BTV NEWS

គណៈបញ្ជាការឯកភាពរាជធានី បន្តប្រតិបត្តិការបង្ក្រាបទីតាំង Online Scams ឃាត់ជនបរទេសជាង៣០០នាក់ នៅខណ្ឌដូនពេញ

ឃាត់ខ្លួនជនសង្ស័យ ៤៩នាក់ពាក់ព័ន្ធ Online Scams និងជនបរទេសស្នាក់នៅខុសច្បាប់ជាច្រើននាក់ទៀត

នគរបាលរាជធានីបង្ហាញមុខជនសង្ស័យ ៣៥នាក់ពាក់ព័ន្ធ ១០ករណីផ្សេងគ្នា

ជនជាតិចិនចំនួន៣៣៩នាក់ ពាក់ព័ន្ធករណី Online Scams ត្រូវបានបណ្ដេញចេញពីកម្ពុជា

សន្តិសុខ និង សង្គម

មេដឹកនាំយោធាស៊ូដង់ សន្យាទទួលជ័យជម្នះដាច់ខាត និងច្រានចោលការដោះស្រាយជាមួយ «ជនក្បត់»

ស៊ូដង់៖ កាលពីថ្ងៃច័ន្ទ (២៨សីហា) មេដឹកនាំយោធានៃប្រទេសស៊ូដង់ លោក Abdel Fattah al-Burhan បានទម្លាក់ក្តីសង្ឃឹមនៃកិច្ចចរចាដើម្បីបញ្ចប់សង្រ្គាមរយៈពេលជាច្រើនខែ ដោយបានរិះគន់កងកម្លាំងគាំទ្ររហ័សដែលជាគូប្រជែង (RSF) ថាជា «ជនក្បត់» ព្រមទាំងបានសន្យាថា នឹងទទួលជ័យជម្នះឲ្យបាន នៅក្នុងសុន្ទរកថារបស់ខ្លួនទៅកាន់ក្រុមទាហាន។មនុស្សរាប់លាននាក់ត្រូវបានបណ្តេញចេញពីលំនៅឋានរបស់ពួកគេ ហើយវិបត្តិមនុស្សធម៌បានកើនឡើងចាប់តាំងពីជម្លោះរវាងកងទ័ព និងកងកម្លាំង RSF បានចាប់ផ្តើមកាលពីខែមេសា មក។ ការចរចាជាបន្តបន្ទាប់បានបរាជ័យក្នុងការជំរុញឱ្យការប្រយុទ្ធគ្នាត្រូវបញ្ឈប់ទាំងស្រុង។សុន្ទរកថារបស់លោក Burhan បានធ្ចើឡើងមួយថ្ងៃបន្ទាប់ពីប្រមុខកងកម្លាំង RSF បានសម្តែងការបើកចំហចំពោះកិច្ចពិភាក្សា និងបទឈប់បាញ់រយៈពេលវែង ហើយប៉ុន្មានថ្ងៃបន្ទាប់ពីលោក Burhan បានងើបចេញពីរដ្ឋធានី Khartoum ជាលើកដំបូងចាប់តាំងពីសង្គ្រាមផ្ទុះឡើង។ភាគីជម្លោះទាំងពីរក៏បានប្រយុទ្ធគ្នាយ៉ាងស្វិតស្វាញដើម្បីដណ្ដើមការគ្រប់គ្រងទីក្រុង Nyala ក្នុងរដ្ឋដាហ្វួរខាងត្បូង ដោយក្រុមសកម្មជនរាយការណ៍ពីការរងគ្រោះរស់ជនស៊ីវិល ហើយភ្នាក់ងារជំនួយជាច្រើននាក់បាននិយាយថា ទីក្រុងនេះត្រូវបានកាត់ផ្តាច់ពីជំនួយ ឬឧបករណ៍ប្រើប្រាស់ផ្សេងៗផងដែរ៕

រដ្ឋមន្ត្រីការបរទេសលីប៊ី ត្រូវបណ្តេញចេញពីតំណែងបន្ទាប់ពីកិច្ចប្រជុំជាមួយអ៊ីស្រាអែល

លីប៊ី៖ នាយករដ្ឋមន្ត្រីលីប៊ីដែលទទួលស្គាល់ជាអន្តរជាតិ បានបណ្តេញប្រមុខការទូតរបស់ខ្លួនចេញពីតំណែង បន្ទាប់ពីលោកស្រីបានជួបជាមួយសមភាគីអ៊ីស្រាអែល ហើយព័ត៌មាននៃការជួបគ្នានេះ បានបង្កឱ្យមានការតវ៉ាជាច្រើននៅក្នុងប្រទេសដែលមិនទទួលស្គាល់អ៊ីស្រាអែលមួយនេះផងដែរ។ប្រទេសលីប៊ីដែលសម្បូរទៅដោយប្រេង ដែលបានធ្លាក់ចូលទៅក្នុងភាពចលាចល បន្ទាប់ពីមេដឹកនាំផ្តាច់ការរបស់ខ្លួនលោក Muammar Gaddafi ត្រូវបានផ្តួលរំលំ និងបានសម្លាប់នៅក្នុងការបះបោរដែលគាំទ្រដោយអង្គការណាតូឆ្នាំ២០១១នោះ ត្រូវបានបែងចែកចាប់តាំងពីឆ្នាំ២០១៤មក រវាងរដ្ឋាភិបាលគាំទ្រដោយអង្គការសហប្រជាជាតិរបស់នាយករដ្ឋមន្ត្រីលីប៊ី លោក Abdelhamid Dbeibah នៅទីក្រុងទ្រីប៉ូលី និងរដ្ឋបាលគូប្រជែងដែលមានមូលដ្ឋាននៅក្នុងខាងកើតរបស់ប្រទេស។ក្រុមអ្នកវិភាគដែលបាននិយាយទៅកាន់សារព័ត៌មាន AFP ហាក់ដូចជាយល់ស្របថា លោកស្រី Najla al-Mangoush គឺជា «មនុស្សមានកំហុស» សម្រាប់ការសម្រេចចិត្តដែលធ្វើឡើងដោយមេដឹកនាំគូប្រជែងរបស់ប្រទេសលីប៊ី ហើយបានភ្ជាប់កិច្ចប្រជុំនោះជាមួយនឹងកិច្ចខិតខំប្រឹងប្រែងរបស់សហរដ្ឋអាមេរិក ក្នុងការដាក់សម្ពាធបណ្ដាប្រទេសអារ៉ាប់បន្ថែមទៀត ដើម្បីធ្វើឱ្យមានទំនាក់ទំនងធម្មតាជាមួយអ៊ីស្រាអែលឡើងវិញ។ បណ្តាញព័ត៌មានឯកជន Al-Ahrar ដែលសំអាងដល់ប្រភពរដ្ឋាភិបាលបាននិយាយថា លោកស្រីMangoush ត្រូវបានបណ្តេញចេញពីតំណែង បន្ទាប់ពីកិច្ចប្រជុំកាលពីសប្តាហ៍មុននៅទីក្រុងរ៉ូមជាមួយរដ្ឋមន្ត្រីការបរទេសអ៊ីស្រាអែល លោក Eli Cohen ។ស្ថានទូតប៉ាឡេស្ទីននៅទីក្រុងទ្រីប៉ូលីមួយនេះ ក៏បានរាយការណ៍ពីការបណ្តេញលោកស្រីចេញផងដែរ ដោយនិយាយថា ការបណ្ដេញចេញនោះត្រូវបានប្រកាសដោយលោកនាយករដ្ឋមន្ត្រី Dbeibah ក្នុងអំឡុងពេលបំពេញទស្សនកិច្ចកាលពីថ្ងៃចន្ទទៅកាន់បេសកកម្មនោះ។ ស្ថានទូតបាននិយាយថា លោក Dbeibah ក៏បានប្រកាស «ការបដិសេធរបស់ខ្លួនចំពោះការធ្វើឱ្យមានលក្ខណៈធម្មតាជាមួយអ៊ីស្រាអែល» និងការគាំទ្រទាំងស្រុងរបស់លីប៊ីសម្រាប់ប្រជាជនប៉ាឡេស្ទីន៕

ប្រធានEU៖ សហភាពអឺរ៉ុបគួរតែត្រៀមខ្លួនទទួលសមាជិកថ្មីនៅឆ្នាំ២០៣០

EU៖ កាលពីថ្ងៃចន្ទ (២៨ សីហា) ប្រមុខសហភាពអឺរ៉ុបលោក Charles Michel បានលើកឡើងថា សហភាពអឺរ៉ុប គួរតែត្រៀមខ្លួនដើម្បីទទួលយកសមាជិកថ្មីពីអឺរ៉ុបខាងកើត និងតំបន់បាល់កង់ នៅត្រឹមឆ្នាំ២០៣០។ ការលុកលុយរបស់រុស្សីលើអ៊ុយក្រែន បានផ្តោតអារម្មណ៍នៅទីក្រុងព្រុចសែល លើតម្រូវការសម្រាប់សន្ទុះនយោបាយថ្មី ដើម្បីគាំទ្រមហិច្ឆតាអឺរ៉ុបសម្រាប់បេក្ខភាពសមាជិកភាពមួយចំនួន។ប៉ុន្តែ ជាមួយនឹងការប្រយុទ្ធគ្នានៅតែបន្តកើតមាននៅក្នុងប្រទេសអ៊ុយក្រែន ហើយរដ្ឋាភិបាលដែលគាំទ្រលោកខាងលិចរបស់ប្រទេសម៉ុលដូវ៉ាកំពុងព្យាយាមធ្វើកំណែទម្រង់ បណ្ដាមន្ត្រីជាន់ខ្ពស់ពីមុនមានការស្ទាក់ស្ទើរក្នុងការផ្តល់តារាងពេលវេលាច្បាស់លាស់សម្រាប់សមាជិកភាព។ លោក Michel បាននិយាយថា «នៅពេលយើងរៀបចំរបៀបវារៈយុទ្ធសាស្ត្របន្ទាប់របស់សហភាពអឺរ៉ុប យើងត្រូវកំណត់ខ្លួនយើងនូវគោលដៅច្បាស់លាស់។ ខ្ញុំជឿថា យើងត្រូវតែត្រៀមខ្លួនជាស្រេចសម្រាប់ភាគីទាំងពីរនៅឆ្នាំ២០៣០ ដើម្បីពង្រីកខ្លួនបន្ថែមទៀត»។លោក Michel បានបញ្ជាក់ថា បណ្តាប្រទេសនៅតំបន់បាល់កង់លោកខាងលិច ដែលបានបង្កើតឡើងពីការបែកបាក់បង្ហូរឈាមនៃអតីតប្រទេសយូហ្គោស្លាវី បានចាប់ផ្តើមសំណើររបស់ពួកគេដើម្បីចូលរួមជាមួយសហភាពអឺរ៉ុបជាងពីរទសវត្សរ៍មុនមកម៉្លេះ។ ប្រធានក្រុមប្រឹក្សាអឺរ៉ុបរូបនេះ បានអនុម័តទស្សនៈរបស់អធិការបតីអាល្លឺម៉ង់ លោក Olaf Scholz ថា អឺរ៉ុបគួរតែធ្វើតាមការសន្យាដែលទីក្រុងព្រុចសែលបានធ្វើឡើងចំពោះបណ្ដាប្រទេសបេក្ខភាពសហភាពអឺរ៉ុប៕

មេដឹកនាំកូរ៉េខាងជើង អំពាវនាវឱ្យមានការពង្រឹងកងកម្លាំងជើងទឹកបន្ថែមទៀត

កូរ៉េខាងជើង៖ ប្រព័ន្ធផ្សព្វផ្សាយរដ្ឋ KCNA បានរាយការណ៍នៅថ្ងៃអង្គារ (២៩សីហា)នេះថា មេដឹកនាំកូរ៉េខាងជើងលោក គីម ជុងអ៊ុន បានអំពាវនាវឱ្យពង្រឹងកងកម្លាំងជើងទឹករបស់ប្រទេស ដោយចោទប្រកាន់សហរដ្ឋអាមេរិកថា បានបង្វែរដែនទឹកនៅជិតឧបទ្វីបកូរ៉េទៅជា «ដែនទឹកដែលមិនស្ថិតស្ថេរបំផុតជាមួយនឹងគ្រោះថ្នាក់នៃសង្គ្រាមនុយក្លេអ៊ែរ»។នៅក្នុងសុន្ទរកថាមួយដើម្បីប្រារព្ធទិវាកងទ័ពជើងទឹក លោក គីម បាននិយាយថា «មេក្រុមជនអន្ធពាល» របស់សហរដ្ឋអាមេរិក ជប៉ុន និងកូរ៉េខាងត្បូង បានប្រកាសធ្វើសមយុទ្ធយោធារួមគ្នាជាទៀងទាត់ ដោយជាក់ស្តែងសំដៅទៅលើកិច្ចប្រជុំកំពូលរបស់ពួកគេកាលពីថ្ងៃទី១៨ ខែសីហានៅឯវិមានសម្រាកលំហែ Camp David នៅរដ្ឋMaryland សហរដ្ឋអាមេរិក។នៅក្នុងកិច្ចប្រជុំផ្ទាល់ខ្លួនលើកដំបូងរវាងមេដឹកនាំអាមេរិក កូរ៉េខាងត្បូង និងជប៉ុននោះ អ្នកទាំងបីបានព្រមព្រៀងគ្នាក្នុងការពង្រឹងកិច្ចសហប្រតិបត្តិការយោធា និងសេដ្ឋកិច្ច ខណៈដែលពួកគេស្វែងរកការរួបរួមក្នុងការប្រឈមមុខនឹងការរីកលូតលាស់នៃអំណាចរបស់ប្រទេសចិន និងការគំរាមកំហែងនុយក្លេអ៊ែររបស់កូរ៉េខាងជើង។លោក គីម បាននិយាយថា ប្រទេសកូរ៉េខាងជើង ទាមទារឱ្យកងទ័ពជើងទឹករបស់ខ្លួន រក្សាការត្រៀមខ្លួនសម្រាប់ធ្វើសង្រ្គាម ដែលជា «ការប្រុងប្រយ័ត្នជានិច្ច» ហើយបានអំពាវនាវឱ្យធ្វើ «ទំនើបកម្ម» សព្វាវុធ និងគ្រឿងយុទ្ធោបករណ៍របស់ខ្លួនបន្ថែមទៀតផងដែរ៕

សវនាការរបស់លោក Trump នៅទីក្រុងវ៉ាស៊ីនតោន ត្រូវកំណត់ធ្វើឡើងនៅខែមីនាឆ្នាំ២០២៤ ចំពេលការតតាំងដ៏ស្វិតស្វាញនៃតំណែងប្រធានាធិបតីក្នុងគណបក្សសាធារណរដ្ឋ

អាមេរិក៖ លោក Donald Trump នឹងត្រូវកាត់ទោសនៅខែមីនា ឆ្នាំ២០២៤ពាក់ព័ន្ធការព្យាយាមបង្វែរលទ្ធផលការបោះឆ្នោតប្រធានាធិបតីកាលពីឆ្នាំ ២០២០ របស់លោកមួយថ្ងៃមុនក្រុមអ្នកបោះឆ្នោតមកពីគណបក្សសាធារណរដ្ឋនៅក្នុងរដ្ឋជាង១០ នៅសហរដ្ឋអាមេរិក នឹងសម្រេចចិត្តថាតើត្រូវផ្តល់ឱកាសឲ្យលោកចូលដណ្តើមយកតំណែងនៅសេតវិមានឡើងវិញឬយ៉ាងណា។ចៅក្រមសហរដ្ឋអាមេរិក លោកស្រី តានយ៉ា ឆាកខាន់(Tanya Chutka) កាលពីថ្ងៃចន្ទបានកំណត់ថ្ងៃជំនុំជម្រះក្ដីនៅថ្ងៃទី៤ ខែមីនាសម្រាប់សំណុំរឿងសហព័ន្ធនៅទីក្រុងវ៉ាស៊ីនតោន ដែលជាការកាត់ទោសព្រហ្មទណ្ឌមួយក្នុងចំណោមការកាត់ទោសចំនួន៤ដែលអតីតប្រធានាធិបតីរូបនេះត្រូវប្រឈម។បញ្ហានេះបានកើតឡើងមួយថ្ងៃមុន "Super Tuesday" ដែលជាកាលបរិច្ឆេទដ៏សំខាន់បំផុតនៅក្នុងការប្រកួតប្រជែងជ្រើសរើសបេក្ខជនប្រធានាធិបតីក្នុងគណបក្សសាធារណរដ្ឋ នៅពេលដែលរដ្ឋនានាចាប់ពីរដ្ឋ ម៉េន (Maine) ដល់រដ្ឋ California នឹងរៀបចំការប្រកួតជ្រើសរើសបេក្ខជនរបស់ពួកគេ។ ការស្ទង់មតិបង្ហាញថា លោកTrump នាំមុខគូប្រជែងរបស់លោកយ៉ាងច្រើនលើសលុប។ការសម្រេចចិត្តរបស់លោកស្រីឆាកខាន់(Chutkan) មានន័យថា លោក Trump ទំនងជានឹងត្រូវកាត់ក្តីនៅក្នុងសំណុំរឿងព្រហ្មទណ្ឌយ៉ាងតិចបីដាច់ដោយឡែកពីគ្នា ខណៈលោកកំពុងធ្វើយុទ្ធនាការសម្រាប់ការតែងតាំងរបស់គណបក្សដើម្បីតតាំងជាជាមួយលោកប្រធានាធិបតី Joe Biden មកពីគណបក្សប្រជាធិបតេយ្យក្នុងការបោះឆ្នោតនៅខែវិច្ឆិកា ឆ្នាំ២០២៤ខាងមុខ។ កាលបរិច្ឆេទជំនុំជម្រះក្នុងសំណុំរឿងព្រហ្មទណ្ឌទីបួនមិនទាន់ត្រូវបានកំណត់នៅឡើយទេ។លោកក៏ជាចុងចោទនៅក្នុងបណ្តឹងរដ្ឋប្បវេណីចំនួនបីដែលគ្រោងនឹងធ្វើឡើងក្នុងរយៈពេល៦ខែខាងមុខនេះផងដែរ។ ក្រុមមេធាវីរបស់លោក Trump បានជំរុញឲ្យមានកាលបរិច្ឆេទកាត់ក្តីនៅខែមេសា ឆ្នាំ២០២៦ ប៉ុន្តែលោកស្រីឆាកខាន់ បាននិយាយថា ពួកគេមិនត្រូវការពេលយូរដើម្បីរៀបចំសំណុំក្ដីទាំងនេះនោះទេ។ការកាត់ក្តីលើកទី៣គ្រោងនឹងធ្វើឡើងនៅថ្ងៃទី ២០ ខែឧសភា ឆ្នាំ ២០២៤ លើការចោទប្រកាន់របស់សហព័ន្ធនៅរដ្ឋ Florida ដោយចោទប្រកាន់ថាលោក Trump ពីបទរក្សាទុកកំណត់ហេតុ ដែលត្រូវបានចាត់ថ្នាក់ដោយខុសច្បាប់ បន្ទាប់ពីចាកចេញពីសេតវិមាន និងព្យាយាមរារាំងយុត្តិធម៌។ លោក Trump មិនបានចូលរួមសវនាការកាលពីថ្ងៃចន្ទទេ។នៅទីក្រុងវ៉ាស៊ីនតោន ក្រុមមេធាវីរបស់លោក Trump បាននិយាយថា ពួកគេត្រូវការពេលវេលាដើម្បីរៀបចំភស្តុតាងរបស់រដ្ឋាភិបាល ដែលមានសរុបប្រហែល ១២,៨ លានទំព័រ៕

បុរសដែលវាយនារី រឿងសាចទឹកដាក់គ្នា ត្រូវសមត្ថកិច្ចខណ្ឌសែនសុខ ឃាត់ខ្លួនបានហើយ

ភ្នំពេញ ៖ បុរសម្នាក់គ្រាន់តែរឿងជិះម៉ូតូសាចទឹកដាក់គ្នា បានផ្ទុះកំហឹងទះកំផ្លៀង ទៅលើនារីម្នាក់ កាលពីពេលកន្លងមកនេះ ត្រូវបានសមត្ថកិច្ចខណ្ឌសែនសុខ ឃាត់ខ្លួនបានហើយ នាថ្ងៃទី២៨ ខែសីហា ឆ្នាំ២០២៣ ។ជនសង្ស័យរូបនេះសមត្ថកិច្ចកំពុងសាកសួរ នៅអធិការដ្ឋាននគរបាលខណ្ឌសែនសុខ ។ នេះបើតាមការបញ្ជាក់ពីលោកឧត្ដមសេនីយ៍ត្រី សាន សុខសីហា អ្នកនាំពាក្យ នៃស្នងការដ្ឋានគរបាលរាជធានីភ្នំពេញ ៕ តារាវុទ្ធី

បេសកកម្មភពព្រះចន្ទរបស់ឥណ្ឌា បញ្ជូនទិន្នន័យស្តីពីប្រវត្តិសីតុណ្ហភាពនៃប៉ូលខាងត្បូងរបស់ព្រះចន្ទមកផែនដី

ឥណ្ឌា៖ អង្គការស្រាវជ្រាវអវកាសឥណ្ឌា (ISRO) បាននិយាយកាលពីថ្ងៃអាទិត្យ (២៧សីហា) ថា បន្ទុកនៅលើយានចុះចតនៃបេសកកម្មព្រះចន្ទ ចន្ត្រាយាន-3 (Chandrayaan-3) របស់ប្រទេសឥណ្ឌា បានបញ្ជូនទិន្នន័យការសង្កេតដំបូងរបស់ខ្លួន អំពីប្រវត្តិសីតុណ្ហភាពនៃផ្ទៃប៉ូលខាងត្បូងរបស់ព្រះចន្ទមកផែនដី។អង្គការនេះបានបន្ថែមថា បន្ទុកដែលហៅថា ការពិសោធន៍លើផ្ទៃព្រះចន្ទ (ChaSTE) របស់យានចន្ត្រា បានវាស់ទម្រង់សីតុណ្ហភាពនៃផ្ទៃព្រះចន្ទជុំវិញប៉ូលខាងត្បូង ដើម្បីស្វែងយល់ពីឥរិយាបថកម្ដៅនៃផ្ទៃព្រះចន្ទ។ទីភ្នាក់ងារ ISRO បាននិយាយនៅក្នុងការបង្ហោះនៅលើប្រព័ន្ធផ្សព្វផ្សាយសង្គម X ដែលពីមុនត្រូវបានគេស្គាល់ថាជាបណ្ដាញសង្គម Twitter ថា «បន្ទុកនោះមានឧបករណ៍ស៊ើបអង្កេតសីតុណ្ហភាព ដែលបំពាក់ដោយឧបករណ៍ជ្រៀតចូល ដែលមានសមត្ថភាពឈានដល់ជម្រៅ១០សង់ទីម៉ែត្រនៅក្រោមផ្ទៃព្រះចន្ទ។ទិន្នន័យក្រាបដែលបានបញ្ជូនមកនោះ បង្ហាញពីបម្រែបម្រួលសីតុណ្ហភាពនៃផ្ទៃព្រះច័ន្ទ ឬផ្ទៃនៅជិតភពព្រះចន្ទនៅជម្រៅផ្សេងៗ ដូចដែលបានកត់ត្រាក្នុងអំឡុងពេលការជ្រៀតចូលរបស់យាននេះ។ នោះគឺជាទម្រង់ដំបូងបង្អស់សម្រាប់សីតុណ្ហភាពប៉ូលខាងត្បូងរបស់ព្រះចន្ទ ចំណែកការសង្កេតលម្អិតកំពុងដំណើរការបន្តទៀត»។ ការវិវត្តន៍នេះបានកើតឡើងរយៈពេលបួនថ្ងៃ បន្ទាប់ពីបេសកកម្មអវកាសរបស់ឥណ្ឌា បានចុះចតដោយជោគជ័យលើផ្ទៃព្រះចន្ទនៅថ្ងៃទី២៣ ខែសីហា៕

សាលារៀនមួយកន្លែងនៅប្រទេសឥណ្ឌាត្រូវបានបិទ បន្ទាប់ពីគ្រូប្រាប់សិស្សឲ្យវាយមិត្តរួមថ្នាក់ជនជាតិម៉ូស្លីមរបស់ខ្លួន

ឥណ្ឌា៖ ក្រុមអាជ្ញាធរក្នុងរដ្ឋ Uttar Pradesh របស់ប្រទេសឥណ្ឌា បានបិទសាលាឯកជនមួយកន្លែង បន្ទាប់ពីគ្រូបង្រៀនម្នាក់របស់សាលានេះ បានប្រាប់ឱ្យសិស្សទះកំផ្លៀងមិត្តរួមថ្នាក់របស់ជនជាតិម៉ូស្លីមរបស់ពួកគេ។ ក្រុមមន្ត្រីបាននិយាយថា សាលារៀនឈ្មោះ Neha Public School ត្រូវបានបិទដោយសារតែគ្រឹះស្ថាននេះ «មិនបំពេញតាមលក្ខណៈវិនិច្ឆ័យរបស់នាយកដ្ឋានអប់រំ»។ក្រុមមន្ត្រីបាននិយាយថា សិស្សានុសិស្សរបស់សាលានេះ នឹងត្រូវផ្លាស់ទៅសាលារៀនរដ្ឋាភិបាល ឬសាលាផ្សេងទៀតដែលនៅជិតនោះ។ ជាមួយគ្នានេះ អ្នកគ្រូនៅសាលាឯកជននេះឈ្មោះ Tripta Tyagi បានប្រាប់ទូរទស្សន៍ NDTV ថា អ្នកស្រីមិនខ្មាស់នឹងទង្វើរបស់ខ្លួននោះទេ។វីដេអូមួយបានបង្ហាញអ្នកស្រី Tyagi ប្រាប់សិស្សរបស់ខ្លួនឱ្យទះកំផ្លៀងមិត្តរួមថ្នាក់ជនជាតិមូស្លីមអាយុប្រាំពីរឆ្នាំ នៅសាលាឯកជនតូចមួយក្នុងសង្កាត់ Muzaffarnagar ត្រូវបានចែករំលែកជាច្រើននៅលើប្រព័ន្ធផ្សព្វផ្សាយសង្គមកាលពីចុងសប្តាហ៍។ ឪពុករបស់ជនរងគ្រោះបានរាយការណ៍ប្រាប់នគរបាល ហើយបានដកកូនរបស់ខ្លួនចេញពីសាលា ប៉ុន្តែលោកមិនបានប្ដឹងនោះទេ។ វីដេអូនេះបានបង្កឱ្យមានការខឹងសម្បារនៅលើប្រព័ន្ធផ្សព្វផ្សាយសង្គម ដោយមានអ្នកប្រើប្រាស់ជាច្រើនបាននិយាយថា គួរតែចាត់វិធានការប្រឆាំងនឹងគ្រូបង្រៀនម្នាក់នោះ៕

ការតវ៉ាបានផ្ទុះឡើងក្នុងប្រទេសលីប៊ី ជុំវិញការទាក់ទងជាមួយអ៊ីស្រាអែល

លីប៊ី៖ នាយករដ្ឋមន្ត្រីលីប៊ី បានផ្អាកតំណែងរដ្ឋមន្ត្រីការបរទេសរបស់ខ្លួន បន្ទាប់ពីលោកស្រីបានជួបក្រៅផ្លូវការជាមួយសមភាគីអ៊ីស្រាអែល។ ប្រទេសលីប៊ី មិនទទួលស្គាល់អ៊ីស្រាអែលទេ ដោយសាររដ្ឋធានីទ្រីប៉ូលីគាំទ្របុព្វហេតុប៉ាឡេស្ទីន ហើយកិច្ចប្រជុំរវាងរដ្ឋមន្រ្តីទាំងពីរនោះបានបង្កឱ្យមានការតវ៉ាជាច្រើន។ការតវ៉ាទាំងនោះ បានផ្ទុះឡើងនៅក្នុងរដ្ឋធានីទ្រីប៉ូលី និងទីក្រុងមួយចំនួនទៀត បន្ទាប់ពីមានព័ត៌មាននៃកិច្ចប្រជុំនេះត្រូវបានផ្សាយ។ ផ្លូវជាច្រើនខ្សែត្រូវបានបិទ និងមានការដុតសំបកកង់ ហើយក្រុមបាតុករបានគ្រវីទង់ជាតិប៉ាឡេស្ទីន ទោះបីជាការតវ៉ាហាក់ដូចជាមានស្ថានភាពតួចតាចក៏ដោយ។អ៊ីស្រាអែលកំពុងព្យាយាមកសាងទំនាក់ទំនងជិតស្និទ្ធជាមួយប្រទេសអារ៉ាប់ និងមូស្លីមច្រើនជាងមុន ដូចជាប្រទេសលីប៊ី ដែលសម្បូរទៅដោយប្រេងនេះជាដើម។ ទោះបីជាយ៉ាងណាក៏ដោយ ក្រុមប្រឹក្សាប្រធានាធិបតីរបស់ប្រទេសលីប៊ី ដែលតំណាងឱ្យខេត្តចំនួនបីរបស់ខ្លួន បាននិយាយថា វាខុសច្បាប់ក្នុងការធ្វើឱ្យមានទំនាក់ទំនងធម្មតាជាមួយអ៊ីស្រាអែល។ប្រទេសលីប៊ី បានស្ថិតក្នុងភាពចលាចលអស់ជាច្រើនឆ្នាំ ដោយប្រទេសនេះបានបែងចែករវាងរដ្ឋាភិបាលបណ្តោះអាសន្ន ដែលត្រូវបានទទួលស្គាល់ជាអន្តរជាតិនៅទីរដ្ឋធានីទ្រីប៉ូលី និងគូប្រជែងមួយនៅភាគខាងកើត៕

ទាហានម៉ារីនអាមេរិក ៣នាក់ស្លាប់ ៨នាក់រងរបួសបន្ទាប់ពីការធ្លាក់យន្តហោះនៅអូស្ត្រាលី

អាមេរិក៖ អាជ្ញាធរនិយាយថា ទាហានម៉ារីនអាមេរិក៨នាក់បានស្ថិតនៅក្នុងមន្ទីរពេទ្យនៅថ្ងៃចន្ទនេះ ដែលម្នាក់ក្នុងចំណោមពួកគេ ស្ថិតនៅក្នុងបន្ទប់សង្គ្រោះបន្ទាន់ បន្ទាប់ពី ការធ្លាក់យន្តហោះយោធា នៅប្រទេសអូស្ត្រាលីភាគខាងជើង បណ្តាលឲ្យមេបញ្ជាការរបស់ពួកគេ៣នាក់ស្លាប់។ កងម៉ារីន ២៣នាក់ បានជិះនៅលើយន្តហោះ Boeing MV-22B Osprey នៅពេលយន្តហោះបានធ្លាក់នៅកោះ Melville ភាគខាងជើងទីក្រុង Darwin កាលពីព្រឹកថ្ងៃអាទិត្យ អំឡុងសមយុទ្ធយោធា សម្រាប់កងទ័ពមានមូលដ្ឋានក្នុងតំបន់។រដ្ឋមន្ត្រីប្រចាំដែនដីភាគខាងជើងលោកស្រី Natasha Fyles បាននិយាយថាទាហានម៉ារីន៨នាក់នៅកំពុងទទួលការព្យាបាល ហើយលោកស្រីមានបំណងធានាដល់ក្រុមគ្រួសាររបស់ពួកគេថា ពួកគេកំពុងទទួលបានការថែទាំងល្អបំផុត ហើយយើងកំពុងធ្វើការដើម្បីធានាបានថា ពួកគេត្រូវបានគាំទ្រ។ អាជ្ញាធរបានចាប់ផ្តើមការស៊ើបអង្កេតចំពោះអ្វីដែលបានបណ្តាលឲ្យយន្តហោះធ្លាក់ ហើយកិច្ចប្រឹងប្រែងកំពុងធ្វើឡើងដើម្បីរកឲ្យឃើញសាកសពទាហានម៉ារីន៣នាក់ដែលបានស្លាប់។ ស្នងការនគរបាលដែនដីភាគខាងជើង លោក Michael Murphy បានប្រាប់អ្នករាយការណ៍ព័ត៌មាន ពីការរកឃើញ និងការស៊ើបអង្កេត ថានឹងអូសបន្លាយពេល ដែលនឹងនៅបន្តនិងស្មុគស្មា្ញញ ហើយក្រុម មន្ត្រីកំពុងរំពឹងថានឹងស្ថិតនៅទីតាំងធ្លាក់យន្តហោះរយៈពេលយ៉ាងហោចណាស់១០ថ្ងៃ។ កាលពីពេលដំបូងលោកបានប្រាប់ប្រព័ន្ធផ្សព្វផ្សាយក្នុងតំបន់ថា យន្តហោះបានបុកដី នៅក្នុងដីព្រៃ ប៉ុន្តែអ្នកឆ្លើយតបបន្ទាន់ ត្រូវបានគេជួយក្នុងកិច្ចប្រឹងប្រែងដំបូងរបស់ពួកគេនៅទីតាំងព្រលានយន្តហោះនៅក្បែរនោះ៕

បណ្ដាញសង្គម

ព័ត៌មានថ្មីៗ

មេដឹកនាំឆ្វេងនិយមសកលជួបជុំគ្នានៅអេស្ប៉ាញ ដើម្បីប្រមូលផ្តុំទប់ទល់នឹងក្រុមស្តាំនិយមជ្រុល

អង្គការមនុស្សធម៌ដាណឺម៉ាក៖ អ្នកផ្លាស់ទីលំនៅដោយបង្ខំ នឹងកើនឡើង ៤,២លាននាក់ នៅឆ្នាំ ២០២៧

ទិន្នន័យបង្ហាញថា នាវាដឹកប្រេងដែលមានទង់ជាតិប៉ាគីស្ថានចាកចេញពីឈូងសមុទ្រ តាមច្រកសមុទ្រហ័រមូស

កងកម្លាំងហ្វីលីពីនសម្លាប់ជនសកម្មប្រយុទ្ធអ៊ីស្លាម ១០នាក់ ក្នុងការបាញ់ប្រហារ ដើម្បីចាប់ខ្លួនពួកគេ

IMF ព្រមានថា វិបត្តិថាមពលទាក់ទងនឹងសង្គ្រាម កំពុងជំរុញឲ្យអតិផរណាឡើងខ្ពស់ នៅអឺរ៉ុប

មេធាវី៖ មីយ៉ាន់ម៉ាកាត់បន្ថយរយៈពេលជាប់ទោសរបស់អតីតមេដឹកនាំ លោកស្រី អ៊ុងសាន ស៊ូជី

IMF និងធនាគារពិភពលោក៖ ពួកគេកំពុងស្តារឡើងវិញទំនាក់ទំនងជាមួយវ៉េណេស៊ុយអេឡា

បីថ្ងៃចូលឆ្នាំនៅស្វាយរៀងមានប្រជាពលរដ្ឋ ភ្ញៀវជាតិ-អន្តរជាតិ មកដើរលេងកម្សាន្តជាង ៤សែននាក់

៣ថ្ងៃនៃសង្រ្កាន្តឆ្នាំថ្មីកោះកុង ទទួលបានភ្ញៀវទេសចរជាង២ម៉ឺននាក់

ប្រទេសចិនផ្តល់ប្រាក់កម្ចី និងបច្ចេកវិទ្យា សម្រាប់ផ្លូវដែកវៀតណាម

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877