នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ក្រុមហ៊ូទីអះអាងថា ខ្លួនបានបង្ខំឲ្យនាវាដឹកប្រេងអារ៉ាប៊ីសាអ៊ូឌីត ៨គ្រឿង បង្វែរទិសដៅ ដោយសារការបិទខ្ទប់ផ្លូវសមុទ្រ
ការចំណាយសរុបរបស់អ៊ុយក្រែនក្នុងឆ្នាំ ២០២៦ នឹងមានចំនួន ១៧៦,៨ ពាន់លានដុល្លារ
សហភាពអឺរ៉ុប នឹងពង្រីកការអនុវត្តច្បាប់ស្តីពីបញ្ញាសិប្បនិម្មិត (AI) ចាប់ពីថ្ងៃទី២ ខែសីហា
រដ្ឋាភិបាលឥណ្ឌា៖ ពលរដ្ឋឥណ្ឌា ១៦នាក់ ស្លាប់និង ៧៥នាក់ រងរបួស ចាប់តាំងពីជម្លោះនៅមជ្ឈិមបូព៌ាផ្ទុះឡើង ក្នុងឆ្នាំនេះ

ព័ត៌មានអន្តរជាតិ

ប្រភព៖ អឺរ៉ុប នឹងបំពេញស្ទើរ​គ្រប់​ចន្លោះបន្សល់ទុក​​ដោយ​​អាមេរិក ក្នុងផែនការការពារជាតិរបស់ណាតូ

2026/07/02 11:46:58 pm        65
Facebook Telegram Linkin
ប្រភពមួយរបស់អង្គការណាតូ (NATO) បានប្រាប់សារព័ត៌មាន Reuters ​កាលពីថ្ងៃពុធ (ទី១ ខែកក្កដា ឆ្នាំ២០២៦) ថា នៅក្នុងកិច្ចប្រជុំកំពូលទីក្រុង Ankara ប្រទេសទួរគី នាសប្តាហ៍ក្រោយ អង្គការណាតូ នឹងប្រកាសថា សមាជិកអឺរ៉ុបរបស់ខ្លួន បានបំពេញចន្លោះស្ទើរតែទាំងអស់ដែលសហរដ្ឋអាមេរិកបានបន្សល់ទុក នៅក្នុងផែនការការពារជាតិរបស់សម្ព័ន្ធភាព​មួយ​នេះ​។តែយ៉ាង​ណាក្ដី ចន្លោះប្រហោងសំខាន់​ដែលអង្គការ​ណាតូ នៅតែកំពុងជួប​ការ​លំបាក ក្នុង​ការ​បំពេញ គឺយន្តហោះទម្លាក់គ្រាប់បែកយុទ្ធសាស្ត្រ ដែលសហរដ្ឋអាមេរិក បានឱ្យដឹង​ថា ខ្លួននឹងទុក​យន្តហោះតែ ១​គ្រឿង ជំនួសឱ្យ ២គ្រឿង។ នេះបើយោងតាមប្រភព ដែល​បាន​និយាយក្នុងលក្ខខណ្ឌមិនបញ្ចេញឈ្មោះ។សហរដ្ឋអាមេរិកបានប្រាប់សម្ព័ន្ធមិត្តរបស់ខ្លួនកាលពីខែឧសភាថា ខ្លួនបានសម្រេចចិត្តបង្រួមសមត្ថភាពយោធាដែលបាន​ប្តេជ្ញាចិត្ត ចំពោះសម្ព័ន្ធមិត្តឆ្លងមហាសមុទ្រ​អាត្លង់ទិកមួយ​នេះ អំឡុង​វិបត្តិ ដោយ​បាន​បង្ក​ឲ្យមាន​ការ​ចោទ​សួរ​បន្ទាន់ជាច្រើន​ ខណៈដែលមេដឹកនាំរៀបចំ សម្រាប់កិច្ចប្រជុំកំពូលណាតូ នៅទីក្រុង Ankara ពី​​ថ្ងៃទី៧ ដល់ថ្ងៃទី៨ ខែកក្កដា។ចំណាត់ការ​នេះស្មើ​នឹងការ​បញ្ចប់បន្តិចម្តងៗនូវ «ការពឹងផ្អែករួមគ្នាប្រកប​ដោយ​ហានិភ័យ​» លើកងកម្លាំងរបស់​សហរដ្ឋ​អាមេរិក ខណៈដែលទីក្រុងវ៉ាស៊ីនតោនប្រឈមនឹងលទ្ធភាព​នៃ​ការ​មាន​ជម្លោះក្នុងពេលដំណាលគ្នា នៅក្នុងសមរភូមិជាច្រើន។ នេះបើយោងតាមមេបញ្ជាការជាន់ខ្ពស់​របស់អង្គការ​ណាតូ គឺឧត្តមសេនីយ៍កងទ័ពអាកាសអាមេរិក លោក Alexus Grynkewich។កាល​ពីពាក់កណ្តាលខែមិថុនា អគ្គលេខាធិការអង្គការណាតូ លោក Mark Rutte បាននិយាយថា សម្ព័ន្ធមិត្តផ្សេងទៀត កំពុងបង្កើនការចូលរួមចំណែករបស់ពួកគេ ហើយនឹងបំពេញចន្លោះប្រហោងជាច្រើន ប៉ុន្តែមិនបានផ្តល់ព័ត៌មានលម្អិតណាមួយឡើយ៕

ក្រុម​ស្តាំនិយមជ្រុលបារាំង គិត​ក្រោយគ្មាន​លោកស្រី Le Pen ខណៈសេចក្ដី​សម្រេចតុលាការឧទ្ធរណ៍ជិត​មាន​

2026/07/02 11:32:25 pm        59
Facebook Telegram Linkin
មេដឹកនាំក្រុម​ស្តាំនិយមជ្រុលរបស់បារាំង លោកស្រី Marine Le Pen ប្រឈមនឹងសេចក្ដី​សម្រេចរបស់តុលាការនៅថ្ងៃទី៧ ខែកក្កដា ឆ្នាំ២០២៦ ជុំវិញការតវ៉ា​របស់លោកស្រី ដើម្បីឲ្យ​លុបចោលបម្រាម​ឈរ​ឈ្មោះ​បោះឆ្នោត ជាសាលក្រមដែលអាចធ្វើឱ្យលោកស្រីមិន​អាច​ចូល​រួម​ការប្រណាំងប្រជែងតំណែង​ប្រធានាធិបតីឆ្នាំ២០២៧ ឬបើកឱកាស​ឱ្យលោកស្រីស្វែងរកតួនាទី​កំពូលនេះ​ជាលើកទី៤។អ្នក​នយោបាយរបស់បារាំង កំពុងរង់ចាំដឹង​ពី​សេចក្តីសម្រេចរបស់តុលាការឧទ្ធរណ៍យ៉ាង​អន្ទះសារ ដែលនឹងកំណត់ថា តើលោកស្រី Le Pen វ័យ​ ៥៧ឆ្នាំ ឬបេក្ខជន​ដែល​លោកស្រីគាំទ្រ គឺលោក Jordan Bardella វ័យ ៣០​ឆ្នាំ ជាអ្នក​កាន់បដាក្រុម​ស្តាំនិយមជ្រុលធ្វើ​យុទ្ធនា​ការបោះឆ្នោត ដែល​មាន​រយៈពេលមិន​ដល់​ ១ឆ្នាំទៀតទេ ខណៈដែលគណបក្សប្រឆាំងអន្តោប្រវេសន៍ National Rally (RN) របស់ពួកគេ នៅតែទទួលបានការគាំទ្រខ្ពស់ នៅក្នុងការស្ទង់មតិ។តុលាការបារាំង កាលពីខែមីនា ឆ្នាំ២០២៥ បានសម្រេចហាមឃាត់លោកស្រី Le Pen មិនឱ្យចូលកាន់តំណែងសាធារណៈរយៈពេល ៥ឆ្នាំ និងឲ្យ​ជាប់ពន្ធនាគារ ៤ឆ្នាំ ពីបទប្រើប្រាស់​ប្រាក់ពីសភាអឺរ៉ុបមិនត្រឹម​ត្រូវ​ ដោយរង់ចាំការប្តឹងឧទ្ធរណ៍ នៅក្នុងសាលក្រមដ៏រំជើប​រំជួល​ល​មួយ ដែលបានលាន់​ឮហួស​ពី​ប្រទេសបារាំង និងបានទាក់ទាញឲ្យ​មាន​ការ​រិះគន់​ធ្ងន់ៗ​ពីប្រធានាធិបតីអាមេរិក លោក Donald Trump និងមេដឹកនាំស្តាំនិយមផ្សេងទៀត​។ដោយសារគណបក្ស RN កាន់តែកៀក​នឹង​ការឈ្នះអំណាច នៅបារាំង ដែលជាប្រទេសមានសេដ្ឋកិច្ចធំទី២ របស់សហភាពអឺរ៉ុប មេដឹកនាំគណបក្សនេះ​ត្រូវបានបង្ខំឱ្យគិតគូរ​ពី​ផែនការស្នងតំណែងយ៉ាង​លឿន​ដោយ​​មិននឹកស្មានដល់ និងផលប៉ះពាល់របស់វាទៅលើគោលនយោបាយរបស់គណបក្ស​៕

សមាជិកព្រឹទ្ធសភា៖ អឺរ៉ុបកំពុងជួបការលំបាកក្នុងការស្វែងរកអ្នកចរចាដែលសមរម្យសម្រាប់ការចរចាជាមួយរុស្ស៊ី

2026/07/02 11:28:25 pm        77
Facebook Telegram Linkin
អនុប្រធានក្រុមប្រឹក្សាសហព័ន្ធរុស្ស៊ី លោក Konstantin Kosachev បានប្រាប់សារព័ត៌មាន TASSថា សហភាពអឺរ៉ុបមានការលំបាកក្នុងការស្វែងរកបេក្ខជនដែលសមរម្យសម្រាប់ការចរចាជាមួយរុស្ស៊ី ដោយសារមនុស្សបែបនេះ មិនគួរត្រូវបានភ្ជាប់ទៅនឹងគោលនយោបាយប្រឆាំងប្រទេសរុស្ស៊ីទេ។ លោក Kosachev បាននិយាយថា៖«ការចរចាដែលអាចធ្វើទៅបាននេះ ពិតជាគួរតែបញ្ជាក់ថា មានមនុស្សម្នាក់នៅម្ខាង ដែលបំពេញតាមតម្រូវការពីរ៖ ម៉្យាងវិញទៀត មនុស្សម្នាក់នេះ ត្រូវតែមានអំណាចគ្រប់គ្រាន់នៅអឺរ៉ុប ហើយម៉្យាងវិញទៀត លោក ឬលោកស្រី ត្រូវតែមានភាពជឿជាក់គ្រប់គ្រាន់ នៅទីនេះក្នុងប្រទេសរុស្ស៊ី ដែលមានន័យថា លោក ឬលោកស្រី មិនគួរមានទំនាក់ទំនងជាមួយនឹងអតីតកាលនោះ ទេ ហើយនៅកម្រិតអតិបរមា វាគឺជាគោលនយោបាយព្រហ្មទណ្ឌ ដែលសហភាពអឺរ៉ុបបានអនុវត្តក្នុងប៉ុន្មានឆ្នាំថ្មីៗនេះទាក់ទងនឹងប្រទេសរបស់យើង រួមទាំងនៅក្នុងបរិបទនៃវិបត្តិអ៊ុយក្រែនផងដែរ»។ សមាជិកព្រឹទ្ធសភារុស្ស៊ីរូបនេះ បាននិយាយថា៖«វាគឺជាកិច្ចការដ៏លំបាកមួយក្នុងការស្វែងរកមនុស្ស បែបនេះ»។ លោក Kosachev បានរំលឹកថា នាពេលថ្មីៗនេះ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានបង្ហើបថា អតីតអធិការបតីអាល្លឺម៉ង់ លោក Gerhard Schroeder ជាបេក្ខជនដែលល្អបំផុតសម្រាប់លទ្ធភាពចរចា រវាងសហភាពអឺរ៉ុប និងរុស្ស៊ី ប៉ុន្តែសហភាពអឺរ៉ុបបានមិនអើពើនឹងសំណើនេះ ដោយចាត់ទុកអ្នកនយោបាយរូបនេះថា «ពុំមានអំណាចគ្រប់គ្រាន់»៕

បក្សកុម្មុយនីស្តចិន ប្រារព្ធខួបលើកទី១០៥ ដោយ​សង្កត់ធ្ងន់​ខ្លាំង លើមនោគមវិជ្ជា និងភាពស្មោះត្រង់

2026/07/02 11:24:55 pm        70
Facebook Telegram Linkin
កាល​ពី​ថ្ងៃ​ពុធ (ទី១ ខែកក្កដា ឆ្នាំ២០២៦) លោកប្រធានាធិបតី Xi Jinping បានមានប្រសាសន៍ក្នុងពិធីអបអរខួបលើកទី១០៥ នៃការបង្កើតគណបក្សថា បក្សកុម្មុយនីស្តចិន (CPC) ត្រូវតែបន្តអនុវត្ត «ស្វ័យ​អភិបាលកិច្ច​​យ៉ាងពេញលេញ និងម៉ឺងម៉ាត់» នៅដំណាក់កាល​​មួយ​ដែលកត្តា​​មិនអាចទាយទុកមុនបាន កំពុងកើនឡើង នៅក្នុងដំណើរការអភិវឌ្ឍប្រទេស។ការអត្ថាធិប្បាយរបស់មេដឹកនាំចិន បានកើតឡើងចំពេលមានការជំរុញ​ឱ្យមានភាពស្មោះត្រង់ និងវិន័យកាន់តែខ្លាំង​ ក្នុងចំណោមសមាជិបក្ស ដោយបង្ហាញថា គណបក្សនយោបាយធំជាងគេទី២ របស់ពិភពលោកមួយ​នេះ មានគោលបំណង​គ្រប់គ្រង​កាន់តែ​​តឹងរ៉ឹងជាងមុន ខណៈពេលដែលខ្លួនត្រូវ​​ប្រឈមនឹងបញ្ហា​ ទាំង​ក្នុងស្រុក និងខាងក្រៅ។ក្នុងសុន្ទរកថារយៈពេល ៤០​នាទីរបស់លោក នៅឯ​ពិធី ក្នុង​ទីក្រុងប៉េកាំង លោក Xi បានលើកឡើង​ថា៖ «យើងត្រូវតែត្រៀមខ្លួនគ្រប់ពេលវេលា ដើម្បីទប់ទល់នឹងការសាកល្បងសំខាន់ៗ​ ពាក់ព័ន្ធនឹង​ការ​លំបាកធំៗ ឬសូម្បីតែការ​លំបាកធំ​ដូច​ព្យុះ​ពី​សមុទ្រ​។ ការអភិវឌ្ឍរបស់ប្រទេសចិន បច្ចុប្បន្នកំពុងស្ថិតក្នុងដំណាក់កាល ដែលឱកាសជាយុទ្ធសាស្ត្រ កើតមក​ជាមួយ​ហានិភ័យ និងបញ្ហាប្រឈមនានា»។មន្ត្រីជាន់ខ្ពស់ និងសមាជិកបក្សរាប់ពាន់នាក់ បានជួប​ជុំ​គ្នានៅមហា​សាលប្រជាជន សម្រាប់ពិធីនេះ ដោយបាន​មើលលោក Xi ប្រគល់មេដាយដល់សមាជិកគណបក្សចំនួន ៨រូប សម្រាប់ «ការចូលរួមចំណែកដ៏ធំ​» របស់ពួកគេ។ ក្នុងចំណោមពួកគេមានអតីតយុទ្ធជនយោធាវ័យ​ ៩០​ឆ្នាំម្នាក់ និងលេខាធិការបក្សភូមិ Henan ដែលបានដឹកនាំកិច្ចប្រឹងប្រែងស្តារឡើងវិញ នៅតំបន់ជនបទ។គួរបញ្ជាក់ថា គណបក្សកុម្មុយនី​ស្តចិន (CPC) ដែល​ត្រូវបានបង្កើតឡើងក្នុងឆ្នាំ១៩២១ បច្ចុប្បន្នមានសមាជិកជាង ១០១លាននាក់ ឬប្រហែលម្នាក់ ក្នុងចំណោមពលរដ្ឋចិន ១៤នាក់។ មានតែគណបក្ស Bharatiya Janata របស់ឥណ្ឌាប៉ុណ្ណោះ ដែលមានសមាជិកច្រើនជាងនេះ ដោយមានចំនួន​ ១៤០​លាននាក់៕

ក្តីសង្ឃឹមស្ទើរ​លែងមាន​​ ហើយ​ភាពអត់ឃ្លានកើតឡើង​​ ១សប្តាហ៍ក្រោយ​រញ្ជួយដីនៅវ៉េណេស៊ុយអេឡា

2026/07/02 11:14:30 pm        40
Facebook Telegram Linkin
ក្តីសង្ឃឹមក្នុងការរកឃើញ​អ្នករស់រានមានជីវិតបន្ថែមទៀត បានរសាត់ឆ្ងាយ​ទៅៗហើយ​ នៅ​ថ្ងៃពុធ (ទី១ ខែកក្កដា ឆ្នាំ២០២៦) ខណៈដែលប្រទេសវ៉េណេស៊ុយអេឡា បានប្រារព្ធរយៈ​ពេល​ ១សប្តាហ៍ គិត​ចាប់តាំងពីរញ្ជួយដី ២លើក បានឆក់​យក​ជីវិត​មនុស្សជិត ២.៣០០នាក់ ហើយ​មនុស្សជាច្រើនដែលបានឆ្លងផុត​ពី​គ្រោះមហន្តរាយ កំពុងខ្វះខាតស្បៀងអាហារយ៉ាងខ្លាំង។ខណៈពេលដែលចំនួនអ្នកស្លាប់បាន​កើនឡើង ប្រធានាធិបតីស្ដី​តី​របស់វ៉េណេស៊ុយអេឡា លោកស្រី​ Delcy Rodriguez បានប្រកាសកាន់ទុក្ខរយៈពេល ៧ថ្ងៃ ដោយនិយាយថា «ប្រទេសជាតិ​កំពុង​ជួប​ប្រទះ​នឹង​ការឈឺចាប់​ ដោយសារការបាត់​បង់អាយុជីវិត​របស់ប្រជាជន​»។មក​ទល់ពេល​នេះ មនុស្សរាប់ម៉ឺននាក់ នៅតែបាត់ខ្លួន។ ​មាន​អ្នកនៅ​រស់រានមានជីវិតមិន​គួរ​ឲ្យ​ជឿ​ជាច្រើននាក់​ ដូចជាក្មេងប្រុសអាយុ ៣ឆ្នាំម្នាក់ត្រូវបានគេរកឃើញនៅមានជីវិតកាល​ពី​ថ្ងៃទី៣០​ ខែមិថុនា ពោល​គឺ ៦ថ្ងៃក្រោយ​រញ្ជួយដីដ៏ខ្លាំងក្លាបំផុតជាលើក​ដំបូង​របស់​វ៉េណេស៊ុយអេឡា ក្នុងរយៈពេលជាង ១សតវត្សរ៍។ ប៉ុន្តែយ៉ាង​ណាក្ដី អ្នកជំនាញ បញ្ជាក់​ថា ជនរងគ្រោះដែលជាប់នៅ​ក្នុង​គំនរបាក់​បែក​របស់​អគារនានា ទំនងជាមិនអាចរស់លើសពី ៧២ម៉ោងឡើយ​។ប្រធានរដ្ឋសភាវ៉េណេស៊ុយអេឡា លោក Jorge Rodriguez បាននិយាយនៅថ្ងៃទី១ ខែកក្កដាថា អ្នក​ស្លាប់បានកើនឡើងដល់ ២.២៩៥នាក់ ហើយមនុស្សជាង ១១.០០នាក់បានរងរបួស។ លោកបានបន្ថែម​ថា ប្រជាជន​ជិត ១៣.០០០នាក់គ្មានផ្ទះសម្បែងជ្រក​កោន​ឡើយ​។គ្រោះ​រញ្ជួយដីដ៏ខ្លាំងក្លា ២លើក ដែលមានកម្រិត ៧,២ និង ៧,៥ រ៉ិចទ័រ បានបំផ្លាញតំបន់​ជាច្រើន​ទាំងមូលនៅក្នុងប្រទេស​សម្បូរប្រេងវ៉េណេស៊ុយអេឡា ដែលបានរងវិបត្តិសេដ្ឋកិច្ចរាប់ទសវត្សរ៍ ដោយ​បាន​ធ្វើ​ឲ្យ​ហេដ្ឋារចនាសម្ព័ន្ធ និងសេវាសុខភាពចុះ​ខ្សោយ​។ ក្រុមជួយសង្គ្រោះអន្តរជាតិ បានទៅដល់​ប្រទេសនេះពីជុំវិញពិភពលោក ដើម្បីជួយ​ស្វែក​រក​អ្នកនៅ​មានជីវិត ខណៈពេលដែលអ្នកស្រុកមានការខឹងសម្បាយ៉ាងខ្លាំង ចំពោះការអវត្តមានរបស់មន្ត្រី​ បន្ទាប់ពី​មាន​គ្រោះមហន្តរាយនេះ​។ ដោយ​ជីវិតប្រចាំថ្ងៃត្រូវបានប៉ះពាល់​យ៉ាង​ធ្ងន់ធ្ងរ ការយក​ចិត្ត​ទុកដាក់ ឥឡូវនេះកំពុងងាក​ទៅរកការមាន​ជីវិតត្រឹមតែមួយ​ថ្ងៃ​ៗ។ មនុស្សជាច្រើនគ្មានផ្ទះសម្បែង ហើយអាហារ និងទឹកកំពុងខ្វះខាត៕

តម្លៃប្រេងធ្លាក់ចុះដល់កម្រិតមិនធ្លាប់ឃើញ ចាប់តាំងពីការចាប់ផ្តើមសង្គ្រាមរបស់អាមេរិកនិងអ៊ីស្រាអែលលើអ៊ីរ៉ង់

2026/07/02 11:10:47 pm        67
Facebook Telegram Linkin
តម្លៃប្រេងបានធ្លាក់ចុះដល់កម្រិតមិនធ្លាប់ឃើញចាប់តាំងពីការចាប់ផ្តើមសង្គ្រាមរបស់សហរដ្ឋអាមេរិក និងអ៊ីស្រាអែលលើអ៊ីរ៉ង់ ក្នុងពេលមានក្តីសង្ឃឹមកើនឡើងសម្រាប់ការទម្លាយភាពទាល់ច្រកក្នុងការចរចាក្នុងគោលបំណងចុះហត្ថលេខាលើកិច្ចព្រមព្រៀងសន្តិភាពជាអចិន្ត្រៃយ៍។ប្រេងឆៅ Brent បានធ្លាក់ចុះជាង១ភាគរយនៅថ្ងៃព្រហស្បតិ៍នេះមកនៅត្រឹមក្រោម៧១ដុល្លារក្នុងមួយបារ៉ែល ដែលធ្វើឲ្យតម្លៃស្តង់ដារអន្តរជាតិត្រឡប់ទៅរកតម្លៃនៅមុនសង្គ្រាមវិញ។ ការធ្លាក់ចុះនេះ បានកើតឡើងបន្ទាប់ពីប្រទេសកាតា ដែលជាអ្នកសម្របសម្រួលដ៏សំខាន់រវាងទីក្រុងវ៉ាស៊ីនតោន និងទីក្រុងតេអេរ៉ង់ បាននិយាយថា មន្ត្រីសហរដ្ឋអាមេរិក និងអ៊ីរ៉ង់ បានធ្វើឱ្យមាន «វឌ្ឍនភាពវិជ្ជមាន» ក្នុងការចរចាដោយប្រយោលក្នុងបំណងដោះស្រាយបញ្ហានានាទាក់ទងនឹងអនុស្សរណៈនៃការយោគយល់(MoU) លើការបញ្ចប់សង្គ្រាម។ប្រធានាធិបតីសហរដ្ឋអាមេរិក លោក Donald Trump បានបង្ហាញពន្លឺវិជ្ជមានលើកិច្ចចរចាកាលពីថ្ងៃពុធ ដោយនិយាយថា «ការរំសាយអាវុធនុយក្លេអ៊ែររបស់អ៊ីរ៉ង់ កំពុងដំណើរការទៅដោយរលូន»។

ក្រុមហ៊ុនអាកាសចរណ៍ Lufthansa ក្រុមហ៊ុនITA និងAirBaltic បន្តជើងហោះហើរទៅអ៊ីស្រាអែល

2026/07/02 11:06:55 pm        67
Facebook Telegram Linkin
ក្រុមហ៊ុនអាកាសចរណ៍អន្តរជាតិចំនួនបី បានបន្តជើងហោះហើរទៅកាន់ប្រទេសអ៊ីស្រាអែលកាលពីថ្ងៃពុធ រយៈពេលបួនខែបន្ទាប់ពីការផ្ទុះឡើងសង្គ្រាមរបស់អ៊ីស្រាអែល-សហរដ្ឋអាមេរិកជាមួយប្រទេសអ៊ីរ៉ង់ នេះបើយោងតាមអាជ្ញាធរអាកាសយានដ្ឋានអ៊ីស្រាអែល (IAA) និងក្រុមហ៊ុនអាកាសចរណ៍។ក្រុមហ៊ុនអាកាសចរណ៍ Lufthansa របស់អាល្លឺម៉ង់ បានបន្តប្រតិបត្តិការរវាងអាកាសយានដ្ឋាន Frankfurt និងអាកាសយានដ្ឋានអន្តរជាតិ Ben Gurion នៅខាងក្រៅទីក្រុង Tel Aviv ដោយមានជើងហោះហើរពីរវ៉ុលជារៀងរាល់ថ្ងៃ។ក្រុមហ៊ុនអាកាសចរណ៍បាននិយាយថា ក្រុមហ៊ុនក៏នឹងបន្តជើងហោះហើរទីក្រុង Munich-Tel Aviv នៅថ្ងៃទី១ ខែសីហា ដោយមានជើងហោះហើរពីរវ៉ុលជារៀងរាល់ថ្ងៃ។ ក្រុមហ៊ុនអាកាសចរណ៍ជាតិអ៊ីតាលី ITA Airways ជាផ្នែកមួយនៃក្រុមហ៊ុន Lufthansa Group បានបន្តជើងហោះហើរពីរវ៉ុលជារៀងរាល់ថ្ងៃពីទីក្រុងរ៉ូម ទៅកាន់ទីក្រុង Tel Aviv។ក្រុមហ៊ុន Lufthansa Group បាននិយាយថា ក្រុមហ៊ុនបុត្រសម្ព័ន្ធចំនួនពីររបស់ខ្លួនគឺក្រុមហ៊ុនអាកាសចរណ៍ Swiss និង Brussels Airlines នឹងដំណើរការតាមនៅក្នុងខែសីហា ខណៈក្រុមហ៊ុនអាកាសចរណ៍ Austrian Airlines របស់ក្រុមហ៊ុននេះបានចាប់ផ្តើមសេវាឡើងវិញទៅកាន់ទីក្រុង Tel Aviv កាលពីដើមខែមិថុនា។ក្រុមហ៊ុនអាកាសចរណ៍ជាតិរបស់ប្រទេសឡាតវី AirBaltic បានចាប់ផ្តើមជើងហោះហើរទីក្រុង Riga-Tel Aviv របស់ខ្លួនឡើងវិញដោយមានជើងហោះហើរបីវ៉ុលក្នុងមួយសប្តាហ៍។

ទួរគី នឹងបញ្ជាក់ពីឧស្សាហកម្មការពារជាតិនៅក្នុងកិច្ចប្រជុំកំពូលNATO នៅទីក្រុងអង់ការ៉ា

2026/07/02 11:04:04 pm        65
Facebook Telegram Linkin
រដ្ឋមន្ត្រីការបរទេសទួរគី លោក Hakan Fidan បានប្រកាសកាលពីថ្ងៃពុធថា ឧស្សាហកម្មការពារជាតិ នឹងដើរតួជាចំណុចកណ្តាលក្នុងកិច្ចប្រជុំកំពូលរបស់អង្គការសន្ធិសញ្ញាអាត្លង់ទិកខាងជើង (NATO) ដែលនឹងធ្វើឡើងនៅទីក្រុងអង់ការ៉ា ប្រទេសទួរគី។ថ្លែងនៅក្នុងសន្និសីទសារព័ត៌មានរួមគ្នាជាមួយរដ្ឋមន្ត្រីការបរទេសកៀហ្ស៊ីស៊ីស្ថាន លោក Zheenbek Kulubaev ដែលកំពុងធ្វើទស្សនកិច្ច នៅរដ្ឋធានីប្រទេសទួរគី លោក Fidan បានបញ្ជាក់ពីរបៀបវារៈសំខាន់ៗសម្រាប់កិច្ចប្រជុំកំពូលនៅថ្ងៃទី ៧-៨ ខែកក្កដា។ លោក Fidan បាននិយាយថា «ការវិវឌ្ឍថ្មីៗនេះ បានបង្ហាញថា សមត្ថភាពផលិតកម្ម ប្រសិទ្ធភាព ភាពចម្រុះ និងកម្រិតនៃការពឹងផ្អែកលើឧស្សាហកម្មការពារជាតិ បានក្លាយជារឿងសំខាន់សម្រាប់សម្ព័ន្ធមិត្ត»។លោកបាននិយាយបន្ថែមថា បញ្ហានានាទាក់ទងនឹងការផលិត និងការត្រៀមខ្លួនក្នុងវិស័យការពារជាតិបច្ចុប្បន្នគឺជាអាទិភាពកំពូលរបស់NATO។ ប្រទេសសម្ព័ន្ធមិត្តត្រូវបានគេរំពឹងថានឹងពិនិត្យឡើងវិញសេចក្តីសម្រេចពីកិច្ចប្រជុំកំពូលចំនួនពីរកាលពីពេលមុនៗ ដោយផ្តោតលើការចែករំលែកបន្ទុក ទស្សនវិស័យយុទ្ធសាស្ត្រវិវត្តរបស់NATO និងការទប់ស្កាត់របស់អឺរ៉ុបក្នុងពេលជម្លោះដែលនៅតែបន្ត និងអស្ថិរភាពសកលដែលកំពុងកើនឡើង។

អ៊ីរ៉ង់ ប្រាប់UNថា ការគំរាមរបស់អ៊ីស្រាអែលក្នុងការសម្លាប់មេដឹកនាំកំពូលរបស់ខ្លួន គឺជា «ភេរវកម្មរដ្ឋ»

2026/07/02 10:54:30 pm        76
Facebook Telegram Linkin
លោក Amir-Saeid Iravani ឯកអគ្គរដ្ឋទូតអ៊ីរ៉ង់ប្រចាំអង្គការសហប្រជាជាតិ បានប្តឹងតវ៉ាជាមួយស្ថាប័នពិភពលោក ជុំវិញការគំរាមកំហែងចុងក្រោយរបស់អ៊ីស្រាអែលក្នុងការគំរាមធ្វើឃាតមេដឹកនាំកំពូលរបស់ប្រទេស លោក Mojtaba Khamenei។នៅក្នុងលិខិតមួយច្បាប់ទៅកាន់អគ្គលេខាធិការ លោក Antonio Guterres ទៅកាន់ក្រុមប្រឹក្សាសន្តិសុខ និងមហាសន្និបាត លោកIravani បានពិពណ៌នាអំពីការគំរាមកំហែងរបស់រដ្ឋមន្ត្រីការពារជាតិអ៊ីស្រាអែល លោក Israel Katz ថាជា «ផ្នែកមួយនៃគោលនយោបាយភេរវកម្មរដ្ឋដោយចេតនា និងជាប្រព័ន្ធ» ដែលផ្តោតគោលដៅលើមន្ត្រីរដ្ឋាភិបាលអ៊ីរ៉ង់។លោកបានភ្ជាប់រឿងនេះទៅនឹង «សកម្មភាពឈ្លានពានខុសច្បាប់របស់របបអ៊ីស្រាអែលប្រឆាំងនឹងអ៊ីរ៉ង់ រួមទាំងការធ្វើឃាតអតីតមេដឹកនាំអ៊ីរ៉ង់ លោក Ayatollah Seyyed Ali Khamenei និងមន្ត្រីនយោបាយ និងយោធាជាន់ខ្ពស់ផ្សេងទៀត ដែលត្រូវបានអនុវត្តដោយមានការចូលរួម ការសម្របសម្រួល និងគាំទ្រពីសហរដ្ឋអាមេរិក»។លោក Iravani បាននិយាយបន្ថែមថា ក្រុមប្រឹក្សាសន្តិសុខអង្គការសហប្រជាជាតិ បានអនុញ្ញាតឱ្យអ៊ីស្រាអែលធ្វើសកម្មភាពដោយគ្មានទោស និងបានព្រមានថា ទីក្រុងតេអេរ៉ង់នឹងឆ្លើយតបទៅនឹងសកម្មភាពអរិភាពណាមួយ។គួរឲ្យសោកស្តាយ ការបរាជ័យរបស់ក្រុមប្រឹក្សាសន្តិសុខក្នុងការបំពេញការទទួលខុសត្រូវរបស់ខ្លួនក្រោមធម្មនុញ្ញអង្គការសហប្រជាជាតិ បានពង្រឹងទិដ្ឋភាពនៃភាពគ្មានទោស និងបានធ្វើឱ្យរបបអ៊ីស្រាអែល កាន់តែគឃ្លើនក្នុងការធ្វើឱ្យអំពើភេរវកម្មរដ្ឋក្លាយជាធម្មតាដែលបានបង្កើតគំរូដ៏គ្រោះថ្នាក់ និងបង្កការគំរាមកំហែងធ្ងន់ធ្ងរដល់សន្តិភាព និងសន្តិសុខអន្តរជាតិ។

អ៊ីរ៉ង់ បង្កើនសន្តិសុខនៅមុនពេលពិធីបុណ្យសពរបស់អតីតមេដឹកនាំ លោក Khamenei

2026/07/02 10:51:12 pm        60
Facebook Telegram Linkin
ឧត្តមសេនីយ៍ Mohammad Akraminia និយាយថា យោធាប្រទេសអ៊ីរ៉ង់កំពុងស្ថិតក្នុងការប្រុងប្រយ័ត្នខ្ពស់នៅមុនពិធីបុណ្យសពរបស់អតីតមេដឹកនាំ លោក Khamenei។លោកបាននិយាយថា កងកម្លាំងអ៊ីរ៉ង់ បានបង្កើនការដាក់ពង្រាយរបស់ពួកគេសម្រាប់ការទៅដល់របស់មន្ត្រីជាន់ខ្ពស់ និងឥស្សរជនសាសនានិងនយោបាយមកពីប្រទេសផ្សេងៗ។លោកបាននិយាយទៅកាន់ទីភ្នាក់ងារសារព័ត៌មាន IRNA ថា «កងកម្លាំងជើងគោក ជើងទឹក និងជើងអាកាសរបស់កងទ័ព បានពង្រីកវត្តមានដ៏សកម្មរបស់ពួកគេនៅទូទាំងព្រំដែនរបស់ប្រទេស ដើម្បីជួយធានាដល់សន្តិសុខ»។ លោកបាននិយាយបន្ថែមថា កងកម្លាំងការពារដែនអាកាសរបស់អ៊ីរ៉ង់ កំពុងរក្សាការឃ្លាំមើលជាបន្តនៅដែនអាកាសរបស់ប្រទេស។ប្រព័ន្ធផ្សព្វផ្សាយរដ្ឋបានរាយការណ៍ថា ពិធីបុណ្យសពរបស់អតីតមេដឹកនាំកំពូលអ៊ីរ៉ង់ លោក Ali Khamenei នឹងចាប់ផ្តើមនៅទីក្រុងតេអេរ៉ង់នៅថ្ងៃទី៤ ខែកក្កដា ហើយបញ្ចប់ដោយការបញ្ចុះសពរបស់លោកនៅទីក្រុង Mashhad ភាគឦសាន នៅថ្ងៃទី៩ ខែកក្កដា។ លោក Khamenei ត្រូវបានសម្លាប់នៅក្នុងការវាយប្រហាររបស់អ៊ីស្រាអែល និងសហរដ្ឋអាមេរិកលើប្រទេសអ៊ីរ៉ង់ កាលពីខែកុម្ភៈ។ លោក Khamenei ត្រូវបានសម្លាប់ក្នុងអាយុ ៨៦ ឆ្នាំ នៅរដ្ឋធានី ប្រទេសអ៊ីរ៉ង់ នៅថ្ងៃទី២៨ ខែកុម្ភៈ ជាថ្ងៃដំបូងនៃសង្គ្រាម។ ពិធីបុណ្យសពជាសាធារណៈរបស់លោកនឹងចាប់ផ្តើមនៅថ្ងៃសៅរ៍ ដោយសពរបស់លោកត្រូវបានដាក់តម្កល់ឲ្យចូលគោរពនៅក្នុងអគារដ៏ធំមួយនៅទីក្រុងតេអេរ៉ង់ភាគកណ្តាល។ យោងតាមមន្ត្រីបានឲ្យដឹងថា ពិធីនេះត្រូវបានគេរំពឹងថានឹងមានអ្នកចូលរួមកាន់ទុក្ខចន្លោះពី ១៥ ទៅ២០ លាននាក់ ដែលនឹងក្លាយជាពិធីបុណ្យសពរដ្ឋធំបំផុតនៅក្នុងប្រវត្តិសាស្ត្ររបស់ប្រទេស។

បណ្ដាញសង្គម

ព័ត៌មានថ្មីៗ

សមត្ថកិច្ចបង្ក្រាប​ទីតាំង​សង្ស័យលួចលាក់ប្រព្រឹត្តបទល្មើស Online Scams នៅនៅក្នុងក្រុងបាវិតឃាត់ខ្លួនមនុដ្ស៣៨នាក់
08/01/2026 08:08 PM
Facebook Telegram Linkin
ប្រធានក្រុមការងាររាជរដ្ឋាភិបាលចុះមូលដ្ឋានស្រុករមាសហែក នាំយកទៀនចំណាំព្រះវស្សា ទេយ្យទាន និងបច្ច័យប្រគេនព្រះសង្ឃគង់ចាំព្រះវស្សានៅវត្តទាំង៥៣ ក្នុងស្រុករមាសហែក ខេត្តស្វាយរៀង
08/01/2026 06:08 PM
Facebook Telegram Linkin
ក្រសួងកសិកម្ម និងក្រសួងទេសចរណ៍សហការគ្នាជំរុញខ្សែក្រវាត់បៃតងនៅតាមតំបន់ទេសចរណ៍កាន់តែប្រសើរ
08/01/2026 06:08 PM
Facebook Telegram Linkin
ក្រុមហ៊ូទីអះអាងថា ខ្លួនបានបង្ខំឲ្យនាវាដឹកប្រេងអារ៉ាប៊ីសាអ៊ូឌីត ៨គ្រឿង បង្វែរទិសដៅ ដោយសារការបិទខ្ទប់ផ្លូវសមុទ្រ
08/01/2026 05:08 PM
Facebook Telegram Linkin
ការចំណាយសរុបរបស់អ៊ុយក្រែនក្នុងឆ្នាំ ២០២៦ នឹងមានចំនួន ១៧៦,៨ ពាន់លានដុល្លារ
08/01/2026 04:08 PM
Facebook Telegram Linkin
សហភាពអឺរ៉ុប នឹងពង្រីកការអនុវត្តច្បាប់ស្តីពីបញ្ញាសិប្បនិម្មិត (AI) ចាប់ពីថ្ងៃទី២ ខែសីហា
08/01/2026 04:08 PM
Facebook Telegram Linkin
រដ្ឋាភិបាលឥណ្ឌា៖ ពលរដ្ឋឥណ្ឌា ១៦នាក់ ស្លាប់និង ៧៥នាក់ រងរបួស ចាប់តាំងពីជម្លោះនៅមជ្ឈិមបូព៌ាផ្ទុះឡើង ក្នុងឆ្នាំនេះ
08/01/2026 04:08 PM
Facebook Telegram Linkin
អគារស្នាក់ការគណបក្សប្រជាជនកម្ពុជាឃុំត្រប់ ស្រុកបាធាយ ត្រូវបានសម្ពោធដាក់ឲ្យប្រើប្រាស់ជាផ្លូវការ
08/01/2026 04:08 PM
Facebook Telegram Linkin
នាយករដ្ឋមន្ត្រីកាតា និងមេដឹកនាំក្រុមហាម៉ាស ពិភាក្សាតាមទូរស័ព្ទអំពីការអនុវត្តបទឈប់បាញ់នៅតំបន់ហ្កាហ្សា
08/01/2026 04:08 PM
Facebook Telegram Linkin
កូរ៉េខាងជើងថា ផែនការផ្គត់ផ្គង់ប្រេងឥន្ធនៈរបស់ NATO បង្ហាញថា សម្ព័ន្ធយោធានេះកំពុងត្រៀមរៀបចំធ្វើ​សង្គ្រាម
08/01/2026 04:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.