BTV NEWS

សម្ដេចកិត្តិសង្គហបណ្ឌិត ម៉ែន សំអន វាយតម្លៃខ្ពស់ចំពោះACUក្នុងការស៊ើបអង្កេត និងបំបែកសំណុំរឿងធំៗ

រដ្ឋមន្ត្រីក្រសួងយុត្តិធម៌បញ្ជាក់អំពីវិធានការចំនួន៣ដែលនឹងត្រូវដាក់ឲ្យអនុវត្តន៍ចំពោះករណីក្មេងទំនើង

រដ្ឋមន្ត្រីការបរទេស៖ ចង់ឱ្យកម្ពុជាឈប់បង្ហាញទៅឆាកអន្តរជាតិ មិនពិបាកទេ ឱ្យតែថៃឈប់ប្រព្រឹត្តខុសច្បាប់

ឯកឧត្តមឧបនាយករដ្ឋមន្ត្រី ហ៊ុន ម៉ានី ដាក់ចេញទិសដៅពង្រឹងការគ្រប់គ្រង និងអត្ថប្រយោជន៍ជូនមន្ត្រីរាជការស៊ីវិល ក្នុងកិច្ចប្រជុំប្រចាំខែមេសា

ព័ត៌មានជាតិ

ក្រុមសមាជិកព្រឹទ្ធសភាប្រចាំភូមិភាគទី២ សហការជាមួយក្រុមគ្រូពេទ្យស្ម័គ្រចិត្ត ចុះពិនិត្យព្យាបាលជំងឺជូនប្រជាពលរដ្ឋដោយមិនយកកម្រៃ នៅឃុំដារ ស្រុកមេមត់ ខេត្តត្បូងឃ្មុំ

នាថ្ងៃសៅរ៍ ៥កើត ខែផល្គុន ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២១ ខែកុម្ភៈ ឆ្នាំ២០២៦ ឯកឧត្តម ស៊ាក ឡេង សមាជិកក្រុម តំណាងដ៏ខ្ពង់ខ្ពស់ឯកឧត្តម អ៊ុច បូររិទ្ធ អនុប្រធានទី១ព្រឹទ្ធសភា និងជាប្រធានក្រុមសមាជិកព្រឹទ្ធសភាប្រចាំភូមិភាគទី២ បានសហការជាមួយនឹងក្រុមគ្រូពេទ្យស្ម័គ្រចិត្ត នៃសមាគមបេសកកម្មមនុស្សធម៌នៅកម្ពុជា (AMH) របស់ប្រទេសបារាំង អញ្ជើញចុះពិនិត្យ និងព្យាបាលជំងឺទូទៅជូនដល់បងប្អូនប្រជាពលរដ្ឋដោយមិនយកកម្រៃ នៅឃុំដារ ស្រុកមេមត់ ខេត្តត្បូងឃ្មុំ។ឆ្លៀតក្នុងឱកាសនោះ ឯកឧត្តម ស៊ាក ឡេង បាននាំយកប្រសាសន៍ផ្តាំផ្ញើសួរសុខទុក្ខ និងជូនពរសព្វសាធុការពីសំណាក់សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា ឯកឧត្តម អ៊ុច បូររិទ្ធ អនុប្រធានទី១ និងឯកឧត្តមបណ្ឌិត ធន់ វឌ្ឍនា អនុប្រធានទី២ព្រឹទ្ធសភា ជូនចំពោះអាជ្ញាធរខេត្ត មន្ត្រីរាជការ ថ្នាក់ដឹកនាំគ្រប់ជាន់ថ្នាក់ និងបងប្អូនប្រជាពលរដ្ឋទូទាំងអស់មានវត្តមាននៅទីនេះផងដែរ ហើយឯកឧត្តម បានថ្លែងនូវការដឹងគុណចំពោះវីរកងទ័ពដែលបានលះបង់ជីវិតការពារលើបូរណភាពដែនដី និងអធិបតេយ្យភាពរបស់កម្ពុជាពីការឃ្លានពានរបស់ប្រទេសថៃ ជាពិសេសអាជ្ញាធរមូលដ្ឋាន ទាំងថ្នាក់ភូមិ ឃុំ ស្រុក ខេត្ត និងប្រជាពលរដ្ឋក្នុងខេត្តទាំងមូល ដែលបានបរិច្ចាគធនធាន ទោះបីតិចក្ដី ច្រើនក្ដី ជាតំបន់សមរភូមិក្រោយ ជួយឧបត្ថម្ភដល់សមរភូមិមុខ គឺជាកម្លាំងសាមគ្គីភាពជាធ្លុងមួយដ៏រឹងមាំ។ លើសពីនេះ ឯកឧត្តម បានជម្រាបជូនអំពីសភាពការណ៍វិវត្តថ្មីៗនៅតាមព្រំដែនកម្ពុជា-ថៃ និងបានអំពាវនាវដល់បងប្អូនប្រជាពលរដ្ឋយើងទាំងគ្នាត្រូវជឿជាក់ទៅលើ ប្រមុខរាជរដ្ឋាភិបាលក្នុងការដោះស្រាយជម្លោះព្រំប្រទល់ជាមួយប្រទេសថៃ ក្រោមយុទ្ធសាស្រ្ត «ស្ងាត់តែមិនស្ងៀម»។ ជាចុងបញ្ចាប់ ឯកឧត្តមតំណាងក្រុមសមាជិកព្រឹទ្ធសភាប្រចាំភូមិភាគទី២ បានមានមតិផ្តាំផ្ញើដល់បងប្អូនប្រជាពលរដ្ឋសូមថែទាំសុខភាពឱ្យបានល្អគ្រប់ៗគ្នា តាមរយៈការហូបស្អាត រស់នៅស្អាត និងគោរពតាមការណែនាំរបស់គ្រូពេទ្យ ព្រមទាំងជូនពរអាជ្ញាធរខេត្ត ស្រុក និងសហការី ជាពិសេសក្រុមគ្រូពេទ្យស្ម័គ្រចិត្តរបស់ប្រទេសបារាំង សូមឱ្យមានសុខភាពល្អបរិបូរណ៍ កម្លាំងពលាំងមាំមួន និងទទួលបាននូវពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។តាមរយៈការពិនិត្យព្យាបាលជំងឺជូនប្រជាពលរដ្ឋក្នុងរយៈពេល១ថ្ងៃពេញ ក្រុមគ្រូពេទ្យស្ម័គ្រចិត្តរបស់ប្រទេសបារាំង បានពិនិត្យព្យាបាលជំងឺជូនប្រជាពលរដ្ឋនៅឃុំដារ ស្រុកមេមត់ សរុបចំនួន១៥៧នាក់ ក្នុងនោះ (មនុស្សចាស់១៥៦នាក់ ស្រី៩៣នាក់ និងកូនក្មេង១នាក់)

សម្តេច ម៉ែន សំអន ជួបសំណេះសំណាលជាមួយរចនាសម្ព័ន្ធគណៈចលនាមហាជនខេត្តស្វាយរៀង

នាព្រឹកថ្ងៃទី២១ ខែកុម្ភៈ ឆ្នាំ២០២៦ សម្តេចកិត្តិសង្គហបណ្ឌិត ម៉ែន សំអន អនុប្រធានគណបក្ស និងជាប្រធានគណៈចលនាមហាជននៃគណៈកម្មាធិការកណ្តាលគណបក្សប្រជាជនកម្ពុជា បានអញ្ជើញជាអធិបតីក្នុងពិធីសំណេះសំណាលជាមួយរចនាសម្ព័ន្ធគណៈចលនាមហាជន ចំណុះគណៈកម្មាធិការបក្សប្រជាជនកម្ពុជា ខេត្តស្វាយរៀង។ ក្នុងពិធីនេះក៏មានវត្តមានអមសម្តេចអនុប្រធានគណបក្សរួមមាន ឯកឧត្តម ហ៊ុន ម៉ានី សមាជិកគណៈអចិន្រ្តៃយ៍គណៈកម្មាធិការកណ្តាល និងជាអគ្គលេខាធិការគណៈចលនាមហាជន ឯកឧត្តម អគ្គលេខាធិការរង ប្រធាន អនុប្រធានផ្នែក ចំណុះអគ្គលេខាធិការដ្ឋាន ថ្នាក់ដឹកនាំគណៈកម្មាធិការបក្សខេត្ត ក្រុង-ស្រុក និងឃុំ-សង្កាត់ ព្រមទាំងរចនាសម្ព័ន្ធគណៈចលនាមហាជនទូទាំងខេត្តស្វាយរៀង សរុប ៣២១នាក់។ថ្លែងក្នុងឱកាសនោះ ឯកឧត្តម ប៉េង ពោធិ៍សា អនុប្រធានគណៈកម្មាធិការបក្សខេត្ត និងជាប្រធានគណៈចលនាមហាជនខេត្តស្វាយរៀង បានធ្វើការស្វាគមន៍យ៉ាងកក់ក្តៅចំពោះវត្តមានរបស់សម្តេចកិត្តិសង្គហបណ្ឌិត ដែលបានអញ្ជើញជួបសំណេះសំណាលដោយផ្ទាល់ជាមួយរចនាសម្ព័ន្ធគណៈចលនាមហាជនខេត្តស្វាយរៀង ព្រមទាំងរាយការណ៍សង្ខេបអំពីស្ថានភាពទូទៅក្នុងខេត្តជូនគណៈអធិបតី។មានប្រសាសន៍ទៅកាន់អង្គពិធី សម្តេចកិត្តិសង្គហបណ្ឌិត បាននាំយកការសាកសួរសុខទុក្ខពីសម្តេចប្រធានគណបក្ស សម្តេចប្រធានកិត្តិយស និងសម្តេចអនុប្រធានបក្សជូនដល់មន្រ្តីគណបក្សទាំងអស់ ក៏ដូចជាបានថ្លែងអំណរគុណជូនចំពោះគ្រប់រចនាសម្ព័ន្ធទាំងអស់ដែលបានបំពេញការងារយ៉ាងសកម្មជូនគណបក្សក្នុងរយៈកាលកន្លងទៅនេះ។ សម្តេចបានលើកឡើងបន្តទៀតថា កិច្ចជំនួបថ្ងៃនេះមានគោលបំណងធ្វើបច្ចុប្បន្នភាពអំពីស្ថានការណ៍នយោបាយរួមជូនដល់មន្រ្តីគណបក្សដើម្បីជាមូលដ្ឋានក្នុងការគ្រប់គ្រងសតិអារម្មណ៍មហាជននៅក្នុងមូលដ្ឋានរៀងៗខ្លួន សំដៅចូលរួមការពារសុខសន្តិភាព ស្ថិរភាព និងសមិទ្ធផលជាតិសំខាន់ៗទាំងឡាយដែលគណបក្សបានខិតខំកសាងដោយលំបាក។ ជាមួយគ្នានោះដែរ សម្តេចក៏បានជម្រាបជូនអង្គពិធីនូវការវិវឌ្ឍថ្មីៗ នៃបញ្ហាព្រំដែនកម្ពុជា-ថៃ ដោយសម្តេចបានរំលេចនូវចំណាត់ការ និងការខិតខំប្រឹងប្រែងរបស់ថ្នាក់ដឹកនាំគណបក្ស ក៏ដូចជារាជរដ្ឋាភិបាល ក្នុងការគ្រប់គ្រងស្ថានការណ៍ បញ្ជៀសនូវបញ្ហាធ្ងន់ធ្ងរ ចែករំលែកជូនដល់រចនាសម្ព័ន្ធគណៈចលនាមហាជនទូទាំងខេត្ត យកទៅផ្សព្វផ្សាយដល់សមាជិក សមាជិកា និងមហាជនទូទៅក្នុងមូលដ្ឋានរៀងៗខ្លួន៕

រដ្ឋាករទឹកស្វយ័តក្រុងភ្នំពេញ លក់ទឹកបោះដុំឲ្យប្រតិបត្តិករឯកជន ដើម្បីរួមគ្នាអភិវឌ្ឍន៍សង្គម-សេដ្ឋកិច្ច

ភ្នំពេញ ៖ រដ្ឋាករទឹកស្វយ័តក្រុងភ្នំពេញ ចុះកិច្ចព្រមព្រៀងលក់ទឹកបោះដុំ ជាទឹកស្អាតដែលមានគុណភាព ឱ្យប្រតិបត្តិករឯកជនបែកចាន ដើម្បី ចែកចាយបន្ត ចូលរួមចំណែកលើកកម្ពស់សុខភាពប្រជាពលរដ្ឋ ជាពិសេសការផ្តល់ទឹកស្អាតដល់រោងចក្រ សហគ្រាស បម្រើក្នុងអាជីវកម្ម និងក៏ការទាក់ទាញវិនិយោគិនមកបណ្តាក់នៅតំបន់នោះបន្ថែម។ឯកឧត្តម ឡុង ណារ៉ូ ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយករដ្ឋាករទឹកស្វយ័តក្រុងភ្នំពេញ លើកឡើងក្នុងកិច្ច សម្ភាសន៍ ស្តីពីការលក់ទឹកបោះដុំ របស់រដ្ឋាករទឹកស្វយ័តក្រុងភ្នំពេញ ក្នុងពិធីបិទសន្និបាតលទ្ធផលការងារអាជីវកម្មប៉ាន់ស្មានឆ្នាំ២០២៥ នៅថ្ងៃទី២០ ខែកុម្ភៈ ឆ្នាំ២០២៦ នេះថា ជុំវិញការផ្គត់ផ្គង់ទឹកស្អាតរបស់រដ្ឋាករទឹកស្វយ័តក្រុងភ្នំពេញ បច្ចុប្បន្នមានសមត្ថភាពផលិតសរុប ប្រមាណក្នុងរង្វង់ ១ លានម៉ែត្រគូប ក្នុងមួយថ្ងៃ ខណៈការចែកចាយប្រចាំថ្ងៃក្នុងរង្វង់ ៩០ ម៉ឺនម៉ែត្រគូបប៉ុណ្ណោះ នៅសល់ ១០ ម៉ឺនម៉ែត្រ គូប ដែលរដ្ឋាករទឹកបាននិងកំពុងគិតគូរលក់ជូនដល់ប្រតិបត្តិករបែកចាន។ ឯកឧត្តមប្រតិភូ បន្តថា ជុំវិញការលក់ទឹកបោះដុំនេះ កន្លងមករដ្ឋាករទឹកស្វយ័តក្រុងភ្នំពេញ បានចុះហត្ថលេខាលើអនុស្សារណៈ នៃការយោគយល់គ្នា ស្តីពីកិច្ចសហប្រតិបត្តិការលើការផ្គត់ផ្គង់ទឹកស្អាតដុំ រវាងរដ្ឋាករទឹក និងប្រតិបត្តិករទឹកស្អាតឯកជនអញ្ជាញ ស្ថិតនៅ ក្នុងស្រុកមុខកំពូល ខេត្តកណ្តាល ចំណែកការចុះហត្ថលេខាជាមួយប្រតិបត្តិករទឹកស្អាតឯកជនបែកចាន នេះគឺជាលើកទី២ ដើម្បីយកទៅ ចែកជូននៅក្នុងតំបន់របស់ខ្លួន ខណៈដែលពួកគាត់មានរោងចក្រ និងបណ្តាញទឹកស្អាតរួចជាស្រាច់ នេះគឺជាការចូលរួមចំណែកលើក កម្ពស់សុខភាពប្រជាពលរដ្ឋ ជាពិសេសការផ្តល់ទឹកស្អាតដល់រោងចក្រ សហគ្រាស បម្រើក្នុងអាជីវកម្មនៅក្នុង តំបន់ទាំងនោះឱ្យកាន់តែ ប្រសើរ និងតាមរយៈនេះផងដែរ ក៏ការទាក់ទាញវិនិយោគិនមកបណ្តាក់នៅតំបន់នោះបន្ថែមទៀត ព្រោះថា មានទឹក មានភ្លើង និងមានផ្លូវ គឺមានការអភិវឌ្ឍ។ សូមបញ្ជាក់ថា សម្រាប់នីតិកាលទី៧នេះ តាមរយៈយុទ្ធសាស្ត្របញ្ចកោណ-ដំណាក់កាលទី១, រាជរដ្ឋាភិបាលបានកំណត់យកអាទិភាព គន្លឹះ៥គឺ៖ មនុស្ស ផ្លូវ ទឹក ភ្លើង និងបច្ចេកវិទ្យា ដោយបានបន្ថែម «បច្ចេកវិទ្យា» ទៅក្នុងអាទិភាពគន្លឹះទី ៥ ហើយ «ទឹក» ត្រូវបានរំកិល មកជាអាទិភាពទី៣។ ក្នុងន័យនេះ រាជរដ្ឋាភិបាលបន្តតួនាទីជាយុទ្ធសាស្ត្ររបស់ខ្លួន ក្នុងការពង្រឹងការគ្រប់គ្រង និងអភិវឌ្ឍន៍វិស័យទឹក ស្អាត ព្រមទាំងបន្តអនុវត្តគោលនយោបាយ លើកទឹកចិត្តដល់វិស័យឯកជន ក្នុងការចូលរួមវិនិយោគលើវិស័យទឹកស្អាត ដើម្បីឆ្លើយតប ទៅនឹងតម្រូវការរបស់ប្រជាពលរដ្ឋជាទូទៅ និងការផ្គត់ផ្គង់ទឹកស្អាតក្នុងភូមិសាស្ត្រអាទិភាពដូចជា តំបន់សេដ្ឋកិច្ចពិសេស, សួនបណ្ដុំ សហគ្រាសធុនតូច និងមធ្យម និងតំបន់ប៉ូលសេដ្ឋកិច្ច នៅបណ្តារាជធានីខេត្តជាដើម ដែលជាកត្តាចាំបាច់ក្នុងការរួមចំណែកជំរុញកំណើន សេដ្ឋកិច្ចជាតិ៕អត្ថបទ៖ សុន រ៉ាឌី

សម្តេចឥស្សរវិទេសបញ្ញា ហោ ណាំហុង អញ្ជើញសួរសុខទុក្ខវីរយុទ្ធជនដែលកំពុងសម្រាកព្យាបាលរបួសនៅមន្ទីរពេទ្យកាល់ម៉ែត

ភ្នំពេញ៖ នៅថ្ងៃទី២១ ខែកុម្ភៈ ឆ្នាំ២០២៦នេះ សម្តេចឥស្សរវិទេសបញ្ញា ហោ ណាំហុង ឧត្តមប្រឹក្សាផ្ទាល់ព្រះមហាក្សត្រ ក្នុងមនោសញ្ចេតនាយ៉ាងជ្រាលជ្រៅ និងសមានចិត្តអាណិតអាសូរយ៉ាងពន់ពេក ដល់វីរយុទ្ធជនកម្ពុជា ដែលរងរបួស ដោយសារការខិតខំតស៊ូការពារបូរណភាពដែនដី យ៉ាងអង់អាចក្លាហាន ពីការឈ្លានពានដោយចោរសៀមសារជាថ្មី បានចុះសួរសុខទុក្ខ និងឧបត្ថម្ភថវិកាមួយចំនួនដល់វីរកងទ័ពកម្ពុជាចំនួន ៥នាក់ ដែលកំពុងសម្រាកព្យាបាលនៅមន្ទីរពេទ្យកាល់ម៉ែត ។ក្នុងចំណោមវីរកងទ័ពទាំង៥នាក់នោះ មាន២នាក់ ទើបតែចូលសម្រាកពេទ្យរួមមាន ទី១. ពលបាលទោ អាយុ៣២ឆ្នាំ ប្រចាំការនៅតំបន់៣៣៩ កោះកុង និងទី២. អនុសេនីយ៍ឯក អាយុ៥៩ឆ្នាំ ប្រចាំការនៅទិសប្រាសាទតាក្របី។ ចំណែកវីរកងទ័ព ៣នាក់ទៀត ក៏ត្រឡប់មកសម្រាកពេទ្យម្ដងទៀត ។ ប៉ុន្តែ៣នាក់នេះ សម្ដេចឥស្សរវិទេសបញ្ញា ធ្លាប់បានសួរសុខទុក្ខ និងឧត្ថម្ភថវិកាម្ដងរួចហើយកាលពីថ្ងៃទី១៩ ខែធ្នូ ឆ្នាំ២០២៥ ក្នុងចំណោម ៨នាក់ ដែលសុខភាពបានឈឺឡើងវិញ ។ក្នុងឱកាសនេះ សម្តេចឥស្សរវិទេសបញ្ញា ហោ ណាំហុង បានជូនពរដល់វីរកងទ័ពទាំងអស់ឱ្យបានជាសះស្បើយឡើងវិញក្នុងពេលឆាប់ៗ ព្រមទាំងបានថ្លែងអំណរគុណ និងគោរពដល់វីរៈកងទ័ពកម្ពុជា ដែលបានលះបង់សាច់ឈាម ដើម្បីការពារបូរណភាពទឹកដីកម្ពុជា និងអធិបតេយ្យភាពប្រទេស ហើយប្រឆាំងទៅនឹងអំពើឈ្លានបានរបស់កងទ័ពថៃ ក្នុងស្មារតីឆន្ទៈមុះមុត ។សម្ដេចបានបន្ថែមថា វីរៈភាពដ៏អង់អាចក្លាហាននេះ គឺបន្តស្ថិតនៅជាប់ក្នុងទឹកចិត្តរបស់ពលរដ្ឋខ្មែរជានិច្ច ជាមួយនឹងការរួបរួម និងលើកទឹកចិត្តដល់វីរកងទ័ពគ្រប់កាលៈទេសៈ ដើម្បីប្រឆាំងទៅនឹងសត្រូវឈ្លានពាន និងសូមវីរកងទ័ពគ្រប់រូបចងចាំ និងជឿជាក់ថា ថ្នាក់ដឹកនាំ និងប្រជាពលរដ្ឋខ្មែរ នៅគ្រប់ទិសទីនៅតែឈរគាំទ្រ និងលើកទឹកចិត្តជានិច្ច ។គួរបញ្ជាក់ថា ជានិច្ចកាល ក្នុងស្មារតីចូលរួមជាមួយរាជរដ្ឋាភិបាលកម្ពុជា សម្តេចអតីតប្រមុខការទូតឆ្នើមកម្ពុជា គឺតែងតែនាំយកនូវគ្រឿងឧបភោគបរិភោគ សម្ភារប្រើប្រាស់ ថវិកា និងអំបុកជាដើម ដើម្បីផ្ដល់ជូនដល់វីរកងទ័ពនៅសមរភូមិមុខ និងរបួសសម្រាកនៅមន្ទីរពេទ្យ រួមទាំងប្រជាពលរដ្ឋភៀសសឹកជាបន្តបន្ទាប់ ៕ អត្ថបទ បាន សុខរិទ្ធិ

តំណាងរាស្ត្រមណ្ឌលខេត្តតាកែវ ជំរុញឱ្យអាជ្ញាធរមូលដ្ឋានស្រុកសំរោង ពង្រឹងប្រសិទ្ធភាពសេវាសាធារណៈជូនប្រជាពលរដ្ឋ

ខេត្តតាកែវ៖ តំណាងរាស្ត្រមណ្ឌលខេត្តតាកែវ បានក្រើន រំលឹកដល់មន្ត្រីមូលដ្ឋានឱ្យពង្រឹងស្មារតីបម្រើប្រជាពលរដ្ឋឱ្យកាន់តែសកម្ម និងបុរេសកម្ម ដើម្បីឆ្លើយតបទៅនឹងការវិវត្តយ៉ាងរហ័សនៃស្ថាប័ននីតិប្បញ្ញត្តិ និងការអនុវត្តយុទ្ធសាស្ត្របញ្ចកោណរបស់រាជរដ្ឋាភិបាល។ក្នុងពិធីសំណេះសំណាលសួរសុខទុក្ខក្រុមប្រឹក្សាឃុំ មេភូមិ មន្ត្រី នគរបាលប៉ុស្តិ៍ និងបុគ្គលិកមណ្ឌលសុខភាព សរុបចំនួន ៦០នាក់ ក្នុងស្រុកសំរោង កាលពីថ្ងៃទី២១ ខែកុម្ភៈ ឆ្នាំ២០២៦ ឯកឧត្តមបណ្ឌិត ម៉ុក ម៉ារ៉េត បាន បង្ហាញមោទនភាពចំពោះការដឹកនាំដ៏ឈ្លាសវៃរបស់ សម្ដេចមហារដ្ឋសភាធិការធិបតី ឃួន សុដារី ដែលកំពុងជំរុញការធ្វើទំនើបកម្មរដ្ឋសភាឱ្យក្លាយជា "រដ្ឋសភាឌីជីថល"។ ការកែទម្រង់ស៊ីជម្រៅនេះ មិនត្រឹមតែពង្រឹងសមត្ថភាពតំណាងរាស្ត្រប៉ុណ្ណោះទេ ប៉ុន្តែថែមទាំងមានគោលដៅយុទ្ធសាស្ត្រក្នុងការបម្រើផលប្រយោជន៍ និងដោះស្រាយបញ្ហាប្រឈមរបស់ពលរដ្ឋឱ្យបានទាន់ពេលវេលា និងមានតម្លាភាព។តាមរយៈការអនុវត្ត "យុទ្ធសាស្ត្របញ្ចកោណ ដំណាក់កាលទី១" ក្រោមការដឹកនាំរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ឯកឧត្តមបណ្ឌិតបានសង្កត់ធ្ងន់ថា អាជ្ញាធរ មូលដ្ឋានគឺជា "ភ្នាក់ងារប្រតិបត្តិផ្ទាល់" ក្នុងការសម្រេចឱ្យបាននូវអាទិភាពគន្លឹះទាំង ៥ រួមមាន៖ មនុស្ស ផ្លូវ ភ្លើង ទឹក និងបច្ចេកវិទ្យា ដើម្បីកសាងគ្រឹះរឹងមាំឈានទៅសម្រេចចក្ខុវិស័យកម្ពុជាឆ្នាំ២០៥០។លោកមេឃុំសំរោង ក៏បានរាយការណ៍ពីជោគជ័យនៃការអនុវត្តគោលនយោបាយ "ភូមិ ឃុំ-សង្កាត់ មានសុវត្ថិភាព" ដែលទទួលបានលទ្ធផលវិជ្ជមានគួរឱ្យកត់សម្គាល់ តាមរយៈការកាត់បន្ថយបទល្មើសគ្រប់ប្រភេទ និងការបង្កើនភាពកក់ក្តៅជូនប្រជាពលរដ្ឋក្នុងមូលដ្ឋាន។ឯកឧត្តម ម៉ុក ម៉ារ៉េត បានសំដែងការអបអរសាទរនិងកោតសរសើរចំពោះជោគជ័យដែលអាជ្ញាធរមូលដ្ឋានសម្រេចបាន ។ទន្ទឹមនឹង នេះឯកឧត្តមក៏នៅតែបន្តលើក ទឹកចិត្តឲ្យមន្ត្រីឃុំសង្កាត់ទាំងអស់បន្តខិតខំប្រឹងប្រែងបន្ថែមទៀតដើម្បីពង្រឹងប្រសិទ្ធភាពនៃការផ្ដល់សេវាកម្មជូនដល់ពលរដ្ឋ។ ឯកឧត្តមបណ្ឌិត ម៉ុក ម៉ារ៉េតបានលើកឡើងថា៖ "ការធ្វើទំនើបកម្មស្ថាប័ននឹងមិនមានន័យពេញ លេញឡើយ ប្រសិនបើការផ្តល់សេវានៅថ្នាក់មូលដ្ឋានមិនមានភាពរហ័សរហួន និងតម្លាភាព។ មេឃុំ មេភូមិ ត្រូវតែជាបង្អែកដ៏រឹងមាំ ដែលនៅកៀកជាប់ និងដឹងសុខទុក្ខពលរដ្ឋបំផុត។" ជាកិច្ចបញ្ចប់ ឯកឧត្តមបណ្ឌិត ម៉ុក ម៉ារ៉េត ក៏បានឧបត្ថម្ភថវិកាលើកទឹកចិត្តដល់មន្ត្រីដែលបានចូលរួមទាំង ៦០នាក់ និងឧបត្ថម្ភដល់រដ្ឋបាលស្រុកសំរោង ដើម្បីជាការគាំទ្រដល់ស្មារតីបំពេញការងារបម្រើជាតិ និងប្រជាជនឱ្យកាន់តែរីកចម្រើនបន្ថែមទៀត៕

មន្រ្តីជាន់ខ្ពស់ គ.ជ.គ.ម អញ្ជើញចុះពិនិត្យជម្រកចល័តសម្រាប់ជនភៀសសឹក នៅខេត្តបន្ទាយមានជ័យ

នាព្រឹកថ្ងៃទី២១ ខែកុម្ភៈ ឆ្នាំ២០២៦ ឯកឧត្តម អ៊ុក ឃ្នួច អនុប្រធាន គណៈកម្មាធិការជាតិគ្រប់គ្រងគ្រោះមហន្តរាយ តំណាងដ៏ខ្ពង់ខ្ពស់ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធានទី១ អមដំណើរដោយ លោក ឃ្លោក នួយ អភិបាលរងខេត្តបន្ទាយមានជ័យ បានអញ្ជើញចុះពិនិត្យជម្រកចល័តសម្រាប់ជនភៀសសឹកដែលនៅមណ្ឌលសុវត្ថិភាពវត្តកណ្តោល ស្រុកថ្មពួក ខេត្តបន្ទាយមានជ័យ មកចូលនៅមណ្ឌលសុវត្ថិភាពថ្មី។ជម្រកចល័តនៅមណ្ឌលសុវត្ថិភាពថ្មីនេះ នឹងផ្តល់ភាពងាយស្រួល និងសុខុមាលភាពប្រសើរជាងមុន ទាំងជម្រកស្នាក់នៅ បន្ទប់ទឹក បង្គន់អនាម័យ និងទឹកស្អាតជាដើម។

អ្នកនាំពាក្យ៖កម្ពុជាមិនដែលរំលោភបំពានទឹកដីអ្នកណាទេ ប៉ុន្តែក៏មិនអាចទទួលយកបានជាដាច់ខាតចំពោះការរំលោភបំពានណាមួយមកលើដែនអធិបតេយ្យ និងបូរណភាពទឹកដីកម្ពុជា

ភ្នំពេញ៖ ជាជំហររបស់រាជរដ្ឋាភិបាលកម្ពុជា សម្តេចបវរធិបតី នាយករដ្ឋមន្ត្រី បានបញ្ជាក់ច្បាស់ៗថា កម្ពុជាមិនដែលរំលោភបំពានទឹកដីអ្នកណាទេ ប៉ុន្តែ រាជរដ្ឋាភិបាលកម្ពុជាក៏មិនអាចទទួលយកបានជាដាច់ខាតចំពោះការរំលោភបំពានណាមួយមកលើដែនអធិបតេយ្យ និងបូរណភាពទឹកដីកម្ពុជា និងមិនទទួលស្គាល់ការប្រើកម្លាំងយោធាដើម្បីកែប្រែខ្សែព្រំដែនជាដាច់ខាត។ នេះបើតាមឯកឧត្តម ប៉ែន បូណា អ្នកនាំពាក្យ រាជរដ្ឋាភិបាល។ តាមរយៈសន្និសីទសារព័ត៌មាននៅថ្ងៃទី២១ ខែកុម្ភៈ ឆ្នាំ២០២៦នេះ ឯកឧត្តម ប៉ែន បូណា អ្នកនាំពាក្យរាជរដ្ឋាភិបាល បានថ្លែងថា ក្នុងដំណើរបំពេញបេសកកម្មការទូតទៅកាន់សហរដ្ឋអាម៉េរិក និងទ្វីបអឺរ៉ុប ដែលជាផ្នែកមួយនៃការទូតសកម្មរបស់រាជរដ្ឋាភិបាលនៅលើឆាកអន្តរជាតិ សម្តេចបវរធិបតីក្រៅពីចូលរួមកិច្ចប្រជុំក្រុមប្រឹក្សាសន្តិភាព (The board of Peace) ក៏បានជួបពិភាក្សាការងារជាមួយមន្ត្រីជាន់ខ្ពស់អាម៉េរិកនិងថ្នាក់ដឹកនាំប្រទេសមួយចំនួនផ្សេងទៀត។ នៅទ្វីបអឺរ៉ុប ជាពិសេសនៅទីក្រុងហ្សឺណែវ និងទីក្រុងព្រុចសែល សម្តេចនាយករដ្ឋមន្ត្រីក៏គ្រោងជួបពិភាក្សាការងារជាមួយថ្នាក់ដឹកនាំអឺរ៉ុបជាច្រើនផងដែរ។ក្រៅពីនោះ សម្តេចប្រមុខរាជរដ្ឋាភិបាលកម្ពុជាក៏បានឆ្លៀតផ្តល់បទសម្ភាសន៍ជូនទីភ្នាក់ងារ សារព័ត៌មាននិងបណ្តាញផ្សព្វផ្សាយអន្តរជាតិធំៗមួយចំនួនផងដែរ។ ក្នុងកិច្ចសម្ភាសន៍ទាំងនោះ សំណួរដំបូងរបស់អ្នកសារព័ត៌មានអន្តរជាតិសុទ្ធតែបានផ្តោតការយកចិត្តទុកដាក់ជាពិសេសទៅលើបញ្ហាព្រំដែនកម្ពុជា-ថៃ។ ខ្លឹមសារសំខាន់ៗដែលសម្តេចបវរធិបតី ហ៊ុន ម៉ាណែត បានបញ្ជាក់ប្រាក់បណ្តាញសារព័ត៌មានអន្តរជាតិមានដូចតទៅ៖ កងកម្លាំងប្រដាប់អាវុធថៃនៅតែន្តកាន់កាប់ទឹកដីកម្ពុជា ហើយទីតាំងជាច្រើនបានចូលជ្រៅមកក្នុងទឹកដីកម្ពុជាហួសពីខ្សែព្រំដែនឯកតោភាគីដែលថៃទាមទារទៅទៀត។ កងកម្លាំងថៃបានរាយបន្លាលួស ដាក់ទូរកុងតឺន័រដើម្បីរារាំងផ្លូវមិនឱ្យប្រជាពលរដ្ឋស៊ីវិលកម្ពុជាចូលទៅកាន់លំនៅដ្ឋាន និងកាន់កាប់ទ្រព្យសម្បត្តិរបស់ខ្លួនបានឡើយ។ បច្ចុប្បន្ន មានជនភៀសសឹកកម្ពុជាប្រមាណជិត៨ម៉ឺននាក់ទៀតមិនអាចវិលចូលផ្ទះសម្បែងរបស់ខ្លួនបាននៅឡើយដោយសារតែភាគីថៃបិទផ្លូវ។ សម្តេចបវរធិបតី នាយករដ្ឋមន្ត្រីបានប្រាប់បណ្តាញសារព័ត៌មានអន្តរជាតិទាំងនោះថា ការលើកឡើងនេះមិនមែនជាការចោទប្រកាន់ទេ ប៉ុន្តែ វាគឺជាការពិតដែលកំពុងកើតឡើងនៅលើដីជាក់ស្តែងតែម្តង។ ឯកឧត្តម ប៉ែន បូណា បានថ្លែងបញ្ជាក់ថា៖«ជាជំហររបស់រាជរដ្ឋាភិបាលកម្ពុជា សម្តេចបវរធិបតី នាយករដ្ឋមន្ត្រី បានបញ្ជាក់ច្បាស់ៗថា កម្ពុជាមិនដែលរំលោភបំពានទឹកដីអ្នកណាទេ ប៉ុន្តែ រាជរដ្ឋាភិបាលកម្ពុជាក៏មិនអាចទទួលយកបានជាដាច់ខាតចំពោះការរំលោភបំពានណាមួយមកលើដែនអធិបតេយ្យ និងបូរណភាពទឹកដីកម្ពុជា និងមិនទទួលស្គាល់ការប្រើកម្លាំងយោធាដើម្បីកែប្រែខ្សែព្រំដែនជាដាច់ខាត»។ អ្នកនាំពាក្យរាជរដ្ឋាភិបាលកម្ពុជា លើកឡើងថា ជាដំណោះស្រាយ កម្ពុជាជានិច្ចកាលចង់បានដំណោះស្រាយដោយសន្តិវិធី តាមរយៈការចរចានិងការចុះវាស់វែងដើម្បីផ្ទៀងផ្ទាត់ ដោយប្រើយន្តការបច្ចេកទេសដែលបានឯកភាពគ្នា និងផ្អែកលើសន្ធិសញ្ញា និងកិច្ចព្រមព្រៀង ដែលមានស្រាប់ ពីព្រោះសង្គ្រាមមិនអាចដោះស្រាយបញ្ចប់បញ្ហាបានទេ។ ក្នុងន័យនេះ កម្ពុជាសង្ឃឹមថា ភាគីថៃនឹងអនុញ្ញាតឱ្យគណៈកម្មការចម្រុះខណ្ឌសីម៉ាព្រំដែន(JBC)ចុះវាស់វែងព្រំដែនឱ្យបានឆាប់បំផុតទៅតាមអ្វីដែលបានព្រមព្រៀងគ្នាក្នុងសេចក្តីប្រកាសរួមថ្ងៃទី២៧ ខែធ្នូ ឆ្នាំ ២០២៥។ ភាគីថៃបានលើកហេតុផលនៃការបោះឆ្នោត តែឥឡូវនេះ ការបោះឆ្នោតបានធ្វើរួចរាល់ហើយ ដូច្នេះ ការងារនេះគួរតែអាចចាប់ផ្តើមធ្វើបាន យ៉ាងហោចណាស់ក្នុងកម្រិតក្រុមការងារចម្រុះបច្ចេកទេសចុះវាស់វែង ដើម្បីបន្ធូរបន្ថយភាពតឹនតឹង និងអនុញ្ញាតឱ្យពលរដ្ឋស៊ីវិលត្រឡប់ទៅផ្ទះសម្បែងវិញដូចធម្មតា។ អ្នកនាំពាក្យរាជរដ្ឋាភិបាល បានឱ្យដឹងថា អ្វីដែលបាននិងកំពុងកើតឡើងនៅឯព្រំដែនកម្ពុជា-ថៃ ហើយដែលសម្តេចបវរធិបតី ហ៊ុន ម៉ាណែត បានមានប្រសាសន៍ប្រាប់សារព័ត៌មានអន្តរជាតិគឺសុទ្ធសឹងជាការពិតជាក់ស្តែងទាំងអស់ដែលអាចផ្ទៀងផ្ទាត់បាន។ ក្រុមអ្នកសង្កេតការណ៍អាស៊ាន (AOT) បណ្តាអង្គទូតបរទេសប្រចាំកម្ពុជា និងតំណាងអង្គការអន្តរជាតិក៏ដូចជាសារព័ត៌មានបរទេសជាច្រើនបានចុះទៅពិនិត្យ ផ្ទៀងផ្តាត់និងរាយការណ៍ដល់ទីកន្លែងផ្ទាល់ជាបន្តបន្ទាប់។ ក្រៅពីនោះ អ្នកមានឥទ្ធិពលលើបណ្តាញសង្គមទាំងជនជាតិខ្មែរនិងបរទេស អ្នកសារព័ត៌មាន និងប្រជាពលរដ្ឋទូទៅ ជាពិសេសប្រជាពលរដ្ឋនៅតាមព្រំដែន សុទ្ធសឹងជាសាក្សីផ្ទាល់ភ្នែកចំពោះសកម្មភាពរបស់កងទាហានថៃនៅតាមព្រំដែន។ ដូច្នេះ គ្មាននរណាអាចបដិសេធឬបំភ្លៃរឿងពិតទាំងនេះបានឡើយ។អ្នកនាំពាក្យរាជរដ្ឋាភិបាលក៏បានបញ្ជាក់ជាថ្មីថា ពាក្យថា «ការការពារបូរណភាពទឹកដី និងប្រជាពលរដ្ឋ គឺជាអាទិភាពខ្ពស់បំផុតរបស់រាជរដ្ឋាភិបាល» ដែលសម្តេចមហាបវរធិបតី នាយករដ្ឋមន្ត្រី បានអះអាងចំពោះមុខប្រជាជាតិ មិនមែនគ្រាន់តែជាពាក្យសម្តីទេ ប៉ុន្តែ គឺជាឆន្ទៈពិតប្រាកដ និងការប្តេជ្ញាចិត្តយ៉ាងមោះមុតរបស់រាជរដ្ឋាភិបាល ដែលបានស្តែងឡើងតាមរយៈនយោបាយការទូតយ៉ាងសកម្មរបស់ថ្នាក់ដឹកនាំយើងដើម្បីឈានទៅរកដំណោះស្រាយដោយសន្តិវិធី។ ឯកឧត្តមបន្តថា ក្នុងន័យនេះហើយដែលរាជរដ្ឋាភិបាលកម្ពុជាបានដាក់សំណើរជាច្រើនលើកទៅកាន់ភាគីថៃដើម្បីចាត់ក្រុមការងារបច្ចេកទេសចុះវាស់វែងព្រំដែនឱ្យបានឆាប់ដូចដែលបានព្រមព្រៀងគ្នា។ អ្នកនាំពាក្យរាជរដ្ឋាភិបាលគូសបញ្ជាក់ជាថ្មីថា ក្នុងស្មារតីស្រឡាញ់សន្តិភាពនិងគោរពច្បាប់អន្តរជាតិ កម្ពុជានៅតែបន្តគោរពយ៉ាងម៉ឺងម៉ាត់នូវបទឈប់បាញ់ និងគ្រប់ចំណុចនៃសេចក្តីប្រកាសរួមថ្ងៃទី២៧ ខែធ្នូ ឆ្នាំ២០២៥ ក៏ដូចជាកិច្ចព្រមព្រៀងផ្សេងទៀតដែលបានធ្វើកាលពីពេលកន្លងទៅ។ កម្ពុជាប្រកាន់ជំហរម៉ឺងម៉ាត់ក្នុងការការពារខ្សែព្រំដែនអន្តរជាតិកម្ពុជា-ថៃ ដែលបន្សល់ទុកដោយគណៈកម្មការព្រំដែនឥណ្ឌូចិន-សៀម ដោយគោរពគោលការណ៍ច្បាប់អន្តរជាតិ គោលការណ៍ខ្សែព្រំដែនមិនកែប្រែ (Uti Possidetis Juris) គោរពអនុសញ្ញា សន្ធិសញ្ញាបារាំង-សៀម ផែនទី និងកំណត់ហេតុបោះបង្គោលព្រំដែនរបស់គណៈកម្មការបោះបង្គោលព្រំដែនឥណ្ឌូចិន-សៀម ព្រមទាំងកិច្ចព្រមព្រៀង និងឯកសារពាក់ព័ន្ធនានាដែលភាគីទាំងពីរបានឯកភាពគ្នានាពេលកន្លងមក។ កម្ពុជាមិនទទួលស្គាល់ដាច់ខាតនូវការកែប្រែខ្សែព្រំដែនណាមួយដែលកើតចេញពីការប្រើប្រាស់កម្លាំងនោះឡើយ៕

ឆ្នាំ២០២៥ រដ្ឋាករទឹកក្រុងភ្នំពេញសម្រេចបានសមិទ្ធផលធំៗជាច្រើន លើការអភិវឌ្ឍ និងចែកចាយទឹកស្អាត

ភ្នំពេញ ៖ ក្នុងឆ្នាំ២០២៥, រដ្ឋាករទឹកស្វយ័តក្រុងភ្នំពេញ សម្រេចបានសមិទ្ធផលធំៗជាច្រើន នៅលើការងារពង្រីកបណ្តាញចែកចាយទឹក ការកាត់ បន្ថយអត្រាទឹកបាត់បង់ ការងារបង្កើនការផលិតទឹកស្អាត ការកើនឡើងនៃអតិថិជន និងការទទូលបានប្រាក់ចំណេញក្នុងវិស័យទឹកស្អាតនេះ ជាដើម។ឯកឧត្តម ឡុង ណារ៉ូ ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយករដ្ឋាករទឹកស្វយ័តក្រុងភ្នំពេញ លើកឡើងក្នុងពិធីបិទ សន្និបាតលទ្ធផលការងារអាជីវកម្មប៉ាន់ស្មានឆ្នាំ២០២៥ និងលើកទិសដៅកាងារឆ្នាំ២០២៦ របស់រដ្ឋាករទឹកស្វយ័តក្រុងភ្នំពេញ នៅថ្ងៃទី ២០ ខែកុម្ភៈ ឆ្នាំ២០២៦ នេះថា ជុំវិញការងារទឹកស្អាត, សម្ធិផលដែលរដ្ឋាករទឹកស្វយ័តក្រុងភ្នំពេញសម្រេចបានក្នុងឆ្នាំ២០២៥ កន្លង មករួមមាន ការដាក់ឱ្យដំណើរការររោងចក្រផលិតទឹកស្អាតតាខ្មៅ មានសមត្ថភាពផលិត៣ម៉ឺនម៉ែត្រគូប, ការងារបង្កើនការផលិតទឹកស្អាត គិតមកដល់ពេលនេះសម្រេបាន១លានម៉ែត្រគូបក្នុងមួយថ្ងៃ, ការពង្រីកនូវបណ្តាញចែកចាយទឹកស្អាតសម្រេចបានជាង៣០០ គីឡូម៉ែត្រ (គិតសរុបដល់បច្ចប្បន្នមានចំនួនជិត ៦ ពាន់គីឡូម៉ែត្រ), ការកើនឡើងនៃអតិថិជនដល់ប្រមាណជាង ៥២ ម៉ឺន, ការកាត់បន្ថយអត្រាទឹក បាត់បង់ពី ២៧ ភាគរយ មកនៅជាង ២៥ ភាគយ និងទទួលបានប្រាក់ចំណេញប្រមាណ ៩៦ ពាន់លានរៀល។ ឯកឧត្តមប្រតិភូ បន្ថែមឱ្យដឹងថា ជុំវិញការផ្គត់ផ្គង់ទឹកស្អាតវិញ គិតមកដល់បច្ចុប្បន្ន រោងចក្រទឹកស្អាតដែលស្ថិតក្រោមគម្រោង របស់រដ្ឋាករទឹកស្វយ័តក្រុងភ្នំពេញ កំពុងដំណើរមានចំនួនសរុប ៩ កន្លែង ក្នុងនោះនៅរាជធានីភ្នំពេញចំនួន ៧, រោងចក្រទឹកស្អាតម្លិច ចំនួន ១ និងរោងចក្រទឹកស្អាតនៅខេត្តត្បូងឃ្មុំ ចំនួន១ ដោយឡែកគម្រោងទឹកស្អាតនៅរាជធានីភ្នំពេញ បច្ចុប្បន្នមានសមត្ថភាពផលិត ក្នុងរង្វង់ ១ លានម៉ែត្រគូបក្នុងមួយថ្ងៃ ខណៈដែលសមត្ថភាពផ្គត់ផ្គង់ប្រចាំថ្ងៃ បានកើនឡើងដល់ ៩០ ម៉ឺនម៉ែត្រគូបក្នុងមួយថ្ងៃ។ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើកឡើងថា ជុំវិញវិស័យទឹកស្អាតនេះ គឺជាវិស័យអាទិភាពមួយ ដែលក្រសួងបាននិងកំពុងយកចិត្តទុកដាក់ ការខិតខំជំរុញនូវរបៀបវារៈគោលនយោបាយ និងកំណែទម្រង់ សំខាន់ៗជាច្រើនក្នុងវិស័យផ្គត់ផ្គង់ទឹកស្អាត ដើម្បីឱ្យរដ្ឋាករទឹកស្វយ័តក្រុងភ្នំពេញ មានតួនាទីជាយុទ្ធសាស្រ្ត និងគន្លឹះផងដែរ ជាពិសេស ការបន្តធ្វើនវានុវត្តន៍ឥតឈប់ឈរ និងការចាប់យកបច្ចេកវិទ្យា ដើម្បីដោះស្រាយបញ្ហាប្រឈម ឈានទៅបង្កើនប្រសិទ្ធភាព និងស័ក្តសិទ្ធ ភាព និងការពង្រឹករបៀបរបបការងារផ្អែកលើគុណាធិបតេយ្យ និងអភិក្រមជវភាពនៃប្រព័ន្ធតួអង្គតែមួយ, ក្រៅពីនេះត្រូវពង្រឹងលើការផ្តល់ សេវាជូនអតិថិជន ប្រកបដោយសុច្ចិតភាព៕អត្ថបទ៖ សុន រ៉ាឌី

ទិវាជាតិសុខភាពមាតា ទារក និងកុមារ អាណាព្យាបាលអំពាវនាវសប្បុរជនបន្តគាំទ្រមន្ទីរពេទ្យគន្ធបុប្ជាដើម្បីកុមារកម្ពុជា

ភ្នំពេញ ៖ ក្នុងឱកាសទិវាជាតិ សុខភាពមាតា ទារក និងកុមារ ថ្ងៃទី២១ ខែកុម្ភៈ ឆ្នាំ២០២៦នេះ ក្រុមអាណាព្យាបាល បានអំពាវនាវដល់សប្បុរជននានាទាំងក្នុងនិងក្រៅប្រទេស បន្តសកម្មភាពចូលរួមបរិច្ចាគប្រាក់ ដើម្បីជួយកុមារកម្ពុជាមានសុខភាពល្អ ជាពិសេសជួយដល់ប្រជាពលរដ្ឋដែលមានជីវភាពខ្វះខាតក្នុងការព្យាបាល។អ្នកស្រី ធី ស្រីមុំ មកពីខេត្តព្រៃវែង ក្នុងកិច្ចសម្ភាសន៍ជាមួយទូរទស្សន៍ព័ត៌មាន ប៊ីធីវី នៅព្រឹកថ្ងៃទី២១ ខែកុម្ភៈនេះ បាននិយាយឱ្យដឹងថា ក្នុងនាមជាម្តាយ នៅពេលដែលកូនៗមានបញ្ហាសុខភាព គឺតែងតែកើតក្តីបារម្មណ៍គ្រប់ពេលវេលា ជាពិសេសនៅពេលដែលកូនឈឺ និងពិបាកស្វែងរកកន្លែងព្យាបាលដែលទុកចិត្ត។ ដូច្នេះ ក្នុងឱកាសទិវាជាតិ សុខភាពមាតា ទារក និងកុមារ ២១ ខែកុម្ភៈ បានបង្ហាញការអរគុណជូនចំពោះថ្នាក់ដឹកនាំគ្រប់ជាន់ថ្នាក់នៃវិស័យរដ្ឋ និងឯកជន ក៏ដូចជាសប្បុរជនទាំងអស់ ដែលតែងតែចូលរួមគាំទ្រដល់មន្ទីរពេទ្យគន្ធបុប្ផា ដើម្បីអាចបន្តផ្តល់សេវាព្យាបាលដោយឥតគិតថ្លៃដល់កុមារបានកាន់តែប្រសើរឡើងថែមទៀត។ ស្រដៀងគ្នាខាងលើនេះ ក្រុមប្រជាពលរដ្ឋរស់នៅតំបន់ផ្សេងៗគ្នា ដែលបានទទួលសេវាពិនិត្យព្យាបាលកូន និងចៅៗ នៅមន្ទីរពេទ្យកុមារគន្ធបុប្ជា បានបង្ហាញអារម្មណ៍សប្បាយរីករាយ និងសម្តែងការអរគុណជូនចំពោះសប្បុរសជននានា ទាំងទីជិត ទីឆ្ងាយ និងនៅក្រៅប្រទេស ដែលបានរួមគ្នាជួយដល់ក្មេងៗ ជាពិសេសគឺជួយដល់ជនខ្វះខាត និងទីទាល់ ដែលគ្មានលទ្ធភាពក្នុងការព្យាបាលកូននៅពេលមានបញ្ហាសុខភាព។ យោងតាមរបាយការណ៍សង្ខេបស្ដីពីសកម្មភាពរបស់មន្ទីរពេទ្យគន្ធបុប្ផា គិតក្នុងរយៈពេលពេញ១ឆ្នាំ២០២៥ មន្ទីរពេទ្យគន្ធបុប្ផាទាំងនៅរាជធានីភ្នំពេញ និងនៅខេត្តសៀមរាប បានពិនិត្យ ពិគ្រោះ និងព្យាបាលជំងឺកុមារចំនួនជាង ១លានករណី កើនឡើង១៤% បើធៀបនឹងរយៈពេលដូចគ្នាក្នុងឆ្នាំ២០២៤កន្លងទៅ។ គិតក្នុង២០២៥ មន្ទីរពេទ្យគន្ធបុប្ផាបានចំណាយថវិកាជាង ៤៦លានដុល្លារអាម៉េរិក ដើម្បីបន្តបេសកកម្មសង្គ្រោះជីវិតទារក កុមារ និងស្រ្តីមានផ្ទៃពោះដោយឥតគិតថ្លៃ និងគ្មានការរើសអើង។សូមជម្រាបជូនថា ទិវាជាតិ សុខភាពមាតា ទារក និងកុមារ ថ្ងៃទី២១ ខែកុម្ភៈ ឆ្នាំ២០២៦ ធ្វើឡើងក្រោមប្រធានបទ ”រួមគ្នាលើកកម្ពស់គុណភាព សុវត្ថិភាព ប្រសិទ្ធភាពនៃការថែទាំផ្ទៃពោះមុនសម្រាល រួមទាំងក្នុងបរិបទមានគ្រោះអាសន្ន ឬគ្រោះមហន្តរាយ ដើម្បីធានាថា ទាំងម្តាយ និងទារក មានសុខភាពល្អ”។ នៅក្នុងសារលិខិតរបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិ នៃផែនការសកម្មភាពរួមអគ្គលេខាធិការអង្គការសហប្រជាជាតិ ដើម្បីសុខភាពស្រ្តី និងកុមារ ក្នុងឱកាសទិវាជាតិនេះ បានថ្លែងថា ការថែទាំសុខភាព, សុវត្ថិភាពផ្នែកសុខភាព និងប្រព័ន្ធភាពធន់ផ្នែកសុខភាព ពិតជាមានសារសំខាន់ស្រួចស្រាវណាស់សម្រាប់ការកសាងជាតិ និងការឈានទៅសម្រេចឱ្យបានចក្ខុវិស័យឆ្នាំ២០៥០។ ម្លោះហើយ យើងត្រូវតែនាំគ្នាវិនិយោគធនធាន និងាករខិតខំប្រឹងប្រែងរបស់យើងនៅក្នុងការលើកកម្ពស់ ប្រព័ន្ធថែទាំសុខភាព និងាករគ្របដណ្តបសេវាថែទាំសុខភាពជាសាកល, ធ្វើ ឱ្យកិច្ចការទាំងនោះកាន់តែមានលក្ខណៈបរិយាបន្ន និងមានភាពធន់៕អត្ថបទ៖ ឈិត បូរ៉ាវី

ស្ថានទូតជប៉ុនប្រចាំកម្ពុជាធ្វើសិក្ខាសាលាស្តីពីឱកាសវិនិយោគសម្រាប់ក្រុមហ៊ុនជប៉ុន នៅកម្ពុជា

ស្ថានទូតជប៉ុនប្រចាំនៅព្រះរាជាណាចក្រកម្ពុជាបានរៀបចំ “សិក្ខាសាលាស្តីពីការវិនិយោគសម្រាប់ក្រុមហ៊ុនជប៉ុន” ដោយមានក្រុមហ៊ុនជប៉ុនប្រមាណ ១៧០ក្រុមហ៊ុន ចូលរួមតាមអនឡាញផង និងទីតាំងផ្ទាល់ផង កាលពីថ្ងៃទី២០ ខែកុម្ភៈ ឆ្នាំ២០២៦ នៅរាជធានីភ្នំពេញ។នេះបើយោងតាមប្រភពរបស់ស្ថានទូតជប៉ុនប្រចាំនៅកម្ពុជា ផ្សព្វផ្សាយនៅថ្ងៃទី២១ ខែកុម្ភៈ ឆ្នាំ២០២៦នេះ។នៅក្នុងសិក្ខាសាលានោះ ឯកឧត្តមឯកអគ្គរាជទូត អ៊ូអ៊ិណុ អាត់ស៊ូស៊ី (UENO Atsushi) ឯកអគ្គរាជទូតជប៉ុនប្រចាំកម្ពុជា បានសម្តែងការរំពឹងទុកថា សិក្ខាសាលានេះនឹងក្លាយជាឱកាសមួយសម្រាប់ក្រុមហ៊ុនជប៉ុនដែលមានចំណាប់អារម្មណ៍ក្នុងការវិនិយោគនៅកម្ពុជា ក៏ដូចជាក្រុមហ៊ុនដែលមានវត្តមាននៅកម្ពុជារួចហើយ ដើម្បីពិចារណាលើការវិនិយោគថ្មី ឬពង្រីកការវិនិយោគដែលមានស្រាប់របស់ពួកគេ។

បណ្ដាញសង្គម

ព័ត៌មានថ្មីៗ

EU៖ ការដាក់ពង្រាយកងទ័ព នៅអឺរ៉ុប គឺ «ដើម្បីផលប្រយោជន៍របស់សហរដ្ឋអាមេរិក»

លោក Trump ៖ សហរដ្ឋអាមេរិកនឹងបញ្ចេញឯកសារមនុស្សពិភពផ្កាយក្នុងពេលដ៏ខ្លីខាងមុខនេះ

ជនជាតិជ្វីហ្វអង់គ្លេស ទាមទារកិច្ចប្រឹងប្រែងបន្ថែមទៀតពីរដ្ឋាភិបាល ក្រោយការវាយប្រហារដោយកាំបិត

កណ្តុររាតត្បាតជំរំតង់នៅតំបន់ហ្គាហ្សា ខាំក្មេងៗ និងធ្វើឲ្យរីករាលដាលជំងឺ

អធិការបតីអាល្លឺម៉ង់ អំពាវនាវឲ្យមាន «ភាពជាដៃគូឆ្លងមហាសមុទ្រអាត្លង់ទិកអាចទុកចិត្តបាន»

អាស៊ានប្ដេជ្ញាបញ្ចៀសការហាមឃាត់ការនាំចេញ និងចែករំលែកប្រេងឥន្ធនៈ ខណៈតម្លៃប្រេងហក់ឡើង

ប្រធានថាមពលអាមេរិក៖ អារ៉ាប៊ីសាអ៊ូឌីត និងអារ៉ាប់រួមនឹងបង្កើនការផលិតប្រេង ក្រោយជម្លោះអ៊ីរ៉ង់

ចិនគំរាមសងសឹក EU ប្រសិនបើប្លុកហាមឃាត់ឧបករណ៍របស់ក្រុមហ៊ុន Huawei

ក្រុមសិទ្ធិមនុស្ស៖ មនុស្សយ៉ាងតិច ៣៥៨នាក់ ត្រូវបានប្រហារជីវិត ក្រោមការដឹកនាំរបស់លោក គីម ជុងអ៊ុន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877