នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
អាជ្ញាធររាជធានីភ្នំពេញ បន្តប្រតិបត្តិការបោសសម្អាត Online Scams ត្រួតពិនិត្យ ៨០ ទីតាំងទៀត និងផាកពិន័យម្ចាស់ទីតាំងរស់នៅប្រមូលផ្ដុំចំនួន ៤ទីតាំង
រដ្ឋមន្ត្រីក្រសួងធនធានទឹក អញ្ជើញចុះពិនិត្យជាក់ស្តែងវឌ្ឍនភាពការងារសាងសង់ច្រាំងទន្លេបាសាក់ ក្នុងក្រុងសំពៅពូន ខេត្តកណ្តាល ដែលសម្រេចបានប្រមាណ ៦០%
គ្រឹះស្ថានអង្គរ រកចំណូលបានជាង ១៧លានដុល្លារពីការលក់សំបុត្រឱ្យភ្ញៀវបរទេសក្នុងរយៈពេល៥ខែឆ្នាំនេះ
អនុប្រធានសមាគមអតីតយុទ្ធជន អញ្ជើញជួបអតីតយុទ្ធជនចំនួន៣០០គ្រួសារ ដើម្បីរៀបចំផ្តល់ដីធ្វើកសិកម្ម ក្នុងខេត្តបាត់ដំបង

ព័ត៌មានជាតិ

អគ្គិភ័យឆេះរោងចក្រនៅស្រុកអង្គស្នួល បានរលត់ហើយ

2025/04/01 12:40:33 pm        597
Facebook Telegram Linkin
ករណីអគ្គិភ័យ​ឆេះរោងចក្រមួយកន្លែង នៅស្រុកអង្គស្នួល ខេត្តកណ្តាល ត្រូវ​បាន​ជំនាញ​ពន្លត់​អគ្គិភ័យ​បាញ់ទឹករលត់ទាំងស្រុងហើយ ។នគរបាលប្រាប់ឲ្យដឹងថា កម្លាំង​បង្ការ​ពន្លត់​អគ្គិភ័យ​ និង​សង្គ្រោះ​បានគ្រប់​គ្រង​ស្ថានភាព​​ទាំងស្រុង​ហើយ​ ក្នុង​ករណី​អគ្គិភ័យ​ឆេះរោងចក្រ ទល់មុខ​ស្ថានីយ​ប្រេង​ឥន្ធនៈ​ PTT អង្គស្នួល តាម​បណ្ដោយ​​ផ្លូវ​ជាតិ​លេខ​៤​ ចន្លោះ​គីឡូម៉ែត្រ​លេខ​២៧​-២៨ ស្រុក​ អង្គ​ស្នួល​ ខេត្ត​កណ្ដាល​ នាវេលា​ម៉ោង​ ១១ និង៤៣ នាទី​ ថ្ងៃ​ទី​០១​ ខែ​មេសា ឆ្នាំ​២០២៥ ។ចំពោះមូលហេតុដែលនាំឲ្យមានគ្រោះអគ្គិភ័យនេះ សមត្ថកិច្ចជំនាញបង្ការ​ពន្លត់​អគ្គិភ័យ​ និង​សង្គ្រោះកំពុងស្រាវជ្រាវ៕ តារាវុទ្ធី

កម្ពុជា ប្រកាសដាក់ឱ្យអនុវត្តគម្រោងមធ្យមសិក្សា សម្រាប់ការប្រកួតប្រជែងមូលធនមនុស្ស (SE4HC)

2025/04/01 12:30:08 pm        377
Facebook Telegram Linkin
ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្ត្រីក្រសួងអប់រំ យុវជន និងកីឡា បានអញ្ជើញជាអធិបតីប្រកាសដាក់ឱ្យអនុវត្តគម្រោងមធ្យមសិក្សា សម្រាប់ការប្រកួតប្រជែងមូលធនមនុស្ស (SE4HC)។ពិធីប្រកាសដាក់ឱ្យអនុវត្តគម្រោងមធ្យមសិក្សាសម្រាប់ការប្រកួតប្រជែងមូលធនមនុស្ស (SE4HC) ខាងលើនេះ មានការចូលរួមពីសំណាក់លោកជំទាវ Jyotsana Varma នាយកធនាគារអភិវឌ្ឍន៍អាស៊ីប្រចាំប្រទេសកម្ពុជា ឯកឧត្តម លោកជំទាវ លោក លោកស្រី និងភ្ញៀវកិត្តិយស, នាព្រឹកថ្ងៃទី១ ខែមេសា ឆ្នាំ២០២៥នេះ។ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្ត្រីក្រសួងអប់រំ យុវជន និងកីឡា បានថ្លែងអំណរគុណដល់ធនាគារអភិវឌ្ឍន៍អាស៊ី ដែលតែងតែផ្តល់ការគាំទ្រទាំងបច្ចេកទេស និងហិរញ្ញវត្ថុដល់ការអភិវឌ្ឍវិស័យអប់រំនៅកម្ពុជា តាមរយៈគម្រោង ជាច្រើនដំណាក់កាល កន្លងមកចាប់តាំង រួមមាន គម្រោង USESDP I, USESDP II, STEPUP ក្នុងក្របខ័ណ្ឌភាពជាដៃគូដ៍រឹងមាំ សុទិដ្ឋិនិយម និងស្មោះត្រង់។ ជាមួយគ្នានេះ ឯកឧត្តមបណ្ឌិតសភាចារ្យ ក៏សូមអរគុណដល់ក្រសួងសេដ្ឋកិច្ច និងហិរញ្ញវត្ថុដែលបានខិតខំកៀគរហិរញ្ញវត្ថុ និងផ្តល់ហិរញ្ញប្បទានដល់ក្រសួងអប់រំ យុវជន និងកីឡា សម្រាប់អភិវឌ្ឍមូលធនមនុស្សដើម្បីចូលរួមចំណែក      កសាងកម្ពុជាក្លាយជាប្រទេសចំណូលមធ្យមកម្រិតខ្ពស់នៅឆ្នាំ២០៣០ និងក្លាយជាប្រទេសអភិវឌ្ឍន៍ត្រឹមឆ្នាំ២០៥០។ជាមួយគ្នានោះដែរលោកជំទាវ ប៉ែន សុបភា រដ្ឋលេខាធិការ ក្រសួងសេដ្ឋកិច្ច និងហិរញ្ញវត្ថុ បានលើកឡើងថា ដើម្បីចូលរួមចំណែកធ្វើឱ្យសម្រេចបាននូវចក្ខុវិស័យកម្ពុជាឆ្នាំ២០៥០ ក្រសួងសេដ្ឋកិច្ច និងហិរញ្ញវត្ថុ នៅតែបន្តកិច្ចសហប្រតិបត្តិការជាមួយក្រសួងអប់រំ យុវជន និងកីឡា ធនាគារអភិវឌ្ឍន៍អាស៊ី និងដៃគូអភិវឌ្ឍន៍ផ្សេងទៀត ផ្តោតលើការកែទម្រង់វិស័យអប់រំនៅគ្រប់កម្រិត និងគ្រប់ផ្នែក ដើម្បីធានាបានប្រសិទ្ធភាពខ្ពស់ ក្នុងការផលិតមូលធនមនុស្ស ឈានទៅសម្រេចគោលដៅជាតិឆ្នាំ២០៥០។ ក្រសួងសេដ្ឋកិច្ច និងហិរញ្ញវត្ថុ មានសេចក្តីសោមនស្សរីករាយដែលគម្រោង SE4HC នេះត្រូវបានរៀបចំយ៉ាងម៉ត់ចត់តាំងពីដំបូង ហើយនឹងមានផលជះជាវិជ្ជមានសម្រាប់ការអភិវឌ្ឍវិស័យអប់រំ តាមរយៈការផ្តល់សិទ្ធិអំណាចដល់ស្ថាប័នសាធារណៈពីសាលារៀនរហូតដល់ឧត្តមសិក្សា និងគ្រឹះស្ថានបណ្តុះបណ្តាលគ្រូបង្រៀន។ឯកឧត្តមបណ្ឌិត អ៊ុម រម្យណី រដ្ឋលេខាធិការ ក្រសួងអប់រំ យុវជន និងកីឡា និងជានាយកគម្រោង SE4HC បានឲ្យដឹងថា គម្រោងមធ្យមសិក្សាសម្រាប់ការប្រកួតប្រជែងមូលធនមនុស្ស (SE4HC) បានទទួលឥណទានកំចីពីធនាគារអភិវឌ្ឍន៍អាស៊ីក្នុងទឹកប្រាក់ ៨០ លានដុល្លារអាមេរិក និងថវិកាបដិភាគរបស់រាជរដ្ឋាភិបាលកម្ពុជា ៣,៩២ លានដុល្លារអាមេរិក ត្រូវបានចុះហត្ថលេខាលើកិច្ចព្រមព្រៀង ហិរញ្ញប្បទានដោយក្រសួងសេដ្ឋកិច្ច និងហិរញ្ញវត្ថុ តំណាងរាជរដ្ឋាភិបាលកម្ពុជា ជាមួយនឹងធនាគារអភិវឌ្ឍន៍អាស៊ី កាលពីថ្ងៃទី១៧ ខែធ្នូ ឆ្នាំ២០២៤ ។ គម្រោង ត្រូវបានចូលជាធរមាននៅថ្ងៃទី០៦ ខែមីនា ឆ្នាំ២០២៥ ដែលមានរយៈពេល អនុវត្ត ៥ ឆ្នាំ គឺចាប់ពីខែមីនា ឆ្នាំ២០២៥ រហូតដល់ខែមិថុនា ឆ្នាំ២០៣១។ គម្រោងមានគោលដៅ អភិវឌ្ឍមូលធនមនុស្សដែលមានជំនាញវិទ្យាសាស្ត្រ និងបច្ចេកវិទ្យាឌីជីថល ដើម្បីឆ្លើយតបនៅនឹងការក សាងសេដ្ឋកិច្ច និងសង្គមឌីជីថល តាមរយៈការពង្រឹងប្រសិទ្ធភាពមធ្យមសិក្សាឱ្យមានគុណភាព មានភាពធន់ទៅនឹងបម្រែបម្រួលអាកាសធាតុ សមធម៌ និងសមភាពយេនឌ័រ។គម្រោងផ្តោតលើលទ្ធផល (Output) ចំនួន ៤ គឺ៖១. លទ្ធភាពទទួលបានការអប់រំមធ្យមសិក្សាទុតិយភូមិ ប្រកបដោយគុណភាព។២.គុណភាពនៃការអប់រំមធ្យមសិក្សាទុតិយភូមិស្របតាមជំនាញសតវត្សរ៍ទី២១។៣. គុណភាពនៃរង្វាយតម្លៃការអប់រំមធ្យមសិក្សាទុតិយភូមិបានប្រសើរឡើង។៤. គន្លងអប់រំក្រោយមធ្យមសិក្សាបានពង្រឹង៕ អត្ថបទ រដ្ឋា

តំណាងអង្គទូត និងក្រសួងស្ថាប័ន បន្តចូលរួមគោរពគោរពវិញ្ញាណក្ខន្ធសព អ្នកឧកញ៉ាឧត្តម​មេត្រី​វិសិដ្ឋ ហ៊ុន សាន

2025/04/01 12:09:50 pm        243
Facebook Telegram Linkin
ក្នុងវេលាតម្កល់ធ្វើបុណ្យតាមប្រពៃណីសាសនានៅគេហដ្ឋានសព ឯកឧត្តមអ្នកឧកញ៉ាឧត្តមមេត្រី វិសិដ្ឋ ហ៊ុន សាន រដ្ឋលេខាធិការ ក្រសួងសាធារណការនិងដឹកជញ្ជូន ត្រូវបានអនុញ្ញតជូនគណៈប្រតិភូជាតិនិងអន្តរជាតិគោរពវិញ្ញាណក្ខន្ធជាបន្តបន្ទាប់ ខណៈនៅថ្ងៃទី១ ខែមេសា ឆ្នាំ២០២៥នេះ ត្រូវនឹងថ្ងៃទី៥នៃពិធីបុណ្យ តំណាងអង្គទូត និងតំណាងក្រសួង ស្ថាប័ននានា បន្តអញ្ជើញដាក់កម្រងផ្កាគោរពវិញ្ញាណក្ខន្ធសព ឯកឧត្តមអ្នកឧកញ៉ា ឧត្តមមេត្រីវិសិដ្ឋ ហ៊ុន សាន នៅគេហដ្ឋាននៃសព ក្នុងសង្កាត់បឹងកក់២ ខណ្ឌទួលគោក រាជធានីភ្នំពេញ។ ក្នុងសមានទុក្ខដ៏ក្រៀមក្រំចំពោះការបាត់បង់ ឯកឧត្តមអ្នកឧកញ៉ា ឧត្តមមេត្រីវិសិដ្ឋ ហ៊ុន សាន ត្រូវជាបងប្រុសច្បងរបស់ សម្តេចតេជោ ហ៊ុន សែន ប្រមុខរដ្ឋស្ដីទី, ឈានចូលដល់ថ្ងៃទី៥ នៃពិធីបុណ្យទក្ខិណានុប្បទាន នៅព្រឹកថ្ងៃអង្គារ ទី១ ខែមេសា ឆ្នាំ២០២៥នេះ, ឯកឧត្តម Wang Wenbin ឯកអគ្គរដ្ឋទូត នៃសាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា និងតំណាងក្រសួង ស្ថាប័ននានា បានចូលរួមគោរពវិញាណក្ខន្ធសព ឯកឧត្តម អ្នកឧកញ៉ា ឧត្តមមេត្រីវិសិដ្ឋ ហ៊ុន សាន ដែលបានទទួលមរណភាពក្នុងជន្មាយុ ៧៨ឆ្នាំដោយរោគាពាធ។ក្នុងក្តីសោកសង្រេងរកទីបំផុតគ្មាននេះ ឯកឧត្តម ឯកអគ្គរដ្ឋទូត និង និងតំណាងក្រសួង ស្ថាប័ននានា បានសម្ដែងនូវសមានទុក្ខដ៏ក្រៀមក្រំ និងសូមគោរពចូលរួមរំលែកមរណទុក្ខចំពោះ សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទីនៃព្រះរាជាណាចក្រកម្ពុជា និងក្រុមគ្រួសារ ចំពោះការបាត់បង់ ឯកឧត្តមអ្នកឧកញ៉ា ឧត្តមមេត្រីវិសិដ្ឋ ហ៊ុន សាន ដែលជាការបាត់បង់បងប្រុសបង្កើត បងថ្លៃ ឪពុកបង្កើត ឪពុកធំ ឪពុកក្មេក និងជីតា ប្រកបដោយព្រហ្មវិហារធម៌របស់ប្អូនៗ កូនចៅ និងក្មួយៗទាំងអស់ ហើយក៏ជាការបាត់បង់ឥស្សរជនជាន់ខ្ពស់ដ៏ឆ្នើមមួយរូបរបស់កម្ពុជា ដែលកន្លងមក អ្នកឧកញ៉ា ឧត្តមមេត្រីវិសិដ្ឋ បានលះបង់កម្លាំងកាយចិត្ត ប្រាជ្ញា ស្មារតី និងវីរភាពអង់អាចប្រកបដោយឆន្ទៈមនសិការ ក្នុងបុព្វហេតុ បម្រើជាតិ សាសនា និងព្រះមហាក្សត្រ។ជាមួយក្ដីឡោះអាល័យ និងការចូលរួមរំលែកទុក្ខជាមួយ សម្ដេចតេជោ និងក្រុមគ្រួសារ, ឯកឧត្តម ឯកអគ្គរដ្ឋទូតចិនប្រចាំកម្ពុជា និងតំណាងក្រសួង ស្ថាប័ននានា បានលំឱនកាយវាចាចិត្តគោរពវិញ្ញាណក្ខន្ធ និងបានបួងសួងសូមឱ្យវិញ្ញាណក្ខន្ធ ឯកឧត្តមអ្នកឧកញ៉ា ឧត្ដមមេត្រីវិសិដ្ឋ ហ៊ុន សាន បានទៅសោយសុខក្នុងសុគតិភពជានិច្ចនិរន្តរ៍កុំបីឃ្លៀងឃ្លាតឡើយ៕

ឯកអគ្គរដ្ឋទូតអូស្ត្រាលី ស្ងើចសរសើរចំពោះសម្ទុះនៃការអភិវឌ្ឍ និងធនធានមនុស្ស​វ័យក្មេង​របស់​កម្ពុជា

2025/04/01 12:02:00 pm        291
Facebook Telegram Linkin
ឯកឧត្តម ដេរិក យីប (Derek Yip) ឯកអគ្គរដ្ឋទូតអូស្ត្រាលី ប្រចាំព្រះរាជាណាចក្រកម្ពុជា បាន​បង្ហាញ​ការ​ស្ងើចសរសើរចំពោះសម្ទុះនៃការអភិវឌ្ឍ និងសក្ដានុពលយុវជនវ័យក្មេងរបស់កម្ពុជា។តាមរយៈកិច្ចសម្ភាសន៍ជាមួយទូរទស្សន៍ BTV ឯកឧត្តម ឯកអគ្គរដ្ឋទូតអូស្ត្រាលី បាន​មាន​ប្រសាសន៍​បញ្ជាក់ថា ក្នុងរយៈពេលដែល​ឯកឧត្តម​មក​កាន់​តំណែង​ជា​ឯកអគ្គ​រដ្ឋ​ទូត​រយៈ​ពេល​ប្រមាណ ៧ខែនៅប្រទេសកម្ពុជា ឯកឧត្តម មានការភ្ញាក់​ផ្អើល​ដោយ​សារ​មើល​ឃើញ​ច្បាស់​អំពី​ការ​អភិវឌ្ឍរបស់ប្រទេសកម្ពុជា និងមើលឃើញកម្ពុជាមានការអភិវឌ្ឍរីកចម្រើនលើគ្រប់វិស័យ ហើយ​ប្រទេសអូស្រ្ដាលីក៏មានបំណងចូលរួមចំណែក​ក្នុង​ការ​អភិវឌ្ឍ​នៅ​ក្នុង​ប្រទេស​កម្ពុជា​ផង​ដែរ​។ ឯកឧត្តម ឯកអគ្គរដ្ឋទូតអូស្ត្រាលី បានលើកឡើងថា ចំពោះសក្ដានុពលនៃធនធានមនុស្សកម្ពុជា តាម​រយៈ ស្ថិតិដែលយើងទទួលបាន គឺចំនួន ២ភាគ៣ នៃប្រជាពលរដ្ឋកម្ពុជា គឺជា​ប្រជា​ពលរដ្ឋ​ដែល​មាន​អាយុ​តិចជាង ៣០ ឆ្នាំ ដែលចំនួននេះ គឺបង្ហាញថាកម្ពុជាសម្បូរធនធានមនុស្សវ័យក្មេង និង​មានកម្លាំងសម្រាប់ការអភិវឌ្ឍប្រទេសជាតិ។ សូមជម្រាបថា នៅក្នុងជំនួបសម្តែងការគួរសមជាមួយសម្តេចមហាបវរធិបតី ហ៊ុន ម៉ាណែត នាយក​រដ្ឋ​មន្ត្រីនៃកម្ពុជាកាលពីពេលកន្លងទៅ ឯកឧត្តម ឌីរ៉េក យីប បានប្តេជ្ញាចិត្តក្នុងការពង្រឹង និង​ពង្រីកទំនាក់ទំនងមិត្តភាព និងកិច្ចសហប្រតិបត្តិការជាមួយកម្ពុជា ឱ្យកាន់​តែ​ខ្លាំង​ក្លា​បន្ថែម​ទៀត​ រួមមាន៖ (១) បន្តពង្រឹងនិងពង្រីកកិច្ចសហប្រតិបត្តិការរវាងប្រទេសទាំងពីរ ឱ្យកាន់​តែ​ខ្លាំង​ក្លា​ថែមទៀត (២) គាំទ្រកម្ពុជាដែលនឹ​ង​ចាក​ចេញ​ពី​ចំណាត់​ថ្នាក់​ក្រុម​ប្រទេស​ដែល​មាន​ការ​អភិវឌ្ឍ​តិច​តួច (LDC) នៅឆ្នាំ២០២៩ និង (៣) គាំទ្រការដាក់ចេញនូវយុទ្ធសាស្ត្របញ្ចកោណ-ដំណាក់​កាល ទី១ ដែលជំរុញការអភិវឌ្ឍសេដ្ឋកិច្ចប្រកបដោយភាពធន់ និងចីរភាពរបស់កម្ពុជា។សម្ដេចធិបតី និងឯកអគ្គរាជទូតអូស្ត្រាលី បានវាយតម្លៃខ្ពស់ចំពោះទំនាក់ទំនង និង​កិច្ច​សហ​ប្រតិបត្តិ​ការ​ដ៏​ល្អប្រសើរ រឹងមាំ និងយូរអង្វែងរវាងប្រទេសទាំងពីរ ព្រមទាំងពិភាក្សា​អំពី​ការ​បន្ត​ពង្រឹង និងពង្រីកកិច្ចសហប្រតិបត្តិការបន្ថែមទៀតលើវិស័យសំខាន់ៗមួយចំនួន មានជាអាទិ៍៖ វិស័យ​​ពាណិជ្ជកម្ម សេដ្ឋកិច្ច វិនិយោគ ថាមពលស្អាត សុខាភិបាល អប់រំ ការពារជាតិ និង សន្តិសុខ រួមទាំងការបណ្តុះបណ្តាលផងដែរ៕ អត្ថបទ៖ វ៉ន ដារ៉ា

ក្រុមការងារសមាគម អ.ម.ត ជួបសំណេះសំណាលជាមួយបេក្ខជន​ដាក់ពាក្យ​ស្នើ​សុំ​អាហារូបករណ៍ អ.ម.ត ទៅបន្តការសិក្សានៅសាធារណរដ្ឋប្រជាមានិតចិន ឆ្នាំសិក្សា២០២៥-២០២៦ (លើកទី២)

2025/04/01 11:40:53 am        247
Facebook Telegram Linkin
នាព្រឹកថ្ងៃទី៣០ ខែមីនា ឆ្នាំ២០២៥ ឯកឧត្តម ឡាវ វ៉ាន់ ប្រធានការិយាល័យកិច្ចការនិស្សិតក្រៅប្រទេស នៃសមាគម អ.ម.ត បានអញ្ជើញជាអធិបតីក្នុងពិធីសំណេះសំណាលជាមួយបេក្ខជន ចំនួន ៧៨រូប ដែលបានដាក់ពាក្យស្នើសុំអាហារូបករណ៍ដ៏ថ្លៃថ្លារបស់ សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ផ្តល់ជូនតាមរយៈ សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី (អ.ម.ត) ទៅបន្តការសិក្សានៅសាធារណរដ្ឋប្រជាមានិតចិន ឆ្នាំសិក្សា២០២៥-២០២៦ (លើកទី២)។ក្នុងឱកាសនៃជំនួបនេះ ឯកឧត្តម បាននាំយកប្រសាសន៍សាកសួរសុខទុក្ខដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនិងជាប្រធានកិត្តិយសសមាគម អ.ម.ត និងលោកជំទាវបណ្ឌិត ពេជ ចន្ទមុន្នី ប្រធានសមាគម អ.ម.ត ដល់គណៈកម្មការចំពោះកិច្ច វាយតម្លៃ និងជ្រើសរើសនិស្សិត និងបេក្ខជន។ ឯកឧត្តមបានគូបញ្ជាក់ថា ក្រោមការយកចិត្តទុកដាក់ដ៏ខ្ពង់ខ្ពស់ពីសំណាក់ សម្តេចធិបតី និងលោកជំទាវបណ្ឌិត បានអនុញ្ញាតឱ្យគណៈកម្មការចំពោះកិច្ចជ្រើសរើស និងវាយតម្លៃ នៃគណៈកម្មាធិការអាហារូបករណ៍ អ.ម.ត រៀបចំដំណើរការជ្រើសរើសនិស្សិតទៅបន្តការសិក្សានៅសាធារណរដ្ឋប្រជាមានិតចិន ជាលើកទី២ ចំនួន ៧៨កន្លែង។ទន្ទឹមនឹងនេះ ក្រុមការងារនៃគណៈកម្មការចំពោះកិច្ច វាយតម្លៃ និងជ្រើសរើសនិស្សិត និងក្រុមការងារជាអតីតនិស្សិតអាហារូបករណ៍ អ.ម.ត ដែលបានបញ្ចប់ការសិក្សានៅសាធារណរដ្ឋប្រជាមានិតចិន បានធ្វើបទបង្ហាញពាក់ព័ន្ធនឹងកម្មវិធីអាហារូបករណ៍នីមួយៗ ដើម្បីឱ្យបេក្ខជនយល់កាន់តែច្បាស់ ព្រមទាំងចែករំលែកពីបទពិសោធសិក្សា និងការរស់នៅក្នុងប្រទេសចិន ផងដែរ៕

វិស័យវាយនភណ្ឌ និងការកាត់ដេររបស់កម្ពុជា នឹងធានាការប្រកួតប្រជែងប្រកបដោយបរិយាប័ន្ន

2025/04/01 10:39:48 am        321
Facebook Telegram Linkin
មន្រ្តីជាន់ខ្ពស់ក្រុមប្រឹក្សាអភិវឌ្ឍន៍កម្ពុជា រំពឹងថា កិច្ចប្រជុំកំពូលវាយនភណ្ឌកម្ពុជាឆ្នាំ២០២៥ នឹងក្លាយជាវេទិកាសម្រាប់ការ កសាងទំនាក់ទំនងរវាងរាជរដ្ឋាភិបាល ស្ថាប័នសង្គមស៊ីវិល និងវិស័យឯកជន ដើម្បីធានាដល់វិស័យវាយនភណ្ឌ និងការកាត់ដេរ សម្លៀកបំពាក់របស់កម្ពុជា មានសមត្ថភាពប្រកួតប្រជែង ប្រកបដោយចីរភាព និងបរិយាប័ន្ន។ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) តំណាងដ៏ខ្ពង់ខ្ពស់សម្តេច មហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងពិធីបើកកិច្ចប្រជុំកំពូលវាយនភណ្ឌកម្ពុជាឆ្នាំ២០២៥ ក្រោមប្រធានបទ «កសាងអនាគត៖ បង្កើនភាពកួតប្រជែងនិងចីរភាព» នៅថ្ងៃទី៣១ ខែមីនា ឆ្នាំ២០២៥ ម្សិលមិញនេះ ឯកឧត្តម ឧបនាយករដ្ឋមន្ត្រី បានលើកឡើងអំពីសក្តានុពលនានា ដែលធ្វើឱ្យកម្ពុជាមានភាពប្រកួតប្រជែងខ្ពស់នៅក្នុងតំបន់ ស័ក្តិសមជាគោល ដៅវិនិយោគគួរពិចារណា, គោលនយោបាយរបស់រាជរដ្ឋាភិបាលក្រោមការដឹកនាំតម្រង់ទិស ប្រកបដោយចក្ខុវិស័យរបស់សម្តេច ធិបតី ក្នុងការលើកកម្ពស់ការបណ្តុះបណ្តាលវិជ្ជាជីវៈ ស្តង់ដារការងារ ការគ្រប់គ្រង បរិស្ថាន និងការធ្វើពិពិធកម្មសេដ្ឋកិច្ច, ការអនុវត្ត ឌីជីថលូបនីយកម្មក្នុងស្ថាប័នរដ្ឋ និងឯកជន ដែលចូលរួមជំរុញល្បឿនការងារ ប្រកបដោយគុណភាព និងប្រសិទ្ធភាពក្រៅពីគោលការណ៍ខាងលើ, ឯកឧត្តមឧបនាយករដ្ឋមន្ត្រី លើកឡើងអំពីយន្តនៃការត្រៀមលក្ខណៈឱ្យរួចរាល់ សម្រាប់ច្បាម យកឱកាសនាពេលអនាគត ស្របតាមរបត់សេដ្ឋកិច្ចជាសកល ដោយពង្រឹងសមត្ថភាពវិស័យវាយនភណ្ឌ និងកាត់ដេរ ឱ្យមានភាពរីក ចម្រើន ទំនើបទាន់សម័យ, និងការបញ្ចប់ឋានៈជាប្រទេសដែលមានការអភិវឌ្ឍន៍ទាប នាពេលខាងមុខរបស់កម្ពុជា ដោយបន្ថែមការ យកចិត្តទុកដាក់ទៅលើបទប្បញ្ញត្តិអន្តរជាតិថ្មីៗ ស្តីពីសិទ្ធិមនុស្ស ការងារ និងបរិស្ថាន។ ឯកឧត្តមឧបនាយករដ្ឋមន្ត្រី សង្ឃឹមយ៉ាងមុតមាំថា អ្នកចូលរួមពីគ្រប់វិស័យពាក់ព័ន្ធ នឹងបានឈ្វេងយល់បន្ថែម អំពីមាគ៌ា នៃការរៀបចំកសាងអនាគតរបស់វិស័យវាយនភណ្ឌ និងការកាត់ដេរនៅកម្ពុជា។ លើសពីនេះ ឯកឧត្តមរំពឹងថា កិច្ចប្រជុំកំពូលនេះ នឹងក្លាយជាវេទិកាសម្រាប់ការកសាងទំនាក់ទំនងរវាងរាជរដ្ឋាភិបាល, ស្ថាប័នសង្គមស៊ីវិល និងវិស័យឯកជន ដើម្បីធានាបានថា វិស័យ វាយនភណ្ឌ និងការកាត់ដេរសម្លៀកបំពាក់របស់កម្ពុជា មានសមត្ថភាពប្រកួតប្រជែង ប្រកបដោយចីរភាព និងបរិយាប័ន្ន។សូមជម្រាបថា កិច្ចប្រជុំកំពូលលើកទី១ ក្នុងវិស័យវាយភណ្ឌកម្ពុជានេះ ត្រូវបានរៀបចំឡើងដោយក្រសួងការងារ និងបណ្តុះបណ្តាល វិជ្ជាជីវៈ សហការជាមួយសមាគមវាយនភណ្ឌ, សម្លៀកបំពាក់, ស្បែកជើង, និងសម្ភារៈធ្វើដំណើរនៅកម្ពុជា, អង្គការពលកម្មអន្តរជាតិ តាមរយៈកម្មវិធី Better Factories Cambodia (BFC), សភាពាណិជ្ជកម្មអឺរ៉ុបនៅកម្ពុជា តាមរយៈកម្មវិធី Responsible Business Hub Cambodia (RBH Cambodia) និងកិច្ចសហប្រតិបត្តិការអាល្លឺម៉ង់ (GIZ) ជាដើម៕ អត្ថបទ៖ សុន រ៉ាឌី

ជប៉ុនផ្តល់ហិរញ្ញប្បទានសហប្រតិបត្តិការដល់កម្ពុជាចំនួន ៤ គម្រោងមានទឹកប្រាក់ ២៦ លានដុល្លារ

2025/04/01 10:31:43 am        378
Facebook Telegram Linkin
កម្ពុជា និង JICA ចុះហត្ថលេខាលើកិច្ចព្រមព្រៀងហិរញ្ញប្បទានសហប្រតិបត្តិការសរុបចំនួន៤ ក្នុងនោះកិច្ចព្រមព្រៀងហិរញ្ញប្ប ទានឥតសំណងថ្មីចំនួន ១ និងវិសោធនកម្មនៃកិច្ចព្រមព្រៀងហិរញ្ញប្បទានឥតសំណងចំនួន ៣ មានទឹកប្រាក់សរុបប្រមាណ ២៦ លានដុល្លារអាមេរិក។ឯកឧត្តម រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ជាភាគីហត្ថលេខីតំណាងរាជរដ្ឋាភិបាលកម្ពុជា និង ឯកឧត្តម SANUI Kazumasa ប្រធានទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន JICA ប្រចាំនៅកម្ពុជា នៅថ្ងៃម្សិលមិញនេះ បានចុះហត្ថលេខាលើកិច្ចព្រមព្រៀងហិរញ្ញប្បទានសហប្រតិបត្តិការចំនួន៤ មានទឹកប្រាក់សរុបចំនួនជិត ៤ ពាន់លានយ៉េនជប៉ុន ត្រូវជាប្រមាណ ២៦ លានដុល្លារអាមេរិក។ ក្នុងនោះរួមមានគម្រោង៖ ទី១-លើវិសោធនកម្មនៃកិច្ចព្រមព្រៀងហិរញ្ញប្បទានឥតសំណង សម្រាប់គម្រោង ពង្រីកសមត្ថភាពប្រព័ន្ធផ្គត់ផ្គង់ទឹកស្អាតភូមិព្រែក មានថវិកាបន្ថែមចំនួន ១២,៣៣ លានដុល្លារអាមេរិក (កិច្ចព្រមព្រៀងដើមមានទឹក ប្រាក់ចំនួន ២២,៤១ លានដុល្លារអាមេរិក)។ គម្រោងនេះមានគោលបំណងពង្រីកសមត្ថភាពផលិតរបស់រោងចក្រប្រព្រឹត្តកម្មទឹក ស្អាតភូមិព្រែកពី ១៥០ ពាន់ម៉ែត្រគីប ដល់ ១៩៥ ពាន់ម៉ែត្រគីបក្នុងមួយថ្ងៃ តាមរយៈការសាងសង់រោងចក្រប្រព្រឹត្តិកម្មទឹកស្អាត ដែលមានសមត្ថភាពផ្គត់ផ្គង់ទឹកស្អាត ៤៥ ពាន់ម៉ែត្រគីប ក្នុងមួយថ្ងៃ, សាងសង់ប្រព័ន្ធបណ្តាញស្ថានីយបូមទឹកឆៅ, អាង ស្តុកទឹក និង ប្រព័ន្ធចែកចាយទឹក។ ទី២- វិសោធនកម្មនៃកិច្ចព្រមព្រៀងហិរញ្ញប្បទានឥតសំណង សម្រាប់គម្រោងការកសាងបណ្ដាញស្ថានីយ៍វាស់វែងអចិន្ត្រៃយ៍ ដោយផ្កាយរណបទូទាំងប្រទេស មានថវិកាបន្ថែម ៤ លានដុល្លារអាមេរិក (កិច្ចព្រមព្រៀងដើមមានទឹកប្រាក់ ៨,៩២ លានដុល្លារអាមេរិក) ។ គម្រោងនេះ មានគោលបំណងពង្រឹងសេវារដ្ឋបាលសម្រាប់ការចុះបញ្ជីដីធ្លីទូទាំងប្រទេសកម្ពុជា តាមរយៈការបង្កើតបណ្តាញ ស្ថានីយវាស់វែងអចិន្ត្រៃយ៍ ដោយប្រព័ន្ធផ្កាយរណប ដែលអាចទទួលទិន្នន័យ កំណត់ទីតាំងដែលមានសុក្រិតភាពខ្ពស់ ពីប្រព័ន្ធផ្កាយ រណបសកល, និងការដំឡើងឧបករណ៍សម្រាប់មជ្ឈមណ្ឌលគ្រប់គ្រងទិន្នន័យរួមមួយដែលនឹងត្រូវធ្វើប្រតិបត្តិការជាប្រព័ន្ធ។ទី៣-កិច្ចព្រមព្រៀងហិរញ្ញប្បទានឥតសំណងសម្រាប់កម្មវិធីអភិវឌ្ឍន៍សង្គម និងសេដ្ឋកិច្ចមានទឹកប្រាក់ ៧,៧៧ លានដុល្លារ អាមេរិក, កម្មវិធីនេះមានគោលបំណងគាំទ្រដល់ការធ្វើឱ្យប្រសើរឡើងនូវសមត្ថភាពរបស់មជ្ឈមណ្ឌលសកម្មភាពកំចាត់មីនកម្ពុជា (CMAC) និងប្រសិទ្ធភាពនៃការបណ្តុះបណ្តាល ស្តីអំពីសកម្មភាពបោសសម្អាតមីន តាមរយៈការផ្ដល់សម្ភារសំខាន់ៗចាំបាច់ទាក់ទង នឹងសកម្មភាពសម្អាតមីន នៅតាមអង្គភាព CMAC ក្នុងខេត្តកំពង់ឆ្នាំង, ខេត្តបាត់ដំបង, និងទីតាំងបណ្តុះបណ្តាលនានា។ចំណែកទី៤- គឺវិសោធនកម្មនៃកិច្ចព្រមព្រៀងហិរញ្ញប្បទានឥតសំណងសម្រាប់គម្រោងសាងសង់អគារហ្វឹកហ្វឺន និងអគារផ្សព្វ ផ្សាយអប់រំ ការយល់ដឹងពីសង្គ្រាមនៃមជ្ឈមណ្ឌលសកម្មភាពកំចាត់មីនកម្ពុជា មានថវិកាបន្ថែម ២ លានដុល្លារអាមេរិក។ គម្រោងនេះមានគោលបំណងបំពេញតម្រូវការចាំបាច់ និងសម្រេចទស្សនវិស័យនៃវិទ្យាស្ថានបច្ចេកទេសសកម្មភាពមីនរបស់អង្គភាព CMAC, ការ ធ្វើឱ្យប្រសើរឡើងនូវការយល់ដឹងជាសាធារណៈ អំពីផលប៉ះពាល់ដោយសារគ្រាប់មីន និងសំណល់យុទ្ធភណ្ឌសង្គ្រាម, ផ្សព្វផ្សាយអប់រំ អំពីវិបត្តិនៃសង្គ្រាម និងលើកកម្ពស់ស្មារតីឱ្យស្គាល់ពីតម្លៃពិតនៃសន្តិភាព ក្នុងស្ថានភាពចំពោះមុខ និងអនាគត តាមរយៈការសាងសង់ សំណង់អគារមួយចំនួន ដើម្បីធ្វើឱ្យប្រសើរឡើងនូវមុខងារដែលមានស្រាប់របស់វិទ្យាស្ថានបច្ចេកទេសសកម្មភាពមីន ក្នុងខេត្តកំពង់ ឆ្នាំង, សាងសង់អគារផ្សព្វផ្សាយអប់រំការយល់ដឹងអំពីសង្គ្រាម នៅខេត្តសៀមរាប និងហេដ្ឋរចនាសម្ព័ន្ធចាំបាច់មួយចំនួនទៀត៕ អត្ថបទ៖ សុន រ៉ាឌី

រដ្ឋមន្រ្តីក្រសួងប្រៃសណីយ៍ លើកទឹកចិត្ត​ដល់ប្រតិបត្តិករ​ផ្តល់សេវាទូរគមនាគមន៍ទាំងអស់​សហការ​​​ជាមួយ​ក្រសួង រួមនឹងអាជ្ញាធរពាក់ព័ន្ធ​ចូលរួម​ទប់ស្កាត់ការឆបោកតាមប្រព័ន្ធអនឡាញ (Online Scam)

2025/04/01 09:02:25 am        329
Facebook Telegram Linkin
ឯកឧត្តម ជា វ៉ាន់ដេត រដ្ឋមន្រ្តី​ក្រសួង​ប្រៃសណីយ៍​និង​ទូរ​គមនាគមន៍ លើកទឹកចិត្ត​ដល់ប្រតិបត្តិករ​ផ្តល់សេវាទូរគមនាគមន៍ទាំងអស់​សហការ​​​ជាមួយ​ក្រសួង រួមនឹងអាជ្ញាធរពាក់ព័ន្ធ​ចូលរួម​ទ​ប់​ស្កាត់នូវប​ញ្ហា​ប្រឈម​​នានា ដូចជា​ការ​ឆបោកតាមប្រព័ន្ធអនឡាញ (Online Scam) និង​ឧបករណ៍​​បញ្ជូន​ទទួ​ល​ក្លែងក្លាយ (Fake Base Transceiver Station - Fake BTS)។ ថ្លែងក្នុងពិធីសំណេះសំណាលជាមួយក្រុមហ៊ុនទូរសព្ទចល័ត ក្រុម​ហ៊ុន​បង្គោល​អង់តែន និង​ក្រុម​ហ៊ុន​បណ្តាញ​ខ្សែ​កាបអុបទិកនៅកម្ពុជា នាព្រឹកថ្ងៃទី៣១ ខែមីនា ឆ្នាំ២០២៥ ឯកឧត្តមរដ្ឋមន្រ្តី ជា វ៉ាន់ដេត បានលើកឡើងពីបញ្ហាប្រឈម​​នានា​ដែល​កំពុង​ជួប​ប្រទះ​នា​​ពេល​បច្ចុប្បន្ន និង​បាន​លើក​ទឹក​​ចិត្ត​​ដល់​ប្រតិបត្តិក​រ​​ផ្តល់​សេវា​ទូរ​គម​នាគមន៍​​ឱ្យ​សហការបន្ថែម​ទៀត​ជា​មួយ​ក្រសួង និង​និយ័ត​ករ​​ទូរ​គមនាគមន៍​កម្ពុជា និង​អាជ្ញាធរ​ពាក់​​ព័ន្ធ​ទាំងអស់ ដើម្បីកំណត់​យន្ត​ការ​ចូល​រួម​ទប់ស្កាត់​នូវ​ប​ញ្ហាទាំងនោះ ដូចជា បញ្ហា​ឆបោក​តាម​ប្រព័ន្ធ​អនឡាញ (Online Scam) និងឧបករណ៍​បញ្ជូន​​ទទួ​ល​​ក្លែងក្លាយ (Fake Base Transceiver Station - Fake BTS) ដែលបានបង្ក​ការ​រំខាន​​ដល់​​​អ្នក​​ប្រើប្រាស់ ឯកជនភាព និង​សុវត្ថិភាពទិន្នន័យ ព្រម​ទាំង​សណ្តាប់​ធ្នាប់សង្គម និង​សន្តិសុខ​ជាតិ​។ ពិធីសំណេះសំណាលនេះ ក៏មាន​ការ​អញ្ជើញ​ចូល​រួម​ពី​ថ្នាក់​ដឹកនាំក្រសួង មន្រ្តីជំនាញ និង​តំណាង​ក្រុម​ហ៊ុន សរុបប្រមាណ ៩០នាក់ នៅ​ទី​ស្ដីការ​ក្រសួង​ប្រៃសណីយ៍និងទូរគមនាគមន៍។ ពិធីនេះ​ រៀប​ចំឡើង​ក្នុង​គោល​បំណង​ផ្សព្វ​ផ្សាយ​សមិទ្ធ​ផល​នានា​ដែល​ក្រសួង​សម្រេច​បាន​នា​ពេល​កន្លង​មក ការពង្រឹងគុណភាពសេវាទូរគមនាគមន៍ ការអភិវឌ្ឍថ្នាល​និង​កម្ម​វិធី​រដ្ឋាភិបាលឌីជីថល និង​ការ​បន្ត​អភិវឌ្ឍធនធានមនុស្សឌីជីថល ជាដើម។បន្ថែមលើនេះ ឯក​ឧត្តម​រដ្ឋមន្រ្តី គូស​បញ្ជាក់​អំពី​កិច្ច​សហការ​ដ៏ល្អរវាងក្រសួង និយ័តករទូរគមនាគមន៍កម្ពុជា ជាមួយ​ប្រតិបត្តិករផ្តល់​សេវា​ទូរ​សព្ទ​ចល័ត បង្គោលអង់តែន និង ខ្សែកាបអុបទិក ដើម្បី​លើកក​ម្ពស់​គុណ​ភាព​សេវា​ទូរគមនាគមន៍​ទូទាំង​រាជធានី ខេត្ត សំដៅពង្រឹង និង​ពង្រីក​គុណ​ភាព​សេវា​ទូរ​គមនាគមន៍​ជូន​ប្រជាពលរដ្ឋ​ឱ្យ​កាន់​តែ​ប្រសើរឡើងបន្ថែមទៀត។ ឯកឧត្តមរដ្ឋមន្រ្តី បាន​លើក​ទឹក​ចិត្ត​ដល់​ក្រុម​ហ៊ុនផ្ត​ល់សេ​វា​ទូរ​គមនា​គមន៍ទាំងអស់ ផ្តល់កិច្ចសហការ​លើ​គម្រោង​រៀបចំ​សណ្តាប់​ធ្នាប់​បណ្តាញ​ខ្សែកា​បអុបទិក នៅតាមភូមិសាស្រ្តអាទិភាពក្នុងរាជធានីភ្នំពេញ ក្នុងគោលដៅ​ពង្រឹង​សោ​ភ័ណ្ឌភាពទីក្រុង៕

ជនបរទេសប្រុសស្រីជាង ១០០នាក់ ត្រូវបាននគរបាលឃាត់ខ្លួន នៅទីតាំងខុនដូរដែលលួចលាក់បើកអនឡាញខុសច្បាប់

2025/04/01 07:38:27 am        416
Facebook Telegram Linkin
ភ្នំពេញ ៖ កម្លាំងនគរបាលនៃអគ្គស្នងការនគរបាលជាតិបានបើកប្រតិបត្តិការ ឡោមព័ទ្ធ ទីតាំងអគារខុនដូមួយកន្លែង ឃាត់ខ្លួនជនជាតិបរទេសប្រុសស្រីជាង ១០០នាក់ ដែលមានលួចលាក់បង្កប់អនឡាញខុសច្បាប់ ។ ប្រតិបត្តិការណ៍ឆ្មក់បង្រ្កាបនេះដែរបានធ្វើឡើងកាលពីវេលាម៉ោង ០៥ នឹង ៣០នាទីល្ងាចថ្ងៃទី ៣១ ខែមីនា ឆ្នាំ២០២៥ នៅចំណុចខុនដូមួយកន្លែង តាមបណ្តោយផ្លូវលេខ៤៩៤ ក្នុងសង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ ។តាមប្រភពព័ត៍មានពីសមត្ថកិច្ច បានអោយដឹងថា កម្លាំងបានបើកការស្រាវជ្រាវ មើលទីតាំងខុនដូនេះជាយូរខែមកហើយ ទើបនៅថ្ងៃនេះទើបទទួលបានបទបញ្ជាពីថ្នាក់ដឹកនាំ អោយបញ្ចេញកម្លាំងទៅកាន់ទីតាំងខាងលើនេះ ឡោមព័ទ្ធបង្រ្កាបអោយខានតែបាន ។ លុះមកដល់ថ្ងៃនេះ សមត្ថកិច្ចបានឆ្មក់បង្រ្កាបនឹងឃាត់បានជនជាតិបរទេសជាង ១០០នាក់ រួមនឹងវត្ថុតាងមួយចំនួន ពាក់ព័ន្ធការមប្រើអនឡាញ បញ្ជូនតាមរថយន្តក្រុងទៅកាន់អគ្គស្នងការនគរជាតិ ។ បច្ចុប្បន្ន ជនជាតិបរទេសប្រុសស្រីជាង១០០នាក់ ត្រូវបានសមត្ថកិច្ចបញ្ជូនទៅ អគ្គស្នងការដ្ឋាននគរបាលជាតិ ដើម្បីចាត់ការតាមនីតិវិធីច្បាប់ ៕អត្ថបទ៖ កុម្ភៈ

ថ្នាក់ដឹកនាំគណៈកម្មាធិការជាតិគ្រប់គ្រងគ្រោះមហន្តរាយ ជួបសំណេះសំណាលជាមួយមន្រ្តី២រូប ដែលបំពេញបេសកកម្មមនុស្សធម៌នៅប្រទេសមីយ៉ាន់ម៉ា

2025/03/31 08:05:20 pm        106
Facebook Telegram Linkin
ភ្នំពេញ៖ នៅរសៀលថ្ងៃទី៣១ ខែមីនា ឆ្នាំ២០២៥ ឯកឧត្តម ហង្ស សាមឿន អនុប្រធានទី២ តំណាងដ៏ខ្ពង់ខ្ពស់របស់ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានអញ្ជើញជួបសំណេះសំណាល និងផ្តាំផ្ញើជូនមន្រ្តីជាន់ខ្ពស់កម្ពុជា ០២រូប ជាសមាជិកក្រុមប៉ាន់ប្រមាណ និងឆ្លើយតបបន្ទាន់របស់អាស៊ាន ដែលទទួលបានការឯកភាពដ៏ខ្ពង់ខ្ពស់ពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បញ្ជូនឱ្យចូលរួមក្នុងបេសកកម្មគ្រោះរញ្ជួយដី ដែលបានកើតឡើងក្នុងប្រទេសមីយ៉ាន់ម៉ា តាមការស្នើសុំរបស់រដ្ឋាភិបាលមីយ៉ាន់ម៉ា និងមជ្ឈមណ្ឌលសម្របសម្រួលជំនួយមនុស្សធម៌អាស៊ានសម្រាប់ការគ្រប់គ្រងគ្រោះមហន្តរាយ (AHA Centre)។ នាឱកាសនោះ ឯកឧត្តម ហង្ស សាមឿន បានពាំនាំនូវការផ្តាំផ្ញើ និងជូនពរពីសំណាក់សម្តេចធិបតី ហ៊ុន ម៉ាណែត នាយករដ្ឋមន្រ្តី និងជាប្រធានគណៈកម្មាធិការជាតិគ្រប់គ្រងគ្រោះមហន្តរាយ ព្រមទាំង ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ ដល់មន្រ្តីទាំង២រូបដែលត្រូវបំពេញបេសកកម្មទៅកាន់ប្រទេសមីយ៉ាន់ម៉ានាយប់ថ្ងៃទី៣១ ខែមីនានេះ តាមអាកាសយានដ្ឋានអន្តរជាតិភ្នំពេញ។ឯកឧត្តម បញ្ជាក់ថា ការបំពេញបេសកកម្មនេះពិតជាមានសារៈសំខាន់ ក្នុងនាមកម្ពុជាជាមិត្ត និងជារដ្ឋសមាជិកអាស៊ានត្រូវចូលរួមតាមសំណើរបស់ប្រទេសមីយ៉ាន់ម៉ា ដើម្បីចូលរួមឆ្លេីយតប និងចែករំលែកបទពិសោធនដែលកម្ពុជាមាន ក្នុងការចូលរួមបេសកកម្មមនុស្សធម៌ផ្អែកតាមធម្មនុញ្ញអាស៊ាន។ឯកឧត្តម បញ្ជាក់ទៀតថា ក្នុងនាមមន្រ្តីជំនាញរបស់កម្ពុជាត្រូវបំពេញតួនាទី និងភារកិច្ចឱ្យបានម៉ឺងម៉ាត់ សកម្ម និងសហការឱ្យបានល្អប្រសើរ ប្រកបដោយវិជ្ជាជីវៈខ្ពស់ដើម្បីឱ្យបេសកកម្មដែលកម្ពុជាចូលរួមទទួលបានទាំងប្រសិទ្ធភាព និងប្រសិទ្ធផលអនុលោមតាមបាវចនា អាស៊ានតែមួយ ការឆ្លើយតបតែមួយ (One ASEAN, One Response) តាមរយៈយន្តការមជ្ឈមណ្ឌលសម្របសម្រួលកិច្ចការជំនួយមនុស្សធម៌សម្រាប់គ្រប់គ្រងគ្រោះមហន្តរាយនៃសហគមន៍អាស៊ាន (AHA Centre)។ឆ្លៀតក្នុងឱកាសនោះ ឯកឧត្តម បានជូនពរដល់មន្រ្តីទាំងពីរឱ្យទទួលបានសុខសុវត្ថិភាព និងជោគជ័យក្នុងបេសកកម្មនេះ ដើម្បីទទួលបាននូវបទពិសោធនបន្ថែម និងការអនុវត្តជាក់ស្តែងក្នុងនាមសមាជិកក្រុមប៉ាន់ប្រមាណ និងឆ្លើយតបបន្ទាន់របស់អាស៊ាន ដែលអាចជួយលើការងារសម្របសម្រួល វាយតម្លៃរហ័ស និងការងារផ្សេងៗទៀត៕

បណ្ដាញសង្គម

ព័ត៌មានថ្មីៗ

អាជ្ញាធររាជធានីភ្នំពេញ បន្តប្រតិបត្តិការបោសសម្អាត Online Scams ត្រួតពិនិត្យ ៨០ ទីតាំងទៀត និងផាកពិន័យម្ចាស់ទីតាំងរស់នៅប្រមូលផ្ដុំចំនួន ៤ទីតាំង
06/01/2026 01:06 PM
Facebook Telegram Linkin
រដ្ឋមន្ត្រីក្រសួងធនធានទឹក អញ្ជើញចុះពិនិត្យជាក់ស្តែងវឌ្ឍនភាពការងារសាងសង់ច្រាំងទន្លេបាសាក់ ក្នុងក្រុងសំពៅពូន ខេត្តកណ្តាល ដែលសម្រេចបានប្រមាណ ៦០%
06/01/2026 01:06 PM
Facebook Telegram Linkin
គ្រឹះស្ថានអង្គរ រកចំណូលបានជាង ១៧លានដុល្លារពីការលក់សំបុត្រឱ្យភ្ញៀវបរទេសក្នុងរយៈពេល៥ខែឆ្នាំនេះ
06/01/2026 12:06 PM
Facebook Telegram Linkin
អនុប្រធានសមាគមអតីតយុទ្ធជន អញ្ជើញជួបអតីតយុទ្ធជនចំនួន៣០០គ្រួសារ ដើម្បីរៀបចំផ្តល់ដីធ្វើកសិកម្ម ក្នុងខេត្តបាត់ដំបង
06/01/2026 12:06 PM
Facebook Telegram Linkin
យោធាអាមេរិក បង្ខំឱ្យនាវាចំនួន ១១៨ គ្រឿង ប្តូរទិសដៅ ក្នុងអំឡុងពេលបិទផ្លូវទឹកប្រឆាំងអ៊ីរ៉ង់
06/01/2026 12:06 PM
Facebook Telegram Linkin
កិច្ចសន្ទនា Shangri-La បិទបញ្ចប់ ដោយគណៈប្រតិភូអំពាវនាវឱ្យមានទំនាក់ទំនង និងការសម្របសម្រួល
06/01/2026 12:06 PM
Facebook Telegram Linkin
កម្ពុជា-ទីម័រឡេស្តេ ចេញសេចក្តីប្រកាសរួមព័ត៌មានស្តីពី ការប្រកាស​ដាក់​ឱ្យ​ប្រើ​ប្រាស់​ជា​ផ្លូវ​ការ​ថ្នាល​ផ្ទៀងផ្ទាត់ឯកសារ verify.gov.tl របស់សាធារណរដ្ឋប្រជាធិបតេយ្យទីម័រឡេស្តេ
06/01/2026 12:06 PM
Facebook Telegram Linkin
អារ៉ាប់រួម រិះគន់ការសម្រុកចូលបរិវេណវិហារអ៊ីស្លាម Al-Aqsa ដោយក្រុមអ្នកតាំងលំនៅឋានអ៊ីស្រាអែល
06/01/2026 12:06 PM
Facebook Telegram Linkin
អាមេរិក និងអ៊ីរ៉ង់ បាញ់ផ្លោងដាក់គ្នាជាថ្មីទៀតលើគោលដៅរៀងៗខ្លួន ខណៈនៅតែពុំទាន់រកឃើញចំណុចបញ្ចប់សង្គ្រាមបាន
06/01/2026 12:06 PM
Facebook Telegram Linkin
សហរដ្ឋអាមេរិក៖ បម្រាមលើការដឹកជញ្ជូនបន្ទះអេឡិចត្រូនិក AI អនុវត្តចំពោះក្រុមហ៊ុនចិននៅខាងក្រៅប្រទេសចិន
06/01/2026 11:06 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.