BTV NEWS

សង្គមស៊ីវិលបង្ហាញសុទិដ្ឋនិយមរដ្ឋសភាបើកសម័យប្រជុំវិសាមញ្ញអនុម័តច្បាប់សេចក្តីព្រាងច្បាប់ស្តីពីកាតព្វកិច្ចយោធានៅថ្ងៃស្អែកនេះ

មន្រ្ដីជាន់ខ្ពស់ CDC៖ កំណើនវិនិយោគនៅក្នុងតំបន់សេដ្ឋកិច្ចពិសេសនៅកម្ពុជាកំពុងមានកំណើនជាគំហុក

ថ្នាក់ដឹកនាំខេត្តស្វាយរៀង អបអរសាទរសិស្សពូកែទទួលបានជ័យលាភីលេខ១ មុខវិជ្ជាអក្សរសិល្ប៍ខ្មែរទូទាំងប្រទេស ថ្នាក់ទី១២ មកពីវិទ្យាល័យ ហ៊ុនសែន ពងទឹក ស្រុករំដួល

វិស័យឯកជនកំពុងចូលរួមជាមួយរាជរដ្ឋាភិបាល ជួយកៀរគរវិនិយោគិនបរទេសផ្ទាល់មកបណ្តាក់ទុន

ព័ត៌មានជាតិ

ឯកឧត្តម ឃឹម ហ្វីណង់៖ «ពេលវេលានេះមិនមែនជាពេលកេងចំណេញនយោបាយនោះទេ តែជាពេលមូរដៃអាវធ្វើការរួមគ្នាជំរុញឱ្យកសិករងាកមកចាប់យកពូជអង្ករក្រអូបរបស់កម្ពុជាជំនួសពូជស្រូវវៀតណាមវិញ»

ឆ្លើយតបទៅនឹងការផ្សាយបំផុសបំផុល ញុះញង់របស់បណ្ដាញផ្សព្វផ្សាយវិទ្យុបរទេស ឯកឧត្តម ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានសរសេរបញ្ជាក់នៅលើហ្វេសប៊ុកថា ពេលវេលានេះមិនមែនជាពេលកេងចំណេញនយោបាយនោះទេ តែជាពេលមូរដៃអាវធ្វើការរួមគ្នាជំរុញឱ្យកសិករងាកមកចាប់យកពូជអង្ករក្រអូបរបស់កម្ពុជាជំនួសពូជស្រូវវៀតណាមវិញ។ឯកឧត្តមបានសរសេរថា «ពេលវេលានេះ មិនមែនជាពេលកេងចំណេញនយោបាយនោះទេ តែជាពេលមូរដៃអាវធ្វើការរួមគ្នា ដើម្បីប្រែក្លាយបញ្ហាប្រឈមឱ្យទៅជាឱកាស ជួយនាំគ្នាផ្សព្វផ្សាយឱ្យត្រូវ ជំរុញឱ្យកសិករយើងងាកមកចាប់យកពូជអង្ករក្រអូបរបស់កម្ពុជាជំនួសពូជស្រូវរបស់វៀតណាមវិញ ជាជាងទៅកាត់យកពាក្យសំដីត្រឹមតែជាង១នាទីនៃបទសម្ភាសជិត២០នាទី ហើយដាក់ចំណងជើងថា «រដ្ឋមន្ត្រីក្រសួងកសិកម្មស្តីបន្ទោសកសិករ» ក្នុងចេតនាព្យាយាមធ្វើឱ្យមានការយល់ច្រឡំពីអត្ថន័យដើម និងបន្ទុចបង្អាក់ដល់ការបញ្ចូនសារដ៏មានសារៈសំខាន់របស់ឯកឧត្តមរដ្ឋមន្ត្រីជូនដល់បងប្អូនកសិករយើងក្នុងកាលៈទេសៈដ៏ចាំបាច់មួយនេះ»។ បើតាមឯកឧត្តមអ្នកនាំពាក្យ ការបកស្រាយពន្យល់ពីស្ថានភាពថ្លៃស្រូវអូអឹមមិនមែនជាការដោះសារ ឬការស្តីបន្ទោសដល់កសិករនោះទេ តែជាការវាយតម្លៃសភាពការណ៍យ៉ាងជាក់លាក់នៃទីផ្សារអង្ករលើសកលលោកពីសំណាក់អ្នកជំនាញ ដើម្បីផ្តល់ព័ត៌មានឱ្យបានត្រឹមត្រូវដល់បងប្អូនកសិករយើង រួមគ្នាដោះស្រាយបញ្ហាភ្លាមៗ និងត្រៀមរៀបចំដំណោះស្រាយនាពេលអនាគត ជៀសវាងការខាតបង់ពីហានិភ័យទីផ្សារនៅរដូវក្រោយៗទៀត។ឯកឧត្តម ឃឹម ហ្វីណង់ បានលើកឡើងថា សាធារណៈជន ជាពិសេសពុកម៉ែបងប្អូនកសិករដែលកំពុងដាំស្រូវអូអឹមទាំងអស់ អាចបើកចំហបេះដូង ហើយស្តាប់បទសម្ភាសទាំងមូលពីប្រភពផ្ទាល់ឱ្យបានដល់ចប់ ដើម្បីទទួលបានខ្លឹមសារពិតប្រាកដរបស់ឯកឧត្តរដ្ឋមន្ត្រី។ បើមិនបានជួយអ្វីដោយផ្ទាល់ដល់កសិករយើងទេយ៉ាងហោចណាស់ សូមធ្វើចំណែកមួយនៃដំណោះស្រាយ ប្រសើរជាងទៅខំប្រឹងបង្កើតបញ្ហាបន្ថែម»៕

សម្តេចរដ្ឋសភាធិបតី ឃួន សុដារី ទទួលជួបពិភាក្សាការងារជាមួយ ឯកអគ្គរដ្ឋទូតអ៊ីរ៉ង់ប្រចាំនៅកម្ពុជា សំដៅពង្រឹងពង្រីកកិច្ចសហប្រតិបត្តិការប្រទេសទំាងពីរបន្ថែមទៀត

សម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា នៅព្រឹកថ្ងៃទី១៤ ខែមករា ឆ្នាំ២០២៥ បានអនុញ្ញាតជូនឯកឧត្តម អាលី អាកបា ណាហ្សារី (Ali Akbar Nazari) ឯកអគ្គរដ្ឋទូតនៃសាធារណរដ្ឋអ៊ីស្លាមអ៊ីរ៉ង់ប្រចាំនៅព្រះរាជាណាចក្រកម្ពុជា ដែនមាននិវេសនដ្ឋាននៅទីហាណូយ ចូលជួបសម្តែងការគួរសម និងពិភាក្សាការងារ នៅវិមានរដ្ឋសភា។ឯកឧត្តម អាលី អាកបា ណាហ្សារី បានថ្លែងអំណរគុណចំពោះ សម្តេចប្រធានរដ្ឋសភា ដែលបានចំណាយពេលវេលាដ៏មមាញឹកទទួលជួបពិភាក្សាការងារជាមួយ ឯកឧត្តម និងសហការីនៅក្នុងឱកាសនេះ។ ឯកឧត្តម បានអបអរសាទរចំពោះ សម្តេចប្រធានរដ្ឋសភា ដែលត្រូវបានរដ្ឋសភាបោះឆ្នោតជ្រើសតំាងជាប្រធានរដ្ឋសភានីតិកាលទី៧នេះ។ តំណាងសាធារណរដ្ឋអ៊ីស្លាមអ៊ីរ៉ង់ ឯកឧត្តមឯកអគ្គរដ្ឋទូត បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់រដ្ឋសភា និងរាជរដ្ឋាភិបាលកម្ពុជាក្នុងការធានា ការពារសុខសន្តិភាព និងស្ថិរភាពសង្គមជូនប្រជាពលរដ្ឋបានយ៉ាងល្អ ដែលនេះជាជោគជ័យធំធេងធ្វើឱ្យប្រទេសជាតិទទួលបានការអភិវឌ្ឍបន្តបន្ទាប់ ក្នុងនោះកំណើនសេដ្ឋកិច្ចក្នុងឆ្នាំ២០២៤ កន្លងមកសម្រេចបានក្នុងរង្វង់៦% ដោយបានលើកម្ពស់ជីវភាពប្រជាពលរដ្ឋមានការរីកចម្រើនជាលំដាប់។ ឯកឧត្តម ណាហ្សារី បានបង្ហាញពីការប្តេជ្ញាចិត្តខ្ពស់នៅក្នុងការពង្រឹងពង្រីកចំណងមិត្តភាពកម្ពុជា-អ៊ីរ៉ង់ ឱ្យមានការរីកចម្រើនរឹងមាំបន្ថែមទៀតទំាងខាងស្ថាប័ននីប្បញ្ញត្តិនិងនីតិប្រតិបត្តិ ដើម្បីបម្រើផលប្រយោជន៍នៃប្រទេសនិងប្រជាជនទំាងសងខាង។ ជាមួយគ្នានេះ ឯកឧត្តមបានជម្រាបជូន សម្តេចប្រធានរដ្ឋសភា អំពីបេសកកម្មសំខាន់ៗមួយចំនួនដែល ឯកឧត្តម បាននិងកំពុងធ្វើជាមួយក្រសួងស្ថាប័នរបស់កម្ពុជា លើវិស័យពាណិជ្ជកម្ម សេដ្ឋកិច្ច ឧស្ម័នប្រេងកាត និងវិស័យសុខាភិបាល ជាដើម។ ឯកឧត្តម បានស្នើសុំ សម្តេចរដ្ឋសភាធិបតី បន្តគំាទ្រដល់បេសសកម្មទំាងនោះ ផងដែរ។សម្តេចរដ្ឋសភាធិបតី ឃួន សុដារី មានសោមនស្សរីករាយ និងកក់ក្តៅចំពោះវត្តមាន ឯកឧត្តម អាលី អាកបា ណាហ្សារី និងសហការី នាពេលនេះ។ សម្តេច បានថ្លែងអំណរគុណយ៉ាងជ្រាលជ្រៅចំពោះឯកអគ្គរដ្ឋទូត ដែលបានខិតខំប្រឹងប្រែងយ៉ាងសកម្មក្នុងការបន្តថែរក្សា ពូនជ្រុំ លើកកម្ពស់ទំនាក់ទំនង និងកិច្ចសហប្រតិបត្តិការរវាងប្រទេសទាំងពីរដែលមានជាង ៣ ទសវត្សរ៍មកនេះ ទទួលបានលទ្ធផលគួរកត់សម្គាល់ និងបាននាំមកផលប្រយោជន៍ជាច្រើនជូនប្រទេស និងប្រជាជនទាំងសងខាង។ សម្តេចប្រធានរដ្ឋសភា បានលើកឡើងថា ប្រទេសទំាងពីរ អ៊ីរ៉ង់និងកម្ពុជា នៅមានសក្តានុពលជាច្រើនទៀតដែលត្រូវពិនិត្យ សិក្សា ដើម្បីពង្រីកកិច្ចសហប្រតិបត្តិការជាមួយគ្នា។ កិច្ចសហប្រតិបត្តិការដ៏ល្អរវាងប្រទេសទំាងពីរមិនត្រឹមនាំមកនូវផលប្រយោជន៍ដល់ប្រទេសទំាងពីរប៉ុណ្ណោះទេ ថែមទាំងបានរួមចំណែកដ៏សំខាន់ដល់ការកសាងសុខសន្តិភាព ការអភិវឌ្ឍប្រកបចីរភាព និងវិបុលភាពដល់មនុស្សជាតិលើភពផែនដី ពីព្រោះថាក្នុងពេលបច្ចុប្បន្ននេះ ស្ថានការណ៍ពិភពលោកស្ថិតនៅក្នុងស្ថានភាពផុយស្រួយ ប្រែប្រួលឆាប់រហ័ស បានកំពុងគំរាមកំហែងដល់សុខសន្តិភាព និងការអភិវឌ្ឈរបស់ប្រជាពលរដ្ឋនៅលើពិភពលោកទំាងមូល។សម្តេចរដ្ឋសភាធិបតី បានថ្លែងអំណរគុណចំពោះ ឯកឧត្តមឯកអគ្គរដ្ឋទូត ដែលបានផ្តល់សច្ចៈភាពដល់កម្ពុជា ដោយបានវាយតម្លៃយ៉ាងត្រឹមត្រូវពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ដឹកនាំដោយ សម្តេចមហាបវរធិបតី ហ៊ុន ម៉ាណែត ដែលមានឆន្ទៈមោះមុត ក្នុងការធានាការពារសុខសន្តិភាព ស្ថិរភាពសង្គម ពិសេសការអភិវឌ្ឍប្រទេសជាតិជូនប្រជាពលរដ្ឋ បន្តវេនពី សម្តេចតេជោ ហ៊ុន សែន ដែលជាមគ្គទេសក៍សន្តិភាពនិងការអភិវឌ្ឍរបស់កម្ពុជា។ សម្តេចរដ្ឋសភាធិបតី បានលើកឡើងថា ប្រទេសទាំងពីរ កម្ពុជា-អ៊ីរ៉ង់មានលក្ខណៈស្រដៀងៗគ្នាច្រើនជាពិសេស ធនធានធម្មជាតិ និងសម្បត្តិវប្បធម៌ ហើយជាប្រទេសដែលផ្តល់តម្លៃពិតនៃសុខសន្តិភាព។ ដូច្នេះចូរយើងនាំគ្នាការពារសុខសន្តិភាព ដែលមានស្រាប់កុំចាំដល់ពេលបាត់បង់ ទើបនាំគ្នាស្វែងរកនោះ វាពិតជាលំបាកខ្លាំងណាស់។ ជាមួយគ្នានេះ សម្តេចរដ្ឋសភាធិបតី ឃួន សុដារី និង ឯកឧត្តម អាលី អាកបា ណាហ្សារី បានយល់ស្របដូចគ្នាពីតម្លៃការទូតសភា។ ការទូតសភាកាន់តែមានសារៈសំខាន់ខ្លំាងឡើងនៅក្នុងការថែរក្សាសុខសន្តិភាពនិងសេចក្តីប្រាថ្នារបស់ប្រជាពលរដ្ឋ។ នៅក្នុងការពង្រឹងពង្រីកចំណងមិត្តភាព កិច្ចសហប្រតិបត្តិការប្រទេសទំាងពីរឱ្យកាន់តែមានការរីកចម្រើនរឹងមាំឡើងបន្ថែមទៀត ជាពិសេសដើម្បីពង្រីកកិច្ចសហប្រតិបត្តិការរវាងស្ថាប័ននីតិប្បញ្ញត្តិ កម្ពុជានិងអ៊ីរ៉ង់ ឱ្យកាន់តែស៊ីជម្រៅ ឯកឧត្តម អាលី អាកបា ណាហ្សារី បាននាំសារគោរពអញ្ជើញរបស់ ឯកឧត្តម មូហាម៉េដ ប៉ាហ្គ័រ ហ្គាលីបាហ្វ( Mohammad Bagher Ghalibaf) ប្រធានរដ្ឋសភាអ៊ីរ៉ង់ គោរពអញ្ជើញសម្តេចប្រធានរដ្ឋសភា ទៅបំពេញទស្សនកិច្ចនៅប្រទេសអ៊ីរ៉ង់នាពេលខាងមុខនេះ។ឆ្លើយតបនឹងការអញ្ជើញនេះ សម្តេចរដ្ឋសភាធិការធិបតី ឃួន សុដារី ប្រធានរដ្ឋសភា គូសបញ្ជាក់ថា នឹងពិចារណាក្នុងការរកពេលវេលាសមស្របណាមួយ ក្នុងការបំពេញទស្សនកិច្ចផ្លូវការនៅសាធារណរដ្ឋអ៊ីស្លាមអ៊ីរ៉ង់ តបតាមការអញ្ជើញនេះ៕

ឯកឧត្តម ឃួង ស្រេង៖ គ្រឹះស្ថានសិក្សាជាឆ្អឹងខ្នងដ៏រឹងមាំរបស់ប្រទេសជាតិ ដែលជាកន្លែងបណ្តុះបណ្តាលធនធានមនុស្ស ដើម្បីកសាងប្រទេស

នាព្រឹកថ្ងៃទី១៤ ខែមករា ឆ្នាំ២០២៥ ឯកឧត្តម ឃួង ស្រេង អភិបាលរាជធានីភ្នំពេញបានអញ្ជើញជាអធិបតីក្នុងពិធីបិទសន្និបាតបូកសរុបវាយតម្លៃលទ្ធផលការងារអប់រំ យុវជន និងកីឡារាជធានីភ្នំពេញ ឆ្នាំសិក្សា២០២៣-២០២៤ និងទិសដៅការងារឆ្នាំសិក្សា២០២៤-២០២៥ នៅមន្ទីរអប់រំ យុវជន និងកីឡារាជធានីភ្នំពេញ ដោយមានការចូលរួមពីលោកគ្រូ អ្នកគ្រូ ជាង៥០០នាក់។ក្នុងឱកាសនោះ ឯកឧត្តម ឃួង ស្រេង មានប្រសាសន៍ថា គ្រឹះស្ថានសិក្សាជាឆ្អឹងខ្នងដ៏រឹងមាំរបស់ប្រទេសជាតិ ដែលជាកន្លែងបណ្តុះបណ្តាលធនធានមនុស្ស ដើម្បីកសាងប្រទេស។ ឯកឧត្ដម ឃួង ស្រេង ក៏បានស្នើឱ្យលោកគ្រូ អ្នកគ្រូនៅតាមគ្រឹះស្ថានសិក្សាទាំងអស់ ត្រូវពន្យល់សិស្សានុសិស្សឱ្យបានយល់ពីតម្លៃសន្តិភាព ដែលសម្តេចតេជោ ហ៊ុន សែន រកបានមកដោយលំបាក ដើម្បីឱ្យពួកគាត់បានចូលរួមរក្សាសន្តិភាពនេះឱ្យបានគង់វង់។ ជាមួយគ្នានេះដែរ ឯកឧត្ដម ឃួង ស្រេង ក៏បានជំរុញឱ្យលោកគ្រូ អ្នកគ្រូ ចូលរូមជាមួយអាជ្ញាធរខណ្ឌទាំង១៤ ក្នុងការទប់ស្កាត់ក្មេងទំនើងនៅតាមសាលារៀន ការចូលរួមចលនាប្រលងប្រណាំង ការរៀបចំសម្អាត អនាម័យ បរិស្ថាននៅតាមសាលារៀនអនុវត្តឱ្យបានល្អផងដែរ។ពាក់ព័ន្ធបញ្ហាសំរាមក្នុងទីក្រុង ឯកឧត្តម ឃួង ស្រេង លើកឡើងថា សាលារៀនរដ្ឋកន្លងមកធ្លាប់ជំពាក់បំណុលសំរាម សំណល់រឹង តែពេលនេះរដ្ឋបាលរាជធានីភ្នំពេញ បានលុបបំណុលនេះហើយ។ សម្រាប់ឆ្នាំ២០២៥នេះតទៅ សាលារៀនរដ្ឋនឹងមានកញ្ចប់ថវិកាសំរាប់បង់ថ្លៃសំរាម។ ឯកឧត្តម ឃួង ស្រេង បានបញ្ជាក់ផងដែរថា គិតមកដល់ពេលនេះ អ្នកដែលបានបង់ថ្ងៃសំរាមមានចំនួនប្រមាណ៦០ទៅ៧០ភាគរយប៉ុណ្ណោះ ដែលធ្វើឱ្យខាតបង់ក្នុងការបង់សំរាមឱ្យទៅក្រុមហ៊ុនប្រមូលសំរាម សំណល់រឹង។ បើការបង់សំរាមពីសំណាក់ប្រជាពលរដ្ឋបាន១០០ភាគរយ នោះនឹងមិនខាតបង់ក្នុងការបង់ថ្លៃសំរាមទៅឱ្យក្រុមហ៊ុនទាំង៣ឡើយ ហើយអាជ្ញាធរក៏អាចដោះស្រាយដោយមិនឱ្យនៅតាមសាលារដ្ឋបង់ថ្លៃសំរាមដែរ។ គ្រឹះស្ថានសិក្សារដ្ឋ មិនមែនជាកន្លែងធ្វើអាជីវកម្ម ដូច្នេះមិនអាចរកលុយបង់ទឹក បង់សំរាមបានទេ ដែលអាជ្ញាធរត្រូវតែរួមគ្នាជួយលើបញ្ហានេះ។ឯកឧត្តម ឃួង ស្រេង បានបន្តទៀតថា នៅឆ្នាំ២០២៩ ប្រទេសកម្ពុជានឹងចាក់ចេញពីប្រទេសក្រីក្រ ហើយនៅឆ្នាំ២០៣០ កម្ពុជានឹងឈានទៅសម្រេចបាននូវចក្ខុវិស័យក្លាយជាប្រទេសមានប្រាក់ចំណូលមធ្យមកម្រិតខ្ពស់ និងនៅឆ្នាំ២០៥០នឹងក្លាយជាប្រទេសមានប្រាក់ចំណូលកំរិតខ្ពស់ ឬជាប្រទេសអ្នកមាន៕

សមត្ថកិច្ចខណ្ឌច្បារអំពៅ បង្ក្រាបក្រុមក្មេងទំនើង២នាក់ ក្រោយធ្វើសកម្មភាពកាប់បំផ្លាញទ្រព្យសម្បត្តិ នៅមុខផ្សារច្បារអំពៅ

ក្រុមក្មេងទំនើង០២នាក់ ក្នុងចំណោមបក្សពួកជាច្រើននាក់ ត្រូវបានកម្លាំងសមត្ថកិច្ចខណ្ឌច្បារអំពៅ ធ្វើការស្រាវជ្រាវឈានទៅឃាត់ខ្លួនបាន ក្រោយពួកគេធ្វើសកម្មភាពបង្កហិង្សា ដោយបានកាប់បំផ្លាញម៉ូតូមួយគ្រឿង នៅមុខផ្សារច្បារអំពៅ ស្ថិតក្នុងសង្កាត់ច្បារអំពៅ២ ខណ្ឌច្បារអំពៅ កាលពីយប់ថ្ងៃទី១៣ ខែមករា ឆ្នាំ២០២៥ ។ជនសង្ស័យទាំង០២នាក់ត្រូវបានឃាត់ខ្លួនមានឈ្មោះ ប៉ាវ ស៊ីណា ( ជនដៃដល់ ) និងម្នាក់ទៀតឈ្មោះ លន់ វិល្លៀម ។ ការស្រាវជ្រាវបង្ក្រាបនេះ ធ្វើឡើងដោយមានការចង្អុលបង្ហាញផ្ទាល់ពីលោកចេង មុនីរ៉ា ប្រធានគណះបញ្ជាការឯកភាពរដ្ឋបាលខណ្ឌ និងក្រោមការដឹកនាំកម្លាំងចុះស្រាវជ្រាវចុះចាប់ដោយផ្ទាល់ ដោយលោកវរសេនីយ៍ឯកម៉ៅ សឿត អធិការនគរបាលខណ្ឌច្បារអំពៅ ។ ការចាប់ខ្លួនក្មេងទំនើងទាំង០២នាក់ខាងលើនេះ ធ្វើឡើងនាព្រឹកថ្ងៃទី១៤ ខែមករា ឆ្នាំ២០២៥នេះតែម្តង ពោលគឺកើតហេតុកាលពីយប់មិញ ព្រឹកឡើងសមត្ថកិច្ចបើកការស្រាវជ្រាវឃាត់ខ្លួនបាន ខណះក្រុមនេះនៅមានបក្សពួកបន្ថែមទៀតដែលកំពុងរត់គេច ហើយសមត្ថកិច្ចក៏កំពុងតាមប្រមាញ់ផងដែរ ។ ក្នុងការឃាត់ខ្លួនពួកគេ សមត្ថកិច្ចដកហូតបានកាំបិត និងដាវដែលធ្វើសកម្មភាពចំនួន០២ដើមផងដែរ ។ គួររំលឹកថា ៖ អំពើហិង្សាកាប់បំផ្លាញទ្រព្យសម្បត្តិខាងលើនេះ មិនបានបណ្តាលឱ្យមានមនុស្សណាម្នាក់រងរបួសឡើយ ដោយម៉ូតូជនរងគ្រោះម៉ាក Honda Scoopy មួយគ្រឿងត្រូវរងការខូចខាតតែប៉ុណ្ណោះ ។ សូមបញ្ជាក់ថា ទាក់ទងបញ្ហាក្រុមក្មេងទំនើងនេះដែរ សម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា តែងតែបន្តក្រើនរំលឹកជារឿយៗ និងបានចេញបទបញ្ជារយ៉ាងម៉ឺងម៉ាត់ដល់កងកម្លាំងអាជ្ញាធរមានសមត្ថកិច្ច នៅថ្នាក់រដ្ឋបាលមូលដ្ឋានក្រោមជាតិទាំងអស់ ត្រូវបន្តការយកចិត្តទុក និងពង្រឹងបន្ថែមកាន់តែខ្លាំងជាងសព្វមួយដង លើការបង្ក្រាបសកម្មភាពក្រុមក្មេងទំនើងនេះឱ្យមានប្រសិទ្ធិភាពខ្ពស់បំផុត ដោយចាំបាច់ត្រូវតែកម្ទេចឱ្យអស់ ដោយមិនត្រូវបណ្តែតបណ្តោយឱ្យក្រុមទំនើងមួយក្តាប់តូច ធ្វើសកម្មភាពបង្កចលាចលប៉ះពាល់ដល់ប្រជាពលរដ្ឋ និងសង្គមជាតិទាំងមូលនោះឡើយ ៕ លីហេង

កសិករក្រុងក្រចេះប្រមាណ ២០គ្រួសារ ងាកមកប្រើប្រាស់ពូជស្រូវក្នុងស្រុកជំនួសពូជស្រូវនាំចូលពីបរទេស

លោកចៅសង្កាត់រងទី១ សង្កាត់រកាកណ្តាល ក្រុង/ខេត្តក្រចេះ បានឲ្យដឹងថា បន្ទាប់ពីបានជួបសំណេះសំណាល និងស្តាប់ការពន្យល់របស់មន្រ្តីក្រសួងកសិកម្ម រុក្ខាប្រមាញ់ និងនេសាទ អំពីស្ថានភាពពូជស្រូវ ឃើញមានប្រជាកសិករចំនួនប្រមាណ ២០គ្រួសារ បានងាកមកចាប់អារម្មណ៍ និងសម្រេចចិត្តប្តូរមកធ្វើស្រូវពូជសែនក្រអូបរបស់ខ្មែរ ជំនួសពូជស្រូវពីបរទេសវិញនៅរដូវកាលក្រោយ។លោក អ៊ន ស៊ាង ចៅសង្កាត់រងទី១ សង្កាត់រកាកណ្តាល ក្រុងក្រចេះ បានឲ្យព័ត៌មាន ប៊ីធីវី ដឹងថា គិតមកដល់ពេលនេះ បានឈានចូលដល់ពាក់កណ្តាលរដូវធ្វើស្រែខែប្រាំង កសិករចាប់ផ្តើមបង្ករបង្កើនផលពីចុងខែ១០ (តុលា) រហូតដល់ខែ១១ (វិច្ឆិកា) លើផ្ទៃដីប្រមាណ ៦៨០ហិចតា។ លោកបន្តថា នៅពេលមន្រ្តីក្រសួងកសិកម្ម រុក្ខាប្រមាញ់ និងនេសាទ បានជួបសំណេះសំណាលជាមួយបងប្អូនប្រជាកសិករកាលពីពេលថ្មីៗកន្លងទៅនេះ ដោយបានពន្យល់ និងលើកទឹកចិត្តប្រជាកសិករឱ្យងាកមកដាំដុះពូជស្រូវសែនក្រអូប០១ ដែលជាពូជស្រូវយុទ្ធសាស្ត្ររបស់ខ្មែរ មានតម្លៃខ្ពស់ រក្សាស្ថេរភាពតម្លៃ និងកំពុងទទួលបានការគាំទ្រពេញនិយមនៅលើទីផ្សារអន្តរជាតិ គឺមានការស្ម័គ្រចិត្ត និងសម្រេចចិត្តប្តូរមកធ្វើស្រូវពូជសែនក្រអូបរបស់ខ្មែរនេះវិញ ខណៈកន្លងមកប្រជាកសិករបានប្រើប្រាស់ប្រភេទស្រូវ OM (ស្រូវស្រាល) ដែលមានប្រភពពូជមកពីប្រទេសវៀតណាម។លោកបានបញ្ជាក់ថា ពូជស្រូវសែនក្រអូប ទិន្នផលរបស់វាបានទាបមែន ដោយក្នុង១ហិកតាទទួលបានទិន្នផលប្រហែល ៣,៥តោន ក៏ប៉ុន្តែតម្លៃរបស់ ១ ៣០០រៀល ក្នុង១គីឡូ គិតទៅក្នុង១តោន អាចលក់បានលុយ ៤លាន ៥៥ម៉ឺនរៀល ប៉ុន្តែបើប្រៀបធៀបទៅនឹងស្រូវ OM (ស្រូវស្រាល) ដែលអាចផ្តល់ទិន្នផលខ្ពស់ក្នុង១ហិកតា ៥តោនក៏ពិតមែន តែតម្លៃស្រូវប្រភេទនេះបានត្រឹមតែ ៨៥០រៀល ក្នុង១គីឡូ ឬទាបជាងនេះ តែបើយើងថាអាចលក់បាន ៨៥០រៀល ក្នុង១គីឡូ សរុប៥តោនបានតែ ៤លាន ៥០ម៉ឺនរៀលតែប៉ុណ្ណោះ គឺចាញ់ស្រូវសែនក្រអូប ដែលក្នុង១ហិកតា ទទួលបានទិន្នផលត្រឹមតែជាង៣តោន តែអាចលក់បានក្នុងតម្លៃហូតដល់ ៤លាន ៥៥ម៉ឺនរៀលឯណោះ។លោក គង់ សាមឿន ជាកសិករនៅសង្កាត់រកាកណ្តាល ក្រុងក្រចេះ បានឲ្យដឹងដែរថា លោកនឹងងាកមករកការធ្វើស្រូវពូជសែនក្រអូបនេះវិញ ព្រោះវាមានតម្លៃខ្ពស់ទោះបីជាវាផ្តល់ទិន្នផលទាបជាងស្រូវពូជផ្សេងក៏ដោយ តែស្រូវសែនក្រអូបជាង៣តោន ក្នុង១ហិកតា អាចលក់បានលុយច្រើនជាងស្រូវពូជផ្សេងដែលមានទម្ងន់រហូតទៅដល់ ៥តោន ក្នុង១ហិកតាទៅទៀត។ លោកបានអំពាវនាវឱ្យឲ្យប្រជាកសិករងាកមកធ្វើស្រូវសែនក្រអូបនេះឱ្យបានគ្រប់ៗគ្នា ដើម្បីទទួលបានផលចំណេញ។លោកជំទាវ អ៊ឹម រចនា អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ កាលពីល្ងាចថ្ងៃទី១៣ ខែមករា ឆ្នាំ២០២៥កន្លងទៅ បានអំពាវវនាវឱ្យប្រជាកសិករងាកមកប្រើប្រាស់ពូជស្រូវខ្មែរសែនក្រអូប និងផ្ការំដួល ដោយសារមើលឃើញថា កសិករភាគច្រើនជ្រើសរើសប្រភេទស្រូវ OM របស់វៀតណាម មានទីផ្សារមិនស្ថិតស្ថេរ តម្លៃប្រែប្រួលតាមឈ្មួញវៀតណាម ស្របពេលស្រូវក្នុងប្រទេសរៀតណាមចាលខ្លាំង ធ្វើឱ្យតម្លៃស្រូវថោក។ជុំវិញបញ្ហាធ្លាក់ថ្លៃស្រូវក្នុងពេលបច្ចុប្បន្ននេះ លោកជំទាវអនុរដ្ឋលេខាធិការ បានគូសបញ្ជាក់ថា ក្នុងរយៈពេលជាង១០ថ្ងៃចុងក្រោយនេះ គឺជាប្រភេទស្រូវស្រាល ដាំដុះរយៈពេលខ្លី (ជាពូជស្រូវមកពីប្រទេសវៀតណាម) មិនមែនពូជស្រូវទាំងអស់ធ្លាក់ថ្លៃនោះទេ។ មូលហេតុដែលស្រូវធ្លាក់ថ្លៃ គឺព្រោះតែមកពីចំនួនស្រូវមានចំនួនច្រើន ទាំងក្នុងប្រទេស ក្នុងតំបន់ និងសកលលោក លក់មិនដាច់ គ្មានការបញ្ជាទិញ។ លោកជំទាវ បានបន្ថែមទៀតថា កិច្ចការនេះ ក្រសួងកសិកម្ម មិនបានព្រងើយកន្តើយឡើយ ចំពោះបញ្ហាពលរដ្ឋត្អូញថា ស្រូវប្រភេទនេះ ជួបបញ្ហាធ្លាក់ថ្លៃ៕ អត្ថបទ៖ ឈិត បូរ៉ាវី

អន្តរក្រសួងបន្តប្រជុំដើម្បីឈានទៅបើកសាច់ប្រាក់ជូនស្ត្រីមានផ្ទៃពោះ ជាប់ពន្ធនាគារដែលគ្រោងអនុវត្តឆ្នាំនេះ

រាជរដ្ឋាភិបាលកម្ពុជា កំពុងពង្រីកវិសាលភាព ការគាំពារសង្គមជារួមទៅកាន់ប្រជាពលរដ្ឋក្រីក្រ និងងាយរងហានិភ័យ ក៏ដូចជា ប្រជាពលរដ្ឋក្នុងលក្ខណ្ឌពិសេស។ ជាក់ស្ដែងអន្តរក្រសួងកំពុងបន្តធ្វើការរួមគ្នា ដើម្បីសម្រេចឱ្យបានការអនុវត្ត ការឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោមពីរឆ្នាំ ដែលជាប់នៅក្នុងពន្ធនាគារ។ កត្តាសំខាន់នាពេលនេះ គឺត្រូវសិក្សាលម្អិតគ្រប់ចំណុច ព្រោះក្រុមគោលដៅថ្មីនេះ ស្ថិតក្រោមការឃុំឃាំងពុំអាចចេញមកខាងក្រៅ ដូចពលរដ្ឋទូទៅនោះទេ។នារសៀល ថ្ងៃទី១៣ ខែមករា ម្សិលម៉ិញនេះ ឯកឧត្តម ចន ណារិទ្ធ ជាអគ្គលេខាធិការក្រុមប្រឹក្សាជាតិគាំពារសង្គម បានដឹកនាំកិច្ចប្រជុំអន្តរក្រសួងស្តីពីការគិតគូរផ្តល់អត្ថប្រយោជន៍ នៃកម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម២ឆ្នាំ ដល់ជនជាប់ឃុំជាស្ត្រីក្នុងពន្ធនាគារ។ កិច្ចប្រជុំនេះ ជាការប្រមូលធាតុចូលបន្ថែម ពីគ្រប់ភាគីពាក់ព័ន្ធ ដែលរួមមាន តំណាងមកពី ក្រសួងសង្គមកិច្ច អតីតយុទ្ធជន និងយុវនីតិសម្បទា, មូលនិធិជាតិជំនួយសង្គម, ក្រសួងមហាផ្ទៃ, ក្រសួងយុត្តិធម៌, ក្រសួងការងារ និងបណ្ដុះបណ្ដាលវិជ្ជាជីវៈ, បេឡាជាតិសន្តិសុខសង្គម, ក្រសួងសុខាភិបាល, ក្រសួងកិច្ចការនារី និងអគ្គនាយកដ្ឋានថវិកា នៃក្រសួងសេដ្ឋកិច្ច និងហិរញ្ញវត្ថុ។ កិច្ចប្រជុំនេះបានផ្តោតការពិភាក្សាលើ យន្តការក្នុងការអនុវត្តកម្មវិធី ក្នុងន័យពិនិត្យគ្រប់ទិដ្ឋភាព និងទទួលធាតុចូលបន្ថែមពីក្រសួង-ស្ថាប័នពាក់ព័ន្ធ ដើម្បីឱ្យការគិតគូរនេះមានលក្ខណៈគ្រប់ជ្រុងជ្រោយ។ស្ត្រីមានផ្ទៃពោះ និងកុមារអាយុក្រោមពីរឆ្នាំ ដែលជាប់នៅក្នុងពន្ធនាគារ ជាក្រុមគោលដៅថ្មី ដែលរាជរដ្ឋាភិបាលបានដៅកំណត់ ដើម្បីផ្ដល់ការគាំពារផ្ដល់ជាអត្ថប្រយោជន៍សម្រាប់ឆ្នាំ ២០២៥នេះ។ កម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោមពីរឆ្នាំ ជាកម្មវិធីអចិន្ត្រៃយ៍ ដែលរាជរដ្ឋាភិបាល បានដាក់ឱ្យអនុវត្ត។ បច្ចុប្បន្នកម្មវិធីនេះ កំពុងអនុវត្តលើក្រុមគោលដៅស្ត្រីមានផ្ទៃពោះ និងកុមារអាយុក្រោមពីរឆ្នាំ ដែលរស់នៅក្នុងគ្រួសារក្រីក្រ មានបណ្ណសមធម៌ ក៏ដូចជាកម្មការិនីដែលមានបណ្ណ បេឡាជាតិរបបសន្តិសុខសង្គមផងដែរ។ ការអនុវត្តកម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម២ឆ្នាំនេះ គឺអនុវត្តទៅតាមលក្ខណ្ឌ។ លក្ខណ្ឌគឺសំដៅ ការទទួលបានថវិកាឧបត្ថម្ភចំនួន ៤ដង ពេលទៅពិនិត្យផ្ទៃពោះ ការទទួលបានសាច់ប្រាក់ ១ដងនៅពេលសម្រាល និងទទួលបានសាច់ប្រាក់ចំនួន ១០ក្រោយសម្រាល ដែលសំដៅលើពេលជូនកូនទៅចាក់វ៉ាក់សាំង រហូតដល់កូនអាយុ ២ឆ្នាំ។ ការទទួលបានគឺនៅពេលក្រុមគោលដៅ ទៅទទួលសេវានៅមន្ទីរពេទ្យរដ្ឋ៕ អត្ថបទ៖ គឹម ហុក

ព្រឹទ្ធសភាបានពិនិត្យ និងអនុម័ត លើសេចក្តីស្នើវិសោធនកម្មបទបញ្ជាផ្ទៃក្នុងព្រឹទ្ធសភា ក្រោមអធិបតីភាពសម្ដេចតេជោ ហ៊ុន សែន

នៅព្រឹកថ្ងៃទី១៤ ខែមករា ឆ្នាំ២០២៥នេះ ព្រឹទ្ធសភានៃព្រះរាជាណាចក្រកម្ពុជា បានបើកសម័យប្រជុំជាវិសាមញ្ញ ក្រោមអធិបតីភាពដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា ដោយមានវត្តមានសមាជិក ព្រឹទ្ធសភាចូលរួមចំនួន ៥៩រូប។ អង្គប្រជុំបានដំណើរការដោយមានរបៀបវារៈតែមួយគឺ ពិនិត្យ និងអនុម័តលើសេចក្តីស្នើ វិសោធនកម្មបទបញ្ជាផ្ទៃក្នុងព្រឹទ្ធសភា នៃព្រះរាជាណាចក្រកម្ពុជា។អនុលោមតាមប្រការ ៨២ នៃបទបញ្ជាផ្ទៃក្នុងព្រឹទ្ធសភាបច្ចុប្បន្ន សមាជិក សមាជិកា ព្រឹទ្ធសភា ចំនួន ២៣រូប បានស្នើសុំធ្វើវិសោធនកម្មបទបញ្ជាផ្ទៃក្នុងព្រឹទ្ធសភា។ ការធ្វើវិសោធនកម្ម បទបញ្ជាផ្ទៃក្នុងនេះ គឺផ្អែកលើគោលការណ៍នីតិកម្ម នៃការរៀបចំបទប្បញ្ញត្តិគតិយុត្ត ដែលឆ្លើយតបយ៉ាងសមស្របទៅនឹងតួនាទីរបស់ព្រឹទ្ធសភាដែលជាអង្គការដែលមានអំណាចនីតិប្បញ្ញត្តិ។សេចក្តីស្នើវិសោធនកម្មបទបញ្ជាផ្ទៃក្នុងនេះ មាន១៧ជំពូក ចែកចេញជា ៨៩ប្រការ ដោយបានចែងលម្អិតអំពី «នីតិវិធីនៃសម័យប្រជុំ និងសកម្មភាពផ្សេងៗនៃព្រឹទ្ធសភា ព្រមទាំង រចនាសម្ព័ន្ធ និងយន្តការនានានៃព្រឹទ្ធសភា និងវិធានផ្ទៃក្នុងមួយចំនួន ។ ការរៀបចំបទប្បញ្ញត្តិនេះក៏ធ្វើឱ្យមានភាពងាយស្រួលយល់ និងមានលំដាប់លំដោយ ប្រទាក់ក្រឡាគ្នាពីបទប្បញ្ញត្តិ មួយទៅបទប្បញ្ញត្តិមួយ និងមានព័ត៌មានគ្រប់គ្រាន់ ដែលអាចដឹងបានយ៉ាងឆាប់រហ័សនូវទំនាក់ ទំនងជាមួយបទដ្ឋានគតិយុត្តផ្សេងទៀត។សេចក្តីស្នើវិសោធនកម្មបទបញ្ជាផ្ទៃក្នុងនេះ ក៏បានឆ្លុះបញ្ចាំងឱ្យឃើញអំពីការទទួលខុស ត្រូវខ្ពស់របស់ព្រឹទ្ធសភា ក្រោមការដឹកនាំដ៏ឈ្លាសវៃ ប្រកបដោយគតិបណ្ឌិតខ្ពស់របស់សម្តេច អគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងដើម្បីធានានូវការអនុវត្តមុខងារឱ្យកាន់តែមានប្រសិទ្ធភាពខ្ពស់ ជាពិសេសឱ្យស្របទៅនឹងបរិបទនៃការរីកចម្រើននៅក្នុងសេដ្ឋកិច្ចសង្គម ការវិវត្តឥតឈប់ឈរនៃប្រព័ន្ធបច្ចេកវិទ្យា និងដើម្បីឆ្លើយតបទៅនឹងទស្សនវិស័យវែងឆ្ងាយ របស់ព្រឹទ្ធសភានីតិកាលទី៥។តំណាងសមាជិកព្រឹទ្ធសភាហត្ថលេខី អញ្ជើញមកការពារសេចក្តីស្នើវិសោធនកម្មបទបញ្ជា ផ្ទៃក្នុងព្រឹទ្ធសភា នៃព្រះរាជាណាចក្រកម្ពុជា ដឹកនាំដោយលោកជំទាវបណ្ឌិត ចាន់ សុទ្ធាវី ប្រធានគណៈកម្មការទី៦ព្រឹទ្ធសភា និងសហការី។ អង្គប្រជុំព្រឹទ្ធសភាបានពិនិត្យ និងអនុម័តលើសេចក្តីស្នើវិសោធនកម្មបទបញ្ជាផ្ទៃក្នុង ព្រឹទ្ធសភា នៃព្រះរាជាណាចក្រកម្ពុជា ដោយមានសំឡេងគាំទ្រចំនួន ៥៩ សំឡេងនៃចំនួនសមាជិក ព្រឹទ្ធសភាទាំងមូល។ការអនុម័តបទបញ្ជាផ្ទៃក្នុងនាថ្ងៃនេះ ក៏ជាពេលវេលាដ៏សំខាន់បំផុតមួយនៃប្រវត្តិសាស្ត្រ កម្ពុជាដោយហេតុថា នៅថ្ងៃទី១៤ ខែមករា ឆ្នាំ២០២៥ នេះ កាលពី៤០ ឆ្នាំមុន សម្តេចអគ្គមហាសេនាបតីតេជោ ហ៊ុន សែន ត្រូវបានបោះឆ្នោតជ្រើសតាំងជាឯកច្ឆន្ទ ជាប្រធានក្រុមប្រឹក្សារដ្ឋមន្ត្រី ក្នុងវ័យ៣២ឆ្នាំ (ជានាយករដ្ឋមន្ត្រីនៃប្រទេសកម្ពុជា)។ សមាជិក សមាជិកា ព្រឹទ្ធសភា ក្នុងអង្គប្រជុំជាវិសាមញ្ញទាំងមូល បានសម្តែងនូវការអបអរសាទរយ៉ាងកក់ក្តៅបំផុត ជូនចំពោះសម្តេចតេជោ ប្រធានព្រឹទ្ធសភា និងពិតជាមានមោទនភាពបំផុតដែលបានបំពេញ ការងារក្រោមការដឹកនាំរបស់សម្តេចអគ្គមហាសេនាបតីតេជោ ប្រធានព្រឹទ្ធសភា នីតិកាលទី៥ ដែលជាអគ្គមគ្គុទ្ទេសក៍ដ៏ឆ្នើមបំផុត៕

ពលរដ្ឋខេត្តស្វាយរៀងស្នើដល់រដ្ឋបាលឃុំ/ស្រុកចុះពិនិត្យការងារស្ថាបនាផ្លូវមិនប្រក្រតី

ស្វាយរៀង ÷ តំណាងពលរដ្ឋភូមិទួលជ័រ ឃុំត្រពាំងស្តៅ ស្រុករមាសហែក ខេត្តស្វាយរៀង លោក ស៊ឹម ចាន់ នៅថ្ងៃទី១៣ ខែមករា ឆ្នាំ២០២៥នេះ បានស្នើដល់រដ្ឋបាលឃុំ/ស្រុក និងផ្នែកពាក់ពន្ធ័ ចុះធ្វើការត្រួតពិនិត្យ ក្រុមហ៊ុនសោភណ្ឌ័ធានីស្ថាបនាផ្លូវ ដើម្បីជំរុញដល់ក្រុមការងារស្ថាបនាផ្លូវធ្វើអោយបានត្រឹមត្រូវ ទៅតាមបទដ្ឋានបច្ចេកទេស សំដៅធានាដល់ការប្រើប្រាស់ផ្លូវបានយូរអង្វែង ។ តំណាងពលរដ្ឋបានសម្ដែងនូវអំណរគុណចំពោះរាជរដ្ឋាភិបាល សម្ដេចមហាបបរធិបតីហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលសម្តេចបានផ្តល់ថវិកា តាមរយះមូលនិធីឃុំ/សង្កាត់ប្រើប្រាស់សម្រាប់ឆ្នាំ២០២៤ ធ្វើការស្ថាបនាផ្លូវឆ្លងកាត់មូលដ្ឋានដាក់អោយពួកគាត់ប្រើប្រាស់ ខណៈដែលនៅតំបន់នេះកន្លងមកពុំមានផ្លូវប្រើប្រាស់ក្នុងការធ្វើដំណើរបានល្អនិងគេទេ។ តំណាងដ៏ដែលបានសុំណូមពរ ដល់ក្រុមការងារថា បើបានតែធ្វើផ្លូវហើយ សុំអោយក្រុមការងារធ្វើអោយបានត្រឹមត្រូវតាមបទដ្ឋាន កុំធ្វើអោយតែបាន ហើយខុសនិង គម្រោងដែលរដ្ឋបាលស្រុកនិងឃុំ ដាក់អោយដេញថ្លៃធ្វើ ដើម្បីបញ្ជៀស ការខាតបង់ថវិកាជាតិ ប្រើប្រាស់មិនបានយូរអង្វែង ខណៈដែលបច្ចុបន្បន្ននេះឃើញថាការស្ថាបនាខុសនិងគម្រោង ដែលលោកអភិបាលស្រុក បានធ្វើការប្រជុំផ្សព្វផ្សាយប្រាប់ថាផ្លូវដែលស្ថាបនានេះ មានកម្រាស់មួយតឹកកន្លះ តែការងារស្ថាបនាមិនដូចតាមការណែនាំរបស់រដ្ឋបាលស្រុកនោះទេ។ សំឡេង....... ជុំវិញនិងការលើកឡើងរបស់តំណាងពលរដ្ឋស្នើដល់រដ្ឋបាលឃុំ/ស្រុក និងផ្នែកពាក់ពន្ធ័ ចុះពិនិត្យកែលំអរផ្លូវ លោក កុល ហ៊ុន មេឃុំត្រពាំងស្តៅ និងជាម្ចាស់គម្រោង បានចុះពិនិត្យនិងណែនាំដល់ក្រុមហ៊ុនរួចរាល់ហើយនៅថ្ងៃនោះដែរ ។ ដោយឡែកតំណាងហ៊ុនស្ថាបនាផ្លូវ លោក គឹម សោភណ្ឌ័ ប្រធានក្រុមហ៊ុនស្ថាបនាផ្លូវ បានទទួលតាមការណែនាំរបស់ម្ចាស់គម្រោងដោយធ្វើប្តេជ្ញាអនុវត្តគម្រោងដែលក្រុមហ៊ុនធ្វើការដេញថ្លៃបានពីរដ្ឋបាលស្រុក និងឃុំ អោយបានល្អ តែបច្ចុប្បន្នការងារស្ថាបនាផ្លូវរបស់ក្រុមហ៊ុនធ្វើមិនទាន់ហើយ ដូច្នេះ ក្រុមហ៊ុនធានានិងស្ថាបនាផ្លូវអោយបានល្អស្អាតតាមគម្រោង សូមបងប្អូនកុំមានការព្រួយបារម្មណ៏ ។ សូមបញ្ជាក់ថាផ្លូវមួយខ្សែប្រវែង ២ពាន់ ៨០ម៉ែត្រ ទទឹងផ្លូវ ៥ម៉ែត្រកន្លះ ក្រាលគ្រួសក្រហមទទឹងផ្លូវ៥ម៉ែត្រ កម្រាស់មួយតឹកកកន្លះ ដាំស្មៅតាមជើងទេ នឹងដាក់ស្លាកសញ្ញាគម្រោង ដែលពលរដ្ឋមានការស្នើដល់រដ្ឋបាលស្រុក/ឃុំ ចុះពិនិត្យការងារស្ថាបនានោះ ស្ថិតនៅក្នុងភូមិត្រពាំងស្គន់ថ្មី និងភូមិទួលជ័រ ឃុំត្រពាំងស្តៅ ស្រុករមាសហែក ខេត្តស្វាយរៀង ។ ដោយ ÷ ភា សារឹត

ការបើកប្រាក់សោធនរបបសន្តិសុខសង្គម លើកទី១ ជូនអតីតយុទ្ធជន អតីតមន្ត្រីរាជការស៊ីវិល និងអ្នកនៅក្នុងបន្ទុក នឹងធ្វើឡើងចាប់ពីថ្ងៃទី១៥ ខែមករានេះតទៅ

មូលនិធិជាតិជំនួយសង្គម (ម.ជ.ជ.) នៅថ្ងៃទី១៤ ខែមករា ឆ្នាំ២០២៥នេះ បានជូនដំណឹងដល់អតីតយុទ្ធជន អតីតមន្ត្រីរាជការស៊ីវិល និងអ្នកនៅក្នុងបន្ទុក អំពីការបើកប្រាក់គោលនយោបាយ របបសន្តិសុខសង្គមសម្រាប់ពីរសប្តាហ៍ លើកទី១ ក្នុងខែមករា ឆ្នាំ២០២៥។ ចំពោះការបើកនេះ ធ្វើឡើងនាម៉ោង០៨៖០០ព្រឹក ថ្ងៃទី១៥ ខែមករា ឆ្នាំ២០២៥នេះ។ការបើកផ្តល់ខាងលើធ្វើឡើង តាមរយៈប្រព័ន្ធធនាគារដៃគូ ដូចខាងក្រោម៖១៖ សម្រាប់អតីតយុទ្ធជន អតីតមន្ត្រីរាជការស៊ីវិល និងអ្នកនៅក្នុងបន្ទុក ដែលមានអាសយដ្ឋាននៅរាជធានីភ្នំពេញ អាចទៅបើកប្រាក់សោធន បានតាមប្រព័ន្ធធនាគារកាណាឌីយ៉ា ក.អ. នៅគ្រប់សាខារាជធានី ខេត្ត ក្រុង ស្រុក ខណ្ឌ ទូទាំងប្រទេសដោយត្រូវយកភ្ជាប់មកជាមួយ នូវសៀវភៅគណនី របស់ធនាគារកាណាឌីយ៉ា ក.អ. និងអត្តសញ្ញាណប័ណ្ណសញ្ញាតិខ្មែរ ឬកាតអេធីអឹម (ប្រើតាមទូ ATM)។២៖ សម្រាប់អតីតយុទ្ធជន អតីតមន្ត្រីរាជការស៊ីវិល និងអ្នកនៅក្នុងបន្ទុក ដែលមានអាសយដ្ឋាន នៅតាមបណ្តាខេត្តទាំង២៤ អាចទៅបើកប្រាក់សោធនបានតាមប្រព័ន្ធធនាគារអេស៊ីលីដា ភីអិលស៊ី នៅគ្រប់សាខារាជធានី ខេត្ត ក្រុង ស្រុក ខណ្ឌ ទូទាំងប្រទេស ដោយត្រូវយកភ្ជាប់មកជាមួយ នូវសៀវភៅគណនីរបស់ធនាគារអេស៊ីលីដា ភីអិលស៊ី និងអត្តសញ្ញាណ ប័ណ្ណសញ្ញាតិខ្មែរ ឬកាតអេធីអឹម (ប្រើតាមទូ ATM)។ ចំពោះប្រាក់គោលនយោបាយ របបសន្តិសុខសង្គមរបស់សពអតីតយុទ្ធជន អតីតមន្ត្រីរាជការស៊ីវិល និងប្រាក់គោលនយោបាយប្រចាំខែ សម្រាប់អ្នកនៅក្នុងបន្ទុក និងកូនកំព្រារបស់សពអតីតមន្ត្រីរាជការស៊ីវិល ត្រូវបានរៀបចំបើកជូនដល់គេហដ្ឋាន ឬសាលាឃុំ/សង្កាត់ ក្រុង ស្រុក/ខណ្ឌ និងមន្ទីរសង្គមកិច្ច អតីតយុទ្ធ័ជន និងយុវនីតិសម្បទា រាជធានី ខេត្ត។ក្នុងករណីអតីតយុទ្ធជន អតីតមន្ត្រីរាជការស៊ីវិល មានជំងឺមិនអាចទៅបើកប្រាក់សោធន នៅធនាគារបាន ឬទទួលមរណភាព សូមអ្នកនៅក្នុងបន្ទុក និងអ្នកដែលបានទទួលសិទ្ធិ បើកប្រាក់សោធនប្រចាំខែ មេត្តាជូនដំណឹងជាបន្ទាន់មកមូលនិធិជាតិជំនួយសង្គម តាមប្រព័ន្ធទូរស័ព្ទលេខ 015 219 888 និង 092 219 888 ឬគេហទំព័រហ្វេសប៊ុកផេក «មូលនិធិជាតិជំនួយសង្គម»៕

កម្ពុជាទទួលគម្រោងវិនិយោគថ្មី និងពង្រីកផលិតកម្ម មានទុនវិនិយោគជាង ៦,៩ ពាន់លានដុល្លារ

ក្រុមប្រឹក្សាអភិវឌ្ឍន៍កម្ពុជា នៅក្នុងឆ្នាំ២០២៤ បានអនុម័តគម្រោងវិនិយោគថ្មី បានចំនួន ៤១៤ មានទំហំទុនវិនិយោគសរុប ប្រមាណជាង ៦,៩ ពាន់លានដុល្លារអាមេរិក ក្នុងនោះចំនួន ៣៨៧ ជាគម្រោងវិនិយោគថ្មី និង ២៧ ជាគម្រោងពង្រីកផលិតកម្ម។ក្រុមប្រឹក្សាអភិវឌ្ឍន៍កម្ពុជា CDC បានបង្ហាញស្ថិតិវិនិយោគវិស័យឯកជន នៃសំណើសុំវិនិយោគរបស់ក្រុមហ៊ុន នៅក្នុងបំណាច់ ឆ្នាំ ២០២៤ នេះ ក្រុមប្រឹក្សាអភិវឌ្ឍន៍កម្ពុជា បានបំបែកកំណត់ត្រាប្រចាំឆ្នាំ តាមរយៈការអនុម័តគម្រោងវិនិយោគសរុបចំនួន ៤១៤ គម្រោង ក្នុងនោះគម្រោងវិនិយោគថ្មីចំនួន ៣៨៧ គម្រោង និងគម្រោងពង្រីកផលិតកម្មចំនួន ២៧ គម្រោង ដែលមានទុនវិនិយោគ សរុបប្រមាណ ៦,៩ ពាន់លានដុល្លារអាមេរិក និងអាចបង្កើតការងារបានប្រមាណជិត ៣២ ម៉ឺនកន្លែង។ ក្នុងចំណោមគម្រោងវិនិយោគ ទាំង ៤១៤ គម្រោង ក្នុងនោះគម្រោងវិនិយោគដែលមានទីតាំងស្ថិតនៅក្រៅតំបន់សេដ្ឋកិច្ចពិសេស មានចំនួន ២៦៤ គម្រោង និង គម្រោងវិនិយោគដែលមានទីតាំងស្ថិតនៅក្នុងតំបន់សេដ្ឋកិច្ចពិសេស មានចំនួន ១៥០ គម្រោង។ជារួម, ក្នុងឆ្នាំ២០២៤ នេះ ការអនុម័តគម្រោងវិនិយោគមានការកើនឡើងចំនួន ១៤៦ គម្រោង ខណៈទុនវិនិយោគមានការ កើនឡើងប្រមាណជិត ២ ពាន់លានដុល្លារអាមេរិក ស្មើនឹងប្រមាណជិត ៤០% ធៀបនឹងរយៈពេលដូចគ្នាក្នុងឆ្នាំ ២០២៣ ក្នុងនោះ គម្រោងពង្រីកផលិតកម្មបានកើនពី ២១ គម្រោង ឡើងមក ២៧ គម្រោង ។ ក្នុងឆ្នាំ ២០២៤ នេះ វិស័យឧស្សាហកម្ម នៅតែបន្តជា វិស័យលេចធ្លោជាងគេ ដោយបានស្រូបទាញគម្រោងវិនិយោគចំនួន៣៩៤ គម្រោង ស្មើនឹងប្រមាណ ៩៥% នៃចំនួនគម្រោងវិនិយោគ សរុប ខណៈទុនវិនិយោគក្នុងវិស័យនេះមានប្រមាណ ៤,៨ ពាន់លានដុល្លារអាមេរិក ដែលចូលរួមចំណែក ៦៩% នៃទុនវិនិយោគសរុប និងមានកំណើនដល់ទៅប្រមាណ ១១០% ធៀបនឹងឆ្នាំ២០២៣។ ទន្ទឹមនេះ, វិស័យកសិកម្ម និងកសិ-ឧស្សាហកម្ម មានចំនួន ៨ គម្រោង ដោយមានទុនវិនិយោគសរុបជាង ១២១ លានដុល្លារ អាមេរិក ស្មើនឹង ២%, វិស័យទេសចរណ៍ មានចំនួន ៤ គម្រោង មានទុនវិនិយោគសរុបប្រមាណ ៧៣៨ លានដុល្លារអាមេរិក ស្មើនឹង ១១%, វិស័យហេដ្ឋារចនាសម្ព័ន្ធ និងផ្សេងៗ មានគម្រោងវិនិយោគចំនួន ៨ គម្រោង ក្នុងទុនវិនិយោគសរុបប្រមាណជាង ១,៣ ពាន់លានដុល្លារអាមេរិក ស្មើនឹងប្រមាណ ១៨% នៃទុនវិនិយោគសរុប។ជាក់ស្តែងគម្រោងវិនិយោគដែលមានភាពលេចធ្លោជាងគេប្រចាំឆ្នាំរួមមាន៖ គម្រោងនៅក្រៅតំបន់សេដ្ឋកិច្ចពិសេស, មាន គម្រោងវិនិយោគបង្កើតកសិដ្ឋានបង្កាត់ពូជ និងចិញ្ចឹមសត្វចតុប្បាទ, រោងចក្រកែច្នៃផលិតចំណីសត្វ និងមន្ទីរពិសោធន៍ ។ ចំណែក ឧស្សាហកម្មមាន គម្រោងផលិតកម្មនៃឧស្សាហកម្មរ៉ែមាស, គម្រោងរោងចក្រផលិតភេសជ្ជៈប៉ូវកំលាំង, រោងចក្រអំពូលដើមណូអែល, ពូកខ្យល់ និងគ្រឿងសង្ហារឹមជាដើម។ ចំណែទេសចរណ៍មាន៖ អាជីវកម្មសណ្ឋាគារ និងមជ្ឈមណ្ឌលពាណិជ្ជកម្ម, និងគម្រោង សណ្ឋាគារផ្សេងៗទៀត។ ចំណែកហេដ្ឋារចនាសម្ព័ន្ធនិងផ្សេងៗមាន៖ គម្រោងផលិតសេវាទូរគមនាគមន៍មូលដ្ឋាន, គម្រោងសាងសង់ វារីអគ្គិសនី, គម្រោងសាងសង់កំពង់ផែ និងមជ្ឈមណ្ឌលភស្តុភារកម្ម និងគម្រោងអគ្គិសនីដើរដោយពន្លឺព្រះអាទិត្យជាដើម។ចំណែកនៅក្នុងតំបន់សេដ្ឋកិច្ចពិសេសមាន៖ គម្រោងរោងចក្រសំបកកង់រថយន្ត, គម្រោងរោងចក្រផលិតភេសជ្ជៈគ្រប់ ប្រភេទ, រោងចក្រដំឡើងគ្រឿងបង្គុំម៉ាស៊ីន និងមេខនិច, រោងចក្រផលិតទឹកដោះគោ និងភេសជ្ជៈគ្រប់ប្រភេទ, និងគម្រោងរោងចក្រ បន្ទះហ្រ្វាំងគ្រប់ប្រភេទជាដើម៕ អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

មេបញ្ជាការយោធាជាន់ខ្ពស់ជួបជាមួយមេដឹកនាំកំពូលអ៊ីរ៉ង់ ដោយសង្ខេបអំពីការត្រៀមលក្ខណៈផ្នែកយោធា

ប្រធានគ្រប់គ្រងវិបត្តិសហភាពអឺរ៉ុប ជំរុញការធានាដំណើរការជំនួយមនុស្សធម៌នៅក្នុងប្រទេសលីបង់

ក្រុមអ្នកតវ៉ា ទាមទារឲ្យមានការបោះឆ្នោតនៅក្នុងប្រទេសស៊ែប៊ី

គ្រូពេទ្យស្ថិតក្នុងចំណោមមនុស្សច្រើននាក់ត្រូវបានសម្លាប់ក្នុងការវាយប្រហាររបស់អ៊ីស្រាអែលនៅលីបង់

ប្រទេសចិន ប្រកាសពីដំណើរទស្សនកិច្ចរបស់លោក Trump ចាប់ពីថ្ងៃទី១៣ ដល់ ១៥ឧសភា សប្ដាហ៍នេះ

ប្រេងឡើងថ្លៃ ខណៈសហរដ្ឋអាមេរិក និងអ៊ីរ៉ង់ មិនយល់ស្របលើសំណើសន្តិភាពចុងក្រោយ

MPL រកឃើញក្រុមឡើង Play-Off ខណៈ Flash KH ប្ដេជ្ញាពង្រឹងចំណុចខ្វះខាត ដើម្បីប្រជែងកៅអីផ្ដាច់ព្រ័ត្រ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877