នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេច​តេជោ ហ៊ុន សែន ចែករំលែក​អត្ថបទ​អ្នកស្រាវជ្រាវថៃ ក្រោមចំណងជើងថា «មនុស្សធម៌ខ្វះការអាណិតអាសូរ»
ឯកឧត្តម ឌី វិជ្ជា និងលោកជំទាវ ហ៊ុន ម៉ាណា អញ្ជើញប្រគេនទៀនព្រះវស្សា និងនាំយកទេយ្យវត្ថុ ប្រគេនវត្តចំនួន១២វត្ត និងចែកអំណោយដល់យាយជីតាជី នៅស្រុកក្រគរ និងស្រុកភ្នំក្រវាញ ខេត្តពោធិ៍សាត់
គណៈប្រតិភូធុរកិច្ចមកពីហុងកុង ក្វាងទុង និងម៉ាកាវ បង្ហាញចំណាប់អារម្មណ៍ក្នុងការស្វែងរកឱកាសវិនិយោគលើវិស័យសក្តានុពលនៅកម្ពុជា
សម្តេចតេជោ ហ៊ុន សែន ចែករំលែកអត្ថបទវិភាគរបស់អ្នកជំនាញផ្នែកទំនាក់ទំនងអន្តរជាតិ និងសន្តិសុខរបស់ប្រទេសថៃ ដែលមានចំណងជើង​ថា «ស្វាដោះសំណាញ់!»

ព័ត៌មានសំខាន់ៗ

កូនឈើជិតមួយម៉ឺនបួនពាន់ដើមត្រូវបានដាំ ដើម្បីអបអរសាទរពិធី រុក្ខទិវា ៩ កក្កដា ២០២២

2022/07/09 07:00:17 pm        1119
Facebook Telegram Linkin
បាត់ដំបង៖ បន្ទាប់ពីអាក់ខានប្រារព្ធពិធី រុក្ខទិវា ៩ កក្ដដា ២ឆ្នាំកន្លងមកនេះ ដោយសារការ​រីករាល​ដាល​នៃជំងឺឆ្លងកូវីដ-១៩ នាឆ្មាំ២០២២នេះ កូនឈើជិតមួយម៉ឺនបួនពាន់ដើម ត្រូវបាន​ដាំ​លើផ្ទៃ​ដីដប់ហិកតា នាស្ថានីយផ្សព្វផ្សាយ និងស្ដារព្រៃឈើសំបួសមាស ខេត្តបាត់ដំបង ដើម្បី​អបអរសាទរ ពិធី រុក្ខទិវា ៩ កក្កដា ២០២២ ក្រោមព្រះរាជាធិបតីភាពដ៏ខ្ពង់ខ្ពស់បំផុត ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត។ជារៀងរាល់ឆ្នាំនៅថ្ងៃទី០៩ ខែកក្កដា គឺជាទិវា​ដ៏​មហានក្ខត្តឬក្សវិសេសវិសាល​ដែល​ព្រះរា​ជា​ណា​ចក្រ​កម្ពុជា តែងតែប្រារព្ធឡើងនូវព្រះរាជពិធីដាំកូនឈើ ដែលហៅថា «រុក្ខទិវា» ក្រោម​ព្រះរាជាធិបតី​ភាពដ៏ខ្ពង់ខ្ពស់បំផុតរបស់ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត។ ប៉ុន្តែ២ឆ្នាំកន្លងនេះ ដោយសារតែការរីករាលដាលនៃជំងឺឆ្លងកូវីដ-១៩ រាជរដ្ឋាភិបាលកម្ពុជាក៏បានសម្រេចឱ្យផ្អាកការរៀបចំព្រះរាជពិធីដ៏ឧត្តុង្គឧត្តម និងមានអត្ថន័យនេះ។ព្រះរាជពិធី «រុក្ខទិវា» ដែលប្រារព្ធឡើងយ៉ាងមហោឡារឹកនេះ ក៏មានការអញ្ជើញចូលរួមពីសម្តេចវិបុលសេនាភក្តី សាយ ឈុំ ប្រធានព្រឹទ្ធសភា សម្តេចពញ្ញាចក្រី ហេង សំរិន ប្រធានរដ្ឋសភា សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ព្រមទាំងសមាជិកព្រឹទ្ធសភា រដ្ឋសភា មន្ត្រីជាន់ខ្ពស់រាជរដ្ឋាភិបាល បណ្ដាឯកអគ្គរដ្ឋទូត និងឯកអគ្គរាជទូតនានាប្រចាំនៅកម្ពុជា ព្រមទាំងថ្នាក់ដឹកនាំ មន្ត្រីរាជការមកពីខេត្តបាត់ដំបង ខេត្តប៉ៃលិន ខេត្តបន្ទាយមានជ័យ ខេត្តពោធិ៍សាត់ ខេត្តកំពង់ឆ្នាំង ខេត្តសៀមរាប និងខេត្តឧត្តរមានជ័យ និងប្រជាពលរដ្ឋយ៉ាងច្រើនកុះករ។របាយការណ៍របស់ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា សម្រាប់ រុក្ខទិវា ឆ្នាំ២០២២នេះ ក្រសួងកសិកម្ម រុក្ខាប្រមាញ់ និងនេសាទ បានសហការជាមួយ​គណៈកម្មាធិការជាតិ​រៀបចំ​បុណ្យជាតិ-អន្តរជាតិ និងអាជ្ញាធរខេត្តបាត់ដំបង ដោយបានជ្រើសរើសកំណត់យកទីតាំងសម្រាប់ប្រារព្ធពិធី រុក្ខទិវា នេះស្ថិតនៅស្ថានីយផ្សព្វផ្សាយ និងស្តារព្រៃឈើសំបួរមាស ក្នុងភូមិសំបួរមាស ឃុំស្នឹង ស្រុកបាណន់ ខេត្តបាត់ដំបង ដែលស្ថានីយនេះត្រូវបានបង្កើតឡើងតាមរយៈប្រកាសរបស់ក្រសួងកសិកម្ម រុក្ខាប្រមាញ់ និងនេសាទ លេខ២៦៧ ប្រក.កសក ចុះថ្ងៃទី១២ ខែមេសា ឆ្នាំ២០១៧ ក្នុងគោលបំណងដាំស្តារព្រៃឈើឡើងវិញ អភិវឌ្ឍន៍ចំណេះដឹងបច្ចេកទេសដាំឈើ បំផុសការចូលរួមដាំឈើ ដើម្បីទប់ស្កាត់ការហូរច្រោះជីជាតិដី កែលម្អគុណភាពដី អភិវឌ្ឍន៍ជីវៈចម្រុះ រួមចំណែកកាត់បន្ថយឧស្ម័នផ្ទះកញ្ចក់លើភពផែនដី ទប់ស្កាត់ការប្រែប្រួលអាកាសធាតុ និងទ្រទ្រង់សកម្មភាពផ្សេងៗទៀតជាច្រើនសម្រាប់ផលប្រយោជន៍របស់ប្រជាសហគមន៍។ រីឯផ្ទៃដីប្រារព្ធ រុក្ខទិវា នាពេលនេះមានទំហំ ១០ហិកតា នៃផ្ទៃដីស្ថានីយផ្សព្វផ្សាយ និងស្តារព្រៃឈើសំបួរមាស ទំហំ ២៦,១៣ហិកតា ហើយកូនឈើដែលត្រូវយកមកដាំមានដើមធ្នង់ ច្រេស គីនីន គ្រញូង ឈើទាល និងម៉ៃសាក់ សរុបទាំងអស់ចំនួន ១៣ ៩៤០ដើម និងបានត្រៀមកូនឈើសម្រាប់ដាំជួសមួយចំនួនទៀត។រុក្ខទិវានេះដែរ ក៏ត្រូវបានខកខានក្នុងការប្រារព្ធបន្ទាប់ពីប្រទេសកម្ពុជា បានជួបនូវវិបត្តិនយោបាយ និងសង្គ្រាម ក្រោយថ្ងៃរដ្ឋប្រហារ ថ្ងៃទី១៨ ខែមីនា ឆ្នាំ១៩៧០។ ដោយផ្អែកលើចក្ខុវិស័យដ៏ត្រចះត្រចង់ និងដើម្បីបន្តស្នាព្រះហស្ថដ៏ថ្លៃថ្លារបស់ព្រះករុណា ព្រះមហាវីរក្សត្រ រាជរដ្ឋាភិបាលកម្ពុជា បានប្រកាសបង្កើតឡើងវិញនូវ «រុក្ខទិវា» តាមសេចក្តីសម្រេចលេខ០៨ ស.ស.រ ចុះថ្ងៃទី១២ ខែមករា ឆ្នាំ១៩៩០ របស់ក្រុមប្រឹក្សារដ្ឋមន្ត្រី ដែលត្រូវប្រារព្ធឡើងនៅថ្ងៃទី០៩ ខែកក្កដា ហើយច្បាប់ស្តីពីព្រៃឈើឆ្នាំ២០០២ បានកំណត់ទិវាពលកម្មដាំដើមឈើជាប្រពៃណីជាតិ ហៅ «រុក្ខទិវា» នេះនៅថ្ងៃទី០៩ ខែកក្កដា ជារៀងរាល់ឆ្នាំ។គិតចាប់ពីឆ្នាំ១៩៩២ រហូតមកដល់ឆ្នាំ២០១៩ ពិធី «រុក្ខទិវា» បានប្រារព្ធនៅតាមបណ្តារាជធានី-ខេត្តចំនួន ១៤ទូទាំងប្រទេសសរុបចំនួន ២៩លើក នៅលើផ្ទៃដីទំហំ ៤៧០ហិកតា ៦៤អា។ ប៉ុន្តែដោយសារប្រទេសជាតិជួបវិបត្តិជាសាកលនៃជំងឺកូវីដ១៩ កម្ពុជា បានអាក់ខានពុំបានរៀបចំពិធី «រុក្ខទិវា» ចំនួនពីរឆ្នាំ គឺឆ្នាំ២០២០ និង២០២១ ដើម្បីចូលរួមទប់ស្កាត់ការរាតត្បាតជំងឺឆ្លងជាសាកលនៅក្នុងសហគមន៍។ពិធី « រុក្ខទិវា » គឺជាចលនាបំផុសបំផុលការដាំដុះដើមឈើដ៏ធំមួយ និងជាប្រពៃណីដ៏ល្អផូរផង់ឧត្តុង្គឧត្តមនៃព្រះរាជាណាចក្រកម្ពុជា ដែលចលនានេះចាប់មានតាំងពី សម័យសង្គមរាស្រ្តនិយម ក្រោមព្រះរាជបូជនីយកិច្ចផ្ដួចផ្ដើម និងដឹកនាំដោយព្រះករុណា ព្រះបាទសម្តេច ព្រះនរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋ ព្រះវររាជបិតាកសិកម្មជាតិ ជាទីគោរពសក្ការៈដ៏ខ្ពង់ខ្ពស់បំផុត ពិធីនេះបានចាប់កកើតតាំងពីទសវត្ស៣០ មកម៉្លេះ ដោយមានការចូលរួមយ៉ាងផុសផុលពីប្រជាពលរដ្ឋគ្រប់ស្រទាប់វណ្ណៈ និងបានក្លាយទៅជាសកម្មភាពយ៉ាងធំទូលំទូលាយ ក្នុងចលនាទិវាពលកម្មដាំដើមឈើនៅក្នុងសង្គមដែលទីបំផុតត្រូវបានទទួលស្គាល់ជាពិធីប្រពៃណីជាតិមួយហៅថា «ពិធីរុក្ខទិវា» ដែលបានកំណត់ដោយព្រះរាជកិច្ច លេខ៧៣៨ នស.រកត ចុះថ្ងៃទី០៨ ខែសីហា ឆ្នាំ១៩៥២។ម្យ៉ាងទៀតបច្ចុប្បន្ន « រុក្ខទិវា » ត្រូវបានទទួលស្គាល់ជាផ្លូវការដោយមានចែងក្នុងច្បាប់ស្ដីពីព្រៃឈើ នាឆ្នាំ២០០២ ជំពូក១២ មាត្រា៦០ បានចែងថា ដើម្បីជម្រុញការអប់រំប្រជាពលរដ្ឋឱ្យយល់ដឹងពីសារសំខាន់ និងផលប្រយោជន៍ព្រៃឈើ ទិវាពលកម្មដាំកូនឈើ ជាប្រពៃណីជាតិហៅថា «រុក្ខទិវា» ត្រូវបានប្រារព្ធធ្វើឡើងនៅថ្ងៃទី ៩ ខែកក្កដា ជារៀងរាល់ឆ្នាំ ក្រោមព្រះរាជអធិបតីភាពដ៏ខ្ពង់ខ្ពស់ របស់ព្រះមហាក្សត្រនៃព្រះរាជាណាចក្រកម្ពុជា ឬព្រះរាជតំណាង។ ទិវានេះពិតជាមានអត្ថន័យដ៏ឧដ្តុង្គឧត្តម និងឧត្តមប្រយោជន៍ដ៏ជ្រាលជ្រៅចំពោះប្រទេសជាតិ បានឆ្លុះបញ្ចាំងពីភាពរឹងមាំនៃការកសាងគ្រឹះសេដ្ឋកិច្ចជាតិ ក្រោមកិច្ចរួបរួមជាធ្លុងមួយបង្ហាញពីសក្ខីកម្មនៃ សាមគ្គីភាព រវាងប្រជារាស្រ្ត និងមន្រ្តីរាជការទូទាំងប្រទេសក្នុងការជម្រុញលើកទឹកចិត្តចូលរួមចលនាដាំដើមឈើដើម្បីផ្ដល់ជាសារប្រយោជន៍ធនធានទ្រទ្រង់វិស័យកសិកម្ម បង្កើនសុខុមាលភាពគ្រួសារ និងជីវភាពសង្គម ព្រមទាំងកិច្ចគាំពារបរិស្ថាន ស្របតាមព្រះរាជតម្រិះដ៏ខ្ពង់ខ្ពស់នៃព្រះករុណា ព្រះបាទសម្តេច ព្រះនរោត្តម សីហនុ ព្រះបរមរតនកោដ្ឋ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត ថា« ព្រៃឈើគឺជាសរសៃឈាម ក្នុងវិស័យកសិកម្មជាតិ ជាអាយុជីវិតប្រជាកសិករ និងជាខឿននៃសេដ្ឋកិច្ចជាតិ ដូច្នេះយើងត្រូវតែរួបរួមគ្នា ថែរក្សាការពារព្រៃឈើ និងដាំដើមឈើឱ្យបានគ្រប់ៗគ្នា »៕ អត្ថបទ ៖ ប្រាក់ វ៉ាន់ដា 

នាយករដ្ឋមន្ត្រី​ក្រិ​ក អ្នកនាំពាក្យ​អឺរ៉ុប ​លោក​ Johnson និង​រដ្ឋមន្ត្រី​អាល្លឺម៉ង់​សម្ដែង​ការរំលែក​ទុក្ខ​ចំពោះ​លោក ​Abe

2022/07/09 06:54:47 pm        1056
Facebook Telegram Linkin
​អឺរ៉ុប៖ ប្រធាន​គណៈកម្មការ​អឺរ៉ុប​លោកស្រី Ursula von der Leyen បាន​សម្តែង​ការរំលែក​ទុក្ខ និង​តក់ស្លុត​ចំពោះ​មរណភាព​របស់​អតីត​នាយករដ្ឋមន្ត្រី​ជប៉ុន​លោក Shinzo Abe កាលពី​ថ្ងៃ​សុក្រ​។ ​លោកស្រី von der Leyen បាន​ថ្លែង​ក្នុង​ការ​អត្ថាធិប្បាយ​ធ្វើឡើង​ តា​ម​រយៈ​អ្នកនាំពាក្យ​គណៈកម្មការ​សហភាព​អឺរ៉ុបលោកស្រី Arianna Podesta ថា មនុស្ស​អស្ចារ្យ​ម្នាក់ អ្នកប្រជាធិបតេយ្យ​ដ៏​អស្ចារ្យ និង​ជា​អ្នកគាំទ្រ​សណ្ដាប់ធ្នាប់ពិភព​លោក​ពហុ​ជាតិ​សាសន៍​បាន​ទទួល​មរណភាព​ហើយ​។ ខ្ញុំ​កាន់ទុក្ខ​ជាមួយ​ក្រុម​គ្រួសារ​របស់​លោក មិត្តភក្តិ​របស់​លោក និង​ប្រជាជន​ជប៉ុន​ទាំងអស់​។ ឃាតកម្ម​ដ៏​ឃោរឃៅ​លើ​លោក Shinzo Abe ធ្វើ​ឲ្យ​ពិភពលោក​ទាំងមូល​រន្ធ​ត់​យ៉ាងខ្លាំង​។​ ​នាយករដ្ឋមន្ត្រី​ក្រិ​កលោក Kyriakos Mitsotakis បានបង្ហាញ​ភាព​ស្អប់ខ្ពើម​ជាខ្លាំង ​ចំពោះ​ឃាតកម្ម​ដ៏​ឃោរឃៅ​លើអតីត​នាយករដ្ឋមន្ត្រី​ជប៉ុន​លោក Shinzo Abe។​​នាយករដ្ឋមន្ត្រី​ចាំផ្ទះ​អង់គ្លេស​លោក Boris Johnson បាន​សរសេរ​នៅលើ​បណ្តាញ Twitter ថា ការដឹកនាំ​ជា​សកលរបស់លោក Abe នឹង​ត្រូវបាន​មនុស្ស​ជាច្រើន​ចងចាំ​។ ​រដ្ឋមន្ត្រីការបរទេស​អាល្លឺម៉ង់​លោកស្រី Annalena Baerbock កាលពី​ថ្ងៃ​សុក្រ​បាន​ចូលរួម​រំលែក​ទុក្ខ ​ចំពោះ​មរណភាព​របស់​អតីត​នាយករដ្ឋមន្ត្រី​ជប៉ុន​លោក Shinzo Abe ក្នុងនាម​ក្រុម​ប្រទេស​រីកលូតលាស់​ទាំង​២០ ក្នុងអំឡុង​កិច្ចប្រជុំ​កំពូល G-20 នៅ​កោះ​បាលី ប្រទេស​ឥណ្ឌូនេស៊ី​។ ​លោកស្រី Baerbock នឹង​ទៅ​បំពេញ​ទស្សនកិច្ច​នៅ​ប្រទេស​ជប៉ុន​នៅ​ចុង​សប្តាហ៍​នេះ ដើម្បី​ចូលរួម​ក្នុង​ពិធី​គោរព​វិញ្ញាណក្ខន្ធ ​សម្រាប់​ការវាយប្រហារ​នុយក្លេអ៊ែរ​របស់​សហរដ្ឋ​អាមេរិក​លើ​ទីក្រុង Nagasaki និង​ជួប​ជាមួយ​សម​ភាគី​ជប៉ុន​របស់លោក​ស្រី​នៅ​ទីក្រុង​តូ​ក្យូ៕អត្ថបទ៖ ប៊ុនថន

លោក Biden ជួប​ឯកអគ្គរដ្ឋទូត​ជប៉ុន​ដើម្បី​សម្ដែង​ការរំលែក​ទុក្ខ​ចំពោះ​លោក Shinzo Abe

2022/07/09 06:25:42 pm        1058
Facebook Telegram Linkin
​សហរដ្ឋអាមេរិក៖ ខណៈ​សម្តែង​ការគោរព​ដល់​អតីត​នាយករដ្ឋមន្ត្រី​ជប៉ុន​លោក ​Shinzo Abe ពី​សំណាក់​មេដឹកនាំពិភពលោក​ ដោយ​មេដឹកនាំ​ជាច្រើន​បាន​សម្តែង​ភាព​តក់ស្លុត ​និង​ទុក្ខព្រួយ ប្រធានាធិបតី​សហរដ្ឋអាមេរិកលោក Joe Biden បាន​សរសើរ​លោក​ Abe ដោយ​ថ្លែងថា ​ចក្ខុវិស័យ​របស់លោក​អំពី​តំបន់​ឥណ្ឌូ​-​ប៉ាស៊ីហ្វិក សេរី និង​បើកចំហនឹង​នៅ​ឋិតថេរ​។ លើសពីនេះលោក​បាន​យកចិត្តទុកដាក់​យ៉ាងខ្លាំង​ចំពោះ​ប្រជាជន​ជប៉ុន និង​លះបង់​ជីវិត​ដើម្បី​បម្រើប្រជាជន​។​ ​លោក Biden បាន​ឈប់​ចត​នៅ​ស្ថាន​ឯកអគ្គរដ្ឋទូត​ជប៉ុន​ក្នុង​ទីក្រុង​វ៉ាស៊ីនតោន ដើម្បី​គោរព​វិញ្ញាណក្ខន្ធ និង​ចុះហត្ថលេខា​លើ​សៀវភៅ​រំលែក​ទុក្ខ​។​ ​លោក Abe ត្រូវបាន​គេ​ធ្វើឃាត​កាលពី​ថ្ងៃ​សុក្រ​នៅ​ភាគ​ខាងលិច​ប្រទេស​ជប៉ុន ដោយ​ខ្មាន់កាំភ្លើង​បាន​បាញ់ប្រហារ​លោក​ពី​ខាងក្រោយ​ ក្នុងពេល​កំពុង​ថ្លែង​សុន្ទរកថា​ក្នុង​យុទ្ធនាការ​បោះឆ្នោត ជាការ​វាយប្រហារ​ដែល​បានធ្វើឱ្យ​ប្រទេសមួយ​នេះ​ភ្ញាក់ផ្អើល​ ខណៈ​មានច្បាប់​គ្រប់គ្រង​កាំភ្លើង​តឹងរ៉ឹង​បំផុត​នៅ​គ្រប់​ទីកន្លែង​។​ ​ជាមួយគ្នានេះលោក Biden បាន​សន្ទនា​តាម​ទូរស័ព្ទ​ជាមួយ​នាយករដ្ឋមន្ត្រី​ជប៉ុនលោក Kishida Fumio និង​បាន​ចូលរួម​រំលែក​ទុក្ខ​ចំពោះ​មរណភាព​របស់លោក​ Abe អតីត​នាយករដ្ឋមន្ត្រី​ជប៉ុន​។មេដឹកនាំ​ទាំងពីរ​បាន​សន្ទនា​តាម​ទូរស័ព្ទ​រយៈពេល​ ១០​នាទីនៅ​ម៉ោង ​៨​ព្រឹក​ថ្ងៃ​សៅរ៍​នេះម៉ោង​ក្នុងប្រទេស​ជប៉ុន​។ ​លោក Biden ដែល​កំពុង​ដោះស្រាយ​ការបាញ់ប្រហារ​ កើតមាន​ជាច្រើន​នៅ​សហរដ្ឋអាមេរិកបាន​និយាយថា ការពិត រឿង​មួយ​នេះ​បានធ្វើឱ្យ​ខ្ញុំ​ចាប់អារម្មណ៍​ថា នេះ​ជាការ​ប្រើប្រាស់​អាវុធ​លើកដំបូង​ដើម្បី​សម្លាប់​មនុស្ស​នៅ​ប្រទេស​ជប៉ុន៕អត្ថបទ៖ ប៊ុនថន

នគរបាល​ក្រុង ​Nara ពិនិត្យ​សន្តិសុខ​ឡើងវិញ​ក្រោយ​ឃាតកម្ម​លើ​លោក Abe

2022/07/09 06:12:58 pm        1626
Facebook Telegram Linkin
​ជប៉ុន៖ នគរបាល​ក្រុង Nara ភាគ​ខាងលិច​ប្រទេស​ជប៉ុន​បាន​និយាយ​ថា ​ពួកគេ​នឹង​ពិនិត្យឡើងវិញ​នូវ​ការរៀបចំ​សន្តិសុខ​សម្រាប់​អតីត​នាយករដ្ឋមន្ត្រី​លោក Shinzo Abe បន្ទាប់ពី​លោក​ត្រូវ​បាន​គេ​បាញ់​សម្លាប់​កាលពី​ថ្ងៃ​សុក្រ​។ ជនសង្ស័យ​អាយុ 41ឆ្នាំឈ្មោះ Yamagami Tetsuya រស់នៅក្នុង​ទីក្រុង Nara ត្រូវបាន​ចាប់ខ្លួន​នៅ​កន្លែង​កើត​ហេតុ​ បន្ទាប់ពី​បាន​បាញ់​ប្រហារ​លោក Abe ដែល​កំពុង​ថ្លែង​ទៅកាន់​មនុស្ស​ជាច្រើន​ ជា​ផ្នែក​នៃ​យុទ្ធនាការ​បោះឆ្នោត​។ នៅ​ក្នុង​សន្និសីទ​សារព័ត៌មាន​កាលពី​ល្ងាច​ថ្ងៃ​សុក្រ នគរបាល​ក្រុង ​Nara បាន​និយាយ​ថា ពួកគេ​បាន​បង្កើត​ក្រុមការ​ងារ​​ដែល​មាន​សមាជិក​ចំនួន 90នាក់ ហើយ​នឹង​ស៊ើប​អង្កេត​លើ​ករណី​ឃាត​កម្ម​នេះ​។​ ក្រុម​មន្ត្រី​បាន​និយាយ​ថា ពួកគេ​បាន​ដឹង​អំពី​ដំណើរ​ទស្សនកិច្ច​របស់​លោក Abe មកកាន់​ទីក្រុង Nara កាល​ពី​ពេល​ល្ងាច​មុន​ពេល​លោក​មកកាន់​ទីក្រុង​នេះ ប៉ុន្តែ​រឿងនេះ​នៅ​តែ​មាន​ពេល​មិន​គ្រប់​គ្រប់គ្រាន់ ​ក្នុង​ការ​ត្រៀម​រៀបចំ​សន្តិសុខ​ដ៏​ចាំបាច់​។ នគរបាល​បាន​និយាយ​ថា ជនសង្ស័យ​បាន​សារ​ភាព​ថាបាន​បាញ់​​លោក Abe ដោយ​ខឹងសម្បា​រលើ​អង្គការ​សាសនា​មួយ ដែល​ជន​នេះ​ជឿ​ថា ​អតីត​នាយករដ្ឋមន្ត្រី​លោក ​Abe មាន​ជាប់​ពាក់ព័ន្ធ​។ Yamagami បាន​ប្រាប់​នគរបាល​ថា ម្តាយ​របស់​គាត់​បាន​ចូលរួម​ជាមួយ​អង្គការ​នេះ ហើយ​បាន​បរិច្ចាគ​ប្រាក់​ជាច្រើន ប៉ុន្តែ​បណ្តាលឱ្យមាន​បញ្ហា​ធ្ងន់ធ្ងរ​ដល់​គ្រួសារ​របស់គាត់​។ នគរ​បាល​បាន​ដកស្រង់​សម្តី​ជននេះ​ថា គាត់​បានដឹង​ពី​ដំណើរ​ទស្សនកិច្ច​របស់​លោក Abe មកកាន់​ទីក្រុង Nara តាម​បណ្តាញ​អ៊ីនធឺណិត ហើយ​គាត់​បានមក​កន្លែង​កើតហេតុ​តាម​រថភ្លើង​។ក្រុមមន្ត្រី​និយាយថា កាំភ្លើង​កែច្នៃ​ប្រើ​សម្រាប់​សម្លាប់​លោក Abe មាន​ប្រវែង​ប្រហែល ៤០​សង់ទីម៉ែត្រ​។ នគរបាលបាន​ឆែកឆេរ​លំនៅឋាន​របស់​ជនសង្ស័យ ហើយ​ដកហូត​បាន​លោហៈ​កែច្នៃ និង​កាំភ្លើង​ឈើ​ជាច្រើន​ដើម ដែល​ស្រដៀង​ទៅនឹង​កាំភ្លើង​ដែល​បាន​ប្រើ​ក្នុងការ​វាយប្រហារ​។ នគរបាល​បាន​ដកស្រង់​សំដី​របស់ Yamagami ដោយបាន​និយាយ​ថា គាត់​បាន​បម្រើការ​ជាមួយ​កងកម្លាំង​ស្វ័យការពារ​រយៈពេល 3ឆ្នាំ​រហូតដល់​ឆ្នាំ2005 ហើយ​បច្ចុប្បន្ន​គាត់​គ្មាន​ការងារ​ធ្វើ​នោះទេ​។ លោក Abe អាយុ 67ឆ្នាំ​បាន​ដួល​ទៅលើ​ដី ហើយ​ត្រូវបាន​គេ​ឃើញ​ហូរឈាម បន្ទាប់ពី​លោក​ត្រូវបាន​គេ​បាញ់​ពី​ខាងក្រោយ​នៅ​ម៉ោង 11:30ម៉ោង​ក្នុង​តំបន់ ខណៈ​លោក​កំពុង​ថ្លែង​នៅមុខ​ស្ថានីយ​រថភ្លើងក្នុង​ទីក្រុង Nara ភាគ​ខាងលិច នៅពេល​កំពុង​ធ្វើ​យុទ្ធនាការ​សម្រាប់​ការបោះឆ្នោត​សភា​ជាន់ខ្ពស់​នៅ​ថ្ងៃអាទិត្យ​។ ការបាញ់ប្រហារ​ចំនួន​ពីរ​គ្រាប់​ត្រូវ​បាន​គេ​ឮ ហើយ​គេ​បានឃើញ​ឈាម​ហូរ​នៅលើ​អាវ​របស់លោក Abe៕អត្ថបទ៖ ប៊ុនថន

កម្ពុជាប្រកាសកាន់ទុក្ខចំពោះមរណភាពឯកឧត្តម ស៊ីនហ្សូ អាបេ អតីតនាយករដ្ឋមន្ត្រីជប៉ុន នៅថ្ងៃអាទិត្យទី១០ ខែកក្កដា

2022/07/09 03:10:56 pm        1086
Facebook Telegram Linkin
ភ្នំពេញ៖  សម្តេចតេជោ ហ៊ុន សែន នាយករដ្ឋមន្រ្តី ថ្លែងសារពិសេសនៅព្រឹកថ្ងៃទី០៩ ខែកក្កដា ឆ្នាំ២០២២ ចូលរួមរំលែកមរណទុក្ខដ៏ក្រៀមក្រំបំផុត និងប្រកាសអោយប្រជាពលរដ្ឋខ្មែរទូទាំងប្រទេសកាន់ទុក្ខផ្លូវការរយៈពេល១ថ្ងៃ​ ចំពោះមរណភាព​ឯកឧត្តម ស៊ីនហ្សូ អាបេ អតីតនាយករដ្ឋមន្ត្រីជប៉ុន គឺនៅថ្ងៃអាទិត្យទី១០ ខែកក្កដា​ ឆ្នាំ២០២ និងបង្ហូតទង់ជាតិពាក់កណ្តាលដង។សម្តេចតេជោ ហ៊ុន សែន បញ្ជាក់ថា មរណភាពរបស់ឯកឧត្តម ស៊ិនហ្សូ អាបេ មិនត្រឹមតែជាការបាត់បង់ ការតក់ស្លុតរន្ធត់ និងអាឡោះអាល័យសម្រាប់តែប្រជាពលរដ្ឋជប៉ុនប៉ុណ្ណោះ តែក៏ជាក្តីរន្ធត់ ក្តីសោកស្តាយ សម្រាប់ប្រជាពលរដ្ឋកម្ពុជា ​និងប្រជាជនពិភពលោកផងដែរ។ក្នុងមនោសញ្ចេតនាដ៏ជ្រាលជ្រៅ និងស្និទ្ធស្នាលបំផុតរវាងរាជរដ្ឋាភិបាល និងប្រជាជនកម្ពុជា ​ជាមួយឯកឧត្តម ស៊ីនហ្សូអាបេ អតីតនាយករដ្ឋមន្ត្រីជប៉ុន សម្តេចតេជោ ហ៊ុន សែន បានបញ្ជាក់ថា អាបេ បានប្រឹងប្រែងយ៉ាងខ្លាំងជំរុញទំនាក់ទំនងរវាងជប៉ុន និងកម្ពុជា រហូតក្លាយទៅជាដៃគូយុទ្ធសាស្ត្រនៅឆ្នាំ២០១៣។ អាបេ បានជំរុញនូវការផ្តល់ជំនួយគាំទ្រដល់ការអភិវឌ្ឍគ្រប់វិស័យនៅកម្ពុជា រួមទាំងហេដ្ឋារចនាសម្ព័ន្ធផងដែរ៕

Breaking News: អតីតនាយករដ្ឋមន្ត្រីជប៉ុន Shinzo Abe បានទទួលមរណភាពហើយ

2022/07/08 11:04:46 pm        775
Facebook Telegram Linkin
ភ្នំពេញ៖ យោងតាមទីភ្នាក់ងារព័ត៌មានជប៉ុន NHKបានឲ្យដឹងថា អតីតនាយករដ្ឋមន្ត្រីជប៉ុន លោក SHINZO ABE ត្រូវបានប្រកាសថាបានទទួលមរណភាពហើយ បន្ទាប់ពីត្រូវបានបាញ់ប្រហារកាលពីព្រឹកមិញនេះ។

អគ្គលេខាធិការ​អង្គការសហប្រជាជាតិ​ថ្លែង​ថា ពិភពលោក​របស់​យើង​កំពុង​មាន​បញ្ហា​ធំ​

2022/07/08 09:49:50 pm        1012
Facebook Telegram Linkin
​UN៖ អគ្គលេខាធិការ​អង្គការសហប្រជាជាតិលោក Antonio Guterres បាន​អំពាវនាវ​ឱ្យមាន​ពហុភាគី​និយមរវាង​បណ្តា​ប្រទេស និង​ប្លុក​ទាំងអស់​នៅ​ជុំវិញ​ពិភពលោក ដើម្បី​ដោះស្រាយ​បញ្ហា​ដែល​កំពុង​កើតមានឡើង រួមទាំង​ជំងឺ​រាតត្បាត​នៃ​វីរុស​ឆ្លង បម្រែបម្រួល​អាកាសធាតុ និង​ការវាយលុក​រប​ស់រុស្ស៊ី​លើ​អ៊ុយ​ក្រែ​ន​។លោក​បាន​ថ្លែង​បែបនេះ​នៅ​ទីក្រុង​ញូវយ៉ក ជា​កន្លែង​ដែល​លោក​ជួប​ជាមួយ​មន្ត្រី​សហភាព​អឺរ៉ុប រួមទាំង​ប្រធាន​គណៈ​កម្មការ​អឺរ៉ុប​លោកស្រី Ursula von der Leyen។​ ​អង្គការសហប្រជាជាតិ​បាន​ព្រមាន​ថា ការ​ឡើងថ្លៃ​ស្បៀងអាហារ ប្រេងឥន្ធនៈ និង​ជី បង្កឡើង​ដោយសង្គ្រាម​នៅ​អ៊ុយ​ក្រែ​ន កំពុង​គំរាមកំហែង​ជំរុញ​ឲ្យ​ប្រទេស​នានា​នៅលើ​ពិភពលោក​ធ្លាក់ចូល​ទៅក្នុង​គ្រោះ​ទុរ្ភិក្ស នាំមក​នូវ​ភាព​អស្ថិរភាព​ពិភពលោក ការធ្វើ​អន្តោប្រវេសន៍​ច្រើនក្នុង​ទំហំ​ដែល​មិន​ធ្លាប់មាន​ពីមុនមក​។​ ​ថ្លែង​ជាមួយ​លោក Guterres លោកស្រី Von der Leyen បាន​ថ្លែងអំណរគុណ​ដល់​អង្គកា​រ​សហប្រជាជាតិ​ សម្រាប់​ការងារ​ដែល​មិនចេះ​នឿយហត់​ក្នុងការ​ព្យាយាម​បង្កើត​ដំណោះស្រាយ​ សម្រាប់​ការនាំចេញ​គ្រាប់​ធញ្ញជាតិ​អ៊ុយ​ក្រែ​ន​តាម​ច្រក​សមុទ្រ​ខ្មៅ​។​អ៊ុយ​ក្រែ​ន​គឺជា​ប្រទេស​នាំចេញ​ស្រូវ​សាលី ពោត និង​ប្រេង​ផ្កាឈូករ័ត្ន​ធំ​បំផុត​មួយ​ក្នុងចំណោម​ប្រទេស​លើ​ពិភព​លោក ប៉ុន្តែ​ការវាយលុក​របស់​រុស្ស៊ី​បាន​បញ្ឈប់​លំហូរ​នាំចេញ​ភាគច្រើន ដែល​បង្ក​ហា​នី​ភ័យ​ដល់​ការផ្គត់ផ្គង់​ស្បៀងអាហារ​ដល់​ប្រទេស​កំពុងអភិវឌ្ឍន៍​ជាច្រើន ជាពិសេស​នៅ​ទ្វីបអាហ្វ្រិក​។ ​រដ្ឋាភិបាល​អ៊ុយ​ក្រែ​ន​បានលើកឡើង​ពី​ការបិទច្រក​របស់​កង​ទ័ពជើងទឹក​រុស្ស៊ី​នៅ​កំពង់ផែ​របស់ខ្លួន ខណៈដែល​រុស្ស៊ី​បាន​អះអាងថា គ្រាប់មីន​នៅ​សមុទ្រ​អ៊ុយ​ក្រែ​ន​បាន​រារាំង​សកម្មភាព​សុវត្ថិភាព​នៃ​ការនាំចេញ​កសិផល៕អត្ថបទ៖ ប៊ុនថន

ពិភពលោក​បង្ហាញ​ប្រតិកម្ម ក្រោយ​អតីត​នាយករដ្ឋមន្ត្រី​ជប៉ុន​រង​ការ​បាញ់​ប្រហារ​

2022/07/08 07:58:52 pm        2306
Facebook Telegram Linkin
​ជប៉ុន៖ យោងតាម​ក្រុមមន្ត្រី​បាន​ឲ្យ​ដឹងថា លោក Shinzo Abe អតីត​នាយករដ្ឋមន្ត្រី​ជប៉ុន​ត្រូវ​បាន​រង​ការ​បាញ់​ប្រហារ ខណៈ​កំពុង​ធ្វើ​យុទ្ធនាការ​នៅ​ក្នុង​ទីក្រុង Nara ភាគ​ខាងលិច។​ ​ការវាយប្រហារ​នៅ​ថ្ងៃ​សុក្រ​នេះ​បាន​ធ្វើ​ឲ្យ​មាន​ភាព​តក់ស្លុត និង​ការ​ថ្កោល​ទោស​ជាច្រើន​នៅ​ក្នុង​ពិភពលោក។ ​លោកនាយក​រដ្ឋមន្ត្រី​អូស្ត្រាលី Anthony Albanese បាន​និយាយ​ថា ព័ត៌មាន​ដ៏​រន្ធត់​ពី​ប្រទេស​ជប៉ុន​ដែល​ថា អតីត​នាយករដ្ឋមន្ត្រី Shinzo Abe ត្រូវ​រង​ការ​បាញ់​ប្រហារ ​អារម្មណ៍​របស់​យើង​គឺ​នៅ​ជាមួយ​ក្រុម​គ្រួសារ​របស់​លោក Abe និង​ប្រជាជន​ជប៉ុន​នៅ​ពេល​នេះ​។ ​ឯកអគ្គរដ្ឋទូត​អាមេរិក​លោក Rahm Emanuel បាន​និយាយ​ថា យើងទាំងអស់គ្នា​ពិតជា​សោក​សៅ និង​រន្ធត់​ណាស់ ដោយសារតែ​ការ​បាញ់​ប្រហារ​ទៅលើ​អតីត​នាយករដ្ឋមន្ត្រី​ជប៉ុន Abe Shinzo​។លោក Abe គឺជា​មេដឹកនាំ​ដ៏​ឈ្លាសវៃ​របស់​ជប៉ុន និង​ជា​សម្ព័ន្ធមិត្ត​ឥត​ងាករេ​របស់​សហរដ្ឋអាមេរិក​។ រដ្ឋាភិបាល​អាមេរិក និង​ប្រជាពលរដ្ឋ​អាមេរិក​កំពុង​បួងសួង​សុំ​ឲ្យ​លោក Abe មាន​សុវត្ថិភាព​រួចផុត​ពី​គ្រោះថ្នាក់​។ ​ហើយ​ភាព​អាណិត​អាសូរ​របស់​យើង​នឹង​ស្ថិតនៅ​ជាមួយ​គ្រួសារ​របស់​លោក និង​ប្រជាជន​ជប៉ុន​។ ​អ្នកនាំពាក្យ​ក្រសួង​ការបរទេស​ឥណ្ឌូនេស៊ី​លោកស្រី Teuku Faizasyah បាន​បង្ហាញ​ការ​អាណិត​អាសូរ​យ៉ាង​ខ្លាំង ជួស​មុខ​ឲ្យ​ក្រុម​រដ្ឋមន្ត្រីការបរទេស G20 ចំពោះ​លោក Abe​៕អត្ថបទ៖ សុខមាន

BREAKING NEWS៖ អតីតនាយករដ្ឋមន្ត្រីជប៉ុនលោក Shinzo Abe រងការបាញ់ប្រហារអំឡុងថ្លែងសុន្ទរកថា និងបុរសម្នាក់ត្រូវបានចាប់ខ្លួន

2022/07/08 06:14:30 pm        2786
Facebook Telegram Linkin
ជប៉ុន៖ សារព័ត៌មានក្នុងស្រុកបានរាយការណ៍ថា អតីតនាយករដ្ឋមន្ត្រីជប៉ុនលោក Shinzo Abe ត្រូវបានរងការបាញ់ប្រហារ និងមានឈាមហូរនៅអំឡុងយុទ្ធនាការមួយក្នុងតំបន់ Nara ក្នុងប្រទេសជប៉ុនភាគខាងលិចនៅព្រឹកថ្ងៃសុក្រនេះ។ នគរបាលបានចាប់ខ្លួនបុរសម្នាក់នៅកន្លែងកើតហេតុភ្លាមៗ ក្រោយការបាញ់ប្រហារ។ លោក Abe ត្រូវគេបារម្ភថាអាចនឹងស្លាប់។ សារព័ត៌មានមួយចំនួនរួមទាំងទីភ្នាក់ងារសារព័ត៌មាន Kyodo បាន​និយាយនៅថ្ងៃសុក្រនេះថា អតីតនាយករដ្ឋមន្ត្រីត្រូវបានខ្មាន់កាំភ្លើងបាញ់ប្រហារ ក្នុង​នោះ​ទាំង​សារព័ត៌មាន Kyodo និងប្រព័ន្ធផ្សព្វផ្សាយរដ្ឋ NHK របស់ជប៉ុនបានរាយ​ការណ៍​ពីសំឡេង​ផ្ទុះ​ដែល​ទំនងជាការផ្ទុះគ្រាប់កាំភ្លើង។ សារព័ត៌មានខាងលើបាននិយាយថា លោក Abe បានដួលសន្លប់ ហើយក្រុមមនុស្សដែលទៅជួយដំបូងបានដឹកលោកទៅមន្ទីរពេទ្យ ដោយបន្ថែមថា លោក Abe មានឈាមហូរចេញពី-ក- ហើយក្រុមអាជ្ញាធរនិយាយថា លោកបានដួលសន្លប់៕អត្ថបទ៖ សុខមាន

ប្រមុខការទូតកម្ពុជា-ឡាវ សន្យារួមគ្នាលើកកម្ពស់វិស័យសេដ្ឋកិច្ច នៃប្រទេសទាំងពីរឲ្យកាន់តែប្រសើរ

2022/07/08 06:03:41 pm        663
Facebook Telegram Linkin
ភ្នំពេញ៖ ឯកឧត្តម ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ និងសាលើមសៃ គុំម៉ាស៊ីត ឧបនាយករដ្ឋមន្រ្តី រដ្ឋមន្រ្តីការបរទេសនៃសាធារណរដ្ឋប្រជាធិបតេយ្យប្រជាមានិតឡាវ បានសន្យារួមគ្នា ខិតខំធ្វើយ៉ាងណាជំរុញវិស័យសេដ្ឋកិច្ចរវាងប្រទេសទាំងពីរឲ្យកាន់តែល្អប្រសើរបន្ថែមទៀត ខណៈបច្ចុប្បន្ននៅមានកម្រិតនៅឡើយនោះ។ ការសន្យារវាងប្រមុខការទូតនៃប្រទេសទាំងពីរនេះ គឺបានធ្វើឡើងនៅក្នុងកិច្ចប្រជុំលើកទី១៤ នៃគណៈកម្មការចម្រុះសម្រាប់កិច្ចសហប្រតិបត្តិការទ្វេភាគី (14th JCBC) កម្ពុជា និងឡាវ នៅសណ្ឋាការសុខាភ្នំពេញ កាលពីរសៀលថ្ងៃទី៧ ខែកក្កដា ឆ្នាំ២០២២។យោងតាមសេចក្តីប្រកាសព័ត៌មានរបស់ក្រសួងការបរទេសកម្ពុជា ស្តីពីលទ្ធផលនៃកិច្ចប្រជុំខាងលើនេះ បានឲ្យដឹងថា ភាគីទាំងពីរ(កម្ពុជា-ឡាវ)បានកត់សម្គាល់ដោយការពេញចិត្តចំពោះការកើនឡើង នៃពាណិជ្ជកម្មទ្វេភាគីក្នុងប៉ុន្មានឆ្នាំចុងក្រោយនេះ ទោះបីជាមានវិបត្តិកូវីដ-១៩ ក៏ដោយ។តាមសេចក្តីប្រកាសបានបញ្ជាក់ទៀតថា អង្គប្រជុំបានឯកភាពលើសារសំខាន់នៃការធ្វើការឲ្យកាន់តែជិតស្និតបន្ថែមទៀត ដើម្បីពង្រឹងកិច្ចសហប្រតិបត្តិការលើវិស័យសេដ្ឋកិច្ចនេះ រួមទាំងរៀបចំសកម្មភាពរួមគ្នា ដូចជាការផ្តូរផ្តងធុរកិច្ច ការតាំងពិរពណ៌ និងសិក្ខាសាលា«ដើម្បីលើកកម្ពស់កាលានុវត្តភាពពាណិជ្ជកម្មរវាងកម្ពុជា-ឡាវ ទន្ទឹមនឹងការជំរុញសកម្មភាពវិនិយោគទៅវិញទៅមករវាងប្រទេសទាំងពីរ»។ នៅក្នុងកិច្ចប្រជុំភាគីទាំងពីរក៏បានសន្យាជាថ្មីម្តងទៀតផងដែរ ចំពោះវិស័យសន្តិសុខដោយភាគី ទាំងពីរព្រមព្រៀងគ្នាបង្កើនការត្រួតពិនិត្យព្រំដែននៅក្នុងដែនដីរៀងៗខ្លួន និងចាត់វិធានការឲ្យបានទាន់ពេលវេលា ដើម្បីទប់ស្កាត់នូវរាល់បទល្មើសព្រហ្មទណ្ឌគ្រប់ប្រភេទ តាមរយៈសកម្មភាពយាមល្បាត ដើម្បីទប់ស្កាត់ ត្រួតពិនិត្យ និងបង្រ្កាបបទល្មើសធនធានធម្មជាតិ ការកាប់ឈើ និងការបរបាញ់ខុសច្បាប់ និងបទ ល្មើសផ្សេងៗទៀតនៅតាមបណ្តោយព្រំដែនរវាងប្រទេសទាំងពីរ។ តាមរយៈសេចក្តីប្រកាសព័ត៌មាននេះដែរ ប្រមុខការទូតកម្ពុជា និងឡាវ ក៏បានពិភាក្សាគ្នា និងឯកភាពគ្នាលើចំណុចសកម្មភាពជាច្រើនពាក់ព័ន្ធនឹងកិច្ចការព្រំដែន ជាពិសេសការជំរុញឲ្យភាគីទាំងពីរពន្លឿនការបញ្ចប់ការចរចាពាក់ព័ន្ធនឹងផ្នែកមួយនៃខ្សែព្រំដែនដែលមិនទាន់បោះបង្គោលចំនួន១៤ភាគរយ ដើម្បីធ្វើការកសាងខ្សែបន្ទាត់ព្រំដែនរវាងប្រទេសទាំងពីរផងដែរ។ភាគីទំាងពីរក៏បានបញ្ជាក់សារជាថ្មីនូវការប្តេជ្ញាចិត្តរួមគ្នា ក្នុងការពង្រឹងភាពជាដៃគូឲ្យកាន់តែស៊ីជម្រៅបន្ថែមទៀត ដើម្បីលើកម្ពស់ការអភិវឌ្ឍជាតិ និងសុខុមាលភាពរបស់ប្រជាជននៃប្រទេសទាំងពីរ ព្រមទាំងដើម្បីដោះស្រាយបញ្ហាប្រឈមក្នុងតំបន់ និងសកលលោកដ៏គួរឲ្យព្រួយបារម្ភនាពេលបច្ចុប្បន្ន ជាពិសេសគឺជំងឺកូវីដ-១៩នេះតែម្តង៕ (អត្ថបទ៖បាន ចក់ )

បណ្ដាញសង្គម

ព័ត៌មានថ្មីៗ

តំបន់ភាគខាងលិចអឺរ៉ុបជួបខែមិថុនា និងខែកក្កដា ក្តៅបំផុតជាប់កំណត់ត្រា
08/10/2026 08:08 PM
Facebook Telegram Linkin
រដ្ឋមន្ត្រីការបរទេសម៉ាឡេស៊ី៖ មីយ៉ាន់ម៉ា មានឆន្ទៈទទួលយកវិញ​នូវ​ជនភៀសខ្លួន ៥.០០០នាក់
08/10/2026 08:08 PM
Facebook Telegram Linkin
ប្រព័ន្ធផ្សព្វផ្សាយអ៊ីរ៉ង់៖ កិច្ចប្រជុំ ៧ម៉ោង រវាងមេដឹកនាំកំពូល និងប្រធានាធិបតី ពិភាក្សាពី​​បញ្ហាប្រឈមនានា
08/10/2026 08:08 PM
Facebook Telegram Linkin
រញ្ជួយដី នៅឆ្នេរសមុទ្រប៉ាស៊ីហ្វិក ធ្វើ​ឱ្យ​រដ្ឋធានីរបស់​កូឡុំប៊ីមាន​រំញ័រ
08/10/2026 08:08 PM
Facebook Telegram Linkin
ខ្លែងចម្រុះពណ៌បានហោះពេញមេឃ អំឡុងពិធីបុណ្យខ្លែងអន្តរជាតិនៅទីក្រុង Colombo ប្រទេសស្រីលង្កា
08/10/2026 08:08 PM
Facebook Telegram Linkin
ក្រសួងមហាផ្ទៃស្នើទៅអភិបាលខេត្តកោះកុង ចាត់វិធានការចំពោះសកម្មភាពឈូសឆាយដីព្រៃក្នុងតំបន់ការពារធម្មជាតិ
08/10/2026 08:08 PM
Facebook Telegram Linkin
ការព្រមាន​ អំពីកម្ដៅ ត្រូវបានដំឡើងទូទាំងអង់គ្លេស ខណៈសីតុណ្ហភាពនឹងឡើងដល់ ៣៦អង្សាសេ
08/10/2026 08:08 PM
Facebook Telegram Linkin
ប៉ូឡូញ និងប្រទេសបាល់ទិកការពារហេដ្ឋារចនាសម្ព័ន្ធ ដោយបារម្ភពី​វាយប្រហារក្លែង​បន្លំរបស់​​រុស្ស៊ី
08/10/2026 08:08 PM
Facebook Telegram Linkin
ក្រុមប្រឹក្សាសន្តិភាព រៀបចំមូលដ្ឋានសម្រាប់កងកម្លាំង ISF នៅហ្កាហ្សា បើទោះបីជាមានការបដិសេធន៍ពីអ៊ីស្រាអែលក៏ដោយ
08/10/2026 08:08 PM
Facebook Telegram Linkin
អ្នកការទូតជាន់ខ្ពស់​អារ៉ាប៊ីសាអ៊ូ​ឌីត និងប៉ាគីស្ថាន ពិភាក្សាបញ្ហាតំបន់ ក្រោយ​ចុះ​កតិកាសញ្ញាការពារជាតិ នៅទីក្រុង Mecca
08/10/2026 08:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.