BTV NEWS

ឯកឧត្តម ឌិត ទីណា លើកទឹកចិត្តសហគមន៍ និងក្រុមហ៊ុនបន្តស្មារតីសាមគ្គីភាព ដើម្បីទទួលផលចំណេញទាំងអស់គ្នាថែមទៀត

កម្ពុជា និងកូរ៉េ រួមគ្នាជំរុញការកាត់បន្ថយឧស្ម័នផ្ទះកញ្ចក់តាមរយៈការវិនិយោគមធ្យោបាយដឹកជញ្ជូន-អគ្គិសនី ឆ្ពោះទៅគោលដៅអព្យាក្រឹតកាបូនឆ្នាំ២០៥០

កសិករខេត្តកំពង់ធំជិតពីររយគ្រួសារទទួលផលចំណេញច្រើនក្រោយចងក្រងជាសហគមន៍កសិកម្មទំនើប

វិស័យដឹកជញ្ជូននៅកម្ពុជាមានភាពមមាញឹកជាងមុន ស្របពេលតម្លៃប្រេងឥន្ធនៈលើទីផ្សារមានស្ថិរភាពល្អ

សេដ្ឋកិច្ច និង កសិកម្ម

០១-១០ខែមេសា ប្រេងសាំងធម្មតាតម្លៃ ៥.២៥០រៀល/លីត្រ និងប្រេងម៉ាស៊ូត ៥.៣០០រៀល/លីត្រ

ភ្នំពេញ៖ ក្រសួងពាណិជ្ជកម្មប្រកាសពីតម្លៃលក់រាយប្រេងឥន្ធនៈតាមស្ថានីយនានាទូទាំងប្រទេស ចាប់ពីថ្ងៃទី១-១០ ខែមេសា ឆ្នាំ២០២២ ដោយប្រេងសាំងធម្មតាត្រូវលក់តម្លៃ ៥.២៥០រៀល/លីត្រ (ធ្លាក់ចុះ៥០រៀល) និងប្រេងម៉ាស៊ូត ត្រូវលក់តម្លៃ ៥.៣០០រៀល/លីត្រ(តម្លៃដដែល)៕

កម្ពុជាពន្លឿនរៀបចំគោលនយោបាយអភិវឌ្ឍន៍កសិកម្ម ដើម្បីជំរុញលើកកម្ពស់វិស័យកសិកម្ម

ភ្នំពេញ៖ គណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ បើកកិច្ចជុំសេចក្តីព្រាងគោលនយោបាយអភិវឌ្ឍន៍វិស័យកសិកម្មចុងក្រោយ ក្នុងគោលដៅកំណត់បណ្តាសកម្មភាពជាអាទិភាព ដោយពន្លឿនគោលនយោបាយនេះ ឲ្យបានឆាប់រហ័ស ដើម្បីឈានឆ្ពោះទៅរកការអភិវឌ្ឍវិស័យកសិកម្មឱ្យមានការរីកចម្រើនឆាប់រហ័ស និងប្រកបដោយចីរភាព។ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ នៅថ្ងៃទី ២៩ ខែ មីនា ឆ្នាំ ២០២២ នេះ បានដឹកនាំប្រជុំស្តីពីសេចក្តីព្រៀងគោលនយោបាយអភិវឌ្ឍន៍វិស័យកសិកម្ម ឆ្នាំ២០២១-២០៣០ ដែលមានចក្ខុវិស័យវែងឆ្ងាយ ក្នុងការធ្វើទំនើបកម្មវិស័យកសិកម្ម ដូចជាការអនុវត្តការដាំដុះក្នុងផ្ទះសំណាញ់ ការប្រើប្រាស់ប្រព័ន្ធស្រោចស្រពសន្សំសំចៃទឹក ការព្រោះស្រូវដោយឧបករណ៍ទំនើបដោយប្រើកម្លាំងពលកម្មតិចបំផុត និងការប្រើដ្រូនបាចជីកសិកម្មជាដើម ដែលទាំងអស់នេះ គឺជាមូលដ្ឋានគ្រឹះដ៏សំខាន់ ក្នុងការជំរុញវិស័យកសិកម្មឱ្យមានលក្ខណៈប្រកួតប្រជែង បរិយាប័ន្ន ធន់នឹងការប្រែប្រួលអាកាសធាតុ និងនិរន្តរភាព សំដៅបង្កើនប្រាក់ចំណូលគ្រួសារកសិករ ពង្រីកវិបុលភាព និងលើកកម្ពស់សុខុមាលភាពរបស់ប្រជាពលរដ្ឋកម្ពុជា។ ទាក់ទងនិងគោលនយោបាយនេះ, លោកឧកញ៉ា ហង់ សុគន្ធ ប្រធានក្រុមប្រឹក្សាភិបាល សម្ព័ន្ធសហគមន៍កសិកម្មកម្ពុជា លើកឡើងថា ការរៀបចំឲ្យមានគោលនយោបាយអភិវឌ្ឍន៍វិស័យកសិកម្មរបស់រាជរដ្ឋាភិបាល គឺជាផែនទីដ៏មានសារៈសំខាន់បំផុត ក្នុងការចង្អុលទិស នៃការអភិវឌ្ឍវិស័យកសិកម្មនៅកម្ពុជា និងជាការទាក់ទាញវិនិយោគិនឲ្យមកអភិវឌ្ឍន៍ក្នុងវិស័យកសិកម្ម ដែលជាមូលដ្ឋានគ្រឹះនៃការអភិវឌ្ឍសេដ្ឋកិច្ចមូលដ្ឋាន ដើម្បីបង្កើនកសិផលបម្រើទីផ្សារនាំចេញ ស្របពេលរាជរដ្ឋាភិបាលបានកំពុងខិតខំពង្រឹង និងពង្រីកកិច្ចព្រមព្រៀងពាណិជ្ជកម្មសេរីជាបន្តបន្ទាប់។គោលនយោបាយអភិវឌ្ឍន៍វិស័យកសិកម្មឆ្នាំ២០២១-២០៣០ បាននិងកំពុងត្រូវបានរៀបចំឡើង ដើម្បីឆ្លើយតបទៅនឹងចក្ខុវិស័យវែងឆ្ងាយរបស់រាជរដ្ឋាភិបាល ព្រមទាំងមានសង្គតិភាព ទៅនឹងឯកសារគោលនយោបាយ និងយុទ្ធសាស្ត្ររបស់អន្តរស្ថាប័នពាក់ព័ន្ធផ្សេងៗផងដែរ។គោលដៅចម្បងដែលត្រូវសម្រេចឱ្យបានក្នុងគោលនយោបាយនេះរួមមាន៖ ការបង្កើនតម្លៃបន្ថែមសរុបនៃវិស័យកសិកម្មឱ្យកើនយ៉ាងតិច ៣ ភាគរយក្នុងមួយឆ្នាំ និងបង្កើនផលិតភាពពលកម្មកសិកម្មពី ១,៩៨៦ដុល្លារអាមេរិក ក្នុងឆ្នាំ ២០១៩ ដល់ ៤,៦២៥ដុល្លារអាមេរិកក្នុងមួយឆ្នាំ នៅឆ្នាំ២០៣០។ “គោលនយោបាយអភិវឌ្ឍន៍វិស័យកសិកម្មឆ្នាំ២០២១-២០៣០” នឹងជួយជំរុញក្នុងន័យធ្វើយ៉ាងណាឱ្យប្រជាកសិករទទួលបានការគាំទ្រពីរដ្ឋនូវព័ត៌មានកសិកម្ម និងព័ត៌មានទីផ្សារ ដើម្បីផ្សារភា្ជប់ផលិតកម្មទៅនឹងតម្រូវការទីផ្សារក្នុងស្រុក តំបន់ និងពិភពលោកព្រមទាំងជំរុញផលិតកម្មកសិផលតាមសក្តានុពលលក្ខណៈភូមិសាស្រ្តនៃតំបន់នីមួយៗ ដើម្បីប្រសិទ្ធភាព និងពិពិធកម្មសេដ្ឋកិច្ច៕ អត្ថបទ៖ សុន រ៉ាឌី

ភ្លៀងកក់ខែមួយមេយ៉ាងធំ ពលរដ្ឋនាំគ្នាចាប់សត្វហ៊ីងមកធ្វើទទួលទាន និងខ្លះទៀតយកទៅលក់លើទីផ្សារ

ស្ទឹងត្រែង៖ ភ្លៀងធ្លាក់កក់ខែមួយមេយ៉ាងធំ ប្រជាពលរដ្ឋនៅក្នុងខេត្តស្ទឹងត្រែង ដែលនិយមចូលចិត្តបរិភោគសត្វហ៊ីង តែងតែនាំគ្នាចេញចាប់យកមកធ្វើទទួលទាន និងខ្លះទៀតចាប់យកទៅលក់លើទីផ្សារផងដែរ។លោកសុខ ចាន់វីរៈ អ្នកលក់ដូរនៅក្នុងផ្សារសាមគ្គីស្ទឹងត្រែង បានឲ្យដឹងថា សត្វហ៊ីងត្រូវបានគេចាប់យកមកលក់ច្រើនណាស់ បន្ទាប់ពីភ្លៀងធ្លាក់កក់ខែ២ទៅ៣មេ នៅក្នុងខេត្ត ហើយតម្លៃថ្លៃកប់ពពក ។លោក បន្ដថា កាលពីថ្ងៃភ្លៀងកក់ខែដំបូង សត្វហ៊ីងត្រូវបានគេយកមកលក់ត្រឹម១គីឡូក្រាមត្រឹម ១៥០០០រៀលប៉ុណ្ណោះ តែនៅថ្មីៗនិងយប់ថ្ងៃទី២៧ខែមីនា ២០២២នេះមានភ្លៀងធ្លាក់កក់ខែយ៉ាងខ្លាំងទៀត អ្នកដើរចាប់សត្វហ៊ីងយកមកលក់លើទីផ្សារ មានតម្លៃរហូតដល់ទៅ២ម៉ឺនរៀល អ្នកខ្លះលក់បានដល់ទៅ២៥០០០រៀលឯណោះ។អ្នកចាប់សត្វហ៊ីងលក់ បានឲ្យដឹងថា សត្វហ៊ីងនៅរដូវភ្លៀងធ្លាក់កក់ខែដំបូង ហ៊ីងមិនទាន់បើកមាត់ទេ ហើយវាក៏មិនទាន់ស៊ីចំណីអ្វីផ្ដេសផ្ដាសដែរ ដូចនេះហើយបងប្អូនដែលនិយមហូបសត្វហ៊ីង ហើយអ្នកខ្លះគេបានទិញយកទៅប្រឡាក់ហាលងៀតទុកនិងអ្នកខ្លះទិញមកធ្វើម្ហូបភ្លាមៗតាមតម្រូវការចូលចិត្តរបស់ពួកគេ។លោកស្រី សមវិចិត្រ នាយខណ្ឌរដ្ឋបាលជលផលស្តីទី ខេត្តស្ទឹងត្រែង បានឲ្យដឹងថា៖ មូលហេតុដែលនាំឲ្យសត្វហ៊ីងធម្មជាតិឡើងថ្លៃ ដល់រាប់ម៉ឺនរៀលបែបនេះ គឺដោយសារតែមានតម្រូវការបរិភោគកើនឡើងកាន់តែច្រើន ម្យ៉ាងទៀត ការបរិភោគសត្វហ៊ីង ពលរដ្ឋខេត្តស្ទឹងត្រែង ពួកគាត់ហូបតែពេលភ្លៀងធ្លាក់កក់ខែដំបូងតែប៉ុណ្ណោះ នៅពេលរដូវវស្សារភ្លៀងធ្លាក់ជោគជាំគេលែងហូប៕ អត្ថបទ៖ មាស ផល្លា

ទឹកឃ្មុំព្រៃមណ្ឌលគិរី ចុះបញ្ជីជាផលិតផលសម្គាល់ភូមិសាស្រ្ត នឹងជួយបង្កើនចំណូលដល់កសិករ

មណ្ឌលគិរី៖ “ទឹកឃ្មុំព្រៃមណ្ឌលគិរី” ត្រូវបានទទួលស្គាល់ជាផលិតផលសម្គាល់ភូមិសាស្ដ្រពីរាជរដ្ឋាភិបាលកម្ពុជា នឹងចូលរួមលើកកម្ពស់គុណភាព និងស្តង់ដារអនាម័យ ក៏ដូចជាបង្កើនច្រវ៉ាក់តម្លៃ បង្កើតការងារ និងជាពិសេសលើកកម្ពស់ជីវភាពប្រជាកសិករ។ក្នុងកិច្ចសម្ភាសន៍ជាមួយទូរទស្សន៍ព័ត៌មាន ប៊ីធីវី នៅព្រឹកថ្ងៃទី២៩ ខែមីនានេះ លោក ស្រើវ សុវណ្ណនី ប្រធានសមាគមអភិរក្សឃ្មុំព្រៃខេត្តមណ្ឌលគិរី បានឲ្យដឹងថា បច្ចុប្បន្នសមាគមមានសមាជិកជាអ្នកប្រមូលឃ្មុំព្រៃសរុបជិត ៤៥០នាក់ ដែលស្ថិតនៅក្នុងសហគមន៍ព្រៃឈើចំនួន ១១ មានក្រុមហ៊ុនចំនួន៣ និងអ្នកទិញលក់ទឹកឃ្មុំចំនួន ៨នាក់។ ជាមធ្យមសមាជិករបស់សមាគមទាំងអស់អាចប្រមូលទឹកឃ្មុំ បានប្រហែល ៣០តោន ក្នុង១ឆ្នាំ។ លោកសង្ឃឹមថា ទឹកឃ្មុំព្រៃមណ្ឌលគិរី ក្រោយបានទទួលស្គាល់ផ្លូវការជាផលិតផលសម្គាល់ភូមិសាស្ដ្រ នឹងធ្វើឲ្យប្រជាកសិករមានការងារធ្វើ មានចំណូលប្រចាំថ្ងៃ និងមានជីវភាពល្អប្រសើរជាងមុន។ លើសពីនេះទៀត នឹងធ្វើឲ្យពួកគាត់មានការយល់ដឹងច្បាស់ និងចូលរួមកាន់តែសកម្មថែមទៀតក្នុងការការពារ និងអភិរក្សធនធានធម្មជាតិ។នៅក្នុងពិធីសម្ពោធដាក់ឱ្យប្រើប្រាស់ជាផ្លូវការម៉ាកសម្គាល់ភូមិសាស្រ្តទំនិញ “ទឹកឃ្មុំព្រៃមណ្ឌលគិរី” កាលពីថ្ងៃទី២៧ ខែមីនា ឆ្នាំ២០២២កន្លងទៅ នៅខេត្តមណ្ឌលគិរី ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម បានមានប្រសាសន៍ថា ការចុះបញ្ជីម៉ាកសម្គាល់ភូមិសាស្រ្ត “ទឹកឃ្មុំព្រៃមណ្ឌលគិរី” គឺដើម្បីផ្តល់កិច្ចការពារកម្មសិទ្ធិបញ្ញាដល់សមាគមអភិរក្សឃ្មុំព្រៃខេត្តមណ្ឌលគិរី ដែលជាម្ចាស់ម៉ាកសម្គាល់ភូមិសាស្រ្តទំនិញ ក្រោមច្បាប់ស្តីពី ម៉ាកសម្គាល់ភូមិសាស្រ្តទំនិញនៃកម្ពុជា និងដើម្បីទប់ស្កាត់ការក្លែងបន្លំម៉ាកសម្គាល់ភូមិសាស្រ្តទំនិញ “ទឹកឃ្មុំព្រៃមណ្ឌលគិរី” នៅលើទីផ្សារជាតិ និងអន្តរជាតិ, អភិរក្សចំណេះដឹង-ចំណេះធ្វើ និងទេពកោសល្យតាមបែបប្រពៃណីរបស់ប្រជាកសិករ និងសហគមន៍ជនជាតិពូនង ក្នុងខេត្តតាមរយៈការរៀបចំចងក្រងសៀវភៅបន្ទុក និងចូលរួមអភិរក្សតំបន់ព្រៃការពារ ធនធានធម្មជាតិ និងទាក់ទាញភ្ញៀវទេសចរ។ល។គិតមកដល់ពេលនេះ ក្រសួងពាណិជ្ជកម្ម បានចុះបញ្ជីម៉ាកសម្គាល់ភូមិសាស្ត្រទំនិញ មានសក្តានុពលចំនួន៤ រួមមាន៖ “ម្រេចកំពត” “ស្ករត្នោតកំពង់ស្ពឺ” “ក្រូចថ្លុងកោះទ្រង់” និង “ទឹកឃ្មុំព្រៃមណ្ឌលគិរី” និងគ្រោងចុះបញ្ជីម៉ាកសម្គាល់ភូមិសាស្ត្រទំនិញបន្ថែមទៀត រួមមាន៖ “អំបិល និងផ្កាអំបិលកំពត” “បង្កងតាកែវ” និង “ទឹកត្រីកំពត”៕ អត្ថបទ៖ ឈិត បូរ៉ាវី

កសិករដាំមៀន នឹងដាក់ពាក្យស្នើសុំចុះបញ្ជីនៅក្រសួងកសិកម្ម ដើម្បីនាំចេញមៀនប៉ៃលិនទៅប្រទេសចិន

ភ្នំពេញ៖ បន្ទាប់ពីទទួលបានដំណឹងអំពីការទទួលពាក្យស្នើសុំការចុះបញ្ជី ដើម្បីមានលទ្ធភាពក្នុងការនាំចេញផ្លៃមៀនស្រស់ទៅកាន់ទីផ្សារប្រទេសចិននោះ ប្រជាកសិករជាច្រើនគ្រួសារក្នុងខេត្តប៉ៃលិន បានសម្តែងក្តីសាទរ និងរីករាយបំផុត ព្រមទាំងអះអាងថា នឹងធ្វើការដាក់ពាក្យស្នើសុំចុះបញ្ជីជាផ្លូវការ ដើម្បីពិនិត្យលទ្ធភាពក្នុងការនាំចេញ។លោក ស្រេង ស្រៀង សមាជិកទទួលបន្ទុកព័ត៌មានទីផ្សារសហគមន៍មៀនប៉ៃលិន នៅព្រឹកថ្ងៃទី២៨ មីនា ឆ្នាំ២០២២នេះ បានមានប្រសាសន៍ប្រាប់ទូរទស្សន៍ព័ត៌មាន ប៊ីធីវីថា ក្នុងចំណោមសមាជិក ១៩៣គ្រួសារនៃសហគមន៍ក្នុងខេត្តចំនួន៤ រួមមាន ខេត្តប៉ៃលិន បាត់ដំបង បន្ទាយមានជ័យ និងខេត្តពោធិ៍សាត់ បាននិងកំពុង ទាក់ទងនិងលើការដាក់លើពាក្យទៅកាន់ក្រសួងដើម្បីធ្វើការនាំចេញ ហើយសង្ឃឹមទៀតថា នៅប៉ុន្មានខែខាងមុខទៀតនឹងមានទីផ្សារមៀនប៉ៃលិន ពីប្រទេសកម្ពុជា ទៅទីផ្សារប្រទេសចិន។លោក សាយ សុផាត ប្រធានមន្ទីរកសិកម្ម រុក្ខាប្រមាញ់ និងនេសាទខេត្តប៉ៃលិន បានឲ្យដឹងដែរថា គិតចាប់ពីការថ្ងៃជូនដំណឹង មន្ទីរកសិកម្មខេត្ត នៅមិនទាន់មានកសិករមកទាក់ទងនៅឡើយទេ។ ប៉ុន្តែមានប្រជាកសិករជាច្រើនគ្រួសារបានចាប់អារម្មណ៍ និងរីករាយចំពោះដំណឹងដ៏ល្អនេះ ក្រោយក្រុមការងារបានចុះ និងផ្សព្វផ្សាយព័ត៌មាននេះ ជូនប្រជាពលរដ្ឋ និងប្រជាកសិករដាំដុះមៀនក្នុងខេត្ត។ ពាក់ព័ន្ធដំណឹងខាងលើនេះ លោកប្រធានមន្ទីរកសិកម្មខេត្តប៉ៃលិន និងតំណាងសហគមន៍មៀនប៉ៃលិន បានអះអាងថា នឹងបង្កើនការផ្សព្វផ្សាយព័ត៌មាន ក៏ដូចជាបង្ហាត់ បង្ហាញនូវចំណេះដឹងពាក់ព័ន្ធការដាំដុះ ថែទាំ និងបច្ចេកទេសនានាជូនដល់ប្រជាកសិករ ដើម្បីជំរុញដល់ការនាំចេញ និងបង្កើនលទ្ធភាពក្នុងការផ្គត់ផ្គង់។យោងតាមសេចក្តីជូនដំណឹងរបស់ក្រសួងកសិកម្ម រុក្ខាប្រមាញ់ និងនេសាទចុះថ្ងៃទី២៥ ខែមីនាកន្លងទៅ ពិធីសារស្តីពីលក្ខខណ្ឌតម្រូវភូតគាមអនាម័យសម្រាប់ការនាំចេញផ្លែមៀនស្រស់កម្ពុជាទៅកាន់ប្រទេសចិន ត្រូវបានចូលជាធរមាន កាលពីថ្ងៃទី១៦ ខែមីនាកន្លងទៅថ្មីៗនេះ។ អនុវត្តតាមស្មារតីកិច្ចប្រជុំកំពូលរវាងកម្ពុជាជាមួយភាគីចិន កាលពីរសៀលថ្ងៃ១៨ ខែមីនា ស្ដីពីការជំរុញការអនុវត្តនូវកិច្ចព្រមព្រៀងពាណិជ្ជកម្មសេរីរវាងកម្ពុជា និងចិន ដែលបានចូលជាធរមានសម្រាប់អ្នកមានបំណងផលិតនិងកែច្នៃវេចខ្ចប់នាំចេញផ្លែមៀនស្រស់ទៅកាន់ទីផ្សារប្រទេសចិន សូមរួសរាន់ដាក់ពាក្យស្នើសុំចុះបញ្ជីចម្ការៈ និងរោងចក្រវេចខ្ចប់ផ្លែមៀនសម្រាប់នាំចេញ នៅអគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ៕ អត្ថបទ៖ ឈិត បូរ៉ាវី

រាជរដ្ឋាភិបាល មានលទ្ធភាពគ្រប់គ្រាន់ លើការគ្រប់គ្រងហិរញ្ញវត្ថុសាធារណៈសម្រាប់កិច្ចអភិវឌ្ឍន៍ប្រទេស

ភ្នំពេញ៖ រាជរដ្ឋាភិបាល នៅតែបន្តមានលទ្ធភាពគ្រប់គ្រងស្ថានភាពហិរញ្ញវត្ថុសាធារណៈបានល្អ ដោយធានាបាននូវប្រក្រតីភាពនៃកិច្ចដំណើររបស់ក្រសួង-ស្ថាប័ននៃរាជរដ្ឋាភិបាល, ការជួយអន្តរាគមន៍ក្នុងគ្រាលំបាក និងសម្រាប់ការផ្តល់សេវាសាធារណៈគ្រប់ប្រភេទ ដើម្បីបំពេញសេចក្តីត្រូវការរបស់ប្រជាពលរដ្ឋ និងធុរកិច្ច ។ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លើកឡើងនៅក្នុងពិធីសម្ពោធដាក់ឱ្យប្រើប្រាស់ជាផ្លូវការនៃអគារ និងសមិទ្ធផលនានាក្នុងបរិវេណទីស្នាក់ការគណបក្សប្រជាជនកម្ពុជា ខេត្តកណ្តាល នៅថ្ងៃទី ២៦ ខែមីនា ឆ្នាំ២០២២ ថា កំណើនសេដ្ឋកិច្ចដ៏រឹងមាំនេះ បានរួមចំណែកពេញទំហឹង ក្នុងការផ្តល់លទ្ធភាពឱ្យរាជរដ្ឋាភិបាលបង្កើនការវិនិយោគសាធារណៈ លើហេដ្ឋារចនាសម្ព័ន្ធគ្រប់ប្រភេទ ដូចជា ទឹកស្អាត, អគ្គិសនី, ផ្លូវថ្នល់, ស្ពាន, សាលារៀន, មន្ទីពេទ្យជាដើម និង ការអភិវឌ្ឍធនធានមនុស្សព្រមទាំងកិច្ចគាំពារសង្គម តាមរយៈការកាត់បន្ថយអត្រានៃភាពក្រីក្របានលឿនជាងការរំពឹងទុក ។ពោលគឺរាជរដ្ឋាភិបាលបានពង្រឹងវិន័យថវិកា តាមរយៈការរក្សាវិន័យចំណាយ និងការចាយវាយឱ្យចំទិសដៅបំផុត និងការបង្កើនប្រសិទ្ធភាពនៃការគ្រប់គ្រងរំហូរសាច់ប្រាក់ ជាពិសេសការបើកផ្តល់ប្រាក់បៀវត្សរ៍ និងប្រាក់ឧបត្ថម្ភផ្សេងៗ បានយ៉ាងទៀងទាត់ និងទាន់ពេលវេលា ។លោក ឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានថ្លែងនូវការសាទរចំពោះរាជរដ្ឋាភិបាល ដែលបានគ្រប់គ្រង់ហិរញ្ញវត្ថុសាធារណៈបានល្អ នៅក្នុងស្ថានភាពដ៏លំបាកនេះ ដែល រាជរដ្ឋាភិបាលចំណាយថវិកាជាច្រើន សម្រាប់គាំពារសង្គមស្ទើរគ្រប់ផ្នែក ជាពិសេសការចំណាយថវិកាសម្រាប់ការស្តារ និងអភិវឌ្ឍន៍សេដ្ឋកិច្ចវិញ។សូមបញ្ជាក់ថា៖ នៅក្នុងឆ្នាំ ២០២២ នេះ រាជរដ្ឋាភិបាលនឹងបង្កើនចំណូលសរុបថវិការដ្ឋ ស្មើនឹង ៣២ ៦៧៦ ប៊ីលានរៀល ក្នុងនោះចំណូលចរន្តថ្នាក់ជាតិស្មើនឹង ២២ ១៥៧ ប៊ីលានរៀល។ ដោយឡែកចំណូលមូលធនថវិការដ្ឋ ត្រូវបានគ្រោងចំនួន ៨ ៣៨៧ ប៊ីលានរៀល, ត្រូវជិត ៧% នៃ ផ.ស.ស. មានកំណើនជាង ២៨% ធៀបនឹងច្បាប់ឆ្នាំ ២០២១ ដែលក្នុងនោះចំណូលមូលធនក្រៅប្រទេសស្មើនឹងប្រមាណ ២០% នៃចំណាយថវិការដ្ឋសរុបឆ្នាំ ២០២២ ។ ចំណែកគម្រោងចំណាយថវិការដ្ឋសម្រាប់ឆ្នាំ ២០២២ ត្រូវបានគ្រោងចំនួន ៣៤ ៧០៨ ប៊ីលានរៀល ត្រូវជិត ២៨% នៃ ផ.ស.ស. មានកំណើនជាង ៨% ធៀបនឹងច្បាប់ឆ្នាំ ២០២១៕

តម្លៃប្រេងឥន្ទនៈអាចនឹងបន្តឡើងថ្លៃ នៅថ្ងៃខាងមុខ ខណៈពិធីបុណ្យចូលឆ្នាំថ្មីនឹងមកដល់ខាងមុខ

ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានលើកឡើងថា តម្លៃប្រេងសាំងនៅកម្ពុជា អាចនឹងបន្តឡើងថ្លៃ ដែលកម្ពុជា មិនអាចគ្រប់គ្រងបានឡើយចំពោះការឡើងថ្លៃប្រេងឥន្ទនៈនេះ។សម្តេចតេជោ ហ៊ុន សែន ថ្លែងនៅក្នុងក្នុងពិធីសម្ពោធដាក់ឱ្យប្រើប្រាស់ផ្លូវជាតិលេខ៥១ តភ្ជាប់រវាងផ្លូវជាតិលេខ៤ និងផ្លូវជាតិលេខ៥ កាលពីថ្ងៃទី២៥ ខែមីនានេះថា តម្លៃប្រេងឥន្ធនៈ យើងលែងគ្រប់គ្រងបានទៀតហើយ ហើយក៏មិនដឹងថា នៅពេលពិធីបុណ្យចូលឆ្នាំថ្មីខាងមុខ ប្រេងសាំងនឹងឡើងដល់តម្លៃប៉ុន្មាននោះដែរ។សម្តេចបញ្ជាក់ថា បញ្ហាប្រេងសាំងនេះ ក៏ពាក់ព័ន្ធនឹងការសប្បាយរីករាយរបស់ប្រជាពលរដ្ឋផងដែរ។តម្លៃប្រេងឥន្ទនៈនៅកម្ពុជា បានហក់ឡើងថ្លៃ ជាបន្តបន្ទាប់ ដោយសារតម្លៃប្រេងនៅទីផ្សារអន្តរជាតិ កើនឡើង ដែលកើតចេញពីវិបត្តិសង្រ្គាម រុស្ស៉ី-អ៊ុយក្រែន។យោងតាមតម្លៃប្រេងសាំងលក់រាយ នៅទីផ្សារក្នុងស្រុកបច្ចុប្បន្ន គឺប្រេងសាំងធម្មតា មានតម្លៃ ៥ ៣០០ រៀល ក្នុងមួយលីត្រ និងប្រេងម៉ាហ្សូត ថ្លៃ ៥ ៣០០ រៀល ក្នុងមួយលីត្រ។ជំរុញការឡើងថ្លៃប្រេងនេះ អន្តរក្រសួង បានសម្រេចធ្វើការគណនាតម្លៃប្រេងលក់រាយ នៅរៀងរាល់១០ថ្លៃម្តង ដើម្បីកំណត់តម្លៃប្រេងឥន្ទនៈ ទៅតាមការប្រែប្រួលតម្លៃប្រេងនៅលើទីផ្សារអន្តរជាតិ៕ អត្ថបទ៖ វណ្ណៈ

ការប្រយុទ្ធប្រឆាំងការសម្អាតប្រាក់រាជរដ្ឋាភិបាល បាននិងកំពុងផ្តល់ទំនុកចិត្តដល់អ្នកវិនិយោគ

ភ្នំពេញ៖ ប្រសិទ្ធភាពនៃការទប់ស្កាត់ និងប្រយុទ្ធប្រឆាំងការសម្អាតប្រាក់រាជរដ្ឋាភិបាល បានផ្តល់នូវស្ថិរភាពសន្តិសុខសង្គម ជាពិសេសការផ្តល់នូវទំនុកចិត្តដល់អ្នកវិនិយោគក្នុងស្រុក និងកំពុងទាក់ទាញដល់វិនិយោគិន និងធុរកិច្ចដែលមានបំណងមកវិនិយោគនៅកម្ពុជាបន្ថែម ។លោកឧកញ៉ា លឹម ហេង អនុប្រធានសភាពពាណិជ្ជកម្មកម្ពុជា ថ្លែងលើកឡើងក្នុងកិច្ចសម្ភាសន៍ជាមួយភ្នាក់ងារអ្នកយកព័ត៌មាន BTV នៅថ្ងៃទី ២៥ ខែ មីនា ឆ្នាំ ២០២២ ថា ជុំវិញការប្រឆាំងសម្អាតប្រាក់នេះ វាមានសារៈសំខាន់ណាស់ ប្រទេសណាក៏មានច្បាប់ដើម្បីប្រឆាំងនឹងការសម្អាតប្រាក់ ក្នុងនោះមានកត្តាជាច្រើនដែលត្រូវទប់ស្កាត់ដូចជាការជូញដូរគ្រឿងញៀន និងការចាប់ជម្រិតជាដើម គឺជាប្រាក់ដែលមិនស្អាតស្អំ ជាពិសេសការកឹកកេងពន្ធរដ្ឋ សម្រាប់អ្នករកស៊ីទទួលទាន ប្រសិនបើយើងមិនបានអនុវត្តឲ្យបានត្រឹមត្រូវ នឹងធ្វើឲ្យការប្រកួតប្រជែងគ្មានតម្លាភាព និងមិនមានស្មើរភាពគ្នា។លោកឧកញ៉ា បន្តថា ជុំវិញបញ្ហាការសម្អាតប្រាក់នេះ ប្រសិនអនុវត្តច្បាប់ និងទប់ស្កាត់ប្រកបដោយដោយប្រសិទ្ធភាព នឹងអាចបំបាត់បាននូវមុខរបរទុច្ចរិត ដែលជាបច្ច័យល្អនៃការផ្តល់ទំនុកចិត្តដល់អ្នករកស៊ីទទួលទាន ជាពិសេសជាការជម្រុញទាក់ទាញ បន្ថែមដល់វិនិយោគិន និងធុរកិច្ចផ្សេងៗ ដែលមានបំណងវិនិយោគនៅកម្ពុជា ។ចំណែកលោកបណ្ឌិត អ៊ិន ចាន់នី ប្រធានសមាគមធនាគារនៅកម្ពុជា មើលឃើញថា រាជរដ្ឋាភិបាល មានវិធានគ្រប់គ្រាន់ ជាពិសេសស្ថាប័នធនាគារជាតិនៃកម្ពុជា បានដាក់ចេញនៃការទប់ស្កាត់ និងសេចក្តីណែនាំលម្អិតជាច្រើន ក្នុងនោះគ្រឹះស្ថានហិរញ្ញវត្ថុក៏មានប្រព័ន្ធតាមដានផងដែរ ដោយមិនត្រឹមតែគ្រប់គ្រងអតិថិជនរបស់ធនាគារប៉ុណ្ណោះទេ គឺគ្រប់គ្រងតាមដានរហូតដល់អតិថិជនរបស់អតិថិជនធនាគារថែមទៀត។លោក គង់ សុខហេង អនុប្រធាននាយកដ្ឋានស៊ើបអង្កេតបទល្មើសពន្ធដារ បានបញ្ជាក់នៅក្នុងសិក្ខាសាលាបណ្តុះបណ្តាលស្តីពីនិយាមនីតិវិធីប្រតិបត្តិការ សម្រាប់អង្កេតបទល្មើសពន្ធដារ និងបទល្មើសសម្អាតប្រាក់ថា អគ្គនាយកដ្ឋានពន្ធដារបានរៀបចំ និយាមនីតិវិធីប្រតិបត្តិការ, សៀវភៅណែនាំការស៊ើបអង្កេត, លក្ខខណ្ឌតម្រូវអប្បរមា និងការផ្តល់ធាតុចូលពីក្រុមការងារពាក់ព័ន្ធ។ ក្រៅពីនេះ ការដាក់ចេញ និយាមនីតិវិធីប្រតិបត្តិការ គឺដើម្បីលើកកម្ពស់ប្រសិទ្ធភាពការស៊ើបអង្កេតបទល្មើសកម្រិតជំនាញវិជ្ជាជីវៈ និងការរក្សាសម្ងាត់របស់មន្រ្តីស៊ើបអង្កេត ក្នុងនោះប្រភពនៃករណីសង្ស័យ អគ្គនាយកដ្ឋាននឹងកសាងសំណុំរឿង ដើម្បីអនុវត្តលើវិធានការណ៍ភ្លាមៗ៕ អត្ថបទ៖ សុន រ៉ាឌី

ធនធានមនុស្សនៅក្នុងវិស័យសាធារណៈ ជាឆ្អឹងខ្នងរបស់រាជរដ្ឋាភិបាល

ភ្នំពេញ៖ មន្រ្តីជាន់ខ្ពស់ក្រសួងសេដ្ឋកិច្ចថា ធនធានមនុស្សនៅក្នុងវិស័យសាធារណៈ គឺជាឆ្អឹងខ្នងរបស់រាជរដ្ឋាភិបាល នៅក្នុងការផ្តល់សេវាសាធារណៈ ប្រកបដោយគុណភាព, ប្រសិទ្ធភាព និងទាន់ពេលជូនប្រជាជន ដោយឈរលើគោលការណ៍ ស្អាតស្អំ និងមានប្រសិទ្ធភាពខ្ពស់ ។ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លើកឡើងនៅក្នុងពិធីបិទសន្និបាតបូកសរុបលទ្ធផលការងារក្រសួងមុខងារសាធារណៈ ប្រចាំឆ្នាំ ២០២០-២០២១ និងលើកទិសដៅការងារសម្រាប់ឆ្នាំ ២០២២ នេះថា ពាក់ព័ន្ធទៅនឹងប្រសិទ្ធភាពនៃវិស័យសាធារណៈ ក្នុងនោះធនធានមនុស្សនៅក្នុងវិស័យនេះ គឺជាឆ្អឹងខ្នងរបស់រាជរដ្ឋាភិបាល នៅក្នុងការផ្តល់សេវាសាធារណៈ ប្រកបដោយគុណភាព, ប្រសិទ្ធភាព និងទាន់ពេល ជូនប្រជាជន ។ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ជំរុញក្រសួងមុខងារសាធារណៈ បន្តអនុវត្ត និងពង្រឹងគោលការណ៍ គុណាធិបតេយ្យ នៅក្នុងការជ្រើសរើសមន្រ្តី និងទាក់ទាញធនធានមនុស្ស ដែលប្រកបដោយសមត្ថភាព ។ ក្រសួងមុខងារសាធារណៈក៏ត្រូវពង្រឹងការបណ្តុះបណ្តាល និងការកសាងសមត្ថភាពរបស់មន្រ្តីរាជការស៊ីវិល, ទាំងមន្រ្តីថ្មី និងមន្រ្តីកំពុងបម្រើការការងារ, តាមរយៈការសិក្សានៅក្នុងសាលាភូមិន្ទរដ្ឋបាល និងកម្មវិធីផ្សេងទៀត សំដៅបំប៉ន និងពង្រឹងសមត្ថភាពរបស់មន្រ្តី ដើម្បីបំពេញតួនាទី និងផ្តល់សេវាសាធារណៈ ប្រកបដោយគុណភាព, ប្រសិទ្ធភាព, ការទទួលខុសត្រូវ និងវិជ្ជាជីវៈខ្ពស់ ។ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន លើកឡើងបន្តថា នៅក្នុងយុគសម័យនៃសមាហរណកម្មក្នុងតំបន់ និងពិភពលោក ដែលប្រទេសទាំងអស់មានអន្តរសកម្មខ្ពស់រវាងគ្នា, ទាំងផ្នែកនយោបាយ និងសេដ្ឋកិច្ច, ស្ថានភាពសង្គម-សេដ្ឋកិច្ចរបស់កម្ពុជា នឹងមានការប្រែប្រួលជានិច្ច ដែលទាមទារឱ្យវិស័យសាធារណៈរបស់កម្ពុជា មានលទ្ធភាពក្នុងការបត់បែនជាប្រចាំ ជាពិសេសតាមរយៈស្មារតីបុរេសកម្មរបស់មន្រ្តីរាជការស៊ីវិលគ្រប់រូប នៅក្នុងការស្វែងយល់ដោយខ្លួនឯង អំពីនិន្នាការសកល និងបច្ច័យរបស់និន្នាការទាំងនេះមកលើប្រទេស និង ប្រជាជនកម្ពុជា ។ ក្នុងបរិការណ៍នៃការងើបឡើងវិញរបស់ពិភពលោកនៅក្រោយវិបត្តិនៃជំងឺកូវីដ-១៩, គុណភាពនៃវិស័យសាធារណៈ របស់កម្ពុជា ជាពិសេសនៅក្នុងក្របខណ្ឌនៃការសម្រួលធុរកិច្ច និងការវិនិយោគ គឺជាលក្ខណៈវិនិច្ឆ័យដ៏សំខាន់ ក្នុងការលើកកម្ពស់ភាពទាក់ទាញរបស់កម្ពុជា ខណៈដែលកម្ពុជាត្រូវប្រកួតប្រជែងជាមួយប្រទេសដទៃទៀត នៅក្នុងតំបន់ ដើម្បីស្រូបយកនូវរំហូរនៃទុនវិនិយោគ៕ អត្ថបទ៖ សុន រ៉ាឌី

ធនាគារអភិវឌ្ឍន៍ជនបទ និងកសិកម្ម ផ្សព្វផ្សាយគោលការណ៍ឥណទានពិសេស ដល់សមាគមមៀនប៉ៃលិន

ប៉ៃលិន៖ ធនាគារអភិវឌ្ឍន៍ជនបទ និងកសិកម្ម បានបន្តចុះផ្សព្វផ្សាយគោលការណ៍ឥណទានពិសេស របស់រាជរដ្ឋាភិបាល ដំណាក់កាលទី២ ជូនដល់សមាជិកសមាគមមៀនប៉ៃលិន។ឯកឧត្តម កៅ ថាច ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃធនាគារអភិវឌ្ឍន៍ជនបទ និងកសិកម្ម និងសហការី នាល្ងាចថ្ងៃទី២៣ ខែមីនា ឆ្នាំ២០២២ បានបន្តចុះផ្សព្វផ្សាយគោលការណ៍ឥណទានពិសេស របស់រាជរដ្ឋាភិបាល ដំណាក់កាលទី២ ជូនដល់សមាជិកសមាគមមៀនប៉ៃលិន។ថ្លែងក្នុងពិធីសំណេះសំណាលឯកឧត្តម កៅ ថាច បានធ្វើការរំលឹកជូនអំពីសវតា នៃគម្រោងហិរញ្ញប្បទានពិសេស របស់រាជរដ្ឋាភិបាល ដំណាក់កាលទី១ចំនួន ៥០ លានដុល្លារអាមេរិក តាមរយៈធនាគារអភិវឌ្ឍន៍ជនបទ និងកសិកម្ម និងបានជម្រាបបន្ថែមអំពីគោលដៅនៃគម្រោងហិរញ្ញប្បទាន ចំនួន៥០លានដុល្លារ ដំណាក់កាលទី២នេះផងដែរ។លោកបណ្ឌិត បានធ្វើការពន្យល់ពី គោលការណ៍ឥណទាន ក្នុងគម្រោងឥណទានពិសេសនេះ អំពីទ្រព្យធានាបំណុល ដើម្បីទទួលបានឥណទានថ្មី ឬឥណទានបន្ថែម និង អំពីលក្ខខណ្ឌមួយចំនួនសម្រាប់សមាជិកសមាគមមៀនប៉ៃលិន ចាំបាច់ត្រូវបំពេញ ដើម្បីចូលក្នុងលក្ខខណ្ឌទទួលបានឥណទាន។ បន្ថែមលើនេះ ឯកឧត្តម បានលើកយកព័ត៌មានទីផ្សារជាពិសេសលើបញ្ហាមៀនប៉ៃលិនផងដែរ។ឯកឧត្តម បានធ្វើការផ្តាំផ្ញើដល់សមាជិកសមាគម សូមមានផែនការច្បាស់លាស់ និងក្តាប់ឲ្យបានព័ត៌មានទីផ្សារ និងជាពិសេសត្រូវចុះបញ្ជីប្រព័ន្ធ GAP ឲ្យបានរួចរាល់ ដើម្បីមានលទ្ធភាពអាចធ្វើការលក់ចេញទៅក្រៅប្រទេសបាន ជាពិសេសទីផ្សារប្រទេសចិន។ជាមួយគ្នានេះ ឯកឧត្តម បានធ្វើការប្រគល់ជូនវត្ថុអនុស្សាវរីយ៍ ជូនដល់កសិករគំរូ នូវទូរស័ព្ទក្នុងម្នាក់ចំនួន១គ្រឿង ដែលបានប្រើប្រាស់ឥណទានចំគោលដៅ និងពង្រីកអាជីវកម្មឲ្យមានកំណើន។លោក ស្រេង ស្រៀង ប្រធានក្រុមប្រឹក្សាភិបាលសមាគមមៀនប៉ៃលិន បានលើកឡើងថា ជុំវិញការដាំដុះមៀននេះ ប្រជាកសិករនៅក្រៅ និងក្នុងសមាគម បានយកចិត្តទុកដាក់ខ្ពស់នៅលើការដាំដុះ ដែលបច្ចុប្បន្នកសិករទាំងនោះកំពុងអនុវត្តតាមការណែនាំរបស់ក្រសួងកសិកម្ម រុក្ខាប្រមាញ់ និងនេសាទ និងអង្គការដៃគូផ្សេងៗទៀត លើគម្រោងការដាំដុះកសិកម្មល្អ ក្នុងនោះមានប្រជាកសិករមួយចំនួន បានទទួលវិញ្ញាបនបត្ររួចហើយ ចំណែកសិករដែលមិនទាន់ទទួលវិញ្ញាបនបត្រ ពួគគាត់កំពុងខិតខំប្រឹងប្រែងជម្រុញការដាំដុះ ឲ្យស្របតាមកសិកម្មល្អផងដែរ។យោងតាកក្រសួងកសិកម្ម រុក្ខាប្រមាញ់ និងនេសាទ មកដល់ពេលនេះ ពិធីសារបច្ចេកទេសរវាងកម្ពុជា-ចិន បានឯកភាពជាគ្នារួចរាល់ហើយ គឺនៅរង់ចាំតែថ្ងៃចុះហត្ថលេខាប៉ុណ្ណោះ។ ក្នុងនោះបន្ទាប់ពីការចុះហត្ថលេខារួច កម្ពុជានឹងបញ្ជូនរបាយការណ៍ពាក់ព័ន្ធទៅភាគីចិនភ្លាម ដើម្បីឲ្យភាគីចិនវាយតម្លៃអំពី របាយការណ៍នោះ ដូច្នេះយើងរំពឹងថា យ៉ាងយូរ ២ ខែទៀត កម្ពុជានឹងអាចនាំចេញមៀនប៉ៃលិន ទៅកាន់ទីផ្សារចិនបាន តែចំពោះការយឺត ឬលឿន គឺវាស្រ័យទៅលើភាគីចិនផងដែរ៕អត្ថបទ៖ វណ្ណៈ

បណ្ដាញសង្គម

ព័ត៌មានថ្មីៗ

ចិនចាប់ផ្តើមសាងសង់ទំនប់វារីអគ្គិសនីធំជាងគេបំផុតរបស់ពិភពលោកនៅតំបន់ទីបេតិ៍

គណៈកម្មាធិការស្វែងរកការពិតស៊ីរី រាយការណ៍ថា មនុស្ស ១.៤២៦នាក់ ត្រូវបានសម្លាប់អំឡុងអំពើហិង្សាក្នុងខែមីនា

ជនប៉ាឡេស្ទីននៅទីក្រុងហ្កាហ្សានិយាយថា ពួកគេពុំបានបរិភោគអស់រយៈពេល ៥ថ្ងៃមកហើយ

រដ្ឋមន្ត្រីសុខាភិបាល «អ្នកដឹកនាំសុខាភិបាល ស្ថិតនៅជាប់ជានិច្ចជាមួយមន្រ្តីរបស់ខ្លួន ឈរលើគោលដៅសម្រេចឱ្យបានជោគជ័យក្នុងការបម្រើសេវាជូនប្រជាពលរដ្ឋ និងលើកកិត្តិយសវិជ្ជាជីវៈសុខាភិបាលទាំងមូល»

ផ្សារសមាគមខ្មែរកំពុងស្រូបយកផលិតផលកែច្នៃក្នុងស្រុក គាំទ្រដល់ការរីកចម្រើនរបស់សហគ្រិន

រលកកម្តៅធ្ងន់ធ្ងរនៅតំបន់បាល់កង់ បណ្តាលឲ្យមានភ្លើងឆេះព្រៃនៅប្រទេសប៊ុលហ្គារី និងអាល់បានី

ប្រេសិតពិសេសសហរដ្ឋអាមេរិកជួបជាមួយប្រធានសភាលីបង់នៅទីក្រុងបេរូត

រដ្ឋមន្រ្តីសុខាភិបាល «យុទ្ធសាស្ត្រមួយល្អ លុះត្រាតែយុទ្ធសាស្រ្តនោះត្រូវបានយកទៅអនុវត្តជាក់ស្តែងបាន ដេីម្បីសម្រេចគោលដៅតាមការគ្រោងទុក»

ទូតឥណ្ឌូនេស៊ីកោតសរសើរកម្ពុជា ចំពោះការគ្រប់គ្រងវិស័យព័ត៌មាន និង សោតទស្សន៍

គម្រោង Golden Dome របស់លោក Trump ស្វែងរកជម្រើសជំនួស SpaceX របស់លោក Musk

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

សេដ្ឋកិច្ច និង កសិកម្ម

០១-១០ខែមេសា ប្រេងសាំងធម្មតាតម្លៃ ៥.២៥០រៀល/លីត្រ និងប្រេងម៉ាស៊ូត ៥.៣០០រៀល/លីត្រ

កម្ពុជាពន្លឿនរៀបចំគោលនយោបាយអភិវឌ្ឍន៍កសិកម្ម ដើម្បីជំរុញលើកកម្ពស់វិស័យកសិកម្ម

ភ្លៀងកក់ខែមួយមេយ៉ាងធំ ពលរដ្ឋនាំគ្នាចាប់សត្វហ៊ីងមកធ្វើទទួលទាន និងខ្លះទៀត​យក​ទៅ​លក់លើទីផ្សារ

ទឹកឃ្មុំព្រៃមណ្ឌលគិរី ចុះ​បញ្ជី​ជាផលិតផល​សម្គាល់ភូមិសាស្រ្ត​ នឹង​ជួយ​បង្កើន​ចំណូល​ដល់កសិករ

កសិករដាំមៀន នឹងដាក់ពាក្យស្នើសុំចុះបញ្ជីនៅក្រសួងកសិកម្ម ​ដើម្បីនាំចេញមៀនប៉ៃលិន​ទៅ​ប្រទេសចិន