BTV NEWS

កម្លាំងចម្រុះនៃគណៈបញ្ជាការឯកភាពរដ្ឋបាលខេត្តសៀមរាបឃាត់ខ្លួនជនសង្ស័យចំនួន៤នាក់ពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យា

ជនសង្ស័យម្នាក់ ត្រូវបានឃាត់ខ្លួន ក្រោយញុះញង់ឱ្យចូលរួមធ្វើបដិវត្តពណ៌ផ្ដួលរំលំរាជរដ្ឋាភិបាល

១សប្តាហ៍ គ្រោះថ្នាក់ចរាចរណ៍ បន្តឆក់យកជីវិតមនុស្ស២៨នាក់ របួសជិត៧០នាក់

ឃាត់ខ្លួនជនសង្ស័យម្នាក់ក្នុងចំណោមបក្ខពួក ៤នាក់ ករណីឆក់ប្រដាប់អាវុធ ៣ករណី

សន្តិសុខ និង សង្គម

អ្នកជម្លៀសខ្លួនជាង ៦០០នាក់ធ្លាក់ខ្លួនឈឺដោយសារការផ្ទុះភ្នំភ្លើងនៅប្រទេសហ្វីលីពីន

ហ្វីលីពីន៖ ទីភ្នាក់ងាររដ្ឋាភិបាលមួយបានរាយការណ៍កាលពីថ្ងៃចន្ទថា មនុស្សយ៉ាងហោចណាស់ ៦២៨ នាក់បានធ្លាក់ខ្លួនឈឺ បន្ទាប់ពីត្រូវបានជម្លៀសខ្លួនទៅកាន់ទីជម្រកដោយសារតែការផ្ទុះនៃភ្នំភ្លើង Mayon ដែលជាភ្នំភ្លើងសកម្មបំផុតនៅក្នុងប្រទេសហ្វីលីពីន។ ក្រុមប្រឹក្សាគ្រប់គ្រង និងកាត់បន្ថយហានិភ័យគ្រោះមហន្តរាយជាតិ បានកត់ត្រាយ៉ាងហោចណាស់ជំងឺចំនួន ១០ ប្រភេទដែលប៉ះពាល់ដល់អ្នកជម្លៀសខ្លួនដែលមានអាយុចន្លោះពី២ ទៅ ៦៤ឆ្នាំ រួមមាន ជំងឺក្អក ផ្តាសាយ គ្រុនក្តៅ រលាកក្រពះ ការឆ្លងមេរោគផ្លូវដង្ហើម និងជំងឺស្បែក។ ទីភ្នាក់ងារគ្រប់គ្រងគ្រោះមហន្តរាយ បាននិយាយថាមនុស្សជិត ៣៩.០០០ នាក់ បានរងផលប៉ះពាល់ដោយការផ្ទុះនៃភ្នំភ្លើង Mayon ដែលបានចាប់ផ្តើមកាលពីថ្ងៃទី ៨ ខែមិថុនា។អាជ្ញាធរក្នុងតំបន់បានជម្លៀសអ្នកភូមិជាង ២០.០០០នាក់ដែលរស់នៅក្នុងតំបន់គ្រោះថ្នាក់ជុំវិញភ្នំភ្លើង Mayon ដែលមានរាងកោណដ៏ទាក់ទាញនៅក្នុងខេត្ត Albay មានចម្ងាយប្រមាណ៥០០ គីឡូម៉ែត្រភាគអាគ្នេយ៍នៃរដ្ឋធានីម៉ានីល របស់ប្រទេសហ្វីលីពីន។ ខេត្តដែលស្ថិតក្រោមស្ថានភាពរដ្ឋក្នុងគ្រាអាសន្នបានបង្កើតមជ្ឈមណ្ឌលជម្លៀសចំនួន ២៨ កន្លែងសម្រាប់ជនភៀសខ្លួន ដែលភាគច្រើននៅក្នុងថ្នាក់រៀន។វិទ្យាស្ថានសិក្សាពីភ្នំភ្លើងនិងរញ្ជួយដីប្រទេសហ្វីលីពីន កាលពីថ្ងៃចន្ទបានកត់ត្រាលំហូរ ចេញពីកម្អែភ្នំភ្លើងដែលបានធ្លាក់មកមានរយៈពេលបីនាទី។ផ្សែងផេះដែលផ្ទុកដោយចំហាយបានកើនឡើងដល់៦០០ ម៉ែត្រហើយវិទ្យាស្ថានបានរក្សាកម្រិតប្រកាសអាសន្នភ្នំភ្លើងនៅកម្រិត៣ក្នុងចំណោមកម្រិតទាំង៥ ។ ភ្នំភ្លើងបានផ្ទុះចុងក្រោយក្នុងឆ្នាំ ២០១៨ បណ្តាលឱ្យមានការជម្លៀសមនុស្សជាង ២៣.០០០ នាក់ពីទីក្រុង និងក្រុងចំនួនប្រាំបួន៕

អ្នកស្លាប់ក្នុងសោកនាដកម្មជនអន្តោប្រវេសន៍នៅប្រទេសក្រិកកើនឡើង ជនសង្ស័យត្រូវបានចាប់ខ្លួន

ក្រិក៖ ជនសង្ស័យថាបានរត់ពន្ធជនអន្តោប្រវេសន៍ជាច្រើននាក់ដែលបានលង់ទឹកក្នុងហេតុការណ៍លិចទូកនៅសមុទ្រមេឌីទែរ៉ាណេ កាលពីសប្តាហ៍មុន ត្រូវបានគេរំពឹងថានឹងប្រឈមមុខការចោទប្រកាន់ពីបទមនុស្សឃាតនៅតុលាការប្រទេសក្រិកក្នុងសប្តាហ៍នេះ ខណៈប្រទេសប៉ាគីស្ថានបានចាប់ខ្លួនជនសង្ស័យរាប់សិបនាក់ជុំវិញគ្រោះមហន្តរាយនេះ។ ប្រទេសក្រិក បានរកឃើញសាកសពបីនាក់បន្ថែមទៀតកាលពីថ្ងៃចន្ទ ដោយនាំឱ្យចំនួនជនរងគ្រោះដែលត្រូវបានបញ្ជាក់កើនឡើងដល់៨១នាក់ បន្ទាប់ពីទូកនេសាទមួយគ្រឿងដែលផ្ទុកជនអន្តោប្រវេសន៍រាប់រយនាក់បានលិចនៅឆ្នេរសមុទ្រភាគនិរតីកាលពីសប្តាហ៍មុន។ មានតែមនុស្ស ១០៤ នាក់ប៉ុណ្ណោះដែលត្រូវបានគេដឹងថាបានរួចជីវិតពីឧបទ្ទវហេតុនេះ។ទីភ្នាក់ងារសារព័ត៌មានពាក់កណ្តាលផ្លូវការរបស់ទីក្រុងAthens បាននិយាយថា មេធាវីរបស់ជនសង្ស័យរត់ពន្ធ៩នាក់ដែលត្រូវបានចាប់ខ្លួនដោយប្រទេសក្រិក ទាំងអស់មកពីប្រទេសអេហ្ស៊ីប បានស្នើសុំ និងត្រូវបានអនុញ្ញាតឱ្យសវនាការលើការចោទប្រកាន់របស់ពួកគេត្រូវពន្យារពេលទៅដល់ព្រឹកថ្ងៃអង្គារនេះ។ ប្រទេសក្រិកនៅតែស្វែងរកនៅសមុទ្រកាលពីថ្ងៃចន្ទ ទោះបីជាឱកាសនៃការរកឃើញអ្នកនៅរស់រានមានជីវិតបន្ថែមទៀតត្រូវបានគេសន្និដ្ឋានថាស្ទើរឈានដល់ចំណុចសូន្យក៏ដោយ។ ទូកបានលិចនៅក្នុងដែនទឹកជ្រៅបំផុតនៅសមុទ្រមេឌីទែរ៉ាណេ។ជនរងគ្រោះត្រូវបានគេជឿថាមកពីប្រទេសស៊ីរី ប៉ាគីស្ថាន និងប្រទេសអេហ្ស៊ីប។ ប្រទេសក្រិកកំពុងស្ថិតនៅក្រោមការត្រួតពិនិត្យកាន់តែខ្លាំងឡើងសម្រាប់ការឆ្លើយតបរបស់ខ្លួនចំពោះគ្រោះមហន្តរាយដែលបានកើតឡើង ទោះបីជាទូកត្រូវបានឃ្លាំមើលដោយឆ្មាំល្បាតឆ្នេរអស់រយៈពេលជាច្រើនម៉ោងក៏ដោយ។ប្រទេសប៉ាគីស្ថាន កាលពីថ្ងៃចន្ទបានប្រកាសជាថ្ងៃកាន់ទុក្ខជាតិ បន្ទាប់ពីជនរងគ្រោះយ៉ាងហោចណាស់ ២១ នាក់ត្រូវបានបញ្ជាក់ពីស្រុក Koti ក្នុងតំបន់គ្រប់គ្រងដោយប៉ាគីស្ថាននៃតំបន់ភ្នំហិម៉ាឡៃ-កាស្មៀរ។ ការស៊ើបអង្កេតបឋមបានបង្ហាញថា ទូកនេះផ្ទុកមនុស្សប្រហែល ៨០០ នាក់។ យោងតាមការសន្និដ្ឋានផ្សេងទៀត មានមនុស្សយ៉ាងហោចណាស់ ៤០០ នាក់នៅលើទូកនោះ។ នៅប្រទេសប៉ាគីស្ថាន មនុស្ស ១៤ នាក់ត្រូវបានចាប់ខ្លួន ដោយជាប់សង្ស័យពីបទជួញដូរមនុស្ស៕

មនុស្ស ៤ នាក់រងរបួសដោយបុរសកាន់ពូថៅវាយអ្នកទទួលទានអាហារនៅភោជនីយដ្ឋានចិនក្នុងប្រទេសនូវ៉ែលហ្សេឡង់

នូវ៉ែលហ្សេឡង់៖ នគរបាល និងសាក្សីបាននិយាយថា បុរសម្នាក់ប្រដាប់ដោយពូថៅបានវាយប្រហារអ្នកទទួលទានអាហារ នៅភោជនីយដ្ឋានចិនដែលនៅជិតគ្នាចំនួនបីក្នុងប្រទេសនូវ៉ែលហ្សេឡង់បណ្តាលឲ្យមនុស្ស៤នាក់របួស។ នគរបាលបាននិយាយថា បុរសនោះបានចាប់ផ្តើមវាយប្រហារនៅម៉ោងប្រហែល ៩ យប់ម៉ោងក្នុងតំបន់ កាលពីថ្ងៃច័ន្ទនៅតំបន់ Albany ជាយទីក្រុង Auckland ភាគខាងជើង ។ នគរបាលបានចាប់ខ្លួនជនសង្ស័យអាយុ២៤ឆ្នាំម្នាក់នៅកន្លែងកើតហេតុ និងបានចោទប្រកាន់ពីបទបង្ករបួសស្នាមដោយចេតនាក្នុងស្ថានភាពធ្ងន់ធ្ងរ។ បុរសនោះជាជនជាតិចិន បានចូលបង្ហាញខ្លួននៅតុលាការនៅថ្ងៃអង្គារនេះ។ នគរបាលពុំបានផ្តល់មូលហេតុភ្លាមៗសម្រាប់ការវាយប្រហារនេះទេ ប៉ុន្តែបាននិយាយថាពួកគេគ្មានភស្តុតាងថាវាជាមូលហេតុនៃការប្រកាន់ពូជសាសន៍នោះទេ។មន្ទីរពេទ្យ North Shore បាននិយាយថា ខាងមន្ទីពេទ្យមានអ្នកជំងឺ២នាក់របួសស្រាល ដែលអ្នកទាំងពីរស្ថិតក្នុងស្ថានភាពមានស្ថិរភាព ហើយមុននេះ អ្នកជំងឺទី ៣ បានចាកចេញពីមន្ទីរពេទ្យ។ អ្នកទទួលទានអាហារម្នាក់បានប្រាប់សារព័ត៌មាន New Zealand Herald ថាលោកកំពុងទទួលអាហារពេលល្ងាចជាមួយមិត្តម្នាក់ នៅពេលនោះបុរសម្នាក់ដើរចូលហើយចាប់ផ្តើមវាយទៅលើមិត្តរបស់គាត់ដែលបានបណ្តាលឲ្យរងរបួសធ្ងន់៕

នាវាមុជទឹករុករកបំណែកនាវា Titanic កំពុងបាត់ការទាក់ទង ខណៈការស្វែងរកកំពុងប្រព្រឹត្តទៅ

យោងតាមក្រុមហ៊ុនឯកជន ដែលបានបញ្ជូននាវាមុជទឹក ដើម្បីធ្វើដំណើររុករកបំបែករបស់នាវាទីតានិក (Titanic) បានឲ្យដឹងថា នាវាបេសកកម្មនេះ បានបាត់ការទាក់ទងនៅឯឆ្នេរសមុទ្រភាគអាគ្នេយ៍នៃប្រទេសកាណាដា។ក្រុមហ៊ុន OceanGate Expeditions បានឲ្យដឹងនៅក្នុងសេចក្តីថ្លែងការណ៍ខ្លីមួយ កាលពីថ្ងៃចន្ទ (ទី១៩ ខែមិថុនា) ថា ខ្លួនកំពុង«ប្រមូលនូវជម្រើសទាំងអស់» ដើម្បីរកវិធីជួយសង្គ្រោះអ្នកនៅក្នុងនាវាមុជទឹកនោះ។ គេមិនទាន់ដឹងភ្លាមៗទេថា មានមនុស្សប៉ុន្មាននាក់បាត់ខ្លួននោះ។ឆ្មាំល្បាតឆ្នេរសមុទ្រសហរដ្ឋអាមេរិក មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ។ សេចក្ដីរាយការណ៍ពីប្រព័ន្ធផ្សព្វផ្សាយនានា បានឲ្យដឹងថា ឆ្មាំល្បាតឆ្នេរ បានចាប់ផ្តើមប្រតិបត្តិការស្វែងរក និងជួយសង្គ្រោះហើយ។គួរបញ្ជាក់ដែរថា យោងតាមគេហទំព័ររបស់ក្រុមហ៊ុន បានឲ្យដឹងថា បច្ចុប្បន្ននេះ ក្រុមហ៊ុនកំពុងដំណើរការបេសកកម្មទី៥ របស់ខ្លួន នៅឆ្នាំ២០២៣ ដែលគ្រោងនឹងចាប់ផ្តើមកាលពីសប្តាហ៍មុន ហើយបញ្ចប់នៅថ្ងៃព្រហស្បតិ៍ (ទី២២ ខែមិថុនា)។យោងតាមគេហទំព័ររបស់ OceanGate បានឲ្យដឹងថា បេសកកម្មទេសចរណ៍ដែលមានតម្លៃ ២៥០.០០០ដុល្លារ ក្នុងមនុស្សម្នាក់ ចាប់ផ្តើមនៅទីក្រុង St. John's នៃខេត្ត Newfoundland របស់ប្រទេសកាណាដា មុនពេលចេញដំណើរប្រហែល ៤០០ម៉ាយល៍ (ជិត៦៤៤គីឡូម៉ែត្រ) ចូលទៅក្នុងមហាសមុទ្រអាត្លង់ទិក ឆ្ពោះទៅកាន់កន្លែងបំណែករបស់នាវា ដែលបានលិចក្នុងឆ្នាំ១៩១២៕

យ៉ាងហោចណាស់មនុស្សម្នាក់ស្លាប់ បន្ទាប់ពីការបាញ់ប្រហារនៅសាលារៀននៅប្រទេសប្រេស៊ីលភាគខាងត្បូង

ប្រេស៊ីល៖ រដ្ឋាភិបាលរដ្ឋ Parana បាននិយាយនៅក្នុងសេចក្តីថ្លែងការណ៍ថា យ៉ាងហោចណាស់សិស្សម្នាក់បានស្លាប់បន្ទាប់ពីការបាញ់ប្រហារនៅសាលារៀននៅទីក្រុង Cambe ភាគខាងត្បូងប្រទេសប្រេស៊ីលកាលពីថ្ងៃចន្ទ ទី 19 ខែមិថុនា។ រដ្ឋាភិបាលបាននិយាយថា ជនបង្កត្រូវបានចាប់ខ្លួន ហើយជាអតីតសិស្សនៃសាលារដ្ឋ Professora Helena Kolody ដែលបានចូលទៅក្នុងបរិវេណសាលាដោយនិយាយថាខ្លួនចង់ស្នើសុំឯកសារសិក្ខាគារិក។អភិបាលរដ្ឋលោក Ratinho Junior បានប្រកាសកាន់ទុក្ខរយៈពេលបីថ្ងៃ ហើយបានបញ្ជូនមន្ត្រីអប់រំនិងសុវត្ថិភាពសាធារណៈរបស់លោកទៅកាន់ទីក្រុង Cambe ជាទីក្រុងដែលមានប្រជាជនចំនួន ១០៨.០០០ នាក់ ដែលស្ថិតនៅចម្ងាយប្រហែល ៤០០ គីឡូម៉ែត្រពីក្រុង Curitiba របស់រដ្ឋ Parana ។ ប្រធានាធិបតីប្រេស៊ីល លោក Luiz Inacio Lula da Silva បាននិយាយថា វាមានសារៈសំខាន់ ដែលប្រទេសនេះស្វែងរកវិធីដើម្បីកសាងសន្តិភាពនៅតាមសាលារៀន។ លោក Lula បាននិយាយនៅក្នុងការបង្ហោះលើបណ្តាញ Twitter ថា៖ «ជីវិតក្មេងម្នាក់ទៀតបានទទួលរងដោយការស្អប់ខ្ពើម និងអំពើហិង្សាដែលយើងមិនអាចអត់ឱនតទៅទៀតបាននៅក្នុងសាលារៀន និងក្នុងសង្គមរបស់យើង»។កាលពីដើមឆ្នាំនេះ បុរសម្នាក់ប្រដាប់ដោយពូថៅតូចមួយបានឡើងលើជញ្ជាំងចូលទៅក្នុងកន្លែងថែទាំក្មេងមួយកន្លែងនៅភាគខាងត្បូងប្រទេសប្រេស៊ីល ហើយបានសម្លាប់កុមារ ៤ នាក់ ខណៈនៅសាលា រៀនទីក្រុង Sao Paulo សិស្សអាយុ ១៣ ឆ្នាំម្នាក់បានចាក់គ្រូបង្រៀនម្នាក់រហូតដល់ស្លាប់ និង ៥ នាក់ផ្សេងទៀតបានរងរបួស៕

ម្ចាស់ជំនួយអន្តរជាតិ សន្យាជំនួយ១,៥ ពាន់លានដុល្លារ សម្រាប់ប្រទេសស៊ូដង់

ស៊ូដង់៖ ម្ចាស់ជំនួយអន្តរជាតិកាលពីថ្ងៃច័ន្ទ បានសន្យាផ្តល់ជំនួយមនុស្សធម៌ជិត ១,៥ពាន់លានដុល្លារដល់ប្រទេសស៊ូដង់ និងតំបន់ដ៏ធំទូលំទូលាយ ដោយឆ្លើយតបទៅនឹងការអំពាវនាវរបស់អង្គការសហប្រជាជាតិដើម្បីជំរុញជំនួយក្នុងពេលមានជម្លោះដែលបានបង្ខំមនុស្សប្រមាណ ២,២ លាននាក់ចាកចេញពីលំនៅឋានរបស់ពួកគេ។អង្គការសហប្រជាជាតិបាននិយាយថា ជំនួយចំនួន៣ ពាន់លានដុល្លារត្រូវការនៅឆ្នាំនេះសម្រាប់ការផ្តល់ជំនួយបន្ទាន់ផ្នែកមនុស្សធម៌នៅក្នុងប្រទេសស៊ូដង់ និងសម្រាប់ជនភៀសខ្លួនដែលភៀសខ្លួនចេញពីប្រទេស ដែលមានតែភាគតិចប៉ុណ្ណោះដែលត្រូវបានផ្តល់មូលនិធិ។ប្រទេសអាល្លឺម៉ង់ បានប្រកាសកាលពីថ្ងៃចន្ទថាខ្លួនកំពុងសន្យាផ្តល់ជំនួយ ២០០ លានអឺរ៉ូ ដល់ប្រទេសស៊ូដង់និងតំបន់រហូតដល់ឆ្នាំ ២០២៤ ហើយសហរដ្ឋអាមេរិកបានសន្យាផ្តល់ចំនួន ១៧១លានដុល្លារ ខណៈប្រទេសកាតាបានសន្យាផ្តល់ចំនួន ៥០ លានដុល្លារ។ អង្គការសហប្រជាជាតិបាននិយាយថា ស្ថាប័ននេះកំពុងបែងចែកជំនួយបន្ថែមចំនួន ២២ លានដុល្លារ ដើម្បីដោះស្រាយតម្រូវការជាអាទិភាព។សង្គ្រាមរវាងកងទ័ពស៊ូដង់ និងកងកម្លាំងគាំទ្ររហ័សយោធាប៉ារ៉ា(RSF) បានចាប់ផ្តើមកាលពីពាក់កណ្តាលខែមេសា ក្នុងពេលមានភាពតានតឹងជុំវិញផែនការដែលគាំទ្រដោយអន្តរជាតិសម្រាប់អន្តកាលឈានឆ្ពោះទៅរកការបោះឆ្នោតក្រោមរដ្ឋាភិបាលស៊ីវិល។ វាបានធ្វើឱ្យមនុស្សជាង ៣.០០០នាក់ស្លាប់ និងបានប្រែក្លាយរដ្ឋធានី Khartoum ទៅជាតំបន់សង្រ្គាម និងបានបង្កឱ្យមានអំពើហិង្សាដ៏ឃោរឃៅនៅក្នុងតំបន់ទីក្រុង Darfur ភាគខាងលិចដែលមានជម្លោះ ព្រមទាំងផ្នែកផ្សេងទៀតរបស់ប្រទេសនេះ។អង្គការសហប្រជាជាតិបានអំពាវនាវដាច់ដោយឡែកសម្រាប់ជំនួយជិត ៥០០លានដុល្លារសម្រាប់ជនភៀសខ្លួនដែលភៀសខ្លួនពីប្រទេសស៊ូដង់ ដែលប្រធានទីភ្នាក់ងារជនភៀសខ្លួនរបស់អង្គការសហប្រជាជាតិ លោក Filippo Grandi បាននិយាយថា បានទទួលមូលនិធិចំនួន ១៥% ជាស្ថានភាពមួយដែលលោកហៅថា «មានការព្រួយបារម្ភយ៉ាងខ្លាំង» ។ អគ្គលេខាធិការលោក Antonio Guterres បានប្រកាសអាសន្នលើជម្លោះនេះដោយនិយាយថា «ខ្ញុំមានការព្រួយបារម្ភជាពិសេសចំពោះរបាយការណ៍អំពីអំពើហិង្សាផ្លូវភេទ និងផ្អែកលើភេទ និងដោយទំហំនៃអំពើហិង្សាជនជាតិភាគតិចនៅក្នុងទីក្រុង Geneina៕

អំពើហិង្សាដោយអាវុធនៅអាមេរិក សម្លាប់មនុស្សចំនួន១៩.៨០៨នាក់ ក្នុងឆ្នាំ២០២៣

អាមេរិក៖ យោងតាមទិន្នន័យចុងក្រោយពីមជ្ឈមណ្ឌលតាមដានអំពើហិង្សាដោយអាវុធ ហ្គាន់ វ៉ាយអឹឡិន អាខាយ (Gun Violence Archive )អំពើហិង្សាដោយអាវុធ និងឧបទ្ទវហេតុបាញ់បោះសេរីនៅសហរដ្ឋអាមេរិក បានបណ្ដាលឲ្យមានមនុស្សជិត២ម៉ឺននាក់ស្លាប់នៅទូទាំងប្រទេសនៅឆ្នាំនេះ គិតត្រឹមថ្ងៃអាទិត្យ ១៨ មិថុនា។ ទិន្នន័យនេះ បានបង្ហាញថា ឧបទ្ទវហេតុទាក់ទងនឹងអាវុធ មានមនុស្សស្លាប់១៩.៨០៨នាក់ និងរបួសចំនួន ១៦.៨៩៧ នាក់ ក្នុងសហរដ្ឋអាមេរិក គិតត្រឹមថ្ងៃអាទិត្យដូចគ្នា។ ក្នុងចំណោមជនរងគ្រោះទាំងអស់ មានអនីតិជនក្រោម១៧ឆ្នាំចំនួន៨២៧នាក់ ហើយក្នុងចំណោមអ្នករបួសទាំងអស់ មាន២.១៧៩នាក់ មានអាយុស្របាលគ្នា។យោងតាមទិន្នន័យខាងលើ មានការបាញ់ប្រហារដ៏រង្គាលចំនួន៣១១លើក នៅទូទាំងសហរដ្ឋអាមេរិក នៅឆ្នាំនេះ គិតត្រឹមថ្ងៃអាទិត្យ មានន័យថា ក្នុងឧបទ្ទវហេតុមួយ មានជនរងគ្រោះ ៤នាក់ ឬ ច្រើនជាងនេះ ត្រូវបានបាញ់ឲ្យរងរបួសឬ ស្លាប់ ដោយមិនបញ្ចូលទាំងខ្មាន់កាំភ្លើងនោះ។ សហរដ្ឋអាមេរិក ដែលមានចំនួនតិចជាង៥%នៃចំនួនប្រជាជនសរុបលើពិភពលោក មានចំនួន៤៦% នៃជនស៊ីវិលអាចកាន់អាវុធបានរបស់ពិភពលោក។ សហរដ្ឋអាមេរិក ឈរនៅលំដាប់លេខ១ក្នុងពិភពលោក ក្នុងចំណោមប្រជាពលរដ្ឋដែលមានទាំងសិទ្ធិកាន់អាវុធផ្ទាល់ខ្លួន ទាំងករណីនៃឧបទ្ទវហេតុបាញ់ប្រហារសម្លាប់មនុស្សដ៏រង្គាល៕

បុរសម្នាក់ធ្លាក់ស្លាប់ពីលើស្ពានកញ្ចក់ Skywalkស្ថិតលើជ្រលងភ្នំ Grand Canyon ក្នុងរដ្ឋ Arizonaសហរដ្ឋអាមេរិក

អាមេរិក៖ យោងតាមការអះអាងរបស់ក្រុមអាជ្ញាធរបានឲ្យដឹងថា បុរសវ័យ៣៣ឆ្នាំម្នាក់ បានធ្លាក់ស្លាប់ពីលើស្ពាន់កញ្ចក់ទាក់ទាញ់ទេសចរដ៏មានប្រជាប្រិយភាព Skywalkស្ថិតនៅលើជ្រលងភ្នំ Grand Canyon ក្នុងរដ្ឋ Arizona សហរដ្ឋអាមេរិក ។ ការិយាល័យរុករក និងសង្រ្គោះតម្រួតស្រុក Mohave បាននិយាយនៅលើបណ្តាញព័ត៌មានសង្គម Facebookថា បុរសម្នាក់នេះ បាននៅលើស្ពាន់កញ្ចក់ Skywalk ស្ថិតលើជ្រលងភ្នំ Grand Canyon West មុនពេលគាត់ឆ្លងកាត់គែម រួចក៏ធ្លាក់ចូលជ្រលងភ្នំខាងក្រោមដែលមានកម្ពស់ជាង ១.២០០ម៉ែត្រ ។ គួរឲ្យដឹងថា កាលពីថ្ងៃទី ៥ ខែមិថុនាកន្លងទៅ ក្រុមបច្ចេកទេសសង្រ្គោះខ្សែពួរ បានឆ្លើយតបនឹងស្ពានកញ្ចក់ Skywalk គឺជាស្ពានរាងជាក្រចកសេះប្រវែងប្រហែល ២១ម៉ែត្រ តភ្ជាប់នឹងគែមជ្រលងភ្នំ បន្ទាប់ពីសេចក្តីរាយការណ៍ថាមាននរណាម្នាក់ ឆ្លងកាត់គែមជ្រលងភ្នំ ។ អ្នកជំនាញខ្សែពួរ ២នាក់ បានឆ្លើយតបជាមួយឧទ្ធម្ភាគចក្រ Rangerរបស់ក្រសួងសុវត្ថិភាពសាធារណៈក្រុង Kingman ដោយធ្វើដំណើរទៅកាន់កន្លែងកើតហេតុ និងបានបញ្ជាក់ថា បុរសម្នាក់ បានស្លាប់ ។ ការិយាល័យតម្រួតស្រុក Mohave កំពុងស៊ើបអង្កេតលើឧបទ្ទេវហេតុដែលបានកើតឡើងនេះ ។ ក្រោយមក សាកសពរបស់បុរសម្នាក់នេះ ត្រូវបានបញ្ជូនទៅកាន់កុលសម្ព័ន្ធ Hualapai គឺជាកុលសម្ព័ន្ធទទួលស្គាល់ដោយរដ្ឋាភិបាលសហព័ន្ធ ស្ថិតនៅតំបន់ភាគពាយព្យរដ្ឋ Arizona ៕

ទឹកជំនន់ប្រែក្លាយឆ្នេរសមុទ្រ Odesa ឲ្យទៅជាកន្លែងចាក់សំរាម និងទីស្មសានរបស់ខ្មោចសត្វ បន្ទាប់ពីបាក់ទំនប់

អ៊ុយក្រែន៖ ឆ្នេរសមុទ្រ នៅតំបន់ Odesa ភាគខាងត្បូងប្រទេសអ៊ុយក្រែន ត្រូវបានបិទបន្ទាប់ពីទឹកកខ្វក់ពីទំនប់ដែលបាក់ Nova Kakhovka បានរសាត់មកតាមខ្សែទឹក ដែលបង្កជា «ការគំរាមកំហែងជាក់ស្ដែង» ដល់ប្រជាជនក្នុងតំបន់ ខណៈដែលចំនួនអ្នកស្លាប់ពីការបាក់ទំនប់ដែលគ្រប់គ្រងដោយប្រទេសរុស្ស៊ីកាលពីថ្ងៃទី៦ ខែមិថុនានេះ បានកើនឡើងដល់ ៤៥នាក់ ក្រោយមានការផ្ដល់ផ្តល់ព័ត៌មានថ្មីៗពីអ្នកបាត់បង់ជីវិត ទាំងពីខាងអ៊ុយក្រែន និងរុស្ស៊ី។ការបាក់ទំនប់នេះបានបំផ្លាញភូមិ ជន់លិចដីស្រែចម្ការ និងធ្វើឲ្យដាច់ចរន្តអគ្គិសនី ហើយនិងការផ្គត់ផ្គង់ទឹកស្អាតដល់ប្រជាពលរដ្ឋរាប់ម៉ឺននាក់ ហើយទោះបីជាអាជ្ញាធរអ៊ុយក្រែន បានឲ្យដឹងថា ទឹកជំនន់ កំពុងតែស្រកចុះក៏ដោយ ប៉ុន្តែកម្ទេចកម្ទីបានរសាត់ធ្លាក់ទៅទន្លេ Dnipro រួចហូរចូលទៅក្នុងសមុទ្រខ្មៅ ដែលនឹងប្រែក្លាយឆ្នេរសមុទ្រ Odesa ឲ្យទៅជា «កន្លែងចាក់សំរាម និងទីស្មសានរបស់ខ្មោចសត្វ»។សាលាក្រុង Odesa បានឲ្យដឹងតាមរយៈបណ្ដាញសង្គម Telegram កាលពីថ្ងៃអាទិត្យថា៖ «ឆ្នេរសមុទ្រ Odesa ត្រូវបានប្រកាសថា មិនស័ក្ដិសមដល់ការហែលទឹកនោះឡើយ ដោយសារតែស្ថានភាពទឹកកាន់តែអាក្រក់ឡើងៗ នៅក្នុងតំបន់ទឹកគ្រប់កន្លែង (សមុទ្រ និងច្រាំងទន្លេ) និងត្រូវបានប្រកាសពីការគំរាមកំហែងជាក់ស្ដែងដល់សុខភាពរបស់អ្នករស់នៅទីក្រុង»។កាលពីថ្ងៃសៅរ៍ តាមរយៈការបង្ហោះសារលើបណ្ដាញសង្គម Telegram អាជ្ញាធរបានព្រមានកាន់តែខ្លាំងអំពីការធ្លាក់ចុះគុណភាពទឹក ដោយប្រាប់ថា ការធ្វើតេស្តមន្ទីរពិសោធន៍ «បានកំណត់អត្តសញ្ញាណភ្នាក់ងារចម្លងជំងឺ កាលពីសប្តាហ៍មុន»។ជាមួយគ្នានេះ អាជ្ញាធរក៏បានប្រកាសហាមប្រាមអ្នកស្រុកតំបន់ឆ្នេរសមុទ្រ Odesa មិនឲ្យលក់ត្រី និងអាហារសមុទ្រពីកន្លែងនេសាទមិនស្គាល់អត្តសញ្ញាណ នៅជិតផ្សារ និងមជ្ឈមណ្ឌលផ្សារទំនើប។ រីឯអាជ្ញាធរសុខាភិបាល នៅទីក្រុង Mykolaiv ភាគខាងត្បូងប្រទេស កាលពីថ្ងៃអាទិត្យ ក៏បានព្រមានអ្នកស្រុកកុំឲ្យបរិភោគទឹកបើកចេញពីក្បាលម៉ាស៊ីនរ៉ូប៊ីណេ ទៅហែលទឹក ឬនេសាទ បន្ទាប់ពីបានរកឃើញសារធាតុចម្លងរោគ នៅក្នុងទឹក នៅទីនោះ។មកទល់ពេលនេះ នៅតែមិនទាន់ច្បាស់ថា តើទំនប់ Nova Kakhovka ត្រូវបានធ្វើឲ្យបាក់ដោយចេតនា ឬថា តើជាកំហុសហេដ្ឋារចនាសម្ព័ន្ធ ខណៈដែលភាគីទាំង២ ទាំងអ៊ុយក្រែន និងរុស្ស៊ី នៅតែឆ្លើយដាក់គ្នា ជុំវិញការនៅពីក្រោយនៃការបាក់ទំនប់នេះ៕

ជនជាតិប៉ាគីស្ថានជាង ៣០០នាក់ បានស្លាប់ក្នុងគ្រោះមហន្តរាយលិចទូកជនអន្តោប្រវេសន៍នៅសមុទ្រមេឌីទែរ៉ាណេ

ប៉ាគីស្ថាន៖ ជនជាតិប៉ាគីស្ថានជាង ៣០០នាក់ បានស្លាប់ក្នុងគ្រោះមហន្តរាយលិចទូកនៅក្នុងសមុទ្រមេឌីទែរ៉ាណេ ស្ថិតនៅជិតតំបន់ឆ្នេរប្រទេសក្រិក គឺជាសោកនាដកម្មចុងក្រោយគេបង្ហាញពីវិបត្តិជនភៀសខ្លួនដែលសហភាពអឺរ៉ុបកំពុងប្រឈម ស្របពេលដែលមនុស្សរាប់ម៉ឺននាក់ ព្យាយាមស្វែងរកទីជម្រកល្អប្រសើរ គេចចេញពីសង្រ្គាម ការរំលោភបំពាន និងភាពក្រីក្រ ។ ប្រធានព្រឹទ្ធសភាប៉ាគីស្ថានលោក Muhammad Sadiq Sanjrani បានចេញចំនួនមនុស្សស្លាប់នៅក្នុងសេចក្តីថ្លែងការណ៍កាលពីថ្ងៃអាទិត្យ ដោយរូបលោកសម្តែងនូវមរណទុក្ខ និងចូលរួមចែករំលែកការសោកស្តាយដល់ក្រុមគ្រួសារអ្នកស្លាប់ ។ លោក Sanjrani និយាយថា ចិត្តគំនិត និងការអធិដ្ឋានរបស់ពួកយើងនៅជាមួយអ្នក ហើយពួកយើងសូមធ្វើអធិស្ឋានដល់ព្រលឹងដែលបានទៅកាន់សុខគតិភព ។ នេះគឺជាឧបទ្ទេវហេតុដ៏អាក្រក់បំផុត ដែលគូសបញ្ជាក់ពីតម្រូវការបន្ទាន់ក្នុងការលើកឡើង និងថ្កោលទោសទង្វើរដ៏គួរស្អប់ខ្ពើមរបស់ក្រុមរត់ពន្ធមនុស្សខុសច្បាប់ ។ ទោះបីជាយ៉ាងណាក៏ដោយ ក្រុមអាជ្ញាធរក្រិក ពុំទាន់បានបញ្ជាក់ពីចំនួនមនុស្សស្លាប់សរុបរបស់ជនជាតិប៉ាគីស្ថាននោះទេ ។ គួរឲ្យដឹងថា ប៉ាគីស្ថាន កំពុងស្ថិតក្នុងវិបត្តិសេដ្ឋកិច្ចដ៏អាក្រក់បំផុតរបស់ខ្លួន ក្នុងរយៈពេលជាច្រើនទសវត្សរ៍កន្លងមកនេះ ។ ដោយឡែក ទីភ្នាក់ងារអន្តោប្រវេសន៍ជាតិ(IOM) បាននិយាយថា បុរស ស្រ្តី និងកុមារប្រហែល ៧៥០នាក់ បាននៅលើទូកមួយគ្រឿង ពេលវាលិចកាលពីសប្តាហ៍មុន ដោយបានសម្លាប់មនុស្សរាប់រយនាក់ និងធ្វើឲ្យវាស្ថិតក្នុងចំណោមសោកនាដកម្មលិចទូកដ៏អាក្រក់បំផុតនៅក្នុងសមុទ្រមេឌីទែរ៉ាណេ ៕

បណ្ដាញសង្គម

ព័ត៌មានថ្មីៗ

កម្ពុជាចាប់ផ្តើមសម្រួលយុទ្ធោបករណ៍ និងអាវុធធុនធ្ងន់ ចេញពីតំបន់ជម្លោះនៅព្រំដែន ត្រឡប់ទៅមូលដ្ឋានដើមវិញ

កម្ពុជា និងហ្វីលីពីនឯកភាពបន្តពង្រឹង និងពង្រីកកិច្ចសហប្រតិបត្តិការថែមទៀត

លោក Trump បានប្រាប់បណ្ដាប្រទេសអាស៊ីអាគ្នេយ៍ថា សហរដ្ឋអាមេរិក តែងនៅជាមួយនិច្ច

នាយករដ្ឋមន្ត្រីជប៉ុន៖ការពង្រឹងសម្ព័ន្ធភាពជាមួយអាមេរិកជាអាទិភាពកំពូលក្រោយសន្ទនាតាមទូរស័ព្ទជាមួយលោកTrump

ពលរដ្ឋឥណ្ឌា ព្រួយបារម្ភពីសុខភាពកូនចៅ ខណៈខ្យល់ពុលគ្របដណ្ដប់លើរដ្ឋធានី Delhi

អតីតយុទ្ធជនពិការមួយគ្រួសារ នៅខេត្តកំពង់ធំទទួលបានអំណោយផ្ទះថ្មីពីសម្ដេចតេជោ ហ៊ុន សែន

មនុស្ស៣នាក់ស្លាប់ និងជិត៣០នាក់របួសក្នុងទីក្រុងគីវ ស្របពេលរុស្ស៊ីវាយប្រហារដោយយានដ្រូនលើអគារលំនៅឋាន

សម្ដេចធិបតី និងឯកឧត្តមប្រធានាធិបតីអាមេរិក ចុះហត្ថលេខាកិច្ចព្រមព្រៀងពាណិជ្ជកម្មបដិការដើម្បីពង្រឹង និងពង្រីកពាណិជ្ជកម្មទ្វេភាគី

ប្រមុខការទូតអាមេរិក៖ហ្កាហ្សាមិនគួរត្រូវបែងចែកជាអចិន្ត្រៃយ៍ទេ ខណៈអ៊ីស្រាអែលវាយប្រហារតាមគោលដៅ

ឯកឧត្តមកិត្តិសង្គហបណ្ឌិត គន់ គីម អញ្ជើញចុះពិនិត្យការសាងសង់ផ្ទះ នៅមណ្ឌលតេជោសន្តិភាព ក្នុងខេត្តបន្ទាយមានជ័យ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877