BTV NEWS

ជនជាតិខ្មែរ និងបរទេសជិត ៥ពាន់នាក់ ត្រូវជាប់ឃុំ ខណៈមន្ត្រីនគរបាល ៧៧នាក់ ត្រូវវិន័យធ្ងន់ធ្ងរដោយសារ Online Scams

នគរបាលរាជធានីឃាត់ខ្លួនបុរសម្នាក់ បែកធ្លាយសម្លេងតាមបណ្តាញសង្គម ម៉ាក់ងាយធ្ងន់ធ្ងរលើវីរជនកងទ័ពកម្ពុជា

កម្លាំងសមត្ថកិច្ចឃាត់ខ្លួនជនជាតិចិនចំនួន០៧នាក់ និងដកហូតសារធាតុញៀនជិត១តោន រួមទាំងអាវុធវែងខ្លីជាច្រើនដើម

នគរបាលរាជធានីភ្នំពេញខិតខំបង្ក្រាប Online Scams បំបែកក្រុមតូច ខណៈក្រុមធំៗបង្រ្កាបរួចរាល់

សន្តិសុខ និង សង្គម

រដ្ឋមន្ត្រីការពារជាតិអ៊ីស្រាអែលបញ្ជាក់ថា ប៉ាឡេស្ទីន នឹងគ្រប់គ្រងតំបន់ហ្កាហ្សាក្រោយសង្គ្រាម

រដ្ឋមន្ត្រីការពារជាតិអ៊ីស្រាអែល លោក យ៉ូអាវ ហ្គាឡែនធ៍ ( Yoav Gallant) បាននិយាយកាលពីថ្ងៃចន្ទត្រឹមតែប៉ុន្មានម៉ោងបន្ទាប់ពីអ្វីដែលអាជ្ញាធរអ៊ីស្រាអែលហៅថា «ការបំផ្ទុះរថយន្តជាច្រើន»នៃការវាយប្រហារភេរវកម្មភាគខាងជើងនៃទីក្រុងតែលអាវីវ (Tel Aviv) បានបណ្តាលឲ្យមនុស្សម្នាក់ស្លាប់ និងជាច្រើននាក់ទៀតរងរបួសថា ប្រជាជនប៉ាឡេស្ទីន នឹងគ្រប់គ្រងតំបនហ្កាហ្សាស្ទ្រីប បន្ទាប់ពីសង្រ្គាមត្រូវបញ្ចប់»។ លោក ហ្គាឡែនធ៍ បាននិយាយនៅក្នុងសន្និសីទសារព័ត៌មានមួយថា៖«ប្រជាជនប៉ាឡេស្ទីនរស់នៅក្នុងតំបន់ហ្កាហ្សា ដូច្នេះហើយ ប៉ាឡេស្ទីន នឹងគ្រប់គ្រងវានៅពេលអនាគត»។ «រដ្ឋបាលហ្កាហ្សានាពេលអនាគតត្រូវតែរីកចម្រើនចេញពីតំបន់ហ្កាហ្សាស្ទ្រីប»។ការអត្ថាធិប្បាយរបស់លោក បានកើតឡើង បន្ទាប់ពីថ្ងៃទី ១០០ នៃសង្រ្គាមអ៊ីស្រាអែល-ហាម៉ាស។ លោកហ្គាឡែនធ៍ ធ្លាប់បាននិយាយថា អ៊ីស្រាអែល នឹងមិនអនុវត្តការគ្រប់គ្រងលើតំបន់ហ្កាហ្សានោះទេ ហើយក្រុមមេដឹកនាំប៉ាឡេស្ទីន នឹងទទួលខុសត្រូវចំពោះដែនដីនេះ។កាលពីព្រឹកថ្ងៃចន្ទ នគរបាល បានចាប់ខ្លួនជនសង្ស័យពីរនាក់មកពីតំបន់វេសបែង ពីបទលួចរថយន្ត និងបើកបុកអ្នកថ្មើរជើងក្នុងទីក្រុងរ៉ាអាណាណា( Ra'anana)។ វាមិនច្បាស់ទេថាតើក្រុមហាម៉ាសមានតួនាទីក្នុងការវាយប្រហារនេះឬយ៉ាងណាទេ?ខណៈពេលដែលការវាយប្រហារក្នុងប្រទេសអ៊ីស្រាអែលមានភាពកម្រ ប្រទេសនេះ នៅតែស្ថិតក្នុងស្ថានភភាពតានតឹងជាងបីខែហើយ បន្ទាប់ពីការវាយប្រហាររបស់ហាម៉ាសកាលពីថ្ងៃទី៧ ខែតុលា បានបង្កឲ្យមានសង្គ្រាមដោយក្រុមហាម៉ាស នៅចុងសប្តាហ៍មុខ បញ្ចេញវីដេអូគួរឲ្យភ័យខ្លាច ដែលហាក់ដូចជាគំរាមកំហែងដល់អាយុជីវិតរបស់ចំណាប់ថ្នូរដែលនៅសេសសល់។-

ក្រុមឧទ្ទាមមីយ៉ាន់ម៉ា អះអាងការគ្រប់គ្រងទីប្រជុំជនជាប់ព្រំដែនឥណ្ឌា និងបង់ក្លាដែស

ក្រុមប្រដាប់អាវុធជនជាតិភាគតិចនៅរដ្ឋរ៉ាឃីន ភាគខាងលិចសហភាពមីយ៉ាន់ម៉ា បាននិយាយថា ខ្លួនបានកាន់កាប់ទីក្រុងមួយជាប់ព្រំដែនឥណ្ឌា និងបង់ក្លាដែស ដែលជាការខាតបង់ចុងក្រោយបំផុតសម្រាប់រដ្ឋាភិបាលយោធា ខណៈដែលរបបសឹកនេះប្រយុទ្ធនឹងការបះបោរនៅក្នុងតំបន់ជាច្រើននៃប្រទេស។មីយ៉ាន់ម៉ា កំពុងស្ថិតក្នុងជម្លោះនៃការបះបោរនៅលើសមរភូមិមុខជាច្រើន ដែលក្រុមប្រឆាំងរដ្ឋាភិបាលសម្ព័ន្ធមិត្ត គាំទ្រដោយរដ្ឋាភិបាលដែលគាំទ្រលទ្ធិប្រជាធិបតេយ្យ បានដណ្តើមកាន់កាប់ទីតាំងយោធា និងទីប្រជុំជនជាច្រើន។ នេះគឺជាបញ្ហាប្រឈមដ៏ធំបំផុតដែលរបបសឹកបានជួបប្រទះចាប់តាំងពីខ្លួនបានធ្វើរដ្ឋប្រហារប្រឆាំងនឹងរដ្ឋាភិបាលជាប់ឆ្នោតក្នុងឆ្នាំ២០២១ មក។អ្នកនាំពាក្យរបស់កងទ័ពអារ៉ាកាន (AA) បាននិយាយកាលពីល្ងាចថ្ងៃអាទិត្យថា ខ្លួនបានដណ្តើមយកទីក្រុង ផាឡេតវ៉ា (Paletwa) ដែលជាទីក្រុងកំពង់ផែមួយនៅលើទន្លេ កាឡាដាន (Kaladan) ដោយជាគន្លឹះក្នុងការធ្វើពាណិជ្ជកម្មជាមួយប្រទេសជិតខាង។ ការដួលរលំនៃទីក្រុង ផាឡេតវ៉ា នៅភាគខាងលិចនេះកើតឡើងបន្ទាប់ពីក្រុមឧទ្ទាមមួយផ្សេងទៀតនៅក្នុងសម្ព័ន្ធភាតរភាពត្រីភាគី គឺក្រុមកងទ័ពសម្ព័ន្ធប្រជាធិបតេយ្យជាតិមីយ៉ាន់ម៉ា MNDAA បានដណ្តើមយកទីក្រុង ឡោកខៃ (Laukkai) ភាគខាងជើងរដ្ឋសាន (Shan) នៅជាប់ព្រំដែនជាមួយប្រទេសចិន៕

អ៊ីរ៉ង់៖ អាមេរិក មិនអាចអំពាវនាវឱ្យមានការអត់ធ្មត់ទេ ខណៈខ្លួនគាំទ្រសង្គ្រាមរបស់អ៊ីស្រាអែលនៅហ្កាហ្សា

រដ្ឋមន្ត្រីការបរទេសអ៊ីរ៉ង់បាននិយាយកាលពីថ្ងៃចន្ទ (១៥ មករា) ថាសហរដ្ឋអាមេរិក មិនអាចអំពាវនាវឱ្យមានការអត់ធ្មត់បានទេ ខណៈពេលដែលគាំទ្រដល់សង្គ្រាមរបស់អ៊ីស្រាអែលនៅតំបន់ហ្កាហ្សា ហើយអ៊ីរ៉ង់កំពុងអំពាវនាវឱ្យមានដំណោះស្រាយការទូតចំពោះសង្គ្រាមនៅក្នុងតំបន់ហ៊ុមព័ទ្ធនេះ។លោក ហូសេន អាមីរ៉ាបឌូលឡាអៀន (Hossein Amirabdollahian) នៅក្នុងសន្និសីទសារព័ត៌មានរួមគ្នាមួយជាមួយសមភាគីឥណ្ឌានៅទីក្រុងតេអេរ៉ង់ បានអំពាវនាវដល់មន្ត្រីអាមេរិក «កុំឲ្យចងសន្តិសុខ និងផលប្រយោជន៍ជាតិរបស់សហរដ្ឋអាមេរិក ទៅនឹងជោគវាសនារបស់នាយករដ្ឋមន្ត្រីអ៊ីស្រាអែល ដែលកំពុងធ្លាក់ចុះ»។សាធារណរដ្ឋអ៊ីស្លាមមួយនេះគាំទ្រក្រុមអ៊ីស្លាមប៉ាឡេស្ទីនហាម៉ាស នៅក្នុងសង្គ្រាមរបស់ខ្លួនជាមួយអ៊ីស្រាអែល ហើយទីក្រុងតេអេរ៉ង់ បានចោទប្រកាន់សហរដ្ឋអាមេរិក ថាបានគាំទ្រនូវអ្វីដែលខ្លួនហៅថាឧក្រិដ្ឋកម្មអ៊ីស្រាអែលនៅតំបន់ហ្កាហ្សា។ លោក អាមីរ៉ាបឌូលឡាអៀន បាននិយាយថា កងជីវពលហ៊ួទី ដែលមានសម្ព័ន្ធមិត្តជាមួយអ៊ីរ៉ង់ នឹងបន្តការវាយប្រហាររបស់ពួកគេនៅក្នុងសមុទ្រក្រហម «ដរាបណាអំពើប្រល័យពូជសាសន៍នៅក្នុងសង្រ្គាមហ្កាហ្សា នៅតែបន្ត»។ទោះបីជាយ៉ាងណាក៏ដោយ រដ្ឋមន្ត្រីការបរទេសអ៊ីរ៉ង់រូបនេះបានបន្ថែមថា ក្រុមហ៊ួទី បានធានាដល់ទីក្រុងតេអេរ៉ង់ ថា «ពួកគេនឹងមិនបង្កើតការរំខានណាមួយនៅក្នុងសន្តិសុខដែនសមុទ្រឡើយ»៕

សង្គ្រាមអ៊ីស្រាអែល-ហាម៉ាស៖ លោកស៊ុណាក់ ព្រមានក្រុមហួទី បន្ទាប់ពីការវាយប្រហារដោយមីស៊ីលថ្មីៗ

លោកនាយករដ្ឋមន្ត្រីអង់គ្លេស រីស៊ី ស៊ុណាក់ ( Rishi Sunak) បានព្រមានក្រុមឧទ្ទាមហួទីពីការវាយប្រហារតាមអាកាសរបស់លោកខាងលិចបន្ថែមទៀត បន្ទាប់ពីមីស៊ីលពីក្រុមឧទ្ទាម បានវាយប្រហារលើនាវាដែលគ្រប់គ្រងដោយសហរដ្ឋអាមេរិក នៅជិតប្រទេសយេម៉ែន។ដោយមានការជំទាស់នៅក្នុងសភាលើសកម្មភាពយោធាបន្ថែមទៀត លោកបាននិយាយថា៖«ជាការពិតណាស់ យើងនឹងមិនស្ទាក់ស្ទើរ ក្នុងការការពារសន្តិសុខ ប្រជាជន និងផលប្រយោជន៍របស់យើងទេ»។នៅក្នុងសេចក្តីថ្លែងការណ៍មួយទៅកាន់សភា លោកស៊ុណាក់ ក៏បានសង្កត់ធ្ងន់ថា សកម្មភាពយោធារបស់អង់គ្លេសកាលពីសប្តាហ៍មុន គឺជា «ការឆ្លើយតបចាំបាច់ និងសមស្របចំពោះការគំរាមកំហែងដោយផ្ទាល់ចំពោះនាវារបស់ចក្រភពអង់គ្លេស ដូច្នេះហើយនេះជាចំណាត់ការរបស់ចក្រភពអង់គ្លេសខ្លួនឯង»។លោកនាយករដ្ឋមន្ត្រី បានប្រាប់ក្រុមសមាជិកសភាថា គោលដៅដែលបានគ្រោងទុកទាំងអស់ត្រូវបានបំផ្លាញ ដោយមិនមានរបាយការណ៍អំពីការស្លាប់ឬរបួសជនស៊ីវិលទេ។លោកបានបន្តថា៖«ខ្ញុំអាចប្រាប់សភានៅថ្ងៃនេះថា ការវាយតម្លៃដំបូងរបស់យើង គឺថាគោលដៅដែលបានគ្រោងទុកទាំង ១៣ ត្រូវបានបំផ្លាញ»។ការអត្ថាធិប្បាយរបស់លោក បានកើតឡើងបន្ទាប់ពីកងកម្លាំងហួទី នៅក្នុងប្រទេសយេម៉ែន បានវាយប្រហារលើកនាវាដឹកកុងតឺន័រ M/V Gibraltar Eagle ដែលគ្រប់គ្រងដោយសហរដ្ឋអាមេរិក និងប្រើប្រាស់មីស៊ីលបាលិស្ទិកប្រឆាំងនាវា។ ទីបញ្ជាការកណ្តាលរបស់សហរដ្ឋអាមេរិក បាននិយាយថា មិនមានរបាយការណ៍អំពីការរងរបួស ឬការខូចខាតគួរឲ្យកត់សម្គាល់នោះទេ។

នាយករដ្ឋមន្ត្រីអ៊ីស្រាអែល ប្តេជ្ញាបន្តប្រយុទ្ធនឹងក្រុមហាម៉ាស ខណៈជម្លោះចុងក្រោយអូសបន្លាយពេល១០០ថ្ងៃ

នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បានប្ដេជ្ញាថានឹងបន្តយុទ្ធនាការយោធានៅតំបន់ ហ្កាហ្សាស្រ្ទីប រហូតដល់ «ជ័យជំនះទាំងស្រុង» ត្រូវបានសម្រេចបាន ខណៈដែលជុំចុងក្រោយនៃជម្លោះអ៊ីស្រាអែល និងក្រុមហាម៉ាស បានអូសបន្លាយជាង ១០០ថ្ងៃ។លោក ណេតាន់យ៉ាហ៊ូ បាននិយាយថា «យើងត្រូវតែបន្តធ្វើសង្រ្គាមនេះ ហើយវានៅតែត្រូវចំណាយពេលជាច្រើនខែទៀត» ទោះបីជាមានការអំពាវនាវជាអន្តរជាតិកាន់តែខ្លាំងឡើងដើម្បីបញ្ឈប់សង្រ្គាមដោយសារតែវិបត្តិមនុស្សធម៌កាន់តែយ៉ាប់យ៉ឺននៅហ្កាហ្សាក៏ដោយ។ នាយករដ្ឋមន្ត្រីអ៊ីស្រាអែលរូបនេះបានបញ្ជាក់ថា តំបន់ព្រំដែនរវាង ហ្កាហ្សាស្រ្ទីប និងប្រទេសអេហ្ស៊ីប គួរតែស្ថិតនៅក្រោមការគ្រប់គ្រងរបស់អ៊ីស្រាអែល ខណៈសង្រ្គាមនៅក្នុងតំបន់ហ៊ុមព័ទ្ធប៉ាឡេស្ទីននេះ និងនៅលើសមរភូមិមុខក្នុងតំបន់ផ្សេងទៀតនឹងមានរយៈពេលជាច្រើនខែ។កងទ័ពអ៊ីស្រាអែលបានអនុម័តផែនការរបស់បញ្ជាការភាគខាងត្បូងរបស់ខ្លួនក្នុងការបន្តប្រតិបត្តិការ និងបង្កើនសម្ពាធយោធាលើក្រុមហាម៉ាស ដោយប្រតិបត្តិការរបស់ខ្លួនផ្តោតលើតំបន់ហ្កាហ្សាភាគកណ្តាល និងភាគខាងត្បូង ដើម្បីកម្ទេចក្រុមសកម្មប្រយុទ្ធប៉ាឡេស្ទីនមួយនេះ និងធានាការដោះលែងចំណាប់ថ្នូរអ៊ីស្រាអែល៕

ទីភ្នាក់ងារអង្គការសហប្រជាជាតិ និយាយថា មនុស្សជាង ៧,៤លាននាក់ ភៀសខ្លួនពីសង្គ្រាមនៅស៊ូដង់

ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) កាលពីថ្ងៃអាទិត្យ (១៤ មករា) បាននិយាយថាចំនួនមនុស្សភៀសខ្លួនពីសង្គ្រាមនៅក្នុងប្រទេសស៊ូដង់ បានកើនឡើងលើសពី ៧,៤លាននាក់។ការិយាល័យកិច្ចការមនុស្សធម៌ OCHA បាននិយាយនៅក្នុងការធ្វើបច្ចុប្បន្នភាពចុងក្រោយរបស់ខ្លួនកាលពីថ្ងៃអាទិត្យថា «មនុស្សជាង ៧,៤លាននាក់ ត្រូវបានផ្លាស់ទីលំនៅទាំងក្នុង និងក្រៅប្រទេសស៊ូដង់ ចាប់តាំងពីការប្រយុទ្ធគ្នាបានផ្ទុះឡើងរវាងកងកម្លាំងប្រដាប់អាវុធស៊ូដង់ (SAF) និងកងកម្លាំងគាំទ្ររហ័សយោធាប៉ារ៉ា (RSF) នៅថ្ងៃទី១៥ ខែមេសា ឆ្នាំ២០២៣ មក»។ការយាល័យនេះបានបញ្ជាក់ថាចំនួនមនុស្សផ្លាស់ទីលំនៅនៅក្នុងប្រទេសស៊ូដង់ បានកើនឡើងប្រហែល ៦១១.០០០នាក់ ក្នុងរយៈពេលមួយខែកន្លងមកនេះ ជាមួយនឹងការផ្លាស់ទីលំនៅថ្មីជាច្រើនពីរដ្ឋ ហ្កេហ្ស៊ីរ៉ា (Gezira) និងរដ្ឋដទៃទៀត។ ទីភ្នាក់ងារអង្គការសហប្រជាជាតិនេះបាននិយាយថា «អសន្តិសុខ ការលួចប្លន់ ការរារាំងការិយាធិបតេយ្យ បណ្តាញខ្សោយ និងការតភ្ជាប់ទូរស័ព្ទ កង្វះសាច់ប្រាក់ និងបុគ្គលិកបច្ចេកទេសមានកំណត់ ព្រមទាំងបញ្ហាមនុស្សធម៌ កំពុងប៉ះពាល់យ៉ាងខ្លាំងដល់ការផ្តល់ជំនួយ»។យោងតាមការប៉ាន់ស្មានរបស់ការិយាល័យ OCHA បានឲ្យដឹងថា ប្រទេសស៊ូដង់ បាននិងកំពុងមើលឃើញការប៉ះទង្គិចគ្នាយ៉ាងបង្ហូរឈាមរវាងកងកម្លាំងប្រដាប់អាវុធស៊ូដង់ SAF និងកងកម្លាំងគាំទ្ររហ័សយោធាប៉ារ៉ា RSF ចាប់តាំងពីថ្ងៃទី១៥ ខែមេសា ឆ្នាំ២០២៣ ដែលរហូតមកដល់ពេលនេះបានបណ្តាលឱ្យមនុស្សជាង ១២.០០០នាក់ត្រូវបានសម្លាប់៕

ព្រះមហាក្សត្រដាណឺម៉ាកអង្គថ្មី ឡើងគ្រងរាជ្យដោយមានហ្វូងមនុស្សប្រមូលផ្ដុំគ្នាអបអរយ៉ាងច្រើនកុះករ

ព្រះមហាក្សត្រដាណឺម៉ាក ព្រះអង្គ ហ្វ្រេដេរីក ទី១០ (Frederik X) បានឡើងសោយរាជ្យកាលពីថ្ងៃអាទិត្យ (១៤ មករា) ដោយបន្តរាជ្យសម្បត្តិពីមាតារបស់ព្រះអង្គ គឺម្ចាស់ក្សត្រី ម៉ាហ្គ្រេថេ ទី២ (Margrethe II) ដែលបានដាក់រាជ្យជាផ្លូវការបន្ទាប់ពីរយៈពេល ៥២ឆ្នាំជាព្រះមហាក្សត្រ ដោយមានហ្វូងមនុស្សយ៉ាងច្រើនកុះករ បានប្រមូលផ្តុំគ្នានៅក្នុងរដ្ឋធានីដើម្បីធ្វើជាសាក្សីដល់ព្រឹត្តិការណ៍ប្រវត្តិសាស្ត្រនេះ។ម្ចាស់ក្សត្រី ម៉ាហ្គ្រេថេ ព្រះជន្ម ៨៣ឆ្នាំ បានធ្វើឱ្យប្រជាជាតិមានការភ្ញាក់ផ្អើលកាលពីថ្ងៃចូលឆ្នាំសកលនៅពេលដែលព្រះនាងបានប្រកាសថាទ្រង់មានគម្រោងក្លាយជាព្រះមហាក្សត្រដាណឺម៉ាកដំបូងគេក្នុងរយៈពេលជិត ៩០០ឆ្នាំក្នុងការស្ម័គ្រចិត្តលះបង់រាជបល្ល័ង្ក។ការស្នងរាជ្យនេះត្រូវបានធ្វើឡើងជាផ្លូវការនៅពេលដែលម្ចាស់ក្សត្រី ម៉ាហ្គ្រេថេ បានចុះព្រះហត្ថលេខាលើការប្រកាសដាក់រាជ្យរបស់ទ្រង់ក្នុងអំឡុងពេលកិច្ចប្រជុំក្រុមប្រឹក្សារដ្ឋនៅសភា។ បន្ទាប់ពីការចុះហត្ថលេខាលើសេចក្តីប្រកាសនោះ ម្ចាស់ក្សត្រីបានធ្វើកាយវិការទៅកាន់ព្រះអង្គ ហ្វ្រេដេរីក ដោយបង្ហាញថាឲ្យទ្រង់បន្តរាជបល្ល័ង្ក។ប្រទេសដាណឺម៉ាក ជាប្រទេសដែលមានរាជាធិបតេយ្យចំណាស់ជាងគេបំផុតមួយក្នុងពិភពលោក មិនមានពិធីឡើងសោយរាជ្យទេ ប៉ុន្តែប្រជាជននៅតែមានភាពរីករាយនៅក្នុងព្រឹត្តិការណ៍ជាប្រវត្តិសាស្រ្តមួយនេះ៕

អ័ព្ទយ៉ាងក្រាស់រំខានដល់ជើងហោះហើរ និងសេវារថភ្លើងក្នុងរដ្ឋធានីរបស់ប្រទេសឥណ្ឌា

សេវាហោះហើរ និងរថភ្លើងត្រូវបានរំខាននៅក្នុងរដ្ឋធានីញូវដែលី របស់ប្រទេសឥណ្ឌា សម្រាប់ថ្ងៃទីពីរដែលកំពុងដំណើរការ នៅថ្ងៃចន្ទ (១៥ មករា) ខណៈដែលអ័ព្ទដ៏ក្រាស់ និងអាកាសធាតុត្រជាក់បានគ្របដណ្តប់តំបន់ដ៏ធំនៃភាគខាងជើងនៃប្រទេស។ មន្ត្រីអាកាសយានដ្ឋានម្នាក់បាននិយាយថា ជើងហោះហើរជាង ១០០ជើង ត្រូវបានពន្យារពេលក្នុងទីក្រុងដេលី កាលពីថ្ងៃអាទិត្យ ប៉ុន្តែប្រតិបត្តិការហោះហើរបណ្តោះអាសន្នបានបន្តឡើងវិញនៅព្រឹកថ្ងៃចន្ទ។យោងតាមគេហទំព័រអាកាសចរណ៍ ហ្វ្លាយរ៉ាដា២៤ (Flightradar24) បានឲ្យដឹងថា យ៉ាងហោចណាស់ជើងហោះហើរ ១៦៨ជើង ដែលចាកចេញពីទីក្រុងដេលី ត្រូវបានពន្យារពេល ហើយជើងហោះហើរចំនួន ៥៦ជើង ត្រូវបានលុបចោលនៅព្រឹកថ្ងៃចន្ទ។ ទីភ្នាក់ងារសារព័ត៌មាន ANI បាននិយាយថា យ៉ាងហោចណាស់រថភ្លើងចំនួន ១៨គ្រឿង ទៅកាន់ក្រុងដេលី ពីផ្នែកផ្សេងៗនៃប្រទេសបានពន្យារពេលដោយសារតែអ័ព្ទក្រាស់ពេក ។ការិយាល័យអាកាសធាតុរបស់ប្រទេសបានព្យាករណ៍ថានឹងមានអ័ព្ទក្រាស់ និងរលកត្រជាក់នៅទីក្រុងញូវដែលី សម្រាប់ថ្ងៃចន្ទ និង «អ័ព្ទក្រាស់ខ្លាំង» នៅថ្ងៃអង្គារ ជាមួយនឹងសីតុណ្ហភាពអប្បបរមា ៤អង្សារសេ៕

ចក្រភពអង់គ្លេស នឹងបញ្ជូនបុគ្គលិកយោធា២ម៉ឺននាក់ សម្រាប់សមយុទ្ធអង្គការណាតូ នៅអឺរ៉ុប

ក្រសួងការពារជាតិអង់គ្លេសបាននិយាយនៅថ្ងៃចន្ទ (១៥ មករា) នេះថាចក្រភពអង់គ្លេស នឹងបញ្ជូនបុគ្គលិកយោធាចំនួន ២០.០០០នាក់ ទៅបម្រើការនៅទូទាំងទ្វីបអឺរ៉ុបនៅក្នុងសមយុទ្ធដ៏ធំមួយរបស់អង្គការណាតូ នៅក្នុងឆមាសទីមួយនៃឆ្នាំនេះ ក៏ដូចជានាវាចម្បាំង និងយន្តហោះចម្បាំងផងដែរ។ការដាក់ពង្រាយនេះរួមមានកងទ័ពអង់គ្លេសចំនួន ១៦.០០០នាក់ ដែលនឹងតាំងមូលដ្ឋាននៅអឺរ៉ុបខាងកើតចាប់ពីខែកុម្ភៈ ដល់ខែមិថុនា ក្រុមវាយប្រហារនាវាផ្ទុកយន្តហោះ ព្រមទាំងយន្តហោះវាយប្រហារផ្លេកបន្ទោរ F35B និងយន្តហោះស៊ើបការណ៍។ លំហាត់សមការពារដ៏រឹងមាំលេខ ២៤ របស់អង្គការណាតូគឺជាឆ្នាំទី៧៥ របស់សម្ព័ន្ធយោធាលោកខាងលិចមួយនេះ។រដ្ឋមន្ត្រីការពារជាតិលោក លោក ហ្គ្រាន ស្ហាបស៍ (Grant Shapps) បាននិយាយថា «យើងអាចប្រកាសនៅថ្ងៃនេះថា ចក្រភពអង់គ្លេសនឹងបញ្ជូនបុគ្គលិកប្រហែល ២០.០០០នាក់ ដើម្បីចូលរួមក្នុងការដាក់ពង្រាយដ៏ធំបំផុតមួយរបស់អង្គការណាតូ ចាប់តាំងពីចុងបញ្ចប់នៃសង្គ្រាមត្រជាក់មក»។សម្ព័ន្ធយោធាណាតូបានបង្កើនចំនួនកងទ័ពត្រៀមប្រយុទ្ធយ៉ាងច្រើន បន្ទាប់ពីប្រធានាធិបតីរុស្ស៊ី លោក វ្ល៉ាឌីមៀ ពូទីន បានបញ្ជាឱ្យលុកលុយអ៊ុយក្រែន កាលពីជិតពីរឆ្នាំមុន ហើយសម្ព័ន្ធយោធានេះបានបន្តគាំទ្រក្រុងគីវ ជាមួយនឹងជំនួយយោធា សេដ្ឋកិច្ច និងមនុស្សធម៌ជាដើម៕

រដ្ឋមន្ត្រីការបរទេសអូស្ត្រាលី អំពាវនាវឲ្យមាន «បទឈប់បាញ់ប្រកបដោយនិរន្តរភាព» នៅពេលចាប់ផ្តើម ទស្សនកិច្ចនៅមជ្ឈិមបូព៌ា

នៅថ្ងៃចន្ទនេះ រដ្ឋមន្ត្រីការបរទេសអូស្ត្រាលី បានអំពាវនាវឲ្យមាន «បទឈប់បាញ់ប្រកបដោយនិរន្តរភាព» នៅតំបន់ហ្កាហ្សា ខណៈដែលលោកស្រី បានចាកចេញទៅដំណើរទស្សនកិច្ចនៅមជ្ឈិមបូព៌ា ដែលរួមមាន ទៅកាន់តំបន់វេសបែងដែលគ្រប់គ្រងដោយអ៊ីស្រាអែល និងកិច្ចប្រជុំជាមួយក្រុមគ្រួសារចំណាប់ថ្នូរអ៊ីស្រាអែល។លោកស្រី Penny Wong បាននិយាយថា លោកស្រីនឹងប្រើប្រាស់ដំណើរទស្សនកិច្ចទៅកាន់ប្រទេសហ្ស៊កដានី អ៊ីស្រាអែល តំបន់វេសបែង និងអ៊ីមីរ៉ាត់អារ៉ាប់រួម ដើម្បីតស៊ូមតិសម្រាប់ផ្លូវចេញពីជម្លោះបច្ចុប្បន្ន និងសន្តិភាពយូរអង្វែងក្នុងទម្រង់នៃដំណោះស្រាយរដ្ឋពីរ។លោកស្រី បានបន្ថែមថា អូស្ត្រាលីក៏នឹងប្រើប្រាស់សំឡេងរបស់ខ្លួន ដើម្បីជំរុញឲ្យមានជំនួយមនុស្សធម៌បន្ថែមទៀត ការការពារជនស៊ីវិលកាន់តែច្រើន និងការបន្ថយភាពតានតឹងក្នុងតំបន់។លោកស្រី Wong បាននិយាយនៅក្នុងសន្និសីទសារព័ត៌មានមុនការចេញដំណើររបស់ខ្លួនថា៖«ជំហររបស់យើង គឺថា យើងចង់ឃើញបទឈប់បាញ់ប្រកបដោយនិរន្តរភាព ហើយថា យើងឃើញបទឈប់បាញ់មនុស្សធម៌អន្តរជាតិ ជាជំហានឆ្ពោះទៅរកការបញ្ចប់ជម្លោះនេះ»។«គ្មានបទឈប់បាញ់ អាចមានតែភាគីម្ខាងទេ ហើយក៏គ្មានបទឈប់បាញ់ អាចគ្មានលក្ខខណ្ឌដែរ»។ប្រទេសអូស្ត្រាលី បានគាំទ្រសេចក្តីសម្រេចរបស់អង្គការសហប្រជាជាតិសម្រាប់បទឈប់បាញ់ នៅតំបន់ហ្កាហ្សាក្នុងខែធ្នូ ក្នុងការបំបែកដ៏កម្រជាមួយសម្ព័ន្ធមិត្តរបស់ខ្លួន គឺសហរដ្ឋអាមេរិក។

បណ្ដាញសង្គម

ព័ត៌មានថ្មីៗ

ព្យុះសង្ឃរា Nolo បង្កើនកម្លាំង ពេលវាបោកបក់ឆ្ពោះទៅកាន់រដ្ឋហាវ៉ៃ សហរដ្ឋអាមេរិក

ប្រភព៖ ប៉ាគីស្ថានទប់ស្កាត់ការវាយប្រហារនៅព្រំដែន ដោយបានសម្លាប់សមាជិកក្រុមតាលីបង់មួយចំនួន

ប្រធានាធិបតី៖ អ៊ីរ៉ង់ត្រៀមខ្លួនរួចជាស្រេចសម្រាប់កិច្ចព្រមព្រៀងជាមួយអាមេរិក ស្របតាមច្បាប់អន្តរជាតិ

លោកMacron៖ ការវាយប្រហារលើរោងចក្រប្រេងរុស្ស៊ី ធ្វើឲ្យស្ថានភាពប្រេងឥន្ធនៈនៅអឺរ៉ុបកាន់តែធ្ងន់ធ្ងរឡើង

មេដឹកនាំសាសនាជាន់ខ្ពស់របស់អារ៉ាប៊ីសាអ៊ូឌីត អំពាវនាវឱ្យទាហានត្រៀមពលីជីវិត ដើម្បីប្រយុទ្ធនឹងក្រុមហ៊ូទី

សម្តេចតេជោ ហ៊ុន សែន អនុញ្ញាតឱ្យ លោកជំទាវ រ៉េឡែន ស្យ៉ាល់ តាហ្គាឡ័រ លៀវហ្វាឡានី (Raylene Siale Tagaloa LIUFALANI) ឯកអគ្គរដ្ឋទូតតែងតាំងថ្មី នៃប្រទេសនូវែលសេឡង់ ប្រចាំនៅកម្ពុជាចូលជួប និងប្រគល់សារតាំង

លោក XI JINPING ៖ ទំនាក់ទំនងចិន-អាមេរិកឈានចូលដំណាក់កាលថ្មី ក្នុងប្រវត្តិសាស្ត្រ

ទីភ្នាក់ងារ EU៖ អឺរ៉ុបត្រូវការផ្លាស់ប្តូរដាច់ណាត់ ក្នុងកិច្ចប្រឹងប្រែងការពារជាតិ ដើម្បីទប់ការគំរាមកំហែងរបស់រុស្ស៊ី

មន្រ្តីជាន់ខ្ពស់ក្រសួងការងារ៖ ការងារជាង ៩ម៉ឺនកន្លែងកំពុងរង់ចាំបងប្អូន ដើម្បីបង្កើតប្រាក់ចំណូលប្រកបដោយភាពថ្លៃថ្នូរនៅក្នុងស្រុក ចៀសវាងចំណាកស្រុកខុសច្បាប់ប្រឈមគ្រោះថ្នាក់ និងការរើសអើង

នគរបាលចាប់ខ្លួនតារាសម្តែង និងអ្នកនយោបាយដែលតវ៉ាប្រឆាំងលោក Netanyahu នៅខាងក្រៅ UN

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877