BTV NEWS

កម្លាំងនគរបាលរាជធានី បើកការឆ្មក់ចុះបង្ក្រាប Online Scams នៅខណ្ឌសែនសុខ ឃាត់ខ្លួនជនបរទេស ៣៣នាក់

ឃាត់ខ្លួនជនសង្ស័យ០៩នាក់ រកឃើញសម្ភារបម្រើឲ្យបទល្មើស Online Scams និងអាវុធខ្លីមួយដើម នៅខណ្ឌច្បារអំពៅ

កម្លាំងនាយកដ្ឋាននគរបាលព្រហ្មទណ្ឌ បង្ក្រាបករណីចាប់បង្ខាំងធ្វើទារុណកម្ម នៅខណ្ឌមានជ័យ

ឃុំខ្លួនឧក្រិដ្ឋជនបរទេស ២២នាក់ ដាក់ពន្ធនាគារបណ្តោះអាសន្ន ពាក់ព័ន្ធនឹងបទល្មើស Online Scams

សន្តិសុខ និង សង្គម

មនុស្ស ២១នាក់ស្លាប់ និងជាង២០នាក់បាត់ខ្លួន បន្ទាប់ពីលិចទូកនៅឆ្នេរសមុទ្រប្រទេសជីប៊ូទី

ទីភ្នាក់ងារអន្តោប្រវេសន៍របស់អង្គការសហប្រជាជាតិ បាននិយាយកាលពីថ្ងៃអង្គារ (២៣ មេសា) ថាជនអន្តោប្រវេសន៍ចំនួន ២១ នាក់បានស្លាប់ និង ២៣ នាក់ផ្សេងទៀតកំពុងបាត់ខ្លួន បន្ទាប់ពីទូកដឹកមនុស្សចំនួន ៧៧ នាក់បានលិចនៅឆ្នេរសមុទ្រប្រទេសជីប៊ូទី ដែលនេះជាឧបទ្ទវហេតុលើកទីពីរក្នុងរយៈពេលពីរសប្តាហ៍។ យោងតាមអង្គការទេសន្តប្រវេសន៍អន្តរជាតិ (IOM) របស់ UN បានឱ្យដឹងថា ជនអន្តោប្រវេសន៍រាប់ម៉ឺននាក់ មកពីតំបន់ញកអាហ្វ្រិក ជាពិសេសមកពីប្រទេស អេត្យូពី (Ethiopia) និងសូម៉ាលី បានចាកចេញពីទ្វីបនេះឆ្លងកាត់ជីប៊ូទី ក្នុងគោលបំណងទៅអារ៉ាប់ប៊ី សាអ៊ូឌីត (Saudi Arabia) និងប្រទេសឈូងសមុទ្រផ្សេងទៀតដើម្បីស្វែងរកការងារធ្វើ។អង្គការ IOM និយាយថាមនុស្សជាច្រើនបរាជ័យក្នុងការធ្វើដំណើរផ្សងព្រេងដ៏គ្រោះថ្នាក់នេះ ហើយមនុស្សរាប់ពាន់នាក់ត្រូវជាប់គាំងក្នុងប្រទេសយេម៉ែន ជាទីដែលពួកគេរស់នៅក្នុងស្ថានភាពលំបាក។ ការលង់ទឹកគឺជារឿងធម្មតានៅក្នុងដែនទឹកជីប៊ូទី ដោយសារជនអន្តោប្រវេសន៍នាំគ្នាធ្វើដំណើរតាមនោះ។លោកស្រី ថានចា ប៉ាស៊ីហ្វីខូ (Tanja Pacifico) ប្រធានការិយាល័យអង្គការ IOM នៅជីប៊ូទី បាននិយាយថាចំនួនអ្នកស្លាប់នេះបានកើនឡើងពីតួលេខ ១៦ នាក់ដែលបានផ្តល់ឱ្យមុននោះ។ លោកស្រីបន្ថែមថា មនុស្ស ៣៣ នាក់ផ្សេងទៀតត្រូវបានគេជួយសង្គ្រោះ ហើយពួកគេ និងអ្នកស្លាប់ទាំងអស់ជាជនជាតិអេត្យូពី៕

ភាពភ័យខ្លាចកើនឡើងសម្រាប់ពលរដ្ឋនៅក្រុង រ៉ាហ្វា ខណៈសង្រ្គាមអ៊ីស្រាអែល-ហាម៉ាសចូលដល់ថ្ងៃទី២០០

សង្រ្គាមរវាងកងទ័ពអ៊ីស្រាអែល និងក្រុមហាម៉ាស បានឈានចូលដល់ថ្ងៃទី២០០ កាលពីថ្ងៃអង្គារទី២៣មេសា សប្ដាហ៍នេះ ខណៈក្រុមដឹកជញ្ជូនជំនួយ បានព្រមានថា អ៊ីស្រាអែល មានផែនការឈ្លានពានចូលទីក្រុងរ៉ាហ្វា ភាគខាងត្បូង ជាទីដែលប្រជាពលរដ្ឋភាគច្រើននៅក្នុងដែនដីហ្កាហ្សា បានរត់ទៅជ្រកកោននៅទីនោះ នឹងជួបស្ថានភាពដ៏មហន្តរាយបំផុត ប្រសិនបើវាយប្រហារមែន។ ការភ័យខ្លាចរបស់ប្រជាពលរដ្ឋ បានកំពុងកើនឡើងថា លោកនាយករដ្ឋមន្ត្រីអ៊ីស្រាអែល Benjamin Netanyahu នឹងបញ្ជូនទាហានចូលទៅក្រុងរ៉ាហ្វា ក្នុងពេលឆាប់ៗនេះ ជាទីដែលមនុស្សប្រមាណ១លាន៥សែននាក់ បានស្វែងរកមម្រកមានសុវត្ថិភាពនៅទីនោះ ភាគច្រើនស្នាក់នៅតាមជំរំតង់។ ប្រធានក្រុមប្រឹក្សាជនអន្តោប្រវេសន៍ជនជាតិន័រវ៉េស លោក ហ្សង់ អ៊ីហ្គេលិន(Jan Egeland) បានប្រាប់សារព័ត៌មាន AFP ថា មនុស្សគ្រប់គ្នានៅទូទាំងជំរំជនភៀសខ្លួនដ៏ធំបំផុតនៅក្នុងរ៉ាហ្វា ទំនង ជាអង្គុយរាប់ពេលវេលាថយក្រោយ ដែលអ៊ីស្រាអែលនឹងវាយលុក។ លោកបានព្រមានថា ការវាយប្រហារដោយថ្មើរជើង លើតំបន់រ៉ាហ្វា នឹងក្លាយជាស្ថានភាពដ៏មហន្តរាយបំផុត ក្នុងពិភពលោក ហើយក្រុមផ្ដល់ជំនួយមនុស្សធម៌នានា ពិតជាពុំដឹងថាត្រូវរៀបរាប់បែបណាទេចំពោះពេលវេលានេះ ។ កាលពី៣ថ្ងៃមុន ទីភ្នាក់ងារការពារជនស៊ីវិលរបស់ដែនដីហ្កាហ្សា បាននិយាយថា គេបានរកឃើញសាកសពជិត៣០០នាក់ ដែលត្រូវបានសម្លាប់ និងកប់ក្នុងកម្ទេចថ្ម ដោយសារតែការវាយប្រហាររបស់កងកម្លាំងអ៊ីស្រាអែល នៅមន្ទីរពេទ្យណាស័រ (Nasser) ក្នុងទីក្រុង Khan Younis ភាគខាងត្បូងដែនដីហ្កហ្សា៕

ស៊ូដង់ខាងត្បូងនិយាយថា មិនរារាំងជំនួយមនុស្សធម៌ និងរថយន្តដឹកប្រេងទេ

អ្នកនាំពាក្យអង្គការសហប្រជាជាតិ បាននិយាយកាលពីថ្ងៃអង្គារថា អង្គការសហប្រជាជាតិទទួលយកការធានារបស់ប្រទេសស៊ូដង់ខាងត្បូង ដែលមិនរារាំងរថយន្តដឹកជំនួយមនុស្សធម៌ឡើយ ខណៈយានយន្តទាំងនោះមិនទាន់បានធ្វើដំណើរចូលនៅឡើយ។លោក Stephane Dujarric ប្រធានអ្នកនាំពាក្យរបស់អគ្គលេខាធិការអង្គការសហប្រជាជាតិ លោក Antonio Guterres បាននិយាយថា លោកអាចនិយាយថា យើងទទួលស្គាល់ការធានាពី រដ្ឋាភិបាលប្រទេសស៊ូដង់ខាងត្បូងថា ការដាក់ពន្ធលើប្រេងឥន្ធនៈ និងរថយន្តផ្គត់ផ្គង់ មិនអនុវត្តចំពោះប្រតិបត្តិការមនុស្សធម៌ ការអភិវឌ្ឍន៍ និងប្រតិបត្តិការរក្សាសន្តិភាពរបស់អង្គការសហប្រជាជាតិ ឬចំពោះសហគមន៍ការទូតឡើយ។លោក Dujarric បាននិយាយថា ទោះជាយ៉ាងណា យើងនៅតែមានការព្រួយបារម្ភថា រថយន្តដឹកប្រេងឥន្ធនៈ នៅតែត្រូវបានរក្សាទុកនៅតាមដេប៉ូផ្សេងៗ និងនៅព្រំដែន។ ពួកគេនឹងមិនអាចជួយដល់សហគមន៍ ដែលត្រូវការជំនួយនៅទូទាំងប្រទេសស៊ូដង់ខាងត្បូងបានឡើយ។ លោកនិយាយថា បុគ្គលិកមនុស្សធម៌ ក្នុងប្រទេសនេះរាយការណ៍ថា ស្ថានភាពនេះគឺធ្ងន់ធ្ងរ ដោយសារប្រេងបម្រុងនឹងអស់។ អ្នកនាំពាក្យបាននិយាយថា ការទប់ស្កាត់ការដឹកជញ្ជូនជំនួយរាប់លានដុល្លារក្នុងអំឡុងពេលមានវិបត្តិមនុស្សធម៌ និងការបង្វែរថវិកាដែលផ្តល់ដោយម្ចាស់ជំនួយនិងប្រទេសសមាជិកអង្គការសហប្រជាជាតិផ្សេងទៀត ដើម្បីជួយប្រជាជនស៊ូដង់ខាងត្បូង គឺជារឿងគួឲ្យសោកស្តាយ។លោក Dujarric និយាយថា ផលប៉ះពាល់ភ្លាមៗនៃការបញ្ឈប់រថយន្តដឹកជំនួយ និងការទម្លាក់ជំនួយមនុស្សធម៌ពីយន្តហោះ នឹងប៉ះពាល់ដល់បុរស ស្ត្រី និងកុមារចំនួន ៦០.០០០ នាក់ ដែលត្រូវការជំនួយ។ លោក Dujarric បាននិយាយថា ស្ថានភាពក៏កំពុងប៉ះពាល់ដល់បេសកកម្មរក្សាសន្តិភាពរបស់យើងនៅតំបន់ Abyei ផងដែរ ព្រោះជំនួយរបស់ពួកគេត្រូវតែចូលតាមតំបន់ Abyei ។ Abyei គឺជាតំបន់ប្រជែងគ្នារវាងប្រទេសស៊ូដង់ដែលហែកហួរដោយសង្រ្គាម និងប្រទេសស៊ូដង់ខាងត្បូង។

ប្រជាជនកេនយ៉ារាប់ពាន់នាក់ រងផលប៉ះពាល់ដោយទឹកជំនន់ ខណៈ៣៨នាក់ស្លាប់

ទិន្នន័យពីសមាគមកាកបាទក្រហមប្រទេសកេនយ៉ាបានបង្ហាញកាលពីថ្ងៃអង្គារថា ភ្លៀងធ្លាក់ខ្លាំងនៅទូទាំងប្រទេសកេនយ៉ា បណ្តាលឲ្យមនុស្សយ៉ាងហោចណាស់ ៣៨នាក់ស្លាប់ និងជម្លៀសប្រជាជនជាង ១១.០០០នាក់ ហើយមនុស្សរាប់រយនាក់ទៀតត្រូវបានបង្ខំឲ្យចាកចេញពីលំនៅឋានរបស់ពួកគេក្នុងរយៈពេលប៉ុន្មានថ្ងៃថ្មីៗនេះ។នៅក្នុងតំបន់ Kiambu នៅក្រៅរដ្ឋធានី Nairobi ប្រជាជនបានប្រាប់សារព័ត៌មានរ៉យទ័រថា ជញ្ជាំងបាក់រលំ បានសម្លាប់មនុស្សម្នាក់អំឡុងពេលមានភ្លៀងធ្លាក់។ នៅភាគអាគ្នេយ៍ ក្នុងតំបន់ Machakos លោកស្រី Caroline Wambui និងកូនៗរបស់គាត់ បានជ្រកកោននៅមន្ទីរពេទ្យ Kinanie Level Three រយៈពេលពីរថ្ងៃបន្ទាប់ពីទឹកជំនន់បានបំផ្លាញលំនៅឋានរបស់គាត់។ លោកស្រី Wambui បានថតវីដេអូនៅពេលដែលគាត់រង់ចាំនៅលើដំបូលផ្ទះរង់ចាំការជួយសង្គ្រោះ។កាកបាទក្រហមបាននិយាយថា អង្គភាពបានជួយសង្គ្រោះមនុស្ស១៨០នាក់ នៅទូទាំងប្រទេសពីទឹកជំនន់ ដែលបានប៉ះពាល់ដល់តំបន់ជាច្រើន។ក្រសួងឧតុនិយមប្រទេសកេនយ៉ា បានព្រមានថា នឹងមានភ្លៀងធ្លាក់ខ្លាំងបន្ថែមទៀតនៅក្នុងសប្តាហ៍ខាងមុខនេះ ហើយបានចេញការព្រមានអំពីទឹកជំនន់។ អាជ្ញាធរ និងក្រុមផ្តល់ជំនួយ បានណែនាំដល់សាធារណជនឱ្យជៀសវាងតំបន់លិចទឹក ស្វែងរកទីទួលខ្ពស់ និងកុំបើកបរក្នុងពេលមានភ្លៀងធ្លាក់។

និស្សិត ចូលរួមការតវ៉ាគាំទ្រពលរដ្ឋប៉ាឡេស្ទីន នៅសាកលវិទ្យាល័យក្នុងក្រុងញូវយ៉ក

ក្រុមបាតុករនិស្សិតគាំទ្រពលរដ្ឋប៉ាឡេស្ទីន បានចេញធ្វើបាតុកម្មនៅសកលវិទ្យាល័យ New School ក្នុងទីក្រុងញូវយ៉ក កាលពីថ្ងៃអង្គារ និងចូលរួមក្នុងបាតុកម្មស្រដៀងៗគ្នា នៅទីបោះជំរំតង់នៅតាមបរិវេណច្រើនកន្លែងជុំវិញប្រទេស ខណៈមួយចំនួនត្រូវបានបំបែកដោយនគរបាល។ចាប់តាំងពីថ្ងៃសុក្រ ទី១៩ ខែមេសា និស្សិតរាប់រយនាក់ និងអ្នកផ្សេងទៀត ត្រូវបានចាប់ខ្លួននៅសកលវិទ្យាល័យ Columbia សាកលវិទ្យាល័យYale និងសាកលវិទ្យាល័យ New York បន្ទាប់ពីមនុស្សមួយចំនួនបានបង្កើតជំរំតង់គ្មានការអនុញ្ញាត ដើម្បីដាក់សម្ពាធចំពោះការទាមទាររបស់ពួកគេ។សេតវិមាន កាលពីថ្ងៃអង្គារបាននិយាយថា ខ្លួនកំពុងតាមដានស្ថានការណ៍នៅបរិវេណមហាវិទ្យាល័យ ដោយនិយាយថា ប្រជាជនមានសិទ្ធិតវ៉ាជាសាធារណៈ ប៉ុន្តែកុំឲ្យមានការបំភិតបំភ័យ ឬការអំពាវនាវឱ្យមានអំពើហិង្សា ដោយលើកឡើងពីវោហាសាស្ត្រគួរឱ្យព្រួយបារម្ភមួយចំនួន។សិស្សវិទ្យាល័យ និងនិស្សិតមហាវិទ្យាល័យ នៅទូទាំងតំបន់ ភ្យូ ជូត សោន(Puget Sound) បានដើរចេញពីថ្នាក់រៀនកាលពីព្រឹកថ្ងៃអង្គារ ដើម្បីតវ៉ា ជុំវិញសង្គ្រាមនៅតំបន់ហ្កាហ្សា។ការតវ៉ារបស់និស្សិតដែលគាំទ្រពលរដ្ឋប៉ាឡេស្ទីន នៅសហរដ្ឋអាមេរិក បានកើនឡើង និងរីកកាន់តែធំកាលពីសប្តាហ៍កន្លងទៅនេះ ដោយមានការបោះជំរំជាច្រើនកន្លែងនៅពេលនេះ នៅមហាវិទ្យាល័យ រួមមានសាកលវិទ្យាល័យ Columbia, Yale និងសាកលវិទ្យាល័យ New York។ នគរបាលត្រូវបានគេដាក់ពង្រាយទៅកាន់បរិវេណសាកលវិទ្យាដើម្បីចាប់ខ្លួនបាតុករ។ នៅក្នុងការបង្ហោះតាមប្រព័ន្ធផ្សព្វផ្សាយសង្គម និងការចេញផ្សាយព័ត៌មាន ក្រុមនិស្សិត គាំទ្រប៉ាឡេស្ទីន បាននិយាយថា សំឡេងគាំទ្រប៉ាឡេស្ទីន កំពុងត្រូវបានដាក់គំនាប និងទាមទារឱ្យសាលារៀនមានចំណាត់ការ។

សហរដ្ឋអាមេរិក អំពាវនាវឱ្យអ៊ីរ៉ាក់ ការពារទាហានរបស់ខ្លួនបន្ទាប់ពីការវាយប្រហារថ្មី

យោធាសហរដ្ឋអាមេរិក កាលពីថ្ងៃអង្គារ (២៣ មេសា) បានអំពាវនាវឱ្យរដ្ឋាភិបាលអ៊ីរ៉ាក់ ចាត់វិធានការដើម្បីការពារទាហានអាមេរិក ទាំងនៅក្នុងប្រទេសអ៊ីរ៉ាក់ និងស៊ីរី បន្ទាប់ពីការវាយប្រហារបរាជ័យ មួយថ្ងៃមុននោះដោយក្រុមជីវពលចម្រុះរបស់អ៊ីរ៉ង់។ការវាយប្រហារដោយយានដ្រូន និងគ្រាប់រ៉ូកែត បែបនេះគឺជាឧបទ្ទវហេតុជាលើកដំបូង ចាប់តាំងពីការផ្អាករយៈពេលជិតបីខែ នៅក្នុងការវាយប្រហារស្ទើរតែរាល់ថ្ងៃ ដែលឈានដល់ការសម្លាប់ទាហានអាមេរិកបីនាក់ក្នុងខែមករា នៅឯមូលដ្ឋានយោធាអាមេរិក ឈ្មោះថា ប៉ប-២២ (Tower 22) ក្នុងប្រទេសហ្ស៊កដានី។ថ្លែងនៅឯមន្ទីរបញ្ចកោណ លោក ផាទ្រីក រ៉ាយឌ័រ (Patrick Ryder) អ្នកនាំពាក្យរបស់កងទ័ពអាកាសអាមេរិក មិនបានសន្និដ្ឋានអំពីអ្វីដែលបង្កឱ្យមានការកើតឡើងជាថ្មីក្នុងការវាយប្រហារនោះទេ ប៉ុន្តែលោកបានអំពាវនាវឱ្យក្រុងបាកដាដ ចាត់វិធានការ។ កាលពីមុន ទីក្រុងវ៉ាស៊ីនតោន បានស្តីបន្ទោសអ៊ីរ៉ង់ ចំពោះការផ្តល់មូលនិធិ និងដឹកនាំក្រុមជីវពលនៅក្នុងប្រទេសអ៊ីរ៉ាក់ និងស៊ីរី ដែលវាយប្រហារកងកម្លាំងអាមេរិក។នាយករដ្ឋមន្ត្រីអ៊ីរ៉ាក់ លោក ម៉ូហាម៉េដ សៀ អាល់ស៊ូដានី (Mohammed Shia al-Sudani) ដែលព្យាយាមមិនឱ្យប្រទេសរបស់ខ្លួនក្លាយជាសមរភូមិសម្រាប់ការប្រយុទ្ធគ្នារវាងសហរដ្ឋអាមេរិក និងអ៊ីរ៉ង់ បានជួបជាមួយលោកប្រធានាធិបតី ចូ បៃដិន (Joe Biden) កាលពីដើមខែនេះ ក្នុងកិច្ចខិតខំប្រឹងប្រែងដើម្បីបើកទំព័រថ្មីក្នុងទំនាក់ទំនងរវាងអាមេរិក និងអ៊ីរ៉ាក់ ទោះបីជាមានភាពតានតឹងក្នុងតំបន់កើនឡើងក៏ដោយ៕

ទីភ្នាក់ងារចារកម្មហូឡង់មើលឃើញថា សង្រ្គាមនៅហ្កាហ្សា និងអ៊ុយក្រែន ជាការបង្កការគំរាមកំហែងភេរវកម្ម

ទីភ្នាក់ងាចារកម្មជាតិរបស់ប្រទេសហូឡង់ បាននិយាយកាលពីថ្ងៃអង្គារថា ការគំរាមកំហែងសំដៅទៅលើប្រទេសហូឡង់ ត្រូវបានផ្សារភ្ជាប់កាន់តែខ្លាំងឡើងទៅនឹងភាពចលាចលទូទាំងពិភពលោក រួមទាំងសង្រ្គាមនៅតំបន់ហ្កាហ្សា និងអ៊ុយក្រែនផងដែរ។ទោះបីជាចំនួននៃការវាយប្រហារភេរវកម្មនៅទូទាំងទ្វីបអឺរ៉ុប បានធ្លាក់ចុះ ក្នុងរយៈពេលប៉ុន្មានឆ្នាំចុងក្រោយនេះក្តី ក៏សេវាចារកម្ម និងសន្តិសុខទូទៅ នៅក្នុងរបាយការណ៍ប្រចាំឆ្នាំរបស់ខ្លួន បានបញ្ជាក់ថា សង្គ្រាមអ៊ីស្រាអែល-ហាម៉ាស នៅតំបន់ហ្កាហ្សា និងការបំផ្លិចបំផ្លាញគម្ពីរកូរ៉ាន នៅខាងក្រៅសភា កាលពីឆ្នាំមុនគឺជា «ព្រឹត្តិការណ៍បង្កឡើង»សម្រាប់ក្រុមជ្រុលនិយម។ លោក Erik Akerboom អគ្គនាយកទីភ្នាក់ងារនេះ បានប្រាប់សារព័ត៌មាន A Pថា៖«ការគំរាមកំហែងភេរវកម្ម គឺពិតជាធ្ងន់ធ្ងរ នៅពេលនេះ»។លោក Akerboom បានលើកឡើងថា លោកមានការព្រួយបារម្ភជាពិសេសអំពីព្រឹត្តិការណ៍ធំៗ ដោយកត់សម្គាល់ថា ទីភ្នាក់ងារនេះ កំពុងធ្វើការយ៉ាងជិតស្និទ្ធជាមួយអាជ្ញាធរបារាំង ដើម្បីទប់ស្កាត់ឧប្បត្តិហេតុ ក្នុងអំឡុងពេលការប្រកួតកីឡាអូឡាំពិកប៉ារីស នៅរដូវក្តៅនេះ។លោក Akerboom បានថ្លែងថា កាលពីខែធ្នូ ទីភ្នាក់ងារប្រឆាំងភេរវកម្មរបស់ប្រទេសហូឡង់ បានបង្កើនការព្រមានពីការគំរាមកំហែងរបស់ប្រទេសដល់កម្រិតខ្ពស់បំផុតទីពីររបស់ខ្លួន ដោយសារតែមានការព្រួយបារម្ភអំពីសម្ព័ន្ធភាព Khorasan របស់ក្រុមរដ្ឋឥស្លាម IS-K ដែលជាសាខានៅអាស៊ីកណ្តាល ទទួលខុសត្រូវចំពោះការវាយប្រហារ នៅសាលប្រគុំតន្ត្រីជាយក្រុងមូស្គូ ដែលបានសម្លាប់មនុស្សយ៉ាងហោចណាស់ ១៣៣នាក់ ក្នុងខែមីនា។

ការតវ៉ាយ៉ាងធំនៅអាហ្សង់ទីន ប្រឆាំងរដ្ឋាភិបាល ជុំវិញការកាត់កញ្ចប់ថវិកាសម្រាប់វិស័យអប់រំ

មនុស្សរាប់ម៉ឺននាក់បានចេញតវ៉ាតាមដងផ្លូវនានារបស់រដ្ឋធានី ប៊ុយ ណូសអ៊ែរ៉េស (Buenos Aires)ប្រទេសអាហ្សង់ទីនកាលពីថ្ងៃអង្គារទី២៣មេសា សប្ដាហ៍នេះ តវ៉ាប្រឆាំងការកាត់បន្ថយកញ្ចប់ថវិការបស់សាកលវិទ្យាល័យសាធារណៈ ជាការតវ៉ាធំបំផុតប្រឆាំងនឹងវិធានការរដ្ឋាភិបាលរបស់លោកប្រធានាធិបតី ហាវីយ័រ មីឡេ (Javier Milei) ។ ការតវ៉ានានាគឺជាឧទាហរណ៍ចុងក្រោយបំផុត នៃការកើនឡើងភាពតានតឹង ជុំវិញការកាត់កញ្ចប់ចំណាយ ដែលជួយដោះស្រាយឱនភាពសារពើពន្ធយ៉ាងជ្រៅ ប៉ុន្តែបណ្តាលឱ្យមានការលំបាកក្នុងសេដ្ឋកិច្ចពិតប្រាកដ។ វីដេអូពីទីក្រុងនេះ បានបង្ហាញពីអ្នកដើរក្បួនតវ៉ាកំពុង ររាំ លេងឧបករណ៍ភ្លេង និងកាន់បដាអំពាវនាវឱ្យទទួលបានមូលនិធិអប់រំដើម្បីទទួលបានការការពារ។លោកប្រធានាធិបតីរបស់ប្រទេស មីឡេ(Milei) បានឡើងកាន់តំណែងកាលពីឆ្នាំមុនដោយសន្យាថានឹងនាំយកហិរញ្ញវត្ថុរបស់ប្រទេសនេះ ឱ្យស្ថិតក្រោមការគ្រប់គ្រង ព្រមទាំងកាត់បន្ថយយ៉ាងខ្លាំងដល់វិស័យសាធារណៈ។រដ្ឋាភិបាលរបស់លោកបានរក្សាមូលនិធិសកលវិទ្យាល័យនៅឆ្នាំនេះក្នុងកម្រិតដូចគ្នានឹងឆ្នាំ ២០២៣ដែរ ទោះបីជាអតិផរណាបានកាត់បន្ថយតម្លៃពិតនៃថវិកានេះ រហូតដល់ ៨០% ក៏ដោយ។សាកលវិទ្យាធិការនៃសាកលវិទ្យាល័យ ប៊ុយ ណូសអ៊ែរ៉េស (Buenos Aires) លោក រីខាដូ ហ្គេលភី ( Ricardo Gelpi) បានព្រមានថា ស្ថាប័ននេះប្រហែលជាត្រូវបិទទ្វារក្នុងរយៈពេលបីខែទៀត លុះត្រាតែទទួលបានមូលនិធិបន្ថែម។លោក Milei បានព្យាយាមបង្ហាញភាពត្រឹមត្រូវនៃការកាត់បន្ថយនេះ ដោយពណ៌នាម្តងហើយម្តងទៀតអំពីបណ្ដាសាកលវិទ្យាល័យគ្រប់គ្រងដោយរដ្ឋ ថាជាមជ្ឈមណ្ឌលនៃលទ្ធិសង្គមនិយម៕

មន្ត្រីអាមេរិក៖ ហានិភ័យនៃគ្រោះទុរ្ភិក្សខ្ពស់ខ្លាំងនៅតំបន់ហ្កាហ្សា ជាពិសេសនៅភាគខាងជើង

ប្រេសិតពិសេសរបស់សហរដ្ឋអាមេរិក ទទួលបន្ទុកបញ្ហាមនុស្សធម៌ បាននិយាយកាលពីថ្ងៃអង្គារ (២៣ មេសា) ថាអ៊ីស្រាអែល បានចាត់វិធានការសំខាន់ៗក្នុងប៉ុន្មានសប្តាហ៍ថ្មីៗនេះលើការអនុញ្ញាតឱ្យផ្តល់ជំនួយចូលទៅក្នុងតំបន់ហ្កាហ្សា ប៉ុន្តែការងារសន្ធឹកសន្ធាប់នៅតែត្រូវធ្វើដដែលដោយសារហានិភ័យនៃគ្រោះទុរ្ភិក្សនៅក្នុងតំបន់ហ៊ុមព័ទ្ធនេះមានកម្រិតខ្ពស់ខ្លាំង។លោក ដេវីដ សាធើហ្វីល (David Satterfield) បានបដិសេធមិននិយាយថាតើទីក្រុងវ៉ាស៊ីន តោនពេញចិត្តនឹងចំណាត់ការរបស់អ៊ីស្រាអែល ដែរឬយ៉ាងណា ប៉ុន្មានសប្តាហ៍បន្ទាប់ពីប្រធានាធិបតីសហរដ្ឋអាមេរិក ចូ បៃដិន (Joe Biden) បានទាមទារឱ្យមានសកម្មភាពដើម្បីកាត់បន្ថយវិបត្តិមនុស្សធម៌នៅហ្កាហ្សា ដោយនិយាយថាលក្ខខណ្ឌអាចត្រូវបានដាក់លើការគាំទ្ររបស់សហរដ្ឋអាមេរិក សម្រាប់អ៊ីស្រាអែល ប្រសិនបើខ្លួនមិនអនុវត្តជាបន្តបន្ទាប់នូវ «ជំហានជាក់លាក់ ជាក់ស្តែង និងអាចវាស់វែងបាន» សម្រាប់ដោះស្រាយវិបត្តិ។លោក សាធើហ្វីល និយាយថា ហានិភ័យនៃគ្រោះទុរភិក្សនៅទូទាំងតំបន់ហ្កាហ្សា ដែលបំផ្លិចបំផ្លាញដោយសង្រ្គាម ជាពិសេសនៅភាគខាងជើងគឺ «ខ្ពស់ខ្លាំងណាស់» ហើយលោកបានអំពាវនាវឱ្យប្រឹងប្រែងបន្ថែមទៀតដើម្បីផ្ដល់ជំនួយដល់អ្នកដែលត្រូវការនៅក្នុងផ្នែកនោះនៃទឹកដីប៉ាឡេស្ទីនដ៏តូចចង្អៀត និងមានប្រជាជនរស់នៅក្រាស់ក្រែលមួយនេះ។អង្គការសហប្រជាជាតិ បានត្អូញត្អែរពីឧបសគ្គជាច្រើនក្នុងការទទួលបានជំនួយ និងចែកចាយនៅទូទាំងតំបន់ហ្កាហ្សា ក្នុងរយៈពេលប្រាំមួយខែ ចាប់តាំងពីអ៊ីស្រាអែល បានចាប់ផ្តើមការវាយលុកតាមអាកាស និងជើងគោកប្រឆាំងនឹងក្រុមសកម្មប្រយុទ្ធអ៊ីស្លាមនិយមហាម៉ាស៕

ក្រុមហេសបូឡានៅលីបង់ បើកការវាយប្រហារចូលទៅក្នុងអ៊ីស្រាអែល យ៉ាងជ្រៅបំផុត ចាប់តាំងពីសង្រ្គាមហ្កាហ្សាចាប់ផ្តើម

ក្រុមហេសបូឡាដែលគាំទ្រដោយអ៊ីរ៉ង់នៅប្រទេសលីបង់ បាននិយាយកាលពីថ្ងៃអង្គារថា ខ្លួនបានបើកការវាយប្រហារដោយយានដ្រូនប្រឆាំងនឹងមូលដ្ឋានយោធាអ៊ីស្រាអែលភាគខាងជើងនៃទីក្រុង Acre ជាការវាយប្រហាររបស់ខ្លួន ចូលទៅក្នុងទឹកដីអ៊ីស្រាអែលយ៉ាងជ្រៅបំផុត ចាប់តាំងពីសង្គ្រាមហ្កាហ្សា បានចាប់ ផ្តើម។យោធាអ៊ីស្រាអែល បានអះអាងថា ខ្លួនមិនបានដឹងពីកន្លែងណាមួយរបស់ខ្លួនដែលត្រូវបានវាយប្រហារដោយក្រុមហេសបូឡានោះទេ ប៉ុន្តែបាននិយាយកាលពីថ្ងៃអង្គារថា ខ្លួនបានស្ទាក់ចាប់ «គោលដៅពីលើអាកាស»ចំនួនពីរ នៅឆ្នេរសមុទ្រភាគខាងជើងនៃប្រទេសអ៊ីស្រាអែល។ភាគីទាំងពីរ បានចូលរួមនៅក្នុងការបាញ់ប្រហារគ្នា និងការវាយប្រហារតាមអាកាសជាប្រចាំ ចាប់តាំងពីការចាប់ផ្តើមនៃសង្គ្រាមនៅតំបន់ហ្កាហ្សា កាលពីខែតុលា ឆ្នាំមុន ប៉ុន្តែបានជៀសវាងពីការរុញច្រានជម្លោះនេះឲ្យទៅជាសង្រ្គាមពេញទំហឹង។ទោះបីជាយ៉ាងណាក៏ដោយ នៅពេលដែលការវាយប្រហារ បានបន្ត ការភ័យខ្លាច បានកើនឡើងថា ឧបទ្ទវហេតុ ឬការប៉ានស្មានខុសទៅលើភាគីណាមួយ អាចមើលឃើញថា ជម្លោះអាចកើនឡើងយ៉ាងឆាប់រហ័ស ដែលអាចអូសទាញដល់មហាអំណាចក្នុងតំបន់ និងពិភពលោកផ្សេងទៀតរួមទាំងសហរដ្ឋអាមេ រិកផងដែរ។ក្រុមហេសបូឡា បានបញ្ជាក់ថា ខ្លួនបានធ្វើសកម្មភាពសងសឹកចំពោះការវាយប្រហាររបស់អ៊ីស្រាអែលមុននេះ ដែលបានសម្លាប់អ្នកប្រយុទ្ធរបស់ខ្លួនម្នាក់។ ក្រុមនេះ បានបោះពុម្ពផ្សាយនូវអ្វីដែលមើលទៅដូចជារូបភាពផ្កាយរណប ជាមួយនឹងទីតាំងនៃការវាយប្រហារដែលកំណត់ដោយពន្លឺដែលមានរង្វង់ពណ៌ក្រហម ព័ទ្ធជុំវិញវា ដែលស្ថិតនៅពាក់កណ្តាលផ្លូវរវាងទីក្រុង Acre និងទីក្រុង Nahariyaya ទៅភាគខាងជើង។ជាការឆ្លើយតប យោធាអ៊ីស្រាអែល បាននិយាយថា យន្តហោះចម្បាំង បានវាយប្រហារគោលដៅយោធានៅភូមិ Ayta ash Shab និង Blida និងនៅតំបន់ Markaba នៅក្នុងប្រទេសលីបង់ភាគខាងត្បូង។

បណ្ដាញសង្គម

ព័ត៌មានថ្មីៗ

ឯកឧត្តម ហ៊ុន ម៉ានី៖ ជាង២ឆ្នាំមកនេះការប្រឡងជ្រើសរើសតាមនិយាមថ្មីដំណើរការបាន ៥៣លើក សម្រាប់១០ក្រសួង-ស្ថាប័ន, មានបេក្ខជនដាក់ពាក្យប្រមាណ ២៩ម៉ឺននាក់ និងជ្រើសរើសបានមន្ត្រីលេចធ្លោ និងពូកែជិត ៨ពាន់នាក់

មូលនិធិគន្ធបុប្ផាកម្ពុជា កោតសរសើរ NOCC ដែលខ្នះខ្នែងក្នុងការងារសប្បុរសធម៌យ៉ាងសកម្ម

Messi ចាត់ទុកបារាំងជាបេក្ខភាពឈានមុខគេដែលអាចឈ្នះជើងឯក World Cup ឆ្នាំនេះ

Carlo Ancelotti៖ ការកោះហៅ Neymar រឺអត់អាស្រ័យលើកាយសម្បទា ទម្រង់លេង មិនមែនមនោសញ្ចេតនា

ទុរេនសំឡូតប្រមូលផលពេញលេញ ចាប់ពីពាក់កណ្ដាលខែមិថុនា ខណៈម្ចាស់ចំការទទូចឱ្យទប់ស្កាត់ការនាំចូល

គណៈកម្មការជំនាញរដ្ឋសភា ជំរុញតុលាការខេត្តកំពង់ស្ពឺ ពន្លឿនការដោះស្រាយ ដើម្បីកាត់បន្ថយការកកស្ទះសំណុំរឿង

កម្ពុជា-អាស៊ែបៃហ្សង់ ពង្រឹងកិច្ចសហប្រតិបត្តិការ លើកកម្ពស់វិស័យសេដ្ឋកិច្ច ពាណិជ្ជកម្ម ថាមពល និងទេសចរណ៍ ដើម្បីពលរដ្ឋទាំងសងខាង និងជាស្ពានភ្ជាប់តំបន់អឺរ៉ុប និងអាស៊ាន

ឃុំ-សង្កាត់ចំនួន ៣០ នៅភ្នំពេញ និងក្រុង-ស្រុកចំនួន ២៧តាមបណ្ដាខេត្ត បានឈ្នះជ័យលាភី «ភូមិ ឃុំ-សង្កាត់មានសុវត្ថិភាព» ឆ្នាំ២០២៦

សម្ដេចធិបតី ហ៊ុន ម៉ាណែត ចាត់ទុកច្បាប់កាតព្វកិច្ចយោធាជាការបណ្តុះស្មារតី និងមនសិការស្នេហាជាតិ ដើម្បីត្រៀមខ្លួនលះបង់បម្រើជាតិមាតុភូមិ

សមត្ថកិច្ចចុះត្រួតពិនិត្យរដ្ឋបាលជនបរទេសនៅក្នុងបុរីពិភពថ្មីកួរស្រូវ២-៣ រកឃើញជនបរទេសស្នាក់នៅខុសច្បាប់ចំនួន ៧៥នាក់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877