បីពិនិត្យសេចក្តីព្រាងច្បាប់ ស្តីពីវិធានដើមកំណើតទំនិញ

2023/05/03 03:24:47 pm        289
Facebook Telegram Linkin
ភ្នំពេញ៖ ឯកឧត្តម ប៉ាន សូរស័ក្តិ រដ្ឋមន្ត្រីក្រសួពាណិជ្ជកម្ម បានដឹកនាំកិច្ចប្រជុំផ្ទៃក្នុង ដើម្បីពិនិត្យ​ពិភាក្សាលើសេចក្តីព្រាងច្បាប់ស្តីពី វិធានដើមកំណើតទំនិញ ដើម្បីស្តាប់នូវសេចក្តី​រាយការណ៍​អំពីវឌ្ឍន៍ភាពនៃការរៀបចំ ក៏ដូចជាផ្តល់អនុសាសន៍នានា ​ដើម្បីឱ្យសេចក្តីព្រាងច្បាប់នេះ កាន់តែ​មាន​ភាពគ្រប់ជ្រុងជ្រោយ​ ដើម្បីត្រៀម​សម្រាប់កិច្ចប្រជុំពិនិត្យចុងក្រោយ។នៅក្នុងកិច្ចប្រជុំ កាលពីរសៀលថ្ងៃទី២ ខែឧសភានេះ ​ឯកឧត្តមរដ្ឋមន្ត្រី បានកោតសរសើរ និងវាយ​តម្លៃខ្ពង់ចំពោះកិច្ចខិតខំប្រឹងប្រែង​របស់ក្រុមការងារក្រសួងពាណិជ្ជកម្ម ក្នុងការរៀបចំសេចក្តី​ព្រាងច្បាប់​ស្តីពីវិធានដើមកំណើតទំនិញ​ និងការពារបានជោគជ័យក្នុងកិច្ចប្រជុំជាបន្តបន្ទាប់ តាមនីតិវិធី ​និងបែបបទរបស់ទីស្តីការគណៈរដ្ឋមន្ត្រី ​និងកិច្ចប្រជុំជាមួយក្រសួងយុត្តិធម៌ពាក់ព័ន្ធ​លើទោសប្បញ្ញត្តិមួយចំនួន។បន្ទាប់ពីបានពិនិត្យ និងពិភាក្សាតាមមាត្រានីមួយៗរួចមក ឯកឧត្តមរដ្ឋមន្ត្រី បានផ្តល់អនុសាសន៍​ណែនាំដល់ក្រុមការងារឱ្យកែសម្រួល និងបន្ថែមខ្លឹមសារសំខាន់ៗមួយចំនួនឱ្យស្រប​ទៅ​តាមស្មារតី​នៃអង្គប្រជុំ ​ព្រមទាំងផ្តល់គោលការណ៍មួយចំនួនទៀតជូនក្រុមការងារ ដើម្បី​មាន​មូលដ្ឋាន​ក្នុងការចូលរួមកិច្ចប្រជុំពិនិត្យចុងក្រោយលើសេចក្តីព្រាងច្បាប់នេះនៅទីស្តីការគណៈរដ្ឋមន្ត្រី ដែលនឹងប្រព្រឹត្តិទៅនៅថ្ងៃទី៣ ខែឧសភានា ឆ្នាំ២០២៣នេះ៕

ព្រឹត្តិការណ៍ស៊ីហ្គេម ចូលរួមចំណែកជំរុញសេដ្ឋកិច្ចកម្ពុជាប្រសើរឡើងរ បង្ហាញសក្តានុពលវិនិយោគ

2023/05/02 12:42:02 pm        590
Facebook Telegram Linkin
ភ្នំពេញ៖ អ្នកជំនាញសេដ្ឋកិច្ច មើលឃើញថា ព្រឹត្តិការណ៍ជាប្រវត្តិសាស្ត្រនេះ នឹងជួយធ្វើឱ្យ​សកម្មភាពសេដ្ឋកិច្ចជាតិកាន់តែរស់រវើក​ អំពីតម្រូវការ​ និងការ​ផ្គត់ផ្គង់ ​ខណៈរដ្ឋាភិបាល​ត្រៀមកញ្ចប់​ចំណាយលើព្រឹត្តិការណ៍ ​ស៊ីហ្គេម ប្រមាណ​២០០លានដុល្លារម៉េរិក។ឧកញ៉ា លឹម ហេង អនុប្រធានសភាពាណិជ្ជកម្មកម្ពុជា​ លើកឡើងថា ព្រឹត្តការណ៍ការប្រកួតកីឡា​អាស៊ីអាគ្នេយ៍ ​និងអាស៊ានប៉ារ៉ាហ្គេម ឆ្នាំ ២០២៣ ​ដែលកម្ពុជាធ្វើជាម្ចាស់ផ្ទះ នាំមកនូវកិត្តិយស ការរឹតចំណង​មិត្តភាព និងសេដ្ឋកិច្ច ធ្វើឱ្យកម្ពុជាគឺជាប្រទេសមួយមានភាពអំណោយផល​គ្រប់​បែបយ៉ាង និងកំពុងផ្តល់នូវភាពទាក់ទាញយ៉ាងខ្លាំង ​នៅលើឆាកអន្តរជាតិ​។ឧកញ៉ា បានបន្តថា ​រាជរដ្ឋាភិបាលបានចំណាយថវិកាជាច្រើន បានបង្ហាញឲ្យឲ្យពិភពលោកស្គាល់​កម្ពុជា​កាន់ខ្លាំង, ចំណែកទាក់ទងវិស័យវិនិយោគវិញ រំពឹងថា កម្ពុជានឹងស្រូបយកការវិនិយោគ​កាន់តែច្រើន មកបណ្តាក់ទុនរកស៊ី នៅកម្ពុជាបន្ថែមទៀត។ជុំវិញព្រឹត្តិការណ៍នេះដែរ, ឯកឧត្តមបណ្ឌិត គី សេរីវឌ្ឍន៍ អ្នកស្រាវជ្រាវសេដ្ឋកិច្ច នៃរាជបណ្ឌិត្យ​សភាកម្ពុជា បានថ្លែងថា ចំពោះការរៀបចំព្រឹត្តិការណ៍ស៊ីហ្គេមនេះ កម្ពុជានឹងទទួលបាននូវផល​ចំណេញ​ជាច្រើន តាមរយៈការផ្សាយពាណិជ្ជកម្មរបស់ប្រទេសកម្ពុជា ខណៈការប្រកួតកីឡានេះ​មាន​ការចូលរួមពីប្រទេសអាស៊ាន និងមានភ្ញៀវទេសចរណ៍អន្តរជាតិមកពីបណ្តាប្រទេសជាច្រើន​ទៀត បានស្គាល់ពីកម្ពុជា ។ នាពេលអនាគត កម្ពុជានឹងទទួលបានផលប្រយោជន៍យ៉ាងច្រើនលើសលុប តាមរយៈការ​ទាក់ទាញ​អ្នកវិនិយោគ រួមទាំងការទាក់ទាញភ្ញៀវទេសចរណ៍បន្ថែមទៀត ខណៈដែលប្រទេសដ៏ទៃៗទៀត​មិនអាចធ្វើដូចកម្ពុជាបាន។សូមរំលឹកថា នាពេលកន្លងមកនេះ ឯកឧត្តម វង្សី វិស្សុត រដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុ ថ្លែងថា រាជរដ្ឋាភិបាលកម្ពុជា បានត្រៀមថវិកាប្រមាណជា ២០០ លានដុល្លារ សម្រាប់​ចំណាយលើការរៀបចំព្រឹត្តិការណ៍ស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣នេះ ក្នុងនោះថវិកាទាំងអស់ គឺកម្ពុជាមិនគិតដល់ការចំណាយ លើការសាងសង់ ពហុកីឡដ្ឋានជាតិមរតកតេជោប្រហែល ៣០ លានដុល្លារអាមេរិកបន្ថែមទៀតនោះឡើយ៕ អត្ថបទ៖ សុន រ៉ាឌី,

កសិករខេត្តតាកែវ នឹងរួមគ្នាពង្រីកការចិញ្ចឹមបង្កង ដើម្បីផ្គត់ផ្គង់ក្នុងស្រុក និងឈានទៅរកការនាំចេញ

2023/05/01 02:50:06 pm        181
Facebook Telegram Linkin
តាកែវ៖ ប្រធានសមាគមអាជីវករបង្កងទឹកសាបខេត្តតាកែវ នឹងចងក្រងកសិករដែលចិញ្ចឹមបង្កទាំង​អស់នៅ​ខេត្តតាកែវ ដើម្បីរួមសហការពង្រឹកការចិញ្ចឹមបង្កងតាមបែបធម្មជាតិ ខណៈមុខរបរនេះអាចជួយ​ដល់កសិកររកចំណូលបានសមរម្យ ​និងរួមគ្នា ពង្រីកការចិញ្ចឹមបង្កងខេត្តតាកែវឲ្យកាន់បានកាន់​តែខ្លាំងក្លា ​សម្រាប់ការផ្គត់ផ្គង់ចូលទីផ្សារក្នុងស្រុក ​និងឈានទៅរកការនាំចេញ។លោក សាប់ សារុន ប្រធានសមាគមអជីវករបង្កងទឹកសាបខេត្តតាកែវ លើកឡើងនៅថ្ងៃទី ៣០ខែមេសា ឆ្នាំ២០២៣នេះថា បច្ចុប្បន្នខេត្តតាកែវ មានកសិករចិញ្ចឹមបង្កងប្រហែលជាង១០​គ្រួសារ នៅក្នុងតំបន់ផ្សេងៗគ្នា។ ដើម្បីជំរុញការចិញ្ចឹមបង្កងឲ្យបានកាន់តែខ្លាំងក្លាថែមទៀត លោកមានផែនការ​គៀងគរ​ដល់​កសិករចិញ្ចឹម នៅក្នុងខេត្តតាកែវទាំងអស់ ​ឲ្យចូលជាសមាគម​ ដើម្បីរួមគ្នាពង្រីកចិញ្ចឹម​បង្កង​ឲ្យបានកាន់តែច្រើន​សម្រាប់​ផ្គត់ផ្គង់​បង្កងចូលទីផ្សារ​ ឬការនាំចេញ ​នៅពេលអនាគត ខណៈបង្កង​ខេត្តតាកែវ មានឈ្មោះបោះសំឡេង​ល្បីល្បាញតាំងពីរយូរយាណាស់មកហើយ។លោក សាប់ សារុន បានបញ្ជាក់ឲ្យដឹងថា ​នាពេលកន្លងមកនេះ ​មានមន្រ្តីក្រសួង-ស្ថាប័នពាក់ព័ន្ធ​ជាច្រើនជាពិសេសឯកឧត្តម ​ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ ​និងនេសាទ បាន​ចុះដល់មូលដ្ឋានចិញ្ចឹម​បង្កងរបស់លោក ​បានណែនាំ និងផ្តល់នូវបទពិសោធន៍ទាក់ទង​និង​ការចិញ្ចឹម និងបញ្ហាទីផ្សារមួយចំនួន ​ក្នុងគោលដៅជំរុញការចិញ្ចឹមបង្កងឲ្យមានការរីកចម្រើន។ លោក បានបន្តឲ្យដឹងទៀតថា ​នាពេលថ្មីៗនេះ​ ក្រសួងពាណិជ្ជកម្ម ​ក៏បានចុះបញ្ជីម៉ាកសម្គាល់​ភូមិសាស្ត្របង្កងខេត្តតាកែវ ​ដែលប្រការទាំងនេះបង្ហាញឲ្យឃើញពីការយកចិត្តទុកដាក់ របស់​រាជរដ្ឋាភិបាល ក្នុងគោលដៅលើកកម្ពស់ដល់សហគមន៍មូលដ្ឋាន ក្នុងការពង្រឹកនូវមុខរបរការចិញ្ចឹម​បង្កងឲ្យកាន់តែខ្លាំងក្លា សម្រាប់ ផ្គត់ផ្គង់ទីផ្សារក្នុងស្រុក ​និងឈានទៅរកការនាំចេញ៕អត្ថបទ៖ សុន រ៉ាឌី

សម្តេចតេជោ៖ ការពង្រីកកំពង់ផែស្វយ័តក្រុងព្រះសីហនុ ដើម្បីឆ្លើយតបទៅនឹងកំណើនទំនិញឆ្លងកាត់កើនឡើង

2023/05/01 02:28:03 pm        308
Facebook Telegram Linkin
ព្រះសីហនុ៖ សម្ដេចតេជោ ហ៊ុន សែន នាយករដ្ឋមន្រ្តីកម្ពុជា បានបញ្ជាក់ថា ការពង្រីកកំពង់ផែ​ស្វយ័តក្រុងព្រះសីហនុ ទៅជាកំពង់ផែទឹកជ្រៅ នឹងធ្វើឱ្យចំនួននាវាធំៗ​ចូលចតមានការ​កើនឡើង​ច្រើនជាងមុន ហើយធ្វើឱ្យតម្លៃនៃការចូលចតរបស់នាវា នឹងមានតម្លៃថោកជាងមុនផងដែរ។សម្តេចតេជោ ហ៊ុន សែន លើកឡើងបែបនេះ ក្នុងពិធីបើកការដ្ឋានសាងសង់ចំណតផែ​កុងតឺន័រថ្មី​ នៅ​កំពង់ផែស្វយ័តក្រុងព្រះសីហនុ នៅថ្ងៃទី ១ខែឧសភា នៅក្រុងព្រះសីហនុ។ប្រមុខរាជរដ្ឋាភិបាល បានមានប្រសាសន៍ថា ​ការកសាងផែទឹកជ្រៅ នឹងធ្វើឱ្យកាត់បន្ថយថ្លៃ​ប្រតិបត្តិការ​លើការធ្វើពាណិជ្ជកម្ម ​ហើយនឹងធ្វើឱ្យកាត់បន្ថយថ្លៃប្រតិបត្តិការលើការធ្វើពាណិជ្ជកម្ម និងធ្វើឱ្យកម្ពុជា ​មានលទ្ធភាពទទួលនាវាពី ១៨ភាគរយ ​ទៅដល់ជាង ៩០ភាគរយ។កំពង់ផែស្វយ័តក្រុងព្រះសីហនុ មានផែនការអភិវឌ្ឍចំណតកំពង់ផែ​ ជាបីដំណាក់កាល ដោយ​នៅឆ្នាំ២០២៦ ចំណតផែកុងទីន័រថ្មី ជំហានទី១ ប្រវែង ៣៥០ ម៉ែត្រ ជម្រៅទឹក ១៤,៥ម៉ែត្រ មាន​សមត្ថភាពផ្ទុកកុងទីន័រឡើងដល់ ១,៤៥ លាន TEU ក្នុងមួយឆ្នាំ ។ចំណតផែកុងទីន័រថ្មី ជំហានទី២ នឹងដាក់អនុវត្តនៅឆ្នាំ២០២៨ និងចំណតផែកុងទីន័រថ្មី ជំហានទី៣ នៅឆ្នាំ២០២៩ ​ធ្វើឱ្យសមត្ថភាពផ្ទុកកុងទីន័រ ឡើងដល់ជាង ​២,៦៧លាន TEU​ក្នុងមួយឆ្នាំ។តាមរយៈផែនការអភិវឌ្ឍចំណតកំពង់ផែថ្មីនេះ ​នឹងអនុញ្ញាត​ឱ្យនាវាដឹកទំនិញទូទាំងពិភពលោក​ចូលចត​បាន ដោយពុំចាំបាច់ Transit នៅកំពង់ផែផ្សេងៗ​ ដោយលែងមានឧបសគ្គជម្រៅទឹក ជា​ពិសេសកាត់បន្ថយចំណាយថវិកា​ និងពេលវេលា​ដឹកជញ្ជូន​តាមសមុទ្រ និងបង្កើនភាពប្រកួត​ប្រជែង៕ អត្ថបទ៖ វណ្ណៈ 

កម្ពុជា-ជប៉ុន គិតរួមគ្នាកសាងអភិវឌ្ឍន៍កំពង់ផែស្វយ័តព្រះសីហនុ ​ទៅជាកំពង់ផែសេរី

2023/05/01 01:28:28 pm        334
Facebook Telegram Linkin
ព្រះសីហនុ៖ ឯកឧត្តម UENO Atsushi ឯកអគ្គរាជទូតជប៉ុនប្រចាំនៅកម្ពុជា បានថ្លែងថា រដ្ឋាភិបាលប្រទេសកម្ពុជា និងប្រទេសជប៉ុន បានគិតរួមគ្នាកសាងកំពង់ផែស្វយ័តព្រះសីហនុ ទៅជាកំពង់ផែសេរី ​ដែលមានទំនាក់ទំនងគ្នារវាងកំពង់ផែ ​និងតំបន់សេដ្ឋកិច្ចពិសេស ។ក្នុងពិធីអបអរសាទរខួបលើកទី១៣៧ នៃទិវាពលកម្មអន្តរជាតិ០១ឧសភា, បើកការដ្ឋានសាងសង់​ចំណតផែកុងតឺន័រខេត្តព្រះសីហនុ ​និងខួបលើកទី៧០ ​នៃទំនាក់ទំនងការទូតកម្ពុជា-ជប៉ុន នៅថ្ងៃទី១ ខែឧសភា ឆ្នាំ២០២៣ ក្រោមអធិបតីភាពសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ឯកឧត្តម UENO Atsushi មានប្រសាសន៍ថា ទោះបីប្រតិបត្តិការនៅកំពង់ផែព្រះសីហនុ មានប្រសិទ្ធភាព ប៉ុន្តែការរីកចម្រើននៃទំនិញ កុងតឺន័រចេញចូលកំពង់ផែបានកើនឡើងទ្វេដង ក្នុងរយៈពេល៥ឆ្នាំ​កន្លងមកនេះ ធ្វើឲ្យចំណតផែមិនអាចផ្ទុកទំនិញអស់ ទើបសាងសង់ទីលានកុងតឺន័រថ្មី នៅលើកែមផែមានស្រាប់ និងចំណតផែកុងតឺន័រថ្មី ​តាមរយៈកម្រងកម្ចីប្រាក់យេន ។ឯកឧត្តមបន្តថា នៅពេលសាងសង់រួចរាល់ នាវាដឹកកុងតឺន័រធំៗ ដែលប្រតិបត្តិការរវាងអាមេរិក​ខាងជើង អឺរ៉ុប និងអាស៊ី ដែលរហូតមកដល់ពេលនេះ​ ពិបាកចូលកំពង់ផែ នឹងអាចធ្វើការចូល​ចតបាន ហើយនឹងចូលរួមចំណែកយ៉ាងធំធេង ​ក្នុងកំណើនសេដ្ឋកិច្ចរបស់កម្ពុជា និងពង្រឹងការ​តភ្ជាប់​ក្នុងតំបន់ ខណៈរដ្ឋាភិបាលកម្ពុជា និងជប៉ុន កំពុងពិភាក្សាគ្នា ក្នុងការអភិវឌ្ឍកំពង់ផែនេះ ឲ្យក្លាយទៅជាកំពង់ផែសេរី ។ឯកឧត្តមអគ្គរដ្ឋទូតជប៉ុន បានបន្ថែមថា បច្ចុប្បន្ននេះផ្សារទំនើបអ៊ីអន កំពុងសាងសង់មជ្ឈមណ្ឌល​ពិពិធកម្ម​ពហុបំណង ​សម្រាប់កម្រងសាកល្បង ​នៅតំបន់សេដ្ឋកិច្ចពិសេស​ ដែលជាប់នឹងកំពង់ផែ ជាមួយ​នឹងការរំពឹងប្រើប្រាស់កំពង់ផែព្រះសីហនុ ​ជាមជ្ឈមណ្ឌលកណ្ដាលសម្រាប់តំបន់អាស៊ី នាពេលអនាគត ។ឯកឧត្តម UENO Atsushi បានបញ្ជាក់ថា ក្រុមហ៊ុនកំពុងធ្វើការជាមួយរាជរដ្ឋាភិបាលកម្ពុជា ដើម្បី​ពិចារណាលើប្រព័ន្ធដឹកជញ្ជូនស្ដង់ដារពិភពលោក ​ការសម្រេចនូវគោលគំនិតរបស់ក្រុមហ៊ុននេះ មិនត្រឹមតែរួមចំណែកអភិវឌ្ឍន៍​កំពង់ផែព្រះសីហនុបន្ថែមទៀត ប៉ុណ្ណោះទេ ប៉ុន្តែក៏អាចពង្រីក​ការវិនិយោគ ​ពីប្រទេសជប៉ុនមកកម្ពុជាផងដែរ និងសូមស្នើឲ្យមានការជួយជ្រោមជ្រែងពីភាគី​ពាក់ព័ន្ធរបស់កម្ពុជាទាំងអស់ ៕ អត្ថបទ បាន សុខរិទ្ធិ

រដ្ឋមន្រ្តីកសិកម្ម បង្ហាញបំណងជូនភាគីចិន អំពីពង្រឹងគុណភាពផលិតផលខ្មែរ ដើម្បីពង្រីកការនាំចេញ

2023/04/28 01:16:42 pm        309
Facebook Telegram Linkin
ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងថ្នាក់ដឹកនាំ នៅថ្ងៃទី២៧ មេសា ឆ្នាំ២០២៣កន្លងទៅ បានទទួលជួបសម្តែងការគួរសមជាមួយក្រុមជំនាញការនៃ មជ្ឈមណ្ឌលសហប្រតិបត្តិការសេដ្ឋកិច្ចក្រៅប្រទេស (FECC) នៃក្រសួងកសិកម្ម និងកិច្ចការអភិវឌ្ឍចិន ដើម្បីពិភាក្សាការងារមួយចំនួន។នៅក្នុងកិច្ចប្រជុំនេះ ឯកឧត្តមរដ្ឋមន្ត្រី បានថ្លែងអំណរគុណសម្រាប់កិច្ចសហប្រតិបត្តិការ​ក្នុងការចូលរួម​អភិវឌ្ឍន៍វិស័យកសិកម្មនៅកម្ពុជា។ ជាមួយគ្នានេះដែរ ឯកឧត្តម បាន​លើកបញ្ជាក់អំពីទិសដៅរបស់ក្រសួងគឺធ្វើយ៉ាងណាសម្រេចបាននូវសន្តិសុខស្បៀង សុវត្ថិភាព​ស្បៀង និងមាននិរន្តរភាពសេដ្ឋកិច្ច។ ទាក់ទងនឹងការងារនេះ គឺកម្ពុជា នឹងមិនប្រកួតប្រជែងលើបរិមាណទេ ​តែនឹងប្រកួតលើគុណភាព ដើម្បីទទួលបានផលចំណេញដោយគិតគូរដល់បរិស្ថាន (Eco-Friendly) គឺមិនប៉ះពាល់​ដល់ព្រៃឈើឡើយ។បើតាម ឯកឧត្តមរដ្ឋមន្ត្រី គឺក្រសួងនឹងជំរុញការផលិតផលិតផលកសិកម្មប្រកបគុណភាព សុវត្ថិភាព​អនាម័យ SPS សម្រាប់នាំចេញទៅប្រទេសចិន ហើយដែលការងារនេះទាមទារ​ឱ្យមាន​នូវ​បច្ចេកទេស ផែនការអាជីវកម្ម ​និងយុទ្ធសាស្ត្រច្បាស់លាស់ ព្រមទាំងអនុវត្តស្របតាម​គោល​នយោបាយដែលក្រសួងបានដាក់ចេញ៕អត្ថបទ ឈិត បូរ៉ាវី

អគ្គនាយកដ្ឋានពន្ធដារ ប្រមូលចំណូលក្នុងខែមីនា បានហក់ឡើងខ្ពស់

2023/04/27 05:29:41 pm        405
Facebook Telegram Linkin
ភ្នំពេញ៖ នៅក្នុងខែ មីនា ឆ្នាំ ២០២៣ អគ្គនាយកដ្ឋានពន្ធដារ ប្រមូលចំណូលពន្ធ-អាករគ្រប់ប្រភេទ បានហក់ឡើងខ្ពស់គួរជាទីគត់សម្គាល់ ក្នុងចំនួនប្រមាណជាង ៣ ២៥៨ ប៊ីលានរៀល ត្រូវជាង ៨០៤ លានដុល្លារ ស្មើនឹង ២២,៥២% នៃផែនការច្បាប់ស្តីពីហិរញ្ញវត្ថុសម្រាប់ការគ្រប់គ្រង ឆ្នាំ២០២៣ ។ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាលទទួលបន្ទុក​ជាអគ្គនាយក លើកឡើងក្នុងកិច្ច ប្រជុំបូកសរុបលទ្ធផលប្រមូលចំណូលពន្ធប្រចាំខែ មីនា និងត្រីមាសទី១ ឆ្នាំ ២០២៣ នៅថ្ងៃទី ២៦ ខែមេសា ឆ្នាំ ២០២៣នេះថា ចំណូលពន្ធប្រចាំខែ មីនា ឆ្នាំ ២០២៣ និងនៅក្នុងរយៈពេល ៣ខែដើមឆ្នាំ ២០២៣ បានហក់ឡើងខ្ពស់ ​ដោយសារជារៀងរាល់ឆ្នាំ ខែ មករាដល់ ខែមីនា គឺជារដូវកាលនៃការប្រកាស​ និងបង់ប្រាក់ពន្ធលើប្រាក់ចំណូល ឬខាតរបស់​សហគ្រាសនាឆ្នាំកន្លងមកប្រចាំឆ្នាំ ដែលឆ្លុះបញ្ចាំងអំពីសកម្មភាពអាជីវកម្មថារកបានចំណេញ ការប្រកាស និងបង់ប្រាក់ពន្ធលើប្រាក់ចំណូលសម្រាប់ឆ្នាំ២០២២ ​បានទទួលនូវលទ្ធផលល្អប្រសើរ ដោយសារប្រព័ន្ធពន្ធដារ E-Filing និង ToI E-Filing មានភាពរឹងមាំនិងមានតម្លាភាព ដែលជាយន្តការយ៉ាងសំខាន់ ក្នុងការពង្រឹងការផ្ទៀងផ្ទាត់ការដាក់លិខិតប្រកាសនិងបង់ប្រាក់ពន្ធ (Cross check)។ជាក់ស្តែងការប្រមូលចំណូល នៅក្នុងខែ មីនា ឆ្នាំ ២០២៣ ចំណូលពន្ធ-អាករគ្រប់ប្រភេទ ដែល​អគ្គនាយកដ្ឋានពន្ធដារប្រមូលបានតាមប្រព័ន្ធគ្រប់គ្រងទិន្នន័យចំណូលអនឡាញ របស់អគ្គនាយកដ្ឋានពន្ធដារមានចំនួនជាង ៣ ២៥៨ ប៊ីលានរៀល ត្រូវប្រមាណជា ៨០៤ លានដុល្លារ ស្មើនឹង ២២,៥២% ក្នុងនោះបើប្រៀបធៀបនឹងចំណូលពន្ធ-អាករប្រចាំខែ មីនា ឆ្នាំ២០២២ ឃើញថាកើនឡើងចំនួនជាង ២១៧ ប៊ីលានរៀល ត្រូវជិត ៥៤លានដុល្លារ ស្មើនឹង ៧,១៦%។ ចំណែកចូលសរុបរយៈពេល ៣ខែ ឆ្នាំ២០២៣ ចំណូលពន្ធ-អាករ អគ្គនាយកដ្ឋានពន្ធដារ មានចំនួន ៥ ៤៤២ប៊ីលានរៀល ត្រូវជិត ១ ៣៤៤លានដុល្លារ ស្មើនឹង ៣៧,៦៣% នៃផែនការច្បាប់ស្តីពី​ហិរញ្ញវត្ថុសម្រាប់ការគ្រប់គ្រងឆ្នាំ២០២៣ ក្នុងនោះបើប្រៀបធៀបនឹងចំណូលពន្ធ-អាករ​ក្នុងរយៈពេលដូចគ្នា ឆ្នាំ២០២២ ឃើញថា កើនឡើងចំនួនជិត ៣២៧ ប៊ីលានរៀល ត្រូវប្រមាណជា ៨០ លានដុល្លារ ស្មើនឹង ៦,៣៩%។ឯកឧត្តម គង់ វិបុល បានបញ្ជាក់ថា នៅក្នុងរយៈពេល ៣ ខែនេះដែរ ទោះបីចំណូលមាន​ការកើនឡើង តែការប្រមូលបំណុលពន្ធមានការថមថយ ធៀបជាមួយនឹងរយៈពេលដូចគ្នាក្នុងឆ្នាំ ២០២២ និងជួបប្រទះបញ្ហាប្រឈម ដោយសារមានសហគ្រាសខ្លះបាន បន្តយកលេសពីស្ថានភាព​នៃភាពមិនប្រាកដប្រជា និងការប្រែប្រួលនូវបរិបទសេដ្ឋកិច្ចសកល ហើយព្យាយាមពន្យារពេល​ឬគេចវះ ពីការបង់បំណុលពន្ធ។ ទន្ទឹមនឹងនេះ សហគ្រាសដែលធ្លាប់ទទួលបានការអនុញ្ញាតឱ្យបង់ជាដំណាក់កាល ក៏មានការ​យឺតយ៉ាវ​ក្នុងការបង់បំណុលពន្ធ ​និងបន្តស្នើសុំពន្យារពេលបង់ពន្ធតាម​កាលកំណត់ផងដែរ៕ អត្ថបទ៖ សុន រ៉ាឌី

ធនាគារកាណាឌីយ៉ាបើកសាខាធនាគារវៃឆ្លាតថ្មី នៅសង្កាត់ស្ទឹងមានជ័យ រាជធានីភ្នំពេញ

2023/04/26 01:19:17 pm        395
Facebook Telegram Linkin
ភ្នំពេញ៖ នៅថ្ងៃទី២៦ ខែមេសានេះ ធនាគារកាណាឌីយ៉ា បានដាក់សម្ពោធអោយប្រើប្រាស់​ជាផ្លូវការនូវសាខាឆ្លាតវៃទី៣ ក្នុងសង្កាត់ស្ទឹងមានជ័យ ផ្លូវលេខ២១៧ ភូមិដំណាក់ធំ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។ នាយកប្រតិបត្តិធនាគារ កាណាឌីយ៉ា ថ្លែងថា សាខាធនាគារវៃឆ្លាតនេះ គឺមានបំពាក់សម្ភារៈប្រព័ន្ធ​ឌីជីថល ដាក់-ដក ទូទាត់ ផ្ទេរសាច់ប្រាក់ស្វ័យប្រវត្តិ ដែលផ្តល់ភាពងាយស្រួលជាងគេ នៅ​ប្រទេសកម្ពុជា។ក្នុងឱកាសបើកសាខាធនាគារកាណាឌីយ៉ាវៃឆ្លាតថ្មីស្ទឹងមានជ័យនេះ លោក Raymond Sia នាយកប្រតិបត្តិ និងក្រុមប្រឹក្សាភិបាល នៃធនាគារ កាណាឌីយ៉ា បានថ្លែងថា អស់រយៈពេលជាង ៣២ឆ្នាំមកហើយ ដែលធនាគារកាណាឌីយ៉ា​បានបើកដំណើរផ្តល់សេវាហិរញ្ញវត្ថុ​នៅក្នុង​ប្រទេសកម្ពុជា មានស្ថេរភាពហិរញ្ញវត្ថុរឹងមាំ ​និងរីកចម្រើនពីមួយឆ្នាំទៅមួយឆ្នាំ។លោកបន្តថា ធនាគារកាណាឌីយ៉ា សាខាស្ទឹងមានជ័យ គឺជាសាខាទី៦៨ ដែលសាខានេះមានផ្តល់​សេវាធនាគារពេញលេញ បំពាក់ដោយម៉ាស៊ីនស្វ័យសេវាធនាគារ ដូចជា ម៉ាស៊ីនឌីជីថលបង្កើត​គណនីដោយខ្លួនឯងបំពាក់ម៉ាស៊ីន CRM ដាក់ប្រាក់ ដកប្រាក់ និងដាក់មូលប្បទានប័ត្រ បំពាក់ម៉ាស៊ីនបោះពុម្ភកាតSEM ដែលអាចទទួលបានកាតឥណពន្ធពីធនាគារ កាណាឌីយ៉ា ក្នុងរយៈពេលខ្លី ព្រមទាំងមានបំពាក់ម៉ាស៊ីន ATM សម្រាប់ដាក់-ដកប្រាក់ជាច្រើនគ្រឿង​ជាដើមផងដែរ។ លោក Raymond Sia បន្តថា សេវាកម្មក្នុងសាខាឆ្លាតវៃថ្មីនេះ ក៏បានរៀបចំឱ្យស្របនឹងតម្រូវការ​ហិរញ្ញវត្ថុរបស់អតិថិជន ដែលមានដូចជា ការបើកគណនីប្រើប្រាស់ម៉ាស៊ីនស្វ័យសេវាធនាគារ ការស្នើសុំកម្ចីឥណទានសម្រាប់សហគ្រាសធនតូច ​និងមធ្យម សេវាកម្មផ្ទេរប្រាក់ក្នុង ឬក្រៅស្រុក ឬសេវា​បើកប្រាក់បៀវត្សសម្រាប់អាជីវកម្ម ​និងសាជីវកម្មផងដែរ ហើយកាន់តែងាយស្រួល អតិថិជន​អាចប្រើប្រាស់ប្រតិបត្តិការហិរញ្ញវត្ថុប្រចាំថ្ងៃ ​តាមតម្រូវការរបស់ខ្លួន តាមរយៈប្រើប្រាស់កម្មវិធី Canadia Bank App ជំនាន់ថ្មី ទូទាត់សាច់ប្រាក់មានភាពរហ័សផងដែរ។ក្នុងឱកាសនេះលោក ក៏បានថ្លែងអំណរគុណអតិថិជន​ទាំងអស់ ដែលតែងតែបន្តផ្តល់ទំនុកចិត្ត និង​ជ្រើសរើសធនាគារកាណាឌីយ៉ា ជា “ធនាគារជម្រើសដំបូង និងជាដៃគូហិរញ្ញវត្ថុ” ដែលធ្វើធនាគារ​បន្តការប្តេជ្ញាក្នុងការនាំយកនូវផលិតផល និងសេវាកម្ម ដើម្បីធានានូវលទ្ធភាពទទួលបានសេវា​កម្មហិរញ្ញវត្ថុល្អបំផុតសម្រាប់ប្រជាជនកម្ពុជា ទូទាំងប្រទេស៕ អត្ថបទ ស៊ុម សុខជា

បណ្ដាញសង្គម

ព័ត៌មានថ្មីៗ

កូរ៉េខាងជើងច្រានចោលការចោទប្រកាន់របស់អាមេរិកថា ទីក្រុងព្យុងយ៉ាង គឺជាការគំរាមកំហែងតាមប្រព័ន្ធអ៊ីនធឺណិត
05/03/2026 01:05 PM
Facebook Telegram Linkin
ប្រធានាធិបតីគុយបាបរិហារទណ្ឌកម្មថ្មីរបស់សហរដ្ឋអាមេរិកលើប្រទេសរបស់លោក
05/03/2026 01:05 PM
Facebook Telegram Linkin
មនុស្ស ១១នាក់ស្លាប់ ក្នុងហេតុការណ៍ក្រឡាប់រថយន្តក្រុងនៅភាគខាងលិចម៉ិកស៊ិក
05/03/2026 01:05 PM
Facebook Telegram Linkin
ក្រុមមន្រ្តីនិយាយថា សហរដ្ឋអាមេរិកដកទាហាន ៥ពាន់នាក់ចេញពីប្រទេសអាល្លឺម៉ង់
05/03/2026 12:05 PM
Facebook Telegram Linkin
អ្នកនាំពាក្យ៖ កម្មវិធីនយោបាយ និងការអភិវឌ្ឍរបស់កម្ពុជា បាននិងកំពុងដំណើរការទៅមុខជានិច្ច បើទោះបីកម្ពុជារងការឈ្លានពានពីថៃ
05/03/2026 12:05 PM
Facebook Telegram Linkin
ប្រតិភូសភាប្រើភាសាបារាំង ១៧ប្រទេសធ្វើសិក្ខាសាលា អំពីក្របខ័ណ្ឌ និងការប្រើប្រាស់ឌីជីថលក្នុងសភា
05/03/2026 12:05 PM
Facebook Telegram Linkin
ជម្លោះនៅតែកើតមានរវាងក្រុមហេសបូឡា និងអ៊ីស្រាអែលនៅតំបន់ភាគខាងត្បូងលីបង់
05/03/2026 12:05 PM
Facebook Telegram Linkin
លោក Trump និយាយថា មានលទ្ធភាពដែលអាមេរិកអាចចាប់ផ្តើមវាយប្រហារអ៊ីរ៉ង់ម្តងទៀត​
05/03/2026 12:05 PM
Facebook Telegram Linkin
មនុស្សយ៉ាងហោច ៩នាក់ស្លាប់ ក្នុងហេតុការណ៍អគ្គិភ័យនៅទីក្រុងញូវដែល្លី ប្រទេសឥណ្ឌា
05/03/2026 11:05 AM
Facebook Telegram Linkin
សហរដ្ឋអាមេរិកអនុម័តលក់អាវុធតម្លៃ ៨,៦ពាន់លានដុល្លារដល់សម្ព័ន្ធមិត្តមជ្ឈិមបូព៌ា
05/03/2026 11:05 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.