នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
គ្រូផ្អែកលើកិច្ចព្រមព្រៀងការងារ បានរួមចំណែកជួយលើបញ្ហាខ្វះគ្រូបង្រៀនតាមសាលារយៈ​ពេល​ជិត​មួយឆ្នាំហើយ
លោកជំទាវបណ្ឌិត ពេជ ចន្ទមុន្នី ដាស់តឿនគ្រូពេទ្យតម្កល់ស្មារតីរក្សាក្រមសីលធម៌វិជ្ជាជីវៈ មាន​មេត្តា​ចំពោះ​អ្នកជំងឺ
មន្ត្រី ក.ប.ប វិភាគឃើញសាច់បង្កក ៤៨គំរូ ដែលសមត្ថកិច្ចចម្រុះពិនិត្យ​ប៉ុន្មានថ្ងៃមុន មាន​កត្តា​ហានិភ័យ​ប៉ះពាល់​សុខភាព
អ្នកនាំពាក្យក្រសួងព័ត៌មាន៖ ការពង្រឹងសុវត្ថិភាពឌីជីថល គឺជាកត្តាចម្បងក្នុងការប្រយុទ្ធប្រឆាំងព័ត៌មានក្លែងក្លាយ

ព័ត៌មានជាតិ

សម្ដេចធិបតី ហ៊ុន ម៉ាណែត៖កម្ពុជាប្រកាន់ភ្ជាប់នូវគោលនយោបាយការបរទេសឯករាជ្យ អនុលោមតាមច្បាប់អន្តរជាតិ

2024/11/18 06:14:31 pm        98
Facebook Telegram Linkin
សៀមរាប ៖នាឱកាសអញ្ជើញថ្លែងសុន្ទរកថាគន្លឹះ ក្នុងកិច្ចប្រជុំគណៈកម្មាធិការប្រតិបត្តិនៃអង្គការអ្នកប្រជាធិបតេយ្យនិយមកណ្តាលអន្តរជាតិ (CDI) នៅរសៀលថ្ងៃទី១៨ ខែវិច្ឆិកា ឆ្នាំ២០២៤ នៅខេត្តសៀមរាបនេះដែរ សម្តេចមហាបវរធិបតី ហ៊ុន ម៉ាណែត អនុប្រធានគណបក្សប្រជាជនកម្ពុជា និងជានាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍បញ្ជាក់ថា គណបក្សប្រជាជនកម្ពុជា ដែលកំពុងដឹកនាំប្រទេសកម្ពុជា បានប្រកាន់ភ្ជាប់នូវគោលនយោបាយការបរទេសឯករាជ្យ អនុលោមតាមច្បាប់អន្តរជាតិ។ ​សម្ដេចធិបតី មានប្រសាសន៍ថា សព្វថ្ងៃនេះ ពិភពលោក បានប្រឈមនឹងបញ្ហាដែលពុំធ្លាប់មានពីមុនមក ជាមួយនឹងការកើនឡើងនូវភាពតានតឹងផ្នែកភូមិសាស្រ្ដនយោបាយដល់ចំណុចខ្ពស់មិនធ្លាប់មាន ក្នុងប៉ុន្មានទសវត្សរ៍ចុងក្រោយនេះ។ ការអូសបន្លាយនៃការរីកសាយភាយនៃសង្គ្រាមតាមតំបន់នានា និងការចូលរួមជាមួយសង្គ្រាមដែលជាតួអង្គមិនមានជាភាគីនៃជម្លោះ បានធ្វើឱ្យពិភពលោកបាត់ក្ដីសង្ឃឹមក្នុងការឈានទៅរកកិច្ចព្រមព្រៀងបទឈប់បាញ់នាពេលដ៏ខ្លីខាងមុខនេះ និងបានបង្កើតនូវភាពភ័យខ្លាចទៅដល់សកលលោក។ សម្ដេចធិបតីបន្តថា ការបែងចែកប៉ូលសេដ្ឋកិច្ច ការប្រែប្រួលអាកាសធាតុ និងគ្រោះធម្មជាតិ កំពុងតែគំរាមកំហែងដល់អាយុជីវិតនៅទូទាំងពិភពលោកក្នុងកម្រិតមួយដ៏ពិបាកប៉ាន់ស្មានដល់ ខណៈបញ្ហាប្រឈមទាំងនេះបានបង្កើតឱ្យមានវិបត្តិមនុស្សធម៌ និងជនភាសខ្លួនរាំងស្ទះដល់ការងើបឡើងវិញនៃសេដ្ឋកិច្ចសាកលលោក។ សម្ដេចធិបតី ហ៊ុន ម៉ាណែត បញ្ជាក់ថា កម្ពុជាក្នុងនាមជាប្រទេសតូចមួយ ប៉ុន្ដែបានប្រកាន់ភ្ជាប់នូវគោលនយោបាយការបរទេសឯករាជ្យ ដោយអនុលោមតាមច្បាប់អន្តរជាតិ នៅក្នុងនោះទាមទារឱ្យប្រទេសទាំងអស់ពង្រឹងនូវភាពធន់របស់ខ្លួន រក្សាបាននូវសន្ដិសុខ នយោបាយ សេដ្ឋកិច្ច និងវប្បធម៌របស់ខ្លួន។ ក្នុងឱកាសនោះសម្ដេចធិបតី បញ្ជាក់ថា ប្រទេសកម្ពុជា បានត្រៀមខ្លួនរួចជាស្រេចដើម្បីរួមចំណែករក្សានូវសន្ដិភាព នៅក្នុងតំបន់ ខណៈកម្ពុជាបានឆ្លងកាត់សង្គ្រាមស៊ីវិលជាច្រើនទសវត្សរ៍ ប៉ុន្ដែពេលនេះកម្ពុជាបានគ្រប់គ្រង និងស្ដារសន្ដិភាពឡើងវិញ ក្នុងរយៈពេលជាងពីរទសវត្សរ៍ចុងក្រោយនេះទទួលបានវិបុលភាពមកដល់បច្ចុប្បន្នតាមរយៈ៕

សម្ដេចធិបតីគោរពដឹងគុណសម្ដេចតេជោ ហ៊ុន សែន ចំពោះការដឹកនាំប្រកបដោយចក្ខុវិស័យ និងកសាងសន្ដិភាព

2024/11/18 06:02:56 pm        246
Facebook Telegram Linkin
សៀមរាប ៖នាឱកាសអញ្ជើញថ្លែងសុន្ទរកថាគន្លឹះ ក្នុងកិច្ចប្រជុំគណៈកម្មាធិការប្រតិបត្តិនៃអង្គការអ្នកប្រជាធិបតេយ្យនិយមកណ្តាលអន្តរជាតិ (CDI) នៅរសៀលថ្ងៃទី១៨ ខែវិច្ឆិកា ឆ្នាំ២០២៤ នៅខេត្តសៀមរាប សម្តេចមហាបវរធិបតី ហ៊ុន ម៉ាណែត អនុប្រធានគណបក្សប្រជាជនកម្ពុជា និងជានាយករដ្ឋមន្ត្រីនៃព្រះរាជាណាចក្រកម្ពុជា បានសម្ដែងនូវការគោរពដឹងគុណសម្ដេចតេជោ ហ៊ុន សែន ប្រធានគណបក្សប្រជាជនកម្ពុជា ចំពោះដឹកនាំប្រកបដោយចក្ខុវិស័យ កសាងសន្ដិភាព និងការអភិវឌ្ឍប្រទេសកម្ពុជា។ ​សម្ដេចធិបតី បានសម្ដែងនូវការគោរពដឹងគុណយ៉ាងជ្រាលជ្រៅបំផុត ចំពោះសម្ដេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងជាប្រធានព្រឹទ្ធសភានៃព្រះរាជាណចក្រកម្ពុជា ចំពោះការដឹកនាំប្រកបដោយចក្ខុវិស័យរបស់សម្ដេចក្នុងការកកសាងសន្ដិភាព ការផ្សះផ្សាជាតិ និងការអភិវឌ្ឍប្រទេសកម្ពុជា។ក្នុងនាមប្រជាជនកម្ពុជា សម្ដេចធិបតី បានសម្ដែងនូវការកត្តញ្ញូត្តាធម៌ចំពោះការប្ដេជ្ញាចិត្តពេញមួយជីវិតរបស់សម្ដេចតេជោ ដើម្បីស្វែងរកសន្ដិភាព ការផ្សះផ្សាជាតិ និងការកសាងប្រទេសកម្ពុជាឡើងវិញពីជម្លោះសង្គ្រាមស៊ីវិល ដោយបានបង្កើតមូលដ្ឋានគ្រឹះរឹងមាំសម្រាប់ការអភិវឌ្ឍជាតិ និងការធ្វើទំនើបកម្មរបស់ប្រទេសកម្ពុជា។សូមបញ្ជាក់ថា នៅក្នុងកិច្ចប្រជុំគណៈកម្មាធិការប្រតិបត្តិ IDC-CDI បានបង្ហាញនូវការដឹកគុណចំពោះសម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា ចំពោះភាពជាអ្នកដឹកនាំដែលមានចក្ខុវិស័យរបស់សម្ដេចក្នុងការធានាសន្តិភាពពេញលេញសម្រាប់កម្ពុជាក្នុងរយៈកាល ៥ សតវត្សកន្លងមកនេះ។ ការកសាងសន្តិភាព ការផ្សះផ្សា និងការអភិវឌ្ឍជាតិ គឺជាកេរ្តិ៍ដំណែលដ៏អស្ចារ្យបំផុតរបស់ សម្ដេចតេជោ ដែលបានបន្សល់ទុកសម្រាប់កម្ពុជា៕

សម្ដេចធិបតីអញ្ជើញជួបជាមួយគណៈប្រតិភូថ្នាក់ដឹកនាំជាន់ខ្ពស់ CDI-IDC និងចុះហត្ថលេខាលើឯកសារចំនួនពីរ

2024/11/18 05:56:00 pm        141
Facebook Telegram Linkin
ភ្នំពេញ ៖ ក្នុងឱកាស អញ្ជើញជាអធិបតីភាពដ៏ខ្ពង់ខ្ពស់ក្នុងកិច្ចប្រជុំគណៈកម្មាធិការប្រតិបត្តិអង្គការអ្នកប្រជាធិបតេយ្យនិយមកណ្ដាលអន្តរជាតិ (IDC-CDI) នៅរសៀលថ្ងៃទី១៨ ខែវិច្ឆិកា ឆ្នាំ២០២៤នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញជួបជាមួយគណៈប្រតិភូថ្នាក់ដឹកនាំជាន់ខ្ពស់ CDI-IDC ដែលដឹកនាំដោយ ឯកឧត្តម Andrés Pastrana ប្រធាន CDI-IDC។​បន្ទាប់ពីជួបជាមួយគណៈប្រតិភូថ្នាក់ដឹកនាំជាន់ខ្ពស់ CDI-IDC នៅរសៀលថ្ងៃទី១៨ ខែវិច្ឆិកា ឆ្នាំ២០២៤ សម្តេចមហាបវរធិបតី នាយករដ្ឋមន្ត្រី បានអញ្ជើញជាអធិបតីភាព ពិធីចុះហត្ថលេខា លើឯកសារចំនួនពីរ៖១) ពិធីចុះហត្ថលេខាគាំទ្រ (Co-Sponsor) ធម្មនុញ្ញសន្តិភាពសកល ដោយ ប្រតិភូរដ្ឋសភាហុងគ្រី ។ ២) ពិធីចុះហត្ថលេខាលើអនុស្សរណៈយោគយល់គ្នារវាងសភាអន្តរជាតិដើម្បីសន្តិភាព និងភាពអត់ឱន (IPTP) និងរដ្ឋសភាហុងគ្រី។សូមជម្រាបថា នៅថ្ងៃទី១៨ ខែវិច្ឆិកានេះ គណបក្សប្រជាជនកម្ពុជាបានធ្វើជាម្ចាស់ផ្ទះរៀបចំកិច្ចប្រជុំគណៈកម្មាធិការប្រតិបត្តិនៃអង្គការអ្នកប្រជាធិបតេយ្យនិយមកណ្តាលអន្តរជាតិ (Centrist Democrat International) នៅលើទឹកដី ខេត្តសៀមរាប ដោយមានការចូលរួមពីសមាជិកប្រតិភូ ប្រមាណ ៨៧ រូប មកពី ២៦ គណបក្ស និង ២៤ ប្រទេស ជុំវិញពិភពលោក ក្នុងនោះមានឥស្សរជននយោបាយជាន់ខ្ពស់ជាច្រើន។ កិច្ចប្រជុំគណៈកម្មាធិការប្រតិបត្តិ CDI ទទួលកិត្តិយសដោយមានវត្តមានដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត អនុប្រធានគណបក្សប្រជាជនកម្ពុជា និងជានាយករដ្ឋមន្ត្រី ដើម្បីចូលរួមថ្លែងសុន្ទរកថាគន្លឹះ ក៏ដូចជាការចូលរួមថ្លែងសុន្ទរកថា ដោយថ្នាក់ដឹកនាំគណបក្ស រដ្ឋាភិបាល និងថ្នាក់ដឹកនាំកំពូលរបស់ CDI ផងដែរ។ តាមរយៈកិច្ចប្រជុំនេះ គណៈកម្មាធិការប្រតិបត្តិ CDI នឹងអនុម័តលើសេចក្តីប្រកាសក្រុងសៀមរាប រួមទាំងសេចក្តី សម្រេចចិត្តនានាដែលស្នើដោយគណបក្សជាសមាជិក និងអនុម័តលើការបញ្ចូលសមាជិកជាគណបក្សនយោបាយចំនួន៤ផងដែរ។ សូមបញ្ជាក់ថា បច្ចុប្បន្ន អង្គការ CDI មានសមាជិកជាង ១០៩ គណបក្ស មកពី ៨៣ ប្រទេស ដែលមានមនោគមវិជ្ជានយោបាយនិយមកណ្តាល មកពីទ្វីបអឺរ៉ុប អាមេរិកឡាទីន អាមេរិកខាងជើង អាហ្វ្រិក និងអាស៊ីប៉ាស៊ីហ្វិក។ គណបក្សប្រជាជនកម្ពុជាបានចូលជា សមាជិកពេញសិទ្ធិរបស់ CDI កាលពីខែមេសា ឆ្នាំ២០១៦ ហើយត្រូវបានបោះឆ្នោតជាអនុប្រធាន អង្គការ CDI ទទួលបន្ទុកតំបន់អាស៊ីប៉ាស៊ីហ្វិក ចាប់ពីខែកក្កដា ឆ្នាំ២០១៨ ចំនួន ៣ អាណត្តិមកហើយ៕

អ្នកវិភាគ និងអ្នកឃ្លាំមើលសង្គម៖ ចលនារបស់ក្រុមប្រឆាំងគឺជាចលនាបំផ្លាញសន្តិភាព និងការអភិវឌ្ឍដែលពលរដ្ឋមិនគួរអើពើ

2024/11/18 05:02:01 pm        611
Facebook Telegram Linkin
អ្នកវិភាគ និងអ្នកឃ្លាំមើលការអភិវឌ្ឍន៍សង្គម បានអំពាវនាវដល់យុវជន និង​ប្រជាពលរដ្ឋ​ខ្មែរ​ទាំង​អស់​កុំចូលរួមពាក់ព័ន្ធក្នុងចលនាណាមួយដែលបង្កើតឡើងដោយមេដឹកនាំក្រុមឧទ្ទាមក្រៅច្បាប់ សម រង្សី ដោយសារសកម្មភាពរបស់ពួកគេជាចលនាបំផ្លាញសន្ដិភាព និង​ការ​អភិវឌ្ឍ​ដែល​ពលរដ្ឋ​មិន​គួរ​អើពើ​​។លោកបណ្ឌិត យង់ ពៅ អ្នកវិភាគបញ្ហានយោបាយនៃរាជបណ្ឌិត្យសភាកម្ពុជាបានលើកឡើងថា យុវជន និងពលរដ្ឋគ្រប់រូប គួរតែចូលរួមក្នុងចលនានយោបាយដ៏ត្រឹមត្រូវដែលស្ថិតនៅក្រោមច្បាប់ ព្រោះ​ច្បាប់​ក្នុងរដ្ឋធម្មនុញ្ញកម្ពុជាមិនបានហាមពលរដ្ឋឱ្យចូលរួមក្នុង​នយោបាយនោះទេ ហើយ​មិន​ត្រូវ​​​ធ្វើនយោបាយក្នុងប្រទេសប្រជាធិបតេយ្យតាមបែបអនាធិបតេយ្យនោះដែរ។ លោក​បណ្ឌិតបន្តថា ប្រសិនបើប្រជាពលរដ្ឋ​ចង់ចូលរួមសកម្មភាពនយោបាយ ហើយចង់​ចូល​រួម​ជួយ​​ដល់​​ប្រទេសជាតិពិតប្រាកដមែន គឺមិន​ចាំ​បាច់​ពាក់​ព័ន្ធ​នឹង​ចល​នា​ណាមួ​យ​ផ្សេង​នៅ​ក្រៅ​ពី​សកម្ម​ភាព​នយោបាយនៅក្នុងស្រុកនោះទេ ដើម្បីការចៀសវាង​ការ​ប្រព្រឹត្តិ​ខុស​ច្បាប់​ដែល​នាំ​ឱ្យ​សង្គម​ជាតិ​បែកបាក់។អ្នកវិភាគបញ្ជាក់ថា «យើងត្រូវរស់នៅក្នុង​សកម្មភាព​នយោបាយ​ណា​ដែល​ស្រប​ទៅ​តាម​ច្បាប់​ធម្មនុញ្ញ​របស់​យើង និងច្បាប់ផ្សេងៗទៀត ដើម្បីស្ថាបនា អភិវឌ្ឍន៍ប្រទេសជាតិយើងទាំងអស់គ្នា ហើយរិះគន់បែបជួយស្ថាបនា ព្រោះយើងជាប្រទេសប្រជាធិបតេយ្យ ត្រូវការ​ពហុ​គំនិត​ដែល​មាន​បន្ទាត់​ក្រហម​នៃច្បាប់ ដើម្បីកុំឱ្យប្រទេសយើងដើរយឺតជាងគេ»។លោកបណ្ឌិតបន្ថែមថា «យើងជួយគ្នាក្នុងការជំរុញវិស័យសេដ្ឋកិច្ច និងការអប់រំនានាឱ្យបាន​រឹង​មាំ​ថែម​ទៀត ហើយរៀងរាល់ប្រាំឆ្នាំម្ដង យើងត្រូវបោះឆ្នោត ក្រោយបោះឆ្នោត យើងត្រូវគោរព​ស្មារតី​នៃ​ប្រជា​ពលរដ្ឋយើងដែលជាម្ចាស់ឆ្នោត បើបោះឆ្នោតឱ្យនរណាជាអ្នកដឹកនាំប្រទេស យើង​គោរព​ទៅ​តាម​ហ្នឹងទៅ»។ចំណែកលោក សំ សឿន អ្នកឃ្លាំមើលការអភិវឌ្ឍសង្គមបានថ្លែងថា ការបង្កើតចលនា​ដ៏ឆ្គួត​លី​លា​នេះ​ គឺគ្រាន់តែជាការបង្កើតព្រឹត្តិការណ៍នយោបាយថ្មីមួយទៀត ដើម្បី​តែ​ការ​ប្រមែ​ប្រមូល​រក​ថវិកា​ពី​អ្នក​គាំទ្រណា​ដែលបន្តការចាញ់បោកនយោបាយរបស់ សម រង្ស៊ីប៉ុណ្ណោះ ខណៈរបៀបវារៈ​ចាស់​ៗ​​ពី​មុនក្រោមលេសសិទ្ធិមនុស្ស និងប្រជាធិបតេយ្យ និង​ស្នេហា​ទឹក​ដី​ហាក់​ដូច​ជាលែង​មាន​ប្រសិទ្ធ​ភាព​បោកប្រាស់គេទៀតហើយ។លោកបន្តថា ចលនា​ដែលបង្កើតឡើងដោយទណ្ឌិត សម រង្ស៊ី មានគោលដៅបំផុសប្រជាពលរដ្ឋ និងកម្លាំងប្រដាប់អាវុធឱ្យងើបបះបោរប្រឆាំងរាជរដ្ឋាភិបាលស្របច្បាប់ និងញុះញង់​ឱ្យ​កង​ទ័ព​មិន​ស្តាប់​បញ្ជា គឺសុទ្ធតែជាបទល្មើសព្រហ្មទណ្ឌទាំងអស់។ អ្នកឃ្លាំមើលថា គោលបំណងរបស់ពួកគេ គឺការបង្កចលាចលសង្គម បង្កើតជាអំពើហិង្សា​បង្ហូរ​ឈាម និងបំផ្លាញសន្តិភាព ស្ថេរ​ភាពនយោបាយនៅក្នុងប្រទេស ដើម្បីផ្តួលរំលំ​រដ្ឋ​អំណាច​​ស្រប​ច្បាប់ ដែលបង្កើតឡើងតាមលិទ្ធិប្រជាធិប្បតេយ្យ និងគោលការណ៍ច្បាប់រដ្ឋធម្មនុញ្ញ។លោក សំ សឿន បញ្ចាក់ថា៖«តាមពិតទៅ វាជារឿងគួរឱ្យហួសចិត្តណាស់នៅពេលដែលទណ្ឌិត សម រង្ស៊ី មេខ្លោងក្រុមជ្រុលនិយម បែរជាដាក់ចេញទិសដៅចង់បង្កសង្គ្រាមនៅក្នុងប្រទេសកម្ពុជា ក្នុងពេលដែលប្រជាពលរដ្ឋខ្មែរ ក៏ដូចជាពលរដ្ឋលើសកលលោកបានថ្កោលទោស និង​ស្អប់​ខ្ពើម​សង្គ្រាម​»។លោកបន្ថែមថា «ខ្ញុំសូមអំពាវនាវដល់ពលរដ្ឋគួរតែរក្សាភាពស្ងប់ស្ងាត់ ប្រកាន់គោលជំហរឱ្យ​រឹង​មាំង​ ចៀសវាងពីចលនាមិនស្របច្បាប់ណាមួយ ដែលផ្ទុយពីច្បាប់ និងរដ្ឋធម្មនុញ្ញកម្ពុជាយើង។ ​ការ​សម្តែងមតិ ឆន្ទៈណាមួយ គឺជាសិទ្ធិសេរីភាពយ៉ាងពេញលេញរបស់ប្រជាពលរដ្ឋ តែយើង​គប្បី​ចៀង​វាង​ការប្រើប្រាស់ឱ្យជ្រុលហួសខុសច្បាប់​ ដែលនាំឱ្យសង្គមជាតិអសន្តិសុខ និងការបែក​បាក់​សាមគ្គី​ជាតិ​របស់ខ្មែរយើង»។គួររំឭកផងដែរថា ក្រុមជ្រុលនិយមដែលដឹកនាំដោយទណ្ឌិត សម រង្ស៊ី និងបក្ខគ្នីគ្នា​បាន​បង្កើត​ចលនា​អសន្ដិសុខជាច្រើន បូករួមទាំងការបំផុសបំផុលផែន​ការ​មាតុភូមិនិវត្តន៍​កាលពីថ្ងៃទី៩​វិច្ឆិកា​ឆ្នាំ​២០១៩។ ទោះបីជាយ៉ាងណា ផែនការទាំងអស់ដែលរៀបចំដោយមេឧទ្ទាមក្រៅច្បាប់សម រង្ស៊ី មិ​ន​ដែលទទួលបានជោគជ័យនោះទេ ហើយថែមទាំងនាំទុក្ខទោសដល់ប្រជាពលរដ្ឋ និង​អ្នក​គាំ​ទ្រ​មួយ​ក្ដាប់​តូចទៀត៕ 

ឯកឧត្តមឧត្តមសេនីយ៍ឯក ហ៊ុន ម៉ានិត ថ្លែងថា ការហ្វឹកហ្វឺនគឺជាការងារមិនអាចខ្វះបាន ក្នុងកិច្ចការការពារជាតិ និងសន្តិសុខ

2024/11/18 04:52:17 pm        500
Facebook Telegram Linkin
កំពង់ស្ពឺ៖ ក្នុងពិធីបិទវគ្គហ្វឹកហ្វឺនបណ្តុះបណ្តាលជំនាញអង្គរក្សពិសេសជំនាន់ទី៣០ បើកវគ្គបន្តជំនាន់ទី៣១ និងសម្ពោធអគារទី ចាត់ការសាលាកម្ពស់ពីរជាន់ ព្រមទាំងសម្ពោធសមិទ្ធផលនានា នៅមជ្ឈមណ្ឌលហ្វឹកហ្វឺនបញ្ជាការដ្ឋានអង្គរក្ស ស្ថិត នៅភូមិសាស្ត្រភ្នំស្រង់ ស្រុកគងពិសី ខេត្តកំពង់ស្ពឺ នាថ្ងៃទី១៨ ខែវិច្ឆិកា ឆ្នាំ២០២៤ ឯកឧត្តម ឧត្តមសេនីយ៍ឯក ហ៊ុន ម៉ានិត អគ្គនាយកនៃអគ្គ នាយកដ្ឋាន​ស្រាវជ្រាវ​ចារកិច្ច​ក្រសួងការ​ពារជាតិ និងជាមេបញ្ជាការរង កងទ័ពជើងគោក បានថ្លែងថា ការហ្វឹកហ្វឺនគឺជាការងារមិនអាចខ្វះបាន ក្នុងកិច្ចការការពារជាតិ និងសន្តិសុខ។ក្នុងនាមសម្តេចធិបតី ហ៊ុន ម៉ាណែត នាយករដ្ឋមន្ត្រី ឯកឧត្តមឧត្តមសេនីយ៍ឯក ហ៊ុន ម៉ានិត បានកោតសរសើរ និងវាយ តម្លៃខ្ពស់ចំពោះការរីកចំរើនរបស់កង យោធពលខេមរភូមិន្ទ ជាពិសេសនាយទាហាន នាយទាហានរង ពលទាហាន និងសិក្ខាកាមបញ្ជាការដ្ឋានអង្គរក្ស ដែលមានស្មារតីជឿជាក់ដ៏ជ្រាលជ្រៅលើថ្នាក់ដឹកនាំនិងយកអស់កម្លាំងកាយ-ចិត្ត ដើម្បីក្រេបជញ្ជក់​នូវរាល់ចំណេះជំនាញឆ្លើយតបនូវកាតព្វកិច្ចចាំបាច់សំដៅលើការការពារសន្តិសុខសុវត្តិភាពជូនសម្តេចតេជោ ប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សម្តេចធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវបណ្ឌិត ព្រមទាំងក្រុមគ្រួសារនិងការពារអធិបតេយ្យភាពជាតិ បូរណភាពទឹកដី ស្ថិរភាពសន្តិសុខសង្គមជាតិ ក៏ដូចជាការអភិវឌ្ឍអង្គភាព និងការបណ្តុះបណ្តាលធនធានមនុស្ស។ឯកឧត្តម បានបញ្ជាក់ថា កងអង្គរក្សបានក្លាយជាកម្លាំងស្នូល ក្នុងការការពារសុវត្ថិភាពសន្តិសុខថ្នាក់​ដឹកនាំប្រមុខរាជរដ្ឋាភិបាល និងលើការការពារជាតិបូរណភាព ទឹកដីនៃព្រះរាជាណាចក្រកម្ពុជា ។ ឯកឧត្តមបន្តថា ការរៀនសូត្រ វិវត្តខ្លួនគ្មានទីបញ្ចប់ គឺត្រូវរៀនសូត្រអភិវឌ្ឍន៍ខ្លួនជាប់ជា ប្រចាំអស់​មួយជីវិត នៅលើចំណេះដឹង និងចំណេះធ្វើ ដើម្បីពង្រឹងសមត្ថភាពជំនាញក្នុងការបំពេញ​តួនាទីភារកិច្ច​របស់ខ្លួនឲ្យទទួល​បានជោគជ័យ ។ក្នុងខណៈនោះដែរ ឯកឧត្តម ហ៊ុន ម៉ានិត ក៏បានថ្លែងអរគុណចំពោះលោកឪពុកអ្នកម្តាយ និង​ក្រុមគ្រួសារបង ប្អូនប្រជាពលរដ្ឋ ដែលបានលះបង់ខ្ពស់ចំពោះកូនចៅ ប្តីប្រពន្ធជាទីស្រលាញ់​ឲ្យចូលមក​បម្រើការងារក្នុងជួរ ខ.ភ.ម ពិសេសមកបម្រើនៅក្នុងបញ្ជាការដ្ឋានអង្គរក្ស។ ឯកឧត្តម ហ៊ុន ម៉ានិត បានបញ្ជាក់ថា ទិសដៅអនុវត្តបន្តទៅមុខទៀត យើងត្រូវរួមគ្នាបំពេញបន្ថែម រក្សាការ​សាមគ្គីគ្នា ឯកភាព ជាតិផ្ទៃក្នុង រក្សាសុវត្ថិភាពដឹកនាំ។ កងទ័ពកម្ពុជា ត្រូវមានភាព​ស្មោះត្រង់ និងបានផ្តាំផ្ញើអនវត្តនូវអនុសាសន៍របស់សម្តេចតេជោ និងអនុសាសន៍របស់​សម្តេចធិបតី ពិសេសការប្រយុទ្ធប្រឆាំងបញ្ហាគ្រឿងញៀន ​ដើម្បីសុខភាពខ្លួន ក្រុមគ្រួសារ និងសង្គមជាតិ ហើយត្រូវយកចិត្តទុកដាក់លើការលាក់ការណ៏សំងាត់កងទ័ព ថែរក្សា​យោធបរិក្ខារ​គ្រឿងបំពាក់ ហ្វឹកហ្វឺនត្រៀមលក្ខណៈនូវសម្ភារៈឧបករណ៍ ដើម្បីដោះស្រាយនូវគ្រប់ឧបទ្ទវហេតុ និងជួយសង្គ្រោះប្រជាពលរដ្ឋជួបគ្រោះមហន្តរាយផ្សេងៗ។ ក្នុងឱកាសនោះដែរឧត្តមសេនីយ៍ឯក ហ៊ុន ម៉ានិត បានពាំនាំអំណោយដ៏ថ្លៃថ្លា របស់សម្តេចធិបតីនាយករដ្ឋមន្ត្រី ​និងលោកជំទាវបណ្ឌិត ឧបត្ថម្ភដល់បញ្ជាការដ្ឋានអង្គរក្សមានអង្ករ ចំនួន ១០តោន, ត្រីខ ចំនួន ៣តោន និង ថវិកាចំនួន ១៥០លានរៀល ។ឧត្តមសេនីយ៍ឯក ណុប រ័ត្ននិមល មេបញ្ជាការរងបញ្ជា ការដ្ឋានអង្គរក្ស បានឲ្យដឹងថា មជ្ឈមណ្ឌល​ហ្វឹកហ្វឺនបញ្ជា ការដ្ឋានអង្គរក្ស បានទទួលហ្វឹកហ្វឺនក្នុងពេលតែមួយ រួម មាន វគ្គជំនាញអង្គរក្ស​ពិសេស និងយុទ្ធវិធីថ្មើរជើងជំនាន់ទី៣០ - វគ្គបណ្តុះបណ្តាលនាយ​ទាហានបឋមជំនាន់ទី៥ ឆ្នាំទី១, វគ្គបំប៉នបញ្ជាការសេនាធិការ និងអប់រំចិត្តសាស្ត្រ ជំនាន់ទី១០។ដោយឡែកវគ្គហ្វឹកហ្វឺនបណ្តុះបណ្តាលជំនា ញអង្គរក្សពិសេសជំនាន់ទី៣០ មានសិក្ខាកាមរួម ចំនួន ៥០៨នាក់ ។ យោធាចារ្យ ចំនួន ៣៤នាក់ និងគណៈគ្រប់ គ្រងចំនួន៣៥ នាក់។ រយៈពេលហ្វឹកហ្វឺនរួមចំនួន ៦ ខែដោយផ្តោតទៅលើខ្លឹមសាររមវៀនធំៗចំនួន៩ ក្នុងនោះលំហាត់​របៀប,កាយសិក្សានិង កីឡា,អប់រំចិត្តសាស្ត្រ ,ភស្តុភារហិរញ្ញវត្ថុ ,ច្បាប់ទូទៅនិងសិទ្ធមនុស្ស, សព្វាវុធនិងការបាញ់,សុខាភិបាល, យុទ្ធវិធីរថ្មើរជើងនិងជំនាញ​អង្គរក្ស។ ជាលទ្ធផលទទួល​បាន​និទ្ទេសល្អចំនួន ១៥៩នាក់ -ល្អបង្គួរ ចំនួន ២៧១ នាក់ និងនិទ្ទេសមធ្យម ចំនួន ៧៨នាក់ ។ឧត្តមសេនីយ៍ឯក ណុប រ័ត្ននិមលបានបញ្ជាក់ថា នាយឧត្តមសេនីយ៍ កិត្តិសង្គហបណ្ឌិត ហ៊ីង ប៊ុនហៀង និងនាយឧត្តម សេនីយ៍ ហ៊ុយ ពិសិដ្ឋ បានដឹកនាំកសាងមជ្ឈមណ្ឌលហ្វឹកហ្វឺន(ភ្នំស្រង់)គិតមក ដល់បច្ចុប្បន្នមានអគារសរុបចំនួន ៦១ខ្នង បណ្ណាល័យចំនួន ១ ស្ថានីយ៍ប្រេងឥន្ធនៈ ១ ស្ថានីយ៍ ឧបសគ្គទីខ្ពស់ ១កន្លែង សំណង់ខ្ពស់សម្រាប់ហ្វឹកហាត់បាញ់អាវុធរយៈចម្ងាយឆ្ងាយ១កន្លែងឧបសគ្គសម្រាប់ពង្រឹងកាយសម្បទា ២៥ ឧបសគ្គ អណ្តូងទឹក ស៊ីទែនទឹក២១កន្លែង អគារមន្ទីរពេទ្យ ផ្លូវចាក់កៅស៊ូ ចំនួន៧ខ្សែ និងអគារទីចាត់ ការសាលាថ្មី ចំនួន ១ ខ្នង កម្ពស់ពីរជាន់ មានបណ្ដោយ ៦០ម និងទទឹង ២៦ម និងអគារស្លាបសងខាង ដែលទើបកាត់ខ្សែប្តូរដាក់ឱ្យប្រើ ប្រាស់នាឱកាសនេះ ដែលជាអំណោយដ៏ថ្លៃថ្លារបស់សម្តេចតេជោ និងសម្តេចកិត្តិព្រឹទ្ធបណ្ឌិត សម្តេចធិបតី ហ៊ុន ម៉ាណែត នាយករដ្ឋមន្ត្រីនិងលោកជំទាវបណ្ឌិតដោយចំណាយអស់ទឹកប្រាក់ប្រមាណជាង ២លានដុល្លាអាមេរិក៕ អត្ថបទ.ភារម្យ

សម្តេចធិបតីអញ្ជើញថ្លែង សុន្ទរកថាគន្លឹះក្នុងកិច្ចប្រជុំគណៈកម្មាធិការប្រតិបត្តិអង្គការអ្នក​ប្រជាធិបតេយ្យ​និយមកណ្តាល អន្តរជាតិ

2024/11/18 04:01:24 pm        569
Facebook Telegram Linkin
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បាន​ផ្តល់​កិត្តិយស​អ​ញ្ជើញថ្លែងសុន្ទរកថា គន្លឹះក្នុងកិច្ចប្រជុំ​គណៈកម្មាធិការ​ប្រតិបត្តិ​អង្គការ​អ្នក​ប្រជា​ធិបតេយ្យ​និយម​កណ្តាល អន្តរជាតិ CDI ខណៈកម្ពុជាធ្វើជាម្ចាស់ផ្ទះ នៃ​កិច្ច​ប្រជុំ​រយៈ​ពេល​៣​ថ្ងៃ​ពី​ថ្ងៃ​ទី​១៧ ដល់ថ្ងៃទី១៩វិច្ឆិកា។សុន្ទរកថា គន្លឹះនៅក្នុងកិច្ច​ប្រជុំ​គណៈកម្មាធិការ​ប្រតិបត្តិ​អង្គការ​អ្នក​ប្រជាធិបតេយ្យ​និយម​កណ្តាល អន្តរជាតិ (IDC-CDI)នៅខេត្តសៀមរាបនារសៀលថ្ងៃទី១៨វិច្ឆិកានេះ សម្តេច​ធិបតី​បាន​សំដែ​ងសេចក្តីរីករាយដែលគណបក្សប្រជាជនកម្ពុជា ក្នុងនាមជាអនុប្រធាននៃអង្គការCDI ពិត​ជា​មាន​កិត្តិយស​ក្នុងការធ្វើជាម្ចាស់ផ្ទះ នៃកិច្ចប្រជុំគណៈកម្មាធិការប្រតិបត្តិនេះ និងកម្មវិធី​ពិសេស​ស្ដីពី​យុវជន និង​ធម្មនុញ្ញសន្តិភាពសម្រាប់មនុស្សជាតិ និងភពផែនដី ដែលបានប្រារព្ធ​ឡើង​កាល​ពី​ព្រឹក​នេះ។​ សម្តេចក៏សំដែងនូវសេចក្តីរីករាយ ផងដែរ ដែលគណៈប្រតិភូជាច្រើន នឹង ចូលរួម​មហា​សន្និបាត​អន្តរជាតិ គណបក្សនយោបាយ​នៅ​អាស៊ីលើកទី១២ ក៏​ដូច​ជា​កិច្ច​ប្រជុំ​ពេញ​អង្គ នៃ​អង្គ​ប្រជុំ​លើកទី១១ នៃ សភាអន្តរជាតិ ដើម្បីភាពអត់ឱន និង​សន្តិភាព​នៅ​សប្តាហ៍​ក្រោយ​នៅ​ក្រុង​ភ្នំពេញ​។ សម្តេចបានយកឱកាសនេះសំដែងនូវ ការដឹងគុណ​យ៉ាង​ជ្រាល​ជ្រៅ​បំផុត​ចំពោះ​សម្ដេច​តេជោ ហ៊ុន សែន ប្រធាន​គណបក្ស​ប្រជាជន​កម្ពុជា និង​ជា​ប្រធាន​ព្រឹទ្ធសភា នៃ​ព្រះរាជា​ណា​ចក្រ​កម្ពុជា​ចំពោះ​ការដឹកនាំប្រកបដោយចក្ខុវិស័យរបស់សម្ដេចក្នុងការកសាងសន្តិភាព ការ​ផ្សះផ្សា និង​ការ​អភិវឌ្ឍរបស់ប្រទេសកម្ពុជា។ ក្នុងនាមប្រជាជនកម្ពុជា សម្តេចបាន សម្ដែង​នៅ​កតញ្ញូតា​ធម៌​ចំពោះ​ការប្តេជ្ញាចិត្តពេញមួយជីវិតរបស់សម្ដេចតេជោ ដើម្បីសន្តិភាព ការផ្សះផ្សា និង​ការ​កសាង​ជាតិ ក្រោយពីជម្លោះ ដែលជាមូលដ្ឋានគ្រឹះសម្រាប់ការអភិវឌ្ឍ និងការធ្វើទំនើបកម្ម​របស់​ប្រទេស​។ សម្ដេចថា សព្វថ្ងៃនេះពិភពលោក ប្រឈមនឹងបញ្ហា ដែលពុំធ្លាប់មានពីមុនមក ជាមួយ​នឹង​ការ​កើន​ឡើងនូវភាពតានតឹង ផ្នែកភូមិសាស្ត្រនយោបាយ ដល់ចំណុចខ្ពស់ ដែលពុំធ្លាប់​មាន​ក្នុង​ប៉ុន្មាន​ទសវត្សរ៍ចុងក្រោយ។ ការអូសបន្លាយនិងការរីកសាយភាយនៃសង្គ្រាមតាមតំបន់នានា ជា​មួយនឹងការចូលរួមក្នុងសង្គ្រាម ដែលពុំមែនជាភាគីដោយផ្ទាល់ នៃជម្លោះ បាន​ធ្វើ​ឲ្យ​យើង​បាត់​បង់​ក្តី​សង្ឃឹម​សម្រាប់ឈានទៅរកកិច្ចព្រមព្រៀងនៃ​បទឈប់បា​ញ់​ក្នុង​ពេល​ដ៏​ខ្លី​ខាង​មុខ និង​បាន​បង្កើន​នូវ​ភាពភ័យខ្លាចដល់ សង្គ្រាមជាសកល។ ទន្ទឹមនេះការបែងចែកប៉ូលសេដ្ឋកិច្ចនិងការប្រែប្រួលអាកាសធាតុ និងគ្រោះធម្មជាតិកំពុងតែគំរាម កំហែង​ដល់អាយុជីវិតទូទាំងពិភពលោកក្នុងកម្រិតមួយដែលពិបាកប៉ាន់ស្មានផងដែរ។ បញ្ហា​ប្រឈម​ទាំង​នេះ បានបង្កើតឲ្យមានវិបត្តិមនុស្សធម៌និងជនភៀសខ្លួន រាំងស្ទះដល់​ការ​ងើប​ឡើង​វិញ​នៃ​សេដ្ឋកិច្ច បង្កើតអត្រានៃអតិផរណា ដល់ខ្សែច្រវ៉ាក់ ផ្គត់ផ្គង់ និងប៉ះពាល់ដល់​សន្តិសុខ​ស្បៀង ​ព្រមទាំងការអភិវឌ្ឍន៍សង្គម។ ទាំងនេះជាហេតុផលដែលធ្វើឲ្យប្រធានបទនៃកិច្ចប្រជុំ មាន​ភាព​ទាន់ពេលនិងចាំបាច់ កាលណា យើងត្រូវប្រើប្រាស់ស្មារតីរួម ការទទួលខុសត្រូវរួមគ្នា ដើម្បី​ដោះ​ស្រាយបញ្ហា ក្តៅគគុកនៅក្នុងតំបន់ និងសកលលោក សម្ដេចជឿជាក់​ថា​យើង​រួម​គ្នានឹ​ងអា​ច​ក្លាយជាអ្នកតស៊ូមតិដែលមានឥទ្ធិពល សម្រាប់សន្តិភាព កិច្ចសន្ទនា​ក៏​ដូចជាកិច្ច​សហ​ប្រតិបត្តិការ ដែលមានគោលបំណងពន្លឿនការស្ដារសេដ្ឋកិច្ចនិងសង្គម ឆ្ពោះទៅ​រក​ការ​អភិវឌ្ឍន៍ និង​វិបុលភាព។សម្ដេចធិបតីក៏ បានអំពាវនាវដល់សមាជិក សមាជិកានៃអង្គការCDI ជុំវិញពិភព​លោក​ចូល​រួម​គាំទ្រ​ និង​រួមចំណែកលើដំណើរការរួមគ្នានេះ ហើយជឿជាក់យ៉ាងមុតមាំថា ការប្តេជ្ញាចិត្តឥ​ត​ងាក​រេ ​របស់CDI នឹងអនុញ្ញាតឱ្យយើងសម្របខ្លួនកាន់តែប្រសើរ នៅក្នុងការផ្លាស់ប្ដូរ ស្ថាន​ភាព​ភូមិ​សាស្ត្រ​នយោបាយ និងភូមិសាស្ត្រសេដ្ឋកិច្ចក្នុងការកសាង សាមគ្គីភាពក្នុងភាពចម្រុះ និង ការ​ពង្រឹង​ទំនាក់ទំនងជាមួយដៃគូយើងដោយផ្អែកលើជំនឿ និងទំនុកចិត្តគ្នា។គួរបញ្ជាក់ថា CDI បាន​ជ្រើសរើស​យក​ប្រទេស​កម្ពុ​ជា​បើក​កិច្ច​ប្រជុំ​រយៈ​ពេល​៣​ថ្ងៃ​នៅ​ខេត្តសៀ​ម​រាប​ ពីថ្ងៃទី១៧ ដល់ថ្ងៃទី១៩វិច្ឆិកា ។សព្វថ្ងៃអង្គការ CDI មានសមាជិក១០៩គណបក្ស មកពី ៨៣​ប្រទេស ដែល មាន មនោគមវិជ្ជានយោបាយនិយម កណ្តាល មកពីទ្វីបអឺរ៉ុប អាមេរិកឡាទីន អាមេរិក​ខាងជើង អាហ្វ្រិក និងអាស៊ី ប៉ាស៊ីហ្វិក ក្នុងនោះគណបក្ស​ប្រជាជន​កម្ពុជា​បាន​ចូល​ជា​សមាជិក​ពេញ​សិទ្ធិរបស់CDI កាលពីខែមេសា ឆ្នាំ២០១៦ ហើយត្រូវបានបោះ​ឆ្នោត​ជា​អនុ​ប្រធាន​អង្គការ CDI ទទួលបន្ទុកតំបន់អាស៊ីប៉ាស៊ីហ្វិក ចាប់ពីខែ កក្កដា ឆ្នាំ២០១៨ ចំនួន ៣អាណត្តិ​មក​ហើយ​៕ អត្ថបទ មុត សុទ្ធ

កម្ពុជាអាចនឹងធ្វើជាម្ចាស់ផ្ទះរៀបចំកិច្ចប្រជុំថ្នាក់រដ្ឋមន្ត្រីស្តីពី ការក្សាសន្តិភាពក្នុងក្របខណ្ឌ UN ហើយនឹងមានប្រទេសជិត១០០ចូលរួម

2024/11/18 03:06:02 pm        494
Facebook Telegram Linkin
នាយឧត្តមសេនីយ៍ ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិកម្ពុជា និង​ជា​ប្រធាន​គណៈ​កម្មការជាតិ និងអ្នកសម្របសម្រួលតំណាងអង្គការសហប្រជាជាតិប្រចាំកម្ពុជា បានថ្លែងថា ក្រសួង​ការពារជាតិកម្ពុជា បានកំពុងរៀបចំសំណើរទៅកាន់អង្គការសហប្រជា ជាតិ​ដើម្បី​ស្នើ​សុំ​ធ្វើ​ជា​ម្ចាស់​ផ្ទះ​នៃកិច្ចប្រជុំ ស្តីពីការរក្សាសន្តិភាពក្នុងក្របខណ្ឌអង្គការសហប្រជាជាតិ ដោយកិច្ច​ប្រជុំ​នេះ​នឹង​មាន​ប្រទេសជាសមាជិក ជិតមួយរយចូលរួម។ថ្លែងក្នុងឱកាសអញ្ជើញជាអធិបតីភាពក្នុងពិធីបើកវគ្គគម្រោងត្រីភាគីកម្ពុជា កូរ៉េ និងអង្គការ សហ​ប្រជាជាតិ​(UNTPP) នៅសាលាហ្វឹកហ្វឺនកងកម្លាំងរក្សាសន្តិភាពពហុជាតិ (KPO) ដែលស្ថិត​នៅ ​ស្រុកភ្នំស្រួច ខេត្តកំពង់ស្ពឺ នាព្រឹកថ្ងៃទី១៨ ខែវិច្ឆិកា ឆ្នាំ២០២៤នេះ នាយឧត្តមសេនីយ៍ ទៀ សីហា បានលើកឡើងថា រាជរដ្ឋាភិបាលកម្ពុជាតាមរយៈក្រសួងការពារជាតិ បានបញ្ជូន​កង​កម្លាំង​ទាហាន​មួក​ខៀវ​របស់ខ្លួនទៅចូលរួមថែរក្សាសន្តិភាពពិភពលោកជាបន្តបន្ទាប់ ក្រោយ​មាន​ការ​ស្នើ​សុំ​ពី​អង្គការ​សហប្រជាជាតិ ហើយតាមរយៈ​បេសកកម្ម​ដ៏​ធំ​នេះ​កម្ពុជា​បាន​ស្មើ​មុខ​ស្មើ​មាត់​ជា​មួយ​អន្តរ​ជាតិ​ ដោយសារតែកង ទ័ពកម្ពុជាមានជំនាញច្បាស់លាស់លើកិច្ចការទាំងនេះ ថែមទាំង​អាច​ហ្វឹក​ហ្វឺន​ដល់ប្រទេសមួយចំនួនក្នុងតំ បន់ផងដែរ​ក្រោម​គម្រោង​សហប្រតិបត្តិការ​ជាមួយ​ប្រទេស​ជា​ដៃ​គូ ដូចជាប្រទេសជប៉ុន អូស្ត្រាលី កូរ៉េ ដោយមាន​ការ​សម្រប​សម្រួល​ពី​អង្គការ​សហ​ប្រជាជាតិ​នោះ​។​នាយឧត្តមសេនីយ៍ ទៀ សីហា បានបញ្ជាក់បន្ថែមថា ក្រៅពី​កម្ពុជា​ធ្វើ​ជា​ម្ចាស់​ផ្ទះ​បើក​វគ្គ​ហ្វឹក​ហ្វឺន​គម្រោង​ត្រី​ភាគី​កម្ពុជា កូរ៉េ និងអង្គការសហប្រជាជាតិ(UNTPP) ដោយមានប្រទេស​ប្រាំបី​ចូល​រួម​នាពេលនេះ កម្ពុជាក៏កំពុងរៀបចំដាក់សំណើរទៅកាន់អង្គការសហប្រជាជាតិ ដើម្បី​ធ្វើ​ជា​ម្ចាស់​ផ្ទះ​នៃ​កិច្ច​ប្រជុំថ្នាក់រដ្ឋមន្ត្រីស្តីពីការក្សាសន្តិភាពក្នុងក្របខណ្ឌអង្គការសហប្រជាជាតិ នាពេលខាង​មុខ​នេះ​ផ​ងដែរ ខណៈកិច្ចប្រជុំនេះគឺជាឱកាសដ៏សំខាន់មួយសម្រាប់រដ្ឋជាសមាជិក ដើម្បី​រួម​គ្នា​ក្នុង​កិច្ច​ខិត​ខំ​ប្រឹង​ប្រែង​រួមមួយ ក្នុងគោលបំណងពង្រឹងប្រសិទ្ធភាពនៃប្រតិបត្តិការរក្សាសន្តិភាព និង​ផល​​ប៉ះពាល់របស់ពួកគេលើសហគមន៍ដែលពួកគេបំពេញការងារនោះ។សូមបញ្ជាក់ថា កម្ពុជាបានកំពុងធ្វើជាម្ចាស់ផ្ទះជាលើកទី២ នូវវគ្គហ្វឹកហ្វឺនភាពជាដៃគូត្រីភាគី កម្ពុជា​-កូរ៉េ-អង្គការសហប្រជាជាតិ ខណៈវគ្គហ្វឹកហ្វឺនដល់សិក្ខាកាមជាតិ និងអន្តរជាតិនេះ ក្នុង​គោល​បំណង បង្កើនសមត្ថភាពលើជំនាញបច្ចេកទេសបញ្ជា-ថែទាំគ្រឿងចក្រវិស្វកម្មធុនធ្ងន់ ជាមួយការយល់ដឹងបន្ថែមអំពីគ្រោះថ្នាក់ នៃគ្រឿងផ្ទុះ/ គ្រឿងផ្ទុះកែច្នែ (IED/C-IED) ក្នុង​ពេល​ប្រតិបត្តិការ និងនីតិវិធីជួយសង្គ្រោះ នៅលើទីលាន ក្នុងដំណាក់កាលបឋមឱ្យមានគុណវុឌ្ឍិ និង​ស្ទាត់​ជំនា​ញដើម្បីរួមចំណែកជាមួយ រាជរដ្ឋាភិបាលក្នុងការបន្តអភិវឌ្ឍន៍សមត្ថភាពរបស់ ខ.ភ.ម ដើម្បី​គាំទ្រដល់ប្រតិបត្តិការ ឱ្យមានប្រសិទ្ធភាពខ្ពស់ និងស្របតាម​តម្រូវ​ការ​របស់​បេសកកម្ម​អង្គការ​សហ​ប្រជាជាតិជាដើម។ វគ្គហ្វឹកហ្វឺនជាលើកទី២នេះ គឺមានសិក្ខាកាមមក​ពី​ប្រទេស​ចំនួន​៨​ចូល​រួម​កម្ពុជា បង់ក្លាដែស ប៊ូតាន ឥណ្ឌូនេស៊ី ម៉ុងហ្គោលី នេប៉ាល់ ប៉ាគីស្ថាន ហ្វីលីពី និង​ស្រី​លង្កា​ជា​ដើម៕ អត្ថបទបាន ចក់

កងទ័ពកម្ពុជា ឡាវ និងវៀតណាម បើកលំហាត់ហ្វឹកហ្វឺន​លើការជួយ​សង្គ្រោះ​គ្រោះ​មហន្តរាយ​បាក់រលំអគារ

2024/11/18 12:52:03 pm        544
Facebook Telegram Linkin
នៅថ្ងៃនេះ កងទ័ពកម្ពុជា ឡាវ និងវៀតណាម បាន​បើក​លំហាត់​ហ្វឹកហ្វឺន​រួមគ្នា​លើ​ប្រតិបត្តិការ​ជួយ​សង្គ្រោះ​គ្រោះមហន្តរាយបាក់រលំអគារ នៅមជ្ឈមណ្ឌលហ្វឹកហ្វឺនកងរាជអាវុធហត្ថ (ភ្នំជុំសែន​រីករាយ) ក្នុងខេត្តកំពង់ឆ្នាំង។ នៅថ្ងៃទី១៨ ខែវិច្ឆិកា ឆ្មាំ២០២៤ លោកឧត្តមសេនីយ៍ទោ ប៉ែន សុក្រិតវិទ្យា នាយកទីចាត់​ការ​ហ្វឹក​ហ្វឺន និងជាប្រធានអនុគណៈកម្មការហ្វឹកហ្វឺននៃគណៈកម្នការអន្តរក្រសួង បានអញ្ជើញ​ក្នុង​ពិធី​បើក​លំហាត់ហ្វឹកហ្វឺនៅនៃប្រទេសទងបី កម្ពុជា ឡាវ និងវៀតណាម ដែល​លំហាត់​ហ្វឹក​ហ្វឺន​នេះ​មាន​រយៈពេល៨ថ្ងៃ ចាប់ពីថ្ងៃទី១៨ ដល់ថ្ងៃទី២៥ ខែវិច្ឆិកា ឆ្នាំ២០២៤។ លោកឧត្តមសេនីយ៍ទោ ប៉ែន សុក្រិតវិទ្យា ថ្លែងថា ការធ្វើលំហាត់កងទ័ពបីប្រទេស បាន​ធ្វើ​ឡើង​តាម​ការ​ដឹកនាំរបស់ ក្រសួងការពារជាតិទាំងបីប្រទេស ក្នុងគោលបំណង​ពង្រឹង​កិច្ច​សហ​ប្រតិ​បត្តិ​ការ​​ក​ងទ័ពទាំងបី នឹងជួយគ្នាទៅវិញទៅមក នៅគ្រប់កាលៈទេសៈដែលមានគ្រោះមហន្ត រាយ​កើត​ឡើង ដើម្បីជួយប្រជាជនរងគ្រោះបានទាន់ពេលវេលា និងកាត់បន្ថយការ គ្រោះថ្នាក់​ដល់​អាយុ​ជីវិត ព្រមទាំងទ្រព្យសម្បត្តិឱ្យបានទាបបំផុតតាមដែលអាចធ្វើបាន។ ក្នុង​ន័យ​នេះ​ថ្នាក់​ដឹកនាំ​ក្រសួង​ការពារ​ជាតិ នៃ​ប្រទេសទាំងបី បានឯកភាពគ្នា ចាត់តាំងលំហាត់កងទ័ពទាំងបីប្រទេស ជារៀងរាល់ឆ្នាំ ដោយ​ប្តូរវេនគ្នាធ្វើម្ចាស់ផ្ទះ ម្នាក់ម្តង និងដាក់ចេញប្រធានបទជាក់ស្តែង អំពីការ​ជួយ​សង្គ្រោះ​គ្រោះ​មហន្តរាយ ដោយធម្មជាតិ ដែលបានកើតឡើងក្នុងប្រទេសទាំងបីជារៀងរាល់ឆ្នាំ។ លោកឧត្តមសេនីយ៍ទោ បញ្ជាក់ថា ផ្អែកលើប្រធានបទ “ប្រតិបត្តិការ ជួយ​សង្គ្រោះ​​គ្រោះមហន្តរាយបាក់រលំអាគារ” យោជិនគ្រប់រូប នៃកងយោធពលខេមរភូមិន្ទ ត្រូវតែ​រួម​សហការ​យ៉ាងជិតស្និត ចូលរួមអនុវត្តឱ្យបានជោគជ័យ និងត្រូវយកចិត្តទុកដាក់ខិតខំ រៀនសូត្រ ហើយ​គោរពប្រតិបត្តិឱ្យបានម៉ឺងមាត់នូវបទវិន័យទូទៅរបស់កងយោធពលខេមរភូមិន្ទ និង​បទ​បញ្ជា​ផ្ទៃ​ក្នុង​របស់សមយុទ្ធនេះ។លោកឧត្តមសេនីយ៍ទោបានណែនាំ​ដល់​យោធិន​គ្រប់​រូប​ត្រូវ​យក​ចិត្ត​ទុក​ដាក់​រៀន​សូត្រ​ពី​គ្នាទៅវិញទៅមក និងដកពិសោធន៍រាល់ ខ្លឹមសារសមយុទ្ធទាំងអស់ ទាំងនៅទីលាន ទាំង​ការដឹកនាំបញ្ជា ដើម្បីបង្កើនចំណេះដឹង ឱ្យមាន​សមត្ថភាព​គ្រប់​គ្រាន់​ក្នុង​ពេល​ប្រតិបត្តិការ​សង្គ្រោះបានទាន់ពេលវេលា សង្គ្រោះជីវិតប្រជាជនរួចផុតពីគ្រោះមហន្តរាយនានា។ជាមួយគ្នានេះលោកឧត្តមសេនីយ៍ទោ ប៉ែន សុក្រិតវិទ្យា បានស្នើដល់យោធិនគ្រប់រូប ត្រូវ​លើក​កម្ពស់​ចំណង​សាមគ្គី​ភាព មិត្តភាព ស្មោះសក្នុងស្មារតីសហប្រតិបត្តិការ និងគោរពគ្នាទៅវិញ​ទៅ​មក​ដោយ​ស្មើរ​ភាព សំដៅធ្វើយ៉ាងណាឱ្យដំណើរការនៃលំហាត់ហ្វឹកហ្វឺនរួម រវាងកងទ័ពបីប្រទេស កម្ពុជា ឡាវ វៀតណាម ឆ្នាំ២០២៤ទទួលបានជោគជ័យតាមកម្មវិធី ព្រមទាំងធានាសុវត្ថិភាពទាំងមនុស្ស និង​គ្រឿង​បំពាក់៕ អត្ថបទ៖ សេក ឧត្តម 

កម្ពុជាសហការជាមួយចក្រភពអង់គ្លេសរៀបចំពិព័រណ៍ពាណិជ្ជកម្មនៅកម្ពុជា ដើម្បីជំរុញ​ការ​នាំចេញ

2024/11/18 12:30:37 pm        448
Facebook Telegram Linkin
ភ្នំពេញ៖ សមាគមសហគ្រិនស្រ្តីកម្ពុជា (Cambodia Women Entrepreneurs' Network (CamWEN)) សហការជាមួយចក្រភពអង់គ្លេស (SheTrades UK) បានរៀ​ប​ចំ​ពិព័រណ៍​ពាណិជ្ជ​កម្ម​អន្តរជាតិកម្ពុជា ឆ្នាំ២០២៤ រយៈពេល២ថ្ងៃ ថ្ងៃទី១៨ និង១៩ ខែវិច្ឆិកានេះ នៅ​អគារ​ពិព័រណ៍​កោះពេជ្រ ដើម្បីជំរុញដល់ការនាំចេញ និងបង្កើតទំនាក់ទំនង រវាងអ្នកបញ្ជាទិញ និង​អ្នក​ផលិត។នៅក្នុងពិធីបើកពិព័រណ៍នៅព្រឹកថ្ងៃទី១៨ ខែវិច្ឆិកានេះ លោកជំទាវ ចម និម្មល រដ្ឋមន្រ្តី​ក្រសួង​ពាណិជ្ជកម្ម បានមានប្រសាសន៍ថា ព្រឹត្តការណ៍នេះរៀបចំឡើង តាមរយៈការ​សម្រប​សម្រួល​ការ​ត​ភ្ជាប់ រវាងធុរកិច្ចកម្ពុជា ជាពិសេសសហគ្រាសដែលដឹកនាំដោយស្ត្រី និងអ្នកបញ្ជាទិញ ក្នុង​គោល​បំណង​ជំរុញផលិតផលវាយនភ័ណ្ឌ សម្លៀកបំពាក់ និងស្បែកជើង​ទៅ​កាន់​ចក្រ​ភព​អង់គ្លេស និងដើម្បី​បង្កើត​បណ្តាញ​ទំនាក់​ទំនង​ជាមួយ​នឹង​អ្នក​បញ្ជា​ទិញ​សំខាន់ៗ​របស់​ចក្រភ​ព​អង់គ្លេស​លើ​ផលិតដែលដាក់តាំងបង្ហាញក្នុងព្រឹត្តការណ៍នេះ។លោកជំទាវរដ្ឋមន្រ្តី បានលើកឡើងថា គិតមកដល់បច្ចុប្បន្ននេះ កម្ពុជា និងចក្រភពអង់គ្លេស មាន​ទំនាក់​ទំនង​យ៉ាងជិតស្និទ្ធលើគ្រប់វិស័យដែលមិត្តភាពដ៏រឹងមាំនេះ ត្រូវបានថែរក្សា​តាមរយៈ​កិច្ច​សហប្រតិបត្តិការ​ជិត​ស្និទ្ធ ជាពិសេសក្នុងវិស័យពាណិជ្ជកម្ម និងវិនិយោគ។ លោកជំទាវ បាន​បន្ថែម​ថា ព្រឹត្តិការណ៍នេះដែរ នឹងជួយជំរុញ ក៏ដូចជាផ្តល់ជូន​អ្នកចូលរួមនូវ​ចំណេះ​ដឹង​បន្ថែម​ស្តីពី​ព័ត៌មា​ន​ទីផ្សារថ្មីជាច្រើនពាក់ព័ន្ធនឹងវិស័យខាងលើ រួមទាំងប្រព័ន្ធអនុគ្រោះពន្ធ DCTS របស់​ចក្រភព​អង់គ្លេសផងដែរ។ឯកឧត្តម Dominic Williams MBE ឯកអគ្គរាជទូតអង់គ្លេសប្រចាំកម្ពុជា សង្ឃឹមថា តាមរយៈ​កិច្ចស​ហការ​នៃ​ការរៀបចំកម្មវិធីនាពេលនេះ នឹងពង្រឹងទំនាក់ទំនងពាណិជ្ជកម្ម រវាង​ប្រទេស​ទាំង​ពីរ​ឲ្យ​កាន់​តែល្អប្រសើរឡើងបន្ថែមទៀត។ ជាពិសេស តាមរយៈវេទិកាពាណិជ្ជកម្ម និងការ​វិនិយោគ​កម្ពុជា-ចក្រភពអង់គ្លេស នឹងបង្ហាញពីសក្ដានុពល​ដែល​កំពុង​រីក​ចម្រើន​របស់​កម្ពុជា​ក្នុង​ពាណិជ្ជកម្ម​សកល ការបង្ហាញផលិតផលវាយនភណ្ឌ សំលៀកបំពាក់ សិប្បកម្ម និងស្បែកជើង​ទៅ​កាន់​ទីផ្សារអន្តរជាតិ។អ្នកចូល​រួមតាំងបង្ហាញផលិតខ្មែរ ក្នុងកម្មវិធីពិព័រណ៌អន្តរជាតិនេះ បានដាក់ក្តីរំពឹងទុកថា ព្រឹត្តិការណ៍​នេះនឹងជួយគាំទ្រដោយផ្ទាល់ដល់សហគ្រាសធុនតូច និងមធ្យមកម្ពុជា ក្នុងការ​ពង្រីក​ទីផ្សារ​ផ្គត់​ផ្គង់ ក៏ដូចជាសេវាកម្មជាដើម ដែលមានការប្រកួតប្រជែង ផ្តល់អត្ថ​ប្រយោជន៍​ទាំង​ពាណិជ្ជកម្ម​ក្នុង​តំបន់ និងអន្តរជាតិ។យោងតាមទិន្នន័យរបស់ក្រសួងពាណិជ្ជកម្មកម្ពុជា បានឲ្យដឹងថា គិតក្នុងរយៈពេល១០ខែ ឆ្នាំ​២០២៤ ការនាំចេញ នាំចូលទំនិញរវាងកម្ពុជា-ចក្រភពអង់គ្លេស សម្រេច​បាន​ក្នុង​ទំហំ​ទឹក​ប្រាក់​សរុប ៨៥០,៧៤ លានដុល្លារ កើនឡើង ១៥,៧ ភាគរយបើធៀបនឹងរយៈពេលដូចគ្នាក្នុងឆ្នាំ ២០២៣ ក្នុងនោះទំនិញកម្ពុជានាំទៅអង់គ្លេស មានប្រមាណ ៨០៧,៣៥ លានដុល្លារ កើនឡើង ២១,១​ភាគរយ និងទំនិញអង់គ្លេសនាំមកកម្ពុជា មានចំនួន ៤៣,៣៨ លានដុល្លារ ធ្លាក់ចុះ ៣៦,៧ ភាគរយ៕ អត្ថបទ ឈិត បូរ៉ាវី 

លោកជំទាវ មិថុនា ភូថង នៅតែមានមោទនភាព​ដែលមាន​យុវសិស្ស​ប្រឡង​ជាប់​និទ្ទេសA ចំនួន​១៣នាក់

2024/11/18 12:19:20 pm        450
Facebook Telegram Linkin
លោកជំទាវ មិថុនា ភូថង អភិបាលនៃគណៈអភិបាលខេត្តកោះកុង ព្រឹកថ្ងៃទី១៨ ខែវិច្ឆិកា ឆ្នាំ​២០២១៤នេះ បានអញ្ជើញ​ប្រគល់​រង្វាន់​លើក​ទឹក​ចិត្តដល់ក្រុមសិស្សប្រឡងជាប់និទ្ទេស A ទាំង ១៣រូប ប្រចាំឆ្នាំ២០២៤ ​ក្នុង​ម្នាក់ៗ​ទទួល​បាន​នូវថវិកា​ចំនួន ​៤លានរៀល។ លោកជំទាវ មិថុនា ភូថង កោតសរសើរ​ពីកិច្ចប្រឹ​ង​ប្រែង​កូន​ក្មួយៗ​ដែល​បញ្ចេញ​សមត្ថ​ភាព​ប្រឡង​ជាប់​បាន​និទ្ទេសAមានចំនួនច្រើនមិនធ្លាប់មានពីមុនរហូតដល់១៣រូប។ នេះជាមោទនភាព​ដ៏​ឧត្តុង​ឧត្តម​យ៉ាង​ខ្លាំងសម្រាប់ខេត្តកោះកុង ក៏ដូចជាម្តាយឪពុកអាណាព្យាបាលសិស្សផងដែរ។ លោកជំទាវអភិបាលខេត្ត ជំរុញឱ្យបន្តខិតខំសិក្សាបន្ថែមទៀតបានឱ្យល្អនៅថ្នាក់មហាវិទ្យាល័យ ដើម្បី​ក្លាយ​ជាធនធានមនុស្សដ៏មានសក្តានុពលដែលប្រទេសជាតិកំពុងត្រូវការ សម្រាប់ការ​ចូល​រួម​អភិវឌ្ឍន៍​សង្គមជាតិទៅអនាគត។ មិនត្រឹមតែប៉ុណ្ណោះ កូនក្មួយៗត្រូវមានគុណធម៌ សិលធម៌ ចរិយា​ថ្លៃ​ថ្នូរឱ្យសាកសមនឹងកូនខ្មែរ ចៀសវាង​ភ្លើត​ភ្លើ​ន​ទៅ​អំពើ​អបាយ​មុខ​ដែល​សង្គម​មិន​ឱ្យ​តម្លៃ​។ ឆ្នាំ២០២៤នេះ ខេត្តកោះកុង បានសិស្សានុសិស្សប្រ​ឡង​សញ្ញា​បត្រ​មធ្យម​សិក្សា​ទុតិយភូ​មិជាប់​និទ្ទេសA​រហូតដល់១៣នាក់ ក្នុងនោះស្រីចំនួន៥នាក់ បើធៀបនឹងឆ្នាំទៅ​២០២៣​មាន​សិស្ស​ជាប់​និទ្ទេស​A​តែ៣នាក់ប៉ុណ្ណោះ។ លោក ង៉ែត ឡឹង ប្រធានមន្ទីរអប់រំ យុវជន និងកីឡាខេត្តកោះកុង បានឱ្យដឹងនៅថ្ងៃទី១ ខែវិច្ឆិកា ឆ្នាំ​២០២៤ថា កន្លងទៅ មានសិស្សប្រឡងសញ្ញាបត្រមធ្យមសិក្សាទុតិយភូមិ មានបេក្ខជន​សរុប​ចំនួន​១១២១នាក់ស្រី៦០៨.នាក់។ ដោយមានអ្នកប្រឡងជាប់សរុបចំនួន.៩០៧ នាក់ស្រី៥០៤ នាក់​ស្មើនឹង៨០.៩១%។ បន្ថែមលើមោទនភាពរបស់លោកជំទាវអភិបាលខេត្ត លោក ង៉ែត ឡឹង បានបញ្ជាក់ថា ក្នុង​ចំណោម សិស្សដែលបានប្រឡងជាប់ គឺសិស្សជាប់និទ្ទេសAចំនួន ១៣ នាក់/ស្រីចំនួន ០៥ នាក់​។ និទ្ទេសBចំនួន ៦៥ នាក់ /និទ្ទេសC ចំនួន១៧៤ នាក់/និទ្ទេសD ចំនួន ៣១២ នាក់/ និង​សិស្សនិ​​ទ្ទេសEចំនួន ៣៤៣ នាក់៕ អត្តបទ៖ ឈឹម មករា

បណ្ដាញសង្គម

ព័ត៌មានថ្មីៗ

គ្រូផ្អែកលើកិច្ចព្រមព្រៀងការងារ បានរួមចំណែកជួយលើបញ្ហាខ្វះគ្រូបង្រៀនតាមសាលារយៈ​ពេល​ជិត​មួយឆ្នាំហើយ
07/04/2026 11:07 AM
Facebook Telegram Linkin
លោកជំទាវបណ្ឌិត ពេជ ចន្ទមុន្នី ដាស់តឿនគ្រូពេទ្យតម្កល់ស្មារតីរក្សាក្រមសីលធម៌វិជ្ជាជីវៈ មាន​មេត្តា​ចំពោះ​អ្នកជំងឺ
07/04/2026 11:07 AM
Facebook Telegram Linkin
ទណ្ឌកម្មសេដ្ឋកិច្ចរបស់អាមេរិក រារាំងកិច្ចខិតខំប្រឹងប្រែងសង្គ្រោះគ្រោះរញ្ជួយដីនៅវ៉េណេស៊ុយអេឡា
07/04/2026 11:07 AM
Facebook Telegram Linkin
ក្រុមហ៊ុនតាមដានការដឹកជញ្ជូន៖ ចរាចរណ៍ឆ្លងកាត់ច្រកសមុទ្រ Hormuz ចាប់ផ្តើមឡើងវិញប៉ុន្តែនៅតែផុយស្រួយ
07/04/2026 11:07 AM
Facebook Telegram Linkin
ក្រុមសិទ្ធិមនុស្ស៖ កិច្ចព្រមព្រៀងលីបង់-អ៊ីស្រាអែល ជាការក្បត់ជនរងគ្រោះនៃឧក្រិដ្ឋកម្មសង្គ្រាម
07/04/2026 10:07 AM
Facebook Telegram Linkin
គណៈកម្មការអឺរ៉ុប ស្នើគម្រោងការពារជាតិឆ្លងព្រំដែនធំៗចំនួនប្រាំ
07/04/2026 09:07 AM
Facebook Telegram Linkin
ក្រុមប្រទេសគាំទ្រអ៊ុយក្រែន ប្តេជ្ញាគាំទ្រយ៉ាងខ្លាំងនៅក្នុងកិច្ចប្រជុំកំពូលសម្ព័ន្ធយោធាណាតូ
07/04/2026 09:07 AM
Facebook Telegram Linkin
ស្វីសទម្លាក់អាល់ហ្សេរី ២-០ ជាជ័យជម្នះវគ្គចាញ់ធ្លាក់នៅ World Cup លើកដំបូងក្នុងរយៈពេល ៨៨ ឆ្នាំ
07/04/2026 09:07 AM
Facebook Telegram Linkin
សពលោក Khamenei ត្រូវបានដាក់តម្កល់នៅរដ្ឋធានីតេអេរ៉ង់ ខណៈអ៊ីរ៉ង់ចាប់ផ្តើមពិធីបុណ្យ ១សប្តាហ៍
07/04/2026 09:07 AM
Facebook Telegram Linkin
មន្ត្រី ក.ប.ប វិភាគឃើញសាច់បង្កក ៤៨គំរូ ដែលសមត្ថកិច្ចចម្រុះពិនិត្យ​ប៉ុន្មានថ្ងៃមុន មាន​កត្តា​ហានិភ័យ​ប៉ះពាល់​សុខភាព
07/04/2026 08:07 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.