នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
មកដល់ពេលនេះ កសិករចំនួនជាង ១៤០០គ្រួសារ ងាកមកចង​ក្រងគ្នា ដើម្បី​ក្លាយ​ជា​សហគមន៍​កសិកម្ម​ទំនើប
កម្ពុជាកំពុងពិភាក្សាលើការចាប់យកឌីជីថលូបនីយកម្ម ដើម្បីជំរុញវិស័យនេះឱ្យកាន់តែរីកចម្រើន
គណៈកម្មាធិការសេដ្ឋកិច្ចក្រៅប្រព័ន្ធដាក់ឱ្យប្រើប្រាស់សមិទ្ធផលថ្មីលើកកម្ពស់អ្នកសេដ្ឋកិច្ចក្រៅប្រព័ន្ធ
ក្រសួងសេដ្ឋកិច្ច ចេញសារាចរឱ្យប្រើប្រាស់វិក្កយបត្រអេឡិចត្រូនិកជាកាតព្វកិច្ចដល់ក្រសួងចំនួន ៦

សេដ្ឋកិច្ច និង កសិកម្ម

រាជរដ្ឋាភិបាល បង្កើតប្រព័ន្ធគ្រប់គ្រងហិរញ្ញវត្ថុសាធារណៈ រឹងមាំទ្រទ្រង់ការស្តារ និងជំរុញ​កំណើន​សេដ្ឋកិច្ច

2022/04/28 01:08:28 pm        613
Facebook Telegram Linkin
ភ្នំពេញ៖ កម្ពុជាត្រូវតែមានប្រព័ន្ធគ្រប់គ្រងហិរញ្ញវត្ថុសាធារណៈមួយ ដែលមានប្រសិទ្ធភាព និងចីរភាព ដើម្បីអាចទ្រទ្រង់ ដល់កិច្ចដំណើរការស្តារ និងជំរុញកំណើនសេដ្ឋកិច្ច ព្រមទាំងអាចកសាងបាននូវភាពធន់ នៃប្រព័ន្ធហិរញ្ញវត្ថុសាធារណៈទាំងមូល នៅក្នុងរយៈពេលវែង។ឯកឧត្តម វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី, រដ្ឋលេខាធិការប្រចាំការ នៃក្រសួងសេដ្ឋកិច្ច និង​ហិរញ្ញវត្ថុ លើកឡើងនៅក្នុងសិក្ខាសាលាពិគ្រោះយោបល់ លើសេចក្តីព្រាងច្បាប់ស្តីពីប្រព័ន្ធ​ហិរញ្ញវត្ថុ​សាធារណៈថ្មី ​នៅថ្ងៃទី ២៧ ខែមករា ឆ្នាំ២០២២ នេះថា សេចក្តីព្រាងច្បាប់ស្តីពីប្រព័ន្ធ​ហិរញ្ញវត្ថុ​សាធារណៈថ្មីនេះ មាន​លក្ខណៈជាក្របខណ្ឌ​គតិយុត្ត​គោល សម្រាប់គ្រប់គ្រង​ការ​អនុវត្តថវិកា​ព័ត៌មាន សមិទ្ធកម្ម ​ដែលជាធាតុផ្សំដ៏សំខាន់ ​នៃគណនេយ្យសមិទ្ធកម្ម ក៏ដូចជា​ការងារផ្សេងទៀត ពាក់ព័ន្ធនឹងហិរញ្ញវត្ថុសាធារណៈ​ ក្នុងយុគសម័យទំនើប។ ដើម្បីធ្វើឱ្យសេចក្តីព្រាងច្បាប់គោលដ៏មានសារៈសំខាន់នេះ ​កាន់តែមានភាពគ្រប់ជ្រុងជ្រោយ និង​ប្រទាក់ក្រឡា, មានភាពបត់បែន និងងាយស្រួលក្នុងការអនុវត្ត ស្របតាមបរិការណ៍កម្ពុជាសម្រាប់​រយៈពេលវែងទៅមុខ, ក្រសួងសេដ្ឋកិច្ច និងហិរញ្ញវត្ថុ បានរៀបចំសិក្ខាសាលាពិគ្រោះយោបល់​នេះឡើង ​ដើម្បីប្រមូលធាតុចូល ​និងមតិយោបល់បន្ថែមពីគ្រប់ក្រសួងស្ថាប័ន​ និងរដ្ឋបាលថ្នាក់ ក្រោមជាតិ ​ដែលជាតួអង្គនៅក្នុងអនុវត្តថវិកា ក្នុងគោលដៅកសាងនូវប្រព័ន្ធគ្រប់គ្រង​ហិរញ្ញវត្ថុ​សាធារណៈមួយ ដែលប្រកបដោយប្រសិទ្ធភាព ក្នុងការប្រើប្រាស់ធនធានហិរញ្ញវត្ថុសាធារណៈ ដើម្បីទ្រទ្រង់ស្ថិរភាពម៉ាក្រូសេដ្ឋកិច្ច ​កំណើនសេដ្ឋកិច្ច ​និងសមធម៌សង្គម។ឯកឧត្តម បន្តថា ការកែទម្រង់ការគ្រប់គ្រងហិរញ្ញវត្ថុសាធារណៈ ​គឺជាផ្នែកមួយយ៉ាងសំខាន់ សម្រាប់​គាំទ្រដល់ការស្តារ ​និងការកសាងភាពធន់របស់កម្ពុជា ​សម្រាប់រយៈពេលវែងទៅមុខ ដែលកិច្ចការ​នេះ​កាន់តែមានទំងន់ និងកាន់តែមានភាពបន្ទាន់ថែមទៀត ​ពិសេស ​ក្នុងបរិការណ៍បច្ចុប្បន្ន ដែល​ពិភពលោកទាំងមូល ក៏ដូចជាកម្ពុជា ​បាននិងកំពុងស្ថិតក្នុង​បរិការណ៍​ក្រោយនៃវិបត្តិជំងឺកូវីដ-១៩ ។ ឯកឧត្តម វង្សី វិស្សុត​ បានលើកឡើងបន្តថា ​សេចក្តីព្រាងច្បាប់នេះ កំណត់អំពីគោលការណ៍​ជា​មូលដ្ឋាន សម្រាប់គ្រប់គ្រងប្រព័ន្ធហិរញ្ញវត្ថុសាធារណៈ ​និងការរៀបចំច្បាប់ហិរញ្ញវត្ថុ ជាពិសេស​ជំហាននីមួយៗនៃដំណើរការរៀបចំអនុម័ត អនុវត្ត ​និងការត្រួតពិនិត្យលទ្ធផលថវិកា ព្រមទាំង​ការកំណត់មុខងារ និងការទទួលខុសត្រូវ របស់តួអង្គពាក់ព័ន្ធ ដើម្បីសម្រេចបាននូវភាពជឿទុកចិត្ត​ថវិកា គណនេយ្យភាពហិរញ្ញវត្ថុ ការផ្សារភ្ជាប់ថវិកាទៅនឹងគោលនយោបាយ និងគណនេយ្យ​ភាពសមិទ្ធកម្ម សំដៅធានាប្រសិទ្ធភាពនិងចីរភាពនៃការគ្រប់គ្រងហិរញ្ញវត្ថុសាធារណៈ ក្នុងការ​ទ្រទ្រង់ស្ថិរភាពម៉ាក្រូសេដ្ឋកិច្ច កំណើនសេដ្ឋកិច្ច និងសមធម៌សង្គម៕ អត្ថបទ៖ សុន រ៉ាឌី

រដ្ឋមន្រ្តីពាណិជ្ជកម្ម ស្នើភាគីជប៉ុនជំរុញសកម្មភាពធុរកិច្ច និងការវិនិយោគនៅកម្ពុជា

2022/04/28 12:30:14 pm        557
Facebook Telegram Linkin
ភ្នំពេញ៖ ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម បានស្នើឲ្យក្រុមហ៊ុនធុរកិច្ច និងវិនិយោគិនជប៉ុន ព្រមទាំងមន្រ្តីជំនាញក្រសួងពាណិជ្ជកម្ម និងក្រសួង-ស្ថាប័នពាក់ព័ន្ធ បន្តកិច្ចសម្របសម្រួលដ៏ល្អប្រសើរ ក្នុងការជំរុញសកម្មភាពធរុកិច្ច ពាណិជ្ជកម្ម និងវិនិយោគជប៉ុនបន្ថែមទៀត ស្របពេលដែលកម្ពុជាមានវិស័យសក្តានុពលជាច្រើនទៀត។ថ្លែងក្នុងឱកាសទទួលជួបសម្តែងការគួរសម និងពិភ្សាការងារជាមួយ ឯកឧត្តម Fumiaki TAKASHASHI អតីតឯកអគ្គរដ្ឋទូតជប៉ុនប្រចាំកម្ពុជា និងជាប្រធានសមាគមជប៉ុន-កម្ពុជា(JCA) ព្រមទាំង​គណៈប្រតិភូពាណិជ្ជកម្ម-វិនិយោគជប៉ុន នៅទីស្តីការក្រសួងពាណិជ្ជកម្ម កាលពីរសៀលថ្ងៃទី២៧ មេសា ម្សិលមិញនេះ។ ឯកឧត្តមរដ្ឋមន្រ្តី ប៉ាន សូរស័ក្តិ បានជម្រាបជូនភ្ញៀវអំពីកិច្ចខិតខំប្រឹងប្រែងរបស់រដ្ឋាភិបាល ក្នុងការ​សម្រួល និងធ្វើឱ្យប្រសើរឡើងនូវបរិយកាសធុរកិច្ច-វិនិយោគនៅកម្ពុជា និងបានលើកឡើងពីការ​គាំទ្រ​របស់ក្រសួងពាណិជ្ជកម្មដល់ធុរកិច្ចនៅកម្ពុជា តាមរយៈការសម្រួលការចុះបញ្ជីម៉ាក​ដល់​ក្រុមហ៊ុន​ធុរកិច្ចនានា ការជំរុញការធ្វើធរុកិច្ចលើផលិតផលសក្តានុពលនានានៅកម្ពុជា រួមមាន​កសិដ្ឋាន​ចិញ្ចឹមដង្កូវនាងសម្រាប់បម្រើដល់ការផលិតគ្រឿងសំអាង និងផលិតផលកសិកម្មមាន​សក្តានុពលដទៃទៀត។ជាការឆ្លើយតប ឯកឧត្តមប្រធានសមាគមជប៉ុន-កម្ពុជា បានសម្តែងការកោតសរសើរចំពោះកិច្ច​ខិតខំ​របស់រាជរដ្ឋាភិបាលក្នុង​ការរក្សាបាននូវកំណើនពាណិជ្ជកម្មទ្វេភាគីដ៏ល្អប្រសើរ ទោះបីកន្លង​មក​ប្រទេសទាំងពីរស្ថិតក្នុងកាលៈទេសៈលំបាក ដែលបង្កដោយជំងឺឆ្លងកូវីដ-១៩ ក៏ដោយ។ ទន្ទឹមនឹងនេះ ​គណៈប្រតិភូពាណិជ្ជកម្ម-វិនិយោគជប៉ុន ​បានសម្តែងការពេញចិត្ត និងអរគុណជូន​ចំពោះ ឯកឧត្តមរដ្ឋមន្រ្តី និងគណៈប្រតិភូក្រសួងពាណិជ្ជកម្ម ដែលបានផ្តល់ពេលវេលាជម្រាបជូន​អំពីកិច្ចសម្រួលដល់ការធ្វើធុរកិច្ច និងវិនិយោគនៅកម្ពុជា ជាពិសេសការបន្តសម្របសម្រួលរវាង​ក្រសួងពាណិជ្ជកម្ម ក្រសួង-ស្ថាប័នពាក់ព័ន្ធ និងធុរកិច្ច-វិនិយោគិនជប៉ុន សំដៅជំរុញ បន្ថែមនូវការ​វិនិយោគ ព្រមទាំងធ្វើពាណិជ្ជកម្មលើទំនិញ ​និងវិស័យសក្តានុពលដទៃទៀតរបស់កម្ពុជា។ក្នុងឱកាសនោះ ភាគីទាំងពីរ ក៏បានពិភាក្សា និងផ្លាស់ប្តូរយោបល់គ្នាអំពីវឌ្ឍនភាពទូទៅដទៃទៀត​ពាក់ព័ន្ធ​នឹងការរៀបចំច្បាប់គ្រប់គ្រងតំបន់សេដ្ឋកិច្ចពិសេស, គោលនយោបាយកាត់បន្ថយឧស្ម័ន​កាបូនរយៈពេលវែង ​និងកិច្ចសហប្រតិបត្តិការទ្វេភាគីលើវិស័យសក្តានុពល​ដទៃទៀត រួមមាន ការបម្លាស់ប្តូរថាមពលជាដើម៕ អត្ថបទ៖ ឈិត បូរ៉ាវី

ទឹកឃ្មុំព្រៃមណ្ឌលគិរី ទទួលការគាំទ្រច្រើនជាងមុន ក្រោយចុះបញ្ជីម៉ាកសម្គាល់ភូមិសាស្ដ្រ

2022/04/28 12:21:51 pm        651
Facebook Telegram Linkin
មណ្ឌលគិរី៖ បន្ទាប់ពីទឹកឃ្មុំព្រៃមណ្ឌលគិរី បានចុះបញ្ជីការពារជាម៉ាកសម្គាល់ភូមិសាស្រ្តទំនិញ (IG) មានការគាំទ្រយ៉ាងខ្លាំង ពិសេសកាន់តែបង្កើនតម្លៃបន្ថែមដល់ប្រជាកសិករ និងជំរុញឲ្យពួកគាត់មានទឹកចិត្តក្នុងការប្រមូលផលជាងមុនថែមទៀត។ក្នុងកិច្ចសម្ភាសន៍ជាមួយទូរទស្សន៍ព័ត៌មាន ប៊ីធីវី នៅថ្ងៃទី២៨ ខែមេសា ឆ្នាំ២០២២ លោក ស្រើវ សុវណ្ណនី ប្រធានសមាគមអភិរក្សឃ្មុំព្រៃខេត្តមណ្ឌលគិរី បានឲ្យដឹងថា ក្រោមកិច្ចគាំទ្រ​របស់​រដ្ឋា​ភិបាល និងដៃគូអភិវឌ្ឍន៍ ដើម្បីចុះបញ្ជីការពារម៉ាកជាសម្គាល់ភូមិសាស្រ្តទំនិញនៅកម្ពុជារួចមក បាន​ធ្វើឲ្យកសិករ ដែលសមាជិកនេះ​ គាត់មានទំនុកចិត្តក្នុងការប្រមូលផលថែមទៀត ជាពិសេស​នោះ គឺតម្លៃមានការកើនខ្ពស់បន្តិច ធ្វើឲ្យពួកគាត់មានជីវភាពល្អប្រសើរមួយកម្រិតទៀត បន្ទាប់​ការងារកសិកម្មមួយចំនួនផ្សេងទៀតរបស់គាត់ ​ដូចជាការដាំដុះដំឡូង និងការធ្វើស្រែជាដើម។លោកប្រធានសមាគម បានឲ្យដឹងថា បច្ចុប្បន្នទឹកឃ្មុំព្រៃមណ្ឌលគិរី បែងចែកតម្លៃលក់ជា៣ប្រភេទ ក្នុងនោះចំណុះ ២៥០ក្រាម តម្លៃ៧ដុល្លារ, ចំណុះ៤៥០ក្រាម តម្លៃ១៣ដុល្លារ និងចំណុះ៥០០ក្រាម តម្លៃ ១៤ដុល្លារ ក្នុងមួយដប/កែវ។លោកបន្តថា ឆ្នាំនេះការប្រមូលផលទឹកឃ្មុំព្រៃមណ្ឌលគិរី បានប្រមាណ ១០០តោន។ ក្នុង១ឆ្នាំ ការប្រមូលផលទឹកឃ្មុំសុទ្ធ គឺមានចំនួនតែ១ដងប៉ុណ្ណោះ គឺចាប់ពីខែមីនា ​ដល់ខែមិថុនា ខណៈចាប់​ពីខែមិថុនាទៅ គឺជាប្រភេទទឹកឃ្មុំ ខែវស្សា ​ដែលមានជាតិទឹកច្រើន។ ការប្រមូល និងផលិតទឹកឃ្មុំព្រៃមណ្ឌលគិរី ​ត្រូវបានធ្វើឡើងដោយសហគមន៍ចំនួន១១ ក្នុង​ខេត្ត​មណ្ឌលគិរី ដែលមានសមាជិកប្រមាណជាង​ ២ពាន់គ្រួសារ។ សូមបញ្ជាក់ថា ទឹកឃ្មុំព្រៃមណ្ឌលគិរី ត្រូវបានដាក់ឱ្យប្រើប្រាស់ជាផ្លូវការម៉ាកសម្គាល់ភូមិសាស្រ្ត​ទំនិញ ​កាលពីថ្ងៃទី២៧ ខែមីនាកន្លងទៅ ក្នុងគោលបំណងដើម្បីផ្តល់កិច្ចការពារកម្មសិទ្ធិបញ្ញាដល់​សមាគមអភិរក្សឃ្មុំព្រៃខេត្តមណ្ឌលគិរី ​ដែលជាម្ចាស់ម៉ាកសម្គាល់ភូមិសាស្ត្រទំនិញ ​ក្រោមច្បាប់ស្តីពី ម៉ាកសម្គាល់ភូមិសាស្ត្រទំនិញ នៃកម្ពុជា និងដើម្បីទប់ស្កាត់ការក្លែងបន្លំម៉ាកសម្គាល់ភូមិសាស្ត្រ​ទំនិញ “ទឹកឃ្មុំព្រៃមណ្ឌលគិរី” នៅលើទីផ្សារជាតិ និងអន្តរជាតិ។ ការចុះម៉ាកសម្គាល់ភូមិសាស្ត្រទំនិញ ក៏ជាការផ្សព្វផ្សាយអំពីកេរ្តិ៍ឈ្មោះ “ទឹកឃ្មុំព្រៃមណ្ឌលគិរី” ចូលរួម​អភិរក្សតំបន់ព្រៃការពារ ​និងធនធានធម្មជាតិ​ និងទាក់ទាញភ្ញៀវទេសចរ រួមទាំង​បង្កើន​ច្រវ៉ាក់តម្លៃ បង្កើតការងារ និងលើកកម្ពស់ជីវភាព ប្រជាកសិករក្នុងតំបន់នេះផងដែរ៕ អត្ថបទ៖ ឈិត បូរ៉ាវី 

ដំណើរការដឹកជញ្ជូនតាមសមុទ្រឆ្លងកាត់កំពង់ផែស្វយ័តក្រុងព្រះសីហនុកើនឡើង១៤ភាគរយ នៅដើមឆ្នាំ២០២២នេះ

2022/04/27 02:52:02 pm        789
Facebook Telegram Linkin
ព្រះសីហនុ៖ មន្ត្រីជាន់ខ្ពស់កំពង់ផែស្វយ័តក្រុងព្រះសីហនុបានឱ្យដឹងថា ការដឹកជញ្ជូនតាមសមុទ្រឆ្លងកាត់កំពង់ផែស្វយ័តក្រុងព្រះសីហនុកើនឡើងប្រមាណ១៤ភាគរយ នាដើមឆ្នាំ២០២២នេះ។គួរបញ្ជាក់ថា កំពង់ផែស្វយ័តក្រុងព្រះសីហនុ កំពុងអភិវឌ្ឍន៍ទៅមុខឲ្យមានផែជម្រៅទឹកជាង១៧ម៉ែត្រ ដែលអាចឲ្យនាវាធំៗចូលចតបាន ដោយមិនចាំបាច់ផ្ទេរទំនិញនៅកំពង់ផែប្រទេសផ្សេងៗទៀតឡើយ៕

រដ្ឋមន្ត្រីទេសចរណ៍កម្ពុជា ស្នើតំណាងរដ្ឋាភិបាលម៉ាល់ឌីវ តភ្ជាប់ទេសចរ​ដើរកម្សាន្ត​រវាង​ប្រទេស​ទាំងពីរ

2022/04/27 01:40:50 pm        491
Facebook Telegram Linkin
ភ្នំពេញ៖ ឯកឧត្តម ថោង ខុន រដ្ឋមន្ត្រីក្រសួងទេសចរណ៍កម្ពុជា បានស្នើឯកអគ្គរដ្ឋទូតម៉ាល់ឌីវ ជំរុញការតភ្ជាប់ជើងហោះហើរដឹកជញ្ជូនភ្ញៀវទេសចរទស្សនាបណ្តាកោះឆ្នេរសមុទ្រកម្ពុជា ជាមួយកោះឆ្នេរសមុទ្រ នៃប្រទេសម៉ាល់ឌីវ។ក្នុងជំនួបពិភាក្សាការងារ ជាមួយឯកឧត្តម Mohamed Jinah ឯកអគ្គរដ្ឋទូតសាធារណរដ្ឋម៉ាល់ឌីវ នៅល្ងាចថ្ងៃទី២៦ ខែមេសាម្សិលមិញនេះ ឯកឧត្តម រដ្ឋមន្ត្រី ថោង ខុន មានប្រសាសន៍ថា ប្រទេស​ម៉ាល់ឌីវ គឺជាប្រទេសមួយដែលសំបូរទៅដោយប្រជុំកោះ ឆ្នេរជាច្រើន ហើយមាន​ភ្ញៀវទេសចរ​ជាច្រើនអញ្ជើញជាទៅទស្សនា ហើយឯកឧត្តម ក៏បានស្នើអោយមានផ្លាស់ប្តូរ​បទពិសោធន៍គ្នា​លើការងារអភិវឌ្ឍន៍កោះ ដើម្បី​ជម្រុញ​កំណើនភ្ញៀវទេសចរទស្សនាកោះពីគ្នាទៅវិញទៅមក​រវាង​ប្រទេសទាំងពីរ។នៅក្នុងជំនួបនេះដែរ ឯកឧត្តម ថោង ខុន ក៏បានជម្រុញអោយភាគីប្រទេសទាំងពីរកម្ពុជា ​ម៉ាល់ឌីវ រៀបចំសេចក្តីព្រាងអនុសារណៈយោគយល់គ្នា លើកិច្ចសហប្រតិបត្តិការទេសចរណ៍នៃប្រទេសទាំងពីរ ហើយឈានចូលទៅរកការចុះហត្ថលេខាព្រមព្រៀងគ្នា​ ដើម្បីបើកផ្លូវទេសចរណ៍អោយកាន់តែទូលំទូលាយថែមទៀត ។ឯកឧត្តមរដ្ឋមន្ត្រី បានបញ្ជាក់ទៀតថា​ បច្ចុប្បន្នកម្ពុជា​បានបើកប្រទេស និងបើកការទទួលយកភ្ញៀវ​ទេសចរ​អន្តរជាតិចាក់វ៉ាក់សាំង ​ដោយតម្រូវឱ្យបង្ហាញតែកាតចាក់វ៉ាក់សាំង​ និងសុំទិដ្ឋាការ ពេលមក​ដល់​កម្ពុជា​ ហើយការបើកទទួលភ្ញៀវទេសចរអន្តរជាតិនេះដែរ កម្ពុជាក៏មានការដកចេញការ​រឹតបន្តឹង​ផ្នែកសុខាភិបាល ​ព្រមទាំងវិធានការមួយចំនួនទៀត។ជាការឆ្លើយតប ឯកឧត្តមឯកអគ្គរដ្ឋទូតម៉ាល់ឌីវ Mohamed Jinah បានថ្លែង​ការគាំទ្រប្រសាសន៍​ឯកឧត្តម រដ្ឋមន្ត្រី ថោង ខុន លើការរួមគ្នាអភិវឌ្ឍន៍វិស័យទេសចរណ៍ និងតភ្ជាប់ជើងហោះរវាង​ប្រទេស​ពីរ។ ព្រមជាមួយគ្នានេះ ឯកឧត្តម ក៏បានកោតសរសើរដល់ប្រមុខថ្នាក់ដឹកនាំរាជរដ្ឋាភិបាលកម្ពុជា ​ ដែល​បានគ្រប់គ្រង​ស្ថានភាពឆ្លងរីករាលដាល ​នៃជំងឺកូវីដ១៩ ជាពិសេសយុទ្ធនាការចាក់វ៉ាក់សាំង​ទប់ស្កាត់​កូវីដ១៩​ទទួលបានជោគជ័យ។ ទន្ទឹមនឹងនេះ ឯកអគ្គរដ្ឋទូតម៉ាល់ឌីវ ​បានគាំទ្រឱ្យកម្ពុជា ធ្វើម្ចាស់​ផ្ទះរៀបចំកិច្ចប្រជុំ​គណៈកម្មការ​អង្គការ​ទសចរណ៍​ពិភពលោក​ សម្រាប់តំបន់អាស៊ី ​និងប៉ាស៊ីហ្វិក និង​គណៈកម្មការ​ទេសចរណ៍​ពិភពលោក ​សម្រាប់អាស៊ីបូព៌ា៕ អត្ថបទ ស៊ុម សុខជា

សមាគមស្ករត្នោត GI ខេត្តកំពង់ស្ពឹ មានតម្រូវការខ្ពស់ ជាមួយនឹងតម្លៃល្អប្រសើរ ក្នុងឆ្នាំ២០២២

2022/04/27 01:14:21 pm        526
Facebook Telegram Linkin
កំពង់ស្ពឺ៖ នៅឆ្នាំ២០២២នេះ ស្ករត្នោតកំពង់ស្ពឹ មានតម្លៃល្អប្រសើរគឺប្រមាណ ៧ ០០០រៀល កើនឡើង ធៀបនឹងតម្លៃ ឆ្នាំកន្លងទៅ ដោយសារសក្តានុពល ក៏ដូចជាមានតម្រូវការខ្ពស់លើការនាំចេញទៅទីផ្សារក្រៅស្រុក។លោក សំ សារឿន ប្រធានសមាគមលើកកម្ពស់ស្ករត្នោតខេត្តកំពង់ស្ពឺ ក្នុងបទសម្ភាសន៍ផ្ទាល់ ជាមួយនឹងទូរទស្សន៍ព័ត៌មាន ប៊ីធីវី នៅថ្ងៃទី២៧ មេសា ឆ្នាំ២០២២ មានប្រសាសន៍ថា ស្ករត្នោតកំពង់ស្ពឺ ដែលជាទំនិញសម្គាល់ម៉ាកភូមិសាស្រ្ត (GI) ទទួលបានការបញ្ជាទិញច្រើន​ពីទី​ផ្សារអន្តរជាតិ ជាពិសេសខាងប៉ែកអឺរ៉ុប។ លោកបានបន្តថា តម្លៃស្ករត្នោតឆ្នាំនេះ មានតម្លៃល្អប្រសើរ ប៉ុន្តែបញ្ហាអាកាសធាតុ មានភ្លៀងធ្លាក់ច្រើន បានរាំងស្ទះដល់ការប្រមូលផល។លោក សំ សារឿន បានអះអាងថា មកដល់ពេលនេះ ទីផ្សារសម្រាប់ស្ករត្នោតកំពង់ស្ពឺ គឺធំទូលាយទៅលើការនាំចេញទៅបណ្តាប្រទេសប្រមាណ ១៥ទៅ២០ប្រទេស ហើយប្រទេសដែលមានតម្រូវការច្រើនជាងគេគឺបារាំង បន្ទាប់អាម៉េរិក និងជប៉ុនជាដើម។ លោកប្រធានសមាគមរូបនេះ បានឲ្យដឹងថា បន្ទាប់ពីស្ករត្នោតកំពង់ស្ពឺ ទទួលបានការចុះបញ្ជី​នៅ​សភាពអឺរ៉ុប ថៃ និងវៀតណាមកន្លងមក​ ទីផ្សារស្ករត្នោតកំពង់ស្ពឺ មានការកើនឡើង​លើការ​នាំចេញ។ ក្នុងឆ្នាំ២០២១កន្លងទៅ ​ស្ករត្នោតប្រមាណ ២០០តោន ត្រូវបានផ្គត់ផ្គង់ក្នុងទីផ្សារស្រុក និងនាំចេញទៅទីផ្សារអន្តរជាតិ។លោក បញ្ជាក់ថា អ្នកទិញទាំងអស់ ទាំងនៅក្នុងស្រុក និងក្រៅស្រុកជ្រាបថា មុននឹងទិញស្ករត្នោត សូមឲ្យពិនិត្យ ​និងទទួលស្គាល់ថា ស្ករនេះ ​ពិតជាស្ករត្នោតកំពង់ស្ពឺ ​គឺ​មាន​ស្លាកសញ្ញា និងបាកូតបញ្ជាក់យ៉ាងត្រឹមត្រូវពីសមាគម៕អត្ថបទ៖ឈិត បូរ៉ាវី

កម្ពុជា-អ៊ីតាលី ឯកភាពគ្នាបន្តជំរុញកិច្ចសហប្រតិបត្តិការវិស័យសេដ្ឋកិច្ច-ពាណិជ្ជកម្ម

2022/04/27 01:05:18 pm        719
Facebook Telegram Linkin
ភ្នំពេញ៖ រាជរដ្ឋាភិបាលកម្ពុជា និងរដ្ឋាភិបាលអ៊ីតាលី បានប្តេជ្ញាចិត្ត បន្តកិច្ចសហប្រតិបត្តិការលើវិស័យសេដ្ឋកិច្ច-ពាណិជ្ជកម្ម ឱ្យកាន់តែមានភាពរឹងមាំបន្ថែមទៀត តាមរយៈការទាក់ទាញអ្នកវិនិយោគអ៊ីតាលីមកកម្ពុជា ដើម្បីផ្លាស់ប្តូរព័ត៌មាន ធ្វើកិច្ចសម្រួលពាណិជ្ជកម្ម និងពិនិត្យពីសក្តានុពលដែលកម្ពុជាមាន ដូចជាវិស័យកសិឧស្សាហកម្ម ឧស្សាហកម្មកែច្នៃ និងវិស័យទេសចរណ៍។ឯកឧត្តម ប៉ាន សូរស័ក្ដិ រដ្ឋមន្រ្ដីក្រសួងពាណិជ្ជកម្ម នៅក្នុងជំនួបការងារជាមួយឯកឧត្តម Lorenzo Galanti ​ឯកអគ្គរដ្ឋទូតនៃសាធារណរដ្ឋអ៊ីតាលីប្រចាំកម្ពុជា ​ដែលទើបតែងតាំងថ្មី កាលពីរសៀល​ថ្ងៃទី២៦​ មេសា​ ឆ្នាំ២០២២កន្លងទៅនេះ បានលើកឡើងអំពីកិច្ចខិតខំប្រឹងប្រែង​របស់រដ្ឋា​ភិបាល​កម្ពុជា ក្នុងការប្រយុទ្ធប្រឆាំងនឹងជំងឺកូវីដ-១៩ ​តាមរយៈវិធានការទប់ស្កាត់ដ៏មានប្រសិទ្ធភាព និង​យុទ្ធនាការចាក់វ៉ាក់សាំងប្រកបដោយជោគជ័យ ​ដែល​អនុញ្ញាតឲ្យកម្ពុជា​អាចបើកប្រទេស ដំណើរការ​សកម្មភាពសេដ្ឋកិច្ចពេញលេញឡើងវិញ​លើគ្រប់វិស័យ និងថ្មីៗនេះឈានទៅដល់ការ​លើក​លែង​ការពាក់ម៉ាស់នៅ​ទីសាធារណៈទូទាំងប្រទេស។ ឯកឧត្តមរដ្ឋមន្រ្តី បានបន្តថា​ ខណៈដែលកម្ពុជាកំពុងបោះជំហានទៅមុខបន្ថែមទៀត ក្នុងការរស់នៅ​ជាមួយ​កូវីដ-១៩​តាមគន្លងប្រក្រតីភាពថ្មី ​និងបដិវត្តឧស្សាហកម្មទី៤ វិស័យពាណិជ្ជកម្មនិងការ​វិនិយោគ ​បានដើរតួយ៉ាងសំខាន់ក្នុងការ​អភិវឌ្ឍ​ប្រទេសជាតិ ជាពិសេសការស្តារសេដ្ឋកិច្ច​ឡើងវិញ​ពី​វិបត្តិជំងឺកូវីដ-១៩។ជាការឆ្លើយតប ឯកឧត្តមឯកអគ្គរដ្ឋទូត បានថ្លែងអំណរគុណសម្រាប់កិច្ចស្វាគមន៍ និងបានទទួល​ស្គាល់ ​នូវល្បឿន​នៃការអភិវឌ្ឍប្រទេសលើគ្រប់វិស័យ ជាពិសេសវឌ្ឍនភាពថ្មីៗ​ក្នុង​វិស័យ​ពាណិជ្ជកម្ម​អន្តរជាតិ​របស់កម្ពុជា។ ​ឯកឧត្តម ​បានជូនដំណឹងអំពីឆន្ទៈ និងកិច្ចខិតខំប្រឹងប្រែង​របស់​រដ្ឋាភិបាលនៃសាធារណរដ្ឋអ៊ីតាលី ក្នុងការត្រៀមរៀបចំធ្វើម្ចាស់ផ្ទះពិព័រណ៍​ពិភពលោក​នៅទីក្រុងរ៉ូម​ឆ្នាំ២០៣០ខាងមុខ។ សូមបញ្ជាក់ថា ទំហំពាណិជ្ជកម្មកម្ពុជា-អ៊ីតាលី សម្រេច​បានប្រមាណជាង​ ៣៤០លានដុល្លារអាមេរិក នៅឆ្នាំ២០១៨ និង​ជាង ៣៧០លានដុល្លារអាមេរិកនៅឆ្នាំ២០១៩ ​កំណើន ៧.៧៤%។ ដោយទទួល​រងផលប៉ះពាល់ពីជំងឺកូវីដ-១៩ ធ្វើឲ្យ​ទំហំពាណិជ្ជកម្មប្រទេសទាំងពីរ ​បានធ្លាក់ចុះមកត្រឹមជាង ៣៣០លានដុល្លារអាមេរិក ​ក្នុងឆ្នាំ២០២០​ ថយចុះ១១.៦៤% ហើយកើនឡើងវិញបន្តិចបន្តួច​នៅ​ឆ្នាំ២០២១ ដែលមានចំនួន ៣៣៤លានដុល្លារអាមេរិក៕ អត្ថបទ ឈិត បូរ៉ាវី 

កម្ពុជា-ជប៉ុន ចាប់ផ្តើមពង្រឹងភាពជាដៃគូរក្នុងងការវិនិយោគ និងវិស័យ SME

2022/04/27 12:33:44 pm        465
Facebook Telegram Linkin
ភ្នំពេញ៖ សម្ព័ន្ធសមាគមសហគ្រាសធុនតូច និងមធ្យមកម្ពុជា ចាប់ដៃគូរជាមួយជប៉ុន ដើម្បីពង្រីកខ្លួនក្នុងខ្សែច្រវ៉ាក់ផលិតកម្ម ការផ្លាស់ប្តូរបទពិសោធន៍ ការផ្គូផ្គងដៃគូវិនិយោគ ការធ្វើពាណិជកម្ម និងការអភិវឌ្ឍនៅក្នុងសហគ្រាសធុនតូច និងមធ្យម ដើម្បីប្រកួតប្រជែង និងជំរុញទីផ្សារនាំចេញ។លោកឧកញ៉ា តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) លើកឡើងនៅក្នុងពិធីផ្គូផ្គងអាជីវកម្ម កម្ពុជា-ជប៉ុន និងការចុះអនុស្សារណៈយោគយល់គ្នា រវាង​សម្ព័ន្ធសមាគមសហគ្រាសធុនតូច ​និងមធ្យមកម្ពុជា និងសមាគនជប៉ុន-កម្ពុជា (JCA) នៅថ្ងៃទី ២៦ ខែ មេសា ឆ្នាំ២០២២ នេះថា ជុំវិញការអភិវឌ្ឍន៍កម្ពុជាគឺជាប្រទេសមួយមាន មាន​សក្តានុពល​វិនិយោគ ​ដែលវិនិយោគិនមានឱកាសច្រើន ​លើការកែច្នៃ ​វិចខ្ចប់ ​សម្រាប់​ផ្គត់ផ្គង់​នៅតាមទីផ្សារ ឬការនាំចេញ ព្រោះកម្ពុជាគឺជាប្រទេសកសិកម្ម ដែលបច្ចុប្បន្នវិស័យនេះត្រូវបានរាជរដ្ឋាភិបាល​យកចិត្ត​ទុកដាក់យ៉ាងខ្លាំង ​គឺការផលិតសម្រាប់ផ្គង់ផ្គង់ក្នុងស្រុក ​និងបម្រើទីផ្សារនាំចេញជាដើម។លោកឧកញ៉ា បន្តថា ដោយមើលឃើញពីសក្តានុពលនេះ ការចុះអនុស្សារណៈយោគយល់គ្នា​ជាមួយ​សមាគម​ជប៉ុន-កម្ពុជា ​គឺជាការស្វែងរកដៃគូរពាណិជ្ជកម្ម ការផ្លាស់ប្តូរបទពិសោធន៍រវាង​គ្នាទៅវិញ​ទៅមក​ និងការវិនិយោគជាដើម ​ដើម្បីពង្រីកខ្លួនខ្សែច្រវ៉ាក់ផលិតកម្មក្នុងស្រុក ផលិត​សម្រាប់​ផ្គត់ផ្គង់ទីផ្សារ​ និងបម្រើទីផ្សារនាំចេញរវាងប្រទេសទាំងពីរផងដែរ, ហើយក្រៅ​ពី​គោលការណ៍​ខាងលើ​ ការចុះអនុស្សារណៈនេះ​ ក៏ជាការទាក់ទាញវិនិយោគិនជប៉ុន ឲ្យមក​បណ្តាក់ទុន​នៅកម្ពុជាកាន់តែច្រើន ​ជាពិសេសលើវិស័យសហគ្រាសធុនតូច និងមធ្យម។ ក្នុងពិធីនេះ, ឯកឧត្តម TAKAHASHI Fumiaki​ ប្រធាន​សមាគមកម្ពុជា-ជប៉ុន ​បានថ្លែងថា កម្ពុជា គឺជា​ប្រទេសមួយ កំពុងមានការអភិវឌ្ឍន៍រីកចម្រើន ដែលវិនិយោគិនបរទេសជាច្រើនបាន​កំពុង​ចាប់​អារម្មណ៍ ​ជាក់ស្តែងវិនិយោគិនមកពីប្រទេសជប៉ុនជាដើម បានកំពុងសម្លឹងមើលឱកាសវិនិយោគ​នៅ​កម្ពុជាផងដែរ។ ចំណែកទីផ្សារនាំចេញវិញ ឯកឧត្តម TAKAHASHI Fumiaki បញ្ជាក់ថា ផលិតផលរបស់កម្ពុជា​ជាច្រើន បានកំពុងនាំចេញទៅកាន់ទីផ្សារជប៉ុន​ និងកំពុងមានការគាំទ្រពីប្រជាជនជប៉ុន​ផងដែរ, ក្នុងនោះតាមរយៈនៃការចាប់ដៃគូរយោគយល់គ្នា ​ជាមួយសម្ព័ន្ធសមាគមសហគ្រាសធុនតូច និង​មធ្យមកម្ពុជានេះ នឹងបង្កើតនូវភាពស្និតស្នាលក្នុងដៃគូរវិនិយោគឲ្យកាន់តែល្អប្រសើរ និងស្វែងរក​ឱកាសវិនិយោគថ្មីៗជាបន្តទៀត ជាពិសេសការអភិវឌ្ឍន៍នៅក្នុងសហគ្រាសធុនតូច និង​មធ្យម​ជាដើម ​ដើម្បីប្រកួតប្រជែង​ និងជម្រុញទីផ្សារនាំចេញ៕អត្ថបទ៖ សុន រ៉ាឌី

វិនិយោគិនជប៉ុន ស្វែងយល់ពីសក្តានុពលវិនិយោគ និងចាប់ដៃគូពាណិជ្ជកម្មនៅកម្ពុជា

2022/04/26 02:04:48 pm        801
Facebook Telegram Linkin
ភ្នំពេញ៖ វិនិយោគិនជប៉ុន សិក្សាស្វែងយល់ដោយផ្ទាល់ពីកាលានុវត្តភាព និងសក្តានុពលវិនិយោគនៅកម្ពុជា ក៏ដូចជាការស្វែងរកដៃគូ និងកិច្ចសហប្រតិបត្តិការអាជីវកម្ម ក្រោយខកខានរយៈពេលពីរឆ្នាំដោយសារវិបត្តិកូវីដ១៩។នៅក្រោយចប់កិច្ចប្រជុំ រវាងដៃគូពាណិជ្ជកម្មកម្ពុជា និងវិនិយោគិនជប៉ុន កាលពីល្ងាចថ្ងៃទី២៥ មេសា ឆ្នាំ២០២២កន្លងទៅនេះ លោកបណ្ឌិត អ៊ិន ចាន់នី ប្រធាននាយកប្រតិបត្តិ នៃធនាគារ អេស៊ីដា ភីអ៊ិលស៊ី មានប្រសាសន៍ប្រាប់ក្រុមអ្នកសារព័ត៌ថា នេះជាលើកទី២ នៃការរៀបចំ​ឲ្យ​មាន​ការ​ផ្គូផ្គង​ធុរកិច្ចនេះឡើង​ ដោយមានក្រុមហ៊ុនចម្រុះ​ខាងកម្ពុជាចំនួន ​២៩ក្រុមហ៊ុន ​និងភាគីជប៉ុនចំនួន ២៤ក្រុមហ៊ុន ​ដើម្បីស្វែងរកឱកាសវិនិយោគនៅទូទាំង​ឧស្សាហកម្មផ្សេងៗ និង​ផ្សារភ្ជាប់​ទំនាក់ទំនង​ជាមួយសហគ្រិនក្នុងស្រុក។លោក បានបន្តថា ព្រឹត្តិការណ៍នេះ ​គឺជាការ​ផ្គូផ្គង​ពាណិជ្ជកម្ម ដែលត្រូវបានផ្តួចផ្តើម​គំនិតដោយ​សមាគម​ជប៉ុន-កម្ពុជា ​និងធនាគារអេស៊ីលីដា​ ដើម្បីដោះស្រាយការបណ្តាក់ទុនថ្មីៗនៅកម្ពុជា ក្នុងគោលបំណងស្វែងរកឱកាសបែបនេះ ឬដៃគូកម្ពុជាសមស្របដើម្បីសម្រេចគោលបំណង​របស់អ្នកវិនិយោគ។នៅក្នុងកិច្ចប្រជុំនេះ ឯកឧត្តម តាកាហាឈី ហ្វូមីអាគី (Takahashi Fumiaki) ប្រធានសមាគមជប៉ុន-កម្ពុជា បានលើកឡើងថា នេះជាព្រឹត្តិការណ៍ដ៏សំខាន់មួយ ដែលអាចទាក់ទាញការ​វិនិយោគថែមទៀត​ទៅក្នុងវិស័យផ្សេងៗ និងនាំមកនូវចំណេះដឹងផ្នែកបច្ចេកទេស និងឱកាសការងារកាន់តែច្រើនមកកម្ពុជា។ លោកសង្ឃឹមថា តារមយៈកិច្ចជំនួបលើកទី២នេះ នឹងក្លាយជាជំនួបដ៏វិសេសវិសាល ដើម្បីពង្រឹងនិង​បំពេញ​តម្រូវការជូនធុរជនទាំងអស់ ក្នុងការស្វែងយល់អំពីសហគ្រិនភាព ​រវាងប្រទេសកម្ពុជា និងជប៉ុន ដើម្បីរួមចំណែកជាថាមវន្តក្នុងកិច្ចការធុរកិច្ចជាមួយគ្នា។សូមបញ្ជាក់ថា ជំនួបធុរកិច្ចខាងលើនេះ មានការចូលរួមពីសំណាក់វិនិយោគិនពហុវិស័យ​ រួមមាន វិស័យកាត់ដេរ អង្ករ ​ភោជនីយដ្ឋាន​ សំណង់ ការប្រឹក្សាយោបល់ ​ការគ្រប់គ្រងធុរកិច្ច ​ទេសចរណ៍ អេឡិចត្រូនិច ​អាហារសុខភាព ​ដឹកជញ្ជូន ​ហិរញ្ញវត្ថុ ​សណ្ឋាគារ និង​បដិសណ្ឋារកិច្ចជាដើម។លោកបណ្ឌិត បានបញ្ជាក់បន្ថែមថា នាពេលអនាគត ប្រសិនបើមានការស្នើរសុំពីពាណិជ្ជករ ឬសមាគម​ដទៃផ្សេងទៀតក្រៅពីជប៉ុន​ ដូចជាកូរ៉េ ​និងចិនជាដើម ​លោកនឹងជួយរៀបចំ​ឲ្យ​មាន​កិច្ចប្រជុំដូចគ្នាខាងលើនេះ ខណៈដែលប្រទេសទាំងពីរបានបង្កើត​ឲ្យមានកិច្ចព្រមព្រៀង​ពាណិជ្ជកម្ម​សេរីជាមួយគ្នា ​ដើម្បីពង្រឹងភាពជាដៃគូសេដ្ឋកិច្ច និ​ងបង្កើនឱកាសវិនិយោគជាដើម។ល៕អត្ថបទ៖ ឈិត បូរ៉ាវី

ក្រសួងសាធារណការ ទាក់ទាញក្រុមហ៊ុនអាមេរិកផលិតថយន្តអគ្គិសនីចូលមកម្ពុជា

2022/04/26 01:55:05 pm        824
Facebook Telegram Linkin
ភ្នំពេញ៖ ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន បានជំរុញក្រុមហ៊ុនរថយន្តល្បីៗរបស់អាមេរិក ចូលមកវិនិយោគ និងបើកហាងលក់រថយន្តអគ្គិសនីនៅកម្ពុជា។ ការទាក់ទាញក្រុមហ៊ុនរថយន្តល្បីៗអាមេរិកនេះ គឺស្របពេលដែលរាជរដ្ឋាភិបាលកម្ពុជា កំពុងជំរុញការប្រើប្រាស់រថយន្តអគ្គិសនី ដើម្បីកាត់បន្ថយការចំណាយលើថ្លៃប្រេងឥន្ទនៈ របស់ប្រជាពលរដ្ឋ​ និងចូលរួមកាត់បន្ថយការបំពុលដល់បរិស្ថាន។ថ្លែងក្នុងពិធីសម្ពោធដាក់ឱ្យប្រើប្រាស់ស្ថានីយ​បញ្ចូល​ថាមពលសម្រាប់យានយន្តអគ្គិសនី និង​ប្រេងឥន្ធនៈ កាល់តិចទី៥០ នៅថ្ងៃទី២៦ ខែមេសានេះ ឯកឧត្តម ស៊ុន ចាន់ថុល បានស្នើ​ដល់​អគ្គរដ្ឋទូត​សហរដ្ឋអាមេរិកប្រចាំនៅកម្ពុជា ឯកឧត្តម W. Patrick Murphy ជួយទាក់ទាញក្រុមហ៊ុន​រថយន្តធំៗរបស់អាមេរិក ដែលផលិតរថយន្តអគ្គិសនី ចូលមកកម្ពុជា។ឯកឧត្តម ស៊ុន ចាន់ថុល៖ កំណើននៃការប្រើប្រាស់យានយន្តអគ្គិសនី​នៅកម្ពុជា ​បានកើនឡើងខ្ពស់ ឆ្លុះ​បញ្ចាំង​ពីការយល់ដឹងរបស់ប្រជាពលរដ្ឋ ​និងអ្នកប្រើប្រាស់ ​លើការប្រើប្រាស់រយន្តអគ្គិសនី និង​ការចូលរួមកាត់​បន្ថយការបំពុលដោយឧស្ម័នចេញពីយានយន្តដល់បរិស្ថាន។ក្នុងរយៈពេលត្រីមាសទី១ ចំនួនរថយន្តអគ្គិសនី ចុះបញ្ជីនៅក្រសួងសាធារណការ​ និងដឹកជញ្ជូន បាន​កើនឡើង ៧០០ភាគរយ ​ពី៧គ្រឿងក្នុងត្រីមាសទី១ ឆ្នាំ២០២១ ដល់ ៤៧គ្រឿង ក្នុងត្រីមាសទី១ឆ្នាំនេះ។សូមបញ្ជាក់ថា បច្ចុប្បន្ន មានស្ថានីយ​បញ្ចូលថាមពល​រថយន្តចំនួនពីរទីតាំង គឺនៅ​ក្រសួងសាធារណការ ​និងស្ថានីយប្រេងឥន្ទនៈ​ Caltex ​ខណៈបីទីតាំងផ្សេងទៀត គ្រោង​បើកដំណើរការនៅក្រុងព្រះសីហនុ ​បាត់ដំបង​ និងសៀមរាប៕ អត្ថបទ៖ វណ្ណៈ

បណ្ដាញសង្គម

ព័ត៌មានថ្មីៗ

រាជរដ្ឋាភិបាលបានកំណត់តម្លៃនិងតួនាទីព្រៃឈើ ដោយមិនកាត់ផ្តាច់ចេញពីវិស័យអាទិភាពរបស់រដ្ឋ
07/17/2025 09:07 PM
Facebook Telegram Linkin
ឯកឧត្តមឧបនាយករដ្ឋមន្ត្រី ប្រាក់ សុខុន អញ្ជើញធ្វើបាឋកថាស្តីពី «សភាពការណ៍អន្តរជាតិ និងនយោបាយការបរទេសរបស់កម្ពុជា» ចែករំលែកដល់សិស្សមន្ត្រីសាលាភូមិន្ទរដ្ឋបាល
07/17/2025 09:07 PM
Facebook Telegram Linkin
ក្រសួងការងារបដិសេធចំពោះជនខិលខូចប្រើប្រាស់រូប និងឈ្មោះ ឯកឧត្តម ហេង សួរ ក្នុងចេតនាឆបោកសាធារណជន
07/17/2025 09:07 PM
Facebook Telegram Linkin
តើហេតុអ្វីបានជាប្រទេសប៉ាគីស្ថានងាយរងគ្រោះដោយសារទឹកជំនន់ស្លាប់មនុស្ស?
07/17/2025 08:07 PM
Facebook Telegram Linkin
ឯកឧត្តមឧបនាយករដ្ឋមន្ត្រី ហ៊ុន ម៉ានី ជួបសំណេះសំណាលជាមួយសមាជិក សមាជិកា ក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី ដែលទើបនឹងជ្រើសរើសថ្មី ប្រចាំសាកលវិទ្យាល័យវិទ្យាសាស្រ្តសុខាភិបាល ចំនួន ៥៨៤នាក់
07/17/2025 08:07 PM
Facebook Telegram Linkin
ការទម្លាក់គ្រាប់បែករបស់រុស្ស៊ីសម្លាប់មនុស្ស ៤នាក់ និង ២៧នាក់ រងរបួសនៅទីក្រុង Dobropillia ប្រទេសអ៊ុយក្រែន
07/17/2025 08:07 PM
Facebook Telegram Linkin
ក្រសួងឧស្សាហកម្ម ដាក់ប្រព័ន្ធបន្សុទ្ធទឹកស្អាតនៅមន្ទីរពេទ្យគន្ធបុប្ផា ជូនដល់អ្នកព្យាបាលជំងឺពិសា
07/17/2025 08:07 PM
Facebook Telegram Linkin
សាស្ត្រាចារ្យសាកលវិទ្យាល័យតូក្យូ ចាប់អារម្មណ៍ស្វែងយល់បន្ថែមអំពីកម្ពុជា និងការអភិវឌ្ឍសង្គម-សេដ្ឋកិច្ច
07/17/2025 08:07 PM
Facebook Telegram Linkin
សារព័ត៌មាន NBC News៖ ការវាយប្រហាររបស់អាមេរិក បានបំផ្លាញទីតាំងនុយក្លេអ៊ែរអ៊ីរ៉ង់តែមួយប៉ុណ្ណោះ
07/17/2025 08:07 PM
Facebook Telegram Linkin
ប្រភព៖ អ្នកការទូតលោកខាងលិចនៅចម្ងាយប៉ុន្មានម៉ែត្រពីការវាយប្រហាររបស់អ៊ីស្រាអែល ក្នុងទីក្រុងដាម៉ាស
07/17/2025 08:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.