BTV NEWS

ជប៉ុនផ្តល់ថវិកា ១,៣លានដុល្លារបន្ថែម ដើម្បីគាំទ្រគម្រោង «ការឆ្លើយតបទៅនឹងតម្រូវការបន្ទាន់របស់ជនទេសន្តរប្រវេសន៍ និងជនភៀសសឹកដែលងាយរងគ្រោះដោយសារវិបត្តិព្រំដែនកម្ពុជា-ថៃ និងការកសាងភាពធន់នឹងវិបត្តិនាពេលអនាគត»

ជនជាតិចិន ១៦៤នាក់ពាក់ទៀត ព័ន្ធករណី Online Scams ត្រូវបានបណ្ដេញចេញពីកម្ពុជា

ព្រះអង្គម្ចាស់ នរោត្តម ចក្រាវុធ ដឹកនាំក្រុមការងារបរិច្ចាគឈាមស្ម័គ្រចិត្ត ដើម្បីរម្លឹកនូវព្រះរាជគុណូបការៈដ៏ថ្លៃថ្លា និងអបអរសាទរនាឱកាសព្រះរាជពិធីបុណ្យចម្រើនព្រះជន្មសម្តេចយាយ

ឯកឧត្តម គន់ គីម អញ្ជើញដឹកនាំគណៈប្រតិភូចូលរួមមហាសន្និបាត តំណាងទូទាំងប្រទេសសមាគមអតីតយុទ្ធជនវៀតណាមលើកទី៨

ព័ត៌មានជាតិ

គម្រោងសាងសង់ស្ពានឆ្លងទន្លេមេគង្គ (ដីឥដ្ឋ-ថ្មគរ) សម្រេចបាន ៣៩,២៩% គិតត្រឹមខែកុម្ភៈ ឆ្នាំ២០២៦

ខេត្តកណ្តាល៖ នាព្រឹកថ្ងៃពុធ ទី១១ ខែកុម្ភៈ ឆ្នាំ២០២៦ ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន បានអញ្ជើញដឹកនាំគណៈប្រតិភូ ចុះពិនិត្យវឌ្ឍនភាពការងារគម្រោងសាងសង់ស្ពានឆ្លងទន្លេមេគង្គ (ដីឥដ្ឋ-ថ្មគរ) ដែលស្ថិតនៅឃុំដីឥដ្ឋ ស្រុកកៀនស្វាយ និងឃុំថ្មគរ ស្រុកល្វាឯម ខេត្តកណ្តាល។ក្នុងដំណើរចុះពិនិត្យវឌ្ឍនភាពការងារនេះ ឯកឧត្តមរដ្ឋមន្រ្តី បានណែនាំឱ្យក្រុមហ៊ុនអនុវត្តការងារឱ្យស្របតាមផែនការ ដោយធានាឱ្យបាននូវសុវត្ថិភាពតាមស្តង់ដារបច្ចេកទេស និងប្រកបដោយសោភ័ណ្ឌភាព។ ជាការឆ្លើយតប ក្រុមហ៊ុនសាងសង់ សន្យា និងបេ្ដជ្ញាចិត្តមោះមុត អនុវត្តន៍ការងារ ឱ្យកាន់តែប្រសើរឡើង ជាមួយក្រុមការងារបច្ចេកទេស និងភាគីពាក់ព័ន្ធ ដោយធ្វើការសហការ ពន្លឿនការសាងសង់ស្ពានមេគង្គនេះ ឱ្យបានកាន់តែឆាប់រហ័សព្រមទាំងជួយសម្រួលដល់ការធ្វើដំណើររបស់បងប្អូនប្រជាពលរដ្ឋផងដែរ។ គួរបញ្ជាក់ផងដែរថា គម្រោងនេះមានទីតាំងស្ថិតនៅខេត្តកណ្ដាល ឆ្លងកាត់តាមទន្លេមេគង្គ ផ្លូវនៅត្រើយខាងលិច ស្ថិតក្នុងឃុំដីឥដ្ឋ តភ្ជាប់នឹងមហាវិថី ស៊ី ជីនពីង (ផ្លូវក្រវាត់ក្រុងទី ៣) និងផ្លូវជាតិលេខ១ ផ្លូវនៅត្រើយខាងកើតស្ថិត ក្នុងឃុំថ្មគរ តភ្ជាប់នឹងផ្លូវល្បឿនលឿនភ្នំពេញ-បាវិត ដែលគ្រោងនឹងសាងសង់។ គម្រោងនេះមានប្រវែងសរុប ៣,៧ គីឡូម៉ែត្រ រួមមានស្ពានដែលឆ្លងទន្លេ និងស្ពានអាកាសតភ្ជាប់ផ្លូវ លូ និងការងារវិស្វកម្មបន្ទាប់បន្សំ។ ស្ពានឆ្លងទន្លេមេគង្គ មានប្រវែងសរុប ១ ៦០០ម៉ែត្រ និងទទឹង ២៦ម៉ែត្រ ដោយមានគន្លងផ្លូវរថយន្ត ផ្លូវទោចក្រយានយន្ត និងផ្លូវថ្មើរជើង ព្រមទាំងមានគន្លងនាវាចរណ៍ចំនួន ៣គន្លង ដែលគន្លងនីមួយៗមានចន្លោះសុវត្ថិភាព ទទឹង ១១០ម៉ែត្រ និងកម្ពស់ ១៥ម៉ែត្រ៕

គ្រូបង្រៀន និងអាណាព្យាបាលប្តេជ្ញាអប់រំកុមារថ្នាក់មត្តេយ្យសិក្សាឱ្យក្លាយជាសិស្សពូកែ

គ្រូបង្រៀន និងអាណាព្យាបាល ប្តេជ្ញាខិតខំអប់រំកុមាររៀននៅថ្នាក់មតេយ្យសិក្សាឱ្យក្លាយជាសិស្សពូកែ ដើម្បីឈានឆ្ពោះទៅរកភាពជោគជ័យនៅពេលពួកគេធំៗឡើង។នៅព្រឹកថ្ងៃទី១១ ខែកុម្ភៈនេះ គ្រូបង្រៀននៅសាលាបឋមសិក្សា ហ៊ុន សែន ចាក់អង្រែ បានប្រាប់ BTVឲ្យដឹងថា ការអប់រំកុមារពីថ្នាក់មតេយ្យសិក្សាឡើងទៅ គឺមានសារសំខាន់ខ្លាំងណាស់ សម្រាប់កសាងមូលធនមនុស្សនៅពេលអនាគត ដើម្បីឲ្យប្រទេសជាតិរីកចម្រើន។ ដូច្នេះក្នុងនាមជាគ្រូបង្រៀននឹងប្តេជ្ញាខិតខំប្រឹងប្រែងអប់រំកុមារនៅថ្នាក់មតេយ្យសិក្សាឲ្យរៀនពូកែ ស្របទៅតាមអនុសាសន៍ណែនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ដែលបានណែនាំឲ្យក្រសួងអប់រំ យុវជន និងកីឡា ត្រូវបង្កើនលទ្ធភាពតាមគ្រប់រូបភាព ដើម្បីបណ្តុះបណ្តាលសិស្សពូកែ រាប់ចាប់តាំងពីកម្រិត មត្តេយ្យសិក្សា រហូតដល់មធ្យមសិក្សាទុតិយភូមិ។អាណាព្យាបាលបានលើកឡើងថា ជារៀងរាល់ថ្ងៃ នៅពេលទំនេរពីការងារ តែងតែយកចិត្តទុកដាក់អប់រំកូនៗ ដូចជា ឱ្យមើលសៀវភៅ និងលំហាត់ដែលលោកគ្រូ អ្នកគ្រូដាក់ឲ្យធ្វើ ជាដើម។កូនសិស្សបានប្តេជ្ញាប្រឹងប្រែងរៀនសូត្រតាមការណែនាំរបស់លោកគ្រូ អ្នកគ្រូដូចជា អាន ស្តាប់ សរសេរ និងធ្វើលំហាត់គណិតវិទ្យាផងដែរ។ លើសពីនេះ សិស្សទាំងនោះ បានអរគុណដល់លោកគ្រូ អ្នកគ្រូដែលបានលះបង់កម្លាំងកាយចិត្តបង្រៀន និងអប់រំ ដល់ពួកគេ។គួរបញ្ជាក់ថា ការពង្រឹងគុណភាពវិស័យអប់រំ គឺជាគោលដៅឤទិភាពមួយរបស់រាជរដ្ឋាភិបាល ដែលបានកំណត់ក្នុងយុទ្ធសាស្ត្របញ្ចកោណ ដំណាក់កាលទី១ ដោយផ្តោតអាទិភាពគន្លឹះ ចំនួន៥រួមមាន ៖ មនុស្ស ផ្លូវ ទឹក ភ្លើង និងបច្ចេកវិទ្យា៕ អត្ថបទ៖ ទូច សោភ័ណ

កម្ពុជាស្នើសុំ UN បន្តផ្តល់ការគាំទ្រ សម្រាប់ការត្រៀមខ្លួនចាកចេញពីប្រទេសអភិវឌ្ឍន៍តិចតួច

រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ ស្នើសុំទីភ្នាក់ងារអង្គការសហប្រជាជាតិ បន្តផ្តល់ការគាំទ្រដល់កម្ពុជា សម្រាប់ការត្រៀមខ្លួនសម្រាប់ការចាកចេញពីប្រទេសអភិវឌ្ឍន៍តិចតួច ការពង្រឹងប្រព័ន្ធគាំពារសង្គម និងការរៀបចំក្របខ័ណ្ឌគោលនយោបាយផ្សេងៗ ដើម្បីគាំទ្រដល់ការប្តេជ្ញាចិត្តរបស់កម្ពុជាសម្រាប់ចក្ខុវិស័យរយៈពេលវែង។ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្ត្រី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ នៅក្នុងជំនួបសម្ដែងការគួរសម និង ពិភាក្សា ការងារជាមួយលោកស្រី វ្ល៉ាដាន់កា អាន់ឌ្រេវ៉ា (Vladanka Andreeva) អ្នកសម្របសម្រួលអង្គការសហប្រជាជាតិ ប្រចាំ នៅកម្ពុជា ក្នុងឱកាសដែលលោកស្រីចូលកាន់តំណែងថ្មី នៅកម្ពុជា នៅថ្ងៃទី៩ ខែកុម្ភៈ ឆ្នាំ២០២៦នេះ ឯកឧត្តមបានជម្រាបជូនអំពី ផលប៉ះពាល់យ៉ាងធ្ងន់ធ្ងរដោយសារសង្រ្គាម និងកិច្ចអន្តរាគមរបស់រាជរដ្ឋាភិបាលដែលបាន និងកំពុងដាក់ចេញក្រោមក្របខ័ណ្ឌ កម្មវិធីគាំពារសង្គម និងវិធានការដោះស្រាយបន្ទាន់ជាបន្តបន្ទាប់ ដោយមានកិច្ចសហការពីដៃគូអភិវឌ្ឍន៍ រួមទាំងទីភ្នាក់ងារអង្គការ សហប្រជាជាតិប្រចាំនៅកម្ពុជាផងដែរ។ ឯកឧត្តមអគ្គបណ្ឌិតសភាចារ្យ បន្ថែមថា ជនភៀសសឹកប្រមាណជាង ៤ ០០០ គ្រួសារទៀត ដែលមិនទាន់អាចត្រលប់ទៅ លំនៅឋានវិញ ត្រូវបានរាជរដ្ឋាភិបាលកំពុងផ្តោតលើការរៀបចំប្រែក្លាយជំរំ ទៅជាជម្រកបណ្តោះអាសន្ន និងរៀបចំសេវាសាធារណៈ និងហេដ្ឋារចនាសម្ព័ន្ធមូលដ្ឋានចាំបាច់ ជាមួយនឹងការជំរុញការអនុវត្តកម្មវិធីជំនួយសង្គមផ្សេងៗទៀត សម្រាប់ការគាំទ្ររយៈពេល មធ្យម និងវែង ដើម្បីឈានទៅស្តារជីវភាពរស់នៅរបស់ប្រជាពលរដ្ឋឡើងវិញឱ្យបានឆាប់។ រាជរដ្ឋាភិបាលក៏បានទទួលជំនួយ មនុស្ស ធម៌ និងហិរញ្ញប្បទានឥតសំណងពីមិត្តចិន និងធនាគារអភិវឌ្ឍន៍អាស៊ី (ADB) ដែលរាជរដ្ឋាភិបាលគ្រោងនឹងប្រើប្រាស់ជំនួយនេះ សម្រាប់ការស្តារហេដ្ឋារចនាសម្ព័ន្ធខូចខាត ដោយសារសង្គ្រាមឡើងវិញក្នុងពេលខាងមុខនេះ។ ជាមួយគ្នានេះ, សម្រាប់ប្រជាពលរដ្ឋ ខ្មែរ ដែលធ្វើការនៅប្រទេសថៃ ហើយវិលត្រលប់មកកម្ពុជាវិញជាង១លាននាក់, រាជរដ្ឋាភិបាលបាននិងកំពុងបន្តជួយពលរដ្ឋរក ការងារធ្វើក្នុងស្រុក ឱ្យបានឆាប់តាមរយៈការផ្គូរផ្គង, កម្មវិធីបណ្តុះបណ្តាលជំនាញបន្ថែមទាំង Up-Skilling និង Re-Skilling, ការបង្កើតមុខរបរខ្នាតតូច, រួមទាំងកម្មវិធីជំនួយជាច្រើនផ្សេងទៀតក្នុងការគាំទ្រ។ ឯកឧត្តមអគ្គបណ្ឌិតសភាចារ្យ បានស្វាគមន៍ចំពោះការផ្តល់ជំនួយថ្មីៗបន្ថែមពីដៃគូអភិវឌ្ឍន៍ទាំងអស់សម្រាប់ការអភិវឌ្ឍ រយៈ ពេលមធ្យម និងវែងរបស់កម្ពុជា និងបានស្នើសុំទីភ្នាក់ងារអង្គការសហប្រជាជាតិ ជាពិសេសកម្មវិធីអភិវឌ្ឍន៍សហប្រជាជាតិ (UNDP) បន្តផ្តល់ការគាំទ្រដល់កម្ពុជា សម្រាប់ការត្រៀមខ្លួនការចាកចេញពីប្រទេសអភិវឌ្ឍន៍តិចតួច, ការពង្រឹងប្រព័ន្ធគាំពារសង្គម, ការរៀបចំ ក្របខ័ណ្ឌគោលនយោបាយហិរញ្ញប្បទានជាតិកៀរគរធនធានពីប្រភពផ្សេងៗ ដើម្បីគាំទ្រដល់ការប្តេជ្ញាចិត្តរបស់កម្ពុជាក្នុងការសម្រេចនូវគោលដៅអភិវឌ្ឍន៍ប្រកបដោយចីរភាព និងរបៀបវារៈអភិវឌ្ឍន៍របស់រាជរដ្ឋាភិបាលសម្រាប់ចក្ខុវិស័យរយៈពេលវែង។លោកស្រី វ្ល៉ាដាន់កា អាន់ឌ្រេវ៉ា បានថ្លែងនូវអំណរគុណ និងវាយតម្លៃខ្ពស់ ចំពោះកិច្ចសហប្រតិបត្តិការដ៏ល្អជាមួយរាជរដ្ឋាភិបាលកម្ពុជា ព្រមទាំងបានបញ្ជាក់ថា អង្គការសហប្រជាជាតិ តាមរយៈ UNDP, ត្រៀមខ្លួនជានិច្ចក្នុង ការបន្តផ្តល់ការគាំទ្រដល់របៀបវារៈអភិវឌ្ឍន៍សំខាន់ៗរបស់កម្ពុជា ជាមួយនឹងការបន្តកិច្ចសន្ទនាគោលនយោបាយ សំដៅជំរុញការអនុវត្តក្របខ័ណ្ឌកិច្ចសហប្រតិបត្តិ-ការឆ្នាំ២០២៤-២០២៨ ឱ្យកាន់តែមានប្រសិទ្ធភាព ។ លោកស្រី នឹងបន្តសម្របសម្រួលជាមួយភាគីពាក់ព័ន្ធ ក្នុងការកៀរគរជំនួយ មនុស្សធម៌ និងជំនួយបច្ចេកទេស ដើម្បីផ្តល់ការគាំទ្រដល់ពលរដ្ឋភៀសសឹក និងពលរដ្ឋដែលត្រលប់មកពីប្រទេសថៃវិញផងដែរ៕ អត្ថបទ៖ សុន រ៉ាឌី

យុវជនបោះបង់ការសិក្សាសាលាចំណេះទូទៅ ងាកមកបន្តរៀនជំនាញវិជ្ជាជីវៈ

នៅសាលាបច្ចេកទេស និងជំនាញវិជ្ជាជីវៈTVET នៅខេត្តកណ្តាល មកដល់បច្ចុប្បន្ន មានយុវជន បោះបង់សិក្សានៅតាមសាលារៀនចំណេះទូទៅនានា បានងាកមកចុះឈ្មោះរៀនជំនាញវិជ្ជាជីវៈ តាមរយៈ កម្មវិធីអាហារូបករណ៍រាជរដ្ឋាភិបាលសម្រាប់បណ្តុះបណ្តាលជំនាញវិជ្ជាជីវៈ ជូនយុវជន ១លាន៥សែននាក់ ហើយក្រុមយុវជនទាំងនេះ បានបង្ហាញពីចំណចង់ចំណូលចិត្ត ប្តេជ្ញាបន្តរៀនជំនាញវិជ្ជាជីវៈរបស់គេឱ្យ ដល់កម្រិតខ្ពស់ ជាពិសេសកម្រិតវិស្វករ។យុវជនកំពុងសិក្សាជំនាញវិជ្ជាជីវៈនៅវិទ្យាស្ថានជាតិពហុបច្ចេកទេសតេជោ សែន ខេត្តកណ្តាល បានប្រាប់BTV នៅថ្ងៃទី១១ ខែកុម្ភៈ នេះថា ពួកគេពិតជាអរគុណរាជរដ្ឋាភិបាលជាខ្លាំង ដែលបានបង្កើត សាលាTVET ផ្តល់ឱកាសឱ្យយុវជនបោះបង់ការសិក្សានៅសាលាចំណេះទូទៅ បានចូលរៀនសូត្រជំនាញ វិជ្ជាជីវៈ ដើម្បីឆាប់មានការងារធ្វើ។ចំណែកអាណិកជនខ្មែរមកពីសហរដ្ឋអាម៉េរិក លោក វណ្ណៈ ពៅ ពេញចិត្តចង់បានជំនាញ វិជ្ជាជីវៈ កម្រិតសញ្ញាបត្រC1 ដែលជាក់ស្តែងបច្ចុប្បន្ន លោកមានបទពិសោធន៍ចំណេះជំនាញការងារពីសហរដ្ឋអាម៉េរិក ប៉ុន្តែលោកមិនទាន់ចេះជំនាញជួសជុលបរិក្ខារត្រជាក់ ដូចនេះលោកត្រូវរៀន ដើម្បីត្រៀម ធ្វើការងារ និងការបង្កើតមុខរបរអាជីវកម្មផ្នែកបរិក្ខារត្រជាក់នៅកម្ពុជា។នៅក្នុងពិធីសំណេះសំណាលជាមួយសិស្សនិទ្ទេសA នៃការប្រឡងសញ្ញាបត្រមធ្យមសិក្សាទុតិយ ភូមិ និងការប្រឡងសញ្ញាបត្រសញ្ញាបត្របច្ចេកទេស និងវិជ្ជាជិវៈ កម្រិត៣ កាលពីម្សិលមិញ សម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានបញ្ជាក់ថា រាជរដ្ឋាភិបាលកម្ពុជា តាំងពីដើមអាណត្តិទី៧មក បានជំរុញឱ្យក្រសួងអប់រំ យុវជន និងកីឡា និងក្រសួងការងារ និងបណ្តុះបណ្តាលវិជ្ជាជីវៈ សហការជំរុញ ការអនុវត្តគន្លងការសិក្សាតម្រង់ទិសអាជីពជូនយុវជនទៅថ្ងៃអនាគត ហើយការតម្រង់ទិសនោះ អាចឱ្យ សិស្សថ្នាក់ទី៩ ទី១០ ឡើងទៅ ចាប់អាជីពចូលរៀនជំនាញវិជ្ជាជីវៈ និងបច្ចេកទេស នៅតាមបណ្តាសាលា បណ្តុះបណ្តាលបច្ចេកទេស និងជំនាញវិជ្ជាជីវៈ TVET ដើម្បីធានាប្រសិទ្ធភាពបង្កើនចំណេះដឹង សមត្ថភាពជំនាញ ឱ្យស្របតាមតម្រូវការការងារ ក៏ដូចចំណង់ចំណូលចិត្តរបស់យុវជន៕ អត្ថបទ៖ ស៊ុម សុខជា

ថ្ងៃសែនដកជើងធូប ពលរដ្ឋខ្មែរកាត់ចិននាំគ្នាទិញរណ្តាប់សែនព្រេន ទោះមាននិន្នាការកាត់បន្ថយចំណាយបន្តិច

នៅថ្ងៃសែនដកជើងធូប ត្រៀមរៀបចំសម្រាប់ពិធីបុណ្យចូលឆ្នាំចិន នៅដើមសប្ដាហ៍ក្រោយនេះ ពលរដ្ឋខ្មែរ មានសែស្រឡាយចិនបាននាំគ្នាទិញគ្រឿងរណ្តាប់សែនព្រេននៅតាមបណ្តាផ្សារ និងកន្លែងលក់ដូរនានាបើទោះឆ្នាំនេះមាននិន្នាការនៃការបន្ថយចំណាយរបស់ពួកគេក្ដី។ ប្រធានគណៈកម្មការគ្រប់គ្រងផ្សារអូរឫស្សី លោក ឡយ ស៊ាងអាង បានឱ្យដឹងថា ទន្ទឹមនឹងការមកទិញអីវ៉ាន់ ទំនិញ ម្ហូបអាហារ និងគ្រឿងរណ្តាប់សែន កាន់តែច្រើនឡើងជាប្រចាំថ្ងៃនោះ គណៈកម្មការផ្សារ បាន បង្កើនការយកចិត្តទុកដាក់ តាមរយៈការរក្សាឲ្យបាននូវសន្តិសុខ សណ្តាប់ធ្នាប់ និងរបៀបរៀបរយសាធារណៈល្អ ប្រសើរជូនបងប្អូនប្រជាពលរដ្ឋជាភ្ញៀវ ។អាជីវករលក់ជ្រូកខ្វៃ និងគ្រឿងរណ្តាប់សែននានា ក្នុងផ្សារអូរឫស្សី បានឲ្យដឹងថា ក្នុងថ្ងៃសែនដកជើងធូប តាមប្រពៃណីបុណ្យចូលឆ្នាំចិននេះ ប្រជាពលរដ្ឋកាត់ចិនជាច្រើន នៅតែបន្តការអញ្ជើញមកទិញ មិនខុសពីឆ្នាំ មុន ដែរ តែមានការកត់សម្គាល់នៃការបន្ថយការចំណាយរបស់ពលរដ្ឋ។ ចំពោះតម្លៃទំនិញ ពុំត្រូវបានដំឡើងនោះទេ។ គួរបញ្ជាក់ថា បុណ្យសែនចូលឆ្នាំចិន នឹងចាប់ផ្តើមនៅថ្ងៃទី១៦ ដល់ថ្ងៃទី១៩ ខែកុម្ភៈ ឆ្នាំ២០២៦ខាងមុខ ដែលជាពេលវេលា ដែលបងប្អូនខ្មែរកាត់ខ្សែស្រឡាយសិន តែងតែចាត់ទុកជាថ្ងៃសំខាន់ ក្នុងការរៀបចំសែនព្រេន ជូនជីដូនជីតា ដើម្បីសុំលាភពរជ័យ និងសេចក្តីសុខចម្រើន ទាំងការរកស៊ីទទួលទាន និងការរស់នៅ៕ អត្ថបទ៖ លីហេង

ក្រសួងអប់រំ៖ ចំនួនសិស្សចូលរៀនកើនឡើងគ្រប់កម្រិតសិក្សា សម្រាប់រយៈពេល១០ឆ្នាំចុងក្រោយនេះ

ឯកឧត្តមឧបនាយករដ្ឋមន្ត្រី ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានលើកឡើងនៅក្នុងឱកាសសន្និបាតបូកសរុបការងារក្រសួងនៅថ្ងៃនេះថា ចំនួនសិស្សចូលរៀនក្នុងរយៈពេល១០ឆ្នាំមកនេះមានការកើនឡើងគ្រប់កម្រិតសិក្សា ចាប់រាប់ពីការអប់រំកុមារតូច រហូតការអប់រំកម្រិតឧត្តមសិក្សា។ នាឱកាសសន្និបាតបូកសរុបការងារក្រសួងអប់រំ យុវជន និងកីឡានៅថ្ងៃនេះ ឯកឧត្តម ឧបនាយករដ្ឋមន្ត្រី ហង់ជួន ណារ៉ុន បានលើកឡើងពីសមិទ្ធផលជាច្រើន ដែលក្រសួងអប់រំ សម្រេចបានក្នុងរយៈពេល១០ឆ្នាំមកនេះ។ ក្នុងចំណោមសមិទ្ធផលទាំងនោះ ឯកឧត្តមក៏បានបញ្ជាក់ពីការកើនឡើងនៃចំនួនសិស្សចូលរៀនជាបន្តបន្ទាប់គ្រប់កម្រិតសិក្សាផងដែរ។ឯកឧត្តមលើកឡើងថា សម្រាប់ការអប់រំកុមារតូច អាយុ៣ទៅ៥ឆ្នាំ បានចូលរៀនគ្រប់រូបភាពមានវឌ្ឍនភាពល្អប្រសើរឡើង ក្នុង ពេល ១០ឆ្នាំ កន្លងមក។ កុមារអាយុ៣ទៅ៥ឆ្នាំ កើនពី ៣១ម៉ឺននាក់ នៅឆ្នាំសិក្សា២០១៤-២០១៥ ដល់ ៤៤ម៉ឺននាក់នៅឆ្នាំសិក្សា២០២៥-២០២៦។ ចំពោះអត្រាចុះឈ្មោះចូលរៀនរបស់កុមារអាយុ ៥ឆ្នាំ បានកើនឡើងពី ៦១,៤% កើនដល់ ៧៧,៩% ។ចំពោះការអប់រំនៅកម្រិតបឋមសិក្សា មានវឌ្ឍនភាពប្រសើរឡើងជាលំដាប់។ អត្រានៃការ សិក្សានៅបឋមសិក្សាបានកើនពី ៩៧,៩% នៅឆ្នាំសិក្សា២០១៤-២០១៥ ដល់ ១០១,៦% នៅឆ្នាំសិក្សា ២០២៥-២០២៦។ ជាមួយនេះ ចំនួនសិស្សបឋមសិក្សាបានកើនពី ២លាន ៨ម៉ឺន នាក់នៅឆ្នាំសិក្សា២០១៤-២០១៥ ដល់ ២ លាន ២សែន ៥ម៉ឺននាក់ នៅឆ្នាំសិក្សា ២០២៥-២០២៦។សម្រាប់ការចូលរៀននៅមធ្យមសិក្សាបឋមភូមិមានវឌ្ឍនភាពគួរឱ្យកត់សម្គាល់ផងដែរ។ អត្រារួមនៃ ការសិក្សានៅមធ្យមសិក្សាបឋមភូមិកើនពី ៥៥,១% នៅឆ្នាំសិក្សា២០១៤-២០១៥ ដល់ ៧៩% នៅឆ្នាំសិក្សា ២០២៥-២០២៦។ សិស្សមធ្យមសិក្សាបឋមភូមិបានកើនពី ៥សែន ៥ ម៉ឺននាក់ ដល់ ៧សែន២ម៉ឺននាក់។ អត្រាបញ្ចប់ការសិក្សានៅមធ្យមសិក្សាបឋមភូមិក៏បានកើនពី ៤២% ដល់ ៦៣.៦% ។ការចូលរៀននៅមធ្យមសិក្សាទុតិយភូមិមានវឌ្ឍនភាពប្រសើរឡើងផងដែរ ដោយអត្រារួម នៃការសិក្សានៅមធ្យមសិក្សាទុតិយភូមិកើនពី ២៥,៣% នៅឆ្នាំសិក្សា ២០១៤-២០១៥ ដល់ ៤៦,៦% នៅឆ្នាំសិក្សា២០២៥-២០២៦។ សិស្សមធ្យមសិក្សាទុតិយភូមិបានកើនពី ២សែន៩ម៉ឺននាក់ ដល់ ៤សែន៥ម៉ឺននាក់។ អត្រាបញ្ចប់ការសិក្សានៅមធ្យមសិក្សាទុតិយភូមិបាន កើនពី ២០,៩% ដល់ ៤១,៧% ។ឯកឧត្តម ឧបនាយករដ្ឋមន្ត្រី ហង់ជួន ណារ៉ុន ក៏បានលើកឡើងដែរថា និស្សិតសិក្សានៅកម្រិតឧត្តមសិក្សាក៏បានកើនឡើងពី ២៥ម៉ឺននាក់នៅ ១០ឆ្នាំមុន ឡើងមកដល់ ៣២ម៉ឺននាក់ នៅឆ្នាំសិក្សា ២០២៤-២០២៥។ អត្រារួមនៃការសិក្សានៅឧត្តមសិក្សា (អាយុ ១៨ ដល់ ២២ឆ្នាំ) កើនពី ៩,៩% ដល់ ១៩%៕ អត្ថបទ៖ គឹមហុក

កម្មវិធីអន្តរាគមន៍ សម្រាប់គ្រួសារភៀសសឹកដែលវិលទៅលំនៅឋានវិញ នឹងអនុវត្តនៅពាក់កណ្ដាលខែកុម្ភៈ

រាជរដ្ឋាភិបាលកម្ពុជា នៅពាក់កណ្ដាលខែកុម្ភៈ ឆ្នាំ ២០២៦នេះ នឹងអនុវត្តការអន្តរាគមន៍ ជួយដល់ពលរដ្ឋភៀសសឹកដែលបានវិលត្រលប់ទៅលំនៅឋានវិញ។ ការអន្តរាគមន៍ ពីរាជរដ្ឋាភិបាលនេះ រួមមានការស្ដារជីវភាព និងការជួសជុលលំនៅឋាន ព្រមទាំងការស្ដារឡើងវិញនូវហេដ្ឋារចនាសម្ព័ន្ធចាំបាច់ដែលរងការខូចខាតក្នុងមូលដ្ឋាននីមួយៗ ដើម្បីឱ្យពួកគាត់អាចប្រកបរបរចិញ្ចឹមជីវិត ជាប្រក្រតីឡើងវិញ។នៅថ្ងៃទី៩ និងថ្ងៃទី១០ ខែកុម្ភៈ ឆ្នាំ២០២៦ នេះ ឯកឧត្តម ចន ណារិទ្ធ ជាប្រធានក្រុមការងារចំពោះកិច្ច បានបន្ដដឹកនាំក្រុមការងារចំពោះកិច្ច រៀបចំ និងគ្រប់គ្រងការស្ដារជីវភាព និងហេដ្ឋារចនាសម្ព័ន្ធដែលខូចខាតពីជម្លោះព្រំដែនកម្ពុជា-ថៃ ជួបប្រជុំពិភាក្សាជាមួយរដ្ឋបាលខេត្តព្រះវិហារ និងឧត្តរមានជ័យ ដើម្បីពិនិត្យ និងផ្ទៀងផ្ទាត់ទិន្នន័យចុងក្រោយ ក្នុងគោលបំណងត្រៀមដាក់ឱ្យអនុវត្តកម្មវិធីអន្តរាគមន៍របស់រាជរដ្ឋាភិបាល សម្រាប់គ្រួសារភៀសសឹកដែលបានវិលត្រលប់ទៅលំនៅឋានវិញ នៅតាមបណ្ដាខេត្តដែលរងផលប៉ះពាល់ពីសង្គ្រាមឈ្លានពានរបស់ថៃនាពេលកន្លងមក ឱ្យបានទាន់ពេលស្របតាមការសម្រេចដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។កិច្ចប្រជុំពិភាក្សានេះ មានការចូលរួមពីតំណាងគណៈកម្មាធិការជាតិគ្រប់គ្រងគ្រោះមហន្តរាយ, មូលនិធិជាតិជំនួយសង្គម, និងរដ្ឋបាលក្រុង-ស្រុកពាក់ព័ន្ធក្នុងខេត្តទាំងពីរ។ កិច្ចប្រជុំក៏បានពិភាក្សាពាក់ព័ន្ធនឹងការគិតគូរអំពីអន្តរាគមន៍ចាំបាច់មួយចំនួនសម្រាប់ក្រុមគ្រួសារពលរដ្ឋ ដែលមិនទាន់អាចត្រលប់ទៅលំនៅឋានវិញ ផងដែរ។ស្របពេលជាមួយគ្នានេះ, ក្រុមការងារចំពោះកិច្ច រៀបចំ និងគ្រប់គ្រងការស្ដារជីវភាព និងហេដ្ឋារចនាសម្ព័ន្ធដែលខូចខាតពីជម្លោះព្រំដែនកម្ពុជា-ថៃ ក៏បានចាត់បញ្ជូនក្រុមការងារបច្ចេកទេសរបស់អគ្គលេខាធិការដ្ឋានក្រុមប្រឹក្សាជាតិគាំពារសង្គម ចុះជួបពិភាក្សាការងារជាមួយរដ្ឋបាលក្រុង-ស្រុក នៅតាមបណ្ដាខេត្តផ្សេងទៀតដែលរងផលប៉ះពាល់ ដើម្បីជំរុញការផ្ទៀងផ្ទាត់ទិន្នន័យសម្រាប់ជាមូលដ្ឋានរឹងមាំ ក្នុងការអនុវត្តកម្មវិធីអន្តរាគមន៍នេះ ឱ្យចំគោលដៅនិងមានប្រសិទ្ធភាពខ្ពស់។អន្តរាគមន៍របស់រាជរដ្ឋាភិបាលសម្រាប់ពលរដ្ឋដែលបានវិលត្រលប់ទៅលំនៅឋានវិញ នឹងត្រូវដាក់ឱ្យអនុវត្តចាប់ពីពាក់កណ្ដាលខែកុម្ភៈ ឆ្នាំ២០២៦នេះ រួមមានការស្ដារជីវភាព និងការជួសជុលលំនៅឋាន ព្រមទាំងការស្ដារឡើងវិញនូវហេដ្ឋារចនាសម្ព័ន្ធចាំបាច់ដែលរងការខូចខាតក្នុងមូលដ្ឋាននីមួយៗ ដើម្បីឱ្យពួកគាត់អាចប្រកបរបរចិញ្ចឹមជីវិត ជាប្រក្រតីឡើងវិញ៕ អត្ថបទ៖ គឹម ហុក

មន្ត្រីជំនាញ នៃមន្ទីរមុខងារសាធារណៈរាជធានី-ខេត្ត ចុះពិនិត្យដំណើរការនៃការធ្វើជំរឿនមន្ត្រីដោយផ្ទាល់ ដើម្បីត្រៀមធ្វើជំរឿនមន្ត្រីតាមបណ្តាខេត្តនាពេលខាងមុខ

ដើម្បីឱ្យដំណើរការនៃការចុះជំរឿនមន្ត្រីជាក់ស្តែងនៅតាមបណ្តាខេត្ត ប្រព្រឹត្តទៅដោយរលូន ទាន់ពេលវេលា និងអនុវត្តស្របតាមស្មារតីនៃសារាចររបស់រាជរដ្ឋាភិបាល គណៈកម្មការធ្វើបច្ចុប្បន្នភាពរចនាសម្ព័ន្ធ និងជំរឿនមន្រ្តីនៃក្រសួងមុខងារសាធារណៈ បានរៀបចំវគ្គបណ្តុះបណ្តាលស្តីពី «ការប្រើប្រាស់ប្រព័ន្ធគ្រប់គ្រងការធ្វើបច្ចុប្បន្នភាពទិន្នន័យជីវមាត្រមន្ត្រី និងប្រើប្រាស់ប្រព័ន្ធធ្វើបច្ចុប្បន្នភាពរចនាសម្ព័ន្ធនិងជំរឿនមន្ត្រីជាក់ស្តែង នៅតាមរចនាសម្ព័ន្ធនៃគ្រឹះស្ថានសិក្សាសាធារណៈ និងអង្គភាពសុខាភិបាលមូលដ្ឋាន ស្ថិតក្នុងភូមិសាស្ត្ររាជធានី ខេត្ត» ជូនដល់មន្ត្រីជំនាញនៃមន្ទីរមុខងារសាធារណៈរាជធានី ខេត្តទាំង២៥។ផ្សារភ្ជាប់ទៅនឹងវគ្គបណ្តុះបណ្តាលនេះ គណៈកម្មការជំរឿនមន្រ្តីនៃក្រសួងមុខងារសាធារណៈ ក៏បានរៀបចំឱ្យមន្ត្រីជំនាញដែលជាសិក្ខាកាមទាំងអស់ ចុះពិនិត្យដំណើរការនៃការធ្វើជំរឿននៅទីតាំងដោយផ្ទាល់ នៅអនុវិទ្យាល័យ ហ៊ុន សែន ពោធិ៍ចិនតុង ជាទីតាំងមួយដែលគណៈកម្មការជំរឿន កំពុងពិនិត្យផ្ទៀងផ្ទាត់រចនាសម្ព័ន្ធ និងវត្តមានមន្ត្រីកំពុងបំពេញការងារជាក់ស្តែងនៃសាលារៀនគោលដៅដែលស្ថិតក្នុងភូមិសាស្ត្រនៃរដ្ឋបាលខណ្ឌពោធិ៍សែនជ័យ រាជធានីភ្នំពេញ។វគ្គបណ្តុះបណ្តាលនេះ ប្រព្រឹត្តទៅរយៈពេល ២ថ្ងៃ ចាប់ពីថ្ងៃទី១០-១១ ខែកុម្ភៈ ឆ្នាំ២០២៦ នៅទីស្តីការក្រសួងមុខងារសាធារណៈ បានផ្តល់ជូនមន្ត្រីជំនាញទាំងអស់ យល់ដឹងពីដំណើរការប្រតិបត្តិការ និងការប្រើប្រាស់ប្រព័ន្ធធ្វើជំរឿនមន្រ្តី តាមរយៈបទបង្ហាញរបស់ក្រុមការងារ នៃគណៈកម្មការធ្វើជំរឿននៃក្រសួងមុខងារសាធារណៈ រួមទាំងការអនុវត្តដោយផ្ទាល់លើការប្រើប្រាស់ប្រព័ន្ធ ដើម្បីធានាដល់ដំណើរការនៃការធ្វើជំរឿនមន្ត្រីជាក់ស្តែង ប្រកបដោយភាពរលូន ឆាប់រហ័ស ច្បាស់លាស់ និងមានប្រសិទ្ធភាព៕

ពលរដ្ឋភៀសសឹកមិនទាន់អាចត្រឡប់ទៅផ្ទះវិញទទួលបានការយកចិត្តទុកដាក់ពីរដ្ឋាភិបាល និងសហគមន៍អន្តរជាតិ ខណៈជាង៨ម៉ឺននាក់កំពុងបន្តស្នាក់នៅមណ្ឌលភៀសសឹក

ប្រជាពលរដ្ឋភៀសសឹកដែលកំពុងបន្តស្នាក់នៅក្នុងមណ្ឌលសុវត្ថិភាពហើយដែលមិនទាន់អាចវិលត្រឡប់ទៅផ្ទះសម្បែងវិញបាននៅឡើយដោយសារតែយោធាថៃព័ទ្ធរបងលួស ឬទូរកុងតឺន័រដើម្បីរារាំងឃាំងដំណើររបស់ពួកគេនោះ មិនត្រឹមតែទទួលបានការយកចិត្តទុកដាក់យ៉ាងខ្លាំងពីរាជរដ្ឋាភិបាលប៉ុណ្ណោះទេ ប៉ុន្តែពួកគេក៏ទទួលបានការចាប់អារម្មណ៍យ៉ាងខ្លាំងពីបណ្តាអង្គទូត អង្គការអន្តរជាតិ និងបណ្តាញសារព័ត៌មានបរទេសនានាដែលបាននាំគ្នាចុះទៅជួបសម្ភាសន៍ សួរសុខទុក្ខ និងផ្តល់ការគាំទ្រទាំងសម្ភារៈ និងស្មារតី។ នេះបើតាមការបញ្ជាក់របស់អ្នកនាំពាក្យរាជរដ្ឋាភិបាល។ តាមរយៈសន្និសីទសារព័ត៌មាននៅថ្ងៃទី១១ ខែកុម្ភៈ ឆ្នាំ២០២៦នេះ ឯកឧត្តម ប៉ែន បូណា អ្នកនាំពាក្យរាជរដ្ឋាភិបាលកម្ពុជា បានឱ្យដឹងថា ជាក់ស្តែង កាលពីចុងសប្តាហ៍កន្លងទៅ ឯកអគ្គរដ្ឋទូតសហភាពអឺរ៉ុប រួមជាមួយតំណាងអង្គការយូនីសេហ្វ បានអញ្ជើញទៅដល់មណ្ឌលជនភៀសសឹកក្នុងខេត្តបន្ទាយមានជ័យនិង បានសម្តែងក្តីអាណិតអាសូរចំពោះពលរដ្ឋភៀសសឹក ហើយបានផ្តល់ការគាំទ្រនិងការលើកទឹកចិត្តយ៉ាងខ្លាំងដល់ពួកគេ។ ឯកឧត្តម ឯកអគ្គរដ្ឋទូតបានប្រាប់បងប្អូនជនភៀសសឹកថា ពួកគេមិននៅឯកការទេ ពោលគឺសហភាពអឺរ៉ុបនៅជាមួយនិងជួយគាំទ្រពួកគេជានិច្ច។ នេះជាសារដែលផ្តល់ភាពកក់ក្តៅយ៉ាងខ្លាំងដល់ប្រជាពលរដ្ឋភៀសសឹកកម្ពុជា ក៏ដូចជាប្រទេសកម្ពុជាទាំងមូល និយាយជារួម។ ឯកឧត្តមបន្តថា វត្តមាននៃបណ្តាអង្គទូតនានាប្រចាំកម្ពុជា តំណាងអង្គការអន្តរជាតិ និងអ្នកសារព័ត៌មានបរទេស រួមទាំងអ្នកសង្កេតការណ៍អាស៊ាន(AOT) ផង ដែលបានទៅឃើញស្ថានភាពជាក់ស្តែងនៅតាមព្រំដែន ក៏ដូចជាស្ថានភាពប្រជាពលរដ្ឋភៀសសឹកដែលត្រូវបានរារាំងមិនឱ្យវិលត្រឡប់ទៅផ្ទះសម្បែងវិញបាន គឺជាសាក្សីផ្ទាល់ភ្នែកដែលបានដឹងលឺនិងកត់ត្រាអំពីការពិតដែលកើតឡើងនៅតាមបណ្តោយព្រំដែនកម្ពុជា-ថៃ។ ដូច្នេះ សកម្មភាពរំលោភបំពាន ទន្ទ្រានកាន់កាប់ទឹកដីកម្ពុជាដោយខុសច្បាប់អន្តរជាតិពីសំណាក់កងទាហានថៃត្រូវបានសហគមន៍អន្តរជាតិដឹងលឺយ៉ាងទូលំទូលាយ។ ឯកឧត្តម ប៉ែន បូណា រម្លឹកជូនថា បណ្តាប្រទេសជាមិត្តទាំងនៅក្នុងតំបន់ និងលើឆាកអន្តរជាតិ បានជួយជ្រោមជ្រែងកម្ពុជាតាំងពីការចាប់ផ្តើមដំបូងនៃសង្គ្រាមទន្ទ្រានឈ្លានពានទឹកដីពីសំណាក់កងទ័ពថៃកាលពីខែកក្កដា ឆ្នាំ ២០២៥ មកម៉្លះ។ ជាក់ស្តែង បទឈប់បាញ់ទាំងពីរលើក គឺនៅថ្ងៃទី២៨ ខែកក្កដា ឆ្នាំ ២០២៥ និង ២៧ ធ្នូ ២០២៥ ក៏ដូចជាសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជា-ថៃ ចុះថ្ងៃទី២៦ ខែតុលា ឆ្នាំ ២០២៥ សុទ្ធតែកើតឡើងដោយកិច្ចខិតខំប្រឹងប្រែងរបស់ថ្នាក់ដឹកនាំកម្ពុជា ក្រោមការជួយជ្រោមជ្រែងពេញទំហឹងពីបណ្តាប្រទេសជាមិត្តជាពិសេស សហរដ្ឋអាម៉េរិក សាធារណរដ្ឋប្រជាមានិតចិននិងម៉ាឡេស៊ីក្នុងនាមប្រធានប្តូរវេនអាស៊ាន។ ឯកឧត្តមបន្តថា កិច្ចព្រមព្រៀងទាំងនេះក៏បានទទួលការសាទរពីបណ្តាប្រទេសជាមិត្តគ្រប់ទិសទីដោយពួកគេបាននិងកំពុងបន្តជំរុញឱ្យភាគីទាំងពីរគោរព និងអនុវត្តឱ្យបានម៉ឺងម៉ាត់បំផុតនូវការដោះស្រាយបញ្ហាព្រំដែនដោយសន្តិវិធី ដោយអនុលោមតាមច្បាប់អន្តរជាតិ និងចៀសវាងដាច់ខាតការប្រើកម្លាំង។ ទាំងអស់នេះសបញ្ជាក់ឱ្យឃើញថា បងប្អូនប្រជាពលរដ្ឋភៀសសឹក និយាយដោយឡែក និងប្រទេសកម្ពុជាទាំងមូល និយាយជារួមកំពុងស្ថិតក្នុងក្រសែភ្នែកតាមដានយ៉ាងយកចិត្តទុកដាក់ពីសហគមន៍តំបន់ និងអន្តរជាតិ ពីព្រោះការទន្ទ្រានកាន់កាប់ទឹកដីនៃប្រទេសអធិបតេយ្យមួយដោយកម្លាំងយោធាត្រូវបានហាមប្រាមដោយធម្មនុញ្ញអាស៊ានធម្មនុញ្ញអង្គការ សហ ប្រជាជាតិ និងច្បាប់អន្តរជាតិ។ ដូច្នេះ ទាំងសមាគមអាស៊ាន និងសហគមន៍អន្តរជាតិមិនអាចឈរឱបដៃមើលការរំលោភបំពានបែបនេះឡើយ។នៅឯកិច្ចប្រជុំចង្អៀតនៃរដ្ឋមន្ត្រីការបរទេសអាស៊ាន នៅកោះសេប៊ូ ប្រទេសហ្វីលីពីន កាលពីថ្ងៃទី២៩ ខែមករា ឆ្នាំ ២០២៦ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ ក៏បានជម្រាបជូនប្រមុខការទូតអាស៊ានរួចហើយថា ទោះបីជាមានការរីកចម្រើនជាវិជ្ជមានចាប់តាំងពីមានបទឈប់បាញ់ក៏ដោយ ក៏នៅតែមានសកម្មភាពមួយចំនួនដែលមិនស្របនឹងសេចក្តីប្រកាសរួមនៃកិច្ចប្រជុំពិសេសលើកទី ៣របស់គណៈកម្មាធិការព្រំដែនទូទៅ ជាពិសេសទាក់ទងទៅនឹងការគោរពអធិបតេយ្យនិងបូរណភាពទឹកដី។ ជាក់ស្តែង ប្រជាពលរដ្ឋភៀសសឹកជាច្រើននៅតែមិនអាចត្រឡប់ទៅលំនៅដ្ឋានរបស់ពួកគេវិញដោយសុវត្ថិភាព និងសេចក្តីថ្លៃថ្នូរបាននៅឡើយ ដោយសារតែផ្ទះសម្បែងរបស់ពួកគេមិនអាចចូលបានដោយមានរបាំងរារាំង និងការគំរាមកំហែងសន្តិសុខ ឬត្រូវបានរុះរើឬបំផ្លាញ។ កុមាររាប់ពាន់នាក់នៅតែមិនអាចទៅសាលារៀនវិញបាន។ថ្នាក់ដឹកនាំអាស៊ានក៏បានដឹងលឺអំពីបញ្ហានេះ ខណៈដែលភីលីពីនក្នុងនាមប្រធានប្តូរវេនអាស៊ានឆ្នាំ២០២៦ ក៏បានបញ្ជាក់ពីអាទិភាពនៃការបន្តតាមដាន និងសម្របសម្រួលដើម្បីឱ្យការអនុវត្តសេចក្តីប្រកាសរួមថ្ងៃទី២៧ ធ្នូ២០២៥ ប្រព្រឹត្តទៅដោយពេញលេញនិងមានប្រសិទ្ធភាព ហើយភីលីពីនក៏ទទួលយកតួនាទីជាប្រធានអ្នកសង្កេតការណ៍អាស៊ាន (AOT) បន្តពីប្រទេសម៉ាឡេស៊ី។ នេះសបញ្ជាក់ថា បណ្តាប្រទេសជាមិត្តក្នុងតំបន់ និងសហគមន៍អន្តរជាតិស្ថិតនៅជាមួយកម្ពុជា និងគាំទ្រជម្រើសរបស់កម្ពុជាក្នុងការការពារអធិបតេយ្យភាព និងបូរណភាពទឹកដីដោយសន្តិវិធី និងស្របតាមច្បាប់អន្តរជាតិ។ឯកឧត្តម ប៉ែន បូណា បញ្ជាក់ជូនជាថ្មីថា កម្ពុជាប្រកាន់ជំហរដាច់ខាតក្នុងការការពារខ្សែព្រំដែនអន្តរជាតិកម្ពុជា-ថៃ ដែលបន្សល់ទុកដោយគណៈកម្មការព្រំដែន ឥណ្ឌូចិន-សៀម ដោយគោរពគោលការណ៍ច្បាប់អន្តរជាតិ គោលការណ៍ខ្សែព្រំដែនមិនកែប្រែ(Uti Possidetis Juris) គោរពអនុសញ្ញា សន្ធិសញ្ញាបារាំង-សៀម ផែនទី និងកំណត់ ហេតុបោះបង្គោលព្រំដែនរបស់គណៈកម្មការបោះបង្គោលព្រំដែនឥណ្ឌូចិន-សៀម ព្រមទាំងកិច្ចព្រមព្រៀង និងឯកសារពាក់ព័ន្ធនានាដែលភាគីទាំងពីរបានឯកភាពគ្នានាពេលកន្លងមក។ កម្ពុជាមិនទទួលស្គាល់ជាដាច់ខាតនូវការកែប្រែខ្សែព្រំដែនណាមួយដែលកើតចេញពីការប្រើប្រាស់កម្លាំង។សូមបញ្ជាក់ថា គិតត្រឹមព្រឹកថ្ងៃទី១០ ខែកុម្ភៈ ឆ្នាំ២០២៦ ក្នុងចំណោមពលរដ្ឋភៀសសឹកសរុបជាង៦សែន៤ម៉ឺននាក់ មានជាង៥សែន៦ម៉ឺននាក់ ឬជាង៨៧% បានវិលត្រឡប់ទៅលំនៅឋានវិញ ខណៈនៅមានពលរដ្ឋចំនួន ៨៣.៥៤៦នាក់ទៀត (ស្រី្ត៤៣.៩៦៩នាក់ និងកុមារ២៧.៦៦៧នាក់) ពុំទាន់អាចវិលទៅលំនៅឋានវិញបាននៅឡើយដោយសារតែយោធាថៃព័ទ្ធរបងលួស ឬទូរកុងតឺន័រដើម្បីរារាំងឃាំងដំណើររបស់ពួកគេ និងមួយចំនួនជាតំបន់មានគ្រោះថ្នាក់ដោយសារយុទ្ធភ័ណ្ឌមិនទាន់ផ្ទុះពីការឈ្លានពានរបស់យោធាថៃ៕

សម្តេចប្រធានរដ្ឋសភា៖ «មហាសាមគ្គីជាតិខ្មែរក្រោមការដឹកនាំរបស់រាជរដ្ឋាភិបាល ជាសក្តានុពលសំខាន់បំផុតនៅក្នុងកិច្ចការពារបូរណភាពទឹកដី»

សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា មានប្រសាសន៍លើកឡើងពីសារៈសំខាន់នៃកម្លំាងសាមគ្គីមហាគ្រួសារខ្មែរ ក្រោមការដឹកនាំរបស់រាជរដ្ឋាភិបាលថា ជាសក្តានុពលសំខាន់បំផុតនៅក្នុងកិច្ចការពារអធិបតេយ្យ និងបូរណភាពទឹកដី។ សម្តេចបានថ្លែងអំណរគុណជូនពលរដ្ឋខ្មែរទាំងអស់ ទំាងក្នុងប្រទេសនិងក្រៅប្រទេស ដែលបានរួមជាធ្លុងមួយឈរការពារ និងគាំទ្ររាជរដ្ឋាភិបាល និងវីរយុទ្ធជនយើង នៅក្នុងកិច្ចការពារអធិបតេយ្យ និងបូរណភាពទឹកដី តំាងពីដើមរហូតមក។សម្តេចប្រធានរដ្ឋសភាបានលើកឡើងដូច្នេះ នៅព្រឹកថ្ងៃទី១១ ខែកុម្ភៈ ឆ្នាំ២០២៦ ក្នុងឱកាសសម្តេចអញ្ជើញទទួលអំណោយសប្បុរសធម៌ ជាថវិកា និងសម្ភារមួយចំនួនពីលោកជំទាវ ឈាង គឹមស្រ៊ុន ទីប្រឹក្សាសម្តេចប្រធានរដ្ឋសភា និងលោកជំទាវ នាង សុវណ្ណារី ទីប្រឹក្សា ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ សម្រាប់ចែកជូនដល់វីរៈកងទ័ព និងជនភៀសសឹករបស់យើង។សម្តេចប្រធានរដ្ឋសភា បានថ្លែងអំណរគុណយ៉ាងជ្រាលជ្រៅ ចំពោះសន្ដានចិត្តប្រកបដោយសប្បុរសធម៌របស់លោកជំទាវទាំងពីររូបក៏ដូចជា សប្បុរសជនទាំងអស់ដែលបានចូលរួមបរិច្ចាគធនធានផ្ទាល់ខ្លួន ចូលរួមជាកម្លំាងសប្បុរសធម៌មហាគ្រួសារខ្មែរ តាមរយៈសម្តេចក្តី និងតាមរយៈថ្នាក់ដឹកនាំស្ថាប័ននានាក្តី ដែលនេះសុទ្ធសឹងជាកាយវិការមនុស្សធម៌ គួរគោរពជាទីបំផុត ស្របតាមការអំពាវនាវរបស់រាជរដ្ឋាភិបាលក៏ដូចជាថ្នាក់ដឹកនាំកំពូលរបស់ជាតិ ក្នុងសា្មរតីមហាគ្រួសារខ្មែរ ជួយសង្គមជាតិក្នុងគ្រាដ៏លំបាកនេះ។ សម្តេចរដ្ឋសភាធិបតី បានគូសបញ្ជាក់ថាទឹកចិត្តសប្បុរសទំាងអស់នោះបានបង្ហាញពីការជឿជាក់របស់ប្រជាពលរដ្ឋមកលើប្រមុខដឹកនាំជាន់ខ្ពស់របស់យើង គឺសម្ដេចតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រនៃព្រះរាជាណាចក្រកម្ពុជា ជាប្រធានព្រឹទ្ធសភា និងជាអគ្គភ័ស្ដុភារ និងព្រមទាំងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៅក្នុងកិច្ចការពារអធិបតេយ្យជាតិ ពីការឈ្លានពានរបស់ប្រទេសជិតខាង។សម្តេចរដ្ឋសភាធិបតី ឃួន សុដារី បានគូសបញ្ជាក់ថា ដូចប្រជាពលរដ្ឋជាទូទៅបានជ្រាបច្បាស់ហើយពីគោលការណ៍អាទិភាពសំខាន់បំផុតរបស់រាជរដ្ឋាភិបាល ទាំងពេលកន្លងមក បច្ចុប្បន្ន និងទៅអនាគត គឺអធិបតេយ្យ បូរណភាពទឹកដី និងអាយុជីវិតប្រជាពលរដ្ឋ។ កិច្ចការពារបូរណភាទឹកដីត្រូវបានការពារដោយច្បាប់អន្តរជាតិ ហើយកម្ពុជាមិនទទួលស្គាល់ដាច់ខាតការកែប្រែខ្សែបន្ទាត់ព្រំដែន ឬការកាន់កាប់ទឹកដីដោយខុសច្បាប់អន្តរជាតិ ឬតាមរយៈការប្រើប្រាស់កម្លាំង។ កម្ពុជាប្រកាន់ខ្ជាប់នូវការដោះស្រាយបញ្ហាព្រំដែនកម្ពុជា-ថៃ ដោយសន្តិវិធី ស្របតាមច្បាប់អន្តរជាតិ ព្រមទាំងកិច្ចព្រមព្រៀងដែលមានស្រាប់ដែលកម្ពុជា និងថៃ បានចុះហត្ថលេខាជាមួយគ្នា ជាពិសេសការចុះវាស់វែងតាមយន្ដការគណៈកម្មការចម្រុះ ខណ្ឌសីមាព្រំដែនគោក (JBC) ដើម្បីកំណត់ភាពត្រឹមត្រូវ និងយុត្តិធម៌របស់ប្រទេសទាំងពីរក្នុងការការពារអធិបតេយ្យ និងបូរណភាពទឹកដីរៀងៗខ្លួន ។សម្តេចប្រធានរដ្ឋសភា បានមានប្រសាសន៍លើកឡើងថា មហាសាមគ្គីគ្រួសារខ្មែរ បានរួមគ្នាជាធ្លុងមួយបានផុសឡើងយ៉ាងរឹងមាំ និងខ្លាំងក្លាជាទីបំផុតមិនធ្លាប់មាននៅក្នុងគ្រាដែលប្រទេសជាតិជួបការលំបាកនេះបានផុសឡើងនៅគ្រប់ប្រទាប់វណ្ណៈ ពីប្រជាពលរដ្ឋ ព្រះសង្ឃ មន្រ្តីរាជការ ថ្នាក់ដឹកនាំរហូតដល់ ព្រះករុណាជាអម្ចាស់ជីវិតលើត្បូង។ មហាសាមគ្គីជាតិខ្មែរ ជាកម្លំាងចលករដ៏សំខាន់ឈរយ៉ាងស្វាហាប់ ពីក្រោយរាជរដ្ឋាភិបាលនិងវីរយុទ្ធជនរបស់យើង ជាខឿនដ៏រឹងមាំការពារប្រទេសជាតិ ក្នុងនាមខ្មែរជួយខ្មែរនៅគ្រប់កាលៈទេសៈ ជាមួយរាជរដ្ឋាភិបាល។ក្នុងស្មារតីសមរភូមិក្រោយគំាទ្រ និងនៅជាប់ជានិច្ចជាមួយសមរភូមិមុខ ថ្នាក់ដឹកនាំរដ្ឋសភា សមាជិក សមាជិការដ្ឋសភា ព្រមទំាងមន្រ្តីរាជការ នៃអគ្គលេខាធិការដ្ឋានរដ្ឋសភា បានចូលរួមយ៉ាងសស្រាក់សស្រំា ទំាងថវិកា កម្លំាងកាយចិត្ត ចុះសួរសុខទុក្ខ និងចែកអំណោយសប្បុរសធម៌ ជូនវីរយុទ្ធជន និងពលរដ្ឋភៀសសឹកគ្រប់គោលដៅយ៉ាងមមាញឹកជាទីបំផុត។ អំណោយដែលសម្តេចប្រធានរដ្ឋសភាទទួលបាននាពេលនេះ ដែលគឺជាអំណោយរបស់លោកជំទាវ គឹមស្រ៊ុន មាន អង្ករផ្កាម្លិះ ចំនួន ២តោន ទឹកបរិសុទ្ធ ចំនួន ៥០កេស សាច់ក្រក ចំនួន ៥០គីឡូក្រាម ប្រហុក ចំនួន ៥០គីឡូក្រាម។ ចំណែក អំណោយទទួលបានពីលោកជំទាវ នាង សុវណ្ណារី មានត្រីងៀត ចំនួន ៥០គីឡូ មីជាតិចំនួន ៥០ កេស និងឆៃប៉ូវចំនួន ៥០គីឡូ។ ចំពោះអំណោយសប្បុរសធម៌ ដែលរដ្ឋសភាទទួលបានតាមរយៈ សម្តេចប្រធានរដ្ឋសភា បានធ្វើការបែងចែកជូន ដល់រដ្ឋបាលខេត្តជាប់ព្រំដែនកម្ពុជា-ថៃ មានដូចជា ខេត្តព្រះវិហារ ខេត្តឧត្តរមានជ័យ ខេត្តបន្ទាយមានជ័យ ខេត្តបាត់ដំបង ខេត្តពោធិ៍សាត់ ខេត្តកោះកុង សម្រាប់ធ្វើការបែងចែកបន្តជូនវីរៈកងទ័ព និងពលរដ្ឋភៀសសឹក។ ក្រៅពីនេះ ថវិកានិងសម្ភារមួយចំនួនទៀតសម្រាប់ចែកជូនវីរយុទ្ធជន ដែលសម្រាកព្យាបាលនៅតាមមន្ទីរពេទ្យ និងសម្រាប់ជូនក្រុមគ្រួសារវីរយុទ្ធជន ដែលបានពលីជីវិតជាដើម។រដ្ឋសភាសូមអរគុណ នៅតែបន្តទទួលអំណោយសប្បុរសធម៌ ហើយនឹងធ្វើការបែងចែក អំណោយ ទាំងនោះ តាមគោលដៅតម្រូវការ ធ្វើយ៉ាងណាផ្តល់ភាពកក់ក្តៅ និងផ្សារភ្ជាប់ជានិច្ច រវាងយុទ្ធជនជួរមុខ និងពលរដ្ឋជួរក្រោយ៕

បណ្ដាញសង្គម

ព័ត៌មានថ្មីៗ

សង្រ្គាមបានលួចពហុកីឡដ្ឋានតំបន់ហ្កាហ្សា ប៉ុន្តែមិនអាចលួចក្តីស្រលាញ់ការប្រកួតបាល់ទាត់បានទេ

ក្រុមមេដឹកនាំ G7ជួបជុំគ្នានៅថ្ងៃចុងក្រោយកិច្ចប្រជុំកំពូលក្នុងប្រទេសបារាំង

មេដឹកនាំ G7ពិភាក្សាលើការគ្រប់គ្រងប្រព័ន្ធ AI ជាមួយប្រធានបច្ចេកវិទ្យា ក្នុងកិច្ចប្រជុំកំពូលនៅបារាំង

លោកប្រធានាធិបតី Aoun និយាយថា លីបង់មាន «ផ្លូវឯករាជ្យ» ក្នុងការចរចាជាមួយអ៊ីស្រាអែល

មេដឹកនាំអាស៊ានធ្វើដំណើរទៅដល់ទីក្រុង Kazan ដើម្បីចូលរួមកិច្ចប្រជុំកំពូលរុស្ស៊ី-អាស៊ាន

បារាំងប្រកាសហាមឃាត់ការប្រើប្រាស់ទូរស័ព្ទដៃ នៅក្នុងសាលាវិទ្យាល័យ ចាប់ពីខែកញ្ញា

លោក Trump ៖ គ្មាននរណាម្នាក់ រួមទាំងលោក Obama មិនអាចបង្កើតកិច្ចព្រមព្រៀងជាមួយអ៊ីរ៉ង់បានទេ

ក្រុមឧទ្ទាមកូឡុំប៊ីស្វាគមន៍កិច្ចប្រជុំជាមួយប្រធានាធិបតីថ្មី តែពួកគេក៏អាចរស់រានពីការវាយប្រហារយោធាដែរ

កោះតៃវ៉ាន់អះអាងថា កេនយ៉ាងរារាំងខ្លួនមិនឲ្យចូលរួមសន្និសីទដោយសារសម្ពាធពីចិន

សំណុំផ្សែងនៅតែបន្តឃើញមាននៅតំបន់ភាគខាងត្បូងលីបង់ បើទោះបីជាមានកិច្ចព្រមព្រៀងអាមេរិក-អ៊ីរ៉ង់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានជាតិ

គម្រោងសាងសង់ស្ពានឆ្លងទន្លេមេគង្គ (ដីឥដ្ឋ-ថ្មគរ) សម្រេចបាន ៣៩,២៩% គិតត្រឹមខែកុម្ភៈ ឆ្នាំ២០២៦

គ្រូបង្រៀន និងអាណាព្យាបាលប្តេជ្ញាអប់រំកុមារថ្នាក់មត្តេយ្យសិក្សាឱ្យក្លាយជាសិស្សពូកែ

កម្ពុជាស្នើសុំ UN បន្តផ្តល់ការគាំទ្រ សម្រាប់ការត្រៀមខ្លួនចាកចេញពីប្រទេសអភិវឌ្ឍន៍តិចតួច

យុវជនបោះបង់ការសិក្សាសាលាចំណេះទូទៅ ងាកមកបន្តរៀនជំនាញវិជ្ជាជីវៈ

ថ្ងៃសែនដកជើងធូប ពលរដ្ឋខ្មែរកាត់ចិននាំគ្នាទិញរណ្តាប់សែនព្រេន ទោះមាន​និន្នាការ​កាត់​បន្ថយ​ចំណាយ​បន្តិច

ក្រសួងអប់រំ៖ ចំនួនសិស្សចូលរៀនកើនឡើងគ្រប់កម្រិតសិក្សា​ សម្រាប់រយៈពេល​១០ឆ្នាំ​ចុងក្រោយនេះ

កម្មវិធីអន្តរាគមន៍ សម្រាប់គ្រួសារភៀសសឹកដែលវិលទៅលំនៅឋានវិញ នឹង​អនុវត្ត​នៅ​ពាក់​កណ្ដាល​ខែ​កុម្ភៈ