BTV NEWS

សម្ដេចតេជោជំរុញឱ្យកម្ពុជា និងកូឡុំប៊ី ពង្រីកកិច្ចសហប្រតិបត្តិការ ពាណិជ្ជកម្ម វិនិយោគ ជាមួយគ្នាបន្ថែមទៀត

ប្រសាសន៍សំខាន់ៗរបស់សម្តេចធិបតី ហ៊ុន ម៉ាណែត ក្នុងឱកាសអញ្ជើញក្នុងពិធីអបអរសាទរទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ លើកទី៩

សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចាត់តំណាងនាំយកទេយ្យវត្ថុ និងបច្ច័យ ថ្វាយប្រគេនសម្ដេចព្រះមហាសង្ឃរាជ នន្ទ ង៉ែត

ករណីនាំសាច់បង្កកមកពីថៃជាង២០០តោន : តំណាងអយ្យការចោទប្រកាន់ជនសង្ស័យ ២នាក់

ព័ត៌មានជាតិ

មន្ទីរប្រឆាំងគ្រឿងញៀន ប្រជុំបូកសរុបលទ្ធិផលការងារប្រចាំខែមិថុនា និងលើកទិសដៅការងារបន្ត

ភ្នំពេញ ៖ កាលពីវេលារសៀលថ្ងៃទី១៤ ខែកក្កដា ឆ្នាំ២០២៥ មន្ទីរប្រឆាំងគ្រឿងញៀន នៃអគ្គស្នងការដ្ឋាននគរបាលជាតិ បានបើកកិច្ចប្រជុំបូកសរុបលទ្ធិផលការងារប្រចាំខែមិថុនា និងលើកទិសដៅការងារបន្តខែកក្កដា ។ កិច្ចប្រជុំនេះធ្វើឡើង ក្រោមការដឹកនាំប្រជុំបូកសរុបការងារ ដោយលោកឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងគ្រឿងញៀន នៅសាលប្រជុំមន្ទីរប្រឆាំងបទល្មើសគ្រឿងញៀន ដោយមានការអញ្ជើញចូលរួមពីលោក-លោកស្រី នាយករងមន្ទីរទទួលផែន លោកនាយការិយាល័យទាំង១១ក លោក-លោកស្រីនាយរងការិយាល័យ លោក-លោកស្រីនាយ-នាយរងផ្នែកនិងមន្រ្តីជំនាញពាក់ព័ន្ធជាច្រើនរូបទៀតផងដែរ ។ លោកឧត្តមសេនីយ៍ឯក ឃឹង សារ៉ាត់ មានប្រសាសន៍ថា ៖ ផ្អែកតាមលទ្ធផលបង្ក្រាបបទល្មើសគ្រឿងញៀន នៅខែមិថុនា ឆ្នាំ២០២៥នេះ ស្ថានភាពជាទូទៅនៃបទល្មើសគ្រឿងញៀន នៅក្នុងព្រះរាជាណាចក្រកម្ពុជា ពុំទាន់មានសញ្ញាណថមថយនៅឡើយទេ ហើយស្ថានភាពប្រើប្រាស់គ្រឿងញៀនបច្ចុប្បន្ន មានការប្រើប្រាស់នៅតាមទីតាំងមួយចំនួន ដូចជាក្លិបកំសាន្ត ខុនដូរ សណ្ឋាគារ ផ្ទះសំណាក់ ខារ៉ាអូខេ និងតាមតំបន់មិនរៀបរយមួយចំនួន ។ ព្រមទាំងមានការបន្តលួចលាក់នាំចូលគ្រឿងញៀន និងនៅតែមានការលួចលាក់កែច្នៃ-ផលិតគ្រឿងញៀនទ្រង់ទ្រាយតូចៗទៀតផងដែរ។ លោកឧត្តមសេនីយ៍ ក៏បានកោតសរសើរដល់ថ្នាក់ដឹកនាំ និងមន្រ្តីក្នុងការិយាល័យទាំង១១ ដែលមានការសាមគ្គីភាពផ្ទៃក្នុង, អនុវត្តតាមតួនាទីភារកិច្ចរបស់ខ្លួនបានល្អ ពិសេសអនុវត្តតាមគោលការណ៍តាមបញ្ជាថ្នាក់ដឹកនាំ និងបានអនុវត្តយ៉ាងខ្ចាប់ខ្ជួន តាមវិន័យនគរបាលជាតិកម្ពុជា។ក្នុងកិច្ចប្រជុំដដែលនោះ លោកឧត្តមសេនីយ៍នាយកមន្ទីរ បានដាក់ទិសដៅបន្តជំរុញឱ្យថ្នាក់ដឹកនាំ និងកងកម្លាំងទាំងអស់ នៃមន្ទីរប្រឆាំងគ្រឿងញៀ នត្រូវបន្តយកចិត្តទុកដាក់ខិតខំបំពេញការងារឱ្យបានល្អ គោរពតាមបទបញ្ជារបស់ឯកឧត្តម នាយឧត្តមសេនីយ៍ អគ្គស្នងការនគរបាលជាតិ ក៏ជាក្រសួងមហាផ្ទៃ និងរាជរដ្ឋាភិបាល ជាពិសេស ត្រូវគោរពនូវក្រមសីលធម៌វិជ្ជាជីវៈ អនុវត្តឱ្យបានត្រឹមត្រូវតាមជំនាញនីតិវិធី និងច្បាប់ ៕ លីហេង

សម្តេច ឃួន សុដារី អនុញ្ញាតឱ្យអនុប្រធានគណៈកម្មការកិច្ចការជនជាតិភាគតិចសភាតំណាងប្រជាជនចិនទូទាំងប្រទេស ចូលជួបសម្តែងការគួរសម និងពិភាក្សាការងារ

សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា អនុញ្ញាតឱ្យឯកឧត្តម វ៉ាង ជីមីន (Wang Zhimin) អនុប្រធានគណៈកម្មការកិច្ចការជនជាតិភាគតិចសភាតំណាងប្រជាជនចិនទូទាំងប្រទេស ចូលជួបសម្តែងការគួរសម និងពិភាក្សាការងារ នៅវិមានរដ្ឋសភា រាជធានីភ្នំពេញ នារសៀលថ្ងៃទី១៥ ខែកក្កដា ឆ្នាំ២០២៥។

អាជ្ញាធរកោះកុង សម្របសម្រួលពលករខ្មែរ១៦នាក់ បញ្ចូនមកកម្ពុជាវិញ

កោះកុង៖ អាជ្ញាធរខេត្តកោះកុង បានសម្របសម្រួលជាមួយអាជ្ញាធរសមត្ថកិច្ចថៃ ចាត់បញ្ជូនក្រោមពលករខ្មែរចំនួន១៦នាក់ដែលធ្វើការខុសច្បាប់នៅខេត្តត្រាតមកកម្ពុជាវិញ។លោកជំទាវ មិថុនា ភូថង អភិបាលខេត្តកោះកុង និងអាជ្ញាធរសមត្ថកិច្ចពាក់ព័ន្ឋ នៅរសៀលថ្ងៃទី១៥ ខែមិថុនា ឆ្នាំ២០២៥ បានចាំទទួលស្វាគមន៍ពលករខ្មែរចំនួន១៦នាក់ដែលចាត់បញ្ជូនមកពីប្រទេសថៃ តាមនៅច្រកទ្វារព្រំដែនអន្តរជាតិចាំយាម ស្រុកមណ្ឌលសីមា ។លោកជំទាវអភិបាលខេត្ត បានបន្តថា ក្រុមពលករខ្មែរត្រូវបានអាជ្ញាធរសមត្ថកិច្ចថៃចាប់ឃាត់ខ្លួន ដោយចោទប្រកាន់ថាចូលទឹកដីថៃបម្រើការងារនេសាទនៅខេត្តត្រាត។លោកជំទាវ មិថុនា ភូថង ស្នើឲ្យក្រុមពលករ ឈប់បន្តទៅរកការងារធ្វើខុសច្បាប់នៅប្រទេសថៃបន្តទៀត ពោលគឺងាកមកចូលរួមសិក្សាជំនាញបច្ចេកទេស និងរកការងារធ្វើនៅក្នុងស្រុកកំណើតវិញ ព្រោះមានសុវត្ថិភាព និងមានភាពកក់ក្តៅក្បែរក្រុមគ្រួសារ។ បច្ចុប្បន្នខេត្តកោះកុង កំពុងត្រូវការកម្លាំងពលកម្មជាង៧ពាន់កន្លែង ខណ:មានតំបន់សេដ្ឋកិច្ចពិសេសចំនួន២កន្លែង ចាំទទួលពាក្យចូលបម្រើការងារ។តំណាងក្រុមពលករខ្មែរដែលថៃបញ្ជូនមក អះអាងថា ពួកគាត់ទៅថៃកាលពីថ្ងៃទី១៣ ខែឧសភា ឆ្នាំ ហើយចុះទូកនេសាទសមុទ្រជាមួយក្រុមបងប្អូនមិត្តភក្តិដែលរួមដំណើរពីខេត្តកោះកុងទៅ។ លុះពេលកំពុងនេសាទ ក៏ត្រូវអាជ្ញាធរថៃចាប់ឃាត់ខ្លួនកាលពីថ្ងៃទី១៥ ខែឧសភា ឆ្នាំ២០២៥ ក្រោមហេតុផលនេសាទនៅចំណុចខៅស្នីង តំបន់អភិរក្សរបស់ថៃ។ពលករខ្មែរដែលជាខ្មែរឥស្លាមដែលមានទីលំនៅភូមិ៤ សង្កាត់ដងទង់ ក្រុងខេមរភូមិន្ទ សូមថ្លែងអំណរអរគុណយ៉ាងជ្រាលជ្រៅជូនចំពោះរាជរដ្ឋាភិបាល អាជ្ញាធរខេត្ត អ្នកឧកញ៉ា លី យ៉ុង និងមន្រ្តីសមត្ថកិច្ចពាក់ព័ន្ឋដែលយកចិត្តដាក់ទុកជួយសម្របសម្រួល ដើម្បីឲ្យពួកគេបានវិលមកស្រុកកំណើតជួបជុំក្រុមគ្រួសារ ហើយសន្យាថានឹងឈប់ទៅធ្វើការនៅថៃទៀត បើទោះជាការងារនេសាទនៅទីនោះរកបានច្រើនគួរសមជាងនៅស្រុកកំណើតយ៉ាងណាក្តី៕ អត្តបទ:ឈឹម មករា

ក្រសួងមុខងារសាធារណៈ និងលេខាធិការដ្ឋានអាស៊ាន សហការរៀបចំកិច្ចប្រជុំត្រីភាគី សម្រាប់ការពង្រីកកិច្ចសហប្រតិបត្តិការ ACCSM ជាមួយគណៈកម្មការមុខងារសាធារណៈនៃប្រទេសអូស្ត្រាលី (APSC)

ភ្នំពេញ៖ ខណៈកម្ពុជា គឺជាប្រធានប្តូរវេនរៀបចំកិច្ចប្រជុំកិច្ចសហប្រតិបត្តិការអាស៊ានស្តីពី កិច្ចការមុខងារសាធារណៈ ASEAN Cooperation on Civil Service Matters (ACCSM) លើកទី២៣ និងកិច្ចប្រជុំកិច្ចសហប្រតិបត្តិការអាស៊ានបូកបីស្តីពី កិច្ចការមុខងារសាធារណៈ (ACCSM+3) លើកទី៨ ក្រសួងមុខងារសាធារណៈ បានសហការជាមួយលេខាធិការដ្ឋានអាស៊ាន (ASEC) រៀបចំកិច្ចប្រជុំត្រីភាគី តាមប្រព័ន្ធអនឡាញជាមួយគណៈកម្មការមុខងារសាធារណៈអូស្ត្រាលី (Australia Public Service Commission-APSC) ដើម្បីធ្វើការពិភាក្សា និងសិក្សាលើការពង្រីកកិច្ចសហប្រតិបត្តិការ ក្នុងក្របខណ្ឌ ACCSM ជាមួយ APSC។ កិច្ចប្រជុំនេះ បានប្រព្រឹត្តទៅនាព្រឹកថ្ងៃទី១៥ ខែកក្កដា ឆ្នាំ២០២៥ ក្រោមអធិបតីភាពដឹកនាំដោយ ឯកឧត្តម ឈុន សុជាតិ អគ្គលេខាធិការនៃគណៈកម្មការកែទម្រង់រដ្ឋបាលសាធារណៈ ក្រសួងមុខងារសាធារណៈកម្ពុជា ដោយមានសមាសភាពចូលរួមពីលេខាធិការដ្ឋានអាស៊ាន តំណាងAPCS និងលេខាធិការដ្ឋាន ACCSM លើកទី២៣។កិច្ចប្រជុំនេះ ផ្តោតលើប្រធានបទសំខាន់រួមមាន៖ (១)ការធ្វើបច្ចុប្បន្នភាពរបស់ ASEC ស្តីពីវឌ្ឍនភាពនៃកិច្ចសហប្រតិបត្តិការ ACCSM ជាមួយ APSC និង (២)ផ្លាស់ប្តូរទស្សនៈរវាងប្រទេសកម្ពុជា ASEC និង APSC សម្រាប់វិស័យដែលអាចធ្វើកិច្ចសហប្រតិបត្តិការជាមួយគ្នា ក្នុងក្របខណ្ឌ ACCSM៕

កាកបាទក្រហមកម្ពុជាផ្តល់អំណោយ និងរៀបចំអាហារមួយពេល ជូនអង្គការសង្គ្រោះជនអស់សង្ឃឹម

ភ្នំពេញ ៖ នៅព្រឹកថ្ងៃទី១៥ កក្កដា ២០២៥ នេះ កាកបាទក្រហមកម្ពុជា បានរៀបចំពិធីជួបជុំ សំណេះសំណាល សួរសុខទុក្ខ និងរៀបចំអាហារមួយពេល ជូនចាស់ឥតទីពឹង កុមារកំព្រា អ្នកផ្ទុកមេរោគអេដស៍ និងបុគ្គលិក នៃអង្គការសង្គ្រោះជនអស់សង្ឃឹម សរុបចំនួន ៣២៨នាក់ នៅក្នុងបរិវេណ អង្គការសង្គ្រោះជនអស់សង្ឃឹម មណ្ឌលទី១ ស្ថិតក្នុងភូមិលិចវត្ត សង្កាត់កំបូល ខណ្ឌកំបូល រាជធានីភ្នំពេញ។ក្នុងឱកាសជួបសំណេះសំណាលនោះ លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា បានពាំនាំប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន ផ្តាំផ្ញើសួរសុខទុក្ខ និងក្តីនឹករលឹកប្រកបដោយមនោសញ្ចេតនាអាណិតស្រឡាញ់ មេត្តាករុណាដ៏ជ្រាលជ្រៅចំពោះ ចាស់ៗ ក្មួយៗ ចៅៗ បុគ្គលិក និងលោកគ្រូ-អ្នកគ្រូទាំងអស់ ពិសេសថ្លែងនូវការកោតសរសើរ ចំពោះស្ថាបនិក និងបុគ្គលិកអង្គការ ដែលបាននិងកំពុងយកចិត្តទុកដាក់ ខិតខំអស់កម្លាំងកាយ-ចិត្ត ដើម្បីជួយដល់កុមារកំព្រា ចាស់ជរា និងគ្រួសារអ្នករស់នៅជាមួយមេរោគអេដស៍ ឱ្យមានអាហារហូបចុក សំលៀកបំពាក់ ការមើលថែ និងផ្តល់ការអប់រំដល់កុមារ រហូតដល់ចប់ថ្នាក់មហាវិទ្យាល័យ ជាពិសេសជម្រកស្នាក់នៅដ៏កក់ក្តៅ និងផ្តល់ការរស់នៅដោយភាពសុខដុមរមនា។ ជាមួយគ្នានេះលោកជំទាវបានផ្តាំផ្ញើដល់ ក្មួយៗ ចៅៗ កុមារា កុមារីតូចៗ និងសិស្ស និស្សិតទាំងអស់ ត្រូវថែទាំសុខភាពឱ្យបានល្អ រក្សាអនាម័យស្អាត ចេះជួយយកអាសារគ្នាទៅវិញទៅមក ខិតខំសិក្សារៀនសូត្រដើម្បីអនាគតភ្លឺស្វាង។ ជាមួយគ្នានេះដែរលោកស្រី ម៉ារី អិន ទីប្រឹក្សាអង្គការសង្គ្រោះជនអស់សង្ឃឹម សូមថ្លែងអំណរគុណយ៉ាងជ្រាលជ្រៅ ដល់កាកបាទក្រហមកម្ពុជា ជាពិសេសសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលតែងតែគិតគូ ដល់សុខភាពរបស់លោកស្រីផ្ទាល់ ក៏ដូចជាសុខទុក្ខ បុគ្គលិក សមាជិកក្នុងអង្គការគ្រប់ពេលវេលា។ លើសពីនោះថវិកា និងសម្ភារទាំងអស់ដែលបានប្រគល់មកអង្គការនៅពេលនេះ លោកស្រីនឹងកាន់តែមានលទ្ធភាពផ្គត់ផ្គង់ អាហារ និងស្លៀកពាក់ គ្រប់គ្រាន់ ដល់ក្មេងៗក្នុងអង្គការ។សូមជម្រាបថាជារៀងរាល់ឆ្នាំ ចាប់ពីថ្ងៃទី៣១ ខែឧសភា ឆ្នាំ ២០១៣ រៀងមក កាកបាទក្រហមកម្ពុជា តែងតែចុះមកសាកសួរសុខទុក្ខ និងនាំមកនូវថវិកា គ្រឿងឧបភោគ-បរិភោគ សម្ភារសិក្សា និងអាហាររូបត្ថម្ភជាច្រើនផ្តល់ជូនដល់ ចាស់ឥតទីពឹង កុមារកំព្រា អ្នករស់នៅជាមួយមេរោគអេដស៍ បុគ្គលិក លោកគ្រូ-អ្នកគ្រូ និងសិស្ស-និស្សិត ដែលរស់នៅក្នុងមណ្ឌលនេះ ព្រមទាំងរៀបចំអាហារមួយពេលយ៉ាងឆ្ងាញ់ពិសាសម្រាប់គ្រប់ៗគ្នាទៀតផង។ អំណោយប្រគល់ជូន អង្គការសង្គ្រោះជនអស់សង្ឃឹម នាពេលនេះរួមមាន៖ អង្ករ៣តោន, មី២០កេស, ត្រីខ៥កេស, ស៊ីអ៊ីវ១០យួ,ទឹកត្រី១០យួ, ប្រេងឆា២កេស, ស្ករស២៥គីឡូក្រាម, ទឹកក្រូច២០កេស, ទឹកបរិសុទ្ធ២០កេស, សាប៊ូកក់សក់ក្លិន៧កេស, ឃីត៥០ឃីត និងថវិកា២០លានរៀល៕អត្ថបទ៖ សំ ងីម

ឯកឧត្តមរដ្ឋមន្ត្រី ហេង សួរ ចែករំលែកបទពិសោធទាក់ទងក្របខណ្ឌអភិបាលកិច្ច និងការគ្រប់គ្រងគាំពារសង្គមនៅកម្ពុជាដល់គណៈប្រតិភូនៃប្រទេសឡាវ

ឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានទទួលជួបគណៈប្រតិភូនៃសាធារណរដ្ឋប្រជាធិបតេយ្យប្រជាមានិតឡាវ ដែលដឹកនាំដោយ ឯកឧត្តម Phongsaysack INTHALATH អនុរដ្ឋមន្រ្តីក្រសួងការងារ និងសុខុមាលភាពសង្គម ដើម្បីពិភាក្សាការងារ និងចែករំលែកបទពិសោធទាក់ទងការគ្រប់គ្រងគាំពារសង្គម នៅទីស្ដីការក្រសួង នាព្រឹកថ្ងៃទី១៥ ខែកក្កដា ឆ្នាំ២០២៥។ កិច្ចពិភាក្សានាព្រឹកនេះ ឯកឧត្តមរដ្ឋមន្រ្តី ហេង សួរ បានចែករំលែកបទពិសោធទាក់ទងក្របខណ្ឌអភិបាលកិច្ច និងរចនាសម្ព័ន្ធរបស់ក្រុមប្រឹក្សាជាតិគាំពារសង្គមក្នុងការគ្រប់គ្រងគាំពារសង្គមកម្ពុជា វិសាលភាពគោលនយោបាយសន្ដិសុខសង្គម និងសុខុមាលភាពសង្គមនៅព្រះរាជាណាចក្រកម្ពុជាទៅដល់គណៈប្រតិភូឡាវដែលកំពុងបំពេញទស្សនកិច្ចនៅកម្ពុជា។ឯកឧត្តមរដ្ឋមន្រ្តីបានបញ្ជាក់ថា៖«ក្រសួងយើងទាំងពីរ ទាំងនៅប្រទេសកម្ពុជា និងប្រទេសឡាវ គឺមានវិសាលភាពគ្របដណ្ដប់ទៅលើវិស័យសន្ដិសុខសង្គមដូចគ្នា។ ដូច្នេះគឺជារឿងមួយមានសារប្រយោជន៍ ដែលយើងបានជួបគ្នា និងអាចផ្លាស់ប្ដូរបទពិសោធ ក៏ដូចជាចែករំលែកទស្សនវិស័យពាក់ព័ន្ធ របបសន្ដិសុខសង្គម ហើយការអនុវត្តរបបសន្ដិសុខសង្គមនៅឡាវ និងកម្ពុជា ក៏មានស្ថានភាព លក្ខណៈប្រហាក់ប្រហែលគ្នាដែរ»។បន្ថែមលើការចែករំលែកបទពិសោធនេះ ឯកឧត្តមរដ្ឋមន្រ្តីបានផ្ដល់អនុសាសន៍ឱ្យមន្រ្តីជំនាញ នៃក្រសួងការងារ និងបណ្ដុះបណ្ដាលវិជ្ជាជីវៈនៃព្រះរាជាណាចក្រកម្ពុជា និងក្រសួងការងារ និងសុខុមាលភាពសង្គមនៃសាធារណរដ្ឋប្រជាធិបតេយ្យប្រជាមានិតឡាវ បង្កើនកិច្ចសហប្រតិបត្តិការជាមួយគ្នាឱ្យបានជិតស្និទ្ធបន្ថែមទៀត ដើម្បីចែករំលែក ផ្លាស់ប្ដូរបទពិសោធទាក់ទងបច្ចេកទេសនៃការគ្រប់គ្រងអភិបាលកិច្ច និងការប្រើប្រាស់បច្ចេកវិទ្យាថ្មីៗជាច្រើនទៀត។ជាការឆ្លើយតប ឯកឧត្តម Phongsaysack INTHALATH អនុរដ្ឋមន្រ្តីក្រសួងការងារ និងសុខុមាលភាពសង្គមនៃសាធារណរដ្ឋប្រជាធិបតេយ្យប្រជាមានិតឡាវ បានថ្លែងអំណរគុណ ឯកឧត្តមរដ្ឋមន្រ្តី ហេង សួរ ដែលបានចំណាយពេលវេលាចែករំលែកបទពិសោធទាក់ទងការគ្រប់គ្រងរបបសន្ដិសុខសង្គមដល់គណៈប្រតិភូឡាវ។ឯកឧត្តម Phongsaysack បានបន្ថែមថា តាមរយៈជំនួបនាព្រឹកនេះឯកឧត្តមនឹងដកស្រង់បទពិសោធដែលឯកឧត្តមរដ្ឋមន្ត្រី ហេង សួរ បានផ្តល់ជូនទៅអនុវត្តតាមស្ថានភាពជាក់ស្ដែងទាក់ទង ការគ្រប់គ្រងអភិបាលកិច្ច និងការអនុវត្តរបបសន្ដិសុខសង្គមនៅប្រទេសឡាវ ដើម្បីលើកកម្ពស់ជីវភាពប្រជាជន៕

អាជ្ញាធរក្រុងស្វាយរៀង ចាត់វិធានការទីតាំងចាក់សំរាមមួយកន្លែង ដែលបន្តចាក់សំរាមចោលបង្កផលប៉ះពាល់

ស្វាយរៀង ៖ ទីតាំងចាក់សំរាមមួយកន្លែងស្ថិតនៅក្នុងភូមិចុងព្រែក សង្កាត់ស្វាយរៀង ក្រុងស្វាយរៀង ខេត្តស្វាយរៀង ត្រូវបានរដ្ឋបាលក្រុងចុះទៅបាញ់ទឹកពន្លត់ បញ្ជៀសភ្លើងឆាបឆេះបង្កផ្សែង និងក្លិនប៉ះពាល់ដល់សុខភាពមនុស្ស និងសត្វនៅក្នុងតំបន់ នៅរសៀលថ្ងៃទី១៤ ខែកក្កដា ឆ្នាំ២០២៥ បន្ទាប់ពីពលរដ្ឋបានរួមគ្នាធ្វើការតវ៉ាដល់សាលាសង្កាត់ និងសាលាក្រុង ដើម្បីចាត់វិធានការដល់ម្ចាស់ទីតាំងបញ្ឈប់ចាក់សម្រាប់នៅទីតាំងខាងលើ ។លោក ជួន រិទ្ធី អភិបាលក្រុងស្វាយរៀង បានប្រាប់ទូរទស្សន៍BTVឲ្យដឹងថា ទីតាំងដែលក្រុងបានចុះទៅបាញ់ទឹកពន្លត់នេះ គឺជាទីតាំងចាស់ ដែលរដ្ឋបាលខេត្តបានណែនាំដល់ម្ចាស់ទីតាំងឱ្យបញ្ឈប់ការចាក់សំរាមតាំងពីចុងឆ្នាំ២០២៤ មកម៉្លេះ តាមរយៈការជូនដំណឹងជាលាយលក្ខអក្សរ និងតាមការណែនាំផ្ទាល់របស់លោកអភិបាលរងខេត្ត និងមន្ទីរជំនាញ រដ្ឋបាលក្រុងជាបន្តបន្ទាប់ តែម្ចាស់ទីតាំងនៅតែឃុបឃិតឲ្យរថយន្តដឹកសំរាមមកចាក់ធ្វើឲ្យអ្នករស់នៅក្នុងតំបន់រងប៉ះពាល់សុខភាព នៅចំពោះមុខភ្លើងផ្សែងនិងក្លិន រដ្ឋបាលក្រុងបាន ពន្លត់ភ្លើងជាមុនៗនិងមានវិធានការចំពោះម្ចាស់ទីតាំងបន្ត ដើម្បីបញ្ជៀសក្លិន និងផ្សែង។ ទាក់ទងទៅនឹងពលរដ្ឋមានប្រតិកម្មចំពោះម្ចាស់ទីតាំងចាក់សំរាម បង្កឲ្យមានក្លិនអាសោចប៉ះពាល់ដល់សុខភាពមនុស្សសត្វ btv បានព្យាយាមសាកសួរទៅម្ចាស់ទីតាំងតាមរយៈទូរសព្ទម្ដងជាពីរដងដែរ តែទូរសព្ទហៅចូលគ្មានអ្នកលើក ។ ជុំវិញបញ្ហានេះដែរអាជ្ញាធរបានបញ្ជាក់បន្ថែមថាបើទោះជាម្ចាស់ទីតាំងមិនគោរពតាមការណែនាំរបស់រដ្ឋបាលខេត្ត ក៏នៅថ្ងៃខាងមុខរដ្ឋបាលក្រុង និងព្យាយាមឲ្យម្ចាស់ទីតាំងធ្វើការឈូសឆាយដឹកអាចម៍ដីចាក់លុបដើម្បីបញ្ជៀសក្លិនតាមការទាមទាររបស់ពលរដ្ឋដែរ៕ ដោយ ៖ ភា សារិទ្ធ

ឧបនាយករដ្ឋមន្ត្រី ហ៊ុន ម៉ានី លើកឡើងថា អភិក្រមរបស់ក្រសួងមុខងារសាធារណៈគឺ ការពិគ្រោះយោបល់ឱ្យបានច្រើន

ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាអនុប្រធានប្រចាំការ គ.វ.រ. បានដឹកនាំកិច្ចប្រជុំលេខាធិការរដ្ឋាន គ.វ.រ. លើកទី៦ ដើម្បីពិនិត្យ និងពិភាក្សាលើបទដ្ឋានគតិយុត្តចំនួន៣ និងបទបង្ហាញពីការធ្វើបច្ចុប្បន្នភាពរចនាសម្ព័ន្ធ និងជំរឿនមន្ត្រីជាក់ស្តែង ជូនដល់តំណាងក្រសួង ស្ថាប័នទាំងអស់ រួមទាំងតំណាងរដ្ឋបាលរាជធានី ខេត្ត ក្នុងការឈ្វេងយល់ពីការធ្វើជំរឿនមន្ត្រី នាពេលខាងមុខ។ជាការកត់សម្គាល់ កិច្ចប្រជុំទទួលបានការផ្តល់នូវមតិយោបល់ចូលរួមជាច្រើន ក៏ដូចជាការពិភាក្សាគ្នាយ៉ាងផុលផុសដោយតំណាងក្រសួង ស្ថាប័ន និងតំណាងរដ្ឋបាលរាជធានី ខេត្ត លើការរៀបចំសេចក្តីព្រាងនៃអនុក្រឹត្យ តាមរបៀបវារៈដែលបានកំណត់។បន្ទាប់ពីបានស្តាប់នូវមតិយោបល់របស់អង្គប្រជុំរួចមក ឯកឧត្តមឧបនាយករដ្ឋមន្ត្រី ហ៊ុន ម៉ានី បានបញ្ជាក់ជូនអង្គប្រជុំថា "អភិក្រមរបស់ក្រសួងមុខងារសាធារណៈ ដែលតែងតែបាន និងកំពុងអនុវត្តជាប្រចាំនោះគឺ ការបំពេញមុខងារពិគ្រោះយោបល់ឱ្យបានច្រើន ហើយស្តាប់មតិយោបល់ពីគ្រប់ភាគីពាក់ព័ន្ធទាំងអស់។ ក្នុងន័យនេះ ឯកឧត្តមឧបនាយករដ្ឋមន្ត្រី បានបន្តដែរថា តាមរយៈការពិភាក្សាការងារជាមួយគ្នាកន្លងមក ទោះបីជាពេលខ្លះមានមតិយោបល់ ស្របគ្នាផង និងមិនស្របគ្នាផងក៏ដោយ យើងក៏អាចរកឃើញចំណុចរួម។ "យើងធ្លាប់តែគិតថាលំបាក តែយើងបានទៅមុខជាមួយគ្នា ស្វែងរកចំណុចរួម ហើយសម្រេចបានការឯកភាពជាទស្សនៈ ប្រកបដោយឆន្ទៈ ដើម្បីឆ្ពោះទៅមុខជាមួយគ្នា ធ្វើឱ្យមានប្រព័ន្ធឯកភាពរដ្ឋបាលតែមួយ។ ទាំងនេះ ជាការអនុវត្តការងាររបស់យើង ស្របតាមចក្ខុវិស័យវែងឆ្ងាយរបស់សម្តេចធិបតី ក្នុងការអនុវត្តវិធានការគន្លឹះ ក្នុងការកែទម្រង់រដ្ឋបាលសាធារណៈ។” ឯកឧត្តមឧបនាយករដ្ឋមន្ត្រី បានបន្ថែម។កិច្ចប្រជុំលេខាធិការរដ្ឋាន គ.វ.រ. លើកទី៦ បានប្រព្រឹត្តទៅនារសៀលថ្ងៃទី១៤ ខែកក្កដា ឆ្នាំ២០២៥ ដោយបានពិភាក្សាលើរបៀបវារៈចំនួន៤ រួមមាន៖ (១)សេចក្តីព្រាងអនុក្រឹត្យស្តីពីការរៀបចំ និងការប្រព្រឹត្តទៅនៃអគ្គលេខាធិការដ្ឋានរបស់ក្រសួង ស្ថាប័ន ចំណុះអង្គការនីតិប្រតិបត្តិ (២)សេចក្តីព្រាងអនុក្រឹត្យស្តីពីការរៀបចំអង្គភាពសវនកម្មផ្ទៃក្នុងក្រសួង ស្ថាប័ន ចំណុះអង្គភាពនីតិប្រតិបត្តិ (៣)សេចក្តីព្រាងអនុក្រឹត្យស្តីពីការបង្កើតគណៈកម្មាធិការលើកកម្ពស់អភិបាលកិច្ចក្រសួង ស្ថាប័ន ចំណុះអង្គភាពនីតិប្រតិបត្តិ និង (៤)ការធ្វើបច្ចុប្បន្នភាពរចនាសម្ព័ន្ធ និងជំរឿនមន្ត្រីជាក់ស្តែងនៅតាមរចនាសម្ព័ន្ធនៃគ្រឹះស្ថានសិក្សាសាធារណៈ អង្គភាពសុខាភិបាលមូលដ្ឋាន និងក្រសួង ស្ថាប័ន ចំណុះអង្គភាពនីតិប្រតិបត្តិ៕

សម្តេច ឃួន សុដារី៖ កម្ពុជាមានឆន្ទៈមោះមុតចូលរួមការពារសុខសន្តិភាពតំបន់ ពិភពលោក តាមការសន្ទនា និងកិច្ចសហប្រតិបត្តិការដោយយកពលរដ្ឋជាស្នូល

ភ្នំពេញ៖ ក្នុងឱកាសអញ្ជើញជាអធិបតីដ៏ខ្ពង់ខ្ពស់បើកកិច្ចប្រជុំក្រុមអ្នកនយោបាយ(អាយប៉ា/AIPA)លើកទី១៦ (The 16th AIPA Caucus Meeting) ដែលសភាកម្ពុជាធ្វើជាម្ចាស់ផ្ទះ នៅព្រឹកថ្ងៃអង្គារទី១៥ ខែកក្កដា ឆ្នាំ២០២៥ នៅវិមានរដ្ឋសភា សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា បានមានប្រសាសន៍ថា កម្ពុជាមានឆន្ទៈមោះមុតក្នុងការរួមចំណែកកាន់តែច្រើនដល់ការលើកកម្ពស់សន្តិភាពនៅក្នុងតំបន់ និងពិភពលោក ជំរុញកិច្ចសន្ទនា និងកិច្ចសហប្រតិបត្តិការតាមរយៈការចែករំលែកបទពិសោធន៍ និងការ បញ្ចប់សង្រ្គាមនិងការផ្សះផ្សាជាតិ របស់កម្ពុជាតាម គោលនយោបាយឈ្នះ-ឈ្នះ របស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្តីកម្ពុជា ដែលបច្ចុប្បន្ន ជាព្រឹទ្ធសភា ជាអគ្គមគ្គទេសក៍និងជាប្រតិបត្តិករសន្តិភាពដ៏ឆ្នើមរបស់កម្ពុជា។កិច្ចប្រជុំក្រុមអ្នកនយោបាយអាយប៉ា (AIPA Caucus) ជាកិច្ចប្រជុំសំខាន់ប្រចាំឆ្នាំមួយរបស់ AIPA ដែលសមាជិកអាយប៉ា ត្រូវប្រជុំពិភាក្សាគ្នាពិនិត្យលើវឌ្ឍនភាពនៃការអនុវត្តសេចក្តីសម្រេចដែលអនុម័តដោយមហាសន្និបាតអាយប៉ា កាលពីឆ្នាំកន្លងទៅ។ សភាកម្ពុជាធ្វើជាម្ចាស់កិច្ចប្រជុំក្រុមអ្នកនយោបាយអាយប៉ា ពីថ្ងៃទី១៤ដល់ថ្ងៃទី១៧ ខែកក្កដា ឆ្នាំ២០២៥ នៅវិមានរដ្ឋសភា ក្រោមមូលបទ «សន្តិភាពតាមរយៈការសន្ទនា៖ មាគ៌ាឆ្ពោះទៅមុខរបស់សភា» Peace through dialogue: The Parliamentary Path Forward) ដែលមានការអញ្ជើញចូលរួមពីថ្នាក់ដឹកនាំ សមាជិកសមាជិកាព្រឹទ្ធសភា រដ្ឋសភា រាជរដ្ឋាភិបាល និងគណៈ ប្រតិភូសមាជិកអន្តរសភាអាស៊ាន (AIPA) ប្រទេសសង្កេតការណ៍ AIPA និងប្រទេសដែលជាភ្ញៀវរបស់សភាកម្ពុជា ដែលជាម្ចាស់ផ្ទះ និងដៃគូអភិវឌ្ឍន៍នានាសរុបប្រមាណជិត៣០០នាក់។នៅក្នុងពិធីបើកកិច្ចប្រជុំ ក្រុមអ្នកនយោបាយអាយប៉ា លើកទី១៦ សម្តេចរដ្ឋសភាធិបតី បានកត់សម្គាល់ថា វត្តមានតំណាងរាស្រ្តក្នុងតំបន់អាស៊ាន ប្រទេសសង្កេតការណ៍ និងគណៈប្រតិភូដែលជាដៃគូអភិវឌ្ឍន៍ គឺជាព្រឹត្តិការណ៍ដ៏សំខាន់និងគួរឱ្យកត់សម្គាល់សម្រាប់គ្រួសារ អាយប៉ា។ ការជួបជុំនេះ បានឆ្លុះបញ្ចាំងពីចក្ខុវិស័យនិងការប្តេជ្ញាចិត្តរួមគ្នាក្នុងការបើកទូលាយ និងបរិយាប័ន្ន ពហុភាគីនិយមដែល មិនត្រឹមតែដើម្បីត្រួតពិនិត្យវឌ្ឍនភាពនៃការអនុវត្តសេចក្តីសម្រេចរបស់មហាសន្និបាត AIPA ប៉ុណ្ណោះទេ ប៉ុន្តែ ក៏ដើម្បីផ្លាស់ប្តូរទស្សនៈលើប្រធានបទ "សន្តិភាពតាមរយៈការសន្ទនា ៖ មាគ៌ាឆ្ពោះទៅមុខរបស់សភា"ជាមួយនឹងការសង្កត់ធ្ងន់លើតួនាទីនៃការទូតសភាដើម្បីសន្តិភាព និងវិបុលភាព”។សម្តេចប្រធានរដ្ឋសភា មានជំនឿមុតមាំថា ការគិតរួមគ្នា និងកិច្ចខិតខំប្រឹងប្រែងរួមគ្នា ពិតជាមានសារៈ សំខាន់ ក្នុងការផ្តល់នូវដំណោះស្រាយ និងការកសាងប្រព័ន្ធអន្តរជាតិ ដែលកាន់តែមានលក្ខណៈបរិយាបន្ន ត្រឹមត្រូវ និងយុត្តិធម៌សម្រាប់មនុស្សគ្រប់រូប។ ក្នុងន័យនេះ ប្រទេសកំពុងអភិវឌ្ឍ ប្រទេសលោកខាងត្បូង (Global South) ដើរតួនាទីកាន់តែសំខាន់ឡើង ក្នុងការរៀបចំនូវទម្រង់ បង្កើតនូវបទដ្ឋាន និងពង្រឹងនូវអភិបាលកិច្ចសកល។តំបន់អាស៊ាន និងពិភពលោក បាននិងកំពុងប្រឈមមុខនឹងបញ្ហា និងរងសម្ពាធយ៉ាង ច្រើនរាប់មិនអស់ រួមទាំងការកើនឡើងនៃការប្រកួតប្រជែងភូមិសាស្ត្រនយោបាយ ការចុះខ្សោយនៃប្រព័ន្ធពហុភាគីនិយម ព្រមទាំងសញ្ញានៃការបែកខ្ញែកសេដ្ឋកិច្ច វិវាទនានាទាក់ទងនឹងអធិបតេយ្យ និងជម្លោះប្រដាប់អាវុធ រួមផ្សំនឹងការគំរាមកំហែងសន្តិសុខមិនប្រពៃណី ដូចជា ការប្រែប្រួលអាកាសធាតុ ការរេចរឹលបរិស្ថាន ឧក្រិដ្ឋកម្មឆ្លងដែនដ៏ស្មុគ្រ ស្មាញ វិសមភាពកាន់តែរីកធំឡើង សន្តិសុខសុខភាពសកល ភាពរអាក់រអួលនៃបច្ចេកវិទ្យា និងវិបត្តិមនុស្សធម៌ ជាដើម។សម្តេចប្រធានរដ្ឋសភាកម្ពុជា បានលើកឡើងថា "យើងត្រូវរួមគ្នារារាំងឯកតោភាគីនិយម អាកប្បកិរិយា អនុត្តរភាពនិយម និងការការពារនិយម ដែលធ្វើឱ្យខូចដល់អភិបាលកិច្ចសកល និងច្បាប់អន្តរជាតិ។ យើងត្រូវមានភាពក្លាហាន និងចូលរួមដើម្បីការពារគោលបំណង និងគោលការណ៍នៃធម្មនុញ្ញអង្គការសហប្រជាជាតិ។ បើយើងមិនក្រោកឈរទេ អ្នកណានឹងក្រោកឈរឡើង?”។សូមជម្រាបថា ការសម្រេចបាននូវសុខសន្តិភាព និងការអភិវឌ្ឍរបស់កម្ពុជានាពេលបច្ចុប្បន្ននេះ ជាពិសេស “គោលនយោបាយឈ្នះ-ឈ្នះ” ដែលជាគំនិតផ្តួចផ្តើមរបស់ សម្តេចតេជោ ហ៊ុន សែន ជាមូលដ្ឋានគ្រឹះសម្រាប់ការផ្សះផ្សាជាតិ និងស្ថិរភាពនយោបាយ។ គោលនយោបាយនេះ ដែលបានបញ្ចប់ជម្លោះផ្ទៃក្នុងជាច្រើនទសវត្សរ៍ដោយមិនប្រើគ្រាប់កាំភ្លើងសូម្បីតែ ១គ្រាប់ បានអនុញ្ញាតឱ្យកម្ពុជាសម្រេចបានកំណើនសេដ្ឋកិច្ចប្រកបដោយនិរន្តរភាព និងចូលរួមក្នុងភាពជាដៃគូក្នុងតំបន់ និងអន្តរតំបន់ ប្រកបដោយទំនុកចិត្ត។ ក្នុងបរិការណ៍នេះ ការចូលរួមរបស់កម្ពុជាក្នុងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ដែលជាកិច្ចព្រមព្រៀងពាណិជ្ជកម្មដ៏សំខាន់ក្នុងចំណោមប្រទេសអាស៊ីប៉ាស៊ីហ្វិក១៥ ប្រទេស បានបង្ហាញពីរបៀបដែលស្ថិរភាពជាតិអាចត្រូវបានប្រើប្រាស់ដើម្បីពង្រឹងកិច្ចសហប្រតិបត្តិការត្បូង-ត្បូង។សម្តេចរដ្ឋសភាធិបតី ឃួន សុដារី បានសង្កត់ធ្ងន់ថា ដើម្បីលើកកម្ពស់សន្តិភាពក្នុងតំបន់ ត្រូវការស្ថាប័នក្នុងតំបន់ដ៏រឹងមាំមួយ។ ចក្ខុវិស័យសហគមន៍អាស៊ានឆ្នាំ២០៤៥ ដើម្បីកសាងអាស៊ាន ដែលផ្តោតលើប្រជាពលរដ្ឋ ពោរពេញដោយឋាមវន្ត នវានុវត្តន៍ និងមានភាពធន់ គឺចង់សង្កត់ធ្ងន់ថា ប្រជាពលរដ្ឋអាស៊ាន ជាបេះដូងនៃកិច្ចខិតខំប្រឹងប្រែងរបស់យើងទាំងអស់គ្នា និងគឺដើម្បីធានាឱ្យមានការចូលរួមប្រកបដោយអត្ថន័យនិងបរិយាបន្នពីភាគីពាក់ព័ន្ធទាំងអស់នៅ ក្នុងដំណើរការនៃការកសាងសហគមន៍អាស៊ាន។ ត្រង់នេះ អាយប៉ាពិតជាមានតួនាទី សំខាន់ណាស់នៅក្នុងដំណើការខាងលើនេះ។ជាមួយគ្នានេះ សម្តេចប្រធានរដ្ឋសភា ក៏បានសង្កត់បន្ថែមថា ដើម្បីលើកកម្ពស់សន្តិភាពពិភពលោក យើងត្រូវពង្រឹងអភិបាលកិច្ចសកល និងសណ្តាប់ធ្នាប់អន្តរជាតិដែលផ្អែកលើច្បាប់ ខណៈពេលដែលការកែទម្រង់ប្រព័ន្ធអន្តរជាតិនេះឱ្យកាន់តែរួមបញ្ចូលយុត្តិធម៌ និងយុត្តិធម៌។ អន្តរសភាអាស៊ាន ហៅកាត់ថាអាយប៉ា (AIPA) ជាវេទិកាសភានៃបណ្ដាប្រទេសជាសមាជិកអាស៊ាន ដែលតំណាងឱ្យពលរដ្ឋប្រមាណជិត ៧០០លាននាក់ ក្នុងក្របខ័ណ្ឌនីតិប្បញ្ញត្តិ ដើម្បីប្រមូលផ្តុំនូវមតិ យោបល់ ទស្សនៈរបស់តំណាងពលរដ្ឋ ក្រោមចក្ខុវិស័យទូលំទូលាយ និងកិច្ចសហប្រតិបត្តិការជិតស្និទ្ធ ក្នុងគោលបំណងដោះស្រាយបញ្ហារួមរបស់ពិភពលោកដែលប៉ះពាល់ដល់តំបន់អាស៊ីអាគ្នេយ៍ និងដើម្បីជំរុញឱ្យមានសន្តិសុខ ស្ថិរភាពនិងវិបុលភាព ជូនពលរដ្ឋ។ អាយប៉ាមានសមាជិកចំនួន ១០ប្រទេស រួមមាន៖ ប្រទេសព្រុយណេដារូស្សាឡឹម កម្ពុជា ឥណ្ឌូនេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សឹង្ហបុរី ថៃ និងវៀតណាម៕

សម្តេចប្រធានរដ្ឋសភាកម្ពុជា និងប្រធានរដ្ឋសភាទីម័រឡេស្តេពិភាក្សាគ្នាជំរុញទំនាក់ទំនងការទូតសភា ពង្រីកវិស័យទេចរណ៍ ពាណិជ្ជកម្ម និងអប់រំប្រទេសទាំងពីរ

ភ្នំពេញ៖ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា បានទទួលជួបពិភាក្សាការងារជាមួយ លោកជំទាវ ម៉ារៀ ហ្វើណាន់ដា ឡៃ (Maria Fernanda Lay) ប្រធានរដ្ឋសភា នៃសាធារណរដ្ឋប្រជាធិបតេយ្យទីម័រឡេស្តេ នៅព្រឹកថ្ងៃទី១៥ ខែកក្កដា ឆ្នាំ២០២៥ នៅវិមានរដ្ឋសភា ក្នុងឱកាសដែលលោកជំទាវ អញ្ជើ្ចញចូលរួមជាភ្ញៀវកិត្តិយសកម្ពុជា ក្នុងកិច្ច ប្រជុំ លើកទី ១៦ នៃក្រុមអ្នកនយោបាយអន្តរសភាអាស៊ាន (The 16th AIPA Caucus)។ក្នុងនាមរដ្ឋសភាកម្ពុជា និងក្នុងនាមសម្តេចផ្ទាល់សម្តេចរដ្ឋសភាធិបតី បានស្វាគមន៍យ៉ាងកក់ក្តៅចំពោះវត្តមានរបស់ លោកជំទាវ ម៉ារៀ ហ្វើណាន់ដា ឡៃ។ វត្តមានរបស់គណៈប្រតិភូរដ្ឋសភាទីម័រឡេស្តេនាពេលនេះ ពិតជាមានសារៈសំខាន់ និងជាកិត្តិយសដ៏ធំសម្រាប់សភាកម្ពុជា ដោយបានបង្ហាញយ៉ាងច្បាស់ពីស្មារតីមិត្តភាព សាមគ្គីភាព និងឆន្ទៈដ៏មោះមុតក្នុងការពង្រឹង លើកកម្ពស់ទំនាក់ទំនង និងកិច្ចសហប្រតិបត្តិការទ្វេភាគីរវាងប្រទេសទាំងពីរ ជាពិសេសទំនាក់ទំនងរវាងស្ថាប័ននីតិប្បញ្ញត្តិ កម្ពុជា-ទីម័រឡេស្តេ។ សម្តេចបានសង្កត់ធ្ងន់ថា ជាមួយគ្នានេះវត្តមានរបស់គណៈប្រតិភូទីម័រឡេស្តេនៅក្នុងកិច្ចប្រជុំ AIPA Caucus លើកទី១៦ ដែលសភាកម្ពុជាធ្វើជាម្ចាស់ សបញ្ជាក់ឱ្យឃើញនូវស្មារតី បំណងប្រាថ្នា និងឆន្ទៈមុតស្រួចរបស់ទីម័រឡេស្តេ ក្នុងការត្រៀមខ្លួនក្លាយជាសមាជិកផ្លូវការរបស់ AIPA នាពេលខាងមុខ។ សម្តេចបានបញ្ជាក់ថា សម្តេចតេជោ ហ៊ុន សែន ដែលបច្ចុប្បន្នជាប្រធានព្រឹទ្ធសភាកម្ពុជា គឺតំាងពីពេលសម្តេចតេជោ នៅជានាយករដ្ឋមន្រ្តីកម្ពុជាមកម៉្លេះ បានគំាទ្រនិងជំរុញជានិច្ច ធ្វើយ៉ាងណាឱ្យទីម័រឡេស្ត បានក្លាយជាសមាជិកទី១១របស់អាស៊ានក៏ដូចជាអាយប៉ាដែរ។ កម្ពុជានិងទីម័រឡេស្តេ គឺជាមិត្តដ៏ជិតស្និទ្ធ និងជាដៃគូប្រកបដោយជំនឿទុកចិត្ត។ ជាក់ស្តែង ដំណើរទស្សនកិច្ចផ្លូវការដ៏ជោគជ័យ កាលពីខែឧសភាកន្លងទៅថ្មីៗនេះរបស់ សម្តេចតេជោ ហ៊ុន សែន ទៅកាន់ប្រទេសទីម័រឡេស្តេ គឺជាដំណើរទស្សនកិច្ចជាប្រវត្តិសាស្ត្រ ដែលបង្ហាញពីភាពរឹងមាំនៃទំនាក់ទំនងរវាងកម្ពុជានិងទីម័រឡេស្តេ និងជាការបើកផ្លូវដល់ការពង្រីកទំនាក់ទំនងទ្វេភាគីរបស់យើង នៅគ្រប់យន្តការជាបន្តបន្ទាប់។ នៅត្រង់ចំណុចនេះ សម្តេចរដ្ឋសភាធិបតី បានគូសបញ្ជាក់ថា លោកជំទាវ បានជ្រាបហើយថា សម្តេចតេជោ ហ៊ុន សែន បានផ្តួចផ្តើមបង្កើតឱ្យមានធម្មនុញ្ញសន្តិភាពជាសកល ដែលត្រូវបានកិច្ចប្រជុំពេញអង្គលើកទី១១ នៃវេទិកាអន្តរជាតិស្តីពីភាពអត់ឱននិងសន្តិភាព (IPTP) បានអនុម័តកាលពីខែវិច្ឆិកា ឆ្នាំ២០២៤ កន្លងទៅ ដែលកម្ពុជាធ្វើជាម្ចាស់ផ្ទះរៀបចំ។ នេះជាការរួមចំណែកដ៏សំខាន់មួយទៀតរបស់ សម្តេចតេជោ ចំពោះសន្តិភាព និងវិបុលភាពតំបន់ និងពិភពលោក។ ធម្មនុញ្ញសន្តិភាពសកលនេះ ក្លាយជាចលនាសកលមួយ ដើម្បីសន្តិភាព និងវិបុលភាពរួម។ លោកជំទាវ ម៉ារៀ ហ្វើណាន់ដា ឡៃ បានថ្លែងអំណរគុណយ៉ាងជ្រាលជ្រៅជូនសម្តេចរដ្ឋសភាធិបតី ដែលបានទទួលស្វាគមន៍យ៉ាងកក់ក្តៅជាទីបំផុតជូនដល់លោកជំទាវ នៅក្នុងឱកាសចូលរួមកិច្ចប្រជុំ AIPA Caucus លើកទី១៦នេះ។ លោកជំទាវប្រធានរដ្ឋសភា បានថ្លែងកោតសរសើរពីការរីកចម្រើនរបស់កម្ពុជា ក៏ដូចជាធនធានធម្មជាតិដ៏សម្បូរបែបរបស់កម្ពុជា។ ជាមួយគ្នានេះ លោកជំទាវក៏បានថ្លែងអំណរជូនដល់កម្ពុជា ពិសេសសម្តេចតេជោ ហ៊ុន សែន ដែលបានគំាទ្រដល់ទីម័រឡេស្តេនៅក្នុងការចូលជាសមាជិកអាស៊ាន។ លោកជំទាវបានគូសបញ្ជាក់ថាការគំាទ្រកម្ពុជានិងក្លាយជាកាលានុវត្តន៍ថ្មីសម្រាប់ការចូលរួមរបស់ទីម័រឡេស្តនៅក្នុងការកសាងសុខសន្តិភាព ការអភិវឌ្ឍប្រកបដោយចីរភាពនិងបរិយាប័ន្ននៅក្នុងតំបន់និងសកលលោក។ សម្តេចរដ្ឋសភាធិបតី ឃួន សុដារី និងលោកជំទាវ ម៉ារៀ ហ្វើណាន់ដា ឡៃ បានពិភាក្សាគ្នាលម្អិត នៅក្នុងការពង្រឹងពង្រីកកិច្ចសហប្រតិបត្តិសភាប្រទេសទំាងពីរ ពិសេសការជំរុញឱ្យមានការចុះអនុស្សរណៈនៃការយោគយល់គ្នារវាងរដ្ឋសភាប្រទេសទំាងពីរ ការពង្រីកទំនាក់ទំនងប្រជាជននិងប្រជាជន រួមមានការភ្ជាប់ជើងហោះហើរត្រង់រវាងប្រទេសទំាងពីរ ការជំរុញវិស័យពាណិជ្ជកម្ម។ កម្ពុជាមានអង្ករ ចំណែកទីម័រឡេស្ត មាន ប្រេង។ ប្រធានរដ្ឋសភាទាំងពីរបានវាយតម្លៃខ្ពស់ និងបានគូសបញ្ជាក់ពីសារៈសំខាន់នៃការលើកកម្ពស់សមភាពយេនឌ័រ និងការចូលរួមយ៉ាងសកម្មរបស់ស្រ្តីជាដៃគូរមិនអាចខ្វះបាននិងបុរស។កម្ពុជា គឺជាប្រទេសដែលស្រលាញ់សន្តិភាព។ សម្តេចរដ្ឋសភាធិបតី បានលើកឡើងថា កម្ពុជាតែងប្រកាន់ខ្ជាប់នូវគោលការណ៍រួមរស់ដោយសន្តិភាព និងការគោរពច្បាប់អន្តរជាតិ។ នាពេលថ្មីៗនេះ កម្ពុជាកំពុងមានជម្លោះព្រំដែនរវាងកម្ពុជា-ថៃ ដែលបង្កឡើងដោយក្រុមជ្រុលនិយមរបស់ថៃ។ កម្ពុជាបានអនុវត្តនូវមធ្យោបាយស្វែងរកដំណោះស្រាយដោយសន្តិវិធីតាមរយៈការចរចាទ្វេភាគី ផ្អែកលើយន្តការដែលមានស្រាប់ និងជាពិសេសការគោរពច្បាប់អន្តរជាតិ។ ជាពិសេសកម្ពុជាចង់បានណាស់នូវ “ព្រំដែនសន្តិភាព មិត្តភាព កិច្ចសហប្រតិបត្តិការ និងការអភិវឌ្ឍ” ប៉ុន្តែភាគីថៃមិនទទួលយកហើយតែងតែ បង្កជម្លោះ ហើយពេលនេះបានពង្រីកពីបញ្ហាព្រំដែនទៅជារឿងសេដ្ឋកិច្ច ពាណិជ្ជកម្ម តាមរយៈការបិទព្រំដែនជាឯកតោភាគី ធ្វើឱ្យប៉ះពាល់កាន់តែធ្ងន់ធ្ងរដល់ទំនាក់ទំនងប្រទេសទំាងពីរពិសេសជីវភាពពលរដ្ឋទំាងសងខាង។លោកជំទាវ ម៉ារៀ ហ្វើណាន់ដា ឡៃ បានស្តាប់ដោយយកចិត្តទុកដាក់និងបានអរគុណជូន សម្តេចប្រធានរដ្ឋសភា ដែលបានលើកឡើងករណីនេះ។ លោកជំទាវប្រធានរដ្ឋសភាទីម័រឡេស្តេក៏បានចែករំលែកបទពិសោធន៍ការដោះស្រាយបញ្ហាព្រំដែន របស់ប្រទេសទីម័រឡេស្តេជាមួយប្រទេសជិតខាង ដោយបានគូសបញ្ជាក់ថា បញ្ហាព្រំដែនមិនអាចដោះស្រាយដោយសសង្រ្គាមឬហិង្សានោះទេ។ មានតែការសន្ទនា ប៉ុណ្ណោះទើបអាចកសាងបាននូវព្រំដែនសន្តិភាព កិច្ចសហប្រតិបត្តិការបានយូរអង្វែង៕

បណ្ដាញសង្គម

ព័ត៌មានថ្មីៗ

លោក Trump ប្រារព្ធខួបកំណើត៨០ឆ្នាំដោយមានការប្រកួតប្រដាល់ក្នុងទ្រុង និងកិច្ចព្រមព្រៀងជាមួយអ៊ីរ៉ង់

កិច្ចព្រមព្រៀងរវាងអាមេរិក និងអ៊ីរ៉ង់ បង្កើនក្តីសង្ឃឹមថា «សន្តិភាពនឹងត្រឡប់មកវិញ» នៅមជ្ឈិមបូព៌ា

មេដឹកនាំពិភពលោកបញ្ចេញប្រតិកម្មចំពោះការប្រកាសអំពីកិច្ចព្រមព្រៀងសន្តិភាពរវាងអាមេរិក-អ៊ីរ៉ង់

[UPDATE] ប៉ាគីស្ថាន៖ អាមេរិក និងអ៊ីរ៉ង់ បានឈានដល់កិច្ចព្រមព្រៀងបញ្ចប់សង្គ្រាម ហើយការចុះហត្ថលេខាត្រូវធ្វើឡើងនៅថ្ងៃសុក្រ

ក្រសួងបរិស្ថានគាំទ្រសហគមន៍តំបន់ការពារធម្មជាតិនៅកម្ពុជា ចូលរួមការពារនិងអភិរក្សធនធានធម្មជាតិ និងលើកកម្ពស់ជីវភាពប្រជាពលរដ្ឋនៅតាមសហគមន៍

អ៊ីរ៉ង់៖ បុណ្យសពអតីតមេដឹកនាំកំពូល នឹងចាប់ផ្តើមនៅថ្ងៃទី ៤ ខែកក្កដា ហើយបញ្ចប់ជាមួយការបញ្ចុះសពនៅថ្ងៃទី ៩ខែកក្កដា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877