BTV NEWS

សម្ដេចធិបតី៖ មន្ត្រីជាអ្នកបម្រើរាស្ត្រ មិនមែនជាចៅហ្វាយរាស្ត្រទេ

សម្ដេចតេជោ ហ៊ុន សែន ចែករំលែកអត្ថបទអ្នកស្រាវជ្រាវថៃ ក្រោមចំណងជើងថា «មនុស្សធម៌ខ្វះការអាណិតអាសូរ»

ឯកឧត្តម ឌី វិជ្ជា និងលោកជំទាវ ហ៊ុន ម៉ាណា អញ្ជើញប្រគេនទៀនព្រះវស្សា និងនាំយកទេយ្យវត្ថុ ប្រគេនវត្តចំនួន១២វត្ត និងចែកអំណោយដល់យាយជីតាជី នៅស្រុកក្រគរ និងស្រុកភ្នំក្រវាញ ខេត្តពោធិ៍សាត់

គណៈប្រតិភូធុរកិច្ចមកពីហុងកុង ក្វាងទុង និងម៉ាកាវ បង្ហាញចំណាប់អារម្មណ៍ក្នុងការស្វែងរកឱកាសវិនិយោគលើវិស័យសក្តានុពលនៅកម្ពុជា

ព័ត៌មានសំខាន់ៗ

ពិធីសំណេះសំណាលជាមួយក្រុមការងារផលិតភាពយន្តភាគ និងតួសំដែងរឿង«កូនប្រុសក្រោមពន្លឺព្រះចន្ទពេញបូណ៌មី»

ភ្នំពេញ ៖ នៅថ្ងៃទី ៨ ខែកុម្ភៈ ឆ្នាំ២០២២នេះ សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រ កម្ពុជា បានអញ្ចើញជួបសំណេះសំណាលជាមួយក្រុមការងារ និងតួសម្តែងខ្សែភាពយន្តរឿង«កូនប្រុសក្រោមពន្លឺព្រះចន្ទពេញបូរណ៌មី» ។ នេះជាការជួបសំណេះសំណាលលើទី២ បន្ទាប់ពីការ ប្រារព្ធពិធីក្រុងពាលី និងជួបសំណេះសំណាល កាលពីថ្ងៃទី១៣ធ្នូ ឆ្នាំ២០២១ កន្លងទៅ ដើម្បីធ្វើ ការបញ្ជាក់ដោយបំពេញបន្ថែមអំពីខ្លឹមសារ និងទិដ្ឋភាពទាំងឡាយនៃទំនាក់ទំនងក្នុងផ្ទៃរឿងនេះ ទាំងមូល។ខ្សែភាពយន្តភាគរឿង «កូនប្រុសក្រោមពន្លឺព្រះចន្ទពេញបូរណ៌មី» ដែលគ្រោងផលិតភាពជាយន្តភាគ ចំនួន៤៤ភាគ ត្រូវបានពង្រីកនូវសេណារីយូបន្ថែម ដោយកើនឡើងដល់ ៥២ភាគ ដោយសារ ត្រូវបញ្ជូលនូវតួអង្គប្រវត្តិសាស្រ្តមួយចំនួន និងឈុតឆាកថ្មីៗបន្ថែមខ្លះទៀត ក្រោយទទួលបានអនុសាសន៍ណែនាំដ៏ខ្ពង់ខ្ពស់ពីសម្តេចអគ្គមហាសេនាបតីតេជោ ហ៊ុន សែន ដែលធ្វើឲ្យអត្ថបទភាព យន្តនេះកាន់តែមានខ្លឹមសារជាងមុន។ នេះបើតាមការបញ្ជាក់ពីលោក ហ៊ុយ វាសនា អ្នកដឹកនាំ រឿង និងជាអនុប្រធានគណៈកម្មការផលិត។ ភាពយឺតយ៉ាវនៃការថត ដែលគ្រោងអនុវត្តក្នុងខែមករា ដោយសា ទី១ បណ្តាមកពីបញ្ហាជំងឺកូវីដ១៩ និងទី២ គឺពាក់ព័ន្ធទៅនិងតួអង្គប្រវត្តិសាស្រ្តខ្លះ ដែលត្រូវបំពេញបន្ថែម និងសម្ភារៈមួយចំនួនត្រូវស្វែងរក។លោក ហ៊ុយ វាសនា បានបញ្ជាក់ថា ការងារផលិតថតភាពយន្តភាគ នឹងចាប់ផ្តើមដំណើរការរបស់ខ្លួន នៅថ្ងៃទី១៥ ខែកុម្ភៈឆ្នាំ២០២២តទៅ ដោយក្រុមការងារ និងសិល្បៈករ សិល្បៈការិនីទាំងអស់ បានរួមគំនិតគ្នា ជាធ្លុងមួយ ដើម្បីផលិតខ្សែភាពយន្តភាគប្រវត្តិសាស្រ្តមួយនេះ គោរពជូនសម្តេចទាំងទ្វេឲ្យបានសម្រេចជោគជ័យ ១០០ភាគរយ។ថ្លែងទៅកាន់ក្រុមការងារ និងតួសំដែងទាំងអស់ សម្តេចតេជោ ហ៊ុន សែន បានណែនាំឲ្យខិតខំស្វែង យល់ សិក្សាស្រាវជ្រាវឲ្យកាន់តែស៊ីជំរៅ ទាក់ទិនទៅនឹងអ្វីដែលកើតមាននៅក្នុងដំណើររឿងដែលជា ប្រវត្តិសាស្រ្ត និងជីវិតពិតរបស់សម្តេច ដោយត្រូវច្បាស់លាស់ទាំងស្ថានភាពជាក់ស្តែង ក្នុងដំណាក់ កាលនីមូយៗ រួមទាំងពេលវេលា ទីកន្លែង និងពិសេសផ្អែកលើភស្តុតាងជាក់ស្តែងមួយចំនួន ។សម្តេចតេជោ ហ៊ុន សែន បានយកឪកាសនេះ រម្លឹកនូវប្រវត្តិពិត និងចំនុចសំខាន់ៗនៃដំណើរជីវិត ដែលសម្តេចបានឆ្លងកាត់ចាប់ពីក្មេងវ័យ រហូតដល់យុវវ័យ និងរៀបរាប់ពីអ្វីដែលសម្តេចទាំងទ្វេ បាន ហែលឆ្លងជាមួយនឹងដំណើរដ៏សែនកម្សត់វេទនា ខ្លោចផ្សារ ស្ទើរពិពណ៌នាពុំបាន ដើម្បីឲ្យអ្នកដឹកនាំ និងតួអង្គនីមួយៗបានយល់ដឹងបន្ថែម ហើយរៀបចំបានល្អត្រឹមត្រូវទៅតាមបច្ចេកទេសថត និង សម្តែង។នៅក្នុងពិធីសំណេះសំណាលនោះ សម្តេចតេជោនាយករដ្ឋមន្រ្តី បានជូនពរដល់ក្រុមការងារ ក៏ដូចជាតួសំដែងសិល្បៈករ សិល្បៈការនីទាំងអស់ ទទួលបានជោគជ័យក្នុងការថតខ្សែភាពយន្តភាគ រឿង កូនប្រុសក្រោមពន្លឺព្រះចន្ទពេញបូរណ៌មី បានចប់សព្វគ្រប់ទៅតាមពេលវេលាដែលបានគ្រោងទុក។សូមបញ្ជាក់ថា ៖ ចំពោះការចំណាយលើការផលិត ខ្សែភាពយន្តភាគរឿង កូនប្រុសក្រោមពន្លឺព្រះចន្ទពេញបូរណ៌មី នេះ គឺបានទទួលនូវការឧបត្ថម្ភថវិកាពីបណ្តាសប្បុរសជននានា ដែលបង្ហាញនូវ ការតបស្នងចំពោះគុណតម្លៃដ៏ធំធេងពុំអាចកាត់ថ្លៃបាន ក្នុងអតីតកាល នោះគឺការហ៊ានធ្វើពលិកម្ម ដើម្បីបុព្វហេតុជាតិមាតុភូមិ ព្រមទាំងស្នាដៃ និងការខិតខំប្រឹងប្រែងក្នុងការដឹកនាំប្រទេសឈានមក រកការរីកចំរើននាពេលបច្ចុប្បន្ន។ ចំណែកសម្ភារៈបច្ចេកទេសបម្រើដល់ការផលិតគឺ ឧបត្ថម្ភគាំទ្រ ដោយលោកជំទាវ ហ៊ុន ម៉ាណា អគ្គនាយិកានៃអគ្គនាយកដ្ឋានវិទ្យុ និងទូរទស្សន៍បាយ័ន ខណៈ ដែលភាពយន្តខ្នាតធំមួយនេះក៏នឹងត្រូវចាក់ ផ្សាយតាមរយៈកញ្ចក់ទូរទស្សន៍បាយ័ន បន្ទាប់ពីបញ្ចប់ ការផលិតរួចរាល់ជាស្ថាពរ៕អត្ថបទ ៖ រក្សា

WHO៖ បួនសប្ដាហ៍ចុងក្រោយនេះអ្នកស្លាប់កើនឡើងខ្លាំងនៅជុំវិញពិភពលោក

ពិភពលោក៖ យោងតាមអង្គការសុខភាពពិភពលោក (WHO) បាននិយាយថា ក្នុងរយៈពេល ៤សប្ដាហ៍ចុងក្រោយនេះ យើងបានឃើញអ្នកស្លាប់កើនឡើងខ្លាំងនៅជុំវិញពិភពលោក។ វាជារឿងសំខាន់ដែលយើងមិនត្រឹមតែត្រូវបង្កើនការផ្តោត លើការចាក់វ៉ាក់សាំងបង្ការដើម្បីការពារអាយុជីវិតប្រជាជនប៉ុណ្ណោះទេ ប៉ុន្តែវាថែមទាំងកាត់បន្ថយការរាលដាលករណីឆ្លងវីរុស។ លោកស្រីវេជ្ជបណ្ឌិត Maria Van Kerkhove អ្នកដឹកនាំបច្ចេកទេសវីរុស COVID-19 របស់អង្គការសុខភាពពិភពលោកបានផ្តល់បច្ចុប្បន្នភាពវីដេអូស្តីពីស្ថានភាពវីរុស COVID-19 នៅទូទាំងពិភពលោក រួមទាំងព័ត៌មានអំពីវីរុសបម្លែងខ្លួនថ្មី Omicron នៃក្តីបារម្ភ។ លោកស្រីបានពន្យល់ថា វីរុសកំពុងរាលដាលជុំវិញពិភពលោកយ៉ាងឆាប់រហ័សក្នុងកម្រិតមិនគួឲ្យជឿ។ ហើយយើងត្រូវកាត់បន្ថយឱកាសសម្រាប់អ្នកឆ្លង ព្រោះអ្នកឆ្លងមានហានិភ័យក្នុងការវិវត្តន៍ទៅជាជំងឺធ្ងន់ធ្ងរ។ នៅទូទាំងពិភពលោកក្នុងអំឡុងសប្តាហ៍នៃថ្ងៃទី៣១ ខែមករាដល់ថ្ងៃទី០៦ ខែកុម្ភៈ ឆ្នាំ២០២២ ចំនួនករណីថ្មីនៃវីរុស COVID-19 បានធ្លាក់ចុះបើប្រៀបធៀបទៅនឹងករណីដែលបានរាយការណ៍ក្នុងសប្តាហ៍មុន ខណៈដែលចំនួនអ្នកស្លាប់ថ្មីបានកើនឡើងជិត ៧%។គិតត្រឹមថ្ងៃទី៧ ខែកុម្ភៈ ឆ្នាំ២០២២ ករណីដែលបានបញ្ជាក់មានជាង ៣៩៧លានករណី និងអ្នកស្លាប់ជាង ៥.៧លាននាក់ត្រូវបានរាយការណ៍នៅទូទាំងពិភពលោក។ អង្គការសុខភាពពិភពលោកកំពុងធ្វើការជាមួយអ្នកវិទ្យាសាស្ត្ររាប់ពាន់នាក់ ដើម្បីសិក្សាអំពីវីរុសបម្លែងខ្លួនថ្មី Omicron និងតំណពូជរបស់វាទាក់ទងនឹងការចម្លង ភាពធ្ងន់ធ្ងរ និងផលប៉ះពាល់៕អត្ថបទ៖ ប៊ុនថន

អាមេរិកព្រមានថា រុស្ស៊ីអាចវាយដណ្ដើមយកទីក្រុងគៀវក្នុងពេល ៧២ម៉ោង

សហរដ្ឋអាមេរិក៖ មន្ត្រីជាន់ខ្ពស់មួយរូបរបស់មន្ទីរបញ្ចកោណបាននិយាយដោយព្រមានថា កងកម្លាំងប្រដាប់អាវុធរុស្ស៊ីអាចវាយដណ្ដើមយកទីក្រុងគៀវក្នុងពេល ៣ថ្ងៃដែលជាការលុកលុយពីសំណាក់កងទ័ពរបស់ខ្លួនចូលអ៊ុយកែន ខណៈភាពតានតឹងរវាងអតីតសាធារណរដ្ឋសូវៀតនៅតែបន្តឡើងកម្ដៅខ្លាំង។នៅក្នុងរបាយការណ៍មួយកាលពីថ្ងៃអាទិត្យបណ្ដាញសារព័ត៌មានអាមេរិក Fox News បានអះអាងថា អគ្គសេនាធិការចម្រុះអាមេរិកលោកឧត្ដមសេនីយ៍ Mark Milley បានបង្ហើបពីការប្រុងប្រយ័ត្នដល់តំណាងរាស្ត្រ អំពីអំណាចយោធាដ៏ខ្លាំងក្លារបស់យោធាក្រុង Moscow អំឡុងរាយការណ៍ព័ត៌មានបិទទ្វារកាលពីសប្ដាហ៍មុន។ យោងតាមសារព័ត៌មាន Fox News ខាងលើដែលដកស្រង់ពីប្រភពជាច្រើនពីសភាអាមេរិកលោក Milley បានប៉ាន់ប្រមាណថា ការឈ្លានពានពេញបន្ទុករបស់រុស្ស៊ីចូលអ៊ុយក្រែន អាចធ្វើឲ្យទីក្រុងគៀវដួលរលំនៅក្នុងរយៈពេល ៧២ម៉ោង ហើយអាចឆក់យកអាយុជីវិតទាហានអ៊ុយក្រែនប្រមាណ ១៥,០០០នាក់ និងអាយុជីវិតកងទ័ពរុស្ស៊ីប្រមាណ ៤,០០០នាក់។សមាជិកសភាមួយចំនួននៅក្នុងជំនួបដែលត្រូវបានគេនិយាយថា បានកើតឡើងកាលពីថ្ងៃទី២ និងទី៣ មករាកន្លងទៅបានបង្ហាញក្ដីបារម្ភថា ក្រុង Washington ពុំបានផ្ដល់ការឆ្លើយតបឆាប់រហ័សដើម្បីជួយដល់អ៊ុយក្រែន ជាជំនួយយោធាដូចជារ៉ូកែតប្រឆាំងយន្តហោះ និងប្រព័ន្ធជើងទម្របាញ់រ៉ូកែតដែលនឹងជួយទប់ស្កាត់ការឈ្លានពានពីរុស្ស៊ី ខណៈដែលក្រុមមន្ត្រីបានលើកឡើងថា ក្រុង Moscow អាចប្រើសកម្មភាពដឹកអាវុធជាមូលដ្ឋានសម្រាប់បើកការវាយប្រហារ៕អត្ថបទ៖ សុខមាន

រុស្សីឈានដល់កំណត់ត្រាថ្មីករណីឆ្លងវីរុស COVID-19 ប្រចាំថ្ងៃ ១៨០,០០០ករណី

រុស្ស៊ី៖ ប្រទេសរុស្ស៊ីកាលពីថ្ងៃអាទិត្យបានរាយការណ៍ពីករណីឆ្លងវីរុស Covid-19 ថ្មីចំនួន ១៨០,០៧១ករណីដែលខ្ពស់ជាង ១០ដងកាលពីមួយខែមុនដោយសារវីរុសបម្លែងខ្លួនថ្មី omicron ឆ្លងខ្ពស់រាលដាលពេញប្រទេស។ សម្រាប់រយៈពេលចាប់តាំងពីការចាប់ផ្តើមនៃជំងឺរាតត្បាតប្រទេសរុស្សី បានរាយការណ៍ពីករណីឆ្លងចំនួន ១២.៨១០,១១៨នាក់ និងអ្នកស្លាប់មានចំនួន ៣៣៥,៤១៤នាក់។ដើម្បីទប់ទល់ទៅនឹងការកើនឡើងនៃករណីឆ្លងថ្មីៗនេះ មន្ទីរពេទ្យមួយក្នុងទីក្រុង Bor ក្នុងតំបន់ Nizhny Novgorod Oblast ប្រទេសរុស្សីបានរាយការណ៍ថា បន្ទប់សង្គ្រោះបន្ទាន់ពេញដោយអ្នកជំងឺ និងមានការកើនឡើងការចូលព្យាបាលនៅមន្ទីរពេទ្យ។ ប្រធានាធិបតីរុស្ស៊ីលោក Vladimir Putin បាននិយាយកាលពីសប្តាហ៍មុនថា រដ្ឋាភិបាលរបស់លោកកំពុងពិចារណាបន្ធូរបន្ថយ វិធានការរឹតត្បិតមួយចំនួននៃវីរុសឆ្លង ទោះបីជាករណីឆ្លងកើនឡើងខ្លាំងក៏ដោយ។ លោក Putin បាននិយាយទៅកាន់សមាគមធុរកិច្ចកំពូលរបស់ប្រទេសរុស្ស៊ីថា អាជ្ញាធរគ្មានផែនការបិទខ្ទប់ណាមួយ ឬការរឹតបន្តឹងបន្ថែមផ្សេងទៀតនោះទេ។ បន្ថែមលើនេះរដ្ឋាភិបាលកំពុងពិចារណាដកវិធានការរឹតបន្តឹង សម្រាប់អ្នកដែលមានទំនាក់ទំនងជាមួយអ្នកជំងឺ COVID-19 ដែលបច្ចុប្បន្នអ្នកមានទំនាក់ទំនងទាំងនេះ ត្រូវដាក់ឲ្យធ្វើចត្តាឡីស័ករយៈពេលប្រាំពីរថ្ងៃ។ដោយប្រឈមមុខទៅនឹងការកើនឡើងវីរុសច្រើនបំផុត អាជ្ញាធររុស្ស៊ីជាទូទៅមិនបានទប់ស្កាត់នឹងការដាក់កំហិតសំខាន់ៗណាមួយ និង បានច្រានចោលម្តងហើយម្តងទៀត នូវគំនិតនៃការណែនាំវិធានការបិទខ្ទប់ប្រទេស។ ប្រទេសរុស្ស៊ីមានវិធានការបិទខ្ទប់ម្តងមានរយៈពេល ៦សប្តាហ៍កាលពីឆ្នាំ២០២០ ហើយក្នុងខែតុលា ឆ្នាំ២០២១ ប្រជាជនជាច្រើនត្រូវបានបញ្ជាឱ្យឈប់សម្រាកការងារប្រមាណមួយសប្តាហ៍។ ប៉ុន្តែក្រៅពីនោះជីវិតរស់នៅរបស់ប្រជាជន នៅក្នុងប្រទេសភាគច្រើននៅតែមានលក្ខណៈធម្មតា ដោយសូម្បីតែកាតព្វកិច្ចពាក់ម៉ាស់ក៏អនុវត្តមានភាពធូរលុង៕អត្ថបទ៖ ប៊ុនថន

សហរដ្ឋអាមេរិកព្រមានថា ទីបំផុតចិននឹងខាតបង់ប្រយោជន៍ផ្ទាល់ខ្លួន បើរុស្ស៊ីចូលឈ្លានពានអ៊ុយក្រែន

សហរដ្ឋអាមេរិក៖ ទីប្រឹក្សាសន្តិសុខជាតិប្រចាំសេតវិមានលោក Jake Sullivan បានព្រមានកាលពីថ្ងៃអាទិត្យថា ប្រទេសចិននឹងខាតបង់ប្រយោជន៍ផ្ទាល់ខ្លួននៅទីបំផុត បើប្រទេសរុស្ស៊ីឈ្លានពានអ៊ុយក្រែន។ មន្ត្រីអាមេរិកមួយរូបដែលបានដឹងផ្ទាល់ពីការវាយតម្លៃចុងក្រោយបំផុតរបស់រដ្ឋាភិបាល បាននិយាយកាលពីល្ងាចថ្ងៃសុក្រសប្ដាហ៍មុន ខណៈភាពតានតឹងកើនឡើងនៅក្នុងតំបន់ថា រុស្ស៊ីបានប្រមូលផ្ដុំកងកម្លាំង ៧០ភាគរយរួចហើយដែលខ្លួនត្រូវការ ដើម្បីធ្វើប្រតិបត្តិការលុកលុយពេញលេញលើអ៊ុយក្រែន។នៅក្នុងសេចក្ដីថ្លែងការណ៍រួមជាមួយរុស្ស៊ីកាលពីសប្តាហ៍មុន ប្រទេសចិនបាននិយាយថា ខ្លួនប្រឆាំងនឹងការពង្រីកខ្លួនរបស់អង្គការណាតូ ដោយបានស្តីបន្ទោសសហរដ្ឋអាមេរិកចំពោះការកើនឡើងភាពតានតឹង និងបានបង្ហាញការគាំទ្រចំពោះការទាមទាររបស់វិមានក្រឹមឡាំងឲ្យមានការធានាសន្តិសុខ។ លោក Sullivan បាននិយាយនៅកម្មវិធី "Meet the Press" របស់ទូរទស្សន៍ NBC ថា យើងជឿថា ក្រុងប៉េកាំងនឹងខាតបង់ប្រយោជន៍ផ្ទាល់ខ្លួន ចំពោះការឈ្លានពានចូលអ៊ុយក្រែនពីសំណាក់រុស្ស៊ី ហើយថា ប្រទេសទាំង២ គួរតែគិត ពួកគេពិចារណាការចូលរួមរបស់ពួកគេជាមួយរដ្ឋាភិបាលរុស្ស៊ីក្នុងរយៈពេលពីរ ឬបីសប្តាហ៍ខាងមុខ។ការព្រមាននេះមានឡើងបន្ទាប់ពីលោកប្រធានាធិបតីរុស្ស៊ី Vladimir Putin បានជួបលោកប្រធានាធិបតីចិន Xi Jinping ក្នុងទីក្រុងប៉េកាំងកាលពីថ្ងៃសុក្រ ស្របពេលភាពតានតឹងនៅអ៊ុយក្រែន។ លោក Putin បានទៅដល់ទីក្រុងប៉េកាំង ដើម្បីចូលរួមបើកព្រឹត្តិការណ៍កីឡាអូឡាំពិករដូវរងា និងជួបពិភាក្សាជាមួយសមភាគីចិន ខណៈមេដឹកនាំទាំង២ រួមគ្នាទប់ទល់នឹងសហរដ្ឋអាមេរិក និងសម្ព័ន្ធមិត្ត។ សហរដ្ឋអាមេរិកបានព្រមានលោកប្រធានាធិបតីរុស្ស៊ី Vladimir Putin ថា រុស្ស៊ីនឹងប្រឈមការរងទណ្ឌកម្មធ្ងន់ធ្ងរជុំវិញភាពជាប់គាំងបញ្ហាអ៊ុយក្រែន។ រដ្ឋបាលលោក Biden បាននិយាយកាលពីប៉ុន្មានសប្ដាហ៍មុនថា ការឈ្លានពានរបស់រុស្ស៊ីចូលអ៊ុយក្រែនអាចនឹងកើតមាន ទោះបីជារុស្ស៊ីច្រានចោលម្ដងហើយម្ដងទៀតក៏ដោយ៕អត្ថបទ៖ សុខមាន

ប្រសាសន៍សំខាន់ៗរបស់សម្ដេចតេជោ ហ៊ុន សែន ក្នុងពិធីសម្ពោធដាក់ឱ្យប្រើប្រាស់ជាផ្លូវការកំណាត់ផ្លូវជាតិលេខ៧

ក្រចេះ៖ នៅព្រឹកថ្ងៃទី០៧ ខែកុម្ភៈ ឆ្នាំ២០២២ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និង ឯកឧត្តម វ៉ាង វិនធៀន ឯកអគ្គរដ្ឋទូតចិន ប្រចាំនៅកម្ពុជា បានអញ្ជើញជាអធិបតីសម្ពោធដាក់ឱ្យប្រើប្រាស់ជាផ្លូវការកំណាត់ផ្លូវជាតិលេខ៧ នៅចំណុចរង្វង់មូលខ្លាស្ទុះ ក្រុងក្រចេះ ទៅភូមិរមាត ឃុំអូរគ្រៀង ស្រុកសំបូរ ខេត្តក្រចេះ ប្រវែងប្រមាណ ៩៣.៥៦គីឡូម៉ែត្រ ដែលសាងសង់ក្រោមជំនួយឥតសំណងរបស់រដ្ឋាភិបាលចិន ក្នុងទឹកប្រាក់ប្រមាណជាង ៣៣លានដុល្លារអាមេរិក។ដើម្បីទទួលបានព័ត៌មានថ្មី រហ័ស សូមចុច Join Channel Telegram BTV Newsខាងក្រោមនេះជាប្រសាសន៍សំខាន់ៗរបស់សម្ដេចតេជោ ហ៊ុន សែន៖ - សម្តេចតេជោ ហ៊ុន សែន នាយករដ្ឋមន្ត្រី និងឯកឧត្តម វ៉ាង វិនធៀន ឯកអគ្គរដ្ឋទូតចិនប្រចាំនៅកម្ពុជា អញ្ជើញសម្ពោធដាក់ឱ្យប្រើប្រាស់ជាផ្លូវការកំណាត់ផ្លូវជាតិលេខ៧ ពីចំណុចរង្វង់មូលខ្លាស្ទុះ ក្រុងក្រចេះ ទៅភូមិរមាត ឃុំអូរគ្រៀង ស្រុកសំបូរ ខេត្តក្រចេះ ប្រវែងប្រមាណ ៩៣.៥៦គីឡូម៉ែត្រ សាងសង់ក្រោមជំនួយរបស់រដ្ឋាភិបាលចិនជាង ៣៣លានដុល្លារអាមេរិក។- សម្តេចតេជោ ហ៊ុន សែន បានបញ្ជាក់ថា ចិនជាមិត្តដែលតែងជួយកម្ពុជា ដោយគ្មានលក្ខខណ្ឌ ទោះជាកម្ពុជាកំពុងជាប់គាំងនយោបាយ ឬកម្ពុជាមិនទាន់បង្កើតរាជរដ្ឋាភិបាលថ្មីកាលពីឆ្នាំ២០០៣ក៏ដោយ។- សម្តេចតេជោ ហ៊ុន សែន បានបញ្ជាក់ថា ចិនបានជួយកម្ពុជាលើវិស័យហេដ្ឋារចនាសម្ព័ន្ធ និងការតភ្ជាប់ ដែលបង្កលក្ខណៈងាយស្រួលក្នុងការធ្វើដំណើរ ជាពិសេសផ្លូវខ្សែក្រវាត់តភ្ជាប់ដែលមានការរីកចម្រើនខ្លាំងនៅក្បែរព្រំដែន។- សម្តេចតេជោ ហ៊ុន សែន បានបញ្ជាក់ថា កម្ពុជាមានប៉ូលសេដ្ឋកិច្ចចំនួន៤ ក្នុងនោះប៉ូលធំជាង គឺរាជធានីភ្នំពេញ, ប៉ូលបន្ទាប់គឺ ព្រះសីហនុ សៀមរាប និងតំបន់ភាគឦសាន ដែលជាទិសដៅសេដ្ឋកិច្ចនៃកសិឧស្សាហកម្ម។- សម្តេចតេជោ ហ៊ុន សែន បានបញ្ជាក់ថា កំណាត់ផ្លូវជាច្រើននៅកម្ពុជាត្រូវបានបំផ្លិចបំផ្លាញជាចម្បងដោយសារគ្រោះទឹកជំនន់ ដែលទាមទារឲ្យយើងត្រូវជួសជុលស្តារឡើងវិញ ដើម្បីសម្រួលដល់ការធ្វើដំណើររបស់ប្រជាពលរដ្ឋ។- សម្តេចតេជោ ហ៊ុន សែន បានបញ្ជាក់ថា ជាង៦ខែនេះ កម្ពុជាបានផលិតមាសនៅអណ្តូងរ៉ែ ខេត្តមណ្ឌលគិរីបានជិត២តោន(១.៧៥១គីឡូក្រាម) ដែលជាផ្នែកមួយនៃការអភិវឌ្ឍន៍សេដ្ឋកិច្ច ខណៈបច្ចុប្បន្នមួយថ្ងៃអាចផលិតបានពី៨០ទៅ១០០គីឡូក្រាមនោះ។ កម្ពុជាមានរ៉ែជាច្រើនទៀត ដូចជារ៉ែបុកស៊ីតជាដើម ដែលយើងមិនទាន់ធ្វើអាជីវកម្មនៅឡើយ។- សម្តេចតេជោ ហ៊ុន សែន បានប្រកាសថា នៅថ្ងៃទី២៨ ខែកុម្ភៈ ខាងមុខនេះ សម្តេចនឹងជួបសំណេះសំណាលជាមួយសិស្សនិទ្ទេសAនៅទូទាំងប្រទេស ហើយសម្តេចបានស្នើសុំឲ្យអាជ្ញាធរខេត្តដែលមានសិស្សនិទ្ទេសAទាំងអស់សម្រួលដល់ការធ្វើដំណើរ និងការសម្រាកជូនដល់ពួកគេ និងក្រុមគ្រួសារផងដែរ។- សម្តេចតេជោបានបញ្ជាក់ជាថ្មីម្តងទៀតថា កូវីដ១៩កើតឡើងបាន តែមិនអាចរំខានដល់ការអភិវឌ្ឍប្រទេសកម្ពុជាបាននោះឡើយ ជាពិសេសក្នុងកិច្ចការកសាងផ្នែកហេដ្ឋារចនាសម្ព័ន្ធដូចជាស្ពាន ផ្លូវជាដើមនោះ។- សម្តេចតេជោបញ្ជាក់ថា កម្ពុជាប្រឹងប្រែងដើម្បីសម្រេចគោលដៅរបស់ខ្លួន ដែលរួមមាន ផ្លូវ ភ្លើង ទឹកស្អាត។ ទោះតំបន់ខ្លះមិនទាន់អាចមានការតភ្ជាប់បណ្តាញទឹកស្អាត តែយើងនឹងដំណើរការបុកអណ្តូងទឹកស្អាតសម្រាប់ការប្រើប្រាស់របស់ប្រជាពលរដ្ឋ។- សម្តេចតេជោ ហ៊ុន សែន បញ្ជាក់ថា តាមគម្រោងចិន នឹងរ៉ាប់រងការស្តារឡើងវិញផ្លូវជាតិលេខ៧ ដែលរងការខូចខាតឆ្ពោះទៅកាន់ព្រំដែនឡាវ និងការតភ្ជាប់ពីខេត្តក្រចេះទៅស្ទឹងត្រែង ឆ្ពោះទៅកំពង់ថ្ម ខេត្តកំពង់ធំ។- សម្តេចតេជោ ហ៊ុន សែន បានបញ្ជាក់ថា ចិនឲ្យតែថាគឺធ្វើហើយ។ ជាទម្លាប់ ចិននិយាយតិច តែធ្វើច្រើន។- សម្តេចតេជោ ហ៊ុន សែន បានបញ្ជាក់ថា កម្ពុជាបាននាំផលិតផលកសិកម្មជាច្រើន ទៅកាន់ប្រទេសចិនជាបន្តបន្ទាប់ ហើយកម្ពុជាសូមធានាចំពោះផលិតផលទាំងនោះ ដើម្បីនិរន្តរភាពនៃទំនាក់ទំនងពាណិជ្ជកម្មយូរអង្វែង។- សម្តេចតេជោ ហ៊ុន សែន បានក្រើនរំលឹកដល់បងប្អូនជនរួមជាតិទាំងអស់បន្តគោរពច្បាប់ចរាចរណ៍ឲ្យបានខ្ជាប់ខ្ជួន ខណៈការស្លាប់ និងរបួសដោយសារបញ្ហាចរាចរណ៍នេះនៅតែមានការកើតឡើងជារៀងរាល់ថ្ងៃ។- សម្តេចតេជោ ហ៊ុន សែន អំពាវនាវដល់ប្រពន្ធៗទាំងឡាយ កុំប្រច័ណ្ឌប្តីពេក តែបុរសៗទាំងឡាយក៏កុំបានដៃពេកដែរ។ សម្តេចតេជោ ហ៊ុន សែន ក៏បានអំពាវនាវដល់ប្រពន្ធៗទាំងឡាយ កុំជេរដល់សម្តេច បើឃើញប្តីចូល KTV។-សម្តេចតេជោ ហ៊ុន សែន នាយករដ្ឋមន្ត្រីបានបន្តអំពាវនាវដល់បងប្អូនជនរួមជាតិទាំងអស់ត្រូវបន្តរួមគ្នាអនុវត្តន៍ឲ្យបានខ្ជាប់ខ្ជួនថែមទៀតចំពោះវិធានការសុខាភិបាល បើទោះបីជារយៈពេល ៣០ថ្ងៃមកនេះពុំមានករណីស្លាប់ ដោយសារវីរុសកូវីដ១៩ក្តី។- សម្តេចតេជោ ហ៊ុន សែន ប្រកាសថា ចិនបានប្រកាសផ្តល់ជំនួយវ៉ាក់សាំងកូវីដ-១៩ប្រភេទ ស៊ីណូវ៉ាក់ ចំនួន៥លានដូស ហើយកម្ពុជាបញ្ជាទិញបន្ថែមចំនួន៣លានដូសទៀត ដើម្បីទុកជាស្តុកយុទ្ធសាស្ត្រ និងបន្តប្រើប្រាស់ជាបន្តបន្ទាប់ ដើម្បីបង្កើនភាពស៊ាំក្នុងសហគមន៍។- សម្តេចតេជោប្រកាសថា កម្ពុជានៅតែបន្តនយោបាយចាក់វ៉ាក់សាំងកូវីដ-១៩ ជូនប្រជាពលរដ្ឋដោយឥតគិតថ្លៃ ទាំងដូសមូលដ្ឋាន និងដូសជំរុញ។- សម្តេចតេជោ ហ៊ុន សែន បានបញ្ជាក់ជាថ្មីម្តងទៀតថា ការចាក់វ៉ាក់សាំងប្រឆាំងកូវីដ១៩ ជូនដល់ជនរួមជាតិខ្មែរគឺមិនយកថវិកានោះឡើយ ហើយការយកថវិកាពីការចាក់វ៉ាក់សំាងជូនដល់ប្រជាពលរដ្ឋខ្លួននេះក៏វាមិនអាចយកទៅធ្វើអ្នកមានបានដែរ។-សម្តេចតេជោ ហ៊ុន សែន បានថ្លែងអំណរគុណជាថ្មីម្តងទៀតចំពោះប្រទេសជាមិត្តទាំងអស់ ដែលបានផ្តល់ជំនួយវ៉ាក់សាំងបង្ការកូវីដ១៩ដល់កម្ពុជា ខណៈប្រភពគាំទ្រទាំងនេះបានធ្វើឲ្យប្រទេសកម្ពុជាបើកដំណើរការសេដ្ឋកិច្ចឡើងវិញនោះ។- សម្តេចតេជោ ហ៊ុន សែន ប្រកាសថា នៅពេលនេះ សហគមន៍អន្តរជាតិបានទទួលស្គាល់យ៉ាងខ្លាំងចំពោះកិច្ចខិតខំប្រឹងប្រែងរបស់យើង(កម្ពុជា) លើការងារប្រយុទ្ធប្រឆាំងការឆ្លងរីករាលដាលជំងឺកូវីដ-១៩ និងយុទ្ធនាការចាក់វ៉ាក់សាំងកូវីដ-១៩ បង្កើនភាពស៊ាំសហគមន៍។- សម្តេចតេជោ ហ៊ុន សែន ប្រកាសប្តូរផ្តាច់ចូលឆ្នាំថ្មី ប្រពៃណីជាតិឲ្យបាននៅឆ្នាំនេះ ខណៈដែលកម្ពុជាខកខានចូលឆ្នាំថ្មី ប្រពៃណីជាតិខ្មែរចំនួន២ឆ្នាំមកហើយ តែសម្តេចនៅតែបន្តអំពាវនាវដល់ជនរួមជាតិឲ្យបន្តចូលរួមប្រយុទ្ធប្រឆាំងជំងឺកូវីដ-១៩។- សម្តេចតេជោ ហ៊ុន សែន បានហៅលោកសុខ សុគន្ធ ហៅជេមសុខ ជាជនតិរច្ឆាន ដែលភ្លេចកំណើតខ្លួនឯងជាខ្មែរ។ សម្តេចតេជោ ហ៊ុន សែន ផ្តាំទៅជេមសុខ ឲ្យរក្សាប្រក្រតីភាព និងតម្កល់ផលប្រយោជន៍ជាខ្មែរ ទោះខ្មែរនៅទីណាក៏ដោយ។- សម្តេចតេជោ ហ៊ុន សែន ប្រកាសថា សម្តេចមិនចង់បានអ្វីពីសហភាពមីយ៉ាន់ម៉ា ក្រៅចង់ឃើញមីយ៉ាន់ម៉ា មានសុខសន្តិភាព និងចង់ឃើញប្រជាជនមីយ៉ាន់ម៉ា រួចផុតពីសង្គ្រាមនោះឡើយ។-សម្តេចតេជោ ហ៊ុន សែន នាយករដ្ឋមន្រ្តីបានផ្ញើសារទៅប្រជាជនមីយ៉ាន់ម៉ាមួយក្តាប់តូចដែលបានរិះគន់សម្តេច ពេលដែលសម្តេចទៅប្រទេសមីយ៉ាន់ម៉ា ខណៈដំណើរទស្សនកិច្ចនេះ គឺដើម្បីស្វែងសុខសន្តិភាពជូនប្រជាជន និងប្រទេសមីយ៉ាន់ម៉ាតែប៉ុណ្ណោះ។- សម្តេចតេជោ ហ៊ុន សែន ប្រកាសថា សាស្ត្រាចារ្យអូស្ត្រាលីម្នាក់ ជាទីប្រឹក្សាសេដ្ឋកិច្ចលោកជំទាវ អោង សានស៊ូជី ត្រូវបានដ្ឋបាលលោក មីន អោងលាំង ដោះលែងពីការឃុំឃាំងហើយ ក្រោយពេលសម្តេចក្នុងនាមជាប្រធានអាស៊ានបានស្នើចំពោះករណីនោះ ហើយពេលនោះ មីន អោងលាំង បានសន្យាចំពោះមុខសម្តេចអំពីការពិចារណាដ៏វិជ្ជមាន។- សម្តេចតេជោ ហ៊ុន សែន បានប្រកាសថា សម្តេច និងជេម សុខ បានទាក់ទងគ្នា តែជេម សុខ ទៅជ្រុលហួស រហូតដល់មានប្រមាថជាតិសាស្ត្រខ្លួនឯង ដោយអត្ថាធិប្បាយថា បើអាមេរិក និងខ្មែរ មានសង្គ្រាមនឹងគ្នា គាត់(ជេមសុខ)នឹងកាន់អាវុធជួយអាមេរិក មកវាយកម្ទេចខ្មែរ។ សង្កថាសម្តេចចប់នៅវេលាម៉ោង ៩និង៣៣នាទី

ព្រះមហាក្សត្រស្តេចយាងនិវត្តមកដល់មាតុប្រទេសវិញហើយ

ភ្នំពេញ៖ បន្ទាប់ពីបានស្តេចយាងចាកចេញទៅកាន់ទីក្រុងប៉េកាំងប្រទេសចិនកាលពីថ្ងៃទី៣កុម្ភៈ ដើម្បីចូលរួមបើកព្រឹត្តិការណ៍កីឡាអូឡាំពិករដូវរងាព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជាបានសព្វព្រះរាជហឫទ័យស្តេចយាងនិវត្តមកដល់មាតុប្រទេសវិញហើយនៅយប់ថ្ងៃទី៥ខែកុម្ភៈនេះ។វត្តមានយាងនិងអញ្ជើញទៅថ្វាយព្រះរាជដំណើរនិវត្តរបស់អង្គព្រះមហាក្សត្រដល់អាកាសយានដ្ឋានអន្តរជាតិភ្នំពេញ មានសម្តេចវិបុលសេនាភក្តី សាយ ឈុំ ប្រធានព្រឹទ្ធសភា សម្តេចអគ្គមហាពញាចក្រី ហេង សំរិន ប្រធានរដ្ឋសភា សម្តេចអគ្គមហាសេនាបតីតេជោ ហ៊ុន សែន នាយករដ្ឋ មន្ត្រីនៃកម្ពុជា ព្រមជាមួយវត្តមានសម្តេច ឯឧ ថ្នាក់ដឹកនាំ ក្នុងជួររាជរដ្ឋាភិបាលសំខាន់ៗមួយចំនួនទៀត។ព្រឹត្តិការណ៍កីឡាអូឡាំពិករដូវរងា ក្រោមប្រធានបទ«រួមគ្នាឆ្ពោះទៅអនាគត»បានបង្ហាញឱ្យឃើញអំពីបំណងប្រាថ្នារបស់សហគមន៍វាសនារួមនៃមនុស្សជាតិនិងការយកឈ្នះលើបញ្ហាប្រឈមជាសកល។ ព្រះវត្តមានដែលព្រះអង្គ សព្វព្រះរាជហឫទ័យតបតាមបង្គំថ្វាយ ស្ដេចយាងចូលរួមពិធីបើកកីឡាអូឡាំពិករដូវរងាប៉េកាំងឆ្នាំ២០២២នេះ បានជួយពង្រឹងចំណងមិត្តភាពជាប្រពៃណី ចំណងមិត្តភាពដូចបងប្អូន និងភាពជាដៃគូវាងកម្ពុជា-ចិន។គួរបញ្ជាក់ថា៖ចាប់តាំងពីកិច្ចជំនួបជាប្រវត្តិសាស្ត្ររវាងព្រះករុណាព្រះបាទសម្តេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ«ព្រះបរមរតនកោដ្ឋ»និងឯកឧត្តម Zhou Enlai នាយករដ្ឋមន្ត្រីចិន ក្នុងសន្និសីទអាស៊ី-អាហ្រ្វិកនាទីក្រុងBandungប្រទេសឥណ្ឌូណេស៊ីកាលពីខែមេសាឆ្នាំ១៩៥៥មក កម្ពុជា និងចិនបានក្លាយជាមិត្តចាស់ ដែលមានទំនាក់ទំនងយ៉ាងជិតស្និទ្ធលើគ្រប់វិស័យ។រយៈពេលជាង៦០ឆ្នាំកន្លងមកនេះ ចំណងមិត្តភាពកម្ពុជា-ចិនទទួលបានការអភិវឌ្ឍន៍រីកចម្រើនហើយក្នុងអំឡុងពេលនៃការប្រយុទ្ធប្រឆាំងនឹងជំងឺកូវីដ-១៩ ចិនបានជួយកម្ពុជាយ៉ាងច្រើន ដោយបានចាត់បញ្ជូនក្រុមអ្នកជំនាញផ្នែកវេជ្ជសាស្រ្ដនិងផ្តល់ជូនជាសម្ភារៈ និងវ៉ាក់សាំងដល់កម្ពុជាដើម្បីចាក់ជូនប្រជាពលរដ្ឋសំដៅបង្កើនបាននូវភាពស៊ាំក្នុងសហគមន៍។បច្ចុប្បន្នវ៉ាក់សាំងកូវីដ១៩ដែលកម្ពុជាទទួលបានគឺមានជាង៩០%បានមកពីប្រទេសចិន ដែលនេះបង្ហាញយ៉ាងជាក់ច្បាស់អំពីសហគមន៍ វាសនារួមរវាងកម្ពុជា-ចិន។ពិធីបើកព្រឹត្តិការណ៍ ប្រកួតកីឡាអូឡាំពិករដូវរងា នៅទីក្រុងប៉េកាំង ប្រទេសចិន គឺចាប់ផ្ដើមពីថ្ងៃទី ៤ ដល់ទី ២០ ខែកុម្ភៈ ឆ្នាំ ២០២២ដែលមានអត្តពលិកចូលរួមជិត ៣ពាន់នាក់ លើ ១៥ប្រភេទ កីឡា ១០៩វិញ្ញាសារ ហើយបើតាមការគ្រោងទុកការប្រកួតកីឡារដូវរងាឆ្នាំនៅ២០២៦នឹងធ្វើនៅប្រទេសអុីតាលី៕អត្ថបទ៖ មុត សុទ្ធ

លោក Biden និយាយថា មេដឹកនាំរដ្ឋអ៊ីស្លាម ISIS បានស្លាប់ក្នុងការវាយឆ្មក់នៅស៊ីរីដឹកនាំដោយអាមេរិក

សហរដ្ឋអាមេរិក៖ លោកប្រធានាធិបតីសហរដ្ឋអាមេរិក Joe Biden បានប្រកាសកាលពីព្រឹកថ្ងៃព្រហស្បតិ៍ថា មេដឹកនាំក្រុមរដ្ឋអ៊ីស្លាមលោក Abu Ibrahim al-Hashimi al-Qurayshi ត្រូវបានសម្លាប់កាលពីថ្ងៃពុធ អំឡុងការវាយឆ្មក់ប្រឆាំងភេរវកម្មដឹកនាំដោយអាមេរិកនៅក្នុងប្រទេសស៊ីរីភាគខាងជើង។នេះគឺជាការវាយឆ្មក់ដ៏ធំបំផុតរបស់សហរដ្ឋអាមេរិកនៅក្នុងប្រទេសនេះ ចាប់តាំងពីប្រតិបត្តិការណ៍ឆ្នាំ២០១៩ ដែលបានសម្លាប់មេដឹកនាំរដ្ឋអ៊ីស្លាម Abu Bakr al-Baghdadi។ យោងតាមមន្ទីរបញ្ចកោណ ក្រុមមន្ត្រីរដ្ឋបាលរបស់លោក Biden បាននិយាយថា លោក Qurayshi បានបំផ្ទុះគ្រាប់បែកសម្លាប់ខ្លួនឯង ខណៈដែលកងកម្លាំងអាមេរិកបានចូលទៅកាន់តែជិតទីតាំងរបស់គេ ហើយការបំផ្ទុះនោះបានបណ្ដាលឲ្យជនស៊ីវិលជាច្រើននាក់ស្លាប់ បើទោះបីជាការបញ្ជាក់ពីចំនួនមានការខុសគ្នារវាងរដ្ឋបាលលោក Biden និងក្រុមការពារជនស៊ីវិលស៊ីរីក៏ដោយ។ លោក Biden បាននិយាយចេញពីសេតវិមានកាលពីព្រឹកថ្ងៃព្រហស្បតិ៍ដោយប្រកាសថា ប្រតិបត្តិការនេះបានកម្ចាត់មេដឹកនាំភេរវករដ៏សំខាន់ដោយនិយាយថា សហរដ្ឋអាមេរិកបានជ្រើសរើសប្រើប្រតិបត្តិការកម្លាំងពិសេស ដើម្បីព្យាយាមកុំឲ្យមានការបាត់បង់អាយុជីវិតជនស៊ីវិលច្រើន៕អត្ថបទ៖ សុខមាន

អាមេរិកចោទរុស្ស៊ីថា មានផែនការបង្កើតឃ្លីបក្រាហ្វិកវីដេអូជាលេសវាយប្រហារលើអ៊ុយក្រែន

សហរដ្ឋអាមេរិក៖ មន្ត្រីអាមេរិកបានចោទប្រកាន់កាលពីថ្ងៃព្រហស្បតិ៍ថា រុស្ស៊ីបាននឹងកំពុងរៀបចំបង្កើតលេសសម្រាប់ការលុកលុយចូលអ៊ុយក្រែន ដោយបង្កើតឃ្លីបក្រាហ្វិកវីដេអូឃោសនាដែលនឹងពណ៌នា អំពីការវាយប្រហារក្លែងក្លាយពីសំណាក់អ៊ុយក្រែនមកលើរុស្ស៊ី។ការលាតត្រដាងរបស់សហរដ្ឋអាមេរិកអំពីផែនការ ដែលត្រូវបានចោទប្រកាន់គឺជាការបង្ហាញចុងក្រោយបង្អស់ ដែលត្រូវបានបង្កើតឡើងដើម្បីបំភ្លៃផលប៉ះពាល់នៃលេសណាមួយ ដែលរុស្ស៊ីអាចប្រើដើម្បីឈ្លានពានអ៊ុយក្រែន ហើយកើតឡើងបន្ទាប់ពីមន្ត្រីអាមេរិកបានព្រមានថា ទីក្រុងមូស្គូអាចប្រើប្រតិបត្តិការទង់ក្លែងក្លាយ ដើម្បីបង្ហាញអំពីភាពត្រឹមត្រូវនៃការឈ្លានពានបែបនេះ។ រុស្ស៊ីបានបន្តបង្កើនកងកម្លាំង និងយោទ្ធោបករណ៍នៅតាមព្រំដែនអ៊ុយក្រែន បើទោះបីជាមានការខិតខំប្រឹងប្រែងផ្នែកការទូតដោយសហរដ្ឋអាមេរិក និងសម្ព័ន្ធមិត្ត ដើម្បីបន្ធូរបន្ថយស្ថានការណ៍ដែលចេះតែតានតឹងក៏ដោយ។ថ្លែងនៅក្នុងសន្និសីទសារព័ត៌មាននៅមន្ទីរបញ្ចកោណកាលពីថ្ងៃព្រហស្បតិ៍ អ្នកនាំពាក្យមន្ទីរបញ្ចកោណលោក John Kirby បាននិយាយថា សហរដ្ឋអាមេរិកជឿថា រដ្ឋាភិបាលរុស្ស៊ីកំពុងរៀបចំផែនការវាយប្រហារក្លែងក្លាយដោយយោធាអ៊ុយក្រែន ឬកងកម្លាំងចារកម្មប្រឆាំងនឹងទឹកដីអធិបតេយ្យភាពរុស្ស៊ី ឬប្រឆាំងនឹងប្រជាជនដែលនិយាយភាសារុស្ស៊ី ដើម្បីប្រឌិតហេតុផល។ សម្រាប់ការចូលឈ្លានពាន។ ឯកអគ្គរដ្ឋទូតរុស្ស៊ីប្រចាំនៅសហភាពអឺរ៉ុបលោក Vladimir Chizhov បានប្រាប់ CNN កាលពីថ្ងៃព្រហស្បតិ៍ថា ទីក្រុងមូស្គូមិនមានគម្រោងប្រតិបត្តិការទង់ជាតិក្លែងក្លាយណាមួយ ដើម្បីឈ្លានពានអ៊ុយក្រែននោះទេ៕អត្ថបទ៖ សុខមាន

WHO៖ វីរុស COVID-19 ប្រភេទ BA.2 ជាសាខា Omicron ត្រូវបានរកឃើញនៅក្នុងប្រទេសចំនួន ៥៧

WHO៖ ប្រមុខអង្គការសុខភាពពិភពលោកគឺលោកវេជ្ជបណ្ឌិត Tedros Adhanom Ghebreyesus បាននិយាយកាលពីថ្ងៃអង្គារសប្ដាហ៍នេះថា សាខារបស់វីរុសបម្លែងខ្លួនថ្មី Omicron ដែលបម្លែងចេញពីវីរុសកូរ៉ូណាត្រូវបានរកឃើញនៅក្នុងប្រទេសចំនួន៥៧។ វីរុសបម្លែងខ្លួនថ្មីនេះអាចចម្លងបានលឿងជាងវីរុសដំបូង។អង្គការសុខភាពពិភពលោកជឿថា វីរុស COVID-19 ប្រភេទ BA.2 ជាសាខាវីរុសបម្លែងខ្លួនថ្មី Omicron ត្រូវបានជំនួសវីរុសប្រភេទ BA.1 មុនរបស់ខ្លួន។ ទោះបីជាវីរុសប្រភេទ BA.1 និង BA.1.1 នៅតែមានចំនួន ជាង ៩៦ភាគរយនៃការឆ្លងវីរុសបម្លែងខ្លួនថ្មី Omicron ទាំងអស់នៅទូទាំងពិភពលោកក៏ដោយ ក៏វាមានការកើនឡើងក្នុងករណីឆ្លងដែលទាក់ទងនឹងសាខានៃវីរុសបម្លែងខ្លួនថ្មីនេះដែរ។ អង្គការសុខភាពពិភពលោកបាននិយាយថា ពពួកវីរុសបម្លែងខ្លួនថ្មីប្រភេទ BA.2 ដែលបានកំណត់ត្រូវបានបញ្ជូនទៅកាន់ប្រព័ន្ធចែកចាយទិន្នន័យ GISAID ពី ៥៧ប្រទេសមកទល់នឹងពេលនេះ។អង្គការនេះក៏បាននិយាយផងដែរថា ករណីឆ្លងនៃសាខារបស់វីរុសបម្លែងខ្លួនថ្មីនេះមាន ច្រើនជាងពាក់កណ្តាលនៃប្រភេទវីរុសបម្លែងខ្លួនថ្មី Omicron ទាំងអស់ដែលបានប្រមូលនៅក្នុងប្រទេសមួយចំនួន។ ទោះជាយ៉ាងណាក៏ដោយ ភ្នាក់ងារសុខភាពមួយនេះបានទទួលស្គាល់ថា មិនសូវមានគេដឹងច្រើនទេអំពីភាពខុសគ្នារវាងសាខានៃវីរុសបម្លែងខ្លួនប្រភេទ BA.1 និង BA.2 នោះ។ អង្គការនេះបាននិយាយថាត្រូវតែមានការស្រាវជ្រាវបន្ថែមទៀតជាចាំបាច់ ដើម្បីដឹងពីលក្ខណៈរបស់វីរុសនេះរួមទាំងការចម្លង និងសមត្ថភាពរបស់វាក្នុងការគេចពីប្រព័ន្ធការការពារភាពស៊ាំ៕អត្ថបទ៖ សុខមាន

បណ្ដាញសង្គម

ព័ត៌មានថ្មីៗ

ទឹកឡើងក្នុងបឹង Tanganyika បានជន់លិចផ្ទះសម្បែងប្រជាពលរដ្ឋនៅភាគខាងកើតកុងហ្គោ

ពលរដ្ឋព័រតូរីកូស្វែងរកទឹក ស្របពេលគ្រោះរាំងស្ងួត បង្កការរឹតត្បិតការបែងចែកទឹកប្រើប្រាស់ប្រចាំថ្ងៃ

អតីតប្រធានាធិបតីកូរ៉េខាងត្បូង លោក Yoon ត្រូវបានចោទប្រកាន់ផ្លូវការ ជុំវិញយុទ្ធនាការការពារច្បាប់អាជ្ញាសឹក

ដាណឺម៉ាកនឹងចាត់វិធានការតាមព្រំដែន បើលំហូរអន្តោប្រវេសន៍នៅតែបន្តមានពីដែនដី Ceuta របស់អេស្ប៉ាញ

ផេះពីបន្ទុះភ្នំភ្លើង Etna នាំឲ្យបិទអាកាសយានដ្ឋានអ៊ីតាលី និងបង្អាក់រដូវកាលដើរកម្សាន្ត

មេបញ្ជាការជាន់ខ្ពស់អ៊ីរ៉ង់ បំពេញទស្សនកិច្ចទៅកាន់អ៊ីរ៉ាក់ ដើម្បីពិភាក្សាលើផែនការរំសាយអាវុធក្រុមប្រដាប់អាវុធ

IEA កាត់បន្ថយការព្យាករតម្រូវការប្រេងឆ្នាំ ២០២៦ម្តងទៀត ស្របពេលច្រកសមុទ្រ Hormuz នៅតែបិទ

យន្តហោះ C919 របស់ចិន ធ្វើការហោះហើរពាណិជ្ជកម្មអន្តរជាតិជាលើកដំបូង

មន្ត្រីជាន់ខ្ពស់៖ អ៊ីរ៉ង់ និងសហរដ្ឋអាមេរិក មិនបានពិភាក្សាអំពីការបន្តបទឈប់បាញ់ទេ

ការវាយប្រហារយានដ្រូនអ៊ុយក្រែន បង្កការខូចខាត ស្លាប់មនុស្សនៅទីក្រុង Novorossiysk របស់រុស្ស៊ី

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានសំខាន់ៗ

ពិធីសំណេះសំណាលជាមួយក្រុមការងារផលិតភាពយន្តភាគ និងតួសំដែងរឿង«កូនប្រុសក្រោមពន្លឺព្រះចន្ទពេញបូណ៌មី»

WHO៖ បួនសប្ដាហ៍ចុងក្រោយនេះអ្នកស្លាប់កើនឡើងខ្លាំងនៅជុំវិញពិភពលោក

អាមេរិកព្រមានថា រុស្ស៊ីអាចវាយដណ្ដើមយកទីក្រុងគៀវក្នុងពេល ៧២ម៉ោង

រុស្សីឈានដល់កំណត់ត្រាថ្មីករណីឆ្លងវីរុស COVID-19 ប្រចាំថ្ងៃ ១៨០,០០០ករណី

សហរដ្ឋអាមេរិកព្រមានថា ទីបំផុតចិននឹងខាតបង់ប្រយោជន៍ផ្ទាល់ខ្លួន បើរុស្ស៊ីចូលឈ្លានពានអ៊ុយក្រែន

ប្រសាសន៍សំខាន់ៗរបស់សម្ដេចតេជោ ហ៊ុន សែន ក្នុងពិធីសម្ពោធដាក់ឱ្យប្រើប្រាស់ជាផ្លូវការកំណាត់ផ្លូវជាតិលេខ៧

ព្រះមហាក្សត្រស្តេចយាងនិវត្តមកដល់មាតុប្រទេសវិញហើយ

លោក Biden និយាយថា មេដឹកនាំរដ្ឋអ៊ីស្លាម ISIS បានស្លាប់ក្នុងការវាយឆ្មក់នៅស៊ីរីដឹកនាំដោយអាមេរិក

អាមេរិកចោទរុស្ស៊ីថា មានផែនការបង្កើតឃ្លីបក្រាហ្វិកវីដេអូជាលេសវាយប្រហារលើអ៊ុយក្រែន

WHO៖ វីរុស COVID-19 ប្រភេទ BA.2 ជាសាខា Omicron ត្រូវបានរកឃើញនៅក្នុងប្រទេសចំនួន ៥៧

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានសំខាន់ៗ

ពិធីសំណេះសំណាលជាមួយក្រុមការងារផលិតភាពយន្តភាគ និងតួសំដែងរឿង«កូនប្រុសក្រោមពន្លឺព្រះចន្ទពេញបូណ៌មី»

WHO៖ បួន​សប្ដាហ៍​ចុងក្រោយ​នេះ​អ្នក​ស្លាប់​កើន​ឡើង​ខ្លាំង​នៅ​ជុំវិញ​ពិភពលោក

អាមេរិក​ព្រមាន​ថា ​រុស្ស៊ី​អាច​វាយ​ដណ្ដើមយក​ទីក្រុង​គៀវ​ក្នុង​ពេល​ ៧២​ម៉ោង​

រុស្សី​ឈាន​ដល់​កំណត់ត្រា​ថ្មី​ករណី​ឆ្លង​វីរុស COVID-19 ប្រចាំថ្ងៃ ១៨០,០០០​ករណី

ព្រះមហាក្សត្រស្តេចយាងនិវត្តមកដល់មាតុប្រទេសវិញហើយ

អាមេរិក​ចោទ​រុស្ស៊ី​ថា ​មាន​ផែនការ​បង្កើត​ឃ្លី​ប​ក្រាហ្វិក​វីដេអូ​ជា​លេស​វាយប្រហារ​លើ​អ៊ុយ​ក្រែ​ន

WHO៖ ​វីរុស COVID-19 ប្រភេទ ​BA.2 ជា​សាខា Omicron ត្រូវ​បាន​រក​ឃើញ​នៅ​ក្នុង​ប្រទេស​ចំនួន​ ៥៧

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

WHO៖ បួនសប្ដាហ៍ចុងក្រោយនេះអ្នកស្លាប់កើនឡើងខ្លាំងនៅជុំវិញពិភពលោក

អាមេរិកព្រមានថា រុស្ស៊ីអាចវាយដណ្ដើមយកទីក្រុងគៀវក្នុងពេល ៧២ម៉ោង

រុស្សីឈានដល់កំណត់ត្រាថ្មីករណីឆ្លងវីរុស COVID-19 ប្រចាំថ្ងៃ ១៨០,០០០ករណី

អាមេរិកចោទរុស្ស៊ីថា មានផែនការបង្កើតឃ្លីបក្រាហ្វិកវីដេអូជាលេសវាយប្រហារលើអ៊ុយក្រែន

WHO៖ វីរុស COVID-19 ប្រភេទ BA.2 ជាសាខា Omicron ត្រូវបានរកឃើញនៅក្នុងប្រទេសចំនួន ៥៧