BTV NEWS

សមត្ថកិច្ចខេត្តមណ្ឌលគិរី និងខេត្តសៀមរាប ឃាត់ខ្លួនជនបរទេសចំនួន១៦២នាក់ ក្នុងប្រតិបត្តិការបង្រ្កាបបទល្មើសតាមប្រព័ន្ធបច្ចេកវិទ្យា

ជនបរទេស១៣នាក់ត្រូវបានឃាត់ខ្លួនក្នុងប្រតិបត្តិការបង្រ្កាបបទល្មើសតាមប្រព័ន្ធបច្ចេកវិទ្យានៅសៀមរាប

ចៅក្រមស៊ើបសួរសាលាដំបូងរាជធានីភ្នំពេញសម្រេចឃុំខ្លួនជនត្រូវចោទ៨នាក់ជាបណ្តោះអាសន្នពាក់ព័ន្ធអំពើឆបោកតាមឆបោកតាមប្រព័ន្ធអនឡាញ

ត្រឹមថ្ងៃទី១៩កក្កដា សមត្ថកិច្ចរាជធានី-ខេត្ត បង្រ្កាបករណីឆបោកតាមប្រព័ន្ធបច្ចេកវិទ្យា ៥២ទីតាំង ឃាត់ខ្លួនជនសង្ស័យ ២.៧៦៧ នាក់ មានជនជាតិចិនចំនួន ៨៤៣នាក់

សន្តិសុខ និង សង្គម

ប្រធានាធិបតីគុយបា ដឹកនាំបាតុកម្មគាំទ្រប៉ាឡេស្ទីន ឆ្លងកាត់ខាងមុខស្ថានទូតអាមេរិកក្នុងទីក្រុងឡាហាវ៉ាន់

ប្រជាជនគុយបារាប់ម៉ឺននាក់ ដឹកនាំដោយប្រធានាធិបតី លោក Miguel Diaz-Canel កាលពីថ្ងៃព្រហស្បតិ៍ បានធ្វើបាតុកម្មដើរដង្ហែរនៅខាងមុខស្ថានទូតសហរដ្ឋអាមេរិកក្នុងទីក្រុងឡាហាវ៉ាន់ ដោយបានចោទប្រកាន់អ៊ីស្រាអែលថា កំពុងប្រព្រឹត្ត«អំពើប្រល័យពូជសាសន៍» ទៅលើពលរដ្ឋប៉ាឡេស្ទីននៅក្នុងតំបន់ហ្កាហ្សា។ការដង្ហែរបាតុកម្ម ដែលបានធ្វើដំណើរតាមឆ្នេរសមុទ្ររបស់ទីក្រុងឡាហាវ៉ាន់ នៅតំបន់ Malecon ជាទីស្នាក់ការការទូតរបស់សហរដ្ឋអាមេរិកមានទីតាំងនៅទីនោះ ជាលើកដំបូងក្នុងរយៈពេលជាងមួយទសវត្សរ៍មកនេះ។ហ្វូងមនុស្សដែលកាន់ទង់ជាតិប៉ាឡេស្ទីន និងបដា បានស្រែកពាក្យថា «សេរីភាព សេរីភាព ប៉ាឡេស្ទីន អ៊ីស្រាអែលប្រព្រឹត្តអំពើប្រល័យពូជសាសន៍» និងពាក្យថា «រួមគ្នាដើម្បីសេរីភាពប៉ាឡេស្ទីន» ខណៈបាតុកម្មបានដើរដង្ហែរនៅក្បែរអគារស្ថានទូត និងបានប្រមូលផ្តុំគ្នានៅទីនោះ។ប្រទេសគុយបា ជាអ្នកគាំទ្រយ៉ាងខ្លាំងចំពោះបុព្វហេតុប៉ាឡេស្ទីនអស់រយៈពេលជាច្រើនទសវត្សរ៍មកហើយ ហើយបានបណ្តុះបណ្តាលវេជ្ជបណ្ឌិតប៉ាឡេស្ទីនជាង ២០០នាក់។ប្រទេសនេះ ពុំមានទំនាក់ទំនងការទូតជាមួយប្រទេសអ៊ីស្រាអែលនោះទេ។

ក្រុមសិទ្ធិមនុស្សហៃទី ផ្អាកប្រតិបត្តិការ បន្ទាប់ពីមានការគំរាមកំហែង

នាយកប្រតិបត្តិរបស់ខ្លួន បាននិយាយកាលពីថ្ងៃព្រហស្បតិ៍ថា មជ្ឈមណ្ឌលសម្រាប់ការវិភាគ និងស្រាវជ្រាវសិទ្ធិមនុស្ស (CARDH) របស់ប្រទេសហៃទី កំពុងផ្អាកការងាររបស់ខ្លួន ជាបណ្ដោះអាសន្ន ដោយសារតែគ្រោះថ្នាក់ដែលអាចកើតឡើងចំពោះបុគ្គលិករបស់ខ្លួន ខណៈដែលសង្រ្គាមក្រុមជនអន្ធពាល កើនឡើងនៅក្នុងផ្នែកខ្លះនៃរដ្ឋធានីព័រអូប្រាំង។លោក Gedeon Jean ដែលដឹកនាំប្រតិបត្តិការមានមនុស្ស ១៦នាក់ បាននិយាយថា សហសេវិកដែលត្រូវបានចាប់ជំរិតកាលពីថ្ងៃទី២៩ ខែតុលា និងត្រូវបានដោះលែង នៅថ្ងៃទី១៧ ខែវិច្ឆិកា បានព្រមានថា ក្រុមដែលចាប់ពង្រត់គាត់ កំពុងផ្តោតលើអង្គការ ដែលការងាររបស់ខ្លួនគឺ «រំខាន»ដល់វិស័យជាក់លាក់មួយចំនួន ។លោកJean បាននិយាយថា៖«គាត់ បានបញ្ជាក់ថា ខ្ញុំត្រូវបានកំណត់គោលដៅដោយផ្ទាល់ពីក្រុមចាប់ ជំរិត។«របាយការណ៍ និងការវិភាគរបស់ CARDH បានបង្ហាញពីទំនាក់ទំនងជិតស្និទ្ធរវាងឧក្រិដ្ឋកម្ម នយោបាយ និងសេដ្ឋកិច្ច នៅក្នុងប្រទេសហៃទី ដោយផ្តោតការយកចិត្តទុកដាក់លើ «ចៅហ្វាយនាយ» ពិតប្រាកដនៃឧស្សាហកម្មឧក្រិដ្ឋកម្ម ដែលមិនមែនជាមេដឹកនាំក្រុមជនអន្ធពាល។សហរដ្ឋអាមេរិក និងកាណាដា បានដាក់ទណ្ឌកម្មលើអ្នកនយោបាយ និងពាណិជ្ជករមួយចំនួនដែលត្រូវបានចោទប្រកាន់ថា បានជួយផ្តល់ហិរញ្ញវត្ថុដល់ក្រុមអន្ធពាល។

ហាម៉ាសអះអាងថា មនុស្សប្រហែល៣០នាក់ បានស្លាប់ក្នុងការវាយប្រហាររបស់អ៊ីស្រាអែលលើសាលារៀនរបស់UN

ក្រុមហាម៉ាស បានអះអាងនៅក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ថា មនុស្សប្រហែល ៣០ នាក់ ត្រូវបានសម្លាប់នៅក្នុងការវាយប្រហាររបស់អ៊ីស្រាអែលទៅលើសាលារៀនមួយ ដែលមានទំនាក់ទំនងជាមួយទីភ្នាក់ងារជនភៀសខ្លួនប៉ាឡេស្ទីនរបស់អង្គការសហប្រជាជាតិ នៅតំបន់ហ្កាហ្សាភាគខាង ជើង។សាលារៀននេះ មានមូលដ្ឋាននៅក្នុងជំរុំជនភៀសខ្លួន Jabalia ដែលអគារជាច្រើន បានក្លាយជាកម្ទេចកម្ទី បន្ទាប់ពីការវាយប្រហារតាមផ្លូវអាកាសដ៏ខ្លាំងក្លា ចាប់តាំងពីថ្ងៃទី៧ ខែតុលា។ការវាយប្រហារនោះ បានកើតឡើងនៅល្ងាច មុនពេលមានការផ្អាកក្នុងការប្រយុទ្ធគ្នាជាបណ្តោះអាសន្ន រយៈពេល៤ថ្ងៃ ដែលនឹងត្រូវចាប់ផ្តើម នៅថ្ងៃសុក្រ ម៉ោង៧ព្រឹក ដែលនឹងឃើញចំណាប់ថ្នូរអ៊ីស្រាអែលនិងអ្នកទោសប៉ាឡេស្ទីន ត្រូវបានដោះលែងផងដែរ។កិច្ចព្រមព្រៀងនេះ មានបទឈប់បាញ់ពេញលេញ ដោយមិនមានការវាយលុកពីអាកាស ឬដី និងនៅលើមេឃមិនមានយានដ្រូន ដើម្បីអនុញ្ញាតឲ្យមានការដោះលែងចំណាប់ថ្នូរ កើតឡើង ក្នុងបរិយាកាសមានសុវត្ថិភាព។

មេដឹកនាំក្រុមហាម៉ាស លោក អ៊ីស្មេល ហានីយ៉េ ដឹកនាំការទូតរបស់ក្រុមខ្លួន នៅពេលដែលសង្រ្គាមនៅតំបន់ហ្កាហ្សា ផ្ទុះឡើង

លោក អ៊ីស្មេល ហានីយ៉េ (Ismail Haniyeh) មេដឹកនាំក្រុមហាម៉ាស ដែលមានមូលដ្ឋាននៅប្រទេស កាតា មានការចរចាដ៏តឹងតែងពីទំនាក់ទំនងការទូតអន្តរជាតិរបស់ក្រុមប៉ាឡេស្ទីន ខណៈដែលសង្រ្គាមបានផ្ទុះឡើងនៅតំបន់ហ្កាហ្សា ជាកន្លែងដែលផ្ទះគ្រួសាររបស់ខ្លួន ត្រូវបានបំផ្លាញ នៅក្នុងការវាយប្រហារតាមអាកាសរបស់អ៊ីស្រាអែល នៅក្នុងខែវិច្ឆិកានេះ។ដោយត្រូវបានតែងតាំងឲ្យកាន់ការងារសំខាន់របស់ក្រុមសកម្មប្រយុទ្ធក្នុងឆ្នាំ ២០១៧ លោកបានផ្លាស់ទីលំនៅនៅចន្លោះប្រទេសទួរគី និងរដ្ឋធានីដូហារបស់ប្រទេសកាតា ដោយគេចចេញពីការរឹតបន្តឹងការធ្វើដំណើរនៅក្នុងតំបន់ហ្កាហ្សាស្ទ្រីប ដែលត្រូវបានបិទ និងអាចធ្វើឲ្យលោកដើរតួជាអ្នកចរចា ក្នុងកិច្ចព្រមព្រៀងបទឈប់បាញ់ចុងក្រោយ ឬនិយាយជាមួយអ៊ីរ៉ង់ដែលជាសម្ព័ន្ធមិត្តដ៏សំខាន់របស់ក្រុមហាម៉ាស។ .លោកហានីយ៉េ បានប្រកាសនៅលើកញ្ចក់ទូរទស្សន៍ Al Jazeera ដែលមានមូលដ្ឋាននៅប្រទេសកាតា ភ្លាមៗ បន្ទាប់ពីក្រុមឧទ្ទាមហាម៉ាស បានបើកការវាយប្រហារលើអ៊ីស្រាអែល កាលពីថ្ងៃទី៧ ខែតុលាដែលបានសម្លាប់មនុស្ស១.២០០នាក់់ និងចាប់មនុស្សជាង២០០នាក់ ជាចំណាប់ថ្នូរថា៖«កិច្ចព្រមព្រៀងទាំងអស់នៃការធ្វើឲ្យមានប្រក្រីភាពទំនាក់ទំនងដែលអ្នក(រដ្ឋអារ៉ាប់) បានចុះហត្ថលេខាជាមួយ (អ៊ីស្រាអែល) នឹងមិនអាចបញ្ចប់ជម្លោះនេះទេ»។ ការឆ្លើយតបរបស់អ៊ីស្រាអែល គឺជាយុទ្ធនាការយោធាដ៏ខ្លាំងក្លា ដែលបានសម្លាប់មនុស្សជាង ១៤.000នាក់ នៅក្នុងតំបន់ហ្កាហ្សា រហូតមកដល់ពេលនេះ។ គ្រួសាររបស់ខ្លួន បាននិយាយថា ចៅពីរនាក់របស់លោកហានីយ៉េ ក៏ស្ថិតក្នុងចំណោមអ្នកស្លាប់ទាំងនោះដែរ។

ជនភៀសខ្លួនអាហ្វហ្គានីស្ថានដែលត្រូវបានបណ្តេញចេញពីប៉ាគីស្ថាន មានធនធានតិចតួចក្នុងរដូវរងា

ប្រធានប្រចាំប្រទេសនៃកម្មវិធីស្បៀងអាហារពិភពលោកស្រីសាវ វេលី (Hsiao-Wei Lee)បាននិយាយនៅថ្ងៃសុក្រ១៧ ខែវិច្ឆិកាកន្លងទៅថា ជនភៀសខ្លួនអាហ្វហ្គានីស្ថានគ្មានឯកសារដែលត្រូវបាននិរទេសដោយប៉ាគីស្ថានបានប្រឈម នឹងរដូវរងាដ៏អាក្រក់ក្នុងពេលមានធនធានតិចតួច។ ទីក្រុង Islamabad កាលពីខែមុនបានប្រកាសថា ខ្លួននឹងបណ្តេញជនភៀសខ្លួនដែលគ្មានឯកសារជាងមួយលាននាក់ ដែលភាគច្រើនជាជនជាតិអាហ្វហ្គានីស្ថាន ស្របពេលមានជម្លោះជាមួយក្រុងកាប៊ុល ជុំវិញការចោទប្រកាន់ថាក្រុមតាលីបង់ បានផ្ដល់ជម្រកដល់ក្រុមសកម្មប្រយុទ្ធប្រឆាំងប៉ាគីស្ថាន។ប្រជាជនអាហ្វហ្គានីស្ថានជាង៣៧០.០០០នាក់ បានភៀសខ្លួនចេញពីប្រទេសប៉ាគីស្ថាន ចាប់តាំងពីថ្ងៃទី១ ខែតុលា ដោយត្រឡប់ទៅរកការប្រឈមក្នុងរដូវរងាជិតមកដល់ ជាប្រទេសមួយដែលរងការបំផ្លិចបំផ្លាញដោយគ្រោះមហន្តរាយធម្មជាតិដ៏ធ្ងន់ធ្ងរជាច្រើន និងការកាត់បន្ថយជំនួយមនុស្សធម៌។ អ្នកនិរទេសអាហ្វហ្គានីស្ថានម្នាក់ដែលរស់នៅបានរយៈ១៤ ឆ្នាំ នៅក្នុងប្រទេសប៉ាគីស្ថានបាននិយាយថាលោកមិនត្រូវបានអនុញ្ញាតឱ្យប្រមូលឯកសាររបស់លោកទាំងអស់ទេ ខណៈត្រូវបាននិរទេស។មួយចំនួនប្រឈមនឹងការរស់នៅក្នុងជំរំតង់ ស្របពេលសីតុណ្ហភាពបានចាប់ផ្តើមហក់ឡើងដល់-4°C ជាការបន្ថែមបន្ទុកលើវិបត្តិមនុស្សធម៌ដែលកំពុងបន្ត។ គួរបញ្ជាក់ថាប៉ាគីស្ថានគឺជាជម្រកសម្រាប់ក្រុមជនអន្តោប្រវេសន៍ និងជនភៀសខ្លួនអាហ្វហ្គានីស្ថានជាង ៤លាននាក់ ក្នុងនោះប្រហែល ១,៧ លាននាក់គ្មានឯកសារ។ ការសម្រុកចេញពីប្រទេសកំណើតដ៏ច្រើនបែបនេះ បានកើតឡើងបន្ទាប់ពីពួកតាលីបង់ដណ្តើមគ្រប់គ្រងប្រទេសអាហ្វហ្គានីស្ថានមកវិញកាលពីឆ្នាំ២០២១ ហើយចំនួនដ៏ច្រើនបានបន្តមកដល់បច្ចុប្បន្ន ចាប់តាំងពីការឈ្លានពានរបស់សហភាពសូវៀត ឆ្នាំ១៩៧៩៕

ចិន៖ គ្មានមេរោគបង្កជំងឺខុសពីធម្មតា ឬជំងឺឆ្លងនោះទេ បន្ទាប់ពី WHO សាកសួរការផ្ទុះឡើងនៃជំងឺផ្លូវដង្ហើម

អង្គការសុខភាពពិភពលោកបាននិយាយថា ប្រទេសចិនបានរាយការណ៍ថាពុំមាន មេរោគខុសពីធម្មតា ឬជំងឺឆ្លងណាមួយទេ នៅក្នុងចង្កោមនៃករណីឆ្លងជំងឺរលាកសួតលើកុមារ។អង្គការសុខភាពពិភពលោក ដែលបានស្នើសុំទិន្នន័យបន្ថែមលើករណីនេះ បាននិយាយថា ទីក្រុងប៉េកាំងបានសន្មតថាមានការកើនឡើងនៃជំងឺដែលដូចទៅនឹងជំងឺផ្តាសាយ គឺដោយសារការដកវិធានការទប់ស្កាត់វីរុស Covid-19 ។ ទោះជាយ៉ាងណាក៏ដោយ អង្គការនេះ បានដាស់តឿនប្រជាពលរដ្ឋរបស់ខ្លួននៅក្នុងប្រទេសចិនឱ្យមានការប្រុងប្រយ័ត្នខ្ពស់ ដូចជាទៅទទួលការចាក់វ៉ាក់សាំង និងពាក់ម៉ាស ជាដើម។ ប្រព័ន្ធផ្សព្វផ្សាយក្នុងស្រុកបានរាយការណ៍ថាមន្ទីរពេទ្យជាច្រើនបានផ្ទុកអ្នកជំងឺដ៏ច្រើនលើសលប់ក្នុងរយៈពេលប៉ុន្មានថ្ងៃថ្មីៗនេះ។នៅក្នុងសេចក្តីថ្លែងការណ៍មួយកាលពីថ្ងៃពុធ អង្គការសុខភាពពិភពលោក (WHO) បាននិយាយថា ខ្លួនបានស្នើសុំប្រទេសចិនសម្រាប់ព័ត៌មានបន្ថែមស្ដីពីរបាយការណ៍នៅក្នុងប្រព័ន្ធផ្សព្វផ្សាយ និងប្រព័ន្ធតាមដានជំងឺ ProMed ដែលជាប្រព័ន្ធឃ្លាំមើលការផ្ទុះឡើងជាសកលនៃ ក្រុមជំងឺរលាកសួតដែលមិនត្រូវបានធ្វើរោគវិនិច្ឆ័យចំពោះកុមារនៅភាគខាងជើងប្រទេសចិន។ ជំងឺរលាកសួត គឺជាពាក្យវេជ្ជសាស្រ្តទូទៅដែលប្រើដើម្បីពិពណ៌នាអំពីការឆ្លងមេរោគ និងការរលាកសួត។ វាអាចបណ្តាលមកពីមេរោគ បាក់តេរី ឬផ្សិតផ្សេងៗ។ បន្ទាប់ពីការស្នើសុំរបស់អង្គការសុខភាពពិភពលោក ទីភ្នាក់ងារសារព័ត៌មានរដ្ឋ Xinhua បានចុះផ្សាយអត្ថបទមួយដែលបានដកស្រង់សម្តីមន្ត្រីនៃគណៈកម្មាធិការសុខភាពជាតិរបស់ប្រទេសចិន (NHC) ដោយនិយាយថាពួកគេកំពុងតាមដានយ៉ាងយកចិត្តទុកដាក់លើការធ្វើរោគវិនិច្ឆ័យ និងការថែទាំកុមារដែលមានជំងឺផ្លូវដង្ហើម៕

ពលរដ្ឋអ៊ីស្រាអែលអន្ទះសារចង់ឃើញការដោះលែងចំណាប់ថ្នូរកាន់តែច្រើន ខណៈបទឈប់បាញ់អុវត្តន៍នៅថ្ងៃសុក្រនេះ

ប្រជាជនអ៊ីស្រាអែលនៅទីក្រុង Tel Aviv កាលពីថ្ងៃព្រហស្បតិ៍ ២៣ វិច្ឆិកា បាននិយាយថា ពួកគេសប្បាយចិត្តដែលបទឈប់បាញ់រយៈពេល ៤ ថ្ងៃ នឹងចាប់ផ្តើមរវាងអ៊ីស្រាអែល និងក្រុមហាម៉ាស ហើយចំណាប់ថ្នូរនឹងត្រូវដោះលែងពីហ្កាហ្សា ប៉ុន្តែបាននិយាយថា ពួកគេចង់ឱ្យចំណាប់ខ្មាំងទាំងអស់វិលត្រលប់មកផ្ទះវិញ។ អ្នកតវ៉ាម្នាក់ គឺ អ្នកស្រី ហ្សានី ហ្គោលែន (Shani Golan) បាននិយាយនៅឯពិធីបួងសួងឲ្យមានការដោះលែងចំណាប់ខ្មាំងក្បែរក្រសួងការពារជាតិថា អ្នកស្រីសប្បាយចិត្តណាស់ ព្រោះយើងបានរង់ចាំដំណឹងនេះជាយូរមកហើយ ។ អ្នកស្រីបន្ថែមថា ម្យ៉ាងវិញទៀត អ្នកដឹងហើយថា យើងមានចំណាប់ខ្មាំងកាន់តែច្រើននៅទីនោះ ហើយ ការសន្យាដោះលែងមនុស្សត្រឹមតែ១៣នាក់ គឺតិចតួចខ្លាំងណាស់បើធៀបទៅនឹងចំនួន ដែលយើងចង់ទទួលបានមកវិញ។ ក្រុមអ្នកសម្របសម្រួលបទឈប់បាញ់រយៈពេលខ្លីនៅក្នុងប្រទេសកាតា បាននិយាយថា អ៊ីស្រាអែល និងក្រុមអ៊ីស្លាមប៉ាឡេស្ទីនហាម៉ាស នឹងចាប់ផ្តើមបទឈប់បាញ់រយៈពេល៤ ថ្ងៃ ព្រឹកនៅថ្ងៃសុក្រ ទី២៤ ខែវិច្ឆិកា ដែលនឹងមានក្រុមទីមួយនៃចំណាប់ខ្មាំងស្ត្រី និង កុមារ អ៊ីស្រាអែល ចំនួន១៣ នាក់ដែលត្រូវបានដោះលែងនៅពេលក្រោយនៅថ្ងៃនោះ។ ក្រសួងការបរទេសរបស់ប្រទេសកាតាបាននិយាយថា កិច្ចព្រមព្រៀងជាលើកដំបូងនៅក្នុងសង្គ្រាមដ៏ព្រៃផ្សៃ ដែលមានរយៈពេលជិត៧សប្តាហ៍ មកហើយនោះ នឹងចាប់ផ្តើមនៅម៉ោង៧ ព្រឹកម៉ោងក្នុងស្រុក ហើយពាក់ព័ន្ធនឹងបទឈប់បាញ់ដ៏ទូលំទូលាយមួយនៅភាគខាងជើង និងភាគខាងត្បូងនៃតំបន់ហ្កាហ្សា៕

អ៊ីស្រាអែល និងក្រុមហាម៉ាស នឹងចាប់ផ្តើមបទឈប់បាញ់រយៈពេលបួនថ្ងៃនៅថ្ងៃសុក្រនេះ

ក្រុមអ្នកសម្រុះសម្រួលក្នុងប្រទេសកាតា បាននិយាយថា អ៊ីស្រាអែល និងក្រុមអ៊ីស្លាមប៉ាឡេស្ទីនហាម៉ាស នឹងចាប់ផ្តើមបទឈប់បាញ់រយៈពេល ៤ ថ្ងៃនៅព្រឹកថ្ងៃសុក្រនេះ ដោយក្រុមដំបូងនៃចំណាប់ថ្នូរស្ត្រី និងកុមារចំនួន ១៣ នាក់ របស់អ៊ីស្រាអែល នឹងត្រូវបានដោះលែងនៅល្ងាចថ្ងៃដដែលនេះ។បណ្ដាមហាអំណាចពិភពលោកបានស្វាគមន៍យ៉ាងប្រុងប្រយ័ត្នចំពោះដំណឹងនេះ ប៉ុន្តែការប្រយុទ្ធគ្នាបានបន្ត ដោយក្រុមមន្ត្រីក្នុងតំបន់បាននិយាយថា មន្ទីរពេទ្យមួយក្នុងទីក្រុងហ្កាហ្សា ស្ថិតក្នុងចំណោមគោលដៅដែលត្រូវបានទម្លាក់គ្រាប់បែក ខណៈនៅសល់ប៉ុន្មានម៉ោងទៀតដល់ការចាប់ផ្តើមនៃការផ្អាកលើកដំបូងនៅក្នុងសង្គ្រាមដ៏ឃោរឃៅជិតប្រាំពីរសប្តាហ៍នេះ។ ភាគីទាំងពីរក៏បានផ្តល់សញ្ញាថាការផ្អាកនេះនឹងមានលក្ខណៈបណ្ដោះអាសន្នប៉ុណ្ណោះមុនពេលការប្រយុទ្ធបន្តទៀត។ក្រសួងការបរទេសរបស់ប្រទេសកាតាបាននិយាយថា បទឈប់បាញ់នឹងចាប់ផ្តើមនៅម៉ោង ៧ ព្រឹក ម៉ោងក្នុងស្រុក ហើយពាក់ព័ន្ធនឹងបទឈប់បាញ់ដ៏ទូលំទូលាយមួយនៅភាគខាងជើង និងភាគខាងត្បូងនៃតំបន់ហ្កាហ្សា។ អ្នកនាំពាក្យក្រសួងការបរទេស លោក ម៉ាជេត អាល់អានសារី (Majed Al-Ansari) បាននិយាយនៅក្នុងរដ្ឋធានី ដូហា ប្រទេសកាតា ថា ជំនួយបន្ថែមនឹងចាប់ផ្តើមហូរចូលទៅក្នុងតំបន់ហ្កាហ្សា ហើយក្រុមចំណាប់ថ្នូរដំបូងរួមទាំងស្ត្រីវ័យចំណាស់ នឹងត្រូវបានដោះលែងនៅម៉ោង ៤ រសៀល (ម៉ោងក្នុងស្រុក) ព្រមទាំងចំនួនសរុបនៃចំណាប់ថ្នូរទាំង៥០នាក់ នឹងត្រូវដោះលែងក្នុងរយៈពេល ៤ ថ្ងៃនេះ។ក្រុមហាម៉ាស ដែលត្រូវបានគេរំពឹងថានឹងប្រកាសបទឈប់បាញ់ជាមួយអ៊ីស្រាអែល រយៈពេលមួយថ្ងៃមុនកាលពីថ្ងៃព្រហស្បតិ៍ ដើម្បីតែបន្តការចរចា បានបញ្ជាក់នៅលើបណ្ដាញតេឡេក្រាមរបស់ខ្លួនថា អរិភាពទាំងអស់ពីកងកម្លាំងរបស់ខ្លួននឹងត្រូវឈប់ ខណៈយោធាអ៊ីស្រាអែលបាននិយាយថា កងទ័ពរបស់ខ្លួននឹងឈរជើងនៅខាងក្រោយតំបន់ខ្សែបន្ទាត់បទឈប់បាញ់មួយនៅខាងក្នុងហ្កាហ្សា ដោយមិនបានផ្តល់ព័ត៌មានលម្អិតអំពីទីតាំងរបស់ខ្លួននោះទេ៕

ក្រុមបាតុករតវ៉ាការឈ្នះឆ្នោតរបស់បក្សប្រឆាំងអ៊ីស្លាមនៅហូឡង់ ខណៈពលរដ្ឋម៉ូស្លីមមានការភ្ញាក់ផ្អើល

ក្រុមបាតុករជនជាតិហូឡង់ បានប្រមូលផ្តុំគ្នាតវ៉ាប្រឆាំងនឹងជ័យជម្នះក្នុងការបោះឆ្នោតរបស់អ្នកនយោបាយនិយមស្តាំនិយមជ្រុល លោក ហ្គឺត វីលឌឺស (Geert Wilders) នៅទីក្រុងអ៊ូត្រេចស៍ (Utrecht) កាលពីល្ងាចថ្ងៃព្រហស្បតិ៍ (២៣ វិច្ឆិកា) រយៈពេលមួយថ្ងៃបន្ទាប់ពីលទ្ធផលនៃការបោះឆ្នោតបានបង្កឱ្យមានការខកចិត្តចំពោះជនជាតិម៉ូស្លីម និងក្រុមអ្នកស្រឡាញ់ភេទដូចគ្នា។ ប្រជាជនម៉ូស្លីមនៅក្នុងប្រទេសហូឡង់ បានសម្តែងការភ្ញាក់ផ្អើលយ៉ាងខ្លាំងចំពោះអ្នកឈ្នះការបោះឆ្នោត ដែលពីមុនធ្លាប់បានអំពាវនាវឱ្យមានការហាមឃាត់វិហារអ៊ីស្លាម និងគម្ពីរកូរ៉ាននៅក្នុងប្រទេសហូឡង់។ក្រុមបាតុករបានប្រមូលផ្តុំគ្នា ដោយអ្នកខ្លះកាន់ទង់ឥន្ទធនូ និងទង់ជាតិប៉ាឡេស្ទីន នៅក្នុងការហែក្បួនតវ៉ាប្រឆាំងនឹងលោក វីលឌឺស និងគណបក្សសេរីភាព (PVV) របស់លោក។ ខណៈភាពតានតឹងកើឡើង នគរបាលបានបំបែកហ្វូងបាតុករ ចេញពីក្រុមអ្នកតវ៉ាប្រឆាំងក្រុមបាតុករទាំងនោះ។ប្រជាជនម៉ូស្លីម មានចំនួនប្រហែល ៥% នៃប្រជាជនហូឡង់ ដែលមានចំនួនជិត ១៨ លាននាក់។ ពលរដ្ឋមួយចំនួននៅប្រទេសហូឡង់ គិតថាប្រព័ន្ធរដ្ឋាភិបាលចម្រុះរបស់ហូឡង់មួយនេះ គឺមានន័យថា លោក វីលឌឺស នឹងត្រូវសម្របសម្រួលលើទស្សនៈជ្រុលនិយមបំផុតរបស់ខ្លួន ខណៈក្រុមអ្នកវិភាគនយោបាយក៏បានព្យាករណ៍បែបនោះផងដែរ៕

ប៉ាគីស្ថាន ទារយកប្រាក់៨៣០ដុល្លាអាមេរិក ពីជនភៀសខ្លួនគ្មានឯកសារ ដើម្បីអាចចាកចេញបាន

ប្រទេសប៉ាគីស្ថានបានបញ្ជាក់ថា ខ្លួនកំពុងទារយកប្រាក់ចំនួន ៨៣០ ដុល្លារអាមេរិកពីជនភៀសខ្លួនគ្មានឯកសារ ដែលចង់ចាកចេញពីប្រទេសនេះ។ ការបង់ប្រាក់ដើម្បីចាកចេញ អនុវត្តចំពោះអ្នកដែលមកដល់ដោយគ្មានទិដ្ឋាការ។ កាលពីខែតុលា ប្រទេសប៉ាគីស្ថាន បានប្រកាសថា ខ្លួននឹងនិរទេសជនបរទេសគ្មានឯកសារចំនួន១,៧ លាននាក់ចេញពីប្រទេស ប្រសិនបើពួកគេមិនព្រមចាកចេញត្រឹមថ្ងៃទី១ ខែវិច្ឆិកា។ភាគច្រើន ជាជនជាតិអាហ្វហ្គានីស្ថាន រួមទាំងមនុស្សរាប់សែននាក់ដែលបានភៀសខ្លួនចេញពីអាហ្វហ្គានីស្ថាន នៅពេលដែលពួកតាលីបង់បានឡើងកាន់អំណាច កាលពីឆ្នាំ ២០២១។ អ្នកដែលមានទិដ្ឋាការផុតកំណត់ នឹងត្រូវគិតប្រាក់អាស្រ័យលើរយៈពេលដែលពួកគេបានស្នាក់នៅលើសពេលវេលាកំណត់។ ការបង់ប្រាក់សម្រាប់ការចាកចេញនេះ មិនអនុវត្តចំពោះអ្នកទាំងឡាយ ដែលធ្វើដំណើរត្រឡប់ទៅអាហ្វហ្គានីស្ថានវិញនោះទេ។ យោងតាមអង្គការលើកលែងទោសអន្តរជាតិ ប្រជាជនអាហ្វហ្គានីស្ថានជាច្រើនដែលបានមកដល់ប៉ាគីស្ថាននៅពេលដែលទីក្រុងកាប៊ុលបានធ្លាក់ចូលកណ្ដាប់ដៃរបស់ក្រុមតាលីបង់បានប្រឈម នឹងការពន្យារពេលក្នុងការទទួលបានឯកសារ។ប្រទេសប៉ាគីស្ថានមិនមែនជាភាគីនៃអនុសញ្ញាជនភៀសខ្លួនទេ ហើយបាននិយាយថា ខ្លួនមិនទទួលស្គាល់ជនជាតិអាហ្វហ្គានីស្ថានណាមួយដែលរស់នៅក្នុងព្រំដែនរបស់ខ្លួនជាជនភៀសខ្លួននោះទេ។ អ្នកការទូតជាន់ខ្ពស់មួយរូបនៅប្រទេសប៉ាគីស្ថានបានប្រាប់សារព័ត៌មាន BBC ថា ថ្លៃសេវានេះ មានការព្រួយបារម្ភជាពិសេសនៅពេលដែលត្រូវបានអនុវត្តចំពោះមនុស្សដែលត្រូវបានផ្លាស់ទីលំនៅដោយផ្អែកលើហេតុផលមនុស្សធម៌។ ពួកគេបាននិយាយថា នៅក្នុងប្រទេសជាច្រើន ប្រសិនបើអ្នកស្នាក់នៅលើសកាលកំណត់ក្នុងទិដ្ឋាការ អ្នកត្រូវតែបង់ប្រាក់ ពុំនោះទេ អ្នកត្រូវបានចាកចេញ។ បញ្ហាគឺការគិតប្រាក់ ចំពោះអ្នកទាំងឡាយដែលយើងកំពុងទទួលយកទិដ្ឋាការមនុស្សធម៌។ មិនចាំបាច់ សម្រាប់មនុស្សដែលយើងកំពុងទទួលយកទេ ព្រោះពួកគេបានធ្វើការឱ្យយើង ប៉ុន្តែមនុស្សទាំងនោះសុទ្ធតែមនុស្សដែលអង្គការ UNHCR មើលឃើញថាមានតម្រូវការមនុស្សធម៌៕

បណ្ដាញសង្គម

ព័ត៌មានថ្មីៗ

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ឧបត្ថម្ភកុមារា២នាក់ដែលឱពុកជាប់បំពេញកាតព្វកិច្ចជូនជាតិ

TOP STORY | សម្តេចតេជោប្រកាសមិនចូលរួមប្រជុំព្រឹទ្ធសភាថ្ងៃស្អែកទេដោយជាប់រវល់ប្រចាំការរួមបញ្ជាកងទ័ព២៤ម៉ោងលើ២៤ម៉ោងក្រោយថៃរៀបចំផែនការវាយប្រហារកម្ពុជា

BREAKING NEWS ÷ ក្រសួងការពារជាតិកម្ពុជា៖កងទ័ពថៃគ្រោងនឹងបើកការវាយលុកតាមបណ្តោយព្រំដែនជាមួយកម្ពុជាឆាប់ៗនេះ

លោកជំទាវ ហ៊ុន ម៉ាណា អញ្ជើញនាំយកទេយ្យវត្ថុប្រគេនព្រះសង្ឃនៅវត្តគោកត្របែក ក្នុងខេត្តកំពង់ធំ និងចែកអំណោយជូនប្រជាពលរដ្ឋ៣៤៩គ្រួសារ

អ្នកនាំពាក្យរាជរដ្ឋាភិបាល៖រាជរដ្ឋាភិបាលកំពុងយកចិត្តទុកដាក់យ៉ាងខ្លាំងចំពោះយោធិន ពិសេសយោធិនពលី និងពលរដ្ឋភៀសសឹក

ព្រះសង្ឃ និងប្រជាពលរដ្ឋខេត្តពោធិ៍សាត់ច្រើនពាន់នាក់ចូលរួម ក្បួនដង្ហែទង់ជាតិខ្មែរ រួមគ្នាថែរក្សាការពារជាតិមាតុភូមិ

សហគមន៍ខ្មែរនៅកូរ៉េប្រមាណជិត២ពាន់នាក់ ប្រមូលផ្តុំអំណរគុណ និងគាំទ្រប្រធានាធិបតីអាមេរិកទទួលពានរង្វាន់សន្តិភាព និងអំពាវនាវឱ្យថៃយល់ព្រមទៅតុលារការអន្តរជាតិ

មនុស្សរាប់ម៉ឺននាក់ប្រមូលផ្ដុំគ្នាទូទាំងពិភពលោកតវ៉ាប្រឆាំងការវាយប្រហាររបស់អ៊ីស្រាអែលនៅហ្កាហ្សា

ប្រតិភូខេត្តកណ្ដាល ចុះសួរសុខទុក្ខ និងនាំយកគ្រឿងឧបភោគបរិភោគដែលទទួលបានពីសប្បជនផ្ដល់ជូនវីរកងទ័ពជួរមុខក្នុងខេត្តព្រះវិហារ

[UPDATE] ចំនួនអ្នកស្លាប់ដោយសារទឹកជំនន់ភ្លៀងមូសុងនៅប្រទេសឥណ្ឌា បានកើនឡើងដល់ជិត១៨០នាក់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877