នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
អាជ្ញាធរ និងកងកម្លាំងរាជធានីភ្នំពេញបន្តចុះត្រួតពិនិត្យទីតាំងប្រមូលផ្ដុំ ៩០ទីតាំងបន្ថែមទៀត ដើម្បីលុបបំបាត់បទល្មើសនានា ពិសេសបទល្មើសការឆបោកតាមប្រព័ន្ធ បច្ចេកវិទ្យា
គណៈកម្មាធិការជាតិគ្រោងរៀបចំប្រព័ន្ធគ្រប់គ្រងសំរាមទំនើប ដោយផ្អែកលើប្រសិទ្ធភាពសេដ្ឋកិច្ច នៅក្នុងខេត្តព្រះសីហនុ និងកោះកុង
ពីថ្នាក់រៀនទៅ​កសិដ្ឋាន​ឆ្លាតវៃ ! សិស្ស NTTI បង្កើត​បាន​ប្រព័ន្ធ Solar Greenhouse គ្រប់គ្រ​ងដំ​ណាំ​ដោយ​ស្វ័យប្រវត្តិ
គ្រូ និងសិស្ស អំពាវនាវសាធារណជនចូលរួមកម្មវីធី TVET Day ដើម្បីស្វែងយល់សារៈសំខាន់វិស័យបណ្តុះបណ្តាលជំនាញ

ព័ត៌មានជាតិ

ឯកឧត្តម ប៉ែន បូណា ៖ មហាសាមគ្គីជាតិខ្មែរ គឺជាកម្លាំងចលករគាំទ្រ លើកទឹកចិត្តដល់កងទ័ព ក្នុងការការពារបូរណភាពទឹកដីកម្ពុជា

2025/07/25 05:12:24 pm        195
Facebook Telegram Linkin
ឯកឧត្តម ប៉ែន បូណា ប្រធានអង្គភាពអ្នកនាំពាក្យរាជរដ្ឋាភិបាល បានថ្លែងថា នៅក្នុងរយៈពេល ២ថ្ងៃមកនេះ បានស្តែងឱ្យឃើញថា កងទ័ព និងកងកម្លាំងប្រដាប់អាវុធរបស់កម្ពុជាគ្រប់ប្រភេទ ពិតជាមានវីរៈភាពអង់អាចក្លាហាន បានខិតខំតស៊ូទប់ទល់ជាមួយសត្រូវឈ្លានពាន ដោយការពារបានទាំងស្រុងអធិបតេយ្យភាព និងបូរណភាពទឹកដី មិនឱ្យយោថៃឈ្លានពានទឹកដីកម្ពុជា ពោលគឺយោធាថៃ មិនអាចមកកាន់កាប់ដែនអធិបតេយ្យកម្ពុជាបានជាដាច់ខាត។ក្នុងឱកាសអញ្ជើញថ្លែងនៅក្នុងសន្និសីទសារព័ត៌មានស្តីពីបច្ចុប្បន្នភាពនៃការឈ្លានពានរបស់កងទ័ពថៃមកលើទឹកដីកម្ពុជា នារសៀលថ្ងៃទី២៥ ខែកក្តដា ឆ្នាំ២០២៥ នៅវិមានសន្តិភាព ឯកឧត្តម ប៉ែន បូណា បានថ្លែងបន្តថា ភាពជោគជ័យនេះ គឺក្រោមការដឹកនាំដ៏ឈ្លាសវៃប្រកបដោយយុទ្ធសាស្ត្រជ្រាលជ្រៅរបស់សម្តេចតេជោ ហ៊ុន សែន ប្រធានព្រឹទ្ធសភា និងសម្តេចធិបតី ហ៊ុន ម៉ាណែត នាយករដ្ឋមន្ត្រី។ឯកឧត្តម ប៉ែន បូណា បញ្ជាក់ថា ភាពជោគជ័យនេះសបញ្ជាក់ឱ្យឃើញថា មហាសាមគ្គីជាតិខ្មែរដ៏រឹងមាំក្នុងចំណោមប្រជាពលរដ្ឋគ្រប់ស្រទាប់សង្គម ទាំងប្រជាជនសាមញ្ញ មន្ត្រីរាជការ ទាំងព្រះសង្ឃ យុវជន ទាំងក្នុង និងក្រៅប្រទេស បានបង្ហាញនូវស្មារតីសាមគ្គីជាតិដ៏រឹងមាំនៅពីក្រោយរាជរដ្ឋាភិបាល និងកងទ័ព កម្លាំងប្រដាប់អាវុធរបស់យើង ដែលជាមហាសាមគ្គីជាតិ គឺជាកម្លាំងចលករដ៏ធំធេងគាំទ្រ លើកទឹកចិត្តដល់កងទ័ព ក្នុងការការពារបូរណភាពទឹកដីកម្ពុជា៕

ប្រជាពលរដ្ឋប្រមាណជិត ៨០០នាក់ ត្រូវបានជម្លៀសខ្លួនចូលមកកាន់ខេត្តសៀមរាប ដោយ​ទទួល​បាន​ការ​យក​ចិត្ត​ទុកដាក់ពីអាជ្ញាធរពាក់ព័ន្ធ

2025/07/25 04:41:07 pm        638
Facebook Telegram Linkin
គិតត្រឹមម៉ោង១១ព្រឹក ថ្ងៃទី២៥ ខែកក្កដា ឆ្នាំ២០២៥នេះ ប្រជាពលរដ្ឋជិត៨០០ហើយ បាន​ជម្លៀស​ចូល​កាន់ខេត្ត​សៀមរាប ក្រោយពេលអាជ្ញាធរ​ខេត្ត​ប្រកាស​អំពី​ការ​ត្រៀម​ទទួល​បង​ប្អូន​ប្រជា​ពលរដ្ឋ​ដែល​ជម្លៀស​ចេញ​ពីតំបន់ព្រំដែនដែលមានការឈ្លានពានពីប្រទេសថៃ ចូល​មក​កាន់​ខេត្ត​សៀមរាប ដោយទទួលបានការយកចិត្តទុកដាក់ពីអាជ្ញាធរពាក់ព័ន្ធ។លោក លី វណ្ណៈ នាយករដ្ឋបាលសាលាខេត្តសៀមរាប បានឱ្យដឹងនៅថ្ងៃទី២៥ ខែកក្កដា ឆ្នាំ​២០២៥​ថា អនុវត្តតាមការណែនាំ ឯកឧត្តម ប្រាក់ សោភ័ណ អភិបាលខេត្តសៀមរាប ខេត្ត​បាន​រៀប​ចំ​នៅ​តាម​បណ្តាស្រុកចំនួន៣មាន៖ ស្រុកក្រឡាញ់ ស្រីស្នំ និងស្រុកស្វាយលើ ដោយ​កំណត់​យក​ទីតាំង​វត្ត​អារាម ឬទីកន្លែងមានសុវត្ថិភាពផ្សេងៗ សម្រាប់ត្រៀម​ទទួល​បង​ប្អូន​ប្រជា​ពលរដ្ឋ​ជម្លៀស​ខ្លួន​ពីទីតាំងសឹកសង្គ្រាមមកស្នាក់នៅបណ្ដោះអាសន្ន។ លោកបញ្ជាក់ថា គិត​មក​ដល់​ពេ​ល​នេះ ​បងប្អូនប្រជាពលរដ្ឋប្រមាណជិត៨០០នាក់ហើយ បានចូលមកកាន់ខេត្តសៀមរាប។ ជា​មួយ​គ្នា​នេះ អាជ្ញាធរខេត្តគ្រោងពង្រីកទីតាំង នៅតាមបណ្តាស្រុកមួយចំនួនបន្ថែមទៀត ដូចជា៖ ស្រុក​វ៉ារិន ជីក្រែង និងស្រុកបន្ទាយស្រី ដើម្បីត្រៀមទទួលបងប្អូនប្រជាពលរដ្ឋ។ ជា​ដំណោះ​ស្រាយ​បន្ទាន់ នៅថ្ងៃនេះដែរ ឯកឧត្តមអភិបាលខេត្តសៀមរាប បានអញ្ជើញចុះសួរសុខទុក្ខ ព្រម​ជា​មួយ​អំណោយ​សង្រ្គោះបន្ទាន់ សម្រាប់ចែកជូនដល់បងប្អូនប្រជាពលរដ្ឋ។ លោកបន្ថែមថា រដ្ឋ​បាល​ខេត្ត​សៀមរាប បានត្រៀមលក្ខណៈរួចរាល់ហើយ មិនត្រឹមតែ​ការ​ស្នាក់​នៅ​របស់ព​លរដ្ឋ​ប៉ុណ្ណោះ​ទេ ​ប៉ុន្តែបានរៀបចំក្រុមគ្រូពេទ្យជួរមុខ នៅបណ្តាស្រុកគោលដៅមួយចំនួន សម្រាប់​ពលរដ្ឋ​ ឬយុទ្ធមិត្តរងគ្រោះថ្នាក់អាចមករកសេវាព្យាបាលបាន។ ជាមួយគ្នានេះ កាលពី​រសៀលថ្ងៃ​ទី​២៤ ខែកក្កដា ឆ្នាំ២០២៥ លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាល នៃ​រដ្ឋបាល​ខេត្ត​សៀមរាប​ ដឹកនាំក្រុមការងារវះកាត់សង្រ្គោះបន្ទាន់ នៃមន្ទីរពេទ្យខេត្តសៀមរាប ត្រៀម​ចាំ​ជា​ជំនួយ​មន្ទីរ​ពេទ្យ​បង្អែក​ខេត្ត​ឧត្តរមានជ័យផងដែរ៕

សហជីពនិងកម្មករ គាំទ្ររាជរដ្ឋាភិបាលចំពោះការវាយបករបស់កងទ័ពកម្ពុជាទៅភាគីថៃដែលកំពុងឈ្លានពានទឹកដី

2025/07/25 03:40:54 pm        359
Facebook Telegram Linkin
ភ្នំពេញ៖ សហជីព និងកម្មកររោងចក្រ បានបង្ហាញការគាំទ្រយ៉ាងពេញទំហឹងចំពោះការវាយបករបស់កងទ័ពកម្ពុជា ទៅលើកងទ័ពថៃដែលកំពុងឈ្លានពាន និងវាយប្រហារមកលើកងទ័ពកម្ពុជានៅតាមតំបន់ព្រំដែន។ សហជីព និងកម្មករ ក៏បានអំពាវនាវដល់ពលរដ្ឋខ្មែរទាំងអស់ ឱ្យរួបរួមគ្នានិងគាំទ្ររដ្ឋាភិបាលប្រឆាំងការឈ្លានពានមួយនេះ។លោក សំ សឿន ប្រធានសហភាពពលកម្មជាតិកម្ពុជា នៅក្នុងបទសម្ភាសន៍ជាមួយព័ត៍មាន ប៊ីធីវី នាព្រឹកថ្ងៃទី២៥ ខែកក្កដានេះ បានលើកឡើងថា ក្នុងនាមជាពលរដ្ឋ និងជាសហជីពតំណាងឱ្យកម្មករនិយោជិតរាប់ម៉ឺននាក់ សូមថ្កោលទោសយ៉ាងដាច់អហង្ការចំពោះទង្វើដ៏អាក្រក់ស្មោកគ្រោករបស់កងទ័ពថៃ ដែលបានវាយប្រហារមកលើទឹកដីកម្ពុជាមុន ដោយប្រើប្រាស់គ្រាប់ផ្លោង។ ដែលនេះជាការបង្ហាញថ្មីមួយទៀត ពីចរិតឈ្លានពានរបស់កងទ័ពថៃមកលើអធិបតេយ្យភាពកម្ពុជា។ ជាមួយនេះ លោកក៏បានប្រកាស គាំទ្រទាំងស្រុងចំពោះចំណាត់ការឆ្លើយតបដ៏ម៉ឺងម៉ាត់ និងអង់អាចក្លាហានរបស់រាជរដ្ឋាភិបាលកម្ពុជា ចំពោះរដ្ឋាភិបាលថៃ ដែលឈ្លានពានម្តងហើយ ម្តងទៀតមកលើបូរណភាពទឹកដីកម្ពុជា។ពាក់ព័ន្ធបញ្ហាព្រំដែននេះដែរ កម្មករ កម្មការិនីរោងចក្រកាត់ដេរសម្លៀកបំពាក់ ដុងឌូ ស្ថិតនៅផ្លូវជាតិលេខ៣ សង្កាត់ក្រាំងពង្រ ខណ្ឌដង្កោ រាជធានីភ្នំពេញ បានប្រកាសគាំទ្រយ៉ាងពេញទំហឹងចំពោះជំហរដ៏ម៉ឺងម៉ាត់របស់ប្រមុខរាជរដ្ឋាភិបាល ដឹកនាំដោយសម្ដេចធិបតី ហ៊ុន ម៉ាណែត ក្នុងការដោះស្រាយបញ្ហាទំនាស់ព្រំដែនរវាងកម្ពុជា និងថៃ។ ក្រុមកម្មករ ក៏បានអំពាវនាវដល់ប្រជាពលរដ្ឋទាំងអស់ បន្តរួបរួមពួតដៃគាំទ្រ និងទុកចិត្តលើការដឹកនាំរបស់រាជរដ្ឋាភិបាល លើកទឹកចិត្តបងប្អូនកងទ័ព ក្នុងការការពារបូរណភាពទឹកដី ការពារជាតិមាតុភូមិខ្មែរតែមួយផងដែរ។តាមការបញ្ជាក់របស់ ក្រសួងការពារជាតិកម្ពុជា ចេញផ្សាយនៅព្រឹកថ្ងៃទី២៥ ខែកក្កដា ឆ្នាំ២០២៥នេះ បានឱ្យដឹងថា ថ្ងៃទី២នៃដំណើរការទាហានឈ្លានពានថៃមកលើកម្ពុជា ថៃបានបាញ់ប្រហារមកលើកម្ពុជាចំនួន ៧ទីតាំង ដោយប្រើប្រាស់កាំភ្លើងធំ យន្តហោះចម្បាំង និងប្រើប្រាស់គ្រាប់បែកចង្កោមផងដែរ ខណៈការប្រើប្រាស់អាវុធបែបនេះ គឺប្រឆាំងនឹងច្បាប់អន្តរជាតិ៕អត្ថបទ៖ ឈិត បូរ៉ាវី

ក្រុមគ្រូពេទ្យ TYDA ឈប់ទទួលការចុះឈ្មោះបរិច្ចាគឈាមនៅហ្នឹងកន្លែងតែទទួលចុះឈ្មោះតាម QR Code

2025/07/25 03:36:59 pm        203
Facebook Telegram Linkin
ភ្នំពេញ ៖ កម្មវិធីបរិច្ចាគឈាម ដើម្បីបុព្វហេតុជាតិមាតុភូមិ ឃើញថាយុវជនរាប់ពាន់នាក់ បានអញ្ជើញមកចូលរួមបរិច្ចាគឈាមយ៉ាងច្រើនកុះករ នៅមជ្ឈមណ្ឌលសន្និបាតនិងពិពណ៌កោះពេជ្រ ដែលមកដល់ម៉ោងនេះឃើញថាសន្ទុះនៃ ក្រុមយុវជននៅតែបន្តចូលរួមយ៉ាងច្រើនកុះករ។ បើតាមការឲ្យដឹងពីក្រុមគ្រូពេទ្យ TYDA បានឲ្យដឹងថា រហូតមកដល់ម៉ោង 3:00 រសៀលនេះ គឺសន្ទុះក្រុមយុវជននៅតែមកចូលរួមបរិច្ចាគ ដែលជាចំនួនមួយដ៏ច្រើនមិនធ្លាប់មាន ក្នុងការងារមនុស្សធម៌បរិច្ចាគឈាមនេះ។ ក្រុមគ្រូគ្រូពេទ្យ TYDA អោយដឹងថា ត្រឹមម៉ោង៣រៀលនេះ គឺក្រុមការងារបានបិទការទទួលការចុះឈ្មោះដោយផ្ទាល់ និងបូមឈាមនៅហ្នឹងកន្លែងហើយ តែក្រុមការងារមាន QR កូត សម្រាប់ការចុះឈ្មោះសប្បុរសជន ដែលមានបំណងចូលរួមបរិច្ចាគឈាមបាន ពេលមានតម្រូវការបន្ទាន់ណាមួយ ក្រុមការងារគ្រូពេទ្យ TYDA និងទាក់ទងតាមលេខទូរស័ព្ទអញ្ជើញមកបរិច្ចាគឈាម។

​ឯកឧត្តមរដ្ឋមន្ត្រី ឌិត ទីណា បន្តប្រចាំការនៅខេត្តបន្ទាយមានជ័យ

2025/07/25 03:29:31 pm        99
Facebook Telegram Linkin
ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ នៅព្រឹកថ្ងៃទី២៥ ខែកក្កដា ឆ្នាំ២០២៥នេះ បានបន្តប្រចាំការនៅខេត្ត ដើម្បីតាមដានស្ថានភាពតំបន់ព្រំដែន និងជួយសម្របសម្រួលប្រជាពលរដ្ឋភៀសសឹកទៅទីទួលសុវត្ថិភាព៕

អភិបាលខេត្តបាត់ដំបង ចុះពិនិត្យស្ថានភាពច្រកទ្វារព្រំដែនអន្តរជាតិដូង ខណៈ​ពលករ​ខ្មែរ​ជា​ច្រើន​នាក់ត្រឡប់ចូលប្រទេសវិញ

2025/07/25 03:07:04 pm        316
Facebook Telegram Linkin
បាត់ដំបង៖ ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង នៅថ្ងៃទី២៥ ខែកក្កដា ឆ្នាំ​២០២៥នេះ បានដឹកនាំក្រុមការងារចុះពិនិត្យស្ថានភាពច្រកទ្វារព្រំដែនអន្តរជាតិដូង ស្រុក​កំរៀង​ ខេត្តបាត់ដំបង ខណៈពលករខ្មែរ​ជា​ច្រើន​នាក់​បាន​សម្រុក​ចេញ​ពី​ប្រទេស​ថៃ​ចូល​ប្រទេស​កម្ពុជា​វិញ​តាម​ច្រកនេះ។ក្នុងឱកាសអញ្ជើញពិនិត្យស្ថានភាពច្រកទ្វារព្រំដែនអន្តរជាតិដូងនេះ ឯកឧត្តម សុខ លូ បាន​ជួប​ទទួល​ស្វាគមន៍​ជា​មួយ​ពលករខ្មែរ និងបានរៀបចំ​រថយន្ត​សម្រាប់​ដឹក​ជញ្ជូន​បង​ប្អូន​ពលករ​ទៅ​តាម​បណ្តា​ខេត្ត​ផ្សេងៗ ដើម្បីត្រឡប់ទៅស្រុកកំណើតរៀងៗខ្លួនវិញ។លោក ខុង យ៉ាត់លួង ប្រធានទីស្នាក់ការត្រួតពិនិត្យច្រកទ្វារព្រំដែនអន្តរជាតិដូង បាន​ឱ្យ​ដឹង​ថា​ពលករ​ខ្មែរ​ត្រឡប់​មកពីប្រទេសថៃចូលប្រទេសកម្ពុជាវិញតាមច្រកដូង នៅថ្ងៃទី២៥ កក្កដា​នេះ​មាន​ចំនួន​ច្រើន​ចន្លោះ​ពី​ប្រមាណ​៣ទៅ៤ពាន់នាក់ ដោយបាន​ទទួល​ការ​យក​ចិត្ត​ទុក​ដាក់​ខ្ពស់​ពី​រដ្ឋបាល​ខេត្ត​បាត់ដំបង និងមន្រ្តីជំនាញមកពីក្រសួងការងារ និងបណ្ដុះបណ្ដាលវិជ្ជាជីវៈ ដោយ​មាន​ការ​រៀបចំ​មណ្ឌល​សំចត ផ្ដល់អាហារសម្រន់ និងការប្រឹក្សាផ្សេងៗ។សូមជម្រាបថា ជាមួយនឹងការវិលត្រឡប់របស់ពលករខ្មែរ មន្ត្រីក្រសួងការងារ និង​បណ្តុះ​បណ្តាល​វិជ្ជា​ជីវៈ ​ដែលរួមមានទីភ្នាក់ងារជាតិមុខរបរ និងការងារ (NEA) បេឡាជាតិសន្តិសុខសង្គម (ប.ស.ស.) មន្ទីរការងារ និងបណ្តុះបណ្តាលវិជ្ជាជីវៈ និងមន្ត្រីពាក់ព័ន្ធគ្រប់ផ្នែកដែលប្រចាំការ នៅ​ច្រក​ព្រំដែ​នអន្តរជាតិដូង និងមណ្ឌលសំចតច្រកដូង ក្នុងស្រុកកំរៀង ខេត្តបាត់ដំបង បាន​ផ្ដល់​ព័ត៌​មាន​ស្តីអំពីឱកាសការងារដ៏សម្បូរបែបការអប់រំបណ្តុះបណ្តាល បច្ចេកទេស និងវិជ្ជាជីវៈ និង​អត្ថ​ប្រយោជន៍ ប.ស.ស. ដែលជាការគិតគូររបស់រាជរដ្ឋាភិបាលកម្ពុជាដល់បងប្អូនប្រជាពលរដ្ឋ និង​ពលករខ្មែរ នៅប្រទេសថៃដែលបានវិលត្រឡប់មកស្រុកកំណើតវិញ។ សូមបញ្ជាក់ថា សម្រាប់ច្រកទ្វារព្រំដែនអន្តរជាតិភ្នំដី ស្រុកសំពៅលូន និងច្រក​ទ្វារ​តំបន់​៣​ទៀត​ក្នុង​ភូមិ​សាស្រ្ត​ខេត្តបាត់ដំបង ច្រកទ្វារតំបន់ព្រំដែនអូររំដួល ច្រកទ្វារតំបន់ព្រំដែនអូរអន្លក់ និង​ច្រក​ទ្វារ​តំបន់​ព្រំដែន៤០០ គឺបានបិទទាំងស្រុងនៅថ្ងៃ២៥ ខែកក្កដា ឆ្នាំ២០២៥នេះ៕

ឯកឧត្តម កែវ រតនៈ ចុះជួបប្រជាពលរដ្ឋដែលជម្លៀសចេញពីតំបន់ព្រំដែនកម្ពុជា-ថៃ ឃុំថ្មដា ខេត្តពោធិ៍សាត់

2025/07/25 02:54:44 pm        481
Facebook Telegram Linkin
ពោធិ៍សាត់៖ នៅថ្ងៃទី២៥ ខែកក្កដា ឆ្នាំ២០២៥នេះ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និង​ថាមពល​ និង​ជាប្រធានក្រុមការងាររាជរដ្ឋាភិបាល ចុះជួយមូលដ្ឋានខេត្តពោធិ៍សាត់ និង ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ បានដឹកនាំក្រុមការងារ ចុះជួប​ប្រជា​ពលរដ្ឋ​ចំនួន​ ១១៤គ្រួសារ ដែលបានជម្លៀសចេញពីឃុំថ្មដា ស្រុកវាលវែង ខេត្តពោធិ៍សាត់ ជា​តំបន់​ជាប់​ព្រំដែន​កម្ពុជា-ថៃ ដើម្បីបញ្ចៀស​គ្រោះថ្នាក់​ដែលអា​ច​ផ្ទុះអា​វុធ​ដាក់​គ្នា​បង្ក​ឡើង​ដោយ​ភាគី​ថៃ​មក​កាន់​កន្លែង​សុវត្ថិភាព ទីរួមស្រុកវាលវែង។ឯកឧត្តម កែវ រតន: បានជម្រាបជូនអំពីស្ថានការនៅតាមបន្ទាត់ព្រំដែនកម្ពុជា-ថៃ ពិសេស​ក្នុង​ភូមិ​សាស្ត្រ​ខេត្ត​ឧត្តរមានជ័យ និងខេត្តព្រះវិហារ ដែលផ្តើមបង្កដោយភាគីថៃមុន នៅប្រាសាទ​តាមា​ន់​ធំ​ព្រឹក​ថ្ងៃ​ទី២៤ ខែកក្កដា ឆ្នាំ២០២៥នេះ កម្ពុជាគ្មានជម្រើស​អ្វី​ក្រៅ​ពី​ស្វ័យ​ការពារ​បូរណ​ភាព​ទឹក​ដីរ​ប​ស់យើងប៉ុណ្ណោះ ដែលទាហាថៃបានចូលរំលោភបំពានឥតកេរ្តិ៍ខ្មាស់ ក្នុងដែន​អធិបតេយ្យ​ភាព​កម្ពុជា​កន្លងមក។ ឯកឧត្តម បានឱ្យដឹងថា មកម៉ោងនេះគ្រប់សមរភូមិមុខ ក្នុងភូមិសាស្រ្តខេត្ត​ឧត្តរ​មាន​ជ័យ និងខេត្តព្រះវិហារ ពួកទាហាថៃ បាននិងបន្តផ្លោងគ្រាប់អាវុធធ្ងន់ និងយន្តហោះ​ចម្បាំង​ទម្លាក់​គ្រាប់ ចូលក្នុងវត្តជិតប្រាសាទព្រះវិហារ និងតំបន់ឈរជើង​របស់​កង​ទ័ព​កម្ពុជា​យើង​នៅ​ឡើ​យ។ ទន្ទឹមនេះកងទ័ពដ៏អង់អាចក្លាហានរបស់យើង បានប្តេជ្ញាទប់​ទល់​វាយ​បក​យ៉ាង​ស្វាហាប់ ​ដោយបានវាយកាន់កាប់ឈរជើងបានទាំងស្រុង នូវតំបន់ប្រាសាទតាមាន់ធំ ប្រាសាទ​តា​ក្របី តំបន់មុំបី និងកន្លែងមួយចំនួនទៀត។ ដោយឡែកចំពោះស្ថានភាពតាមខ្សែ បន្ទាត់ព្រំដែន​ក្នុង​ភូមិ​សាស្ត្រខេត្តពោធិ៍សាត់ និងខេត្តត្រាត ប្រទេសថៃ មានសភាពធម្មតា ទោះយ៉ាង​ណា​កង​ទ័ព​កម្ពុជា​ និងកងទ័ពថៃ កំពុងឋិតស្ថានភាពប្រុងជើងការខ្ពស់ដូចគ្នាផងដែរ។ ឯកឧត្តម កែវ រតនៈ សូម​ឱ្យ​ប្រជាពលរដ្ឋកុំមានភាពច្របួកច្របល់ ហើយ​ជឿជាក់​លើ​ការ​ដឹកនាំ​របស់​សម្តេចតេជោ និង​ប្រមុខរាជរដ្ឋាភិបាល។ ប្រមុខរាជរដ្ឋាភិបាល និង អាជ្ញាធរ ខេត្ត ស្រុក បាននិង​កំពុង​យក​ចិត្ត​ទុកដាក់ ចំពោះប្រជាពលរដ្ឋ​ទាំងស្បៀង អាហារ ថ្នាំពេទ្យនិងការរស់នៅ៕

ក្រសួងការបរទេសកម្ពុជា កោះអញ្ជើញអង្គទូតបរទេសប្រចាំកម្ពុជា ពន្យល់ពីស្ថានភាពជម្លោះព្រំដែនកម្ពុជា-ថៃ

2025/07/25 01:31:16 pm        559
Facebook Telegram Linkin
ភ្នំពេញ៖ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការ​អន្តរជាតិ នៅថ្ងៃទី២៥ ខែកក្កដា ឆ្នាំ២០២៥ ​បានកោះអញ្ជើញ​បណ្ដាអង្គទូតបរទេស​ ប្រចាំនៅកម្ពុជា ដើម្បីធ្វើការពន្យល់អំពីស្ថានភាព ​នៃជម្លោះព្រំដែនរវាងកម្ពុជា-ថៃ​ ខណៈបណ្ដាអង្គទូតទាំងអស់នោះ បាន​បង្ហាញនូវក្តីព្រួយបារម្ភ ​ពីការរីករាលដាលនៃជម្លោះ ​និងផលប៉ះពាល់ ។ក្នុងសន្និសីទសារព័ត៌មាន បន្ទាប់ពីកិច្ចប្រជុំនេះ ឯកឧត្តម គង់ ភោគ អ្នកនាំពាក្យក្រសួងការបរទេស និង​សហប្រតិបត្តិការអន្តរជាតិ បានលើកឡើងថា ​នៅចំពោះមុខអង្គទូតទាំង ៥១រូប ឯកឧត្តម ប្រាក់ សុខុន បានពន្យល់ប្រាប់ចំនួន៤ចំណុច ទី១. ការថ្កោលទោសរបស់កម្ពុជា ​អំពីការឈ្លានពានរបស់ថៃ និងហេតុការណ៍កំពុងកើតឡើង, ទី២. ការឆ្លើយតបរបស់កម្ពុជាលើការឈ្លានពានរបស់ថៃ, ទី៣. ដំណោះស្រាយនានារបស់ម្ពុជា លើការងារការទូតជាដើម និងទី៤. ការប្ដេជារបស់កម្ពុជា ប្រើប្រាស់​យន្តការអន្តរជាតិ ដើម្បីដោះស្រាយ ។ឯកឧត្តម បានបន្តថា បន្ទាប់ពីបានស្ដាប់ការពន្យល់ អង្គទូតមួយចំនួន​បាន​សួរនាំបន្ថែម ពី​ស្ថានភាពបច្ចុប្បន្ននៅជួរមុខ ​និងសម្ដែងនូវការ​ព្រួយបារម្ភ ​ជាមួយនោះ ជំហររបស់ពួកគេ​ក៏ដូចជា​កម្ពុជាផងដែរ គឺចង់ឲ្យមានការចរចាដោយសន្តិវិធី ។ឯកឧត្តម គង់ ភោគ ​បានគូសបញ្ជាក់ថា ការឆ្លើយតបជាប្រដាប់វុធចំពោះការឈ្លានពាន គឺធ្វើស្រប​ទៅតាមច្បាប់ ក្នុងន័យការពារខ្លួន ការពារបូរណភាពទឹកដី​ ហើយគោរពទៅតាមផែន ទីដែល​បានកំណត់ ខណៈដែលភាគីថៃ កំពុងរំលោភច្បាប់អន្តរជាតិ​ ប្រើប្រាស់​អាវុធ​ធុនធ្ងន់ និង​បាញ់ប្រហារ​ក្នុងតំបន់ជនស៊ីវិល ​ធ្វើឲ្យមានស្លាប់​ និងរបួស រួមទាំង​មាន​ការ​ជម្លៀសពលរដ្ឋ​ទៅ​កាន់​ទីសុវត្ថិភាពរាប់ពាន់នាក់ ។គួរបញ្ជាក់ថា​ បន្ទាប់ពីមានការផ្ទុះអាវុធរវាងកម្ពុជា ​និងថៃ​ នៅតាមបន្ទាប់ព្រំដែន ក្នុងភូមិសាស្ត្រ​ខេត្តឧត្តរមានជ័យ និងខេត្តព្រះវិហារ ​កាលពីថ្ងៃទី​២៤ ខែកក្កដា ឆ្នាំ ២០២៥ម្សិលមិញ សម្ដេចមហាបវរធិបតី ​ហ៊ុន ម៉ាណែត ​នាយករដ្ឋមន្ត្រី នៃព្រះរាជាណាចក្រកម្ពុជា​ បាន​ដាក់​លិខិត ទៅ​អង្គការសហប្រជាជាតិ (UN) ដើម្បីជួយអន្តរាគមន៍ ​អំពីបញ្ហាជម្លោះប្រដាប់អាវុធនេះ ព្រោះ​កម្ពុជា​ត្រូវការ​សន្តិភាព ​និងចង់ដោះស្រាយតាមយន្តការអន្តរជាតិ ។ បើមិនមានអ្វីប្រែប្រួលទេនោះ នារសៀលថ្ងៃទី២៥​ ខែកក្កដា ម៉ោងនៅសហរដ្ឋអាមេរិក នឹង​មានកិច្ចប្រជុំបន្ទាន់នៃសមាជិកអង្គការ​សហប្រជាតិ ដើម្បីពិភាក្សាជម្លោះព្រំដែនកម្ពុជា-ថៃនេះ ៕ អត្ថបទ សុខរិទ្ធិ

ថ្ងៃទី២នៃដំណើរការឈ្លានពានរបស់ថៃ មកលើកម្ពុជា ទាហានថៃប្រើប្រាស់គ្រាប់បែកចង្កោម វាយប្រហារមកលើកម្ពុជា

2025/07/25 01:07:28 pm        538
Facebook Telegram Linkin
អ្នកនាំពាក្យក្រសួងការពារជាតិកម្ពុជា លោកជំទាវឧត្តមសេនីយ៍ឯក ម៉ាលី សុជាតា បានអះអាងថា ថ្ងៃទី២នៃដំណើរការទាហានឈ្លានពានថៃ មកលើកម្ពុជា ថៃបានបាញ់ប្រហារមកលើកម្ពុជាចំនួន ៧ទីតាំង ដោយប្រើប្រាស់កាំភ្លើងធំ យន្តហោះចម្បាំង និងប្រើប្រាស់គ្រាប់បែកចង្កោមផងដែរ ខណៈការប្រើប្រាស់អាវុធបែបនេះ គឺប្រឆាំងនឹងច្បាប់អន្តរជាតិ និងបង្ហាញអំពីភាពឃោឃៅ និងអមនុស្សធម៌របស់ថៃ។ក្នុងសន្និសីទសារព័ត៌មាន ព្រឹកថ្ងៃទី២៥ ខែកក្កដា ឆ្នាំ២០២៥នេះ ស្តីពីថ្ងៃទី២ នៃដំណើរការទាហាន​ឈ្លាន​ពាន​សៀម​មកលើកម្ពុជា ​លោកជំទាវ ម៉ាលី សុជាតា បានលើកឡើងថា ថ្ងៃនេះថៃ បាន​បើកការ​វាយប្រហារ​មក​លើកម្ពុជា​ទាំង​កម្រោល​ចាប់តាំងពីម៉ោងបីទៀបភ្លឺ ដោយ​ប្រើសុទ្ធតែ​អាវុធធន់ធ្ងន់ ​មានទាំង ការទម្លាក់គ្រាប់បែក តាមរយៈយន្តហោះ F-16 និងគ្រាប់បែកចង្កោមជាដើម។លោកជំទាវអ្នកនាំពាក្យ បានឲ្យដឹងទៀតថា ថ្ងៃទី២៥នេះថៃ បានចាប់ផ្តើមវាយប្រហារមក​លើកម្ពុជា ដំបូងគេនៅតំបន់ភ្នំខ្មោចខេត្តព្រះវិហារ ​តាថាវ និង៣៣៣ និងតំបន់មួយចំនួនទៀត នៅប្រាសាទ​តាមាន់ តំបន់មុំបី និងចង់វាយដណ្តើមកាន់កាប់ប្រាសាទ​តាក្របីវិញ ប៉ុន្តែត្រូវបានទាហានខ្មែរ​បាន​តស៊ូយ៉ាង​ស្វិតស្វាញ​ ដោយ​វាយ​បកទៅវិញ​យ៉ាងស្វាហាបធ្វើឲ្យទាហានថៃបរាជ័យ។ជាមួយគ្នានោះដែរលោកជំទាវ ម៉ាលី សុជាតា ក៏បានលើកឡើង​ផងដែរថា ថៃបានប្រើប្រាស់គ្រាប់​បែក​ចង្កោមវាយមកលើទាហានកម្ពុជានោះ គឺជាការខុសច្បាប់ គឺជាទង្វើឈ្លានពានយ៉ាងឃោឃៅ ដោយ​បានបំពានយ៉ាងធ្ងន់ធ្ងរ​ទៅលើច្បាប់អន្តរជាតិ ​រួមទាំងអនុសញ្ញា​ ស្តីពីគ្រាប់បែក​ចង្កោម។ មួយវិញទៀត ការប្រើប្រាស់នូវអាវុធបែបនេះ មិនត្រឹមតែឃោឃៅ​ និងអមនុស្សធម៌ប៉ុណ្ណោះទេ ថែមទាំងបាន​ឆ្លុះបញ្ចាំង​ឲ្យអន្តរជាតិ​មើលឃើញថា ថៃ​គ្មានខ្លាចក្រែង​ចំពោះច្បាប់មនុស្សធម៌ អន្តរជាតិនោះឡើយ។សូមបញ្ជាក់ថា នៅថ្ងៃទី២៥ ខែកក្កដានេះ ​ជាថ្ងៃទី២ហើយ ដែលទាហានថៃ បានធ្វើការ​ឈ្លាន​ពានមក​លើទឹកដីកម្ពុជា ​ដោយបានបាញ់ប្រហារមកលើទាហានកម្ពុជា ​និងពលរដ្ឋខ្មែរស្លូតត្រង់ ហើយបាន​ធ្វើឲ្យប្រជាជនកម្ពុជា​ស្លាប់ម្នាក់​ និង​រងរបួស​៥នាក់​ និង​បាន​ធ្វើ​ពលរដ្ឋខ្មែរ​ស្លូតត្រង់​ធ្វើការ​ភៀស សឹក​រាប់ពាន់គ្រួសារ​ទៅរកទីកន្លែងសុវត្ថិភាព៕ អត្ថបទ បានចក់

អាជ្ញាធរមីនកម្ពុជា ថ្កោលទោស​ចំពោះ​ទាហាន​ថៃ​ដែល​ប្រើ​ប្រាស់​គ្រាប់​បែក​ចង្កោម​បាញ់​ប្រហារ​មក​លើ​កម្ពុជា

2025/07/25 12:47:16 pm        749
Facebook Telegram Linkin
អាជ្ញាធរកម្ពុជាគ្រប់គ្រងសកម្មភាពកំចាត់មីន និងសង្គ្រោះជនពិការដោយសារមីន(អាជ្ញាធរមីន) បាន​ប្រកាស​ថ្កោលទោសយ៉ាងដាច់អហង្ការចំពោះទាហានឈ្លានពានថៃ ដែលបាន​ប្រើ​ប្រាស់​គ្រាប់​បែក​ចង្កោម​បាញ់មកលើកម្ពុជា ខណៈគ្រាប់បែក​ចង្កោម​នេះ​ជាអាវុធ​មួយ​ត្រូវ​បាន​ហាម​ប្រាម​ដោយ​អន្តរជាតិ​នោះ។​យោងតាមសេចក្តីថ្លែងការណ៍របស់អាជ្ញាធរមីន ដែលបានចេញនៅព្រឹកថ្ងៃទី២៥ ខែកក្កដា ឆ្នាំ ២០២៥នេះ បានបង្ហាញការព្រួយបារម្ភ និងថ្កោលទោសយ៉ាងខ្លាំងបំផុត បន្ទាប់​ពី​ទទួល​បាន​របាយ​ការណ៍​ថា កងកម្លាំង ប្រដាប់អាវុធថៃបានប្រើប្រាស់គ្រាប់បែកចង្កោមនៅថ្ងៃនេះ គឺថ្ងៃទី២៥ ខែ​កក្កដា ឆ្នាំ២០២៥ នៅតំបន់ព្រំដែនក្នុងទឹកដីកម្ពុជា។សេចក្តីថ្លែងការណ៍របស់អាជ្ញាធរមីន បានលើកឡើងទៀតថា តាម​ព័ត៌មាន​បឋម​ដែល​ទទួ​ល​បាន​ពី​អាជ្ញាធរ​មូល​ដ្ឋាន និងក្រុមបច្ចេកទេសបោសសម្អាតមីន បានបញ្ជាក់ច្បាស់ថា មានគ្រាប់ជាច្រើន ដែល​មាន​លក្ខណៈដូចទៅនឹងគ្រាប់បែកចង្កោមដែលហាមប្រាម ដោយអន្តរជាតិ ត្រូវ​បាន​ប្រើ​ប្រាស់​ទៅ​លើ​ទីតាំង​ភ្នំខ្មោច និងទីតាំងភូមិធម្មជាតិ ស្រុកជាំក្សាន្ត ដែល​បង្ក​ការ​គំរាម​កំហែង​ចំពោះ​ប្រ​ជាជន ប្រតិបត្តិករបោសសម្អាតមីន និងសហគមន៍ក្នុងតំបន់ព្រំដែន។អាជ្ញាធរមីនកម្ពុជា បានហៅការប្រើប្រាស់គ្រាប់បែកចង្កោមពីសំណាក់ទាហានឈ្លានពានថៃមក លើ​កម្ពុជា​នេះ គឺជាទង្វើបំពានយ៉ាងធ្ងន់ធ្ងរចំពោះច្បាប់អន្តរជាតិ។ គ្រាប់បែកចង្កោមត្រូវ បាន​ហាម​ប្រាម​ នៅក្រោមអនុសញ្ញាស្តីពីគ្រាប់បែកចង្កោមឆ្នាំ២០០៨ ដោសារតែគ្រាប់នេះ បង្ក​ផល​ប៉ះ​ពាល់​ទៅ​លើ​ផ្ទៃដី​ធំ និងបង្កគ្រោះថ្នាក់ចំពោះប្រជាជន ជាពិសេសក្មេងតូច។ កម្ពុជាបាន​យល់​ច្បាស់​អំពី​ផល​ប៉ះពាល់ ដ៏អាក្រក់របស់គ្រាប់ចង្កោម ដោយកម្ពុជាធ្លាប់ទទួលរងគ្រោះធ្ងន់ធ្ងរ ដោយ​សារ​គ្រាប់​ប្រភេទ​នេះ ​ដែលបានទម្លាក់ជាច្រើនលានគ្រាប់នៅក្នុងសម័យសង្គ្រាម។ គ្រាប់​បែក​ចង្កោម​ទាំង​នេះ ​បានបង្កគ្រោះថ្នាក់ដល់អាយុជីវិតប្រជាជនរារាំងការអភិវឌ្ឍ និង​បង្ក​ភាព​ភ័យ​ខ្លាច​ដល់​សហគម​ន៍​ជា​ច្រើនជំនាន់ទៅមុខទៀតផងដែរ។អាជ្ញាធរមីនបានគូសបញ្ជាក់បន្ថែមទៀតថា ការប្រើប្រាស់​គ្រាប់​បែក​ចង្កោម​ជា​ពិសេស​នៅ​ក្នុង​តំបន់​ព្រំដែន​ដែល​មាន​ប្រជាជន​រស់​នៅ​កក​កុញ​នេះ​«​គឺ​ជា​ទង្វើ​បំពាន​ដែល​មិន​អាច​ទទួល​យក​បាន​ឡើយ ​ព្រោះវាជាការមិនគោរពដល់អាយុជីវិតមនុស្ស គោលការណ៍មនុស្សធម៌ និង​សន្តិភាព​ក្នុង​តំបន់​ជា​ដើម​»។កម្ពុជាបានខិតខំប្រឹងប្រែងយ៉ាងខ្លាំង ក្នុងការបោសសម្អាតរាល់សំណល់ជាតិផ្ទុះពីសង្គ្រាម ក៏​ប៉ុន្តែ​ការ​ប្រើ​ប្រាស់​គ្រា​ប់បែកចង្កោមនៅថ្ងៃនេះ ពិតជាបានគំរាមកំហែងដល់អាយុជីវិត និង​កិច្ច​សហ​ប្រតិបត្តិការ និងទំនុកចិត្ត ដែលបានសាងមកអស់ រយៈពេលជាច្រើនទសវត្សរ៍មកហើយ។ យ៉ាង​ណាក៏​ដោយតាមរយៈសេចក្តីថ្លែងការណ៍នេះអាជ្ញាធរមីន ក៏បានរំលឹកដល់គ្រប់ភាគីផងដែរថា វឌ្ឍន​ភាពសកម្មភាពមីន និងសន្តិភាពក្នុងតំបន់ អាចសម្រេចបានតាមរយៈកិច្ចសន្ទនា ការ​គោរព​គ្នា​ទៅ​វិញ​ទៅ​មក និងការបដិសេធដាច់ខាតចំពោះ អំពើហឹង្សា និងការប្រើប្រាស់​កម្លាំង​យោធា​។ អាជ្ញាធរមីន សូមបញ្ជាក់ជាថ្មីនូវការប្ដេជ្ញាចិត្តរបស់ខ្លួនចំពោះតម្លាភាព និងគណនេយ្យភាព និង​ស្នើ​អញ្ជើញ​ដល់​សហគមន៍អន្តរជាតិ រួមទាំអង្គការសហប្រជាជាតិ អាស៊ាន និងគ្រប់ស្ថាប័ន​ពាក់​ព័ន្ធ​ទៅ​នឹង​ការរំសាយអាវុធមនុស្សធម៌ ចូលរួមតាមដានស្ថានការណ៍។ អាជ្ញាធរមីន «​ថៃ​ត្រូវ​តែ​បញ្ឈប់​រាល់​សកម្មភាព​នេះ​ជាបន្ទាន់ និងត្រូវរក្សានូវគោលការណ៍​ច្បាប់​មនុស្ស​ធម៌​អន្តរជាតិ​តាមរយៈ​កិច្ច​សន្ទនាដោយសន្តិវិធី»៕ អត្ថបទ៖ បាន ចក់ 

បណ្ដាញសង្គម

ព័ត៌មានថ្មីៗ

ពលរដ្ឋអ៊ីរ៉ង់និយាយថា ទីក្រុងតេអេរ៉ងមិនត្រូវនៅអសកម្មនោះទេ ស្របពេលភាពតានតឹងអាមេរិក-អ៊ីរ៉ង់កើនឡើង
06/10/2026 05:06 PM
Facebook Telegram Linkin
អាជ្ញាធរ និងកងកម្លាំងរាជធានីភ្នំពេញបន្តចុះត្រួតពិនិត្យទីតាំងប្រមូលផ្ដុំ ៩០ទីតាំងបន្ថែមទៀត ដើម្បីលុបបំបាត់បទល្មើសនានា ពិសេសបទល្មើសការឆបោកតាមប្រព័ន្ធ បច្ចេកវិទ្យា
06/10/2026 05:06 PM
Facebook Telegram Linkin
ស្ថាប័ន​តាម​ដាន​ EU៖ ពិភពលោកមាននូវ​ខែឧសភាក្តៅបំផុតទី២ ខណៈអឺរ៉ុបប្រឈមស្ថានភាពធម្មតាថ្មី​
06/10/2026 05:06 PM
Facebook Telegram Linkin
គណៈកម្មាធិការជាតិគ្រោងរៀបចំប្រព័ន្ធគ្រប់គ្រងសំរាមទំនើប ដោយផ្អែកលើប្រសិទ្ធភាពសេដ្ឋកិច្ច នៅក្នុងខេត្តព្រះសីហនុ និងកោះកុង
06/10/2026 05:06 PM
Facebook Telegram Linkin
គុយបាត្រៀមដឹកជញ្ជូនប្រេងឥន្ធនៈដ៏ធំបំផុតពី​សហរដ្ឋអាមេរិក ចាប់តាំងពី​មាន​ទណ្ឌកម្ម​សង្គ្រាមត្រជាក់
06/10/2026 05:06 PM
Facebook Telegram Linkin
ពីថ្នាក់រៀនទៅ​កសិដ្ឋាន​ឆ្លាតវៃ ! សិស្ស NTTI បង្កើត​បាន​ប្រព័ន្ធ Solar Greenhouse គ្រប់គ្រ​ងដំ​ណាំ​ដោយ​ស្វ័យប្រវត្តិ
06/10/2026 05:06 PM
Facebook Telegram Linkin
នាយករដ្ឋមន្ត្រីនិយាយថា «អូស្ត្រាលីមានការព្រួយបារម្ភយ៉ាងខ្លាំង» អំពីស្ថានភាពនៅមជ្ឈិមបូព៌ា
06/10/2026 04:06 PM
Facebook Telegram Linkin
មនុស្ស ១២នាក់ស្លាប់ និង ៩នាក់រងរបួស ក្នុងហេតុការណ៍បាញ់ប្រហារនៅទីក្រុង Johannesburg អាហ្វ្រិកខាងត្បូង
06/10/2026 04:06 PM
Facebook Telegram Linkin
គ្រូ និងសិស្ស អំពាវនាវសាធារណជនចូលរួមកម្មវីធី TVET Day ដើម្បីស្វែងយល់សារៈសំខាន់វិស័យបណ្តុះបណ្តាលជំនាញ
06/10/2026 04:06 PM
Facebook Telegram Linkin
ម៉ារ៉ុកចាប់ខ្លួនមនុស្ស ១១ នាក់ពីបទជួញដូរគ្រឿងញៀននៅអឺរ៉ុប
06/10/2026 04:06 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.