នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
កម្ពុជាភ្លាត់ចាញ់សិង្ហបុរីនៅនាទីទីចុងក្រោយ ក្នុងជំនួបបើកឆាកពានរង្វាន់បាល់​ទាត់តំបន់​អាស៊ី​អាគ្នេយ៍ ​(ASEAN Hyundai Cup 2026)
វ័យ ៤០ ឆ្នាំ Luka Modric បន្តកិច្ចសន្យាថ្មីជាមួយ AC Milan មួយឆ្នាំទៀត
Arsenal នាំយកខ្សែប្រយុទ្ធក្រិក Christos Tzolis ពី Club Brugge ក្នុងតម្លៃ ៣៤ លានផោន
មន្រ្តីជាន់ខ្ពស់ក្រសួងអប់រំ៖ ការប្រកួតកីឡាជាតិ-កីឡាជាតិជនពិការ ត្រូវរៀបចំតាមលំនាំហ្គេមស្តង់ដា លើប្រភេទកីឡានីមួយៗ

ព័ត៌មានកីឡា

ទោះ MPL រដូវកាលនេះ មិនសូវមានតុល្យភាពរវាងក្រុមខ្លាំង និងខ្សោយ តែ CFU តែងគោរពគូប្រកួតជានិច្ច

2026/04/27 05:36:14 pm        159
Facebook Telegram Linkin
ឆ្លងកាត់ការប្រកួត ៣សប្ដាហ៍ សម្រាប់វគ្គ Regular ក្នុងព្រឹត្តិការណ៍ MPL Cambodia រដូវកាលទី១០ ឆ្នាំ២០២៦ កីឡាករ ញ៉ែម ចន្ទ័ដាវណ្ណ នៃក្រុមការពារជើងឯក CFU Gaming បានមើលឃើញកម្រិតលេងរវាងក្រុមខ្លាំង និងក្រុមខ្សោយ ហាក់មិនសូវមានតុល្យភាព តែបែបនេះក្ដី ក៏គេនៅតែគោរពគូប្រកួតជានិច្ច មិនថាជួបក្រុមកម្រិតណាឡើយ។បន្ទាប់ពីជួយក្រុមបន្ដយកឈ្នះក្រុម See You Soon កាលពីថ្ងៃអាទិត្យកន្លងទៅ កីឡាករមានបទពិសោធន៍ជោគជ័យ ទាំងការប្រកួតក្នុង និងក្រៅស្រុករូបនេះ ថា ក្រុមខ្លាំងពិតជាខ្លាំង ហើយក្រុមខ្សោយ ហាក់នៅមានកម្រិត លេងមិនសូវស្មាដៃគ្នា ។ យ៉ាងណារាល់ការប្រកួត ក្រុមខ្លួនតែងលេងដោយការគោរព ជាមួយការប្រុងប្រយ័ត្នជានិច្ច ដើម្បីទទួលបានជ័យជម្នះ និងឈានទៅវគ្គបន្ដ។គួរដឹងថា គិតត្រឹមសប្ដាហ៍ទី៣ នៃវគ្គ Regular Season ក្នុងព្រឹត្តិការណ៍ MPL Cambodia រដូវកាលនេះ គេឃើញក្រុមមួយចំនួន បានកក់កៅអីវគ្គបន្ដជាបណ្ដើរ ជាក់ស្ដែងក្រុមខ្លាំង Pro Esports ដែលឈ្នះ ៦ប្រកួតជាប់គ្នា បានកក់កៅអី Play-Off មុនគេ គ្រាដែលក្រុមជើងឯកឆ្នាំចាស់ CFU Gaming កំពុងឈរលេខ៣ ជាមួយកំណត់ត្រាប្រកួត ៦លើកឈ្នះ ៤ និងចាញ់ ២ ក្រោមក្រុម Valhalla ដែលប្រកួត ៥លើកឈ្នះ ៤ និងចាញ់ ១។ យ៉ាងណាក្រុមនីមួយៗ ក្រុមខ្លះសល់ ៣ប្រកួត ហើយក្រុមខ្លះសល់ ៤ប្រកួតក្នុងដៃ ដែលកំពុងប្រកួតប្រជែងជុំបន្ដផងដែរ៕ អត្ថបទ លី ឈុនឡា 

កីឡា ២ប្រភេទមកដល់មាតុភូមិវិញ អមមមេដាយប្រាក់ ១ ក្រោយ​ចប់ភារកិច្ច​ក្នុង​កីឡាលើ​ឆ្នេរ​ខ្សាច់​អាស៊ី នៅចិន

2026/04/27 05:19:54 pm        105
Facebook Telegram Linkin
ប្រតិភូ និងអត្តពលិកកីឡាទ្រីយ៉ាត្លុង និងកីឡាជឺជីតស៊ូ បានត្រឡប់មកដល់មាតុភូមិវិញហើយ ក្រោយ​បញ្ចប់ភារកិច្ចរបស់ខ្លួន នៅក្នុងព្រឹត្តិការណ៍ប្រកួតកីឡាលើឆ្នេរខ្សាច់អាស៊ី លើកទី៦ នៅ​ទីក្រុង Sanya ប្រទេសចិន កាលពីថ្មីៗ ដោយនាំមកនូវមេដាយប្រាក់ ១គ្រឿងជូនជាតិមាតុភូមិ ដោយ​កីឡាការិនីទ្រីយ៉ាត្លុង ម៉ាហ្គត មរកត ហ្គារ៉ាប៊ីឌៀន។ដំណើរវិលត្រឡប់របស់ប្រតិភូកីឡាកម្ពុជាទាំង ២ប្រភេទ ដឹកនាំដោយឯកឧត្តម ប៉ុន សុខ អគ្គ​នាយក​ នៃអគ្គនាយកដ្ឋានកីឡា ដែលជាអនុប្រធានប្រតិភូ និងមានការ​ទទួល​ស្វាគមន៍​ពី​មន្ដ្រី​នៃ​ក្រសួង​អប់រំ យុវជន និងកីឡា ព្រមទាំងថ្នាក់ដឹកនាំសហព័ន្ធជាតិពាក់ព័ន្ធផងដែរ កាលពីល្ងាចថ្ងៃទី២៦ ខែមេសា ឆ្នាំ២០២៦ នៅអាកាសយានដ្ឋានអន្ដរជាតិតេជោ។ឆ្លៀតឱកាសនោះ លោក ងិន សុបញ្ញា អគ្គលេខាធិការសហព័ន្ធកីឡាទ្រីយ៉ាត្លុងកម្ពុជា បានបង្ហាញមោទនភាព ក្នុងនាមសហព័ន្ធ សម្រាប់ការដណ្ដើមបានមេដាយប្រាក់ ១គ្រឿងជូនជាតិ ដោយកីឡាការិនីខ្មែរ-បារាំង ម៉ាហ្គត មរកត ហ្គារ៉ាប៊ីឌៀន ។ នេះជាលើកដំបូង ដែលកីឡាទ្រីយ៉ាត្លុងបានចូលរួមព្រឹត្តិការណ៍កម្រិតទ្វីបនេះ ហើយក៏ជាផលល្អសម្រាប់ការត្រៀមលក្ខណៈចូលរួមប្រកួតកីឡាអាស៊ី នៅប្រទេសជប៉ុន នាខែតុលាខាងមុខផងដែរ។ដោយឡែកឯកឧត្តម ថោង បញ្ញាធន ប្រធានសហព័ន្ធកីឡាជឺជីតស៊ូកម្ពុជា បានសម្ដែងការសោកស្ដាយ សម្រាប់បេសកកម្មលើកដំបូង នៃការចូលរួមប្រកួតកីឡាលើឆ្នេរខ្សាច់អាស៊ីនេះ ពុំទទួលបានមេដាយជូនជាតិ តែយ៉ាងណាកម្រិតបច្ចេកទេសកីឡាករ-កីឡាការិនីកម្ពុជា មានការកើនឡើងគួរឲ្យកត់សម្គាល់ ដ្បិតមានឈ្នះ មានចាញ់ ហើយក៏បានជួបម្ចាស់មេដាយកម្រិតពិភពលោក។ ឯកឧត្តមរំពឹងអត្តពលិករបស់ខ្លួន នឹងយកបទពិសោធន៍ទាំងអស់នេះ មកដុសខាត និងពង្រឹងសមត្ថភាពបន្ថែមទៀត សម្រាប់ត្រៀមការប្រកួតអន្ដរជាតិជាបន្ដបន្ទាប់ ពិសេសការចូលរួមប្រកួតលើកក្រោយៗ ដើម្បីប្រជែងមេដាយជូនជាតិ។សូមរំឮកថា កម្ពុជាបានបញ្ជូនអត្តពលិក ៤ប្រភេទកីឡាប៉ុណ្ណោះ ចូលរួមព្រឹត្តិការណ៍កីឡាលើឆ្នេរខ្សាច់អាស៊ី លើកទី៦ នៅទីក្រុង Sanya ប្រទេសចិន ដែលប្រព្រឹត្តទៅពីថ្ងៃទី២២ ដល់ថ្ងៃទី៣០ ខែមេសា ឆ្នាំ២០២៦ ក្នុងនោះកីឡា ៣ប្រភេទបានបញ្ចប់ការប្រកួតរបស់ខ្លួន ហើយមាន ២ប្រភេទបានត្រឡប់មកដល់មាតុភូមិវិញហើយ រួមមានកីឡាជឺជីតស៊ូ និងកីឡាទ្រីយ៉ាងត្លុង ។ រីឯកីឡាបាល់ទាត់លើតុ បានបញ្ចប់ការប្រកួត តែនៅរង់ចាំទទួលមេដាយសំរឹទ្ធ ដែលខ្លួនទទួលបានលើវិញ្ញាសានារី ២នាក់ ទល់ ២នាក់។ ចំណែកកីឡាចំបាប់ គ្រោងនឹងធ្វើការប្រកួតនៅថ្ងៃទី២៨-២៩ ខែមេសានេះ៕ អត្ថបទ លី ឈុនឡា 

សាមគ្គីភាពជាតិរឹងមាំនឹងក្លាយជាប្រធានបទ ដើម្បីបំផុសស្មារតីយុវជនក្នុងពាន Soccer League លើកទី៩

2026/04/24 07:02:12 pm        130
Facebook Telegram Linkin
ការប្រកួតកីឡាបាល់ទាត់ដណ្ដើមពានរង្វាន់ Soccer League រដូវកាលទី៩ នឹងប្រព្រឹត្តទៅ នា​ដើម​ខែ​មិថុនា ឆ្នាំ២០២៦ ខាងមុខ ដោយមានក្រុមបាល់ទាត់បុរស-នារីចូលរួមសរុបចំនួន ៦៣​ក្រុម​។ជាមួយការត្រៀមរៀបចំព្រឹត្តិការណ៍ដ៏ធំប្រចាំឆ្នាំ ក្រោមគំនិត​ផ្ដួច​ផ្ដើម​របស់​ឯកឧត្តម ឧប​នាយក​រដ្ឋមន្ដ្រី ហ៊ុន ម៉ានី ប្រធានសហភាពសហព័ន្ធយុវជនកម្ពុជានេះដែរ ឆ្នាំនេះ គណៈកម្មការរៀបចំ បាន​ជ្រើសរើសយកប្រធានបទដ៏សំខាន់មួយ គឺ «សាមគ្គីភាព ជាតិ​រឹង​មាំ» ​ដើម្បី​បំផុត​ស្មារតី​យុវជន​ចូល​រួម​លើសពីការលេងកីឡា តែដើម្បីបំផុសស្មារតីសាមគ្គីភាពក្នុងស្រទាប់យុវជន និង​ប្រជា​ពលរដ្ឋ​ទូទាំងប្រទេស ដើម្បីពង្រឹងនូវខឿនការពារជាតិដ៏រឹងមាំ។ឯកឧត្តម ខៀវ ភារិទ្ធ ប្រធានគណៈកម្មការប្រតិបត្តិរៀបចំការប្រកួត បានឲ្យដឹងថា រយៈពេលជិត ១០​ឆ្នាំ នៃដំណើរការប្រកួតពានរង្វាន់ Soccer League បានក្លាយជាគ្រួសារមួយ និង​ជា​វេទិកា​មួយ​ ដើម្បីផ្ដល់ឱកាសដល់យុវជនជាច្រើន បានចូលរួមបង្ហាញសមត្ថភាព ដើម្បីឈាន​ទៅ​រក​ចាប់​ក្ដី​ស្រម៉ៃ​ក្លាយ​ជាកីឡាករអាជីព ពោលគឺជាព្រឹត្តិការណ៍ដ៏ធំនេះ ដែលបានរួមចំណែក​ជួយ​ដល់​សង្គម​ជាតិ​ ទាំងក្នុងវិស័យកីឡាបាល់ទាត់ និងការបណ្ដុះធនធាន​មនុស្ស​ក្លាយ​ជា​ទំពាំង​ស្នងឫស្សី​ដ៏ល្អ​។ ហេតុនេះ ទើបឆ្នាំនេះ គណៈកម្មការសម្រេចនឹងរៀបចំដ៏អស្ចារ្យមួយ ក្រោម​ប្រធាន​បទ ​«សាមគ្គីភាពជាតិនឹងរឹងមាំ»។គួរដឹងថា យោងតាមសេចក្ដីជូនដំណឹងរបស់សហភាពសហព័ន្ធយុវជនកម្ពុជា កាលពីថ្មីៗ សម្រាប់​​រដូវ​កាលទី៩ នៃការប្រកួតពានរង្វាន់ Soccer League ឆ្នាំនេះ គ្រោងនឹង​ប្រព្រឹត្ត​ទៅ​ពី​ថ្ងៃ​ទី​៦ ​ខែមិថុនា ដល់ថ្ងៃទី៣១ ខែកក្កដា ឆ្នាំ២០២៦ ។ ចំពោះបេក្ខភាពចូលរួមការប្រកួតឆ្នាំនេះដែរ សម្រាប់​ផ្នែកបុរស គឺមាន ៥៥ក្រុមចូលរួម និងផ្នែកនារី មាន ៨ក្រុមចូលរួម។សម្រាប់​ប្រាក់​រង្វាន់ជ័យលាភី ក្រុមជើងឯកផ្នែកបុរស នឹងទទួលបានពាន អមប្រាក់រង្វាន់ ២៥​លាន​រៀល​, លេខ២ ទទួលបាន ១០លានរៀល និងលេខ៣ ទទួលបាន ៥លានរៀល ។ រីឯ​ផ្នែក​នារី ​ក្រុមជើងឯក ទទួលបាន ១០លានរៀល, លេខ២ ទទួលបាន ៥លានរៀល និងលេខ៣ ទទួល​បាន ៣លានរៀល ។ ក្រៅពីនេះ ក៏មានប្រាក់រង្វាន់ក្រុម Fair-Play និង​ពាន​រង្វាន់​ឯកត្តជន​ជា​ច្រើន​ផងដែរ។សូមរំឮកផងដែរថា កាលពីឆ្នាំ២០២៥ ព្រឹត្តិការណ៍បាល់ទាត់ Soccer League ​លើក​ទី៨​ ​គឺ​មាន​ក្រុម​បាល់​ទាត់ចូលរួមសរុប ៦៣ក្រុមដូចគ្នា ក្នុងនោះមានក្រុមបុរស ៥៦ក្រុម និងនារី ៧ក្រុម ។ ជា​លទ្ធផលក្រុមបាល់ទាត់អាណាចក្របៃតង់ បានគ្រងជើងឯកផ្នែកបុរស និង​ក្រុម​បាល់​ទាត់​សូភី​ណា​អេហ្វស៊ី បានគ្រងជើងឯកផ្នែកនារី៕ អត្ថបទ លី ឈុនឡា

ឯកសណ្ឋានផ្លូវការប្រតិភូកីឡាឆ្នេរខ្សាច់កម្ពុជា ត្រូវបានប្រើប្រាស់ធម្មតា ក្នុងព្រឹត្តិការណ៍​កម្រិត​ទ្វីប នៅចិន

2026/04/24 06:33:33 pm        265
Facebook Telegram Linkin
សម្លៀកបំពាក់ ឬឯកសណ្ឋានផ្លូវការរបស់ប្រតិភូកីឡាឆ្នេរខ្សាច់កម្ពុជា ដែលដូចគ្នា​ទៅ​នឹង​ឯក​សណ្ឋាន​ធ្លាប់​បានប្រើប្រាស់ក្នុងព្រឹត្តិការណ៍ស៊ីហ្គេម លើកទី៣៣ ឆ្នាំ២០២៥ ត្រូវបាន​ប្រើ​ប្រាស់​ជា​ធម្មតា​ក្នុងព្រឹត្តិការណ៍កីឡាលើឆ្នេរខ្សាច់អាស៊ី (Asian Beach Games) លើកទី៦ ដែល​កំពុង​ប្រព្រឹត្ត​ទៅនាទីក្រុង Sanya សាធារណរដ្ឋប្រជាមានិតចិន។ឯកឧត្តម វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គ​លេខា​ធិការ​គណៈ​កម្មាធិ​ការ​ជាតិអូឡាំពិកកម្ពុជា(NOCC) ដែលកំពុងដឹកនាំប្រតិភូកីឡា ៤ប្រភេទ​ចូល​រួម​ព្រឹត្តិការណ៍​កម្រិត​ទ្វីបនេះ បានឲ្យដឹងថា ចំពោះអាវ ឬឯកសណ្ឋាន ដែលប្រតិភូកីឡាកម្ពុជា កំពុង​ប្រើប្រាស់ចូលរួមព្រឹត្តិការណ៍កីឡាលើឆ្នេរខ្សាច់អាស៊ីនេះ មិនមានបញ្ហាអ្វីនោះទេ ព្រោះ​កម្ពុជា​ បានគោរពត្រឹមត្រូវតាមគោលការណ៍របស់ក្រុមប្រឹក្សាអូឡាំពិកអាស៊ី និងគោល​ការណ៍​របស់​គណៈកម្មការរៀបចំការប្រកួត។ទោះបីមានការកំណត់ទំហំផ្សេងៗ ដែលកម្ពុជា ក្នុងនាមសមាជិកក្រុមប្រឹក្សាអូឡាំពិកអាស៊ី បាន​គោរព​ត្រឹម​ត្រូវ ហើយរឿងដៃគូឧបត្ថម្ភ ឬ Sponsor មានប្រភពមកពីណា គេអត់គិតនោះទេ ហើយ​ក៏​មិនអាស្រ័យទៅលើច្បាប់របស់ម្ចាស់ផ្ទះដែរ គឺអាស្រ័យលើ​គណៈកម្មាធិការ​ជាតិ​អូឡាំពិក​ប្រទេស​នីមួយៗ ក្នុងការជ្រើសរើស Sponsor មក។ ជារួមសម្លៀកបំពាក់ដូចគ្នានឹងស៊ីហ្គេម ដែល​ប្រតិភូ​កីឡាឆ្នេរខ្សាច់កម្ពុជា កំពុងប្រើប្រាស់ក្នុងបេសកកម្មពេលនេះ មិនមានបញ្ហាអ្វីឡើយ ពោល​គឺ​គោរពបានត្រឹមត្រូវទៅតាមច្បាប់ទម្លាប់ការប្រកួត នៃព្រឹត្តិការណ៍កីឡាលើឆ្នេរខ្សាច់អាស៊ី។ក្រឡេកទៅការទទួលបដិសណ្ឋារកិច្ច ក៏ដូចជាពិធីការផ្សេងៗ ទាំងការស្នាក់នៅ ហូបចុក ជាដើម ប្រតិភូ​កីឡាកម្ពុជា បានទទួលការស្វាគមន៍យ៉ាងកក់ក្ដៅ ពីម្ចាស់ផ្ទះ ក្នុងនាម​ប្រទេស​មាន​បទ​ពិសោធន៍​រៀប​ចំព្រឹត្តិការណ៍ធំៗជាច្រើន រួមទាំងកីឡាអូឡាំពិកផងដែរ ដែលធ្វើឲ្យអត្ត​ពលិក​គ្រប់​បណ្ដា​ប្រទេស​ ពិសេសកីឡាករ-កីឡាការិនីកម្ពុជា បាននឹងកំពុងហ្វឹកហាត់ និងត្រៀមខ្លួន​ធ្វើ​ការ​ប្រកួត​ដោយ​ទំនុកចិត្តជាបន្ដបន្ទាប់ តាមកាលវិភាគប្រកួតរបស់ប្រភេទកីឡានីមួយៗ។ នេះ​បើ​តាម​​ការបញ្ជាក់បន្ថែមរបស់ឯកឧត្តម វ៉ាត់ ចំរើន។គួរដឹងថា បេសកកម្មចូលរួមប្រកួតកីឡាលើឆ្នេរខ្សាច់អាស៊ី លើកទី៦ កម្ពុជា បានប​ញ្ជូន​ប្រតិភូ​កីឡា​ត្រឹម​ ៤ប្រភេទកីឡាចូលរួម រួមមានកីឡាចំបាប់ ជឺជីតស៊ូ ទ្រីយ៉ាត្លុង និងកីឡាបាល់​ទាត់​លើ​តុ ​ដែល​ជា​បេសកកម្មទ្រង់ទ្រាយតូច បើធៀបនឹងការចូលរួមលើកមុន ដើម្បីចូលរួម​ចំណែក​ជាមួយ​រាជ​រដ្ឋាភិបាល ក្នុងការកាត់បន្ថយការចំណាយ ក្នុងកាលៈ​ទេសៈ​សេដ្ឋកិច្ច​សកល​មិន​សូវ​អំណោយ​ផល ដើម្បីរក្សាបាននូវសិទ្ធិជាសមាជិកភាពរបស់ចលនាអូឡាំពិកអាស៊ី ហើយក៏ជា​ឱកាស​ត្រួត​ពិនិត្យលទ្ធភាពក្នុងការចូលរួមព្រឹត្តិការណ៍នេះ នៅ ៤ឆ្នាំក្រោយ ដែលហ្វីលីពីន នឹង​ធ្វើ​ម្ចាស់​ផ្ទះ​ផងដែរ៕ អត្ថបទ លី ឈុនឡា

អាមេរិកមិនបដិសេធការចូលរួម World Cup របស់អ៊ីរ៉ង់ គ្រាន់តែ​ហាម​មនុស្ស​ពាក់ព័ន្ធ​កង​ឆ្មាំ​បដិវដត្តន៍

2026/04/24 06:23:42 pm        154
Facebook Telegram Linkin
រដ្ឋមន្ត្រីការបរទេសអាមេរិក លោក Marco Rubio បាននិយាយនាពេលថ្មីៗនេះថា ទីក្រុង​វ៉ាស៊ីន​តោន មិនមានការជំទាស់ចំពោះអ៊ីរ៉ង់ក្នុងការចូលរួម World Cup ឆ្នាំនេះទេ ប៉ុន្តែ​លោក​បាន​បន្ថែម​ថា កីឡាករ​នឹង​មិន​ត្រូវ​បាន​អនុញ្ញាត​ឱ្យ​នាំមនុស្ស​ដែលមានទំនាក់​ទំនង​ជាមួយ​កង​ឆ្មាំ​បដិវត្តន៍​អ៊ី​ស្លាម​អ៊ីរ៉ង់​មកជាមួយប៉ុណ្ណោះ។ប្រធានាធិបតីអាមេរិកលោក Donald Trump ក៏ធ្លាប់បាននិយាយដែរថា រដ្ឋបាល​របស់​លោក​មិន​ចង់​យក​រឿងនយោបាយនេះមកពាក់ព័ន្ធនឹងអត្តពលិកឡើយ។ការលើកឡើងរបស់លោក Marco Rubio ធ្វើឡើងបន្ទាប់ពីមានសារព័ត៌មាន Financial Times ចុះ​ផ្សាយថា បេសកជនកំពូលរបស់ប្រធានាធិបតីអាមេរិក Donald Trump លោក Paolo Zampolli បានស្នើសុំឱ្យ FIFA ជ្រើសរើស​អ៊ីតាលី​ជំនួស​អ៊ីរ៉ង់​នៅ​ក្នុង​ការ​ប្រកួត​បាល់​ទាត់​ពិភព​លោក​រដូវ​ក្តៅនេះ។រដ្ឋមន្ត្រីការបរទេសអាមេរិកដដែលបន្តថា បញ្ហារបស់អាមេរិកជាមួយអ៊ីរ៉ង់ មិនមែន​ជា​មួយ​អត្ត​ពលិក​ឡើយ ​តែវាអាចនឹងមានបញ្ហាដែរ ប្រសិនបើកីឡាករទាំង​នោះ​មាន​ពាក់​ព័ន្ធ​នឹង​កង​ឆ្មាំ​បដិវត្តន៍​ដែល​អាមេរិកចាត់ទុកថាជាក្រុមភេវរករ នឹងមិនអាចចូលទឹកអាមេរិកបានឡើយ។ Financial Times បានរាយការណ៍ថាប្រទេសអ៊ីរ៉ង់បានចេញសេចក្តីថ្លែងការណ៍មួយថ្មីៗនេះថា អ៊ីរ៉ង់​ត្រៀម​ខ្លួនរួចរាល់សម្រាប់ការចូលរួមប្រកួត តែគេមិនទាន់​ទទួល​បាន​ការ​ផ្ទៀង​ផ្ទាត់​ដោយ​សហព័ន្ធ​បាល់ទា​ត់អ៊ីរ៉ង់ឡើយ។កន្លងមកអ៊ីរ៉ង់ធ្លាប់បានបញ្ជាក់ថា ខ្លួននឹងសម្រេចចិត្ត​លើការ​ចូល​រួមរ​បស់​ក្រុម​ជម្រើស​ជាតិ​ក្នុង​ការ​ប្រកួត ​World Cup នៅពេលទទួលបានការឆ្លើយតបពី FIFA ជុំវិញការផ្លាស់​ប្តូរ​ទីតាំង​នៃ​ការ​ប្រកួត​របស់​ពួកគេពីសហរដ្ឋអាមេរិកទៅកាន់ម៉ិកស៊ិកប៉ុណ្ណោះ៕ អត្ថបទ៖នាង សុភាវុធ

ក្រោយធ្លាក់ទៅលីគទីបីអង់គ្លេសអ្នកគាំទ្រ Leicester City ធ្វើបាតុកម្មប្រឆាំងម្ចាស់ក្លិបជនជាតិថៃ

2026/04/24 05:59:02 pm        391
Facebook Telegram Linkin
“King Power Out” ជាបដារបស់បាតុករដែលជាអ្នកគាំទ្រក្លិបបាល់ទាត់ Leicester City ដាក់នៅពីមុខអំឡុងពេលធ្វើបាតុកម្មប្រឆាំងនឹងការវិនិយោគរបស់ម្ចាស់ក្លិបជនជាតិថៃ។ការប្រឆាំងតវ៉ារបស់អ្នកគាំទ្រធ្វើឡើងបន្ទាប់ពី Leicester City នឹងធ្លាក់ទៅកាន់ក្របខណ្ឌទីបីអង់គ្លេស League One ទោះនៅសល់ ២ ប្រកួតទៀតចប់រដូវកាល។ បរាជ័យមិនមែនជារឿងចម្លែកទេនៅក្នុងវិស័យកីឡា តែការដឹកនាំ ការវិនិយោគដែលគ្មានចក្ខុវិស័យ គ្មានឆន្ទៈ ជាមូលហេតុដែលធ្វើឱ្យក្លិបជួបនឹងបរាជ័យជាបន្តបន្ទាប់។ការចេញមកបាតុកម្មររបសអ្នកគាំទ្រ មិនមែនមិនពេញចិត្តតែនឹងលទ្ធផលប៉ុណ្ណោះទេ ការវិនិយោគរបស់អ្នកជំនួះញថៃ Aiyawatt Srivaddhanaprabha បានធ្វើឱ្យក្លិបមិនមានលំនឹងហិរញ្ញវត្ថុ និងទាញឱ្យក្លិបធ្លាក់ផុងជ្រៅដល់លីគទីបី ផ្ទុយពីពេលឪពុកដឹកនាំគឺលោក Vichai Srivaddhanaprabha ដែលស្លាប់ដោយសារធ្លាក់ឧទ្ធម្ភាចក្រកាលពីឆ្នាំ ២០១៨ ពីរឆ្នាំបន្ទាប់ពី Leicester City ឈ្នះជើងឯក Premier League លើកដំបូងជាប្រវត្តិសាស្រ្ត។ Aiyawatt ក៏ធ្លាប់បានយករឿងនយោបាយប្រទេសរបស់ខ្លួន ទៅឡូកឡំនឹងកីឡាផងដែរអំឡុងសង្គ្រាមឈ្លានពានរបស់ថៃលើកម្ពុជា និងយកពាក្យភូតកុហកទៅឱ្យពិភពលោកមើលថាខ្លួនជាអ្នករងគ្រោះ ដោយសរសេរពាក្យ #TruthFromThailand នៅក្នុងអាក្រក់យក្សក្នុងកីឡដ្ឋាន។ កម្មពារមានពិតមិនចាំជាតិក្រោយ បរាជ័យ ភាពដុនដាបរបស់អ្នកជំនួញថៃរូបនេះបានធ្វើឱ្យ Leicester City រងបរាជ័យហៅមិនលឺផ្ទុយពីឆ្ទៈឪពុក។ បញ្ហាធំបំផុតរបស់ក្លិបគឺហិរញ្ញវត្ថុ ដោយប្រាក់ចំណូលអនាគតត្រូវបានដាក់បញ្ចាំរួចហើយជាមួយអត្រាការប្រាក់ខ្ពស់ មានន័យថា ម្ចាស់ក្លិបត្រូវតែរកថវិកាថ្មីសម្រាប់ស្ថាបនាក្រុមឡើងវិញក្នុងស្ថានភាពលំបាក។យោងតាមព័ត៌មានពីប្រទេសថៃ ដែលជាប្រភពរបស់ក្រុមហ៊ុន King Power មានសញ្ញាបង្ហាញថា ពួកគេអាចមិនមានសមត្ថភាពគ្រប់គ្រាន់ក្នុងការគាំទ្រហិរញ្ញវត្ថុដល់ក្លិបបន្តទៀតទេ។សំណួរធំមួយដែលកំពុងត្រូវបានលើកឡើងគឺ៖ តើ Leicester City នឹងទៅណាបន្ត? ហើយតើស្ថានភាពអាចកាន់តែអាក្រក់មុននឹងមានការកែលម្អវិញឬទេ?បច្ចុប្បន្ននេះ អនាគតរបស់ក្លិបនៅមិនច្បាស់លាស់ ហើយការស្ដារឡើងវិញនឹងត្រូវការពេលវេលា ការគ្រប់គ្រងល្អ និងការវិនិយោគយ៉ាងប្រុងប្រយ័ត្ន៕ អត្ថបទ៖នាង សុភាវុធ

Lamine Yamal ត្រូវអវត្តមានដល់ចប់រដូវកាលដោយសាររបួសតែនឹងជាទាន់ World Cup

2026/04/24 05:19:21 pm        138
Facebook Telegram Linkin
ខ្សែប្រយុទ្ធស្លាបអេស្ប៉ាញ Lamine Yamal នឹងត្រូវអវត្តមានពី Barcelona រហូត​ដល់​ចប់​រដូវកាល​តែរំពឹងថានឹងជាទាន់ World Cup។កីឡាករវ័យ ១៨ ឆ្នាំរូបនេះ មានបញ្ហាសរសៃរពួរជើងខាងឆ្វេង អំឡុងពេលស៊ុតបាល់ពិន័យ ១១ ម៉ែត្រ​ឱ្យ Barcelona យកឈ្នះ Celta Vigo ១-០ កាលពីយប់ថ្ងៃពុធកន្លងទៅ។ Lamine Yamal ជាអ្នកស៊ុតសម្រេចគ្រាប់បាល់ ១១ ម៉ែត្រនោះនៅនាទីទី ៤០ តែភ្លាម​ៗ​ក្រោយ​ទាត់​ក៏​បាន​បង្ហាញអាការៈឈឺចុងចាប់ និងសុំធ្វើការផ្លាស់ប្តូរចេញ។ Barcelona បានបញ្ជាក់ក្នុងសេចក្តីថ្លែងការរបស់ខ្លួនថា ក្លិបកំពុងតាមដានស្ថានភាពរបួសរបស់ Yamal និងច្បាស់ណាស់ថាកីឡាករវ័យ ១៨ ឆ្នាំរូបនេះ នឹង​អវត្ត​មាន​ពី​ការ​ប្រកួត​ដែល​នៅ​សេស​សល់​របស់​ក្លិប។ គ្រាប់បាល់ជ័យជំនះរបស់ Lamine Yamal លើ Celta Vigo ធ្វើឱ្យ Barcelona ពន្លាតការ​នាំ​មុខ​នៅ ​La Liga ដល់ ៩ ពិន្ទុពីក្រុមលេខ ២ Real Madrid ដែលនឹងត្រូវជួបគ្នានៅថ្ងៃទី ១០ ខែ​ក្រោយ​នេះ​។ របួសរបស់ Lamine Yamal ត្រូវបានគេរំពឹងថានឹងជាទាន់ World Cup ដែល​អេស្ប៉ាញ​ស្ថិត​ក្នុង​ពូល H ត្រូវជួបជាមួយ កាប់វែរ អារ៉ាប៊ីសាអ៊ូឌីត និងអ៊ុយរូហ្កាយ៕ អត្ថបទ៖នាង សុភាវុធ

Manchester City ឡើងកំពូលតារាងវិញខណៈ Burnley ត្រូវកាត់ចេញ

2026/04/23 11:46:31 pm        184
Facebook Telegram Linkin
ក្រុមបាល់ទាត់ Manchester City បានបន្តដំណើរស្វែងរកជើងឯកលីគកំពូលអង់គ្លេសលើកទី​ ១១ របស់ខ្លួនជាមួយនឹងជ័យជំនះឡើងមកឈរលេខ ១ វិញ ខណៈ Burnley ត្រូវកាត់ចេញ។ក្រុមរបស់លោក Pep Guardiola ចាប់ផ្តើមមានទម្រង់លេងល្អចំពេញ Arsenal ធ្លាក់ចុះទម្រង់លេងរបូតការនាំមុខដាច់ ៩ រហូតស្មើគ្នា។ ក្រុមរបស់លោក Pep Guardiola ដឹងច្បាស់ថា ជ័យជំនះនៅកីឡដ្ឋាន Turf Moor នឹងធានាបានកៅអីកំពូលតារាង ហើយជាក់ស្តែងពួកគេពិតជាធ្វើឱ្យខណៈគ្រាប់ជ័យជំនះ ១-០ សម្រេចបានដោយកីឡាករកំពុងនាំមុខក្នុងតារាងអ្នកស៊ុតបញ្ចូលទីច្រើនជាងគេរដូវកាលនេះ Erling Haaland តាំងពីនាទីទី ៥។ ជ័យជំនះជារឿងល្អសម្រាប់ City តែបរាជ័យបានធ្វើឱ្យ Burnley ធានាបានការកាត់ចេញពី Premier League ហើយបន្ទាប់ពី Wolverhampton។ ក្រោយ ៣៣ ប្រកួតនៅពេលនេះ Manchester City និង Arsenal កំពុងមាន ៧០ ពិន្ទុស្មើគ្នាតែ City នៅពីលើដោយមានគ្រាប់បាល់ស៊ុតបញ្ចូលទីគូប្រកួតច្រើនជាង។ នៅសល់ ៥ ប្រកួតទៀត Manchester City ជួប៖ Everton(ក្រៅដី) Brentford(ក្នុងដី) Bournemouth(ក្រៅដី) Crystal Palace(ក្នុងដី) និង Aston Villa(ក្នុងដី)។ចំណែក Arsenal ៥ ប្រកួតចុងក្រោយត្រូវជួប៖ Newcastle(ក្នុងដី) Fulham(ក្នុងដី) West Ham(ក្រៅដី) Burnley(ក្នុងដី) និង Crystal Palace(ក្រៅដី)៕ អត្ថបទ៖នាង សុភាវុធ

លោក McConkey ថា កូនក្រុមធ្វើបានល្អ ទោះលទ្ធផលមិនតាមការចង់បាន

2026/04/23 11:35:51 pm        251
Facebook Telegram Linkin
ក្រុមព្រះខ័នរាជស្វាយរៀង បានបញ្ចប់យុទ្ធនាការប្រកួតជើងឯកក្លិបបាល់ទាត់អាស៊ីអាគ្នេយ៍ ឆ្នាំ២០២៥/២៦ ជាផ្លូវការ ក្រោយជំនួបទល់ក្រុម Bangkok United របស់ថៃ បញ្ចប់ដោយលទ្ធផលស្មើគ្នា ១-១នៅទីក្រុងហាណូយ ប្រទេសវៀតណាម កាលពីរាត្រីថ្ងៃពុធកន្លងទៅ ដែលនាំឲ្យក្រុមជើងឯកលីគកំពូលកម្ពុជា រក្សាតំណែងលេខ៣ ក្នុងពូលB បន្ទាប់ពីក្រុមកំពូលតារាង Nam Dinh របស់វៀតណាម និងក្រុម Johor Darul Ta’zim របស់ម៉ាឡេស៊ី ដែលឈរលេខ២ ក្នុងពូលB។ជំនួបបង្គ្រប់កិច្ច លើទឹកដីកណ្ដាលនេះ កីឡាករ សារ៉េត គ្រីយ៉ា បានវាយបករកបានគ្រាប់តាមស្មើ នៅនាទី៤៥+១ បន្ទាប់ពីត្រូវគូប្រជែងនាំមុខ តាំងពីនាទី១៦ ហើយលទ្ធផលនេះ ក៏បានរក្សាដល់ចប់ការប្រកួតពេញម៉ោង។ បែបនេះក្ដី ក្រោយចប់ការប្រកួតលោក McConkey Mattew ថា កូនក្រុមពិតជាធ្វើបានល្អ ទោះបីលទ្ធផលមិនតាមការចង់បានក៏ដោយ។លោក McConkey ថា ការប្រកួតនេះ ក្រុមខ្លួនបានបង្កើតឱកាសជាច្រើន ពិសេសការដាក់សម្ពាធនៅវគ្គទី១ តែសោកស្ដាយកូនក្រុមមិនអាចក្ដោបឱកាសល្អទាំងនោះបាន។ យ៉ាងណាបេសកកម្មនេះ មិនអាក្រក់ពេលនោះទេ ពោលគឺព្រះខ័នរាជស្វាយរៀង ចាញ់តែ ១ប្រកួតប៉ុណ្ណោះ ដែលបង្ហាញពីកម្រិតលេងរបស់ក្រុម មិនមានគម្លាតឆ្ងាយពីក្រុមផ្សេងពេកនោះទេ។ដោយឡែកកីឡាករ សារ៉េត គ្រីយ៉ា បានលើកឡើងស្រដៀងគ្នាថា ជំនួបបញ្ចប់យុទ្ធនាការប្រកួតជើងឯកក្លិបអាស៊ាននេះ ក្រុមខ្លួនធ្វើបានល្អ ទោះលទ្ធផលមិនតាមការចង់បាន។ តែអ្វីដែលសោកស្ដាយ គឺក្រុមមិនអាចឡើងទៅវគ្គបន្ដ តាមការគ្រោងទុក។ បែននេះក្ដី គ្រីយ៉ា ថា សមិទ្ធផលនៃការប្រកួតឆ្នាំនេះ បានបង្ហាញពីកម្រិតលេងរបស់ព្រះខ័នរាជស្វាយរៀង មិននៅឆ្ងាយពីបណ្ដាក្លិបខ្លាំងៗក្នុងតំបន់ឡើយ។គួរដឹងថា ឆ្លងកាត់ ៥ប្រកួតក្នុងការប្រកួតជើងឯកក្លិបបាល់ទាត់អាស៊ីអាគ្នេយ៍ ឆ្នាំ២០២៥/២៦ ព្រះខ័នរាជស្វាយរៀង រកបាន ៨ពិន្ទុ ជាមួយលទ្ធផលឈ្នះ ២ ស្មើ ២ និងចាញ់ ១ រួមមានឈ្នះក្រុមមីយ៉ាន់ម៉ា Shan United ៣-០ និងឈ្នះក្រុម Lion City របស់សិង្ហបុរី ២-០ ហើយស្មើក្រុម Johor Darul Ta’zim ២-២ មុនស្មើ Bangkok United ១-១ និងចាញ់ ១ប្រកួតទល់ក្រុមខ្លាំង Dam Dinh ក្នុងលទ្ធផល ២-១៕ អត្ថបទ លី ឈុនឡា

វិសាខា ចំណេញ ៣គ្រាប់ មុនធ្វើដំណើរទៅជួប ISI កាត់ក្ដីក្រុមឡើងវគ្គផ្ដាច់ព្រ័ត្រ Hun Sen Cup 2025/26

2026/04/23 11:23:58 pm        381
Facebook Telegram Linkin
ក្រុមវិសាខា បានចំណេញ ៣គ្រាប់ក្នុងដៃ ក្រោយជំនួបជើងទី១ ក្នុងវគ្គពាក់កណ្ដាលផ្ដាច់ព្រ័ត្រ នៃ​ពានរង្វាន់សម្ដេចអគ្គមហាសេនាបតីតេជោ ហ៊ុន សែន លើកទី១៩ ឆ្នាំ២០២៥/២៦ (ថ្នាក់ជាតិ) ដែល​បានយកឈ្នះក្រុមភ្ញៀវ ISI ដង្កោសែនជ័យ ៣-០ កាលពីរាត្រីថ្ងៃពុធកន្លងទៅ មុន​ជំនួប​កាត់​សេចក្ដី​ជើង​ទី២ នៅទឹកដីក្រុមដំរីជ័យ នាសប្ដាហ៍ក្រោយ។ជំនួបនៅ​កីឡដ្ឋានវិសាខា ដែលមានអ្នកទស្សនាជាង ៤ពាន់នាក់នេះ វគ្គទី១ ក្រុមម្ចាស់ផ្ទះ បាន​បើក​ការ​នាំមុខ ២-០ ដែលគ្រាប់ទី១ ដោយបានដោយប្រធានក្រុម Jahodinskis Viitalijs ​នៅ​នាទី​២២ និងគ្រាប់ទី២ ជាគ្រាប់ភ្លាត់ចូលទីខ្លួនឯង(Own Goal) ពីខ្សែការពារ Sonokuke Onda ​នៅនាទី៤៥+៤ មុនចូលវគ្គទី២ វិសាខា បន្ថែម ១គ្រាប់ទៀត ដោយខ្សែ​បម្រើ​ទើប​ប្ដូរ​ចូល​បាន ៣៦វិនាទី ឡេង ណូរ៉ា នៅនាទី៦៥។លទ្ធផលនេះ បានផ្ដល់ផលចំណេញច្រើនសម្រាប់អតីតក្រុមជើងឯក ៣សម័យវិសាខា និង​ជា​សម្ពាធ​មួយ​ដ៏ធំ សម្រាប់ក្រុម ISI ដង្កោសែនជ័យ មុនពួកគេត្រូវបើកទ្វារផ្ទះទទួលក្រុមវិសាខា វិញ​ម្ដង ​នាថ្ងៃទី២៩ ខែមេសាខាងមុខ នៅតំបន់វេងស្រេង ។ យ៉ាងណាគេរំពឹងការប្រកួតជើងទី២ ដើម្បី​កាត់​សេចក្ដីក្រុមឡើងវគ្គផ្ដាច់ព្រ័ត្រ នៃពានរង្វាន់សម្ដេចតេជោ ហ៊ុន សែន រវាងក្រុមទាំងពីរ នឹង​ផ្ដល់នូវភាពជក់ចិត្តកាន់តែខ្លាំង ពិសេសក្រុម​ម្ចាស់​ផ្ទះ ​ISI ​ដែល​នឹង​ត្រូវ​សម្រុក​គ្រាប់​បាល់​តាម​ដែល​អាច​ធ្វើបាន ដើម្បីមានឱកាសបង្កើតកំណត់ត្រាថ្មីសម្រាប់ក្លិបបន្ថែមទៀត។ រីឯវិសាខា ក៏​នឹង​ព្យាយាម ​ដើម្បីក្រសោបឱកាសទៅប្រជែងពាននេះផងដែរ៕ អត្ថបទ លី ឈុនឡា

បណ្ដាញសង្គម

ព័ត៌មានថ្មីៗ

គណបក្សប្រជាជនកម្ពុជាខេត្តកំពង់ស្ពឺ ប្រជុំបូកសរុបលទ្ធផលការងារខែកក្កដា ឆ្នាំ២០២៦ និងលើកទិសដៅភារកិច្ចខែបន្ទាប់
07/25/2026 05:07 PM
Facebook Telegram Linkin
ក្រសួងអប់រំ ផ្ដល់ឱកាសឱ្យសិស្សធ្វើទស្សនកិច្ចសិក្សានៅសិង្ហបុរី តាមរយៈកម្មវិធី ME-NISTER
07/25/2026 05:07 PM
Facebook Telegram Linkin
ការ​លាលែងពីតំណែងរបស់​រដ្ឋមន្ត្រីអប់រំឥណ្ឌា គឺ​ជាជ័យជម្នះដ៏ធំ សម្រាប់ក្រុមបាតុករយុវជន
07/25/2026 05:07 PM
Facebook Telegram Linkin
លោក Trump រិះគន់ព័ត៌មានក្លែងក្លាយ និងបង្កឱ្យមានភាពចម្រូងចម្រាស ជុំវិញការបោះឆ្នោតឆ្នាំ២០២៨
07/25/2026 05:07 PM
Facebook Telegram Linkin
មនុស្សយ៉ាង​តិច ៥នាក់ស្លាប់ ក្នុងហេតុការណ៍​បាក់ដី នៅភាគខាងជើងចិន
07/25/2026 05:07 PM
Facebook Telegram Linkin
ម៉ិកស៊ិកនឹងមិន​តប​ត​ពន្ធរបស់លោក Trump ទេ ខណៈ​​ការនាំចេញត្រូវបានការពារដោយ​កិច្ចព្រមព្រៀងពាណិជ្ជកម្ម
07/25/2026 05:07 PM
Facebook Telegram Linkin
កម្មវិធីប្រកួតប្រជែងនិយាយជាសាធារណៈសម្រាប់និស្សិតសាកលវិទ្យាល័យរបស់អង្គភាពអ្នកនាំពាក្យ​រាជរដ្ឋាភិបាល រកឃើញអ្នកទទួលបានជ័យលាភីហើយ
07/25/2026 05:07 PM
Facebook Telegram Linkin
ចិនតវ៉ាប្រឆាំងនឹងទណ្ឌកម្មរបស់សហភាពអឺរ៉ុប លើក្រុមហ៊ុនចិន ពាក់ព័ន្ធនឹង​បញ្ហា​រុស្ស៊ី
07/25/2026 05:07 PM
Facebook Telegram Linkin
មនុស្សជាង ១៦០.០០០នាក់ រត់គេចពីចំហេះព្រៃ នៅប្រទេសបារាំង និងអេស្ប៉ាញ
07/25/2026 05:07 PM
Facebook Telegram Linkin
ប្រទេសចិនជម្លៀសមនុស្សជាង ២០.០០០នាក់ ខណៈព្យុះទីហ្វុង Noul បក់បោក​ជិត​ដល់
07/25/2026 03:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.