BTV NEWS

ព្រះករុណាព្រះមហាក្សត្រ និងសម្ដេចព្រះមហាក្សត្រីយាងនិវត្តន៍មកដល់មាតុភូមិវិញដោយសុវត្ថិភាពបន្ទាប់ពីពិនិត្យ និងព្យាបាលព្រះរោគនៅរដ្ឋធានីប៉េកាំង

សម្ដេចតេជោ និងសម្ដេចធិបតី អបអរសាទរខួបលើកទី៧៥ កម្ពុជា ចូលជាសមាជិកអង្គការយូណេស្កូ

ICRC ប្ដេជ្ញាបន្តគាំទ្រ និងពង្រឹងកិច្ចសហប្រតិបត្តិការជាមួយកម្ពុជា បន្ថែមទៀត

សម្ដេចធិបតី៖ ភាពជោគជ័យរបស់អ្នកដឹកនាំអង្គភាពមួយ គឺការធានាឱ្យអង្គភាពនោះមានសមត្ថភាពបន្តដំណើរការ និងការរីកចម្រើន ទោះបីជាក្នុងពេលអវត្តមានរបស់ខ្លួនក៏ដោយ

ព័ត៌មានសំខាន់ៗ

WHO៖ ករណីឆ្លងវីរុសបម្លែងខ្លួនថ្មី Omicron ហក់ឡើងខ្ពស់អាចបង្កគ្រោះថ្នាក់កាន់តែខ្លាំងតាមរយៈវីរុស COVID-19 បម្លែងថ្មីដទៃទៀត

WHO៖ នៅសប្ដាហ៍នេះអង្គការសុខភាពពិភពលោក (WHO) នៅអឺរ៉ុបបានព្រមានថា ការហក់ឡើងខ្ពស់ករណីឆ្លងវីរុសបម្លែងខ្លួនថ្មីOmicron នៅជុំវិញពិភពលោកអាចបង្កើនហានិភ័យ និងអាចបង្កគ្រោះថ្នាក់កាន់តែខ្លាំងតាមរយៈវីរុស COVID-19 បម្លែងថ្មីដទៃទៀត។ ខណៈវីរុសបម្លែងខ្លួនថ្មី Omicron កំពុងរីករាលដាលឆាប់រហ័សដូចជាភ្លើងឆេះព្រៃ នៅជុំវិញពិភពលោកវាហាក់ដូចជាមិនសូវធ្ងន់ធ្ងរជាងការភ័យខ្លាចដំបូងឡើយ ហើយបានបង្កើនក្តីសង្ឃឹមថានឹងអាចយកឈ្នះជំងឺរាតត្បាតសកលបាន ហើយជីវភាពរស់នៅត្រឡប់ទៅរក ភាពប្រក្រតីវិញ។ប្រធានកម្មវិធីគ្រាអាសន្នសុខភាពសាធារណៈ របស់អង្គការសុខភាពពិភពលោកលោកស្រី Catherine Smallwood បានសង្កត់ធ្ងន់លើការប្រុងប្រយ័ត្នដ៏ម៉ឺងម៉ាត់ ដោយប្រាប់សារព័ត៌មាន AFP ថា អត្រាឆ្លងកើនឡើងខ្ពស់អាចបង្កគ្រោះថ្នាក់កាន់តែខ្លាំងថែមទៀត។ លោកស្រីវេជ្ជបណ្ឌិត Smallwood បាននិយាយនៅក្នុងបទសម្ភាសន៍មួយថា មានការរីករាលដាលនៃវីរុសបម្លែងខ្លួនថ្មី Omicron កាន់តែច្រើន វាកាន់តែមានការចម្លងខ្លាំង និងកាន់តែច្រើន វាទំនងជានឹងលេចចេញនូវវីរុសប្រភេទថ្មីដទៃទៀត។ ឥឡូវនេះវីរុសបម្លែងខ្លួនថ្មី Omicron គឺសាហាវណាស់ វាអាចបណ្តាលឱ្យស្លាប់បាន ប្រហែលជាតិចជាងវីរុសបម្លែងខ្លួនថ្មីប្រភេទ Delta បន្តិច ប៉ុន្តែតើនរណាអ្នកដឹងថា នឹងមានវីរុសCOVID-19 បម្លែងខ្លួនថ្មីប្រភេទណាទៀតផ្ទុះឡើង។នៅសប្ដាហ៍នេះក្រុមអ្នកវិទ្យាសាស្ត្រនៅប្រទេសបារាំង បានរកឃើញវីរុសបម្លែងខ្លួនថ្មីមួយប្រភេទផ្សេងទៀតនោះគឺវីរុសបម្លែងខ្លួនថ្មី 'IHU' ឬ (B.1.640.2) ដែលត្រូវបានរកឃើញនៅក្នុងអ្នកខ្លួនជំងឺ ១២នាក់នៅជិតទីក្រុង Marseille មានការវិវឌ្ឍន៍ចំនួន ៤៦ដងដែលធ្វើឱ្យវាកាន់តែធន់ទៅនឹងវ៉ាក់សាំង និងងាយឆ្លង។ លោកស្រីវេជ្ជបណ្ឌិត Smallwood បាននិយាយថា អឺរ៉ុបបានចុះកត់ត្រាករណីឆ្លងវីរុស Covid-19 ជាង ១០០លាននាក់ចាប់តាំងពីការចាប់ផ្តើមនៃជំងឺរាតត្បាតសកលនេះ ហើយមានករណីឆ្លងថ្មីជាង ៥លាននាក់នៅក្នុងសប្តាហ៍ចុងក្រោយនៃឆ្នាំ២០២១៕អត្ថបទ៖ សុខមាន

សម្ដេចតេជោ ហ៊ុន សែន ស្នើ IOC ដាក់តេក្វាន់ដូ ITF ចូលព្រឹត្តិការណ៍អូឡាំពិកដើម្បីលើកទឹកចិត្តការបង្រួបបង្រួមឧបទ្វីបកូរ៉េ

តេក្វាន់ដូ៖ សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានស្នើឲ្យគណៈកម្មាធិការជាតិអូឡាំពិកអន្តរជាតិ (IOC) ពិចារណាដាក់បញ្ចូលកីឡាតេក្វាន់ដូ ITF របស់កូរ៉េខាងជើងចូលក្នុងព្រឹត្តិការណ៍កីឡាអូឡាំពិក ដូចកីឡាតេក្វាន់ដូ WT របស់សាធារណរដ្ឋកូរ៉េដែរដើម្បីលើកទឹកចិត្តឲ្យមានការបង្រួបបង្រួមជាតិនៅក្នុងឧបទ្វីបកូរ៉េ។ការអំពាវនាវរបស់ប្រមុខរាជរដ្ឋាភិបាលកម្ពុជា បានធ្វើឡើងក្នុងពិធីប្រគល់ប្រាក់រង្វាន់ជ័យលាភីដល់វីរកីឡាការិនី អ៊ុក ស្រីមុំ បន្ទាប់ពីលោកស្រីដណ្ដើមបានមេដាយមាស ពីការប្រកួតកីឡាប៉េតង់ជ្រើសរើសជើងឯកពិភពលោកឆ្នាំ២០២១ នៅទីក្រុងសាន់តាស៊ូសាណា ប្រទេសអេស្ប៉ាញកាលពីខែវិច្ឆិកាកន្លងទៅ នៅថ្ងៃទី៥ ខែមករា ឆ្នាំ២០២២ នេះនៅវិមានសន្តិភាព។ សម្ដេចតេជោនាយករដ្ឋមន្ដ្រីបានមានប្រសាសន៍ថា ការដាក់បញ្ចូលកីឡាតេក្វាន់ដូ ទាំងកូរ៉េខាងត្បូង ទាំងកូរ៉េខាងជើង ចូលក្នុងព្រឹត្តិការណ៍អូឡាំពិកគឺជាការរួមចំណែកមួយ ដើម្បីចូលរួមបង្រួបបង្រួមកូរ៉េ។ តាមរយៈនេះ សម្ដេចតេជោ ហ៊ុន សែន ក៏បានណែនាំឲ្យគណៈកម្មាធិការជាតិ CAMSOC ត្រូវរៀបចំប្រភេទកីឡាទាំងពីរឲ្យមានក្នុងការប្រកួតកីឡាស៊ីហ្គេមឆ្នាំ២០២៣ នៅកម្ពុជា ដើម្បីជាផ្នែកមួយនៃកិច្ចខិតខំឈានឆ្ពោះទៅរកការបង្រួបបង្រួមឧបទ្វីបកូរ៉េផងដែរ។គួរដឹងថា សម្រាប់កម្ពុជាបច្ចុប្បន្នគឺមានទាំងប្រភេទកីឡាតេក្វាន់ដូ WT របស់កូរ៉េខាងត្បូង ដែលដឹកនាំដោយឯកឧត្តមបណ្ឌិតសភាចារ្យ ហង់ជួន ណារ៉ុន ជាប្រធានសហព័ន្ធ និងតេក្វាន់ដូ ITF របស់កូរ៉េខាងជើង ដែលមានឯកឧត្តម កែវ រ៉េមី ជាប្រធានសហព័ន្ធ។ កីឡាទាំងពីរត្រូវបានចាត់ទុកជាកីឡាសក្ដានុពលជាតិដូចគ្នា ដើម្បីត្រៀមការប្រកួតប្រជែងលើឆាកអន្ដរជាតិ ពិសេសត្រៀមដាក់បញ្ចូលក្នុងស៊ីហ្គេម ឆ្នាំ២០២៣ នៅកម្ពុជាតែម្ដង។ អ្វីដែលពិសេសទាំងកីឡាតេក្វាន់ដូ WT និង ITF សុទ្ធតែបានធ្វើឲ្យពិភពលោកបានស្គាល់ប្រទេសកម្ពុជាកាន់តែច្បាស់ ក្នុងនោះកីឡាតេក្វាន់ដូ WT ធ្លាប់ដណ្ដើមបានមេដាយកម្រិតអន្ដរជាតិជាច្រើន ពិសេសមេដាយមាសកីឡាអាស៊ីលើកដំបូង ដែលដណ្ដើមបានដោយកីឡាការិនី ស៊ន សៀវម៉ី កាលពីឆ្នាំ២០១៤។ រីឯកីឡាតេក្វាន់ដូ ITF គឺដណ្ដើមបានមេដាយអន្ដរជាតិជាច្រើនដូចគ្នា ក្នុងនោះក៏ធ្លាប់ដណ្ដើមបានមេដាយមាសពិភពលោកដោយកីឡាករ ប៉ាល់ ជីវ័ន្ដ កាលពីឆ្នាំ២០១៩ ជាដើម៕អត្ថបទ៖ លី ឈុនឡា

សម្ដេចតេជោ ហ៊ុន សែន កោតសរសើរការខិតខំហ្វឹកហាត់របស់កីឡាករ-កីឡាការិនីក្នុងសម័យកូវីដ-១៩

ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងកោតសរសើរចំពោះកិច្ចខិតខំប្រឹងប្រែងរបស់កីឡាករ-កីឡាការិនីទាំងអស់ក្នុងការហ្វឹកហាត់ ទោះបីស្ថិតក្នុងសម័យកូវីដ-១៩ ក៏ដោយដើម្បីពង្រឹងសមត្ថភាព និងបច្ចេកទេសត្រៀមការប្រកួតថ្នាក់ជាតិ-អន្ដរជាតិ ពិសេសត្រៀមស៊ីហ្គេមឆ្នាំ២០២៣ ដែលនៅសល់រយៈពេល ៤៨០ថ្ងៃទៀត។ការកោតសរសើររបស់ប្រមុខរាជរដ្ឋាភិបាលកម្ពុជានេះ ធ្វើឡើងស្របពេលសម្ដេចបានអញ្ជើញជាអធិបតីភាពដ៏ខ្ពង់ខ្ពស់ ក្នុងពិធីប្រគល់ប្រាក់រង្វាន់ជ័យលាភីដល់វីរកីឡាការិនី អ៊ុក ស្រីមុំ ក្រោយដណ្ដើមបានមេដាយមាសពិភពលោកក្នុងការប្រកួតកីឡាប៉េតង់ នៅប្រទេសអេស្ប៉ាញកាលពីខែវិច្ឆិកា ឆ្នាំ២០២១ នៅព្រឹកថ្ងៃទី០៥ ខែមករា ឆ្នាំ២០២២ នេះនៅវិមានសន្តិភាព។ សម្ដេចតេជោនាយករដ្ឋមន្ដ្រីមានប្រសាសន៍ថា ទោះបីក្នុងសម័យកូវីដ-១៩ តែកីឡាករ-កីឡាការិនីទាំងអស់នៅតែបន្ដការខិតខំប្រឹង ពិសេសគ្រប់ភាគីពាក់ព័ន្ធដែលបានសម្រួលដល់ការហ្វឹកហាត់របស់កីឡាករ-កីឡាការិនី តាមរយៈការផ្ដល់នូវប្រាក់សម្រាប់ទទួលប្រចាំថ្ងៃក្នុងមួយថ្ងៃ ៤៤,០០០រៀលបន្ថែមលើប្រាក់បៀវត្សប្រចាំខែ ដោយបែងចែកជា ៣កម្រិតគឺកម្រិតអ្នកធ្លាប់បានទទួលមេដាយស៊ីហ្គេម ទី២-កម្រិតអ្នកធ្លាប់ទទួលបានមេដាយកីឡាអាស៊ី និងទី៣-អ្នកមិនទាន់ទទួលបានមេដាយក៏នៅតែទទួលបានថវិកា សម្រាប់ការហ្វឹកហាត់ជាមួយគ្នាដែរ។តាមរយៈនេះ សម្ដេចតេជោ ហ៊ុន សែន បានជំរុញ និងលើកទឹកចិត្តឲ្យកីឡាករ-កីឡាការិនីទាំងអស់ត្រូវបន្ដការខិតខំប្រឹងប្រែងហ្វឹកហាត់បន្ថែមទៀត ដើម្បីត្រៀមការប្រកួត និងដណ្ដើមជ័យលាភី ក៏ដូចជាកិត្តិយសជូនជាតិជាបន្ដបន្ទាប់ទៀត ពិសេសការប្រកួតកីឡាស៊ីហ្គេម ឆ្នាំ២០២៣ នៅកម្ពុជា។ សម្ដេចតេជោបានសង្កត់ធ្ងន់ថា ដាច់ខាតត្រូវពង្រឹង និងយកចិត្តទុកដាក់លើការហ្វឹកហាត់ ព្រោះបើគ្មានការហ្វឹកហាត់គឺមិនដឹងចូលរួមប្រកួតដើម្បីអ្វីឡើយ។ ដូច្នេះត្រូវតែពង្រឹងការហ្វឹកហាត់ឲ្យបានខ្លាំង៕អត្ថបទ៖ គង់ ហួន

បារាំងរកឃើញវីរុស COVID-19 បម្លែងខ្លួនថ្មី IHU ដែលមានសមត្ថភាពចម្លងខ្លាំងជាងវីរុស Omicron

បារាំង៖ ទោះបីជាពិភពលោកកំពុងប្រយុទ្ធប្រឆាំងនឹងការកើនឡើងនៃករណីឆ្លងវីរុស COVID-19 បម្លែងខ្លួនថ្មី Omicron ក្រុមអ្នកវិទ្យាសាស្ត្រនៅប្រទេសបារាំងបានរកឃើញវីរុសបម្លែងខ្លួនថ្មីមួយប្រភេទផ្សេងទៀត។ វីរុសបម្លែងខ្លួនថ្មី (B.1.640.2) ដែលត្រូវបានរកឃើញនៅក្នុងអ្នកខ្លួនជំងឺ ១២នាក់នៅជិតទីក្រុង Marseille មានការវិវត្តិន៍ ៤៦ដងដែលធ្វើឱ្យវាកាន់តែធន់ទៅនឹងវ៉ាក់សាំង និងងាយឆ្លង។ការរកឃើញវីរុសបម្លែងខ្លួនថ្មីដែលត្រូវបានគេហៅថា B.1.640.2 ត្រូវបានប្រកាសនៅក្នុងក្រដាសមួយសន្លឹកដែលបានបង្ហោះនៅលើ គេហទំព័រអ៊ីនធឺណិត med Rxiv។ ដោយត្រូវបានគេហៅឈ្មោះថា IHU រហូតមកដល់ពេលនេះវីរុសនេះត្រូវបានរកឃើញដោយក្រុមស្រាវជ្រាវ ដែលមានមូលដ្ឋាននៅមជ្ឈមណ្ឌលគ្រប់គ្រង និងបង្ការជំងឺឆ្លង IHU Mediterranee Infection របស់ប្រទេសបារាំងកាលពីថ្ងៃទី១០ ខែធ្នូ។ បច្ចុប្បន្ននេះវីរុសបម្លែងខ្លួនថ្មី Omicron គឺជាវីរុសឆ្លងដ៏លេចធ្លោនៅក្នុងប្រទេសបារាំង ដោយបានស្ថិតក្នុងចំណោមបណ្តាប្រទេសនៅតំបន់អឺរ៉ុបផ្សេងទៀតដូចជាចក្រភពអង់គ្លេស និងព័រទុយហ្គាល់ ខណៈមានចំនួនករណីឆ្លងកើនឡើងខ្ពស់ក្នុងរយៈពេលប៉ុន្មានថ្ងៃកន្លងមកនេះ។ រហូតមកដល់ពេលនេះមានករណីឆ្លងចំនួន ១២នាក់ត្រូវបានគេប្រទះឃើញនៅជិតទីក្រុង Marseille ដោយជាប់ពាក់ព័ន្ធដំបូងទៅនឹងការធ្វើដំណើរទៅកាន់ប្រទេសកាមេរូនក្នុងទ្វីបអាហ្វ្រិក។ករណីឆ្លងវីរុសកូរ៉ូណាបម្លែងខ្លួនថ្មី Omicron ត្រូវបានបញ្ជាក់ប្រចាំថ្ងៃជាមធ្យមដល់ទៅជាង ១៦០,០០០នាក់ក្នុងមួយថ្ងៃក្នុងសប្តាហ៍កន្លងទៅ និងមានកម្រិតខ្ពស់បំផុតជាង ២០០,០០០នាក់។ នៅក្នុងការប៉ុនប៉ងដើម្បីទប់ទល់នឹងការកើនឡើងការចម្លងខ្ពស់នេះ ក្រុមសមាជិកសភាបារាំងបានស្នើច្បាប់ ដែលតម្រូវឱ្យមនុស្សភាគច្រើនត្រូវចាក់វ៉ាក់សាំងប្រឆាំងនឹងវីរុស Covid-19 ដើម្បីអាចចូលទៅក្នុងទីសាធារណៈដូចជាបារ ភោជនីយដ្ឋាន និងការដឹកជញ្ជូនសាធារណៈផ្លូវឆ្ងាយជាដើម៕អត្ថបទ៖ សុខមាន

WHO រកឃើញភស្តុតាងបន្ថែមទៀតដែលបញ្ជាក់ថា វីរុសបម្លែងខ្លួនថ្មី Omicron បង្កឲ្យមានរោគសញ្ញាស្រាល

WHO៖ មន្ត្រីអង្គការសុខភាពពិភពលោកបាននិយាយកាលពីថ្ងៃអង្គារទី៤ ខែមករាថា មានភស្តុតាងកាន់តែច្រើនកំពុងលេចឡើងដែលបង្ហាញថា វីរុសកូរ៉ូណាបម្លែងខ្លួនថ្មី Omicron កំពុងប៉ះពាល់ដល់ផ្លូវដង្ហើមផ្នែកខាងលើ ដែលបណ្តាលឱ្យមានរោគសញ្ញាស្រាលជាងវីរុសបម្លែងខ្លួនមុនៗ ហើយបណ្តាលឱ្យមានភាពខុសប្លែកគ្នារវាងចំនួនករណីឆ្លងកើនឡើង និងអត្រាស្លាប់ទាប។ លោក Abdi Mahamud អ្នកគ្រប់គ្រងឧបទ្ទវហេតុរបស់អង្គការសុខភាពពិភពលោក (WHO) បានប្រាប់អ្នកសារព័ត៌មានដែលមានមូលដ្ឋាននៅទីក្រុងហ្សឺណែវថា យើងកំពុងមើលឃើញការសិក្សាកាន់តែច្រើនឡើងៗ ដែលចង្អុលបង្ហាញថា វីរុសបម្លែងខ្លួនថ្មី Omicron កំពុងឆ្លងផ្នែកខាងលើនៃរាងកាយ។ មិនដូចជាវីរុសផ្សេងទៀតដែលនឹងបង្កឱ្យមានជំងឺរលាកសួតធ្ងន់ធ្ងរ។ វាអាចជាដំណឹងដ៏ល្អមួយ ប៉ុន្តែយើងពិតជាទាមទារឱ្យមានការសិក្សាបន្ថែមទៀត ដើម្បីបញ្ជាក់អំពីរឿងនេះឲ្យកាន់តែច្បាស់។ចាប់តាំងពីវីរុសបម្លែងខ្លួនថ្មីដែលបានវិវត្តន៍ខ្លួនយ៉ាងលឿន ត្រូវបានរកឃើញជាលើកដំបូងកាលពីខែវិច្ឆិកានៅអាហ្វ្រិក ទិន្នន័យរបស់អង្គការសុខភាពពិភពលោកបង្ហាញថា វីរុសនេះបានរីករាលដាលយ៉ាងឆាប់រហ័ស និងបានរាតត្បាតនៅក្នុងប្រទេសយ៉ាងហោចណាស់ ១២៨ ដោយបង្ហាញពីភាពលំបាកសម្រាប់ប្រទេសជាច្រើន និងមនុស្សដែលកំពុងស្វែងរកការចាប់ផ្ដើមសេដ្ឋកិច្ច និងជីវិតរបស់ពួកគេឡើងវិញ បន្ទាប់ពីការរំខានដោយសារជំងឺ COVID-19 ជិតពីរឆ្នាំមកនេះ៕អត្ថបទ៖ សុខមាន

វីរកីឡាការិនី អ៊ុក ស្រីមុំ ទទួលបានថវិកាលើកទឹកចិត្តពីរាជរដ្ឋាភិបាល និងសម្ដេចតេជោ ហ៊ុន សែន សរុប ២ម៉ឺនដុល្លារ

ប៉េតង់៖ វីរកីឡាការិនី អ៊ុក ស្រីមុំ បានទទួលប្រាក់រង្វាន់ពីរាជរដ្ឋាភិបាល និងថវិកាលើកទឹកចិត្តផ្ទាល់របស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន សរុបចំនួន ២ម៉ឺនដុល្លារ។ ពិធីប្រគល់ប្រាក់រង្វាន់លើកទឹកចិត្តនេះបានធ្វើឡើងក្រោមអធិបតីភាពដ៏ខ្ពង់ខ្ពស់របស់សម្ដេចតេជោ ហ៊ុន សែន នៅវិមានសន្ដិភាពនៅព្រឹកថ្ងៃទី០៥ ខែមករា ឆ្នាំ២០២២ នេះ បន្ទាប់ពីវីរកីឡាការិនី អ៊ុក ស្រីមុំ ដណ្ដើមបានមេដាយមាសពិភពលោកពីការប្រកួតកីឡាប៉េតង់ នៅទីក្រុងសាន់តាស៊ូសាណា ប្រទេសអេស្ប៉ាញ កាលពីថ្ងៃទី១៤ ខែវិច្ឆិកា ឆ្នាំ២០២១ កន្លងទៅ។សម្ដេចតេជោនាយករដ្ឋមន្ដ្រីបានធ្វើការកោតសរសើរ និងវាយតម្លៃខ្ពស់ចំពោះវិស័យកីឡាប៉ូល និងប៉េតង់កម្ពុជាដែលបានរក្សានូវភាពខ្លាំងតជំនាន់ តាមរយៈការដណ្ដើមបានមេដាយមាសពិភពលោក ៥ជំនាន់ជាប់ៗគ្នាដោយវីរកីឡាការិនី កែ ឡេង ចំនួន ៤ជំនាន់កាលពីឆ្នាំ២០១៣, ២០១៥, ២០១៧ និងឆ្នាំ២០១៩ មុនបន្ដឈ្នះមេដាយមាសពិភពលោកជំនាន់ទី៥ លើវិញ្ញាសាវាយយកពិន្ទុដដែលដោយវីរកីឡាការិនី អ៊ុក ស្រីមុំ។ សម្ដេចមានប្រសាសន៍បន្ដថា ជ័យលាភីនេះមិនមែនជារបស់កីឡាការិនី អ៊ុក ស្រីមុំ តែម្នាក់ឯងនោះទេ តែវាជាកិត្តិយសជាតិ និងប្រជាជនកម្ពុជាទាំងជាង ១៦លាននាក់។ ម្លោះហើយទើបមានការរៀបចំនូវក្បួនដង្ហែរម៉ូតូ ១២គ្រឿងអមដំណើររៀងរាល់ដំណើរវិលត្រឡប់របស់ម្ចាស់មេដាយមាសពិភពលោកពេលមកដល់ប្រទេសកម្ពុជាវិញ ដែលជាការអមដំណើរនូវមេដាយមាសដែលកម្ពុជាដណ្ដើមបាន។ សម្ដេចតេជោ ហ៊ុន សែន បានបង្ហាញនូវមោទនភាព និងឆ្លៀតឱកាសរំលឹកដល់សម្ដេចវិបុលបញ្ញា សុខ អាន ដែលជាអតីតប្រធានសហព័ន្ធ និងបានខិតខំពង្រឹងកីឡាមួយនេះ ក៏ដូចជាសម្ដេចក្រឡាហោម ស ខេង ដែលនៅតែបន្ដការខិតខំជួយជ្រោមជ្រែងកីឡានេះឲ្យទទួលបានជោគជ័យលើឆាកអន្ដរជាតិជាបន្ដបន្ទាប់។ក្នុងឱកាសនោះ សម្ដេចក៏បានផ្ដាំផ្ញើដល់អ្នកបន្ដវេណសហព័ន្ធគឺឯកឧត្តម ស សុខា ត្រូវបន្ដដឹកនាំកីឡាដែលជាចំណុចខ្លាំងរបស់កម្ពុជា ឲ្យរក្សាបាននូវភាពខ្លាំង តាមរយៈការដណ្ដើមបានមេដាយមាសពិភពលោកជាបន្ដបន្ទាប់ទៀត មិនត្រឹមតែកីឡាស៊ីហ្គេម ឬអាស៊ីនោះទេ។ ដើម្បីអបអរសាទរ និងលើកទឹកចិត្តដល់វីរកីឡាការិនី អ៊ុក ស្រីមុំ ដែលដណ្ដើមបានមេដាយមាសពិភពលោកជំនាន់ទី៥ លើវិញ្ញាសាវាយយកពិន្ទុជូនកម្ពុជានេះ សម្ដេចតេជោនាយករដ្ឋមន្ដ្រី ក៏បានប្រកាសឧបត្ថម្ភនូវថវិកាលើកទឹកចិត្តចំនួន ៤០លានរៀលដែលជាថវិការបស់រាជរដ្ឋាភិបាលតាមរយៈក្រសួងអប់រំ យុវជន និងកីឡា ហើយសម្ដេចតេជោ និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន បានបន្ថែមការឧបត្ថម្ភថវិកាផ្ទាល់របស់សម្ដេចទាំងទ្វេចំនួន ១ម៉ឺនដុល្លារទៀតសរុបចំនួន ២ម៉ឺនដុល្លារ។ ដោយឡែកលោក សុខ ម៉ុង គ្រូបង្វឹកក្រុមជម្រើសជាតិកីឡាប៉េតង់កម្ពុជាផ្នែកនារីដែលដឹកនាំវីរកីឡាការិនី អ៊ុក ស្រីមុំ ដណ្ដើមបានមេដាយមាសពិភពលោកនេះក៏ទទួលបានប្រាក់រង្វាន់ ៤០លានរៀលជាថវិការបស់រាជរដ្ឋាភិបាលតាមរយៈក្រសួងអប់រំ យុវជន និងកីឡា ព្រមទាំងទទួលបានថវិកាផ្ទាល់របស់សម្ដេចតេជោ និងសម្ដេចកិត្តិព្រឹទ្ធបណ្ឌិតចំនួន ៥ពាន់ដុល្លារសរុបចំនួន ១៥,០០០ដុល្លារផងដែរ៕អត្ថបទ៖ លី ឈុនឡា

សហរដ្ឋអាមេរិកបានបង្កើតកំណត់ត្រាពិភពលោកនៃករណីឆ្លង COVID-19 ជិត ១លាននាក់ក្នុងមួយថ្ងៃ

សហរដ្ឋអាមេរិក៖ យោងតាមតួលេខរបស់សារព័ត៌មាន Reuters សហរដ្ឋអាមេរិកបានបង្កើតកំណត់ត្រាពិភពលោកនៃការឆ្លងថ្មីនៃវីរុស COVID-19 ជិត ១លាននាក់ដែលត្រូវបានរាយការណ៍កាលពីថ្ងៃចន្ទដើមសប្ដាហ៍នេះ ជិតពីរដងនៃការកើនឡើងខ្ពស់បំផុតរបស់ប្រទេសនេះកាលពីមួយសប្តាហ៍មុន ខណៈដែលវីរុសបម្លែងខ្លួនថ្មី Omicron កំពុងឆ្លងខ្លាំងដោយគ្មានសញ្ញាបង្ហាញពីការថយចុះនោះទេ។ការវិភាគរបស់សារព័ត៌មាន Reuters បានបង្ហាញថា ចំនួនអ្នកជំងឺ COVID-19 ដែលចូលសម្រាកព្យាបាលនៅមន្ទីរពេទ្យបានកើនឡើងជិត ៥០% ក្នុងសប្តាហ៍មុន ហើយឥឡូវនេះមានជាង ១០០,០០០នាក់ជាចំនួនខ្ពស់បំផុតលើកដំបូង ចាប់តាំងពីការកើនឡើងខ្ពស់កាលពីរដូវរងាមួយឆ្នាំមុន។ សរុបមកសហរដ្ឋអាមេរិកបានឃើញករណីឆ្លងជាមធ្យមប្រចាំថ្ងៃចំនួន ៤៨៦,០០០នាក់កាលពីសប្ដាហ៍មុន ជាអត្រាមួយបានកើនឡើងទ្វេដងក្នុងរយៈពេល ៧ថ្ងៃ និងលើសពីប្រទេសដទៃទៀត។ ការឆ្លងថ្មីចំនួន ៩៧៨,៨៥៦នាក់កាលពីថ្ងៃចន្ទ រួមទាំងករណីឆ្លងមួយចំនួនចាប់ពីថ្ងៃសៅរ៍ និងថ្ងៃអាទិត្យនៅពេលដែលបណ្ដារដ្ឋជាច្រើនមិនរាយការណ៍។យោងតាមតួលេខរបស់សារព័ត៌មាន Reuters ចំនួនជាមធ្យមនៃការស្លាប់ដោយសារវីរុស COVID-19 នៅសហរដ្ឋអាមេរិកក្នុងមួយថ្ងៃនៅតែឋេរពេញមួយខែធ្នូ និងចូលដល់ដើមខែមករានៅប្រហែល ១,៣០០នាក់ ទោះបីជាការស្លាប់ជាធម្មតាតិចជាងករណីឆ្លង និងការចូលសម្រាកព្យាបាលនៅមន្ទីរពេទ្យក៏ដោយ៕ អត្ថបទ៖ សុខមាន

អង្គការសហប្រជាជាតិ៖ ពលរដ្ឋមីយ៉ាន់ម៉ាជាង ១៤លាននាក់ត្រូវការជំនួយមនុស្សធម៌បន្ទាន់

មីយ៉ាន់ម៉ា៖ ទីភ្នាក់ងារអង្គការសហប្រជាជាតិនិយាយថា ប្រជាជនជាង ១៤លាននាក់នៅសហភាពមីយ៉ាន់ម៉ាប្រហែលមួយភាគបួន នៃចំនួនប្រជាជនរបស់ប្រទេសនេះនឹងត្រូវការជំនួយមនុស្សធម៌នៅឆ្នាំនេះ។ ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ ឬ OCHA បានចេញផ្សាយរបាយការណ៍មួយស្តីពីតម្រូវការមនុស្សធម៌នៅមីយ៉ាន់ម៉ា។របាយការណ៍បាននិយាយថា តម្លៃស្បៀងអាហារ និងប្រេងឥន្ធនៈបានកើនឡើង បន្ទាប់ពីយោធាបានដណ្ដើមអំណាចក្នុងរដ្ឋប្រហារកាលពីខែកុម្ភៈ។ របាយការណ៍ដដែលនេះក៏បាននិយាយផងដែរថា ជំងឺរាតត្បាតសកលបានធ្វើឱ្យស្ថានភាពមនុស្សធម៌របស់ប្រទេសនេះកាន់តែធ្ងន់ធ្ងរទៅៗ។ អង្គការនេះបានប៉ាន់ប្រមាណថា មនុស្ស ១៤.៤លាននាក់នឹងត្រូវការជំនួយដូចជាអាហារ និងការផ្គត់ផ្គង់វេជ្ជសាស្ត្រ។ ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ បានសម្ដែងការព្រួយបារម្ភអំពីផលប៉ះពាល់នៃវីរុសរាតត្បាតសកលលើការអប់រំ។អង្គការខាងលើនេះបានកត់សម្គាល់ថា ការសិក្សាត្រូវបានរំខានដល់កុមារប្រហែល ១២លាននាក់ក្នុងឆ្នាំ២០២០ និង ២០២១ ដោយសារការបិទសាលារៀន។ របាយការណ៍បាននិយាយថា "ប្រជាជនមីយ៉ាន់ម៉ាកំពុងប្រឈមនឹងវិបត្តិនយោបាយ សេដ្ឋកិច្ចសង្គម សិទ្ធិមនុស្ស និងមនុស្សធម៌ដែលមិនធ្លាប់មានពីមុនមក ខណៈមានតម្រូវការខ្ពស់សម្រាប់ជីវភាពប្រចាំថ្ងៃ។ កាលពីចុងខែធ្នូ ឆ្នាំ២០២១ ការវាយប្រយុទ្ធគ្នារវាងរដ្ឋាភិបាលមីយ៉ាន់ម៉ាគ្រប់គ្រងដោយយោធា និងក្រុមទ័ពព្រៃជនជាតិភាគបានបង្ខំឲ្យអ្នកស្រុកជាង ៤,០០០នាក់រត់គេចខ្លួនឆ្លងព្រំដែនចូលទៅប្រទេសថៃ៕អត្ថបទ៖ សុខមាន

មហាអំណាចពិភពលោកប្ដេជ្ញាទប់ស្កាត់ការរីកសាយអាវុធនុយក្លេអ៊ែរ

ពិភពលោក៖ មហាអំណាចនុយក្លេអ៊ែរពិភពលោកចំនួន ៥ បានសន្យាកាលពីថ្ងៃចន្ទដើម្បីទប់ស្កាត់ការរីកសាយនៃអាវុធបរមាណូ និងដើម្បីបញ្ចៀសជម្លោះនុយក្លេអ៊ែរនៅក្នុងសេចក្ដីថ្លែងការណ៍រួមដ៏កម្រមួយ ដែលទុកដោយឡែកពីការកើនឡើងនៃភាពតានតឹងរវាងបណ្ដាប្រទេសលោកខាងលិច និងអឺរ៉ុបខាងកើត ដើម្បីបញ្ជាក់ឡើងវិញនូវគោលដៅរបស់ពិភពលោកដែលគ្មាននុយក្លេអ៊ែរ។សេចក្ដីថ្លែងការណ៍កាលពីថ្ងៃចន្ទបាននិយាយថា សហរដ្ឋអាមេរិក ចក្រភពអង់គ្លេស រុស្ស៊ី ចិន និងបារាំង ដែលជាសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ ចាត់ទុកការប្ដេជ្ញានេះជាទំនួលខុសត្រូវចម្បងរបស់ពួកគេ ក្នុងការបញ្ចៀសសង្គ្រាមរវាងរដ្ឋនុយក្លេអ៊ែរ និងកាត់បន្ថយហានិភ័យជាយុទ្ធសាស្ត្រ ខណៈដែលមានបំណងធ្វើការជាមួយប្រទេសទាំងអស់ ដើម្បីបង្កើតបរិយាកាសសន្តិសុខ។ សេចក្ដីថ្លែងការណ៍នេះត្រូវបានចេញផ្សាយបន្ទាប់ពីការពិនិត្យឡើងវិញចុងក្រោយ នៃសន្ធិសញ្ញាស្ដីពីការមិនរីកសាយភាយអាវុធនុយក្លេអ៊ែរ (NPT) ដែលបានចូលជាធរមានដំបូងក្នុងឆ្នាំ១៩៧០ ត្រូវបានពន្យារពេលពីកាលបរិច្ឆេទដែលបានកំណត់ទុកនៅថ្ងៃទី៤ ខែមករាដល់ចុងឆ្នាំដោយសារតែវីរុសរាតត្បាតសកល COVID-19។ ទោះបីជាភាពតានតឹងនាពេលថ្មីៗនេះរវាងចិន និងរុស្ស៊ី និងដៃគូលោកខាងលិចរបស់ពួកគេក៏ដោយ ក៏មហាអំណាចទាំង ៥ បាននិយាយថា ពួកគេមើលឃើញការបញ្ចៀសសង្គ្រាមរវាងបណ្ដារដ្ឋអាវុធនុយក្លេអ៊ែរ និងការកាត់បន្ថយហានិភ័យជាយុទ្ធសាស្ត្រជាទំនួលខុសត្រូវចម្បងរបស់ពួកគេ។សេចក្ដីថ្លែងការណ៍នេះធ្វើឡើង ខណៈភាពតានតឹងរវាងរុស្ស៊ី និងសហរដ្ឋអាមេរិកបានឈានដល់កម្រិតខ្ពស់ ដែលកម្របានឃើញចាប់តាំងពីសង្គ្រាមត្រជាក់ ជុំវិញការបង្កើនកម្លាំងកងទ័ពរុស្ស៊ីនៅជិតព្រំដែនអ៊ុយក្រែន។ ទន្ទឹមនឹងនេះការកើនឡើងឥទ្ធិពលរបស់ប្រទេសចិនក្រោមការដឹកនាំរបស់លោកប្រធានាធិបតី Xi Jinping ក៏បានលើកឡើងពីការព្រួយបារម្ភថា ភាពតានតឹងជាមួយទីក្រុងវ៉ាស៊ីនតោនអាចបង្កឱ្យមានជម្លោះ ជាពិសេសលើបញ្ហាកោះតៃវ៉ាន់។ សេចក្តីថ្លែងការណ៍រួមនេះក៏បានកើតឡើងផងដែរ ស្របពេលដែលមហាអំណាចពិភពលោកព្យាយាមឈានដល់កិច្ចព្រមព្រៀងជាមួយអ៊ីរ៉ង់ ស្តីពីការស្រោចស្រង់ឡើងវិញនូវកិច្ចព្រមព្រៀងឆ្នាំ២០១៥ ជុំវិញការបង្កើនការផលិតនុយក្លេអ៊ែរដ៏ចម្រូងចម្រាសរបស់ខ្លួន ដែលត្រូវបានធ្វើឱ្យរង្គោះរង្គើដោយសារសហរដ្ឋអាមេរិក ដើរចេញពីកិច្ចព្រមព្រៀងក្នុងឆ្នាំ២០១៨ ក្រោមរដ្ឋបាលលោក Trump៕អត្ថបទ៖ សុខមាន

កំណើនករណីឆ្លងវីរុស COVID-19 កើនឡើងជិតដល់ ៣០០លាននាក់លើពិភពលោក

ពិភពលោក៖ ខណៈមានការកើនឡើងជាសកលនៃករណីវីរុស COVID-19 ខិតជិតដល់ ៣០០លាននាក់ ប្រទេសមួយចំនួនបានមើលឃើញស្ថានភាពជំងឺរាតត្បាតកាន់តែធ្ងន់ធ្ងរ ក្នុងរយៈពេលប៉ុន្មានថ្ងៃថ្មីៗនេះដោយមានករណីឆ្លងថ្មី និងស្លាប់ដែលមិនគួរឱ្យជឿកើនឡើងគួរឱ្យព្រួយបារម្ភ។ រហូតមកដល់ពេលនេះករណីឆ្លងវីរុស COVID-19 នៅទូទាំងពិភពលោកបានកើនឡើងដល់ ២៩០,៤៣៩,៤៤៣ករណី និងមានអ្នកស្លាប់ ៥,៤៥៩,៨០០នាក់។សហរដ្ឋអាមេរិកមានកំណត់ត្រាថ្មីជាច្រើននៅក្នុងសូចនាករវីរុស COVID-19 នៅពេលដែលជំងឺរាតត្បាតឈានចូលដល់ឆ្នាំទី៣ របស់ខ្លួន ហើយអ្នកជំនាញសុខភាពបានព្រមានអំពីរលកនៃជំងឺរាតត្បាតនៅឆ្នាំ២០២២ នេះ។ យោងតាមទិន្នន័យចុងក្រោយរបស់សកលវិទ្យាល័យ Johns Hopkins បានឲ្យដឹងថា សហរដ្ឋអាមេរិកបានបំបែកកំណត់ត្រាករណីឆ្លងវីរុស COVID-19 ប្រចាំថ្ងៃម្តងទៀត ខណៈករណីឆ្លងប្រចាំថ្ងៃមានជាង ៥៨០,០០០ករណីត្រូវបានកត់ត្រាទូទាំងប្រទេសនៅថ្ងៃទី៣០ ខែធ្នូ។ សហរដ្ឋអាមេរិកមានករណីឆ្លងសរុប ៥៦,០៥២,៦៣៨ករណី និងមានអ្នកស្លាប់ ៨៤៧,៣០០នាក់។ ការកើនឡើងថ្មីនៃវីរុសឆ្លងជាមួយនឹងវីរុសបម្លែងខ្លួនថ្មីទាំង Omicron និង Delta បានធ្វើឱ្យសហរដ្ឋអាមេរិកស្ថិតក្នុងភាពវឹកវរដ៏ស្មុគស្មាញ នៃសេវាវេជ្ជសាស្ត្រដែលគ្មានមានបុគ្គលិក ក៏ដូចជាការលុបចោលជើងហោះហើររាប់ពាន់ជើង។ ចក្រភពអង់គ្លេសមានករណីឆ្លងវីរុស COVID-19 សរុប ១៣,២៣៥,៤០១ករណី និងមានអ្នកស្លាប់ចំនួន ១៤៨,៨៥១នាក់។ ចំនួនសរុបនៃករណីវីរុស COVID-19 នៅប្រទេសបារាំងមានចំនួន ១០,២៥០,៣៥៨ករណី និងមានអ្នកស្លាប់ ១២៣,៩៤២នាក់។ វាជាថ្ងៃទី៤ ជាប់ៗគ្នាដែលប្រទេសបារាំងបានរាយការណ៍ពីចំនួនករណីឆ្លងជំងឺ COVID-19 ប្រចាំថ្ងៃជាង ២០០,០០០ករណី។ ក្រសួងសុខាភិបាលបារាំងបានប្រកាសថា ប្រជាជនជិត ៥៣លាននាក់បានចាក់វ៉ាក់សាំងយ៉ាងហោចណាស់ដូសទី១ ដែលស្មើនឹងប្រមាណ ៧៨.៥% នៃចំនួនប្រជាជនរបស់ប្រទេស ហើយប្រមាណ ២៥លាននាក់បានចាក់វ៉ាក់សាំងដូសជំរុញ៕អត្ថបទ៖ ប៊ុនថន

បណ្ដាញសង្គម

ព័ត៌មានថ្មីៗ

ប្រធានាធិបតីកូរ៉េខាងត្បូង លោក Lee នឹងចូលរួមកិច្ចប្រជុំកំពូលណាតូ នៅទួរគី

ចិនអំពាវនាវឱ្យមាន «ការដោះស្រាយសមស្រប» ដើម្បីបញ្ចប់ការរំខាន នៅច្រកសមុទ្រ Hormuz

ឥណ្ឌូនេស៊ីរកឃើញសាកសពអ្នកបើកបរយន្តហោះអាមេរិកដែលត្រូវបានសម្លាប់ដោយក្រុមឧទ្ទាមនៅតំបន់ប៉ាពួ

ការវាយប្រហារយានដ្រូនរុស្ស៊ីសម្លាប់មនុស្ស ៤នាក់ រួមទាំងកុមារម្នាក់ នៅតំបន់ Sumy របស់អ៊ុយក្រែន

នគរបាលរុស្ស៊ីចាប់ខ្លួនអ្នកលក់ប្រេងខុសច្បាប់ ស្របពេលជួបវិបត្តិប្រេងឥន្ធនៈ

មនុស្សជាង ១០០នាក់ កើតជំងឺសុរិយារោគ ក្នុងព្រឹត្តការណ៍រថភ្លើងប្រវត្តិសាស្រ្តនៅរដ្ឋ Pennsylvania សហរដ្ឋអាមេរិក

នាយករដ្ឋមន្ត្រីប៊ុលហ្គារីបញ្ជាក់ពីការត្រៀមខ្លួនរួចជាស្រេចដើម្បីវេតូកញ្ចប់ទណ្ឌកម្មលើកទី ២១ របស់EU ប្រឆាំងនឹងរុស្ស៊ី

មេដឹកនាំអូម៉ង់ និងនាយករដ្ឋមន្ត្រីអង់គ្លេស ពិភាក្សាអំពីការធ្វើនាវាចរណ៍នៅក្នុងផ្លូវទឹកនៃឈូងសមុទ្រ

នាយករដ្ឋមន្រ្តីប៉ាគីស្ថាន បានចេញដំណើរទៅកាន់អ៊ីរ៉ង់ ដើម្បីចូលរួមពិធីបុណ្យសពមេដឹកនាំកំពូល Khamenei

អ្នកបើកបរតម្រង់ជួរចាក់ប្រេងនៅតាមស្ថានីយក្នុងទីក្រុងមូស្គូ ស្របពេលជួបកង្វះខាតប្រេងនៅរុស្ស៊ី

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានសំខាន់ៗ

សម្ដេចតេជោ ហ៊ុន សែន កោតសរសើរការខិតខំហ្វឹកហាត់របស់កីឡាករ-កីឡាការិនីក្នុងសម័យកូវីដ-១៩

បារាំងរកឃើញវីរុស COVID-19 បម្លែងខ្លួនថ្មី IHU ដែលមានសមត្ថភាពចម្លងខ្លាំងជាងវីរុស Omicron

WHO រកឃើញភស្តុតាងបន្ថែមទៀតដែលបញ្ជាក់ថា វីរុសបម្លែងខ្លួនថ្មី Omicron បង្កឲ្យមានរោគសញ្ញាស្រាល

សហរដ្ឋអាមេរិកបានបង្កើតកំណត់ត្រាពិភពលោកនៃករណីឆ្លង COVID-19 ជិត ១លាននាក់ក្នុងមួយថ្ងៃ

អង្គការសហប្រជាជាតិ៖ ពលរដ្ឋមីយ៉ាន់ម៉ាជាង ១៤លាននាក់ត្រូវការជំនួយមនុស្សធម៌បន្ទាន់

មហាអំណាចពិភពលោកប្ដេជ្ញាទប់ស្កាត់ការរីកសាយអាវុធនុយក្លេអ៊ែរ

កំណើនករណីឆ្លងវីរុស COVID-19 កើនឡើងជិតដល់ ៣០០លាននាក់លើពិភពលោក

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានសំខាន់ៗ

សម្ដេច​តេ​ជោ ហ៊ុន សែន កោតសរសើរ​ការ​ខិតខំ​ហ្វឹកហាត់​របស់​កីឡាករ​-​កីឡា​ការិនី​ក្នុង​សម័យ​កូ​វីដ​-១៩

បារាំង​រក​ឃើញ​វីរុស COVID-19 ប​ម្លែ​ង​ខ្លួន​ថ្មី IHU ដែល​មានសមត្ថភាព​ចម្លង​ខ្លាំង​ជាង​វីរុស Omicron

សហរដ្ឋអាមេរិក​បាន​បង្កើត​កំណត់ត្រា​ពិភពលោក​នៃ​ករណី​ឆ្លង COVID-19 ជិត​ ១​លាន​នាក់​ក្នុង​មួយថ្ងៃ

អង្គការសហប្រជាជាតិ​៖ ពលរដ្ឋ​មី​យ៉ាន់​ម៉ា​ជាង ​១៤​លាន​នាក់​ត្រូវការ​ជំនួយ​មនុស្សធម៌​បន្ទាន់​

មហាអំណាច​ពិភពលោក​ប្ដេជ្ញា​ទប់ស្កាត់​ការ​រីក​សាយ​អាវុធ​នុយក្លេអ៊ែរ​

កំណើន​ករណី​ឆ្លង​វីរុស COVID-19 កើន​ឡើង​ជិត​ដល់ ៣០០​លាន​នាក់​លើ​ពិភព​លោក​

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

សម្ដេចតេជោ ហ៊ុន សែន កោតសរសើរការខិតខំហ្វឹកហាត់របស់កីឡាករ-កីឡាការិនីក្នុងសម័យកូវីដ-១៩

បារាំងរកឃើញវីរុស COVID-19 បម្លែងខ្លួនថ្មី IHU ដែលមានសមត្ថភាពចម្លងខ្លាំងជាងវីរុស Omicron

សហរដ្ឋអាមេរិកបានបង្កើតកំណត់ត្រាពិភពលោកនៃករណីឆ្លង COVID-19 ជិត ១លាននាក់ក្នុងមួយថ្ងៃ

អង្គការសហប្រជាជាតិ៖ ពលរដ្ឋមីយ៉ាន់ម៉ាជាង ១៤លាននាក់ត្រូវការជំនួយមនុស្សធម៌បន្ទាន់

មហាអំណាចពិភពលោកប្ដេជ្ញាទប់ស្កាត់ការរីកសាយអាវុធនុយក្លេអ៊ែរ

កំណើនករណីឆ្លងវីរុស COVID-19 កើនឡើងជិតដល់ ៣០០លាននាក់លើពិភពលោក