BTV NEWS

គណៈប្រតិភូធុរកិច្ចមកពីហុងកុង ក្វាងទុង និងម៉ាកាវ បង្ហាញចំណាប់អារម្មណ៍ក្នុងការស្វែងរកឱកាសវិនិយោគលើវិស័យសក្តានុពលនៅកម្ពុជា

សម្តេចតេជោ ហ៊ុន សែន ចែករំលែកអត្ថបទវិភាគរបស់អ្នកជំនាញផ្នែកទំនាក់ទំនងអន្តរជាតិ និងសន្តិសុខរបស់ប្រទេសថៃ ដែលមានចំណងជើងថា «ស្វាដោះសំណាញ់!»

សម្តេចធិបតី៖កម្ពុជាគាំទ្រពេញទំហឹង និងបន្តប្តេជ្ញាចិត្តធ្វើការយ៉ាងជិតស្និទ្ធជាមួយរដ្ឋសមាជិកអាស៊ាន ប្រទេសបូកបី និងដៃគូសន្ទនាដើម្បីបំប្លែងឯកសារទៅជាសកម្មភាពជាក់ស្តែង

សម្តេចធិបតី ហ៊ុន ម៉ាណែត៖នៅទូទាំងពិភពលោកនិន្នាការផ្លាស់ប្តូរចំនួនបីកំពុងរៀបចំរដ្ឋបាលសាធារណៈឡើងវិញទោះបីជាក្នុងកម្រិត និងល្បឿនខុសៗគ្នាក៏ដោយ

ព័ត៌មានសំខាន់ៗ

កម្ពុជា-ចិន ប្រារព្ធពិធីនាំចេញផ្លែមៀនស្រស់ផ្លូវការនៅព្រឹកថ្ងៃនេះ

ភ្នំពេញ៖ នៅទីស្ដីការក្រសួងកសិកម្ម រុក្ខាប្រមាញ់ និងនេសាទ នាព្រឹកថ្ងៃទី២៧ ខែតុលា ឆ្នាំ២០២២នេះ មានរៀបចំពិធីសម្ភោធការនាំចេញផ្លែមៀនស្រស់កម្ពុជាទៅកាន់ទីផ្សារប្រទេសចិន។ ពិធីនេះបានប្រព្រឹត្តទៅក្រោមអធិបតីភាពឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងឯកឧត្តម Wang Wentian ឯកអគ្គរដ្ឋទូតសាធារណរដ្ឋប្រជាមានិតចិនប្រចាំនៅកម្ពុជា និងមានការអញ្ញេីញចូលរួមពីថ្នាក់ដឹកនាំមន្រ្តីរាជការ តំណាងក្រសួង ស្ថាប័នពាក់ព័ន្ធ និងមន្ទីរកសិកម្មខេត្តចំនួន៤មកពីខេត្តកណ្តាល ប៉ៃលិន បន្ទាយមានជ័យ និងខេត្តបាត់ដំបង ព្រមទាំងសហគមន៍កសិកម្មមៀននានាសរុបចំនួនប្រមាណជាង១០០នាក់។ សូមរម្លឹកថា នៅខែមិថុនា ឆ្នាំ២០១៩ កម្ពុជាបានចាប់ផ្តើមស្នើសុំចរចាលក្ខខណ្ឌតម្រូវកួតតាមនាម័យរីកទីផ្សារ នាំចេញផ្លែមៀនកម្ពុជាទៅកាន់ប្រទេសចិន ដោយភ្ជាប់ជាមួយឯកសារបច្ចេកទេសសម្រាប់ការវិភាគសមាសភាពតង។ បន្ទាប់មកនៅខែសីហា ឆ្នាំ២០២១ អត្ថរដ្ឋបាលគយនៃសាធារណរដ្ឋប្រជាជិតចិន (GAI បានផ្ញើ លិខិតឆ្លើយតបស្តីពីលទ្ធផលនៃការធ្វើវិភាគហានិភ័យសមាសភាពចម្រៃលើដីណាំមៀនកម្ពុជា ដោយ បានបញ្ចាក់ជាមានសមាសភាពចង្រៃចំនួន៨ រឺជវចហាមឃាត់ដោយប្រទេសចិន។បន្ទាប់ពីការចរចារួច ភាគីទាំងពីរបានយល់ព្រមដកចេញរុយចោះផ្លែឈើចំនួន២ប្រភេទចេញពីបញ្ជីហាមឃាត់របស់ប្រទេសចិន។កម្ពុជាបានខិតខំប្រឹងប្រែង និងយកចិត្តទុកដាក់យ៉ាងខ្ពស់លេីការងារខាងលេី។ បន្ទាប់ពីការចរចាលក្ខខណ្ឌតម្រូវភូតគាមអនាម័យបើកទីផ្សារអស់រយៈពេលជាង៣ឆ្នាំ រួចមក នៅថ្ងៃទី៧ ខែកញ្ញា ឆ្នាំ២០២២នេះ អត្ថរដ្ឋបាលគយនៃសាធារណរដ្ឋប្រជាជិតចិន (GACC) បានអនុម័តចុះបញ្ជីជាផ្លូវការនូវចម្ការមៀនចំនួន៧៤ និងរោងចក្រវេចខ្ចប់ចំនួន៨ សម្រាប់នាំចេញផ្លែមៀនស្រស់កម្ពុជាទៅកាន់ប្រទេសចិន។

អាមេរិក និងអង់គ្លេសព្រមព្រៀងគាំទ្រអ៊ុយក្រែន និងប្រឆាំងប្រទេសចិន

អាមេរិក៖ សេតវិមានបាននិយាយថា ប្រធានាធិបតីសហរដ្ឋអាមេរិកលោក Joe Biden និងនាយករដ្ឋមន្ត្រីថ្មីរបស់ចក្រភពអង់គ្លេសលោក Rishi Sunak បានព្រមព្រៀងគ្នាក្នុងកិច្ចសន្ទនាកាលពីថ្ងៃអង្គារ ដើម្បីធ្វើការរួមគ្នាគាំទ្រប្រទេសអ៊ុយក្រែន និងប្រឆាំងប្រទេសចិន។ មេដឹកនាំប្រទេសទាំង២ បានជួបសន្ទនាជាលើកដំបូងរយៈជាច្រើនម៉ោង បន្ទាប់ពីលោក Sunak បានក្លាយជានាយករដ្ឋមន្ត្រីទី៣ របស់ចក្រភពអង់គ្លេសនៅឆ្នាំនេះ ដោយកំពុងទទួលនូវវិបត្តិសេដ្ឋកិច្ចបន្ទាប់ពីការលាលែងពីតំណែងរបស់លោកស្រី Liz Truss ក្រោយការចូលកាន់តំណែងត្រឹមតែ ៤៩ថ្ងៃ។ សេតវិមានបាននិយាយថា មេដឹកនាំទាំង២ បានអះអាងជាថ្មីអំពីទំនាក់ទំនងពិសេសដែលមានរវាងសហរដ្ឋអាមេរិក និងអង់គ្លេស និងបាននិយាយថា ប្រទេសទាំង២ នឹងធ្វើការរួមគ្នាដើម្បីជំរុញសន្តិសុខ និងភាពរុងរឿងពិភពលោក។សេចក្តីថ្លែងការណ៍បាននិយាយអំពីសង្គ្រាម បង្កដោយការឈ្លានពានរបស់រុស្ស៊ីលើប្រទេសជិតខាង ដែលគាំទ្រដោយប្រទេសលោកខាងលិចថា មេដឹកនាំបានព្រមព្រៀងលើសារៈសំខាន់នៃការធ្វើការរួមគ្នា ដើម្បីគាំទ្រប្រទេសអ៊ុយក្រែន និងនាំយកប្រទេសរុស្ស៊ីឲ្យទទួលខុសត្រូវចំពោះការឈ្លានពានរបស់ខ្លួន។ សេតវិមានបាននិយាយថា លោក Biden និងលោក Sunak បានព្រមព្រៀងដោះស្រាយបញ្ហាប្រឈមដែលបង្កឡើងដោយប្រទេសចិន ដែលទីក្រុងវ៉ាស៊ីនតោនបានកំណត់ថាជាគូប្រជែងភូមិសាស្ត្រ នយោបាយ និងសេដ្ឋកិច្ចកំពូលរបស់ខ្លួននៅលើឆាកពិភពលោក នាពេលបច្ចុប្បន្ននេះ៕អត្ថបទ៖ ប៊ុនថន

លោក Sunak តែងតាំងក្រុមរដ្ឋមន្ត្រីកំពូលក្នុងការរុះរើគណៈរដ្ឋមន្ត្រី

អង់គ្លេស៖ លោក Rishi Sunak បានក្លាយជានាយករដ្ឋមន្ត្រីទី៣ របស់ចក្រភពអង់គ្លេសនៅឆ្នាំនេះកាលពីថ្ងៃអង្គារ ដោយត្រូវបំពេញភារកិច្ចក្នុងការទប់ទល់វិបត្តិសេដ្ឋកិច្ច ដែលបានធ្វើឱ្យហិរញ្ញវត្ថុរបស់ប្រទេសស្ថិតក្នុងស្ថានភាពមិនច្បាស់លាស់ ហើយមនុស្សរាប់លាននាក់កំពុងតស៊ូក្នុងការចំណាយលើតម្លៃហក់ឡើងនៃតម្លៃអាហារ និងតម្លៃថាមពលរបស់ពួកគេ។ លោក Sunak បានកំណត់ភ្លាមៗចំពោះការតែងតាំងគណៈរដ្ឋមន្ត្រី ក្នុងគោលបំណងដឹកនាំរដ្ឋាភិបាល ខណៈនាំយកមនុស្សមកពីផ្នែកផ្សេងៗគ្នានៃគណបក្សអភិរក្សនិយម។ លោកបានដកចេញសមាជិករដ្ឋាភិបាលរបស់លោកស្រី Liz Truss ជាច្រើនរូប ប៉ុន្តែបានរក្សាទុកឥស្សរជនជាន់ខ្ពស់មួយចំនួនឲ្យនៅដដែល។ រដ្ឋមន្ត្រីក្រសួងមហាផ្ទៃលោកស្រី Suella Braverman ដែលបានលាលែងពីតំណែងកាលពីសប្តាហ៍មុន ក្នុងចំណាត់ការដែលជួយជំរុញឱ្យមានការដួលរលំលោកស្រី Liz Truss ទទួលបានការងាររបស់លោកស្រីមកវិញ។ លោក Sunak មានគោលបំណងប្រមូលផ្តុំគណៈរដ្ឋមន្ត្រីដែលមានបទពិសោធន៍ និងសមត្ថភាព ប៉ុន្តែការបែកបាក់របស់គណបក្សស្តាំនិយមកណ្តាលជុំវិញបញ្ហាអន្តោប្រវេសន៍ ទំនាក់ទំនងជាមួយសហភាពអឺរ៉ុប និងបញ្ហាធំៗផ្សេងទៀតនៅតែជាបញ្ហាដ៏ស៊ីជម្រៅ៕អត្ថបទ៖ ប៊ុនថន

លោក Biden ព្រមានទីក្រុង Moscow ថា ការប្រើប្រាស់អាវុធនុយក្លេអ៊ែរនឹងជាកំហុសដ៏ធ្ងន់ធ្ងរបំផុត

អាមេរិក៖ ស្របពេលមានការចោទប្រកាន់ដដែលៗរវាងភាគីសង្គ្រាមថា ភាគីម្ខាងទៀតគ្រោងនឹងពង្រីកជម្លោះរបស់ពួកគេដោយប្រើអាវុធមិនធម្មតានោះ លោកប្រធានាធិបតី Joe Biden កាលពីថ្ងៃអង្គារបានព្រមានរុស្ស៊ីថា វានឹងជាកំហុសដ៏ធ្ងន់ធ្ងរបំផុតក្នុងការបំផ្ទុះអាវុធនុយក្លេអ៊ែរ។ ក្នុងរយៈពេល ៣ថ្ងៃចុងក្រោយនេះរុស្ស៊ីបានចោទប្រកាន់ដោយគ្មានហេតុផលថា ទីក្រុង Kyiv មានបំណងវាយប្រហារគ្រាប់បែកវិទ្យុសកម្មដែលបង្កឱ្យមានការព្រួយបារម្ភខ្លាំង ពីការបែកធ្លាយកាកសំណល់វិទ្យុសកម្មនៅពេលវាផ្ទុះ។ អ៊ុយក្រែនបានឆ្លើយតបដោយនិយាយថា ទីក្រុង Moscow កំពុងបង្កើតលេសសម្រាប់ការប្រើអាវុធនុយក្លេអ៊ែរ ក្នុងសង្គ្រាមដែលខ្លួនចាញ់នៅសមរភូមិ។លោក Biden និយាយថា គេមិនច្បាស់ទេថា តើវិមានក្រឹមឡាំងកំពុងព្យាយាមបង្កើតឆាកល្ខោន សម្រាប់វាយប្រហារដោយនុយក្លេអ៊ែរ ឬយ៉ាងណា ប៉ុន្តែបានលើកឡើងពីការព្រមានម្ដងហើយម្ដងទៀត ពីរដ្ឋបាលរបស់លោកទាក់ទងនឹងសកម្មភាពនេះ។ លោក Biden និយាយថា ខ្ញុំហ៊ាននិយាយថា រុស្ស៊ីនឹងប្រព្រឹត្តកំហុសធ្ងន់ធ្ងរបំផុត បើប្រើអាវុធនុយក្លេអ៊ែរតាកទិក។ ខ្ញុំមិនធានាចំពោះអ្នកគ្រប់គ្នាទេថា វាជាប្រតិបត្តិការបំភាន់ភ្នែក ខ្ញុំមិនដឹងទេ ប៉ុន្តែវានឹងជាកំហុសដ៏ធ្ងន់ធ្ងរបំផុត៕អត្ថបទ៖ សុខមាន

អ្នកស្លាប់ដោយព្យុះស៊ីក្លូន Sitrang កើនឡើងដល់ ៣៥នាក់នៅបង់ក្លាដែស ខណៈលំនៅឋានជាច្រើនត្រូវបានបំផ្លាញ

បង់ក្លាដែស៖ យោងតាមក្រុមមន្ត្រី និងប្រព័ន្ធផ្សព្វផ្សាយបានរាយការណ៍ថា ចំនួនអ្នកស្លាប់ដោយសារព្យុះស៊ីក្លូន Sitrang បានកើនឡើងដល់ ៣៥នាក់ ហើយលំនៅឋានជាច្រើនខ្នងត្រូវបានបំផ្លាញ ខណៈព្យុះនេះបានបោកបក់មកលើឆ្នេរសមុទ្រភាគខាងត្បូង និងផ្នែកកណ្តាលរបស់ប្រទេសបង់ក្លាដែស។ សារព័ត៌មានបានរាយការណ៍ថា ព្យុះ Sitrang បានធ្វើឲ្យមានបំណាក់ដី ហើយបានចុះខ្សោយទៅវិញជាព្យុះត្រូពិចនៅប្រទេសបង់ក្លាដែសកាលពីថ្ងៃអង្គារ។ សារព័ត៌មានបានរាយការណ៍ថា ព្យុះស៊ីក្លូនបានឆក់យកជីវិតមនុស្ស ៣៥នាក់ ព្រមទាំងបានបំផ្លាញលំនៅឋាន និងហេដ្ឋារចនាសម្ព័ន្ធផ្សេងទៀត រម្លើងដើមឈើ និងកាត់ផ្តាច់ប្រព័ន្ធទំនាក់ទំនង ផ្លូវថ្នល់ និងការផ្គត់ផ្គង់ថាមពល។ប្រជាជនប្រមាណ ១០លាននាក់គ្មានថាមពលប្រើប្រាស់នៅក្នុងស្រុកជាច្រើន នៅតាមឆ្នេរសមុទ្រកាលពីថ្ងៃអង្គារ។ ព្យុះស៊ីក្លូនបានបោកបក់មកលើឆ្នេរភាគនិរតីនៃប្រទេសបង់ក្លាដែស ប៉ុន្តែរបាយការណ៍ប្រព័ន្ធផ្សព្វផ្សាយបានបញ្ជាក់ថា ការស្លាប់ខ្ពស់បំផុតត្រូវបានគេរាយការណ៍នៅឆ្នេរសមុទ្រ Chattogram ភាគនិរតី ជាកន្លែងដែលនាវាបូមខ្សាច់ដែលដឹកខ្សាច់បានលិចនៅឈូងសមុទ្រ Bengal បណ្តាលឲ្យកម្មករ ៨នាក់លង់ទឹក ខណៈខ្យល់បក់បោកខ្លាំង៕អត្ថបទ៖ ប៊ុនថន

អ៊ុយក្រែនជំរុញពលរដ្ឋដែលបានភៀសខ្លួនចេញពីប្រទេសបន្តរស់នៅបរទេស ខណៈខ្វះថាមពលក្នុងរដូវរងា

អ៊ុយក្រែន៖ រដ្ឋមន្ត្រីអ៊ុយក្រែនមួយរូបនិយាយថា ជនភៀសខ្លួនដែលបានរត់គេចក្រោយការវាយលុករបស់រុស្ស៊ីលើអ៊ុយក្រែន គួរតែបន្តស្នាក់នៅបរទេសនៅរដូវរងានេះដោយសារការដាច់ចរន្តអគ្គិសនី ព្រោះតែការទម្លាក់គ្រាប់បែកពីរុស្ស៊ីលើហេដ្ឋារចនាសម្ព័ន្ធថាមពលសំខាន់ៗ។ ក្នុងបទសម្ភាសន៍ផ្សាយនៅលើកញ្ចក់ទូរទស្សន៍រដ្ឋអ៊ុយក្រែនកាលពីថ្ងៃអង្គារ ឧបនាយករដ្ឋមន្ត្រីលោកស្រី Iryna Vereshchuk បានប្រាប់ពលរដ្ឋអ៊ុយក្រែនដែលបច្ចុប្បន្នកំពុងរស់នៅបរទេសថា ពួកគេគួរតែរង់ចាំរហូតដល់រដូវផ្ការីក ចាំវិលមកប្រទេសអ៊ុយក្រែនវិញ។ លោកស្រីបាននិយាយថា ខ្ញុំចង់ស្នើដល់ពួកគេកុំទាន់ត្រឡប់មកវិញ។ យើងចាំបាច់ត្រូវតស៊ូរដូវរងានេះឲ្យបាន។ រុស្ស៊ីបានវាយប្រហារដោយមីស៊ីល និងយានដ្រូនជាបន្តបន្ទាប់ដាក់គោលដៅលើហេដ្ឋារចនាសម្ព័ន្ធថាមពលរបស់អ៊ុយក្រែន បណ្ដាលឲ្យដាច់ចរន្តអគ្គិសនី និងរំខានដល់ការផ្គត់ផ្គង់ទឹក បន្ទាប់ពីការផ្ទុះបានបំផ្លិចបំផ្លាញស្ពានតភ្ជាប់ពីតំបន់គ្រីមៀទៅរុស្ស៊ីកាលពីថ្ងៃទី៨ ខែតុលា។ទីក្រុង Kyiv និយាយថា ការវាយប្រហារនានាបានបំផ្លិចបំផ្លាញប្រព័ន្ធថាមពល ៤០%។ មន្ត្រីក្នុងតំបន់មួយរូបនៅទីក្រុង Kyiv បានព្រមានកាលពីសប្ដាហ៍មុនថា ប្រជាពលរដ្ឋត្រូវតែត្រៀមសម្រាប់ការកាត់ផ្ដាច់ថាមពល ដែលអាចនឹងកើតមានបន្តរយៈពេលជាច្រើនថ្ងៃ ឬច្រើនសប្ដាហ៍៕អត្ថបទ៖ សុខមាន

សម្តេចអគ្គមហាពញាចក្រី ហេង សំរិន អញ្ជើញដល់ប្រទេសថៃដោយសុវត្ថិភាពដើម្បីចូលរួមវេទិកាសភាអាស៊ី-ប៉ាស៊ីហ្វិក (APPF) លើកទី៣០

ភ្នំពេញ៖ សម្តេចអគ្គមហាពញាចក្រី ហេង សំរិន ប្រធានរដ្ឋសភា និងគណៈប្រតិភូជាន់ខ្ពស់សភានៃព្រះរាជាណាចក្រកម្ពុជា បានអញ្ជើញដល់ទីក្រុងបាងកក ក្នុងការអញ្ជើញចូលរួមវេទិកាសភាអាស៊ី-ប៉ាស៊ីហ្វិក (APPF) លើកទី៣០ ដែលនឹងប្រារព្ធធ្វើឡើងពីថ្ងៃទី២៦-២៩ ខែតុលា ឆ្នាំ២០២២ នៅព្រឹកថ្ងៃពុធ ទី២៦ ខែតុលាឆ្នាំ២០២២នេះ ។ នៅអាកាសយានដ្ឋានអន្តរជាតិដនមឿង សម្តេចប្រធានរដ្ឋសភា និងគណៈប្រតិភូទទួលស្វាគមន៍យ៉ាងកក់ក្តៅបំផុតពីសំណាក់ថ្នាក់ដឹកនាំសភាប្រទេសថៃ និងឯកឧត្តម អ៊ូក សោភ័ណ ឯកអគ្គរាជទូតកម្ពុជាប្រចាំនៅប្រទេសថៃ និងសហការី។តាមគម្រោង នៅរសៀលថ្ងៃនេះ សម្តេចប្រធានរដ្ឋសភាមានកម្មវិធីបន្តបន្ទាប់ រួមមាន៖ ជួបពិភាក្សាការងារជាមួយប្រធានរដ្ឋសភាប្រទេសឡាវ ឯកឧត្តម សាយ សំភូន ភូមវិហាន អនុញ្ញាតឱ្យ ឯកឧត្តមអគ្គលេខាធិការអន្តរសភាអាស៊ាន (AIPA) ចូលជួបសម្តែងការគួរសម និងបន្ទាប់មកទៀត សម្តេចនឹងអញ្ជើញចូលរួមពិធីបើកជាផ្លូវការ កិច្ចប្រជុំប្រចំាឆ្នាំវេទិកាសភាអាស៊ី-ប៉ាស៊ីហ្វិក (APPF) លើកទី៣០ ផងដែរ៕

រុស្ស៊ីបង្កើនការផលិតគ្រឿងសព្វាវុធគ្រប់ប្រភេទ

រុស្ស៊ី៖ អនុប្រធានក្រុមប្រឹក្សាសន្តិសុខជាតិរុស្ស៊ីលោក Dmitry Medvedev បាននិយាយកាលពីដើមសប្ដាហ៍នេះថា ប្រទេសរុស្ស៊ីកំពុងបង្កើនការផលិតអាវុធគ្រប់ប្រភេទទាំងអស់ចាប់ពីរថក្រោះ និងកាំភ្លើង រហូតដល់មីស៊ីលបាញ់ស៊ីបចំគោលដៅ និងយានដ្រូន។ លោកបាននិយាយនៅលើសារបណ្ដាញ Telegram ថា ការផលិតអាវុធ និងយុទ្ធោបករណ៍ពិសេសៗគ្រប់ប្រភេទកំពុងកើនឡើងទ្វេដងចាប់ពីរថក្រោះ និងកាំភ្លើងរហូតដល់មីស៊ីលបាញ់ស៊ីបចំគោលដៅ និងយានដ្រូន។ ត្រៀមខ្លួនទប់ទល់ទៅ។ អ្នកនយោបាយជើងចាស់រូបនេះបានផ្ដាំទៅគូប្រជែងរបស់រុស្ស៊ី និងបានណែនាំពួកគេកុំសង្ឃឹមឲ្យសោះថា រុស្ស៊ីនឹងអស់អាវុធនោះ។ លោកថា នៅពេលអានការវិភាគរបស់សត្រូវ ខ្ញុំច្រានចោលការលើកឡើងដដែលៗថា រុស្ស៊ី នឹងអស់យុទ្ធោបករណ៍ឆាប់ៗ និងប្រើប្រាស់អាវុធច្រើនពេក ដូចជាពាក្យថាអ្វីៗត្រូវបានប្រើប្រាស់អស់ហើយ។ វាគ្មានរឿងបែបនេះកើតឡើងទេ។ក្រុមមន្ត្រីបាននិយាយថា ក្រោមបទបញ្ជាពីអគ្គមេបញ្ជាការកងទ័ពគឺលោកប្រធានាធិបតីរុស្ស៊ី Vladimir Putin លោក Medvedev បានធ្វើដំណើរទៅទីក្រុង Nizhny Tagil ពិនិត្យមើលការផលិតរថក្រោះនៅរោងចក្រផលិតអាវុធ Uralvagonzavod ដែលជារោងចក្រផលិតរថយន្តប្រយុទ្ធធំបំផុតក្នុងតំបន់នោះ៕អត្ថបទ៖ សុខមាន

រុស្ស៊ីបង្ហាញអង្គការសហប្រជាជាតិថា អ៊ុយក្រែនកំពុងត្រៀមប្រើគ្រាប់បែកវិទ្យុសកម្ម

រុស្ស៊ី៖ រុស្ស៊ីបានប្រាប់ក្រុមប្រឹក្សាសន្តិសុខអង្គការសហប្រជាជាតិថា អ៊ុយក្រែនកំពុងត្រៀមប្រើប្រាស់គ្រាប់បែកវិទ្យុសកម្ម រួមជាមួយសារធាតុវិទ្យុសកម្មនៅលើទឹកដីខ្លួនឯង ដែលលោកខាងលិច និងក្រុមមន្ត្រីអ៊ុយក្រែននិយាយថា ជាលេសពង្រីកសង្គ្រាម។ ទីក្រុង Moscow បានផ្ញើលិខិតមួយច្បាប់រៀបរាប់លម្អិតការចោទប្រកាន់ ទៅអង្គការសហប្រជាជាតិកាលពីថ្ងៃចន្ទ និងបានលើកបញ្ហានេះនៅក្នុងកិច្ចប្រជុំបិទទ្វារមួយ ជាមួយក្រុមប្រឹក្សាសន្តិសុខអង្គការសហប្រជាជាតិ។ លោក Dmitry Polyanskiy ឯកអគ្គរដ្ឋទូតរងរុស្ស៊ីប្រចាំនៅអង្គការសហប្រជាជាតិ បានប្រាប់ក្រុមអ្នកសារព័ត៌មានថា យើងពិតជាពេញចិត្តខ្លាំងណាស់ ព្រោះយើងបានលើកឡើងពីការពិតនៃស្ថានភាព។ ខ្ញុំមិនប្រកាន់ខឹងនឹងមនុស្សដែលនិយាយថា រុស្ស៊ីកំពុងព្យាយាមធ្វើឲ្យគេជឿ ទាំងដែលមិនមានរឿងនេះកើតឡើងព្រោះវាធ្ងន់ធ្ងរ ជាគ្រោះមហន្តរាយដ៏ធំដែលគំរាមកំហែងយ៉ាងខ្លាំងដល់ភពផែនដីទាំងមូលនោះទេ។អ្នកនាំពាក្យវិមានក្រឹមឡាំងលោក Dmitry Peskov កាលពីថ្ងៃអង្គារបានបញ្ជាក់ជាថ្មីពីការចោទប្រកាន់របស់រុស្ស៊ី និងនិយាយថា លោកខាងលិចឆោតល្ងង់ដែលមិនព្រមជឿរឿងទាំងនោះ។ រឿងនេះបានកើតឡើងក្រោយមានការលើកឡើងពីទីក្រុង Moscow ដែលថា ខ្លួនអាចត្រូវបង្ខំឲ្យប្រើប្រាស់អាវុធនុយក្លេអ៊ែរតាកទិកប្រឆាំងនឹងអ៊ុយក្រែន ដែលប្រធានាធិបតីរបស់ប្រទេសនេះគឺលោក Volodymyr Zelenskyy បាននិយាយថា ការចោទប្រកាន់ពីការប្រើប្រាស់គ្រាប់បែកវិទ្យុសកម្មនោះបង្ហាញថា ទីក្រុង Moscow កំពុងមានផែនការវាយប្រហារ និងព្យាយាមទម្លាក់កំហុសឲ្យទីក្រុង Kyiv៕អត្ថបទ៖ សុខមាន

រដ្ឋមន្រ្តីក្រសួងយុត្តិធម៌ចេញអធិបញ្ជាឲ្យព្រះរាជអាជ្ញាចាត់វិធានការផ្លូវច្បាប់ជាបន្ទាន់ លេីជនក្បត់ជាតិ សម រង្ស៉ី ប្រមាថលើអង្គព្រះមហាក្សត្រ

ភ្នំពេញ៖ ឯកឧត្តម កើត រិទ្ធ រដ្ឋមន្រ្តីក្រសួងយុត្តិធម៌ បានចេញអធិបញ្ជាឲ្យលោកច្រឹង ខ្មៅ ព្រះរាជអាជ្ញាអមសាលាដំបូងរាជធានីភ្នំពេញ ចាត់វិធានការផ្លូវច្បាប់ជាបន្ទាន់ និងតឹងរឹងបំផុតលេីឈ្មោះ សម រង្ស៉ី ដែលប្រមាថយ៉ាងធ្ងន់ធ្ងរបំផុតលើអង្គព្រះមហាក្សត្រ នៃព្រះរាជាណាចក្រកម្ពុជា។ យងតាមលិខិតចុះថ្ងៃទី២៥ ខែុលា ឯកឧត្តម កេីត រិទ្ធ រដ្ឋមន្រ្តីក្រសួងយុត្តិធម៌ បានជម្រាបជូនលោកច្រឹង ខ្មៅ ព្រះរាជអាជ្ញាអមសាលាដំបូងរាជធានីភ្នំពេញថា នៅក្នុងវីដេអូមួយដែល ត្រូវបានបង្ហោះក្នុងបណ្តាញសង្គម Facebook កាលពីពេលថ្មីៗនេះ ឈ្មោះ សម រង្ស៊ី បាននិយាយប្រមាថយ៉ាងធ្ងន់ធ្ងរ បំផុតលើព្រះចេស្តា ព្រះករុណា ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត នៃព្រះរាជាណាចក្រកម្ពុជា ថា "មិនមានមនសិការជាតិ" និង "ក្បត់ជាតិ"។សម្ដីដែលឈ្មោះ សម រង្ស៊ី បាន និយាយនៅក្នុងវីដេអូដែលត្រូវបាននិងកំពុងផ្សព្វផ្សាយជាសាធារណៈតាមរយៈបណ្ដាញសង្គមនេះ គឺជាការប្រមាថ យ៉ាងធ្ងន់ធ្ងរបំផុតចំពោះ អង្គព្រះមហាក្សត្រ ដោយបានធ្វើឱ្យប៉ះពាល់ដល់សេចក្តីថ្លៃថ្នូរ និងព្រះកិត្តិនាមរបស់ ព្រះមហាក្សត្រ នៃព្រះរាជាណាចក្រកម្ពុជា ដែលជាទីគោរពសក្ការៈដ៏ខ្ពង់ខ្ពស់បំផុតរបស់ប្រជារាស្ត្រខ្មែរ ទូទាំងប្រទេស។ ទង្វើនេះ គឺជាការរំលោភបំពានម៉ាត្រា ៧ នៃរដ្ឋធម្មនុញ្ញនៃព្រះរាជាណាចក្រកម្ពុជា ដែលជាច្បាប់ កំពូលរបស់ជាតិ ដែលចែងថា "អង្គព្រះមហាក្សត្រមិនអាចនរណារំលោភបំពានបានឡើយ" ហើយអំពើនេះ ក៏ត្រូវ បានកំណត់ជាបទ "ប្រមាថចំពោះអង្គព្រះមហាក្សត្រ"បទល្មើសព្រហ្មទណ្ឌដែលមានចែង និងផ្តន្ទាទោសតាម បញ្ញត្តិនៃមាត្រា៤៣៧ ស្ទួន នៃក្រមព្រហ្មទណ្ឌ នៃព្រះរាជាណាចក្រកម្ពុជា។យោងតាមមាត្រា២៩ នៃក្រមនីតិវិធីព្រហ្មទណ្ឌនៃព្រះរាជាណាចក្រកម្ពុជា ក្រសួងយុត្តិធម៌សូម ឯកឧត្ដមព្រះរាជអាជ្ញា ចាត់វិធានការផ្លូវច្បាប់ជាបន្ទាន់ និងតឹងរឹងបំផុតចំពោះអំពើប្រមាថយ៉ាងធ្ងន់ធ្ងរបំផុត ចំពោះ អង្គព្រះមហាក្សត្រ ខាងលើ ដោយអនុវត្តស្របតាមនីតិវីធីជាធរមាន៕