BTV NEWS

ក្រសួងការងារ នាំយកឱកាសការងារពិសេសទាំងក្នុង និងក្រៅប្រទេសជូនអតីតពលករ និងយុវជននៅក្នុងខេត្តឧត្តរមានជ័យ

សម្តេចប្រធានរដ្ឋសភា អំពាវនាវដល់ពលរដ្ឋបន្តរក្សាស្មារតីសាមគ្គីជាតិ គាំទ្ររាជរដ្ឋាភិបាល ដើម្បីប្រែក្លាយការគំរាមកំហែង និងបញ្ហាប្រឈមនានា ទៅជាឱកាសពង្រឹងសេដ្ឋកិច្ច និងខឿនការពារជាតិ

មន្ត្រីសុខាភិបាល OD មេគង្គ អំពាវនាវអាណាព្យាបាលនាំកូនៗអាយុក្រោម៥ឆ្នាំ ទៅទទួលថ្នាំបន្តក់គ្រុនស្វិតដៃជើង

អភិបាលខេត្តកោះកុង ជំរុញដល់កម្មករកម្មការិនី និងនិយោជក ចាត់ទុករោងចក្រជាឆ្នាំងបាយរួម និងជាផ្ទះទីពីរ

ព័ត៌មានជាតិ

‎រដ្ឋបាលខេត្តកំពង់ស្ពឺ ប្រារព្ធពិធីបុណ្យមាឃបូជា នៅវត្តមុនីរង្សីរតនារាម (វត្តម្រុំខាងជើង)

កំពង់ស្ពឺ៖ ថ្ងៃទី០២ ខែកុម្ភៈ ឆ្នាំ២០២៦-ឯកឧត្តម យឹម សុខុម ប្រធានក្រុមប្រឹក្សាខេត្តកំពង់ស្ពឺ ឯកឧត្តម ជាម ច័ន្ទសោភ័ណ អភិបាល នៃគណៈអភិបាលខេត្ត និងលោកជំទាវ បានអញ្ជើញជាអធិបតីក្នុងពិធីបុណ្យមាឃបូជា ដែលបានប្រារព្ធឡើងយ៉ាងអធិកអធមនៅ វត្តមុនីរង្សីរតនារាម (វត្តម្រុំខាងជើង) នាព្រឹកថ្ងៃចន្ទ ១៥កើត ខែមាឃ ឆ្នាំម្សាញ់ ត្រីស័ក ព.ស.២៥៦៩ ត្រូវនឹងថ្ងៃទី០២ ខែកុម្ភៈ ឆ្នាំ២០២៦ ស្ថិតនៅភូមិទួលគក សង្កាត់ស្វាយក្រវ៉ាន់ ក្រុងច្បារមន ពិធីនេះក៏មានការអញ្ជើញចូលរួមពីសំណាក់ ឯកឧត្តម លោកជំទាវ លោក លោកស្រី អភិបាលរងខេត្ត មន្ត្រីរាជការជុំវិញខេត្ត កងកម្លាំងប្រដាប់អាវុធ លោកគ្រូ អ្នកគ្រូ សិស្សានុសិស្ស និងបងប្អូនពុទ្ធបរិស័ទយ៉ាងច្រើនកុះករ។ការប្រារព្ធពិធីបុណ្យមាឃបូជា គឺជាការបង្ហាញពីសទ្ធាជ្រះថ្លាចំពោះព្រះរតនត្រ័យ និងជាការដឹងគុណយ៉ាងជ្រាលជ្រៅចំពោះបុព្វការីជន និងវីរកងទ័ពដែលបានពលីដើម្បីជាតិមាតុភូមិ។ យើងរួមគ្នាថែរក្សាសន្តិភាព ដើម្បីបន្តលើកកម្ពស់តម្លៃព្រះពុទ្ធសាសនា និងសីលធម៌សង្គមឱ្យកាន់តែរីកចម្រើន។ការប្រារព្ធពិធីបុណ្យនេះ មិនត្រឹមតែជាការគោរពតាមទំនៀមទម្លាប់ប្រពៃណីព្រះពុទ្ធសាសនាប៉ុណ្ណោះទេ ប៉ុន្តែថែមទាំងបង្ហាញពីការសាមគ្គីភាព និងការយកចិត្តទុកដាក់ខ្ពស់របស់រដ្ឋបាលខេត្ត ក្នុងការថែរក្សាការពារសន្តិសុខ និងសណ្ដាប់ធ្នាប់ ជូនប្រជាពលរដ្ឋក្នុងឱកាសបុណ្យទាននាន។ក្នុងឱកាសដ៏ថ្លៃថ្លានេះ ថ្នាក់ដឹកនាំខេត្ត និងពុទ្ធបរិស័ទ‎ថ្វាយគ្រឿងសក្ការបូជាដើម្បីរំលឹកដល់គុណបុណ្យព្រះសម្មាសម្ពុទ្ធ ដែលទ្រង់បានបង្កើត "ព្រះឱវាទបាតិមោក្ខ" និងការដាក់ព្រះជន្មាយុសង្ខារ។ ឯកឧត្តមគណៈអធិបតី និងសប្បុរសជន បានរួមគ្នារាប់បាត ដើម្បីប្រមូលបច្ច័យ និងចង្ហាន់ប្រគេនព្រះសង្ឃ ក្នុងគោលបំណងឧទ្ទិសកុសលផលបុណ្យជូនដល់បុព្វការីជន ញាតិការទាំងប្រាំពីរសន្តាន និងជាពិសេសគឺវិរៈកងទ័ពដែលបានពលីជីវិត ដើម្បីបុព្វហេតុការពារជាតិ មាតុភូមិ និងសន្តិភាព។ឯកឧត្តមអភិបាលខេត្ត ក៏បានមានប្រសាសន៍សង្កត់ធ្ងន់ផងដែរថា ការប្រារព្ធពិធីបុណ្យសាសនានៅថ្ងៃនេះ គឺកើតចេញពីផ្លែផ្កានៃ "សន្តិភាព" ដែលអនុញ្ញាតឱ្យប្រជាពលរដ្ឋមានសិទ្ធិសេរីភាពពេញលេញក្នុងការគោរពប្រតិបត្តិជំនឿសាសនា និងជួបជុំគ្នាធ្វើបុណ្យទានយ៉ាងសប្បាយរីករាយ។ពិធីបុណ្យមាឃបូជានេះ បានបញ្ចប់ទៅក្នុងបរិយាកាសជ្រះថ្លា និងស្នាមញញឹម ដែលបង្ហាញពីការរួបរួមគ្នាយ៉ាងរឹងមាំរវាងវិស័យពុទ្ធចក្រ និងអាណាចក្រ ក្នុងទឹកដីខេត្តកំពង់ស្ពឺផងដែរ។

ការសាងសង់ស្ពានឆ្លងកាត់ទន្លេមេគង្គ (ដីឥដ្ឋ-ថ្មគរ) សម្រេចបាន៣៩,២%ហើយ គិតត្រឹមបំណាច់ខែមករា ឆ្នាំ២០២៦

ភ្នំពេញ៖ គម្រោងសាងសង់ស្ពានឆ្លងកាត់ទន្លេមេគង្គ (ដីឥដ្ឋ-ថ្មគរ)សម្រេចបាន៣៩,២%ហើយ គិតត្រឹមបំណាច់ខែមករា ឆ្នាំ២០២៦ (រយៈពេលសាងសង់៤៨ ខែ-គ្រោងបញ្ចប់ឆ្នាំ ២០២៨)។ បើតាមការបញ្ជាក់របស់លោក ផន រឹម អ្នកនាំពាក្យក្រសួងសាធារណការ និងដឹកជញ្ជូន បញ្ជាក់នៅថ្ងៃទី២ ខែកុម្ភៈ ឆ្នាំ២០២៦នេះ។ លោក ផន រឹម បានឱ្យដឹងថា ស្ពាន ដីឥដ្ឋ-ថ្មគរ មានទីតាំងត្រើយខាងលិចស្ថិតក្នុងឃុំដីឥដ្ឋ ស្រុកកៀនស្វាយ និងត្រើយខាងកើតស្ថិតក្នុងឃុំថ្មគរ ស្រុកល្វាឯម ខេត្តកណ្តាល។ ស្ពាននេះជាទស្សនវិស័យរបស់រាជរដ្ឋាភិបាលសម្រាប់តភ្ជាប់សេដ្ឋកិច្ច ការដឹកជញ្ជូន ពីភាគខាងត្បូង និងខាងកើត រាជធានីភ្នំពេញ ដោយភា្ជប់មហាវិថី ស៊ី ជីនពីង (ក្រវាត់ក្រុងទី៣) ត្រង់ចំណុចផ្លូវជាតិលេខ១ និងព្រលានយន្តហោះថ្មី ត្រើយខាងកើតភ្ជាប់ទៅផ្លូវល្បឿនលឿនភ្នំពេញ-បាវិត។អ្នកនាំពាក្យក្រសួងសាធារណការបញ្ជាក់ថា ស្ពានឆ្លងកាត់ទន្លេមេគង្គ (ដីឥដ្ឋ-ថ្មគរ)ជាប្រភេទស្ពានបេតុង ប្រវែងស្ពាន និងផ្លូវក្បាលស្ពានសរុប: ៣ ៧០០ម៉ែត្រ តួស្ពានមានប្រវែងសរុប ១ ៦០០ ម៉ែត្រ និងទទឹង ២៦ម៉ែត្រ(៤គន្លងផ្លូវ)។ផ្លូវតភ្ជាប់ក្បាលស្ពាន ប្រវែង ២១០០ ម៉ែត្រ ទទឹងផ្លូវ ២៦ ម៉ែត្រ ក្រាលបេតុងកៅស៊ូ(AC) និងសាងសង់ផ្លូវបង្វែរទិសចរាចរណ៍៤ខ្សែ៕

នៅថ្ងៃនេះ ក្រុមលេខា RBC កម្ពុជា-ថៃ បានជួបប្រជុំគ្នានៅច្រកអន្តរជាតិជាំ-សាង៉ាំ ស្រុកអន្លង់វែង ក្រោមការសង្កេតការណ៍ពីក្រុម AOT របស់កម្ពុជា និងថៃ

នៅថ្ងៃទី២ ខែកុម្ភៈ ឆ្នាំ២០២៦ វេលាម៉ោង ១១:៥០នាទីព្រឹកនេះ ក្រុមលេខាធិការដ្ឋាននៃគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) រវាងយោធភូមិភាគទី៤ ភាគីកម្ពុជា និងកងទ័ពភូមិភាគទី២ ភាគីថៃ បានជួបប្រជុំគ្នានៅច្រកអន្តរជាតិជាំ-សាង៉ាំ ស្រុកអន្លង់វែង ខេត្តឧត្តរមានជ័យ ក្រោមការសង្កេតការណ៍ពីក្រុមអ្នកសង្កេតការណ៍អាស៊ាន (AOT) របស់កម្ពុជា និងថៃផងដែរ។ ក្រុមលេខាធិការរបស់កម្ពុជាដឹកនាំដោយ ឧត្តមសេនីយ៍ត្រី និត ណារ៉ុង នាយសេនាធិការរង យោធភូមិភាគទី៤ និងក្រុមលេខាធិការរបស់ថៃដឹកនាំដោយ ឧត្តមសេនីយ៍ត្រី កាំផាក់ណាក វ៉ាផាន់ស៊ុ នាយសេនាធិការ កងទ័ពភូមិភាគទី២។ នេះបើតាម លោកជំទាវ ឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារកម្ពុជា។អ្នកនាំពាក្យក្រសួងការពារកម្ពុជា បានឱ្យដឹងថា ដោយសារតែភាគីទាំងពីរមិនទាន់រកឃើញនូវចំណុចកណ្តាលរួមគ្នាមួយនៅឡើយ ដូច្នេះភាគីទាំងពីរបានឯកភាពគ្នាដកឃ្លាវិលត្រលប់ទៅទីបញ្ជាការរៀងខ្លួនវិញ ហើយបន្តផ្លាស់ប្តូរឯកសារ និងពិភាក្សាគ្នាឈានដល់ការឯកភាពគ្នានាពេលខាងមុខទើបមានការរៀបចំពិធីចុះហត្ថលេខា និងកិច្ចប្រជុំគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) រវាងយោធភូមិភាគទី៤ របស់កម្ពុជា និងកងទ័ពភូមិភាគទី២ របស់ថៃ ។ អ្នកនាំពាក្យក្រសួងការពារកម្ពុជាបានរំលឹកថា កិច្ចប្រជុំពិសេសនៃគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) នេះធ្វើឡើងផ្អែកតាមស្មារតីនៃសេចក្តីប្រកាសរួម នៃកិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅ (GBC) រវាងព្រះរាជាណាចក្រកម្ពុជា និងព្រះរាជាណាចក្រថៃ កាលពីថ្ងៃទី២៧ ខែធ្នូ ឆ្នាំ២០២៥ ដែលភាគីទាំងពីរបានបញ្ជាក់សាជាថ្មី អំពីការបន្តអនុវត្តយ៉ាងម៉ឺងម៉ាត់ខ្ជាប់ខ្ជួននូវលទ្ធផលនៃកិច្ចប្រជុំពិសេសនេះឱ្យបានពេញលេញ និងប្រកបដោយប្រសិទ្ធភាព ក៏ដូចជាការបន្តកិច្ចខិតខំប្រឹងប្រែងកាត់បន្ថយភាពតានតឹងតាមបណ្តោយព្រំដែន ព្រមទាំងស្វែងរកកិច្ចសហប្រតិបត្តិការជាក់ស្តែងសំដៅលើកកម្ពស់សន្តិភាព និងស្ថិរភាពរវាងប្រទេសទាំងពីរ និងឈានដល់ការវិលត្រឡប់ទៅរកប្រក្រតីភាពឡើងវិញបានឆាប់រហ័ស៕

អតិផរណាឆ្នាំ២០២៦ ស្ថិតក្នុងអត្រា ២,៣% ខណៈម្ហូបអាហារ មុខទំនិញ និងប្រេងឥន្ធនៈរំពឹងធ្លាក់ចុះ

ធនាគារជាតិនៃកម្ពុជា ព្យាករថា អត្រាអតិផរណានៅឆ្នាំ២០២៦ នឹងស្ថិតក្នុងរង្វង់ ២,៣% ទាបជាងឆ្នាំ២០២៥ ក្នុងនោះកំណើន ថ្លៃក្រុមម្ហូបអាហារនឹងថមថយមក ៣,៣%, ថ្លៃស្នូល ១,៧%, ស្របពេលដែលក្រុមទំនិញ និងសេវាពាក់ព័ន្ធនឹងប្រេងឥន្ធនៈនឹងបន្តធ្លាក់ ថ្លៃ -២,២% បើធៀបនិងឆ្នាំ២០២៥។ទស្សនវិស័យសេដ្ឋកិច្ច, យោងតាមមូលនិធិរូបិយវត្ថុអន្តរជាតិ សេដ្ឋកិច្ចពិភពលោកឆ្នាំ២០២៦ ត្រូវបានព្យាករថា មានកំណើន ៣,១% ទាបជាងឆ្នាំ២០២៥ (៣,២%) ដោយសារភាពតានតឹងភូមិសាស្ត្រនយោបាយនិងសេដ្ឋកិច្ច ភាពផុយស្រួយនៅក្នុងទីផ្សារ ហិរញ្ញវត្ថុអន្តរជាតិ ការព្រួយបារម្ភពីចីរភាពសារពើពន្ធ និងការកើនឡើងហានិភ័យពីការប្រែប្រួលអាកាសធាតុ។ ចំពោះអត្រាអតិផរណាពិភពលោក ព្យាករថា ថយចុះមក ៣,៧% នាឆ្នាំ២០២៦ (ធៀបនឹង ៤,២% ឆ្នាំ២០២៥) ដោយសារតម្រូវការសកលបាន ថមថយ ការថយចុះថ្លៃទំនិញសកល និងឥទ្ធិពលបន្សល់ទុកនៃការអនុវត្តនយោបាយរូបិយវត្ថុរឹតត្បិត របស់ធនាគារកណ្តាលធំៗ។ ចំពោះសេដ្ឋកិច្ចកម្ពុជា, ទស្សនវិស័យនៅឆ្នាំ២០២៦ ត្រូវបានព្យាករថា នឹងអាចសម្រេចបានក្នុងអត្រា ៥% កំណើននេះត្រូវ បានគាំទ្រជាចម្បងដោយ៖ កំណើនវិស័យកម្មន្តសាល, វិស័យទេសចរណ៍, កំណើនវិស័យកសិកម្ម និងការងើបឡើងសន្សឹមៗនៃវិស័យ សំណង់និងអចលនទ្រព្យ។ ទន្ទឹមនេះសេដ្ឋកិច្ចកម្ពុជាអាចបន្តប្រឈមនឹងហានិភ័យមួយចំនួន ជាពិសេសហានិភ័យខាងក្រៅដូចជា៖ ភាពតានតឹងនៃភូមិសាស្ត្រនយោបាយ ដែលធ្វើឱ្យប៉ះពាល់ដល់ខ្សែច្រវាក់ផ្គត់ផ្គង់, ឥទ្ធិពលនៃការប្រែប្រួលអាកាសធាតុ, និងការឆបោក តាមប្រព័ន្ធអនឡាញ។ ចំពោះហានីភ័យខាងក្នុងរួមមាន៖ ភាពទន់ខ្សោយនៃវិស័យសំណង់និងអចលនទ្រព្យ, ផលប៉ះពាល់ពីការអូស បន្លាយនៃជម្លោះព្រំដែនកម្ពុជា-ថៃ និងការកើនឡើងឥណទានមិនដំណើរការ។ចំណែកអត្រាអតិផរណានៅឆ្នាំ២០២៦ ត្រូវបានព្យាករថា នឹងថមថយបន្តិចមក ២,៣% (ធៀបនឹង ២,៥% នៅឆ្នាំ២០២៥) ដែលក្នុងនោះកំណើនថ្លៃក្រុមម្ហូបអាហារនឹងថមថយមក ៣,៣% (ធៀបនឹង ៣,៧%) និងអតិផរណាស្នូលនឹងថមថយមក ១,៧% (ធៀបនឹង ១,៩%) ស្របពេលដែលក្រុមទំនិញនិងសេវាពាក់ព័ន្ធនឹងប្រេងឥន្ធនៈនឹងបន្តធ្លាក់ថ្លៃ -២,២% (ធៀបនឹង -១,៧%)។ ការ ថមថយនេះត្រូវបានព្យាករក្រោមកត្តាសន្មតដូចជា៖ ភាពប្រសើរឡើងនៃវិស័យកសិកម្ម និងការស្ដារឡើងវិញនៃខ្សែច្រវាក់ផ្គត់ផ្គង់ ក្រោយការផ្ទុះអាវុធកម្ពុជា-ថៃលើកទី២, ប្រាក់រៀលនឹងមានស្ថិរភាពធៀបនឹងដុល្លារអាមេរិក, និងថ្លៃប្រេងឆៅពិភពលោកនឹងបន្តធ្លាក់ ចុះ ដោយសារកំណើនផលិតកម្មប្រេង ជាពិសេសពីបណ្តាប្រទេសក្រៅពី OPEC+។ ទោះយ៉ាងណា កត្តាមួយចំនួននឹងចូលរួមបង្កើន សម្ពាធអតិផរណាមួយផ្នែកដែលរួមមាន៖ ការងើបឡើងវិញនៃសកម្មភាពសេដ្ឋកិច្ច ជាពិសេសវិស័យទេសចរណ៍ និងវិស័យកម្មន្តសាល ដែលនឹងជំរុញតម្រូវការ ការកើនឡើងនៃកម្លាំងទិញរបស់ពលករដែលបានវិលត្រឡប់មកពីប្រទេសថៃ បន្ទាប់ពីទទួលបានការងារធ្វើ និងការរំពឹងទុកនៃការទម្លាក់អត្រា ការប្រាក់គោលរបស់ធនាគារកណ្តាលសហរដ្ឋអាមេរិក ដែលអាចជំរុញកំណើនឥណទាន៕ អត្ថបទ៖ សុន រ៉ាឌី

ប្រជាពលរដ្ឋ និងសមាជិកវេទិកាសន្តិភាពកម្ពុជា ចូលរួមបរិច្ចាគឈាមស្ម័គ្រចិត្តដើម្បីសង្គ្រោះជីវិត

នៅព្រឹកថ្ងៃទី ០២ ខែកុម្ភៈ ឆ្នាំ ២០២៦នេះ ប្រជាពលរដ្ឋ ក៏ដូចជាសមាជិក សមាជិការបស់វេទិកាសន្តិភាពកម្ពុជា ជាច្រើនរយនាក់ បានចូលរួមបរិច្ចាគឈាមដោយស័្មគ្រចិត្ត ដើម្បីសង្គ្រោះជីវិតប្រជាពលរដ្ឋទូទៅ ក៏ដូចជាសម្រាប់ការផ្គត់ផ្គង់តម្រូវការជួយដល់វីរកងទ័ពជួរមុខ។ ការបរិច្ចាគឈាមនេះ រៀបចំឡើងនៅ សង្កាត់ គោកឃ្លាង ខណ្ឌសែនសុខ រាជធានីភ្នំពេញ។ការបរិច្ចាគឈាមនេះ ធ្វើឡើងក្នុងគោលបំណងសំខាន់រួមមួយ គឺបង្ហាញពីសាមគ្គីភាព បង្ហាញពីភាពស្ម័គ្រចិត្ត របស់ប្រជាពលរដ្ឋ ក៏ដូចជាសាមជិក សមាជិកានៃវេទិកាសន្តិភាពកម្ពុជា ក្រោមប្រធានបទ រួមគ្នាបរិច្ចាគឈាមដើម្បីសង្គ្រោះជីវិត។ ការបរិច្ចាគឈាមនេះ ត្រូវបានរៀបចំឡើងដោយ មានការចូលរួមពីមជ្ឈមណ្ឌលជាតិផ្ដល់ឈាម ក៏ដូចជាការចូលរួមពី ក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី។ក្នុងការបរិច្ចាគឈាមនាថ្ងៃនេះ ឯកឧត្តម សួន សេរីរដ្ឋា ប្រធានក្រុមប្រឹក្សាភិបាលនៃ វេទិកាសន្តិភាពកម្ពុជា លើកឡើងថា នេះជាការចូលរួមរបស់បុគ្គលម្នាក់ៗ ដើម្បីជួយសង្គ្រោះជីវិតអ្នកដែលមានតម្រូវការឈាមជាចាំបាច់។ ឯកឧត្តម លើកឡើងដែរថា ការបរិច្ចាគឈាមនាពេលនេះ ក្រៅពីបំពេញតម្រូវការសម្រាប់ប្រជាពលរដ្ឋទូទៅ នេះក៏ជាការដែលផ្គត់ផ្គង់សម្រាប់តម្រូវការដល់កងទ័ពជួរមុខផងដែរ។ ឯកឧត្តមថា នេះជាការផ្សាភ្ជាប់រវាងកងទ័ពជួរមុខ និងប្រជាពលរដ្ឋនៅជួរក្រោយ។សម្រាប់អ្នកបានចូលរួមបរិច្ចាគឈាមនាពេលនេះ មានទាំងអ្នកធ្លាប់បរិច្ចាគឈាមកន្លងទៅ និងមានទាំងអ្នកបរិច្ចាគឈាមលើកដំបូង។ ពួកគេម្នាក់ៗបរិច្ចាគឈាមដោយស័្មគ្រចិត្ត បរិច្ចាគឈាមខដោយស្នាមញញឹម ដោយភាពជឿជាក់ជាក់ថា ឈាមរបស់ពួកគេនឹងអាចជួយសង្គ្រោះជីវិតមនុស្សដែលត្រូវការឈាមជាចាំបាច់។ ពួកគាត់ក៏សំណូមពរ ទៅប្រជាពលរដ្ឋដទៃ ចូលរួមបរិច្ចាគឈាមដោយស្ម័គ្រចិត្តឱ្យកាន់តែច្រើន។ក្នុងឱកាសចូលរួមកម្មវិធីបរិច្ចាគឈាមនៅថ្ងៃនេះដែរ លោកវេជ្ជបណ្ឌិត សុខ ប៉ូ នាយកមជ្ឈមណ្ឌលជាតិផ្ដល់ឈាម លើកឡើងថា តម្រូវការឈាមនៅកម្ពុជាក្នុងពេលបច្ចុប្បន្នមានចំនួនធំធេង។ ជាក់ស្ដែងកម្ពុជា ត្រូវការឈាមមួយប្លោក រៀងរាល់ ៣នាទីម្ដង។ លោកវេជ្ជបណ្ឌិតលើកទឹកចិត្តឱ្យមានការបរិច្ចាគឈាមដោយស្ម័គ្រចិត្ត កាន់តែច្រើន និងទៀងទាត់ ទោះបច្ចុប្បន្នកំណើនការស្ម័គ្រចិត្តបរិច្ចាគឈាមមានការកើនឡើងមួយចំនួនក្ដី។ក្នុងនាមជានាយកមជ្ឈមណ្ឌលជាតិផ្ដល់ឈាម លោកវេជ្ជបណ្ឌិតបញ្ជាក់ដែរថា ការបរិច្ចាគឈាមគឺផ្ដល់ជាអត្ថប្រយោជន៍សម្រាប់ខ្លួនឯង ដឹងច្បាស់ពីសុខភាពខ្លួនឯង ក៏ដូចជាអត្ថប្រយោជន៍សម្រាប់សង្គមជាតិ ដែលជាការចូលរួមជួយជីវិតមនុស្សដទៃឱ្យរួចផុតពីគ្រោះមរណៈ។ លើសពីនេះ បើគិតលើផ្លូវសាសនា ការបរិច្ចាគឈាម ជាការធ្វើបុណ្យមួយដ៏ប្រពៃ។ អត្ថបទ៖គឹម ហុក

រដ្ឋាភិបាលយកចិត្តទុកដាក់ខ្ពស់ចំពោះពលរដ្ឋភៀសសឹក ខណៈជាង ៥៤ម៉ឺននាក់ហើយបានត្រឡប់ទៅផ្ទះវិញ

រាជរដ្ឋាភិបាលកំពុងបន្តយកចិត្តទុកដាក់ខ្ពស់ចំពោះប្រជាពលរដ្ឋភៀសសឹក ជាមួយនឹងការការពារបូរណភាពទឹកដីយ៉ាងសកម្មខ្លាំងក្លាតាមមធ្យោបាយការទូត និងច្បាប់អន្តរជាតិ ខណៈគិតមកទល់ពេលនេះមានជនភៀសសឹកប្រមាណជា ៨៣% ឬស្មើ ជាង៥៤ម៉ឺននាក់ហើយបានវិលត្រឡប់ទៅកាន់ផ្ទះសំបែងវិញក្នុងចំណោមជនភៀសសឹកជាង៦៤ម៉ឺននាក់។ ឯកឧត្តម ប៉ែន បូណា អ្នកនាំពាក្យរាជរដ្ឋាភិបាលកម្ពុជា បានឱ្យដឹង តាមរយៈសន្និសីទសារព័ត៌មាននៅថ្ងៃទី២ ខែកុម្ភៈ ឆ្នាំ២០២៦នេះថា ជាក់ស្ដែង សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា កាលពីថ្ងៃទី៣១ ខែមករា ឆ្នាំ ២០២៦ បានអញ្ជើញចុះជួបសំណេះសំណាល និងសួរសុខទុក្ខបងប្អូនប្រជាពលរដ្ឋភៀសសឹកក្នុងខេត្តព្រះវិហារដែលរងគ្រោះដោយសង្គ្រាមឈ្លានពានរបស់ថៃ នៅមណ្ឌលសុវត្ថិភាពវត្តបាក់កាំ ចំនួន ៥៤០ គ្រួសារ មណ្ឌលសុវត្ថិភាពវត្តពោធិ៍សាល (ហៅវត្តគីឡូលេខ៨) ចំនួន ១ ២៨២ គ្រួសារ និងនៅមណ្ឌលសុវត្ថិភាពវត្តកំពង់សង្កែចំនួន ៧៧៤ គ្រួសារ។ សរុបទាំងអស់ចំនួន ២ ៥៩៦ គ្រួសារ។ ក្នុងឱកាសនោះសម្ដេចធិបតី បានបញ្ជាក់ជូនបងប្អូនជនភៀសសឹកថា រាជរដ្ឋាភិបាលបានគិតគូរយ៉ាងយកចិត្តទុកដាក់ចំពោះផលប៉ះពាល់របស់បងប្អូនភៀសសឹកដោយបានដាក់ចេញនូវវិធានការចាំបាច់ចំនួន៣ គឺ៖ ទី១ សម្រាប់បងប្អូនជនភៀសសឹកដែលអាចវិលត្រឡប់ទៅលំនៅឋានវិញបាន៖ ក្រសួងស្ថាប័នពាក់ព័ន្ធ ជាពិសេសក្រសួងការពារជាតិ ក្រសួងមហាផ្ទៃ និងអាជ្ញាធរមូលដ្ឋាន បាននិងកំពុងខ្នះខ្នែងរៀបចំសម្របសម្រួលឱ្យជនភៀសសឹកអាចវិលត្រឡប់ទៅលំនៅឋានវិញបានកាន់តែឆាប់តាមដែលអាចធ្វើទៅបាន។ ទី២ ចំពោះបងប្អូនជនភៀសសឹកដែលមិនទាន់អាចត្រឡប់ទៅលំនៅឋានវិញបាន ដោយសារស្ថានភាពមិនទាន់អំណោយផល៖ ចំពោះមុខនេះរាជរដ្ឋាភិបាលតាមរយៈក្រសួង ស្ថាប័នពាក់ព័ន្ធបាននិងកំពុងគិតគូរពង្រឹងជម្រកបណ្តោះអាសន្ន ឬក្នុងករណីចាំបាច់អាចផ្លាស់ប្តូរជម្រកបណ្តោះអាសន្នរបស់បងប្អូនទៅកាន់ទីតាំងដែលមានភាពប្រសើរជាងបច្ចុប្បន្ន និងទី៣ ចំពោះហេដ្ឋារចនាសម្ព័ន្ធនៅក្នុងមូលដ្ឋាន និងសាធារណៈដែលបានរងការខូចខាត ក្រុមការងារចំពោះកិច្ចបាននិងកំពុងវាយតម្លៃផលខូចខាតទាំងនេះ ហើយរាជរដ្ឋាភិបាលនឹងប្រើប្រាស់ធនធានទាំងថវិកាជាតិ និងថវិកាពីដៃគូអភិវឌ្ឍន៍ ដើម្បីស្តារឡើងវិញនូវហេដ្ឋារចនាសម្ព័ន្ធទាំងនេះឱ្យបានឆាប់រហ័សបំផុត តាមស្ថានភាពជាក់ស្តែង។សូមបញ្ជាក់ថា អញ្ជើញចុះជួបសំណេះសំណាល និងសួរសុខទុក្ខបងប្អូនប្រជាពលរដ្ឋភៀសសឹកក្នុងខេត្តព្រះវិហារ សម្ដេចធិបតីនាយករដ្ឋមន្រ្ដីបានបញ្ជាក់ថា ជាគោលការណ៍អាទិភាពរបស់រាជរដ្ឋាភិបាលកម្ពុជា មាន២ គឺ ការពារទឹកដី និងសុខសុវត្ថិភាពរបស់ប្រជាពលរដ្ឋ។ ដូចនេះអ្វីៗដែលរាជរដ្ឋាភិបាលបាននឹងកំពុងធ្វើ គឺជាសាក្ខីភាពច្បាស់អំពីការយកចិត្តទុកដាក់ខ្ពស់ពីថ្នាក់ដឹកនាំ ក្រុមការងារគ្រប់លំដាប់ថ្នាក់ ពិសេសអាជ្ញាធរមូលដ្ឋានបានប្រើប្រាស់កម្លាំងសរុបរួមគ្នា គ្រប់យន្តការ សំដៅធានាដល់ការបម្រើ និងផ្តល់ជម្រកសុវត្ថិភាពជូនដល់ប្រជាពលរដ្ឋហើយនឹងឈានឆ្ពោះទៅស្តារឡើងវិញឱ្យបានល្អប្រសើរ៕

ប្រជាពលរដ្ឋចំនួនជាង៦០០នាក់ ទទួលបានលទ្ធផលល្អក្នុងវេទិកាការងារនៅខេត្តសៀមរាប

តាមរយៈកម្មវិធីវេទិកាការងារ សន្តិសុខសង្គម និងបណ្ដុះបណ្ដាលវិជ្ជាជីវ: នៅខេត្តសៀមរាប ដែលសហការរៀបចំដោយ ក្រសួងការងារ និងបណ្តុះបណ្តាលវិជ្ជាជីវៈ កាលពីសប្តាហ៍កន្លងទៅនេះ ប្រជាពលរដ្ឋដែលបានដាក់ពាក្យ និងជាប់ការងារ (បឋម) មានចំនួន ៦៤៣នាក់។ឯកឧត្តម ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ប្រាប់ព័ត៌មានប៊ីធីវី នៅព្រឹកថ្ងៃទី២ ខែកុម្ភៈនេះឱ្យដឹងថា វេទិកាការងារ សន្តិសុខសង្គម និងបណ្ដុះបណ្ដាលវិជ្ជាជីវ: រយៈពេល២ថ្ងៃកន្លងទៅនេះ នៅខេត្តសៀមរាប ត្រូវបានបញ្ចប់ទៅដោយរលូន និងទទួលបានអ្នកចូលរួមស្វែងយល់អំពីឱកាសការងារ ក៏ដូចជាអត្ថប្រយោជន៍ផ្សេងទៀតក្នុងវិស័យការងារចំនួន ១ ៥៩៥នាក់។ ឯកឧត្តមអ្នកនាំពាក្យ បានលើកឡើងថា ជាការកត់សម្គាល់នៅក្នុងកម្មវិធីវេទិកាការងារនេះ អតីតពលករ ក៏ដូចជាក្រុមគ្រួសារពួកគាត់ និងអាជ្ញាធរ មានការសប្បាយរីករាយខ្លាំងមែនទែន ចំពោះយុទ្ធនាការរបស់ក្រសួងការងារ ដែលជួយស្វែងរកការងារដល់ពួកគាត់ទៅដល់របងផ្ទះតែម្តង ពីព្រោះថា មានការងារទៅដល់កន្លែង ថែមទទួលបានការដឹកជញ្ជូនដោយឥតគិតថ្លៃ និងអាហារផ្សេងៗថែមទៀត។ ឯកឧត្តម ស៊ុន មេសា បានបន្តថា “នេះជាការបង្ហាញពីការយកចិត្តទុកដាក់របស់រាជរដ្ឋាភិបាលទៅដល់ប្រជាពលរដ្ឋ ជាពិសេសអតីតពលករដែលបានវិលមកពីប្រទេសថៃ ដែលពួកគាត់ធ្លាប់មានកូនចិត្តគិតថា អាចពិបាកក្នុងការរកការងារធ្វើពេលមកដល់ស្រុកកំណើតវិញ ប៉ុន្តែផ្ទុយទៅវិញឱកាសការងារមានច្រើនផ្តល់ជូនពួកគាត់ ហើយគាត់ក៏មានជំរើសជ្រើសរើសច្រើន ហើយមិនត្រឹមតែប៉ុណ្ណោះ ពួកគាត់គឺបានដឹងអត្ថប្រយោជន៍ជាច្រើននៅក្នុងប្រទេសកម្ពុជា ជាពិសេសរបបការថែទាំសុខភាព របបហានិភ័យការងារ (គ្រោះថ្នាក់ការងារ) និងរបបប្រាក់សោធននិវត្តន៍ (ប្រាក់រឺត្រែត) ដែលគាត់មិនដែលមានទេ ហើយគាត់ក៏បានសម្តែងការអរគុណដល់រាជរដ្ឋាភិបាលដែលមានការយកចិត្តទុកដាក់ និងគិតគូរទៅដល់ពួកគាត់ សម្រាប់ប្រែក្លាយជីវភាពពួកគាត់ឱ្យកាន់តែប្រសើរឡើងថែមទៀត”។ឯកឧត្តម ស៊ុន មេសា បានបញ្ជាក់បន្ថែមថា ឆ្នាំ២០២៦នេះ ក្រសួងការងារ និងបណ្តុះបណ្តាលវិជ្ជាជីវៈ នឹងរៀបចំវេទិកាការងារចំនួនប្រមាណ៦០លើក នៅខេត្តធំៗប្រមាណ១៤។ ហើយនៅសប្តាហ៍នេះ ក្រសួងការងារនឹងបន្តយុទ្ធនាការនៅខេត្តប៉ៃលិន និងខេត្តបាត់ដំបង។ ឯកឧត្តមក៏បានអំពាវនាវទៅដល់ប្រជាពលរដ្ឋទាំងអស់ ក៏ដូចជាអតីតពលករមកពីថៃនៅក្នុងមូលដ្ឋាន សូមចូលរួមវេទិកាការងារនេះឱ្យបានច្រើនកុះករ ដើម្បីទទួលបានព័ត៌មានកាន់តែលម្អិត និងស្តាប់នូវអត្ថប្រយោជន៍ជាច្រើនផ្សេងទៀតដែលរាជរដ្ឋាភិបាលផ្តល់ជូន។សូមជម្រាបថា បច្ចុប្បន្ននេះតម្រូវកម្លាំងពលកម្មនៅកម្ពុជាដែលកំពុងរង់ចាំអ្នកស្វែងរកការងារមានចំនួនជិត ៩ម៉ឺនកន្លែង ក្នុងនោះការងារដែលមានតម្រូវការខ្ពស់ ភាគច្រើនមកពីវិស័យឧស្សាហកម្ម កសិកម្ម កសិ-ឧស្សាហកម្ម សំណង់ និងសេវាកម្ម-ល- ។ គិតមកដល់ពេលនេះ ប្រជាពលរដ្ឋខ្មែរដែលបានចាកចេញពីប្រទេសថៃ មានចំនួនកើនឡើងជិត ១លាននាក់ ដើម្បីវិលត្រឡប់មកស្វែងរកការងារ ក៏ដូចជាមករស់នៅក្នុងប្រទេសកម្ពុជាវិញ។ ក្នុងនោះ អ្នកទទួលបានការងារធ្វើក្នុងស្រុកមានចំនួនជាង ៦០ម៉ឺននាក់៕ អត្ថបទ៖ ឈិត បូរ៉ាវី

អគ្គលេខាធិការព្រឹទ្ធសភា អញ្ជើញស្វាគមន៍ និងជូនកន្ត្រកផ្កាដល់ឯកឧត្តមប្រធានព្រឹទ្ធសភាប៉ាគីស្ថាន ក្នុងឱកាសអញ្ជើញដឹកនាំគណៈប្រតិភូមកបំពេញទស្សនកិច្ចផ្លូវការនៅកម្ពុជា

ភ្នំពេញ៖ នៅព្រឹកថ្ងៃ ទី២ ខែកុម្ភៈ ឆ្នាំ២០២៦ ឯកឧត្តម ឡាយ សំកុល អគ្គលេខាធិការព្រឹទ្ធសភា បានអញ្ជើញទទួលស្វាគមន៍ និងជូនកន្ត្រកផ្កាដល់ឯកឧត្តម ស៊ីយ៉េដ យូសាហ្វ រ៉ាសា ហ្គីឡានី (Syed Yusuf Raza Gillani) ប្រធានព្រឹទ្ធសភា នៃសាធារណរដ្ឋអ៊ីស្លាមប៉ាគីស្ថាន និងជាប្រធានស្ថាបនិក នៃសន្និសីទប្រធានសភានៃអន្តរសភា (ISC) នៅសណ្ឋាគារHyatt Regency Phnom Penh ក្នុងឱកាសដែលឯកឧត្តមដឹកនាំគណៈប្រតិភូព្រឹទ្ធសភាប៉ាគីស្ថាន អញ្ជើញមកបំពេញទស្សនកិច្ចផ្លូវការនៅព្រះរាជាណាចក្រកម្ពុជា ពីថ្ងៃទី២-៥ ខែកុម្ភៈ ឆ្នាំ២០២៦៕

សម្ដេចតេជោ និងសម្ដេចធិបតី អនុមោទនាបុណ្យមាឃបូជា ខណៈកម្ពុជាប្រារព្ធនៅតាមទីវត្តអារាមទូទាំងប្រទេសដើម្បីរំលឹកដល់ថៃ្ងព្រះសម្មាសម្ពុទ្ធទ្រង់ប្រកាសបង្កើតព្រះពុទ្ធសាសនាឡើងក្នុងលោក

ភ្នំពេញ៖ នៅថ្ងៃចន្ទ ១៥កើត ខែមាឃ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២ ខែកុម្ភៈ ឆ្នាំ២០២៦ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា ក៏ដូចជាប្រជាពលរដ្ឋខ្មែរជាពុទ្ធសាសនិក បានអនុមោទនាបុណ្យថ្ងៃមាឃបូជា ខណៈពិធីបុណ្យនេះវត្តអារាមនានានៅទូទាំងប្រទេសកម្ពុជាតែងតែប្រារព្ធឡើងជារៀងរាល់ឆ្នាំដើម្បីរំលឹកដល់ថៃ្ងដែលព្រះសម្មាសម្ពុទ្ធទ្រង់ប្រកាសបង្កើតព្រះពុទ្ធសាសនាឡើងក្នុងលោក។តាមរយៈសារនៅលើបណ្ដាញសង្គមហ្វេសប៊ុក សម្ដេចតេជោ ហ៊ុន សែន បានអនុមោទនាពិធីបុណ្យ មាឃបូជានៅថ្ងៃនេះ និងបានបញ្ជាក់ថា បុណ្យ មាឃបូជា គឺជាពិធីបុណ្យដ៏សំខាន់មួយនៅក្នុងព្រះពុទ្ធសាសនា។ ពិធីនេះត្រូវបានប្រារព្ធឡើងដើម្បីរំលឹកដល់ថៃ្ងដែលព្រះសម្មាសម្ពុទ្ធទ្រង់ប្រកាសបង្កើតព្រះពុទ្ធសាសនាឡើងក្នុងលោក នៅប្រទេសឥណ្ឌាកាលពី ៥៨៨ឆ្នាំ មុនគ្រិស្តសករាជ នាថៃ្ង១៥កើត ខែមាឃ ក្រោយពីការត្រាស់ដឹងរបស់ព្រះអង្គចំនួន ៩ខែគត់។សម្ដេចតេជោ បានបញ្ជាក់ថា ការប្រារព្ធពិធីបុណ្យ មាឃបូជានេះឡើងគឺដើម្បីប្រារព្ធនូវព្រឹត្តិការណ៏ធំៗ៣គឺ៖ ១- ដើម្បីប្រារព្ធនូវការធ្វើចតុរង្គសន្និបាតប្រកបដោយអង្គបួន ២- ដើម្បីប្រារព្ធថ្ងៃដែលព្រះអង្គទ្រង់សម្តែងឱវាទបាតិមោក្ខ ៣- ដើម្បីប្រារព្ធថ្ងៃដែលព្រះអង្គទ្រង់ដាក់អាយុសង្ខារ។សម្រាប់ឆ្នាំនេះ ពិធីបុណ្យមាឃបូជា នៅតាមទីវត្តអារាមនានានៅទូទាំងប្រទេសកម្ពុជា មានរៀបចំគ្រឿងរណ្ដាប់មានផ្កាភ្ញី ទៀន ធូប និងឮតែសំឡេងសូរស័ព្ទព្រះធម៌ ក្នុងការប្រារព្ធពិធីបុណ្យសាសនាមួយនេះ។សម្ដេចតេជោជូនពរដល់ពុទ្ធសាសនិកទាំងឡាយ អញ្ជើញចូលរួមក្នុងពិធីបុណ្យ មាឃបូជានេះដោយសទ្ធាជ្រះថ្លារៀងៗខ្លួន៕

រដ្ឋមន្រ្តីក្រសួងប្រៃសណីយ៍៖ រាជរដ្ឋាភិបាលតែងផ្តោតការយកចិត្តទុកដាក់លើការអភិវឌ្ឍធនធានមនុស្សជំនាញបច្ចេកវិទ្យាឌីជីថល ដើម្បីឆ្លើយតបទៅនឹងការវិវត្តន៍នៃបច្ចេកវិទ្យាឌីជីថល

ឯកឧត្តម ជា វ៉ាន់ដេត រដ្ឋមន្រ្តីក្រសួងប្រៃសណីយ៍និងទូរគមនាគមន៍ (ក.ប.ទ.) បានថ្លែងថា រាជរដ្ឋាភិបាលដែលមាន ក.ប.ទ. ជាសេនាធិការ តែងតែផ្តោតការយកចិត្តទុកដាក់លើការអភិវឌ្ឍធនធានមនុស្សជំនាញបច្ចេកវិទ្យាឌីជីថល និងការកសាងលិខិតបទដ្ឋានពាក់ព័ន្ធ ដើម្បីឆ្លើយតបទៅនឹងការវិវត្តន៍ នៃបច្ចេកវិទ្យាឌីជីថល។ឯកឧត្តមរដ្ឋមន្រ្តី បានថ្លែងយ៉ាងដូច្នេះក្នុងឲ្យកាសអញ្ជើញថ្លែងសុន្ទរកថាគន្លឹះក្នុង “ពិធីអបអរសាទរខួប ២៥ឆ្នាំ នៃការបង្កើតអង្គការប្រព័ន្ធទិន្នន័យកម្ពុជា (Digital Divide Data-DDD) កាលពីរសៀលថ្ងៃទី៣១ ខែមករា ឆ្នាំ២០២៦ ដោយកម្មវិធីនេះក៏មានការអញ្ជើញចូលរួមពីសំណាក់លោក Jeremy Hockenstein ប្រធានក្រុមប្រឹក្សាភិបាល លោក Sameer Raina នាយកប្រតិបត្តិ នៃអង្គការ DDD ថ្នាក់ដឹកនាំ ក.ប.ទ. ភ្ញៀវជាតិ អន្តរជាតិ បុគ្គលិក និងអតីតបុគ្គលិក នៃអង្គការ DDD សរុបប្រមាណ ១២០០នាក់ នៅអគារសាលកោះពេជ្រ។ក្នុងឱកាសនោះឯកឧត្តមរដ្ឋមន្រ្តី បានថ្លែងកោតសរសើរចំពោះកិច្ចខិតខំប្រឹងប្រែងរបស់អង្គការ DDD ក្នុងបណ្តុះបណ្តាលធនធានមនុស្សជំនាញឌីជីថល ជាពិសេសផ្នែកទិន្នន័យដែលគិតមកដល់ពេលនេះ បុគ្គលិក និងអតីតបុគ្គលិករបស់អង្គការ DDD ចូលរួមយ៉ាងសកម្មក្នុងទីផ្សារការងារលើជំនាញនេះ ទាំងក្នុង និងក្រៅប្រទេស។ ឯកឧត្តមរដ្ឋមន្រ្តី បន្តថារាជរដ្ឋាភិបាលដែលមាន ក.ប.ទ. ជាសេនាធិការ តែងតែផ្តោតការយកចិត្តទុកដាក់លើការអភិវឌ្ឍធនធានមនុស្សជំនាញបច្ចេកវិទ្យាឌីជីថល និងការកសាងលិខិតបទដ្ឋានពាក់ព័ន្ធ ដើម្បីឆ្លើយតបទៅនឹងការវិវត្តន៍នៃបច្ចេកវិទ្យាឌីជីថល ដែលគឺជាឃ្នាស់នៃការអភិវឌ្ឍសេដ្ឋកិច្ច និងសង្គម។បន្ថែមលើនេះ ឯកឧត្តមរដ្ឋមន្រ្តីបានគូសបញ្ជាក់ថា រាជរដ្ឋាភិបាល បានធ្វើជាគំរូក្នុងការប្រើប្រាស់បច្ចេកវិទ្យាឌីជីថលនៅក្នុងប្រតិបត្តិការផ្ទៃក្នុង ដើម្បីពង្រឹងប្រសិទ្ធភាពការងារ និងការផ្តល់សេវាសាធារណៈឱ្យបានកាន់តែល្អប្រសើរជូនប្រជាពលរដ្ឋនិងវិស័យឯកជន។ លើសពីនេះ រាជរដ្ឋាភិបាល បានផ្តោតលើអាទិភាពចម្បងចំនួន ៣ រួមមាន (១) ការអភិវឌ្ឍ និងការប្រើប្រាស់ថ្នាលរដ្ឋាភិបាលឌីជីថល (២) ការរៀបចំច្បាប់និងគោលនយោបាយ និង (៣) ការអភិវឌ្ឍមូលធនមនុស្សឌីជីថល និងការលើកស្ទួយអក្ខរកម្មឌីជីថល។មុននឹងបញ្ចប់ ឯកឧត្តមរដ្ឋមន្រ្តី បានលើកទឹកចិត្តដល់ អង្គការ DDD បន្តបេសកកម្មរបស់ខ្លួនក្នុងការបណ្តុះបណ្តាលធានធានមនុស្សលើផ្នែកបច្ចេកវិទ្យាឌីជីថល សំដៅរួមចំណែកដល់អភិវឌ្ឍសេដ្ឋកិច្ច និងសង្គមឌីជីថលកម្ពុជាប្រកបដោយភាពរស់រវើក៕

បណ្ដាញសង្គម

ព័ត៌មានថ្មីៗ

អនុប្រធានសមាគមអតីតយុទ្ធជន អញ្ជើញក្នុងពិធីប្រគល់-ទទួលថវិកា ៥០០,០០០ ដុល្លារ ពីក្រុមហ៊ុន ជីប ម៉ុង ដើម្បីសាងសង់ផ្ទះចំនួន ១០០ខ្នងជូនអតីតយុទ្ធជន និងនិវត្តជន

កសិដ្ឋានផ្សិតប៊ូតុង ប្រើបច្ចេកវិទ្យាខ្ពស់ ដើម្បីផ្គត់ផ្គង់ផ្សិតមានគុណភាពល្អដល់ទីផ្សារកម្ពុជា

ជនជាតិចិន ៣១៩នាក់ ពាក់ព័ន្ធករណីឆបោកតាមប្រព័ន្ធបច្ចេកវិទ្យា (Online Scams) ត្រូវបានបណ្ដេញចេញពីកម្ពុជា

នាយករដ្ឋមន្ត្រី៖ លីបង់លីបង់កំពុងស្វែងរកការពង្រីងនូវការអនុវត្តបទឈប់បាញ់ជាមួយអ៊ីស្រាអែល មុនពេលការចរចាជុំបន្ទាប់

សហភាពអឺរ៉ុប អនុញ្ញាតឱ្យក្រុមហ៊ុនអាកាសចរណ៍អឺរ៉ុប ប្រើប្រាស់ប្រេងឥន្ធនៈយន្តហោះរបស់អាមេរិកដើម្បីកាត់បន្ថយបញ្ហាកង្វះប្រេង

លោកTrump៖ សហរដ្ឋអាមេរិក រំពឹងថានឹងមានការឆ្លើយតបពីអ៊ីរ៉ង់ចំពោះសំណើរបស់អាមេរិក

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានជាតិ

‎រដ្ឋបាលខេត្តកំពង់ស្ពឺ ប្រារព្ធពិធីបុណ្យមាឃបូជា នៅវត្តមុនីរង្សីរតនារាម (វត្តម្រុំខាងជើង)

ការសាងសង់ស្ពានឆ្លងកាត់ទន្លេមេគង្គ (ដីឥដ្ឋ-ថ្មគរ) សម្រេចបាន៣៩,២%ហើយ គិតត្រឹមបំណាច់ខែមករា ឆ្នាំ២០២៦

អតិផរណាឆ្នាំ២០២៦ ស្ថិតក្នុងអត្រា ២,៣% ខណៈម្ហូបអាហារ មុខទំនិញ និងប្រេងឥន្ធនៈរំពឹងធ្លាក់ចុះ

ប្រជាពលរដ្ឋ និងសមាជិកវេទិកាសន្តិភាពកម្ពុជា ចូលរួមបរិច្ចាគឈាមស្ម័គ្រចិត្តដើម្បីសង្គ្រោះជីវិត

រដ្ឋាភិបាលយកចិត្តទុកដាក់ខ្ពស់ចំពោះពលរដ្ឋភៀសសឹក ខណៈជាង ៥៤ម៉ឺននាក់ហើយបានត្រឡប់ទៅផ្ទះវិញ

ប្រជាពលរដ្ឋចំនួនជាង៦០០នាក់ ទទួលបានលទ្ធផលល្អក្នុងវេទិកាការងារនៅខេត្តសៀមរាប

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានជាតិ

‎រដ្ឋបាលខេត្តកំពង់ស្ពឺ ប្រារព្ធពិធីបុណ្យមាឃបូជា នៅវត្តមុនីរង្សីរតនារាម (វត្តម្រុំខាងជើង)

ការសាងសង់ស្ពានឆ្លងកាត់ទន្លេមេគង្គ (ដីឥដ្ឋ-ថ្មគរ) សម្រេចបាន៣៩,២%ហើយ គិតត្រឹមបំណាច់ខែមករា ឆ្នាំ២០២៦

អតិផរណាឆ្នាំ២០២៦ ស្ថិតក្នុងអត្រា ២,៣% ខណៈម្ហូបអាហារ មុខទំនិញ និង​ប្រេង​ឥន្ធនៈ​រំពឹង​ធ្លាក់​ចុះ

ប្រជាពលរដ្ឋ និងសមាជិកវេទិកាសន្តិភាពកម្ពុជា ចូលរួមបរិច្ចាគឈាមស្ម័គ្រចិត្តដើម្បីសង្គ្រោះជីវិត

រដ្ឋាភិបាលយកចិត្តទុកដាក់ខ្ពស់ចំពោះពលរដ្ឋភៀសសឹក ខណៈជាង ៥៤ម៉ឺននាក់​ហើយ​បាន​ត្រឡប់​ទៅ​ផ្ទះវិញ

ប្រជាពលរដ្ឋចំនួនជាង៦០០នាក់ ទទួលបានលទ្ធផលល្អក្នុងវេទិកាការងារនៅខេត្តសៀមរាប

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

អតិផរណាឆ្នាំ២០២៦ ស្ថិតក្នុងអត្រា ២,៣% ខណៈម្ហូបអាហារ មុខទំនិញ និងប្រេងឥន្ធនៈរំពឹងធ្លាក់ចុះ

រដ្ឋាភិបាលយកចិត្តទុកដាក់ខ្ពស់ចំពោះពលរដ្ឋភៀសសឹក ខណៈជាង ៥៤ម៉ឺននាក់ហើយបានត្រឡប់ទៅផ្ទះវិញ