BTV NEWS

សេវារថយន្តក្រុងរដ្ឋបានជួយសម្រួលដល់ដំណើរទេសចរក្នុងស្រុកទៅកាន់បណ្ដាខេត្តនានាដោយក្ដីរីករាយ

ភ្ញៀវទេសចរជាតិ និងអន្ដរជាតិជាច្រើនកុះករទស្សនាប្រាសាទអង្គរនៅថ្ងៃភ្ជុំបិណ្ឌ

ក្រសួងទេសចរណ៍ប្រកាសទទួលស្គាល់បញ្ហាប្រឈម បន្តបើកចំហស្តាប់មតិយោបល់ និងជំរុញការអនុវត្តដំណោះស្រាយជាក់ស្តែង

ពិព័រណ៍ទេសចរណ៍នៅអាកាសយានដ្ឋាន TIA ទាក់ទាញចំណាប់អារម្មណ៍ទេសចរណ៍អន្តរជាតិ

វប្បធម៌ និងទេសចរណ៍

រទេះគោខ្មែរ ក្លាយជាយាន្តជំនិះដ៏ពេញនិយម សម្រាប់ភ្ញៀវទេសចរអន្តរជាតិនាពេលបច្ចុប្បន្ន

កំពង់ឆ្នាំង៖ រទេះគោខ្មែរដឹកភ្ញៀវបរទេស ក្នុងឃុំកំពង់ត្រឡាច ស្រុកកំពង់ត្រឡាច ខេត្តកំពង់ឆ្នាំង បាន និងកំពុងក្លាយជាយាន្តជំនិះដ៏ពេញនិយមសម្រាប់ភ្ញៀវទេសចរអន្តរជាតិនាពេលបច្ចុប្បន្ន ។ ការដឹកភ្ញៀវទេសចរអន្តរជាតិនេះ បានចាប់ផ្តើមពេញនិយមឡើងវិញ ក្រោយរាជរដ្ឋាភិបាលកម្ពុជាទប់ស្កាត់ជំងឺកូវីដ១៩បាន១០០%ក្នុងប្រទេស និងនាំអោយភ្ញៀវអន្តរជាតិបានចូលមកជិះរទេះគោខ្មែរ រួមនិងការទស្សនាផ្ទាំងគំនូរបុរាណអាយុជាង៣០០ឆ្នាំ ក្នុងព្រះវិហារវត្តពោធិ៍រុក្ខារាម ហៅវត្តកំពង់ត្រឡាចលើ និងការទស្សនាវាលស្រែ រួមនិងភូមិឋានខ្មែរតាមជនបទ។ប្រជាសហគមន៍អ្នកតាហាង ស្ថិតក្នុងភូមិអ្នកតាហាង ឃុំកំពង់ត្រឡាចក្រោមបានអោយដឹងថា រទេះគោខ្មែរ មាននៅក្នុងសហគមន៍ចំនួន២គឺ សហគមន៍អ្នកតាហាង និងសហគមន៍កំពង់ត្រឡាចលើ ហើយសមាជិកក្នុងសហគមន៍មាន៤៨នាក់ ។ សព្វថ្ងៃក្នុង១ថ្ងៃៗសមាជិកអាចដឹកភ្ញៀវអន្តរជាតិបានចន្លោះពី២ ទៅ៣ជើង ដោយក្នុង១រទេះគោអាចផ្ទុកភ្ញៀវបាន២នាក់ ជិះមើលតាមភូមិឋានរបស់ប្រជាពលរដ្ឋរស់នៅជនបទ ទស្សនាវាលស្រែវាលស្រូវ និងបានចូលទៅទស្សនាផ្ទាំងគំនូរបុរាណអាយុជាង៣០០ឆ្នាំ ក្នុងព្រះវិហារវត្តពោធិ៍រុក្ខារាម ហៅវត្តកំពង់ត្រឡាចលើ ។ សមាជិកនៅក្នុងសមាគមន៍ទាំងអស់សុទ្ធតែមានរទេះ និងគោខ្លួនឯងផ្ទាល់ ហើយសេវាដឹកក្នុងភ្ញៀវម្នាក់៧ដុល្លារ ក្នុង១ថ្ងៃៗ ពួកគាត់អាចរកកម្រៃបានចន្លោះពី៣ម៉ឺនរៀល ទៅ៨ម៉ឺនរៀល សម្រាប់ផ្គត់ផ្គង់គ្រួសារ។ ប្រជាសហគមន៍ទាំងអស់បានថ្លែងអំណរគុណដល់សម្តេចតេជោ ហ៊ុន សែន ដែលសម្តេចបានខិតខំការពារថែរក្សាអាយុជីវិតប្រជាពលរដ្ឋទាំងអស់តាមរយៈការខិតខំស្វែងរកវ៉ាក់សាំងការពារជម្ងឺកូវីត១៩ និងការពារប្រជាពលរដ្ឋរហូតអាចទប់ស្កាត់បានទាំងស្រុង។លោក កុយ ញ៉ាន មេឃុំកំពង់ត្រឡាចបានអោយដឹងថា៖ កាលពីឆ្នាំ២០១៩ និងឆ្នាំ២០២០ មិនមានភ្ញៀវអន្តរជាតិមកជិះរទេះគោខ្មែរក្នុងឃុំរបស់លោកឡើយ ព្រោះកំពុងជួបវិបត្តិជាសកលចំពោះជំងឺកូវីដ១៩ ។ លុះក្រោយមកជម្ងឺនេះត្រូវបានទប់ស្កាត់បាត់ទៅវិញ ហើយភ្ញៀវអន្តរជាតិបានមកជិះរទេះគោខ្មែរ និងទស្សនាគំនូរបុរាណ និងជីវភាពប្រជាពលរដ្ឋតាមជនបទរបស់ខ្មែរយើងបន្តទៀត ។ តាមរយៈរូមគំនូរបុរាណ និងការធ្វើដំណើរកម្សាន្តបែបប្រពៃណីខ្មែរជិះរទេះគោ របស់ភ្ញៀវទេសចរអន្តរជាតិនេះ បានផ្តល់ឱកាសការងារ និងចំណូលដល់ប្រជាសហគមន៍រស់នៅក្នុងតំបន់ជនបទ ក្នុងឃុំកំពង់ត្រឡាច មានជីវភាពធូរធារមួយកម្រឹត ។ ភ្ញៀវទេសចរអន្តរជាតិ ដែលមកទស្សនាទាំងនេះ មិនត្រឹមតែបានកម្រៃផ្គត់ផ្គង់គ្រួសារក្នុងសហគមន៍នោះទេ ថែមទាំងបង្កើនការអភិរក្សរូបគំនូរទឹកថ្នាំបុរាណរបស់ខ្មែរ និងសត្វគោ រទេះគោខ្មែរថែមទៀតផង ។ ភ្ញៀវទេសចរអន្តរជាតិដែលមកកទស្សនាកំសាន្តនេះ ភាគច្រើនមកពី អាមេរិក បារាំង ជប៉ុន និងតំបន់អឺរ៉ុប ដើម្បីមើលរូបគំនូរពីសម័យបុរាណរបស់ខ្មែរ ការជិះរទេះគោខ្មែរ និងបានទស្សនាតំបន់វាលស្រែវាលស្រូវខ្មែរ និងការរស់នៅបែបជនបទរបស់ប្រជាពលរដ្ឋខ្មែរផងដែរ ។ចំពោះភ្ញៀវទេសចរអន្តរជាតិ ដែលមកកំសាន្តទីនោះ គឺធ្វើដំណើរតាមកប៉ាល់មកចតនៅមាត់កំពង់ក្នុងឃុំកំពង់ត្រឡាចក្រោម ហើយប្រជាសហគមន៍បានយករទេះគោខ្មែរទៅទទួលពួកគាត់ពីទីនោះ បន្ទាប់មកដឹកពួកគាត់ទៅទស្សនារូបគំនូរបុរាណ នៅព្រះវិហារក្នុងវត្តពោធិ៍រុក្ខារាម ដែលមានចម្ងាយប្រមាណ៣គីឡូម៉ែត្រ ដោយត្រូវឆ្លងកាត់វាលស្រែ និងភូមិឋានប្រជាពលរដ្ឋផងដែរ៕ កាំង ហុងវាស្នា

មន្ត្រីវប្បធម៌ប្រឹងប្រែងសិក្សាស្រាវជ្រាវតឹកតាងប្រវតិ្តសាស្រ្ត របកគំហើញថ្មីៗ ជូនដល់មហាជន ពីសម្បតិ្តវប្បធម៌

លោក ឡេង វិទូ ប្រធាននាយកដ្ឋានស្តីទី នៃនាយកដ្ឋានបុរាណវិទ្យា និងបុរេប្រវតិ្តវិទ្យា តាមរយៈBTVព័ត៌មាន នាថ្ងៃទី៩ ខែមីនា ឆ្នាំ២០២៤នេះបានលើកឡើងថា មន្ត្រីជំនាញវប្បធម៌ ប្រឹងប្រែងសិក្សាស្រាវជ្រាវតឹកតាងប្រវតិ្តសាស្រ្ត របកគំហើញថ្មីៗ ជូនដល់មហាជន ពីសារៈសំខាន់សម្បតិ្តវប្បធម៌។លោក ឡេង វិទូ លើកឡើងថា នៅដើមខែឧសភា ឆ្នាំ២០២៤ខាងមុខនេះ នាយកដ្ឋានសហការជាមួយសាកលវិទ្យាល័យ ហាវៃ សហរដ្ឋអាមេរិក និងបើកការសិក្សាស្រាវជ្រាវបុរាណវិទ្យា នៅក្នុងខេត្តបាត់ដំបង ទាក់ទងជីវភាពរស់នៅរបស់ប្រជាពលរដ្ឋ នៅតំបន់ប្រាសាទបាសែត ស្ថិតក្នុងស្រុកសង្កែ ក្រោយពីការធ្វើកំណាយ យើងនឹងធ្វើការសិក្សាអភិរក្ស ផ្សព្វផ្សាយវត្ថុសិល្បៈដែលយើងរកឃើញ។ ហើយនាយកដ្ឋានក៏មានកិច្ចសហការជាមួយសាកលវិទ្យាល័យ ប្រទេសអូស្រ្តាលី ដែលដឹកនាំដោយលោកបណ្ឌិត ម៉ាទីន ដោយធ្វើការសិក្សាស្រាវជ្រាវបុរាណ នៅតំបន់រាជធានីសម័យកណ្តាល។សូមបញ្ជាក់ផងដែរថា៖ តាំងពីឆ្នាំ២០០៧ ដែលបានបង្កើតនាយកដ្ឋានបុរាណវិទ្យា និងបុរេប្រវត្តិវិទ្យារួចមក នាយកដ្ឋានបានធ្វើប្រតិបត្តិការដោយផ្ទាល់ខ្លួនឯងផង និងធ្វើការសហប្រតិបត្តិការ ជាមួយដៃគូរជាតិ និងដៃគូរអន្តរជាតិមួយចំនួនធំ ក្នុងនោះមានការចូលរួមពីបណ្តាល៩ប្រទេស ស្មើនឹង២១ស្ថាប័នស្រាវជ្រាវ។ ការគ្រប់គ្រង និងការស្រាវជ្រាវទាំងនេះផ្តោតលើ សម័យបុរេប្រវត្តិសាស្ត្រ សម័យប្រវត្តិសាស្ត្រ រហូតដល់សម័យមុន-ក្រោយអង្គរ។ មកទល់នឹងពេលនេះក្រសួង ក៏ដូចជានាយកដ្ឋានបានចុះបញ្ជី និងគ្រប់គ្រងស្ថានីយបុរាណវិទ្យាទាំងអស់ចំនួន ៩៣១៧ទីតាំង ក្នុងនោះមានបុរាណដ្ឋានជា ប្រព័ន្ធធារាសាស្ត្របុរាណ ប្រាសាទមានរូបរាង ទួលមានគ្រឹះប្រាសាទ ទួលមនុស្សរស់នៅ ទួលកប់សព ទីតាំងឡស្លរដែក និងទីតាំងឡដុតកុលាលភាជន៍បុរាណ៕ អត្ថបទ រដ្ឋា

ការលះបង់នៃមន្រ្តីបរិស្ថាននារី គឺជាវីរភាព និងការលះបង់ដ៏មានតម្លៃបំផុត ចំពោះការគ្រប់គ្រងធនធានធម្មជាតិឱ្យគង់វង្សតទៅមុខទៀត

ភ្នំពេញ៖ «ការលះបង់នៃមន្រ្តីបរិស្ថាននារី គឺជាវីរភាព និងការលះបង់ដ៏មានតម្លៃបំផុត ដែលមិនអាចកាត់ថ្លៃបាន ជាពិសេស ធានាការគ្រប់គ្រងធនធានធម្មជាតិឱ្យគង់វង្សតទៅមុខទៀត» នេះជាការលើកឡើងរបស់ ឯកឧត្តម ខ្វៃ អាទិត្យា អ្នកនាំពាក្យក្រសួងបរិស្ថាន នាថ្ងៃទី៨ ខែមីនា ឆ្នាំ២០២៤ ដែលជាថ្ងៃដែលពិភពលោក ក៏ដូចជានៅកម្ពុជា បាននិងកំពុងប្រារព្ធទិវានារីអន្តរជាតិ ៨ មីនា។ អ្នកនាំពាក្យក្រសួងបរិស្ថាន បានថ្លែងថា ក្នុងចំណោមមន្រ្តីឧទ្យានុរក្សសរុប ១០៦៩នាក់ មានស្រ្តីប្រមាណ៣០% បាននិងកំពុងបំពេញបេសកកម្មជាមន្រ្តីឧទ្យានុរក្ស ដែលបានបំពេញតួនាទីសំខាន់ ចុះអប់រំ ផ្សព្វផ្សាយ ទប់ស្កាត់ និងបង្ក្រាបបទល្មើសធនធានធម្មជាតិ ប្រកបដោយការទទួលខុសត្រូវខ្ពស់ នៅតាមតំបន់ការពារធម្មជាតិ ក្នុងភូមិសាស្រ្តខេត្តចំនួន១៥ នៅក្នុងព្រះរាជាណាចក្រកម្ពុជា។ ឯកឧត្តម ខ្វៃ អាទិត្យា បានឱ្យដឹងថា មន្រ្តីឧទ្យានុរក្សទាំងអស់ បានលះបង់ពេលវេលាជាមួយក្រុមគ្រួសារ លះបង់កម្លាំងកាយកម្លាំងចិត្ត និងបញ្ញាស្មារតី ដើរល្បាតនៅតាមព្រៃ ភ្នំ ជ្រលងដងអូរ ទន្លេនានា ទាំងយប់ ទាំងថ្ងៃ ដោយមិនខ្លាចនឿយហត់ ប្រឈមជំងឺដង្កាត់នានា វង្វេងផ្លូវ ដាច់បាយ ផ្លូវលំបាក ទឹកជំនន់ ការប្រឈមនឹងបទល្មើស ជួបគ្រោះថ្នាក់ដោយប្រការណាមួយ ក៏ប៉ុន្តែមន្រ្តីឧទ្យានុរក្សទាំងបុរស និងស្រ្តី ត្រូវបានឈរជើង និងចុះល្បាតបង្កាបបទល្មើសធនធានធម្មជាតិ ជាប់ជាប្រចាំ នៅតាមតំបន់ការពារធម្មជាតិទាំងអស់ ដែលមានផ្ទៃដីជាង៧លានហិចតា ស្មើនឹងប្រមាណ៤០% នៃផ្ទៃដីប្រទេសកម្ពុជាទាំងមូល។«មន្ត្រីឧទ្យានុរក្សរបស់យើង បាននិងកំពុងបំពេញភារកិច្ច ជាក់ស្តែងនៅពេលនេះ គឺដូចជាឪពុក ម្តាយ ឬអ្នកអាណាព្យាបាល ដែលជួយឃ្លាំមើល ការពារ ថែរក្សា មរតកធនធានធម្មជាតិដ៏សម្បូណ៌បែបសម្រាប់កូនចៅ តទៅមុខទៀត» បញ្ជាក់បន្ថែមពីអ្នកនាំពាក្យក្រសួងបរិស្ថាន។ជាមួយគ្នានេះ ឯកឧត្តម ខ្វៃ អាទិត្យា បានលើកឡើងថា កន្លងមកក៏ដូចជាបច្ចុប្បន្ន មន្រ្តីឧទ្យានុរក្សត្រូវបានទទួលការថែទាំ និងលើកទឹកចិត្តពីរាជរដ្ឋាភិបាល តាមរយៈក្រសួងបរិស្ថាន ដូចជាការថែទាំសុខភាព ការការពារជំងឺ ការបណ្តុះបណ្តាលជំនាញវិជ្ជាជីវៈ ពង្រឹងសមត្ថភាព របៀបនៃការចុះល្បាត និងបង្កាបបទល្មើស មធ្យោបាយ សម្ភារៈ ការប្រើប្រាស់ឧបករណ៍ ស្របនឹងការវិវត្តថ្មីនៃការជឿនលឿន នៃបច្ចេកវិទ្យា និងការអភិវឌ្ឍប្រទេស។ លើសពីនេះ ក្រសួងបរសិស្ថាន បានពង្រឹងការគ្រប់គ្រង ចាត់ចែង និងការធ្វើសេចក្តីសម្រេចចិត្ត ក្នុងការគ្រប់គ្រងធនធានធម្មជាតិ ដែលជាការផ្តល់លទ្ធភាព ក្នុងការលើកកម្ពស់សមត្ថភាព លទ្ធភាព និងប្រសិទ្ធភាពការងារស្រ្តី ក្នុងការបំពេញភារកិច្ច ក៏ដូចជាការបង្កើនឱ្យមានការចូលរួម កាន់តែប្រសើរថែមទៀត រវាងស្រ្តី កុមារ ក្មេងស្រី ក្នុងវិស័យបរិស្ថាន។ឯកឧត្តម ខ្វៃ អាទិត្យា បានថ្លែងថា ក្រសួងបរិស្ថាន សហការជាមួយអ្នកពាក់ព័ន្ធ ក្នុងការបន្តថែរក្សាធនធានធម្មជាតិ និងគិតគូរចូលរួមលើកស្ទួយជីវភាព ប្រជាសហគមន៍មូលដ្ឋាន តាមរយៈកម្មវិធីអភិវឌ្ឍន៍វិស័យគោលដៅកម្សាន្តបៃតង និងបន្តអប់រំផ្សព្វផ្សាយ ដល់មហាជនទូទៅពីសារៈសំខាន់នៃយុទ្ធសាស្រ្តចក្រា ដែលផ្តោតលើមុំយុទ្ធសាស្រ្តចំនួន ៣ គឺភាព ស្ងាត បៃតង និងចីរភាព ឆ្ពោះទៅការសម្រេចទស្សនវិស័យ កម្ពុជាឆ្នាំ២០៥០ ជាប្រទេសមានការអភិវឌ្ឍន៍ជឿនលឿន និងជាប្រទេសអព្យាក្រឹតកាបូន។អ្នកនាំពាក្យក្រសួងបរិស្ថាន បានវាយតម្លៃខ្ពស់ចំពោះមន្រ្តីរាជការក្រសួងបរិស្ថានទាំងអស់ ជាពិសេសចំពោះមន្ត្រីឧទ្យានុរក្សជានារី ដែលមានភាពអង់អាចក្លាហាន មានស្មារតីស្នេហាជាតិមាតុភូមិ មានការប្តេជ្ញាចិត្ត និងការលះបង់ខ្ពស់ក្នុងការថែរក្សាធនធានធម្មជាតិ ដែលកម្ពុជាមានសម្រាប់មនុស្សរាប់ជំនាន់ទៀត៕

កម្ពុជាពង្រឹងការគ្រប់គ្រងធនធានធម្មជាតិ និងអភិរក្សសត្វព្រៃកម្រ នៅតាមតំបន់ការពារធម្មជាតិ

ដើម្បីចូលរួមអបអរសាទរ ទិវាសត្វព្រៃពិភពលោក ថ្ងៃទី ៣ មិនា ឆ្នាំ២០២៤ ក្រសួងបរិស្ថាន បានបង្ហាញពីការគ្រប់គ្រងធនធនធម្មជាតិ ជាពិសេសអភិរក្សសត្វព្រៃ នៅកម្ពុជា សំដៅលើកកម្ពស់ការយល់ដឹងរបស់មហាជនអំពីមរតកធម្មជាតិ ដ័មានតម្លៃសម្រាប់មនុស្សជាតិ។ឯកឧត្តម ខ្វៃ អាទិត្យា អ្នកនាំពាក្យក្រសួងបរិស្ថាន បានបញ្ជាក់ថា កម្ពុជាយើងមានតំបន់ការពារធម្មជាតិចំនួន ៧៣កន្លែង មានផ្ទៃដីជាង៧លានហិចតា ស្មើនឹង៤០%នៃផ្ទៃដីប្រទេស។ អ្នកនាំពាក្យក្រសួងបរិស្ថាន បានលើកឡើងថា យោងតាមផែនការយុទ្ធសាស្រ្ត និងសកម្មភាពនានា បានរកឃើញថា សត្វព្រៃនៅប្រទេសកម្ពុជាមានប្រមាណ ២០៨៥ ប្រភេទ (ថនិកសត្វ=១៤៧ បក្សី=៥៤៣ ល្មូន=១៤៥ ថលជលិគ=៥៩ ត្រី=១០៩៣ និងសត្វល្អិត=៩៨)។ ឯកឧត្តម ខ្វៃ អាទិត្យា បានអះអាងថា ក្រសួងបរិស្ថាន និងអង្គការដៃគូធ្វើការអភិរក្សដោយផ្តោតសំខាន់ទៅលើប្រភេទសត្វដែលមានដោយកម្រ ជិតផុតពូជ និងកំពុងគំរាមកំហែងចំនួនប្រមាណ ១២៣ប្រភេទ (ថនិកសត្វ=២៥ បក្សី=៣៣ ល្មូន=២១ ថលជលិគ=៩ និងត្រី=៣៥) ជាមួយគ្នានេះ ប្រភេទសត្វជិតផុតពូជដែលមានច្រើនជាងគេនៅកម្ពុជារួមមាន៖ ថនិកសត្វមាន៖ ទន្សោង បក្សីមាន៖ក្ងរ (ត្រយ៉ង) យក្ស ចាបតេតកម្ពុជា និងត្រយ៉ងចំកកសជាដើម។ ឯកឧត្តមអ្នកនាំពាក្យក្រសួងបរិស្ថាន ប្រទេសកម្ពុជាក៏ចាត់ទុកជាប្រទេស ដែលមានវត្តមានប្រភេទសត្វ ដែលមានដោយកម្រ ជិតផុតពូជ និងកំពុងគំរាមកំហែងច្រើនដូចជា៖ ទន្សោង ត្រយ៉ងយក្ស ត្រយ៉ងចំកកស និងចាបតេតកម្ពុជាជាដើម មានវត្តមានតិចជាងប្រទេសជិតខាងដូចជា ដំរីអាស៊ី និងខ្ទីងជាដើម។ឯកឧត្តម ខ្វៃអាទិត្យា បានលើកឡើងបន្ថែមថា កម្ពុជាបាននិងកំពុងយកចិត្តទុកដាក់ខ្លាំង សហការជាមួយក្រសួង ស្ថាប័ន ពាក់ព័ន្ធ អាជ្ញាធរមូលដ្ឋានគ្រប់លំដាប់ថ្នាក់ អង្គការដៃគូ ការពារមរតកធម្មជាតិ រួមមានព្រៃឈើ សត្វព្រៃនិង ជិវៈចម្រុះ ដើម្បីបន្តទុកដល់កូនចៅជំនាន់ក្រោយ និងជាពិសេសធានាដល់ថែរក្សាប្រព័ន្ធអេកូឡូស៊ី ប្រយុទ្ធនឹងការប្រែប្រួលអាកាសធាតុ និងឆ្ពោះទៅសម្រេចទស្សនវិស័យប្រទេសអព្យាក្រឹតកាបូនឆ្នាំ២០៥០។ឯកឧត្តមលើកទឹកចិត្តឱ្យភាគីពាក់ព័ន្ធ ដៃគូសហការ ជាពិសេសប្រជាសហគមន៍តំបន់ការពារធម្មជាតិ ពង្រឹងការចូលរួមឱ្យកាន់តែសកម្មខ្លាំងបន្ថែមទៀត ជាមួយក្រសួងបរិស្ថាន ដើម្បីបង្កើតសេដ្ឋកិច្ចមូលដ្ឋាន និងការពារអភិរក្សធនធានធម្មជាតិ។ នៅក្នុងវិធានការបង្កើនប្រសិទ្ធភាពនៃការការពារ និងអភិរក្សធនធានធម្មជាតិ ក្រសួងបរិស្ថានមិនត្រឹមតែបន្តពង្រឹងលើការ អនុវត្តច្បាប់លើវិធាន៤ចំណុច ក្នុងនោះដោយអនុវត្តច្បាប់១០០% ចំពោះអ្នកប្រព្រឹត្តបទល្មើសធនធានធម្មជាតិ ប៉ុណ្ណោះទេ ប៉ុន្តែបានផ្តោតសំខាន់លើការអភិវឌ្ឍ ជំរុញការដាំដើមឈើឲ្យច្រើនជាងការកាប់ ដើម្បីរក្សានូវកំណើន ជាពិសេសការជំរុញ ការដាំស្តារព្រៃឈើ ដែលជាទិសដៅអាទិភាព បង្កើនគម្របព្រៃឈើឲ្យបាន៦០% នៅឆ្នាំ២០៥០ ស្របតាមយុទ្ធសាស្ត្របញ្ចកោណ របស់រាជរដ្ឋាភិបាលកម្ពុជា និងលើកកម្ពស់ជីវភាពប្រជាពលរដ្ឋ នៅតាមសហគមន៍ រួមទាំងការអភិរក្សជីវចម្រុះដោយចីរភាព។ តាមរយៈនេះ ក្រសួងបរិស្ថានបានដាក់ចេញយុទ្ធនាការថ្ងៃទី១០ តុលា ឆ្នាំ២០២៣ នឹងធ្វើការផ្តល់ និងដាំដើមឈើយ៉ាងតិច ១លានដើមក្នុងមួយឆ្នាំ ចាប់ពីឆ្នាំ២០២៤នេះ។ឯកឧត្តមអ្នកនាំពាក្យ បានបញ្ជាក់ថា ចំពោះការបង្កើតសេដ្ឋកិច្ចមូលដ្ឋាន គឺជាវិធានការជាក់ស្តែង ដើម្បីការពារ និងអភិរក្សព្រៃឈើ និងសត្វព្រៃរបស់កម្ពុជាឱ្យបានគង់វង្ស ដូចជាការដាំដុះដើមឈើ គឺ«ដើម្បីរកចំណូល» តាមរយៈការលក់ឥណទានកាបូន និងទេសចរណ៍គោលដៅកម្សាន្តបៃតង ៕

MedCREATE សហការជាមួយមន្ទីរពេទ្យនៅម៉ាឡេស៊ី ផ្តល់សេវាដល់ពលរដ្ឋកម្ពុជា ដែលចង់ទៅព្យាបាលជំងឺនៅក្រៅប្រទេស

ភ្នំពេញ៖ ការិយាល័យតំណាងមន្ទីរពេទ្យអន្តរជាតិប្រចាំកម្ពុជា MedCREATE នៅថ្ងៃទី២៥ ខែកុម្ភៈ ឆ្នាំ២០២៤ នេះ បានចុះអនុស្សរណៈយោគយល់គ្នា (MoU) ជាមួយមន្ទីរពេទ្យថ្មីមួយទៀត នៅក្នុងប្រទេសម៉ាឡេស៊ី ឈ្មោះ «Subang Jaya Medical Centre» ដើម្បីផ្តល់ភាពកាន់តែទូលំទូលាយសម្រាប់ប្រជាជនកម្ពុជា ដែលមាន បំណងស្វែងរកសេវាព្យាបាលនៅក្រៅប្រទេស។ការចុះអនុស្សរណៈយោគយល់គ្នា (MoU) រវាង Med CREATE និងមន្ទីរពេទ្យ Subang Jaya Medical Centre ខាងលើនេះ គឺប្រព្រឹត្តឡើងនៅសណ្ឋាគារ សាន់និងម៉ូន ក្នុងរាជធានីភ្នំពេញ បន្ទាប់ពីបើកសិក្ខាសាលាចែក រំលែកចំណេះដឹងពីបញ្ហា «ជំងឺមហារីកសុដន់» ពីសំណាក់លោកស្រីវេជ្ជបណ្ឌិតឯកទេសមកពីប្រទេសម៉ាឡេស៊ី ដើម្បីផ្តល់ពីវិធីសាស្ដ្រស្វែងរករោគសញ្ញា និងការព្យាបាលដ៏មាន ប្រសិទ្ធភាពជូនដល់អ្នកចូលរួមដែលចំនួនប្រមាណជិត ១០០ នាក់ នាវេលាថ្ងៃទី២៥ខែកុម្ភះ ២០២៤ នេះ។ខណះ ជំងឺមហារីកសុដន់ដែលចាត់ទុកជាប្រភេទមហារីកជាទូទៅច្រើនកើតលើស្តី្រ រីឯ បុរសក៏អាចវិវត្តទៅជាមហារីកសុដន់នេះដែរ បើទោះបីជាការកើតនៃជំងឺនេះកើតឡើងដោយកម្រក៏ដោយ ។ហើយការធ្វើរោគវិនិច្ឆ័យរកឃើញឆាប់រហ័សនៃមហារីក បង្កើនឱកាសច្រើនក្នុងការទទួលបានការព្យាបាលបានជោគជ័យ។នៅក្នុងឱកាសនោះលោក រ័ត្ន សុចាន់ នាយកប្រតិបត្តិផ្នែក ទីផ្សារ និងអាជីវកម្ម នៃMedCREATE ក៏ថ្លែងប្រាប់អ្នកចូលរួមឲ្យបានដឹងផងដែរថា MedCREATE គឺជាការិយាល័យតំណាងមន្ទីរពេទ្យអន្ដរជាតិឈានមុនគេ ក្នុងប្រទេសកម្ពុជា ចាប់ពីតាំងពីឆ្នាំ២០១៦ កន្លងមក តែងតែសិប្រឹក្សាយ៉ាងល្អិតល្អន់ និងស្វែងរកនូវដៃគូ មន្ទីរពេទ្យ ដែលមានគុណភាព និងសេវាកម្មល្អ សម្រាប់ផ្តល់ការព្យាបាលនូវប្រភេទជំងឺទាំងធ្ងន់ និងស្រាល និងការសង្រ្គោះបន្ទាន់ដល់អ្នកជំងឺ ។ លោក រ័ត្ន សុចាន់ បន្តឲ្យដឹងថា សម្រាប់អ្នកជំងឺសង្រ្គោះបន្ទាន់វិញ ការិយាល័យតំណាងមន្ទីរពេទ្យអន្តរជាតិប្រចាំកម្ពុជា នឹងផ្តល់នូវសេវារថយន្ត និងយន្តហោះសង្រ្គោះបន្ទាន់ទៅកាន់79ប្រទេសផងដែរ ខណះ MedCREATE បានធ្វើការសហការដោយផ្ទាល់ជាមួយមន្ទីរពេទ្យល្បីៗជា ច្រើន នៅក្នុងប្រទេសចំនួន៤ រួមមាន ប្រទេសថៃ, ប្រទេសឥណ្ឌា, ប្រទេសសិង្ហបុរី និងប្រទេសម៉ាឡេស៊ី៕

ក្រសួងវប្បធម៌ និងវិចិត្រសិល្បៈ បើកវគ្គបណ្តុះបណ្តាលមន្រ្តីរាជការលើកិច្ចការរដ្ឋបាល សម្រាប់មន្រ្តីថ្មីក្របខ័ណ្ឌឆ្នាំ២០២៣

ឯកឧត្តម ឡុង ប៉ុណ្ណាស៊ីរីវត្ថ រដ្ឋលេខាធិការក្រសួងតំណាងដ៏ខ្ពង់ខ្ពស់ លោកជំទាវបណ្ឌិតសភាចារ្យ ភឿង សកុណា រដ្ឋមន្រ្តីក្រសួងវប្បធម៌និងវិចិត្រសិល្បៈ នៅថ្ងៃអង្គារ ទី២០ ខែកុម្ភៈ ឆ្នាំ២០២៤ បានអញ្ជើញជាអធិបតី ក្នុងពិធីបើកវគ្គបណ្តុះបណ្តាលមន្រ្តីរាជការ លើកិច្ចការរដ្ឋបាល សម្រាប់មន្រ្តីថ្មីក្របខ័ណ្ឌឆ្នាំ២០២៣។ វគ្គបណ្តុះបណ្តាលនេះ ធ្វើឡើងចាប់ពីថ្ងៃនេះរហូតដល់ថ្ងៃទី២៣ ខែកុម្ភៈ ឆ្នាំ២០២៤ ហើយក្នុងវគ្គនេះសាលាបានកំណត់ជ្រើសយកមន្រ្តីក្របខ័ណ្ឌថ្មីឆ្នាំ២០២៣ សរុបចំនួន ៦០រូប ក្នុងនោះសិក្ខាកាមជាស្រ្តីមានចំនួន ២៨រូប មកពីអាជ្ញាធរជាតិសំបូរព្រៃគុក សាកលវិទ្យាល័យភូមិន្ទវិចិត្រសិល្បៈ គណៈកម្មការបេតិកភណ្ឌពិភពលោក សាលាមធ្យមវិចិត្រសិល្បៈ បណ្តានាយកដ្ឋាន និងមន្ទីរវប្បធម៌រាជធានី-ខេត្ត។ ការបើកវគ្គបណ្តុះបណ្តាលនាពេលនេះ ក្នុងគោលបំណង ចែករំលែកបទពិសោធ និងផ្តល់ចំណេះដឹងជាមូលដ្ឋានលើការងាររដ្ឋបាលសម្រាប់មន្រ្តីរាជការក្របខ័ណ្ឌថ្មី ដើម្បីយកទៅអនុវត្តនៅតាមអង្គភាពរៀងៗខ្លួនឱ្យដំណើរការ ការងារទទួលបានប្រសិទ្ធភាព និងដើម្បីជាគុណប្រយោជន៍ក្នុងការចូលរួមដល់ការអភិវឌ្ឍប្រទេសជាតិ។ក្នុងឱកាសនោះ ឯកឧត្តមរដ្ឋលេខាធិការ បានថ្លែងថា កិច្ចការរដ្ឋបាលនេះ គឺជាកិច្ចការងារថ្មីសម្រាប់ប្អូនៗទាំងអស់ជាសិក្ខាកាមនៅពេលនេះ ក្រោយបញ្ចប់ការសិក្សានៅមហាវិទ្យាល័យ ទើបក្រសួងវប្បធម៌និងវិចិត្រសិល្បៈ តាមរយៈសាលាបណ្តុះបណ្តាលក្របខ័ណ្ឌវប្បធម៌ បានខិតខំប្រឹងប្រែងអស់ពីកម្លាំងកាយចិត្ត ដើម្បីធ្វើឱ្យវគ្គបណ្តុះបណ្តាលនេះលេចចេញជារូបរាងឡើង។ នៅក្នុងវគ្គបណ្តុះបណ្តាលនេះ សាលាបណ្តុះបណ្តាលក្របខ័ណ្ឌវប្បធម៌ បានអញ្ជើញនូវវាគ្មិន ក៏ដូចជាសាស្រ្តាចារ្យដែលមានចំណេះ ជំនាញច្បាស់លាស់លើកិច្ចការរដ្ឋបាលនេះធ្វើជាគ្រូឧទ្ទេស។ ឯកឧត្តមបន្តថា វគ្គបណ្តុះបណ្តាលនេះ គឺជាលទ្ធផលថ្មីមួយទៀតដែលថ្នាក់ដឹកនាំក្រសួងវប្បធម៌ និងវិចិត្រសិល្បៈ បានខិតខំប្រឹងប្រែងក្នុងការបណ្តុះបណ្តាលធនធានមនុស្ស ផ្តល់ចំណេះដឹងដល់មន្រ្តីរាជការ ឱ្យបានដឹងអំពីតួនាទី ភារកិច្ច និងការទទួលខុសត្រូវក្នុងការងាររបស់ខ្លួន ដែលនេះគឺជាកាតព្វកិច្ចរបស់មន្រ្តីរាជការគ្រប់រូបត្រូវអនុវត្តដើម្បីបម្រើផលប្រយោជន៍ជាតិ និងជំរុញឱ្យវិស័យវប្បធម៌កាន់តែរីកចម្រើន និងប្រសើរឡើងថែមមួយកម្រិតទៀត ស្របតាមបញ្ចកោណទី១៖ ការអភិវឌ្ឍមូលធនមនុស្សនៃយុទ្ធសាស្រ្តបញ្ចកោណ ដែលជាផែនការយុទ្ធសាស្រ្តជាតិរបស់រាជរដ្ឋាភិបាល នីតិកាលទី៧ នេះ។ចំណែកឯ លោក ប៊ុនថន សុខាណារិទ្ធ នាយកស្តីទីសាលាបណ្តុះបណ្តាលក្របខ័ណ្ឌវប្បធម៌ បានឱ្យដឹងថា ផ្អែកលើគោលនយោបាយ និងយុទ្ធសាស្រ្ត បញ្ចកោណដំណាក់កាលទី១ របស់រាជរដ្ឋាភិបាល សាលាបណ្តុះ បណ្តាលក្របខ័ណ្ឌវប្បធម៌ ដែលជាអង្គភាពចំណុះក្រសួងវប្បធម៌ និងវិចិត្រសិល្បៈ មានបេសកកម្ម និងភារកិច្ចកាន់តែសំខាន់ឡើងក្នុងមុខងារជាអ្នកផ្តល់ការគាំទ្រលើវិស័យបណ្តុះបណ្តាលធនធនមនុស្ស ដល់អង្គភាពមន្រ្តីរាជការ ទាំងថ្នាក់ជាតិ និងថ្នាក់ក្រោមជាតិក្នុងបរិបទនៃការផ្លាស់ប្តូរដ៏ឆាប់រហ័សរបស់សង្គមកម្ពុជានិងតំបន់ ការប្រកួតប្រជែង និងសេចក្តីត្រូវការនៃសេវាសាធារណៈ និងកិច្ចការរដ្ឋបាលដែលមានការវិវត្ត និងការកើនឡើងជាលំដាប់នោះ។ក្នុងន័យនេះ ការកែលម្អឱ្យកាន់តែប្រសើរឡើងនូវគុណភាពនៃសេវាបណ្តុះបណ្តាលផ្តល់ដោយអង្គភាពចំណុះក្រសួងមួយនេះ ត្រូវបានកំណត់ចូលក្នុងរបៀបវារៈជាអាទិភាពរបស់ក្រសួងវប្បធម៌ និងវិចិត្រសិល្បៈ។ លោកបន្តថា វគ្គនេះគឺជាលទ្ធផលថ្មីមួយដ៏ល្អ ដែលថ្នាក់ដឹកនាំក្រសួងវប្បធម៌ និងវិចិត្រសិល្បៈ បានខិតខំប្រឹងប្រែងបំពេញ ភារកិច្ចក្នុងការបណ្តុះបណ្តាលធនធានមនុស្ស ផ្តល់ចំណេះដឹងដល់មន្រ្តីរាជការទាំងអស់ ឱ្យមានការទទួលខុសត្រូវក្នុងការងារ។ នេះគឺជាកាតព្វកិច្ចរបស់មន្រ្តីរាជការក្នុងការបំពេញការងារ បម្រើផលប្រយោជន៍ជាតិ ជំរុញឱ្យការងារក្នុងវិស័យវប្បធម៌ និងវិចិត្រសិល្បៈកាន់តែរីកចម្រើនប្រសើរឡើងថែមទៀត។ ដូចនេះមន្រ្តីគ្រប់រូបក្នុងក្របខណ្ឌក្រសួង ត្រូវមានកាតព្វកិច្ចចាំបាច់ពង្រឹងសមត្ថភាពខ្លួនបន្ថែមទៀត ដោយខិតខំសិក្សារៀនសូត្រ បំពាក់នូវចំណេះដឹងផ្ទាល់ខ្លួនបន្ថែម ដើម្បីក្លាយខ្លួនជាមន្រ្តីដែលមានសមត្ថភាពចេះទទួលខុសត្រូវក្នុងភារកិច្ចដែលក្រសួងផ្តល់ឱ្យ៕

គិតត្រឹមឆ្នាំ២០២៣ មនី្ទរវប្បធម៌ខេត្តកំពង់ស្ពឺ ចុះកំណត់តំបន់ស្ថានីយបុរាណ បានចំនួនជាង ៥០០ទីតាំង

លោក ស៊ុន មានជ័យ ប្រធានមនី្ទរវប្បធម៌ និងវិចិត្រសិល្បៈ ខេត្តកំពង់ស្ពឺ ថ្លែងប្រាប់BTV ព័ត៌មាន នាព្រឹកថ្ងៃទី១៩ ខែកុម្ភៈ ឆ្នាំ២០២៤នេះថា គិតត្រឹមឆ្នាំ២០២៣មកនេះ មន្ត្រីជំនាញបានចុះកំណត់តំបន់ស្ថានីបុរាណ(ដីរដ្ឋ) នៅតាមបណ្តាស្រុកនានា ដើម្បីថែរក្សាការពារសម្បតិ្តបេតិកភណ្ឌជាតិបានចំនួន៥០៩ទីតាំង។លោក ស៊ុន មានជ័យ បានបន្តថា មនី្ទរវប្បធម៌ខេត្តកំពង់ស្ពឺ ការចុះបញ្ជីដីធ្លីជាប្រព័ន្ធមានលក្ខណៈជាប្រព័ន្ធនេះ គឺសំដៅទៅលើទីទួលបុរាណ(ស្ថានីយបុរាណ) ក្នុងនោះមានដូចជា ទួលអង្គ ទួលប្រាសាទ ទួលគ្រឹះប្រាសាទ បឹងបុរាណ ស្រះទឹកបុរាណ ជាដើម ទៅតាមកាលកំណត់នៅក្នុងច្បាប់ស្តីពីកិច្ចការពារបេតិកភណ្ឌវប្បធម៌ ដែលមនី្ទរវប្បធម៌ បានអនុវត្តកន្លងមក។ លទ្ធផលដែលយើងសម្រេចបាន ក្នុងការចុះកំណត់តំបន់ស្ថានីបុរាណ(ដីរដ្ឋ) នៅតាមបណ្តាស្រុកនានា សរុប ៥០៩ ទីតាំង រួមមាន៖ ស្រុកសំរោងទង ២០០ទីតាំង, ស្រុកគងពិសី ៨៣ទីតាំង, ស្រុកបសេដ្ឋ ៨៤ទីតាំង, ក្រុងច្បាមន ២១ទីតាំង, ស្រុកសាមគ្គីមុនីជ័យ ៤១ទីតាំង, ក្រុងឧដុង្គម៉ែជ័យ ២៨ទីតាំង, ស្រុកភ្នំស្រួច ២៤ទីតាំង, ស្រុកថ្ពង ២២ទីតាំង, ស្រុកឱរ៉ាល់ ៦ទីតាំង និងបានកំណត់និយាមការសរុប ៣១៤ទីតាំង និងបានចុះធ្វើបណ្ណកម្មសិទ្ធសរុបចំនួន ៥៥ទីតាំង ក្នុងនោះរួមមាន៖ បង្កាន់ដៃសម្រាប់ទទួលប្លង់រឹង ៤៧ និងប្លង់រឹងចំនួន ៨ និងបានបោះបង្គោលព្រំការពារចំនួន ៦៦ ទីតាំង។លោក ស៊ុន មានជ័យ ប្រធានមនី្ទរវប្បធម៌ និងវិចិត្រសិល្បៈ ខេត្តកំពង់ស្ពឺ «ចង់ជម្រាបជូនថា នៅឆ្នាំ២០១៨ នៅពេលដែលលោកទទួលបន្ទុកជាប្រធានមនី្ទរវប្បធម៌ និងវិចិត្រសិល្បៈ ខេត្តកំពង់ស្ពឺ គឺស្ថានីយបុរាណ មានទិន្នន័យចំនួន៤២៣។ ដូច្នេះចាប់ពីឆ្នាំ២០១៨ រហូតមកដល់ឆ្នាំ២០២៤នេះ ក្រុមការងាររបស់មនី្ទរ បានរកឃើញទីតាំងថ្មី រហូតដល់ទៅ៥០៩ទីតាំង នេះបើយើងគិតពីបច្ចុប្បន្នភាពក្នុងខែកុម្ភៈ ឆ្នាំ២០២៤នេះ មានការកើនឡើង។ ការកើនឡើង និងរកឃើញស្ថានីយបុរាណនេះ គឺដោយសារតែយុទ្ធការ នៃការចុះបញ្ជីដីធ្លីជាប្រព័ន្ធ ទើបយើងរកឃើញថ្មី។ ពីមុនមកយើងចុះធ្វើការងារនេះជារៀងរាល់ឆ្នាំ ដើម្បីទៅពិនិត្យទីទួល ទីតាំងដែលមានស្រាប់ និងចុះធ្វើនិយាមការ ដើម្បីការពារទីតាំងទាំងនោះ រួមមានទាំងការបោះបង្គោលផងដែរ។ជាចុងក្រោយលោក ស៊ុន មានជ័យ បានបញ្ជាក់ថា តួនាទី និងភារកិច្ចរបស់មនី្ទរវប្បធម៌ និងវិចិត្រសិល្បៈ ខេត្តកំពង់ស្ពឺ ឈរលើកិច្ចការចំនួន២ចម្បង គឺទី១៖ កិច្ចការបេតិកភណ្ឌរូបី និងទី២៖កិច្ចការវប្បធម៌អរូបី។ ដូច្នេះទាំងរូបី និងអរូបី មន្រី្តជំនាញរបស់យើងបានខិតខំប្រឹងប្រែងអនុវត្តទៅតាមផែនការ នូវអ្វីដែលយើងទទួលការងារបន្ថែមពីការណែនាំក្រសួងវប្បធម៌ និងវិចិត្រសិល្បៈ និងរដ្ឋបាលខេត្តកំពង់ស្ពឺ គ្រប់សកម្មភាពទាំងអស់យើងតែងតែសហការជានិច្ចជាមួយអាជ្ញាធរមូលដ្ឋាន(ប្រជាពលរដ្ឋ-មេភូមិ-ឃុំ-សង្កាត់-ស្រុក-ក្រុង)ជាប់ជាប្រចាំ៕ អត្ថបទ៖ រដ្ឋា

រដ្ឋមន្ត្រីក្រសួងបរិស្ថាន ចុះសិក្សាស្វែងយល់ព័ត៌មាន ជាមូលដ្ឋាន សម្រាប់ការរៀបចំ អភិវឌ្ឍន៍ទេសចរណ៍ធម្មជាតិ នៅក្នុងឧទ្យានជាតិព្រះជ័យវរ្ម័ន-នរោត្តម «ភ្នំគូលែន»

ឯកឧត្តម បណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថានអញ្ជើញចុះសិក្សាស្វែងយល់ពីសក្តានុពលទេសចរណ៍ធម្មជាតិ និងវប្បធ៌ម ដើម្បីអភិវឌ្ឍន៍ គោលដៅកម្សាន្តបៃតង នៅក្នុងឧទ្យានជាតិព្រះជ័យវរ្ម័ន-នរោត្តម«ភ្នំគូលែន» នៅថ្ងៃសៅរ៍ ៨ កើត ខែមាឃ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី១៧ ខែកុម្ភៈ ឆ្នាំ២០២៤ នេះ ដោយមានការចូលរួមពី ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ អគ្គនាយក និងមន្រ្តីជំនាញពាក់ព័ន្ធ អាជ្ញាធរមូលដ្ឋាន និងគណៈកម្មការសហគមន៍តំបន់ការពារធម្មជាតិផងដែរ។ ក្នុងដំណើរទស្សនៈកិច្ចនេះ ឯកឧត្តមរដ្ឋមន្ត្រី បានចុះពិនិត្យលើគោលដៅសំខាន់ចំនួនរួមមាន មជ្ឈមណ្ឌលស្រាវជ្រាវ និងអភិរក្សកេសរកូល សុខ អាន ភ្នំគូលែន ពើងថ្មជ្រួញ ទីតាំងបោះតង់អូរតាចក់ ពិនិត្យទីតាំងវត្តចាស់ ជាទីដែលមានភាពទាក់ទាញនៃធម្មជាតិ ទឹកជ្រោះ ល្អាងថ្ម និងពើងធម្មជាតិបង្កប់នូវរូបចម្លាក់បុរាណ ជាពិសេសចម្លាក់បាតស្ទឹងជាស្នាដៃសល្បៈដ៏អស្ចារ្យរបស់បុព្វបុរសខ្មែរបានបង្កប់នូវអត្ថន័យសំខាន់ៗ ខាងជំនឿសាសនា ធ្វើឱ្យមានការចាប់អារម្មណ៍ទាំងមជ្ឈដ្ឋានជាតិ និងអន្តជាតិ។នៅក្នុងវេទិកាលើកទី១៩ នៃរាជរដ្ឋាភិបាល និងវិស័យឯកជន នៅថ្ងៃទី១៣ ខែវិច្ឆិកា ឆ្នាំ២០២៣ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានកំណត់យកឧទ្យានជាតិព្រះជ័យវរ្ម័ន-នរោត្តម«ភ្នំគូលែន» ជាគោលដៅទេសចរណ៍ធម្មជាតិ។ និងអនុលោមតាម«យុទ្ធសាស្រ្តបញ្ចកោណ» ដំណាក់កាលទី១ និងឈរលើមូលដ្ឋានគ្រឹះនៃ «យុទ្ធសាស្រ្តចក្រាវិស័យបរិស្ថាន» ឆ្នាំ២០២៣-២០២៨ ក្រសួងបរិស្ថានបានរៀបចំកម្មវិធីចុះសិក្សាស្វែងយល់ព័ត៌មានជាមូលដ្ឋានសម្រាប់ការរៀបចំផែនការយុទ្ធសាស្រ្តអភិវឌ្ឍន៍ទេសចរណ៍ធម្មជាតិនៅក្នុងឧទ្យានជាតិព្រះជ័យវរ្ម័ន-នរោត្តម«ភ្នំគូលែន» សំដៅលើកកម្ពស់ជីវភាពសហគមន៍មូលដ្ឋាន ការអភិរក្សប្រព័ន្ធជីវៈចម្រុះ និងវប្បធម៌ប្រពៃណី ដើម្បីជាឧត្តមប្រយោជន៍ដល់ប្រជាពលរដ្ឋកម្ពុជាគ្រប់ជំនាន់។ក្រោមការគាំទ្ររបស់គម្រោងនិរន្តរភាពតំបន់ទេសភាព និងទេសចរណ៍ធម្មជាតិកម្ពុជា (CSLEP) បាននឹងកំពុងជួយលើការរៀបចំផែនការ និងគ្រប់គ្រងតំបន់ការពារធម្មជាតិ (ពង្រឹងការអនុវត្តច្បាប់ សាងសង់ស្នាក់ការ) សាងសងហេដ្ឋារចនាសម្ព័ន្ធ និងសម្បទាទេសចរណ៍ រួមមាន សាងសង់ផ្លូវកៅស៊ូប្រវែង ១៤ គ.ម អគារពហុបំណង (អាហារដ្ឋាននិងសាលប្រជុំ) ទីលានបោះជំរុំ ការរៀបចំប្រព័ន្ធផ្លូវទស្សនាចរណ៍ ក្លោងទ្វា ចំណតយានយន្ត កញ្ចុះលំហែកាយ តូបលក់អាហារ ។ល។) និងជួយរួមទាំងជួយ ពង្រឹងខ្សែច្រវ៉ាក់តម្លៃជ្រូកគូលែន នៅសហគមន៍តំបន់ការពារធម្មជាតិចំនួន ៥ (សហគមន៍ព្រៃធំអន្លង់ធំ ព្រៃភ្នំម្នាស់ ជប់តាសុខ ព្រៃភ្នំក្តួច ព្រៃធំពពេល)និង ទឹកស្អាត និងអនាម័យនៅសហគមន៍ព្រៃធំអន្លង់ធំ។ ឧទ្យានជាតិព្រះជ័យវរ្ម័ន-នរោត្តម«ភ្នំគូលែន» ជាតំបន់ប្រវត្តិសាស្រ្តដ៏មានសារៈសំខាន់ ដែលបានរក្សាទុកនូវសំណង់ ប្រវត្តិសាស្រ្តជាច្រើនកន្លែងមានដូចជា ប្រាសាទបុរាណ ស្ថានីយ៍បុរាណ ធនធានធម្មជាតិ និងប្រព័ន្ធជីវៈចម្រុះដ៏សំបូរបែប ជាពិសេសជាតំបន់ដែលបង្កប់ទៅដោយជំនឿ ប្រពៃណីរបស់ជនជាតិខ្មែរតាំងពីបុរាណកាលមក៕

រដ្ឋមន្ត្រីទេសចរណ៍ ស្នើស្ថាប័នពាក់ព័ន្ធផ្តល់ការសម្របសម្រួលល្អជូនទេសចរអន្តរជាតិ

នៅថ្ងៃទី១៥ ខែកុម្ភៈនេះ ឯកឧត្តម សុខ សូកេន រដ្ឋមន្ត្រីក្រសួងទេសចរណ៍ បានបើកកិច្ចប្រជុំគណៈកម្មការអន្តរក្រសួង ដើម្បីសម្រួលការធ្វើដំណើរ ដឹកជញ្ជូនភ្ញៀវទេសចរអន្តរជាតិ និងអ្នកដំណើរអន្តរជាតិ នៅតាមច្រកទ្វារព្រំដែនជាតិ អន្តរជាតិ ទូទាំងប្រទេស ដែលក្នុងកិច្ចប្រជុំនេះ ឯកឧត្តម រដ្ឋមន្ត្រី ស្នើស្ថាប័នពាក់ព័ន្ធ និងមន្ត្រីជំនាញផ្តល់ការសម្របសម្រួលល្អ បដិសណ្ឋារកិច្ចល្អជូនអ្នកដំណើរ និងទេសចរអន្តរជាតិ។ឯកឧត្តម រដ្ឋមន្ត្រី សុខ សូកេន ថ្លែងថា នៅក្នុងឆ្នាំ២០២៤ ការធ្វើដំណើរអ្នកដំណើរ និងទេសចរអន្តរជាតិចូលមកកម្ពុជា នឹងមានកំណើនល្អប្រសើរឡើងវិញ ស្របពេលសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានឯកភាពគ្នាជាមួយ នាយករដ្ឋមន្ត្រីថៃ ផ្តល់ការលើកលែងទិដ្ឋាការរវាងប្រជាជនទាំងពីរពេញមួយខែមេសា ដើម្បីជាកាដូអបអរពិធីបុណ្យចូលឆ្នាំថ្មីផង និងស្របពេលកម្ពុជា អនុវត្តយុទ្ធនាការទស្សនាសៀមរាបឆ្នាំ២០២៤ និងការអាកាសយានដ្ឋានអន្តរជាតិខ្នាតធំនៅខេត្តសៀមរាបជាដើម។ឯកឧត្តម រដ្ឋមន្ត្រី ថ្លែងថា ការស្នើរស្ថាប័ន និងអង្គភាពជំនាញបង្កើនផ្តល់ការសម្រួលការធ្វើដំណើរឆ្លងដែនល្អ ផ្តល់បដិសណ្ឋារកិច្ចល្អជូនអ្នកដំណើរ និងទេសចរអន្តរជាតិនោះ នឹងផ្តល់ការលើកកម្ពស់កិត្តិនាមកម្ពុជា លើឆាកអន្តរជាតិ និងផ្តល់អនុស្សាវរីយ៍ល្អជូនទេសចរអន្តរជាតិ ស្របតាមផែនការយុទ្ធសាស្ត្របង្កើន៥ អភិវឌ្ឍន៍៣របស់ក្រសួងទេសចរណ៍។តាមរបាយការណ៍គណៈកម្មការអន្តរក្រសួងដើម្បីសម្រួលការធ្វើដំណើរនោះ បានឲ្យដឹងថា នៅក្នុងឆ្នាំ២០២៣ កម្ពុជាទទួលបានទេសចរអន្តរជាតិអញ្ជើញមកទស្សនាមានប្រមាណ៥លាន៤៥ម៉ឺននាក់ ក្នុងនោះភ្ញៀវទេសចរអន្តរជាតិធ្វើដំណើរចូលមកកម្ពុជា តាមច្រកទ្វារព្រំដែនគោកមានប្រមាណជិត៦៥% ច្រកទ្វារព្រំដែនផ្លូវអាកាសមានជាង៣៤% និងច្រកទ្វារព្រំដែនផ្លូវទឹក១.២%។នៅក្នុងរបាយការណ៍បានបញ្ជាក់ថា នៅក្នុងដំណើរការសម្រួលល្អជូនអ្នកដំណើរ និងទេសចរអន្តរជាតិបច្ចុប្បន្ន គឺរាជរដ្ឋាភិបាល បានពង្រីកដាក់ដំណើរការ Cambodia E-Arrival បំពេញឯកសារអន្តោប្រវេសន៍ចូលកម្ពុជាពីចំងាយ នៅខេត្តសៀមរាប និងបន្តអនុវត្តនៅខេត្តព្រះសីហនុ ជំរុញការលុបចោលបាតុភាពមិនល្អ និងភាពអសកម្មនានាទៀត ដែលប៉ះពាលដល់កិត្តិនាមកម្ពុជា និងជំរុញការអនុវត្តគោលការណ៍បដិសណ្ឋារកិច្ចល្អ ទេសចរណ៍មានសុវត្ថិភាពនៅគ្រប់ច្រកទ្វារទាំងអស់៕ អត្ថបទ៖ ស៊ុម សុខជា

អ្នកប្រកបរបរធាក់ស៊ីក្លូនៅភ្នំពេញទទួលបានភ្ញៀវទេសចរបរទេសដឹកជាប្រចាំ

បច្ចុប្បន្នក្រុមអ្នកប្រកបរបរធាក់ស៊ីក្លូនៅរាជធានីភ្នំពេញ នៅតែមានភាពញញឹកដឹកភ្ញៀវទេសចរបរទេសជាប្រចាំ។ ពួកគេតែងតែទៅទទួលភ្ញៀវចុះពីកាប៉ាល់នៅចំណុចផែស្ងួត ក្បែរស្ពានជ្រោយចង្វារ និងនៅតាមសណ្ឋាគារ។ ការទទទួលបានភ្ញៀវទេសចរបរទេសដឹកជាប្រចាំនេះ បានចូលរួមផ្ដល់កម្រៃ ប្រាក់ឧបត្ថម្ភ ដល់ក្រុមអ្នកប្រកបរបរនេះ។ ជារៀងរាល់ព្រឹកក្រុមអ្នកធាក់ស៊ីក្លូជាច្រើន តែងមកជួបជុំគ្នាចាំទទួលភ្ញៀវទេសចរបរទេស ចុះពីកាប៉ាល់នៅចំណុចផែស្ងួត ក្បែរស្ពានជ្រោយចង្វារ។ រីឯអ្នកធាក់ស៊ីក្លូខ្លះ ទៅរង់ចាំភ្ញៀវទេសចរបរទេស នៅតាមសណ្ឋាគារ ដោយពួកគេទទួលបានការដឹកជាប្រចាំ។ ថ្ងៃខ្លះទទួលបានការដឹក ទាំងព្រឹក ទាំងល្ងាចថែមទៀតផង។ នេះជាការលើកឡើង របស់អ្នកធាក់ស៊ីក្លូ ដែលមកទទួលភ្ញៀវចុះពីកាប៉ាល់។ក្រុមអ្នកធាក់ស៊ីក្លូលើកឡើងថា ការទទួលបានភ្ញៀវបរទេសដឹកជាប្រចាំថ្ងៃនេះ ជួយសម្រួលពួកគាត់បានច្រើនលើជីវភាព។ ពួកគាត់ទទួលបានថវិកាពីតម្លៃសេវា ថែមទាំងទទួលបានប្រាក់ឧបត្ថម្ភថែមពីភ្ញៀវទៀតផង។ ពួកគាត់ពិតជាសប្បាយចិត្តដែលមានវត្តមានភ្ញៀវទេសចរបរទេសច្រើនបន្តប្រើប្រាស់សេវាស៊ីក្លូបែបនេះ។សម្រាប់ការដឹកភ្ញៀវទេសចរបរទេសជាប្រចាំនេះ ក៏មានការជួយរៀបចំដោយសមាគមអភិរក្សស៊ីក្លូ និងមុខរបរក្រៅប្រព័ន្ធផងដែរ។ លោក អ៊ឹម សម្បត្តិ ប្រធានសមាគម លើកឡើងថា សមាគមតែងរៀបចំឱ្យអ្នកធាក់ស៊ីក្លូ ឆ្លាស់វេនគ្នា ដឹកភ្ញៀវបរទេស។ លោកថា ចំនួនភ្ញៀវទេសចរបរទេសជិះស៊ីក្លូ មានជាប្រចាំថ្ងៃ ហើយថ្ងៃខ្លះមានចំនួនរហូតដល់ប្រមាណ ១០០នាក់។ លោកបន្តថា ចំនួនភ្ញៀវទេសចរចុះពីកាប៉ាល់នេះនឹងបន្តមានរហូតដល់ខែ មីនា ទើបមានភាពស្ងប់ស្ងាត់។សូមជម្រាបថា អ្នកប្រកបរបរធាក់ស៊ីក្លូក៏ជាក្រុមគោលដៅដែលទទួលបានការជួយឧបត្ថម្ភពីរាជរដ្ឋាភិបាលកម្ពុជាផងដែរ។ ជាក់ស្ដែងសម្ដេចតេជោ ហ៊ុន សែន អតីតនាយករដ្ឋមន្ត្រីប្រទេសកម្ពុជា បានបង្កើតមូលនិធិស៊ីក្លូ កាលពីឆ្នាំ ២០១៨កន្លងទៅ។ មូលនិធិនេះ បានផ្ដល់ថវិកា ២១ ម៉ឺនរៀល ក្នុងមួយខែ ជូនអ្នកប្រកបរបរធាក់ស៊ីក្លូ។ លើសពីនេះ រាល់អ្នកធាក់ស៊ីក្លូទាំងអស់ ក៏ទទួលបាន បណ្ណ ប ស ស សម្រាប់ការទៅទទួលសេវាពិនិត្យ ព្យាបាលដោយមិនគិតថ្លៃផងដែរ៕ អត្ថបទ៖ គឹមហុក

បណ្ដាញសង្គម

ព័ត៌មានថ្មីៗ

កម្ពុជា-អាស៊ែបៃហ្សង់ នឹងបន្តពង្រឹង និងពង្រីកកិច្ចសហប្រតិបត្តិការឱ្យកាន់តែរីកចម្រើនបន្ថែមទៀត

កូរ៉េខាងជើង និងរុស្ស៊ី ចុះហត្ថលេខាលើផែនការសហប្រតិបត្តិការ ៣ឆ្នាំ ស្តីពីការគ្រប់គ្រងគ្រោះមហន្តរាយ

អាកាសយានដ្ឋាន Nuremberg របស់អាល្លឺម៉ង់ បិទដំណើរការដោយសារគ្រាអាសន្នផ្នែកអាកាសចរណ៍

ស៊ុយអែត៖ លោកស្រី Andersson ប្រាប់ថា គណបក្សរបស់លោកស្រី នៅមិនអាចបង្កើតរដ្ឋាភិបាលបាន

លោក TRUMP ថា លោកមិនជឿថា ចិន និងរុស្ស៊ី កំពុងជួយអ៊ីរ៉ង់នោះទេ

សម្ដេចធិបតី៖រយៈពេល៤ថ្ងៃហើយ មិនទាន់បានឃើញលោក អ៊ុ សំអាន ផ្តល់ចម្លើយច្បាស់លាស់ពាក់ព័ន្ធនឹងការអញ្ជើញរបស់សម្ដេចនៅឡើយទេ

សារព័ត៌មាន RIA៖ រុស្ស៊ីចាត់ទុកការរឹបអូសនាវាដឹកប្រេងដោយបារាំងថា ជាការរំលោភលើច្បាប់អន្តរជាតិ

ហ្ស៊កដានីជំរុញឲ្យសមាជិក OIC រួមគ្នាដោះស្រាយការរំលោភបំពានរបស់អ៊ីស្រាអែល

ប្រមុខរដ្ឋកាតា៖ សន្តិសុខ និងអធិបតេយ្យភាពរបស់បណ្តាប្រទេសឈូងសមុទ្រ មិនអាចត្រូវបានគេបំពានបានឡើយ

រុស្ស៊ីអះអាងថា បានវាយប្រហារលើនាវាដែលដឹកសម្ភារៈយោធាទៅកាន់ទីក្រុង Mykolaiv របស់អ៊ុយក្រែន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877