BTV NEWS

ទំហំពាណិជ្ជកម្មរវាងកម្ពុជាជាមួយប្រទេសដៃគូ RCEP មានទំហំទឹកប្រាក់ជាង ៣,៧៦ ពាន់លានដុល្លារកើនជិត ១៥ភាគរយក្នុងខែមករាឆ្នាំនេះ

ក្នុងខែមករាឆ្នាំនេះ ប្រទេសអាស៊ានចំនួន៥ ស្រូបយកទំនិញពីកម្ពុជា មានទឹកប្រាក់សរុបជាង ៤៣៣លានដុល្លារ

ឧស្សាហកម្មកៅស៊ូកម្ពុជា រីកចម្រើនលឿននាំឱ្យតម្រូវការផ្គត់ផ្គងកៅស៊ូក្នុងស្រុកកើនឡើងខ្ពស់ចន្លោះពី ២០ទៅ២៥ម៉ឺនតោនក្នុងមួយឆ្នាំ

ខែមករាឆ្នាំនេះ កម្ពុជានាំទំនិញទៅចិនមានទឹកប្រាក់ជាង ១៦៤លានដុល្លារ កើនជាង ៥៩ភាគរយ

សេដ្ឋកិច្ច និង កសិកម្ម

សកម្មភាពពលរដ្ឋទិញលក់មាស មានកំណើនខ្លាំង ខណៈហាងឆេងមាសកំពុងធ្លាក់ថ្លៃ

ភ្នំពេញ៖ បន្ទាប់ពីហាងឆេងមាសនៅលើទីផ្សារអន្តរជាតិ កំពុងធ្លាក់ថ្លៃ បណ្តាពលរដ្ឋនៅតាមបណ្តាទីផ្សារសាធារណៈ ក៏ដូចនៅតាមបណ្តាហាងលក់មាសនានា នៅរាជធានីភ្នំពេញ បាននិងកំពុងទទួលពលរដ្ឋជាអតិថិជនចូលទិញ និងលក់មាស ហាក់មានកំណើនឡើងជាបន្តបន្ទាប់ ជាពិសេសនៅថ្ងៃចុងសប្តាហ៍។នៅថ្ងៃទី២២ ខែកក្កដានេះ ដោយសារតម្លៃមាសហាក់កំពុងបន្តធ្លាក់ គេសំគាល់ឃើញថា មានពលរដ្ឋមួយចំនួន បានទិញគ្រឿងអលង្ការមាសទុកដើម្បីលំអរខ្លួន និងផលចំណេញរបស់គេ ហើយសម្រាប់ពលរដ្ឋដែលមានមាសនៅក្នុងដៃមួយចំនួន ក៏បានសម្រេចចិត្តលក់ចេញវិញដែរ ដោយសារគេបារម្ភខ្លាចមាសបន្តធ្លាក់ថ្លៃបន្តទៀត។អាជីវករជួញដូរមាសនៅផ្សារច្បារអំពៅ រាជធានីភ្នំពេញ បានថ្លែងថា សម្រាប់ការលក់មាសនៅទីនេះ មានការប្រែប្រួលទៅតាមតម្លៃទីផ្សារមាសអន្តរជាតិទាំងអស់ ហើយនៅខណៈដែលតម្លៃមាសបាននិងកំពុងធ្លាក់ថ្លៃនេះ សំគាល់ឃើញថា ទាំងអតិថិជនដែលចូលមកសាកសួរតម្លៃមាស ហើយអតិថិជនដែលមកទិញមាសទុក និងមកលក់មាសវិញ មានកំណើនឡើងច្រើន ជាពិសេសការលក់ទិញ នៅរៀងរាល់ថ្ងៃចុងសប្តាហ៍។សូមបញ្ជាក់ថា សម្រាប់តម្លៃមាសដែលកែច្នៃធ្វើគ្រឿងអលង្កាលក់ នៅផ្សារច្បារអំពៅនៅព្រឹកនេះ លក់ចេញតម្លៃក្នុងរង្វង់ ១ជី ២០៥ដុល្លាអាមេរិច មាសចិញ្ចៀនលាត ២០៧ដុល្លាអាមេរិច ដោយឡែកមាសគីឡូ លក់ចេញ តម្លៃ២០៩ដុល្លាអាមេរិច ក្នុង១ជី ទិញចូលតម្លៃរង្វង់១៩៩ដុល្លាអាមរិច៕ អត្ថបទ ស៊ុម សុខជា

ក្រសួងពាណិជ្ជកម្ម ចាត់វិធានការជាច្រើន ដើម្បីកាត់បន្ថយអតិផរណានៅតាមទីផ្សារ

ភ្នំពេញ៖ ក្រសួងពាណិជ្ជកម្មដាក់ចេញនូវវិធានការសំខាន់ៗមួយចំនួន ដើម្បីសម្រួលទំនិញដល់ទីផ្សារ ការសហការជាមួយវិស័យឯនជន, ជំរុញការលក់ឲ្យស្ថិតក្នុងតម្លៃមួយសមរម្យ និងការកំណត់ថ្លៃប្រេងឥន្ធនៈជាដើម ដែលជាការចូលចំណែកកាត់បន្ថយអតិផរណាថ្លៃម្ហូបអា ហារនៅកម្ពុជា។ឯកឧត្តម ប៉ែន សុវិជាតិ អ្នកនាំពាក្យ និងជាអនុរដ្ឋលេខាធិការក្រសួងពាណិជ្ជកម្ម នៅក្នុងសន្និសីទព័ត៌មានស្តីពីសមិទ្ធិផលសម្រេចបានរយៈពេល៥ឆ្នាំ របស់ក្រសួងពាណិជ្ជកម្ម នៅថ្ងៃទី ២១ ខែ កក្កដា ឆ្នាំ២០២២ថា ពិភពលោកបានប្រឈមនឹងបញ្ហាថ្មីៗ ដែលធ្វើឱ្យកំណើនសេដ្ឋកិច្ចពិភពលោកកើនឡើងយឺត ដោយសារការកើនឡើងខ្ពស់នៃអត្រាអតិផរណា ការប្រែប្រួលលំហូរមូលធន និងសម្ពាធលើតម្លៃរូបិយប័ណ្ណនានាជាដើម, កត្តាទាំងនេះកម្ពុជាក៏ទទួលផលជះនៃការកើនឡើងនៃអតិផរណាផងដែរ។ ឯកឧត្តម បន្តថា ជុំវិញបញ្ហាការកើនឡើងនៃអតិផរណានេះ ក្រសួងពាណិជ្ជកម្មបានធ្វើការតាមដានវិភាគ និងគណនាថ្លៃទំនិញប្រើប្រាស់សម្រាប់ជីវភាពសំខាន់ៗ, បញ្ហានេះ ក្រសួងក៏សង្កេតឃើញមានការកើនឡើងចន្លោះ ៤ ទៅ ៥%ផងដែរ នៅក្នុងដំណាក់កាលដំបូង ក្នុងនោះជាកាតព្វកិច្ចរបស់ក្រសួង គឺបានខិតខំប្រឹងប្រែងសម្រួលឲ្យប្រភពនៃទំនិញ និងភាពសំបូរបែបនៃទំនិញបានមកដល់ទីផ្សារ ជាពិសេសទំនិញចាំបាច់សម្រាប់បម្រើជីវភាពរួមមាន៖ សាច់ បន្លែ ត្រី អង្ករ ស្ករ ប៊ីចេងជាដើម និងទំនិញមួយចំនួនសម្រាប់បម្រើជីវភាព ដើម្បីឲ្យប្រភពទំនិញបានហូរពីចំណុចផ្គត់ផ្គង់ មកដល់អ្នកប្រើប្រាស់។ បញ្ហានេះ វិស័យឯកនក៏អាចរួមចំណែកជាមួយក្រសួង ក្នុងការកាត់បន្ថយថ្លៃ ដើម្បីធ្វើឲ្យតម្លៃលក់ស្ថិតនៅក្នុងលំដាប់មួយសមរម្យ ។ ក្រៅពីនេះ ក្រសួងក៏បានចូលរួមចំណែកផងដែរ គឺការកាត់ថ្លៃប្រេងឥន្ធនៈ, បច្ចុប្បន្នថ្លៃប្រេងបានធ្លាក់ចុះមកវិញជាបណ្តើរៗផងដែរ ដែលកត្តាមួយចំនួន គឺជាការគិតគូរដ៏ខ្ពង់ខ្ពស់ពីប្រមុខរាជរដ្ឋាភិបាល ដូចជាការឧបត្តម្ភធុន ដើម្បីជួយកាត់បន្ថយថ្លៃប្រេងឥន្ធនៈនេះជាដើម។ចំណែកប្រជាពលរដ្ឋអ្នកប្រើប្រាស់ ថ្លែងថា នៅក្នុងស្ថានភាព ២ ទៅ ៣ឆ្នាំចុងក្រោយនេះ ថ្លៃមុខទំនិញសម្រាប់ផ្គត់ផ្គង់ការហូបចុក បានមានកំណើនកើនឡើងបន្តិចម្តងៗ ចំពោះការកើនឡើងនេះ វាអាចនឹងប៉ះពាល់ដល់អ្នកប្រើប្រាស់ ជាពិសេសប្រជាពលរដ្ឋមានជីវភាពក្រីក្រ តែបញ្ហានេះ ពួកគាត់មានក្តីរំពឹងខ្ពស់លើរាជរដ្ឋាភិបាល នឹងអាចចូលរួមទប់ស្កាត់អំពីការកើនឡើងនេះបានល្អប្រសើរ ស្របពេលកន្លងមកនេះ រាជរដ្ឋាភិបាលបានដាក់ចេញវិធានការជាច្រើនផងដែរ ដើម្បីជួយទ្រទ្រង់ដល់ជីវភាពរស់នៅរបស់ប្រជាពលរដ្ឋ។សូមបញ្ជាក់ថា ពាក់ព័ន្ធអតិរណា ថ្មីៗនេះ ធនាគារជាតិនៃកម្ពុជា បានបង្ហាញថា ក្រោមឥទ្ធិពលនៃការកើនឡើងថ្លៃប្រេង និងម្ហូបអាហារពិភពលោក, បានធ្វើឲ្យអតិផរណានៅកម្ពុជា បានកើនឡើងជាបន្តបន្ទាប់ដល់ប្រមាណ ៧,២% នៅខែឧសភា ដែលជាកម្រិតខ្ពស់បំផុតក្នុងរយៈពេលជាង ១ ទសវត្សរ៍ចុងក្រោយ។ ក្នុងស្ថានភាពនេះ ធនាគារជាតិនៃកម្ពុជា បានថ្លឹងថ្លែងការអនុវត្តនយោបាយរូបិយវត្ថុ ដើម្បីគ្រប់គ្រងសម្ពាធអតិផរណាផង និងគាំទ្រការស្តារកំណើនសេដ្ឋកិច្ចផង ។ ដើម្បីរួមចំណែកគ្រប់គ្រងសម្ពាធអតិផរណា អត្រាប្តូរប្រាក់ត្រូវបានបន្តរក្សាឱ្យមានស្ថិរភាព សំដៅការពារអំណាចទិញរបស់ប្រាក់រៀល ក៏ដូចជាប្រាក់ចំណូលរបស់ប្រជាពលរដ្ឋងាយរងគ្រោះ។ សម្រាប់បញ្ហានេះ ដោយសារបញ្ហាដុល្លារូបនីយកម្ម ការប្រែប្រួល អត្រាប្តូរប្រាក់មានឥទ្ធិពលដោយផ្ទាល់ និងឆាប់រហ័សមកលើអតិផរណានៅកម្ពុជា ក្នុងនោះកាលណាតម្លៃប្រាក់រៀលធ្លាក់ចុះ នោះនឹងនាំឱ្យតម្លៃទំនិញ និងសេវានានាកើនឡើងភ្លាមផងដែរ៕ អត្ថបទ៖ សុន រ៉ាឌី

ជប៉ុនសន្យាបង្កើនឥណទានសម្បទានទ្វេដង ដើម្បីឆ្លើយតបនឹងតម្រូវការអភិវឌ្ឍនៅកម្ពុជា

ភ្នំពេញ៖ ជប៉ុនសន្យាបង្កើនឥណទានសម្បទានទ្វេដង ដើម្បីឆ្លើយតបទៅនឹងតម្រូវការអភិវឌ្ឍរបស់ប្រទេសកម្ពុជា និងហិរញ្ញប្បទានសហប្រតិបត្តិការនានាបន្ថែមទៀត ដើម្បីជួយគាំទ្រ ដល់សកម្មភាពអភិវឌ្ឍន៍សេដ្ឋកិច្ច-សង្គមនៅកម្ពុជា ។ឯកឧត្តម HATAEDA Mikio, អគ្គនាយក ទទួលបន្ទុកនាយកដ្ឋានអាស៊ីអាគ្នេយ៍ និងប៉ាស៊ីហ្វិកទីស្នាក់ ការកណ្តាល នៃទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន នៅក្នុងជំនួបពិភាក្សាការងារជាមួយ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ នៅថ្ងៃទី២០ ខែកក្កដា ឆ្នាំ២០២២ បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្តេចតេជោ នាយករដ្ឋមន្ត្រី ចំពោះចំណាត់ការ និងវិធានការនានា ដែលរាជរដ្ឋាភិបាលបានដាក់ចេញ ក្នុងការប្រយុទ្ធប្រឆាំងទៅនឹងនៃជំងឺកូវីដ-១៩ ។ក្នុងជំនួបនេះឯកឧត្តម សន្យាបង្កើនឥណទានសម្បទានទ្វេដង សម្រាប់មួយឆ្នាំៗ ដើម្បីឆ្លើយតបទៅនឹងតម្រូវការអភិវឌ្ឍរបស់ប្រទេសកម្ពុជា និងហិរញ្ញប្បទានសហប្រតិបត្តិការនានាបន្ថែមទៀត ដើម្បីជួយគាំទ្រ ដល់សកម្មភាពអភិវឌ្ឍន៍សេដ្ឋកិច្ច-សង្គមនៅកម្ពុជា ។ជាការឆ្លើយតប ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន បានសម្តែងនូវការស្វាគមន៍យ៉ាងកក់ក្តៅចំពោះដំណើរបំពេញទស្សនកិច្ចការងាររបស់ ឯកឧត្តម HATAEDA Mikio មកកម្ពុជា។ ក្នុងជំនួបនេះ ឧបនាយករដ្ឋមន្ត្រី បានគូសបញ្ជាក់ថា រដ្ឋាភិបាលជប៉ុន, តាមរយៈទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA), បានដើរតួនាទីស្នូលយ៉ាងសំខាន់ ក្នុងការផ្តល់ហិរញ្ញប្បទាន សម្រាប់កិច្ចសហប្រតិបត្តិការអភិវឌ្ឍន៍ផ្លូវការ (Japanese ODA) ទាំងក្នុងក្របខ័ណ្ឌហិរញ្ញប្បទានឥតសំណង, ឥណទានសម្បទាន និងជំនួយបច្ចេកទេស ចូលរួមចំណែកក្នុងការអនុវត្តគោលនយោបាយ និងយុទ្ធសាស្ត្រអភិវឌ្ឍគ្រប់ដំណាក់កាលដែល រាជរដ្ឋាភិបាល ដាក់ចេញពីមួយអាណត្តិទៅមួយអាណត្តិ សម្រាប់អភិវឌ្ឍន៍សេដ្ឋកិច្ច និងសង្គមកម្ពុជា ។ជាក់ស្តែងស្ថិតក្នុងបរិការណ៍បច្ចុប្បន្ន កម្ពុជាកំពុងប្រឹងប្រែងធ្វើដំណើរយ៉ាងសកម្មឥតឈប់ឈរ ដើម្បីសម្រេចបាន នូវក្របខ័ណ្ឌគោលនយោបាយសេដ្ឋកិច្ចរបស់ខ្លួន តម្រង់ទិសឆ្ពោះទៅចក្ខុវិស័យក្លាយជាប្រទេសមានចំណូល មធ្យមកម្រិតខ្ពស់ នៅឆ្នាំ ២០៣០ និងស្របតាមគន្លងមាគ៌ាអភិវឌ្ឍន៍ ដែលបានដាក់ចេញនូវ “ចក្ខុវិស័យកម្ពុជា ឆ្នាំ២០៥០”, កិច្ចសហប្រតិបត្តិការអភិវឌ្ឍន៍ផ្លូវការ (ODA) របស់មិត្តជប៉ុន ជាធាតុចូលមួយយ៉ាងសំខាន់ ដែលបាន ឆ្លើយតបទៅនឹងសេចក្តីត្រូវការជាអាទិភាព និងគោលនយោបាយសំខាន់ៗនានារបស់រាជរដ្ឋាភិបាលកម្ពុជា, ជាក់ស្តែងតាមការផ្តល់ Japanese ODA អនុវត្តដោយ JICA សឹងតែគ្រប់វិស័យនៅកម្ពុជា ជាពិសេសនៅក្នុងក្រប ខ័ណ្ឌអភិវឌ្ឍន៍ហេដ្ឋារចនាសម្ព័ន្ធរូបវន្តរួមមាន កំពង់ផែសមុទ្រអន្តជាតិ, ផ្លូវថ្នល់-ស្ពាន, អគ្គិសនី, ប្រព័ន្ធធារាសាស្រ្ត, មន្ទីរពេទ្យ, សាលារៀន និង រោងចក្រផលិតទឹកស្អាតជាដើម ដែលសកម្មភាពទាំងនេះ បានឆ្លុះបញ្ចាំងយ៉ាងច្បាស់ថា ប្រទេសជប៉ុន នៅតែជាមិត្តភ័ក្ដិដ៏ប្រពៃ និងជាដៃគូយុទ្ធសាស្រ្តអភិវឌ្ឍន៍ដ៏សំខាន់មួយសម្រាប់ប្រទេសកម្ពុជា៕ អត្ថបទ៖ សុន រ៉ាឌី

ការនាំចេញរបស់កម្ពុជា នៅបន្តកើនឡើង ទៅទីផ្សារអាមេរិក

ភ្នំពេញ៖ ការនាំចេញទំនិញរបស់កម្ពុជាទៅកាន់ទីផ្សារសហរដ្ឋអាមេរិក ទោះបីកម្ពុជាមិនទាន់ទទួលបានការបន្តប្រព័ន្ធអនុគ្រោះពន្ធ (GSP) ពីអាមេរិក បានស្ថិតដល់កម្រិតខ្ពស់ ដោយសបញ្ជាក់ឲ្យឃើញពីសមត្ថភាព ការផលិត និងទីផ្សារផ្គត់ផ្គង់ទំនិញរបស់កម្ពុជា។ឯកឧត្តម ប៉ែន សុវិជាតិ អ្នកនាំពាក្យ និងជាអនុរដ្ឋលេខាធិការក្រសួងពាណិជ្ជកម្ម នៅក្នុងសន្និសីទព័ត៌មានស្តីពីសមិទ្ធិផលសម្រេចបានរយៈពេល៥ឆ្នាំ របស់ក្រសួងពាណិជ្ជកម្ម នៅថ្ងៃទី ២១ ខែ កក្កដា ឆ្នាំ ២០២២ ថា ចំពោះប្រទេសដែលមានការអភិវឌ្ឍតិចតួច សហរដ្ឋអាមេរិកបានផ្តល់ប្រព័ន្ធអនុគ្រោះពន្ធ ការផ្តល់ភាពអនុគ្រោះពន្ធនេះមិនមែនផ្តល់ជូនគ្រប់មុខទំនិញ នឹងគ្រប់ប្រទេសនៃចេញទៅកាន់ទីផ្សារសហរដ្ឋអាមេរិកនោះផងដែរ។ឯកឧត្តម បន្តថា ជុំវិញពាណិជ្ជកម្មទ្វេភាគីកម្ពុជា-អាមេរិកវិញ ទោះបីសហរដ្ឋអាមេរិកមិនបានផ្តល់អាជ្ញាប័ណ្ណនៃប្រព័ន្ធអនុគ្រោះពន្ធ តាំងពីខែ មករា ដើមឆ្នាំ ២០២១ មក, ក្នុងកាលៈទេសៈនេះ កម្ពុជានាំចេញទៅកាន់សហរដ្ឋអាមេរិកដោយបង់ពន្ធ ក្នុងនោះសម្រាប់ការនាំចេញផលិតផលសំលៀកបំពាក់របស់កម្ពុជា មិនទទួលបាន GSP នោះទេ ដោយកម្ពុជាបានបង់ពន្ធលើផលិតផលនេះ ក្នុងរង្វង់ប្រមាណពី ១២ ទៅ ១៩% ។ ចំណែកការទទួលបាន GSP មានតែផលិតផលកាបូបធ្វើដំណើរប៉ុណ្ណោះ តែទោះបីសហរដ្ឋអាមេរិកមិនទាន់អនុម័តប្រព័ន្ធអនុគ្រោះពន្ធ ក៏ដោយ ការនាំចេញមុខទំនិញទៅកាន់សហរដ្ឋអាមេរិកមានកំណើនគួរឲ្យកត់សម្គាល់ផងដែរ ក្នុងនោះប្រសិនសហរដ្ឋអាមេរិកបានអនុម័តប្រព័ន្ធអនុគ្រោះពន្ធ នេះ យើងក៏ទទួលបានពន្ធដែលបានបង់នាពេលកន្លងមក មកវិញផងដែរ ហើយទំហំនៃការនាំចេញរបស់កម្ពុជាអាចនឹងកើនឡើងបន្ថែមទៀត។ សូមបញ្ជាក់ថា នៅក្នុងឆមាសទី ១ ឆ្នាំ ២០២២ នេះ ការធ្វើពាណិជ្ជកម្មអន្តរជាតិ មានទំហំទឹកប្រាក់សរុប ជាង ២៧ ពាន់លានដុល្លារអាមេរិក ក្នុងនោះសម្រាប់ពាណិជ្ជកម្មទ្វេភាគីកម្ពុជា-អាមេរិក មានទំហំទឹកប្រាក់ប្រមាណ ៤ ៨១៧ លានដុល្លារអាមេរិក គឺកម្ពុជាបាននាំចេញ មានទឹកប្រាក់ ៤ ៦៤៨ លានដុល្លារអាមេរិក ខណៈការនំាចូលពីសហរដ្ឋអាមេរិក មានចំនួនទឹកប្រាក់ ១៦៨ លានដុល្លារអាមេរិក៕ អត្ថបទ៖ សុន រ៉ាឌី

កម្ពុជា-ឥណ្ឌា ឯកភាពគ្នាជំរុញកិច្ចសហការសម្របសម្រួល និងជំរុញសកម្មភាពធុរកិច្ចនិងវិនិយោគ

ភ្នំពេញ៖ ប្រទេសកម្ពុជា និងឥណ្ឌា បានឯកភាពគ្នាលើការបន្តកិច្ចសហការសម្របសម្រួល និងជំរុញសកម្មភាពធុរកិច្ចនិងវិនិយោគ ដើម្បីជំរុញកំណើនសេដ្ឋកិច្ច និងពាណិជ្ជកម្ម រវាងប្រទេសទាំង២ ឱ្យកាន់តែរីកចម្រើនបន្ថែមទៀត។ឯកឧត្តម ឈួន ដារ៉ា រដ្ឋលេខាធិការក្រសួងពាណិជ្ជកម្ម និងឯកឧត្តម Karthik Tallam កុងស៊ុលកិត្តិយស កម្ពុជាប្រចាំទីក្រុង Bangalore នៃសាធារណរដ្ឋឥណ្ឌា បានពិភាក្សាលើកិច្ចសហប្រតិបត្តិការសេដ្ឋកិច្ច និងពាណិជ្ជកម្មក្នុងជំនួបកាលពីថ្ងៃទី២០ ខែកក្កដាកន្លងទៅ នៅក្រសួងពាណិជ្ជកម្ម។ឯកឧត្តម ឈួន ដារ៉ា រដ្ឋលេខាធិការក្រសួងពាណិជ្ជកម្ម បានស្វាគមន៍យ៉ាងកក់ក្ដៅចំពោះគណៈប្រតិភូឥណ្ឌាមកកាន់ប្រទេសកម្ពុជា និងជាពិសេសមកកាន់ក្រសួងពាណិជ្ជកម្ម ព្រមទាំងបានថ្លែងថា កម្ពុជា-ឥណ្ឌា មានទំនាក់ទំនងជាមួយគ្នាជាប្រវត្តិសាស្រ្តជាយូរណាស់មកហើយ ជាពិសេសឆ្នាំ២០២២នេះ ជាខួបគម្រប់៧០ឆ្នាំនៃ ចំណងការទូតរវាងព្រះរាជាណាចក្រកម្ពុជា នឹងសាធារណរដ្ឋឥណ្ឌាផងដែរ។ឯកឧត្តមរដ្ឋលេខាធិការ បានបន្តថាក្រសួងពាណិជ្ជកម្មគាំទ្រ និងផ្តល់កិច្ចសហការជាមួយស្ថានទូតឥណ្ឌាប្រចាំកម្ពុជា និងសភាពពាណិជ្ជកម្មឥណ្ឌាប្រចាំកម្ពុជា ក្នុងការរៀបចំព្រឹត្តិការណ៍នានា ក្នុងគោលបំណងជំរុញកិច្ចសហប្រតិបត្តិការ លើវិស័យពាណិជ្ជកម្ម និងវិនិយោគ រវាងប្រទេសទាំងពីរបន្ថែមទៀត។ជាមួយគ្នានេះ ឯកឧត្តម Karthik Tallam បានជម្រាប អំពីគោលបំណងនៃគណៈប្រតិភូឥណ្ឌាមកកាន់ក្រសួងពាណិជ្ជកម្មថា គឺដើម្បីស្វែងរកការគាំទ្រ និងកិច្ចសហប្រតិបត្តិការពីក្រសួងពាណិជ្ជកម្មក្នុងការរៀបចំកម្មវិធី Business Excellence Awards 2022 ដែលរៀបចំដោយសភាពពាណិជ្ជកម្មឥណ្ឌាប្រចាំកម្ពុជា ក្នុងគោលបំណងអបអរសាទរខួបគម្រប់៧០ឆ្នាំ នៃចំណងការទូតកម្ពុជា-ឥណ្ឌា ដែលព្រឹត្តិការណ៍នឹងប្រព្រឹត្តទៅចាប់ពី ថ្ងៃទី៨-១០ ខែធ្នូ ឆ្នាំ២០២២ខាងមុខនេះ នៅរាជធានីភ្នំពេញ ដោយមានការ ចូលរួមពីស្ថាប័នរដ្ឋរបស់កម្ពុជា ព្រមទាំងវិស័យឯកជនឥណ្ឌាជាង២០០ក្រុមហ៊ុនផងដែរ។ភាគីទាំងពីរបានសម្តែងនូវការប្តេជ្ញាចិត្តបន្តកិច្ចសហការសម្របសម្រួល និងជំរុញសកម្មភាពធុរកិច្ចនិងវិនិយោគ ដើម្បីជំរុញកំណើនសេដ្ឋកិច្ច និងពាណិជ្ជកម្ម រវាងប្រទេសទាំង២ ឱ្យកាន់តែរីកចម្រើនបន្ថែមទៀត។គួរបញ្ជាក់ថា ក្នុងឆ្នាំ២០២១ ទំហំពាណិជ្ជកម្មរវាងកម្ពុជា-ឥណ្ឌា មានទំហំទឹកប្រាក់ជាង ៣១១លានដុល្លារអាមេរិក ដែលក្នុងនោះកម្ពុជានាំចេញទៅឥណ្ឌាក្នុងទំហំទឹកប្រាក់ជាង ១២៦លានដុល្លារអាមេរិក និងឥណ្ឌានាំចេញមកកម្ពុជា ក្នុងទំហំទឹកប្រាក់ជាង ១៨៥លានដុល្លារអាមេរិក៕ អត្ថបទ៖ វណ្ណៈ

កម្ពុជា-ថៃពង្រឹងកិច្ចសហប្រតិបត្តិការលើវិស័យភស្តុភារកម្ម

ភ្នំពេញ៖ ប្រទេសកម្ពុជា និងប្រទេសថៃ បានចុះអនុស្សារណៈយោគយល់ដើម្បីបង្កើនចំណងមិត្តភាពឱ្យកាន់តែជិតស្និទ្ធក្នុងវិស័យភស្តុភារកម្ម និងគាំទ្រគ្នាទៅវិញទៅមកក្នុងការពង្រឹងសមត្ថភាពស្ថាប័ន និងសមត្ថភាពរបស់ភាគីពាក់ព័ន្ធក្នុងវិស័យភស្តុភារកម្ម។អនុស្សារណៈយោគយល់ ត្រូវបានចុះហត្ថលេខារវាង គណៈប្រតិភូក្រសួងសាធារណការ និងដឹកជញ្ជូនកម្ពុជា ដឹកនាំដោយលោកជំទាវរដ្ឋលេខាធិការ កុយ សុដានី និងក្រុមប្រឹក្សាជាតិអភិវឌ្ឍន៍សេដ្ឋកិច្ច និងសង្គមរបស់ព្រះរាជាណាចក្រថៃ កាលពីថ្មីៗនេះ នៅទីក្រុងបាងកក។ យោងតាមក្រសួងសាធារណការ ការចុះហត្ថលេខាលើអនុស្សារណៈយោគយល់នេះ ធ្វើឡើងដោយការស្ម័គ្រចិត្តសម្រាប់កិច្ចសហប្រតិបត្តិការលើផ្នែកគោលនយោបាយ និងការគាំទ្រលើវិសាលភាព និង កម្រិតក្របខណ្ឌគោលនយោបាយរួមមានគោលនយោបាយភស្តុភារកម្ម ក្របខណ្ឌគតិយុត្ត និងបទប្បញ្ញត្តិ ក្របខណ្ឌស្ថាប័ន យន្តការសម្របសម្រួល និងការសម្រេចចិត្តដំណើរការនៃការអនុវត្ត តាមដាន និងវាយតម្លៃគោលនយោបាយ។តាមរយៈអនុស្សារណៈនេះ ភាគីទាំងពីរ មានគោលបំណងសម្តៅ សូចនាករ និងប្រព័ន្ធផ្ទុកទិន្នន័យភស្តុភារកម្ម រួមមានថ្លៃចំណាយភស្តុភារកម្មធៀបនឹងកំណើនផលិតផលក្នុងស្រុកសរុប និងសន្ទស្សន៍ប្រតិបត្តិការភស្តុភារកម្ម និងគាំទ្រគ្នាទៅវិញទៅមកក្នុងការពង្រឹងសមត្ថភាពស្ថាប័ន និងសមត្ថភាពរបស់ភាគីពាក់ព័ន្ធក្នុងវិស័យភស្តុភារកម្ម។ថ្លែងក្នុងជំនួបនោះ លោកជំទាវរដ្ឋលេខាធិការបានជម្រាបជូនភាគីថៃអំពីការយកចិត្តទុកដាក់ និងកិច្ចខិតខំប្រឹងប្រែងរបស់ក្រសួងក្នុងការតាក់តែងសេចក្តីព្រាងផែនការមេស្តីពីការតភ្ជាប់ប្រព័ន្ធដឹកជញ្ជូនពហុមធ្យោបាយ និងភស្តុភារកម្មនៅកម្ពុជា។លោកជំទាវ បានបញ្ជាក់ថា ផែនការមេនេះ មានបញ្ចូលគម្រោងអភិវឌ្ឍន៍ហេដ្ឋារចនាសម្ព័ន្ធទាំងផ្នែករឹង និងផ្នែកទន់ ដែលរួមមានគម្រោងអភិវឌ្ឍន៍ប្រព័ន្ធដឹកជញ្ជូនផ្លូវថ្នល់ ផ្លូវដែក ផ្លូវល្បឿនលឿន ផ្លូវទឹក ផ្លូវសមុទ្រ កំពង់ផែ អាកាសយានដ្ឋាន និងហេដ្ឋារចនាសម្ព័ន្ធភស្តុភារកម្ម ដែលត្រូវការទឹកប្រាក់ប្រមាណ ៥០ពាន់លានដុល្លាសហរដ្ឋអាមេរិកសម្រាប់រយៈពេល១០ឆ្នាំ៕ អត្ថបទ៖ វណ្ណៈ

NBCនឹងប្រើប្រាស់ឧបករណ៍នយោបាយរូបិយវត្ថុចាំបាច់ ដើម្បីរក្សាតម្លៃប្រាក់រៀល

ភ្នំពេញ៖ ធនាគារជាតិនៃកម្ពុជា នឹងបន្តប្រើប្រាស់ឧបករណ៍នយោបាយរូបិយវត្ថុចាំបាច់នានា ក្នុងការរក្សាតម្លៃប្រាក់រៀលឱ្យមានស្ថិរភាព ដើម្បីការពារអំណាចទិញរបស់រូបិយវត្ថុជាតិ ខណៈការដំឡើងអត្រាការប្រាក់គោលរបស់ធនាគារកណ្តាលអាមេរិក អាចនឹងធ្វើឱ្យមានសម្ពាធអត្រាប្តូរប្រាក់រៀល ប្រឈមនឹងសម្ពាធនៃការធ្លាក់ថ្លៃ។ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជា ថ្លែងលើកឡើងក្នុងពិធីបិទសន្និបាតបូកសរុបលទ្ធផលការងារប្រចាំឆមាសទី១ និងទិសដៅការងារឆមាសទី២ ឆ្នាំ២០២២ របស់ធនាគារជាតិនៃកម្ពុជា នៅថ្ងៃទី២០ខែកក្កដា ឆ្នាំ២០២២ ថា ស្ថានភាពអត្រាអតិផរណាមានភាពមិនប្រាកដប្រជាខ្ពស់ ដោយអាស្រ័យជាចម្បង លើឥទ្ធិពលនៃការអូសបន្លាយសង្រ្គាមរុស្ស៊ី-អ៊ុយក្រែន ទៅលើថ្លៃប្រេង និងការអនុវត្តវិធានបិទខ្ទប់តំបន់ផលិតកម្មនៅប្រទេសចិន ដើម្បីទប់ស្កាត់ការរាលដាលនៃជំងឺកូវីដ-១៩ ក្នុងនោះបើតាមការរំពឹងទុក ថ្លៃប្រេងនឹងថយចុះ អតិផរណាក៏ត្រូវបានព្យាករណ៍ថា ថយចុះផងដែរ នៅឆមាសទី២នេះ។ ការដំឡើងអត្រាការប្រាក់គោលរបស់ធនាគារកណ្តាលអាមេរិក មិនមានឥទ្ធិពលដោយផ្ទាល់លើអត្រាការប្រាក់នៅកម្ពុជា ប៉ុន្តែអាចធ្វើឱ្យមានសម្ពាធលើអត្រាប្តូរប្រាក់ ដោយសារការឡើងថ្លៃប្រាក់ដុល្លារអាមេរិកនៅលើទីផ្សារអន្តរជាតិ។ ឯកឧត្តម ស្នើរដល់មន្រ្តីធនាគារទាំងអស់ បន្តអនុវត្តការងារឲ្យបានផុលផុសរួមមាន៖ ការបន្តរក្សាស្ថិរភាពអត្រាប្តូរប្រាក់៖ ដោយសារប្រាក់ដុល្លារអាមេរិក មាននិន្នាការឡើងថ្លៃនៅលើទីផ្សារអន្តរជាតិ ប្រាក់រៀលនឹងបន្តប្រឈមនឹងសម្ពាធធ្លាក់ថ្លៃ។ធនាគារជាតិនៃកម្ពុជា នឹងបន្តប្រើប្រាស់ឧបករណ៍នយោបាយរូបិយវត្ថុចាំបាច់នានា ក្នុងការរក្សាតម្លៃប្រាក់រៀលឱ្យមានស្ថិរភាព ដើម្បីការពារអំណាចទិញរបស់រូបិយវត្ថុជាតិ ក៏ដូចជាប្រាក់ចំណូល របស់ប្រជាពលរដ្ឋងាយរងគ្រោះ។ក្នុងទិសដៅនេះ ការបន្តជំរុញការប្រើប្រាស់ប្រាក់រៀលពីគ្រប់មជ្ឈដ្ឋានទាំងអស់ ទាំងវិស័យសាធារណៈ វិស័យឯកជន និងប្រជាពលរដ្ឋទូទៅពិតជាមានសារៈសំខាន់ណាស់ ក្នុងការលើកកម្ពស់តម្លៃប្រាក់រៀលដោយផ្ទាល់ និងពង្រឹងប្រសិទ្ធភាព ឧបករណ៍នយោបាយរូបិយវត្ថុជារួម៕ អត្ថបទ៖ សុន រ៉ាឌី

ការលក់កញ្ចប់ទេសចរណ៍ទស្សនាកម្ពុជាតាមដងទន្លេមេគង្គ ចាប់ផ្តើមកើនឡើងវិញ

ភ្នំពេញ៖ ក្រុមហ៊ុននាវាទេសចរណ៍កម្ពុជា និងក្រុមហ៊ុននាវាទេសចរណ៍អន្តរជាតិនានាទៀត បាននាំគ្នាបើកដំណើរការអាជីវកម្មនាវាទេសចរណ៍ឡើងវិញ ដើម្បីដឹកទេសចរជាតិអន្តរជាតិ ទស្សនាកម្ពុជា វៀតណាម នៅតាមផ្លូវទឹកតាមទន្លេមេគង្គ បន្ទាប់ពីរាជរដ្ឋាភិបាលកម្ពុជាប្រកាសបើកប្រទេស និងរដ្ឋមន្ត្រីទេសចរណ៍អាស៊ានបានប្រកាសបើកទេសចរណ៍អាស៊ានឡើងវិញមក។លោក ផាន សុបិន តំណាងក្រុមហ៊ុននាវាទេសចរណ៍កម្ពុជា បានថ្លែងប្រាប់BTVនៅថ្ងៃទី២១ ខែកក្តដានេះថា ក្រុមហ៊ុននាវាទេសចរណ៍កម្ពុជា បានចាប់ផ្តើមបើកដំណើរការដឹកភ្ញៀវទេសចរជាតិអន្តរជាតិទស្សនាកម្ពុជា វៀតណាម តាមដងទន្លេមេគង្គ នៅដើមខែកក្តដានេះ ហើយនៅក្នុងដំណាក់កាលដំបូងនេះ ក្រុមហ៊ុនលោក បើកដំណើរការចំនួន២នាវា ឆ្លងដែនចេញចូលកម្ពុជា វៀតណាម ហើយដោយសារនៅក្នុងអំឡុងពេលនេះមានភ្ញៀវទេសចរអន្តរជាតិកក់ទិញកញ្ចប់ទេសចរណ៍ទស្សនាកម្ពុជាតាមផ្លូវទឹកនេះបន្តមានកំណើនច្រើន លោកនឹងបង្កើនការបើកចំនួនប្រាំនាវាបន្ថែមទៀត។ លោក ផាន សុបិន បានថ្លែងថា នៅមុនបរិបទកូវីដ១៩មិនទាន់រាតត្បាត មានក្រុមហ៊ុននាវាទេសចរណ៍ជាតិអន្តរជាតិចំនួន ៥ក្រុមហ៊ុន ក្នុងនោះមានក្រុមហ៊ុនជាតិចំនួន២ បើកដំណើរការដឹកជញ្ជូនភ្ញៀវទេសចរជាតិអន្តរជាតិទស្សនាកម្ពុជា វៀតណាម តាមដងទន្លេមេគង្គយ៉ាងសកម្ម ហើយក្នុងអំឡុងមានការរាតត្បាតកូវីដ១៩ ជាង២ឆ្នាំនេះ អាជីវកម្មនាវាទេសចរណ៍ដឹកទេសចរឆ្លងដែនចេញចូលកម្ពុជាវៀតណាមនេះបានផ្អាក ហើយទើបតែរហូតមកដល់ពេលនេះទេ គឺមានតែក្រុមហ៊ុនលោកដែលជាក្រុមហ៊ុនក្នុងស្រុកបានសម្រេចចិត្តបើកមុនគេ។ឯកឧត្តម ហោ សារុន រដ្ឋលេខាធិការក្រសួងទេសចរណ៍ បានថ្លែងថា ការបើកអាជីវកម្មដឹកទេសចរជាតិអន្តរជាតិ ឆ្លងដែនតាមច្រកព្រំដែនផ្លូវទឹក មកទស្សនាកម្ពុជា នឹងជម្រុញកំណើនភ្ញៀវទេសចរអន្តរជាតិមកទស្សនាកម្ពុជា កើនលើស ១លាននាក់នៅដំណាច់ឆ្នាំ២០២២នេះ ខណៈក្នុងរយៈពេល ៦ខែក្នុងឆ្នាំ២០២២កន្លងមក កម្ពុជាទទួលភ្ញៀវទេសចរអន្តរជាតិបានជាង៥០ម៉ឺននាក់។ទោះយ៉ាងណាក៏ដោយ ឯកឧត្តម ហោ សារុន ក៏បានស្នើឲ្យបណ្តាក្រុមហ៊ុននាវាទេសចរណ៍សូមកុំដំឡើងថ្លៃកញ្ចប់ទេសចរណ៍ទស្សនាកម្ពុជាតាមផ្លូវទឹក និងត្រូវបង្កើនការផ្តល់សេវាប្រកបដោយគុណភាព បដិសណ្ឋារកិច្ចល្អ ដើម្បីបង្កើតភាពទាក់ទាញទេសចរអន្តរជាតិមកទស្សនាកម្ពុជាកាន់តែច្រើនថែមទៀត៕ អត្ថបទ ស៊ុម សុខជា

ហាងឆេងមាសនៅបន្តធ្លាក់ចុះ ដោយសារការដំឡើងអត្រាប្រាក់គោលរបស់ធនាគារកណ្តាលអាមេរិក

ភ្នំពេញ៖ អ្នកជំនាញអាជីវកម្មមាសថា តម្លៃហាងឆេងមាសនឹងធ្លាក់ចុះបន្ថែមទៀត ដោយសារធនាគារកណ្តាលសហរដ្ឋអាមេរិក នឹងបន្តឡើងថ្លៃអត្រាការប្រាក់ដុល្លារ ចំណែកចំពោះអតិថិជន និងអាជីករដែលវិនិយោគនៅលើតម្លៃហាងឆេងមាស គួររង់ចាំក្នុងរយៈពេលខ្លីខាងមុខនេះ ។លោក ឈា ឆាយហេង ប្រធានផ្នែកប្រឹក្សាយោបល់ហិរញ្ញវត្ថុ នៃក្រុមហ៊ុន PP Link Securities លើកឡើងក្នុងកិច្ចសម្ភាសន៍ជាមួយភ្នាក់ងារអ្នកយកព័ត៌មាន BTV នៅថ្ងៃទី ២០ ខែ កក្កដា ឆ្នាំ ២០២២ នេះថា បច្ចុប្បន្នកំពុងមានការប្រែប្រួល ដោយសារពាក់ព័ន្ធនឹងតម្រូវការរបស់ហាងឆេងមាសផ្ទាល់ និងកត្តាមួយទៀត ពាក់ព័ន្ធនឹងបម្រែបម្រួលតម្លៃលុយដុល្លារសហរដ្ឋអាមេរិក ព្រោះតម្លៃហាងឆេងមាស គឺធ្វើការប្តូរផ្លាស់ជាមួយលុយដុល្លារសហរដ្ឋអាមេរិក។ជាក់ស្តែងនាប៉ុន្មានខែចុងក្រោយនេះ តម្លៃហាងឆេងមាសបានហក់ឡើងដល់ ២ ០៧០ ដុល្លារក្នុងមួយអោន ហើយក្នុងរយៈពេលប៉ុន្មានចុងក្រោយនេះវិញ តម្លៃហាងឆេងមាសបន្តធ្លាក់ដល់ ១ ៧០០ ដុល្លារ ក្នុងមួយអោន ដែលការធ្លាក់ចុះ ដោយសារតែតម្លៃហាងឆេងមាសបានចាប់ផ្តើមបាត់បង់តម្រូវការដោយសារបច្ចុប្បន្នធនាគារកណ្តាលនៃសហរដ្ឋអាមេរិក កំពុងរៀបចំគោលនយោបាយក្នុងការដំឡើងអត្រាប្រាក់ ដើម្បីឲ្យប្រាក់ដុល្លាឡើងថ្លៃ។សូមបញ្ជាក់ថា ជុំវិញការនាំចូលមាសនេះ យោងតាមរបាយការណ៍អគ្គនាយកដ្ឋានគយ និងរដ្ឋាករកម្ពុជា ក្នុងរយៈពេល ៣ខែ ឆ្នាំ២០២២នេះ កម្ពុជាបាននាំចូលមាស មានតម្លៃ ១ ២៨១ លានដុល្លារអាមេរិក ថយចុះជាង ៤៧% បើធៀបរយៈពេលដូចគ្នានិងឆ្នាំ ២០២១។ នៅក្នុងរយៈពេលនេះដែរ កម្ពុជាក៏បាននាំចេញមាស មានទំហំទឹកប្រាក់ប្រមានជាង ៨៤លានដុល្លារអាមេរិក៕អត្ថបទ៖ សុន រ៉ាឌី

ដំណឹងល្អ..! ពីថ្ងៃទី២១-៣១ ខែកក្កដា ឆ្នាំ២០២២ តម្លៃប្រេងឥន្ធនៈបានបន្តធ្លាក់បន្ថែមទៀត ធៀបនឹងសន្ទស្សន៍ចាស់

ភ្នំពេញ៖ ក្រសួងពាណិជ្ជកម្មប្រកាសពីតម្លៃលក់រាយប្រេងឥន្ធនៈតាមស្ថានីយនានាទូទាំងប្រទេស ចាប់ពីថ្ងៃទី២១-៣១ ខែកក្កដា ឆ្នាំ២០២២ ដោយប្រេងសាំងធម្មតាត្រូវលក់តម្លៃ ៤.៨០០រៀល/លីត្រ(ចុះ ៤៥០រៀល) និងប្រេងម៉ាស៊ូតត្រូវលក់តម្លៃ ៥.៣០០រៀល/លីត្រ(ចុះ ៣០០រៀល)។

បណ្ដាញសង្គម

ព័ត៌មានថ្មីៗ

សមាជិកព្រឹទ្ធសភាហ្វីលីពីនអំពាវនាវឲ្យពង្រឹងសម្ព័ន្ធភាពការពារជាតិ អំឡុងទស្សនកិច្ចនៅតំបន់កោះមានជម្លោះជាមួយចិន

លោក Macron៖ សេចក្តីសម្រេចពីពន្ធរបស់តុលាការកំពូលអាមេរិក បង្ហាញពីតុល្យភាពអំណាច ក្នុងប្រទេសប្រជាធិបតេយ្យ

ក្រុមប្រដាប់អាវុធ សម្លាប់មនុស្សយ៉ាងតិច ៥០នាក់ ហើយចាប់ពង្រត់ស្ត្រី និងកុមារ នៅនីហ្សេរីយ៉ា

ស៊ែប៊ីជំរុញឲ្យពលរដ្ឋចាកចេញពីអ៊ីរ៉ង់ «ឲ្យបានឆាប់តាមដែលអាច» ក្រោយលោក Trump គំរាមប្រតិបត្តិការយោធា

លោកស្រី Takaichi សន្យាបញ្ចប់ការរឹតត្បិត និងពង្រឹងសន្តិសុខ នៅក្នុងសុន្ទរកថាគោលនយោបាយ

លោក Zelenskyy៖ អ៊ុយក្រែនរំដោះបានដែនដី ៣០០គីឡូម៉ែត្រការ៉េ អំឡុងការវាយបកនៅភាគខាងត្បូង

ក្រុមសមាជិកព្រឹទ្ធសភាប្រចាំភូមិភាគទី២ សហការជាមួយក្រុមគ្រូពេទ្យស្ម័គ្រចិត្ត ចុះពិនិត្យព្យាបាលជំងឺជូនប្រជាពលរដ្ឋដោយមិនយកកម្រៃ នៅឃុំដារ ស្រុកមេមត់ ខេត្តត្បូងឃ្មុំ

លោក Trump ជំរុញសហរដ្ឋអាមេរិកឲ្យធ្វើសង្គ្រាមជាមួយអ៊ីរ៉ង់ ខណៈទីប្រឹក្សាឲ្យផ្តោតលើសេដ្ឋកិច្ច

សម្តេច ម៉ែន សំអន ជួបសំណេះសំណាលជាមួយរចនាសម្ព័ន្ធគណៈចលនាមហាជនខេត្តស្វាយរៀង

រដ្ឋាករទឹកស្វយ័តក្រុងភ្នំពេញ លក់ទឹកបោះដុំឲ្យប្រតិបត្តិករឯកជន ដើម្បីរួមគ្នាអភិវឌ្ឍន៍សង្គម-សេដ្ឋកិច្ច

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877