BTV NEWS

កម្ពុជាផ្សព្វផ្សាយជាផ្លូវការ របាយការណ៍វឌ្ឍនភាពនៃការអនុវត្តវិធានការកែទម្រង់មុតស្រួចជាកញ្ចប់

មកដល់ពេលនេះ កសិករចំនួនជាង ១៤០០គ្រួសារ ងាកមកចងក្រងគ្នា ដើម្បីក្លាយជាសហគមន៍កសិកម្មទំនើប

កម្ពុជាកំពុងពិភាក្សាលើការចាប់យកឌីជីថលូបនីយកម្ម ដើម្បីជំរុញវិស័យនេះឱ្យកាន់តែរីកចម្រើន

គណៈកម្មាធិការសេដ្ឋកិច្ចក្រៅប្រព័ន្ធដាក់ឱ្យប្រើប្រាស់សមិទ្ធផលថ្មីលើកកម្ពស់អ្នកសេដ្ឋកិច្ចក្រៅប្រព័ន្ធ

សេដ្ឋកិច្ច និង កសិកម្ម

ភ្ញៀវទេសចរណ៍អន្តរជាតិ កក់សំបុត្រចូលមកកម្ពុជាមានចំនួនកើនឡើងជាបណ្តើរៗ

ភ្នំពេញ៖ កម្ពុជាបានទទួលការកក់សំបុត្រសម្រាប់ភ្ញៀវទេសចរណ៍អន្តរជាតិ ជាពិសេសភ្ញៀវទេសចរណ៍មកពីសហគមន៍អឺរ៉ុប មានចំនួនល្អប្រសើរ បានកើនឡើងជាបណ្តើរៗវិញហើយ សម្រាប់វិសម្សកាល នៅក្នុងរដូវកាល High Season ដែលនឹងឈានចូលមកដល់ក្នុងពេលខាងមុខនេះ។លោកជំទាវ ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា លើកឡើងនៅថ្ងៃ ១៨ ខែសីហា ឆ្នាំ២០២២នេះថា ស្របពេលដែលកម្ពុជាទប់ស្កាត់នៃការរីករាលដាលជំងឺកូវីដ ១៩ បានល្អប្រសើរ និងស្របពេលពិភពលោកមានភាពស្ងប់ស្ងាត់ជាងមុន នៅក្នុងរដូវកាលហៃស៊ីសិន (High Season) ដែលនឹងឈានមកដល់ចាប់ពីខែចុងខែ កញ្ញាខាងមុខ ដែលភ្ញៀវទេសចរណ៍អន្តរជាតិ ជាពិសេសភ្ញៀវទេសចរណ៍មកពីអឺរ៉ុបជាដើម តែងតែបញ្ជាកក់សំបុត្រ ប្រទេសដែលជាគោលដៅទេសចរណ៍របស់ពួកគេ, ក្នុងនោះសម្រាប់កម្ពុជាដែលជាប្រទេសគោលដៅដ៏ល្អប្រសើរប្រកបដោយភាពទាក់ទាញ នៅក្នុងដំណាក់កាលនេះ សង្កេតឃើញថា ភ្ញៀវទេសចរណ៍បរទេស បានចាប់ផ្តើមកក់សំបុត្រចូលមកទស្សនាកម្សាន្តនៅព្រះរាជាណាចក្រកម្ពុជា ជាបណ្តើរៗហើយ ដោយមានចំនួនកើនឡើងល្អប្រសើរ ស្របពេលជើងហោះហើរ ក៏មានចំនួនកើនឡើងបន្តិចម្តងៗ ដែលធ្វើឲ្យកម្ពុជា ចាប់ផ្តើមស្រូបយកចំនួនភ្ញៀវទេសចរណ៍អន្តរជាតិ កាន់តែច្រើនឡើងៗ ។គួររំលឹកថា សម្រាប់ឆមាសទី១ ឆ្នាំ២០២២ នេះ កម្ពុជាទទួលបានទេសចរណ៍អន្តរជាតិចំនួនប្រមាណជាង ៥០ ម៉ឺននាក់ កើនទ្បើងជាង ៣៩៤% ធៀបនឹងរយៈពេលដូចគ្នាឆ្នាំ ២០២១ ខណៈភ្ញៀវទេសចរណ៍ផ្ទៃក្នុង ក៏មានការកើនឡើងប្រមាណជិត ៤០០%។ក្រសួងទេសចរណ៍ ក៏បានខិតខំផ្សព្វផ្សាយ «កម្ពុជាជាគោលដៅទេសចរណ៍សុវត្ថិភាព ផ្ដល់ភាពកក់ក្ដៅ» ចូលរួមរៀបចំពិព័រណ៍វប្បធម៌ទេសចរណ៍ រៀបចំដំណើរទស្សនកិច្ចរបស់ប្រតិភូអន្តរជាតិ បង្កើតព្រឹត្តិការណ៍កីឡាទេសចរណ៍ ទេសចរណ៍ការ៉ាវ៉ាន់ (Caravan Tour) ផ្សព្វផ្សាយផ្លូវទស្សនាកម្ពុជា (Cambodia Road Show)។ក្រៅពីការសិក្សាពីការរៀបចំកញ្ចប់ទស្សនកិច្ចពិសេសនៅខេត្តសៀមរាបនេះ ក្រសួងទេសចរណ៍ក៏ត្រៀមរៀបចំព្រឹត្តិការណ៍ទេសចរណ៍ផ្សេងទៀតដែរ៕ អត្ថបទ៖ សុន រ៉ាឌី

អាជីវកម្មទេសចរណ៍ផ្តល់សេវាគ្មានគុណភាព នឹងមិនត្រូវអនុញ្ញាតឱ្យបើកដំណើរការឡើយ

ភ្នំពេញ៖ ឯកឧត្តម ថោង ខុន ថ្លែងថា គ្រប់អាជីវកម្មទេសចរណ៍ដែលបើកផ្តល់សេវាគ្មានគុណភាព គឺក្រសួងមិនអនុញ្ញាតឲ្យបើកដំណើរការនោះទេ។ថ្លែងក្នុងពិធី ប្រគល់វិញ្ញាបនបត្របញ្ជាក់ការសិក្សា ជំនាញការិយាល័យជួរមុខ, គេហកិច្ច, និងសេវាកម្មម្ហូបអាហារ និងភេសជ្ជៈអមដោយពិធីប្រកាសទទួលស្គាល់មជ្ឈមណ្ឌលវាយតម្លៃសមត្ថភាពអ្នកជំនាញទេសចរណ៍ នៅថ្ងៃទី១៧ខែសីហានេះ ឯកឧត្តមរដ្ឋមន្ត្រី ថោង ខុន ថ្លែងថា ការបើកអាជីកម្មទេសចរណ៍ផ្តល់សេវាមិនមានគុណភាពល្អនេះ គឺវាបង្កការប៉ះពាល់ខ្លាំង ទៅដល់គោលនយោបាយទាក់ទាញទេសចរខ្លាំងណាស់ ។ឯកឧត្តម ថោង ខុន បន្តថា យ៉ាងណាក៏ដោយនៅក្នុងអំឡុងពេលដែលកម្ពុជា កំពុងជួបការរាតត្បាតកូវីដ១៩ ក្រសួងទេសចរណ៍ និងសាលាបណ្តុះបណ្តាលជំនាញវិជ្ជាជីវៈទេសចរណ៍ វីត និងអង្គការពាក់ព័ន្ធ បានទទួលបានការបណ្តុះបណ្តាលជំនាញវិជ្ជាជីវៈក្នុងវិស័យទេសចរណ៍នេះច្រើនណាស់ នៅតាមប្រព័ន្ធអនឡាញផង និងការបណ្តុះបណ្តាលដោយផ្ទាល់ផង ដើម្បីធានាជំរុញការផ្គត់ផ្គង់ធនធានមនុស្សនិងការផ្តល់សេវារបស់អាជីវកម្មក្នុងវិស័យទេសចរណ៍ប្រកបគុណភាព។ឯកឧត្តម បន្តថា នៅក្នុងអំឡុងពេលក្រសួងមិនទាន់បានបូកសរុបលទ្ធផលការបើកអាជីវកម្មទេសចរណ៍ឡើងវិញនោះទេ ខណៈសម្រាប់គោលដៅទេសចរណ៍នៅខេត្តសៀមរាបមួយ ក្នុងរយៈពេល៧ខែចុងក្រោយក្នុងឆ្នាំ២០២២នេះ គឺមានអាជីវកម្មទេសចរណ៍ប្រមាណ ៤៦% បានបើកដំណើរការវិញ ហើយបាននិងកំពុងមានតម្រូវការបុគ្គលិកជំនាញជាច្រើនចូលបំរើការងារវិញផងដែរ៕ អត្ថបទស៊ុម សុខជា

រដ្ឋមន្រ្តីពាណិជ្ជកម្ម បើកកិច្ចប្រជុំដើម្បីពិនិត្យនិងត្រៀមការងារប្រជុំសេដ្ឋកិច្ចអាស៊ាននាខែកញ្ញាខាងមុខ

ភ្នំពេញ៖ ឯកឧត្ដម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ជាប្រធានកិច្ចប្រជុំថ្នាក់រដ្ឋមន្រ្តីសេដ្ឋកិច្ចអាស៊ាន និងជាប្រធានគណៈកម្មការរៀបចំកិច្ចប្រជុំក្រោមសសរស្តម្ភសហគមន៍សេដ្ឋកិច្ចអាស៊ានសម្រាប់ឆ្នាំ២០២២ និងកិច្ចប្រជុំពាក់ព័ន្ធ បានបើកកិច្ចប្រជុំត្រៀមលើកទី៣ កាលពីថ្ងៃទី១៦ ដើម្បីតាមដានវឌ្ឍនភាពក្នុងការរៀបចំត្រៀមកិច្ចប្រជុំថ្នាក់រដ្ឋមន្រ្តីសេដ្ឋកិច្ចលើកទី៥៤ និងកិច្ចប្រជុំពាក់ព័ន្ធ ដែលគ្រោងនឹងប្រព្រឹត្តទៅនៅពាក់កណ្តាលខែកញ្ញាខាងមុខ។ក្រសួងពាណិជ្ជកម្ម កាលពីល្ងាចថ្ងៃទី១៦ ខែសីហាកន្លងទៅ បានឲ្យដឹងថា កិច្ចប្រជុំនេះ មានការអញ្ជើញចូលរួមពីសមាជិកអនុគណៈកម្មការ និងក្រុមការងារលេខាធិការដ្ឋាន មន្រ្តីជំនាញពាក់ព័ន្ធ ព្រមទាំងមន្ត្រីជំនាញមកពីអន្តរក្រសួង-ស្ថាប័នពាក់ព័ន្ធ ដើម្បីតាមដានវឌ្ឍនភាពក្នុងការរៀបចំត្រៀមកិច្ចប្រជុំថ្នាក់រដ្ឋមន្រ្តីសេដ្ឋកិច្ចលើកទី៥៤ និងកិច្ចប្រជុំពាក់ព័ន្ធ ដែលគ្រោងនឹងប្រព្រឹត្តទៅចាប់ពីថ្ងៃទី១១-១៨ ខែកញ្ញា ឆ្នាំ២០២២ នៅខេត្តសៀមរាប។ កិច្ចប្រជុំនេះ ផ្តោតសំខាន់លើរបៀបវារៈសំខាន់ៗ រួមមាន៖ របាយការណ៍វឌ្ឍនភាព បញ្ហាប្រឈម និងសំណូមពររបស់អនុគណៈកម្មការទាំងអស់ ក្នុងការត្រៀមរៀបចំកិច្ចប្រជុំថ្នាក់រដ្ឋមន្រ្តីសេដ្ឋកិច្ចអាស៊ានលើកទី៥៤ និងកិច្ចប្រជុំពាក់ព័ន្ធ, អនុសាសន៍ណែនាំដោះស្រាយបញ្ហាប្រឈម និងទិសដៅការងារបន្តជូនដល់គណៈកម្មការនិងអនុគណៈកម្មការនីមួយៗ និងបញ្ហាផ្សេងៗ។នៅក្នុងកិច្ចប្រជុំនោះ ឯកឧត្តមរដ្ឋមន្រ្តី បានផ្តល់អនុសាសន៍មួយចំនួន សម្រាប់ជាទិសដៅការងារបន្ទាប់ ជូនអនុគណៈកម្មការនីមួយៗ ព្រមទាំងក្រុមការងារលេខាធិការដ្ឋាន ដូចជា រៀបចំកន្លែងប្រជុំនិងសិល្បៈ, ទីតាំងរៀបចំកិច្ចប្រជុំ, សណ្ឋាគារស្នាក់នៅ សន្តិសុខ, ទីតាំងធ្វើតេស្តយកសំណាក និងតាមដានបញ្ជីជើងហោះហើររបស់គណៈប្រតិភូចូលរួមកិច្ចប្រជុំ។ល។ឯកឧត្តមរដ្ឋមន្រ្តី បានថ្លែងអំណរគុណយ៉ាងជ្រាលជ្រៅជូនអង្គប្រជុំ ដែលបានខិតខំយកចិត្តទុកដាក់បំពេញកាតព្វកិច្ច និងតួនាទី ក្នុងស្មារតីបុរេសកម្ម និងទទួលខុសត្រូវខ្ពស់ ក្នុងការរៀបចំកិច្ចប្រជុំនានាក្រោមសសរស្តម្ភសហគមន៍សេដ្ឋកិច្ចឱ្យប្រព្រឹត្តទៅបានយ៉ាងរលូន និងទទួលបានលទ្ធផលជូនជាតិយ៉ាងល្អប្រសើរ៕អត្ថបទ៖ឈិត បូរ៉ាវី

កម្ពុជាកំពុងស្រូបយកឧស្សាហកម្មកម្មន្តសាលមិនមែនកាត់ដេរកាន់តែច្រើន ចូលរួមជំរុញកំណើនសេដ្ឋកិច្ច

ភ្នំពេញ៖ រាជរដ្ឋាភិបាលកម្ពុជា បាននិងកំពុង ទាក់ទាញឧស្សាហកម្មកម្មន្តសាលមិនមែនកាត់ដេរកាន់តែច្រើន ដែលផលិតកម្មប្រភេទនេះ បានបង្កើតនូវតម្លៃបន្ថែមខ្ពស់ ដើម្បីជួយរុញកំណើនសេដ្ឋកិច្ចជាតិឲ្យកាន់តែរឹងមាំ។ ឯកឧត្តមបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា ថ្លែងលើកឡើង ក្នុងកិច្ចសម្ភាសន៍ជាមួយភ្នាក់ងារអ្នកយកព័ត៌មាន BTV នៅថ្ងៃ ១៧ខែសីហា ឆ្នាំ២០២២ នេះថា ការខិតខំប្រឹងប្រែងគៀងគររកអ្នកវិនិយោគរបស់រាជរដ្ឋាភិបាល មកដល់បច្ចុប្បន្នកម្ពុជាទទួលរោងចក្រ សហគ្រាស ជាពិសេសការអភិវឌ្ឍលើវិស័យកម្មន្តសាលមិនមែនកាត់ដេរបានកាន់តែច្រើន និងបានកំពុងដំណើការនៅក្នុងប្រទេស ដែលវិស័យនេះបានកំពុងពង្រីកខ្លួនកាន់ធំនៅក្នុងសេដ្ឋកិច្ច។ ឯកឧត្តមបណ្ឌិត បន្តថា កម្ពុជាពិតជាត្រូវការខ្សែច្រវ៉ាក់ផលិតកម្មប្រភេទនេះ ព្រោះកម្ពុជាមិនអាចពឹងផ្អែកលើវិស័យឧស្សាហកម្មកាត់ដេរ និងវិស័យកសិកម្មតែប៉ុណ្ណោះនោះឡើយ ខណៈដែលវិស័យឧស្សាហកម្ម កម្មន្តសាលមិនមែនកាត់ដេរ បានកំពុងស្រូបយកធនធានជំនាញ និងបច្ចេកវិទ្យា ជាពិសេសបានផ្តល់នូវតម្លៃបន្ថែមខ្ពស់ ដែលជាផ្នែកមួយយ៉ាងសំខាន់សម្រាប់ជួយរុញកំណើនសេដ្ឋកិច្ច។សូមបញ្ជាក់ថា ការនាំចេញផលិតផលវិនិយោគមិនមែនកាត់ដេរ នៅក្នុងឆមាសទី១ ឆ្នាំ ២០២២ ក្នុងនោះកម្ពុជាបាននាំចេញដូចជា៖ គ្រឿងបំណែកអេឡិចត្រូនិក កង់ ផលិតផលពីឈើ ផលិតផលប្លាស្ទិច គ្រឿងបន្លាស់រថយន្ត និងផលិតផលឧស្សាហកម្មផ្សេងៗទៀត មានចំនួនជាង ២ ៦៥៩ លានដុល្លារអាមេរិក កើនឡើងប្រមាណជាង ៧៥៩ លានដុល្លារអាមេរិក ស្មើនឹង ៤០%, បើធៀបរយៈពេលដូចគ្នាទៅឆ្នាំ២០២១។ចំណែកវិស័យកាត់ដេរវិញ រាជរដ្ឋាភិបាល បានប៉ាន់ស្មានថា វិស័យនេះ នឹងរក្សាបានកំណើន ក្នុងអត្រា ១២,២% ក្នុងឆ្នាំ២០២២ ដែលគាំទ្រដោយភាពរឹងមាំនៃតម្រូវការខាងក្រៅ, ការអនុវត្តកិច្ចព្រមព្រៀងពាណិជ្ជកម្មសេរី និងការងើបឡើងវិញនៃតម្រូវការក្នុងស្រុក៕ អត្ថបទ៖ សុន រ៉ាឌី

រាជរដ្ឋាភិបាលបញ្ចេញឥណទានគាំទ្រគម្រោងស្រូវអង្ករមានទំហំទឹកប្រាក់ ៨០ លានដុល្លារ

ភ្នំពេញ៖ រាជរដ្ឋាភិបាលបានបញ្ចេញឥណទាន គាំទ្រគម្រោងស្រូវអង្ករនៅកម្ពុជា គិតមកដល់ពេលនេះ មានទំហំទឹកប្រាក់ជាង ៨០ ដុល្លារអាមេរិក ដោយរាជរដ្ឋាភិបាល នឹងពិចារណាផ្តល់ឥណទានបន្ថែម ដើម្បីជម្រុញផលិតកម្មស្រូវអង្ករ និងចូលរួមចំណែកដល់កំណើនសេដ្ឋកិច្ចក្រោយពីវិបត្តិកូវីដ ១៩ នេះ។ឯកឧត្តម ចាន់ សីហា អគ្គនាយករងធនាគារអភិវឌ្ឍន៍ជនបទ និងកសិកម្ម (ARDB) នៃក្រសួងសេដ្ឋកិច្ច និងហិរញ្ញវត្ថុ ថ្លែងក្នុងកិច្ចសម្ភាសន៍ជាមួយភ្នាក់ងារអ្នកយកព័ត៌មាន BTV នៅថ្ងៃទី ១៥ ខែ សីហា ឆ្នាំ ២០២២ នេះថា ចំពោះគម្រោងពិសេសរបស់រាជរដ្ឋាភិបាល ដែលធនាគារអភិវឌ្ឍន៍ជនបទ និងកសិកម្ម បានអនុវត្តកន្លងមករួមមានគម្រោងគាំទ្រដល់វិស័យស្រូវអង្ករសម្រាប់ការនាំចេញ និងគម្រោងគំាទ្រដល់សហគ្រាសធុនតូច និងធម្យម ដែលពាក់ព័ន្ធវិស័យកសិកម្ម ដែលមានទំហំទឹកប្រាក់សរុប ១០០ លានដុល្លារ។ឯកឧត្តម បន្តថា ធនាគារអភិវឌ្ឍន៍ជនបទ និងកសិកម្ម បានអនុវត្តគម្រោងនេះចាប់តាំងពីឆ្នាំ ២០១៦ ។ មកដល់ពេលនេះ ARDB បានបញ្ចេញថវិកាប្រមាណជា ៨០ លានដុល្លារអាមេរិករួចហើយ គឺការគាំទ្រវិស័យស្រូវអង្ករតែមួយមុខគត់ ។ ចំណែកជំហានបន្តបន្ទាប់ទៀត ឯកឧត្តម រំពឹងថា រាជរដ្ឋាភិបាល នឹងពិចារណាផ្តល់ឥណទានបន្ថែម សម្រាប់គម្រោងទាំងនេះ ដើម្បីជម្រុញកំណើនសេដ្ឋកិច្ច នៅក្រោយពីវិបត្តិជំងឺកូវីដ-១៩ នេះ។ទាក់ទងគម្រោងគាំទ្រស្រូវអង្ករ,លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជា ថ្លែងថា រាជរដ្ឋាភិបាលតែងតែគិតគូរនឹងផ្តល់កញ្ចប់ថវិកាពិសេស ដើម្បីគាំទ្រដល់ស្រូវអង្ករកម្ពុជា ជាពិសេសការផ្តល់ឥណទានជាទុនបង្វែល សម្រាប់ការប្រមូលទឹកស្រូវរបស់ម្ចាស់សហគ្រាសរោងម៉ាស៊ីនពីកសិករ, គម្រោងពង្រីករោងម៉ាស៊ីនកិនស្រូវ និងគម្រោងសម្រាប់បង្កើតឡសម្ងួតជាដើម ។ ឯកឧត្តម ចាន់ សីហា បញ្ជាក់ថា គម្រោងផ្តល់ហិរញ្ញប្បទានពិសេសរបស់រាជរដ្ឋាភិបាល បានចូលរួមចំណែកយ៉ាងខ្លាំង ជាពិសេសក្នុងការរីករាលដាលជម្ងឺកូវីដ ១៩ ដើម្បីលើកកម្ពស់ជីវភាពរស់នៅរបស់ប្រជាជន និងសម្រាប់ស្តុកស្បៀងក្នុងវិបត្តិដែលកំពុងកើតឡើងជាដើម, ជាក់ស្តែងការគាំទ្រសម្រាប់ការនាំចេញស្រូវអង្ករ តាមរយៈការផ្តល់ឥណទានមានការប្រាក់ទាបនេះ គឺជាការចូលរួមចំណែកកាត់នូវបន្ថយថ្លៃដើមដល់ម្ចាស់អាជីវកម្មជាច្រើនផងដែរ៕ អត្ថបទ៖ សុន រ៉ាឌី

ពន្ធដារប្រមូលពន្ធ-អាករបានជាង ២ ២១០ លានដុល្លារអាមេរិក ក្នុងរយៈពេល៧ខែ

ភ្នំពេញ៖ អគ្គនាយកដ្ឋានពន្ធដារ បានប្រមូលចំណូលពន្ធអាករគ្រប់ប្រភេទ តាមប្រព័ន្ធគ្រប់គ្រងទិន្នន័យអនឡាញ អនុវត្តបានចំនួនជិត ៨ ៩៥១ ប៊ីលានរៀល ត្រូវប្រមាណជាង ២ ២១០ លានដុល្លារ ក្នុងរយៈពេល៧ខែ ឆ្នាំ២០២២ ស្មើជាង ៧៨% នៃផែនការច្បាប់ហិរញ្ញវត្ថុប្រចាំឆ្នាំ។របាយការណ៍របស់អគ្គនាយកដ្ឋានពន្ធដារ បានបង្ហាញឲ្យដឹងថា នៅក្នុងខែ កក្កដា ឆ្នាំ ២០២២ នេះ ចំណូលពន្ធ-អាករគ្រប់ប្រភេទដែលអគ្គនាយកដ្ឋានពន្ធដារប្រមូលបាន តាមប្រព័ន្ធគ្រប់គ្រងទិន្នន័យចំណូលអនឡាញរបស់អគ្គនាយកដ្ឋានពន្ធដារ មានចំនួនជិត ៩៧០ ប៊ីលានរៀល ត្រូវប្រមាណជាង ២៣៩ លានដុល្លារ ស្មើជាង ៨% នៃផែនការច្បាប់ហិរញ្ញវត្ថុសម្រាប់ការគ្រប់គ្រងឆ្នាំ ២០២២ ប្រៀបធៀបនឹងចំណូលពន្ធ-អាករប្រចាំនេះ ទៅខែកក្កដា ឆ្នាំ២០២១ ឃើញថា បានកើនឡើងចំនួនជាង ១៥៦ ប៊ីលានរៀលប្រមាណជាង ៣៨ លានដុល្លារ ស្មើជាង ១៩%។ចំណែកប្រមូលចំណូលសរុបរយៈពេល ៧ខែ ឆ្នាំ២០២២ នេះវិញ ចំណូលពន្ធ-អាករ ដែលអគ្គនាយកដ្ឋានពន្ធដារប្រមូលបានជាក់ស្ដែង តាមប្រព័ន្ធគ្រប់គ្រងទិន្នន័យចំណូលអនឡាញ មានចំនួនជិត ៨ ៩៥១ ប៊ីលានរៀល ត្រូវប្រមាណជាង ២ ២១០ លានដុល្លារ ស្មើជាង ៧៨% នៃផែនការច្បាប់ហិរញ្ញវត្ថុប្រចាំឆ្នាំ ធៀបនឹងចំណូលពន្ធ-អាករក្នុងរយៈពេលដូចគ្នា ឆ្នាំ២០២១ កើនឡើងជាង ១ ៩៨៩ ប៊ីលានរៀល ត្រូវជាង ៤៩១ លានដុល្លារ ស្មើជាង ២៨%។ឯកឧត្តម គង់ វិបុល អគ្គនាយកដ្ឋានពន្ធដារ លើកឡើងថា ទោះបីជាមានហានិភ័យដែលបណ្តាលពីភាពមិនប្រាកដប្រជា និងការប្រែប្រួលបរិបទសេដ្ឋកិច្ចសកល រលកនៃការរីករាលដាល និងបំប្លែងឥតឈប់ឈរនៃមេរោគកូវីដ-១៩ ភាពតាន តឹងនៃភូមិសាស្ត្រនយោបាយ និងសន្តិសុខសកល ដែលបានជះឥទ្ធិពលមកលើស្ថានភាពសេដ្ឋកិច្ចកម្ពុជាយ៉ាងណាក្ដី ក៏ស្ថានភាពនៃការគ្រប់គ្រងប្រមូលចំណូលពន្ធក្នុងឆ្នាំ២០២០, ឆ្នាំ២០២១ និងរយៈពេល ៧ ខែ ឆ្នាំ ២០២២ នេះ នៅតែរក្សាបាននូវស្ថានភាពល្អប្រសើរ ដោយតែងតែសម្រេចបានគ្រប់ និងលើសផែនការ កំណត់ក្នុងច្បាប់ស្តីពីហិរញ្ញវត្ថុសម្រាប់ការគ្រប់គ្រងប្រចាំឆ្នាំ ដែលបានឆ្លើយតបទៅនឹងតម្រូវការថវិកាសម្រាប់ការចំណាយនានា របស់រដ្ឋាភិបាល ជាពិសេស ក្នុងការប្រយុទ្ធប្រឆាំងនឹងកូវីដ-១៩៕អត្ថបទ៖ សុន រ៉ាឌី

កម្ពុជានាំចេញកៅស៊ូមានទឹកប្រាក់សរុប ២៥៥លានដុល្លារ ក្នុងរយៈពេល៧ខែ

ភ្នំពេញ៖ កម្ពុជា បាននាំចេញកៅស៊ូ ទៅក្រៅប្រទេស ទទួលបានចំណូលសរុប ប្រមាណ ២៥៥លានដុល្លារ ក្នុងរយៈពេល៧ខែ ឆ្នាំ២០២២នេះ។របាយការណ៍របស់អគ្គនាយកដ្ឋានកៅស៊ូ បានឱ្យដឹងថា កម្ពុជាបាននាំចេញកៅស៊ូស្ងួតចំនួន ១៦១ ៥៦២តោនក្នុងរយៈពេល៧ខែនៃឆ្នាំ ២០២២ ធ្លាក់ចុះបន្តិចបន្តួច ០.៣ ភាគរយ ធៀបនឹងរយៈពេលដូចគ្នាឆ្នាំមុន។របាយការណ៍ បាននិយាយថា ព្រះរាជាណាចក្រកម្ពុជា ទទួលបានប្រាក់ចំណូលចំនួន ២៥៤.៨ លានដុល្លារអាម៉េរិកពីការនាំចេញទំនិញក្នុងអំឡុងខែមករាដល់ខែកក្កដាឆ្នាំនេះ ធ្លាក់ចុះ ៦ ភាគរយពី ២៧១ លានដុល្លារក្នុងរយៈពេលដូចគ្នា កាលពីឆ្នាំមុន។ឯកឧត្តម ហ៊ឹម អូន អគ្គនាយកនៃអគ្គនាយកដ្ឋានកៅស៊ូ បាននិយាយនៅក្នុងរបាយការណ៍ថា ជ័រកៅស៊ូមួយតោនមានតម្លៃជាមធ្យម ១ ៥៧៧ ដុល្លារក្នុងអំឡុងពេលប្រាំពីរខែនៃឆ្នាំ ២០២២ បានថយចុះ ៩៥ ដុល្លារ ក្នុងមួយតោន បើធៀបនឹងរយៈពេលដូចគ្នាកាលពីឆ្នាំមុន ។ កម្ពុជានាំចេញជ័យកៅស៊ូភាគច្រើនទៅកាន់ប្រទេសម៉ាឡេស៊ី វៀតណាម សិង្ហបុរី និងចិន។ការវិនិយោគពីវិស័យឯកជន បង្កើតរោងចក្រផលិតកង់រថយន្ត ក្នុងក្រុងបាវិត និងក្រុងព្រះសីហនុ កាលពីពេលថ្មីៗនេះ នឹងជួយជំរុញ និងធានាទីផ្សារដល់ជ័រកៅស៊ូក្នុងស្រុក។របាយការណ៍ បានបន្តថា មកដល់ពេលនេះ កម្ពុជាបានដាំដើមកៅស៊ូលើផ្ទៃដីសរុបចំនួន ៤០៤ ០៤៤ ហិកតា ដែលក្នុងនោះផ្ទៃដីចៀរជ័រកៅស៊ូ ៣១០.១៩៣ ហិកតា ឬ ៧៧ ភាគរយ៕ អត្ថបទ៖ វណ្ណៈ

ស្តង់ដារជួយលើកកម្ពស់ផលិតផល និងការប្រកួតប្រជែងនៅទីផ្សារក្នុងស្រុក និងនាំចេញ

ភ្នំពេញ៖ កម្ពុជា បានអនុម័តស្តង់ដារ មានចំនួនជាង ១ ពាន់ស្តង់ដាររួចហើយ និងបច្ចុប្បន្ន ក្រុមប្រឹក្សាស្តង់ដារជាតិ កំពុងជម្រុញបង្កើត និងងអនុម័តយកស្តង់ដារថ្មីៗបន្ថែមទៀត សម្រាប់ជាមូលដ្ឋានបើកនូវរបាំងបច្ចេកទេស ដើម្បីលើកកម្ពស់ និងការប្រកួតប្រជែងផលិតផលទាំងក្នុង និងក្រៅស្រុក។តាមរបាយការណ៍របស់វិទ្យាស្ថានស្តង់ដារកម្ពុជា នៃក្រសួងឧស្សាហកម្ម វិទ្យាសាស្ត្រ បចេ្ចកវិទ្យា និងនវានុវត្តន៍ បង្ហាញឲ្យដឹងថា វិទ្យាស្ថានបានកំពុងខិតខំប្រឹងប្រែង រៀបចំ កែសម្រួលស្តង់ដារអន្តរជាតិមួយចំនួន ឲ្យមកជាស្តង់ដារជាតិ, គិតមកដល់ពេលនេះកម្ពុជាបានអនុម័តស្តង់ដារ មានចំនួន ១ ០៣០ ស្តង់ដាររួចហើយ នឹងកំពុងជម្រុញបង្កើត និងអនុម័តយកស្តង់ដារថ្មីៗឲ្យបានច្រើនទៀត ជាពិសេសស្តង់ដារសម្រាប់វិស័យឧស្សាហកម្ម និងកសិកម្មជាដើម។ វិទ្យាស្ថានស្តង់ដារកម្ពុជា បានចេញ និងបន្តវិញ្ញាបនបត្រប្រព័ន្ធសរុបចំនួន ៣៨ ក្នុងនោះរួមមានប្រព័ន្ធវិញ្ញាបនបត្រប្រព័ន្ធការអនុវត្តផលិតកម្មល្អ (GMP), វិញ្ញាបនបត្រប្រព័ន្ធសុវត្ថិភាពម្ហូបអាហារ (HACCP), ចេញវិញ្ញាបនបត្រប្រព័ន្ធប្រព័ន្ធគ្រប់គ្រងគុណភាព (ISO 9001:2015), វិញ្ញាបនបត្រប្រព័ន្ធគ្រប់គ្រងសុវត្តិភាពម្ហូបអាហារ ( ISO 22000: 2018) និងវិញ្ញាបនបត្របញ្ជាក់អនាម័យជាដើម។ស្តង់ដាសំខាន់ៗ ដែលកម្ពុជាកំពុងដាក់ឲ្យប្រើប្រាស់រួមមាន៖ ស្តង់ដារផលិតផលផ្នែកម្ហូបអាហារ និងម្ហូបអាហារវេចខ្ចប់ជាមុន ស្តង់ដារផលិតផលផ្នែកឧបករណ៍អគ្គិសនី និងអេឡិចត្រូនិក ស្តង់ដាផ្នែកវិធីសាស្ត្រធ្វើតេស្ត, ស្តង់ដាផ្នែកសារធាតុគីមី, ស្តង់ដាផលិតផលផ្នែកសម្ភារសំណង់, ស្តង់ដាផលិតផលផ្នែកយានយន្ត, ស្តង់ដាផលិតផលផ្នែកផលិតផលពីកៅស៊ូ, ស្តង់ដាផលិតផលផ្នែកគ្រឿងសង្ហារឹមផលិតពីឈើ ស្ថិតក្នុងចំណោមស្តង់ដារផ្សេងទៀត៕ អត្ថបទ៖ សុន រ៉ាឌី

អ្នកជំនាញកម្ពុជាជួបប្រជុំគ្នា បើកវេទិកាស្តីពីបញ្ញាសិប្បនិមិ្មត និងសង្គម

ភ្នំពេញ៖ ដោយសង្កេតឃើញថា បញ្ញាសិប្បនិមិ្មត (Artificial Intelligence) ហៅកាត់ថា អេអាយ (AI) កំពុងដើរតួនាទីយ៉ាងសំខាន់ក្នុងការគាំទ្រនិងជំរុញកំណើនសេដ្ឋកិច្ច និងកសាងសង្គមឌីជីថលនៅកម្ពុជា សាកលវិទ្យាល័យខេមតិច សហការជាមួយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និង AI-Cambodia បានរៀបចំវេទិកាសំខាន់មួយ ស្តីពីបញ្ញាសិប្បនិមិ្មត និងសង្គម នៅរាជធានីភ្នំពេញ។វេទិកាស្តីពី បញ្ញាសិប្បនិមិ្មត និងសង្គម បានប្រព្រឹត្តទៅ នៅរសៀលថ្ងៃទី១០ ខែសីហា ឆ្នាំ២០២២ ដោយមានការចូលរួមពីអ្នកតំណាងមកពីក្រសួងពាក់ព័ន្ធ សាកលវិទ្យាល័យ ស្ថាប័នស្រាវជ្រាវ វិស័យឯកជន និងសិស្ស និស្សិត ដើម្បីឆ្លើយតបទៅនឹងការអភិវឌ្ឍ និងលើកកម្ពស់ការប្រើប្រាស់បច្ចេកវិទ្យាបញ្ញាសិប្បនិម្មិតក្នុងគោលដៅល្អៗ។ឯកឧត្តមសាស្រ្តាចារ្យបណ្ឌិត ឆែម គាតរិទ្ធី រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋមន្រ្តីស្តីទីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ មានប្រសាសន៍ប្រាប់ទូរទស្សន៍ព័ត៌មាន ប៊ីធីវី នៅក្រោយអង្គវេទិកាថា វេទិកានេះរៀបចំឡើងក្នុងយន្តការជាកត្តាលិករជំរុញការពិភាក្សា និងពង្រឹងកិច្ចសហប្រតិបត្តិការក្នុងចំណោមភាគីពាក់ព័ន្ធ ដើម្បីប្រមើមើលកាលានុវត្តភាព និងដោះស្រាយបញ្ហាចម្បងមួយចំនួនមាន ដូចជាឯកជនភាព សនិ្តសុខនិងសុវត្ថិភាព ការអប់រំ សុខភាព ទីផ្សារការងារ ការអភិវឌ្ឍឧស្សាហកម្ម និងការបង្កើនជំនាញ ឬបង្កើតជំនាញថ្មីសម្រាប់យុគសម័យឌីជីថល។លោក យឹម ប្រសិទ្ធីឬទ្ធិ នាយកប្រតិបតិ្ត នៃក្រុមហ៊ុន Quantum Engineering and Manufacturing បានលើកឡើងថា បច្ចេកវិទ្យាមួយនេះ ស្ថិតនៅក្នុងដំណាក់កាលអភិវឌ្ឍន៍ដំបូង និងទាមទារឱ្យបន្តការអភិវឌ្ឍដើម្បីឲ្យវានៅតែអាចមានសមត្ថភាពជំរុញនវានុវត្តន៍ និងការលូតលាស់ផ្នែកសេដ្ឋកិច្ច។ ក្នុងន័យនេះហើយ បានជាការអភិវឌ្ឍបច្ចេកវិទ្យាបញ្ញាសិប្បនិម្មិត ត្រូវបានចាត់ទុកជារបៀបវារៈ និងគោលនយោបាយចម្បងរបស់ប្រទេសមួយចំនួនធំ។វេទិកានេះថា ដើម្បីពិនិត្យមើលទិដ្ឋភាពនៃការប្រើប្រាស់បច្ចេកវិទ្យាបញ្ញាសិប្បនិម្មិតជាទូទៅ នៅកម្ពុជានា ពេលបច្ចុប្បន្ន និងនិន្នាការអនាគត និងឥទិ្ធពលនៃបច្ចេកវិទ្យាមួយនេះទៅលើសង្គមទាំងមូល ព្រមទាំងបង្ហាញ ពីគោលនយោបាយសំខាន់ៗរបស់រាជរដ្ឋាភិបាល សម្រាប់ការលើកកម្ពស់ និងពង្រឹងការអភិវឌ្ឍបច្ចេក វិទ្យាក្នុងយុគសម័យបដិវត្តន៍ឧស្សាហកម្ម៤.០៕អត្ថបទ៖ បូរ៉ាវី

កម្ពុជា-សហរដ្ឋអាម៉េរិក បន្តកិច្ចសហប្រតិបត្តិការពាណិជ្ជកម្ម-វិនិយោគ

ភ្នំពេញ៖ កម្ពុជា និងសហរដ្ឋអាមេរិក ជំរុញបន្តកិច្ចសហប្រតិបត្តិការ សំដៅលើកកម្ពស់បរិយាកាសវិនិយោគ និងទាក់ទាញក្រុមហ៊ុនវិនិយោគធំៗរបស់សហរដ្ឋអាម៉េរិក ឱ្យមកវិនិយោគរយៈពេលវែងនៅកម្ពុជា។នេះជាការលើកឡើងក្នុងជំនួបរវាង ឯកឧត្តម បួន សារៈមុនី រដ្ឋលេខាធិការ ក្រសួងពាណិជ្ជកម្ម កាលពីថ្ងៃទី១០ ខែសីហា ជាមួយគណៈប្រតិភូ តំណាងពាណិជ្ជកម្មសហរដ្ឋអាម៉េរិក ដឹកនាំដោយលោកស្រី Wallis Yu នាយកប្រចាំតំបន់អាស៊ីអាគ្នេយ៍ និងប៉ាស៊ីហ្វិក ក្រោមកិច្ចសម្របសម្រួលដោយស្ថានទូតសហរដ្ឋអាម៉េរិកប្រចាំនៅកម្ពុជា ដើម្បីទទួលបាននូវបច្ចុប្បន្នភាពព័ត៌មានទាក់ទងនឹងវិស័យពាណិជ្ជកម្ម និងវិនិយោគ នៅកម្ពុជា។ក្នុងជំនួបនេះ ឯកឧត្តមរដ្ឋលេខាធិការ បានលើកឡើងថា ទោះបីស្ថិតក្នុងស្ថានភាពរីករាលដាលនៃជម្ងឺកូវីដ-១៩ក្តី ទំហំពាណិជ្ជកម្មកម្ពុជា-សហរដ្ឋអាម៉េរិកមានចំនួន ៦.២ប៊ីលានដុល្លារអាម៉េរិក ក្នុងរយៈពេល ៦ខែដើមឆ្នាំ២០២២ ដែលជាការកើនឡើងក្នុងអត្រាកំណើន ៦១.៥៤% ធៀបនឹង ៦ខែ ដើមឆ្នាំ២០២១។ឯកឧត្តមរដ្ឋលេខាធិការ បន្តថា កម្ពុជាបាននិងកំពុងខិតខំប្រឹងប្រែងឥតឈប់ឈរ ដើម្បីធ្វើយ៉ាងណាឱ្យបរិយាកាសពាណិជ្ជកម្ម-វិនិយោគនៅកម្ពុជាកាន់តែមានភាពទាក់ទាញ និងអំណោយផលដល់វិនិយោគិនអន្តរជាតិមកពីបណ្តាប្រទេសនានាលើពិភពលោក។ជាការឆ្លើយតប លោកស្រី Wallis Yu ក៏បានថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាលកម្ពុជា ជាពិសេសគឺក្រសួងពាណិជ្ជកម្មកម្ពុជា ដែលបានធ្វើការសម្របសម្រួលអន្តរក្រសួងដើម្បីឱ្យកម្ពុជាសម្រេចទទួលយកស្តង់ដារយានយន្តសហរដ្ឋអាម៉េរិក ជាហេតុធ្វើឱ្យកម្ពុជាបានក្លាយជាទីផ្សារដ៏សំខាន់មួយក្នុងវិស័យយានយន្តសហរដ្ឋអាម៉េរិក។បន្ថែមពីនេះ លោកស្រីបានស្នើសុំឱ្យក្រសួងពាណិជ្ជកម្មកម្ពុជា បន្តសហការផ្តល់បច្ចុប្បន្នភាពព័ត៌មានទាក់ទងនឹងវិស័យច្បាប់ និងបទប្បញ្ញត្តិ ពាក់ព័ន្ធក្នុងវិស័យពាណិជ្ជកម្ម-វិនិយោគ ដល់តំណាងពាណិជ្ជកម្មសហរដ្ឋអាម៉េរិកសំដៅលើកកម្ពស់បរិយាកាសវិនិយោគ និងទាក់ទាញក្រុមហ៊ុនវិនិយោគធំៗរបស់សហរដ្ឋអាម៉េរិក ឱ្យមកវិនិយោគរយៈពេលវែងនៅកម្ពុជា ក្នុងវិស័យបច្ចេកវិទ្យា មានដូចជា ក្រុមហ៊ុន Amazon និង ក្រុមហ៊ុន Meta (Facebook) ជាដើម។ជាមួយគ្នានេះ លោកស្រីក៏បានជម្រាបមកកាន់ក្រសួងពាណិជ្ជកម្មកម្ពុជាផងដែរថា ថ្មីៗនេះរាជរដ្ឋាភិបាលសហរដ្ឋអាម៉េរិកកំពុងដំណើរការនីតិវិធីវាយតម្លៃលក្ខខណ្ឌនានា លើប្រទេសដែលទទួលអត្ថប្រយោជន៍មួយចំនួន ដើម្បីសម្រេចថានឹងបន្តផ្តល់ប្រព័ន្ធអនុគ្រោះពន្ធទូទៅ (GSP) ដល់ប្រទេសទាំងនោះ ដែលក្នុងនោះក៏មានកម្ពុជាផងដែរ៕ អត្ថបទ៖ វណ្ណៈ

បណ្ដាញសង្គម

ព័ត៌មានថ្មីៗ

សម្ដេចធិបតី ហ៊ុន ម៉ាណែត ថ្លែងអំណរគុណដល់បងប្អូនមហាគ្រួសារខ្មែរ ដែលបានជួបជុំគ្នាជាលើកទីពីរ ជាសារលើកទឹកចិត្តដ៏ធំធេងទៅដល់វីរកងទ័ពជួរមុខ

ប្រតិភូគណៈចលនាសាសនិកឥស្លាមកម្ពុជា នាំយកអំណោយឧបត្ថម្ភជូនកងកម្លាំងជួរមុខ ដែលកំពុងឈរជើងការពារព្រំដែន ខេត្តព្រះវិហារ

ឯកឧត្តម ឌិត ទីណា អញ្ជើញបើកកិច្ចប្រជុំបូកសរុបសកម្មភាព និងលទ្ធផលការងារមូលដ្ឋានខេត្តបន្ទាយមានជ័យ

កូនប្រុសពៅសម្ដេចធិបតី ហ៊ុន ម៉ាណែត ទទួលបានមេដាយមាសសិស្សឆ្នើម លើការប្រកួតគណិតវិទ្យាអន្តរជាតិ ចំណាត់ថ្នាក់លេខមួយ ៣ឆ្នាំជាប់គ្នា

ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី បន្តចុះពិនិត្យ ព្យាបាលជំងឺ ជូនប្រជាពលរដ្ឋដោយឥតគិតថ្លៃ នៅឃុំតាសាល ស្រុកឱរ៉ាល់ ខេត្តកំពង់ស្ពឺ

ចិនប្តេជ្ញាចាត់វិធានការកាន់តែតឹងរ៉ឹង ប្រឆាំងនឹងការរត់ពន្ធរ៉ែយុទ្ធសាស្ត្រ

មន្ត្រីជាន់ខ្ពស់ក្រសួងធម្មការនិងសាសនាណែនាំដល់យុវជនត្រូវធ្វើអំពើល្អនិងខិតខំរៀនសូត្រដើម្បីបន្តការពារនិងអភិវឌ្ឍន៍ជាតិ

លោក Zelenskyy៖ រុស្ស៊ីបាញ់មីស៊ីលជាង ៣០គ្រាប់ និងយានដ្រូន ៣០០គ្រឿង អំឡុងការវាយប្រហារលើអ៊ុយក្រែន

មនុស្សយ៉ាងតិច ១៩នាក់ រងរបួសដោយសារការផ្ទុះកាំជ្រួចនៅកន្លែងតាំងពិព័រណ៍ ភាគខាងលិចអាល្លឺម៉ង់

កុងហ្គោ និងក្រុមឧទ្ទាម M23 ចុះហត្ថលេខាលើកិច្ចព្រមព្រៀងឈប់បាញ់ នៅកាតា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877