BTV NEWS

ព្រះករុណាព្រះមហាក្សត្រ និងសម្ដេចព្រះមហាក្សត្រីយាងនិវត្តន៍មកដល់មាតុភូមិវិញដោយសុវត្ថិភាពបន្ទាប់ពីពិនិត្យ និងព្យាបាលព្រះរោគនៅរដ្ឋធានីប៉េកាំង

សម្ដេចតេជោ និងសម្ដេចធិបតី អបអរសាទរខួបលើកទី៧៥ កម្ពុជា ចូលជាសមាជិកអង្គការយូណេស្កូ

ICRC ប្ដេជ្ញាបន្តគាំទ្រ និងពង្រឹងកិច្ចសហប្រតិបត្តិការជាមួយកម្ពុជា បន្ថែមទៀត

សម្ដេចធិបតី៖ ភាពជោគជ័យរបស់អ្នកដឹកនាំអង្គភាពមួយ គឺការធានាឱ្យអង្គភាពនោះមានសមត្ថភាពបន្តដំណើរការ និងការរីកចម្រើន ទោះបីជាក្នុងពេលអវត្តមានរបស់ខ្លួនក៏ដោយ

ព័ត៌មានសំខាន់ៗ

សហភាពអឺរ៉ុបយល់ព្រមដាក់ទណ្ឌកម្មថ្មីលើបេឡារុស ខណៈវិបត្តិព្រំដែនកាន់តែធ្ងន់ធ្ងរ

អឺរ៉ុប៖ កាលពីថ្ងៃចន្ទសហភាពអឺរ៉ុបបានយល់ព្រមពង្រីកការដាក់ទណ្ឌកម្មបន្ថែមលើប្រទេសបេឡារុស ខណៈដែលវិបត្តិជនអន្តោប្រវេសន៍កាន់តែជ្រៅនៅតាមព្រំដែនរបស់ខ្លួនជាមួយប៉ូឡូញ។ មនុស្សរាប់ពាន់នាក់នៅតែជាប់គាំងនៅក្នុងលក្ខខណ្ឌអាកាសធាតុត្រជាក់ នៅតាមភាគីទាំងពីរនៃព្រំដែនបេឡារុស-ប៉ូឡូញ ដែលត្រូវបានរារាំងមិនឱ្យចូលទៅក្នុងសហភាពអឺរ៉ុបតាមរយៈប្រទេសប៉ូឡូញ ខណៈជម្លោះរវាងប្លុក និងទីក្រុង Minsk ផ្ទុះឡើង។លោក Josep Borrell តំណាងជាន់ខ្ពស់របស់សហភាពអឺរ៉ុបទទួលបន្ទុកកិច្ចការបរទេស និងគោលនយោបាយសន្តិសុខបាននិយាយថា ទណ្ឌកម្មនឹងដាក់គោលដៅបុគ្គល និងអង្គភាពមួយចំនួន ចំពោះការសម្របសម្រួលការឆ្លងកាត់ព្រំដែនខុសច្បាប់ចូលទៅក្នុងសហភាពអឺរ៉ុប។ ប្រទេសប៉ូឡូញ និងសមាជិកសហភាពអឺរ៉ុបផ្សេងទៀតបានចោទប្រកាន់បេឡារុសថា បានលើកទឹកចិត្តប្រជាជនឱ្យឆ្លងកាត់ព្រំដែនចូលប្រទេសប៉ូឡូញ ជាការសងសឹកចំពោះការដាក់ទណ្ឌកម្មរបស់បណ្ដាប្រទេសលោកខាងលិចមកលើទីក្រុង Minsk ជុំវិញការបោះឆ្នោតកាលពីខែសីហា ឆ្នាំ២០២០ ដ៏ចម្រូងចម្រាសដែលបានផ្តល់ឱ្យប្រធានាធិបតីដ៏យូរលោក Lukashenko ឡើងកាន់អាណត្តិទី៦ និងបង្កឱ្យមានការតវ៉ាប្រឆាំងរដ្ឋាភិបាលដ៏ធំ។ទីក្រុង Minsk បានទាត់ចោលការចោទប្រកាន់នេះ ហើយបានគំរាមសងសឹកប្រឆាំងនឹងវិធានការថ្មីណាមួយ រួមទាំងការបិទការផ្គត់ផ្គង់ឧស្ម័នរបស់រុស្ស៊ីទៅកាន់អឺរ៉ុបតាមរយៈបំពង់បង្ហូរប្រេងដែលរត់កាត់បេឡារុស។ ដោយឡែកការិយាល័យរបស់ប្រធានាធិបតីបារាំងបាននិយាយថា ប្រធានាធិបតីបារាំងលោក Emmanuel Macron និងប្រធានាធិបតីរុស្ស៊ីលោក Vladimir Putin បានព្រមព្រៀងគ្នាកាលពីថ្ងៃចន្ទថា ភាពតានតឹងនៅព្រំដែនប៉ូឡូញ-បេឡារុស ជាទីដែលក្រុមជនអន្តោប្រវេសន៍បាននឹងកំពុងកើនឡើងច្រើននោះ ត្រូវតែត្រូវបានកាត់បន្ថយ៕អត្ថបទ៖ សុខមាន

កម្ពុជា-ចិនជំរុញទំហំពាណិជ្ជកម្មឲ្យឡើងដល់១០ពាន់លានដុល្លារក្រោយឯកភាពគ្នាលើកិច្ចព្រមព្រៀងពាណិជ្ជកម្មសេរីនៅឆ្នាំក្រោយ

ភ្នំពេញ ៖ រាជរដ្ឋាភិបាលកម្ពុជា និងសាធារណៈរដ្ឋប្រជាមានិតចិនបានឯកភាពគ្នាដាក់ឱ្យចូលជាធរមាននូវកិច្ចព្រមព្រៀងពាណិជ្ជកម្មសេរីនៅដើមឆ្នាំក្រោយនេះ និងជំរុញពាណិជ្ជកម្មឱ្យកើនដល់១០ពាន់លានដុល្លារក្នុងមួយឆ្នាំៗនោះ។ ថ្លែងប្រាប់អ្នកសារព័ត៌មានក្រោយពីកិច្ចពិភាក្សាការងារ វាងសម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងឯកឧត្តម លី ខឺឈាង នាយករដ្ឋមន្រ្តីនៃសាធារណៈរដ្ឋប្រជាមានិត ចិនតាមរយៈវិដេអូនាថ្ងៃទី១៥ ខែវិច្ឆិកា ឆ្នាំ២០២១នេះ ឯកឧត្តម អ៊ាង សុផល្លែត ជំនួយការផ្ទាល់សម្តេច តេជោ ហ៊ុន សែន បានលើកឡើងថា នៅក្នុងកិច្ចពិភាក្សានោះ សម្ដេចតេជោ និងឯកឧត្តម លី ខឺឈាង បានពិភាក្សាគ្នាលើបញ្ហាសេដ្ឋកិច្ច, ពាណិជ្ជកម្ម,កសិកម្ម,និងទំនាក់ទំនងរវាងប្រជាជននិងប្រជាជន។ ឯកឧត្តមបានបញ្ជាក់ទៀតថា នៅក្នុងកិច្ចជំនួបនោះភាគីទាំងពីរបានឯកភាពគ្នាក្នុងការជំរុញពាណិជ្ជកម្មរវាងប្រទេសទាំងពីរឱ្យកើនឡើងដល់ ១០ ពាន់លានដុល្លារក្នុងមួយឆ្នាំនិងបានឯកភាពគ្នាដាក់ឱ្យចូលជាធរមាននូវកិច្ចព្រមព្រៀងពា ណិជ្ជកម្មសេរីរវាងកម្ពុជា-ចិននៅខែមករាខាងមុខនេះ។ ដោយឡែកលើវិស័យកសិកម្ម ឯកឧត្តម លី ខឺឈាង បានយល់ស្របនឹងជំរុញឲ្យមានការធ្វើការរួមគ្នារវាងភាគីទាំងពីរធ្វើយ៉ាងណាពិភាក្សាចរចាគ្នាលើកូតានាំអង្ករ និងនាំកសិផលកម្ពុជាចូលទៅប្រទេសចិនដោយផ្ទាល់តែម្តងតាមរយៈការបង្កើតយន្តការរួមគ្នាមួយពិនិត្យមើលលទ្ធផលទាំងឡាយណា ដែលត្រូវនាំចេញពីកម្ពុជាទៅប្រទេសចិន គប្បីទាក់ទាញធ្វើឲ្យការនាំចេញនេះ គឺនាំចេញផ្ទាល់ទៅប្រទេសចិនតែម្ដង។ បើតាមឯកឧត្តម អ៊ាង សុផល្លែត បានឲ្យដឹងទៀតថា នៅក្នុងកិច្ចពិភាក្សានោះឯកឧត្តម លី ខឺឈាង បានសន្យាថានឹងបន្តជួយដល់កម្ពុជានូវវ៉ាក់សាំងជួយទប់ស្កាត់កូវីដ-១៩ ក្នុងរយៈពេលដ៏ខ្លីខាងមុខនេះ រួមទាំងជំនួយពាក់ព័ន្ធនឹងវិស័យសុខាភិបាល និងពេទ្យព្យាបាលជំងឺកូវីដ-១៩ដល់កម្ពុជាផងដែរ។ ទន្ទឹមនេះភាគីចិននឹងផ្ដល់អាហារូបករណ៍ដល់កម្ពុជាសម្រាប់ឆ្នាំ២០២២-២០២៣ ចំនួន៥០០កន្លែង រយៈពេល៥ឆ្នាំហើយក៏កំពុងពិនិត្យពិចារណាមើលផងដែរដើម្បីបើកឲ្យនិស្សិតកម្ពុជាបានត្រឡប់ទៅបន្តការសិក្សានៅប្រទេសចិនវិញនៅពេលឆាប់ខាងមុខនេះ៕អត្ថបទ ៖ បាន ចក់

មនុស្ស ៣នាក់ត្រូវចាប់ខ្លួនក្រោមច្បាប់ភេរវកម្ម ក្រោយបំផ្ទុះរថយន្តសម្លាប់មនុស្សម្នាក់នៅអង់គ្លេស

អង់គ្លេស៖ បុរស ៣នាក់ត្រូវបានចាប់ខ្លួនក្រោមច្បាប់ភេរវកម្ម បន្ទាប់ពីបុរសម្នាក់បានស្លាប់នៅក្នុងការបំផ្ទុះរថយន្តនៅខាងក្រៅមន្ទីរពេទ្យស្ត្រី Liverpool នៅចក្រភពអង់គ្លេស។ រថយន្តឈ្នួលដឹកអ្នកដំណើរមួយគ្រឿងបានឆេះនៅមុនម៉ោង ១១:០០នាទីម៉ោងក្នុងស្រុក ជាពេលវេលាដែលប្រជាពលរដ្ឋទូទាំងចក្រភពអង់គ្លេសធ្វើពិធីស្ងៀមស្ងាត់រយៈពេល ២នាទីកាលពីថ្ងៃអាទិត្យរំលឹកដល់មនុស្សដែលបានស្លាប់ក្នុងសម័យសង្គ្រាម។អ្នកដំណើរម្នាក់ត្រូវបានគេប្រកាសថាស្លាប់នៅនឹងកន្លែងកើតហេតុ ហើយមិនទាន់ស្គាល់អត្តសញ្ញាណជាផ្លូវការនៅឡើយទេ។ ចំណែកបុរសជាអ្នកបើកបរបានរងរបួស កំពុងសម្រាកព្យាបាលនៅមន្ទីរពេទ្យក្នុងស្ថានភាពធម្មតា។ ក្រុមអ្នកស៊ើបអង្កេតមកពីអង្គភាពប្រឆាំងភេរវកម្ម North West បាននិយាយថា បុរស ៣នាក់ដែលមានអាយុ ២៩ឆ្នាំ, ២៦ឆ្នាំ និង ២១ឆ្នាំត្រូវបានឃុំខ្លួននៅផ្លូវ Sutcliffe ក្នុងតំបន់ Kensington របស់ទីក្រុង Liverpool។ ក្រុមពួកគេបាននិយាយថា ខ្លួនកំពុងបន្តរក្សាតាមដានអំពីមូលហេតុនៃការផ្ទុះនេះ ហើយកំពុងធ្វើការជាមួយអង្គភាពនគរបាល Merseyside ខណៈដែលការស៊ើបអង្កេតនៅតែបន្ត។ ចំណែកភ្នាក់ងារកងកម្លាំងសន្តិសុខ MI5 ក៏កំពុងជួយដល់ការងារនេះផងដែរ៕អត្ថបទ៖ សុខមាន

អាមេរិក និងចិនព្រមានគ្នាជុំវិញបញ្ហាកោះតៃវ៉ាន់មុនជំនួបកំពូលរវាងលោក Biden និងលោក Xi

អាមេរិក៖ ប្រមុខការទូតជាន់ខ្ពស់មកពីប្រទេសចិន និងសហរដ្ឋអាមេរិកបានព្រមានគ្នាទៅវិញទៅមកយ៉ាងម៉ឺងម៉ាត់ ជុំវិញបញ្ហាយ៉ាងក្តៅគគុករបស់កោះតៃវ៉ាន់ នៅមុនកិច្ចប្រជុំកំពូលដែលរង់ចាំយ៉ាងអន្ទះសានៅថ្ងៃចន្ទ (១៥ ខែវិច្ឆិកា) នេះរវាងមេដឹកនាំមហាអំណាចទាំង២។ កិច្ចប្រជុំតាមវីដេអូរវាងលោកប្រធានាធិបតី Joe Biden និងលោក Xi Jinping កើតឡើងស្របពេលមានភាពតានតឹងកំពុងកើនឡើងមួយផ្នែកលើកោះតៃវ៉ាន់ ជាលទ្ធិប្រជាធិបតេយ្យស្វ័យគ្រប់គ្រងដែលទីក្រុងប៉េកាំងអះអាងថា ជាផ្នែកមួយនៃដែនដីរបស់ចិន ប៉ុន្តែក៏ទាក់ទងនឹងពាណិជ្ជកម្ម សិទ្ធិមនុស្ស និងបញ្ហាផ្សេងៗទៀតផងដែរ។នៅក្នុងការហៅទូរស័ព្ទកាលពីថ្ងៃសុក្ររវាងរដ្ឋមន្ត្រីការបរទេសចិនលោក Wang Yi ដើម្បីពិភាក្សាអំពីការរៀបចំសម្រាប់កិច្ចប្រជុំកំពូល រដ្ឋមន្ត្រីការបរទេសអាមេរិកលោក Antony Blinken បានលើកឡើងពីការព្រួយបារម្ភអំពី "សម្ពាធយោធា ការទូត និងសេដ្ឋកិច្ច" របស់ទីក្រុងប៉េកាំងលើកោះតៃវ៉ាន់។ លោក Wang បានព្រមានពីគ្រោះថ្នាក់នៃសកម្មភាពរបស់សហរដ្ឋអាមេរិកដែលទំនងគាំទ្រ "ឯករាជ្យភាពកោះតៃវ៉ាន់"។ ទីក្រុងវ៉ាស៊ីនតោនបានប្តូរការទទួលស្គាល់ការទូតពីទីក្រុងតៃប៉ិទៅទីក្រុងប៉េកាំងក្នុងឆ្នាំ១៩៧៩ ប៉ុន្តែទង្វើរបស់សភាបានអនុម័តនៅឆ្នាំនោះតម្រូវឱ្យសហរដ្ឋអាមេរិក ផ្តល់អាវុធដល់កោះតៃវ៉ាន់សម្រាប់ស្វ័យការពារ៕អត្ថបទ៖ សុខមាន

ប្រមុខ UN ព្រមានថា ការកំណត់គោលដៅនៃការឡើងកំដៅភពផែនដីគឺផ្ដោតលើការសង្គ្រោះជីវិត

UN៖ ប្រធានអង្គការសហប្រជាជាតិលោក Antonio Guterres បានប្រាប់ទីភ្នាក់ងារសារព័ត៌មាន AP ថា គោលដៅនៃការកាត់បន្ថយការឡើងកំដៅភពផែនដីដល់ ១.៥អង្សាសេគឺផ្ដោតលើការសង្គ្រោះជីវិត។ លោកបាននិយាយថា កិច្ចប្រជុំកំពូលស្ដីពីបម្រែបម្រួលអាកាសធាតុលើកទី២៦ របស់អង្គការសហប្រជាជាតិ (COP26) ប្រហែលជាពុំបានមើលឃើញរដ្ឋាភិបាលធ្វើការសន្យា ដែលជាតម្រូវការចាំបាច់ក្នុងការកាត់បន្ថយការបំភាយឧស្ម័នផ្ទះកញ្ចក់ឱ្យបានគ្រប់គ្រាន់នោះទេ។សម្ពាធកំពុងកើនឡើងសម្រាប់ប្រទេសនានាដើម្បីធ្វើកិច្ចព្រមព្រៀងដ៏មានអត្ថន័យមួយ មុនពេលកិច្ចប្រជុំកំពូលបញ្ចប់នៅថ្ងៃទី១២ ខែវិច្ឆិកានេះ។ ប៉ុន្តែអគ្គលេខាធិការអង្គការសហប្រជាជាតិរូបនេះក៏បាននិយាយផងដែរថា ក្តីសង្ឃឹមនៅតែមានរហូតដល់នាទីចុងក្រោយ។ ក្រុមអ្នកវិទ្យាសាស្ត្រនិយាយថា ការកាត់បន្ថយសីតុណ្ហភាពពិភពលោកឡើងដល់ត្រឹម ១.៥អង្សាសេនឹងជួយមនុស្សជាតិឱ្យជៀសផុតពីផលប៉ះពាល់អាកាសធាតុដ៏អាក្រក់បំផុត។ នេះគឺប្រៀបធៀបទៅនឹងសីតុណ្ហភាពមុនសម័យធ្វើឧស្សាហកម្ម។ នៅទីក្រុងប៉ារីសកាលពីឆ្នាំ២០១៥ មេដឹកនាំពិភពលោកបានសន្យាថា នឹងព្យាយាមទប់ពិភពលោកពីការឡើងកំដៅលើសពីចន្លោះពី ១.៥អង្សាសេ ទៅ ២អង្សាសេ តាមរយៈការកាត់បន្ថយការបញ្ចេញឧស្ម័នផ្ទះកញ្ចក់។ ការព្យាករណ៍ចុងក្រោយគឺសីតុណ្ហភាពនឹងកើនឡើងដល់កម្រិត ២.៧អង្សាសេ៕អត្ថបទ៖ សុខមាន

តំបន់អឺរ៉ុបមានអ្នកស្លាប់ដោយសារវីរុស COVID-19 ជាងពាក់កណ្ដាលនៃចំនួនសរុបរបស់ពិភពលោកនៅដើមខែវិច្ឆិកានេះ

អឺរ៉ុប៖ យោងតាមតួលេខរបស់អង្គការសុខភាពពិភពលោក (WHO) ដែលបានចេញផ្សាយនៅសប្ដាហ៍នេះ អ្នកស្លាប់ដោយសារជំងឺវីរុសកូរ៉ូណានៅតំបន់អឺរ៉ុបបានកើនឡើង ១០% នៅក្នុងសប្ដាហ៍ដំបូងនៃខែនេះ ហើយក្នុងពេលមួយថ្ងៃមានអ្នកស្លាប់ជាង ៤៨,០០០នាក់ដោយសារវីរុសកូរ៉ូណាជាងពាក់កណ្ដាលនៃចំនួនអ្នកស្លាប់ ដែលបានរាយការណ៍នៅទូទាំងពិភពលោកនៅពេលនោះ ទោះបីជាករណីឆ្លងថ្មី និងការស្លាប់បានធ្លាក់ចុះ ឬនៅតែមានចំនួនថេរនៅក្នុងពិភពលោកក៏ដោយ។ចំនួនអ្នកស្លាប់ខ្ពស់បំផុតត្រូវបានកត់ត្រានៅក្នុងប្រទេសរុស្ស៊ី ដែលបានរាយការណ៍ពីចំនួនអ្នកស្លាប់ដោយសារវីរុស Covid-19 ក្នុងរយៈពេលប៉ុន្មានសប្ដាហ៍ថ្មីៗនេះបន្ទាប់មកគឺអ៊ុយក្រែន និងរូម៉ានី។ ចំនួនអ្នកឆ្លងថ្មីគឺខ្ពស់បំផុតនៅក្នុងប្រទេសរុស្ស៊ី ចក្រភពអង់គ្លេស និងទួរគី នេះបើយោងតាមតួលេខរបស់អង្គការសុខភាពពិភពលោក។ របាយការណ៍របស់ទីភ្នាក់ងារនេះបាននិយាយថា អឺរ៉ុបមានចំនួនប្រហែល ២ ភាគ ៣ នៃករណីឆ្លងថ្មីដែលបានរាយការណ៍ចំនួន ៣.១លានរបស់ពិភពលោកក្នុងសប្ដាហ៍នោះ ហើយក្រុមមន្ត្រីនៅក្នុងប្រទេសដែលរងគ្រោះខ្លាំងកំពុងថ្លឹងថ្លែងការរឹតបន្តឹងថ្មី ដើម្បីព្យាយាមទប់ស្កាត់ការផ្ទុះឡើងខណៈដែលរដូវរងាខិតជិតមកដល់។នៅប្រទេសអាឡឺម៉ង់ដែលប្រជាជនប្រហែល ៦៧% ត្រូវបានចាក់វ៉ាក់សាំងពេញលេញប្រឆាំងនឹងវីរុស Covid-19 ករណីឆ្លងថ្មីរាប់ម៉ឺននាក់កំពុងត្រូវបានរាយការណ៍ជារៀងរាល់ថ្ងៃ ដែលជាករណីឆ្លងថ្មីខ្ពស់បំផុតរបស់ប្រទេស ចាប់តាំងពីជំងឺរាតត្បាតសកលនេះបានចាប់ផ្តើម។ នៅក្នុងប្រទេសរូម៉ានី វីរុស Covid-19 បានឈានដល់កម្រិតខ្ពស់បំផុត ហើយបន្ទប់សង្គ្រោះបន្ទាន់ ឬ ICU កំពុងស្ថិតក្នុងភាពទ្រុឌទ្រោម។ សរុបមកមានករណីឆ្លងជាង ២៥០លាននាក់ និងស្លាប់ជាង ៥លាននាក់ដោយសារវីរុស Covid-19 ត្រូវបានរាយការណ៍ចាប់តាំងពីជំងឺរាតត្បាតនេះបានចាប់ផ្តើម៕អត្ថបទ៖ សុខមាន

WHO៖ ករណីឆ្លងវីរុសកូរ៉ូណាបានថយចុះគ្រប់ទីកន្លែងលើកលែងតែទ្វីបអឺរ៉ុប

WHO៖ អង្គការសុខភាពពិភពលោកបានរាយការណ៍កាលពីថ្ងៃពុធថា ចំនួនអ្នកស្លាប់ដោយសារវីរុសកូរ៉ូណាឬ COVID-19 បានហក់ឡើង ១០% នៅអឺរ៉ុបកាលពីសប្ដាហ៍មុន ដែលបានក្លាយជាតំបន់តែមួយគត់មានទាំងករណីឆ្លង ទាំងករណីស្លាប់ដោយសារវីរុស COVID-19 កើនឡើងជាលំដាប់។ នោះជាសប្ដាហ៍ទី ៦ជាប់ៗគ្នាដែលវីរុសនេះបានហក់ឡើងខ្ពស់នៅទូទាំងទ្វីបនេះ។ក្នុងរបាយការណ៍ប្រចាំសប្ដាហ៍របស់ខ្លួនស្ដីពីការវិវត្តន៍នៃវីរុសរាតត្បាតសកល ទីភ្នាក់ងារសុខភាពរបស់អង្គការសហប្រជាជាតិបាននិយាយថា មានករណីឆ្លងថ្មីប្រមាណ ៣.១លាននាក់នៅទូទាំងពិភពលោកកើនឡើងប្រហែល ១% ពីសប្ដាហ៍មុនជិត ២ភាគ៣ នៃការឆ្លងវីរុសកូរ៉ូណាចំនួន ១.៩លានករណីនៅក្នុងទ្វីបអឺរ៉ុប ជាទីដែលមានករណីឆ្លងបានហក់ឡើង ៧%។ បណ្ដាប្រទេសដែលមានចំនួនខ្ពស់បំផុតនៃករណីឆ្លងថ្មីនៅទូទាំងពិភពលោក មានសហរដ្ឋអាមេរិក រុស្ស៊ី ចក្រភពអង់គ្លេស ទួរគី និងអាល្លឺម៉ង់។ ចំនួនអ្នកស្លាប់ដោយសារវីរុស COVID-19 ប្រចាំសប្ដាហ៍បានធ្លាក់ចុះប្រហែល ៤% នៅទូទាំងពិភពលោក និងបានធ្លាក់ចុះគ្រប់តំបន់លើកលែងតែទ្វីបអឺរ៉ុប។ក្រៅពីប្រទេសចំនួន ៦១ អង្គការសុខភាពពិភពលោកបានដាក់បញ្ចូលក្នុងតំបន់អឺរ៉ុប ដែលរួមទាំងប្រទេសរុស្ស៊ី និងរហូតទៅដល់អាស៊ីកណ្ដាលនោះមានការរាយការណ៍ពីករណីឆ្លងកើនឡើង ៤២% យ៉ាងហោចណាស់ក៏មាន ១០% កាលពីសប្ដាហ៍មុន។ នៅទ្វីបអាមេរិក អង្គការសុខភាពពិភពលោកបាននិយាយថា ករណីឆ្លងថ្មីប្រចាំសប្ដាហ៍បានធ្លាក់ចុះ ៥% និងការស្លាប់ថយចុះ ១៤% ខណៈដែលមានករណីឆ្លងខ្ពស់បំផុតត្រូវបានរាយការណ៍នៅក្នុងសហរដ្ឋអាមេរិក៕អត្ថបទ៖ សុខមាន

ប្រធានសិទ្ធិមនុស្សអង្គការសហប្រជាជាតិជំរុញឲ្យបន្ធូរបន្ថយភាពតានតឹងនៃវិបត្តិជនអន្តោប្រវេសន៍រវាងប៉ូឡូញ និងបេឡារុស

បេឡារុស៖ ប្រមុខសិទ្ធិមនុស្សរបស់អង្គការសហប្រជាជាតិលោកស្រី Michelle Bachelet បានអំពាវនាវឲ្យប្រទេសបេឡារុស និងប៉ូឡូញបន្ធូរបន្ថយវិបត្តិជនអន្តោប្រវេសន៍ "ដែលមិនអាចអត់ឱនបាន" នៅតាមព្រំដែនរួមគ្នារបស់ពួកគេ ហើយបាននិយាយថា អ្នកដែលជាប់គាំងនៅព្រំដែនមិនគួរបន្តស្នាក់នៅដោយគ្មានទីជម្រកក្នុងសីតុណ្ហភាពត្រជាក់នោះឡើយ។ការអត្ថាធិប្បាយរបស់លោកស្រី Bachelet កាលពីថ្ងៃពុធមានឡើងបន្ទាប់ពីទីក្រុង Warsaw ប្រទេសប៉ូឡូញបាននិយាយថា ខ្លួនបានបញ្ជូនកងទ័ពរាប់ពាន់នាក់បន្ថែមទៀតទៅកាន់ព្រំដែន បន្ទាប់ពីមនុស្សរាប់រយនាក់បានព្យាយាមពេញមួយយប់ ដើម្បីឆ្លងពីប្រទេសបេឡារុសចូលប្រទេសប៉ូឡូញ។ ទីក្រុង Minsk ប្រទេសបេឡារុសបានចោទប្រកាន់កងកម្លាំងសន្តិសុខប៉ូឡូញថា បានបណ្ដេញក្រុមអ្នកស្វែងរកសិទ្ធិជ្រកកោនដោយខុសច្បាប់ត្រឡប់ទៅប្រទេសបេឡារុសវិញ។ បច្ចុប្បន្ននេះ មនុស្សរាប់រយនាក់កំពុងបោះជំរំស្នាក់នៅតាមព្រំដែន ដែលជនអន្តោប្រវេសន៍ និងជនភៀសខ្លួនប្រមាណ ៤,០០០នាក់បានប្រមូលផ្តុំគ្នានៅតំបន់ក្បែរព្រំដែន រួមទាំងព្រៃឈើនៅក្បែរនោះ។លោកស្រី Bachelet បាននិយាយនៅក្នុងសេចក្ដីថ្លែងការណ៍មួយថា "ខ្ញុំជំរុញឱ្យរដ្ឋដែលពាក់ព័ន្ធចាត់វិធានការជាបន្ទាន់ ដើម្បីបន្ធូរបន្ថយភាពតានតឹង និងដោះស្រាយស្ថានការណ៍ដែលមិនអាចអត់ឱនបាននេះ ស្របតាមកាតព្វកិច្ចរបស់ពួកគេក្រោមច្បាប់សិទ្ធិមនុស្សអន្តរជាតិ និងច្បាប់ជនភៀសខ្លួន។ កាលពីថ្ងៃពុធ ក្រុមអាជ្ញាធរបេឡារុសបានចោទប្រកាន់ទាហានប៉ូឡូញ ពីបទប្រើកម្លាំងវាយដុំលើក្រុមជនអន្តោប្រវេសន៍ដែលកំពុងព្យាយាមឆ្លងព្រំដែន ស្របពេលភាពតានតឹងរីកកាន់តែធំរវាងប្រទេសជិតខាងទាំង២ នៅអឺរ៉ុបខាងកើត៕អត្ថបទ៖ សុខមាន

ក្រុមប្រឹក្សាសន្តិសុខអង្គការសហប្រជាជាតិជំរុញឲ្យសហភាពមីយ៉ាន់ម៉ាបញ្ចប់អំពើហិង្សា

UN៖ ក្រុមប្រឹក្សាសន្តិសុខអង្គការសហប្រជាជាតិ បានសម្ដែងការព្រួយបារម្ភយ៉ាងខ្លាំងកាលពីថ្ងៃពុធ ទី១០ វិច្ឆិកា ជុំវិញការកើនឡើងនៃអំពើហិង្សានៅទូទាំងសហភាពមីយ៉ាន់ម៉ា ហើយនៅក្នុងសេចក្តីថ្លែងការណ៍ដ៏កម្រមួយដែលបានព្រមព្រៀងគ្នាដោយសមាជិក ១៥រូបបានអំពាវនាវឱ្យបញ្ចប់ការប្រយុទ្ធជាបន្ទាន់ និងឱ្យយោធាអនុវត្តការអត់ធ្មត់ឲ្យបានខ្លាំងបំផុត។មានរបាយការណ៍មួយចំនួនអំពីការបង្កើនអាវុធធុនធ្ងន់ និងកម្លាំងកងទ័ពនៅក្នុងរដ្ឋ Chin ដែលបង្ហាញពីការវាយប្រហាររបស់កងទ័ពដែលនឹងកើតមានឡើង ដើម្បីកម្ចាត់ក្រុមជីវពលដែលបានបង្កើតឡើង បន្ទាប់ពីយោធាបានបណ្ដេញរដ្ឋាភិបាលជាប់ឆ្នោតរបស់លោកស្រី Aung San Suu Kyi ក្នុងរដ្ឋប្រហារកាលពីថ្ងៃទី១ ខែកុម្ភៈ។ សេចក្ដីថ្លែងការណ៍បាននិយាយថា ក្រុមសមាជិកក្រុមប្រឹក្សាសន្តិសុខបានសម្ដែងការព្រួយបារម្ភយ៉ាងខ្លាំង ចំពោះអំពើហិង្សាថ្មីៗបន្ថែមទៀតនៅទូទាំងសហភាពមីយ៉ាន់ម៉ា។ ក្រុមសមាជិកទាំងនោះបានអំពាវនាវឱ្យបញ្ឈប់អំពើហិង្សាជាបន្ទាន់ និងធានាសុវត្ថិភាពរបស់ជនស៊ីវិល។របបយោធាមីយ៉ាន់ម៉ាមិនបានធ្វើអត្ថាធិប្បាយអំពីស្ថានការណ៍នៅរដ្ឋ Chin ជាតំបន់ព្រំដែនងាយនឹងផ្ទុះជម្លោះ ដែលក្លាយជាតំបន់ជួរមុខនៃការតស៊ូប្រឆាំងនឹងការគ្រប់គ្រងដោយយោធា។ សហភាពមីយ៉ាន់ម៉ាបានធ្លាក់ចូលក្នុងវិបត្តិដោយសារការតវ៉ា និងអំពើហិង្សាចាប់តាំងពីរដ្ឋប្រហារដោយរបបយោធាដែលកំពុងព្យាយាមគ្រប់គ្រងប្រទេស និងប្រឈមនឹងការតស៊ូប្រដាប់អាវុធពីក្រុមកងជីវពល និងក្រុមឧទ្ទាមជនជាតិភាគតិចដែលចងសម្ព័ន្ធមិត្តជាមួយរដ្ឋាភិបាលស្រមោល ដែលឧត្ដមសេនីយ៍យោធា Min Aung Hlaing ហៅថា ជាក្រុមភេរវករ៕អត្ថបទ៖ សុខមាន

សម្ដេចតេជោចែករម្លែកទស្សនៈជូនរដ្ឋមន្ត្រីដឹកជញ្ជូនអាស៊ានគួរបន្តត្រួតពិនិត្យអនុវត្តផែនការស្តារឡើងវិញគ្រប់ជ្រុងជ្រោយ

សូមចុច Join Channel Telegram BTV News ដើម្បីទទួលព័ត៌មានថ្មីៗភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានចែករម្លែកទស្សនៈជូនរដ្ឋមន្ត្រីដឹកជញ្ជូនអាស៊ាន គួរបន្តតាមដាន និងត្រួតពិនិត្យយ៉ាងម៉ឺងម៉ាត់ លើ ដំណើរការនៃការអនុវត្តផែនការសកម្មភាព ក្រោមក្របខណ្ឌការស្ដារឡើងវិញគ្រប់ជ្រុងជ្រោយ។សម្ដេចតេជោ ហ៊ុន សែន ប្រមុខរាជរដ្ឋាភិបាលកម្ពុជាបានអញ្ជើញថ្លែងយ៉ាងដូច្នេះក្នុងពិធីបើកកិច្ចប្រជុំរដ្ឋមន្ត្រីដឹកជញ្ជូនអាស៊ានលើកទី ២៧(27Th ATM) និងកិច្ចប្រជុំពាក់ព័ន្ធតាមប្រព័ន្ធវីដេអូនៅថ្ងៃទី១១ ខែវិច្ឆិកា ឆ្នាំ២០២១នេះ។សម្តេចបានថ្លែងថា ជាជំហានទៅមុខ កម្ពុជាយល់ថា ការជំរុញការធ្វើសមាហរណកម្មសហគមន៍អាស៊ាន តាមគន្លង ប្រក្រតីភាពថ្មី គឺជាកិច្ចការចាំបាច់ និងសមស្រប ដើម្បីបង្កើតជាកម្លាំងមួយដ៏ធំ សំដៅប្រែក្លាយអាស៊ាន ទាំងមូលទៅជាតំបន់មួយដែលមានភាពធន់, ភាពប្រកួតប្រជែង និងបរិយាប័ន្ន ។ ក្នុងបរិបទនេះ, ផែនការមេស្តីពីការតភ្ជាប់អាស៊ាន នឹងដើរតួជាផែនការគន្លឹះ ដែលនឹងធានាការរីកចម្រើនខាងផ្នែក សេដ្ឋកិច្ច ជាមួយនឹងគម្លាតអភិវឌ្ឍន៍តិចតួច និងការតភ្ជាប់គ្នាដោយរលូនរវាងប្រទេសជាសមាជិក និង ជាមួយពិភពលោក តាមរយៈការធ្វើឱ្យកាន់តែស៊ីសង្វាក់គ្នា និងបរិយាប័ន្នភាពនៃការតភ្ជាប់ទាំង ៣ គឺ ការតភ្ជាប់ហេដ្ឋារចនាសម្ព័ន្ធ, ការតភ្ជាប់ស្ថាប័ន និងការតភ្ជាប់ប្រជាជន ។ផ្តើមចេញពីនេះ, សម្តេចបានផ្តល់ជូនអនុសាសន៍មួយចំនួន ដែលកិច្ចប្រជុំរដ្ឋមន្ត្រីដឹកជញ្ជូនអាស៊ានអាចយកទៅពិចារណា ។សម្តេចបានបន្តថា អាស៊ានត្រូវពង្រឹង និងពង្រីកកិច្ចសហប្រតិបត្តិការជាមួយដៃគូសន្ទនា និងដៃគូអភិវឌ្ឍន៍ បន្ថែមទៀត ដើម្បីពង្រីកកិច្ចសហប្រតិបត្តិការ, ស្វែងរកមូលនិធិ និងជំនួយបច្ចេកទេស ព្រមទាំង ជំរុញការអភិវឌ្ឍហេដ្ឋារចនាសម្ព័ន្ធដឹកជញ្ជូនបន្ថែមទៀត នៅក្នុងតំបន់អាស៊ាន ។ សម្តេចបានបញ្ជាក់ជូន អង្គពិធីផងដែរថា ក្រោយពីកម្ពុជាបានចូលជាសមាជិកវេទិកាដឹកជញ្ជូនអន្តរជាតិ សម្តេចសង្ឃឹមថា កម្ពុជា នឹងអាចទទួលបាន និងចូលរួមចែករំលែកបទពិសោធន៍ និងចំណេះដឹងល្អៗ ជាមួយសមាជិកដទៃទៀត សម្រាប់ជាទុនមួយក្នុងដំណើរអភិវឌ្ឍន៍វិស័យដឹកជញ្ជូនរបស់អាស៊ានទាំងមូល ។វិស័យដឹកជញ្ជូនបានបញ្ចេញឧស្ម័នកាបូនឌីអុកស៊ីដ ប្រមាណ ២០ ភាគរយ ដែលជា ប្រភពចម្បងមួយនៃការប្រែប្រួលអាកាសធាតុ ។ ក្នុងន័យនេះ, សម្តេចសូមស្នើឱ្យអាស៊ាន បន្តអនុវត្តយ៉ាង ខ្ជាប់ខ្ជួននូវផែនការយុទ្ធសាស្ត្រដឹកជញ្ជូនអាស៊ាន ២០១៦-២០២៥ និងលើកទឹកចិត្តចំពោះការប្រើ ប្រាស់យានយន្តដែលមានមេត្រីភាពបរិស្ថាន ព្រមទាំងជំរុញសមាហរណកម្ម ការធ្វើផែនការប្រើប្រាស់ ដីធ្លី និងផ្លូវថ្នល់ ដើម្បីដោះស្រាយផលប៉ះពាល់បរិស្ថាន ដែលបណ្តាលមកពីការប្រើប្រាស់ថាមពល, ការកកស្ទះចរាចរឧស្ម័ន, ផ្ទះកញ្ចក់ និងសារធាតុបំពុលផ្សេងៗទៀត ។ ការជំរុញអនុវត្តការងារទាំងនេះ នឹងចូលរួមកាត់បន្ថយល្បឿននៃការប្រែប្រួលអាកាសធាតុ ដែលកំពុងគំរាមកំហែងដល់ពិភពលោក យើងទាំងមូល ។អាស៊ានត្រូវបន្តខិតខំដោះស្រាយបញ្ហាគ្រោះថ្នាក់ចរាចរណ៍ ដែលនៅតែជាបញ្ហាប្រឈម ដ៏សំខាន់នៅក្នុងតំបន់អាស៊ាន និងពិភពលោក ពិសេសតាមរយៈការជំរុញការអនុវត្តនូវលិខិតុបករណ៍ គតិយុត្ត ដូចជា ៖ (១). សេចក្តីណែនាំស្តីពីការកែលម្អស្ដង់ដាររបាយការណ៍ សម្រាប់រាយការណ៍អំពី គ្រោះថ្នាក់ចរាចរណ៍ ដោយផ្អែកទៅលើស្តង់ដាររបាយការណ៍របស់អង្គការសហប្រជាជាតិ, (២)សេចក្តីប្រកាសព្រុយណេដារ៉ូស្សាឡាម ស្តីពីសុវត្ថិភាពចរាចរណ៍ផ្លូវគោក ឆ្នាំ ២០២០ និងទិសដៅថ្មី ឆ្នាំ ២០៣០ ដែលកំណត់គោលដៅកាត់បន្ថយគ្រោះថ្នាក់ចរាចរណ៍ យ៉ាងតិច ៥០% ពីឆ្នាំ ២០២១ ទៅឆ្នាំ ២០៣០ ៕

បណ្ដាញសង្គម

ព័ត៌មានថ្មីៗ

អ្នកនាំពាក្យក្រសួងព័ត៌មាន៖ ការពង្រឹងសុវត្ថិភាពឌីជីថល គឺជាកត្តាចម្បងក្នុងការប្រយុទ្ធប្រឆាំងព័ត៌មានក្លែងក្លាយ

កាកបាទក្រហមកម្ពុជា បណ្តុះបណ្តាលយុវជន ជាង១០០នាក់ លើច្បាប់មនុស្សធម៌ និងការកសាងសន្តិភាព

ផ្ទាំងទឹកនៅប្រទេសស្វីស ឆ្ពោះទៅរកការបំបែកកំណត់ត្រាមួយទៀត ក្រោយរលកកម្តៅខែមិថុនា

លោក Merz បញ្ជាក់ថា អាល្លឺម៉ង់អាចការពារការជំរុញការចំណាយយោធា ជាការឆ្លើយតបទៅនឹងលោក Trump

បុគ្គលិកសន្តិសុខស៊ីរី ៣រូបរងរបួស ដោយសារវាយប្រហារនៅជិតក្រុងដាម៉ាស ខណៈអ្នកប្រព្រឹត្តិស្លាប់

ក្រុមតាំងលំនៅនិគមន៍អ៊ីស្រាអែល ដណ្តើមក្តីស្រមៃជនប៉ាឡេស្ទីនក្នុងការមានផ្ទះសម្បែងនឹងគេនៅតំបន់វ៉េសប៊ែង

EU «ថ្កោលទោសយ៉ាងខ្លាំង» ចំពោះការវាយប្រហារបណ្ដាលឲ្យមានអ្នកស្លាប់ច្រើន នៅទីក្រុងដាម៉ាស

កងទ័ពជើងទឹកអង់គ្លេស សាកល្បងយានដ្រូនមានសមត្ថភាពវាយប្រហារចេញពីនាវា

មន្រ្តីជាន់ខ្ពស់រួមទាំងប្រធានាធិបតីអ៊ីរ៉ង់ ចូលរួមពិធីលាគ្នាចុងក្រោយ សម្រាប់អតីតមេដឹកនាំកំពូល Khamenei

អង្គការសហប្រជាជាតិ ព្រមានអំពីការមានបាតុភូតអែលនីញ៉ូដ៏ខ្លាំងក្លា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានសំខាន់ៗ

សហភាពអឺរ៉ុបយល់ព្រមដាក់ទណ្ឌកម្មថ្មីលើបេឡារុស ខណៈវិបត្តិព្រំដែនកាន់តែធ្ងន់ធ្ងរ

មនុស្ស ៣នាក់ត្រូវចាប់ខ្លួនក្រោមច្បាប់ភេរវកម្ម ក្រោយបំផ្ទុះរថយន្តសម្លាប់មនុស្សម្នាក់នៅអង់គ្លេស

អាមេរិក និងចិនព្រមានគ្នាជុំវិញបញ្ហាកោះតៃវ៉ាន់មុនជំនួបកំពូលរវាងលោក Biden និងលោក Xi

ប្រមុខ UN ព្រមានថា ការកំណត់គោលដៅនៃការឡើងកំដៅភពផែនដីគឺផ្ដោតលើការសង្គ្រោះជីវិត

តំបន់អឺរ៉ុបមានអ្នកស្លាប់ដោយសារវីរុស COVID-19 ជាងពាក់កណ្ដាលនៃចំនួនសរុបរបស់ពិភពលោកនៅដើមខែវិច្ឆិកានេះ

WHO៖ ករណីឆ្លងវីរុសកូរ៉ូណាបានថយចុះគ្រប់ទីកន្លែងលើកលែងតែទ្វីបអឺរ៉ុប

ក្រុមប្រឹក្សាសន្តិសុខអង្គការសហប្រជាជាតិជំរុញឲ្យសហភាពមីយ៉ាន់ម៉ាបញ្ចប់អំពើហិង្សា

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានសំខាន់ៗ

សហភាព​អឺរ៉ុប​យល់ព្រម​ដាក់ទណ្ឌកម្ម​ថ្មី​លើ​បេឡា​រុស ខណៈ​វិបត្តិ​ព្រំដែន​កាន់តែ​ធ្ងន់ធ្ងរ

អាមេរិក និង​ចិន​ព្រមាន​គ្នា​ជុំវិញ​បញ្ហា​កោះ​តៃវ៉ាន់​មុន​ជំនួប​កំពូល​រវាងលោក Biden​ និង​លោក ​Xi

ប្រមុខ UN ព្រមាន​ថា ការកំណត់​គោលដៅ​នៃ​ការ​ឡើង​កំដៅ​ភព​ផែន​ដី​គឺ​ផ្ដោត​លើ​ការ​សង្គ្រោះ​ជីវិត​

WHO៖ ករណី​ឆ្លង​វីរុស​កូ​រ៉ូ​ណា​បាន​ថយ​ចុះ​គ្រប់​ទីកន្លែង​លើក​លែងតែ​ទ្វីប​អឺរ៉ុប

ក្រុមប្រឹក្សាសន្តិសុខ​អង្គការសហប្រជាជាតិ​ជំរុញ​ឲ្យ​សហភាព​មី​យ៉ាន់​ម៉ា​បញ្ចប់​អំពើ​ហិង្សា

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

សហភាពអឺរ៉ុបយល់ព្រមដាក់ទណ្ឌកម្មថ្មីលើបេឡារុស ខណៈវិបត្តិព្រំដែនកាន់តែធ្ងន់ធ្ងរ

អាមេរិក និងចិនព្រមានគ្នាជុំវិញបញ្ហាកោះតៃវ៉ាន់មុនជំនួបកំពូលរវាងលោក Biden និងលោក Xi

ប្រមុខ UN ព្រមានថា ការកំណត់គោលដៅនៃការឡើងកំដៅភពផែនដីគឺផ្ដោតលើការសង្គ្រោះជីវិត

WHO៖ ករណីឆ្លងវីរុសកូរ៉ូណាបានថយចុះគ្រប់ទីកន្លែងលើកលែងតែទ្វីបអឺរ៉ុប

ក្រុមប្រឹក្សាសន្តិសុខអង្គការសហប្រជាជាតិជំរុញឲ្យសហភាពមីយ៉ាន់ម៉ាបញ្ចប់អំពើហិង្សា