នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចាត់សហការីនាំយកអំណោយមនុស្សធម៌សម្រាលទុក្ខលំបាក ជូនលោកតាលោកយាយចាស់ជរាគ្មានទីពឹងនៅក្រុងច្បារមន ខេត្តកំពង់ស្ពឺ
កម្ពុជាបន្តស្នើទៅថៃឱ្យរៀបចំកិច្ចប្រជុំពិសេសបន្ទាន់ JBC និងជំរុញឱ្យបន្តអនុវត្តការងារនៅលើដីជាក់ស្តែង
គណៈកម្មការគ្រប់គ្រងល្បែងពាណិជ្ជកម្មកម្ពុជានឹងចាត់វិធានការ​តាមផ្លូវច្បាប់ចំពោះម្ចាស់កាស៊ីណូផ្តល់ទីតាំងឱ្យក្រុមឧក្រិដ្ឋជនប្រព្រឹត្តបទល្មើស Online Scams
សម្ដេចធិបតី នាយករដ្ឋមន្ត្រី អញ្ជើញចូលរួមកិច្ចប្រជុំចង្អៀតជាមួយ ប្រធានាធិបតីបារាំង, អគ្គនាយក WHO និងមេដឹកនាំប្រទេសមួយចំនួនទៀត

ព័ត៌មានជាតិ

អនុប្រធានទី២ ព្រឹទ្ធសភា៖ សមាជិកព្រឹទ្ធសភាត្រូវខិតខំគ្រប់គ្នា និងរួមគ្នា ដើម្បីប្រយោជន៍ជាតិ និងប្រជាជន ដោយមិនប្រកាន់គណបក្សនយោបាយ

2026/03/24 05:46:06 pm        76
Facebook Telegram Linkin
នារសៀលថ្ងៃអង្គារ ទី២៤ ខែមីនា ឆ្នាំ២០២៦ នៅសាលប្រជុំពិសេស៣ ព្រឹទ្ធសភា ឯកឧត្តមបណ្ឌិត ធន់ វឌ្ឍនា អនុប្រធានទី២ ព្រឹទ្ធសភា បានដឹកនាំកិច្ចប្រជុំជាមួយក្រុមសមាជិកព្រឹទ្ធសភាប្រចាំភូមិភាគទី៦ ទី៨ និងក្រុមសមាជិកាព្រឹទ្ធសភា ដើម្បីពិភាក្សា និងឆ្លុះបញ្ចាំងពីសកម្មភាពការងារ ពិសេសបញ្ហាប្រឈម និងសំណូមពរ ដែលសមាជិកព្រឹទ្ធសភាបានជួបនៅតាមភូមិភាគនីមួយៗ ក្នុងចន្លោះសម័យប្រជុំលើទី៤ និងលើកទី៥។ក្នុងឱកាសនោះ ឯកឧត្តមបណ្ឌិត បានអំពាវនាវដល់សមាជិកព្រឹទ្ធសភា មកពីគ្រប់គណបក្សនយោបាយឱ្យខិតខំធ្វើការទាំងអស់គ្នា និងធ្វើការរួមគ្នា ក្នុងស្មារតីសាមគ្គីជាតិខ្មែរ ដើម្បីសុខសន្តិភាព និងវិបុលភាពរបស់ប្រទេសជាតិ និងប្រជាជាតិខ្មែរ។ជាមួយគ្នានោះ ឯកឧត្តមបណ្ឌិត បានជម្រាបជូនដល់សមាជិកព្រឹទ្ធសភា ឱ្យបន្តយកចិត្តទុកដាក់ខ្ពស់ក្នុងការតាមដានការអនុវត្តច្បាប់ និងគោលនយោបាយរបស់រាជរដ្ឋាភិបាល ដើម្បីធានាថា ការអនុវត្តនានាគឺប្រកបដោយតម្លាភាព និងផ្ដល់នូវឧត្តមប្រយោជន៍ដល់ប្រជាជន។ក្នុងបរិបទដែលពិភពលោកកំពុងប្រឈមនឹងភាពមិនប្រាកដប្រជា ពិសេសបញ្ហាបណ្តាលមកពីសង្គ្រាមនៅមជ្ឈឹមបូព៌ា ដែលបណ្ដាលឱ្យតម្លៃថាមពលកើនឡើង ឯកឧត្តមបណ្ឌិត អនុប្រធានទី២ បានរំលឹកជូនសមាជិកព្រឹទ្ធសភានៅតាមភូមិភាគ ជួយណែនាំ និងជំរុញស្មារតីសន្សំសំចៃការប្រើប្រាស់ថាមពល និងត្រូវចូលរួមលើកកំពស់សកម្មភាពសេដ្ឋកិច្ចឱ្យមានការប្រកួតប្រជែង នៅតាមភូមិភាគរៀងៗខ្លួន។ស្ថានការណ៍ នៅព្រំដែន កម្ពុជា និងថៃ កំពុងមានកម្ដៅ ប៉ុន្ដែរាជរដ្ឋាភិបាលកម្ពុជា មិនទាន់មានការបកស្រាយអ្វីនៅឡើយទេ។ ភាគីទាំងពីស្ថិតក្នុងការត្រៀមខ្លួនប្រឈមដាក់គ្នាគ្រប់ពេល។

សមាគមកម្មករកម្ពុជាសេដ្ឋកិច្ចក្រៅប្រព័ន្ធថ្លែងអំណរគុណដល់រាជរដ្ឋាភិបាលដែលបានបញ្ចុះតម្លៃប្រេងសាំង

2026/03/24 05:13:21 pm        216
Facebook Telegram Linkin
សមាគមកម្មករកម្ពុជាសេដ្ឋកិច្ចក្រៅប្រព័ន្ធ បានថ្លែង​អំណរ​គុណ​ដល់​រាជ​រដ្ឋាភិបាល​ដែល​បាន​យក​ចិត្ត​ទុក​ដាក់​គិតគូរដល់ជីវភាពប្រជាពលរដ្ឋ កម្មករ កម្មការិនី ក៏ដូចជាអ្នក​ប្រកបរ​បរ​សេដ្ឋ​កិច្ច​ក្រៅ​ប្រព័ន្ធ​ ក្នុងការបញ្ចុះអាករបន្ថែមលើប្រេងសាំង និងប្រេងម៉ាស៊ូតមក ០ (សូន្យ) ដុល្លារ ដើម្បី​ជួយ​បន្ធូរ​បន្ថយ​នៅតម្លៃប្រេង។លោក សុខ ឈុនអឿន ប្រធានសមាគមកម្មករកម្ពុជាសេដ្ឋកិច្ចក្រៅប្រព័ន្ធ បានថ្លែងប្រាប់ BTV នៅ​ព្រឹក​ថ្ងៃទី២៤ ខែមីនា នេះថា ខណៈប្រេងឥន្ធនៈ និងហ្គាស មានការឡើងថ្លៃ គឺ​រាជ​រដ្ឋាភិបាល​បាន​លុប​ចោល​ពន្ធ​ខ្លះលើប្រេងដម្បីសម្រួលអ្នកប្រើប្រាស់ទូទៅ និងអ្នកសេដ្ឋកិច្ចក្រៅប្រព័ន្ធ។ លោក​ស្នើរាជរដ្ឋាភិបាល ក្រសួងពាក់ព័ន្ធ ជួយពិនិត្យមើល​តម្លៃ​ហ្គាស​ដែល​មិន​ទាន់​មាន​ការ​កំណត់​តម្លៃ​ច្បាស់​លាស់​។ចំណែកលោក ប្រាក់ សុខន អ្នកប្រកបរបរសេដ្ឋកិច្ច​ក្រៅ​ប្រព័ន្ធ​បាន​ថ្លែង​អំណរ​គុណ​ដល់​រាជ​រដ្ឋាភិបាល​ដែល​តែងតែបានគិតគូរយកចិត្តទុកដាក់ដល់ប្រជាពលរដ្ឋ ក៏ដូចជាអ្នក​ប្រកបរបរ​សេដ្ឋកិច្ច​ក្រៅ​ប្រព័ន្ធ ក្នុងការបញ្ចុះតម្លៃប្រេងសាំង និងស្នើសុំជួយ​បញ្ចុះ​តម្លៃ​ហ្គាស​កុំ​ឲ្យ​មាន​ការ​ឡើង​ថ្លៃ​ខ្លាំង​ពេក និងកំណត់តម្លៃហ្គាសដូចតម្លៃប្រេងសាំង។ដោយផ្អែក​តាមសភាពការណ៍ និងថ្លៃប្រេងឥន្ទនៈបន្តកើនឡើងនៅទីផ្សារអន្តរជាតិ រាជរដ្ឋាភិបាល​បាន​ដាក់​ចេញនូវវិធានការអន្តរាគមន៍បន្ថែមកាលពីថ្ងៃ២០ ខែមីនា ឆ្នាំ២០២៦ ដែលរួម​មាន​ការ​បញ្ចុះ​អាករ​បន្ថែមលើប្រេងសាំង និងប្រេងម៉ាស៊ូតមក ០ (សូន្យ) ដុល្លារ បញ្ចុះអាករ​ពិសេស​លើ​ប្រេង​ម៉ាស៊ូត​ ពី ៤% មក ០% និងបញ្ចុះអាករលើតម្លៃបន្ថែមប្រេងសាំង និងម៉ាស៊ូត ពី ១០% មក ៤% ដោយរាជរដ្ឋាភិបាលទទួលបន្ទុកជំនួស ចំនួន ៦%៕ អត្ថបទ៖ វង្ស សុភាព

ជនបរទេស ៩៣៩នាក់ ត្រូវបានបណ្ដេញចេញពីកម្ពុជាពាក់ព័ន្ធបទល្មើស Online Scams និងលួចឆ្លងដែន បន្លំឯកសារក្លែងក្លាយ ស្នាក់នៅខុសច្បាប់

2026/03/24 05:06:45 pm        244
Facebook Telegram Linkin
ភ្នំពេញ៖ ចាប់ពីថ្ងៃទី២០ ដល់ថ្ងៃទី២៣ ខែមីនា ឆ្នាំ២០២៦ អនុវត្តតាមអនុសាសន៍ដ៏ខ្ពង់ខ្ពស់ របស់ឯកឧត្តមអភិសន្តិបណ្ឌិត ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ, ឯកឧត្តម ឧត្តមសេនីយ៍ឯក សុខ វាសនា អគ្គនាយកអន្តោប្រវេសន៍ បានណែនាំឱ្យនាយកដ្ឋានស៊ើបអង្កេត និងអនុវត្តនីតិវិធី បន្តធ្វើកាបណ្ដេញចេញជនបរទេសសរុបចំនួន ៩៣៩នាក់ ស្រី១១៣នាក់ មាន២២សញ្ជាតិ ចេញពីកម្ពុជា។ នេះបើតាមការឱ្យដឹងពីអគ្គនាយកដ្ឋានអន្តោប្រវេសន៍នៅថ្ងៃទី២៤ ខែមីនា ឆ្នាំ២០២៦នេះ។ អគ្គនាយកដ្ឋានអន្តោប្រវេសន៍ បានឱ្យដឹងថា ជនបរទេសទាំង៩៣៩នាក់ រួមមានសញ្ជាតិ៖ ប៉ាគីស្ថាន ឥណ្ឌា ឥណ្ឌូនេស៊ី យ៉ូហ្គង់ដា ស្រីលង្កា ចិន មីយ៉ាន់ម៉ា បង់ក្លាដេស នីហ្សេរីយ៉ា ចិនតៃវ៉ាន់ ម៉ាឡេស៊ី កាមេរូន ហ្គាណា កេនយ៉ា ឡាវ ថៃ កូរ៉េ អ៊ីតាលី វៀតណាម អេត្យូពី ជប៉ុន និងរវ៉ាន់ដា ត្រូវបានបណ្ដេញចេញពីព្រះរាជាណាចក្រកម្ពុជា។ ក្នុងនោះមានជនជាតិវៀតចិនចំនួន ៣៣១នាក់ (ស្រី ១៦នាក់) ពាក់ព័ន្ធករណីឆបោកតាមប្រព័ន្ធអនឡាញ (Online Scams) ត្រូវបានបណ្ដេញចេញប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ និងជនបរទេសមួយចំនួនទៀតពាក់ព័ន្ធករណីលួចឆ្លងដែន បន្លំឯកសារក្លែងក្លាយ ស្នាក់នៅគ្មានលិខិតឆ្លងដែន ប្រើប្រាស់ទិដ្ឋាការក្លែងក្លាយ ( QR Code ក្លែងក្លាយ) ឆបោកតាមប្រព័ន្ធអនឡាញ និងធ្វើការងារខុសច្បាប់នៅក្នុងព្រះរាជាណាចក្រកម្ពុជា ត្រូវបានបណ្ដេញចេញតាមប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ។ បើតាម អគ្គនាយកដ្ឋានអន្តោប្រវេសន៍ ការបណ្ដេញចេញជនជាតិបរទេសខាងលើនេះ គឺជាការអនុវត្តតាមវិធានការច្បាប់យ៉ាងម៉ឺងម៉ាត់របស់រាជរដ្ឋាភិបាល នៃព្រះរាជាណាចក្រកម្ពុជា ក្នុងកិច្ចខិតខំប្រឹងប្រែងបោសសំអាត និងលុបបំបាត់ឧក្រិដ្ឋកម្មតាមប្រព័ន្ធបច្ចេកវិទ្យា ធានាការពារសុវត្ថិភាពជូនប្រជាពលរដ្ឋទាំងក្នុងតំបន់ និងសកលលោក ដោយគ្មានការលើកលែងនោះឡើយចំពោះមេខ្លោងដែលនៅពីក្រោយ ក៏ដូចជាការជួយសង្គ្រោះជនរងគ្រោះដែលត្រូវមេខ្លោងបោកបញ្ឆោតឱ្យមកធ្វើការក្នុងសកម្មភាពឆបោកតាមប្រព័ន្ធបច្ចេកវិទ្យា ហើយមានសេរីភាព និងអាចវិលត្រឡប់ទៅប្រទេសរបស់ខ្លួនវិញ៕

ភោជនីយដ្ឋាននានានៅតំបន់ផ្លូវបាសាក់ រាជធានីភ្នំពេញ ត្រៀមមុខម្ហូបជាច្រើន ដើម្បីទាក់ទាញ​ទេសចរ​ក្នុងព្រឹត្តិការណ៍ «នគរសង្ក្រាន្ត»

2026/03/24 04:39:10 pm        222
Facebook Telegram Linkin
ស្ថិតក្នុងព្រឹត្តិការណ៍ «នគរសង្ក្រាន្ត» ភោជនីយដ្ឋាននៅតំបន់ផ្លូវបាសាក់ ក្នុងរាជធានីភ្នំពេញ បាន​តុប​តែង​លំអ និងត្រៀមមុខម្ហូបជាច្រើនប្រទភេទ ដើម្បីទាក់ទាញ​ភ្ញៀវទេសចរ​ចូល​ទទួល​ទាន​អាហារ និងដើរកម្សាន្តនៅទីនេះ។អ្នកតំណាងម្ចាស់អាជីវកម្មនៅតំបន់ផ្លូវបាសាក់ ស្ថិតនៅសង្កាត់ទន្លេបាសាក់ ខណ្ឌចំការមន រាជ​ធានី​ភ្នំពេញ នៅព្រឹកថ្ងៃទី២៤ ខែមីនា នេះ បានប្រាប់BTVថា ការរៀបចំព្រឹត្តិការណ៍ «នគរសង្ក្រាន្ត»​ នៅតំបន់ផ្លូវបាសាក់ នឹងអាចទាក់ទាញភ្លៀវទេសចរមកច្រើន ហើយចំណូល​ក៏​អាច​រក​បានច្រើនដែរ។ អ្នកទាំងអស់នោះបានបន្តថា នៅក្នុងភោជនីយដ្ឋានមានមុខម្ហូប​បរទេស​ជា​ច្រើន​ភេទសម្រាប់បម្រើសេវាជូនភ្ញៀវទេសេចរ ដែលក្នុងនោះមានដូចជាប្រទេស បារាំង អេស្បាញ និង​ឥណ្ឌា ជាដើម។ ក្រៅពីនេះ ក៏មានមុខម្ហូបខ្មែរផងដែរ។ដើម្បី​អបអរសាទរពិធីបុណ្យចូលឆ្នាំថ្មី ប្រពៃណីជាតិ សហភាពសហព័ន្ធយុវជនកម្ពុជា នឹង​រៀបចំ​ព្រឹត្តិការណ៍ «នគរសង្ក្រាន្ត» ជាលើកដំបូង ក្នុងរយៈពេល៦ថ្ងៃ ដោយចាប់ពីថ្ងៃទី១៤ រហូតដល់​ថ្ងៃទី​១៩ ខែមេសា ឆ្នាំ២០២៦ នៅរាជធានីភ្នំពេញ ត្រង់ចំណុចទីតាំងមួយចំនួនដូចជា៖ តំបន់​រមណីយ​ដ្ឋានប្រវត្តិសាស្ត្រវត្តភ្នំ ផ្លូវថ្មើរ ជើងចតុមុខ សួនច្បារ Vattanac មកដល់ផ្សាររាត្រី បរិវេណវត្តបុទុមវត្តី តំបន់ផ្លូវបាសាក់ និងផ្សារទួលទំពូង។ បច្ចុប្បន្ន សហភាព​សហព័ន្ធ​យុវជន​កម្ពុជា សហការជាមួយអង្គភាពពាក់ព័ន្ធនានា កំពុងរៀបចំ​តុបតែង​លំអ​ទីតាំង​ទាំង​នោះ​មុនព្រឹត្តិការណ៍ «នគរសង្ក្រាន្ត» ឈានចូលមកដល់៕ អត្ថបទ៖ ទូច សោភ័ណ 

អភិបាលខេត្តកំពង់ស្ពឺ ក្រើនរំលឹកអាជ្ញាធរមូលដ្ឋានត្រូវខិតខំទប់ស្កាត់ល្បែងអនឡាញ និងបទល្មើសនានា

2026/03/24 04:23:37 pm        71
Facebook Telegram Linkin
កំពង់ស្ពឺ៖ ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ បានក្រើនរំលឹកទៅដល់អាជ្ញាធរមូលដ្ឋាន និងសមត្ថកិច្ចពាក់ព័ន្ធក្នុងភូមិសាស្ត្រខេត្តកំពង់ស្ពឺ ត្រូវខិតខំទប់ស្កាត់នូវបទល្មើសល្បែងអនឡាញ (Scam Online) និងបទល្មើសនានា ដើម្បីភាពសុខសាន្តរបស់ប្រជាពលរដ្ឋ និងរស់នៅដោយភាពកក់ក្ដៅ ។ ការដាស់តឿននេះ ធ្វើឡើងនៅក្នុងពិធីសម្ពោធឆ្លងសាលាធម្មសាលា និងសមិទ្ធផលនានា ក្នុងវត្តទួលតាម៉ៅ ស្ថិតនៅឃុំតាំងក្រូច ស្រុកសំរោងទង ថ្ងៃទី២៤ ខែមីនា ឆ្នាំ២០២៦ ។ ឯកឧត្តមអភិបាលខេត្ត មានប្រសាសន៍ថា ដើម្បីភាពសុខសាន្ត និងផ្ដល់អត្ថប្រយោជន៍ដល់ប្រជាពលរដ្ឋ រាជរដ្ឋាភិបាលកម្ពុជាបានប្រឹងប្រែងតាក់តែងច្បាប់ គោលនយោបាយ និងផែនការផ្សេងៗ ក៏ដូចជាកសាងនូវហេដ្ឋារចនាសម្ព័ន្ធនានា ។ឯកឧត្តមបានបន្តថា ក្នុងនោះសមិទ្ធផលរូបវ័ន្តជាច្រើន ដែលកើតមានឡើងនៅក្នុងមូលដ្ឋានពីភូមិ រហូតដល់ស្រុក ខេត្ត និងក្នុងទីអារាមសាសនា បានបង្ហាញឱ្យឃើញពីសក្ខីភាព ដ៏ពិតប្រាកដមួយ ដែលកើតចេញកត្តាសុខសន្តិភាពពេញលេញ ក្រោមការដឹកនាំរបស់សម្តេចតេជោ ហ៊ុន សែន អតីតនាយករដ្ឋមន្ត្រី បច្ចុប្បន្នប្រធានព្រឹទ្ធសភា និងបន្តដឹកនាំដោយសម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា ហើយហេដ្ឋារចនាសម្ព័ន្ធទាំងនោះ រួមមានផ្លូវថ្នល់ ស្ពានអាកាស សាលារៀន មន្ទីរពេទ្យ មណ្ឌលសុខភាព វត្តអារាម ប្រព័ន្ធធារាសាស្ត្រ និងការរីកចម្រើន នៃរោងចក្រសហគ្រាសជាដើម ។ឯកឧត្តមបណ្ឌិត ជាម ច័ន្ទសោភ័ណ បានបន្ថែមថា ការអភិវឌ្ឍទាំងនេះ គឺបាននិងកំពុងជួយលើកកម្ពស់ជីវភាពរស់នៅ របស់ប្រជាពលរដ្ឋឱ្យកាន់តែប្រសើរឡើង ដែលជាក់ស្តែងខេត្តកំពង់ស្ពឺ បច្ចុប្បន្នរោងចក្រ សហគ្រាសបានកើតឡើងបន្តបន្ទាប់ពីភូមិរហូតដល់ខេត្ត ដែលគិតមកទល់ថ្ងៃមានប្រមាណ ១៦០០រោងចក្រ សហគ្រាស និងមានកម្មករ កម្មការិនីជាង ៣០ម៉ឺនកំពុងមានការងារធ្វើ ។ឯកឧត្តមអភិបាលខេត្ត បានគូសបញ្ជាក់ថា ទម្ទឹងនឹងកិច្ចខិតខំប្រឹងប្រែងរបស់រាជរដ្ឋាភិបាលទាំងអស់នេះ ក្នុងនាមអាជ្ញាធរមូលដ្ឋាន និងសមត្ថកិច្ចពាក់ព័ន្ធ ត្រូវអនុវត្តឱ្យបានម៉ឺងម៉ាត់នូវគោលនយោបាយភូមិ-ឃុំ-សង្កាត់ មានសុវត្ថិភាព របស់រាជរដ្ឋាភិបាល ដើម្បីធានាបានសុខសុវត្ថិភាព និងការអភិវឌ្ឍនៅក្នុងមូលដ្ឋាន បន្តការអប់រំ ផ្សព្វផ្សាយឱ្យស៊ីជម្រៅទូលំទូលាយអំពីការអនុវត្តច្បាប់ចរាចរណ៍ផ្លូវគោក និងបង្រ្កាបល្បែងស៊ីសងខុសច្បាប់គ្រប់ប្រភេទ ពិសេសគឺល្បែងឆបោកតាមប្រព័ន្ធអនឡាញ ដែលរាជរដ្ឋាភិបាល កំពុងមានវិធានការក្តៅ ក្នុងការបោសសំអាតឱ្យអស់ពីកម្ពុជា ។ មួយវិញទៀត ត្រូវពិនិត្យលទ្ធភាពក្នុងការជួយកែសម្រួលផ្លូវនៅតាមភូមិ ឃុំមួយចំនួនដែលរងការខូចខាត ឱ្យប្រជាពលរដ្ឋអាចចរាចរណ៍បានស្រួល ទោះបីមិនទាន់មានលទ្ធភាពកសាង ឬស្ថាបនាផ្លូវបេតុងជូនពួកគាត់ និងជម្រុញឱ្យទឹកស្អាត អគ្គិសនី បានតភ្ជាប់ទៅដល់គ្រប់ភូមិដើម្បីឱ្យពលរដ្ឋបានប្រើប្រាស់ ៕ អត្ថបទ បាន សុខរិទ្ធិ

ទិវាកម្ចាត់រោគរបេង៖ មណ្ឌលសុខភាព និង​អង្គការដៃគូ​ប្តេជ្ញា​រួមគ្នាលុ​ប​បំបាត់​ជំងឺ​របេង​ឲ្យ​អស់​ពី​មូលដ្ឋាន​

2026/03/24 04:22:27 pm        107
Facebook Telegram Linkin
នៅថ្ងៃទី២៤ ខែមីនា នេះ គឺថ្ងៃទិវាពិភពលោកកំចាត់រោគរបេង ហើយតាមរយៈទិវានេះ មណ្ឌល​សុខ​ភាព​តាម​ឃុំសង្កាត់ និងអង្គការដៃគូនានា បានបង្ហាញការ​តាំង​ចិត្ត​កាន់​តែ​ខ្លាំង​ក្លា​រួម​គ្នា​ស្រាវ​ជ្រាវ​រុក​រកអ្នកកើតជំងឺគ្រប់ប្រភេទ សំដៅលុបបំបាត់មេរោគរបេងឲ្យអស់ពីក្នុងមូលដ្ឋាន និង​សហគមន៍​របស់​ខ្លួន ខណៈការផ្តល់ថ្នាំ ព្យាបាលជំងឺរបេងនេះ គឺមិនមានគិតថ្លៃសេវាអ្វីទាំងអស់ នៅ​តាម​មណ្ឌលសុខភាពនៅទូទាំងប្រទេស។បើ​តាមលោក ប្រាក់ វណ្ណារ៉ា ប្រធានមណ្ឌលសុខភាពស្វាយរលំ និងអង្គការដៃគូ នៅក្រុងតាខ្មៅ ខេត្ត​កណ្តាល បានថ្លែងប្រាប់BTV នៅថ្ងៃទី២៤ ខែមីនា ឆ្នាំ២០២៦នេះ ថា មណ្ឌល​សុខ​ភាព​ស្វាយ​រលំ ក៏ដូចមណ្ឌលសុខភាពនានាទូទាំងប្រទេស គឺសុទ្ធតែអនុវត្តនូវគ្រប់សកម្មភាព និង​គ្រប់​យុទ្ធនាការ​របស់ខ្លួនរួមគ្នាកំចាត់រោគរបេងនៅក្នុងមូលដ្ឋាន ក្នុងសហគមន៍របស់ខ្លួន ដោយ​មាន​ការ​ចុះ​ផ្សព្វផ្សាយ ចុះស្រាវជ្រាវរុករកអ្នកកើតជំងឺរបេង នៅតាមវត្តអារ៉ាម សាលារៀន តាមផ្សារ តាម​ទីសាធារណៈ និងក្រុមគ្រួសារណាដែលមានសមាជិកគ្រួសារកើតជំងឺរបេង សំដៅ​មិន​ទុក​ឲ្យ​ពលរដ្ឋ​ណា​ម្នាក់ នៅសំងំខ្លួនមិនព្យាបាលរបេង។នៅក្នុងឱកាសទិវាពិភពលោកកំចាត់រោគរបេង បើតាមអ្នកផ្ទុករោគរបេង និងសមាជិកក្រុមគ្រួសារ បាន​នាំ​គ្នាថ្លែងអំណរគុណរាជរដ្ឋាភិបាលកម្ពុជា ដែល​បាន​អនុវត្ត​គោល​នយោបាយ​ព្យាបាល​ជំងឺ​របេង​ដោយ​មិនមានការយកប្រាក់កំរ៉ៃអ្នកជំងឺរបេងទាំងអស់គ្នា ហើយគេនឹងខិតខំ​អនុវត្ត​តាម​ការ​ណែនាំ​គ្រូពេទ្យ សំដៅមិនឲ្យមេរោគកាចសាហាវនេះឆ្លងទៅអ្នកដទៃ។តាមសារលិខិតសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាបានសរសេរថា ទិវា​ពិភព​លោក​កម្ចាត់រោគរបេង ២៤ មីនា ក្នុងឆ្នាំ២០២៦នេះ គឺប្រារព្វក្រោមប្រធានបទ មែនហើយ! យើង​អាចបញ្ចប់ជំងឺរបេង៖ ដឹកនាំដោយប្រទេសជាតិ ជំរុញដោយប្រជាជន ក្នុង​គោល​បំណង​បន្ត​ជំរុញ​ និងយកចិត្តទុកដាក់បន្ថែមទៀត លើកកម្ពស់សុខភាពប្រជាជនឲ្យកាន់តែទូលំលាយ និង​បំផុស​ការ​យល់ដឹង ការយកចិត្តទុកដាក់ប្រយុទ្ធនឹងជំងឺរបេង និងផ្សព្វផ្សាយ​ពលរដ្ឋ​យល់​ដឹង​ពី​ទំហំ​បញ្ហា និងផលវិបាកនៃជំងឺរបេង សំដៅរួមចំណែកលើកកម្ពស់សុខុមាលភាពសង្គម និងតម្លៃ សេចក្តី​ថ្លៃថ្នូររបស់សង្គមជាតិ។សារលិ​ខិតសម្តេចធិបតី បានសរសេរដែរថា កម្ពុជាកាលពី២០ឆ្នាំមុន គឺស្ថិតក្នុង​ចំណោម​ប្រទេស​មាន​អត្រា​អ្នកកើតជំងឺរបេងខ្ពស់ជាងគេនៅក្នុងពិភពលោក តែបច្ចុប្បន្ន កម្ពុជា​បាន​ក្លាយ​ជា​ប្រទេស​គំរូ​មួយ ​និងបានធ្វើឲ្យអ្នកជំងឺរបេងក្នុងចំណោម១០ម៉ឺននាក់ មានអត្រា​ស្លាប់​ធ្លាក់​ចុះ​ពី​៨០​ករណី​ នៅឆ្នាំ២០០០ ចុះមកនៅត្រឹម ១៨ករណីក្នុងឆ្នាំ២០២៤៕ អត្ថបទ៖ ស៊ុម សុខជា

ក្រសួងមុខងារសាធារណៈ៖ពេលខាងមុខ ក្រសួង ស្ថាប័ននីមួយៗនឹងមានថ្នាលឌីជីថលរួមមួយដើម្បីដំណើរការចរន្តឯកសារឱ្យមានភាពលឿនរហ័ស មានប្រសិទ្ធភាពខ្ពស់

2026/03/24 04:18:09 pm        77
Facebook Telegram Linkin
ក្រសួងមុខងារសាធារណៈ បានបញ្ជាក់ឱ្យដឹងថា ក្នុងពេលខាងមុខ ក្រសួង ស្ថាប័ននីមួយៗ នឹងមានថ្នាលឌីជីថលរួមមួយ ដើម្បីដំណើរការចរន្តឯកសារឱ្យមានភាពលឿនរហ័ស មានប្រសិទ្ធភាពខ្ពស់ ហើយកាត់បន្ថយរបាំងរដ្ឋបាល។ការបញ្ជាក់បែនេះ ធ្វើឡើងក្រោយក្នុងកិច្ចប្រជុំ ពិភាក្សាលើការរៀបចំថ្នាលឌីជីថល សម្រាប់ការគ្រប់គ្រង និងការបញ្ជូនឯកសារ និងនិយាមនីតិវិធីប្រតិបត្តិសម្រាប់ការគ្រប់គ្រង ប្រគល់ និងទទួលឯកសាររបស់ក្រសួង ស្ថាប័ន នៅថ្ងៃទី២៣ ខែមីនា ឆ្នាំ២០២៦ ក្រោមអធិបតី ឯកត្តម យក់ ប៊ុនណា រដ្ឋលេខាធិការប្រចាំការ ក្រសួងមុខងារសាធារណៈ ជាមួយនឹងតំណាងក្រសួង ស្ថាប័នពាក់ព័ន្ធនានា។ក្រសួងមុខងារសាធារណៈ បានឱ្យដឹងថា ផ្នែកមួយនៃការកែទម្រង់រដ្ឋបាលសាធារណៈ គឺជាគំនិតផ្តួចផ្តើមចងក្រងជាបណ្តាញអគ្គលេខាធិការដ្ឋាន។ តាមរយៈបណ្តាញនេះ អគ្គលេខាធិការដ្ឋាននៃក្រសួង ស្ថាប័ននីមួយៗបានសហការ ជួបពិភាក្សាគ្នាជាបន្តបន្ទាប់ក្នុងការ បង្កើតថ្នាលបច្ចេកវិទ្យាឌីជីថលមួយដើម្បីជួយសម្រួលដល់ការងាររដ្ឋបាល និងការប្រតិបត្តិការងារប្រចាំថ្ងៃរបស់ក្រសួង ស្ថាប័ន ក្នុងការគ្រប់គ្រង បញ្ជូន ប្រគល់ និងទទួលឯកសាររវាងគ្នា ទៅវិញទៅមក ឱ្យមានភាពលឿនរហ័ស សុវត្ថិភាព និងមានប្រសិទ្ធភាពខ្ពស់។ ក្រសួងមុខងារសាធារណៈបានបញ្ជាក់ថា សារៈសំខាន់ចម្បងនៃការអនុវត្តប្រព័ន្ធថ្នាលឌីជីថលនេះ ជាការកាត់បន្ថយការប្រើប្រាស់ឯកសារក្រដាស កាត់បន្ថយពេលវេលា និងបង្កើនប្រសិទ្ធភាពការងាររដ្ឋបាលឱ្យកាន់តែលឿន និងទាន់ពេលវេលា។ បើតាម ក្រសួងមុខងារសាធារណៈ តាមរយៈកិច្ចប្រជុំជាបន្តបន្ទាប់កន្លងមក និងក្នុងពេលនេះ បណ្តាញអគ្គលេខាធិការដ្ឋានបានពិភាក្សាគ្នាយ៉ាងស្និតស្នាល ធ្វើយ៉ាងណាឱ្យការអនុវត្តថ្នាលឌីជីថលនេះមានភាពសាមញ្ញ ងាយស្រួលប្រើប្រាស់ និងអាចអនុវត្តបានជាក់ស្តែងនៅគ្រប់ក្រសួង ស្ថាប័ន៕

បញ្ជូនជនសង្ស័យ ៥នាក់ពាក់ព័ន្ធនឹងការឆបោកអនឡាញ និងក្លែង​បន្លំទិដ្ឋាការស្នាក់នខុសច្បាប់​ទៅសាលាដំបូងរាជធានីភ្នំពេញផ្ដន្ទាទោសតាមច្បាប់​

2026/03/24 04:15:11 pm        363
Facebook Telegram Linkin
នៅថ្ងៃទី២៤ ខែមីនា ឆ្នាំ២០២៦នេះ អគ្គនាយកដ្ឋានអន្តោប្រវេសន៍បានចាប់បញ្ជូនជនសង្ស័យចំនួនប្រាំនាក់ ដោយក្នុងនោះមានជនបរទេសបីនាក់ និងជនជាតិខ្មែរពីរនាក់ ទៅកាន់សាលាដំបូងរាជធានីភ្នំពេញ ករណី ជាប់ពាក់ព័ន្ធនឹងការឆបោកតាមអនឡាញ និងធ្វើទិដ្ឋាការស្នាក់នៅក្លែងក្លាយ ដើម្បីផ្តន្ទាទោសតាមច្បាប់។ ជនសង្ស័យទាំង៥នាក់ ដែលឃាត់ខ្លួនពាក់ព័ន្ធនឹងការឆបោក និងធ្វើទិដ្ឋាការស្នាក់នៅក្លែងក្លាយ មាន ១-ឈ្មោះ KHAN NAEEM (STAVE KHAN) ភេទប្រុស ជនជាតិប៉ាគីស្ថាន, ២-ឈ្មោះ KHAN MEHDI HASSAN (DAWOOD IBRAHIM) ភេទប្រុស ជនជាតិប៉ាគីស្ថាន, ៣-ឈ្មោះ SHAHBAZ MUHAMMAD ភេទប្រុស ជនជាតិប៉ាគីស្ថាន, ៤-ឈ្មោះ អែម រតនៈ ហៅ ខេ ភេទប្រុស ជនជាតិខ្មែរ, ៥-ឈ្មោះ ជឹម ចាន់កែ ហៅ ម៉េង ភេទប្រុស ជនជាតខ្មែរ៕

ក្រសួងផែនការប្រកាសដាក់ឱ្យដំណើរការ «ផតថលអត្តសញ្ញាណកម្មគ្រួសារក្រីក្រ (IDPoor Portal) លើថ្នាលឌីជីថលគាំពារសង្គមកម្ពុជា» ដែលជាជំហានថ្មី ក្នុងការធ្វើទំនើបកម្ម និងបង្កើនប្រសិទ្ធភាពប្រព័ន្ធគាំពារសង្គម

2026/03/24 04:11:34 pm        104
Facebook Telegram Linkin
ភ្នំពេញ៖ នៅថ្ងៃទី២៤ ខែមីនា ឆ្នាំ២០២៦ នៅសណ្ឋាគារ SUN & MOON ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ អញ្ជើញជាអធិបតីភាពដ៏ខ្ពង់ខ្ពស់ក្នុងពិធីប្រកាសដាក់ឱ្យដំណើរការផតថលអត្តសញ្ញាណកម្មគ្រួសារក្រីក្រលើថ្នាលឌីជីថលគាំពារសង្គមកម្ពុជាជាផ្លូវការ ដោយមានការអញ្ជើញចូលរួមជាគណៈអធិបតីពីឯកឧត្តម Stefan Messerer ឯកអគ្គរដ្ឋទូតនៃសាធារណរដ្ឋសហព័ន្ធអាល្លឺម៉ង់ប្រចាំកម្ពុជា និងឯកឧត្តម Derek Yip ឯកអគ្គរដ្ឋទូតអូស្រ្តាលីប្រចាំកម្ពុជា, លោកជំទាវ ប៉ែន សុបភា រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ, ឯកឧត្តមបណ្ឌិត ចន ណារិទ្ធ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ អគ្គលេខាធិការនៃក្រុមប្រឹក្សាជាតិគាំពារសង្គម និងជាប្រធានអនុគណៈកម្មាធិការទទួលបន្ទុកបរិវត្តកម្មឌីជីថលក្នុងប្រព័ន្ធគាំពារសង្គម, ឯកឧត្តម លោកជំទាវ លោក លោកស្រី តំណាងក្រសួង ស្ថាប័ន តំណាងដៃគូអភិវឌ្ឍ ភ្ញៀវកិត្តិយសជាតិ និងអន្តរជាតិ និងប្រធានមន្ទីរផែនការរាជធានី ខេត្ត អញ្ជើញចូលរួម។ជាកិច្ចចាប់ផ្តើម ឯកឧត្តមរដ្ឋមន្ត្រីបានសម្តែងនូវអំណរគុណយ៉ាងជ្រាលជ្រៅចំពោះ ឯកឧត្តម Stefan Messerer និងឯកឧត្តម Derek Yip ចំពោះការថ្លែងនូវមតិចំណាប់អារម្មណ៍ដ៏មានអត្ថន័យ ព្រមទាំង ឯកឧត្តមបណ្ឌិត ចន ណារិទ្ធ ចំពោះមតិស្វាគមន៍ដ៏កក់ក្តៅ និងរបាយការណ៍ប្រកបដោយខ្លឹមសារសង្ខេបនិងគ្រប់ជ្រុងជ្រោយ ជាមួយគ្នានេះឯកឧត្តមក៏បានថ្លែងអំណរគុណដល់តំណាងក្រសួងស្ថាប័នពាក់ព័ន្ធ រដ្ឋបាលថ្នាក់ក្រោមជាតិ តំណាងដៃគូអភិវឌ្ឍនានា ជាពិសេសរដ្ឋាភិបាលសាធារណៈរដ្ឋសហព័ន្ធអាល្លឺង់ រដ្ឋាភិបាលអូស្រ្តាលី អង្គការ GIZ, UNDP, និងអង្គការ UNICEF ដែលតែងតែផ្តល់ការសហការល្អ និងការគាំទ្រដល់កម្មវិធីអត្តសញ្ញាណកម្មគ្រួសារក្រីក្រ ក្រសួងផែនការ ដ៏មានសារៈសំខាន់នេះ។ឯកឧត្តមរដ្ឋមន្ត្រីបន្តថា តាងនាមក្រសួងផែនការ និងក្នុងនាមឯកឧត្តមផ្ទាល់ ពិតជាមានមោទកភាពចំពោះសមិទ្ធផលទាំងឡាយ ជាពិសេសការធ្វើឌីជីថលូបនីយកម្មលើយន្តការកំណត់អត្តសញ្ញាណគ្រួសារក្រីក្រជាជំហានៗក្នុងរយៈពេល១០ឆ្នាំ ចុងក្រោយនេះ ដែលប្រែក្លាយរំហូរការងារពីការធ្វើកិច្ចការដោយដៃ រហូតដល់ការធ្វើកិច្ចការតាមប្រព័ន្ធឌីជីថលទាំងស្រុង។ ការដាក់ឱ្យដំណើរការ “ផតថលអត្តសញ្ញាណកម្មគ្រួសារក្រីក្រ លើថ្នាលឌីជីថលគាំពារសង្គមកម្ពុជា” នាថ្ងៃនេះ ជាការបោះជំហានដ៏សំខាន់ និងជាការសម្រេចបាននូវបង្គោលចរថ្មីមួយទៀត ពោល គឺ ធ្វើទំនើបកម្ម និងសុខដុមនីយកម្មផតថលអត្តសញ្ញាណកម្មគ្រួសារក្រីក្រ ឱ្យកាន់តែមានភាពប្រទាក់ក្រឡា និងដំណើរការលើប្រព័ន្ធអេកូឡូស៊ីគាំពារសង្គមឌីជីថលរួមនៃថ្នាលឌីជីថលគាំពារសង្គមកម្ពុជា ដូចដែលបានកំណត់ក្នុង ផែនការយុទ្ធសាស្ត្របរិវត្តកម្មឌីជីថលក្នុងប្រព័ន្ធគាំពារសង្គមឆ្នាំ២០២៤-២០២៨។ ការធ្វើទំនើបកម្ម និងសុខដុមនីយកម្មនេះ នឹងរួមចំណែកជាកាតាលិករដ៏សំខាន់ក្នុងការបង្កើនប្រសិទ្ធភាព និងស័ក្តិសិទ្ធិភាពនៃការអនុវត្ត ក្របខ័ណ្ឌគោលនយោបាយជាតិគាំពារសង្គមឆ្នាំ២០២៤-២០៣៥ ដែលរាជរដ្ឋាភិបាល បានប្រកាសដាក់ឱ្យអនុវត្តកាលពីខែកុម្ភៈ ឆ្នាំ២០២៥ កន្លងទៅ។ឯកឧត្តមរដ្ឋមន្ត្រីបញ្ជាក់ថា រាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំដ៏ត្រឹមត្រូវ ស្វាហាប់, និងឈ្លាសវៃ ប្រកបដោយជវភាព និងចក្ខុវិស័យវែងឆ្ងាយរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្ដី នៃព្រះរាជាណាចក្រកម្ពុជា បានបន្តកំណត់យកមនុស្សជាអាទិភាពគន្លឹះទី១ ដែលត្រូវបានរំលេចយ៉ាងច្បាស់នៅក្នុងបញ្ចកោណទី១ និងបំពេញបន្ថែមដោយបញ្ចកោណទី៣ ទី៤ និងទី៥ នៃយុទ្ធសាស្ត្របញ្ចកោណ ដំណាក់កាលទី១ ដោយបន្តផ្តោតលើការអភិវឌ្ឍមូលធនមនុស្ស ជាគោលដៅចម្បង តាមរយៈការបន្តលើកកម្ពស់សុខភាពនិងសុខុមាលភាព និងជីវភាពរស់នៅរបស់ប្រជាពលរដ្ឋ ក្នុងស្មារតី “មិនបោះបង់ពលរដ្ឋណាម្នាក់” ដើម្បីកាត់បន្ថយភាពក្រីក្រ វិសមភាព និងពង្រឹងសាមគ្គីភាព ស្ថិរភាព និងសមធម៌ក្នុងសង្គម ឆ្ពោះទៅសម្រេចបានចក្ខុវិស័យកម្ពុជា ឆ្នាំ២០៥០ ជាប្រទេសមានចំណូលខ្ពស់។ឯកឧត្តមរដ្ឋមន្ត្រីបន្តទៀតថា ការដាក់ឱ្យដំណើរការជាផ្លូវការ ផតថលអត្តសញ្ញាណកម្មគ្រួសារក្រីក្រ លើថ្នាលឌីជីថលគាំពារសង្គមកម្ពុជា ជាវឌ្ឍនភាពថ្មីមួយបន្ថែមទៀតក្នុងការបន្តអភិវឌ្ឍ និងការធ្វើបន្តធ្វើទំនើបកម្មឱ្យកាន់តែមានប្រសិទ្ធភាព ប្រទាក់ក្រឡាគ្នាល្អ និងឆ្លើយតបទាន់ពេល ចំពោះតម្រូវការរបស់ពលរដ្ឋ ហើយក៏ស្របទៅនឹងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលដែលបានកំណត់ បច្ចេកវិទ្យាជាអាទិភាពគន្លឹះទី៥ ដោយមានបញ្ចកោណទី៥៖ ការអភិវឌ្ឍសេដ្ឋកិច្ចនិងសង្គមឌីជីថល។ចំពោះការដាក់ឱ្យដំណើរការ IDPoor Portal លើថ្នាលឌីជីថលគាំពារសង្គមកម្ពុជា (DSPP) នាថ្ងៃនេះ ឯកឧត្តមរដ្ឋមន្ត្រីបានគូសបញ្ជាក់នូវអត្ថប្រយោជន៍សំខាន់ៗមួយចំនួនដូចខាងក្រោម៖ទី១-ការធ្វើសុខដុមនីយកម្មមុខងារ IDPoor លើថ្នាលឌីជីថលរួមនៃប្រព័ន្ធគាំពារសង្គមកម្ពុជា បានពង្រីកមុខងារអត្តសញ្ញាណកម្មគ្រួសារក្រីក្រ ដែលមាននៅលើ Tablet មកដំណើរការនៅលើគ្រប់ឧបករណ៍ឌីជីថល ពិសេសដំណើរការលើឧបករណ៍ចុះបញ្ជីរួមដែលត្រូវបានបំពាក់ដោយក្រុមប្រឹក្សាជាតិគាំពារសង្គម នៅគ្រប់ឃុំ សង្កាត់ទូទាំងប្រទេស និងបញ្ចូលការប្រើប្រាស់មុខងារទំនើបនៃថ្នាល DSPP ដើម្បីជាជំនួយក្នុងការចុះបញ្ជី ស្វែងរកទិន្នន័យ អត្តសញ្ញាណ ផ្ទៀងផ្ទាត់ភាពត្រឹមត្រូវ និងធ្វើបច្ចុប្បន្នកម្មទិន្នន័យពលរដ្ឋគោលដៅកាន់តែងាយស្រួល និងស្របតាមស្តង់ដារួម។ទី២-ការពង្រឹងការធ្វើអន្តរប្រតិបត្តិការ និងការផ្ទៀងផ្ទាត់ទិន្នន័យបែបឌីជីថល នឹងរួមចំណែកពង្រឹងការតភ្ជាប់ និងការធ្វើអន្តរប្រតិបត្តិការរវាងទិន្នន័យ IDPoor ជាមួយមូលដ្ឋានទិន្នន័យ ចុះបញ្ជីគាំពារសង្គមនៃក្រុមប្រឹក្សាជាតិគាំពារសង្គម និងប្រព័ន្ធអត្តសញ្ញាណកម្មរួម របស់អគ្គនាយកដ្ឋានអត្តសញ្ញាណកម្មនៃក្រសួងមហាផ្ទៃ ព្រមទាំងមូលដ្ឋានទិន្នន័យជាច្រើនទៀតរបស់ក្រសួង ស្ថាប័នពាក់ព័ន្ធ សំដៅការផ្ទៀងផ្ទាត់អត្តសញ្ញាណបុគ្គល ព័ត៌មានគ្រួសារ និងការគណនាកម្រិតនៃភាពក្រីក្រ ឱ្យបានកាន់តែសុក្រឹត និងមានតម្លាភាព ព្រមទាំងឆ្លើយតបទៅនឹងស្មារតីសមាជរដ្ឋសភា និងព្រឹទ្ធសភា កាលពីខែមិថុនា ឆ្នាំ២០២៥។ទី៣-ការបង្កើនប្រសិទ្ធភាពនៃការអនុវត្តនៅរដ្ឋបាលថ្នាក់ក្រោមជាតិ ការធ្វើទំនើបកម្មផតថល IDPoor ក្នុងដំណាក់កាលថ្មីនេះ នឹងជំរុញ ក៏ដូចជាពន្លឿនដំណើរការនៃការចុះបញ្ជី និងកំណត់អត្តសញ្ញាណកម្មគ្រួសារក្រីក្រ ដោយប្រើប្រាស់មុខងារ ស្វែងរករហ័ស ឬ ហៅថា Fast Search, មុខងារទាញយកព័ត៌មានចេញអត្តសញ្ញាណបណ្ណសញ្ជាតិខ្មែរដោយស្វ័យប្រវត្តិ ឬ ហៅថា OCR ដែលជាហេដ្ឋារចនាសម្ព័ន្ធឌីជីថល មានស្រាប់លើថ្នាលឌីជីថល DSPP។ទី៤-ការពង្រឹងសមត្ថភាពរាជរដ្ឋាភិបាល ក្នុងការឆ្លើយតបទៅនឹងគ្រោះអាសន្ន ជួយបង្កើនសមត្ថភាពឆ្លើយតបរបស់រាជរដ្ឋាភិបាលទៅនឹងគ្រោះអាសន្ន និងវិបត្តិនានា ដូចជារៀបចំអន្តរាគមន៍គោលនយោបាយគាំពារសង្គម ប្រកបដោយភាពឆាប់រហ័ស និងមានប្រសិទ្ធភាព ពឹងផ្អែកលើមូលដ្ឋានទិន្នន័យដែលអាចធ្វើអន្តរប្រតិបត្តិការរវាងគ្នានឹងគ្នា ព្រមទាំងគាំទ្រដល់ការសម្រេចចិត្តផ្អែកលើទិន្នន័យ ក្នុងការដាក់ចេញនូវគោលនយោបាយជាតិគាំពារសង្គម ជាបន្តបន្ទាប់។ចុងក្រោយ ឯកឧត្តមបានអំពាវនាវឱ្យក្រសួង ស្ថាប័នពាក់ព័ន្ធ និងរដ្ឋបាលថ្នាក់ក្រោមជាតិ បន្តពង្រឹងកិច្ចសហប្រតិបត្តិការ កែលម្អគុណភាពទិន្នន័យ និងអនុវត្តប្រព័ន្ធឌីជីថលនេះឱ្យមានប្រសិទ្ធភាពខ្ពស់ ដើម្បីបម្រើប្រជាពលរដ្ឋបានល្អប្រសើរឡើង។

ជនបរទេសពាក់ព័ន្ធ Online Scams រាប់ម៉ឺននាក់ត្រូវបានបណ្ដេញចេញពីកម្ពុជា ដើម្បី​ស្ដារ​សន្តិសុខ​ជាតិ

2026/03/24 04:07:21 pm        140
Facebook Telegram Linkin
ភ្នំពេញ៖ បណ្តាជនបរទេសនានាទាំងឡាយ ដែលពាក់ព័ន្ធ​ឧក្រិដ្ឋ​កម្ម​ឆបោក​តាម​ប្រព័ន្ធ​បច្ចេក​​វិទ្យា ​(Online Scams) តែងត្រូវបានរដ្ឋាភិបាលកម្ពុជា អនុវត្តនីតិ​វិធី​តាម​រយៈ​ការ​ចាប់​បញ្ចូន​ចេញ ​ដើម្បីសន្តិសុខជាតិ។ ក្នុងមួយរយៈពេលក្រោយមកនេះ នគរបាលអន្តោប្រវេសន៍កម្ពុជា តែង​បាន​បំពេញ​នីតិ​វិធី​បញ្ជូន​ខ្លួន​ជនបរទេសជាច្រើនពាន់នាក់ និងចម្រុះជាតិសាសន៍ ទៅកាន់ប្រទេសដើមរបស់ពួកគេវិញ ដើម្បី​អនុវត្តទៅតាមនីតិវិធីច្បាប់ ក្រោយពួកគេត្រូវបានកម្លាំងសមត្ថកិច្ចកម្ពុជា បើក​ការ​បង្ក្រាប​ជា​បន្ត​បន្ទាប់​ ក្នុងយុទ្ធនាការបោសសម្អាតឧក្រិដ្ឋកម្មឆបោកអនឡាញ នៅកម្ពុជាក្នុងពេលកន្លងមក ។ ក្រៅពីការ​អនុវត្តការបញ្ជូនចេញហើយនោះ ក្នុងនោះជនសង្ស័យជាជនបរទេសខ្លះ និ​ង​ខ្មែរ​មួយ​ចំនួន​ក៏ត្រូវបានអនុវត្តទោសទណ្ឌច្បាប់នៅក្នុងប្រទេសកម្ពុជាផងដែរ។ ជាក់​ស្តែងក្នុ​ងពេលថ្មីៗនេះ កាលពីយប់រំលងអាធ្រាត្រឈានចូលថ្ងៃទី២២ ខែមីនា ឆ្នាំ២០២៦ នគរបាល​អន្តោប្រវេសន៍កម្ពុជា ក៏បានបណ្តេញជន ជាតិចិន៣៣១នាក់ ចេញពី​ព្រះរាជា​ណា​ចក្រ​ក​ម្ពុជាពាក់ព័ន្ធ​ករណីឆបោកតាមប្រព័ន្ធអនឡាញ (Online Scams) ផងដែរ តាមរយៈ​យន្ត​ហោះ​ពិសេស ​នៅប៉ុស្តិ៍នគរបាលច្រកទ្វារអាកាសអន្តរជាតិតេជោ។ពលរដ្ឋគាំទ្រ និងជឿជាក់លើសម្តេចប្រមុខរាជរដ្ឋាភិបាល ដែលបានយក​ចិត្ត​ទុក​ដាក់​ខ្ពស់​ក្នុង​បោស​សម្អាត​ការឆបោកតាមអនឡាញនេះ សំដៅធ្វើយ៉ាងណាមិនឲ្យកម្ពុជា ក្លាយជាជម្រក នៃ​បទ​ល្មើស​ឧក្រិដ្ឋទាំងឡាយណាមួយនោះឡើយ។ គួរបញ្ជាក់ថា ការបណ្ដេញចេញជនជាតិបរទេសខុសច្បាប់ចេញពីកម្ពុជា គឺជាការ​អនុវត្ត​តាម​វិធាន​ការ​ច្បាប់​យ៉ាងម៉ឺងម៉ាត់របស់រាជរដ្ឋាភិបាល នៃព្រះរាជាណាចក្រកម្ពុជា ក្នុងកិច្ចខិត​ខំ​ប្រឹង​ប្រែង​បោស​សម្អាត និងលុបបំបាត់ឧក្រិដ្ឋកម្មតាមប្រព័ន្ធបច្ចេកវិទ្យា ធានាការពា​រ​សុវត្ថិភាព​ជូន​ប្រ​ជា​ព​ល​រដ្ឋ​ទាំង​ក្នុងតំបន់ និងសកលលោក ដោយគ្មានការលើក​លែង​នោះ​ឡើយ​ចំពោះ​មេខ្លោង​ដែល​នៅ​ពី​ក្រោយ ក៏ដូច​ជា​ការ​ជួយ​ស​ង្គ្រោះ​ជនរង​គ្រោះ​ដែល​ត្រូវ​មេខ្លោ​ង​បោក​បញ្ឆោត​ឱ្យ​មក​ធ្វើ​ការ​ក្នុង​សក​ម្ម​ភាពឆបោកតាមប្រព័ន្ធបច្ចេកវិទ្យា ហើយមានសេរីភាព និងអាចវិលត្រឡប់​ទៅ​ប្រទេស​របស់​ខ្លួនវិញ៕ អត្ថបទ៖ លីហេង

បណ្ដាញសង្គម

ព័ត៌មានថ្មីៗ

ប្រភពប៉ាគីស្ថាន៖ កិច្ចប្រឹងប្រែង ដើម្បីសម្រួលដល់ការចរចា រវាងសហរដ្ឋអាមេរិក និងអ៊ីរ៉ង់ កំពុងបន្ត
04/07/2026 08:04 PM
Facebook Telegram Linkin
អាមេរិកវាយប្រហារគោលដៅយោធាលើកោះ Kharg របស់អ៊ីរ៉ង់ ខណៈលោក Vance ប្រាប់ថា គ្មានការប្តូរយុទ្ធសាស្ត្រទេ
04/07/2026 08:04 PM
Facebook Telegram Linkin
ប្រេងឡើងថ្លៃ និងកង្វះខាតប្រេង រុញច្រានឲ្យអ្នកប្រើប្រាស់ប៉ាគីស្ថានងាកមករកម៉ូតូអគ្គិសនី
04/07/2026 08:04 PM
Facebook Telegram Linkin
លោក Trumpថា សង្គមមនុស្សទាំងមូលនឹងត្រូវស្លាប់នៅយប់នេះ បើសិនជាអ៊ីរ៉ង់មិនបង្កើតកិច្ចព្រមព្រៀង
04/07/2026 08:04 PM
Facebook Telegram Linkin
[UPDATE] លោក Trump បញ្ជាក់ថា «អារ្យធម៌ទាំងមូលនឹងលែងមាននៅយប់នេះ» បើអ៊ីរ៉ង់មិនធ្វើកិច្ចព្រមព្រៀង
04/07/2026 08:04 PM
Facebook Telegram Linkin
ចិនសង្ឃឹមថា ភាគីពាក់ព័ន្ធនឹងសង្រ្គាមអ៊ីរ៉ង់អាចក្តាប់ឱកាស ដើម្បីសន្តិភាព និងចាប់ផ្តើមកិច្ចពិភាក្សាឡើងវិញ
04/07/2026 08:04 PM
Facebook Telegram Linkin
អ៊ីរ៉ង់គំរាមរំខានការផ្គត់ផ្គង់ប្រេង និងឧស្ម័ន ក្នុងតំបន់ «ជាច្រើនឆ្នាំ» បើហេដ្ឋារចនាសម្ព័ន្ធស៊ីវិលត្រូវបានវាយប្រហារ
04/07/2026 08:04 PM
Facebook Telegram Linkin
WHO ៖ ការជម្លៀសផ្នែកវេជ្ជសាស្រ្តនៅតំបន់ហ្កាហ្សា បានផ្អាក ក្រោយកម្មករជាប់កិច្ចសន្យាម្នាក់ត្រូវបានសម្លាប់
04/07/2026 08:04 PM
Facebook Telegram Linkin
BREAKING NEWS ៖ សង្គមមនុស្សទាំងមូលនឹងត្រូវស្លាប់នៅយប់នេះ បើសិនជាអ៊ីរ៉ង់មិនបង្កើតកិច្ចព្រមព្រៀង
04/07/2026 08:04 PM
Facebook Telegram Linkin
សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចាត់សហការីនាំយកអំណោយមនុស្សធម៌សម្រាលទុក្ខលំបាក ជូនលោកតាលោកយាយចាស់ជរាគ្មានទីពឹងនៅក្រុងច្បារមន ខេត្តកំពង់ស្ពឺ
04/07/2026 08:04 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.