BTV NEWS

កូរ៉េខាងជើង៖ ការពង្រីកកងកម្លាំងអាមេរិក នៅជប៉ុន បង្កើនហានិភ័យនៃការប៉ះទង្គិច នៅឧបទ្វីបកូរ៉េ

ជប៉ុនបាញ់សាកល្បងមីស៊ីល Tomahawk ជាលើកដំបូង ចេញពីនាវាចម្បាំង

សារព័ត៌មាន៖ សម្ព័ន្ធមិត្តមិនទាន់ត្រៀមផ្តល់ជំនួយយោធាដោយផ្ទាល់ដល់អាមេរិកក្នុងជម្លោះជាមួយអ៊ីរ៉ង់ទេ

ការសិក្សា៖ ក្មេងជំទង់អូស្ត្រាលីភាគច្រើន នៅតែប្រើប្រាស់បណ្ដាញសង្គម ៣ខែក្រោយមានបម្រាម

ព័ត៌មានអន្តរជាតិ

អ្នកបើកបរតម្រង់ជួរចាក់ប្រេងនៅតាមស្ថានីយក្នុងទីក្រុងមូស្គូ ស្របពេលជួបកង្វះខាតប្រេងនៅរុស្ស៊ី

អ្នកបើកបរ បានតម្រង់ជួរចាក់ប្រេងនៅតាមស្ថានីយទូទាំងទីក្រុងមូស្គូ នាថ្ងៃសុក្រនេះ ស្របពេលកង្វះខាតប្រេងឥន្ធនៈ ធ្វើឲ្យប៉ះពាល់ដល់តំបន់ជាច្រើនរបស់រុស្ស៊ី ក្នុងនោះស្ថានីយប្រេងមួយចំនួន រាយការណ៍ពីការគ្មានប្រភេទប្រេងឥន្ធនៈមួយចំនួន ហើយស្ថានីយខ្លះទៀត បិទបណ្តោះអាសន្នតែម្តង ។រូបភាពវីដេអូឃ្លីប ឃើញរថយន្តចតជាជួរយ៉ាងវែង រង់ចាំចាក់ប្រេង ខណៈផ្ទាំងតម្លៃប្រេងនៅតាមស្ថានីយមួយចំនួន លែងឃើញមានប្រភេទប្រេង ។ នៅស្ថានីយបិទមួយកន្លែង កញ្ចក់អេក្រង់ជូនដំណឹងដល់អតិថិជនថា ប្រតិបត្តិការត្រូវបានផ្អាក ដោយសារហេតុផលបច្ចេកទេស ។ កង្វះខាតប្រេង បានកើតមាន ស្របពេលការផ្គត់ផ្គង់ប្រេងនៅតាមតំបន់ជាច្រើនរបស់រុស្ស៊ី រងសម្ពាធ ដោយវាបង្ហាញពីភាពតានតឹងនៅក្នុងទីផ្សារប្រេងឥន្ធនៈក្នុងស្រុករបស់ប្រទេសមួយនេះ ។ ទោះបីជាមានការខ្វះខាតប្រេងឥន្ធនៈធ្ងន់ធ្ងរនៅទូទាំងប្រទេសរុស្ស៊ីយ៉ាងណាក្តី លោកប្រធានាធិបតី Vladimir Putin ហាក់ដូចជាមិនអើពើនឹងការវាយប្រហារកាន់តែខ្លាំងឡើងរបស់អ៊ុយក្រែននោះឡើយ លើរោងចក្រចម្រាញ់ប្រេងរបស់ប្រទេសលោក ៕

ក្រុមប្រឹក្សាសន្តិសុខជំរុញឲ្យប្រជាជនបេឡារុសជៀសវាងការធ្វើដំណើរទៅកាន់តំបន់ព្រំដែនរុស្ស៊ី

រដ្ឋលេខាធិការក្រុមប្រឹក្សាសន្តិសុខបេឡារុស លោក Alexander Volfovich បានអំពាវនាវឲ្យប្រជាជនបេឡារុសជៀសវាងការធ្វើដំណើរទៅកាន់តំបន់ព្រំដែនរុស្ស៊ី បន្ទាប់ពីការវាយប្រហាររបស់អ៊ុយក្រែនលើរថយន្តក្រុងដែលធ្វើដំណើរពីទីក្រុងមីនស្ក៍ទៅកាន់ទីក្រុងអាណាប៉ា (Anapa)។ទីភ្នាក់ងារសារព័ត៌មាន BelTA ដកស្រង់សម្តីរបស់លោកដែលបាននិយាយថា ប្រធានាធិបតីនៃប្រទេសបេឡារុស លោក Alexander Lukashenko បាននិយាយម្តងហើយម្តងទៀតថា៖«ប្រជាជនបេឡារុស្សជាទីស្រឡាញ់ សូមជៀសវាងការធ្វើដំណើរទៅកាន់ប្រទេសរុស្ស៊ី ជាពិសេសទៅកាន់តំបន់ព្រំដែន។ ជនរួមជាតិជាទីស្រឡាញ់ សូមជៀសវាងការធ្វើដំណើរនៅថ្ងៃនេះ។ អ្នកកំពុងធ្វើឲ្យខ្លួនអ្នកនិងមនុស្សជាទីស្រលាញ់របស់អ្នក អ្នកដែលធ្វើដំណើរជាមួយអ្នកប្រឈមនឹងគ្រោះថ្នាក់។ គ្មាននរណាម្នាក់អាចធានាសុវត្ថិភាពរបស់អ្នកក្នុងការធ្វើដំណើរបែបនេះបានទេ រហូតដល់ប្រតិបត្តិការយោធាពិសេសត្រូវបានបញ្ចប់»។ លោក Volfovich បានកត់សម្គាល់ថា ការធ្វើដំណើរតាមរថយន្តក្រុង ត្រូវបានរៀបចំដោយប្រតិបត្តិករ ឯកជន។លោកបានបន្ថែមថា៖«ពុំមានក្រុមហ៊ុនរថយន្តក្រុងទេសចរណ៍ណា អាចធានាសុវត្ថិភាពរបស់អ្នកបាន ទេ»៕

ស្រីលង្កាចាប់ខ្លួនអតីតមេបញ្ជាការកងទ័ពជើងទឹកពីបទពុករលួយ

អាជ្ញាធរស្រីលង្កាបានចាប់ខ្លួនអតីតមេបញ្ជាការកងទ័ពជើងទឹកម្នាក់នៅថ្ងៃសុក្រនេះជុំវិញការចោទប្រកាន់ថា លោកបានជួយដោយខុសច្បាប់ក្នុងការជ្រើសរើសកូនប្រុសរបស់លោកអតីតប្រធានាធិបតី Mahinda Rajapaksa ឲ្យទៅទទួលការបណ្តុះបណ្តាលនៅក្រៅប្រទេស។លោកឧត្តមនាវីឯកនៃកងនាវា Wasantha Karannagoda អាយុ ៧៣ឆ្នាំ ត្រូវបានចាប់ឃុំខ្លួនដោយ គណៈកម្មការប្រឆាំងអំពើពុករលួយពីបទជ្រើសរើសលោក Yoshitha Rajapaksa ក្នុងឆ្នាំ ២០០៦ ដោយគ្មានលក្ខណៈសម្បត្តិគ្រប់គ្រាន់។លោក Karannagoda គឺជាមេបញ្ជាការកងទ័ពជើងទឹកនៅពេលដែលសង្គ្រាមបំបែកខ្លួនតាមិលរយៈពេលជាច្រើនទសវត្សរ៍របស់ប្រទេសស្រីលង្កា បានបញ្ចប់នៅឆ្នាំ ២០០៩។ លោកត្រូវបានតម្លើងឋានៈជាឧត្តមនាវីឯកនៃកងនាវានៅឆ្នាំ ២០១៩ ហើយបច្ចុប្បន្នមិនមានតួនាទីសកម្មនៅក្នុងកងទ័ពជើងទឹកទេ។លោក Yoshitha Rajapaksa អាយុ ៣៨ ឆ្នាំ ត្រូវបានដោះលែងឲ្យនៅក្រៅឃុំ បន្ទាប់ពីលោកត្រូវបានចាប់ខែមុន កាលពីខែមុនក្នុងករណីពាក់ព័ន្ធ ដែលលោកត្រូវបានចោទប្រកាន់ពីបទប្រើប្រាស់មូលនិធិសាធារណៈសម្រាប់ការបណ្តុះបណ្តាលនៅមហាវិទ្យាល័យកងទ័ពជើងទឹកដ៏មានកិត្យានុភាពរបស់ចក្រភពអង់គ្លេសនៅ Dartmouth៕

ចក្រភពអង់គ្លេស និងចិន សន្យាជំរុញការវិនិយោគសេវាកម្ម នៅឯកិច្ចប្រជុំកំពូលពាណិជ្ជកម្មក្រុងឡុងដ្រ៍

ចក្រភពអង់គ្លេស និងចិន កាលពីថ្ងៃព្រហស្បតិ៍ (ទី២ ខែកក្កដា ឆ្នាំ២០២៦) បានធ្វើកិច្ចពិភាក្សាសេដ្ឋកិច្ចកម្រិតខ្ពស់ នៅទីក្រុងឡុងដ្រ៍ ដោយផ្តោតលើការជំរុញពាណិជ្ជកម្មសេវាកម្ម និងដោះស្រាយឧបសគ្គសំខាន់ៗនៃការចូលទីផ្សារ រវាងប្រទេសទាំង២។កិច្ចប្រជុំគណៈកម្មការសេដ្ឋកិច្ច និងពាណិជ្ជកម្មរួម រវាងចក្រភពអង់គ្លេស និងចិន (JETCO) ត្រូវបានធ្វើសហប្រធានដោយរដ្ឋមន្ត្រីពាណិជ្ជកម្ម លោក Peter Kyle និងសមភាគីចិនរបស់លោក គឺលោក Wang Wentao នៅឯនិវេសនដ្ឋាន Mansion House។កិច្ចប្រជុំកំពូលនេះធ្វើឡើងបន្ទាប់ពីមានដំណើរទស្សនកិច្ចរបស់នាយករដ្ឋមន្ត្រីទៅកាន់ប្រទេសចិន ក្នុងខែមករា ឆ្នាំ២០២៦ ដែលរដ្ឋាភិបាលចក្រភពអង់គ្លេស លើកឡើងថា បានជំរុញ «កិច្ចព្រមព្រៀងនាំចេញចំនួន ២,២ពាន់លានផោន និងឱកាសចូលទីផ្សារប្រហែល ២,៣ពាន់លានផោន សម្រាប់អាជីវកម្មចក្រភពអង់គ្លេសក្នុងរយៈពេល ៥ឆ្នាំ»។យោងតាមសេចក្តីថ្លែងការណ៍របស់រដ្ឋាភិបាលអង់គ្លេស ដែលមានបន្ទាប់ពីការពិភាក្សាបច្ចេកទេសធ្វើឡើងបន្តិចមុនកិច្ចប្រជុំកំពូល បានឲ្យដឹងថា ការផ្តោតជាសំខាន់នៃការពិភាក្សានេះ គឺការពិនិត្យឡើងវិញនូវវឌ្ឍនភាពលើ «ការសិក្សាលទ្ធភាពរួមគ្នា ស្ដីពីកិច្ចព្រមព្រៀងពាណិជ្ជកម្មសេវាកម្មដែលមានសក្តានុពល»។រដ្ឋមន្ត្រីនៃភាគីទាំង២ បានគូសបញ្ជាក់ពី «ភាពជាដៃគូសេវាកម្មទ្វេភាគី» ដែលមានគោលបំណងពង្រឹងកិច្ចសហប្រតិបត្តិការ ក្នុងសេវាកម្មវិជ្ជាជីវៈ និងអាជីវកម្ម។ លើសពីនេះ ពួកលោកបានប្តេជ្ញាគាំទ្រការផ្លាស់ប្តូរទ្វេភាគី លើការបើកទីផ្សារសេវាកម្មផ្នែកច្បាប់របស់ប្រទេសចិន និងបានអបអរសាទរការដាក់ឱ្យដំណើរការ «វេទិកាផ្គូផ្គងសេវាកម្មវិជ្ជាជីវៈ និងអាជីវកម្មចក្រភពអង់គ្លេស-ចិន» ថ្មីមួយ៕

ចិនបង្កើនការព្រមានដល់ជប៉ុន និងហ្វីលីពីន ជុំវិញកិច្ចចរចាដែនសមុទ្រ

ចិនបានចេញការព្រមានផ្នែកច្បាប់ ប្រឆាំងនឹងជប៉ុន និងហ្វីលីពីន ជុំវិញកិច្ចចរចាព្រំដែនដែនសមុទ្រនាពេលខាងមុខរបស់ភាគីទាំង២ ជាការបង្កើនសម្ពាធលើសម្ព័ន្ធមិត្តសំខាន់ៗក្នុងតំបន់របស់ទីក្រុងវ៉ាស៊ីនតោន ខណៈពេលដែលប្រទេសទាំងនេះ ព្យាយាមទប់ទល់នឹងឥទ្ធិពលកងទ័ពជើងទឹករបស់ទីក្រុងប៉េកាំង។ក្រសួងធនធានធម្មជាតិរបស់ប្រទេសចិន បានបញ្ជាក់ថា ការពិភាក្សាដែលបានគ្រោងទុកនោះ «បង្កើតបានជាវិធានការខុសច្បាប់អន្តរជាតិ» ខណៈដែលខ្លួនបានជំរុញឱ្យប្រទេសទាំង២ ចាប់ផ្តើមកិច្ចចរចាជាមួយទីក្រុងប៉េកាំង។ នេះបើយោងតាមឯកសារបកស្រាយផ្នែកច្បាប់ដែលស្ថាប័ននេះបានចេញផ្សាយកាលពីថ្ងៃព្រហស្បតិ៍ (ទី២ ខែកក្កដា ឆ្នាំ២០២៦)។ឯកសារដែលចេញដោយវិទ្យាស្ថានកិច្ចការដែនសមុទ្រចិនក្រោមក្រសួង បានលើកឡើងថា ការចរចាទាំងនេះ គឺខុសច្បាប់ ព្រោះវាត្រូវបានផ្តួចផ្តើមឡើង «ដោយគ្មានការពិគ្រោះយោបល់ជាមួយប្រទេសចិន»។ របាយការណ៍នេះ ក៏បានព្រមានផងដែរដល់មហាអំណាចខាងក្រៅឱ្យជៀសវាង «ហានិភ័យនយោបាយ» ក្នុងការជួយ ឬទទួលស្គាល់ដំណើរការកិច្ចចរចា។ចំណាត់ការនេះបង្ហាញពីការមិនពេញចិត្តកាន់តែខ្លាំងឡើងរបស់ទីក្រុងប៉េកាំង ចំពោះការសម្រេចចិត្តរបស់ទីក្រុងម៉ានីល និងតូក្យូ ក្នុងការចាប់ផ្តើមកិច្ចចរចាព្រំដែនដែនសមុទ្រ ពាក់ព័ន្ធនឹងដែនទឹក នៅភាគខាងកើតកោះតៃវ៉ាន់។ ក្រោយមក ចិនបានបញ្ជូននាវាឆ្មាំសមុទ្រឱ្យល្បាតតំបន់នោះ ក៏ដូចជានាវាសិក្សាស្រាវជ្រាវ ដើម្បីគូសផែនទីបាតសមុទ្រ។ក្រៅពីកិច្ចចរចាដែលបានគ្រោងទុក ពាក់ព័ន្ធនឹងព្រំដែនសមុទ្រនេះ ប៉ុន្មានខែថ្មីៗនេះ មេដឹកនាំរបស់ជប៉ុន និងហ្វីលីពីន ក៏បានលើកឡើងផងដែរថា ប្រទេសរបស់ពួកគេ ទំនងជានឹងត្រូវបានទាញចូលទៅក្នុងជម្លោះណាមួយ ដែលកើតមានលើកោះតៃវ៉ាន់ ជាការកត់សម្គាល់ដែលធ្វើឱ្យទីក្រុងប៉េកាំងខឹងសម្បា។ ហើយប្រទេសទាំង២ ក៏បានចាត់វិធានការពង្រឹងទំនាក់ទំនងយោធា ដោយកាលពីខែឧសភា ព្រមព្រៀងគ្នាលើកកម្ពស់ទំនាក់ទំនងរបស់ភាគីទាំង២ និងបើកកិច្ចចរចាការពារជាតិជាបន្តបន្ទាប់៕

ប្រធានាធិបតីលីបង់ បញ្ជាក់ថា នឹងមិនព្រមបាត់បង់ទឹកដី «សូម្បី ១អ៊ីញ» ទៅឱ្យអ៊ីស្រាអែលឡើយ

កាលពីថ្ងៃព្រហស្បតិ៍ (ទី២ ខែកក្កដា ឆ្នាំ២០២៦) ប្រធានាធិបតីលីបង់ លោក Joseph Aoun បាននិយាយការពារការចរចាជាមួយអ៊ីស្រាអែល ដោយបានបញ្ជាក់ថា វាមិនមែនជាការក្បត់ជាតិឡើយ ហើយលោកនឹងមិនព្រមបាត់បង់ «ទឹកដីរបស់ប្រទេសលីបង់សូម្បី ១អ៊ីញ»។ នេះបើយោងតាមការិយាល័យរបស់ប្រធានាធិបតី។រដ្ឋមន្ត្រីការពារជាតិអ៊ីស្រាអែល លោក Israel Katz បាននិយាយកាលពីថ្ងៃពុធថា កងទ័ពអ៊ីស្រាអែលនឹងនៅតែមានវត្តមានតាមទីតាំងឈរជើងនានា «រហូតដល់មានការជូនដំណឹងបន្ថែម» ជាអ្វីដែលខ្លួនពិពណ៌នាថា ជា «តំបន់សន្តិសុខ» នៅក្នុងប្រទេសលីបង់ ស៊ីរី និងតំបន់ហ្កាហ្សា។លីបង់បានចុះហត្ថលេខាកាលពីសប្តាហ៍មុន លើកិច្ចព្រមព្រៀងក្របខ័ណ្ឌគាំទ្រដោយសហរដ្ឋអាមេរិកជាមួយអ៊ីស្រាអែល ដោយមានគោលបំណងធានាសន្តិភាព រវាងប្រទេសទាំង២ ជាចំណាត់ការមួយដែលត្រូវបានជួបប្រទះនឹងការតវ៉ាយ៉ាងខ្លាំងពីហេសបូឡា ជាក្រុមប្រដាប់អាវុធដែលគាំទ្រដោយអ៊ីរ៉ង់។លោក Aoun បាននិយាយកាលពីថ្ងៃព្រហស្បតិ៍ថា ការចរចាជាមួយអ៊ីស្រាអែលមិនមែនជា «ការក្បត់ជាតិទេ ប៉ុន្តែជាសង្គ្រាមការទូតដោយគ្មានការបង្ហូរឈាមដែលមិនចាំបាច់»។ប្រធានាធិបតីលីបង់បានបញ្ជាក់ថា ទីក្រុងបេរូតបានសម្រេចចិត្តចូលរួម ក្នុងកិច្ចចរចា «ដើម្បីធានាឲ្យមានការដកទ័ពរបស់អ៊ីស្រាអែលចេញពីទឹកដីរបស់ខ្លួន»។ ហើយលោកបានប្រកាស ដោយសង្កត់ថ្ងន់ថា «យើងនឹងមិនព្រមបាត់បង់ទឹកដីរបស់ប្រទេសលីបង់សូម្បីតែ ១អ៊ីញ»។កិច្ចព្រមព្រៀងក្របខ័ណ្ឌនេះមើលឃើញថា កងទ័ពលីបង់នឹងបង្កើតសិទ្ធិអំណាចរបស់ខ្លួនបន្តិចម្តងៗ នៅភាគខាងត្បូងនៃប្រទេសលីបង់ នៅពេលដែលក្រុមហេសបូឡារំសាយអាវុធ ហើយអ៊ីស្រាអែលដកទ័ពចេញ ប៉ុន្តែមិនកំណត់ពេលវេលា សម្រាប់ដំណើរការនេះឡើយ៕

ភ្លៀងធ្លាក់ខ្លាំង បង្កការជន់លិចតំបន់ជាច្រើនរបស់ប្រទេសឥណ្ឌា ខណៈអ្នកស្រុកប្រឈមនឹងការជន់លិចធ្ងន់ធ្ងរ

ភ្លៀងធ្លាក់ខ្លាំង បានវាយប្រហារតំបន់ជាច្រើននៅភាគខាងលិច និងភាគកណ្តាលប្រទេសឥណ្ឌានាថ្ងៃសុក្រនេះ បណ្តាលឲ្យមានការអាក់ខានទ្រង់ទ្រាយធំដល់ការធ្វើដំណើរក្នុងស្រុក ។នៅទីក្រុង Valsad ស្ថិតក្នុងរដ្ឋភាគខាងលិច Gujarat ទឹកជំនន់បានហូរចូលផ្ទះប្រជាពលរដ្ឋ ធ្វើឲ្យខូចខាតសម្ភារៈប្រើប្រាស់របស់ក្រុមគ្រួសារ ហើយនៅទីក្រុង Rajkot ស្ពានបាក់ត្រូវបានរាយការណ៍ ។ខណៈពេលនោះដែរ អ្នកស្រុករស់នៅក្នុងទីក្រុងភាគឦសាន Guwahati និយាយថា ផលប៉ះពាល់នៃទឹកដក់ បង្កើនហានិភ័យនៃជំងឺសើរស្បែក ហើយពួកគេចាត់ទុកស្ថានភាពបែបនេះថា ពុំសូវអំណោយផលទាល់តែសោះ ។សូមបញ្ជាក់ថា ភ្លៀងមូសុងវស្សា ផ្តល់ទឹកភ្លៀងប្រហែល ៧០ភាគរយនៃទឹកភ្លៀងប្រចាំឆ្នាំ ដើម្បីបំពេញប្រភពទឹកសំខាន់ៗ នៅក្នុងប្រទេសសេដ្ឋកិច្ចតម្លៃជិត ៤សែនកោដិដុល្លារមួយនេះ ជាទីដែលជិតពាក់កណ្តាលនៃដីកសិកម្មខ្វះខាតប្រព័ន្ធធារាសាស្រ្ត ហើយប្រហែលពាក់កណ្តាលនៃប្រជាពលរដ្ឋ រកប្រាក់ចិញ្ចឹមជីវីតរបស់ខ្លួនពីការប្រកបរបរកសិកម្ម ។ភ្លៀងធ្លាក់អំឡុងខែកក្កដា សំខាន់ខ្លាំងណាស់ ដោយសារវាគឺជាប្រភពទឹកភ្លៀងដ៏ខ្លាំងក្លាមួយនៃរដូវវស្សារយៈពេល ៤ខែ ហើយកសិករភាគច្រើន បានសាបព្រួសដំណាំរបស់ពួកគេ អំឡុងខែនេះ ៕

មន្ត្រីអាមេរិក៖ លោក Trump ចង់ឱ្យបញ្ចប់ «ការសម្លាប់ឥតហេតុផល» នៅអ៊ុយក្រែន

មន្ត្រីអាមេរិកមួយរូប បាននិយាយកាលពីថ្ងៃព្រហស្បតិ៍ (ទី២ ខែកក្កដា ឆ្នាំ២០២៦)ថា លោកប្រធានាធិបតី Donald Trump ចង់ឱ្យមានកិច្ចព្រមព្រៀងសន្តិភាព ដើម្បីបញ្ចប់ «ការសម្លាប់ឥតសមហេតុផល» នៅប្រទេសអ៊ុយក្រែន បន្ទាប់ពីការវាយប្រហារយ៉ាងខ្លាំងរបស់រុស្ស៊ី លើទីក្រុងគីវ បានសម្លាប់មនុស្សយ៉ាងហោចណាស់ ២១នាក់។ដើម្បីឆ្លើយតបទៅនឹងសំណួរមួយ អំពីការវាយប្រហាររបស់រុស្ស៊ី មន្ត្រីអាមេរិករូបនេះបានប្រាប់សារព័ត៌មាន AFP ថា៖ «លោកប្រធានាធិបតី Trump មានចិត្តមនុស្សធម៌ ហើយចង់ឱ្យសង្គ្រាមនេះត្រូវបានបញ្ចប់ ដើម្បីឲ្យការសម្លាប់ឥតសមហេតុផលលែងមានតទៅ»។មន្ត្រីរូបនោះបានបន្ថែមថា៖ «លោកប្រធានាធិបតី និងក្រុមរបស់លោក បានខិតខំប្រឹងប្រែងយ៉ាងខ្លាំង ដើម្បីបញ្ចប់សង្គ្រាមរវាងរុស្ស៊ី និងអ៊ុយក្រែន ហើយលោកនៅតែមានសុទិដ្ឋិនិយមថា នៅទីបំផុត យើងនឹងទទួលបានកិច្ចព្រមព្រៀងសន្តិភាព»។គួរបញ្ជាក់ថា ទីក្រុងគីវ និងមូស្គូ សុទ្ធតែបានសន្យាយ៉ាងម៉ឺងម៉ាត់ដូចគ្នាថា នឹងបើកការវាយប្រហារជាថ្មី នៅក្នុងសង្គ្រាមរយៈពេល ៤ឆ្នាំនេះ បន្ទាប់ពីមានការបាញ់ស្រោចដ៏ធំពេញមួយយប់ ដែលបានបំផ្លាញអគារផ្ទះល្វែង នៅក្នុងរដ្ឋធានីរបស់អ៊ុយក្រែន និងបានធ្វើឲ្យមនុស្សរាប់ម៉ឺននាក់រត់ទៅកាន់ទីជម្រកសុវត្ថិភាព។មុនពេលលោកវិលត្រឡប់ទៅកាន់តំណែងវិញ កាលពីឆ្នាំមុន លោក Trump បាននិយាយថា លោកអាចដោះស្រាយសង្គ្រាមអ៊ុយក្រែន ក្នុងរយៈពេល ២៤ម៉ោង ប៉ុន្តែកិច្ចខិតខំប្រឹងប្រែងរបស់សហរដ្ឋអាមេរិ កក្នុងការសម្របសម្រួលឱ្យមានបទឈប់បាញ់ រវាងទីក្រុងមូស្គូ និងទីក្រុងគីវ រហូតមកដល់ពេលនេះ មិនទួលបានជោគជ័យឡើយ៕

លោក Trump ប្រាប់ថា អ៊ីរ៉ង់យល់ព្រមតាមតម្រូវការរបស់សហរដ្ឋអាមេរិកស្ទើរទាំងអស់

លោកប្រធានាធិបតី Donald Trump កាលពីថ្ងៃព្រហស្បតិ៍ (ទី២ ខែកក្កដា ឆ្នាំ២០២៦) បាននិយាយថា អ៊ីរ៉ង់បានយល់ព្រមចំពោះ «អ្វីៗស្ទើរតែទាំងអស់» ដែលសហរដ្ឋអាមេរិកត្រូវការ។លោក Trump បានប្រាប់ប្រព័ន្ធផ្សព្វផ្សាយ CNBC កាលពីថ្ងៃព្រហស្បតិ៍ថា៖ «យើងកំពុងចរចា ហើយខ្ញុំគិតថា ពួកគេបានយល់ព្រម ចំពោះអ្វីៗស្ទើរតែទាំងអស់ដែលយើងត្រូវការ»។នៅថ្ងៃព្រហស្បតិ៍នោះដែរ អ្នកសម្របសម្រួលបានឱ្យដឹងថា អ៊ីរ៉ង់ និងសហរដ្ឋអាមេរិក បានបញ្ចប់ការចរចាដោយប្រយោលមួយជុំ នៅទីក្រុងដូហា ប្រទេសកាតា ខណៈដែលភាគីទាំង២ បានបន្តកិច្ចខិតខំប្រឹងប្រែងដើម្បីជំរុញការចរចា និងកាត់បន្ថយភាពតានតឹង បន្ទាប់ពីមានការបាញ់ប្រហារតបតគ្នាថ្មីៗនេះ។កាលពីខែមិថុនា ទីក្រុងវ៉ាស៊ីនតោន និងអេរ៉ង់ បានយល់ព្រមលើអនុស្សរណៈនៃការយោគយល់គ្នា (MOU) សម្របសម្រួលដោយកាតា និងប៉ាគីស្ថាន ដែលរួមមានបទឈប់បាញ់រយៈពេល ៦០ថ្ងៃ ដោយមានបំណងផ្អាកសង្គ្រាមដែលបានផ្ទុះឡើងដោយការវាយប្រហាររបស់សហរដ្ឋអាមេរិក-អ៊ីស្រាអែល កាលពីចុងខែកុម្ភៈ ក៏ដូចជាការបើកឡើងវិញនូវច្រកសមុទ្រ Hormuz ដែលត្រូវបានបិទខ្ទប់។កិច្ចព្រមព្រៀង ១៤ចំណុចនេះ ក៏បានកំណត់ពេលវេលា ដើម្បីបន្តការចរចាបញ្ចប់សង្គ្រាមជាអចិន្ត្រៃយ៍ និងដោះស្រាយបញ្ហានានា ដូចជាការរៀបចំសម្រាប់ច្រកសមុទ្រ Hormuz មូលនិធិកសាងឡើងវិញសម្រាប់អ៊ីរ៉ង់ និងអនាគតនៃកម្មវិធីនុយក្លេអ៊ែររបស់សាធារណរដ្ឋអ៊ិស្លាម៕

អ៊ីរ៉ង់ព្រមានអាមេរិក និងអ៊ីស្រាអែល កុំឲ្យធ្វើការវាយប្រហារ មុនពិធីដង្ហែសពលោក Khamenei

កាលពីថ្ងៃព្រហស្បតិ៍ (ទី២ ខែកក្កដា ឆ្នាំ២០២៦) មេបញ្ជាការយោធាអ៊ីរ៉ង់មួយរូប បានព្រមានសហរដ្ឋអាមេរិក និងអ៊ីស្រាអែល កុំឲ្យបើកការវាយប្រហារណាមួយ លើអ៊ីរ៉ង់ ខណៈដែលប្រទេសនេះកំពុងរៀបចំពិធីបុណ្យសពផ្លូវរដ្ឋរបស់មេដឹកនាំកំពូល លោក Ayatollah Ali Khamenei ដែលត្រូវបានសម្លាប់នៅក្នុងការវាយប្រហារតាមអាកាស អំឡុងថ្ងៃដំបូងនៃសង្គ្រាម។នៅក្នុងសេចក្តីថ្លែងការណ៍មួយដែលត្រូវបានផ្សាយដោយប្រព័ន្ធផ្សព្វផ្សាយរដ្ឋ មេបញ្ជាការនៃទីស្នាក់ការកណ្តាល Khatam al-Anbiya លោក Ali Abdollahi បានបញ្ជាក់ថា៖ «យើងសូមព្រមានគូសត្រូវរបស់អ៊ីរ៉ង់ ជាពិសេសសហរដ្ឋអាមេរិក និងអ៊ីស្រាអែល ឲ្យជៀសវាងនូវការគណនាខុស និងគិតអំពីការសងសឹកដ៏ខ្លាំងក្លាដែលកងកម្លាំងប្រដាប់អាវុធរបស់យើង នឹងធ្វើចំពោះការគំរាមកំហែង និងការឈ្លានពានណាមួយលើប្រទេសរបស់យើង»។ពិធីដង្ហែសពលោក Khamenei នឹងចាប់ផ្តើមនៅថ្ងៃទី៤ ខែកក្កដា នៅទីក្រុងតេអេរ៉ង់ និងបញ្ចប់នៅថ្ងៃទី៩ ខែកក្កដា ដោយមានការបញ្ចុះសពរបស់លោកនៅស្រុកកំណើតរបស់លោក គឺ Mashhad ខណៈពិធីបន្ថែមបានគ្រោងទុកធ្វើនៅទីក្រុង Qom និងប្រទេសអ៊ីរ៉ាក់ នៅចន្លោះកាលបរិច្ឆេទទាំងនេះ។កាលពីថ្ងៃពុធ រដ្ឋមន្ត្រីការបរទេសអ៊ីរ៉ង់ លោក Abbas Araqchi បានព្រមានស្រដៀងគ្នានេះថា ទីក្រុងតេអេរ៉ង់ នឹងផ្តល់ការឆ្លើយតបភ្លាមៗ និងខ្លាំងក្លា ចំពោះការគំរាមកំហែងណាមួយ លើប្រជាជន ឬថ្នាក់ដឹកនាំរបស់ខ្លួន បន្ទាប់ពីមានការអត្ថាធិប្បាយដោយរដ្ឋមន្ត្រីក្រសួងការពារជាតិអ៊ីស្រាអែល លោក Israel Katz ថា មេដឹកនាំកំពូលបច្ចុប្បន្នរបស់អ៊ីរ៉ង់ លោក Mojtaba Khamenei ត្រូវបាន «កំណត់គោលដៅធ្វើឃាត»។ប្រព័ន្ធផ្សព្វផ្សាយអ៊ីរ៉ង់បានរាយការណ៍ពីការមានវិធានការសន្តិសុខកាន់តែតឹងរ៉ឹង ក្នុងអំឡុងពេលពិធីបុណ្យសពនេះ ខណៈដែលប្រធានអង្គការអាកាសចរណ៍ស៊ីវិលអ៊ីរ៉ង់ បាននិយាយកាលពីថ្ងៃពុធថា ការរឹតបន្តឹងដែនអាកាសបណ្តោះអាសន្ននឹ ងត្រូវបានអនុវត្តលើទីក្រុងជាច្រើន ក្នុងនោះរួមទាំងទីក្រុងតេអេរ៉ង់ និង Mashhad ផងដែរ៕

បណ្ដាញសង្គម

ព័ត៌មានថ្មីៗ

ឯកឧត្តមបណ្ឌិត អ៊ាង សុផល្លែត អញ្ជើញប្រគេនទៀនវស្សា និងទេយ្យទានផ្សេងៗរបស់សម្តេចធិបតី និងលោកជំទាវដល់ព្រះសង្ឃនៅតាមបណ្តាវត្តក្នុងខេត្តត្បូងឃ្មុំ

តំណាងអយ្យការចោទប្រកាន់ រតនៈ ពិសាល ពីបទហិង្សាដោយចេតនាមានស្ថានទម្ងន់ទោស ក្រោយបង្កហិង្សា និងអះអាងថា ខ្លួនជាកូនខ្លាមេ០៧

ជប៉ុនបាញ់សាកល្បងមីស៊ីល Tomahawk ជាលើកដំបូង ចេញពីនាវាចម្បាំង

អាមេរិក និងចិន លេចឡើងនូវភាពតានតឹង ជុំវិញបញ្ហានានា មុនដំណើរទស្សនកិច្ចរបស់លោក Xi នៅខែកញ្ញា

លោក Trump ចុះហត្ថលេខាលើក្រឹត្យ ស្តីពីការរឹតបន្តឹងការនាំចេញ ដើម្បីរក្សារ៉ែសំខាន់ៗ

អ្នករាយការណ៍ពិសេស UN ៖ ជនភៀសសឹកកម្ពុជាគួរត្រូវបានត្រឡប់ទៅភូមិឋានវិញដោយគ្មានការរារាំង

ច្រកចេញចូលតែមួយស្រុករំដួលខេត្ត ស្វាយរៀងផ្ដល់សេវាសាធារណៈជូនពលរដ្ឋមុនថ្ងៃកំណត់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានអន្តរជាតិ

អ្នកបើកបរតម្រង់ជួរចាក់ប្រេងនៅតាមស្ថានីយក្នុងទីក្រុងមូស្គូ ស្របពេលជួបកង្វះខាតប្រេងនៅរុស្ស៊ី

ក្រុមប្រឹក្សាសន្តិសុខជំរុញឲ្យប្រជាជនបេឡារុសជៀសវាងការធ្វើដំណើរទៅកាន់តំបន់ព្រំដែនរុស្ស៊ី

ស្រីលង្កាចាប់ខ្លួនអតីតមេបញ្ជាការកងទ័ពជើងទឹកពីបទពុករលួយ

ចក្រភពអង់គ្លេស និងចិន សន្យាជំរុញការវិនិយោគសេវាកម្ម នៅឯ​កិច្ចប្រជុំកំពូលពាណិជ្ជកម្មក្រុងឡុងដ្រ៍

ចិនបង្កើនការព្រមានដល់ជប៉ុន និងហ្វីលីពីន ជុំវិញកិច្ចចរចាដែនសមុទ្រ

ប្រធានាធិបតីលីបង់ បញ្ជាក់​ថា នឹងមិនព្រម​បាត់បង់​ទឹកដី «សូម្បី ១អ៊ីញ» ទៅឱ្យអ៊ីស្រាអែលឡើយ​

ភ្លៀងធ្លាក់ខ្លាំង បង្កការជន់លិចតំបន់ជាច្រើនរបស់ប្រទេសឥណ្ឌា ខណៈអ្នកស្រុកប្រឈមនឹងការជន់លិចធ្ងន់ធ្ងរ

មន្ត្រីអាមេរិក៖ លោក Trump ចង់ឱ្យបញ្ចប់​ «ការសម្លាប់ឥតហេតុផល​» នៅអ៊ុយក្រែន ​

លោក Trump ប្រាប់​ថា អ៊ីរ៉ង់យល់ព្រមតាមតម្រូវ​ការ​របស់​សហរដ្ឋ​អាមេរិក​​ស្ទើរទាំងអស់

អ៊ីរ៉ង់ព្រមានអាមេរិក និងអ៊ីស្រាអែល កុំ​ឲ្យ​ធ្វើ​ការវាយប្រហារ មុនពិធីដង្ហែសពលោក Khamenei