BTV NEWS

គណៈកម្មាធិការសេដ្ឋកិច្ចក្រៅប្រព័ន្ធដាក់ឱ្យប្រើប្រាស់សមិទ្ធផលថ្មីលើកកម្ពស់អ្នកសេដ្ឋកិច្ចក្រៅប្រព័ន្ធ

ក្រសួងសេដ្ឋកិច្ច ចេញសារាចរឱ្យប្រើប្រាស់វិក្កយបត្រអេឡិចត្រូនិកជាកាតព្វកិច្ចដល់ក្រសួងចំនួន ៦

កសិករអ្នកដាំដំឡូងមីជាង៥០គ្រួសារ នៅឃុំអន្លង់រាប ស្រុកវាលវែង ស្ម័គ្រចិត្តចងក្រងជាសហគមន៍ទំនើប និងងាកទៅដាំឈើហូបផ្លែ

មន្រ្ដីនាំពាក្យក្រសួងកសិកម្ម៖ មិនគួរមានការព្រួយបារម្ភណាមួយពីកង្វះ ឬការកើនឡើងតម្លៃស្បៀងក្នុងស្រុកឡើយ ខណៈកម្ពុជាមានសមត្ថភាពគ្រប់គ្រាន់ធានាសន្តិសុខស្បៀង

សេដ្ឋកិច្ច និង កសិកម្ម

បញ្ហាទីផ្សារ និងការចំណាយខ្ពស់លើថ្លៃដើមផលិតនៅតែជាកង្វល់របស់កសិករ

ស្វាយរៀង៖ បញ្ហាទីផ្សារ និងការចំណាយខ្ពស់លើថ្លៃដើមផលិត នៅតែជាកង្វល់របស់កសិករធ្វើស្រែចម្ការ ដែលពួកគេស្នើសុំឱ្យក្រសួង និងស្ថាប័នពាក់ព័ន្ធនានាជួយគិតគូរអំពីបញ្ហានេះឱ្យបានខ្លាំងក្លាផង។កសិករ នៅក្នុងខេត្តស្វាយរៀង បាននិយាយថា បច្ចុប្បន្ន អ្វីដែលពួកគេ កំពុងប្រឈមនោះ គឺតម្លៃកសិផល និងស្រូវអង្ករ មិនទៀតទាត់នៅលើទីផ្សារក្នុងស្រុក បណ្ដាលមកពីការទម្លាក់តម្លៃតាមចិត្ត ពីសំណាក់ឈ្មួញកណ្ដាល បញ្ហាតម្លៃដើមផលិត តម្លៃប្រេងឥន្ធនៈ ជី និងថ្នាំពុលកសិកម្ម មិនទៀងទាត់ ដែរ ធ្វើឱ្យពួកគេពិបាករកចំណេញ។ពាក់ព័ន្ធនឹងបញ្ហានេះ ប្រធានមន្ទីរពាណិជ្ជកម្មខេត្តស្វាយរៀង លោក មាគ ឆវណ្ណរុណ បាននិយាយថា កិច្ចការនេះ វាហួសពីសមត្ថភាពរបស់មន្ទីរ ។តាមរបាយការណ៍របស់មន្ទីរកសិកម្មខេត្តស្វាយរៀង ដែលBTV ទទួលបាន គិតត្រឹមថ្ងៃទី១១ ខែកក្កដា នេះ កសិករក្នុងខេត្តស្វាយរៀង បានធ្វើការប្រមូលផលស្រូវដើមរដូវ បានប្រមាណជាង ២០០ហិកតា ដោយទទួលបានទិន្នផលប្រមាណជាង ៧០០តោន។ ក្នុងនោះ កសិករ ក្នុងនិងក្រៅខេត្ត បាននាំស្រូវចម្រុះទៅកាន់ទីផ្សារវៀតណាម តាមច្រកទ្វារព្រំដែនអន្តរជាតិព្រៃវ័ល្ល ច្រកក្រសាំងជ្រំ ច្រកដូង ច្រកព្រៃតាអី និងច្រកទ្វេភាគី និងបុសមន ក្នុងមួយសប្តាហ៍ ប្រមាណជាង៥ពាន់តោន ដែលតម្លៃស្រូវក្នុង ១គីឡូក្រាម ចន្លោះ៩០០រៀល៕ អត្ថបទ៖ ភា សារិត

ទំហំពាណិជ្ជកម្មទ្វេភាគីកម្ពុជា-អាមេរិកមានតម្លៃជាង ៤,៨ ពាន់លានដុល្លារក្នុងឆមាសទី១

ភ្នំពេញ៖ ទំហំពាណិជ្ជកម្មទ្វេភាគីរវាងកម្ពុជា និងសហរដ្ឋអាមេរិក បានកើនឡើងដល់ជិត ៥ប៊ីលានដុល្លារ ក្នុងឆមាសទី១ឆ្នាំនេះ ខណៈទីផ្សារអាមេរិក នៅតែបន្តជាអ្នកទិញទំនិញធំជាងគេរបស់កម្ពុជា។ពាណិជ្ជកម្មទ្វេភាគីរវាងកម្ពុជា-អាមេរិក ក្នុងឆមាសទី១ ឆ្នាំ ២០២២ មានតម្លៃសរុបជាង ៤,៨ ពាន់លានដុល្លារកើនឡើងជាង ៥១ ភាគរយ បើធៀបនឹងរយៈពេលដូចគ្នាឆ្នាំ ២០២១។ នេះបើយោងតាមរបាយការណ៍របស់អគ្គនាយកដ្ឋានគយ និងរដ្ឋាករ ដោយបញ្ជាក់ថា ការនាំទំនិញពីកម្ពុជាទៅអាមេរិកបានហក់ឡើងរហូតដល់ ៥៤ ភាគរយ។ ទិន្នន័យស្ថិតិជញ្ជីងពាណិជ្ជកម្មទំនិញជាមួយនឹងប្រទេសសំខាន់ៗរបស់អគ្គនាយកដ្ឋានគយ និងរដ្ឋាករកម្ពុជា បង្ហាញថា ចាប់ពីខែមករា-ខែមិថុនា ឆ្នាំ ២០២២ ការធ្វើពាណិជ្ជកម្មរវាងប្រទេសកម្ពុជា និងអាមេរិក មានតម្លៃសរុប ៤ ៨១៦ លានដុល្លារ កើនឡើង ៥១,៨ ភាគរយ បើធៀបរយៈពេលដូចគ្នាឆ្នាំ ២០២១។យោងតាមទិន្នន័យខាងលើ ការនាំចេញទំនិញពីកម្ពុជាទៅអាមេរិក មាន ៤ ៦៤៨ លានដុល្លារ កើន ៥៤ ភាគរយ ធៀបនឹងឆមាសទី១ ឆ្នាំមុន និងការនាំទំនិញពីអាមេរិកមកកម្ពុជា មានមានចំនួន ១៦៨,២២ លានដុល្លារ កើន ៨,៧ ភាគរយ ។ តាមរយៈតួលេខនេះ គឺជញ្ជីងពាណិជ្ជកម្មកម្ពុជាមានអតិរេក៤ ៤៨០ លានដុល្លារ។ទីផ្សារអាមេរិក ឈរនៅលើគេក្នុងនាមជាប្រទេសទិញទំនិញពីកម្ពុជាច្រើន ដោយមានចំណែកប្រមាណ ៤០,៨ ភាគរយ នៃការនាំចេញសរុបរបស់កម្ពុជា ។កាលពីឆ្នាំមុនពាណិជ្ជកម្មរវាងប្រទេសទាំង ២ មានតម្លៃ ៧ ៨២៦ លានដុល្លារ កើនឡើង ៤០,៤ ភាគរយ ធៀបនឹងឆ្នាំ ២០២០ ។អ្នកជំនាញ លើកឡើងថា ការកើនឡើងនៃការនាំចេញទំនិញរបស់កម្ពុជា ទៅកាន់ទីផ្សារសេដ្ឋកិច្ចធំបំផុតពិភពលោក នេះ គឺដោយសារទំនិញកម្ពុជា មានគុណភាពខ្ពស់ និងផលិត ផ្គត់ផ្គង់តាមតម្រូវការទាន់ពេលវេលា ជាពិសេស ក្នុងវិបត្តិកូវីដ១៩ កម្ពុជាបើកសកម្មភាពសង្គមសេដ្ឋកិច្ចឡើងវិញ និងឈានដល់បើកដំណើរការខ្សែច្រវ៉ាក់ផលិតកម្ម ផ្គត់ផ្គង់ការនាំចេញ ខណៈប្រទេសផលិតមួយចំនួនមិនអាចដំណើរការសង្វាក់ផលិតកម្មបាន ដោយសារបន្ត រងផលប៉ះពាល់កូវីដ១៩៕ អត្ថបទ៖ វណ្ណៈ

កម្ពុជានាំចេញកៅស៊ូ មានទឹកប្រាក់សរុបជាង ២០០លានដុល្លារ ក្នុងឆមាសទី១

ភ្នំពេញ៖ កម្ពុជាទទួលបានចំណូលប្រមាណ ២១៥លានដុល្លារ លើការនាំចេញកៅស៊ូស្ងួត ប្រមាណ ១៣.៥ម៉ឺនតោន ក្នុងឆមាសទី១ ឆ្នាំ២០២១នេះ កើនឡើង ៣ភាគរយធៀបនឹងរយៈពេលដូចគ្នាកាលពីឆ្នាំមុន។របាយការណ៍របស់អគ្គនាយកដ្ឋានកៅស៊ូ បានឱ្យដឹងថា ប្រទេសកម្ពុជាបាននាំចេញកៅស៊ូស្ងួតចំនួន ១៣៥ ១៣៧ តោននៅក្នុងឆមាសទីមួយនៃឆ្នាំ ២០២២ កើនឡើង ៣ភាគរយធៀបនឹងរយៈពេលដូចគ្នាកាលពីឆ្នាំមុន។របាយការណ៍ បានឲ្យដឹងថា កម្ពុជា រកប្រាក់ចំណូលបាន ២១៥,៨ លានដុល្លារអាមេរិក ពីការនាំចេញទំនិញក្នុងអំឡុងខែមករា ដល់ខែមិថុនាឆ្នាំនេះ ធ្លាក់ចុះ ២,៩ ភាគរយពី ២២២,៤ លានដុល្លារ កាលពីឆ្នាំមុន។អគ្គនាយកនៃអគ្គនាយកដ្ឋានកៅស៊ូ បានបញ្ជាក់នៅក្នុងរបាយការណ៍ថា កៅស៊ូស្ងួតមួយតោនជាមធ្យមមានតម្លៃ ១ ៥៩៧ ដុល្លារអាមេរិកក្នុងរយៈពេលប្រាំមួយខែដំបូងនៃឆ្នាំ២០២២ ប្រហែល៩១ ដុល្លារទាបជាងតម្លៃក្នុងរយៈពេលដូចគ្នាកាលពីឆ្នាំមុន ។កម្ពុជា នាំចេញទំនិញកៅស៊ូភាគច្រើនទៅកាន់ប្រទេសម៉ាឡេស៊ី វៀតណាម សិង្ហបុរី និងចិន។របាយការណ៍ បានបន្តថា មកដល់ពេលនេះកម្ពុជាបានដាំដើមកៅស៊ូលើផ្ទៃដីសរុបចំនួន ៤០៤ ០៤៤ ហិកតា ដែលក្នុងនោះផ្ទៃដីចៀរជ័រកៅស៊ូ មានចំនួន ៣១០.១៩៣ ហិកតា ឬ ៧៧ ភាគរយ ៕អត្ថបទ៖ វណ្ណៈ

ការលក់ម៉ាស់ ជែល អាល់កុល រក្សាតម្លៃដដែលបើទោះបីកម្ពុជារកឃើញជំងឺកូវីដ-១៩បំប្លែងថ្មី

ភ្នំពេញ៖ ការលក់ម៉ាស់ ជែល អាកុល រក្សាតម្លៃដដែល បើទោះបីបច្ចុប្បន្នកម្ពុជារកឃើញជំងឺកូវីដ-១៩ បំប្លែងថ្មី ពពួកអូមីក្រុង ពួកអូមីក្រុង BA.4 និងBA.5។អាជីវករលក់ដូរក្នុងផ្សារ ក្នុងរាជធានីភ្នំពេញនៅថ្ងៃទី១៤ ខែកក្កដានេះ បានប្រាប់BTVឲ្យដឹងថា បច្ចុប្បន្ន ការលក់ម៉ាស់ ជែល អាកុល មានអតិថិជនមកទិញជាធម្មតា ទាំងមុន និងកំពុងឆ្លងជំងឺកូវីដសារ ឡើងវិញនៅពេលនេះ។ សម្រាប់តម្លៃទំនិញវិញ គឺរក្សាដដែល មិនមានការឡើងថ្លៃដូចកាលពីផ្ទុះជំងឺកូវីដ-១៩ នៅឆ្នាំមុននោះទេ។កន្លងទៅថ្មីៗនេះ ក្រសួងសុខាភិបាល បានចេញសេចក្តីណែនាំក្រើនរំលឹកដល់ប្រជាពលរដ្ឋ ឱ្យ បង្កើនការការពារខ្លួនពីការចម្លងវីរុសកូវីដ-១៩ ជាពិសេសពពួកអូមីក្រុងបំប្លែងថ្មី BA.4 និង BA.5។ក្រសួងសុខាភិបាល បានឲ្យដឹងថា ស្ថានភាពឆ្លងនៃវីរុសកូវីដ-១៩ នៅក្នុងប្រទេសកម្ពុជា មានការ កើតសារឡើងវិញ ចាប់តាំងពីថ្ងៃទី២៨ ខែមិថុនា ឆ្នាំ២០២២ ដោយមានអ្នកវិជ្ជមាន ត្រូវបានរកឃើញលើ អ្នកដំណើរមកពីក្រៅប្រទេស អ្នកនៅក្នុងសហគមន៍ និងអ្នកធ្វើតេស្តសម្រាប់ធ្វើវិញ្ញាបនបត្រ ក្នុងការធ្វើដំណើរចេញទៅក្រៅប្រទេសមួយចំនួន។ដើម្បីបញ្ចៀសនូវការរីករាលដាលការឆ្លងវីរុសកូវីដ-១៩ ដ៏ធ្ងន់ធ្ងរទៅក្នុងសហគមន៍ ទៅក្នុងគ្រួសារ និងស្ថាប័ននានា ដែលអាចកើតមានជាយថាហេតុ ក្រសួងសុខាភិបាល បានក្រើនរម្លឹកដល់ប្រជាជនទាំងអស់ (ទាំងកម្ពុជា និងជនបរទេស) ដែលរស់នៅប្រទេសកម្ពុជា ត្រូវនាំគ្នាបន្តអនុវត្តវិធានការ «៣ការពារ និង៣កុំ» ព្រមទាំងនាំគ្នាទៅចាក់វ៉ាក់សាំងកូវីដ-១៩ ទាំងដូសមូលដ្ឋាន និងដូសជំរុញ (ដូសទី៣ ទី៤ និងទី៥) ជាចាំបាច់ ដែលមានគម្លាតពីដូសមួយ ទៅដូសមួយទៀត មានរយៈពេលពី ៣ខែឡើងទៅ៕អត្ថបទ៖ ទូច សោភ័ណ

អគ្គនាយកដ្ឋានពន្ធដារ កំណត់ការប្រមូលចំណូលក្នុងឆ្នាំនេះ ឱ្យលើស ១០ភាគរយ នៃផែនការ

ភ្នំពេញ៖ អគ្គនាយដ្ឋានពន្ធដារ នឹងអនុវត្តការប្រមូលចំណូលពន្ធឲ្យសម្រេចបានលើសផែនការ ដែលកំណត់ដោយច្បាប់គ្រប់គ្រងហិរញ្ញវត្ថុ មិនតិចជាង ១០ ភាគរយនោះឡើយ នៅក្នុងឆ្នាំ ២០២២ នេះ ខណៈបច្ចុប្បន្នអគ្គនាយកដ្ឋានបានពង្រឹងនូវវិធានការគោលនយោបាយ និងរដ្ឋបាលសារពើពន្ធ ដើម្បីធានាដល់ប្រសិទ្ធភាពនៃការប្រមូលចំណូលពន្ធឲ្យបានល្អប្រសើរ។ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាល ទទួលបន្ទុកជាអគ្គនាយកនៃអគ្គនាយកដ្ឋានពន្ធដារ លើកឡើងនៅក្នុងកម្មវិធីបិទវគ្គបណ្តុះបណ្តាលស្តីពី “ច្បាប់និងបទប្បញ្ញត្តិពាក់ព័ន្ធ ជូនដល់ថ្នាក់ដឹកនាំ និងមន្រ្តីរាជការពន្ធដារដែលទទួលបាននីតិសម្បទា ជានគរបាលយុត្តិធម៌” នៅថ្ងៃទី១៣ ខែកក្កដា ឆ្នាំ២០២២នេះថា ការពង្រឹង និងបណ្តុះបណ្តាលធនធានមនុស្សគឺជាកត្តាសំខាន់, ដើម្បីពង្រីកធនធានឲ្យកាន់តែសំបូរបែប នឹងឆ្លើយតបតាមតម្រូវការ ក្នុងនោះការពង្រឹកផ្សព្វផ្សាយច្បាប់ និងបទប្បញ្ញត្តិស្តីពីពន្ធដារ កំណែទម្រង់ និងទំនើបកម្មរដ្ឋបាលសារពើពន្ធ និងបន្តពង្រឹងការផ្តល់សេវាជូនអ្នកជាប់ពន្ធ គឺជារឿងចាំបាច់ផងដែរ ដើម្បីឲ្យអ្នកជាប់ពន្ធទាំងអស់បានយល់អំពីកាតព្វកិច្ចនៃការបង់ពន្ធ។ឯកឧត្តម បន្តថា ជុំវិញការពង្រីកធនធានមនុស្សនេះ មន្រ្តីពន្ធដារអាចធ្វើសវនកម្មកំណត់ពន្ធ និងប្រមូលចំណូលពន្ធបានល្អប្រសើរជាងមុន ជាក់ស្តែងនៅក្នុងវិបត្តិនៃការរីករាលជំងឺកូវីដ ១៩ អគ្គនាយកដ្ឋាននៅតែបន្តប្រមូលចំណូលពន្ធបានលើសផែនការ ក្នុងនោះបើគិតការប្រមូលចំណូលក្នុងរយៈពេលជាង ៦ ខែ ឆ្នាំ២០២២ នេះវិញ អគ្គនាយកដ្ឋានពន្ធដារប្រមូលចំណូលបានជាង ៧០ភាគរយរួចហើយ នឹងបើតាមការគ្រោងទុក នៅក្នុងឆ្នាំ ២០២២ នេះ អគ្គនាយកដ្ឋានពន្ធដារ នឹងអាចប្រមូលចំណូលលើលផែនការក្នុងរង្វង់ជាង ១០ភាគរយផងដែរ។ឯកឧត្តម គង់ វិបុល បន្តថា ទាក់ទងការប្រមូលចំណូលបានល្អប្រសើរ ជាពិសេសនៅក្នុងឆ្នាំនេះ ដោយសារមន្រ្តីពន្ធដារបានប្រតិបត្តិការនិងបទល្មើសពន្ធដារមួយចំនួន និងផ្សព្វផ្សាយអំពីសិទ្ធត្រួតពិនិត្យ បទល្មើសបទឧក្រិដ្ឋ បទមជ្ឈិម និងបទលហុកំណត់អត្តសញ្ញាណ និងចាប់ជនល្មើស តាមច្បាប់កំណត់នៅក្នុងក្រមនីតិវិធីព្រហ្មទណ្ឌ នឹងកសាងសំណុំរឿងបទល្មើសទៅតុលាការជាដើម និងការបន្តកៀគរប្រមូលចំណូលឲ្យអស់សក្តានុពលផង និងពន្ធដារក៏នៅក្នុងក្របខណ្ឌសម្អាតប្រាក់ផងដែរ ដែលជាផ្នែកមួយក្នុងការជម្រុញប្រមូលចំណូលឲ្យបានល្អប្រសើរ។សូមបញ្ជាក់ថា នៅក្នុងឆ្នាំ ២០២២ នេះ រាជរដ្ឋាភិបាលបានកំណត់ការគ្រប់គ្រង និងមូលចំណូលក្នុងវិស័យពន្ធដារ ដែលកំណត់ក្នុងច្បាប់ហិរញ្ញវត្ថុ សម្រាប់ការគ្រប់គ្រង ក្នុងចំនួនប្រមាណជាង ១១ ៤១៩ ប៊ីលានរៀល ត្រូវជាង ២ ៨១៩ លានដុល្លារអាមេរិក ៕អត្ថបទ៖ សុន រ៉ាឌី

កម្ពុជាកំពុងពន្លឿនការរៀបចំផែនទីផ្លូវការអភិវឌ្ឍវិស័យយានយន្ត និងអេឡិចត្រូនិក

ភ្នំពេញ៖ រាជរដ្ឋាភិបាលកម្ពុជា កំពុងពន្លឿនការរៀបចំផែនទីបង្ហាញផ្លូវការអភិវឌ្ឍវិស័យយានយន្ត និងអេឡិចត្រូនិកនៅកម្ពុជា ដែលផែនការណេះ នឹងប្រែក្លាយកម្ពុជា ទៅជាមជ្ឈមណ្ឌលផលិតគ្រឿងបង្គុំយានយន្ត និងអេឡិចត្រូនិក ដើម្បីពង្រីកទីផ្សារនាំចេញទៅក្នុងតំបន់ និងសកលលោក។ឯកឧត្តម សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា នៅថ្ងៃទី ១២ខែកក្កដា ឆ្នាំ ២០២២ នេះ បានដឹកនាំប្រជុំពិនិត្យ និងពិភាក្សា លើសេចក្តីព្រាងផែនទីបង្ហាញផ្លូវការអភិវឌ្ឍវិស័យយានយន្ត និងអេឡិចត្រូនិកនៅកម្ពុជា ដើម្បីប្រមូលធាតុចូលបន្ថែមពីក្រសួងស្ថាប័នពាក់ព័ន្ធ លើសេចក្តីព្រាងផែនទីបង្ហាញផ្លូវ។ចំពោះការចូលរួមផ្តល់ធាតុចូល ក្នុងការរៀបចំសេចក្តីព្រាងផែនទីបង្ហាញផ្លូវ គឺមានសារៈសំខាន់ណាស់ ព្រោះរាជរដ្ឋាភិបាលបានកំណត់យកវិស័យយានយន្ត និងអេឡិចត្រូនិក ជាវិស័យអាទិភាព ដែលមានសក្តានុពលសម្រាប់ការចូលរួមទៅក្នុងខ្សែច្រវាក់តម្លៃតំបន់ និងសកល ក៏ដូចជាការលើកកម្ពស់ការធ្វើពិពិធកម្មសេដ្ឋកិច្ច និងចូលរួមស្ដារសេដ្ឋកិច្ចឡើងវិញក្រោយវិបត្តិនៃជំងឺកូវីដ-១៩ ស្របតាមមាគ៌ាដែលបានដាក់ចេញនៅក្នុង ក្របខណ្ឌយុទ្ធសាស្ត្រ និងកម្មវិធីស្តារ និងជំរុញកំណើនសេដ្ឋកិច្ចកម្ពុជា ក្នុងការរស់នៅជាមួយកូវីដ-១៩ តាមគន្លងប្រក្រតីភាពថ្មី សម្រាប់ឆ្នាំ២០២១-២០២៣។ ឯកឧត្តមបណ្ឌិត តាន់ មុនីវណ្ណ ប្រធានសម្ព័ន្ធឧស្សាហកម្មយានយន្តកម្ពុជា ថ្លែងនូវការគាំទ្រពេញទំហឹង ចំពោះផែនការរបស់រាជរដ្ឋាភិបាល ដែលបានគិតគូរគ្រប់ជ្រោយ និងច្បាស់លាស់ ហើយតាមរយៈផែនការនេះ ឯកឧត្តម រំពឹងថា នៅពេលខាងមុខ កម្ពុជានឹងក្លាយជាទីផ្សារផ្គត់ផ្គង់ នឹងនាំចេញយានយន្ត និងអេឡិចត្រូនិចដ៏សំខាន់មួយ នឹងជាប្រភពបង្កើនប្រាក់ចំណូលសម្រាប់សេដ្ឋកិច្ចជាតិកាន់តែខ្លាំងក្លាបន្ថែមទៀត។សូមរំលឹកថា នៅក្នុងកិច្ចប្រជុំនេះ មន្ត្រីជំនាញនៃលេខាធិការដ្ឋាន IDP នៃក្រុមប្រឹក្សាអភិវឌ្ឍន៍កម្ពុជា បានធ្វើបទបង្ហាញលម្អិត ស្តីពីទម្រង់ និងខ្លឹមសារនៃសេចក្តីព្រាងផែនទីបង្ហាញផ្លូវ ដែលបានរៀបរាប់ពីសាវតារនៃការរៀបចំសេចក្តីព្រាង, សក្តានុពលរបស់វិស័យយានយន្ត និងអេឡិចត្រូនិកក្នុងបរិបទនៃការអភិវឌ្ឍនៅកម្ពុជា, បញ្ហាប្រឈមក្នុងការអភិឌ្ឍវិស័យយានយន្ត និងអេឡិចត្រូនិកនៅកម្ពុជា និងវិធានការគន្លឹះដើម្បីដោះស្រាយបញ្ហាប្រឈមទាំងនោះ, យន្តការស្ថាប័នដឹកនាំអនុវត្តផែនទីបង្ហាញផ្លូវ ដើម្បីធានាប្រសិទ្ធភាពការងារ និងការកំណត់ពីក្រសួង ស្ថាប័នទទួលបន្ទុកការងារតាមដាននិងវាយតម្លៃផែនទីបង្ហាញផ្លូវជាដើម៕អត្ថបទ៖ សុន រ៉ាឌី

ពន្ធដាររម្លឹកការប្រកាសបង់ពន្ធលើអចលនទ្រព្យ ឬពន្ធលើដីធ្លីមិនបានប្រើប្រាស់ឆ្នាំ២០២២

ភ្នំពេញ៖ អគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ បានរំលឹកការប្រកាសបង់ពន្ធលើអចលនទ្រព្យ ឬពន្ធលើដីធ្លីមិនបានប្រើប្រាស់ឆ្នាំ២០២២ ឱ្យទាន់ពេលវេលា ត្រឹមថ្ងៃ៣០ ខែកញ្ញា ។ ចំពោះការខកខានមិនបានដាក់លិខិតប្រកាសពន្ធទាន់ពេលវេលាកំណត់ ម្ចាស់អចលនទ្រព្យ នឹងត្រូវរងនូវទោសទណ្ឌតាមច្បាប់ជាធរមាន។ក្នុងសេចក្ដីជូនដំណឹង ស្តីពីការរំលឹកការប្រកាសបង់ពន្ធលើអចលនទ្រព្យ និង/ឬ ពន្ធលើដីធ្លីមិនបានប្រើប្រាស់ សម្រាប់ឆ្នាំ២០២២ ចុះថ្ងៃទី១២ ខែកក្កដា អគ្គនាយកដ្ឋានពន្ធដារ លើកឡើងថា រហូតមកទល់ពេលនេះ អគ្គនាយកដ្ឋានពន្ធដារ សង្កេតឃើញថា មានម្ចាស់អចលនទ្រព្យមួយចំនួននៅមិនទាន់ បានបំពេញកាតព្វកិច្ចប្រកាសបង់ពន្ធប្រភេទទាំងនេះឡើយ។ ដើម្បីជំរុញការប្រមូលពន្ធលើអចលនទ្រព្យ និង/ឬពន្ធលើដីធ្លីមិនបានប្រើប្រាស់ សម្រាប់ឆ្នាំ២០២២នេះ បានអស់លទ្ធភាពប្រកបដោយប្រសិទ្ធភាពខ្ពស់ និងចៀសវាងបាននូវការកកស្ទះ ការប្រជ្រៀតគ្នាមកប្រកាសបង់ពន្ធនៅថ្ងៃជិតផុតកំណត់ ដែលអាចនាំឱ្យមានបាតុភាពអសកម្មដោយប្រកាសណាមួយ អគ្គនាយកដ្ឋានពន្ធដារ សូមក្រើនរំលឹកដល់ម្ចាស់អចលនទ្រព្យទាំងអស់ ដែលមិនទាន់បានបំពេញកាតព្វកិច្ចបង់ពន្ធ រួសរស់ទៅប្រកាសបង់ពន្ធឱ្យបានទាន់ពេលវេលាកំណត់ ត្រឹមថ្ងៃទី៣០ ខែកញ្ញាខាងមុខ។ ម្ចាស់អចលនទ្រព្យនិង/ឬពន្ធលើដីធ្លីមិនបានប្រើប្រាស់ អាចទៅប្រកាសបង់ពន្ធ នៅអគ្គនាយកដ្ឋានពន្ធដារ ឬសាខាពន្ធដារខេត្ត-ខណ្ឌដែលអចលនទ្រព្យស្ថិតនៅ ឬនៅគ្រប់សាខាធនាគារ អេស៊ីលីដា ឬធនាគារកាណាឌីយ៉ា ឬធនាគារវឌ្ឍនៈ ឬធនាគារដៃគូដទៃទៀត។អគ្គនាយកដ្ឋានពន្ធដារ សង្ឃឹមយ៉ាងមុតមាំថា បន្ទាប់ពីទទួលបានសេចក្តីជូនដំណឹងនេះ ម្ចាស់អចលនទ្រព្យទាំងអស់ ពិតជានឹងយកចិត្តទុកដាក់ និងទៅបំពេញកាតព្វកិច្ចសារពើពន្ធឱ្យបានទាន់ពេលវេលាកំណត់ខាងលើនេះ៕ អត្ថបទ៖ វណ្ណៈ

ចំនួនអ្នកដាក់ពាក្យស្នើសុំធ្វើអាជីវកម្មតាមប្រព័ន្ធអនឡាញកើនដល់ជិត ៧ពាន់

ភ្នំពេញ៖ មន្រ្តីជាន់ខ្ពស់នៃក្រសួងពាណិជ្ជកម្មកម្ពុជា បានឱ្យដឹងថា គិតរហូតមកដល់ពេលនេះ ក្រសួងទទួលបានពាក្យស្នើសុំលិខិតអនុញ្ញាត ឬអាជ្ញាប័ណ្ណពាណិជ្ជកម្មតាមប្រព័ន្ធអេឡិចត្រូនិកចំនួនប្រមាណជិត ៧ពាន់ពាក្យហើយ ដើម្បីបន្តពាណិជ្ជកម្មដោយស្របច្បាប់។លោកជំទាវ តឹករ៉េត កំរង រដ្ឋលេខាធិការក្រសួងពាណិជ្ជកម្ម លើកឡើងពីតួលេខនេះ នៅក្នុងពិធីបិទវគ្គ និងប្រគល់វិញ្ញាបនបត្របណ្តុះបណ្តាល ស្តីពីអាជីវកម្មបែបឌីជីថលសម្រាប់សហគ្រាសធុនមីក្រូ តូច និងមធ្យម កាលពីរសៀលថ្ងៃទី១២ ខែកក្កដា ឆ្នាំ២០២២កន្លងទៅ នៅសណ្ឋាគារ អូឡាំព្យា ស៊ីធី។លោកជំទាវ មានប្រសាសន៍ថា ចរន្តនៃបដិវត្តន៍ឧស្សាហកម្មជំនាន់ទី៤ កំពុងជះឥទ្ធិពលយ៉ាងខ្លាំងលើវិស័យទាំងអស់ បច្ចេកវិទ្យាឌីជីថលទាំងនោះ បានធ្វើឲ្យមានការផ្លាស់ប្តូរយ៉ាងលឿនដែលមិនធ្លាប់មានពីមុនមកលើគ្រប់វិស័យ និងជាពិសេសវិស័យធុរកិច្ចផងដែរ។ លោកជំទាវ លើកឡើងថា អាជីវកម្មបែបឌីជីថលបច្ចុប្បន្ននេះ សម្រាប់សហគ្រាសធុនមីក្រូតូច និងមធ្យម ពិតជានឹងរួមចំណែកយ៉ាងសំខាន់ក្នុងការលើកកម្ពស់បច្ចេកវិទ្យាឌីជីថលសម្រាប់សហគ្រាសធុនមីក្រូ តូច និងមធ្យម ដែលជាឆ្អឹងខ្នងនៃសេដ្ឋកិច្ចជាតិ។សូមបញ្ជាក់ថា កម្មវិធីបណ្តុះបណ្តាល ស្តីពីអាជីវកម្មបែបឌីជីថលសម្រាប់សហគ្រាសធុនមីក្រូ តូច និងមធ្យមអនុវត្តដោយ សមាគមសហគ្រិនវ័យក្មេងកម្ពុជា ដោយមានការគាំទ្រដោយភ្នាក់ងារអភិវឌ្ឍន៍អង្គការសហប្រជាជាតិប្រចាំនៅកម្ពុជា នៅក្នុងភាពជាដៃគូយុទ្ធសាស្រ្តជាមួយក្រសួងពាណិជ្ជកម្ម និងសហគ្រិនខ្មែរ ក្រោមការអនុវត្តការផ្តួចផ្តើមថ្មីសំខាន់មួយ នៃគម្រោងពង្រីកពាណិជ្ជកម្មតាមប្រព័ន្ធអេឡិចត្រូនិចនៅកម្ពុជា ជាមួយនឹងការផ្តោតលើជំនាញ និងសហគ្រិនភាព សម្រាប់ការធ្វើពាណិជ្ជកម្មតាមប្រព័ន្ធអេឡិចត្រូនិច ដែលត្រូវបានផ្តល់ការគាំទ្រហិរញ្ញវត្ថុដោយកម្មវិធី Enhance Integrated Framework និងក្រសួងសេដ្ឋកិច្ច និងហិរញ្ញវត្ថុ៕អត្ថបទ៖ ឈិត បូរ៉ាវី

កម្ពុជារំពឹងមានកំណើនទេសចរឡើងវិញ ខណៈទេសចរតំបន់ និងពិភពលោក កំពុងងើបឡើង

ភ្នំពេញ៖ អ្នកប្រកបមុខរបរក្នុងវិស័យទេសចរ រំពឹងថា វិស័យទេសចរណ៍នៅកម្ពុជា ងើបឡើងវិញឆាប់រហ័ស ខណៈកំណើនភ្ញៀវទេសចរពិភពលោក និងតំបន់ បង្ហាញនូវចំណុចវិជ្ជមាននៃការងើបឡើងវិញ។លោក ពេជ សូវៀត ស្ថាបនិក (CEO) នៃក្រុមអួតអេប (Uot App) ដែលជាសហគមន៍ឌីជីថលសម្រាប់អ្នកដើរលេង លើកឡើងក្នុងកិច្ចសម្ភាសន៍ជាមួយភ្នាក់ងារអ្នកយកព័ត៌មាន BTV នៅថ្ងៃទី ១៣ ខែ កក្កដា ឆ្នាំ២០២២ នេះថា ការខិតខំប្រឹងប្រែងរបស់រាជរដ្ឋាភិបាល ក្នុងការប្រយុទ្ធប្រឆាំងកូវីដ១៩ អនុវត្តផែនការគ្រប់ជ្រុងជ្រោយ កម្ពុជាកំពុងក្លាយទៅជាគៅលដៅទេចរណ៍មួយប្រកបដោយសុវត្ថិភាព ដែលអាចធ្វើឲ្យកម្ពុជាក្លាយជាប្រទេសមួយក្នុងតំបន់ ដែលអាចធ្វើដំណើរចេញចូល មានល័ក្ខខណ្ឌធ្វើដំណើរងាយស្រួលសម្រាប់ភ្ញៀវទេសចរ។លោកបណ្ឌិត ហុង វណ្ណៈ ជំនាញសេដ្ឋកិច្ច នៃវិទ្យាស្ថានទំនាក់ទំនងអន្តរជាតិនៃរាជបណ្ឌិតសភាកម្ពុជា ថ្លែងថា ប្រសិនជំងឺកូវីដ ១៩ ធូរស្រាលមួយកម្រិតទៀត និងសង្រ្គាមរុស្សីអ៊ុយក្រែន មិនជះឥទ្ធពលខ្លាំង វិស័យទេសចរនៅកម្ពុជា នឹងងើបឡើងវិញឆាប់រហ័ស ខណៈកម្ពុជាបានរៀបចំផែនការក្នុងវិស័យទេសចរណ៍ និងកម្ពុជាមានតំបន់សក្តានុពលជាច្រើនប្រកបដោយភាពទាក់ទាញ ជាពិសេសកម្ពុជាមានកិច្ចសហប្រតិបត្តិការជាមួយបណ្តាប្រទេសលើពិភលោកជាច្រើន នៃការផ្សារភ្ជាប់ទំនាក់ទំនង កិច្ចសហការតំបន់ និងអន្តរជាតិ ដែលបញ្ហាទាំងនោះសុទ្ធតែជាទីផ្សារគោលដៅល្អរបស់កម្ពុជា ក្នុងការស្រូបយកសក្តានុពលទេសចរឡើងវិញ។បើតាមរបាយការណ៍ក្រសួងទេសចរណ៍ បានបង្ហាញថា នៅក្នុងឆមាសទី១ ឆ្នាំ ២០២២ នេះ ទេសរចអន្តរជាតិមកទស្សនាកម្ពុជាមានចំនួនប្រមាណ ៥០ម៉ឺននាក់ កើនឡើងប្រមាណ ៣៩៤ភាគរយ បើធៀបនិងឆ្នាំ២០២១ ។ ចំណែកភ្ញៀវទេសចរផ្ទៃក្នុងដែល ធ្វើដំណើរកម្សាន្តនៅតាមតំបន់រមនីយដ្ឋាននានានៅទូទាំងប្រទេស មានចំនួន ៦,៣លាននាក់ កើនឡើង ២១៩ភាគរយ និងទេសចរបរទេស ៦៨ម៉ឺននាក់ កើនឡើង ៣៨០ភាគរយ បើធៀបនិងឆ្នាំ ២០២១៕ អត្ថបទ៖ សុន រ៉ាឌី

អ្នកដំណើរអន្តរជាតិតាមផ្លូវអាកាសកើនឡើង បន្ទាប់កម្ពុជាលើកលែងធ្វើចត្តាឡីស័ក លើអ្នកមិនទាន់ចាក់វ៉ាក់សាំង

ភ្នំពេញ៖ បន្ទាប់ពីរាជរដ្ឋាភិបាលកម្ពុជាលើកលែងការធ្វើចត្តាឡីស័ក ចំពោះអ្នកដំណើរអន្តរជាតិមិនទាន់ចាក់វ៉ាក់សាំងការពារកូវីដ១៩ ធ្វើឱ្យចំនួនអ្នកដំណើរអន្តរជាតិចូលមកកម្ពុជា តាមផ្លូវអាកាសកើនឡើង។ឯកឧត្តម ជា អូន រដ្ឋលេខាធិការ នៃរដ្ឋលេខាធិការដ្ឋានអាកាសស៊ីវិល ក្នុងបទបង្ហាញនៅក្នុងសន្និបាតបូកសរុបលទ្ធផលការងារទេសចរណ៍ និងបូកសរុបការងារស្តារវិស័យទេសចរណ៍ក្នុងក្រោយវិបត្តិកូវីដ១៩ នៅថ្ងៃទី១៣ ខែកក្កដានេះ ថ្លែងថា ក្នុងខែមិថុនា និងក្នុងរយៈពេលប៉ុន្មានថ្ងៃចុងក្រោយក្នុងខែកក្តដា ឆ្នាំ២០២២ ចំនួនអ្នកដំណើរអន្តរជាតិមកកម្ពុជា តាមផ្លូវអាកាសបានកើនឡើងប្រមាណ ១៩ម៉ឺននាក់ដែលស្មើនឹង ២៣%បើប្រៀបធៀបនឹងឆ្នាំ២០១៩ ដែលមានប្រមាណជាង ៨២ម៉ឺននាក់ ហើយនឹងស្មើនឹង ៩០៣% បើប្រៀបធៀបខែមិថុនាក្នុងឆ្នាំ២០២១។ឯកឧត្តម ជា អូន បន្ថែមថា យ៉ាងណាក៏ដោយរហូតមកដល់ពេលនេះ រដ្ឋលេខាធិការដ្ឋានអាកាសចរណ៍ស៊ីវិល បានទទួលពាក្យស្នើសុំការហោះហើរពីក្រុមហ៊ុនអាកាសចរបានចំនួនប្រមាណ ៧១ ២២៩ ជើងហើយរំពឹងថា នឹងអាចកើនប្រមាណ ៦៨% ប្រៀបធៀបនឹងឆ្នាំ២០១៩ ដែលមានប្រមាណជិត ១០ម៉ឺន៥ពាន់ជើង។ឯកឧត្តម បញ្ជាក់ថា នៅក្នុងចំណោមក្រុមហ៊ុនអាកាសចរណ៍ដែលបានដាក់ពាក្យស្នើសុំបើកជើងហោះហើរ មកកម្ពុជា គឺមានក្រុមហ៊ុនចិន បានដាក់ពាក្យស្នើសុំបើកហោះហើរថ្មីមករាជធានីភ្នំពេញ មានចំនួន ១១ក្រុមហ៊ុន កើនសរុប ៣៨ក្រុមហ៊ុន ក្រុមហ៊ុនស្នើបើកជើងហោះហើរទៅខេត្តសៀមរាប មាន៣ក្រុមហ៊ុនបន្ថែម កើនសរុប ២១ក្រុមហ៊ុន និងក្រុមហ៊ុនស្នើបើកជើងហោះហើរថ្មីទៅខេត្តព្រះសីហនុ ៣ក្រុមហ៊ុន កើនសរុប១០ក្រុមហ៊ុន។ ក្រសួងទេសចរណ៍ បានស្នើបណ្តាច្រកទ្វារព្រំដែនអន្តរជាតិតាមផ្លូវអាកាស ផ្លូវគោក និងផ្លូវទឹក សូមបង្កើនការធ្វើបដិសណ្ឋារកិច្ចទទួលភ្ញៀវអោយបានល្អប្រសើរ ខណៈរាជរដ្ឋាភិបាលកម្ពុជា បានប្រកាសបើកប្រទេសនិងបានបន្ធូរបន្ថយលក្ខខ័ណ្ឌអ្នកដំណើរអន្តរជាតិ អាចធ្វើVisa On Arrival នៅពេលភ្ញៀវអន្តរជាតិមកដល់ច្រកទ្វារព្រំដែនអន្តរជាតិ លុបចោលការធ្វើចត្តាឡីស័កជាដើម៕ អត្ថបទ ស៊ុម សុខជា

បណ្ដាញសង្គម

ព័ត៌មានថ្មីៗ

សាធារណរដ្ឋកូរ៉េនឹងបន្តពង្រឹង និងពង្រីកកិច្ចសហប្រតិបត្តិការជាមួយកម្ពុជា

បទឈប់បាញ់ដួលរលំនៅទីក្រុង Suwayda ប្រទេសស៊ីរី ខណៈអ៊ីស្រាអែលគំរាមបង្កើនការវាយប្រហារ

ប្រាក់ដុល្លារធ្លាក់ថ្លៃ ខណៈទិន្នន័យតម្លៃអ្នកផលិតរបស់អាមេរិក ស្ថិតក្នុងការតាមដានរបស់វិនិយោគិន

លោក Zelensky និយាយថា «ត្រៀមខ្លួនសម្រាប់ធ្វើសកម្មភាព» ប្រសិនបើទីក្រុងគីវ ទទួលបានអាវុធរយៈចម្ងាយឆ្ងាយ

ប្រភពពីគេហទំព័រ Axios៖អ៊ីស្រាអែលប្តេជ្ញាបញ្ឈប់ការវាយប្រហារលើទីតាំងយោធាស៊ីរី

លោក Netanyahu ៖ អ៊ីស្រាអែលវាយប្រហារស៊ីរី ដើម្បីរក្សាតំបន់គ្មានកងទ័ព និងការពារជនជាតិភាគតិច Druze

ឯកឧត្តម ឃ្លាំង ហួត៖លោក ភូមិថាំ វៈឆៈយៈឆៃ នាយករដ្ឋមន្រ្តីស្ដីទីថៃធ្លាប់រង់ចាំជជែកតាមទូរស័ព្ទដើម្បីសុំចរចាជាមួយសម្ដេចតេជោរហូតដល់៤ម៉ោង

អ៊ុយក្រែន និងអាមេរិក រួមគ្នាផលិតសារធាតុគីមី សម្រាប់ឧស្សាហកម្មការពារជាតិ

លោក Trump និយាយថា អាវុធត្រៀមខ្លួនរួចរាល់ក្នុងការបញ្ជូនទៅកាន់ប្រទេសអ៊ុយក្រែន

ស៊ីរីនិយាយថា មានសិទ្ធិការពារខ្លួន ស្របពេលមានការវាយប្រហាររបស់អ៊ីស្រាអែល

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877