BTV NEWS

គណៈកម្មាធិការសេដ្ឋកិច្ចក្រៅប្រព័ន្ធដាក់ឱ្យប្រើប្រាស់សមិទ្ធផលថ្មីលើកកម្ពស់អ្នកសេដ្ឋកិច្ចក្រៅប្រព័ន្ធ

ក្រសួងសេដ្ឋកិច្ច ចេញសារាចរឱ្យប្រើប្រាស់វិក្កយបត្រអេឡិចត្រូនិកជាកាតព្វកិច្ចដល់ក្រសួងចំនួន ៦

កសិករអ្នកដាំដំឡូងមីជាង៥០គ្រួសារ នៅឃុំអន្លង់រាប ស្រុកវាលវែង ស្ម័គ្រចិត្តចងក្រងជាសហគមន៍ទំនើប និងងាកទៅដាំឈើហូបផ្លែ

មន្រ្ដីនាំពាក្យក្រសួងកសិកម្ម៖ មិនគួរមានការព្រួយបារម្ភណាមួយពីកង្វះ ឬការកើនឡើងតម្លៃស្បៀងក្នុងស្រុកឡើយ ខណៈកម្ពុជាមានសមត្ថភាពគ្រប់គ្រាន់ធានាសន្តិសុខស្បៀង

សេដ្ឋកិច្ច និង កសិកម្ម

ប្រទេសឆែក គ្រោងផ្តល់ជំនួយលើការអភិវឌ្ឍវិស័យកសិកម្មកម្ពុជា ដើម្បីជំរុញការនាំចេញ

ភ្នំពេញ៖ ប្រទេសឆែក គ្រោងផ្តល់ជំនួយបច្ចេកទេសលើការអភិវឌ្ឍវិស័យកសិកម្មដល់កម្ពុជា ដើម្បីជំរុញការផលិតផ្គត់ផ្គង់ទីផ្សារ និងនាំចេញទៅកាន់ទីផ្សារអឺរ៉ុប។កម្ពុជា និងសាធារណរដ្ឋឆែក គ្រោងនឹងចុះអនុស្សរណៈនៃការយោគយល់គ្នា (MoU) ស្តីពីកិច្ចសហប្រតិបត្តិការលើវិស័យកសិកម្មក្នុងពេលឆាប់ៗនេះ លើការបណ្តុះបណ្តាល ការលើកកម្ពស់គុណភាព និងផលិតភាពផលិតកម្មកសិកម្ម ដើម្បីឆ្លើយតបតាមតម្រូវការទីផ្សារនាំចេញទៅកាន់ទីផ្សារអឺរ៉ុប។ឯកឧត្តម វេង សាខុន រដ្ឋមន្ត្រីក្រសួងកសិកម្ម បានជួបកាលពេលថ្មីៗនេះ ពិភាក្សាការងារជាមួយ ឯកឧត្តម ម៉ារទីន វ៉ាវរ៉ា ឯកអគ្គរដ្ឋទូតនៃសាធារណរដ្ឋឆែកប្រចាំកម្ពុជា នៅទីស្តីការក្រសួងកសិកម្ម ដោយភាគីទាំង២ បានលើកយកប្រធានបទសំខាន់ៗមកពិភាក្សាគ្នាជាជំហានបឋមក្នុងការធ្វើកិច្ចសហប្រតិបត្តិការរវាងប្រទេសទាំង២ទាក់ទងនឹងការអភិវឌ្ឍវិស័យកសិកម្មរុក្ខាប្រមាញ់ និងនេសាទនាពេលអនាគត ដែលក្នុងនោះមាន ដូចជា ការងារបណ្តុះបណ្តាលធនធានមនុស្ស ទាំងរយៈពេលខ្លី និងពេលវែង ការផ្លាស់ប្តូរមន្ត្រីជំនាញឱ្យទៅធ្វើទស្សនកិច្ចសិក្សា ដើម្បីដកស្រង់បទពិសោធន៍លើការងារអនុវត្តបច្ចេកទេសផ្ទាល់។ភាគីទាំង ២ បានពិភាក្សាលើការសហការគ្នាលើការអភិវឌ្ឍវិស័យវារីវប្បកម្មទាំងទឹកសាប និងសមុទ្រ, ការធ្វើទំនើបកម្មកសិកម្ម និង ការពង្រឹងសមត្ថភាពលើការកែច្នៃកសិផលផងដែរ។ឯកឧត្តម វេង សាខុន មានប្រសាសន៍ថា ភាគីទាំងពីរសង្ឃឹម ថានឹងឈានទៅអនុវត្តលើខ្លឹមសារ MoU នេះឱ្យចេញជាផ្លែផ្កា ដើម្បីជាប្រយោជន៍សម្រាប់ប្រទេសទាំង ២ នាពេលឆាប់ៗនេះ។ឯកឧត្តម រដ្ឋមន្ត្រីបានមានប្រសាសន៍ថា នាពេលអនាគតដ៏ខ្លី កិច្ចសហប្រតិបត្តិការនេះ នឹងលេចចេញជារូបរាង និងទទួលបានជោគជ័យ ជាពិសេសគឺភាគីកម្ពុជាផ្ទាល់ដែលកំពុងត្រូវការកសាងធនធានមនុស្សតាមរយៈការបណ្តុះបណ្តាល ការលើកកម្ពស់គុណភាព និងផលិតភាពផលិតកម្មកសិកម្ម ដើម្បីឆ្លើយតបតាមតម្រូវការទីផ្សារនាំចេញ និងជាពិសេសទៅកាន់ទីផ្សារអឺរ៉ុប។បើយោងតាម ឯកឧត្តម វេង សាខុន រដ្ឋាភិបាលឆែកដែលបានទិញអង្ករពីកម្ពុជាចំនួនជាង ៧ ០០០ តោនក្នុងឆ្នាំ ២០២១ ហើយសង្ឃឹមថា បរិមាណនេះនឹងកើនឡើងនាពេលអនាគត៕ អត្ថបទ៖ វណ្ណៈ

កម្ពុជា និងស្រីលង្កា ឯកភាពធ្វើសកម្មភាពជំរុញចលនាទេសចរណ៍ឡើងវិញ

ភ្នំពេញ៖ នៅថ្ងៃទី១០ ខែឧសភានេះ ឯកឧត្តម ថោង ខុន រដ្ឋមន្ត្រីក្រសួងទេសចរណ៍កម្ពុជា បានចុះហត្ថលេខាលើអនុសារណៈយោគយល់គ្នាជាមួយលោកជំទាវ Chaminda l. Colonne ឯកអគ្គរដ្ឋទូតប្រទេសស្រីលង្កា ប្រចាំនៅកម្ពុជាជាលើកដំបូង ដើម្បីជំរុញចលនាទេសចរណ៍រវាងប្រទេសពីរអោយមានភាពល្អប្រសើរឡើងវិញ ។បើតាមឯកឧត្តម ទី្រ ឈីវ ទីប្រឹក្សាក្រសួងទេសចរណ៍ បានថ្លែងអោយក្រោយជំនួបចុះហត្ថលេខានេះថា នៅក្នុងខ្លឹមសារអនុសារណៈការយោគយល់គ្នាលើកិច្ចសហប្រតិបត្តិការនៃវិស័យទេសចរណ៍នេះ គឺភាគីប្រទេសទាំងពីរ នឹងជម្រុញអោយមានសកម្មភាពទេសចរណ៍នានាដូចជា ការតភ្ជាប់ជើងហោះហើរត្រង់រវាងប្រទេសពីរ ដោយចាប់ផ្តើមពីការតភ្ជាប់ជើងហោះហើរជា Charter flight ជម្រុញការរៀបចំកញ្ចប់ទស្សនកិច្ចសាសនាព្រះពុទ្ធ កម្ពុជា ស្រីលង្ការ ហើយក្នុងនោះដែរភាគីទាំងពីរនឹងជម្រុញអោយមានការផ្លាស់ប្តូរទស្សនកិច្ចរវាងព្រះសង្ឃ ថ្នាក់ដឹកនាំសង្ឃ និងគ្រឹះស្ថានសិក្សាពុទ្ធសាសនៈបណ្ឌិតនានាទៀតជាដើម។នៅក្នុងជំនួបនេះដែរ ឯកឧត្តម ថោង ខុន បានក៏បានលើកឡើងដែរថា បច្ចុប្បន្នកម្ពុជា ក៏កំពុងអនុវត្តគោលនយោបាយទេសចរណ៍ផ្នែកសាសនាព្រះពុទ្ធ តាមការដាក់ចុះនូវយន្តការគឺ ខេត្តមួយ ត្រូវបានមានវត្តអារ៉ាមគំរូយ៉ាងតិចចំនួន២ ដែលជាវត្តទាក់ទាញភ្ញៀវទេសចរជាតិអន្តរជាតិផ្នែកសាសនាព្រះពុទ្ធអោយទៅទស្សនានៅក្នុងវត្តទាំងនោះ ជាពិសេសនៅខេត្តសៀមរាប នៅបាត់ដំបងជាដើម។ លោកជំទាវ Chaminda l. Colonne បានថ្លែងថា នៅក្នុងមុនពេលពិភពលោកមិនទាន់មានការរាតត្បាតកូវីដ១៩ កម្ពុជា ស្រីលង្ការមានផ្លាស់ប្តូរទេសចរណ៍ផ្នែកសាសនាព្រះពុទ្ធមានភាពល្អប្រសើរ ក្នុងនោះ ភ្ញៀវទេសចរមកពីស្រីលង្ការមកទស្សនាកម្ពុជា មានកំណើនប្រមាណ២៣% ហើយរំពឹងថា ក្រោយវិបត្តិកូវីដ១៩ធូរស្រាលនេះ កម្ពុជា ស្រីលង្កា នឹងមានការផ្លាស់ប្តូរដំណើរទស្សនកិច្ច និងទេសចរណ៍មានភាពល្អប្រសើរដូចដើមវិញ។ សូមបញ្ជាក់ថា នៅក្នុងជំនួបនេះដែរភាគីទាំងពីរ ក៏បានឯកភាពបង្កើតក្រុមការងារកម្ពុជាស្រីលង្កា ដើម្បីជម្រុញអោយមានកិច្ចប្រជុំរៀងរាល់៣ខែម្តង ដើម្បីបូកសរុបលទ្ធផលការងារ តាមដានការអនុវត្តខ្លឹមសារអនុសារណៈកិច្ចសហប្រតិបត្តិការក្នុងវិស័យទេសចរណ៍នេះនៃប្រទេសទាំងពីរ៕អត្ថបទ៖ ស៊ុម សុខជា

ប្រជាពលរដ្ឋបំពេញកាតព្វកិច្ចបង់ពន្ធ ជាការចូលរួមចំណែកអភិវឌ្ឍន៍ប្រទេស

នំពេញ៖ អ្នកជំនាញគ្រប់គ្រងពន្ធធំ នៃអគ្គនាយកដ្ឋានពន្ធដារ លើកឡើងថា កាតព្វកិច្ចពន្ធដារ គឺជាកាតព្វកិច្ចសម្រាប់ប្រជាពលរដ្ឋគ្រប់រូប ការចូលរួមពីប្រជាពលរដ្ឋលើការបំពេញកាតព្វកិច្ចបង់ពន្ធ តាមរយៈដោយផ្ទាល់ ឬប្រយោល គឺជាការចូលរួមចំណែកយ៉ាងសំខាន់ដល់អភិវឌ្ឍន៍ប្រទេសទាំងអស់គ្នា ។ឯកឧត្ដមបណ្ឌិត អេង រតនា ប្រធាននាយកដ្ឋានគ្រប់គ្រងអ្នកជាប់ពន្ធធំ នៃអគ្គនាយកដ្ឋានពន្ធដារ លើកឡើងក្នុងវេទិការ ស្ដីពីអាជីពការងារ ដែលរៀបចំដោយវិទ្យាស្ថានខេមអេដ នាចុងសប្តាហ៍កន្លងមកថា ការចូលរួមបង់ពន្ធរបស់ប្រជាពលរដ្ឋកម្ពុជា តាមរយៈដោយផ្ទាល់ ឬប្រយោលក្តី គឺជាការចូលរួមអភិវឌ្ឍន៍ប្រទេសយ៉ាងសំខាន់ ដើម្បីបង្កើនគ្រប់ហេដ្ឋារចនាសម្ព័ន្ធឲ្យកាន់តែរឹងមាំ ជាពិសេសការបង្កើននូវធនធានមនុស្សឲ្យកាន់តែសំបូរបែប ដើម្បីជម្រុញអភិវឌ្ឍន៍ប្រទេសកម្ពុជាឲ្យកាន់តែខ្លាំងដូចបណ្តា ប្រទេសរីកចម្រើនមួយចំនួន។ឯកឧត្ដមបណ្ឌិត លើកឡើងបន្តថា កាតព្វកិច្ចពន្ធដារ គឺជាកាតព្វកិច្ចសម្រាប់ប្រជាពលរដ្ឋគ្រប់រូប ព្រោះធនធានពន្ធដារ គឺមានសារៈសំខាន់ណាស់ សម្រាប់ប្រទេសជាតិ ក៏ដូចជាលើកកម្ពស់ជីវភាពប្រជាជនទាំងមូលផងដែរ ចំណែកធនធានមនុស្សក្នុងអាជីពនៃវិស័យគណនេយ្យ សវនកម្ម និងពន្ធដារ ក៏មានសារៈសំខាន់ផងដែរ សម្រាប់ជួយសម្រួលដល់ការប្រមូលពន្ធ និងត្រួតពិនិត្យរបាយការណ៍ហិរញ្ញវត្ថុ ប្រកបទៅបានដោយរលូន។ ក្នុងវេទិការនេះដែរ លោក ខេស៊ី បាណេត នាយកវិទ្យាស្ថានខេមអេដ បានបន្ថែមទៀតថា គណនេយ្យ គឺជាមធ្យោបាយយ៉ាងសំខាន់ សម្រាប់ការដំណើរការនៃអាជីវកម្ម ក៏ដូចជាបម្រើការដល់ការប្រមូលពន្ធ ដើម្បីជាចំណូលរដ្ឋសម្រាប់រាជរដ្ឋាភិបាល នៃព្រះរាជាណាចក្រកម្ពុជា។ ប្រសិនបើការអនុវត្តគណនេយ្យប្រកបដោយគុណភាព និងស្តង់ដារ ការគ្រប់គ្រងអាជីវកម្មក៏ប្រកបទៅដោយជោគជ័យ រីឯការប្រមូលពន្ធ ក៏ធ្វើឡើងប្រកបដោយគុណភាព និងតម្លាភាពផងដែរ ដើម្បីផលប្រយោជន៍ដល់ប្រទេសជាតិទាំងមូល៕អត្ថបទ៖ សុន រ៉ាឌី

ការនាំចេញស្រូវ-អង្ករកម្ពុជាទៅទីផ្សារអន្តរជាតិ ទទួលបានចំណូលជាង ៥០០លានដុល្លារ ក្នុងរយៈពេលបួនខែដើមឆ្នាំ

ភ្នំពេញ៖ កម្ពុជានាំចេញស្រូវ អង្ករ ទៅកាន់ទីផ្សារអន្តរជាតិ ទទួលបានចំណូល ៥១៦លានដុល្លារ ក្នុងរយៈពេល៤ខែដើមឆ្នាំ២០២២នេះ ខណៈការនាំចេញអង្ករបានចំនួនជាង ២២ម៉ឺនតោន នៅក្នុងរយៈពេល ៤ខែ ឆ្នាំ២០២២ នេះ កើនឡើងប្រមាណ ១៥ ភាគរយ បើធៀបនឹងរយៈពេលដូចគ្នាក្នុងឆ្នាំ២០២១។សេចក្តីប្រកាសព័ត៌មានរបស់សហព័ន្ធស្រូវអង្ករកម្ពុជា បានឱ្យដឹងថា ចាប់ពីខែមករា ដល់ខែមេសា ឆ្នាំ ២០២២ កម្ពុជា បាននាំចេញអង្ករចំនួន ២២១ ១៣៨ តោនកើនឡើង ១៤,៨ ភាគរយ។ដោយឡែកការនាំចេញស្រូវបានចំនួន ១ ៦៤៨ ៤៧៤ តោន ដោយទាំងស្រូវ និងអង្ករមានតម្លៃទឹកប្រាក់សរុបមានចំនួន ៥១៦,២១ លានដុល្លារ។តាមសេចក្តីប្រកាសព័ត៌មានរបស់សហព័ន្ធស្រូវអង្ករកម្ពុជា បានឱ្យដឹងទៀតថា ក្រុមហ៊ុននាំចេញចំនួន ៤៨ ក្រុមហ៊ុន បានធ្វើការនាំចេញទៅកាន់គោលដៅចំនួន ៥៤ ប្រទេស។ ក្នុងនោះ កម្ពុជាបាននាំទៅប្រទេសចិន និងតំបន់ស្វយ័តហុងកុង ម៉ាកាវ បានចំនួន ១១៥ ២៥៥ តោន ស្មើនឹង ៥២ ភាគរយនៃការនាំចេញសរុប ដែលគិតជាទឹកប្រាក់មានចំនួន ៦២,៧៤ លានដុល្លារ។ដោយឡែក តំបន់អឺរ៉ុបមានបរិមាណ ចំនួន ៦៨ ៥៥៥ តោន ឬស្មើនឹង ៣១ ភាគរយ ទទួលបានទឹកប្រាក់ចំនួន ៥១,០២ លានដុល្លារ។ចំណែក តំបន់សមាជិកអាស៊ាន ចំនួន ២១ ៨៧៦ តោន ឬស្មើនឹង ៩,៨៩ ភាគរយទទួលបានទឹកប្រាក់ចំនួន ១៣,៩០ លានដុល្លារ និងបណ្តាប្រទេសផ្សេងៗ ក្រៅពីតំបន់ខាងលើបានចំនួន ១៥ ៤៥២ តោន ឬស្មើនឹង ៦,៩៩ ភាគរយ គិតជាទឹកប្រាក់មានចំនួន ១១,៧៤ លានដុល្លារ។អង្ករដែលសហព័ន្ធបាននាំចេញរួមមាន ប្រភេទអង្ករក្រអូបគ្រប់ប្រភេទមានចំនួន ៦៧,១២ ភាគរយ, អង្ករស ចំនួន ៣០,១៣ ភាគរយ, អង្ករចំហុយចំនួន ១,០៧ ភាគរយ និងអង្ករសរីរាង្គចំនួន ១,៦៨ ភាគរយ៕អត្ថបទ៖ វណ្ណៈ

ក្រុមប្រឹក្សាធុរកិច្ចអាស៊ាន-សហរដ្ឋអាមេរិក ជំរុញលើកកម្ពស់ការវិនិយោគ និងសេដ្ឋកិច្ចប្រកបដោយចីរភាព

ភ្នំពេញ៖ ក្រុមប្រឹក្សាធុរកិច្ចអាស៊ាន-សហរដ្ឋអាមេរិក ស្នើដល់រាជរដ្ឋាភិបាលកម្ពុជា ផ្តោតការយកចិត្តទុកដាក់លើកកម្ពស់បរិយាកាសវិនិយោគ ដើម្បីសម្រេចបាននូវការស្តារសេដ្ឋកិច្ចប្រកបដោយចីរភាព និងបរិយាបន្ន ។នេះជាការលើកឡើងរបស់ លោក Michael Michalak នាយកគ្រប់គ្រងតំបន់នៃក្រុមប្រឹក្សាធុរកិច្ចអាស៊ាន-សហរដ្ឋអាមេរិក នៅក្នុងជំនួបពិភាក្សាការងារជាមួយ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច នៅថ្ងៃទី៤ ខែឧសភា ឆ្នាំ ២០២២។ក្នុងជំនួបនេះ,ឯកឧត្ដមអគ្គបណ្ឌិតសភាចារ្យ ឧបនាយករដ្ឋមន្រ្តី បានគូសបញ្ជាក់អំពីស្មារតីបុរេសកម្មរបស់រាជរដ្ឋាភិបាលកម្ពុជា ក្នុងការលើកកម្ពស់ការចូលរួមរបស់វិស័យឯកជនក្នុងការស្ដារ និងជំរុញកំណើនសេដ្ឋកិច្ចជាតិ តាមរយៈការជំរុញការអនុវត្តគោលនយោ បាយសំខាន់ៗ ដែលបានដាក់ចេញកន្លងមករួមមាន៖ “ក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា២០២១-២០៣៥”, “ក្របខណ្ឌយុទ្ធសាស្រ្ត និងកម្មវិធីស្តារ និងជំរុញកំណើនសេដ្ឋកិច្ចកម្ពុជា ក្នុងការរស់នៅជាមួយកូវីដ-១៩ តាមគន្លងប្រក្រតីភាពថ្មី សម្រាប់ឆ្នាំ ២០២១-២០២៣”, “ច្បាប់ស្តីពីវិនិយោគថ្មី”, “ច្បាប់ស្តីពីភាពជាដៃគូរវាងរដ្ឋ និងឯកជន”។រាជរដ្ឋាភិបាល កំពុងត្រៀមដាក់ចេញនូវគោលនយោបាយសំខាន់ៗមួយចំនួនទៀតដូចជា “គោលនយោបាយសារពើពន្ធ ដើម្បីជំរុញការប្រើប្រាស់យានជំនិះដែលមិនប៉ះពាល់ដល់បរិស្ថាន”, “គោលនយោបាយជាតិស្តីពីប្រសិទ្ធភាពថាមពល”, “យុទ្ធសាស្ត្រអភិវឌ្ឍន៍សហគ្រាសធុនតូច និងមធ្យមឆ្នាំ ២០២២-២០២៦” និង “ផែនទីបង្ហាញផ្លូវសម្រាប់ការធានារ៉ាប់រងសុខភាពជាសកល” ជាដើម។ទាក់ទងពាណិជ្ជកម្មវិញ ឯកឧត្តមអគ្គបណ្ឌិតសភាចារ្យ មានប្រសាសន៍ថា សហរដ្ឋអាមេរិក គឺជាដៃគូពាណិជ្ជកម្ម និងវិនិយោគដ៏សំខាន់របស់កម្ពុជា ជាក់ស្តែងតម្លៃពាណិជ្ជកម្មរវាងប្រទេសទាំងពីរ មានចំនួនសរុបប្រមាណ ៧.៩ ពាន់លានដុល្លារ និងវិនិយោគពីសហរដ្ឋអាមេរិកមកកម្ពុជាបានកើនដល់ ៨៦៣ លានដុល្លារ ក្នុងឆ្នាំ ២០២១ ។សម្រាប់ការគាំទ្រដល់ធ្វើជាប្រធានអាស៊ានរបស់កម្ពុជា ឆ្នាំ២០២២, ឯកឧត្ដម ឧបនាយករដ្ឋមន្រ្តី បានវាយតម្លៃខ្ពស់ ចំពោះការរៀបចំឱ្យមានកិច្ចពិភាក្សារវាងថ្នាក់ដឹកនាំកំពូលអាស៊ាន ជាមួយសមាគមធុរកិច្ចរបស់សហរដ្ឋអាមេរិក ក្នុងអំឡុងពេលនៃកិច្ចប្រជុំកំពូលពិសេសអាស៊ាន-សហរដ្ឋអាមេរិក ដែលនឹងប្រព្រឹត្តទៅនៅថ្ងៃទី ១២-១៣ ខែ ឧសភា ឆ្នាំ ២០២២ នៅសហរដ្ឋអាមេរិក ដើម្បីអបអរខួបនៃទំនាក់ទំនងរវាងភាគីទាំងពីរ ក្នុងរយៈពេលជាងបួនទសវត្សរ៍ និងពង្រឹងកិច្ចសហប្រតិបត្តិការក្នុងវិស័យសំខាន់ៗដូចជា ការឆ្លើយតបនឹងជំងឺកូវីដ-១៩ និងភាពតានតឹងភូមិសាស្ត្រនយោបាយ, ការប្រែប្រួលអាកាសធាតុ និងការអភិវឌ្ឍប្រកបដោយចីរភាព, ការអភិវឌ្ឍធនធានមនុស្ស និងការតភ្ជាប់សេដ្ឋកិច្ចជាដើម ៕អត្ថបទ៖ សុន រ៉ាឌី

អគ្គនាយកដ្ឋានពន្ធដារប្រមូលចំណូល បានជាងពាក់កណ្តាលនៃផែនការក្នុងរយៈពេល៤ខែ

ភ្នំពេញ៖ ត្រឹមរយៈពេល ៤ខែ ដើមឆ្នាំ២០២២ប៉ុណ្ណោះ អគ្គនាយកដ្ឋានពន្ធដារ អនុវត្តការប្រមូលចំណូលជាង ៥៣ ភាគរយ នៃផែនការកំណត់ដោយច្បាប់។ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្រ្តី និងទទួលបន្ទុកជាអគ្គនាយកនៃអគ្គនាយកដ្ឋានពន្ធដារ លើកឡើងនៅក្នុងពីធីបើកដំណើរការ ជាផ្លូវការនូវកម្មវិធីវិក្កយបត្រនាំសំណាង របស់អគ្គនាយកដ្ឋានពន្ធដារ (GDT Lucky Draw) នៅថ្ងៃទី ៥ខែឧសភា ឆ្នាំ២០២២ នេះ។ឯកឧត្តម គង់ វិបុល លើកឡើងថា ទោះជាស្ថានភាពសេដ្ឋកិច្ចមានការថមថយ ក្នុងរយៈពេលប៉ុន្មានចុងក្រោយនេះក្តី, អគ្គនាយកដ្ឋានពន្ធដារតែងតែគ្រប់គ្រង ប្រមូលចំណូលពន្ធគ្រប់ និងលើសផែនការ ក្នុងរយៈពេលឆ្នាំចុងក្រោយនេះ។ជាក់ស្ដែងឆ្នាំ២០២០ សម្រេចបាន ១០១,៣៦% នៃផែនការប្រចាំឆ្នាំ និងឆ្នាំ២០២១ សម្រេចបាន ១២៤,០២% នៃផែនការប្រចាំឆ្នាំ។ ចំណែក ក្នុងរយៈពេល ៤ខែ ដើមឆ្នាំ ២០២២ នេះ អគ្គនាយកដ្ឋានពន្ធដារប្រមូលចំណូលសម្រេចបាន ៥៣,២៧% នៃផែនការប្រចាំឆ្នាំ ដែលជាចំនួនមួយបង្ហាញឲ្យឃើញថា ត្រឹមរយៈពេលដ៏ខ្លីប៉ុណ្ណោះ។ឯកឧត្តម បញ្ជាក់ថា ចំពោះលទ្ធផលប្រមូលចំណូលដ៏ប្រសើរនេះ គឺបានកើតក្រោមមាគ៌ាដឹកនាំដ៏ត្រឹមត្រូវប្រកបដោយគតិបណ្ឌិត និងទស្សនវិស័យវែងឆ្ងាយ ព្រមទាំងបានដឹកនាំប្រទេសកម្ពុជាឆ្លងកាត់វិបត្តិកូវីដ-១៩ បានប្រកបដោយសុវត្ថិភាព សុខុមាលភាព តាមរយៈការដាក់ចេញនូវវិធានការត្រឹមត្រូវ និងទាន់ពេលវេលា ជាពិសេសការការចាក់វ៉ាក់សាំង ដែលជាយុទ្ធសាស្ត្រគន្លឹះ និងរហូតឈានដល់ការបើកដំណើរការសេដ្ឋកិច្ចប្រទេសឡើងវិញ គឺបានធ្វើឲ្យកម្ពុជា សម្រេចនូវបរិយាកាសម៉ាក្រូសេដ្ឋកិច្ចដែលមានស្ថិរភាព និងប្រកបដោយភាពល្អប្រសើរ ។ក្នុងពិធីនេះដែរ, លោក Arnaud Darc ប្រធានសមាគមភោជនីយដ្ឋាននៅកម្ពុជា ថ្លែងថា នៅក្នុងស្ថានភាពនៃការរីករាលដាលជម្ងឺកូវីដ ១៩ នេះ វិស័យភោជនីយដ្ឋាននៅកម្ពុជា បានធ្លាក់ចុះយ៉ាងខ្លាំង ជាក់ស្តែងនៅក្នុងរយៈពេល ២ឆ្នាំ កន្លងមកនេះ បានធ្លាក់ចុះ ៥០% ក្នុងនោះប្រសិនគ្មានការគិតគូរ ជួយជ្រោមជ្រែងពីរាជរដ្ឋាបាលនោះទេ វិស័យនេះក៏គ្មានឱកាសមកដល់ពេលនេះផងដែរ។ក្នុងនាមជាប្រធានសមាគម លោករំពឹងថា វិស័យភោជនីយដ្ឋាននៅកម្ពុជា នឹងរីកចម្រើនឡើងវិញ ខណៈដែលរាជរដ្ឋាភិបាលកម្ពុជា បានខិតខំប្រែងប្រែង និងអនុវត្តវិធានការជាច្រើន ដើម្បីទប់ស្កាត់នឹងវិបត្តិនៃជម្ងឺកូវីដ ១៩នេះ ដោយបានបង្កើតភាពស៊ាំក្នុងសហគមន៍ និងបានឈានបើកអាជីវកម្មឡើងវិញ៕ អត្ថបទ៖ សុន រ៉ាឌី

អគ្គនាយកដ្ឋានពន្ធដារ ដាក់ឱ្យប្រើប្រាស់កម្មវិធីវិក្កយបត្រនាំសំណាង ដើម្បីពង្រឹងការប្រមូលចំណូលពន្ធ

ភ្នំពេញ ៖ អគ្គនាយកដ្ឋានពន្ធដារ ដាក់ឱ្យប្រើប្រាស់កម្មវិធីវិក្កយបត្រនាំសំណាង (GDT Lucky Draw) ក្នុងគោលបំណងឱ្យសាធារណជនទូទៅក្នុងព្រះរាជាណាចក្រកម្ពុជា បានរួមចំណែក ក្នុងការពង្រឹងការប្រមូលចំណូលពន្ធជូនរដ្ឋឱ្យកាន់តែប្រសើរ ដើម្បីចូលរួមចំណែកដល់ការអភិវឌ្ឍរបស់ប្រទេសជាតិ។ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្រ្តី និងទទួលបន្ទុកជាអគ្គនាយកនៃអគ្គនាយកដ្ឋានពន្ធដារ លើកឡើងនៅក្នុងពិធីបើកដំណើរការ ជាផ្លូវការនូវកម្មវិធីវិក្កយបត្រនាំសំណាង របស់អគ្គនាយកដ្ឋានពន្ធដារ (GDT Lucky Draw) នៅថ្ងៃទី ៥ ខែឧសភា ឆ្នាំ២០២២នេះថា ជាង ១០ ឆ្នាំកន្លងមកនេះ អគ្គនាយកដ្ឋានពន្ធដារ ប្រមូលចំណូលបានល្អប្រសើរ និងបានកើនឡើងគួរជាទីកត់សម្គាល់ ដែលការកើនឡើងនេះ ពន្ធដារបានអនុវត្តនូវវិធានការជាច្រើនដូចជា ការដាក់ចេញនូវប្រព័ន្ធបច្ចេកវិទ្យា ដើម្បីសម្រួល និងផ្តល់ភាពងាយស្រួលជូនប្រជាពលរដ្ឋ និងការអនុវត្តតាមយុទ្ធសាស្រ្តគៀគរចំណូលជាដើម។ជាក់ស្តែងការដាក់ឲ្យដំណើរកម្មវិធីវិក្កយបត្រនាំសំណាងនៅពេលនេះ គឺមានគោលបំណង ឱ្យសាធារណជនទូទៅក្នុងព្រះរាជាណាចក្រកម្ពុជា បានរួមចំណែកក្នុងការពង្រឹងការប្រមូលចំណូលពន្ធជូនរដ្ឋឱ្យកាន់តែប្រសើរឡើង និងជួយបង្កើនតម្លាភាពក្នុងការប្រមូលចំណូលពន្ធ។ បន្ថែមពីលើនេះ ប្រជាពលរដ្ឋ នឹងមានឱកាសឈ្នះរង្វាន់ផ្សេងៗជាច្រើនផងដែរ និងក៏ជាឱកាសចូលរួមចំណែក ក្នុងការពង្រឹងការចំណូលរបស់អគ្គនាយកដ្ឋានពន្ធដារ ជាពិសេសជាការចូលរួមចំណែកដល់ការអភិវឌ្ឍរបស់ប្រទេសជាតិ។សូមបញ្ជាក់ថា នៅក្នុងត្រីមាសទី ១ដើមឆ្នាំ២០២២ អគ្គនាយកដ្ឋានពន្ធដារ ប្រមូលចំណូលបានចំនួនជាង ៥ ១១៥ ប៊ីលានរៀល ត្រូវប្រមាណជាង ១ ២៦៣ លានដុល្លារអាមេរិក បើធៀបរយៈពេលដូចគ្នាឆ្នាំ ២០២១ ចំណូលនេះកើនឡើងជាង ២២%៕អត្ថបទ ស៊ុន រ៉ាឌី

វិនិយោគិន និងធុរកិច្ចជនជប៉ុន មានទំនុកចិត្តមកវិនិយោគនៅកម្ពុជា

ភ្នំពេញ៖ អតីតឯកអគ្គរាជទូតជប៉ុនប្រចាំកម្ពុជា និងជាប្រធានមូលនិធិគាំទ្រការអប់រំនៅកម្ពុជា អះអាងថា វិនិយោគិន និងធុរកិច្ចជនជប៉ុន មានទំនុកចិត្ត មកវិនិយោគនៅកម្ពុជា ខណៈចំនួនក្រុមហ៊ុនវិនិយោគកាន់តែច្រើនមកវិនិយោគនៅកម្ពុជា។នេះជាការលើកឡើងរបស់ឯកឧត្តម Katsuhiro SHINOHARA អតីតឯកអគ្គរាជទូតជប៉ុនប្រចាំកម្ពុជា និងជាប្រធានមូលនិធិគាំទ្រការអប់រំនៅកម្ពុជា ព្រមទាំងគណៈប្រតិភូក្រុមហ៊ុន FORVAL ជប៉ុន ក្នុងជំនួបជាមួយឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម កាលពីរសៀលថ្ងៃទី៤ ឧសភា ឆ្នាំ២០២២កន្លងទៅ ក្នុងគោលបំណងដើម្បីស្វែងយល់បន្ថែមនូវសក្តានុពលពាណិជ្ជកម្ម និងធុរកិច្ចរវាងប្រទេសទាំងពីរ។ឯកឧត្តម អតីតឯកអគ្គរាជទូត បានសម្តែងការកោតសរសើរចំពោះកិច្ចខិតខំប្រឹងប្រែងរបស់ក្រសួងពាណិជ្ជកម្ម ដែលធ្វើឱ្យធុរជនមានទំនុកចិត្ត និងមកវិនិយោគនៅកម្ពុជាកាន់តែច្រើន។ ជាមួយគ្នានេះ លោកនាយកប្រតិបត្តិរបស់ក្រុមហ៊ុន FORVAL ជប៉ុន ក៏បានជម្រាបពីគោលបំណងក្នុងការជួយគាំទ្រ និងរួមចំណែកអភិវឌ្ឍសហគ្រាសធុនតូច និងមធ្យមនៅកម្ពុជាព្រមទាំងប្តេជ្ញាពង្រីកសកម្មភាពធុរកិច្ចនៅកម្ពុជា ក៏ដូចជាកៀគរវិនិយោគិនជប៉ុនមកកម្ពុជាឱ្យកាន់តែច្រើន ដើម្បីរួមចំណែកដល់ការអភិវឌ្ឍ និងលើកកម្ពស់ជីវភាពប្រជាពលរដ្ឋកម្ពុជាផងដែរ។ក្នុងជំនួបខាងលើនេះ ភាគីទាំងពីរ ក៏បានសម្តែងសារជាថ្មីនូវការប្តេជ្ញាចិត្តបន្តកិច្ចសហការសម្របសម្រួល និងជំរុញសកម្មភាពធុរកិច្ច និងវិនិយោគ ជាពិសេសលើវិស័យដែលមានសក្តានុពលនានានៅកម្ពុជា ដើម្បីជំរុញកំណើនសេដ្ឋកិច្ច-ពាណិជ្ជកម្មរវាងប្រទេសទាំងពីរបន្ថែមទៀត។ឯកឧត្តមរដ្ឋមន្រ្តី បានគូសបញ្ជាក់អំពីកិច្ចខិតខំប្រឹងប្រែងរបស់ក្រសួងពាណិជ្ជកម្ម ក្នុងការធ្វើឱ្យប្រសើរឡើងនូវបរិយាកាសធុរកិច្ចនៅកម្ពុជា ដើម្បីសម្រួលដល់ធុរជន និងបានស្នើឱ្យក្រុមហ៊ុន ពិនិត្យលទ្ធភាពពង្រីកប្រតិបត្តិការធុរកិច្ចនៅកម្ពុជា និងវិនិយោគលើវិស័យដែលមានសក្តានុពលនានាបន្ថែមទៀត។ ក្នុងនោះ ឯកឧត្តម បានស្នើឱ្យភាគីជប៉ុន ក៏ដូចជាវិស័យឯកជនជប៉ុន ជួយគាំទ្រឱ្យមានការបង្កើតកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-ជប៉ុន ដូចដែលបានលើកឡើងនៅក្នុងជំនួប រវាងសម្ដេចនាយករដ្ឋមន្រ្តីតេជោ ហ៊ុន សែន ជាមួយ ឯកឧត្តម Fumio Kishida នាយករដ្ឋមន្រ្តីជប៉ុន ដើម្បីផលប្រយោជន៍ប្រជាជន និងវិស័យធុរកិច្ចនៃប្រទេសទាំងពីរ។សូមបញ្ជាក់ថា យោងតាមទិន្នន័យរបស់អង្គការពាណិជ្ជកម្មក្រៅប្រទេសជប៉ុន (Jetro) បានឲ្យដឹងថា គិតត្រឹមបំណាច់ឆ្នាំ២០២១ ការផ្លាស់ប្តូរពាណិជ្ជកម្ម រវាងកម្ពុជា-ជប៉ុន មានតម្លៃសរុបប្រមាណជាង ២ ៣០០លានដុល្លារ កើនជិត ១១ភាគរយ បើធៀបឆ្នាំ២០២០។ ក្នុងនោះ ការនាំចេញពីកម្ពុជា មានទឹកប្រាក់ប្រមាណជាង ១ ៧០០លានដុល្លារ និងនាំចូលពីជប៉ុន មានទឹកប្រាក់ប្រមាណជាង ៥៨០លានដុល្លារ៕ អត្ថបទ៖ បូរ៉ាវី

គយនិងរដ្ឋាករ ប្រមូលចំណូលរថយន្តអត់ពន្ធ និងផាកពិន័យបានជិត ៦៥ លានដុល្លារ

ភ្នំពេញ៖ គិតត្រឹមថ្ងៃទី ៣ខែមេសា ឆ្នាំ២០២២ អគ្គនាយកដ្ឋានគយ និងរដ្ឋាករកម្ពុជាប្រមូលពន្ធ-អាករ លើរថយន្តអត់ពន្ធ និងរថយន្តចង្កូតស្តាំ និងការផាកពិន័យ បានចំនួនប្រមាណជិត ៦៥ លានដុល្លារអាមេរិក។ឯកឧត្តម គុណ ញឹម រដ្ឋមន្រ្តីប្រតិភូអមនាយករដ្ឋមន្ត្រី ទទួលបន្ទុកជាអគ្គនាយក នៃអគ្គនាយកដ្ឋានគយ និងរដ្ឋាករកម្ពុជា លើកឡើងក្នុងសន្និសីទសារព័ត៌មាន ស្តីពីវឌ្ឍនភាពនៃការអនុវត្តការប្រមូលពន្ធ លើយានយន្តគ្មានពន្ធ និងអាករនាំចូល ដែលមានស្រាប់ក្នុងប្រទេស នៅថ្ងៃទី ៤ខែ ឧសភា ឆ្នាំ២០២២ នេះថា លទ្ធផលប្រមូលចំណូលពន្ធអាករ គិតត្រឹមថ្ងៃទី៣០ ខែមេសា ឆ្នាំ ២០២២ នេះ គឺមានម្ចាស់រថយន្តបាន ចូលមកបង់ពន្ធអាករ និងកក់ប្រាក់ ទាំងរថយន្តចង្កូតស្តាំ និងរថយន្តចង្កូតឆ្វេង សរុបមានចំនួនជិត ៧ ពាន់គ្រឿងសរុបជាថវិការទាំងអស់បានជិត ៦០លានដុល្លាអាមេរិក។ឯកឧត្តម បន្តថា នៅក្នុងចំណោមរថយន្តដែលប្រមូលបានខាងលើនេះ មានរថយន្តចំនួន ៤ ៦៩០ គ្រឿង គឺបានបង់ពន្ធ និងបង្វែរប្រាក់កក់ ទៅជាប្រាក់ពន្ធរួចហើយ ដែលបានផ្ទេរចូលទៅថវិកាជាតិ។ ដោយឡែក រថយន្តចង្កូតស្តាំ ក្នុងចំណោមរថយន្តចង្កូតស្តាំដែលបានកក់ប្រាក់ប្រមាណ ៤ ៥៩០ គ្រឿង បានកែចង្កូតរួចហើយ មានចំនួន ២ ៣៥៨គ្រឿង នៅសល់ ២ ២៣៣ គ្រឿង គឺស្ថិតនៅក្នុងរោងជាង។ បើគិតប្រាក់ពន្ធអាករដែលបានកក់ មិនទាន់បង្វែរប្រាក់កក់ទៅជាប្រាក់ពន្ធអាករ មានចំនួនប្រមាណជាង ១៣ លានដុល្លាអាមេរិក។ឯកឧត្តម គុណ ញឹម អំពាវនាវដល់ម្ចាកស់ រថយន្តដែលមិនទាន់បំពេញកាតព្វកិច្ច សូមមកប្រកាសពន្ធឲ្យបានរួសរាន់ ដែលអគ្គនាយកដ្ឋានគយ និងរដ្ឋាករកម្ពុជា នឹងការអនុវត្តវិធានការនេះ នៅត្រឹមថ្ងៃទី ៣០ ខែមិថុនា ខាងមុខ។ ចាប់ពីថ្ងៃទី១ ខែកក្តដា តទៅអគ្គនាយកដ្ឋានគយ និងរដ្ឋាករកម្ពុជា ពុំមានសិទ្ធិបង់ពន្ធរថយន្តមានស្រាប់ក្នុងប្រទេសទៀតឡើយ។ អគ្គនាយកដ្ឋានគយ និងរដ្ឋាករកម្ពុជា នឹងពង្រឹង ការចុះបង្រ្កាបឲ្យកាន់តែខ្លាំងក្លាជាងមុន លើរថយន្តចង្កូតឆ្វេង គឺត្រូវបង់ពន្ធអាករ និងពិន័យ។ ចំណែករថយន្តចង្កូតស្តាំ នឹងត្រូវដោះជាបំណែក ដើម្បីបំផ្លាញចោល៕ អត្ថបទ៖ សុន រ៉ាឌី

ក្រុមធុរជនម៉ាឡេស៊ីស្វែងរកឱកាសវិនិយោគនៅកម្ពុជា ក្រោយវិបត្តិកូវីដ

ភ្នំពេញ៖ តំណាងធុរកិច្ចប្រទេសម៉ាឡេស៊ី មកពីក្រុមហ៊ុនចំនួន ៣៦ បានមកស្វែងរកការវិនិយោគ និងធុរកិច្ចក្នុងវិស័យសក្ដានុពលនៅកម្ពុជា បន្ទាប់ពីប្រទេសទាំង២ បានបើកដំណើរការសេដ្ឋកិច្ចពេញលេញឡើងវិញ ក្រោយការរីករាលដាលជំងឺកូវីដ១៩។ម៉ាឡេស៊ីជាប្រទេសឈរនៅលំដាប់ទីបីក្នុងតំបន់អាស៊ាន បន្ទាប់ពី វៀតណាម និងសិង្ហបុរី ដែលមានទុនវិនិយោគច្រើនជាងគេនៅកម្ពុជា។ គិតត្រឹមខែកុម្ភៈ ឆ្នាំ២០២២ កម្ពុជាទទួលបានលំហូរទុនវិនិយោគដោយផ្ទាល់ពីប្រទេសម៉ាឡេស៊ី ប្រមាណ ៣,២ ប៊ីលាន។នេះយោងបើតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ។វិនិយោគិនពីប្រទេសម៉ាឡេស៊ី បានបោះទុននៅកម្ពុជាក្នុងវិស័យហិរញ្ញវត្ថុ កម្មន្តសាល អចលនទ្រព្យ សណ្ឋាគារ និងភោជនីយដ្ឋាន កសិកម្ម និងសំណង់ ចំនួន១៦២គម្រោង ដែលមានទឹកប្រាក់ប្រមាណ ៣,២ពាន់លានដុល្លារ។ តួលេខនេះ ត្រូវបានបង្ហាញឡើងនៅក្នុងជំនួបរវាង ឯកឧត្តម ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ជាមួយគណៈប្រតិភូសហគ្រាសធុនតូច និងមធ្យមម៉ាឡេស៊ី (SMEs) ចំនួន៥៣នាក់ នាក្នុងឱកាសដំណើរបំពេញបេសកកម្មធុរកិច្ចនៅកម្ពុជា កាលពីសប្តាហ៍មុន។ឧកញ៉ា លឹម ហេង អនុប្រធានសភាពាណិជ្ជកម្មកម្ពុជា យល់ឃើញថា ការស្វែងរកឱកាសវិនិយោគរបស់ធុរកិចុ្ចម៉ាឡេស៊ីនៅកម្ពុជា គឺស្របតាមការអំពាវនាវរបស់រាជរដ្ឋាភិបាលកម្ពុជា ក៏ដូចជាវិស័យឯកជនតាមរយៈសភាពាណិជ្ជកម្មកម្ពុជា។ឧកញ៉ា លឹម ហេង បញ្ជាក់បន្ថែមថា ទន្ទឹមពេលដែលកម្ពុជា អនុវត្តកិច្ចព្រមព្រៀងពាណិជ្ជកម្មសេរីជាមួយចិន និងមានកិច្ចព្រមព្រៀងពាណិជ្ជកម្មទ្វេភាគីជាមួយកូរ៉េខាងត្បូង បន្ថែមពីលើប្រព័ន្ធអនុគ្រោះពន្ធ ដូចជា EBA និង GSP វិនិយោគិនបរទេស កំពុងសម្លឹងមើលកម្ពុជា ជាទិសដៅវិនិយោគដ៏មានសក្កានុពល។សូមជម្រាបថា កាលឆ្នាំ ២០២១ ទំហំពាណិជ្ជកម្មទ្វេភាគីរវាងប្រទេសទាំងពីរមានគឺមានប្រមាណ ៥០០ លានដុល្លារកើន ១៣ ភាគរយ ធៀបនឹងឆ្នាំ២០២០។ ដោយឡែក ក្នុងរយៈពេល៣ខែដើមឆ្នាំ២០២២ ពាណិជ្ជកម្មរវាងប្រទេសទាំងពីរគឺមានប្រមាណ ១៤៧ លានដុល្លារ ដែលកើនក្នុងរង្វង់ ១៥ ភាគរយ បើធៀបនឹងគ្រាដូចគ្នាកាលឆ្នាំ២០២១។ នេះបើយោងតាមស្ថិតិជញ្ជីងពាណិជ្ជកម្មរបស់អគ្គនាយកដ្ឋានគយ និងរដ្ឋាករកម្ពុជា៕អត្ថបទ៖ វណ្ណៈ

បណ្ដាញសង្គម

ព័ត៌មានថ្មីៗ

សាធារណរដ្ឋកូរ៉េនឹងបន្តពង្រឹង និងពង្រីកកិច្ចសហប្រតិបត្តិការជាមួយកម្ពុជា

បទឈប់បាញ់ដួលរលំនៅទីក្រុង Suwayda ប្រទេសស៊ីរី ខណៈអ៊ីស្រាអែលគំរាមបង្កើនការវាយប្រហារ

ប្រាក់ដុល្លារធ្លាក់ថ្លៃ ខណៈទិន្នន័យតម្លៃអ្នកផលិតរបស់អាមេរិក ស្ថិតក្នុងការតាមដានរបស់វិនិយោគិន

លោក Zelensky និយាយថា «ត្រៀមខ្លួនសម្រាប់ធ្វើសកម្មភាព» ប្រសិនបើទីក្រុងគីវ ទទួលបានអាវុធរយៈចម្ងាយឆ្ងាយ

ប្រភពពីគេហទំព័រ Axios៖អ៊ីស្រាអែលប្តេជ្ញាបញ្ឈប់ការវាយប្រហារលើទីតាំងយោធាស៊ីរី

លោក Netanyahu ៖ អ៊ីស្រាអែលវាយប្រហារស៊ីរី ដើម្បីរក្សាតំបន់គ្មានកងទ័ព និងការពារជនជាតិភាគតិច Druze

ឯកឧត្តម ឃ្លាំង ហួត៖លោក ភូមិថាំ វៈឆៈយៈឆៃ នាយករដ្ឋមន្រ្តីស្ដីទីថៃធ្លាប់រង់ចាំជជែកតាមទូរស័ព្ទដើម្បីសុំចរចាជាមួយសម្ដេចតេជោរហូតដល់៤ម៉ោង

អ៊ុយក្រែន និងអាមេរិក រួមគ្នាផលិតសារធាតុគីមី សម្រាប់ឧស្សាហកម្មការពារជាតិ

លោក Trump និយាយថា អាវុធត្រៀមខ្លួនរួចរាល់ក្នុងការបញ្ជូនទៅកាន់ប្រទេសអ៊ុយក្រែន

ស៊ីរីនិយាយថា មានសិទ្ធិការពារខ្លួន ស្របពេលមានការវាយប្រហាររបស់អ៊ីស្រាអែល

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877