BTV NEWS

តំណាងអយ្យការ មិនទាន់បញ្ចប់ការស៊ើបអង្កេត និងស្តាប់ចម្លើយមន្ត្រីជាន់ខ្ពស់នគរបាល២រូប និងជនសង្ស័យពីររូបទៀតនៅឡើយទេពាក់ព័ន្ធករណីសង្ស័យស៊ីសំណូក និងសម្អាតប្រាក់ពីក្រុមឆបោក តាមប្រព័ន្ធបច្ចេកវិទ្យា

ប្រព័ន្ធលូបង្ហូរទឹក ជាផ្នែកសំខាន់ដែលអាជ្ញាធរមូលដ្ឋានត្រូវយកចិត្តទុកដាក់ ដើម្បីបញ្ចៀសការជន់លិចនៅរដូវវស្សា

គណៈបញ្ជាការឯកភាពរាជធានី បើកការចុះបង្ក្រាបទីតាំងឆបោកអនឡាញ និងគ្រឿងញៀននៅខណ្ឌមានជ័យ ឃាត់ជនបរទេស៥៥នាក់

នគរបាលរាជធានីភ្នំពេញបង្ហាញមុខជនសង្ស័យ ១១នាក់ករណីហិង្សាវាយកម្ទេចរថយន្តក្បែរវត្តភ្នំ

សន្តិសុខ និង សង្គម

ព្យុះកួច Lidia វាយបោកបក់មកលើឆ្នេរប្រទេសម៉ិកស៊ិក បណ្តាលឲ្យមានការបំផ្លាញរាលដាល

ព្យុះកួចដ៏មានឥទ្ធិពល Lidia បានបណ្តាលឲ្យមនុស្សយ៉ាងហោចណាស់ម្នាក់ស្លាប់ កាលពីថ្ងៃអង្គារ បន្ទាប់ពីបានវាយបោកបក់ចូលមកឆ្នេរសមុទ្រប៉ាស៊ីហ្វិករបស់ប្រទេសម៉ិកស៊ិក និងបានបណ្តាលឲ្យដើមឈើ និងបណ្តាញអគ្គិសនី បាក់រលំ។ នៅក្នុងទីក្រុង Puerto Vallarta តំបន់ឆ្នេរ ដើមឈើនិងកម្ទេចកម្ទី មកពីអគារដែលត្រូវបានបំផ្លាញ បានរាយប៉ាយនៅលើដងផ្លូវ។ រលកធំៗ អាចត្រូវបានគេមើលឃើញ នៅលើឆ្នេរសមុទ្រទីក្រុងនេះ។មជ្ឈមណ្ឌលព្យុះកួចជាតិ បាននិយាយថា ព្យុះ Lidia ដែលបានចុះខ្សោយទៅជាព្យុះប្រភេទទី២ ដោយមានខ្យល់បក់អតិបរមា ១១០គីឡូម៉ែត្រក្នុងមួយម៉ោង ត្រូវបានគេរំពឹងថាបន្តបង្កើតឲ្យមានភ្លៀងធ្លាក់ខ្លាំង និងសន្ទុះខ្យល់បក់ ខណៈព្យុះនេះឆ្ពោះទៅដីគោក លើប្រទេសម៉ិកស៊ិកគាភកណ្តាលប៉ែកខាងលិច។ព្យុះ Lidia បានវាយបោកបក់ដល់ដីគោក ជាព្យុះប្រភេទទី៤ បង្កឲ្យមានភ្លៀងធ្លាក់ខ្លាំង បណ្តាលឲ្យទន្លេពេញហៀរ ផ្តួលរំលំដើមឈើ និងនាំទៅរកការជន់លិចខ្លាំង នៅរដ្ឋភាគខាងលិចជាច្រើន របស់ប្រទេសម៉ិកស៊ិក។យោងតាមអភិបាលរដ្ឋ Nayarit បាននិយាយថា បុរសម្នាក់បានស្លាប់ នៅពេលដែលដើមឈើបានបាក់រលំលើរថយន្តរបស់គាត់ អំឡុងពេលព្យុះនៅជិតរមណីយដ្ឋានឆ្នេរ Punta Mita ។

ស្ថាប័នសិទ្ធិមនុស្សរបស់UN អនុម័តសេចក្តីសម្រេច ដើម្បីស៊ើបអង្កេតការរំលោភសិទ្ធិនៅប្រទេសស៊ូដង់ ដែលហែកហួរដោយសង្រ្គាម

ក្រុមប្រឹក្សាសិទ្ធិមនុស្សរបស់អង្គការសហប្រជាជាតិកាលពីថ្ងៃពុធ បានអនុម័តសេចក្តីសម្រេចបើកការស៊ើបអង្កេតលើស្ថានភាពមនុស្សធម៌ក្នុងប្រទេសស៊ូដង់ ដែលកងទ័ព និងក្រុមប្រដាប់អាវុធ បានប្រយុទ្ធគ្នាអស់រយៈពេល៦ខែចុងក្រោយនេះ។លោកស្រី Michèle Taylor តំណាងអចិន្ត្រៃយ៍របស់សហរដ្ឋអាមេរិកប្រចាំក្រុមប្រឹក្សាសិទ្ធិមនុស្សអង្គការសហប្រជាជាតិ ដែលជាប្រទេសមួយក្នុងចំណោមប្រទេស ដែលបានបង្ហាញសេចក្តីសម្រេចនេះ បាននិយាយថា សេចក្តីសម្រេចនេះ គឺជាការអំពាវនាវឲ្យមានសកម្មភាពសម្រាប់អ្វីដែលយើងទាំងអស់គ្នាយល់ស្រប គឺជាអាទិភាពសំខាន់សម្រាប់ភាគីសង្រ្គាម ដើម្បីបញ្ឈប់អំពើឃោរឃៅ និងការរំលោភបំពានផ្សេងទៀតរបស់ពួកគេ ការដាក់អាវុធរបស់ពួកគេ និងអនុញ្ញាតឲ្យមានសិទ្ធិចូលដំណើរការមនុស្សធម៌ដ៏មានសុវត្ថិភាព ឆាប់រហ័ស និងគ្មានការរារាំង ដែលជាតម្រូវការដ៏ចាំបាច់បំផុត។ ប្រទេសចំនួន១៩ បានបោះឆ្នោតគាំទ្រ ១៦បានបោះឆ្នោតប្រឆាំង និង ១២អនុប្បវាទ។អំពើហិង្សា និងការផ្លាស់ទីលំនៅ បានកើនឡើង ចាប់តាំងពីការប្រយុទ្ធគ្នារវាងកងទ័ព និងកងកម្លាំងគាំទ្ររហ័សយោធាប៉ារ៉ា (RSF) បានផ្ទុះឡើង នៅក្នុងខែមេសា។ ក្នុងចំណោមតំបន់ដែលរងផលប៉ះពាល់ខ្លាំងជាងគេគឺ ដាហ្វឺខាងលិច (West Darfur) ជាកន្លែងដែលការវាយប្រហារជំរុញដោយជាតិភាគតិច បានសម្លាប់មនុស្សរាប់រយនាក់។

រូបភាពថតដោយយានដ្រូន បង្ហាញពីការបំផ្លិចបំផ្លាញនៅទីក្រុង Beeri ក្រោយការវាយប្រហាររបស់ក្រុមហាម៉ាស

យោធាអ៊ីស្រាអែល និយាយថា ខ្លួនបានសម្លាប់ពួកសកម្មប្រយុទ្ធហាម៉ាសរាប់សិបនាក់ កាលពីថ្ងៃពុធ (ទី១១ តុលា) នៅតំបន់ប៊ីរី គីបប៊ុត Beeri Kibbutz ក្នុងប្រទេសអ៊ីស្រាអែល។រូបភាពថតដោយយានដ្រូនរបស់សារព័ត៌មានរ៉យទ័រ បានបង្ហាញពីការបំផ្លិចបំផ្លាញ ការខូចខាត និងកម្ទេចថ្មនៅលើដី បន្ទាប់ពីអ៊ីស្រាអែល បានបំផ្លាញទីតាំងដែលពួកគេនិយាយថា ពួកសកម្មប្រយុទ្ធកំពុងលាក់ ខ្លួន។ប្រព័ន្ធផ្សព្វផ្សាយអ៊ីស្រាអែល បានរាយការណ៍ថា ក្រុមសកម្មប្រយុទ្ធ បានសម្លាប់មនុស្សយ៉ាងហោចណាស់ ១០០នាក់ នៅក្នុងទីក្រុងប៊ីរី។ការវាយប្រហារដ៏គួរឲ្យភ្ញាក់ផ្អើលរបស់ក្រុមហាម៉ាស កាលពីថ្ងៃសៅរ៍ (ទី៧ ខែតុលា) ពាក់ព័ន្ធនឹងការវាយ ដោយគ្រាប់រ៉ុក្កែត និងការវាយប្រហារដោយក្រុមខ្មាន់កាំភ្លើងនៅលើសហគមន៍ គីបប៊ុតហ្សេស (kibbutzes)និងទីប្រជុំជននានានៅភាគខាងត្បូងប្រទេសអ៊ីស្រាអែលជុំវិញតំបន់ហ្គាហ្សាស្ទ្រីបដែលត្រូវបានគេបិទខ្ទប់។ការវាយប្រហារនេះ បានបង្កើនអំពើហិង្សាយ៉ាងខ្លាំងរវាងអ៊ីស្រាអែល និងក្រុមសកម្មប្រយុទ្ធប៉ាឡេស្ទីន។ក្រុមមន្ត្រីប៉ាឡេស្ទីន បាននិយាយថា អ៊ីស្រាអែល បានទម្លាក់គ្រាប់បែកលើតំបន់ហ្គាហ្សា ជាការឆ្លើយតបចំពេលមានរបាយការណ៍អំពីការវាយប្រហារលើដីដ៏ខ្លាំងក្លាប្រឆាំងនឹងក្រុមហាម៉ាស ដែលបានសម្លាប់មនុស្សជាង ១.០០០ នាក់។ យោធាអ៊ីស្រាអែល បាននិយាយថា ចំនួនអ្នកស្លាប់របស់អ៊ីស្រាអែលពីការវាយប្រហាររបស់ពួកហាម៉ាស បានកើនឡើងដល់ ១.២០០នាក់ និងជាង ២.៧០០នាក់ បានរងរបួស។

ក្រុមវេជ្ជបណ្ឌិតតំបន់ហ្គាហ្សា ព្យាបាលកុមារ ខណៈព្រួយបារម្ភពីកង្វះថ្នាំពេទ្យ ឬការផ្គត់ផ្គង់សម្ភារៈវេជ្ជសាស្ត្រ

អ៊ីស្រាអែលនៅតែទម្លាក់គ្រាប់បែកកម្ទេចតំបន់ហ្គាហ្សាទាំងយប់ជ្រៅ កាលពីថ្ងៃពុធទី១១ខែតុលារ មុនវាយលុកលើដីដ៏ធំប្រឆាំងក្រុមហាម៉ាស។ មន្ទីរពេទ្យជាច្រើនផ្ទុកពេញដោយអ្នកជំងឺ ហើយក្រុមវេជ្ជបណ្ឌិត បារម្ភថាពួកគេ នឹងពុំមានថ្នាំពេទ្យ ឬលែងមានការផ្គត់ផ្គង់វេជ្ជសាស្ត្រទៀត។លោកវិជ្ជបណ្ឌិត អាស្រាហ្វ អាល់ គីដ្រា (Ashraf Al- Qidra) អ្នកនាំពាក្យក្រសួងសុខាភិបាលប៉ាឡេស្ទីន និយាយថាយើងត្រូវការច្រកសុវត្ថិភាពដើម្បីទទួលបានការផ្គត់ផ្គង់វិជ្ជសាស្ត្រចូលទៅតំបន់ហ្គាហ្សា។ ហើយអាចនាំអ្នករបួសចេញពីតំបន់ហ្គាហ្សាទៅកន្លែងផ្សេងទៀត ដើម្បីទទួលបានការព្យាបាលនៅមន្ទីរពេទ្យ។រយៈពេលប៉ុន្មានម៉ោងទៀត គឺជាពេលវេលាដ៏ធ្ងន់ធ្ងរ និងអាចជាស្ថានភាពតក់ស្លត់បំផុតចំពោះវិស័យសុខាភិបាលទាំងអស់សម្រាប់មនុស្សទាំងអស់ដែរ។ យោធាអ៊ីស្រាអែលនិយាយថាចំនួនអ្នកស្លាប់របស់ខ្លួន បានឡើងដល់ ជាង១.២០០នាក់និងជាង២.៧០០នាក់របួសពីការសម្រុកចូលបាញ់ស្រោចរយៈពេលជាច្រើនម៉ោងរបស់ក្រុមខ្មាន់កាំភ្លើងរបស់ក្រុមហាម៉ាស់ បន្ទាបើពីការវាយលុកឆ្លងព្រំដែនជុំវិញតំបន់ហ្គាហ្សាកាលពីថ្ងៃសៅរ៍។ ក្រុមមន្ត្រីប៉ាឡេស្ទីននិយាយថាការវាយប្រហារសងសឹកលើតំបន់រងការឡោមព័ទ្ធបានសម្លាប់មនុស្ស ១.០៥៥ នាក់ និងរបួស៥.១៨៤នាក់ ។ យោធាអ៊ីស្រាអែល និយាយថា ខ្លួនបានសម្លាប់ក្រុមខ្មាន់កាំភ្លើងប៉ាឡេស្ទីនយ៉ាងហោចណាស់១.០០០នាក់ ដែលជ្រៀតចូលពីតំបន់ហ្គាហ្សា។ ក្រសួងការបរទេសប៉ាឡេស្ទីន និយាយាថា ការវាយប្រហាររបស់អ៊ីស្រអែលចាប់តាំងពីថ្ងៃសៅរ៍មកបានបំផ្លាញអគារលំនៅឋានពលរដ្ឋជាង ២២.៦០០ អគារមន្ទីរពេទ្យ១០កន្លែង និងខូចខាតដល់អគារសាលារៀនចំនួន៤៨កន្លែង៕

ប្រទេសអាហ្វ្រិកដើរតាមមាគ៌ាការទូត ដើម្បីឆ្លើយតបនឹងការវាយប្រហាររបស់ក្រុមហាម៉ាស់ទៅលើអ៊ីស្រាអែល

ការកើនឡើងនៃអរិភាពរវាងអ៊ីស្រាអែល និងប៉ាឡេស្ទីន បន្ទាប់ពីការវាយប្រហារទ្រង់ទ្រាយធំដែលមិនធ្លាប់មានពីមុនមកដោយក្រុមសកម្មប្រយុទ្ធប៉ាឡេស្ទីនហាម៉ាស់(Hamas) បាននាំឲ្យមានប្រតិកម្មយ៉ាងទូលំទូលាយពីបណ្តាប្រទេសនៅអាហ្វ្រិក។ ក្រុមមេដឹកនាំទាំងនេះ កំពុងព្យាយាមដើរតាមមាគ៌ានេះរវាងគោលការណ៍ដែលត្រូវបានគាំទ្រយ៉ាងរឹងមាំ ភាពត្រឹមត្រូវខាងការទូត និងការយោគយល់ បន្ទាប់ពីមានការសម្លាប់រង្គាល កើតឡើងនៅក្នុងតំបន់នេះ។ប្រទេសកេនយ៉ា និងហ្គាណា បានចេញសេចក្តីថ្លែងការណ៍ដោយប្រើពាក្យសម្តីខ្លាំងៗបំផុតមួយចំនួន ដើម្បីគាំទ្រអ៊ីស្រាអែល។ ប្រធានាធិបតីនៃប្រទេសកេនយ៉ា លោក វីល្លៀម រ៉ូតូ (William Ruto) ដែលត្រូវបានគេមើលឃើញថាជាសម្ព័ន្ធមិត្តលោកខាងលិចដ៏សំខាន់ បានអំពាវនាវឲ្យសហគមន៍អន្តរជាតិ ចាត់វិធានការប្រឆាំងនឹង «ឧក្រិដ្ឋជន អ្នករៀបចំ អ្នកផ្តល់ហិរញ្ញវត្ថុ អ្នកឧបត្ថម្ភ អ្នកគាំទ្រ និងអ្នកផ្តល់ជំនួយដល់អ្វីដែលលោកបានពិពណ៌នាថាជាអំពើឧក្រិដ្ឋកម្មនៃអំពើភេរវកម្ម។ លោករ៉ូតូ ក៏បានអំពាវនាវឲ្យមានបទឈប់បាញ់មួយ ប៉ុន្តែសេចក្តីថ្លែងការណ៍របស់លោក មិនបានស្នើឲ្យមានប្រតិកម្មពីផ្នែកមួយចំនួននៃសាធារណជនកេនយ៉ា ដែលពួគេមួយចំនួន បានសម្តែងការគាំទ្រដល់ប៉ាឡេស្ទីន។ក្រសួងការបរទេសរបស់ប្រទេសហ្គាណា បាននិយាយថា ខ្លួន«ថ្កោលទោសយ៉ាងដាច់អហង្ការ»ចំពោះការវាយប្រហារដោយក្រុមហាម៉ាស់ ហើយបានអំពាវនាវឲ្យក្រុមនេះដកប្រយុទ្ធជនរបស់ខ្លួនចេញពីអ៊ីស្រា អែល។ ប្រទេសរ្វ៉ាន់ដា បានចេញសេចក្តីថ្លែងការណ៍ស្រដៀងគ្នានេះ ថ្កោលទោសការវាយប្រហារនេះ ហើយបាននិយាយថា ស្ថានភាពបច្ចុប្បន្ន កំពុងធ្វើឲ្យព្រួយបារម្ភ និងត្រូវការការបន្ធូរបន្ថយជាបន្ទាន់។ប៉ុន្តែនាយកដ្ឋានទំនាក់ទំនងអន្តរជាតិរបស់អាហ្រ្វិកខាងត្បូង ខណៈពេលដែលបដិសេធការកើនឡើងនៃអំពើហិង្សា បាននិយាយថា ជម្លោះនេះ បានកើតឡើងពី«ការបន្តកាន់កាប់ដីប៉ាឡេស្ទីនដោយខុសច្បាប់របស់អ៊ីស្រាអែល ការបន្តការពង្រីកការតាំងទីលំនៅ ការប្រមាថវិហារឥស្លាម Al Aqsa និងកន្លែងដ៏ពិសិដ្ឋរបស់របស់គ្រិស្តបរិស័ទ និងការគាបសង្កត់ដែលកំពុងបន្តទៅលើប្រជាជនប៉ាឡេស្ទីន»។

សាលារៀននៅប្រជុំកោះកាណារី របស់អេស្ប៉ាញត្រូវបានបិទ ខណៈកំណើនសីតុណ្ហភាពបង្កើនហានិភ័យចំហេះព្រៃ

ក្រុមអាជ្ញាធរនៅលើប្រជុំកោះកាណារី បានបញ្ជាឱ្យបិទសាលារៀនជាបណ្តោះអាសន្ន ដោយសារមានកំណើនសីតុណ្ហភាពក្តៅខ្លាំងកម្រិតបំបែកកំណត់ត្រានៅលើប្រជុំកោះនេះ ហើយស្ថានភាពនោះអាចជួយធ្វើឱ្យចំហេះព្រៃដ៏ធំមួយនៅលើកោះថេណឺរីហ្វ (Tenerife) កើតឡើងម្ដងទៀត។ ដោយមានការព្យាករណ៍ថាសីតុណ្ហភាពខ្ពស់នឹងបន្ត រដ្ឋមន្ត្រីអប់រំនៃប្រជុំកោះនេះ គឺលោកប៉ូលី ស្វារ៉េស (Poli Suárez) បានប្រកាសថាថ្នាក់រៀនត្រូវផ្អាកនៅថ្ងៃពុធ (១០ តុលា) នេះ រហូតដល់ថ្ងៃសុក្រ (១៣ តុលា) ខាងមុខ។ ប្រព័ន្ធផ្សព្វផ្សាយក្នុងស្រុកបាននិយាយថា មានករណីជាច្រើននៃសិស្សដួលសន្លប់ ឬទទួលរងនូវអាការៈថប់ដង្ហើមដោយសារកម្ដៅខ្លាំង ក្នុងប៉ុន្មានថ្ងៃថ្មីៗនេះនៅក្នុងប្រជុំកោះកាណារី នេះ។ សីតុណ្ហភាពដ៏ខ្ពស់បានជួយក្នុងការបង្កជាចំហេះព្រៃឡើងវិញនៅភាគឦសាននៃកោះថេណឺរីហ្វ ដែលបានបំផ្លាញព្រៃឈើទំហំប្រហែល ១.៥០០០ហិចតា កាលពីរដូវក្តៅឆ្នាំនេះ។ចំហេះបានឆាបឆេះលើកដំបូងកាលពីពាក់កណ្តាលខែសីហា ហើយត្រូវបានប្រកាសថា ស្ថិតក្រោមការគ្រប់គ្រងបាននៅថ្ងៃទី១១ ខែកញ្ញា ប៉ុន្តែមិនទាន់រលត់ទាំងស្រុងនៅឡើយទេហើយចំហេះតូចៗជាច្រើនបានបន្តឆាបឆេះជាបន្តបន្ទាប់ក្នុងតំបន់ដដែលនោះ ដោយសារខ្យល់បក់ និងកម្ដៅដ៏ខ្លាំងក្លាផងដែរ៕

រដ្ឋបាលរាជធានី ណែនាំសមត្ថកិច្ចឱ្យបង្កើនការអប់រំស្តីពីសុវត្ថិភាពចរាចរណ៍ជាងការផាកពិន័យ ក្នុងឱកាសបុណ្យភ្ជុំបិណ្ឌ

រដ្ឋបាលរាជធានីភ្នំពេញណែនាំដល់កងកម្លាំងមានសមត្ថកិច្ច ត្រូវបង្កើនកម្លាំងអប់រំ ស្តីពីសុវត្ថិភាពចរាចរណ៍ឱ្យកាន់តែផុសផុលបន្ថែមទៀតដល់ប្រជាពលរដ្ឋក្នុងឱកាសបុណ្យភ្ជុំបិណ្ឌនេះ។ក្នុងឱកាសអញ្ជើញចូលរួមកិច្ចប្រជុំសាមញ្ញាលើកទី៥៣ របស់ក្រុមប្រឹក្សារាជធានីភ្នំពេញ អាណត្តិទី៣ នាព្រឹកថ្ងៃទី១១ ខែតុលា ឆ្នាំ ២០២៣ លោក មាន ចាន់យ៉ាដា អភិបាលរងរាជធានីភ្នំពេញ បានមានប្រសាសន៍ថា ការលើកកម្ពស់ការងារសន្តិសុខ សណ្ដាប់ធ្នាប់ មុនពេល អំឡុងពេល និងក្រោយពេលពិធីបុណ្យភ្ជុំបិណ្ឌ រដ្ឋបាលរាជធានីភ្នំពេញសង្កត់ធ្ងន់ឱ្យមានការអប់រំ ស្តីពីសុវត្ថិភាពចរាចរណ៍ ដែលនេះ គឺជាចំណុចមួយដ៏ល្អប្រសើរ ដើម្បីធានាសុវត្ថិភាពដល់អ្នកបើកបរនៅតាមដងផ្លូវ។ លោកអភិបាលរងបានណែនាំដល់កងកម្លំាងសមត្ថកិច្ចត្រូវពង្រាយកម្លាំង នៅតាមតំបន់ច្រកចេញចូលសំខាន់ៗនៅរាជធានីភ្នំពេញ ដើម្បីជួយសម្រួលចរាចរណ៍ដល់បងប្អូនប្រជាពលរដ្ឋដែលធ្វើដំណើរទៅកាន់ស្រុកកំណើត។ បន្ថែមពីនេះទៀត ត្រូវដាក់ពង្រាយកម្លាំងចុះទៅអប់រំ ស្តីពីសុវត្ថិភាពចរាចរណ៍ ព្រោះប្រជាពលរដ្ឋចាប់ផ្ដើមចេញពីរាជធានីភ្នំពេញនៅពីថ្ងៃទី១២ ខែតុលា តទៅហើយ ដើម្បីទៅតាមបណ្ដាស្រុកកំណើតរបស់គាត់ ពីព្រោះពលរដ្ឋបានឈប់សម្រាកក្នុងឱកាសបុណ្យភ្ជុំបិណ្ឌខាងមុខនេះ។លោក មាន ចាន់យ៉ាដា បានបន្តថា ចំពោះការអប់រំទៅដល់ប្រជាពលរដ្ឋនេះ គឺអប់រំកុំឱ្យមានដឹកលើសចំណុះ ដឹកសំពីងសំពោង និងចូលរួមគោរពច្បាប់ចរាចរណ៍ទាំងអស់គ្នា ដើម្បីធានាសុវត្ថិភាពក្នុងការធ្វើដំណើរ ជាពិសេសបានទៅលេងស្រុកកំណើតដោយទឹកមុខសប្បាយរីករាយក្នុងឱកាសបុណ្យភ្ជុំបិណ្ឌនេះ ។ ជាងនេះទៅទៀត ក្នុងពេលនេះកងកម្លាំង ត្រូវបង្កើនការអប់រំផ្សព្វផ្សាយឱ្យបានច្រើនជាងការផាកពិន័យ ដើម្បីបង្កើនការយល់ដឹងទៅដល់ប្រជាពលរដ្ឋឱ្យបានច្បាស់លាស់ ។ លោក មាន ចាន់យ៉ាដា បានស្នើសុំឱ្យបង្កើនកម្លាំងសម្រួលចរាចរណ៍ ដើម្បីធ្វើយ៉ាងណាបង្កើនការអប់រំផ្សព្វផ្សាយ កុំយកតែវិធានការផាកពិន័យមកប្រើ ពីព្រោះប្រជាពលរដ្ឋគឺគាត់ចង់ដឹងអំពីច្បាប់ គាត់ធ្វើខុសគឺជំនាញបង្កើនការអប់រំមិនបានច្រើន ជំនាញផាកពិន័យក្នុងករណីគាត់រឹងរូស ចចេះ ជាមួយនឹងបទល្មើសចរាចរណ៍ធំៗ ប៉ុន្តែករណីទូទៅគួរតែផ្ដល់នូវការអប់រំឱ្យបានច្រើនជាងការផាកពិន័យ នេះជាសំណូមទី១ពាក់ព័ន្ធនាឱកាសបុណ្យភ្ជុំបិណ្ឌ។ ក្នុងកិច្ចប្រជុំនេះដែរ ឯកឧត្តម ម៉ប់ សារិន ប្រធានក្រុមប្រឹក្សារាជធានីភ្នំពេញ បានមានប្រសាសន៍កោតសរសើរ ចំពោះមន្ត្រីរាជការ កងកម្លាំងប្រដាប់អាវុធគ្រប់លំដាប់ថ្នាក់ និងប្រជាជនរាជធានីភ្នំពេញដែលបានខិតខំយ៉ាងសកម្ម ប្រកបដោយស្មារតីទទួលខុសត្រូវ ចូលរួមអភិវឌ្ឍន៍រាជធានីភ្នំពេញ ក្រោមការដឹកនាំរបស់គណៈអភិបាលរាជធានីភ្នំពេញ រហូតសម្រេចបានលទ្ធផលរីកចម្រើនលើគ្រប់វិស័យ៕អត្ថបទ ៖ ប្រាក់ វ៉ាន់ដា

សង្គ្រាមអ៊ីស្រាអែល-ក្រុមហាម៉ាស់៖ កុមារតំបន់ហ្គាហ្សា ចង់ក្លាយជាកុមារធម្មតា រស់នៅដោយគ្មានសង្គ្រាម

ខណៈគ្រាប់បែកបានបន្តធ្លាក់ ទៅលើទីក្រុងនៅតំបន់ហ្គាហ្សា នៅក្នុងទីធ្លាមួយបានក្លាយជាទីជម្រកជនភៀសខ្លួនសម្រាប់មនុស្សមួយចំនួន។ ក្មេងស្រីអាយុ ១៣ឆ្នាំម្នាក់ បាននាំបុគ្គលិកអ្នកថតរបស់សារព័ត៌មានរ៉យទ័រដើរជុំវិញសាលារៀនមួយកន្លែង ដំណើរការដោយអង្គការសហប្រជាជាតិ ដែលបានក្លាយជាទីជម្រកសម្រាប់ក្រុមគ្រួសារជាច្រើន។ កុមារមួយចំនួន កំពុងលេង ហើយកុមារផ្សេងទៀតកំពុងងើបមើល និងចង្អុល យន្តហោះអ៊ីស្រាអែលនៅលើមេឃ។ ការវាយប្រហារតាមអាកាស មានស្ថានភាពធ្ងន់ធ្ងរបំផុតនៅក្នុងប្រវត្តិសាស្ត្ររយៈពេល៧៥ឆ្នាំមកនេះ នៃជម្លោះរវាង អ៊ីស្រាអែល និងប៉ាឡេស្ទីន។ កុមារម្នាក់ឈ្មោះ Israa al-Qishawi អាយុ១៣ឆ្នាំ និយាយថានាងមិនអាចដេកបានទេនៅពេលយប់។ នាងទៅបន្ទប់ទឹករៀងរាល់ពីរបីនាទីម្តង ព្រោះនាងខ្លាចគ្រាប់រ៉ុក្កែត។នាងនិយាយថាមនុស្ស៣០នាក់ដេកនៅទីនេះ។ គ្មានកន្លែងសល់ទេសម្រាប់យើង។ ក្រសួងសុខាភិបាលតំបន់ហ្គាហ្សា និយាយថាមនុស្សជាង៩០០នាក់ បានស្លាប់ដោយការវាយប្រហារតាមអាកាស ក្នុងរយៈពេលជាច្រើនថ្ងៃមកនេះចាប់តាំងពីការសម្លាប់រង្គាលរបស់ក្រុមហាម៉ាស់ដ៏ភ្ញាក់ផ្អើលនៅក្នុងប្រទេសអ៊ីស្រអែល ដែលតាមសេចក្តីរាយការណ៍ថាបានសម្លាប់មនុស្សជាង១.០០០នាក់ ភាគច្រើនជាជនស៊ីវិល។ អ៊ីស្រអែលនិយាយថា ខ្លួនកំពុងវាយប្រហារលើគោលដៅយោធាក្នុងតំបន់ហ្គាហ្សា ដូចជាទីតាំងស្តុកអាវុធ ហើយពួកគេបានផ្តល់ការព្រមានដល់ជនស៊ីវិលឲ្យចាកចេញ។ អគ្គលេខាធិការអង្គការសហប្រជាជាតិនិយាយថា មនុស្ស១៣៧.០០០នាក់ កំពុងស្វែងរកទីជម្រកនៅក្នុងទីតាំងរបស់អង្គការសហប្រជាជាតិ ដូចជាសាលារៀនជាដើម។ នាង Al-Qishawi បានប្រាប់យើងថាគ្មានទឹកម៉ាស៊ីននៅក្នុងបន្ទប់ទឹកនោះទេ ដែលនាងបានចេញរោគសញ្ញាកន្ទួលព្រោះនាងមិនអាចងូតទឹកជាច្រើនថ្ងៃមកហើយ។ នាងនិយាយថា នាងបន់ស្រន់ឲ្យខ្លួននាងក្លាយជាកុមារធម្មតារស់នៅដោយគ្មានសង្គ្រាម គ្មានគ្រាប់រ៉ុក្កែត ដូច្នេះយើងអាចត្រលប់ទៅផ្ទះវិញដោយសុវត្ថិភាព។

ក្រុមអ្នកជួយសង្រ្គោះនៅតំបន់ហ្គាហ្សា ស្វែងរកអ្នកនៅរស់លើគំនរបាក់បែក ក្រោយការវាយប្រហារ

ក្រុមអ្នកជួយសង្រ្គោះនៅតំបន់ហ្គាហ្សា កាលពីថ្ងៃអង្គារ បានទាញសាកសពក្មេងស្រីអាយុ៤ឆ្នាំម្នាក់ និងអ្នកផ្សេងទៀត ដែលបានស្លាប់ចេញពីគំនរបាក់បែកនៃអគារសាលាក្រុងមួយជាកន្លែង ដែលនាង និងមនុស្សជាច្រើនទៀត កំពុងជ្រកកោន ហើយដែលត្រូវបានខូចខាត ក្នុងអំឡុងពេលការវាយប្រហារតាមអាកាសរបស់អ៊ីស្រាអែល។ក្មេងស្រីនេះ ត្រូវបានគេដាក់ឈ្មោះថា Shahid Abu Rokbah ហើយក្រុមអ្នកជួយសង្រ្គោះបាននិយាយថា គ្រួសាររបស់នាង បានភៀសខ្លួនពីភាគខាងកើតនៃសង្កាត់ Khan Younis ទៅកាន់ខាងក្នុងទីក្រុង ដើម្បីស្វែងរកសុវត្ថិភាព តែត្រូវបានគេសម្លាប់។លោក Mohammad al Najjar ដែលជាអ្នកស្ម័គ្រចិត្តស្ម័គ្រចិត្ត បាននិយាយថា៖«ពួកគេបានព្យាយាមរត់គេចពីសេចក្តីស្លាប់...ពួកគេបានមករកទីជម្រក។ ពួកគេកំពុងជ្រកកោននៅក្បែរជណ្តើរដែលវាអាចជាកន្លែងមានសុវត្ថិភាព។ ការវាយប្រហារនោះ បានកំណត់គោលដៅលើពួកគេ និងសម្លាប់ពួកគេ។

មនុស្សរាប់រយនាក់ប្រមូលផ្ដុំគ្នា តវ៉ាក្នុងប្រទេសជាច្រើន ដើម្បីគាំទ្រប៉ាឡេស្ទីន ខណៈអ្នកខ្លះទៀតគាំទ្រអ៊ីស្រាអែល

មនុស្សរាប់រយនាក់ បានប្រមូលផ្ដុំគ្នាតវ៉ានៅក្នុងប្រទេសឈីលី ប្រេស៊ីល សហរដ្ឋអាមេរិក និងអេស្ប៉ាញ កាលពីថ្ងៃអង្គារ (១០ តុលា) ដើម្បីបង្ហាញការគាំទ្ររបស់ពួកគេដោយអ្នកខ្លះបង្ហាញការគាំទ្រសម្រាប់អ៊ីស្រាអែល និងខ្លះទៀតគាំទ្រប៉ាឡេស្ទីន បន្ទាប់ពីការវាយប្រហារជាច្រើនដងកាលពីចុងសប្តាហ៍លើអ៊ីស្រាអែល ដោយក្រុមសកម្មប្រយុទ្ធប៉ាឡេស្ទីន ហាម៉ាស។ក្រុមអ្នកគាំទ្រប៉ាឡេស្ទីន បានប្រមូលផ្តុំគ្នានៅមុខអគារសំខាន់ៗក្នុងប្រទេសឈីលី និងប្រេស៊ីល ដោយគ្រវីទង់ជាតិ និងបដា អំពាវនាវឱ្យបញ្ឈប់ការសម្លាប់កុមារអំឡុងពេលជម្លោះ។ ដោយឡែក មនុស្សរាប់រយនាក់ក៏បានចេញតវ៉ានៅទីក្រុងញូវយ៉ក របស់សហរដ្ឋអាមេរិក និងអេស្ប៉ាញ សម្រាប់ការប្រមូលផ្តុំគ្នាគាំទ្រអ៊ីស្រាអែល បន្ទាប់ពីការវាយប្រហារដោយពួកសកម្មប្រយុទ្ធហាម៉ាស បានសម្លាប់ជនជាតិអ៊ីស្រាអែលជាង ១.០០០នាក់មក។កាលពីចុងសប្តាហ៍ ខ្មាន់កាំភ្លើងក្រុមហាម៉ាស បានសម្រុកចូលរបងពីតំបន់ហ្គាហ្សា កាលពីថ្ងៃសៅរ៍ (៧ តុលា) ដោយបានសម្លាប់ទាហាន និងជនស៊ីវិលអ៊ីស្រាអែល ព្រមទាំងចាប់ចំណាប់ថ្នូររាប់សិបនាក់ត្រឡប់ទៅតំបន់ឆ្នេរហ៊ុមព័ទ្ធវិញ។ អ៊ីស្រាអែលបានឆ្លើយតបទៅវិញដោយការវាយប្រហារតាមអាកាសដោយទម្លាក់គ្រាប់បែកច្រើនបំផុតរបស់ខ្លួនទៅលើតំបន់ហ្គាហ្សា ហើយក៏កំពុងត្រៀមការវាយលុកលើទឹកដីផ្លូវគោក ដែលខ្លួនបានដកទ័ពចេញពីជិតពីរទសវត្សរ៍មុន បន្ទាប់ពីការកាន់កាប់អស់រយៈពេល ៣៨ឆ្នាំមកផងដែរ៕

បណ្ដាញសង្គម

ព័ត៌មានថ្មីៗ

ការវាយប្រហារយានដ្រូនរុស្ស៊ីសម្លាប់មនុស្ស ៣នាក់ នៅទីក្រុង Dnipro របស់អ៊ុយក្រែន

មេបញ្ជាការកងទ័ពប៉ាគីស្ថានលោក Munir ជួបពិភាក្សាការងារជាមួយប្រធានាធិបតីអ៊ីរ៉ង់លោក Pezeshkian

មនុស្ស ១១នាក់ស្លាប់ ក្នុងគ្រោះថ្នាក់រថយន្តបុកគ្នានៅភាគខាងជើងប្រទេសឥណ្ឌា

កង្វះខាតប្រេងបណ្តាលឲ្យអ្នកបើកបររង់ចាំអស់រយៈពេលរាប់ម៉ោង ដើម្បីចាក់ប្រេងនៅបូលីវី

ពលរដ្ឋអ៊ីរ៉ង់រស់នៅទីក្រុងតេអេរ៉ង់មិនទុកចិត្តការបន្តបទឈប់បាញ់របស់អាមេរិក

ព្រះសង្ឃចាប់ផ្តើមនិមន្ត ដើម្បីសន្តិភាពរយៈពេល ១សប្តាហ៍នៅប្រទេសស្រីលង្កា

ប៉ាគីស្ថានរឹតបន្តឹងសន្តិសុខនៅទីក្រុងអ៊ីស្លាម៉ាបាដ ខណៈភាពពុំច្បាស់ចំពោះកិច្ចប្រជុំសន្តិភាពអាមេរិក-អ៊ីរ៉ង់

ការវាយប្រហាររបស់អ៊ីស្រាអែលសម្លាប់មនុស្ស ៥នាក់ នៅតំបន់ហ្កាហ្សា

សង្រ្គាមអ៊ីរ៉ង់ជំរុញឲ្យមានតម្រូវការកើនឡើងសម្រាប់ថាមពលពន្លឺព្រះអាទិត្យនៅអឺរ៉ុប

កងទ័ពជើងទឹកអាល្លឺម៉ង់ត្រៀមខ្លួនសម្រាប់លទ្ធភាពនៃបេសកកម្មបោសសម្អាតមីននៅច្រកសមុទ្រ Hormuz

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877