BTV NEWS

ស្លាប់១៨នាក់ ក្នុងករណីគ្រោះថ្នាក់ចរាចរណ៍៦ថ្ងៃ,ពីថ្ងៃទី២០ដល់២៥សីហានេះ

ឃាត់ខ្លួនជនបរទេសចំនួន៥នាក់ក្នុងប្រតិបត្តិការបង្ក្រាបបទល្មើសឆបោកតាមប្រព័ន្ធបច្ចេកវិទ្យានៅឃុំសំរោង ស្រុកចន្ទ្រា ខេត្តស្វាយរៀង

បង្ក្រាបក្រុមចោរកាច់កម៉ូតូទាំងសំបុក ៦នាក់ដែលតែងធ្វើសកម្មភាពយ៉ាងសកម្មក្នុងភូមិសាស្ដ្ររាជធានីភ្នំពេញ

ស្នងការរាជធានី បញ្ជារឲ្យរឹតបន្តឹងកាន់តែខ្លាំង លើម៉ូតូកៃច្នៃបំពង់ស៊ីម៉ាំងបង្កសម្លេងរំខានដល់ពលរដ្ឋ តាមទីសាធារណៈ

សន្តិសុខ និង សង្គម

កងទ័ពហ៊ូធីរបស់យ៉េម៉ែន លេចចេញជាការគំរាមកំហែងយ៉ាងធំដល់អ៊ីស្រាអែល និងអាមេរិក

កងទ័ពហ៊ូធីដែលគាំទ្រដោយអ៊ីរ៉ង់របស់យ៉េម៉ែន កំពុងលេចចេញជាការគំរាមកំហែងតែមួយគត់ចំពោះផលប្រយោជន៍របស់អ៊ីស្រាអែល និងអាមេរិក ទោះបីជាមានចម្ងាយជិត ១.៤០០ ម៉ាយពីសង្គ្រាមអ៊ីស្រាអែល-ហាម៉ាសក៏ដោយ ខណៈដែលក្រុងតេអេរ៉ង់ ប្រមូលផ្តុំសម្ព័ន្ធមិត្តរបស់ខ្លួន នៅពីក្រោយជម្លោះមជ្ឈិមបូព៌ាដ៏ធំនេះ។ក្រុមហ៊ូធី បានធ្វើឲ្យមន្ទីរបញ្ចកោណភ្ញាក់ផ្អើល កាលពីថ្ងៃព្រហស្បតិ៍សប្តាហ៍មុន ដោយបានបាញ់បង្ហោះយានដ្រូនវាយប្រហារ និងមីស៊ីលរយៈចម្ងាយឆ្ងាយពីប្រទេសយ៉េម៉ែន ដែលមន្ត្រីការពារជាតិអាមេរិកនិយាយថា គោលដៅសម្រាប់អ៊ីស្រាអែល ប៉ុន្តែត្រូវបានស្ទាក់ចាប់ដោយនាវា USS Carney ដែលជានាវាពិឃាតបំពាក់ដោយមីស៊ីលតម្រង់គោលដៅបញ្ជាពីចម្ងាយរបស់អាមេរិក ឆ្លងកាត់សមុទ្រក្រហម។ ក្រុម ហ៊ូធី បានគំរាមកំហែងនាពេលកន្លងមក ដើម្បីវាយប្រហារអ៊ីស្រាអែល ក្នុងការជួយដល់ទីក្រុងតេអេរ៉ង់ និងសម្ព័ន្ធមិត្តនៅមជ្ឈិមបូព៌ា រួមទាំងក្រុមហាម៉ាស នៅក្នុងទឹកដីប៉ាឡេស្ទីន និងក្រុមហេសបូឡា នៅលីបង់។មន្ត្រីអាមេរិក និងមជ្ឈិមបូព៌ា ដែលតាមដានក្រុមហ៊ូធី និងសម្ព័ន្ធមិត្តយោធារបស់ពួកគេជាមួយអ៊ីរ៉ង់ បាននិយាយថា នេះគឺជាលើកទីមួយហើយ ដែលពួកគេបានធ្វើសកម្មភាព និងបង្ហាញសមត្ថភាពរយៈចម្ងាយឆ្ងាយនេះ។

វេជ្ជបណ្ឌិត៖ អ្នកជំងឺក្នុងមន្ទីរពេទ្យហ្កាហ្សា បង្ហាញសញ្ញានៃជំងឺបណ្ដាលមកពីកន្លែងតូចចង្អៀត និងគ្មានអនាម័យ

ក្រុមវេជ្ជបណ្ឌិតនៅតំបន់ហ្កហ្សា និយាយថា អ្នកជំងឺដែលមកដល់មន្ទីរពេទ្យ កំពុងបង្ហាញសញ្ញានៃជំងឺថ្មី ដែលបង្កឡើងដោយស្ថានភាពកន្លែងតូចចង្អៀត និងអនាម័យមិនល្អ បន្ទាប់ពីមនុស្សជាង ១,៤លាននាក់ បានភៀសខ្លួនចេញពីលំនៅឋានរបស់ពួកគេ ទៅកាន់ទីជម្រកបណ្តោះអាសន្នក្រោមការទម្លាក់គ្រាប់បែកដ៏ធ្ងន់ធ្ងរបំផុតមិនធ្លាប់មានរបស់អ៊ីស្រាអែល។ទីភ្នាក់ងារផ្តល់ជំនួយជាច្រើនបានព្រមានម្តងហើយម្តងទៀត អំពីវិបត្តិសុខភាពនៅក្នុងតំបន់ហ៊ុមព័ទ្ធដ៏តូចចង្អៀតរបស់ប៉ាឡេស្ទីនមួយនេះ ក្រោមការបិទផ្លូវរបស់អ៊ីស្រាអែល ដែលបានកាត់ផ្តាច់អគ្គិសនី ទឹកស្អាត និងប្រេងឥន្ធនៈ ដោយមានតែក្បួនរថយន្តជំនួយតូចៗសម្រាប់ស្បៀងអាហារ និងឳសថរបស់អង្គការសហប្រជាជាតិចូលប៉ុណ្ណោះ។ក្រុមអាជ្ញាធរប៉ាឡេស្ទីនបាននិយាយថា មនុស្សជិត ៥.៨០០នាក់ ត្រូវបានសម្លាប់ដោយការវាយប្រហារតាមអាកាស និងកាំភ្លើងធំរបស់អ៊ីស្រាអែល បន្ទាប់ពីការវាយប្រហារកាលពីថ្ងៃទី៧ ខែតុលា ដោយក្រុមសកម្មប្រយុទ្ធហាម៉ាស ដែលបានសម្លាប់ពលរដ្ឋអ៊ីស្រាអែលជាង ១.៤០០នាក់ និងចាប់ចំណាប់ថ្នូរជាង ២០០នាក់មក។ដោយសារមន្ទីរពេទ្យទាំងអស់ ជិតអស់ប្រេងឥន្ធនៈដើម្បីផ្តល់ថាមពលដល់ម៉ាស៊ីនភ្លើងរបស់ពួកគេ ក្រុមវេជ្ជបណ្ឌិតបានព្រមានថា ឧបករណ៍សំខាន់ៗ ដូចជាឧបករណ៍កម្ដៅខ្លួនសម្រាប់ទារកទើបនឹងកើត អាចជួបហានិភ័យនៃការឈប់ដំណើរការ។ ក្រសួងសុខាភិបាលដែលគ្រប់គ្រងដោយក្រុមហាម៉ាស បាននិយាយថា មជ្ឈមណ្ឌលវេជ្ជសាស្ត្រចំនួន ៤០កន្លែង បានផ្អាកប្រតិបត្តិការនៅពេលដែលការទម្លាក់គ្រាប់បែក និងការផ្លាស់ទីលំនៅកំពុងដាក់សម្ពាធយ៉ាងខ្លាំងលើប្រព័ន្ធសុខាភិបាលក្នុងតំបន់មួយនេះ៕

ម៉ាឡេស៊ីប្រមូលផ្តុំអ្នកគាំទ្រ ថ្កោលទោសភាពឃោរឃៅរបស់អ៊ីស្រាអែល និងសម្ព័ន្ធមិត្តលោកខាងលិចនៅហ្កាហ្សា

នាយករដ្ឋមន្ត្រីប្រទេសម៉ាឡេស៊ី លោក Anwar Ibrahim បានចូលរួមជាមួយអ្នកគាំទ្រប៉ាឡេស្ទីន ១៦.០០០នាក់ កាលពីថ្ងៃអង្គារដើម្បីថ្កោលទៅទង្វើដ៏ឃោឃៅរបស់អ៊ីស្រាអែល នៅក្នុងតំបន់ហ្កាហ្សា ជាកន្លែងដែលមនុស្សរាប់ពាន់នាក់ ត្រូវបានសន្និដ្ឋានថាបានស្លាប់ក្នុងការវាយប្រហាររបស់អ៊ីស្រាអែល និងបានក៏បានរិះគន់ក្រុមអ្នកគាំទ្រលោកខាងលិច របស់ប្រទេសនេះ។ ការប្រមូលផ្តុំគ្នា នៅក្នុងរដ្ឋធានីកូឡាឡំពួ របស់ប្រទេសម៉ាឡេស៊ី គឺជាការប្រមូលផ្តុំគ្នាច្រើនបំផុត ក្នុងការធ្វើបាតុកម្មជាបន្តបន្ទាប់ ធ្វើឡើងនៅក្នុងប្រទេសម៉ាឡេស៊ី ដែលមានពលរដ្ឋមូស្លីមភាគច្រើន ក្នុងរយៈពេលប៉ុន្មានសប្តាហ៍ថ្មីៗនេះ។ប្រទេសម៉ាឡេស៊ី គឺជាអ្នកគាំទ្រប៉ាឡេស្ទីដ៏សំខាន់ជាយូរណាស់មកហើយ និងបានអំពាវនាវឲ្យមានដំណោះស្រាយរដ្ឋ២ចំពោះជម្លោះនេះ រវាងប្រទេសអ៊ីស្រាអែល និងប៉ាឡេស្ទីន។ ប្រទេសនេះពុំមាន ទំនាក់ទំនងការទូតជាមួយប្រទេសអ៊ីស្រាអែលនោះទេ។ លោក Anwar កាលពីសប្តាហ៍មុន បាននិយាយថា លោកបានច្រានចោលសម្ពាធរបស់លោកខាងលិចដើម្បីឲ្យថ្កោលទោសក្រុមហាម៉ាស់។ លោក បាននិយាយទៅកាន់មេដឹកនាំក្រុមហាម៉ាស់ លោក Ismail Haniyeh កាលពីដើមខែនេះ និងបានអំពាវនាវឲ្យបញ្ចប់ជាបន្ទាន់ការទម្លាក់គ្រាប់បែកនៅក្នុងតំបន់ហ្កាហ្សា និងអំពាវនាវឲ្យមានការបង្កើតច្រករបៀងមនុស្សធម៌។

នគរបាលធ្វើការដុតបំផ្លាញផលិតផលទំនិញខុសច្បាប់ជាង៥០តោន ក្រោយការបង្ក្រាបបាន

ភ្នំពេញ៖ ផលិតផលទំនិញខុសច្បាប់ជាង៥០តោន ដែលកម្លាំងសមត្ថកិច្ចចម្រុះ សហការគ្នា ធ្វើការបង្ក្រាបបានជាបន្តបន្ទាប់ កាលពីពេលកន្លងមក ក្នុងករណីចំនួន១០ ត្រូវបានធ្វើពិធីដុតបំផ្លាញចោល នាព្រឹកថ្ងៃទី២៥ ខែតុលា ឆ្នាំ២០២៣នេះ ក្នុងទីលានចាក់សំរាម ស្ថិតក្នុងសង្កាត់ដង្កោ ខណ្ឌដង្កោ រាជធានីភ្នំពេញ ។ពិធីដុតបំផ្លាញខាងលើនេះ ធ្វើឡើងក្រោមវត្ដមានឯកឧត្តមឧត្តមសេនីយ៍ឯក មួង សុធា អគ្គស្នងការរងនគរបាលជាតិ តំណាងឯកឧត្តមអគ្គស្នងការ និងដោយមានការចូលរួមពីលោកប្រធាននាយកដ្ឋាន មន្ត្រីកាំកុងត្រូល ស្ថាប័ន្ថតំណាងអយ្យការ មន្ត្រីអាជ្ញាធរពាក់ព័ន្ធ ក៏ដូចជាពលរដ្ឋជាច្រើនទៀតផងដែរ ។ឯកឧត្តម មួង សុធា មានប្រសាសន៍ឱ្យដឹងថា ផលិតផលដែលដុតបំផ្លាញចោលនៅព្រឹកនេះ រួមមាន ៖ ទំនិញនិងផលិតផល ក្លែងក្លាយ, ផលិតផលនាំចូលគ្មានច្បាប់អនុញ្ញាត, ផលិតផលគ្រឿងសំអាងលាយសារធាតុ គីមីខុសច្បាប់ ,ឱសថហួសកាលបរិច្ឆេទប្រើប្រាស់,ចំណីអាហារ និងសាច់ខូចគុណភាព ព្រម ទាំងសារធាតុគីមីខុសច្បាប់ជាដើម ។ ដែលកន្លងទៅ នគរបាលធ្លាប់បានធ្វើការដុតបំផ្លាញចោលចំនួន ៣៧លើក រួចមកហើយដែរ ។ឯកឧត្តម បានបន្តថា ពិធីដុតបំផ្លាញចោលនាថ្ងៃនេះ គឺជាសក្ខីភាពមួយ ដែលស្តែងពីការខិតខំប្រឹងប្រែងរបស់មន្រ្តីជំនាញ នៃនាយកដ្ឋាននគរបាលប្រឆាំងបទល្មើសសេដ្ឋកិច្ច សហការជាមួយ អង្គភាព ស្ថាប័នជំនាញពាក់ព័ន្ធ អាជ្ញាធរមូលដ្ឋាន រួមជាមួយវិស័យឯកជន ក្រោមការចង្អុលបង្ហាញពីថ្នាក់ដឹកនាំក្រសួងមហាផ្ទៃ និងអគ្គស្នងការដ្ឋាននគរបាលជាតិ ស្របតាមផែនការយុទ្ឋសាស្ត្ររបស់នាយកដ្ឋាននគរបាលប្រឆាំងបទល្មើសសេដ្ឋកិច្ច ។ក្នុងនោះដែរឯកឧត្តមក៏បានបន្ថែមថា ជាកិច្ចការបន្ត នាយកដ្ឋាននគរបាលប្រឆាំងបទល្មើសសេដ្ឋកិច្ច បាននិងកំពុងបន្តខិតខំអនុវត្តតាមតួនាទី ភារៈកិច្ច និងដាក់ចេញនូវទិសដៅការងាររបស់ខ្លួនស្រមតាមផនការ យុទ្ធសាស្ត្ររបស់អគ្គស្នងការដ្ឋាននគរបាលជាតិ ជាពិសេសបន្តចូលរួមសហការជាមួយសមត្ថ កិច្ចជំនាញពាក់ព័ន្ធ និងអាជ្ញាធរមូលដ្ឋានបង្ក្រាបនូវរាល់បទល្មើសសេដ្ឋកិច្ចប៉ះពាល់ដល់ខឿន សន្តិសុខសេដ្ឋកិច្ចជាតិ បទល្មើសគេចពន្ធបទល្មើសនាំទំនិញ និងផលិតផលក្លែងក្លាយ ហួសកាលបរិច្ឆេទប្រើប្រាស់,ចំណីអាហារខូចគុណភាព និងមានសារធាតុគីមីធ្វើឲ្យប៉ះពាល់ ដល់សុខុមាលភាពរបស់ប្រជាពលរដ្ឋយើង ៕ អត្ថបទ ៖ លីហេង

ចរាចរណ៍លើកំណាត់ផ្លូវជាតិលេខ១ មានភាពល្អប្រសើរបន្ទាប់ពីស្ពានកោះនរា បានបើកឱ្យប្រើប្រាស់

ភ្នំពេញ៖ បន្ទាប់ពីស្ពានឆ្លងទន្លេពីតំបន់អភិវឌ្ឍន៍កោះពេជ្រ ទៅតំបន់អភិវឌ្ឍន៍កោះនរា ត្រូវបានដាក់ឱ្យប្រើប្រាស់បណ្តោះអាសន្នរួចមក មានការកត់សម្គាល់ឃើញថា នៅថ្ងៃទី២៤ ខែតុលា ឆ្នាំ២០២៣នេះ ស្ថានភាពចរាចរណ៍ធ្វើដំណើររបស់ពលរដ្ឋ នៅលើកំណាត់ផ្លូវជាតិលេខ១ មានភាពល្អប្រសើរឡើងវិញ ដោយមិនមានការកកកុញស្ទះខ្លាំងដូចសព្វមួយដងនោះឡើយ ។ លោកវរសេនីយ៍ទោ រឿន សុជីវី អធិការរងនគរបាលខណ្ឌច្បារអំពៅ ទទួលផែននគរបាលចរាចរណ៍ និងសណ្តាប់ធ្នាប់សាធារណះ បានប្រាប់ BTV ឱ្យដឹងថា ដោយសារតែពលរដ្ឋបានទទួលជ្រាប អំពីការអនុញ្ញាតឱ្យមានការធ្វើចរាចរណ៍លើស្ពានកោះនរា ទើបពួកគាត់ភាគច្រើន បានបង្វែរទិសដៅចរាចរណ៍ទៅឆ្លងកាត់ស្ពានវិញ ធ្វើឱ្យស្ថានភាពចរាចរណ៍លើកំណាត់ផ្លូវជាតិលេខ១ មានភាពធូរស្បើយខ្លះជាងពេលមុន ។ លោកអធិការរងបន្ថែមថា ទន្ទឹមនឹងស្ថានភាពលំហូរចរាចរណ៍ បានធូរស្បើយ មិនបង្កជាការកកស្ទះដូចសព្វដងក៏ដោយ ក៏កម្លាំងនគរបាលរបស់លោក នៅតែបន្តយកចិត្តទុកដាក់ ក្នុងការប្រចាំការតាមគោលដៅស្តុបនីមួយៗលើកំណាត់ផ្លូវ ដើម្បីឈរសម្រួល និងរក្សារបៀបរៀបរយសាធារណៈ ឱ្យបានកាន់តែល្អប្រសើរឡើងផងដែរ ។ប្រជាពលរដ្ឋ ក៏បានបង្ហាញអារម្មណ៍រីករាយ ពេលស្ថានភាពលំហូរចរាចរណ៍លើផ្លូវជាតិលេខ១ មិនមានការកកស្ទះ ដោយពួកគាត់ ចំណេញពេលវេលាពេលជិះធ្វើដំណើរឆ្លងកាត់ មិនបន្តបង្កការរំខាន ។សូមបញ្ជាក់ថា ស្ពានបេតុងខ្សែកាបឆ្លងទន្លេ កោះពេជ្រ - កោះនរា បានដាក់ឱ្យដំណើរការប្រើប្រាស់ទាំង២ស្ពាន ជាបណ្តោះអាសន្ន កាលពីវេលាព្រលប់ល្ងាចថ្ងៃទី២៣ តុលា ឆ្នាំ២០២៣ ។ បន្ទាប់ពីមានការដាក់ឱ្យប្រើប្រាស់ភ្លាម មានពលរដ្ឋជាច្រើន បាននាំគ្នាជិះទៅដំណើរឆ្លងកាត់ជាបន្តបន្ទាប់ ៕ អត្ថបទ ៖ លីហេង

បារាំងបញ្ចប់ការដកទ័ពចេញពីមូលដ្ឋានភាគខាងជើងក្នុងប្រទេសនីហ្សេ ជាផ្នែកមួយនៃការចាកចេញដែលបានគ្រោងទុក

ប្រទេសបារាំង បានបញ្ចប់ការដកទ័ពចេញពីមូលដ្ឋានភាគខាងជើងនៃប្រទេសនីហ្សេ ដែលជាផ្នែកមួយនៃការចាកចេញដែលបានគ្រោងទុកពីប្រទេសអាហ្វ្រិកខាងលិច បន្ទាប់ពីរដ្ឋប្រហារយោធា កាលពីខែកក្កដា។អ្នកនាំពាក្យរដ្ឋាភិបាលលោកវីរសេនីយ៍ទោ Amadou Abdramane បាននិយាយកាលពីថ្ងៃអាទិត្យថា ទាហានជិត ២០០នាក់ រថយន្តដឹកទំនិញ ២៨គ្រឿង និងរថពាសដែកចំនួន ២៤គ្រឿង បានចាកចេញពីមូលដ្ឋានយោធា Ouallam ដែលត្រូវបានប្រគល់ទៅឲ្យប្រទេសនីហ្សេ។ ការដកទ័ពរបស់បារាំង ត្រូវបានគេរំពឹងថា នឹងបញ្ចប់នៅចុងឆ្នាំនេះ។ ទាហានបារាំងប្រហែល ១.៥០០ នាក់ បាននិងកំពុងប្រតិបត្តិការនៅក្នុងប្រទេសនីហ្សេ ដោយបានបណ្តុះបណ្តាលយោធារបស់ខ្លួន និងធ្វើប្រតិបត្តិការរួមគ្នា។ការប្រកាសនេះ ធ្វើឡើងប៉ុន្មានសប្តាហ៍ បន្ទាប់ពីប្រធានាធិបតីបារាំង អេម៉ានូអែល ម៉ាក្រុង បានប្រកាសថា ប្រទេសបារាំង នឹងបញ្ចប់វត្តមានយោធារបស់ខ្លួននៅក្នុងប្រទេសនីហ្សេ ហើយដកឯកអគ្គរដ្ឋទូតរបស់ខ្លួនចេញពីប្រទេសនេះ ដោយសាររដ្ឋប្រហារដែលបានទម្លាក់លោកប្រធានាធិបតី ម៉ូហាម៉េ បាហ្ស៊ូម (Mohamed Bazoum)ពីតំណែង។

អ៊ីស្រាអែល ប្ដេជ្ញាធ្វើការវាយប្រហារឥតឈប់ឈរលើក្រុមហាម៉ាស ខណៈលោកអូបាម៉ា ជំរុញឱ្យមានការប្រុងប្រយ័ត្ន

យោធាអ៊ីស្រាអែលបាននិយាយថា ខ្លួនកំពុងរៀបចំសម្រាប់ «ការវាយប្រហារដោយឥតឈប់ឈរ» ដើម្បីកម្ចាត់ក្រុមហាម៉ាស ខណៈអតីតប្រធានាធិបតីសហរដ្ឋអាមេរិក លោក បារ៉ាក់ អូបាម៉ា (Barack Obama ) បានព្រមានថា «យុទ្ធសាស្ត្រយោធារបស់អ៊ីស្រាអែលណាមួយ ដែលមិនអើពើនឹងជីវិតមនុស្ស អាចជះឥទ្ធិពលអាក្រក់ត្រលប់មកខ្លួនវិញ»។លោក អូបាម៉ា នៅក្នុងការអត្ថាធិប្បាយដ៏កម្រមួយរបស់អតីតប្រធានាធិបតីអាមេរិក ស្តីពីវិបត្តិគោលនយោបាយការបរទេស បានចេញសេចក្តីថ្លែងការណ៍ជាលាយលក្ខណ៍អក្សរ ព្រមានអ៊ីស្រាអែល កុំឱ្យបណ្តាលឱ្យមានជនស៊ីវិលស្លាប់ និងរបួសច្រើនពេក ក្នុងការសងសឹកលើក្រុមហាម៉ាស ដែលវានឹងធ្វើឱ្យប្រជាជនប៉ាឡេស្ទីនជំនាន់ក្រោយ បង្កើតគំនិតផ្តាច់ខ្លួន។ក្រសួងសុខាភិបាលប៉ាឡេស្ទីនបាននិយាយថា ចំនួនអ្នកស្លាប់នៅតំបន់ហ្កាហ្សា បានកើនឡើងដល់ជាង ៥.០០០នាក់ ក្នុងរយៈពេលពីរសប្តាហ៍ នៃការវាយប្រហារតាមអាកាសរបស់អ៊ីស្រាអែល ដើម្បីឆ្លើយតបទៅនឹងការវាយប្រហាររបស់ពួកហាម៉ាស កាលពីថ្ងៃទី៧ ខែតុលា ទៅលើភាគខាងត្បូងអ៊ីស្រាអែល ដែលក្រុមសកម្មប្រយុទ្ធអ៊ីស្លាមមួយក្រុមនេះ បានសម្លាប់ពលរដ្ឋអ៊ីស្រាអែលជាង ១.៤០០នាក់។អគ្គសេនាធិការកងទ័ពអ៊ីស្រាអែល លោកឧត្តមសេនីយឯក Herzi Halevi បានចេញសេចក្តីថ្លែងការណ៍មួយ ដោយលើកឡើងថា អ៊ីស្រាអែលមិនមានចេតនាទប់ស្កាត់ការវាយប្រហាររបស់ខ្លួនលើតំបន់ហ្កាហ្សា ស្ទ្រីប ដែលមានប្រជាជនរស់នៅច្រើននោះទេ ហើយបានចង្អុលបង្ហាញថា ខ្លួនបានរៀបចំយ៉ាងល្អសម្រាប់ការវាយលុកថ្មើរជើង ដែលនឹងមកដល់ក្នុងពេលឆាប់ៗនេះផងដែរ៕

មនុស្សយ៉ាងហោចណាស់៧នាក់ បានស្លាប់ក្នុងគ្រោះថ្នាក់ចរាចរណ៍មួយនៅសហរដ្ឋអាមេរិក

ក្រុមអាជ្ញាធរបាននិយាយថា មនុស្សយ៉ាងហោចណាស់ ៧នាក់បានស្លាប់ និងមនុស្ស ២៥នាក់ផ្សេងទៀត បានរងរបួសនៅក្នុងគ្រោះថ្នាក់រថយន្តដ៏ធំមួយ កាលពីថ្ងៃច័ន្ទ (២៣ តុលា) ដោយសារតែ «ផ្សែងអ័ព្ទដ៏ក្រាស់» ចេញពីចំហេះព្រៃនៅរដ្ឋលូស៊ីអាណា (Louisiana) ភាគខាងត្បូង និងអ័ព្ទពេលព្រឹកដ៏ក្រាស់។ នគរបាលរដ្ឋបាននិយាយកាលពីយប់ថ្ងៃច័ន្ទថា យានយន្តចំនួន១៥៨គ្រឿង បានបុកបន្តគ្នា ហើយចំនួនអ្នកស្លាប់អាចកើនឡើងខ្ពស់ជាងនេះ។សាក្សីជាច្រើនបានរាយការណ៍ពីដំបូងថា មានមនុស្សពីរនាក់បានស្លាប់ នៅក្នុងរថយន្តដឹកទំនិញមួយគ្រឿង ដែលត្រូវបានរថយន្តខ្នាតធំកង់១៨ មួយគ្រឿងរអិលសង្កត់ពីលើ។ ផ្សែងអ័ព្ទដ៏ក្រាស់ ដែលបង្កឲ្យការមើលឃើញមិនសូវល្អ ត្រូវបានបង្កើតឡើងដោយផ្សែងចេញពីចំហេះព្រៃនៅតំបន់ដីសើម រួមជាមួយនឹងអ័ព្ទពេលព្រឹកដ៏ក្រាស់ ហើយផ្សែងអ័ព្ទទាំងនោះត្រូវបានគេរំពឹងថា នឹងបន្តមានរយៈពេលជាច្រើនថ្ងៃទៀតផងដែរ៕

ក្រុមមន្ត្រី IAEA៖ ការបញ្ចេញទឹកមានវិទ្យុសកម្ម ដែលត្រូវបានធ្វើប្រព្រឹត្តកម្មពីរោងចក្រហ៊្វូគូស៊ីម៉ា ដំណើរការដោយរលូន

ប្រតិបត្តិករនៃរោងចក្រថាមពលនុយក្លេអ៊ែរ ហ៊្វូគូស៊ីម៉ា ដាយអ៊ីឈិ (Fukushima Daiichi) បាននិយាយថាការបញ្ចេញសំណល់ទឹកមានសារធាតុវិទ្យសកម្ម ដែលបានធ្វើប្រព្រឹត្តកម្មរួចដំណាក់កាលទី២ ចូលទៅក្នុងសមុទ្រ បានបញ្ចប់ទៅតាមផែនការកាលពីថ្ងៃចន្ទទី២៣ខែតុលាសប្ដាហ៍នេះ ហើយក្រុមមន្ត្រីទីភ្នាក់ងារថាមពលអាតូមិកអន្តរជាតិ នៅក្នុងប្រទេសជប៉ុន សម្រាប់សុវិត្ថភាពដំបូងរបស់ពួកគេ និងបេសកម្មតាមដាន ចាប់តាំងពីការបញ្ចេញបានចាប់ផ្ដើមកាលពី២ខែមុន បាននិយាយថា គ្មានបញ្ហាអ្វី ត្រូវតាមដាននោះទេ។ រោងចក្រថាមពលនុយក្លេអ៊ែរ ហ្វូគូស៊ីម៉ាដាយអ៊ីឈិ បានចាប់ផ្ដើមបញ្ចេញសំណល់ទឹកមានសារធាតុវិទ្យុសកម្ម និងបានធ្វើប្រព្រឹត្តកម្មរួច ចូលទៅក្នុងសមុទ្រកាលពីថ្ងៃទី២៤ខែសីហា ។ ប្រតិបត្តិករ ក្រុមហ៊ុន ថាមពលអគ្គិសនី តូក្យូ បាននិយាយថា ការបញ្ចេញទឹក មានសារធាតុវិទ្យុសកម្ម ដែលបានធ្វើប្រព្រឹត្តកម្មរួច ក្នុងដំណាក់កាលទី២ មានចំនួន៧.៨០០ តោន ត្រូវបានបញ្ចប់រួចរាល់ហើយ ដោយមានការតាមដានសំណាកទឹកសមុទ្រប្រចាំថ្ងៃ ស្របតាមស្តង់ដារសុវត្ថិភាពពេញលេញ។ ការរញ្ជួយដីកម្រិត៩រ៉ិចទ័រ កាលពីថ្ងៃទី១១ខែមីនា ឆ្នាំ២០១១ បានបង្កឲ្យមានរលកយក្សស៊ូណាមិ ដែលបានបំផ្លិចបំផ្លាញប្រព័ន្ធផ្គត់ផ្គង់ថាមពលនិងប្រព័ន្ធស្អំទឹកត្រជាក់ បណ្ដាលឲ្យម៉ាស៊ីរ៉េអាក់ទ័រ ចំនួន៣ត្រូវរលាយ និងបញ្ចេញសារធាតុវិទ្យុសកម្មយ៉ាងច្រើន ។ គេរំពឹងថា ការបញ្ចេញទឹកដែលបានធ្វើវិទ្យុសកម្មរួច នឹងត្រូវការពេលជាច្រើនទសវត្សរ៍ ។ការបញ្ចេញនេះ មានភាពចម្រូងចម្រាសយ៉ាងខ្លាំង ពីក្រុមប្រជានេសាទ និងប្រទេសជិតខាង ដូចជា កូរ៉េខាងត្បូងជាដើម ដែលមានមនុស្សរាប់រយនាក់ចេញតវ៉ា។ ប្រទេសចិន បានហាមប្រាមការនាំចូលអាហារសមុទ្រសំខាន់ៗទាំងអស់ នៅថ្ងៃដែលប្រទេសជប៉ុន បានចាប់ផ្ដើមបញ្ចេញសំណល់ទឹកនេះ ដែលបានប៉ះពាល់យ៉ាងខ្លាំង ដល់ក្រុមអ្នកផលិត អ្នកដំណើរការ និងអ្នកនាំចូលអាហារសមុទ្ររបស់ជប៉ុន។ ថ្មីៗនេះ ប្រទេសរុស្ស៊ី ក៏បានចូលួមជាមួយប្រទេសចិនក្នុងការរឹតត្បិតពាណិជ្ជកម្មលើប្រទេសជប៉ុនផងដែរ៕

អ៊ីស្រាអែលបង្កើនការវាយប្រហារលើតំបន់ហ្កាហ្សា ខណៈអាមេរិកសុំឲ្យពន្យាពេលសង្គ្រាមថ្មើជើង ទុកឱកាសចរចាដោះលែងចំណាប់ថ្នូរ

អ៊ីស្រាអែលបានបង្កើនការវាយប្រហារតាមអាកាសកាលពីថ្ងៃចន្ទនៅតំបន់ហ្កាហ្សា ជាទីដែលចំនួនអ្នកស្លាប់កំពុងកើនឡើងយ៉ាងឆាប់រហ័ស ហើយសហរដ្ឋអាមេរិកបានណែនាំអ៊ីស្រាអែលឱ្យពន្យារពេលការឈ្លានពានដោយថ្មើរជើង ដែលរំពឹងទុក ទុកពេលបន្ថែមទៀតដើម្បីចរចារដោះលែងចំណាប់ថ្នូរដែលក្រុមសកម្មប្រយុទ្ធហាម៉ាស បានចាប់យកទៅ។ ក្រុមហាម៉ាស បានដោះលែងស្ត្រីជនជាតិអាមេរិកម្នាក់នាក់ និងកូនស្រីជំទង់របស់ខ្លួន កាលពីសប្ដាហ៍មុន ជាអ្វីដែលក្រុមនេះនិយាយថា ជាកាយវិកាមនុស្សធម៌ ដែលបានសម្របសម្រួលដោយប្រទេសកាតា ។ ក្រុមមន្ត្រីអាមេរិក ក៏ចង់បានពេលវេលាខ្លះដែរ ដើម្បីត្រៀមទប់ទល់ការវាយប្រហារនានាលើផលប្រយោជន៍អាមេរិក នៅក្នុងតំបន់នេះ ពីក្រុមគាំទ្រដោយអ៊ីរ៉ង់ ដែលក្រុមមន្ត្រីអាមេរិកនិយាយថា ទំនងមានការបង្កើនការវាយប្រហារលើកងកម្លាំងរបស់ខ្លួនក្នុងតំបន់មជ្ឈិមបូព៌ា នៅពេលអ៊ីស្រាអែលវាយលុកចូលតំបន់ហ្កាហ្សាពេញទំហឹង។ យោងតាមមន្ត្រីប៉ាឡេស្ទីន និងក្រុមអ្នកឃើញហេតុការណ៍បាននិយាយថា ការវាយប្រហារតាមអាកាសយ៉ាងខ្លាំងក្លា បានវាយកម្ទេចអគារនានានៅទូទាំងតំបន់ហ្កាហ្សា រួមទាំងតំបន់ គេបានប្រាប់ឲ្យជនជាតិប៉ាឡេស្ទីនស្វែងរកកន្លែងជ្រកកោន ដោយបានសម្លាប់មនុស្សរាប់រយនាក់ និងបញ្ជូនរលកថ្មីនៃអ្នករបួសទៅកាន់មន្ទីរពេទ្យដែលបានរងការបំផ្លិចបំផ្លាញរួចរួចទៅហើយ។កាលពីល្ងាចថ្ងៃចន្ទ ក្រុមហាម៉ាសបានប្រកាសថាខ្លួនបានដោះលែងចំណាប់ថ្នូរពីរនាក់បន្ថែមលើហេតុផលមនុស្សធម៌។ ប្រព័ន្ធផ្សព្វផ្សាយអ៊ីស្រាអែលដែលបានដកស្រង់សម្តីមន្ត្រីមិនបញ្ចេញអត្តសញ្ញាណថា បានបញ្ជាក់ពីការដោះលែងនោះ ប៉ុន្តែមិនមានការប្រកាសជាផ្លូវការពីភាគីអ៊ីស្រាអែលទេ។ ហើយសារព័ត៌មាន AP មិនអាចបញ្ជាក់ដោយឯករាជ្យពីការដោះលែងនោះទេ ៕

បណ្ដាញសង្គម

ព័ត៌មានថ្មីៗ

រាជរដ្ឋាភិបាលកំពុងតាមដាន និងត្រៀមដាក់ចេញវិធានការ អំពីផលប៉ះពាល់នានាដែលកំពុងកើតឡើង

បេសកជនអាមេរិក៖ លីបង់នឹងរៀបចំផែនរំសាយអាវុធរបស់ក្រុមហេសបូឡា នៅថ្ងៃទី៣១ ខែសីហា

រដ្ឋមន្ត្រីបារាំងនឹងមិនច្រានចោលការមានការបោះឆ្នោតមុនអាណត្តិ ក្រោយការឆ្នោតផ្ដល់ទំនុកចិត្ត ចំពោះនាយករដ្ឋមន្ត្រី ស្ថិតក្នុងហានិភ័យ

អ្នករៀបចំ៖ ប្រទេសជាង ៧០ បញ្ជាក់ពីការចូលរួមក្នុងវេទិកាសេដ្ឋកិច្ចបូព៌ា ឆ្នាំ ២០២៥

កងទ័ពហ្ស៊កដានីស្ទាក់ចាប់បានបាឡុងជាច្រើនគ្រាប់ដែលផ្ទុកគ្រឿងញៀន នៅព្រំដែនភាគខាងកើតប្រទេសនេះ

ការជម្លៀសខ្លួនទ្រង់ទ្រាយធំធ្វើឡើងនៅភាគខាងកើតប៉ាគីស្ថាន ពេលដែលឥណ្ឌាបញ្ចេញទឹកពីទន្លេ

លោកអភិបាលខណ្ឌ៧មករា ដឹកនាំមន្រ្តីចុះសម្អាតបរិស្ថានអនាម័យ ក្នុងបរិវេណវិទ្យាល័យបាក់ទូក ត្រៀមជាមណ្ឌលប្រឡងទុតិយភូមិរបស់សិស្សានុសិស្ស

អធិការបតី៖ អាល្លឺម៉ង់នឹងមិនទទួលស្គាល់រដ្ឋប៉ាឡេស្ទីន នៅឯមហាសន្និបាត UN

សម្តេចធិបតី និងលោកជំទាវបណ្ឌិត ពេជ ចន្ទមុន្នីហ៊ុនម៉ាណែត ផ្តល់ក្ដីសង្ឃឹមថ្មីដល់ក្មួយស្រី “សុខ រក្សា” ក្នុងការព្យាបាលជំងឺដុំសរសៃឈាម (Hemangioma) នៅរដ្ឋធានីតៃវ៉ាន់

ផ្សែងហុយពីលើទីក្រុងហ្កាហ្សា ស្របពេលប្រតិបត្តិការយោធាអ៊ីស្រាអែលនៅតែបន្ត

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877