BTV NEWS

រដ្ឋបាលខណ្ឌប្ញស្សីកែវបង្ក្រាបឃ្លាំងស្តុកសាច់បង្កករាប់សិបតោនដែលនាំចូលមកពីប្រទេសថៃ

សល់៤ថ្ងៃទៀតប្រតិភូពិភពលោក ត្រៀមជួបជុំនៅខេត្តសៀមរាប ក្នុងមហាសន្និបាតកាយឫទ្ធិនារីពិភពលោក(WAGGGS) លើកទី៣៩

ក្រុមភ្លេងកាយរឹទ្ធិខេត្តប៉ៃលិនត្រៀមប្រកួតក្រុមភ្លេងកាយរឹទិ្ធថ្នាក់ជាតិ លើកទី៣

អ្នកវិនិយោគទុនចិននៅជុំវិញពិភពលោកនាំគ្នាមកបើកប្រជុំត្រៀមរៀបចំមហាសន្និបាតធុរកិច្ចនៅកម្ពុជាចុងឆ្នាំនេះ

ព័ត៌មានជាតិ

ថៃបាននឹងកំពុងប្រព្រឹត្តឧក្រិដ្ឋកម្មធ្ងន់ធ្ងរប្រឆាំងនឹងបេតិកភណ្ឌពិភពលោក និងរំលោភបំពានច្បាប់អន្តរជាតិ

ថៃបាននិងកំពុងប្រព្រឹត្តឧក្រិដ្ឋកម្មធ្ងន់ធ្ងរប្រឆាំងនឹងបេតិកភណ្ឌពិភពលោក និងការរំលោភបំពានច្បាប់អន្តរជាតិដោយការបាញ់គ្រាប់ផ្លោង និងការទំលាក់គ្រាប់បែកពីលើយន្តហោះប៉ះពាល់ដល់ប្រាង្គប្រាសាទព្រះវិហារដែលជាបេតិកភណ្ឌពិភពលោក, កងទ័ពឈ្លានពានថៃបានប្រើប្រាស់យន្តហោះទម្លាក់គ្រាប់បែកបំផ្លាញវត្តអារាម និងមណ្ឌលសុខភាពដែលជាកន្លែងប្រារព្ធជំនឿសាសនានិងព្យាបាលពលរដ្ឋ។ យោងតាមមន្ត្រីអាជ្ញាធរមូលដ្ឋាន នៅវេលាម៉ោង៥.៣០នាទីរសៀលមានយន្ដហោះថៃ F16 មួយគ្រឿង បានមកទម្លាក់គ្រាប់មកលើវត្តតាមាន់សែនជ័យ និងមណ្ឌលសុខភាពតាសែនជ័យ ស្ថិតនៅភូមិតាសែនជ័យ ឃុំគោកមន ស្រុកបន្ទាយអំពិលខេត្តឧត្ដរមានជ័យ បង្កឱ្យមានការខូចខាត។ នេះជាការរំលោភពបំពានច្បាប់អន្តរជាតិយ៉ាងធ្ងន់ធ្ងររបស់ថៃ។ កងទ័ពថៃ ដែលនៅព្រឹកថ្ងៃទី២៤ ខែកក្កដា ឆ្នាំ២០២៥ នេះ បានបើកការវាយប្រហារមកលើកងទ័ពកម្ពុជានៅប្រាសាទតាមាន់ធំ និងនៅទីតាំង ៥ កន្លែងផ្សេងទៀតដែលបង្ហាញពីការឈ្លានពានបូរណភាពទឹកដី នៃព្រះរាជាណាចក្រកម្ពុជា៕

សម្តេចកិត្តិសង្គហបណ្ឌិត ម៉ែន សំអន អញ្ជើញគោរពបូជា និងបួងសួងឱ្យបារមីលោកឧកញ៉ា ឃ្លាំង មឿង តាមជួយបីបាច់ថែរក្សាប្រជាពលរដ្ឋទូទាំងប្រទេស ឱ្យទទួលបានសេចក្តីសុខ សេចក្តីចម្រើន ពិសេសក្នុងបេសកកម្មការពារបូរណភាពទឹហកដីពីសត្រូវឈ្លានពាន

សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ និងជាប្រធានក្រុមប្រឹក្សាជាតិរណសិរ្សសាមគ្គី អភិវឌ្ឍន៍មាតុភូមិកម្ពុជា ដោយបានការចូលរួមពី លោក ខូយ រីដា អភិបាលខេត្តពោធិ៍សាត់ ព្រមទាំងថ្នាក់ដឹកនាំមួយចំនួនទៀត នាល្ងាចថ្ងៃទី២៤ ខែកក្កដា ឆ្នាំ២០២៥នេះ បានចូលមកគោរពបូជា និងសូមបួងសួងឱ្យបារមីលោកឧកញ៉ា ឃ្លាំង មឿង និងជំទាវ ខាន់ ខៀវ តាមជួយបីបាច់ថែរក្សាថ្នាក់ដឹកនាំគ្រប់ជាន់ថ្នាក់ មន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋទូទាំងប្រទេស ឱ្យទទួលបានសេចក្តីសុខ សេចក្តីចម្រើន ពិសេសក្នុងបេសកកម្មការពារបូរណភាពទឹកដី ពីសត្រូវឈ្លានពាន។បើតាមឯកសារប្រវត្តិសាស្រ្ត នៅក្នុងសៀវភៅមហាវីរៈបុរសខ្មែរ លោកឧកញ៉ា ឃ្លាំង មឿង និងជំទាវ ខាន់ ខៀវ ចាត់ទុកជាវរៈជនស្នេហាជាតិខ្លាំងពូកែ ក្នុងការធ្វើសឹកសង្គ្រាម ជាមួយទ័ពសៀម ការពារទឹកដីប្រទេសកម្ពុជា។ រូបរាងកាយលោកឧកញ៉ា និងលោកជំទាវ បានលាចាកលោកទៅក៏ពិតមែន ប៉ុន្តែភាពល្បីល្បាញ និងភាពស័ក្តិសិទ្ធិ បានដក់ជាប់នៅក្នុងអារម្មណ៍របស់ប្រជាពលរដ្ឋទូទាំងខេត្ត ក៏ដូចជាទូទាំងប្រទេស និងបាននាំគ្នាមកគោរពបូជា ជារៀងរាល់ឆ្នាំ មិនដែលអាក់ខានឡើយ។ ដោយសារបារមីនេះហើយ ទើបថ្នាក់ដឹកនាំខេត្ត ព្រមទាំងប្រជាពលរដ្ឋក្នុងខេត្តពោធិ៍សាត់ បានបួងសួងសុំឱ្យឆ្នាំនេះ មានទឹកភ្លៀងគ្រប់គ្រាន់ សម្រាប់ការងារដាំដុះ គ្មានគ្រោះមហន្តរាយទឹកជំនន់។ ម្យ៉ាងវិញទៀតសូមបារមី លោកឧកញ៉ា និងជំទាវ និងបារមីរក្សាការពារ ក្នុងទឹកដីនៃខេត្តពោធិ៍សាត់ សូមតាមជួយថែរក្សាសម្តេចតេជោ ហ៊ុន សែន ប្រធានព្រឹទ្ធសភា និងសម្ដេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ព្រមទាំងថ្នាក់ដឹកនាំផ្សេងៗទៀត សូមទទួលបានជោគជ័យតទៅមុខជានិច្ចនិរន្តន៍ ជាពិសេសសូមឱ្យខេត្តពោធិ៍សាត់ មានការអភិវឌ្ឍន៍ទៅមុខជាលំដាប់។ ក្នុងនាមជាប្រធានក្រុមប្រឹក្សាជាតិរណសិរ្សសាមគ្គី អភិវឌ្ឍន៍មាតុភូមិកម្ពុជា និងមន្រ្តីក្រោមឱវាទ សូមផ្ដល់កម្លាំងចិត្ត ដល់វីរកងទ័ពកម្ពុជានៅជួរមុខ ក្នុងបេសកកម្មការពារជាតិ និងសូមបួងសួងដល់គុណបុណ្យបារមីវត្ថុស័ក្តិសិទ្ធិក្នុងលោក មេត្តាប្រោសព្រំពរជ័យដល់វីរកងទ័ពដ៏អង់អាចរបស់យើង ដែលកំពុងឈរជើងការពារទឹកដីពីខ្មាំងសត្រូវ។ យើងខ្ញុំពីសមរភូមិក្រោយ សូមផ្តល់នូវកម្លាំងចិត្ត ជំនឿជាក់ និងការគាំទ្រយ៉ាងពេញទំហឹងដល់វីរកងទ័ពដ៏អង់អាចរបស់យើង ដែលកំពុងឈរជើងការពារទឹកដី។សូមជម្រាបថា ការផ្ទុះអាវុធរវាងកម្ពុជា-ថៃ បានកើតឡើងនៅព្រឹកថ្ងៃទី២៤ ខែកក្កដា ឆ្នាំ២០២៥នេះ នៅចំណុចប្រាសាទតាមាន់ធំ ខេត្តឧត្តរមានជ័យ ដោយបានរាលដាលទៅកាន់តំបន់សមរភូមិផ្សេងទៀត នៅតាមបណ្តោយព្រំដែនកម្ពុជា-ថៃ។ ការប្រយុទ្ធគ្នានេះ បានកើតឡើងបន្ទាប់ពីភាគីថៃ បានផ្ទុះអាវុធមុន នៅចំណុចប្រាសាទតាមាន់ធំ៕

កម្ពុជាគាំទ្រគំនិតផ្តួចផ្តើមរៀបចំចុះ MoU ជាមួយបង់ក្លាដែស លើកិច្ចសហប្រតិបត្តិការវិស័យការងារនិងបណ្តុះបណ្តាលវិជ្ជាជីវៈ

ភ្នំពេញ៖ ឯកឧត្ដម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានទទួលជួបសម្តែងការគួរសម និងពិភាក្សាការងារជាមួយ ឯកឧត្ដម Faiyaz Murshid Kazi ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋប្រជាមានិតបង់ក្លាដែសប្រចាំនៅកម្ពុជា ដែលមាននិវេសនដ្ឋាននៅទីក្រុងបាងកក នារសៀលថ្ងៃទី២៤ ខែកក្កដា ឆ្នាំ២០២៥ នៅទីស្តីការក្រសួង។នៅក្នុងកិច្ចជំនួបនោះ ឯកឧត្ដមរដ្ឋមន្ត្រី បានសម្តែងក្តីរីករាយពេញចិត្តចំពោះទំនាក់ទំនងល្អ រវាងសាធារណរដ្ឋប្រជាមានិតបង់ក្លាដែស ជាមួយប្រទេសកម្ពុជា និងបានគាំទ្រចំពោះគំនិតផ្តួចផ្តើមក្នុងការរៀបចំអនុស្សរណៈនៃការយោគយល់គ្នា (MoU) ស្តីពី កិច្ចសហប្រតិបត្តិការលើវិស័យការងារ និងបណ្តុះបណ្តាលវិជ្ជាជីវៈរវាងប្រទេសទាំងពីរ។ឯកឧត្ដមរដ្ឋមន្ត្រី បានបញ្ជាក់ថា កិច្ចសហប្រតិបត្តិការលើវិស័យការងារ និងបណ្តុះបណ្តាលវិជ្ជាជីវៈ ពិតជាល្អ ព្រោះនឹងជួយសម្រួលដល់ការប្រតិបត្តិ និងបង្កើនប្រសិទ្ធភាពក្នុងវិស័យការងារ និងបណ្តុះបណ្តាលវិជ្ជាជីវៈ រវាងព្រះរាជាណាចក្រកម្ពុជា និងសាធាណរដ្ឋប្រជាមានិតបង់ក្លាដែស។ជាមួយគ្នានោះ ភាគីបង់ក្លាដែស បានថ្លែងអំណរគុណ និងសម្តែងការពេញចិត្តចំពោះជំនួបពិភាក្សាការងារជាមួយ ឯកឧត្ដម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ និងបានបង្ហាញការប្តេជា្ញចិត្តក្នុងកិច្ចសហប្រតិបត្តិការលើវិស័យពាក់ព័ន្ធដើម្បីជាផលប្រយោជន៍សម្រាប់ប្រទេសទាំងពីរ៕

អតីតពលករខ្មែរជាច្រើននាក់ បានកំពុងហ្វឹកហាត់ការងារមុនចូលបំពេញការងារពេញលេញនៅរោងចក្រ សហគ្រាស

ភ្នំពេញ៖ គិតត្រឹមដើមខែកក្កដា ឆ្នាំ២០២៥នេះ ក្រោមការសម្របសម្រួលរបស់រាជរដ្ឋាភិបាល ប្រជាពលរដ្ឋ ជាពិសេសពលករខ្មែរត្រឡប់មកពីប្រទេសថៃចំនួនប្រមាណ ១ម៉ឺន ៣ពាន់នាក់ហើយ ទទួលបានឱកាសការងារតាមរោងចក្រ សហគ្រាសនៅប្រទេសកម្ពុជា។ ជាក់ស្តែង ពលករខ្មែរមួយចំនួនបានកំពុងតេស្តសមត្ថភាព និងមួយចំនួនផ្សេងទៀត បានកំពុងហ្វឹកហាត់ការងារ មុនអនុញ្ញាតឱ្យចូលបំពេញការងារទៅតាមផ្នែក និងជំនាញរៀងៗខ្លួន។ លោក ថុន ដាណេ តំណាងផ្នែកធនធានមនុស្សនៅក្នុងរោងចក្រផលិតខ្សែភ្លើង គ្រឿងបង្គុំអេឡិចត្រូនិចសំរាប់រថយន្ត ស៊ូមិ ខេមបូឌា ស្ថិតនៅតំបន់សេដ្ឋកិច្ចពិសេសខណ្ឌកំបូល រាជធានីភ្នំពេញ បានឱ្យព័ត៌មាន ប៊ីធីវី ដឹងថា គិតមកដល់ពេលនេះ រោងចក្របានដំណើរការរយៈពេល ១៣ឆ្នាំ ដែលផលិតនាំចេញទៅប្រទេសជប៉ុន និងមានកម្មករនិយោជិត និងបុគ្គលិកសរុបប្រមាណ ៥ពាន់នាក់ ក្នុងនោះស្រ្តីប្រមាណ៩០%។ លោកបានបន្តថា សព្វថ្ងៃនេះ រោងចក្រនៅតែត្រូវការកម្លាំងពលកម្មបន្ថែមទៀតខ្ទង់រាប់រយនាក់បន្ថែម ដោយសារស្របទៅតាមផែនការផលិត និងឆ្លើយតបតម្រូវកើនឡើងរបស់អ្នកបញ្ជាទិញ។ លោកបានបញ្ជាក់ថា ចំពោះលក្ខខណ្ឌការងារនៅរោងចក្រនេះ គឺផ្តល់អាទិភាពដល់ពលករខ្មែរមកពីថៃ ទាំងអ្នកមានបទពិសោធន៍ ឬគ្មានបទពិសោធន៍ក៏ត្រូវការ ដោយសារមុនចូលបំពេញការងារ ខាងរោងចក្រមានការបណ្តុះបណ្តាល និងហ្វឹកហាត់ការងារជាមុន។ ជាក់ស្តែងកំឡុងពេលនេះ កម្មករ កម្មការិនីជាច្រើននាក់ បានកំពុងទទួលការបណ្តុះបណ្តាលយ៉ាងយកចិត្តទុកដាក់ ក្រោយជាប់សម្ភាស៍ការងារ។ លោកបន្ថែមទៀតថា នៅទីនេះ ក្រៅពីប្រាក់ឈ្នួល ខាងរោងចក្រក៏មានផ្តល់ជូនបន្ថែមនូវអត្ថប្រយោជន៍ផ្សេងៗជាច្រើនទៀតដល់កម្មករនិយោជិត ដូចជា ថ្លៃអាហារ និងការស្នាក់នៅជាដើមដោយមិនគិតថ្លៃ។ ក្រុមអតីតពលករខ្មែរដែលត្រឡប់មកពីថៃ និងជាប់ការងារនៅរោងចក្រខាងលើនេះ បានសម្តែងការអរគុណ និងដឹងគុណរាជរដ្ឋាភិបាលកម្ពុជា ដែលបានជួយស្វែងរកឱកាសការងារថ្មីជូនដល់ពួកគាត់ និងពលករផ្សេងៗទៀត ព្រោះពួកគាត់មិននឹកស្មានទេថា នៅកម្ពុជាមានការងារជាច្រើនកន្លែងដែលកំពុងខ្វះខាតកម្លាំងពលកម្ម ទាំងមានការងារល្អៗ ប្រាក់ឈ្នួលសមរម្យ ជាពិសេសមិនចាំបាច់ធ្វើការងារចំណាកស្រុក ដូចមុន និងរស់នៅឆ្ងាយពីសាច់ញាតិ និងកូនចៅ។ឯកឧត្តម ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ឱ្យដឹងថា គិតត្រឹមដើមខែកក្កដា ឆ្នាំ២០២៥ ពលករខ្មែរមកពីប្រទេសថៃ ចំនួនប្រមាណ ១ម៉ឺន ៣ពាន់នាក់ ទទួលបានឱកាសការងារដែលធ្វើការនៅក្នុងរោងចក្រ សហគ្រាសនៅកម្ពុជា។ ហើយតំបន់ដែលស្រូបកម្លាំងពលកម្មច្រើនជាងគេ មានដូចជា រាជធានីភ្នំពេញ កំពង់ស្ពឺ ស្វាយរៀង និងតំបន់សេដ្ឋកិច្ចពិសេសនានា ដូចជាតំបន់សេដ្ឋកិច្ចពិសេសក្នុងខេត្តកោះកុងជាដើម និងតាមបណ្តារោងចក្រ សហគ្រាសផ្សេងៗទៀត។ឯកឧត្តម បានឱ្យដឹងទៀតថា វិស័យឧស្សាហកម្ម នៅតែជាវិស័យដឹកមុខនៅក្នុងការស្រូបទាញកម្លាំងពលកម្មរបស់ពលករ ក៏ដូចជាប្រជាពលរដ្ឋ។ កម្ពុជា នៅតែមានឱកាសការងារប្រមាណ ២៥ម៉ឺនកន្លែងថែមទៀត ពីព្រោះដោយសារមានការបោះទុនវិនិយោគថ្មីៗ ហើយក្រុមហ៊ុនកើតឡើងជាបន្តបន្ទាប់ ដូច្នេះពេលដែលរោងចក្រសាងសង់ហើយ តំរូវការកម្លាំងពលកម្មនៅបន្តមានដដែល។ គិតក្នុងរយៈពេល ២២ខែ ចាប់ពីខែសីហា ឆ្នាំ២០២៣ រហូតត្រឹមបំណាច់ខែមិថុនា ឆ្នាំ២០២៥ ក្រោមការដឹកនាំរបស់រាជរដ្ឋាភិបាលអាណត្តិទី៧ នៃរដ្ឋសភា សហគ្រាស គ្រឹះស្ថាននៅកម្ពុជា បានកើនឡើងចំនួន ៥ ៣៥៦សហគ្រាស។ ក្នុងនោះ វិស័យកាត់ដេរ មានចំនួន ១ ៦៨២សហគ្រាស និងវិស័យក្រៅពីការដេរ មានចំនួន ៤៣ ៩៧៤សហគ្រាស៕អត្ថបទ៖ ឈិត បូរ៉ាវី

សិប្បកម្មក្នុងស្រុកកំពុងមានភាពមមាញឹក ក្នុងដំណើរការផលិត និងវេចខ្ចប់ផលិតផលរុញចូលទីផ្សារ

ភ្នំពេញ ៖ សិប្បករខ្មែរជាច្រើនរូប បង្ហាញនូវការសប្បាយចិត្តយ៉ាងខ្លាំង ខណៈដែលសិប្បកម្មរបស់ពួកគាត់មានភាពមមាញឹកជាងមុន នៅក្នុង ដំណើរការផលិត និងវេចខ្ចប់ផលិតផល បច្ចុប្បន្នបាននិងកំពុងឆ្លើយតបទៅនិងតម្រូវការទីផ្សារជំនួសការនាំចូល និងបានកំពុងជំរុញដល់ ការនាំចេញផងដែរ។សិប្បករដែលជាម្ចាស់សិប្បកម្មកែច្នៃ វេចខ្ចប់ចំណីអាហារ និងកែច្នៃផលិតផលផ្សេងៗនៅក្នុងស្រុក ថ្លែងលើកឡើងក្នុងកិច្ច សម្ភាសន៍ជាមួយ BTV ស្តីពីកិច្ចដំណើរការខ្សែច្រវាក់ផលិតកម្ម និងការផ្គត់ផ្គង់ទីផ្សារ នេះថា ជុំវិញការអភិវឌ្ឍសហគ្រាសធុនតូច និងមធ្យម និងសិប្បកម្មនេះ រាជរដ្ឋាភិបាលបានយកចិត្តទុកដាក់យ៉ាងខ្លាំង តាមរយៈការលើកកម្ពស់សហគ្រាសធុនតូច និងមធ្យម និង សេដ្ឋកិច្ចក្រៅប្រព័ន្ធជាដើម រួមផ្សំនិងការយកចិត្តទុករបស់សិប្បករ តាមរយៈកិច្ចដំណើរការផលិត និងវេចខ្ចប់ ជាផលិតផលដែលមាន អនាម័យ និងគុណភាព និងការចូលរួមក្នុងព្រឹត្តិការណ៍ពិព័រណ៍ផ្សេងៗ បានធ្វើឱ្យសាធារណជនចាប់អារម្មណ៍ និងគាំទ្រផលិតផល ខ្មែរជាបន្តបន្ទាប់។ សិប្បករទាំងនោះ ថ្លែងឱ្យដឹងថា ចាប់ពីដើមឆ្នាំ២០២៥ រហូតមកដល់ពេលនេះ ឃើញថា ការលក់ដូរផលិតផលរបស់ពួកគាត់ នៅលើទីផ្សារ មានសម្ទុះកើនឡើងជាងមុន ដោយបានកំពុងគាំទ្រដល់ខ្សែច្រវាក់ផលិតកម្ម នៅក្នុងកិច្ចដំណើរការផលិត និងវេចខ្ចប់រុញ ចូលទីផ្សារ ក្នុងនោះផលិតផលពួកគាត់មួយចំនួន ក៏បានហូរចេញទៅក្រៅប្រទេសជាបន្តបន្ទាប់ផងដែរ ។ តាមរយៈនៃសម្ទុះការលក់ ដូរនេះ ពួកគាត់បានបង្ហាញនូវមោទកភាពយ៉ាងខ្លាំង និងរំពឹងថា តាមរយៈនៃការរីកចម្រើនរបស់សហគ្រាស និងសិប្បកម្មក្នុងស្រុក, កម្ពុជាបាននិងកំពុងកាត់បន្ថយការនំាចូលទំនិញពីបរទេស ដែលជាការគាំទ្រដល់សហគ្រាស និងសិប្បកម្មក្នុងស្រុក និងកសិករដែល ជាអ្នកផ្គត់ផ្គង់ ត្ថុធាតុដើមសម្រាប់កែច្នៃផងដែរ។លោកជំទាវ ខៀវ ខេមរី នាយិកាប្រតិបត្តិសមាគមអភិវឌ្ឍន៍សង្គមខ្មែរ ថ្លែងថា ជុំវិញការលក់ដូររបស់សហគ្រិនក្នុងស្រុកនេះ ស្របពេលប្រជាពលរដ្ឋខ្មែរ ងាកមកគាំទ្រផលិតផលខ្មែរ, សូមឱ្យសហគ្រិនពង្រឹងការយកចិត្តទុកដាក់បន្ថែមទៀត លើបញ្ហាគុណភាព និងសោភណ្ឌភាពនៃការវេចខ្ចប់ និងស្តង់ដារផលិតផលជាដើម ក្នុងនោះលោកជំទាវ ក៏បានអំពាវដល់បងប្អូនប្រជាពលរដ្ឋបន្ថែម សូម ជួយគាំទ្រផលិតផលខ្មែរបន្ថែមទៀតផងដែរ ព្រោះការចូលរបស់អស់លោកអ្នក មិនត្រឹមតែជួយលើកកម្ពស់ផលិតផលខ្មែរប៉ុណ្ណោះទេ គឺជួយដល់កសិករដែលជាអ្នកដាំដុះនៅតាមមូលដ្ឋាន និងសហគមន៍នានា, ការបង្កើតការងារ, និងការបង្កើតនូវតម្លៃបន្ថែមជាដើម។សូមបញ្ជាក់ថា ជុំវិញផលិតផលខ្មែរនេះ នៅក្នុងកម្មវិធីគោលនយោបាយរបស់រាជរដ្ឋាភិបាលនីតិកាលទី៧ នៃរដ្ឋសភា បានដាក់ចេញ នូវយុទ្ធសាស្រ្តជំរុញការប្រើប្រាស់ផលិតផលខ្មែរនៅទីផ្សារក្នុងស្រុក និងទីផ្សារអន្តរជាតិ តាមរយៈការរៀបចំពិព័រណ៍ក្នុងស្រុក និងអន្តរ ជាតិនានា ព្រមទាំងជួយដល់វិស័យឯកជន ក្នុងការបង្កើតសភាពាណិជ្ជកម្មនៅតាមបណ្តារាជធានី-ខេត្ត និងបណ្តាសភាពាណិជ្ជកម្ម នៅក្រៅប្រទេសដូច ការបង្កើតសមាគមតាមមុខរបរ និងផលិតផល ដើម្បីចូលរួមចំណែកខ្សែច្រវាក់ផ្គត់ផ្គង់ និងចាប់យកឱកាស ពាណិជ្ជកម្មជាដើម៕អត្ថបទ៖ សុន រ៉ាឌី

រដ្ឋមន្ត្រីសុខាភិបាល «យើងទាំងអស់គ្នា ជាក្រុមគ្រូពេទ្យ គឺជាកងទ័ពស្ងប់ស្ងាត់ឈរជើងត្រៀមជានិច្ច នៅជាមួយកងទ័ពយើង»

ភ្នំពេញ ៖ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានដឹកនាំកិច្ចប្រជុំប្រចាំខែកក្កដា ឆ្នាំ២០២៥ ដើម្បីពិនិត្យវឌ្ឍនភាពការងារ និងពិនិត្យផែនការយុទ្ធសាស្រ្ត ក្នុងការត្រៀមខ្លួនគាំទ្រផ្នែកសេវាសុខភាព និងសង្គ្រោះបន្ទាន់ នៅតំបន់ព្រំដែន ជាពិសេសតំបន់ដែលកំពុងផ្ទុះអាវុធ។មុននឹងចាប់ផ្តើមនៃកិច្ចប្រជុំ ឯកឧត្តមសាស្ត្រាចារ្យរដ្ឋមន្ត្រី បានបង្ហាញនូវអារម្មណ៍មោទនភាព ចំពោះវីរកងទ័ពនៅសមរភូមិជួរមុខរបស់កម្ពុជា ដែលបានលះបង់គ្រប់យ៉ាងក្នុងការការពារបូរណភាពទឹកដី។ ឯកឧត្តមសាស្ត្រាចារ្យ បានបញ្ជាក់ថា ព្រឹកថ្ងៃទី២៤ ខែកក្កដា ឆ្នាំ២០២៥ មន្ទីរពេទ្យថ្នាក់ជាតិ ដែលជាសម្ព័ន្ធមេត្រីភាពជាមួយខេត្តជាប់ព្រំដែនកម្ពុជា-ថៃ បានរៀបចំចាត់ចែងក្រុមគ្រូពេទ្យ សម្ភារៈ និងបរិក្ខារ រួចជាស្រេច និងបានកំពុងចេញដំណើរឆ្ពោះទៅខេត្តទីតាំងរៀងៗខ្លួន ដើម្បីត្រៀមជួយគាំទ្រ ដល់ក្រុមគ្រូពេទ្យដែលកំពុងប្រចាំការនៅទីនោះ ករណីជាយថាហេតុណាមួយកើតឡើង។កិច្ចប្រជុំនេះ ឯកឧត្តមសាស្រ្តាចារ្យរដ្ឋមន្រ្តី បានដាក់ចេញនូវចំនុចអាទិភាពមួយចំនួន ដល់ថ្នាក់ដឹកនាំ និងមន្រ្តីសុខាភិបាលគ្រប់ឋានានុក្រម ដូចខាងក្រោម៖ មន្ទីរពេទ្យថ្នាក់ជាតិទាំងអស់ត្រូវត្រៀមខ្លួនជានិច្ច ក្នុងការរៀបចំក្រុមគ្រូពេទ្យ និងសម្ភារៈបរិក្ខារ សម្រាប់ចេញដំណើរទៅតាមតំបន់ព្រំដែន ដើម្បីត្រៀមជួយគាំទ្របន្ថែមក្នុងករណីចាំបាច់។ រៀបចំវិធីសាស្រ្តឱ្យមានការទំនាក់ទំនងគ្នាជាប់ជានិច្ច ក្នុងគោលបំណងបញ្ជូន និងទទួលព័ត៌មានអំពីស្ថានភាពនៅសមរភូមិជួរមុខបានឆាប់រហ័យ។ ពង្រឹងការយកចិត្តទុកដាក់ចំពោះការឆ្លើយតបបន្ទាន់ ទាំងការជួយសង្រ្គោះបឋម និងការបញ្ជូន។ ពង្រឹងយន្តការគាំពារសុខភាព សុវត្ថិភាពប្រជាពលរដ្ឋ និងបុគ្គលិកសុខាភិបាលខ្លួនឯងឱ្យបានល្អ ទាំងផ្លូវកាយ និងផ្លូវចិត្ត។ពង្រឹងនូវគុណភាពសេវាសង្គ្រោះ និងរក្សាអនាម័យ ទៅតាមស្តង់ដារ ទោះបីស្ថិតក្នុងស្ថានភាពអាសន្ន។ ត្រូវមានយន្តការផ្តល់ព័ត៌មាន និងរបាយការណ៍ច្បាស់លាស់ មកក្រសួងសុខាភិបាល។ នៅតាមឃ្លាំងឱសថកណ្តាល និងខេត្ត ត្រូវពិនិត្យ និងរៀបចំរួចជាស្រេចនូវ សម្ភារៈ បរិក្ខារ ឱសថ ចាំបាច់ និងសំខាន់ៗ ដើម្បីផ្គត់ផ្គង់ទៅមូលដ្ឋានសុខាភិបាល និងក្រុមគ្រុពេទ្យនៅតាមតំបន់ព្រំដែន កុំឱ្យមានការខ្វះខាត។ មន្ទីរសុខាភិបាលរាជធានី ខេត្ត ចាត់ចែងរៀបចំក្រុមគ្រូពេទ្យ ដើម្បីត្រៀមផ្លាស់ប្តូរវេន ជាមួយក្រុមគ្រូពេទ្យដែលនៅប្រចាំការតាមតំបន់ព្រំដែន ក្នុងករណីមានតម្រូវការ។ នៅតាមមន្ទីរពេទ្យថ្នាក់ជាតិ ខេត្ត និងស្រុក ទាំងអស់ត្រូវរៀបចំបែងចែកក្រុមគ្រូពេទ្យប្រចាំការនៅកន្លែងរបស់ខ្លួន ២៤ម៉ោង លើ២៤ម៉ោង ដើម្បីធានាបាននូវការបម្រើសេវាសុខាភិបាលជូនប្រជាពលរដ្ឋជាធម្មតា និងរង់ចាំទទួលជួយសង្រ្គោះ។ជាចុងបញ្ចប់ ឯកឧត្តមសាស្រ្តាចារ្យរដ្ឋមន្រ្តី បានគោរពជូនទៅដល់វីរកងទ័ពកម្ពុជា ដែលឈរជើងនៅសមរភូមិជួរមុខ ជាពិសេសនៅតំបន់ដែលផ្ទុះអាវុធ ប្រកបដោយសុខសុវត្ថិភាព និងទទួលបានជ័យជំនះ គ្រប់កាលៈទេសៈ និងគ្រប់ពេលវេលា។ ឯកឧត្តមសាស្រ្តាចារ្យ ផ្តាំផ្ញើការសួខសុខទុក្ខ និងជូនពរដល់ក្រុមគ្រូពេទ្យដែលកំពុងប្រចាំការនៅតាមតំបន់ព្រំដែន និងក្រុមគ្រូពេទ្យចេញដំណើរជួយគាំទ្របន្ថែម ជួបតែសុខសុវត្ថិភាពទាំងអស់គ្នា។ក្នុងកិច្ចប្រជុំនេះ ក៏មានការអញ្ជើញចូលរួមពី ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ ទីប្រឹក្សាក្រសួង អគ្គនាយក និងលោក លោកស្រីប្រធានការិយាល័យ និងប្រធានមន្ទីរសុខាភិបាល នៃរដ្ឋបាលខេត្ត ដែលចូលរួមតាមរយៈប្រព័ន្ធអនឡាញ (Zoom)៕អត្ថបទ រដ្ឋា

រដ្ឋមន្រី្តសុខាភិបាល បើកកិច្ចប្រជុំពិគ្រោះយោបល់អន្តរជាតិ ក្នុងការបង្កើតផែនការយុទ្ធសាស្រ្តរយៈពេល៥ឆ្នាំ

ភ្នំពេញ ៖ ឯកឧត្តមសាស្ត្រាចារ្យ ឈាង រ៉ា រដ្ឋមន្រ្តីក្រសួងសុខាភិបាល បានអញ្ជើ្ជញជាអធិបតី ក្នុងពិធីបើកកិច្ចប្រជុំពិគ្រោះយោបល់អន្តរជាតិ ដែលមានការចូលរួមពីសាស្រ្តាចារ្យ អ្នកជំនាញជាតិ និងអន្តរជាតិជាង៤០រូប មកពី៩ប្រទេសផ្សេងគ្នា រយៈពេល២ថ្ងៃ ក្នុងការបង្កើតផែនការយុទ្ធសាស្រ្ត រយៈពេល៥ឆ្នាំ សម្រាប់មជ្ឈមណ្ឌលស្រាវជ្រាវសុខភាពសាកល, នាព្រឹកថ្ងៃទី២៤ ខែកក្កដា ឆ្នាំ២០២៥នេះ នៅសាកលវិទ្យាល័យវិទ្យាសាស្ត្រសុខាភិបាល។ ឯកឧត្តមសាស្រ្តាចារ្យ ឈាង រ៉ា បានសំដែងនូវការថ្លែងអំណរគុណវត្តមានដ៏មានតម្លៃរបស់អ្នកជំនាញជាន់ខ្ពស់ជាតិ និងអន្តរជាតិទាំងអស់ ដែលបានចូលរួមចែករំលែកចំណេះដឹងដ៏សម្បូរបែបរបស់ខ្លួន និងរួមគ្នាបង្កើតឡើងនូវអនាគតមួយដ៏ភ្លឺស្វាង សម្រាប់មជ្ឈមណ្ឌលស្រាវជ្រាវសុខភាពសាកលនេះ ដែលនឹងក្លាយជាផ្នែកមួយ សម្រាប់លើកកម្ពស់សុខភាពប្រជាជននៅកម្ពុជា ក្នុងតំបន់ និងអន្តរជាតិ។ ឯកឧត្តមសាស្រ្តាចារ្យរដ្ឋមន្រ្តី បានរំលេចអំពីភាពចាំបាច់ នៃការងារស្រាវជ្រាវ នវានុវត្តន៍ ដើម្បីការលើកម្ពស់សុខភាព និងទប់ស្កាត់ការប៉ះពាល់សុខភាព តាមរយៈការគិតគូរ ប្រកបដោយភាពបុរេសកម្ម ការពារ និងទប់ស្កាត់ទាំងជំងឺឆ្លង និងជំងឺមិនឆ្លង។ ឯកឧត្តមសាស្រ្តាចារ្យរដ្ឋមន្រ្តី បានបង្ហាញពីភាពប្រទាក់ក្រឡាគ្នា លើតម្រូវការចាំបាច់ សម្រាប់ការសិក្សាស្រាវជ្រាវ ទាំងជំងឺមិនឆ្លង និងជំងឺឆ្លង ដោយបង្ហាញនូវបទពិសោធន៍ទំនាក់ទំនងនៃជំងឺកូវីដ-១៩ លើបុគ្គលដែលមានជំងឺរ៉ាំរ៉ៃមួយចំនួនជាដើម។ឯកឧត្តមសាស្រ្តាចារ្យរដ្ឋមន្រ្តី បានសំដែងនូវការគាំទ្រយ៉ាងមុតមាំ ចំពោះសាកលវិទ្យាល័យវិទ្យាសាស្រ្តសុខាភិបាល ដែលមានគំនិតផ្តួចផ្តើមបង្កើតមជ្ឈមណ្ឌលស្រាវជ្រាវសុខភាពសាកល ដែលជាមណ្ឌលស្រាវជ្រាវជាតិ និងជាចំណែកមួយ នៃការស្រាវជ្រាវសុខភាពសកល ដើម្បីធ្វើឱ្យប្រសើរឡើង ក្នុងវិស័យសុខាភិបាល និងកំណត់អាទិភាពសុខាភិបាលចាំបាច់ ដែលនឹងជាធាតុចូលសម្រាប់ការរៀបចំគោលនយោបាយសុខាភិបាល ឆ្លើយតបនឹងតម្រូវការសុខភាពជាក់ស្តែង។ ឯកឧត្តមសាស្រ្តាចារ្យ បានបង្ហាញនូវក្តីរំពឹងថា មជ្ឈមណ្ឌលស្រាវជ្រាវសុខភាពសកលនេះ ដែលនឹងដើរតួយ៉ាងសំខាន់ ដូចខាងក្រោម៖ ១- ជាមជ្ឈមណ្ឌលកណ្តាលមួយ (Hub) សម្រាប់ស្វែងរក និងសំយោគនូវចំណេះដឹងសុខភាពថ្មីៗបំផុតលើសកលលោក សម្រាប់ជួយជាធាតុចូលដ៏សំខាន់ជូនដល់ក្រសួងសុខាភិបាល ក៏ដូចជាអង្គការសុខភាពអន្តរជាតិនានា យកទៅរៀបចំគោលនយោបាយ និងយុទ្ធសាស្រ្ត សម្រាប់ដោះស្រាយបញ្ហាសុខភាពបន្ទាន់ និងចាំបាច់បំផុតរបស់យើង រួមមានទាំង ជំងឺឆ្លង ជំងឺមិនឆ្លង និងការគំរាមកំហែងសុខភាពជាសកល ដែលកំពុងកើតឡើង។២- ជាមជ្ឈមណ្ឌលប្រមូលផ្តុំ និងកសាងធនធានអ្នកស្រាវជ្រាវជំនាន់ថ្មី ដែលមានពហុជំនាញនិងចេះធ្វើការជាក្រុម ដែលមានកម្រិតស្តង់ដាអន្តរជាតិ តាមរយៈការបណ្តុះបណ្តាលក្នុងពេលបំពេញការងារ ជាប្រចាំដល់អ្នកស្រាវជ្រាវទាំងនោះ ឱ្យអនុវត្តជាក់ស្តែងក្នុងគម្រោងស្រាវជ្រាវផ្សេងៗ ដោយផ្អែកលើគោលការណ៍កិច្ចសហការ និងសហប្រតិបត្តិការជាតិ និងអន្តរជាតិប្រកបដោយនិរន្តរភាព និងចីរភាព។ ៣- ជា Platform មួយដែលមានគណនេយ្យភាព និងធានានូវប្រសិទ្ធភាពខ្ពស់ ក្នុងការសម្របសម្រួលជាមួយគ្រប់ដៃគូជាតិ និងអន្តរជាតិ លើការងាររៀបចំ និងដំណើរការការងារស្រាវជ្រាវ និងនវានុវត្តន៍ក្នុងវិស័យសុខាភិបាល តាមរយៈការពង្រឹងភាពជាដៃគូរវាងអង្គភាពបណ្តុះបណ្តាល មន្ទីរពេទ្យជាតិ មូលដ្ឋានសុខាភិបាលថ្នាក់ក្រោមជាតិ វិស័យឯកជន និងដៃគូអន្តរជាតិនានា ដើម្បីបង្កើតជាកម្លាំងរួមបញ្ចូលគ្នា លើកកម្ពស់គុណភាព ប្រសិទ្ធភាពនៃការស្រាវជ្រាវ និងនវានុវត្តន៍។៤-ជាមជ្ឈមណ្ឌលមួយដែលស្វែងយល់ពីសក្តានុពលនៃសុខភាពឌីជីថល និងបច្ចេកវិទ្យាទំនើបថ្មីៗ និងចាប់យកសក្តានុពលទាំងឡាយនៃការវិវឌ្ឍទាំងនោះឱ្យអស់លទ្ធភាព ដើម្បីជួយរៀបចំជាគំរូដើម (Prototype) ជូនដល់ក្រសួងសុខាភិបាល ក្នុងទិសដៅ ដើម្បីពង្រឹង និងពង្រីកការផ្តល់សេវាបម្រើសុខភាពជូនដល់ប្រជាពលរដ្ឋ ប្រកបដោយប្រសិទ្ធភាព ស័ក្តិសិទ្ធិភាព និងសមធម៌ ដោយមិនទុកចោលប្រជាពលរដ្ឋណាម្នាក់ មិនទទួលបានសេវាសុខាភិបាលឡើយ។បន្ថែមពីនេះ ឯកឧត្តមសាស្រ្តាចារ្យ ឈាង រ៉ា បានផ្តល់អនុសាសន៍បន្ថែម ដល់សាកលវិទ្យាល័យវិទ្យាសាស្រ្តសុខាភិបាល ដោយ ១) បន្តអនុវត្តការងារប្រកបដោយភាពនវានុវត្តន៍ ព្រោះនវានុវត្តន៍ នឹងមិនមានទីបញ្ចប់ទេ ២) បន្តពង្រឹង និងពង្រីកកិច្ចសហប្រតិបត្តិការជាមួយដៃគូអន្តរជាតិទាំងអស់ ដើម្បីកៀងគរធនធាន ទាំងថវិកា និងជំនួយបច្ចេកទេស ដើម្បីពង្រឹងបន្ថែមការងារបណ្តុះបណ្តាល និងការងារស្រាវជ្រាវរបស់សាកលវិទ្យាល័យ ៣) ពង្រឹងការងារស្រាវជ្រាវ ឆ្លើយតបនឹងតម្រូវការសុខភាពនៃប្រទេសកម្ពុជា តំបន់ និងសាកលលោក ដោយគោរពក្រមសីលធម៌ស្រាវជ្រាវ ព្រមទាំងត្រូវមានតម្លាភាព និងនិរន្តរភាព៕អត្ថបទ រដ្ឋា

ប្រទេសបារាំងអំពាវនាវដល់កម្ពុជា និងថៃបញ្ឈប់ការប្រយុទ្ធគ្នា និងដោះស្រាយជម្លោះដោយសន្តិវិធីនិងច្បាប់អន្តរជាតិ

យោងតាមសេចក្តីថ្លែងការណ៍របស់ក្រសួងអឺរ៉ុប និងការបរទេសបារាំង នៅថ្ងៃនេះ ប្រទេសបារាំងអំពាវនាវដល់កម្ពុជា និងថៃបញ្ឈប់ការប្រយុទ្ធគ្នា និងដោះស្រាយជម្លោះដោយសន្តិវិធីនិងច្បាប់អន្តរជាតិ។តាមសេចក្តីថ្លែងការណ៍ ប្រទេសបារាំងសម្តែងការព្រួយបារម្ភយ៉ាងខ្លាំងជុំវិញជម្លោះប្រដាប់អាវុធ នៅតាមព្រំដែនរវាងប្រទេសកម្ពុជា និងប្រទេសថៃ ដែលបានកើតឡើងនៅថ្ងៃទី២៤ ខែកក្កដា ដែលបណ្តាលឱ្យមនុស្សជាច្រើនបានបាត់បង់ជីវិត ហើយប្រទេសបារាំងសូមចូលរួមរំលែកទុក្ខដល់ក្រុមគ្រួសារនៃសព។ ប្រទេសបារាំងអំពាវនាវឱ្យប្រទេសកម្ពុជា និងប្រទេសថៃបញ្ឈប់ការប្រយុទ្ធគ្នាជាបន្ទាន់ និងដោះស្រាយជម្លោះដោយសន្តិវិធីយោងទៅតាមច្បាប់អន្តរជាតិ។ ប្រទេសបារាំងអំពាវនាវឱ្យពលរដ្ឋបារាំងចៀសវាងធ្វើដំណើរទៅកាន់តំបន់ព្រំដែន។ សូមអ្នកដំណើរបារាំងដែលអាចស្ថិតនៅតំបន់ព្រំដែន ចាកចេញឱ្យបានឆាប់ពីតំបន់ទាំងនោះ ហើយអាចជូនដំណឹងទៅស្ថានទូតបារាំង។

ក្រសួងការងារ និងបណ្ដុះបណ្តាលវជ្ជាជីវៈ ចេញញត្តិថ្កោលទោសការឈ្លានពានរបស់ថៃ

ភ្នំពេញ៖ ថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់ នៃក្រសួងការងារ និងបណ្តុះបណ្តាលវិជ្ជាជីវៈ បានចេញញត្តិថ្កោលទោសយ៉ាងដាច់អហង្ការចំពោះអំពើរំលោភបំពានយ៉ាងគឃ្លីនពីសំណាក់កងទ័ពថៃ ដែលបានបើកការបាញ់ប្រហារមុនមកលើកងទ័ពកម្ពុជាដែលកំពុងតែឈរជើងការពារក្នុងបូរណភាពទឹកដីកម្ពុជា។នៅក្នុងញត្តិចេញផ្សាយនៅយប់ថ្ងៃទី២៤ ខែកក្កដា ឆ្នាំ២០២៥នេះ ក្រសួងការងារ បានគូសបញ្ជាក់ថា ក្នុងខណៈពេលដែលកម្ពុជា បាននិងកំពុងប្រកាន់ជំហរដោះស្រាយបញ្ហាព្រំដែនប្រកបដោយភាព ចាស់ទុំខាងនយោបាយការទូតយ៉ាងម៉ឺងម៉ាត់ និងបន្តកសាងព្រំដែនសន្តិភាព កិច្ចសហប្រតិបត្តិការ និងមិត្តភាព ល្អជាមួយប្រទេសថៃ និងបណ្តាប្រទេសជិតខាង ផ្ទុយទៅវិញ ប្រទេសថៃបែរជារំលោភនូវអធិបតេយ្យភាពក្នុងតំបន់ ដែលកំពុងមានជម្លោះ និងកំពុងដាក់ដោះស្រាយនៅតុលាការយុត្តិធម៌អន្តរជាតិ (ICJ) ដោយបានលបវាយឆ្មក់មក កាន់កងទ័ពកម្ពុជានាព្រឹកនេះ។ទន្ទឹមនេះ ថ្នាក់ដឹកនាំនៃក្រសួងការងារ ប្រកាសគាំទ្រយ៉ាងឱឡារិកចំពោះចំណាត់ការរបស់រាជរដ្ឋាភិបាល ក្នុងការ ប្រើប្រាស់យន្តការវាយបកដែលជាសិទ្ធិការពារខ្លួនក្នុងអធិបតេយ្យ និងបូរណភាពទឹកដីរបស់កម្ពុជា និងសូមអំពាវ នាវដល់បងប្អូនប្រជាពលរដ្ឋខ្មែរ សូមកុំធ្វើសកម្មភាពដែលប៉ះពាល់ដល់ទឹកចិត្តកងទ័ពជួរមុខ ខណៈពេលដែល យើងត្រូវរួបរួមសាមគ្គីគ្នា ដើម្បីការពារជាតិ និងទឹកដីយើងទាំងអស់គ្នា និងសូមចូលរួមលើកទឹកចិត្តដល់បងប្អូន កងកម្លាំងប្រដាប់អាវុធគ្រប់ជាន់ថ្នាក់ ជាពិសេស បងប្អូនកងទ័ពជួរមុខដែលកំពុងត្រូវបានទ័ពថវាយឆ្មក់ និងកំពុងទប់ទល់វាយបកនឹងសត្រូវនៅសមរភូមិជួរមុខ តាមតំបន់ជាប់ព្រំដែនកម្ពុជា-ថៃ នៃខេត្តឧត្តរមានជ័យ និងខេត្ត ព្រះវិហារ។ ជាមួយគ្នានេះ ថ្នាក់ដឹកនាំនិងមន្ត្រីរាជការរបស់ក្រសួង បានជូនពរបងប្អូនកងទ័ពកម្ពុជាទទួលបានសុខសុវត្ថិភាព និងជោគជ័យក្នុង ការបំពេញកាតព្វកិច្ចការពារជាតិ មាតុភូមិ។ជាថ្មីម្ដងទៀត ថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់ នៃក្រសួងការងារ និងបណ្តុះបណ្តាលវិជ្ជាជីវៈ បានប្រកាសថ្កោលទោសយ៉ាងដាច់អហង្ការចំពោះអំពើរំលោភបំពានយ៉ាងគឃ្លីន របស់សំណាក់កងទ័ពថៃ ដែលបានបើកការបាញ់ប្រហារមុនមកលើកងទ័ពកម្ពុជា ដែលកំពុងតែឈរជើងការពារ ក្នុងបូរណភាពទឹកដីកម្ពុជា។ នេះបើយោងតាមលិខិតដដែល៕

ឯកឧត្តម ឌិត ទីណាប្រចាំការនៅខេត្តបន្ទាយមានជ័យ

ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ នាថ្ងៃទី២៤ ខែកក្កដា ឆ្នាំ២០២៥នេះ បានអញ្ជើញដឹកនាំកិច្ចប្រជុំពីស្ថានភាពក្នុងតំបន់ព្រំដែនខេត្តបន្ទាយមានជ័យ និងការត្រៀមលក្ខណៈអន្តរាគមន៍របស់ខេត្តដើម្បីការពារបូរណភាពទឹកដីនៃព្រះរាជាណាចក្រកម្ពុជានិងការរក្សាសន្តិសុខប្រជាពលរដ្ឋខ្មែរ។ កម្ពុជាតែងតែប្រកាន់ជំហរដោះស្រាយបញ្ហាដោយសន្តិវិធី ប៉ុន្តែរក្សាសិទ្ធិការពារខ្លួនចំពោះសកម្មភាពបំពានលើអធិបតេយ្យភាពជាតិនិងបូរណភាពទឹកដី៕

បណ្ដាញសង្គម

ព័ត៌មានថ្មីៗ

ប្រធានសិទ្ធិមនុស្ស៖ UN នឹងបញ្ជូនអ្នកស៊ើបអង្កេតទៅលីបង់ ជុំវិញលទ្ធភាពដែលមានការរំលោភច្បាប់

អ៊ុយក្រែនវាយប្រហារទីតាំងជាច្រើនកន្លែងនៅកំពង់ផែ Mariupol កាន់កាប់ដោយរុស្ស៊ី

ប្រធានាធិបតីទួរគី៖ វត្តមានរបស់លោក Trump នៅកិច្ចប្រជុំកំពូលណាតូ គឺសំខាន់សម្រាប់ស្ថិរភាពរបស់សម្ព័ន្ធមិត្ត

លោក Trump៖ អ៊ីរ៉ង់បានចំណាយពេលយូរពេក ដើម្បីចរចាកិច្ចព្រមព្រៀង ហើយនឹងត្រូវប្រឈមផលវិបាក

កងទ័ពប៉ាគីស្ថាន បញ្ជាក់ថា ឧទ្ធម្ភាគចក្រធ្លាក់នៅក្បែរទីក្រុង Muzaffarabad ហើយបុគ្គលិកទាំងអស់ស្លាប់

រុស្ស៊ីស៊ើបអង្កេតហេតុការណ៍ផ្ទុះគ្រាប់បែកក្នុងរថយន្តនៅមូស្គូ ក្នុងនោះយុវជនសង្ស័យ ២នាក់ ត្រូវបានចាប់ខ្លួន

គណបក្ស៖ លោក Netanyahu នឹងឈរឈ្មោះអាណត្តិថ្មី ក្រោយលោក Trump បង្ហាញការសង្ស័យ

អ៊ីរ៉ង់៖ ការវាយប្រហាររបស់សហរដ្ឋអាមេរិក ធ្វើឲ្យខូចដល់កិច្ចប្រឹងប្រែងផ្នែកការទូត

ប្រធានាធិបតីកេនយ៉ានិយាយថា ជំងឺអេបូឡានៅកុងហ្គោនៅតែជាក្តីបារម្ភមួយ

លោក Erdogan ៖ ការវាយប្រហាររបស់អ៊ីស្រាអែលើស៊ីរី និងលីបង់ គំរាមកំហែងទួរគីផងដែរ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877