BTV NEWS

ឯកឧត្តម ឌិត ទីណា បន្តដំណើរចុះជួបសំណេះសំណាលជាមួយសហគមន៍ទំនើបស្វាយចន្ទីភ្នំគូលែន នៅខេត្តសៀមរាប

កម្ពុជាផ្សព្វផ្សាយជាផ្លូវការ របាយការណ៍វឌ្ឍនភាពនៃការអនុវត្តវិធានការកែទម្រង់មុតស្រួចជាកញ្ចប់

មកដល់ពេលនេះ កសិករចំនួនជាង ១៤០០គ្រួសារ ងាកមកចងក្រងគ្នា ដើម្បីក្លាយជាសហគមន៍កសិកម្មទំនើប

កម្ពុជាកំពុងពិភាក្សាលើការចាប់យកឌីជីថលូបនីយកម្ម ដើម្បីជំរុញវិស័យនេះឱ្យកាន់តែរីកចម្រើន

សេដ្ឋកិច្ច និង កសិកម្ម

រដ្ឋមន្រ្តីក្រសួងឧស្សាហកម្ម សរសើរសហគ្រិនស្រ្តីចូលរួមចំណែកដល់ការអភិវឌ្ឍសេដ្ឋកិច្ចជាតិ

ភ្នំពេញ៖ មន្រ្តីជាន់ខ្ពស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ កោតសរសើរចំពោះភាពរីកចម្រើន និងធនធានមនុស្សជាស្ត្រី ដែលមានសហគ្រិនភាពដ៏ឆ្នើមនៅក្នុងក្រុមហ៊ុន ឬសហគ្រាសរបស់ខ្លួន ដែលបានចូលរួមយ៉ាងសកម្ម ក្នុងសកម្មភាពអភិវឌ្ឍន៍សេដ្ឋកិច្ចជាតិ ។ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្រ្តី រដ្ឋមន្ត្រី ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើកឡើងនៅក្នុងកិច្ចប្រជុំត្រីមាសទី១ រវាងសមាគមសហគ្រិនស្ត្រីកម្ពុជា និងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ កាលពីថ្ងៃទី១៩ ខែមេសា ឆ្នាំ២០២២ថា នៅក្នុងវិបត្តិកូវីដ-១៩ ផលប៉ះពាល់បានកើតឡើងជាច្រើន ជាពិសេសការធ្វើឲ្យប៉ះពាល់ដល់សេដ្ឋកិច្ចសង្គម ស្ថិតក្នុងស្ថានភាពនេះ សហគ្រិនជាស្រ្តីជាច្រើនបានតស៊ូយ៉ាងស្វិតស្វាញ នៅក្នុងដំណើរការអាជីវកម្ម ដែលមកដល់បច្ចុប្បន្នយើងឃើញថា អាជីវកម្មមួយចំនួនបានកំពុងងើបឡើងវិញ។ឯកឧត្តមទេសរដ្ឋមន្រ្តី បានកោតសរសើរចំពោះភាពរីកចម្រើន ជាពិសេសធនធានមនុស្សជាស្ត្រី ដែលមានសហគ្រិនភាពដ៏ឆ្នើមនៅក្នុងក្រុមហ៊ុន ឬសហគ្រាសរបស់ខ្លួន ដែលបានជម្រុញឲ្យសង្វាក់ផលិតកម្មរបស់ខ្លួនបានដំណើរ នៅក្នុងស្ថានភាពដ៏លំបាក ដែលកត្តាទាំងអស់នេះ ជាការបង្ហាញនូវស្នាដៃធំធេងមួយ នៃសកម្មភាពអភិវឌ្ឍ និងជាការចូលរួមចំណែកដ៏សំខាន់ដល់ការអភិវឌ្ឍសេដ្ឋកិច្ចជាតិ ។សូមបញ្ជាកថា នៅក្នុងកិច្ចប្រជុំសមាគមសហគ្រិនស្ត្រីកម្ពុជា ដែលដឹកនាំដោយលោកជំទាវ កែវ មុំ បានធ្វើបទបង្ហាញនូវបញ្ហាចំនួន ៣ចំណុច ដែលមានចែងក្នុងសៀវភៅស ទី២ និងទី៣ របស់សមាគម ក្នុងនោះរួមមាន៖ បុគ្គលិកខ្វះជំនាញ និងប្រាក់ឈ្នួលខ្ពស់, ការលំបាកក្នុងការទទួលកម្ចីពីធនាគារ និងផលប៉ះពាល់ដោយជម្ងឺរាតត្បាតកូវីដ-១៩ មកលើអាជីវកម្ម ។ ជាការឆ្លើយតប, ឯកឧត្តមកិត្តិសេដ្ឋាបណ្ឌិត ទេសរដ្ឋមន្រ្តី ចម ប្រសិទ្ធ និងថ្នាក់ដឹកនាំទទួលបន្ទុកបានផ្តល់អនុសាសន៍ និងដំណោះស្រាយជាក់ស្តែងជាច្រើន ដោយសង្កត់ធ្ងន់ទៅលើការអភិវឌ្ឍអាជីវកម្មតាមបទដ្ឋានបច្ចេកទេស ការសន្សំសំចៃថាមពល អនុវត្តឧស្សាហកម្មបៃតង ជាពិសេសការបណ្តុះបណ្តាលពង្រឹងសមត្ថភាពដល់បុគ្គលិក និងនិយោជិក ឲ្យមានចំណេះជំនាញស្រប នឹងមុខសញ្ញាការងាររបស់ខ្លួន។ ចំណែកទាក់ទងនឹងការលំបាកទទួលបានប្រាក់កម្ចីពីធនាគារ ថ្នាក់ដឹកនាំបានលើកឡើងពីការខិតខំរបស់រាជរដ្ឋាភិបាល និងក្រសួង ស្ថាប័នពាក់ព័ន្ធ បង្កើតឲ្យមានធនាគារ SME ធនាគារអភិវឌ្ឍជនបទជាដើម ដើម្បីសហគ្រាសទទួលបានប្រាក់កម្ចីដែលមានការប្រាក់ទាប៕ អត្ថបទ៖ សុន រ៉ាឌី

កម្ពុជាកំណត់យកវិស័យយានយន្ត និងអេឡិចត្រូនិក សម្រាប់ជំរុញកំណើនសេដ្ឋកិច្ច ក្រោយវិបត្តិកូវីដ

ភ្នំពេញ៖ រាជរដ្ឋាភិបាលកម្ពុជា កំណត់យកវិស័យយានយន្ត និងវិស័យអេឡិចត្រូនិក ជាវិស័យអាទិភាពដែលមានសក្តានុពល សម្រាប់ជំរុញការចូលរួមរបស់កម្ពុជា ទៅក្នុងខ្សែច្រវាក់តម្លៃសកល ក៏ដូចជាការលើកកម្ពស់ការធ្វើពិពិធកម្មសេដ្ឋកិច្ច និងជាពិសេសចូលរួមស្តារសេដ្ឋកិច្ចកម្ពុជាឡើងវិញ ក្រោយវិបត្តិនៃជំងឺកូវីដ-១៩ ។ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ (គ.ស.ហ.) បានដឹកនាំកិច្ចប្រជុំពិភាក្សាស្តីពីការរៀបចំ “ផែនទីបង្ហាញផ្លូវការអភិវឌ្ឍ និងទាក់ទាញវិនិយោគលើវិស័យយានយន្ត និងអេឡិចត្រូនិក តាមប្រព័ន្ធវីដេអូពីចម្ងាយ (Zoom) នៅថ្ងៃទី ១៩ ខែ មេសា ឆ្នាំ ២០២២ នេះ ដោយមានការចូលរួមដោយក្រុមការងារអន្តរក្រសួង-ស្ថាប័ន បានសហការជាមួយការិយាល័យបរទេស, សហធនរដ្ឋ និងការអភិវឌ្ឍ នៃចក្រភពអង់គ្លេស និងក្រុមហ៊ុន BCG។កិច្ចប្រជុំបានរៀបចំឯកសារចំនួនពីរ ដើម្បីបង្ហាញពីចក្ខុវិស័យវែងឆ្ងាយរបស់រាជរដ្ឋាភិបាល ជាពិសេសគំនិតផ្តួចផ្តើម សម្រាប់ការអភិវឌ្ឍវិស័យយានយន្ត និងអេឡិចត្រូនិក។ឯកសារទី១ គឺ “ផែនទីបង្ហាញផ្លូវការអភិវឌ្ឍ និងទាក់ទាញវិនិយោគលើវិស័យយានយន្ត” មានគោលបំណងអភិវឌ្ឍន៍ និងផ្សារភ្ជាប់វិស័យយានយន្តនៃប្រទេសកម្ពុជា ទៅនឹងខ្សែច្រវាក់តម្លៃតំបន់ និងសកល និងជាពិសេសប្រែក្លាយកម្ពុជាទៅជាមជ្ឈមណ្ឌលផលិតគ្រឿងផ្គុំយានយន្ត ព្រមទាំងជំរុញការផលិតគ្រឿងផ្គុំយានយន្ត ដែលមានលក្ខណៈស្មុគស្មាញ និងតម្លៃបន្ថែមខ្ពស់ជាងមុន ។ចំណែកឯកសារទី២ គឺ “ផែនទីបង្ហាញផ្លូវការអភិវឌ្ឍ និងទាក់ទាញវិនិយោគលើវិស័យអេឡិចត្រូនិក» មានគោលបំណងប្រែក្លាយប្រទេសកម្ពុជាទៅជាមជ្ឈមណ្ឌលផលិតគ្រឿងអេឡិចត្រូនិក ដែលមានសមាហរណកម្មខ្ពស់ ដែលផលិតគ្រឿងបន្លាស់អេឡិចត្រូនិកជាច្រើនប្រភេទ, ផលិតគ្រឿងបង្គុំពាក់កណ្តាលសម្រេច និងផលិតផលសម្រេច ដើម្បីបម្រើទីផ្សារនាំចេញក្នុងតំបន់ និងពិភពលោក ។ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី ប្រធានអង្គប្រជុំ បានស្នើឱ្យក្រសួង-ស្ថាប័នពាក់ព័ន្ធ បន្តផ្តល់កិច្ចសហការជាមួយបក្រុមហ៊ុន BCG និងកែសម្រួលសេចក្តីព្រាងផែនទីបង្ហាញផ្លូវនេះ ស្របតាមស្មារតីនៃអង្គប្រជុំ ឲ្យបានគ្រប់ជ្រុងជ្រោយ មុននឹងបន្តនីតិវិធីគោរពស្នើសុំការអនុម័តពីប្រមុខរាជរដ្ឋាភិបាល ៕អត្ថបទ៖ សុន រ៉ាឌី

អគ្គនាយកដ្ឋានពន្ធដារប្រមូលពន្ធ-អាករ បានចំនួនជាង ១ ២៦៣ លានដុល្លារ ក្នុងត្រីមាសទី១

ភ្នំពេញ៖ អគ្គនាយកដ្ឋានពន្ធដារ ប្រមូលចំណូលពន្ធ-អាករ តាមប្រព័ន្ធគ្រប់គ្រងទិន្នន័យចំណូលអនឡាញ ក្នុងត្រីមាសទី១ ដើមឆ្នាំ ២០២២ បានចំនួនជាង ៥ ១១៥ ប៊ីលានរៀល ត្រូវប្រមាណជាង ១ ២៦៣ លានដុល្លារអាមេរិក បើធៀបរយៈពេលដូចគ្នាឆ្នាំ ២០២១ ចំណូលនេះកើនឡើងជាង ២២%។ឯកឧត្តម គង់ វិបុល ប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានពន្ធដារ បានបង្ហាញឲ្យដឹងនៅក្នុងកិច្ចប្រជូំបូកសរុបលទ្ធផលប្រមូលចំណូលខែ មីនា និងត្រីមាសទី១ ឆ្នាំ ២០២២ នៅថ្ងៃទី ១៩ ខែមេសា ឆ្នាំ ២០២២ នេះ។ចំពោះលទ្ធផលនៃការគ្រប់គ្រងប្រមូលចំណូលពន្ធ ក្នុងខែ មីនា ឆ្នាំ២០២២, ចំណូលពន្ធអាករគ្រប់ប្រភេទ ដែលអគ្គនាយកដ្ឋានពន្ធដារប្រមូលបានជាក់ស្តែង តាមប្រព័ន្ធគ្រប់គ្រងទិន្នន័យចំណូលអនឡាញ មានចំនួនជាង ៣ ០៤០ ប៊ីលានរៀល ត្រូវប្រមាណជាង ៧៥០ លានដុល្លារអាមេរិក ស្មើជាង ២៦% នៃផែនការច្បាប់ហិរញ្ញវត្ថុសម្រាប់ការគ្រប់គ្រងឆ្នាំ២០២២ បើប្រៀបធៀបនឹងចំណូលពន្ធអាករប្រចាំខែ មីនា ឆ្នាំ២០២១ ឃើញថាកើនឡើងចំនួនជាង ៥៤៧ ប៊ីលានរៀល ប្រមាណជាង ១៣៥ លានដុល្លារអាមេរិក ស្មើជិត ២២%។ដោយឡែកសម្រាប់រយៈពេល ៣ខែ ដើមឆ្នាំ ២០២២ នេះវិញ, ចំណូលពន្ធ-អាករ ដែលអគ្គនាយកដ្ឋានពន្ធដារប្រមូលបានជាក់ស្តែង តាមប្រព័ន្ធគ្រប់គ្រងទិន្នន័យចំណូលអនឡាញ មានចំនួនជាង ៥ ១១៥ ប៊ីលានរៀល ត្រូវប្រមាណជាង ១ ២៦៣ លានដុល្លារអាមេរិក ស្មើជិត ៤៥% នៃផែនការច្បាប់ហិរញ្ញវត្ថុប្រចាំឆ្នាំ ក្នុងនោះបើធៀបនឹងចំណូលពន្ធ-អាករ ក្នុងរយៈពេលដូចគ្នា ឆ្នាំ ២០២១ ឃើញថាកើនឡើងជិត ៩៣១ ប៊ីលានរៀល ត្រូវជាង ២២៩ លានដុល្លារអាមេរិក ស្មើជាង ២២%។ ចំណែកចំណូលប្រភេទពន្ធសំខាន់ៗ ដែលអគ្គនាយកដ្ឋានពន្ធដារប្រមូលបាន ក្នុងរយៈពេលនេះដែរ គឺមានប្រភេទពន្ធចំនួន ៥ បានរក្សាកំណើនឡើងគួរឱ្យកត់សម្គាល់ ធៀបនឹងខែរយៈពេលដូចគ្នាក្នុង ឆ្នាំ២០២១ ក្នុងនោះពន្ធលើប្រាក់ចំណូល អាករលើតម្លៃបន្ថែម អាករពិសេស ពន្ធលើប្រាក់បៀវត្ស និងលើពន្ធប្រថាប់ត្រា លើការផ្ទេរកម្មសិទ្ធិអចលនទ្រព្យ ៕អត្ថបទ៖ សុន រ៉ាឌី

កម្ពុជាមានទំហំជញ្ជីងពាណិជ្ជកម្មជាង ១៣ប៊ីលានដុល្លារ ក្នុងត្រីមាសទី១

ភ្នំពេញ៖ កម្ពុជាមានទំហំជញ្ជីងពាណិជ្ជកម្មជាមួយប្រទេសដៃគូពាណិជ្ជកម្មជាង ១៣ ប៊ីលានដុល្លារ នៅក្នុងត្រីមាសទី១ ឆ្នាំ២០២២នេះ កើនឡើង ៩ ភាគរយ ធៀបនឹងរយៈពេលដូចគ្នាកាលពីឆ្នាំ២០២១។ ការកើនឡើងនេះ គឺដោយសារកម្ពុជា ទទួលបានជោគជ័យលើយុទ្ធនាការចាក់វ៉ាក់សាំងកូវីដ អនុញ្ញាតឱ្យមានការបើកសកម្មភាពសង្គមសេដ្ឋកិច្ចឡើងវិញ។យោងតាមស្ថិតិជញ្ជីងពាណិជ្ជកម្ម អគ្គនាយកដ្ឋានគយនិងរដ្ឋាករកម្ពុជា ចាប់ពីខែមករា ដល់មីនា ឆ្នាំ២០២២កម្ពុជា មានទំហំពាណិជ្ជកម្មរហូតប្រមាណ ១៣,១៦ពាន់លានដុល្លារ។ ក្នុងនោះ កម្ពុជានាំចេញទំនិញទៅកាន់ទីផ្សារពិភពលោក ជាង៥,៧ពាន់លានដុល្លារ ខណៈនាំចូលវិញ មាន៧,៤ពាន់លានដុល្លារ។ឧកញ៉ា លឹម ហេង អនុប្រធានសភាពាណិជ្ជកម្មកម្ពុជា យល់ឃើញថា ភាពស៊ាំក្នុងសង្គមនឹងជំងឺកូវីដ ដោយសារយុទ្ធសាស្រ្តចាក់វ៉ាក់សាំងកូវីដ១៩ របស់រាជរដ្ឋាភិបាល ធ្វើឱ្យកម្ពុជា អាចដំណើរការសកម្មសង្គមសេដ្ឋកិច្ចបានយ៉ាងលឿន ធៀបនឹងប្រទេសដៃទៀត អំណោយផលដល់ការធ្វើពាណិជ្ជកម្ម និងវិនិយោគ។ស្ថិតិជញ្ជីងពាណិជ្ជកម្ម របស់អគ្គនាយកដ្ឋានគយនិងរដ្ឋាករកម្ពុជា បានបង្ហាញថា នៅក្នុងត្រីមាសទីមួយនេះ ប្រទេសចិនមានទំហំពាណិជ្ជកម្មធំជាងគេជាមួយកម្ពុជា ដែលមានតម្លៃរហូតដល់ជិត ២,៩ពាន់លានដុល្លារ។ចំណែក ទំហំពាណិជ្ជកម្មរវាង កម្ពុជា និងសហរដ្ឋអាម៉េរិក សម្រេចបាន ក្នុងរង្វង់ ២,២ពាន់ដុល្លារ។ ដៃគូពាណិជ្ជកម្មបន្ទាប់គឺប្រទេសវៀតណាមមាន ១,៧ពាន់ដុល្លារ ប្រទេសថៃ មាន ១,១ពាន់ដុល្លារ និងប្រទេសសិង្ហបុរី ជិត៩៨០លានដុល្លារ។សូមជម្រាបថា កាលឆ្នាំ២០២១ កម្ពុជាសម្រេចទំហំពាណិជ្ជកម្មជាមួយប្រទេស-តំបន់នៅលើពិភពលោកបានជាង ៤៨ពាន់ល្លានដុល្លារ។ ក្នុងនោះការនាំចេញរបស់កម្ពុជា គឺមាន ១៩,៣ពាន់លានដុល្លារ។ រីឯការនាំចូលវិញគឺមាន ២៨,៧ ពាន់លានដុល្លារ។ នេះបើយោងតាមស្ថិតិជញ្ជីងពាណិជ្ជកម្មទំនិញរបស់អគ្គនាយកដ្ឋានគយ និងរដ្ឋាករកម្ពុជា៕ អត្ថបទ៖ វណ្ណៈ

កម្ពុជាទទួលចំណូលជាង ៩៩លានដុល្លារ ពីការនាំចេញជ័រកៅស៊ូ និងឈើកៅស៊ូ នៅត្រីមាសទី១ ឆ្នាំ២០២២

ភ្នំពេញ៖ នៅត្រីមាសទី១ ឆ្នាំ២០២២នេះ កម្ពុជាទទួលបានចំណូលជាង ៩៩លានដុល្លារ ពីការនាំចេញជ័រកៅស៊ូ និងឈើកៅស៊ូ។របាយការណ៍អគ្គនាយកដ្ឋានកៅស៊ូ ចេញផ្សាយនៅថ្ងៃទី១៨ ខែមេសា ឆ្នាំ២០២២ បានបញ្ជាក់ថា ចំណូលសរុបគិតត្រឹមត្រីមាសទី១ ឆ្នាំ២០២២ ពីការនាំចេញជ័រកៅស៊ូ និងឈើកៅស៊ូ មានចំនួន ៩៩,១៤៦,៩៧០ដុល្លារ ក្នុងនោះ ចំណូលពីការនាំចេញជ័រកៅស៊ូ ចំនួន៩៨,៥៦០,២៧០ដុល្លារ និងចំណូលពីការនាំចេញឈើកៅស៊ូ ចំនួន៥៨៦,៧០០ដុល្លារ។ចំពោះបរិមាណនៃការនាំចេញគិតត្រឹមត្រីមាសទី១ ឆ្នាំ២០២២ កម្ពុជាបាននាំចេញជ័រកៅស៊ូ ចំនួន ៦១,៨៣៩តោន កើនឡើងចំនួន៧៨៣តោន ស្មើនឹង១% ធៀបនឹងរយៈពេលដូចគ្នានៃឆ្នាំមុន។ រីឯការនាំចេញឈើកៅស៊ូវិញ សម្រេចបានចំនួន៨៣៦ម៉ែត្រគូប កើនឡើង៣.៤៧%។សម្រាប់តម្លៃលក់ជ័រកៅស៊ូមធ្យម គិតត្រឹមត្រីមាសទី១ ឆ្នាំ២០២២ ថ្លៃ១,៥៩៤ដុល្លារ ក្នុងមួយតោន បានថយចុះចំនួន៤២ដុល្លារ ក្នុងមួយតោន ស្មើនឹង០.៣% ធៀបនឹងរយៈពេលដូចគ្នានៃឆ្នាំមុន។គិតត្រឹមត្រីមាសទី១ ឆ្នាំ២០២២ ផ្ទៃដីកៅស៊ូសរុបមានចំនួន ៤០៤,០៤៤ហិកតា ក្នុងនោះ ផ្ទៃដីចៀរជ័រមានចំនួន ៣១០,១៩៣ហិកតា ស្មើនឹង៧៧% និងផ្ទៃដីថែទាំមានចំនួន ៩៣,៨៥១ហិកតា ស្មើនឹង២៣%។ គូសបញ្ជាក់ថា នៅឆ្នាំ២០២១ កម្ពុជារកចំណូលបានជាង ៦១១លានដុល្លារ ពីការនាំចេញជ័រកៅស៊ូ និងឈើកៅស៊ូ ។ ក្នុងនោះ នាំចេញជ័រកៅស៊ូ ចំនួន៣៦៦,៣០០តោន និងនាំចេញឈើកៅស៊ូ ចំនួន ៤៥៤ម៉ែត្រគូប៕

កម្ពុជានាំចេញវិស័យកាត់ដេរ មានទំហំទឹកប្រាក់ជាង ៣,១ ប៊ីលានដុល្លារអាមេរិក

ភ្នំពេញ៖ ទំហំនៃការនាំចេញផលិតផលកាត់ដេរ ក្នុងត្រីមាសដំបូងឆ្នាំ ២០២២ មានចំនួនទឹកប្រាក់ប្រមាណជា ៣ ១៥៥ លានដុល្លារអាមេរិក កើនឡើងជាង ៦២៧ លានដុល្លារអាមេរិក ស្មើនឹង ២៤.៨% បើធៀបរយៈពេលដូចគ្នានៅឆ្នាំ ២០២១។ អគ្គនាយកដ្ឋានគយ និងរដ្ឋាករកម្ពុជា នៃក្រសួងសេដ្ឋកិច្ច និងហិរញ្ញវត្ថុ បានបង្ហាញតួរលេខបានឲ្យដឹងថា នៅក្នុងត្រីមាសទី១ ឆ្នាំ២០២២នេះ ការពាណិជ្ជកម្មក្រៅប្រទេស ក្នុងនោះទំហំនៃការនាំចេញផលិតផលកាត់ដេរ ស្បែកជើង និងផលិផលការបូប គិតជាទឹកប្រាក់សរុប មានចំនួន ៣ ១៥៥ លានដុល្លារអាមេរិក ដោយបានកើនឡើងប្រមាណជាង ៦២៧ លានដុល្លារអាមេរិក បើប្រៀបធៀបទៅរយៈពេលដូចគ្នាក្នុងឆ្នាំ ២០២១ ចំនួននេះបានកើនឡើងជិត ២៥%។ជុំវិញការនាំចេញផលិតផលកាត់ដេរ, លោកកាំង ម៉ូនីកា អគ្គលេខាធិការរងសមាគមរោងចក្រកាត់ដេរនៅកម្ពុជា GMAC លើកឡើងឲ្យដឹងថា នៅក្នុងរយៈពេលកន្លងមកនេះ ការបញ្ជាទិញពីទីផ្សារខាងក្រៅ បានកើនឡើងគួរជាទីកត់សម្គាល់ ក្នុងនោះទីផ្សារដែលលេចធ្លោជាងគេ គឺការនាំចេញនាំទៅកាន់ទីផ្សារអាមេរិក ។ ទាក់ទងនឹងការនាំចេញនេះដែរ លោក បានរំពឹងថា ការនាំចេញផលិតផលកាត់ដេរ នឹងមាននិន្នាការបន្តល្អប្រសើររហូតដល់ដំណាច់ឆ្នាំ។លោក បានបន្តថា បន្ទាប់ពីស្ថានភាពនៃការរីលរាលដាលជំងឺកូវីដ ១៩ នៅកម្ពុជា មានស្ថិរភាពល្អជាបណ្តើរៗ នឹងស្របពេលកម្ពុជាទទួលបានទទួលបានក្រុមហ៊ុនវិនិយោគលើវិស័យកាត់ដេរជាបន្តបន្ទាប់ ក្នុងនោះសម្រាប់ការផលិតនៅទីផ្សារក្នុងស្រុក អាចឆ្លើយតបទៅនិងតម្រូវការនាំចេញបាន តែទោះបីយ៉ាងណា យើងបានជួបបញ្ហាបន្តិចបន្តួច ក្នុងការរើសកម្មករថែម ជាពិសេសសម្រាប់តំបន់ភ្នំពេញជាដើម។ចំណែកលោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា ថ្លែងថា ស្របពេលដែលរាជរដ្ឋាភិបាលបានដាក់ចេញច្បាប់ស្តីពីគារវិនិយោគរបស់ព្រះរាជាណាចក្រកម្ពុជា នឹងថ្មីៗនេះ រាជរដ្ឋាភិបាលបាននូវយុទ្ធសាស្រ្តអភិវឌ្ឍន៍វិស័យកាត់ដេរ ផលិតស្បែកជើង និងកាបូបកម្ពុជាបន្ថែមទៀតនោះ, ដែលផែនការសកម្មភាពទាំងអស់នេះ គឺជាផែនទីបង្ហាញផ្លូវ សម្រាប់ជម្រុញអភិវឌ្ឍន៍លើកវិស័យកាត់ដេរ ស្បែកជើង និងកាបូបនៅកម្ពុជា ដែលវិស័យនេះបានផ្តល់អត្ថប្រយោជន៍យ៉ាងសំខាន់ សម្រាប់វិស័យការងារ និងកំណើនសេដ្ឋកិច្ច។សូមបញ្ជាក់ថា យុទ្ធសាស្រ្តអភិវឌ្ឍន៍វិស័យកាត់ដេរ ផលិតស្បែកជើង និងកាបូបកម្ពុជា២០២២-២០២៧ មានចក្ខុវិស័យអភិវឌ្ឍវិស័យកាត់ដេរ, ផលិតស្បែកជើង និងកាបូបនៅកម្ពុជា ឱ្យទៅជាឧស្សាហកម្មដែលមានចីរភាពបរិស្ថាន, មានភាពធន់, មានតម្លៃបន្ថែមខ្ពស់, ផ្តោតលើផលិតផលដែលលក់បានថ្លៃ មានភាពប្រកួតប្រជែងខ្ពស់ និងជាមូលដ្ឋានគាំទ្រពិពិធកម្មសេដ្ឋកិច្ចនៅឆ្នាំ២០២៧។យុទ្ធសាស្រ្ត នេះក៏មានគោលបំណងកំណត់ទិសដៅអភិវឌ្ឍន៍រួម, បង្កើនភាពឯករាជ្យ, ពង្រឹងភាពប៉ាន់ប្រមាណបាន និងស្ថិរភាព ដើម្បីបន្តលើកកម្ពស់ការអភិវឌ្ឍវិស័យនេះ ប្រកបដោយចីរភាព និងបរិយាប័ន្ន ៕អត្ថបទ៖ សុន រ៉ាឌី

ទំហំពាណិជ្ជកម្មកម្ពុជា-វៀតណាម មានចំនួន ៩ប៊ីលានដុល្លារក្នុងឆ្នាំ២០២១

ភ្នំពេញ៖ ទោះបីមានផលប៉ះពាល់ពីជំងឺរាតត្បាតសកលកូវីដ-១៩ ក្ដី ទំហំពាណិជ្ជកម្មនៃប្រទេសកម្ពុជា និងប្រទេសវៀតណាម ក្នុងឆ្នាំ២០២១ មានទំហំជាង៩ ប៊ីលានដុល្លារអាម៉េរិក កើនឡើងប្រមាណ៨០ភាគរយ ប្រៀបធៀបនឹងឆ្នាំ២០២០។ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងឯកឧត្តម ផាម ម៉ិញជីង នាយករដ្ឋមន្ត្រីនៃសាធារណរដ្ឋសង្គមនិយមវៀតណាម បានសម្តែងនូវក្តី សោមនស្សរីករាយ អំពីដំណើរវិវត្ដន៍ជាវិជ្ជ មានក្នុងទំនាក់ទំនងសហប្រតិបត្តិ ការរវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម ក្នុងរយៈពេលកន្លងមក។ទំហំពាណិជ្ជកម្មទ្វេភាគីនេះ នៅបន្តរក្សាបាននូវសន្ទុះកំណើន ជាវិជ្ជមានក្នុងត្រីមាសទី១ ឆ្នាំ២០២២។ សាធារណរដ្ឋសង្គមនិយមវៀតណាម បន្តឈរលំដាប់ទី១ ក្នុងចំណោមប្រទេសអាស៊ាន ចំពោះការវិនិយោគ ដោយផ្ទាល់ ក្នុងព្រះរាជាណាចក្រកម្ពុជា។នេះបើយោងតាមសេចក្តីព័ត៌មាន ចេញផ្សាយកាលពីថ្ងៃទី១២។សម្តេចអគ្គមហាសេនាបតីតេជោ ហ៊ុន សែន និងឯកឧត្តម ផាម ប៊ិញជីង បានសម្តែងនូវក្តី សោមនស្សរីករាយ អំពីដំណើរវិវឌ្ឍជាវិជ្ជមានក្នុងទំនាក់ទំនងសហប្រតិបត្តិការរវាងព្រះរាជាណាចក្រកម្ពុជា និងសាធារណៈរដ្ឋសង្គមនិយមវៀតណាម ក្នុងរយៈពេលកន្លងមក ជាពិសេសទោះបីមានផល ប៉ះពាល់ពីជំងឺរាតត្បាតសកលកូវីដ-១៩ ក្តីក៏ទំហំពាណិជ្ជកម្មនៃប្រទេសទាំងពីរក្នុងឆ្នាំ២០២១ មានទំហំជាង ៩ កោដដុល្លារសហរដ្ឋអាមេរិក កើនឡើងប្រមាណ ៨០ភាគរយ ប្រៀបធៀបនឹងឆ្នាំ២០២០ និងបន្តរក្សាបាននូវសន្ទុះកំណើនជាវិជ្ជមានក្នុងត្រីមាសទី១ ឆ្នាំ ២០២២។ សាធារណៈសង្គមនិយម វៀតណាម បន្តឈរលំដាប់ទី១ ក្នុងចំណោមប្រទេសអាស៊ាន ចំពោះការវិនិយោគដោយផ្ទាល់ ក្នុងព្រះរាជាណាចក្រកម្ពុជា៕ អត្ថបទ៖ វណ្ណៈ

គយនិងរដ្ឋាករ ប្រមូលចំណូលបានជាង ៥៩៧ លានដុល្លារអាមេរិក ក្នុងរយៈពេលបីខែនេះ

ភ្នំពេញ៖ ក្នុងរយៈពេល ៣ខែដើមឆ្នាំនេះ អគ្គនាយកដ្ឋានគយ និងរដ្ឋាករកម្ពុជា ប្រមូលចំណូលបានជាង ២ ៤២៨ ប៊ីលានរៀល ស្មើជាង ៥៩៧ លានដុល្លារអាមេរិក ត្រូវជាប្រមាណ ២៣ ភាគរយ នៃផែនការកំណត់ដោយច្បាប់ ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២២ ។ អគ្គនាយកដ្ឋានគយ និងរដ្ឋាករកម្ពុជា បានបង្ហាញតួរលេខឲ្យដឹង នៅកិច្ចប្រជុំបូកសរុបលទ្ធផលការងារគយ និងរដ្ឋាករប្រចាំត្រីមាសទី១ ឆ្នាំ២០២២ ថ្ងៃទី១២ ខែមេសា ឆ្នាំ២០២២នេះ, សម្រាប់ការប្រមូលចំណូល ក្នុងរយៈពេល ៣ខែ ដើមឆ្នាំ២០២២នេះ អគ្គនាយកដ្ឋានគយ និងរដ្ឋាករកម្ពុជា ប្រមូលចំណូលបានចំនួនជាង ២ ៤២៨ ប៊ីលានរៀល ស្មើនឹងជាង ៥៩៧ លានដុល្លារអាមេរិក ត្រូវប្រមាណ ២៣.២% នៃផែនការកំណត់ដោយច្បាប់ ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២២ ក្នុងនោះបើប្រៀបធៀបនឹងរយៈពេលដូចគ្នាក្នុងឆ្នាំ ២០២១ លទ្ធផលនៃការចំណូលនេះ បានថយចុះជាង ៦១ ប៊ីលានរៀល ដែលត្រូវជាប្រមាណ ២.៥% ។ចំណែកចំណូលតាមប្រភេទពន្ធ និងអាករ ដែលគយ និងរដ្ឋាករប្រមូលបានវិញ រួមមាន៖ អាករលើតម្លៃបន្ថែម មានចំនួនជាង ៩៤៣ ប៊ីលានរៀល ត្រូវជិត ៣៩% នៃចំណូលសរុប, អាករពិសេសមានចំនួនជិត ៨៩៥ ប៊ីលានរៀល ត្រូវជិត ៣៧%, ពន្ធគយមានជាង ៤៣៦ ប៊ីលានរៀល ត្រូវ ១៨%, អាករបន្ថែមលើផលិតផលប្រេងជិត១០១ ប៊ីលានរៀល ត្រូវជាង ៤%, និងអាករនាំចេញ និងកម្រៃផ្សេងៗ មានចំនួនជិត ៥៣ ប៊ីលានរៀល ត្រូវជាង ២% នៃចំណូលសរុប។ ដោយឡែកតួលេខទំហំពាណិជ្ជកម្មរបស់កម្ពុជា៖ ក្នុងរយៈពេល ៣ខែនេះដែរ ធៀបនឹងរយៈពេលដូចគ្នា ក្នុងឆ្នាំ២០២១ មានបម្រែបម្រួលខ្លះៗដូចជា៖ ការនាំចេញផលិតផលកាត់ដេរ មានចំនួន ៣ ១៥៥ លានដុល្លារអាមេរិក កើនឡើងប្រមាណជិត ៦២៧ លានដុល្លារអាមេរិក ស្មើ ២៤.៨%, ការនាំចេញផលិតផលវិនិយោគមិនមែន កាត់ដេរដូចជា៖ កង់ គ្រឿងបំណែកអេឡិចត្រូនិច បង្គុំខ្សែភ្លើង គ្រឿងបន្លាស់រថយន្ត អំពូលលម្អ ផលិតផលពីឈើ ផលិតផលប្លាស្ទិក ស្បែកសត្វកែច្នៃ និងផលិតផលផ្សេងៗទៀត មានចំនួនជិត ១ ២១៣ លានដុល្លារអាមេរិក កើនឡើងជាង ៣៣៥ លានដុល្លារអាមេរិក ស្មើជាង ៣៨%, ការនាំចេញកសិផលសរុបមានតម្លៃជាង ១ ១២៣ លានដុល្លារអាមេរិក កើនឡើងជាង ១០៧ លានដុល្លារអាមេរិក ៕អត្ថបទ៖ សុន រ៉ាឌី

តម្លៃរថយន្តឈ្នួលចាប់ផ្តើមឡើងថ្លៃ ខណៈពិធីបុណ្យចូលឆ្នាំខ្មែរជិតឈានមកដល់

ភ្នំពេញ៖ នៅសល់តែ២ថ្ងៃទៀតប៉ុណ្ណោះ ពិធីបុណ្យចូលឆ្នាំប្រពៃណីជាតិខ្មែរនឹងឈានមកដល់ ។ ក្រុមប្រកបរបររថន្តឈ្នួល រវាងភ្នំពេញ និងបណ្តាខេត្តនានា បានឲ្យដឹងថា តម្លៃឈ្នួលនឹងចាប់ផ្តើមឡើង ចាប់ពីថ្ងៃនេះទៅ ប៉ុន្តែឡើងក្នុងកម្រិតអាចទទួលយកបានចន្លោះពី ៥ពាន់ ដល់១ម៉ឺនរៀល ក្នុងម្នាក់ ដោយសារប្រេង/ហ្គាសឡើងថ្លៃ និងមនុស្សចេញពីភ្នំពេញច្រើន ជាងត្រឡប់មកវិញនៅមុនពិធីឈានដល់។លោក ម៉េង ម្ចាស់រថយន្តឈ្នួលរវាងភ្នំពេញ និងខេត្តកំពង់ធំ បានឲ្យទូរទស្សន៍ព័ត៌មាន ប៊ីធីវី ដឹងនៅព្រឹកថ្ងៃទី១១ ខែមេសានេះថា ជារៀងរាល់ពិធីបុណ្យជាតិធំៗ តម្លៃរថយន្តឈ្នួលតែងតែមានការឡើងថ្លៃ ប៉ុន្តែមិនច្រើនណាស់ណាទេ ជាក់ស្តែងសម្រាប់លោក គឺឡើងថ្លៃចំនួនតែ ១ម៉ឺនរៀល ក្នុងម្នាក់ ដោយសារប្រេងឡើងថ្លៃ និងមូលហេតុមួយទៀតគឺ នៅមុនពិធីឈានដល់ អ្នកធ្វើដំណើរចាកចេញពីភ្នំពេញច្រើនជាងអ្នកត្រឡប់ចូល ហើយក្រោយចប់ពិធីបុណ្យ អ្នកធ្វើដំណើរចូលក្រុងវិញ មានចំនួនច្រើនជាងអ្នកចេញពីក្រុង។ស្រដៀងគ្នានេះ ក្រុមអ្នករត់រថយន្តឈ្នួល (តាក់ស៊ី) ដទៃផ្សេងទៀតស្ថិតនៅម្តុំផ្សារថ្មី រាជធានីភ្នំពេញ បានលើកឡើងថា ការឡើងថ្លៃឈ្នួល មិនមែនចេះតែមាន និងហួសហេតុទេ ជាពិសេសក្នុងអំឡុងនៃវិបត្តិជំងឺឆ្លងកូវីដ១៩នេះ ត្រូវកាត់បន្ថយចំនួនអ្នកជិះ ដើម្បីរក្សាគម្លាត និងទប់ស្កាត់ការឆ្លងរាលដាលជាដើម បន្ទាប់ពីតម្លៃប្រេងកើនឡើង។ពលរដ្ឋដែលត្រៀមចាកចេញពីភ្នំពេញ ទៅស្រុកកំណើតដើម្បីជួបជុំគ្រួសារ សាច់ញាតិ និងដើម្បីប្រារព្ធពិធីបុណ្យចូលឆ្នាំខាងមុខនេះ បាននិយាយថា ការឡើងថ្លៃឈ្នួលរថយន្តក្នុងពិធីបុណ្យទានម្តងៗ គឺអាចទទួលយកបាន ដោយសារការតម្លើងថ្លៃនោះ មិនលើសពី ១ម៉ឺន ឬ ២ម៉ឺនរៀលនោះទេ។សូមបញ្ជាក់ថា បុណ្យចូលឆ្នាំប្រពៃណីជាតិខ្មែរឆ្នាំ២០២២នេះ នឹងប្រព្រឹត្តទៅរយៈពេល ៣ថ្ងៃជាប់គ្នាដូចបណ្តាឆ្នាំមុនៗដែរ គិតចាប់ពីថ្ងៃទី១៤ ១៥ និង១៦ ខែមេសាខាងមុខ៕ អត្ថបទ៖ ឈិត បូរ៉ាវី

អាស៊ានគ្រោងនឹងពង្រីកការតភ្ជាប់ប្រព័ន្ធទូទាត់ឆ្លងដែន មានតម្លៃទាប និងសុវត្ថិភាពខ្ពស់

ភ្នំពេញ៖ ប្រទេសសមាជិកអាស៊ាន គ្រោងនឹងពង្រីកការតភ្ជាប់ប្រព័ន្ធទូទាត់ឆ្លងដែន ជាលក្ខណៈពហុភាគី សម្រាប់តំបន់ដែលអាចធ្វើឱ្យការទូទាត់ ឆ្លងដែន មានប្រតិបត្តិការឆាប់រហ័ស តម្លៃទាប និងសុវត្ថិភាពខ្ពស់។ឯកឧត្តម ជា ចាន់តូ ទេសាភិបាល ធនាគារជាតិនៃកម្ពុជា បានធ្វើជាប្រធាននៃកិច្ចប្រជុំរវាងទេសាភិបាលធនាគារកណ្តាល និងនាយកប្រតិបត្តិគ្រឹះស្ថានហិរញ្ញវត្ថុអាស៊ាន តាមរយៈប្រព័ន្ធអនឡាញ នៅថ្ងៃទី ៧ ខែមេសា ឆ្នាំ២០២២ ក្នុងនោះកិច្ចប្រជុំនេះ បានផ្តល់ឱកាសសម្រាប់គ្រឹះស្ថានហិរញ្ញវត្ថុអាស៊ាន បានជួបពិភាក្សា និងផ្លាស់ប្តូរមតិយោបល់ជាមួយអាជ្ញាធររូបិយវត្ថុ និងធនាគារកណ្តាលអាស៊ាន អំពីវឌ្ឍនភាព គំនិតផ្ដួចផ្ដើមថ្មីៗ ក៏ដូចជាបញ្ហាប្រឈមនានា ដើម្បីរួមចំណែកសម្រេចបានសមាហរណកម្មហិរញ្ញវត្ថុនៅក្នុងតំបន់។ចំណែកនៅក្នុងឆ្នាំនេះ កិច្ចប្រជុំបានពិភាក្សាលើប្រធានបទដូចជា៖ ការបច្ចុប្បន្នកម្មការបង្កើតក្របខ័ណ្ឌអន្តរប្រតិបត្តិការ ការទូទាត់ឆ្លង ដែនតាម QR កូត អាស៊ាន និងការលើកកម្ពស់ការតភ្ជាប់ហិរញ្ញវត្ថុក្នុងតំបន់អាស៊ាន ក្នុងគោលដៅរួមចំណែកពង្រឹងកិច្ចសហប្រតិបត្តិការ ហិរញ្ញវត្ថុក្នុងតំបន់ឱ្យកាន់តែស៊ីជម្រៅ។ ការបង្កើតក្របខ័ណ្ឌអន្តរប្រតិបត្តិការ ត្រូវបានអនុម័តដោយទេសាភិបាលធនាគារកណ្តាលអាស៊ាន នៅ ឆ្នាំ២០២១ កន្លងមក និងត្រូវធ្វើឡើងជាដំណាក់កាល ដើម្បីគាំទ្រដល់ការអភិវឌ្ឍសេវាហិរញ្ញវត្ថុថ្មីៗ លើកកម្ពស់ការគ្រប់គ្រងហានិភ័យ និងបង្កើនប្រសិទ្ធភាពនៃការចែករំលែកទិន្នន័យនៅក្នុងតំបន់។បច្ចុប្បន្នដំណាក់កាលទី១ ត្រូវបានបញ្ចប់, ចំណែកដំណាក់កាលទី២ ដែលនឹងចាប់ផ្តើមនៅត្រីមាសទី ២ និងបញ្ចប់ចុងឆ្នាំ ២០២២ នេះ នឹងផ្តោតលើការបង្កើតក្របខ័ណ្ឌអន្តរប្រតិបត្តិការធនាគារអាស៊ាន, ការរៀបចំក្របខ័ណ្ឌគោលការណ៍ណែនាំពាក់ព័ន្ធផ្សេងៗ និងការជ្រើសរើសករណី សិក្សា ដើម្បីធ្វើការសាកល្បង ដោយផ្តោតលើការទូទាត់ឆ្លងដែន និងការវាយតម្លៃឥណទានមិនដំណើរការជាដើម។ ជាមួយគ្នានេះ ការអភិវឌ្ឍ ការទូទាត់ឆ្លងដែនតាម QR កូត ក៏សម្រេចបាននូវវឌ្ឍនភាពគួរឱ្យកត់សម្គាល់ និងបានដើរតួនាទីកាន់យ៉ាងសំខាន់ សម្រាប់ប្រទេសសមាជិក អាស៊ានទាំងអស់ ក្នុងការសម្រួល និងលើកកម្ពស់ការផ្ញើប្រាក់របស់ពលករនៅក្រៅប្រទេស ពាណិជ្ជកម្មអេឡិចត្រូនិក និងទេសចរណ៍ សំដៅឈានទៅរកសេដ្ឋកិច្ចឌីជីថលូបនីយកម្មនិងលើកកម្ពស់បរិយាបន្នហិរញ្ញវត្ថុ។ គួររំលេចថា ប្រទេសសមាជិកអាស៊ាន ភាគច្រើនបានភ្ជាប់ប្រព័ន្ធទូទាត់ឆ្លងដែនជាលក្ខណៈទ្វេភាគីរួចហើយដូចជា កម្ពុជានិងម៉ាឡេស៊ី កម្ពុជា និងថៃ សិង្ហបុរី និងថៃ សិង្ហបុរីនិងម៉ាឡេស៊ី វៀតណាមនិងថៃ ជាដើម។ លើសពីនេះប្រទេសសមាជិកគ្រោងនឹងពង្រីក ការតភ្ជាប់ប្រព័ន្ធទូទាត់ ឆ្លងដែនជាលក្ខណៈពហុភាគីសម្រាប់តំបន់ ដែលអាចធ្វើឱ្យការទូទាត់ឆ្លងដែនមានប្រតិបត្តិការឆាប់រហ័ស តម្លៃទាប និងសុវត្ថិភាពខ្ពស់៕ អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

បេសកជនអាមេរិក៖ បទឈប់បាញ់អ៊ីស្រាអែល-ស៊ីរី បានចូលជាធរមាន ខណៈអ្នកស្លាប់កើនឡើងជាង១ពាន់នាក់

NHK៖ ក្រុមចម្រុះដែលកំពុងកាន់អំណាចរបស់ជប៉ុន បាត់បង់ការគ្រប់គ្រងនៅសភាជាន់ខ្ពស់

មនុស្ស ៣នាក់ស្លាប់ និងរាប់រយនាក់បានរួចជីវិត បន្ទាប់ពីឆេះសាឡាងនៅកណ្ដាលសមុទ្រឥណ្ឌូនេស៊ី

ពលរដ្ឋហ្កាហ្សាលើស ៨០នាក់ បានស្លាប់ក្នុងការបាញ់ប្រហារយ៉ាងឃោរឃៅនៅទីតាំងរថយន្តជំនួយ UN

[UPDATE] ចំនួនអ្នកស្លាប់ដោយសារជំនន់ទឹកភ្លៀងនៅកូរ៉េខាងត្បូង កើនឡើងដល់១៧នាក់ និង១១ នាក់បាត់ខ្លួន

វិមានក្រឹមឡាំង៖លោក Putin បើកឱ្យមានសន្តិភាពជាមួយអ៊ុយក្រែនលុះត្រាតែក្រោយពេលគោលដៅយោធារុស្ស៊ីត្រូវបានសម្រេច

ព្រះមហាក្សត្របានចេញព្រះរាជក្រម ប្រកាសឲ្យប្រើប្រាស់ច្បាប់ធម្មនុញ្ញ ស្តីពីវិសោធនកម្មមាត្រា៣៣

ក្នុងគោលបំណងមនុស្សធម៌! អាជ្ញាធរកម្ពុជាសម្រេចបើកច្រកទ្វារព្រំដែនអនុញ្ញាតដល់អនុព័ន្ធយោធាថៃប្រចាំនៅភ្នំពេញ និងមនុស្សពីរនាក់ធ្វើដំណើរតាមច្រកទ្វារអន្តរជាតិប៉ោយប៉ែត-ខ្លងលីកទៅព្យាបាលជំងឺនៅខេត្តស្រះកែវ

ចៅក្រមស៊ើបសួរសាលាដំបូងរាជធានីភ្នំពេញសម្រេចឃុំខ្លួនជនត្រូវចោទ៨នាក់ជាបណ្តោះអាសន្នពាក់ព័ន្ធអំពើឆបោកតាមឆបោកតាមប្រព័ន្ធអនឡាញ

ត្រឹមថ្ងៃទី១៩កក្កដា សមត្ថកិច្ចរាជធានី-ខេត្ត បង្រ្កាបករណីឆបោកតាមប្រព័ន្ធបច្ចេកវិទ្យា ៥២ទីតាំង ឃាត់ខ្លួនជនសង្ស័យ ២.៧៦៧ នាក់ មានជនជាតិចិនចំនួន ៨៤៣នាក់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877