នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ពលរដ្ឋបន្តសាទរកិច្ចប្រឹងប្រែងរបស់រដ្ឋាភិបាលបោសសម្អាត Online Scams ដើម្បីស្ដារ​មុខមាត់​កម្ពុជា
សាធារណជនគាំទ្រគំនិតផ្ដួចផ្ដើមរបស់សម្តេចធិបតីឱ្យបញ្ជូនក្រុមក្មេងទំនើងទៅជួយការងារសមរភូមិមុខ
បង្រ្កាបអគារប្រព្រឹត្តបទល្មើស Online Scams នៅទីតាំង ១កន្លែង ក្នុងក្រុងប៉ោយប៉ែត ឃាត់ខ្លួនមនុស្សប្រមាណ ៣០០នាក់
កម្លាំងគណៈបញ្ជាការឯកភាពរាជធានី បន្តប្រតិបត្តិការឆ្មក់ចុះបង្ក្រាប Online Scams នៅខណ្ឌ៧មករា ឃាត់ជនបរទេស៤០នាក់

សន្តិសុខ និង សង្គម

ចំនួនជនអន្តោប្រវេសន៍វេណេហ្ស៊ុយអេឡា ធ្លាក់ចុះពាក់កណ្តាលនៅតាមព្រំដែនអាមេរិក-ម៉ិកស៊ិក

2023/11/15 01:50:40 pm        115
Facebook Telegram Linkin
ចំនួនជនជាតិវេណេហ្ស៊ុយអេឡាដែលឆ្លងដែនដោយខុសច្បាប់រវាងសហរដ្ឋអាមេរិក និងម៉ិកស៊ិក បានធ្លាក់ចុះជិតពាក់កណ្តាលចាប់តាំងពីជើងហោះហើរនិរទេសបានចាប់ផ្តើមឡើងវិញកាលពីខែមុន។ ស្ថិតិពីអង្គភាពគយ និងល្បាតព្រំដែន (CBP) បង្ហាញពីការធ្លាក់ចុះចំនួន៤៦% នៃការមកដល់បែបនេះ។ កាលពីដើមខែតុលា រដ្ឋាភិបាលរបស់លោកប្រធានាធិបតីអាមេរិក Joe Biden បានប្រកាសថា ខ្លួននឹងនិរទេសជនជាតិវេណេហ្ស៊ុយអេឡា ដែលមិនមានសិទ្ធិសុំសិទ្ធិជ្រកកោន ឬស្ថានភាពស្របច្បាប់បណ្តោះអាសន្ន។ មនុស្សជាង៧លាននាក់បានភៀសខ្លួនចេញពីប្រទេសវេណេហ្ស៊ុយអេឡាក្នុងរយៈពេលប៉ុន្មានឆ្នាំចុងក្រោយនេះ។ យោងតាមតួលេខរបស់អង្គភាពគយ និងល្បាតព្រំដែន ដែលចេញផ្សាយកាលពីថ្ងៃអង្គារ ភ្នាក់ងារព្រំដែនបានចាប់ជនជាតិវេណេហ្ស៊ុយអេឡាចំនួន ២៩.៦៣៧ នាក់ នៅព្រំដែនកាលពីខែមុន ដែលជាការធ្លាក់ចុះយ៉ាងខ្លាំងពីកម្រិតខ្ពស់ កាលពីខែកញ្ញាដែលមានដល់ទៅ៥៤.៨៣៣ នាក់ ។ ការចូលដោយខុសច្បាប់ជាទូទៅនៅតាមបណ្តោយព្រំដែនភាគខាងត្បូងក៏បានថយចុះផងដែរកាលពី ខែតុលាចំនួន១៤% ពីជិត ២១៩.០០០នាក់ កាលពីខែកញ្ញា។ កាលពីថ្ងៃទី ១៨ ខែតុលា កងកម្លាំងអនុវត្តច្បាប់អន្តោប្រវេសន៍ និងគយរបស់សហរដ្ឋអាមេរិក (ICE) បានចាប់ផ្តើមជើងហោះហើរនិរទេសទៅកាន់ប្រទេសវេណេហ្ស៊ុយអេឡា។ ចាប់តាំងពីពេលនោះមក ប្រជាជនវេណេហ្ស៊ុយអេឡារាប់រយនាក់ត្រូវបានបញ្ជូនទៅប្រទេសកំណើតវិញ។ កាលពីខែខែកញ្ញា សហរដ្ឋអាមេរិក ក៏បាននិយាយផងដែរថា ជនជាតិវេណេហ្ស៊ុយអេឡាប្រហែល ៤៧២.០០០នាក់ នឹងមានសិទ្ធិទទួលបានឋានៈការពារបណ្តោះអាសន្ន (TPS) សម្រាប់រយៈពេល ១៨ ខែ៕

រដ្ឋមន្ត្រីការពារជាតិអ៊ីស្រាអែលបានបញ្ជាក់ថា ការវាយលុកថ្មើរជើង នឹងរួមបញ្ចូល​តំបន់ហ្កាហ្សាភាគខាងត្បូង

2023/11/15 01:45:45 pm        172
Facebook Telegram Linkin
រដ្ឋមន្ត្រីក្រសួងការពារជាតិអ៊ីស្រាអែល លោក យ៉ូអាវ ហ្គាឡែនធ៍(Yoav Gallant) បានប្រាប់បណ្តាញព័ត៌មានវិទ្យុរបស់កម្លាំងការពារអ៊ីស្រាអែល(IDF) កាលពីថ្ងៃអង្គារថា ការវាយលុកថ្មើរជើងបស់ប្រទេសនេះលើតំបន់ហ្កាហ្សា នឹងមានរយៈពេលជាច្រើនខែ ហើយរាប់បញ្ចូលទាំងផ្នែកខាងត្បូងនៃដែនដីនេះ ដែលជាកន្លែងជនជាតិប៉ាឡេស្ទីនប្រហែលមួយលាននាក់ ត្រូវបានបញ្ជាឲ្យភៀសខ្លួនទៅ ខណៈដែល អ៊ីស្រាអែល បានចាប់ផ្តើមការទម្លាក់គ្រាប់បែក នៅភាគខាងជើង។លោកហ្គាឡែនធ៍ បានថ្លែងប្រាប់សេវាព័ត៌មានវិទ្យុ GLZ ថា៖«កិច្ចប្រតិបត្តិការនេះ នឹងមានរយៈពេលជាច្រើនខែ ហើយវានឹងរួមបញ្ចូលទាំងភាគខាងជើង និងភាគខាងត្បូង»។ «យើងនឹងកម្ទេចក្រុមហាម៉ាស នៅគ្រប់ទីកន្លែង។ ក្រុមហាម៉ាស កំពុងតែត្រូវបានបំផ្លាញ»។កម្លាំងការពារអ៊ីស្រាអែល (IDF) មិនបានឆ្លើយតបភ្លាមៗចំពោះសំណើសុំការបញ្ជាក់របស់សារព័ត៌មាន Semafor ទាក់ទងនឹងសេចក្តីថ្លែងការណ៍របស់ហ្គាឡែនធ៍នោះទេ។កម្លាំងការពារអ៊ីស្រាអែល បានកំណត់គោលដៅម្តងហើយម្តងទៀតលើតំបន់ហ្កាហ្សាភាគខាងត្បូងតាម រយៈការវាយប្រហារតាមអាកាស បើទោះបីជាបានបញ្ជាឲ្យប្រជាជនប៉ាឡេស្ទីនចេញពីតំបន់ហ្កាហ្សាភាគខាងជើងឲ្យជម្លៀស ទៅទីនោះក៏ដោយ។ក្នុងការការពារការវាយប្រហារតាមអាកាសរបស់ខ្លួនទៅលើតំបន់ហ្កាហ្សាភាគខាងត្បូង អ៊ីស្រាអែល អះអាងថា មាន «គោលដៅស្របច្បាប់»របស់ក្រុមសកម្មប្រយុទ្ធដែលរស់នៅក្បែរផ្ទះជនស៊ីវិល នៅទូទាំងតំបន់នេះ។

គ្រោះថ្នាក់រថយន្តក្រុងនៅរដ្ឋ Ohio បណ្តាលឲ្យមនុស្ស៦នាក់ស្លាប់ និង១៨នាក់រងរបួស

2023/11/15 01:42:25 pm        125
Facebook Telegram Linkin
រថយន្តបុកគ្នានៅលើផ្លូវ Interstate ៧០ ក្បែរផ្លូវលេខ ៣១០ ក្នុងតំបន់ Licking រដ្ឋ Ohio បានបណ្តាលឲ្យមនុស្ស ៦ នាក់ស្លាប់ និង ១៨ នាក់ផ្សេងទៀតរងរបួស។គ្រោះថ្នាក់ចរាចរណ៍ដ៏រន្ធត់នេះ បានកើតឡើងរវាងរថយន្តដឹកទំនិញមួយគ្រឿង បានបុកជាមួយរថយន្តក្រុងមួយគ្រឿងផ្សេងទៀត បណ្តាលឲ្យខូចខាតយ៉ាងដំណំ ហើយបានបង្កការភ្ញាក់ផ្អើលឲ្យមានការឆ្លើយតបភ្លាមៗពីអង្គភាពសង្គ្រោះបន្ទាន់។ឧបទ្ទវហេតុបណ្តាលឲ្យមានមនុស្សស្លាប់នេះ បានកើតឡើង ខណៈរថយន្តក្រុងមួយគ្រឿង កំពុងដឹកសិស្សមកពីសាលារៀនមួយកន្លែងនៅភាគខាងកើតរដ្ឋ Ohio ត្រូវបានរថយន្តដឹកទំនិញបុកពីក្រោយ។ អាជ្ញាធរកំពុងស៊ើបអង្កេតយ៉ាងសកម្ម ជុំវិញករណីគ្រោះថ្នាក់នេះ ហើយពុំទាន់បានបញ្ចប់ការជូនដំណឹងដល់ក្រុមគ្រួសារជនរងគ្រោះនៅឡើយទេ។

តុលាការកំពូលប្រទេសស្រីលង្កានិយាយថា អតីតប្រធានាធិបតីស្ថិតក្នុងចំណោមអ្នកដែលបានរួមចំណែកដល់វិបត្តិសេដ្ឋកិច្ច

2023/11/15 01:39:26 pm        109
Facebook Telegram Linkin
តុលាការកំពូលរបស់ប្រទេសស្រីលង្កា បានចេញសេចក្តីសម្រេចកាលពីថ្ងៃអង្គារថា អតីតប្រធានាធិបតី លោក Gotabaya Rajapaksa និងបងប្អូនប្រុសរបស់លោក គឺអតីតនាយករដ្ឋមន្ត្រី លោក Mahinda ស្ថិតក្នុងចំណោមមន្ត្រីរដ្ឋាភិបាលមួយចំនួន ដែលបានរួមចំណែកដល់វិបត្តិសេដ្ឋកិច្ចធ្ងន់ធ្ងរបំផុតរបស់ប្រទេសនេះក្នុងរយៈពេលជាច្រើនទសវត្សរ៍។ តុលាការបានចេញសេចក្តីសម្រេចលើញត្តិ ដែលបានប្តឹងអតីតមន្ត្រី១៣រូប ធ្វើឡើងដោយអង្គការសិទ្ធិមនុស្សតម្លាភាពអន្តរជាតិស្រីលង្កា (TISL) ដែលនិយាយថាបងប្អូនប្រុស Rajapaksa និងអ្នកមួយចំនួនទៀតជាអ្នកទទួលខុសត្រូវចំពោះវិបត្តិនេះ។យោងតាមសេចក្តីថ្លែងការណ៍ ដោយអង្គការសិទ្ធិមនុស្សតម្លាភាពអន្តរជាតិស្រីលង្កា (TISL) បានឲ្យដឹងថា សេចក្តីសម្រេចនិយាយថា «សកម្មភាព ការលុបចោល និងការប្រព្រឹត្ត របស់ពួកគេបានរួមចំណែកដល់វិបត្តិរបស់ប្រទេសស្រីលង្កា»។ តុលាការ ពុំបានបញ្ជាឲ្យមានការផ្ដន្ទាទោសណាមួយឡើយ។ បងប្អូនប្រុស Rajapaksa ពីរនាក់ អតីតទេសាភិបាលធនាគារកណ្តាលពីររូប និងប្រធានាធិបតីលោក Ranil Wickremesinghe ស្ថិតក្នុងចំណោមអ្នកដែលមានឈ្មោះនៅក្នុងញត្តិរបស់ អង្គការសិទ្ធិមនុស្សតម្លាភាពអន្តរជាតិស្រីលង្កា (TISL) ។ លោក Wickremesinghe គឺជានាយករដ្ឋមន្ត្រីនៅពេលមានវិបត្តិ។សេដ្ឋកិច្ចរបស់ប្រទេសស្រីលង្កា បានដួលរលំខណៈដែលវាបានធ្លាក់ចុះ ៧,៨% កាលពីឆ្នាំមុន ទទួលរងដោយការដាច់ចរន្តអគ្គិសនីរយៈពេលយូរ អតិផរណាកើនឡើង ប្រាក់រូពីធ្លាក់ចុះ និងមានអត្រាការប្រាក់ខ្ពស់ ដែលបណ្តាលមកពីវិបត្តិហិរញ្ញវត្ថុធ្ងន់ធ្ងរបំផុតក្នុងរយៈពេលជាង ៧ ទសវត្សរ៍។

កម្តៅត្រូវបានព្យាករថានឹងសម្លាប់មនុស្សជិត ៥ ដងបន្ថែមទៀតនៅឆ្នាំ ២០៥០

2023/11/15 01:34:14 pm        95
Facebook Telegram Linkin
ក្រុមអ្នកជំនាញអន្តរជាតិ បានព្រមាននៅថ្ងៃពុធ ទី១៥ ខែវិច្ឆិកានេះថា មនុស្សជិត៥ដងបន្ថែមទៀតទំនងជានឹងស្លាប់ដោយសារតែកម្តៅក្តៅខ្លាំងនៅក្នុងទសវត្សរ៍ខាងមុខនេះ ហើយប្រសិនបើគ្មានវិធានការលើបម្រែបម្រួលអាកាសធាតុនោះទេ សុខភាពរបស់មនុស្សនឹងមានហានិភ័យយ៉ាងធ្ងន់ធ្ងរ។ យោងតាម The Lancet Countdown ជាស្ថាប័នវាយតម្លៃប្រចាំឆ្នាំដ៏សំខាន់ ធ្វើឡើងដោយក្រុមអ្នកស្រាវជ្រាវ និងស្ថាប័នឈានមុខ បានឲ្យដឹងថា កម្តៅដែលអាចធ្វើឲ្យមនុស្សស្លាប់ ជាបញ្ហាមួយក្នុងចំណោមបញ្ហាជាច្រើន ដែលការប្រើប្រាស់ឥន្ធនៈហ្វូស៊ីលកំពុងកើនឡើងនៅលើពិភពលោក គំរាមកំហែងដល់សុខភាពមនុស្ស ។ អ្នកស្រាវជ្រាវបានព្រមានថា គ្រោះរាំងស្ងួតទូទៅកាន់តែច្រើននឹងធ្វើឱ្យមនុស្សរាប់លាននាក់ប្រឈមហានិភ័យភាពអត់ឃ្លាន សត្វមូសរាលដាលកាន់តែឆ្ងាយជាងពេលណាៗទាំងអស់ចម្លងជំងឺឆ្លង ហើយប្រព័ន្ធសុខាភិបាលនឹងព្យាយាមដើម្បីទប់ទល់ជាមួយបន្ទុកនេះ។ ការវាយតម្លៃនេះ ធ្វើឡើងក្នុងអំឡុងពេល អ្វីដែលគេរំពឹងថាជាឆ្នាំដែលក្តៅបំផុតក្នុងប្រវត្តិសាស្ត្រមនុស្សជាតិ ដែលកាលសប្តាហ៍មុនអ្នកតាមដានអាកាសធាតុរបស់អឺរ៉ុប បានប្រកាសថាកាលពីខែតុលាមុន ជាខែក្តៅបំផុតក្នុងកំណត់ត្រា។វាក៏កើតឡើងមុនកិច្ចពិភាក្សាស្តីពីអាកាសធាតុ COP28 នៅទីក្រុងឌូបៃ នៅខែក្រោយ ដែលនឹងរៀបចំ «ទិវាសុខភាព» ជាលើកដំបូងនៅថ្ងៃទី ៣ ខែធ្នូ ខណៈអ្នកជំនាញព្យាយាមបំភ្លឺអំពីផលប៉ះពាល់នៃការឡើងកម្តៅផែនដីសកល មកលើសុខភាព។ របាយការណ៍របស់ The Lancet Countdown បាននិយាយថា ទោះបីជាមានការអំពាវនាវកើនឡើងសម្រាប់សកម្មភាពជាសាកលក៏ដោយ ការបំភាយកាបូនដែលទាក់ទងនឹងថាមពល បានកើនឡើងដល់កម្រិតខ្ពស់ថ្មីកាលពីឆ្នាំមុន ។

បាតុករប្រមូលផ្តុំគ្នាគាំទ្រអ៊ីស្រាអែល និងប្រឆាំងផ្នត់គំនិតប្រឆាំងជនជាតិជ្វីហ្វ ក្នុងទីក្រុងវ៉ាស៊ីនតោន

2023/11/15 01:28:57 pm        156
Facebook Telegram Linkin
បាតុកររាប់ម៉ឺននាក់ បានមកប្រមូលផ្តុំគ្នានៅក្នុងទីក្រុងវ៉ាស៊ីនតោន កាលពីថ្ងៃអង្គារ សម្រាប់បាតុកម្មមួយគាំទ្រអ៊ីស្រាអែល ដើម្បីបង្ហាញសាមគ្គីភាពជាមួយអ៊ីស្រាអែល ក្នុងសង្គ្រាមរបស់ប្រទេសនេះ ជាមួយក្រុមហាម៉ាស និងថ្កោលទោសការកើនឡើងការផ្នត់គំនិតប្រឆាំងជនជាតិជ្វីហ្វ។ផ្លូវជាច្រើនកន្លែងត្រូវបានបិទនៅជុំវិញទីប្រជុំជនភាគច្រើន សន្តិសុខត្រូវបានរឹតបន្តឹង ខណៈមនុស្សជាច្រើន បានប្រមូលផ្តុំគ្នានៅពេលថ្ងៃរះនៅឧទ្យានជាតិ National Mall ដែលមនុស្សជាច្រើនបានកាន់ទង់ជាតិអ៊ីស្រាអែល និងសហរដ្ឋអាមេរិក។ ការតវ៉ា និងបាតុកម្មសាធារណៈជាច្រើន ទាំងគាំទ្រប៉ាឡេស្ទីន និងគាំទ្រអ៊ីស្រាអែល បានរាលដាលនៅជុំវិញពិភពលោក ចាប់តាំងពីខ្មាន់កាំភ្លើងមកពីក្រុមសកម្មប្រយុទ្ធហាម៉ាសប៉ាឡេស្ទីន បានសម្រុកចូលតាមប្រទេសអ៊ីស្រាអែលភាគខាងត្បូងកាលពីថ្ងៃទី៧ ខែតុលា បណ្តាលឲ្យមនុស្ស១.២០០នាក់ស្លាប់ និងប្រមាណ២៤០នាក់ត្រូវបានចាប់ជាចំណាប់ថ្នូរនាំយកទៅកាន់តំបន់ហ្កាហ្សា។ប្រទេសអ៊ីស្រាអែល បានឆ្លើយតបវិញដោយការបិទផ្លូវតឹងរ៉ឹងនៅតំបន់ហ្កាហ្សាគ្រប់គ្រងដោយក្រុមហាម៉ាសនិងបានទម្លាក់គ្រាប់បែកតាមអាកាស ព្រមទាំងវាយប្រហាតាមដីគោក ដែលអាជ្ញាធរប៉ាឡេស្ទីន និយាយថា បានសម្លាប់មនុស្សជាង១១.០០០នាក់ ប្រមាណ៤០ភាគរយក្នុងចំណោមនេះជាកុមារ។

ក្រុមឧទ្ទាម Houthis នៅយ៉េម៉ែន និយាយថា ពួកគេបានបាញ់មីស៊ីលបាលីស្ទីក លើគោលដៅយោធាអ៊ីស្រាអែល

2023/11/15 01:22:22 pm        162
Facebook Telegram Linkin
ក្រុមឧទ្ទាម Houthis នៅយ៉េម៉ែន បាននិយាយថាពួកគេ បានបាញ់មីស៊ីលបាលីស្ទីកទៅលើគោលដៅយោធាអ៊ីស្រាអែលជាច្រើនកន្លែង។ អ្នកនាំពាក្យយោធារបស់ក្រុមនេះ លោក Yahya Sarea បាននិយាយនៅក្នុងសេចក្តីថ្លែងការណ៍តាមទូរទស្សន៍ថា ក្រុមHouthis បានបាញ់មីស៊ីលបាលីស្ទីក ទៅលើគោលដៅជាច្រើនកន្លែងរបស់យោធាអ៊ីស្រាអែលនៅក្នុងដែនដីកាន់កាប់ប៉ាឡេស្ទីន រួមមានទាំងគោលដៅលាក់បាំង នៅក្នុងតំបន់ Umm Al-Rashrash ។អ្នកនាំពាក្យបាននិយាយថា ការបាញ់មីស៊ីល បានធ្វើឡើង រយៈ២៤ម៉ោងបន្ទាប់ពីប្រតិបត្តិការយោធាមួយផ្សេងទៀត ដែលត្រូវបានអនុវត្តដោយកងកម្លាំងប្រដាប់អាវុធរបស់យើងដោយប្រើប្រាស់យានដ្រូន ទៅលើគោលដៅតែមួយ។ អ្នកនាំពាក្យនិយាយបន្តថា ក្រុមនេះនឹងមិនស្ទាក់ស្ទើរនោះទេ ដើម្បីដាក់គោលដៅលើនាវាអ៊ីស្រអែលនៅសមុទ្រក្រហម ឬនៅទីតាំងណាមួយដែលអាចបាញ់ដល់ ដោយចាប់ផ្តើមពីពេលដែលសេចក្តីថ្លែងការណ៍ត្រូវបានប្រកាស។ យោធាអ៊ីស្រាអែល បាននិយាយកាលពីថ្ងៃអង្គារថាខ្លួនបានប្រើប្រាស់ប្រព័ន្ធការពារដែនអកាស Arrow ដើម្បីស្ទាក់ចាប់មីស៊ីលនៅជិតសមុទ្រក្រហម បន្ទាប់ពីស៊ីរ៉ែនវាយឆ្មក់តាមអាកាស បានបន្លឺឡើង នៅកំពង់ផែភាគខាងត្បូងទីក្រុង Eilat ។ យោធាបាននិយាយថា មីស៊ីលមិនបានឆ្លងកាត់ចូលក្នុងទឹកដីអ៊ីស្រាអែលនោះទេ និងពុំបាននិយាយថា នណាជាអ្នកបាញ់ឡើយ។ ចលនាក្រុមឧទ្ទាមHouthis សម្ព័ន្ធមិត្តអ៊ីរ៉ង់ នៅយ៉េម៉ែន បានបាញ់មីស៊ីលដដែលៗ និងវាយប្រហារដោយយានដ្រូន លើអ៊ីស្រអែល ចាប់តាំងពីការវាយប្រហាររបស់ហាម៉ាស ទៅលើអ៊ីស្រាអែល កាលពីថ្ងៃទី៧ ខែតុលា ដែលទាំងអស់នេះត្រូវបានបាញ់ទម្លាក់ឬធ្លាក់ភ្លាមៗ។

សារធាតុគីមីគ្មានស្លាកសញ្ញាត្រូវបានរកឃើញនៅតំបន់ផ្សារនាគមាស ដែលនាំឱ្យប៉ះពាល់ធ្ងន់ធ្ងរដល់សុខភាពមនុស្ស

2023/11/15 12:20:16 pm        2046
Facebook Telegram Linkin
ភ្នំពេញ៖ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» នៅព្រឹកថ្ងៃទី១៥ វិច្ឆិកា ឆ្នាំ ២០២៣នេះ បានឱ្យដឹងថា មន្រ្តីជំនាញ សាខា ក.ប.ប. រាជ​ធានីភ្នំពេញ បានសហការជាមួយនាយកដ្ឋានមន្ទីរពិសោធន៍ បាន​នាំ​យក​រថយន្ត​មន្ទីរ​ពិសោធន៍​ចល័ត ចុះត្រួតពិនិត្យសុវត្ថិភាពម្ហូបអាហារនៅទីតាំងកែច្នៃខ្ញីហាន់ និងចែកចាយចំនួន ៣ទី​តាំង ដោយមួយកន្លែងក្នុងភូមិសាស្រ្ត សង្កាត់បឹងសាឡាង និង២ទីតាំងទៀត នៅ​តំបន់​ផ្សារ​នាគ​មាស សង្កាត់ផ្សារដើមគរ ខណ្ឌទួលគោក រាជធានីភ្នំពេញ។ក្នុងប្រតិបត្តិការនោះ ក្រុមមន្រ្តីជំនាញបានរកឃើញទីតាំងមួយកន្លែង មាន​សារធាតុ​គីមី​គ្មាន​ស្លាក​សញ្ញា​ជា​ម្សៅស ចំនួន៨៥ គីឡូក្រាម និងសាជូរ ចំនួន២៨បាវ ស្មើនឹង ៨៣០គីឡូក្រាម សម្រាប់​យក​ទៅ​ប្រើប្រាស់លាយជាមួយទឹក និងដាក់ខ្ញីហាន់រួចត្រាំជាមួយ មុននឹងចែកចាយ។ តាម​ការ​វិភាគ​បឋម​ទៅ​លើគំរូម្សៅស បង្ហាញថា គឺជាសារធាតុគីមីម្យ៉ាងមានឈ្មោះ Sodium Hydrosulfite ដែល​ជា​ប្រភេទសារធាតុគីមី​មិន​ត្រូវ​បាន​អនុញ្ញាត​ឱ្យ​ប្រើប្រាស់​ជា​សារធាតុ​បន្ថែម​ក្នុង​ម្ហូប​អាហារ​ទេ។ ការទទួលទានផលិតផលម្ហូបអាហារដែលមានសារធាតុគីមីហាមឃាត់ Sodium Hydrosulfite ទៅក្នុងសារពាង្គកាយមនុស្ស អាចបណ្តាលឱ្យពិបាកដកដង្ហើម សម្ពាធ​ឈាម​ចុះ​ទាប វិលមុខ ឈឺពោះ ក្អួតចង្អោរ រាគរូស។ សម្រាប់អ្នក Allergic ធ្ងន់ធ្ងរ​ជា​មួយ​សារ​ធាតុ​ខាង​លើ​នេះ ឬអ្នកមានជំងឺហឺត អាចបណ្តាលឱ្យពិបាកដកដង្ហើម និងអាចបាត់បង់ជីវិតបាន។ប្រភពដដែលបន្តថា ដោយមានការយកចិត្តទុកដាក់ជាប្រចាំពីលោកជំទាវ ចម និម្មល រដ្ឋមន្រ្តី​ក្រសួង​ពាណិជ្ជកម្ម ក្នុងការលើកកម្ពស់សុខុមាលភាព សុខភាពប្រជាពលរដ្ឋ តាមរយៈ​ការ​ត្រួត​ពិនិត្យ​សុវត្ថិភាពម្ហូបអាហារ និងដោយមានការណែនាំពី ឯកឧត្តម ផាន អូន ប្រតិភូ​រាជរដ្ឋាភិបាល​កម្ពុជា​ទទួល​បន្ទុកជាអគ្គនាយក នៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និង​បង្ក្រាបការក្លែងបន្លំ ឱ្យបន្តពង្រឹងយុទ្ធនាការចុះត្រួតពិនិត្យគុណភាព សុវត្ថិភាពទំនិញ ពិសេស​ម្ហូបអាហារ នៅតាមបណ្តាទីផ្សារនានា ក្នុងក្របខណ្ឌទូទាំងប្រទេស។សូមជម្រាបជូនថា តាមការអះអាងពីម្ចាស់ទីតាំងខាងលើ គឺសារធាតុ​គីមី​ទាំង​នេះ​គាត់​បាន​បញ្ជា​ទិញ​ពីផ្សារ​ច្បារអំពៅ។ ជាវិធានការ មន្ត្រីជំនាញបាន៖ដកហូតនូវសារធាតុគីមីជាម្សៅស Sodium Hydrosulfite ចំនួន ៨៥គីឡូក្រាម យកមករក្សាទុកជាបណ្តោះអាសន្ននៅសាខា ក.ប.ប. រាជ​ធានីភ្នំពេញ , ឃាត់ជាបណ្តោះអាសន្ននៅនឹងកន្លែង (សៀលទុក) នូវខ្ញីហាន់​ដែល​កំពុង​ដាក់​ត្រាំក្នុ​ងធុ​ងជ័រចំនួន ៣ធុង សរុបប្រមាណ ២៥០គីឡូក្រាម , ឃាត់ជាបណ្តោះ​អាសន្ន​នៅ​នឹង​កន្លែង (សៀលទុក) នូវសារធាតុសាច់ជូរចំនួន ៨៣០គីឡូក្រាម ដើម្បីតាម​ដាន​អំពី​គោល​ដៅ​ប្រើ​ប្រាស់ និងត្រូវមានច្បាប់អនុញ្ញាតក្នុងករណីប្រើជាសារធាតុបន្ថែមក្នុងម្ហូបអាហារ , យក​គំរូ​ទៅ​វិភាគ​នៅ​មន្ទីរពិសោធន៍របស់អគ្គនាយកដ្ឋាន ក.ប.ប. បន្តទៀត។ ករណីរកឃើញមានសារធាតុគីមីហាមឃាត់ធ្វើឱ្យប៉ះពាល់ដល់សុខភាព អគ្គនាយកដ្ឋាន ក.ប.ប. នឹង​ចាត់វិធានការតាមផ្លូវច្បាប់។ជាមួយគ្នានេះ អគ្គនាយកដ្ឋាន ក.ប.ប. បានអំពាវនាវដល់បុគ្គលធ្វើធុរកិច្ចម្ហូបអាហារ ជាអាទិ៍ អ្នក​នាំ​ចូល ផលិតករ សិប្បករ អ្នកកែច្នៃ អ្នកស្តុកទុក អ្នកចែកចាយ អ្នកលក់ដូរម្ហូបអាហារទាំងអស់ សូម​មេត្តាកុំប្រើប្រាស់សារធាតុគីមីហាមឃាត់ក្នុងចំណីអាហារ ដែលធ្វើឱ្យ​ប៉ះ​ពាល់​ដល់​សុខភាព​អ្នក​ទទួល​ទាន ករណីធ្ងន់ធ្ងរអាចបណ្ដាលឱ្យបាត់បង់ជីវិតភ្លាមៗ ឬបង្ករជាជំងឺរ៉ាំរ៉ៃ ឬជំងឺ​ប្រចាំ​កាយ​ រយៈពេលជាយូរអង្វែង។ ទន្ទឹមនឹងនេះ ក៏សូមអំពាវនាវដល់គ្រប់តួអង្គពាក់ព័ន្ធទាំងអស់ មេត្តា​ចូលរួមទប់ស្កាត់នូវផលិតផលមានសារធាតុគីមីហាមឃាត់ ផលិតផលខូចគុណភាព ផលិត​ផល​ពុំ​មានអនុលោមភាពតាមបទប្បញ្ញត្តិ តាមរយៈការដាក់ពាក្យបណ្តឹង ឬផ្តល់​ព័ត៌មាន​អំពី​ករណី​ខាង​លើ​នេះ ទៅកាន់ក្រសួង ស្ថាប័នមានសមត្ថកិច្ចពាក់ព័ន្ធ ពិសេស​មក​អគ្គនាយកដ្ឋាន​ការពារ​អ្ន​ក​ប្រើ​ប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» នៃក្រសួងពាណិជ្ជកម្ម ដែល​មាន​អាសយដ្ឋាន ផ្លូវ១៨ ភូមិក្តីតាកុយ សង្កាត់វាលស្បូវ ខណ្ឌច្បារអំពៅ រាជធានីភ្នំពេញ ឬទូរស័ព្ទ​លេខ (១). 0២៣ ២៣១ ៨៥៦ និង(២). 0៩២ ៨៣០ ៨៥៦ ដើម្បីអគ្គនាយកដ្ឋាន ក.ប.ប. នៃ​ក្រសួងពាណិជ្ជកម្ម មានវិធានការតាមនីតិវិធីច្បាប់ជាធរមាន៕

តុលាការ សម្រេចចោទប្រកាន់ជនជាតិថៃ និងឡាវ ៥នាក់នាំគ្រឿងញៀនជាង ១០០គីឡូឆ្លងដែននៅកម្ពុជា

2023/11/15 11:42:26 am        438
Facebook Telegram Linkin
តុលាការបានសម្រេចចោទប្រកាន់ជនជាតិថៃ និងឡាវ សរុប ៥នាក់ ដែលនាំគ្រឿងញៀនជាង ១០០គីឡូក្រាមឆ្លងដែននៅកម្ពុជា។លោក ប្លង់ សុផល អ្នកនាំពាក្យនៃអយ្យការអមសាលាដំបូងរាជធានីភ្នំពេញ បានឲ្យ​ដឹង​នៅ​ថ្ងៃ​ទី​១៥ ខែវិច្ឆិកា ឆ្នាំ២០២៣ថា នៅថ្ងៃទី១២ ខែវិច្ឆិកា ឆ្នាំ២០២៣ តំណាង​អយ្យការ​អមសាលា​ដំបូង​រាជ​ធានី​ភ្នំពេញ បានទទួល ចាត់ការលើសំណុំរឿងព្រហ្មទណ្ឌមួយ ដែលមានជនសង្ស័យចំនួន ៣នាក់ ទី១-ឈ្មោះ ចេង វឿត ភេទប្រុស ជនជាតិឡាវ ទី២-ឈ្មោះ វ៉ាស៊ីន សែកគឺ ភេទប្រុស ជន​ជាតិ​ថៃ និងទី៣-ឈ្មោះ ជីនណាវ៉ាត សែលី ភេទប្រុស ជនជាតិថៃ ត្រូវបាន​សង្ស័យ​ថា​បាន​ប្រព្រឹត្ត​សកម្ម​ភាព រក្សាទុក ដឹកជញ្ជូន និងជួញដូរដោយខុសច្បាប់នូវ សារធាតុញៀន ប្រព្រឹត្ត​នៅ​រាជ​ធានី​ភ្នំពេញ។ អ្នកនាំពាក្យនៃអយ្យការអមសាលាដំបូងរាជធានីភ្នំពេញបានបន្ថែមថា បន្ទាប់​ពី​ឆ្លង​កាត់​ការ​ស្រាវជ្រាវ​របស់​សមត្ថកិច្ចនៅថ្ងៃទី០៩ ខែវិច្ឆិកា ឆ្នាំ២០២៣ កម្លាំងជំនាញ​ការិយាល័យ​នីតិ​វិធី​ នៃ​មន្ទីរ​ប្រឆាំង​គ្រឿងញៀន និងកម្លាំងជំនាញនៃស្នងការដ្ឋាននគរបាលរាជធានីភ្នំពេញ ក្រោម​ការ​ដឹកនាំ​សម្រប​សម្រួលពីតំណាងអយ្យការ បានធ្វើការបង្ក្រាបករណីនេះ ព្រមទាំង​បាន​ឃាត់​ខ្លួន​ជន​សង្ស័យ និងដកហូតវត្ថុតាងគ្រឿងញៀនប្រភេទមេតំហ្វេតាមីនចំនួន ១០១ដុំ មានទម្ងន់ ១០១ គីឡូក្រាម នឹង ៤៤៩,២០ ក្រាម បន្ទាប់​មក​សមត្ថកិច្ច​បាន​កសាង​សំណុំ​រឿង​បញ្ជូន​មក​កាន់​អយ្យការ​អមសាលាដំបូងរាជធានីភ្នំពេញដើម្បីចាត់ការតាមនីតិវិធី ។លោក ប្លង់ សុផល បន្ថែមទៀតថា ផ្អែកតាមលទ្ធផលនៃការស៊ើបអង្កេតខាងលើ តំណាង​អយ្យការ​អម​សាលាដំ​បូងរាជធានីភ្នំពេញ បានសម្រេច​បើក​ការ​ស៊ើប​សួរ​តាម​រយៈ​ដី​កា​សន្និដ្ឋាន​បញ្ជូន​រឿង​ឲ្យ​ស៊ើប​សួរ ដោយស្នើសុំ​ចៅ​ក្រម​ស៊ើប​សួរ​ដាក់​ឲ្យ​ស្ថិត​នៅ​ក្រោម​ការ​ពិនិត្យ​លើ​ជន​សង្ស័យ​ទាំង​៣នា​ក់ខាងលើ ដែលសមត្ថកិច្ចបានឃាត់ខ្លួន និងជនជាតិឡាវចំនួន ២នាក់ទៀត​ដែល​កំពុង​គេច​ខ្លួន​មាន​ ១-ឈ្មោះ លី ម៉េង ភេទប្រុស និង២-ឈ្មោះ VANG TOUYER ភេទប្រុស ជនជាតិឡាវ ដោយ​សម្រេចចោទប្រកាន់ពីបទ រក្សាទុក ដឹកជញ្ជូន និងជួញដូរដោយ​ខុស​ច្បាប់​នូវ​សារធាតុ​ញៀន​ ប្រព្រឹត្តនៅរាជធានីភ្នំពេញ កាលពីថ្ងៃទី០៩ ខែវិច្ឆិកា ឆ្នាំ២០២៣ បទល្មើស​មាន​បញ្ញត្តិ​ឲ្យ​ផ្ដន្ទា​ទោស​តាមមាត្រា ៤០ នៃច្បាប់ស្តីពីការត្រួត ពិនិត្យគ្រឿងញៀន៕ អត្ថបទ៖ ប្រាក់ វ៉ាន់ដា

ជីវិតទារករាប់សិបនាក់ នៅក្នុងមន្ទីរពេទ្យហ្កាហ្សា រងហានិភ័យ ទោះបីអ៊ីស្រាអែល ផ្តល់ជូនឧបករណ៍សង្រ្គោះក៏ដោយ

2023/11/15 11:13:45 am        114
Facebook Telegram Linkin
ជីវិតរបស់ទារក ៣៦នាក់ នៅមន្ទីរពេទ្យ អាល់ស៊ីហ្វា (Al Shifa) នៃតំបន់ហ្កាហ្សា បានស្ថិតក្នុងហានិភ័យ កាលពីថ្ងៃអង្គារ (១៤ វិច្ឆិកា) នេះបើយោងតាមបុគ្គលិកពេទ្យនៅទីនោះ ដែលបាននិយាយថា មិនមានយន្តការច្បាស់លាស់ដើម្បីជម្លៀសពួកគេ បើទោះបីជាកិច្ចខិតខំប្រឹងប្រែងរបស់អ៊ីស្រាអែល ក្នុងការផ្គត់ផ្គង់ឧបករណ៍កម្ដៅខ្លួនទារកទុកសម្រាប់ការជម្លៀសក៏ដោយ។ទារកចំនួន ៣នាក់ ក្នុងចំណោមទារកកើតមិនគ្រប់ខែ ៣៩នាក់ បានស្លាប់រួចទៅហើយ ចាប់តាំងពីមន្ទីរពេទ្យដ៏ធំបំផុតរបស់តំបន់ហ្កាហ្សា មួយនេះបានអស់ប្រេងឥទ្ធនៈសម្រាប់ប្រតិបត្តិការកាលពីចុងសប្តាហ៍ លើម៉ាស៊ីនភ្លើងដែលរក្សាឧបករណ៍កម្ដៅខ្លួនទារក។យោធាអ៊ីស្រាអែលបាននិយាយកាលពីថ្ងៃអង្គារថា ខ្លួនកំពុងសម្របសម្រួលការផ្ទេរឧបករណ៍សង្រ្គោះទារកទាំងនោះចូលទៅក្នុងតំបន់ហ្កាហ្សា ស្ទ្រីប ក្នុងជំហានមួយដើម្បីអនុញ្ញាតឱ្យមានការជម្លៀសទារក។ យោធានេះមិនបាននិយាយថា តើខ្លួននឹងត្រូវធ្វើជំហានណាខ្លះដើម្បីដំណើរការជម្លៀសចេញ ស្របចំពេលមានការវាយប្រហារផ្លូវអាកាសយ៉ាងខ្លាំងក្លា និងការប្រយុទ្ធគ្នាជាបន្តបន្ទាប់នៅក្បែរមន្ទីរពេទ្យ អាល់ស៊ីហ្វា នោះ។អ្នកនាំពាក្យក្រសួងសុខាភិបាលហ្កាហ្សា ដែលស្ថិតនៅក្រោមការគ្រប់គ្រងរបស់ក្រុមហាម៉ាស បាននិយាយថា មិនមានការជំទាស់នឹងការជម្លៀសទារកនោះទេ ប៉ុន្តែអ៊ីស្រាអេល មិនទាន់មានយន្តការក្នុងការធ្វើរឿងនេះឡើយ។ មន្ទីរពេទ្យជាច្រើននៅតំបន់ហ្កាហ្សា ដូចជាមន្ទីរពេទ្យដ៏ធំ អាល់ស៊ីហ្វា ក៏ត្រូវបានបិទផងដែរ ដោយសារតែខ្វះប្រេងឥន្ធនៈ និងការផ្គត់ផ្គង់ ឬមានអ្នកជំងឺកកកុញពេក និងអ្នកដែលរងរបួសដ៏ច្រើនលើសលប់ពីក្នុងការប្រយុទ្ធគ្នា៕

បណ្ដាញសង្គម

ព័ត៌មានថ្មីៗ

មេដឹកនាំឈូសមុទ្រធ្វើដំណើរទៅដល់អារ៉ាប៊ីសាអ៊ូឌីត ដើម្បីពិភាក្សាពីការឆ្លើយតបចំពោះការវាយប្រហាររបស់អ៊ីរ៉ង់
04/28/2026 08:04 PM
Facebook Telegram Linkin
ប្រធានាធិបតីអេស្តូនី៖ «អឺរ៉ុបត្រូវតែត្រៀមខ្លួន» សម្រាប់គ្រាប់សេណារីយ៉ូ នៅក្នុងសង្គ្រាមអ៊ុយក្រែន
04/28/2026 08:04 PM
Facebook Telegram Linkin
យោធាអ៊ីស្រាអែលចេញការព្រមានជម្លៀស សម្រាប់តំបន់ភាគខាងត្បូងលីបង់
04/28/2026 08:04 PM
Facebook Telegram Linkin
ស៊ុយអែតព្រមានអំពីលទ្ធភាពដែលអាចខ្វះខាតប្រេងឥន្ធនៈយន្តហោះ ដោយសារសង្គ្រាមមជ្ឈិមបូព៌ា
04/28/2026 08:04 PM
Facebook Telegram Linkin
រសៀលនេះក្រុមអនុព័ន្ធយោធាបរទេសប្រចាំកម្ពុជា បន្តចុះសង្កេតការណ៍​ និងផ្ទៀងផ្ទាត់អំពីស្ថានភាពនៅស្ពានស្ទឹងមេទឹក ខេត្តពោធិ៍សាត់
04/28/2026 08:04 PM
Facebook Telegram Linkin
អារ៉ាប់រួម ចាកចេញពី OPEC និង OPEC+ ជាផលប៉ះពាល់យ៉ាងខ្លាំងដល់ក្រុមផលិតប្រេងសកល
04/28/2026 08:04 PM
Facebook Telegram Linkin
ក្រុមហ៊ុននីហ្សេរីយ៉ាផលិតយានបើកដោយខ្លួនឯង ដើម្បីការពារហេដ្ឋារចនាសម្ព័ន្ធអាហ្វ្រិក
04/28/2026 07:04 PM
Facebook Telegram Linkin
មន្ត្រីការពារជាតិជាន់ខ្ពស់៖ ហ្វីលីពីនមិនបារម្ភថា សង្គ្រាមអ៊ីរ៉ង់នឹងធ្វើឲ្យអាមេរិកងាកចេញពីតំបន់នោះទេ
04/28/2026 07:04 PM
Facebook Telegram Linkin
មនុស្សជាច្រើននាក់ស្លាប់ ក្នុងហេតុការណ៍អគ្គិភ័យឆាប់ឆេះការដ្ឋានសំណង់អគារកំពុងសាងសង់នៅទីក្រុងមូស្គូ
04/28/2026 07:04 PM
Facebook Telegram Linkin
អ៊ីរ៉ង់៖ អាមេរិកលែងមានឥទ្ធិពល «កំណត់» គោលនយោបាយដល់ប្រទេសដទៃទៀតហើយ
04/28/2026 07:04 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.