BTV NEWS

សម្តេចធិបតី ណែនាំឱ្យក្រសួងស្ថាប័នពាក់ព័ន្ធត្រៀមឆ្លើយតបជាមួយបាតុភូតធម្មជាតិ El Niño ដែលកម្ពុជាកំពុងទទួលរងឥទ្ធិពល

សម្ដេចធិបតីណែនាំអាជ្ញាធរពាក់ព័ន្ធគ្រប់លំដាប់ថ្នាក់ ត្រួតពិនិត្យ និងគ្រប់គ្រងឱ្យបានចំពោះទំនិញគេចពន្ធ និងខូចគុណភាព ហើយត្រូវសហការគ្នាចាត់វិធានការឱ្យបានច្បាស់លាស់

សម្ដេចធិបតីក្រើនរំឭកអាជ្ញាធរពាក់ព័ន្ធគ្រប់លំដាប់ថ្នាក់ត្រូវបន្តបង្ក្រាប Online Scams មិនត្រូវបន្ធូរដៃឡើយ

សម្ដេចតេជោ ហ៊ុន សែន អញ្ជើញជួបពិភាក្សាទ្វេភាគីជាមួយ ឯកឧត្តម លី ឈាង នាយករដ្ឋមន្ត្រីចិន

ព័ត៌មានសំខាន់ៗ

ទូកដឹកជនភៀសខ្លួនរ៉ូហ៊ីងយ៉ាប្រមាណ ១៨០នាក់មកដល់ប្រទេសឥណ្ឌូនេស៊ី

ឥណ្ឌូនេស៊ី៖ ទូកដឹកជនភៀសខ្លួនរ៉ូហ៊ីងយ៉ា ១៨៥នាក់បានមកដល់ឆ្នេរសមុទ្រនៅទីក្រុងអាឆេ (Aceh) ប្រទេសឥណ្ឌូនេស៊ីកាលពីថ្ងៃចន្ទ មួយថ្ងៃបន្ទាប់ពីទូកមួយគ្រឿងផ្សេងទៀតដឹកជនជាតិរ៉ូហ៊ីងយ៉ា ៥៧នាក់បានមកដល់ខេត្តនេះ បន្ទាប់ពីបានអណ្តែតជិតមួយខែនៅលើសមុទ្រ។ ទូកពីរគ្រឿងផ្សេងទៀតដែលដឹកជនជាតិរ៉ូហ៊ីងយ៉ាសរុប ២៣០នាក់បានចូលចតនៅខេត្តអាឆេ (Aceh) កាលពីខែមុន ខណៈកងទ័ពជើងទឹករបស់ប្រទេសស្រីលង្កាបានជួយសង្គ្រោះជនជាតិរ៉ូហ៊ីងយ៉ា ១០៤នាក់ក្នុងខែនេះ។ ក្រុមសិទ្ធិមនុស្សបានប៉ាន់ប្រមាណថា ចំនួនប្រជាជនរ៉ូហ៊ីងយ៉ាដែលចាកចេញពីប្រទេសបង់ក្លាដែស តាមទូកនៅឆ្នាំនេះបានកើនឡើងជាង ៥ដងធៀបនឹងឆ្នាំមុនមានចំនួនដល់ជិត ២,៤០០នាក់។ វាមិនច្បាស់នោះទេថា តើការដកវិធានការរឹតត្បិតវីរុស COVID-19 នៅក្នុងតំបន់អាស៊ីអាគ្នេយ៍ដែលជាគោលដៅពេញចិត្ត បានបណ្តាលឱ្យមនុស្សជាច្រើនប្រញាប់ប្រញាល់មកកាន់តំបន់នេះ។ ជនជាតិរ៉ូហ៊ីងយ៉ាជិត ១លាននាក់មកពីសហភាពមីយ៉ាន់ម៉ា កំពុងរស់នៅកន្លែងដែលមានមនុស្សច្រើនក្នុងប្រទេសបង់ក្លាដែសដែលភាគច្រើនជាជនមូស្លីម រួមទាំងរាប់ម៉ឺននាក់ដែលបានភៀសខ្លួនចេញពីប្រទេសកំណើតរបស់ពួកគេ បន្ទាប់ពីយោធារបស់ប្រទេសបានបង្ក្រាបដ៏ឃោរឃៅកាលពីឆ្នាំ២០១៧។ នៅសហភាពមីយ៉ាន់ម៉ាដែលភាគច្រើនកាន់សាសនាព្រះពុទ្ធ ជនជាតិរ៉ូហ៊ីងយ៉ាត្រូវបានបដិសេធមិនផ្តល់សញ្ជាតិ ហើយត្រូវបានគេមើលឃើញថា ជាជនអន្តោប្រវេសន៍ខុសច្បាប់មកពីអាស៊ីខាងត្បូង៕អត្ថបទ៖ ប៊ុនថន

អង្គការសហប្រជាជាតិជួបក្រុមតាលីបង់ និងជំរុញឲ្យកែប្រែបម្រាមមិនឲ្យស្ដ្រីធ្វើការក្នុងអង្គការក្រៅរដ្ឋាភិបាល

អាហ្វហ្គានីស្ថាន៖ យោងតាមសេចក្ដីថ្លែងការណ៍កាលពីថ្ងៃចន្ទ ប្រធានស្ដីទីនៃបេសកកម្មរបស់អង្គការសហប្រជាជាតិប្រចាំនៅប្រទេសអាហ្វហ្គានីស្ថាន បានប្រាប់រដ្ឋមន្ត្រីសេដ្ឋកិច្ចស្ដីទីរបស់រដ្ឋបាលតាលីបង់ ឲ្យកែប្រែការសម្រេចក្នុងការហាមប្រាមស្ត្រីមិនឲ្យចូលបម្រើ នៅតាមបណ្ដាអង្គការក្រៅរដ្ឋាភិបាលអំឡុងកិច្ចប្រជុំ។ បេសកកម្មផ្ដល់ជំនួយសម្រាប់អាហ្វហ្គានីស្ថានហៅកាត់ថា UNAMA បាននិយាយក្នុងសេចក្ដីថ្លែងការណ៍ថា ជនជាតិអាហ្វហ្គានីស្ថានរាប់លាននាក់ត្រូវការជំនួយមនុស្សធម៌ ហើយការដកបម្រាមនេះគឺជារឿងសំខាន់ ដោយបន្ថែមថា ប្រធានស្ដីទី និងជាអ្នកសម្របសម្រួលជំនួយមនុស្សធម៌ របស់បេសកកម្មផ្ដល់ជំនួយសម្រាប់អាហ្វហ្គានីស្ថានលោក Ramiz Alakbarov បានជួបរដ្ឋមន្ត្រីសេដ្ឋកិច្ចរបស់ក្រុមតាលីបង់គឺលោក Mohammad Hanif។ ក្រសួងសេដ្ឋកិច្ចអាហ្វហ្គានីស្ថានបានបញ្ជាឲ្យអង្គការក្រៅរដ្ឋាភិបាលនានា ក្នុងស្រុក និងបរទេសមិនឲ្យទទួលយកស្ត្រីធ្វើជាបុគ្គលិករហូតមានការជូនដំណឹងបន្ថែម។ បទបញ្ជានានាពុំបានដាក់ជូនដោយផ្ទាល់ទៅអង្គការសហប្រជាជាតិជាតិទេ ប៉ុន្តែភាគច្រើននៃកម្មវិធីរបស់ខ្លួនត្រូវបានអនុវត្តន៍ដោយអង្គការក្រៅរដ្ឋាភិបាល ដែលបានដាក់គោលទៅលើបទបញ្ជានោះ។ កាលពីចុងសប្ដាហ៍មុននេះ សហភាពអឺរ៉ុប សហរដ្ឋអាមេរិក និងប្រទេសជាច្រើនលើពិភពលោកបានថ្កោលទោសក្រុមតាលីបង់ ចំពោះបម្រាមមិនឲ្យស្ត្រីចូលបម្រើការងារតាមស្ថាប័នអង្គការក្រៅរដ្ឋាភិបាលនានា នៅក្នុងប្រទេសអាហ្វហ្គានីស្ថាន និងបាននិយាយថា បម្រាមនេះប៉ះពាល់ដល់ដំណើរការផ្ដល់ជំនួយក្នុងប្រទេសនេះ។ ជាមួយគ្នានោះក្រុមមន្ត្រីមកពីអង្គការសហប្រជាជាតិ និងអង្គការក្រៅរដ្ឋាភិបាលរាប់សិបស្ថាប័នបានជួបពិភាក្សាគ្នា អំពីស្ថានភាពនេះក្នុងទីក្រុងកាប៊ុលប្រទេសអាហ្វហ្គានីស្ថាន៕ អត្ថបទ៖ សុខមាន

ប្រធានាធិបតី Xi ជំរុញឱ្យមានវិធានការការពារអាយុជីវិត ខណៈប្រទេសចិនប្រយុទ្ធរលក COVID-19

ចិន៖ ប្រធានាធិបតីចិនលោក Xi Jinping កាលពីថ្ងៃចន្ទបានជំរុញឱ្យក្រុមមន្ត្រីចាត់វិធានការដើម្បីការពារអាយុជីវិត នៅក្នុងសុន្ទរកថាជាសាធារណៈលើកដំបូងរបស់លោកស្តីពីជំងឺ COVID-19 ចាប់តាំងពីទីក្រុងប៉េកាំងបានបន្ធូរបន្ថយវិធានការទប់ស្កាត់យ៉ាងខ្លាំងនៅក្នុងខែនេះ។ ដោយភាគច្រើនបានកាត់ផ្តាច់ចេញពីពិភពលោកទាំងមូលក្នុងអំឡុងពេលជំងឺរាតត្បាត ពេលនេះប្រទេសចិនកំពុងជួបប្រទះការកើនឡើងករណីឆ្លងវីរុសច្រើនបំផុត បន្ទាប់ពីបានដកចេញវិធានការរឹតត្បិតភ្លាមៗដែលបានធ្វើឲ្យប៉ះពាល់ដល់សេដ្ឋកិច្ច។ ការសិក្សាបានប៉ាន់ប្រមាណថា មនុស្សប្រហែល ១លាននាក់អាចស្លាប់ក្នុងរយៈពេលពីរទៅបីខែខាងមុខនេះ។ បច្ចុប្បន្នប្រជាជនជាច្រើនកំពុងប្រឈមនឹងការខ្វះខាតថ្នាំពេទ្យ ខណៈអគារពេទ្យសង្គ្រោះបន្ទាន់ចង្អៀតដោយលំហូរនៃអ្នកជំងឺវ័យចំណាស់ដែលមិនបានចាក់វ៉ាក់សាំង។ យោងតាមទូរទស្សន៍រដ្ឋ CCTV បានឲ្យដឹងថា លោក Xi បាននិយាយនៅក្នុងការណែនាំថា ពេលបច្ចុប្បន្ននេះការបង្ការ និងគ្រប់គ្រងវីរុស COVID-19 នៅក្នុងប្រទេសចិនកំពុងប្រឈមមុខនឹងស្ថានភាពថ្មី និងភារកិច្ចថ្មី។ លោក Xi និយាយថា យើងគួតែចាប់ផ្តើមយុទ្ធនាការសុខភាពជាតិ ក្នុងមធ្យោបាយមានទិសដៅ ពង្រឹងបណ្តាញការពារសហគមន៍សម្រាប់ការបង្ការ និងគ្រប់គ្រងជំងឺរាតត្បាត និងការពារជីវិតមនុស្ស សុវត្ថិភាព និងសុខភាពប្រកបដោយប្រសិទ្ធភាព។ មន្ទីរពេទ្យ និងទីបូជាសពនៅទូទាំងប្រទេសបាននឹងកំពុងពេញទៅដោយអ្នកជំងឺ និងជនរងគ្រោះជំងឺ COVID-19 ខណៈគណៈកម្មការសុខភាពជាតិរបស់ប្រទេសចិនកាលពីថ្ងៃអាទិត្យបានប្រកាសថា ខ្លួននឹងបញ្ឈប់ការចេញផ្សាយស្ថិតិនៃករណីឆ្លងឆ្លង និងអ្នកស្លាប់ប្រចាំថ្ងៃនៅទូទាំងប្រទេស។ ទីក្រុងប៉េកាំងបានទទួលស្គាល់ថា ទំហំនៃការផ្ទុះឡើងវីរុសគឺមិនអាចធ្វើទៅបានក្នុងការតាមដាន បន្ទាប់ពីបញ្ចប់ការធ្វើតេស្តទ្រង់ទ្រាយធំជាកាតព្វកិច្ច ដោយសារប្រជាជនពុំប្រកាសលទ្ធផលតេស្តជាកាតព្វកិច្ចដល់អាជ្ញាធរ៕អត្ថបទ៖ ប៊ុនថន

មនុស្ស ១៣នាក់ស្លាប់ក្នុងគ្រោះជំនន់ទឹកភ្លៀង ខណៈរំខានដល់ការប្រារព្ធពិធីបុណ្យណូអែលនៅហ្វីលីពីន

ហ្វីលីពីន៖ ក្រុមអាជ្ញាធរហ្វីលីពីនកាលពីថ្ងៃចន្ទបានរាយការណ៍ថា មនុស្សយ៉ាងហោចណាស់ ១៣នាក់បានស្លាប់ដោយសារទឹកជំនន់បណ្ដាលមកពីភ្លៀងធ្លាក់ខ្លាំងនៅក្នុងខេត្តមួយចំនួនភាគខាងត្បូង ខណៈការប្រារព្ធពិធីបុណ្យណូអែលត្រូវបានរំខាន សម្រាប់មនុស្សរាប់ពាន់នាក់ដែលត្រូវបានបង្ខំឲ្យជម្លៀសចេញពីលំនៅឋាន។រូបភាពនៅតាមបណ្ដាញសង្គមបង្ហាញពីក្រុមបុគ្គលិកសង្គ្រោះ កំពុងជួយប្រជាពលរដ្ឋចេញពីទឹកជំនន់ជម្រៅត្រឹមទ្រូង បង្កឡើងដោយភ្លៀងធ្លាក់ខ្លាំង ២ថ្ងៃជាប់គ្នានៅភាគកណ្ដាល និងខាងត្បូងប្រទេសហ្វីលីពីន។ ក្នុងការសរុបចំនួនជនរងគ្រោះចុងក្រោយរបស់ខ្លួន ទីភ្នាក់ងារគ្រោះមហន្តរាយជាតិបានរាយការណ៍អ្នកស្លាប់ចំនួន ១៣នាក់ភាគច្រើនបានស្លាប់ដោយសារលង់ទឹក ខណៈមនុស្ស ២៣នាក់នៅតែបាត់ខ្លួននៅឡើយ។ ក្នុងចំណោមអ្នកស្លាប់ទាំងនោះភាគច្រើនរស់នៅតាមតំបន់ភ្នំ និងខេត្ត Misamis Occidental ស្ថិតនៅតំបន់ឆ្នេរសមុទ្រ។ទិន្នន័យពីក្រសួងសុខុមាលភាពសង្គមបានបង្ហាញកាលពីថ្ងៃចន្ទថា មនុស្សជិត ៤៦.០០០នាក់កំពុងស្នាក់នៅក្នុងមជ្ឈមណ្ឌលបណ្ដោះអាសន្ន។ ប្រជាពលរដ្ឋម្នាក់រស់នៅក្នុងខេត្ត Misamis Occidental បានប្រាប់វិទ្យុ DZRH ថា យើងត្រូវការអាហារ។ ផ្ទះសម្បែង និងសត្វចិញ្ចឹមរបស់យើងហូរកួចទៅតាមទឹកជំនន់អស់ហើយ គ្មានសល់អ្វីទេ សូម្បីតែសម្លៀកបំពាក់៕អត្ថបទ៖ សុខមាន

អ្នកស្លាប់ដោយសារព្រិលធ្លាក់ខ្លាំងនៅជប៉ុនកើនឡើងដល់ ១៧នាក់ និង ៩៣នាក់រងរបួស

ជប៉ុន៖ មនុស្សចំនួន ១៧នាក់នៅក្នុងប្រទេសជប៉ុនបានស្លាប់ និង ៩៣នាក់រងរបួសដោយសារព្រិលធ្លាក់ខ្លាំង។ ចំនួននេះទទួលបានពីទីភ្នាក់ងារពន្លត់អគ្គិភ័យ និងគ្រប់គ្រងគ្រោះមហន្តរាយជាតិរបស់ជប៉ុនកាលពីព្រឹកថ្ងៃចន្ទ។ កាលពីថ្ងៃសៅរ៍ចុងសប្ដាហ៍កន្លងទៅនេះ អ្នកស្លាប់មានត្រឹមតែ ១១នាក់ប៉ុណ្ណោះ។ ក្រុមមន្ត្រីបានព្រមានពលរដ្ឋឲ្យបង្កើនការប្រុងប្រយ័ត្ន ខណៈកំពុងកាយព្រិលចេញពីលំនៅឋានរបស់ពួកគេ។ អ្នកស្លាប់ថ្មីៗភាគច្រើនបានកើតឡើងនៅពេលមនុស្សធ្លាក់ ពេលកំពុងកាយព្រិលចេញពីដំបូលផ្ទះរបស់ពួកគេ។ ក្នុងចំណោមអ្នកស្លាប់រួមស្ត្រីចំណាស់វ័យប្រហែល ៧០ឆ្នាំដែលត្រូវបានប្រទះឃើញក្រោមគំនរព្រិលនៅផ្ទះរបស់គាត់ក្នុងទីក្រុង Nagai ស្ថិតចំងាយប្រមាណ ១៨០ម៉ាយល៍ភាគខាងជើងទីក្រុង Tokyo។ ព្រិលបានធ្លាក់ខ្លាំងនៅផ្នែកភាគខាងជើងប្រទេសនេះ ដែលបានប៉ះពាល់ដល់ស្ថានីយបញ្ជូនថាមពលអគ្គិសនីមួយ ដោយកាត់ផ្ដាច់ការផ្គត់ផ្គង់ដល់អ្នកប្រើប្រាស់ប្រមាណ ២០.០០០គ្រួសារពុំមានថាមពលអគ្គិសនីនៅព្រឹកថ្ងៃបុណ្យ Christmas។ មន្ត្រីនិយាយថា ក្រោយមកនៅថ្ងៃដដែល ពលរដ្ឋភាគច្រើនត្រូវបានក្រុមអាជ្ញាធរតភ្ជាប់បណ្ដាញអគ្គិសនីឡើងវិញ៕អត្ថបទ៖ សុខមាន

ចំនួនអ្នកស្លាប់ឡើងដល់ ៥៧នាក់ ខណៈសីតុណ្ហភាពត្រជាក់ និងព្រិលធ្លាក់ខ្លាំងវាយប្រហារសហរដ្ឋអាមេរិក

អាមេរិក៖ ក្រុមមន្ត្រីបាននិយាយកាលពីថ្ងៃចន្ទថា ព្យុះព្រិលដ៏ធ្ងន់ធ្ងរមិនធ្លាប់មានបានសម្លាប់មនុស្សយ៉ាងហោចណាស់ ៥៧នាក់នៅសហរដ្ឋអាមេរិក រួមទាំង ២៧នាក់នៅតំបន់ Erie ភាគខាងលិចរដ្ឋ New York។ អភិបាលតំបន់លោក Mark Poloncarz បាននិយាយនៅសន្និសីទសារព័ត៌មានថា គេរំពឹងថាចំនួនអ្នកស្លាប់ដោយសារព្យុះព្រិលដ៏ខ្លាំងក្លានេះអាចនឹងកើនឡើងថែមទៀត ខណៈព្រិលនៅតែបន្តគ្របដណ្ដប់តំបន់ Erie ដែលបណ្ដាលឲ្យផ្លូវនានានៅក្នុងតំបន់ជាច្រើនមិនអាចធ្វើដំណើរឆ្លងកាត់បាន រួមទាំងភាគច្រើននៅក្នុងទីក្រុង Buffalo។ អភិបាលរដ្ឋ New York និយាយថា ព្យុះព្រិលរដូវរងាដ៏ធ្ងន់ធ្ងរជាប្រវត្តិសាស្ត្រនេះ បានបោកបក់ពាសពេញអាមេរិកខាងជើង និងប្រែទីក្រុង Buffalo ដូចជាតំបន់សង្គ្រាម។ យោងតាមសារព័ត៌មាន NBC News ដោយបោកបក់ចេញពីតំបន់ Great Lakes ជិតប្រទេសកាណាដារហូតដល់តំបន់ Rio Grande ស្ថិតនៅតាមព្រំដែនម៉ិកស៊ិក ព្រិលនេះបានសម្លាប់មនុស្សយ៉ាងហោចណាស់ ៥៧នាក់គិតត្រឹមព្រឹកថ្ងៃចន្ទ។ ចំនួនអ្នកស្លាប់ត្រូវបានកត់ត្រានៅក្នុងរដ្ឋចំនួន ១២ ដូចជារដ្ឋ Colorado, Illinois, Kansas, Kentucky, Michigan, Missouri, Nebraska, New York, Ohio, Oklahoma, Tennessee និងរដ្ឋ Wisconsin៕ អត្ថបទ៖ សុខមាន

សម្តេចកិត្តិព្រឹទ្ធបណ្ឌិត អញ្ជើញសំណេះសំណាល និងបំពាក់គ្រឿងឥស្សរិយយសជូននិវត្តជនកាកបាទក្រហមកម្ពុជា

ភ្នំពេញ៖ នៅល្ងាចថ្ងៃចន្ទ ទី២៦ ខែធ្នូ ឆ្នាំ២០២២នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា អញ្ជើញជួបសំណេះសំណាល សួរសុខទុក្ខ និងបំពាក់គ្រឿងឥស្សរិយយសជូននិវត្តន៍ជន-មន្ត្រីកាកបាទក្រហមកម្ពុជា ដែលធ្លាប់បានបម្រើការងារមនុស្សធម៌យ៉ាងសកម្មជាមួយកាកបាទក្រហមកម្ពុជា នាពេលកន្លងមក។ពិធីនេះប្រព្រឹត្តទៅនៅទីស្នាក់ការកណ្តាលកាកបាទក្រហមកម្ពុជា ដោយមានការអញ្ជើញចូលរួមពីសំណាក់ សម្ដេចចៅហ្វាវាំង វរវៀងជ័យ អធិបតីស្រឹង្គារ គង់ សំអុល អនុប្រធានអចិន្រ្តៃយ៍ លោកជំទាវ ឯកឧត្តម អនុប្រធាន អគ្គហេរញ្ញិក សមាជិកគណៈកម្មាធិការកណ្តាល និវត្តន៍ជន និងក្រុមប្រតិបត្តិសរុបប្រមាណ ៨០នាក់។ក្នុងឱកាសនោះ សម្តេចកិត្តិព្រឹទ្ធបណ្ឌិត បានថ្លែងដោយក្តីសោមនស្សរីករាយដោយបានជួបសំណេះសំណាលសួរសុខទុក្ខ ជាមួយនិវត្តន៍ជន និងមន្ត្រីកាកបាទក្រហមកម្ពុជាទាំងអស់។ សម្តេចកិត្តិព្រឹទ្ធបណ្ឌិត បានថ្លែងអំណរគុណយ៉ាងជ្រាលជ្រៅបំផុតប្រកបដោយមោទកភាពយ៉ាងក្រៃលែងចំពោះបងប្អូននិវត្តន៍ជនទាំងអស់ ដែលបានពលិកម្មគ្រប់បែបយ៉ាង ខិតខំប្រឹងប្រែងអស់ពីកម្លាំងកាយចិត្តបំពេញការងារមនុស្សធម៌ជាមួយកាកបាទក្រហមកម្ពុជាតាំងពីដើមរហូតមក ដែលអ្នកខ្លះបានបំពេញការងារមុនពេលសម្តេចកិត្តិព្រឹទ្ធបណ្ឌិត ធ្វើជាប្រធានកាកបាទក្រហមកម្ពុជាមកម្លេះ។សមិទ្ធផល ស្នាដៃ និងជោគជ័យ តាំងពីដើម រហូតដល់បច្ចុប្បន្ន ក៏ដូចជាទៅអនាគត គឺបានដោយសារការចូលរួមពីបងប្អូននិវត្តន៍ជន និងមន្ត្រី អ្នកស្ម័គ្រចិត្ត យុវជនកាកបាទក្រហមកម្ពុជាយេីងទាំងអស់ ដែលបាននិងកំពុងជួយសម្រាលការលំបាកដល់បងប្អូនប្រជាពលរដ្ឋងាយរងគ្រោះបំផុត និងរងគ្រោះដោយគ្រោះមហន្តរាយផ្សេងៗ ដូចជាគ្រោះទឹកជំនន់ ខ្យល់កន្ត្រាក់ ភ្លើងឆេះផ្ទះ។ល។ ជាពិសេសបានរួមចំណែកធ្វើឱ្យកាកបាទក្រហមកម្ពុជា មានឈ្មោះល្បីរន្ទឺ ខ្ពស់មុខខ្ពស់មាត់លើឆាកអន្តរជាតិ។ជាចុងក្រោយ សម្តេចកិត្តិព្រឹទ្ធបណ្ឌិត បានជូនពរដល់និវត្តន៍ជន គណៈកម្មាធិការកណ្តាល មន្ត្រី អ្នកស្ម័គ្រចិត្ត យុវជនកាកបាទក្រហមកម្ពុជាទាំងអស់ ជាពិសេសក្នុងឱកាសបុណ្យចូលឆ្នាំថ្មីឆ្នាំសកល២០២៣ សូមមានសុខភាពល្អ ជោគជ័យគ្រប់ភារកិច្ច និងជួបប្រទះតែនឹងព្រះពុទ្ធពរទាំង៤ប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕

សម្តេចកិត្តិព្រឹទ្ធបណ្ឌិតអញ្ជើញដឹកនាំប្រជុំបូកសរុបការងាររបស់កាកបាទក្រហមកម្ពុជាប្រចាំឆ្នាំ២០២២ និងលើកទិសដៅបន្ត

ភ្នំពេញ៖កាកបាទក្រហមកម្ពុជា ដែលមានសម្ដេចព្រះមហាក្សត្រី ព្រះវររាជមាតាជាតិខ្មែរ នរោត្ដម មុនិនាថ សីហនុ ជាព្រះប្រធានកិត្ដិយស បានបើកកិច្ចប្រជុំប្រចាំឆ្នាំគណៈកម្មាធិការកណ្តាល នៅទីស្នាក់ការកណ្ដាលកាកបាទក្រហមកម្ពុជា រសៀល ថ្ងៃទី ២៦ ធ្នូ ក្រោមអធិបតីភាពដ៏ខ្ពង់ខ្ពស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ។ សម្តេចកិត្តិព្រឹទ្ធបណ្ឌិតប្រធាន បានបញ្ជាក់ពីរបៀបវារៈនៃកិច្ចប្រជុំ រួមមាន៖ឆ្លងសេចក្តីព្រាង របាយការណ៍សកម្មភាពឆ្នាំ២០២២ និងទិសដៅការងារឆ្នាំ២០២៣ឆ្លងសេចក្តីព្រាង របាយការណ៍ចំណូល-ចំណាយមូលនិធិឆ្នាំ២០២២ស្នើសុំការអនុម័តលើផែនការមូលនិធិសម្រាប់ចំណាយជាអាទិភាពឆ្នាំ២០២៣បញ្ហាផ្សេងៗ។ លោកជំទាវ ម៉ែន នារីសោភ័គ អគ្គលេខាធិការរងទី១ បានធ្វើរបាយការណ៍បូកសរុបការងារឆ្នាំ២០២២ដោយរំលេចពីព្រះរាជូបត្ថម្ភ ព្រះរាជទ្រព្យពី ព្រះករុណា ព្រះមហាក្សត្រ ជាអម្ចាស់ជីវិតលើត្បូង និង សម្តេចម៉ែ ព្រះប្រធានកិត្តិយសកាកបាទក្រហមកម្ពុជា រួមជាមួយសប្បុរសជនគ្រប់មជ្ឈដ្ឋាន ដែលបានធ្វើឱ្យសមាគមជាតិមានមូលនិធិទាំងនៅថ្នាក់កណ្តាល និងតាមសាខាទាំងរាជធានី-ខេត្ត សម្រាប់ធ្វើប្រតិបត្តិការ។ក្នុងឆ្នាំ២០២២ នេះ កាកបាទក្រហមកម្ពុជា សម្រេចបានការជួយសម្រាលជីវភាពប្រជាពលរដ្ឋងាយរងគ្រោះបំផុតបានចំនួន ៧៣.១៣៤ គ្រួសារ (ក្នុងនោះថ្នាក់កណ្តាលឆ្លើយតបបាន ៨.៥២០ គ្រួសារ) កសាងផ្ទះបាន ចំនួន ១០៤ ខ្នង និងបណ្តុះបណ្តាលជំនាញ និងអប់រំផ្សព្វផ្សាយលើកកម្ពស់ការយល់ដឹងផ្សេងៗបានរាប់សែនគ្រួសារទៀត។ ចំណែកសមិទ្ធផលសំខាន់ៗ ទៅតាមវិស័យអាទិភាពទាំង៤ នៃយុទ្ធសាស្ត្រ ២០២១-២០៣០។របាយការណ៍បានរំលេចពីការងារតាមវិស័យដូចជាវិស័យអាទិភាពគ្រប់គ្រងគ្រោះមហន្តរាយ វិបត្តិភ័យ និងការប្រែប្រួលអាកាសធាតុដែលក្នុងវិស័យនេះបានផ្តល់ស្បៀងសម្រាលជីវភាពរបស់គ្រួសាររងគ្រោះ និងងាយរងគ្រោះបំផុតចំនួន ១៨.៥៣៩គ្រួសារ សាខាបានសង់ផ្ទះ ១២ខ្នង និងផ្តល់ស័ង្កសីជួសជុល ផ្ទះរងគ្រោះដោយខ្យល់កន្ត្រាក់ ចំនួន ១.២២៥គ្រួសារ។ ក្នុងការកសាងភាពធន់សហគមន៍ ដែលសហការជាមួយសមាគមជាតិកាកបាទក្រហមចិន, កាកបាទក្រហមកម្ពុជា បានផ្តល់អណ្តូងចំនួន៤ បង្គន់អនាម័យចំនួន២៧២ កន្លែងលាងសម្អាតដៃនៅក្នុងមណ្ឌលសុខភាពចំនួន២ ក្នុងឃុំចំនួន ២ នៃស្រុកថ្ពង ខេត្តកំពង់ស្ពឺ ។ក្នុងពេលដែលរាជរដ្ឋាភិបាលទទួលដោះស្រាយ១០០% ក្នុងការផ្តល់ពូជស្រូវ ស្បៀង និងថវិកា ដល់ប្រជាពលរដ្ឋរងគ្រោះដោយទឹកជំនន់ទូទាំងប្រទេស កាកបាទក្រហមកម្ពុជា បន្តយកចិត្តទុកដាក់ក្នុងការតម្រង់ទិសដល់ក្រុមប្រតិបត្តិរបស់សាខាទាំង ២៥រាជធានី-ខេត្ត ស្តីពីការពង្រឹងសមត្ថភាពភស្តុភារ ការប្រកាសព័ត៌មានជាមុន ការរាយការណ៍ពីផលប៉ះពាល់របស់មុខសញ្ញារងគ្រោះ និងទម្រង់ប្រតិបត្តិការឆ្លើយតប។ ជាមួយគ្នានោះ ថ្នាក់កណ្តាលក៏បានបញ្ជ្រាបការយល់ដឹងពីហានិភ័យបង្កដោយការប្រែប្រួលអាកាសធាតុដល់សាខា សម្រាប់ជាមូលដ្ឋាននៃការគិតគូរដោះស្រាយផលប៉ះពាល់នានាតាមសហគមន៍ផងដែរ។ក្នុងការចូលរួមកាត់បន្ថយហានិភ័យបង្កដោយការប្រែប្រួលអាកាសធាតុ សម្តេចកិត្តិព្រឹទ្ធបណ្ឌិតប្រធាន បានដឹកនាំសកម្មភាពដាំដើមឈើជាង ១.២០០ដើម នៅមជ្ឈមណ្ឌលពុទ្ធសាសនាកម្ពុជា។ ចំណែក សាខារាជធានី-ខេត្ត សម្រេចបានការដាំដើមឈើ សរុបប្រមាណ ៥.៣៧៥ដើម នៅតាមទីសាធារណៈ និងគ្រឹះស្ថានសិក្សានានា រួមទាំងបានដាំកូនឈើកោងកាង សរុប ២.០០០ដើម នៅតាមដងព្រែកកោងកាងសាងស្នេហ៍ ឃុំតានៃ ក្នុងស្រុកព្រៃនប់ ខេត្តព្រះសីហនុ។ក្នុងការចូលរួមកាត់បន្ថយអត្រាមរណៈ ពិការ របួស និងបាត់បង់ទ្រព្យសម្បត្តិរដ្ឋ ឯកជន បង្កដោយគ្រោះថ្នាក់ចរាចរណ៍ កាកបាទក្រហមកម្ពុជា និងសាខាទាំង២៥ រាជធានី-ខេត្ត សម្រេចបានការធ្វើយុទ្ធនាការទូទាំងប្រទេសស្តីពីសុវត្ថិភាពចរាចរណ៍ក្នុងឱកាសបុណ្យចូលឆ្នាំខែ្មរ បុណ្យភ្ជុំបិណ្ឌ និងបុណ្យអុំទូក ធ្វើការអប់រំផ្សព្វផ្សាយ ស្តីពីសុវត្ថិភាពចរាចរណ៍ប្រកបដោយបរិយាប័ន្ន និងគំាពារកុមារ បានចំនួន ៥៧៧លើក មានអ្នកទទួលផលសរុប ១៣៣.៥០៩នាក់ (ស្រីចំនួន ៧៣.៥៦០នាក់) និងអ្នកមានពិការភាពចំនួន១.៧៦៩នាក់។ លើសពីនេះទៅទៀត បាន កសាងជម្រាល ចំនួន ៦កន្លែង សម្រាប់ជនមានពិការភាពចំនួន ១.៣៥៣នាក់។វិស័យអាទិភាព សុខភាព និងការថែទាំសុខភាពក្នុងសហគមន៍កាកបាទក្រហមកម្ពុជា បានបន្តផ្តល់ថវិកា ១លានដុល្លារ ជូនមូលនិធិគន្ធបុប្ផាកម្ពុជា (លើកទី៥) ដែលត្រូវជាលើកទី១១ សម្រាប់មន្ទីរពេទ្យកុមារគន្ធបុប្ផា និងថវិកា ៥ម៉ឺនដុល្លារ ជូនមន្ទីរពេទ្យកុមារអង្គរ (លើកទី៤) ។ការងារអប់រំផ្សព្វផ្សាយលើកកម្ពស់ពីសារប្រយោជន៍នៃការថែទាំសុខភាពមាតា ទារក និងកុមារ រួមទាំងការទប់ស្កាត់ការចម្លងមេរោគអេដស៍ ថ្លើមប្រភេទបេ ជំងឺស្វាយពីម្តាយទៅកូន និងការងារត្រូវបានអនុវត្តតាមយន្តការ ការងារឥស្សរជនឆ្នើមថ្នាក់ជាតិគ្របដណ្តប់ទូទាំងប្រទេស និងអនុវត្តជាប្រចាំក្នុងយុទ្ធនាការឈានឆ្ពោះទិវាដ៏សំខាន់ ចំនួន ៣ គឺ ទិវាជាតិសុខភាពមាតា ទារក និងកុមារ ២១កុម្ភៈ ទិវាឆ្មបជាតិ-អន្តរជាតិ ៥ឧសភា និង ទិវាពិភពលោកប្រយុទ្ធនឹងជំងឺអេដស៍ ១ធ្នូ។ក្នុងការងារអភិវឌ្ឍសុខភាពសហគមន៍វិញ កាកបាទក្រហមកម្ពុជា បានផ្តោតលើការសាងសង់កន្លែងលាងសម្អាតដៃតាមគ្រឹះស្ថានសិក្សា ដែលជារួមមានព្រះសមិទ្ធផល សម្តេចម៉ែជាអម្ចាស់ តាមរយៈសម្តេចកិត្តិព្រឹទ្ធបណ្ឌិតប្រធាន នៅខេត្តមណ្ឌលគីរី ជាអណ្ដូងទឹកស្អាតចំនួន៣ កន្លែងលាងសម្អាតដៃចំនួន៧ និងបង្គន់អនាម័យចំនួន១ខ្នង (មាន៤បន្ទប់) ក្នុងវិទ្យាល័យចំនួនមួយ និងសាលាបឋមសិក្សាចំនួន៦ សម្រាប់លោកគ្រូ-អ្នកគ្រូ និងសិស្សានុសិស្សប្រមាណជាង ២.៤០០នាក់ និងកន្លែងលាងសម្អាតដៃចំនួន៦ និងបង្គន់អនាម័យចំនួន ៣ខ្នង (មាន ៩បន្ទប់) សម្រាប់លោកគ្រូ-អ្នកគ្រូ និងសិស្សានុសិស្សប្រមាណ ៥.០២០នាក់ ក្នុងវិទ្យាល័យចំនួន៤ និងសាលាបឋមសិក្សាចំនួន១ នៅក្នុងក្រុង១ ស្រុក៤ នៃខេត្តកំពង់ធំ។ លើសពីនេះទៅទៀត ដោយមានការជួយឧបត្ថម្ភពី សហព័ន្ធអន្តរជាតិ កាកបាទក្រហមសិង្ហបូរី និងកាកបាទក្រហមកូរ៉េ សមិទ្ធផលបន្ថែមទៀតមានអណ្តូងស្នប់មានម៉ូទ័រ១៩ កន្លែងលាងសម្អាតដៃ៤២ បន្ទប់អនាម័យ៣៣ និងស៊ីទែនទឹក១៧ មានអ្នកទទួលផលសរុប ៣៨.៣០៧នាក់ ។វិស័យអាទិភាព ការអភិវឌ្ឍស្ថាប័ន កាកបាទក្រហមកម្ពុជា អាចពង្រឹងបានភាពជាម្ចាស់របស់សាខាទាំង២៥រាជធានី-ខេត្ត ទៅតាមទិសវិមជ្ឈ ការ វិសហមជ្ឈការ, សាខានីមួយៗ មានសមត្ថភាពក្នុងការបំផុសចលនាកៀរគររកមូលនិធិ និងជំនួយឧបត្ថម្ភ ព្រមទាំងដឹកនាំ គ្រប់គ្រងសាខាតាមអភិក្រមអភិបាលកិច្ចល្អ ការគ្រប់គ្រងមានតម្លាភាព និងគណនេយ្យភាព។ ចំណែក ថ្នាក់កណ្តាលវិញ បាននឹងកំពុងបន្តតួនាទីជួយគាំទ្របច្ចេកទេស កសាងសមត្ថភាព និងបណ្តុះបណ្តាលសមត្ថភាពជំនាញដូចជា ផែនការអភិវឌ្ឍសាខា អនុសាខាជាដំណាក់កាល តាមទិសស្លោក “សកម្មភាពនៅមូលដ្ឋាន សម្រេចបានគោលដៅសាកល” នៃយុទ្ធសាស្ត្រ ២០២១-២០៣០។ការងារអភិវឌ្ឍធនធានហិរញ្ញវត្ថុ ៖ ទិវា ៨ឧសភា បានក្លាយជាទិវាដ៏សំខាន់ និងចាំបាច់របស់ថ្នាក់កណ្តាល និងគណៈកម្មាធិការសាខាក្នុងការបំផុសសប្បុរសជនកៀរគររកមូលនិធិ។ បទពិសោធន៍ថ្មីឆ្នាំនេះ ឃើញថា គណនីទទួលថវិកា តាមធនាគារ ABA អាចទទួលថវិកាពីសប្បុរសបានច្រើនជាងមុន។ ការងារសមាជិកភាពនៅតែបន្ត ដោយឆ្នាំនេះមានចុះបញ្ជីនៅថ្នាក់កណ្តាល ២.៩៤៥នាក់ និងសាខាទាំងអស់ ៥៧.០៩៩នាក់។លោកជំទាវកិត្តិបណ្ឌិត អ៊ុក ម៉ាលី អគ្គហេរញ្ញិក បានអានជូននូវរបាយការណ៍ចំណូល-ចំណាយមូលនិធិឆ្នាំ២០២២ ហើយអង្គប្រជុំបានអនុម័ត ជាមួយនឹងអនុសាសន៍បន្តពង្រឹងការធ្វើសវនកម្ម ដើម្បីធានាបានការជឿទុកចិត្តពីសប្បុរសជនគ្រប់មជ្ឈដ្ឋាន និងអនុម័តផែនការ ចំណាយជាអាទិភាពឆ្នាំ២០២៣ ដែលជាកញ្ចប់ថវិកាមិនស្ថិតនៅក្នុងមូលនិធិទទួលបានពីសប្បុរសជន ។កាកបាទក្រហមកម្ពុជា ប្តេជ្ញានឹងបន្តបំពេញតួនាទីជាជំនួយការឱ្យអាជ្ញាធរសាធារណៈឱ្យកាន់តែប្រកបដោយគុណតម្លៃថែមទៀត ជាពិសេស ក្នុងការអប់រំផ្សព្វផ្សាយឱ្យសហគមន៍ពង្រឹងការអនុវត្ត “៣ការពារ ៣កុំ”, រួមសាមគ្គីគ្នាចូលរួមអនុវត្តយុទ្ធសាស្ត្រស្តីពី “ការរស់នៅតាមគន្លងប្រក្រតីភាពថ្មី ក្នុងបរិបទនៃជំងឺកូវីដ-១៩” និង “យុទ្ធសាស្ត្រស្ដារ និងជំរុញកំណើនសេដ្ឋកិច្ច ក្នុងការរស់នៅជាមួយកូវីដ១៩ តាមគន្លងប្រក្រតីភាពថ្មី”។សម្តេចប្រធានបានថ្លែងអំណរគុណនិងកោតសរសើរដល់កិច្ចខិតខំប្រឹងប្រែងរបស់មន្ត្រីកាកបាទក្រហមគ្រប់ថ្នាក់សាខារាជធានីខេត្តទាំងអស់ដែលបានខិតខំបំពេញការងារក្នុងឆ្នាំ២០២២ក៏ដូចជាពេលកន្លងមកបានយកចិត្តទុកដាក់ជួយប្រជាពលរដ្ឋបានភ្លាមៗទាន់ពេលវេលានៅពេលពលរដ្ឋជួបការលំបាកឬគ្រោះធម្មជាតិផ្សេងៗនិងបានផ្តាំផ្ញើឱ្យបន្តយកចិត្តទុកដាក់ឱ្យកាន់តែសកម្មថែមទៀតនៅឆ្នាំ២០២៣។សម្តេចបញ្ជាក់ថា ទោះជាយ៉ាងនេះក្តីថ្នាក់កណ្តាលនឹងជួយដល់សាខានៅពេលមានតម្រូវការ ឆ្លើយតបក្នុងករណីហួសពីលទ្ធភាពរបស់សាខានីមួយៗ៕…………

ក្រុមផ្តល់ជំនួយបរទេសបានផ្អាកការងារ បន្ទាប់ពីក្រុមតាលីបង់ហាមប្រាមបុគ្គលិកស្ត្រីមិនឲ្យធ្វើការងារ

អាហ្វហ្គានីស្ថាន៖ អង្គការមិនមែនរដ្ឋាភិបាល (NGO) ធំៗចំនួន៥ បានផ្អាកការងារនៅក្នុងប្រទេសអាហ្វហ្គានីស្ថាន បន្ទាប់ពីក្រុមតាលីបង់បានហាមប្រាមស្ត្រីមិនឱ្យធ្វើការងារ។ អង្គការ Care International ជាក្រុមប្រឹក្សាជនភៀសខ្លួនប្រទេសន័រវេស (NRC) និងអង្គការ Save the Children បាននិយាយថា ពួកគេមិនអាចបន្តការងារបាននោះទេ បើគ្មានបុគ្គលិកស្ត្រីរបស់យើង។ គណៈកម្មាធិការជួយសង្គ្រោះអន្តរជាតិក៏បានផ្អាកសេវារបស់ខ្លួនផងដែរ ខណៈក្រុមសង្គ្រោះឥស្លាមបាននិយាយថា ខ្លួនកំពុងផ្អាកការងារភាគច្រើន។ ក្រុមតាលីបង់ដែលកំពុងកាន់អំណាចក្នុងប្រទេសអាហ្វហ្គានីស្ថាន បាននឹងកំពុងដាក់គំនាបលើសិទ្ធិស្ត្រីជាបន្តបន្ទាប់។ សេចក្តីប្រកាសចុងក្រោយរបស់អង្គការមិនមែនរដ្ឋាភិបាល បានធ្វើឡើងប៉ុន្មានថ្ងៃបន្ទាប់ពីក្រុមតាលីបង់បានហាមប្រាមស្ត្រី មិនឱ្យចូលរៀននៅសាកលវិទ្យាល័យ។ លោក Abdel Rahman Habib អ្នកនាំពាក្យក្រសួងសេដ្ឋកិច្ចរបស់ក្រុមតាលីបង់ បានចោទបុគ្គលិកស្ត្រីនៅក្រុមអង្គការផ្តល់ជំនួយបរទេស ពីការបំពានច្បាប់ស្លៀកសំលៀកបំពាក់ និងកន្សែងរុំមុខ។ ក្រុមតាលីបង់បានគំរាមលុបចោលអាជ្ញាប័ណ្ណរបស់អង្គការណា ដែលមិនគោរពតាមបម្រាមនេះ។ ក្រុមផ្តល់ជំនួយមួយចំនួនបាននិយាយរិះគន់ និងទាមទារឱ្យស្ត្រីត្រូវបានអនុញ្ញាតឱ្យបន្តធ្វើការងារ។ ប្រធានអង្គការ Care, NRC និងអង្គការ Save the Children បាននិយាយនៅក្នុងសេចក្តីថ្លែងការណ៍រួមថា អង្គការមិនអាចចូលទៅដល់ប្រជាជនអាហ្វហ្គានីស្ថានរាប់លាននាក់ ដែលត្រូវការជំនួយចាំបាច់ចាប់តាំងពីខែសីហា ឆ្នាំ២០២១ បាននោះទេ ប្រសិនបើគ្មានបុគ្គលិកជាស្ត្រី។ លោក Ramiz Alakbarov អ្នកសម្របសម្រួលជាន់ខ្ពស់ផ្នែកមនុស្សធម៌របស់អង្គការសហប្រជាជាតិបាននិយាយថា អង្គការសហប្រជាជាតិកំពុងព្យាយាមធ្វើឱ្យការដាក់បម្រាមនេះដកចេញវិញ ព្រោះវាជាបន្ទាត់ក្រហមសម្រាប់សហគមន៍មនុស្សធម៌ទាំងមូល។ លោកបានប្រាប់សារព័ត៌មាន BBC ថា អង្គការសហប្រជាជាតិអាចបញ្ឈប់ការផ្តល់ជំនួយមនុស្សធម៌នៅក្នុងប្រទេសអាហ្វហ្គានីស្ថាន ប្រសិនបើអាជ្ញាធរក្រុមតាលីបង់មិនលុបចោលសេចក្តីប្រកាសរបស់ពួកគេ ដែលហាមប្រាមបុគ្គលិកផ្តល់ជំនួយស្ត្រី។ ប៉ុន្តែលោក Alakbarov បាននិយាយថា វានៅតែមិនច្បាស់ថា តើក្រុមតាលីបង់មានបំណងចង់បានអ្វីតាមការប្រកាសរបស់ខ្លួននោះ៕អត្ថបទ៖ ប៊ុនថន

គណៈកម្មការសុខភាពជាន់ខ្ពស់ចិនបញ្ឈប់ការចេញទិន្នន័យឆ្លង COVID-19 ប្រចាំថ្ងៃ ខណៈករណីឆ្លងហក់ឡើងខ្ពស់

ចិន៖ អាជ្ញាធរសុខភាពជាន់ខ្ពស់របស់ប្រទេសចិនបានប្រកាសថា ខ្លួនបានបញ្ឈប់ការចេញផ្សាយចំនួនករណីឆ្លង Covid-19 ប្រចាំថ្ងៃហើយ ខណៈរបាយការណ៍នានាអះអាងថា ចំនួនពិតប្រាកដមានច្រើនជាងទិន្នន័យផ្លូវការដែលបានចេញផ្សាយដោយក្រុមអាជ្ញាធរ។ គណៈកម្មការសុខភាពជាតិបាននិយាយកាលពីថ្ងៃអាទិត្យថា ព័ត៌មានទាក់ទងករណីឆ្លងនឹងត្រូវបានចេញផ្សាយដោយមជ្ឈមណ្ឌលគ្រប់គ្រង និងបង្ការជំងឺឆ្លងជំនួសវិញ ដែលជាផ្នែកមួយត្រូវបានគ្រប់គ្រងដោយគណៈកម្មការសុខភាពជាតិរបស់ចិន។ ការសម្រេចចិត្តក្នុងការផ្ទេរការរាប់ចំនួនករណីឆ្លង ទៅឲ្យអាជ្ញាធរថ្នាក់ក្រោមនេះមានឡើង ខណៈចិនឆ្លងកាត់រលកឆ្លងវីរុសកូរ៉ូណាដ៏ច្រើនមិនធ្លាប់មាន ក្រោយការបន្ធូរបន្ថយការរឹតត្បិតដ៏តឹងរ៉ឹងនានា។ សេចក្ដីថ្លែងការណ៍នេះពុំបាននិយាយទេថា តើមជ្ឈមណ្ឌលគ្រប់គ្រង និងបង្ការជំងឺឆ្លងរបស់ចិននឹងចេញផ្សាយរបាយការណ៍ករណីឆ្លងវីរុស Covid-19 ញឹកញាប់ប៉ុណ្ណា។ តាមធម្មតាមជ្ឈមណ្ឌលគ្រប់គ្រង និងបង្ការជំងឺឆ្លងរបស់ចិនចេញផ្សាយរួមគ្នាប្រចាំខែ សម្រាប់ជំងឺឆ្លងទាំងអស់ក្រោមច្បាប់របស់ចិន ចាប់ពីរដូវសំបូរដោយជំងឺផ្ដាសាយរហូតដល់ជំងឺរលាកថ្លើមប្រភេទ B និងជំងឺអាសន្នរោគ។ ចាប់តាំងពីប្រទេសចិនបានបន្ធូរបន្ថយការរឹតត្បិតការឆ្លងវីរុស Covid-19 កាលពីដើមខែនេះមក ពុំមានទិន្នន័យច្បាស់លាស់បញ្ជាក់ពីចំនួននៃការឆ្លងរាលដាលរបស់ប្រទេសនេះទេ៕អត្ថបទ៖ សុខមាន

បណ្ដាញសង្គម

ព័ត៌មានថ្មីៗ

ប្រធានគណៈប្រចាំការនៃគណៈអចិន្ត្រៃយ៍យុវជនគណបក្សប្រជាជនកម្ពុជាថ្នាក់កណ្ដាល និងលេខាទី១ នៃគណៈកម្មាធិការមជ្ឈិមសម្ព័ន្ធយុវជនកុម្មុយនីស្តចិនចុះអនុស្សរណៈស្ដីពីកិច្ចសហប្រតិបត្តិការជាមួយគ្នា

កសិដ្ឋានចិញ្ចឹមសត្វគោ និងជ្រូកនៅប្រទេសបែលហ្ស៊ិក កំពុងជួបការលំបាក ដោយសាររលកកម្តៅ

នយោបាយឈ្នះ-ឈ្នះនាំឱ្យកម្ពុជាសម្រេចបានសន្តិភាព និងការអភិវឌ្ឍដូចសព្វថ្ងៃ

អ៊ីរ៉ង់៖ ការឆ្លងកាត់ច្រកសមុទ្រ Hormuz មិនត្រូវបានធានាទេ បើគ្មានការសម្របសម្រួលជាមួយទីក្រុងតេអេរ៉ង់

ប្រធានាធិបតីជិតឡើងកាន់អំណាចកូឡុំប៊ី ចេញឱសានវាទដល់ក្រុមឧក្រិដ្ឋកម្មប្រដាប់អាវុធ

មន្ត្រីជាន់ខ្ពស់៖ លីបង់ទាមទារឲ្យអ៊ីស្រាអែលដកទ័ពទាំងស្រុង ក្នុងកិច្ចព្រមព្រៀងណាមួយ នៅទីក្រុងវ៉ាស៊ីនតោន

កម្ពុជា ប្តេជ្ញាធ្វើការងារជិតស្និទ្ធជាមួយចិន ដើម្បីពង្រីកបន្ថែមទាំងវិសាលភាព និងភាពស៊ីជម្រៅនៃទំនាក់ទំនងទ្វេភាគី

រញ្ជួយដីកម្រិត ៦,៥រ៉ិចទ័រ វាយប្រហារកោះ នៅភាគខាងត្បូងនៃប្រទេសហ្វីលីពីន

UN ជំរុញឲ្យមានសេចក្តីថ្លៃថ្នូរសម្រាប់ជនអន្តោប្រវេសន៍ ក្រោយតុលាការអាមេរិកសម្រេចលើជនអន្តោប្រវេសន៍ហៃទី និងស៊ីរី

អ៊ីស្រាអែលទម្លាក់ខិត្តប័ណ្ណ នៅទីក្រុងរបស់លីបង់ ដោយបញ្ជាឲ្យប្រជាជនចាកចេញ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានសំខាន់ៗ

ទូកដឹកជនភៀសខ្លួនរ៉ូហ៊ីងយ៉ាប្រមាណ ១៨០នាក់មកដល់ប្រទេសឥណ្ឌូនេស៊ី

ប្រធានាធិបតី Xi ជំរុញឱ្យមានវិធានការការពារអាយុជីវិត ខណៈប្រទេសចិនប្រយុទ្ធរលក COVID-19

មនុស្ស ១៣នាក់ស្លាប់ក្នុងគ្រោះជំនន់ទឹកភ្លៀង ខណៈរំខានដល់ការប្រារព្ធពិធីបុណ្យណូអែលនៅហ្វីលីពីន

អ្នកស្លាប់ដោយសារព្រិលធ្លាក់ខ្លាំងនៅជប៉ុនកើនឡើងដល់ ១៧នាក់ និង ៩៣នាក់រងរបួស

ចំនួនអ្នកស្លាប់ឡើងដល់ ៥៧នាក់ ខណៈសីតុណ្ហភាពត្រជាក់ និងព្រិលធ្លាក់ខ្លាំងវាយប្រហារសហរដ្ឋអាមេរិក

សម្តេចកិត្តិព្រឹទ្ធបណ្ឌិត អញ្ជើញសំណេះសំណាល និងបំពាក់គ្រឿងឥស្សរិយយសជូននិវត្តជនកាកបាទក្រហមកម្ពុជា

ក្រុមផ្តល់ជំនួយបរទេសបានផ្អាកការងារ បន្ទាប់ពីក្រុមតាលីបង់ហាមប្រាមបុគ្គលិកស្ត្រីមិនឲ្យធ្វើការងារ

គណៈកម្មការសុខភាពជាន់ខ្ពស់ចិនបញ្ឈប់ការចេញទិន្នន័យឆ្លង COVID-19 ប្រចាំថ្ងៃ ខណៈករណីឆ្លងហក់ឡើងខ្ពស់

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានសំខាន់ៗ

ទូក​ដឹក​ជនភៀសខ្លួន​រ៉ូ​ហ៊ីង​យ៉ា​ប្រមាណ ​១៨០​នាក់​មកដល់​ប្រទេស​ឥណ្ឌូនេស៊ី

ប្រធានាធិបតី Xi ជំរុញឱ្យមាន​វិធាន​ការការពារ​អាយុជីវិត ខណៈ​ប្រទេស​ចិន​ប្រយុទ្ធ​រលក​ COVID-19

អ្នកស្លាប់​ដោយសារ​ព្រិល​ធ្លាក់​ខ្លាំង​នៅ​ជប៉ុន​កើនឡើង​ដល់​ ១៧នាក់ និង ​៩៣​នាក់​រងរបួស​

សម្តេចកិត្តិព្រឹទ្ធបណ្ឌិត អញ្ជើញសំណេះសំណាល និងបំពាក់គ្រឿងឥស្សរិយយសជូននិវត្តជនកាកបាទក្រហមកម្ពុជា

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ទូកដឹកជនភៀសខ្លួនរ៉ូហ៊ីងយ៉ាប្រមាណ ១៨០នាក់មកដល់ប្រទេសឥណ្ឌូនេស៊ី

ប្រធានាធិបតី Xi ជំរុញឱ្យមានវិធានការការពារអាយុជីវិត ខណៈប្រទេសចិនប្រយុទ្ធរលក COVID-19

អ្នកស្លាប់ដោយសារព្រិលធ្លាក់ខ្លាំងនៅជប៉ុនកើនឡើងដល់ ១៧នាក់ និង ៩៣នាក់រងរបួស