នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ជនបរទេស១៣នាក់ត្រូវបានឃាត់ខ្លួនក្នុងប្រតិបត្តិការបង្រ្កាបបទល្មើសតាមប្រព័ន្ធបច្ចេកវិទ្យានៅសៀមរាប
​ការអនុវត្ត​វិធានការគន្លឹះក្នុងវិស័យអប់រំ (គ.វ.អ.) នៅសាលាបឋមសិក្សា ត្រពាំងអារ័ក្ស ស្រុកកំពង់ស្វាយ ខេត្តកំពង់ធំ
កសិករកំពង់ធំជាង១០០គ្រួសារ ទទួលផលចំណេញច្រើនជាងមុន ក្រោយស្ម័គ្រចិត្តចងក្រងជាសហគមន៍កសិកម្មទំនើប
រដ្ឋទូតឥណ្ឌូនេស៊ី ត្រៀមផ្តល់ការគាំទ្រ និងកិច្ចសហការជាមួយកម្ពុជាដើម្បីប្រយុទ្ធប្រឆាំងការឆបោកតាមបច្ចេកវិទ្យា

ព័ត៌មានជាតិ

ក្រសួងប្រៃសណីយ៍និងទូរគមនាគមន៍ បានរៀបចំសិក្ខាសាលាស្ដីពី “ការរៀបចំ និងពង្រឹងសន្តិសុខឌីជីថលសម្រាប់ក្រុមហ៊ុនធុរកិច្ចថ្មី និងសហគ្រិនឌីជីថល”

2025/02/03 03:47:13 pm        281
Facebook Telegram Linkin
ដោយមើលឃើញពីកំណើននៃការវាយប្រហារនិងការគំរាមកំហែងផ្នែកសន្តិសុខសាយប័រលើក្រុមហ៊ុនធុរកិច្ចថ្មីឌីជីថល ក.ប.ទ. ក្នុងនាមជាក្រសួងអភិវឌ្ឍនិងគ្រប់គ្រងវិស័យប្រៃសណីយ៍ វិស័យទូរគមនាគមន៍ និងវិស័យបច្ចេកវិទ្យាគមនាគមន៍និងព័ត៌មាន បានកំពុងរៀបចំគោលនយោបាយ យុទ្ធសាស្ត្រ បទដ្ឋានគតិយុត្ត ការគាំទ្រលើការអភិវឌ្ឍធនធានជំនាញ និងបានកំពុងរៀបចំកម្មវិធីបញ្ជ្រាបចំណេះដឹងនានាពាក់ព័ន្ធនឹងសន្តិសុខសាយប័រ។ ហើយកាលពីថ្ងៃទី ១ ខែកុម្ភៈ ឆ្នាំ២០២៥ ក.ប.ទ. បានរៀបចំសិក្ខាសាលាស្ដីពី “ការរៀបចំ និងពង្រឹងសន្តិសុខឌីជីថលសម្រាប់ក្រុមហ៊ុនធុរកិច្ចថ្មី និងសហគ្រិនឌីជីថល” នៅសាកលវិទ្យាល័យអាមេរិកាំងភ្នំពេញ ក្រោមអធិបតីភាពរបស់ឯកឧត្តម សំ សិទ្ធិសេរី អគ្គនាយកនៃអគ្គនាយកដ្ឋានបច្ចេកវិទ្យាគមនាគមន៍និងព័ត៌មាន នៃ ក.ប.ទ. ដែលមានការចូលរួមពីតំណាងក្រុមហ៊ុនធុរកិច្ចថ្មី និងសហគ្រិនឌីជីថលចំនួន ៣០ក្រុមហ៊ុន សរុបអ្នកចូលរួម ៨៣នាក់។សិក្ខាសាលានេះ ត្រូវបានរៀបចំដោយរួមបញ្ចូលការធ្វើបទបង្ហាញពីវាគ្មិនកិត្តិយស ការបង្ហាញ (Demo) និងសំណួរចម្លើយទាក់ទងនឹងនិន្នាការ បញ្ហាប្រឈម ហានិភ័យ វិធីសាស្រ្តក្នុងការបង្ការ ការគ្រប់គ្រង និងការឆ្លើយតបចំពោះការគំរាមកំហែងសន្តិសុខសាយប័រ ជាពិសេសការរៀបចំផែនការក្នុងការធានាសុវត្ថិភាពនិងសន្តិសុខលើការគ្រប់គ្រង ប្រតិបត្តិការ និងការប្រើប្រាស់ប្រព័ន្ធឌីជីថលរបស់ក្រុមហ៊ុនធុរកិច្ចថ្មី និងសហគ្រិនឌីជីថលស្របទៅតាមឧត្តមានុវត្តន៍តំបន់និងសកល។វាគ្មិនកិត្តិយស បានលើកឡើងក្នុងបទបង្ហាញថា ដើម្បីពង្រឹងសុវត្ថិភាពឌីជីថលដល់អាជីវកម្ម ក្រុមហ៊ុនធុរកិច្ចថ្មី និងសហគ្រិនឌីជីថលចាំបាច់ត្រូវយកចិត្តទុកដាក់លើសន្តិសុខសាយប័រដោយផ្អែកលើធាតុសំខាន់ៗចំនួន ៣ រួមមាន៖- ការគ្រប់គ្រងដំណើរការនិងអភិបាលកិច្ច (Process)៖ ការរៀបចំគោលការណ៍សន្តិសុខសាយប័រ ការវាយតម្លៃហានិភ័យ (Risk Assessment) និងផែនការឆ្លើយតបទៅនឹងហានិភ័យ (Incident Response Plan) ដើម្បីពង្រឹងសុវត្ថិភាពប្រតិបត្តិការអាជីវកម្ម។- ធនធានមនុស្ស (People)៖ ការលើកកម្ពស់ការយល់ដឹងអំពីសន្តិសុខសាយប័រ ចំពោះនិយោជិក និងដៃគូអាជីវកម្ម ដើម្បីកាត់បន្ថយហានិភ័យដែលអាចកើតឡើងដោយការវាយប្រហារ។- បច្ចេកវិទ្យា (Technology)៖ ការបំពាក់ឧបករណ៍និងបច្ចេកវិទ្យាបង្កើនសុវត្ថិភាពឌីជីថលដល់អាជីវកម្មដើម្បីទប់ស្កាត់និងកាត់បន្ថយការវាយប្រហារ។ក.ប.ទ. លើកទឹកចិត្តឱ្យមានការចូលរួមនិងសហការពីក្រុមហ៊ុនធុរកិច្ចថ្មីនិងសហគ្រិនឌីជីថល ព្រមទាំងគ្រប់ភាគីពាក់ព័ន្ធទាំងអស់លើការងារសន្តិសុខសាយប័រ ដើម្បីបង្កើតសង្គមមួយប្រកបដោយសុវត្ថិភាពសម្រាប់កម្ពុជា។ ក.ប.ទ. នឹងបន្តគាំទ្រនិងជំរុញការបញ្រ្ជាបចំណេះដឹងឱ្យបានកាន់តែទូលំទូលាយនិងការយល់ដឹងកាន់តែល្អប្រសើរឡើងអំពីការវាយប្រហារតាមប្រព័ន្ធអនឡាញ និងវិធីសាស្ត្រការពារខ្លួន៕ 

លោកជំទាវភឿងសកុណាណែនាំក្រុមការងារនិងរដ្ឋបាលខេត្តរួមឆ្លើយ តបសេវាសាធារណៈនិងចុះពិនិត្យជីវភាពពិសេសការងារបង្ករបង្កើនផលរបស់ពលរដ្ឋ

2025/02/03 02:48:45 pm        97
Facebook Telegram Linkin
ស្វាយរៀង ៖ លោកជំទាវភឿង សកុណា ប្រធានក្រុមការងាររាជរដ្ឋាភិបាលចុះជួយមូលដ្ឋានខេត្តស្វាយរៀង បានណែនាំដល់ឯកឧត្តម លោកជំទាវ លោក លោកស្រីជាក្រុមការងាររាជរដ្ឋាភិបាលចុះជួយមូលដ្ឋានស្រុក ក្រុង គោលដៅនិងរដ្ឋបាលខេត្ត មន្ទីរអង្គភាពពាក់ព័ន្ធ ត្រូវធ្វើការពិភាក្សាឆ្លើយតបរាល់លើសេវាតម្រូវការ អភិវឌ្ឍន៏ និងសេវាបម្រើជីវភាពរបស់ពលរដ្ឋ អោយបានទាន់ពេលវេលា ដើម្បីឲ្យពួកគាត់មានចំណាប់អារម្មណ៍ និងមានភាពជឿជាក់មកលើការដឹកនាំរបស់រាជរដ្ឋាភិបាល។ ការថ្លែងនឹងមានប្រសាសន៍លើកឡើងរបស់មន្ត្រីជាន់ខ្ពស់រាជរដ្ឋាភិបាលបែបនេះបានធ្វើឡើងក្នុងឱកាស លោកជំទាវអញ្ជើញជាអធិបតី ក្នុងកិច្ចប្រជុំបូកសរុបលទ្ធផលការងាររបស់ក្រុមការងាររាជរដ្ឋាភិបាលចុះជួយខេត្ត ឆ្នាំ២០២៤ និងទិសដៅការងារបន្តឆ្នាំ២០២៥ នៅសាលប្រជុំសាលាខេត្តថ្ងៃទី៣ ខែកុម្ភៈ ឆ្នាំ២០២៥ ដោយមានការអញ្ជើញចូលរួមពីឯកឧត្តមលោកជំទាវ លោក លោកស្រីថ្នាក់ដឹកនាំខេត្ត ស្រុក ក្រុង ឃុំ សង្កាត់និងមន្ត្រីនគរបាលប៉ុស្តិ៍រដ្ឋបាលរដ្ឋបាលនៅទូទាំងខេត្តផងដែរ ។ក្នុងនាមប្រមុខរាជរដ្ឋាភិបាលសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី លោកជំទាវ ភឿង សកុណា បានសម្ដែងអបអរសាទរចំពោះឯកឧត្តម លោកជំទាវ លោក លោកស្រី និងផ្នែកពាក់ព័ន្ធទាំងអស់ ដែលបានខិតខំលះបង់ទាំងកម្លាំងកាយចិត្តធនធាននិងថវិកា យកមកធ្វើការអភិវឌ្ឍន៍មូលដ្ឋានបានល្អលើគ្រប់ហេដ្ឋារចនាសម្ព័ន្ធរូបវន្ត័ ពិសេសជីវភាពពលរដ្ឋត្រូវបានលើកកម្ពស់តាមរយៈការចូលរួមឧបត្ថម្ភ ជីកស្ដារប្រព័ន្ធធារាសាស្ត្រនៅគ្រប់មូលដ្ឋានផ្ដល់ឲ្យពលរដ្ឋធ្វើការងារបង្កបង្កើតផលបម្រើជីវភាពមានភាពល្អប្រសើរ។ទាក់ទងទៅនឹងស្ថានភាពធាតុអាកាសលោកជំទាវ ប្រធានក្រុម បានណែនាំដល់ ក្រុមការងារ ត្រូវចុះស្វែងយល់ពីតម្រូវការទឹក និងស្វះស្វែងរកប្រភពទឹកបូមធ្វើការសង្គ្រោះស្រូវប្រាំងជូនបងប្អូនទៅតាមសមត្ថភាពលទ្ធភាពដែលអាចធ្វើបានករណីពលរដ្ឋមានតម្រូវការ ដើម្បីបញ្ជៀសការខូចខាតស្រូវរបស់បងប្អូន ខណៈដែលបច្ចុប្បន្នពលរដ្ឋនៅតាមមូលដ្ឋានមួយចំនួនធំ បាននឹងកំពុងប្រឈមនិងកង្វះទឹកប្រើប្រាស់លើដំណាំស្រូវ បន្លែ ។ ដោយឡែកការងារសន្តិសុខសង្គម លោកជំទាវប្រធានក្រុមការងារបានណែនាំនិងជំរុញដល់មន្ត្រីមានសមត្ថកិច្ចបន្តចុះធ្វើការផ្សព្វផ្សាយគោលនយោបាយភូមិឃុំមានសុវត្ថិភាពបន្ថែមទៀតដើម្បីបំផុសពលរដ្ឋ ពិសេសយុវជនឲ្យពួកគេបានយល់ និងចូលអនុវត្តធ្វើការទប់ស្ចាត់ក្មេងទំនើង ពិសេសបញ្ជៀសបានពីការប្រើប្រាស់គ្រឿងញៀននិងគោរពច្បាប់ចរាចរណ៍ ដែលជាកង្វល់ធំរបស់រាជរដ្ឋាភិបាល ក៏ដូចជាពលរដ្ឋនៅតាមមូលដ្ឋានបានប្រឈមលើគ្រប់បញ្ហាខាងលើធ្វើឲ្យស្ថេរភាពសន្តិសុខមានភាពអសកម្ម ខ្លះៗ ខណៈដែលចលនាក្មេងបង្ករអុកឡុកនៅតាមមូលដ្ឋាន។

រដ្ឋមន្ត្រីកសិកម្ម៖ កម្ពុជាបើកទ្វារស្វាគមន៍រាល់អ្នកវិនិយោគលើវិស័យកសិកម្ម ផលិតធាតុចូលកសិកម្មជួយកាត់បន្ថយថ្លៃដើមរបស់កសិករ

2025/02/03 02:13:02 pm        123
Facebook Telegram Linkin
នៅព្រឹកថ្ងៃទី៣ ខែកុម្ភៈ ឆ្នាំ២០២៥ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងថ្នាក់ដឹកនាំ បានទទួលជួបសម្តែងការគួរសមជាមួយសាស្ត្រាចារ្យ Wendy Umberger នាយកប្រតិបត្តិនៃមជ្ឈមណ្ឌលអូស្ត្រាលីសម្រាប់ការស្រាវជ្រាវកសិកម្មអន្តរជាតិ (ACIAR) នៅទីស្តីការក្រសួងកសិកម្ម រុក្ខាប្រមាញ់ និងនេសាទ។នាឱកាសនៃជំនួប ឯកឧត្តមរដ្ឋមន្ដ្រី បានសម្តែងនូវការស្វាគមន៍ថ្នាក់ដឹកនាំ និងក្រុមការងារ (ACIAR) ក្នុងការពិនិត្យលទ្ធភាពចូលរួមចំណែកក្នុងវិស័យកសិកម្មកម្ពុជា និងបន្តពង្រឹងកិច្ចការសហប្រតិបត្តិការនេះឱ្យកាន់តែរលូន ដើម្បីផលប្រយោជន៍របស់ប្រជាកសិករ។ លើសពីនេះ ឯកឧត្តមរដ្ឋមន្ដ្រី បានលើកទឹកចិត្តដល់ក្រុមការងារ (ACIAR) ក្នុងការសិក្សាបន្ថែមពាក់ព័ន្ធនឹងការប្រើប្រាស់ថាមពល និងថាមពលកកើតឡើងវិញ ឥណទានកាបូន និងធ្យូងជីវៈ ជាដើមដោយធ្វើយ៉ាងណាមានទិន្នន័យច្បាស់លាស់ និងអាចអនុវត្តបានពិតប្រាកដ។ទន្ទឹមនឹងនេះ ឯកឧត្តមរដ្ឋមន្ដ្រី បានលើកឡើងពីសហគមន៍កសិកម្មទំនើប ដែលជាគោលនយោបាយអាទិភាពរបស់រាជរដ្ឋាភិបាល អាចកាត់បន្ថយថ្លៃដើមផលិត ផលិតតាមតម្រូវការទីផ្សារ និងមានប្រសិទ្ធភាពសេដ្ឋកិច្ច ហើយ (ACIAR) អាចពិនិត្យលទ្ធភាពចូលរួមក្នុងការវិនិយោគលើកម្ចីដែលមានអត្រាការប្រាក់ទាបសម្រាប់ប្រជាកសិករ ការវិនិយោគលើហេដ្ឋារចនាសម្ព័ន្ធ និងផ្សាភ្ជាប់គម្រោងនានាជួយដល់សហគមន៍កសិកម្មទំនើបនេះផងដែរ។បើតាម ឯកឧត្តមរដ្ឋមន្ដ្រី កម្ពុជាបើកទ្វារស្វាគមន៍រាល់អ្នកវិនិយោគទាំងអស់ដែលមានបំណងវិនិយោគលើវិស័យកសិកម្ម ក្នុងការផលិតធាតុចូលកសិកម្ម ចំណីសត្វគ្រប់ប្រភេទ ការវិនិយោគលើថាមពល ដើម្បីអាចជួយកាត់បន្ថយថ្លៃដើមរបស់ប្រជាកសិករ ជាពិសេសការវិនិយោគលើការសិក្សាស្រាវជ្រាវគ្រប់អនុវិស័យដូចជា ផលិតកម្មសត្វ វារីវប្បកម្ម និងហេដ្ឋារចនាសម្ព័ន្ធនានាចាំបាច់។ពាក់ព័ន្ធនឹងការងារគម្រោង ឯកឧត្តមរដ្ឋមន្ដ្រី បានលើកទឹកចិត្តដល់ក្រុមការងារ (ACIAR) បន្តកិច្ចសហប្រតិបត្តិការឱ្យតែល្អបន្ថែមទៀតជាមួយក្រសួងកសិកម្ម សំដៅផ្តល់ផលប្រយោជន៍ និងផលចំនេញសេដ្ឋកិច្ចដល់ប្រជាកសិករ ប្រកបដោយប្រសិទ្ធភាព និងប្រសិទ្ធផលខ្ពស់៕

សម្ដេចតេជោ ហ៊ុន សែន ផ្ដល់អនុសាសន៍ដល់ក្រុមហ៊ុន JTI ជួយទាក់ទាញការវិនិយោគបន្ថែមលើវិស័យឧស្សាហកម្មឱសថ និងកែច្នៃអាហារ

2025/02/03 02:08:15 pm        130
Facebook Telegram Linkin
ភ្នំពេញ៖ នៅព្រឹកថ្ងៃចន្ទ ទី៣ ខែកុម្ភៈ ឆ្នាំ២០២៥ សម្ដេចអគ្គមហាសេនាបតីតេជោហ៊ុន សែន ប្រធានព្រឹទ្ធសភា បានអនុញ្ញាតឱ្យ លោក Eddy Pirardអគ្គនាយក និងជានាយកប្រតិបត្តិ (CEO) ក្រុមហ៊ុន Japan Tobacco International (JTI) សកលលោក និងសហការី ចូលជួបសម្ដែងការគួរសមនៅវិមានព្រឹទ្ធសភា រាជធានីភ្នំពេញ។ជាកិច្ចចាប់ផ្តើម សម្តេចតេជោ ហ៊ុន សែន បានស្វាគមន៍ លោក Eddy Pirard និងសហការី ដែលបានអញ្ជើញមកប្រទេសកម្ពុជា និងស្នើសុំអនុសាសន៍ណែនាំ និងចក្ខុវិស័យពី សម្តេច ក្នុងកិច្ចដំណើរការរួមចំណែករបស់ក្រុមហ៊ុនក្នុងការអភិវឌ្ឍប្រទេសកម្ពុជា។ សម្តេចតេជោ បានបន្តថា ទោះបីសម្តេចមិនមែនជាថ្នាក់ដឹកនាំរាជរដ្ឋាភិបាលក្តី សម្តេចនៅតែទទួលជួបជាមួយវិស័យឯកជន ដើម្បរួមចំណែកជាមួយរាជរដ្ឋាភិបាលក្នុងការអភិវឌ្ឍសង្គម និងសេដ្ឋកិច្ចកម្ពុជា។នាឱកាសជំនួបនេះ លោក Eddy Pirard បានលើកឡើងថា លោក និងសហការី មានកិត្តិយសយ៉ាងខ្លាំង និង ថ្លែងអំណរគុណ សម្តេចតេជោ ដែលបានអនុញ្ញាតឱ្យចូលជួបសម្ដែងការគួរសម និងរាយការណ៍ជូន សម្តេចតេជោ ពីកិច្ចខិតខំប្រឹងប្រែងរបស់ក្រុមហ៊ុន JTI ក្នុងការចូលរួមចំណែកអភិវឌ្ឍ សេដ្ឋកិច្ច និងសង្គមកម្ពុជា តាមរយៈការទទួលបានចំណាត់ថ្នាក់ល្អ ក្នុងនាមជានិយោជក ក្រុមហ៊ុនប្រតិបត្តិអនុលោមតាមលក្ខន្តិកៈកម្ពុជា និងជាពិសេសការរួមចំណែកលើកស្ទួយបរិស្ថាននៅកម្ពុជា តាមរយៈសកម្មភាពបណ្តុះកូនឈើ និងការធ្វើការជាមួយ សហគមន៍មូលដ្ឋាន ការបណ្តុះបណ្តាលធនធានមនុស្ស ការជ្រើសរើសបុគ្គលិកក្នុងស្រុក និងបានក្លាយជាដៃគូដ៏ល្អជាមួយកម្ពុជាសម្រាប់វឌ្ឍនភាពរួមគ្នា ដោយចាត់ទុកថា ការរីកចម្រើនរបស់កម្ពុជា គឺជាការរីកចម្រើនរបស់ក្រុមហ៊ុន។ លោក Eddy Pirard បានបន្ថែមថា ក្រុមហ៊ុន JTI ប្រចាំនៅកម្ពុជា គឺជាបុត្រសម្ព័ន្ធរបស់ក្រុមហ៊ុន JT Group ដែល មានភាគហ៊ុន៣៣% កាន់កាប់ដោយរដ្ឋាភិបាលជប៉ុន ហើយក្រុមហ៊ុននេះ ក៏មានអាជីវកម្មលើផ្នែកផ្សេងទៀតក្រៅពីឧស្សាហកម្មថ្នាំជក់ ដូចជាឧស្សាហកម្មឱសថ និងកែច្នៃអាហារផងដែរ។ លោក Eddy Pirard បានគូសបញ្ជាក់ថា ក្រុមហ៊ុនរបស់លោក មានវត្តមាននៅប្រទេសកម្ពុជាជាច្រើនឆ្នាំមកហើយ និងបានឃើញការរីកចម្រើនយ៉ាងលឿនខ្លាំងក្លារបស់ប្រទេសកម្ពុជា និងបានចាត់ទុកប្រទេសកម្ពុជាជាប្រទេសសំខាន់សម្រាប់ក្រុមហ៊ុន ព្រមទាំងស្វែងរកកិច្ចសហការ និងភាពជាដៃគូជាមួយអាជ្ញាធរកម្ពុជាដើម្បីបន្តរីកចម្រើនធំធាត់ថែមទៀត។ លោក Eddy Pirard មានជំនឿជឿជាក់យ៉ាងមុតមាំថា សម្តេចធិបតីនាយករដ្ឋមន្ត្រី នឹងដឹកនាំកម្ពុជាឈានទៅដំណាក់កាលថ្មីនៃការអភិវឌ្ឍជាតិ។ ជាកិច្ចឆ្លើយតប សម្តេចតេជោ បានសាទរ និងវាយតម្លៃខ្ពស់លើក្រុមហ៊ុន JTI ចំពោះជោគជ័យសម្រេចបានកន្លងមក ជាភាពជាគម្រូល្អនៃអនុលោមភាពសារពើពន្ធ និងជាសមាជិកក្រុមធុរជនល្អបំផុត ព្រមទាំង ការចូលរួមរបស់ក្រុមហ៊ុនក្នុងការអភិវឌ្ឍបៃតង និងប្រកបដោយចីរភាព និងការទប់ស្កាត់ការប្រែប្រួលអាកាសធាតុ និង ការផ្តល់ប្រព័ន្ធអគ្គិសនីប្រើពន្លឺព្រះអាទិត្យនៅបណ្តោយផ្លូវជាតិនានា។ សម្តេចតេជោ ក៏បានរំឭកអំពីអតីតកាលដែលគ្រួសារសម្តេចក៏ជាគ្រួសារកសិកររស់នៅតាមដងទន្លេមេគង្គដែលដាំថ្នាំជក់ និងចែករំលែកអំពីការវិវត្តនៃការសម្រេចជាគោលនយោបាយលើថ្នាំជក់របស់សម្តេច ពីពេលដែលចរន្តពិភពលោក មិនទាន់មានការហាមឃាត់ការជក់បារី រហូតមកទល់នឹងពេលបច្ចុប្បន្ន។ ក្នុងគោលដៅបន្តជំរុញការអភិវឌ្ឍសេដ្ឋកិច្ចសម្តេចតេជោ បានផ្តល់អនុសាសន៍ដល់ក្រុមហ៊ុន ពិនិត្យលទ្ធភាព និងទាក់ទាញការវិនិយោគបន្ថែមទៀត ជាពិសេសពិពិធកម្មផលិតកម្មលើវិស័យផ្សេងទៀតតួយ៉ាងដូចជាឧស្សាហកម្មឱសថ និងកែច្នៃអាហារ ។ ជាក់ស្តែង កម្ពុជា បាននឹងកំពុងក្លាយជាប្រទេសនាំមុខគេដែលដាំ និងប្រមូលផលស្រូវ និងគ្រាប់ស្វាយចន្ទីច្រើនជាងគេលើពិភពលោកនាពេលកន្លងទៅនេះ។ សម្តេចតេជោ ក៏បានលើកទឹកចិត្តឱ្យក្រុមហ៊ុន បន្តកិច្ចសហប្រតិបត្តិការល្អ និងឱ្យបានជិតស្និទ្ធជាមួយក្រសួងកសិកម្ម រុក្ខាប្រមាញ់ និងនេសាទ ជំរុញកិច្ចសហការសិក្សាស្រាវជ្រាវដោយប្រើប្រាស់បច្ចេកវិទ្យា និងបទពិសោធល្អៗ ជាពិសេស បទពិសោធជប៉ុន លើការជ្រើសរើសពូជ ការប្រើប្រាស់ដី និងបច្ចេកទេសកេ្សតសាស្រ្តដាំដុះ ជាពិសេស ដីដែលគ្មានឬមានល្បាប់តិចតួច សំដៅជួយកសិករបង្កើនគុណភាព និងទិន្នផលដាំដុះសន្លឹកថ្នាំជក់នៅកម្ពុជា។ សម្តេច បានបន្ថែមថា ក្រុមហ៊ុន គួរសហការជាមួយសហគមន៍ដាំដុះសន្លឹកថ្នាំជក់ ដែលជាសមាជិកម៉ាកសមូហភាពរបស់ក្រសួងពាណិជ្ជកម្ម សិក្សា បង្កើនការផលិត និងពង្រីកទីផ្សារនាំចេញ ដើម្បីធានាបាននិរន្តរភាពនៃការដាំដុះក្នុងទំរង់ភាពជាដៃគូឈ្នះ-ឈ្នះ ផងដែរ។នៅចុងបញ្ចប់ សម្តេចតេជោ បានជូនពរ លោក Eddy Pirard និងសហការី ព្រមទាំងក្រុមហ៊ុន JTI ទទួលបានជោគជ័យ ក្នុងការបំពេញការងារ និងធុរកិច្ចនៅកម្ពុជា៕

កសិករស្រុកស្អាងអរគុណរាជរដ្ឋាភិបាលអនុវត្តគម្រោងស្តារប្រព័ន្ធធារាសាស្ត្រផ្តល់ទឹកគ្រប់គ្រាន់សម្រាប់ធ្វើស្រែ

2025/02/03 01:53:41 pm        125
Facebook Telegram Linkin
បណ្តាប្រជាកសិករ នៅឃុំព្រែកអំបិល ស្រុកស្អាង ខេត្តកណ្តាល បានសម្តែង​ការអរគុណ​ចំពោះ​រាជ​រដ្ឋាភិបាលកម្ពុជា រដ្ឋាភិបាលអូស្ត្រាលី ដែលបានអនុវត្តគម្រោងប្រព័ន្ធធារាសាស្ត្រ​គ្រប់ជ្រុងជ្រោយ(Completed Irrigation System) បានផ្តល់ទឹកគ្រប់គ្រាន់​ដល់​កសិករ​អាច​ធ្វើ​ស្រែបាន២​ទៅ​បីដងក្នុងមួយឆ្នាំៗ។បណ្តាប្រជាសហគមកសិករ ឃុំព្រែកអំបិល ថ្លែងប្រាប់BTV នៅថ្ងៃទី៣ ខែកុម្ភៈនេះថា គ្រប់ដី​ស្រែ​កសិករដែលកំពុងអាស្រ័យផលទឹកពីគម្រោងប្រព័ន្ធធារាសាស្ត្រគ្រប់ជ្រុង​ជ្រោយរបស់​រាជ​រដ្ឋាភិបាល​​នេះ បើមិនមានទឹកជនទន្លេជនលិចនៅក្នុងរដូវទឹកដំឡើងនោះទេ គឺគ្រប់​កសិករ​ទាំង​អស់ មានទឹកគ្រប់គ្រាន់ ហើយអាចធ្វើស្រែបានចំនួនបីដងក្នុងមួយឆ្នាំៗ។បើតាមប្រធានសហគមន៍គ្រប់គ្រងទឹក ទំនប់ចារ លោក ណេង លាង ថ្លែងថា បច្ចុប្បន្ន គម្រោង​ប្រព័ន្ធ​ធារាសាស្ត្រគ្រប់ជ្រុងជ្រោយ (Completed Irrigation System)នៅព្រែកគ្រួសនេះ គឺមាន​ស្ថានីយបូមទឹកដើរកម្លាំងអគ្គិសនីចំនួន២កន្លែង ហើយផ្តល់ទឹកជូនកសិករនៅក្នុងស្រុកស្អាង នៅ​ក្នុង​ខេត្ត​កណ្តាល នៅក្នុងតំបន់ដីខ្លះៗនៅក្នុងស្រុកព្រៃកប្បាស និងស្រុកបាទីខេត្តតាកែវ ។សូមបញ្ជាក់ថា គម្រោងប្រព័ន្ធធារាសាស្ត្រគ្រប់ជ្រុងជ្រោយ ក្រោមជំនួយកិច្ចសហប្រតិបត្តិការ​រាជ​រដ្ឋាភិបាល​កម្ពុជា និងរាជរដ្ឋាភិបាលអូស្ត្រាលីនេះ ត្រូវបានអនុវត្តនៅខេត្តចំនួន ៣ រួមមាន៖ ១/ខេត្តកណ្តាល មានប្រព័ន្ធធារាសាស្រ្ត និងស្ថានីយបូមទឹកចំនួន ២ប្រព័ន្ធ គឺប្រព័ន្ធសំបួរ និង​ចារ​២ ​ដែលមានផ្ទៃដីសរុបប្រមាណ ១ម៉ឺនហិចតា។ ទី៣/ ខេត្តតាកែវ មានប្រព័ន្ធធារាសាស្រ្ត និង​ស្ថានីយ​បូម​ទឹកចំនួន ៥ប្រព័ន្ធ រួមមាន៖ ប្រព័ន្ធវត្តថ្មី ប្រព័ន្ធវត្តថ្មី៣ ប្រឡាយ៩០ ប្រឡាយតាសួង និង​ប្រព័ន្ធចារ ១, ទី៣/ ខេត្តព្រៃវែង មានប្រព័ន្ធធារាសាស្រ្ត និងស្ថានីយបូមទឹកចំនួន ៥ប្រព័ន្ធ គឺ ប្រព័ន្ធ​អង្គរអង្គ អន្លុងរាជ ពាមរ តាហែល និងដីក្រហម។ គម្រោងនេះ មានគោលបំណងធានាផ្តល់ទឹកគ្រប់គ្រាន់ ជំរុញប្រជាកសិករ ធ្វើស្រូវបានចំនួន ៣ដង ក្នុងមួយឆ្នាំ និងរួមទាំងដំណាំរួមផ្សំផ្សេងៗទៀតផងដែរ ដោយមិន​មាន​ការ​ព្រួយ​បារម្ភ​ពី​ការ​ខ្វះខា​ត​ទឹកប្រើប្រាស់ឡើយ៕ អត្ថបទ ស៊ុម សុខជា

វិស័យឯកជន៖ វិស័យកសិកម្មនៅកម្ពុជានឹងមានសម្ទុះកាន់តែខ្លាំងគាំទ្រដល់កំណើនសេដ្ឋកិច្ចជាតិ

2025/02/03 01:35:59 pm        151
Facebook Telegram Linkin
អ្នកជំនាញក្នុងវិស័យកសិកម្ម រំពឹងថា វិស័យកសិកម្មនៅកម្ពុជា នឹងមានសម្ទុះរីកចម្រើនកាន់តែខ្លាំងក្លា គាំទ្រដោយការដាំដុះ និងការចិញ្ចឹមសត្វ ខណៈដែលរាជរដ្ឋាភិបាលបានដាក់ចេញនូវវិធានអន្តរាគមន៍ និងការស្រូបយកវិនិយោគិនមកបណ្តាក់ទុន នៅលើវិស័យទាំង នេះជាបន្តបន្ទាប់ ។ លោក ចាវ ប៉េងណាំ ប្រធានអង្គការអភិវឌ្ឍន៍កសិកម្មធម្មជាតិកម្ពុជា លើកឡើងក្នុងកិច្ចសម្ភាសន៍ អំពីការរីកលូតលាស់ក្នុង វិស័យកសិកម្មនៅកម្ពុជា នេះថា ទាក់ទិនវិស័យកសិកម្មនេះ ក្រោមការគិតគូរយកចិត្តទុកដាក់ និងការអនុវត្តនូវវិធានការអន្តរាគមន៍ របស់រាជរដ្ឋាភិបាល និងការគាំឬទ្រពីដៃគូអភិវឌ្ឍន៍នានា បានដោះស្រាយនូវបញ្ហាប្រឈមជាច្រើនដូចជា ការគាំទ្រផ្នែកហិរញ្ញប្បទាន ការស្វែងរកទីផ្សារ តាមរយៈនៃកិច្ចព្រមព្រៀងពាណិជ្ជកម្មសេរីផ្សេងៗ ដោយបាននិងកំពុងធ្វើឱ្យផ្នែកជាច្រើននៅក្នុងវិស័យកសិកម្ម មានសម្ទុះរីកចម្រើនគួកត់សម្គាល់។ជាក់ស្តែងជុំវិញដាំដុះ, លោក បន្តលើកឡើងថា ក្នុងនាមរូបលោកជាអ្នកជំនាញបច្ចេកទេសលើការដំាដុះ បច្ចុប្បន្នឃើញថា កសិករដែលជាអ្នកដាំដុះតាមទម្លាប់ បានកំពុងងាកទៅរកការដាំដុះតាមបច្ចេកទេស ជាពិសេសកសិករបានកំពុងរួមគ្នា ចងក្រងជា សហគមន៍អ្នកដាំដុះ ដែលការបង្កើតជាសហគមន៍នេះ នឹងផ្តល់ឱកាសដល់កសិករជាច្រើនដូចជា៖ ការចែករំលែកចំណេះដឹង ការស្វែង រកទីផ្សារជាដើម, ហើយអ្វីដែលពិសេសជាងនេះទៅទៀត ការធ្វើកសិកម្ម, ប្រសិនកសិករចេះកែច្នៃគាំទ្រដល់ការដាំដុះដូចជា៖ ការចេះ ផលិតជី ផលិតថ្នាំផ្សេងៗ និងចេះផលិតចំណីសត្វជាដើម នឹងធ្វើឱ្យកសិករកាត់បន្ថយចំណាយថ្លៃដើមជាច្រើន នឹងអាចឈានទៅ ប្រកួតប្រជែងកសិផលរបស់ខ្លួនលើទីផ្សារកាន់តែប្រសើរ។ចំណែកការចិញ្ចឹមសត្វវិញ, លោក ស្រ៊ុន ពៅ ដែលជាប្រធានសមាគមអ្នកចិញ្ចឹមសត្វនៅកម្ពុជា ក៏បានលើកឡើងថា ចំពោះការ ចិញ្ចឹមសត្វបច្ចុប្បន្នឃើញថា ការចិញ្ចឹមមាន់ ទា ជាពិសេសការចិញ្ចឹមជ្រូកនៅកម្ពុជា បានកំពុងផ្លាស់ប្តូររបត់នៃការចិញ្ចឹមជ្រូក ពីការ ចិញ្ចឹមជាលក្ខណៈគ្រួសារ ទៅជាកសិកដ្ឋាន និងការចិញ្ចឹមជាកសិដ្ឋានធម្មតា ទៅតាមបែបឧស្សាហកម្មទំនើប ប្រកបដោយគុណភាព និងស្របតាមស្តង់ដារខ្ពស់ បច្ចុប្បន្នការចិញ្ចឹមបែបនេះបានកើតឡើងជាច្រើន។ នេះជាការកំពុងរៀបចំខ្លួនរបស់កម្ពុជា នៃការឈានទៅ ប្រកួតប្រជែងជំរុញការនាំចេញ និងការផ្គត់ផ្គង់ក្នុងស្រុក ដែលមានស្តង់ដារអនាម័យខ្ពស់។សូមបញ្ជាក់ថា ជុំវិញវិស័យកសិកម្មនៅក្នុងឆ្នាំ ២០២៥ នេះ, រាជរដ្ឋាភិបាលកម្ពុជារំពឹងថា នឹងបន្តសម្រេចបានកំណើនល្អក្នុងរង្វង់ ១,១% ដោយសារការរំពឹងទុកនៃកំណើនល្អលើអនុវិស័យដាំដុះ និងការចិញ្ចឹមសត្វ និងការងើបឡើងវិញនៃអនុវិស័យទេសាទជាដើម។ ចំណែកអនុវិស័យដាំដុះ ត្រូវបានរំពឹងថា រក្សាបានកំណើនល្អ ដោយសារការបន្តងើបឡើងនៃអ្នកវិនិយោគទាំងក្នុងនិងក្រៅស្រុក នៅលើ ការកែច្នៃផលិតកម្មកសិកម្ម ការបង្កើនវិនិយោគសាធារណៈ និងការអន្តរាគមន៍របស់រាជរដ្ឋាភិបាលដូចជា៖ ការផ្តល់ហិរញ្ញប្បទាន សម្បទាន ដើម្បីជំរុញផលិតកម្មក្នុងស្រុកជាដើម។ ចំណែកអនុវិស័យចិញ្ចឹមសត្វវិញ ត្រូវបានព្យាករថា នឹងងើបឡើងផងដែរ ដោយសារ ការអន្តរាគមន៍របស់រាជរដ្ឋាភិបាល លើការនាំចូលសាច់បង្កក នេះជាការលើកទឹកចិត្តដល់អ្នកចិញ្ចឹមសត្វ ចិញ្ចឹមសម្រាប់ផ្គត់ផ្គង់ទីផ្សារ ក្នុងស្រុក និងនាំចេញជាដើម៕ អត្ថបទ៖ សុន រ៉ាឌី

១១ថ្ងៃ មន្រ្តីអត្តសញ្ញាណកម្មផ្តល់សេវាជូនប្រជាពលរដ្ឋប្រមាណជាង ២ម៉ឺនសេវា!

2025/02/03 12:59:03 pm        38
Facebook Telegram Linkin
ភ្នំពេញ៖ ត្រឹមរយៈពេល១១ថ្ងៃកន្លងមកនេះ គិតចាប់ពីថ្ងៃទី២១ រហូតដល់ថ្ងៃទី៣១ ខែមករា ឆ្នាំ២០២៥ មន្ត្រីទទួលបន្ទុកការងារអត្តសញ្ញាណកម្មនៃក្រសួងមហាផ្ទៃបានបន្តផ្ដល់សាវាជូនប្រជាពលរដ្ឋទូទាំងប្រទេសប្រមាណជាង២ម៉ឺនសេវា។ នេះបើតាមលោកបណ្ឌិត ទូច សុឃៈ អ្នកនាំពាក្យរងក្រសួងមហាផ្ទៃ។ បើតាមអ្នកនាំពាក្យសេវាដែលមន្រ្តីអត្តសញ្ញាណកម្មបានផ្តល់ជូនប្រជាពលរដ្ឋរួមមាន អត្តសញ្ញាណប័ណ្ណសញ្ជាតិខ្មែរ មានចំនួន៨.៨៣៤សន្លឹក លិខិតឆ្លងដែន ៩.១៦២ក្បាល លិខិតធ្វើដំណើរ១.៩៤៧ក្បាល សៀនភៅស្នាក់នៅ ២.៨៣៩ក្បាល និងសៀវភៅគ្រួសារមានចំនួន ២.៦៧៤ក្បាលផងដែរ។ សូមបញ្ជាក់ថា បច្ចុប្បន្ន រាជរដ្ឋាភិបាលបានផ្ទេរសេវាធ្វើសៀវភៅស្នាក់នៅ មកឱ្យស្ថិតក្រោមសមត្ថកិច្ចប៉ុស្តិ៍នគរបាលឃុំ សង្កាត់ និងសៀវភៅគ្រួសារមកនៅអធិការដ្ឋាននគរបាលក្រុង ស្រុក ខណ្ឌ។ ដោយឡែកសេវាអត្តសញ្ញណបណ្ណ ក៏ត្រូវបានអនុវត្តតាមយន្តការសម្បូរបែប រួមទាំងចល័តតាមភូមិ ខណៈសេវាលិខិតឆ្លងដែន ថ្មីៗនេះក៏ទើបបើកស្នាក់ការនៅខេត្តសៀមរាប៕

ដើមឆ្នាំ២០២៥ សម្ដេចធិបតីនាយករដ្ឋមន្រ្ដីចុះពិនិត្យផ្ទាល់​ចំពោះការអនុវត្តគោលនយោបាយ​របស់រដ្ឋាភិបាលដល់ពលរដ្ឋនៅមូលដ្ឋាន

2025/02/03 12:49:10 pm        105
Facebook Telegram Linkin
ដើមឆ្នាំថ្មី ២០២៥នេះ សម្ដេចមហាបវរធីបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានបន្ត​ចុះពិនិត្យដោយផ្ទាល់លើការអនុវត្តគោលនយោបាយនានារបស់ក្រសួង ស្ថាប័ន ចំពោះ​ការផ្ដល់​សេវា និងជួយដល់ប្រជាពលរដ្ឋនៅមូលដ្ឋាន។ ខណៈកាលពីឆ្នាំដំបូងនៃអាណត្តិទី៧នេះសម្ដេចនាយករដ្ឋមន្រ្ដីធ្លាប់មានប្រសាសន៍ប្រាប់ទៅមន្រ្ដីនៅក្នុងឱកាសពិធីសម្ពោធសមិទ្ធផលនានាថា នៅឆ្នាំទី២ នៃអាណត្តិនេះ​សម្ដេចនឹងចុះ​ពិនិត្យដោយផ្ទាល់លើការអនុវត្តគោលនយោបាយរបស់ក្រសួង ស្ថាប័ន និងតាមបណ្ដាខេត្ត។ជាក់ស្ដែងក្រោយសម្ដេចបានដាក់បទបញ្ជាឱ្យក្រសួង ស្ថាប័នពាក់ព័ន្ធ និងរដ្ឋបាលរាជធានី-ខេត្ត ត្រៀមជួយដោះស្រាយបញ្ហាប្រជាកសិករខ្វះខាតទឹកធ្វើស្រែប្រាំងកាលពីដើមខែមករា ឆ្នាំ២០២៥ ក្នុងកិច្ចប្រជុំដំបូងគណៈរដ្ឋមន្រ្ដីរួចមក, នៅថ្ងៃទី២៩ ខែមករា ឆ្នាំ២០២៥នេះ សម្ដេចនាយករដ្ឋមន្រ្ដីបានចុះពិនិត្យដោយផ្ទាល់ចំពោះសកម្មភាពអន្តរាគមន៍បូមទឹកសង្គ្រោះស្រូវប្រាំងរបស់បងប្អូនប្រជាកសិករនៅស្រុកស្អាង ខេត្តកណ្ដាល និងស្រុកព្រៃកប្បាស ខេត្តតាកែវ ដែលមានស្រូវរងគ្រោះខ្វះទឹកជិត ៦ ពាន់ហិកតា។ ក្នុងឱកាសនោះសម្ដេចធិបតីបានណែនាំឱ្យធ្វើការអន្តរាគមន៍ដែលឈរលើមានប្រភពទឹកគ្រប់គ្រាន់, ដោយរាជរដ្ឋាភិបាល ខិតខំគ្រប់លទ្ធភាពក្នុងការបូមទឹកសង្គ្រោះផង ហើយក៏បានអន្តរាគមន៍ពង្វាងទឹកចេញពីទំនប់ទឹកតាសាល មកបំពេញបន្ថែមក្នុងទន្លេបាទី ដើម្បីអាចនឹងធានាដល់ការប្រើប្រាស់នារដូវប្រាំងខាងមុខផងដែរ។ មកដល់ថ្ងៃទី៣១ ខែមករា ឆ្នាំ២០២៥ សម្ដេចធិបតី នាយករដ្ឋមន្រ្ដីបន្តចុះជួបជាមួយបងប្អូនប្រជាកសិករនៅសហគមន៍កសិកម្មទំនើបស្វាយចន្ទី នៅឃុំគោល ស្រុកប្រាសាទសំបូរ ខេត្តកំពង់ធំ ដើម្បីបានស្តាប់ផ្ទាល់ពីបងប្អូនកសិករអំពីស្ថានភាពស្វាយចន្ទី និងអត្ថប្រយោជន៍ ឬបញ្ហាប្រឈមនានានៃការចូលរួមជាមួយសហគមន៍កសិកម្មទំនើបដែលផ្តួចផ្តើម និងគាំទ្រដោយក្រសួងកសិកម្ម។សហគមន៍កសិកម្មទំនើបប្រាសាទសំបូររុងរឿង គឺជាសហគមន៍ទំនើបមួយ ក្នុងចំណោមសហគមន៍ទំនើបទាំង៣ (សហគមន៍កសិកម្មទំនើបកំពង់ធំសាលាវិស័យ និងសហគមន៍កសិកម្មទំនើបទំរីងកំពង់ធំ) ដែលផ្តោតលើដំណាំស្វាយចន្ទី នៅក្នុងខេត្តកំពង់ធំ ដោយមានសមាជិកសរុបចំនួន ១៥៣ គ្រួសារ និងមានផ្ទៃដីផលិតកម្ម ចំនួន ៦៤៤ ហិកតា ដោយរំពឹងបរិមាណផលគ្រាប់ស្វាយចន្ទីសើមប្រមាណ ១០០០តោន។ ក្នុងឱកាសនោះសម្ដេចធិបតីបាន កោតសរសើរដល់សហគមន៍ ក្នុងការរៀបចំផែនការបានយ៉ាងល្អ ដោយមានយុទ្ធសាស្ត្រក្នុងការលក់គ្រាប់ស្វាយចន្ទីសើម ៧០% និងគ្រាប់ស្វាយចន្ទីស្ងួត ៣០% ជាមួយនឹងការរៀបចំធ្វើផលិតកម្មកសិកម្មតាមកិច្ចសន្យាថ្លៃល្អជាងមុន ១០-១៥%។ បន្ថែមពីនេះ សម្ដេចនាយករដ្ឋមន្រ្ដីក៏បានវាយតម្លៃខ្ពស់ដល់ការជួយសម្របសម្រួល និងជ្រោមជ្រែងរបស់ក្រសួងកសិកម្មក្នុងការអនុវត្តកម្មវិធីគោលនយោបាយអាទិភាពទី៦ របស់រាជរដ្ឋាភិបាល នីតិកាលទី៧ ក្នុងគោលដៅប្រែក្លាយការធ្វើកសិកម្មបែបគ្រួសារឱ្យទៅជាសហគ្រាសសេដ្ឋកិច្ចកសិកម្មដ៏រឹងមាំ មានសមាហរណកម្មខ្ពស់ មានសេដ្ឋកិច្ចមាត្រដ្ឋាន និងមានសមត្ថភាពប្រកួតប្រជែងទាំងបរិមាណ និងគុណភាព។ សម្ដេចនាយករដ្ឋមន្រ្ដីមានប្រសាសន៍បញ្ជាក់ថា ការចងក្រងជាសហគមន៍កសិកម្មទំនើប ប្រជាកសិករ ក៏អាចទទួលបាននូវយន្តការគាំទ្រចំនួនពីរ ដូចជា៖ ១/. ក្រុមប្រឹក្សាគោលនយោបាយសហគមន៍កសិកម្ម និងទី២/. មូលនិធិអភិវឌ្ឍសហគមន៍កសិកម្ម។ក្រោយជួបសំណេះសំណាលជាមួយប្រជាសហគមន៍ក្នុងស្រុកប្រាសាទសំបូរ សម្ដេចនាយករដ្ឋមន្រ្ដីបានបន្តចុះពិនិត្យវឌ្ឍនភាពនៃការបូមទឹកជួយសង្គ្រោះស្រូវប្រាំងរបស់ប្រជាកសិករប្រមាណជាង ១៦០០ ហិកតា ក្នុងមូលដ្ឋានស្រុកកំពង់ស្វាយ ស្រុកសន្ទុក និងស្រុកស្ទោង ខេត្តកំពង់ធំផងដែរ។ ក្នុងឱកាសនោះសម្ដេចធិបតីបានមានប្រសាសន៍ថា ដើម្បីឱ្យការបង្កបង្កើនផលស្រូវប្រាំង បានកាន់តែច្រើន និងមានគុណភាពខ្ពស់ រាជរដ្ឋាភិបាលបាននិងកំពុងយកចិត្តដាក់ខ្ពស់ក្នុងការអន្តរាគមន៍ទឹកពីប្រភពទឹកនានា ក្នុងគោលដៅបម្រើដល់ការស្រោចស្រពស្រែរដូវប្រាំងឱ្យបានគ្រប់គ្រាន់ ព្រមទាំងដោះស្រាយនូវទុក្ខកង្វល់របស់ប្រជាកសិករឱ្យអស់ពីលទ្ធភាព៕

រដ្ឋមន្រ្តីផែនការជំរុញឲ្យមន្រ្តី និងដៃគូពាក់ព័ន្ធរៀបចំប្រព័ន្ធទិន្នន័យក្រៅបណ្តាញ​ទៅជាប្រព័ន្ធក្នុងបណ្តាញ​សម្រាប់ថ្ងៃអនាគត

2025/02/03 11:48:56 am        160
Facebook Telegram Linkin
ឯកឧត្តម ប៊ិន ត្រឈៃ រដ្ឋមន្រ្តីក្រសួងផែនការ បានណែនាំមន្រ្តីក្រោមឱវាទ សហការជាមួយក្រសួង ស្ថាប័នពាក់ព័ន្ធ ឲ្យរៀបចំផែនការយុទ្ធសាស្រ្តស្តីពីការអភិវឌ្ឍ ដើម្បីប្រែក្លាយកម្មវិធីគ្រប់គ្រងប្រព័ន្ធទិន្នន័យក្រៅបណ្តាញ (Offline) ទៅជាប្រព័ន្ធក្នុងបណ្តាញ (Online) ដើម្បីឆ្លើយតបតម្រូវការអ្នកប្រើប្រាស់ទាន់ពេលវេលា និងធានាបានសុក្រឹតភាពនៃទិន្ននន័យ។នាឱកាសអញ្ជើញជាអធិបតី ក្នុងពិធីបើកសិក្ខាសាលាពិគ្រោះយោបល់ ស្តីពីរបាយការណ៍លទ្ធផលបឋមលើការវាយតម្លៃស្ថានភាពអនុវត្ត និងការគ្រប់គ្រងប្រព័ន្ធទិន្នន័យមូលដ្ឋានឃុំ សង្កាត់ (CDB) នៅព្រឹកថ្ងៃទី៣ ខែកុម្ភៈ ឆ្នាំ២០២៥នេះ ឯកឧត្តម រដ្ឋមន្រ្តី បានមានប្រសាសន៍ថា ក្នុងបរិការណ៍នៃការធ្វើបរិវត្តកម្មឌីជីថល និងក្រោមកិច្ចការគម្រោងកិច្ចសហប្រតិបត្តិការ រវាងរាជរដ្ឋាភិបាលកម្ពុជា និងអង្គការយូនីសេហ្វ (២០២៤-២០២៨) ក្រសួងផែនការបានរៀបចំការសិក្សា និងវាយតម្លៃស្ថានភាពអនុវត្ត និងការគ្រប់គ្រងប្រព័ន្ធទិន្នន័យមូលដ្ឋានឃុំ សង្កាត់ ដោយបានជ្រើសរើសទីប្រឹក្សាបច្ចេកទេសក្នុងស្រុក ដែលមានបទពិសោធន៍លើការងារគ្រប់គ្រងទិន្នន័យ អភិវឌ្ឍន៍កម្មវិធី និងការ រៀបចំសេចក្តីណែនាំប្រតិបត្តិច្បាស់លាស់។ ការវាយតម្លៃនេះ គឺជាការរកឱ្យឃើញនូវបញ្ហាប្រឈមមួយចំនួននាពេលកន្លងមក ដើម្បីរកមធ្យោបាយដោះស្រាយ ការបង្កើតឯកសារប្រតិបត្តិ និងកម្មវិធីគ្រប់គ្រងទិន្នន័យ ដោយប្រែក្លាយទៅជាប្រព័ន្ធអនឡាញ។ នៅក្នុងកម្មវិធីនេះ លោកបណ្ឌិត Anirban Chatterjee នាយករងប្រចាំប្រទេសនៃអង្គការ យូនីសេហ្វ បានលើកឡើងថា ចំពោះការគាំទ្រក្រសួងផែនការ ដើម្បីរៀបចំសិក្ខាសាលាថ្ងៃនេះឡើង គឺក្នុងគោលបំណងដើម្បីបង្ហាញអំពីលទ្ធផល និងបញ្ហាប្រឈមដែលរកឃើញនៅក្នុងរបាយការណ៍លទ្ធផលបឋម ស្តីពីការវាយតម្លៃលើស្ថានភាពអនុវត្ត និងការគ្រប់គ្រងប្រព័ន្ធទិន្នន័យមូលដ្ឋានឃុំ សង្កាត់ ដើម្បីកែលម្អដល់គុណភាពទិន្នន័យ និងធានាដល់ការចែករំលែកអ្នកប្រើប្រាស់ប្រកបដោយប្រសិទ្ធភាពខ្ពស់, ផ្តល់ឱកាសក្នុងការពិភាក្សា ដើម្បីទទួលធាតុចូលបន្ថែមលើបញ្ហាប្រឈម ក្នុងការដោះស្រាយបញ្ហាប្រឈមដែលបានជួបប្រទះនាពេលកន្លងមក និងដើម្បីធានាដល់ការរៀបចំរបាយការណ៍ចុងក្រោយប្រកបដោយខ្លឹមសារពេញលេញ គ្រប់ជ្រុងជ្រោយ ដែលជាទិន្នន័យមានគុណភាព និងជឿទុកចិត្តបាន ជាពិសេសឆ្លើយតបទៅនឹងបរិការណ៍នៃការប្រែប្រួលស្ថានភាពសេដ្ឋកិច្ច និងសង្គមរបស់កម្ពុជានាពេលបច្ចុប្បន្ន។តាមរយៈសិក្ខាសាលាពិគ្រោះយោបល់នេះ អង្គពិធីសង្ឃឹមថា នឹងអាចប្រមូលបានព័ត៌មាន ធាតុចូល និងការចែករំលែកនូវបទពិសោធន៍ និងឧត្តមានុវត្តន៍នានា ក្នុងការពង្រឹង និងពង្រីកទិន្នន័យមូលដ្ឋាន ឃុំ សង្កាត់ កាន់តែមានប្រសិទ្ធិភាព ដើម្បីជាគុណប្រយោជន៍សម្រាប់ការប្រើប្រាស់បានចំគោលដៅ មានប្រសិទ្ធភាព និងទាន់ពេលវាលា៕ អត្ថបទ ឈិត បូរ៉ាវី 

ការផ្គត់ផ្គង់អគ្គិសនីបានគ្របដណ្ដប់លើភូមិស្ទើរ ១០០ភាគរយ នៃភូមិទាំងអស់​ទូទាំង​ប្រទេស​កម្ពុជា

2025/02/03 11:38:55 am        221
Facebook Telegram Linkin
គិតត្រឹមចុងឆ្នាំ ២០២៤កន្លងទៅនេះ ការផ្គត់ផ្គង់ថាមពលអគ្គិសនីនៅកម្ពុជា បាន​ពង្រីក​វិសាល​ភាព​របស់​ខ្លួន ដោយបានគ្របដណ្ដប់ការផ្គត់ផ្គង់ថាមពលអគ្គិសនីទៅកាន់ភូមិចំនួន ៩៩,១៥​ភាគរយ​ នៃភូមិទាំងអស់ទូទាំងប្រទេស។ នេះជាការលើកឡើងរបស់ ឯកឧត្តម យឹម វិសិដ្ឋ ប្រធាន​អាជ្ញាធរ​អគ្គិសនីកម្ពុជា ក្នុងឱកាសធ្វើសន្និបាតបូកសរុបការងារឆ្នាំ ២០២៤។ឯកឧត្តម យឹម វិសិដ្ឋ ប្រធានអជ្ញាធរអគ្គិសនីកម្ពុជា បានលើកឡើងនៅថ្ងៃទី៣ ខែកុម្ភៈ ឆ្នាំ​២០២៥​នេះ​ថា រហូតមកដល់ចុងឆ្នាំ២០២៤ កន្លងទៅនេះ ការផ្គត់ផ្គង់​ថាមពល​អគ្គិសនី​បាន​គ្រប​ដណ្ដប់​លើ​ភូមិចំនួន ៩៩,១៥ភាគរយ នៃភូមិសរុបទូទាំងប្រទេស។ ភូមិដែល​មិន​ទាន់​មាន​ការ​ផ្គត់​ផ្គង់ថាមពលអគ្គិសនីគឺមានត្រឹមតែ ១២០ភូមិប៉ុណ្ណោះ។ឯកឧត្តមលើកឡើងដែរថា តាមគម្រោងផែនការ ក្នុងរយៈពេល ២ទៅ៣ឆ្នាំមុខ ទាំង​អគ្គិសនី​កម្ពុជា​ ក៏ដូចជាសេវាឯកជន អាចមានលទ្ធភាពពង្រីកការផ្គត់ផ្គង់អគ្គិសនីពីបណ្ដាញជាតិបាន ៥១​ភូមិទៀត ដែលអាចធ្វើឱ្យភូមិមិនមានថាមពលអគ្គិសនីប្រើប្រាស់ធ្លាក់មកត្រឹម ៦៩ភូមិ ឬស្មើ​នឹង ០,៤៩ភាគរយ នៃភូមិសរុបទូទាំងប្រទេស។ក្រៅ​ពីបញ្ជាក់ផែនការផ្គត់ផ្គង់នេះ ឯកឧត្តមប្រធានអាជ្ញាធរអគ្គិសនីកម្ពុជា ក៏បានលើក​ឡើង​ពី​ផល​វិបាក​ក្នុងផ្គត់ផ្គង់អគ្គិសនីទៅកាន់ភូមិដែលនៅសល់ផងដែរ។ ផលវិបាកដោយសារភូមិទាំងនោះ ស្ថិត​នៅ​តំបន់ដាច់ស្រយាលខ្លាំង តំបន់គ្មានផ្លូវធ្វើដំណើរ តំបន់រស់នៅបណ្ដែតទឹក តំបន់កោះ តំបន់​លិច​ទឹកនៅរដូវវស្សា តំបន់មានប្រជាពលរដ្ឋរស់នៅរាយប៉ាយ តំបន់តាំងទីលំនៅថ្មីជាដើម។ ការផ្គត់​ផ្គង់​នៅតំបន់ទាំងនេះ ត្រូវការដើមទុនច្រើន និងមានភាពស្មុគស្មាញ ប្រសិន​បើ​មាន​ការ​ពង្រី​កការផ្គត់ផ្គង់ពីបណ្ដាញជាតិទៅកាន់ភូមិទាំងនោះ។ឯកឧត្តម​លើកឡើងដែរថា បើផ្តោតលើការភ្ជាប់អគ្គិសនី ទៅលំនៅឋានវិញ បង្ហាញថាត្រឹមចុងឆ្នាំ ២០២៤ លំនៅឋាន ដែលបានភ្ជាប់អគ្គិសនីមានចំនួនជាង ៣,៥លាន ឬស្មើនឹង ៩៥,២៤​ភាគ​រយ នៃលំនៅឋានសរុប។ក្នុង​ពិធីសន្និបាតនេះដែរ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល លើកឡើងថា សម្តេចធិបតី ហ៊ុន ម៉ាណែត នាយករដ្ឋមន្ត្រី បានបន្ត​សម្រួច​គោល​នយោបាយ​អន្តរកាល​ថាមពល​កម្ពុជា​ឆ្ពោះ​ទៅអព្យាក្រឹតកាបួន នៅឆ្នាំ២០៥០ តាមអភិក្រមចំនួន ៤ គឺ១-បង្កើនថាមពលស្អាត ប្រសិទ្ធភាពថាមពល និងភាពគ្រប់គ្រាន់, ២-រក្សាថ្លៃ​សមរម្យ​ស្របតាមថ្លៃ​នៃ​ធាតុ​ចូល​ក្នុង​ការ​ផលិត​ បញ្ជូន និងចែកចាយថាមពល, ៣-បង្កើនស្ថិរភាព និងគុណភាព នៃការផ្គត់ផ្គង់ និង៤-បង្កើនការផ្តល់សេវាឱ្យបានកាន់តែប្រសើរ និងប្រកបដោយសមធម៌រវាងតំបន់ទីក្រុង និង ជនបទ និង​យកភាពជោគជ័យនៃការអនុវត្តអភិក្រមទាំង ៤ នេះទៅបម្រើវិស័យផ្សេងៗ និងទាក់​ទាញ​បង្កើន​ភាព ប្រកួតប្រជែងនៃសេដ្ឋកិច្ចកម្ពុជា៕ អត្ថបទ៖ គឹម ហុក

បណ្ដាញសង្គម

ព័ត៌មានថ្មីៗ

ជនបរទេស១៣នាក់ត្រូវបានឃាត់ខ្លួនក្នុងប្រតិបត្តិការបង្រ្កាបបទល្មើសតាមប្រព័ន្ធបច្ចេកវិទ្យានៅសៀមរាប
07/21/2025 09:07 PM
Facebook Telegram Linkin
​ការអនុវត្ត​វិធានការគន្លឹះក្នុងវិស័យអប់រំ (គ.វ.អ.) នៅសាលាបឋមសិក្សា ត្រពាំងអារ័ក្ស ស្រុកកំពង់ស្វាយ ខេត្តកំពង់ធំ
07/21/2025 08:07 PM
Facebook Telegram Linkin
អ្នកជំនាញ UN ជំរុញឲ្យក្រុមតាលីបង់ដោះលែងប្តីប្រពន្ធសញ្ជាតិអង់គ្លេសវ័យចំណាស់ជាប់ឃុំនៅអាហ្វហ្គានីស្ថាន
07/21/2025 08:07 PM
Facebook Telegram Linkin
អ៊ីរ៉ង់បន្ទោសអឺរ៉ុបថា បានធ្វើឲ្យដួលរលំនៃកិច្ចព្រមព្រៀងនុយក្លេអ៊ែរ មុនការចរចាថ្មី
07/21/2025 08:07 PM
Facebook Telegram Linkin
កសិករកំពង់ធំជាង១០០គ្រួសារ ទទួលផលចំណេញច្រើនជាងមុន ក្រោយស្ម័គ្រចិត្តចងក្រងជាសហគមន៍កសិកម្មទំនើប
07/21/2025 08:07 PM
Facebook Telegram Linkin
ទាហានប៉ារ៉ាប៉ាគីស្ថាន ៨នាក់ និងសមាជិកក្រុមប្រយុទ្ធ ៤នាក់ ត្រូវបានសម្លាប់ អំឡុងការប៉ះទង្គិចគ្នា នៅភាគពាយព្យ
07/21/2025 08:07 PM
Facebook Telegram Linkin
វិមានក្រឹមឡាំងមិនច្រានចោលពីលទ្ធភាពមានកិច្ចប្រជុំ Putin-Trump នៅទីក្រុងប៉េកាំង ក្នុងខែកញ្ញា
07/21/2025 08:07 PM
Facebook Telegram Linkin
វិមានក្រឹមឡាំងទទួលស្គាល់ភាពតានតឹងក្នុងទំនាក់ទំនងជាមួយអាស៊ែបៃហ្សង់ តែសង្ឃឹមថា នឹងប្រសើរឡើងវិញ
07/21/2025 07:07 PM
Facebook Telegram Linkin
រដ្ឋទូតឥណ្ឌូនេស៊ី ត្រៀមផ្តល់ការគាំទ្រ និងកិច្ចសហការជាមួយកម្ពុជាដើម្បីប្រយុទ្ធប្រឆាំងការឆបោកតាមបច្ចេកវិទ្យា
07/21/2025 07:07 PM
Facebook Telegram Linkin
អភិបាលខេត្តប៉ៃលិនពិនិត្យទីតាំងសាងសង់ខ្លោងទ្វារនៅច្រកទ្វារព្រំដែនអន្តរជាតិព្រំ
07/21/2025 07:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.