BTV NEWS

រដ្ឋមន្ត្រីវប្បធម៌ អញ្ជើញបើកសិក្ខាសាលាស្តីពី«អនាគតគោលនយោបាយឧស្សាហកម្មវប្បធម៌ និងច្នៃប្រតិដ្ឋកម្ពុជា»

កម្ពុជា ចិន និងជប៉ុន ពង្រឹងទំនាក់ទំនងអភិវឌ្ឍលើវិស័យភាពយន្ត និងអភិរក្សហ្វីលឯកសារភាពយន្តកម្ពុជា

បទពិសោធ និងអនុសាសន៍របស់កម្ពុជាលើកឡើងក្នុងសន្និសីទពិភពលោកលើប្រធានបទ "បរិវត្តកម្មទេសចរណ៍ និងនិរន្តភាព ត្រូវបានទទួលការសាទរ និងគាំទ្រយកជាគំរូ

ក្រសួងទេសចរណ៍ គ្រោងបើកដំណើរការសាលាវិជ្ជាជីវៈទេសចរណ៍VST របស់ខ្លួននៅចុងខែមិថុនានេះ

វប្បធម៌ និងទេសចរណ៍

រដ្ឋមន្ត្រីក្រសួងបរិស្ថាន ចុះសិក្សាស្វែងយល់ព័ត៌មាន ជាមូលដ្ឋាន សម្រាប់ការរៀបចំ អភិវឌ្ឍន៍ទេសចរណ៍ធម្មជាតិ នៅក្នុងឧទ្យានជាតិព្រះជ័យវរ្ម័ន-នរោត្តម «ភ្នំគូលែន»

ឯកឧត្តម បណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថានអញ្ជើញចុះសិក្សាស្វែងយល់ពីសក្តានុពលទេសចរណ៍ធម្មជាតិ និងវប្បធ៌ម ដើម្បីអភិវឌ្ឍន៍ គោលដៅកម្សាន្តបៃតង នៅក្នុងឧទ្យានជាតិព្រះជ័យវរ្ម័ន-នរោត្តម«ភ្នំគូលែន» នៅថ្ងៃសៅរ៍ ៨ កើត ខែមាឃ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី១៧ ខែកុម្ភៈ ឆ្នាំ២០២៤ នេះ ដោយមានការចូលរួមពី ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ អគ្គនាយក និងមន្រ្តីជំនាញពាក់ព័ន្ធ អាជ្ញាធរមូលដ្ឋាន និងគណៈកម្មការសហគមន៍តំបន់ការពារធម្មជាតិផងដែរ។ ក្នុងដំណើរទស្សនៈកិច្ចនេះ ឯកឧត្តមរដ្ឋមន្ត្រី បានចុះពិនិត្យលើគោលដៅសំខាន់ចំនួនរួមមាន មជ្ឈមណ្ឌលស្រាវជ្រាវ និងអភិរក្សកេសរកូល សុខ អាន ភ្នំគូលែន ពើងថ្មជ្រួញ ទីតាំងបោះតង់អូរតាចក់ ពិនិត្យទីតាំងវត្តចាស់ ជាទីដែលមានភាពទាក់ទាញនៃធម្មជាតិ ទឹកជ្រោះ ល្អាងថ្ម និងពើងធម្មជាតិបង្កប់នូវរូបចម្លាក់បុរាណ ជាពិសេសចម្លាក់បាតស្ទឹងជាស្នាដៃសល្បៈដ៏អស្ចារ្យរបស់បុព្វបុរសខ្មែរបានបង្កប់នូវអត្ថន័យសំខាន់ៗ ខាងជំនឿសាសនា ធ្វើឱ្យមានការចាប់អារម្មណ៍ទាំងមជ្ឈដ្ឋានជាតិ និងអន្តជាតិ។នៅក្នុងវេទិកាលើកទី១៩ នៃរាជរដ្ឋាភិបាល និងវិស័យឯកជន នៅថ្ងៃទី១៣ ខែវិច្ឆិកា ឆ្នាំ២០២៣ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានកំណត់យកឧទ្យានជាតិព្រះជ័យវរ្ម័ន-នរោត្តម«ភ្នំគូលែន» ជាគោលដៅទេសចរណ៍ធម្មជាតិ។ និងអនុលោមតាម«យុទ្ធសាស្រ្តបញ្ចកោណ» ដំណាក់កាលទី១ និងឈរលើមូលដ្ឋានគ្រឹះនៃ «យុទ្ធសាស្រ្តចក្រាវិស័យបរិស្ថាន» ឆ្នាំ២០២៣-២០២៨ ក្រសួងបរិស្ថានបានរៀបចំកម្មវិធីចុះសិក្សាស្វែងយល់ព័ត៌មានជាមូលដ្ឋានសម្រាប់ការរៀបចំផែនការយុទ្ធសាស្រ្តអភិវឌ្ឍន៍ទេសចរណ៍ធម្មជាតិនៅក្នុងឧទ្យានជាតិព្រះជ័យវរ្ម័ន-នរោត្តម«ភ្នំគូលែន» សំដៅលើកកម្ពស់ជីវភាពសហគមន៍មូលដ្ឋាន ការអភិរក្សប្រព័ន្ធជីវៈចម្រុះ និងវប្បធម៌ប្រពៃណី ដើម្បីជាឧត្តមប្រយោជន៍ដល់ប្រជាពលរដ្ឋកម្ពុជាគ្រប់ជំនាន់។ក្រោមការគាំទ្ររបស់គម្រោងនិរន្តរភាពតំបន់ទេសភាព និងទេសចរណ៍ធម្មជាតិកម្ពុជា (CSLEP) បាននឹងកំពុងជួយលើការរៀបចំផែនការ និងគ្រប់គ្រងតំបន់ការពារធម្មជាតិ (ពង្រឹងការអនុវត្តច្បាប់ សាងសង់ស្នាក់ការ) សាងសងហេដ្ឋារចនាសម្ព័ន្ធ និងសម្បទាទេសចរណ៍ រួមមាន សាងសង់ផ្លូវកៅស៊ូប្រវែង ១៤ គ.ម អគារពហុបំណង (អាហារដ្ឋាននិងសាលប្រជុំ) ទីលានបោះជំរុំ ការរៀបចំប្រព័ន្ធផ្លូវទស្សនាចរណ៍ ក្លោងទ្វា ចំណតយានយន្ត កញ្ចុះលំហែកាយ តូបលក់អាហារ ។ល។) និងជួយរួមទាំងជួយ ពង្រឹងខ្សែច្រវ៉ាក់តម្លៃជ្រូកគូលែន នៅសហគមន៍តំបន់ការពារធម្មជាតិចំនួន ៥ (សហគមន៍ព្រៃធំអន្លង់ធំ ព្រៃភ្នំម្នាស់ ជប់តាសុខ ព្រៃភ្នំក្តួច ព្រៃធំពពេល)និង ទឹកស្អាត និងអនាម័យនៅសហគមន៍ព្រៃធំអន្លង់ធំ។ ឧទ្យានជាតិព្រះជ័យវរ្ម័ន-នរោត្តម«ភ្នំគូលែន» ជាតំបន់ប្រវត្តិសាស្រ្តដ៏មានសារៈសំខាន់ ដែលបានរក្សាទុកនូវសំណង់ ប្រវត្តិសាស្រ្តជាច្រើនកន្លែងមានដូចជា ប្រាសាទបុរាណ ស្ថានីយ៍បុរាណ ធនធានធម្មជាតិ និងប្រព័ន្ធជីវៈចម្រុះដ៏សំបូរបែប ជាពិសេសជាតំបន់ដែលបង្កប់ទៅដោយជំនឿ ប្រពៃណីរបស់ជនជាតិខ្មែរតាំងពីបុរាណកាលមក៕

រដ្ឋមន្ត្រីទេសចរណ៍ ស្នើស្ថាប័នពាក់ព័ន្ធផ្តល់ការសម្របសម្រួលល្អជូនទេសចរអន្តរជាតិ

នៅថ្ងៃទី១៥ ខែកុម្ភៈនេះ ឯកឧត្តម សុខ សូកេន រដ្ឋមន្ត្រីក្រសួងទេសចរណ៍ បានបើកកិច្ចប្រជុំគណៈកម្មការអន្តរក្រសួង ដើម្បីសម្រួលការធ្វើដំណើរ ដឹកជញ្ជូនភ្ញៀវទេសចរអន្តរជាតិ និងអ្នកដំណើរអន្តរជាតិ នៅតាមច្រកទ្វារព្រំដែនជាតិ អន្តរជាតិ ទូទាំងប្រទេស ដែលក្នុងកិច្ចប្រជុំនេះ ឯកឧត្តម រដ្ឋមន្ត្រី ស្នើស្ថាប័នពាក់ព័ន្ធ និងមន្ត្រីជំនាញផ្តល់ការសម្របសម្រួលល្អ បដិសណ្ឋារកិច្ចល្អជូនអ្នកដំណើរ និងទេសចរអន្តរជាតិ។ឯកឧត្តម រដ្ឋមន្ត្រី សុខ សូកេន ថ្លែងថា នៅក្នុងឆ្នាំ២០២៤ ការធ្វើដំណើរអ្នកដំណើរ និងទេសចរអន្តរជាតិចូលមកកម្ពុជា នឹងមានកំណើនល្អប្រសើរឡើងវិញ ស្របពេលសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានឯកភាពគ្នាជាមួយ នាយករដ្ឋមន្ត្រីថៃ ផ្តល់ការលើកលែងទិដ្ឋាការរវាងប្រជាជនទាំងពីរពេញមួយខែមេសា ដើម្បីជាកាដូអបអរពិធីបុណ្យចូលឆ្នាំថ្មីផង និងស្របពេលកម្ពុជា អនុវត្តយុទ្ធនាការទស្សនាសៀមរាបឆ្នាំ២០២៤ និងការអាកាសយានដ្ឋានអន្តរជាតិខ្នាតធំនៅខេត្តសៀមរាបជាដើម។ឯកឧត្តម រដ្ឋមន្ត្រី ថ្លែងថា ការស្នើរស្ថាប័ន និងអង្គភាពជំនាញបង្កើនផ្តល់ការសម្រួលការធ្វើដំណើរឆ្លងដែនល្អ ផ្តល់បដិសណ្ឋារកិច្ចល្អជូនអ្នកដំណើរ និងទេសចរអន្តរជាតិនោះ នឹងផ្តល់ការលើកកម្ពស់កិត្តិនាមកម្ពុជា លើឆាកអន្តរជាតិ និងផ្តល់អនុស្សាវរីយ៍ល្អជូនទេសចរអន្តរជាតិ ស្របតាមផែនការយុទ្ធសាស្ត្របង្កើន៥ អភិវឌ្ឍន៍៣របស់ក្រសួងទេសចរណ៍។តាមរបាយការណ៍គណៈកម្មការអន្តរក្រសួងដើម្បីសម្រួលការធ្វើដំណើរនោះ បានឲ្យដឹងថា នៅក្នុងឆ្នាំ២០២៣ កម្ពុជាទទួលបានទេសចរអន្តរជាតិអញ្ជើញមកទស្សនាមានប្រមាណ៥លាន៤៥ម៉ឺននាក់ ក្នុងនោះភ្ញៀវទេសចរអន្តរជាតិធ្វើដំណើរចូលមកកម្ពុជា តាមច្រកទ្វារព្រំដែនគោកមានប្រមាណជិត៦៥% ច្រកទ្វារព្រំដែនផ្លូវអាកាសមានជាង៣៤% និងច្រកទ្វារព្រំដែនផ្លូវទឹក១.២%។នៅក្នុងរបាយការណ៍បានបញ្ជាក់ថា នៅក្នុងដំណើរការសម្រួលល្អជូនអ្នកដំណើរ និងទេសចរអន្តរជាតិបច្ចុប្បន្ន គឺរាជរដ្ឋាភិបាល បានពង្រីកដាក់ដំណើរការ Cambodia E-Arrival បំពេញឯកសារអន្តោប្រវេសន៍ចូលកម្ពុជាពីចំងាយ នៅខេត្តសៀមរាប និងបន្តអនុវត្តនៅខេត្តព្រះសីហនុ ជំរុញការលុបចោលបាតុភាពមិនល្អ និងភាពអសកម្មនានាទៀត ដែលប៉ះពាលដល់កិត្តិនាមកម្ពុជា និងជំរុញការអនុវត្តគោលការណ៍បដិសណ្ឋារកិច្ចល្អ ទេសចរណ៍មានសុវត្ថិភាពនៅគ្រប់ច្រកទ្វារទាំងអស់៕ អត្ថបទ៖ ស៊ុម សុខជា

អ្នកប្រកបរបរធាក់ស៊ីក្លូនៅភ្នំពេញទទួលបានភ្ញៀវទេសចរបរទេសដឹកជាប្រចាំ

បច្ចុប្បន្នក្រុមអ្នកប្រកបរបរធាក់ស៊ីក្លូនៅរាជធានីភ្នំពេញ នៅតែមានភាពញញឹកដឹកភ្ញៀវទេសចរបរទេសជាប្រចាំ។ ពួកគេតែងតែទៅទទួលភ្ញៀវចុះពីកាប៉ាល់នៅចំណុចផែស្ងួត ក្បែរស្ពានជ្រោយចង្វារ និងនៅតាមសណ្ឋាគារ។ ការទទទួលបានភ្ញៀវទេសចរបរទេសដឹកជាប្រចាំនេះ បានចូលរួមផ្ដល់កម្រៃ ប្រាក់ឧបត្ថម្ភ ដល់ក្រុមអ្នកប្រកបរបរនេះ។ ជារៀងរាល់ព្រឹកក្រុមអ្នកធាក់ស៊ីក្លូជាច្រើន តែងមកជួបជុំគ្នាចាំទទួលភ្ញៀវទេសចរបរទេស ចុះពីកាប៉ាល់នៅចំណុចផែស្ងួត ក្បែរស្ពានជ្រោយចង្វារ។ រីឯអ្នកធាក់ស៊ីក្លូខ្លះ ទៅរង់ចាំភ្ញៀវទេសចរបរទេស នៅតាមសណ្ឋាគារ ដោយពួកគេទទួលបានការដឹកជាប្រចាំ។ ថ្ងៃខ្លះទទួលបានការដឹក ទាំងព្រឹក ទាំងល្ងាចថែមទៀតផង។ នេះជាការលើកឡើង របស់អ្នកធាក់ស៊ីក្លូ ដែលមកទទួលភ្ញៀវចុះពីកាប៉ាល់។ក្រុមអ្នកធាក់ស៊ីក្លូលើកឡើងថា ការទទួលបានភ្ញៀវបរទេសដឹកជាប្រចាំថ្ងៃនេះ ជួយសម្រួលពួកគាត់បានច្រើនលើជីវភាព។ ពួកគាត់ទទួលបានថវិកាពីតម្លៃសេវា ថែមទាំងទទួលបានប្រាក់ឧបត្ថម្ភថែមពីភ្ញៀវទៀតផង។ ពួកគាត់ពិតជាសប្បាយចិត្តដែលមានវត្តមានភ្ញៀវទេសចរបរទេសច្រើនបន្តប្រើប្រាស់សេវាស៊ីក្លូបែបនេះ។សម្រាប់ការដឹកភ្ញៀវទេសចរបរទេសជាប្រចាំនេះ ក៏មានការជួយរៀបចំដោយសមាគមអភិរក្សស៊ីក្លូ និងមុខរបរក្រៅប្រព័ន្ធផងដែរ។ លោក អ៊ឹម សម្បត្តិ ប្រធានសមាគម លើកឡើងថា សមាគមតែងរៀបចំឱ្យអ្នកធាក់ស៊ីក្លូ ឆ្លាស់វេនគ្នា ដឹកភ្ញៀវបរទេស។ លោកថា ចំនួនភ្ញៀវទេសចរបរទេសជិះស៊ីក្លូ មានជាប្រចាំថ្ងៃ ហើយថ្ងៃខ្លះមានចំនួនរហូតដល់ប្រមាណ ១០០នាក់។ លោកបន្តថា ចំនួនភ្ញៀវទេសចរចុះពីកាប៉ាល់នេះនឹងបន្តមានរហូតដល់ខែ មីនា ទើបមានភាពស្ងប់ស្ងាត់។សូមជម្រាបថា អ្នកប្រកបរបរធាក់ស៊ីក្លូក៏ជាក្រុមគោលដៅដែលទទួលបានការជួយឧបត្ថម្ភពីរាជរដ្ឋាភិបាលកម្ពុជាផងដែរ។ ជាក់ស្ដែងសម្ដេចតេជោ ហ៊ុន សែន អតីតនាយករដ្ឋមន្ត្រីប្រទេសកម្ពុជា បានបង្កើតមូលនិធិស៊ីក្លូ កាលពីឆ្នាំ ២០១៨កន្លងទៅ។ មូលនិធិនេះ បានផ្ដល់ថវិកា ២១ ម៉ឺនរៀល ក្នុងមួយខែ ជូនអ្នកប្រកបរបរធាក់ស៊ីក្លូ។ លើសពីនេះ រាល់អ្នកធាក់ស៊ីក្លូទាំងអស់ ក៏ទទួលបាន បណ្ណ ប ស ស សម្រាប់ការទៅទទួលសេវាពិនិត្យ ព្យាបាលដោយមិនគិតថ្លៃផងដែរ៕ អត្ថបទ៖ គឹមហុក

នាវាទេសចរណ៍មួយគ្រឿងទៀតដឹកភ្ញៀវទេសចរជាង ៧០០ នាក់ ចូលទស្សនាកម្សាន្ត នៅខេត្តព្រះសីហនុ

ព្រះសីហនុ៖ នាវាទេសចរណ៍ ឈ្មោះ SEVEN SEA EXPLORER សញ្ជាតិ MARSHALL ISLAND នៅព្រឹកថ្ងៃទី១២ ខែកុម្ភៈនេះ បានដឹកភ្ញៀវទេសចរជាង ៧០០ នាក់ ចូលទស្សនាកម្សាន្តនៅខេត្តព្រះសីហនុ។យោងតាមរបាយការណ៍របស់ មន្ទីរទេសចរណ៍ខេត្តព្រះសីហនុ បានឱ្យដឹងថា នាវាទេសចរណ៍ ឈ្មោះ SEVEN SEA EXPLORER សញ្ជាតិ MARSHALL ISLAND ដែលមានប្រវែងបណ្តោយ ២២៣.៧៤ ម៉ែត្រ ទទឹង ៣១ម៉ែត្រ ជម្រៅ៧ ម៉ែត្រ ចេញដំណើរមកពីប្រទេសថៃ បានចូលចតនៅកំពង់ផែស្វយ័តក្រុងព្រះសីហនុដោយសុវត្ថិភាព ដើម្បីនាំយកភ្ញៀវទេសចរមកទស្សនា កម្សាន្តតំបន់ទេសចរណ៍ក្នុងខេត្តព្រះសីហនុ ។ នាវាទេសចរណ៍នេះមាននាវិកសរុបចំនួន៥៤៨នាក់ ស្រី ១១១នាក់ មាន ៤៣សញ្ជាតិ និងមានភ្ញៀវទេសចរ សរុបចំនួន ៧២៦នាក់ ស្រី ៣៧៣នាក់ មាន ២៩សញ្ជាតិ (សញ្ជាតិដែលមានភ្ញៀវច្រើនជាងគេ គឺ អាមេរិក ៤៨៣នាក់ កាណាដា៦៦នាក់ និង អង់គ្លេស ៦៥នាក់ ) ក្នុងគោលបំណងមកទស្សនាប្រទេសកម្ពុជារយៈពេល១ថ្ងៃ (ក្នុងខេត្តព្រះសីហនុ ) នាវានេះនឹងចាកចេញទៅវិញ វេលាម៉ោង ១៩.៤០នាទី នៅថ្ងៃ ខែ ឆ្នាំដដែល ឆ្ពោះទៅប្រទេសវៀតណាម៕

ទេសចរ ១ម៉ឺន៦ពាន់នាក់មកលេងខេត្តកោះកុង អំឡុងបុណ្យចូលឆ្នាំចិន៣ថ្ងៃ

មន្រ្តីមន្ទីរទេសចរណ៍ខេត្តកោះកុង បង្ហាញថា ៣ថ្ងៃអំឡុងពិធីបុណ្យចូលឆ្នាំចិនវៀតណាម មានអ្នកទេសចរសរុបប្រមាណ១ម៉ឺន៦ពាន់នាក់ មានមកលេងលំហែនៅតាមរមណីយដ្ឋានក្នុងខេត្ត។គិតចាប់ពីថ្ងៃទី៩ដល់ថ្ងៃទី១១ ខែកុម្ភៈ ឆ្នាំ២០២៤ ខេត្តកោះកុងបានស្វាគមន៍ទទួលភ្ញៀវទេសចរសរុប១៦.៣៩៩នាក់ ដោយតួលេខនេះបានកើនឡើង ៥.៧៦៣នាក់ ស្មើនឹង៥៤ភាគរយ ធៀបនឹងរយៈពេលដូចគ្នាកាលពីឆ្នាំ២០២៣ ក្នុងនោះភ្ញៀវបរទេសចំនួន៣៥៥នាក់។លោក សាគុណ ភក្តី ប្រធានការិយាល័យព័ត៌មាន និងផ្សព្វផ្សាយនៃមន្ទីរទេសចរណ៍ខេត្តកោះកុង បានឱ្យដឹងនៅថ្ងៃទី១២ ខែកុម្ភៈ ឆ្នាំ២០២៤ថា ភ្ញៀវទេសចរជាតិ និងអន្តរជាតិ បានសម្រុកទៅលេងឆ្នេរសមុទ្រនៅរមណីយដ្ឋានកោះស្តេច ដែលស្ថិតនៅក្នុងស្រុកគិរីសារគរ គឺមានចំនួនច្រើនជាងគេ ព្រោះទីនោះមានសក្តានុពលទេសចរធម្មជាតិទាក់ទាញខ្លាំង។លោក សាគុណ ភក្តី បន្ថែមថា ក្រៅពីតំបន់ទេសចរណ៍កោះស្តេច ពលរដ្ឋ និងអ្នកទេសចរមកពីបណ្តារាជធានីខេត្ត ក៏ទៅលេងកម្សាន្តឆ្នេរនេសាទ ស្រុកស្រែអំបិល ឆ្នេរប៉ាក់ខ្លងស្ថិតនៅស្រុកមណ្ឌលសីមា និងតំបន់ធម្មជាតិនៅស្រុកថ្មបាំងផងដែរ។ ដោយឡែកតម្លៃចំណីអាហារ និងសេវាកម្មស្នាក់នៅមួយចំនួន បានតម្លើងថ្លៃសេវារបស់ខ្លួន ទោះបីជាមានការផ្សព្វផ្សាយអប់រំណែនាំពីមន្រ្តីជំនាញ ព្រមទាំងអាជ្ញាធរសមត្ថកិច្ចមូលដ្ឋានក៏ដោយ។លោក ទួន ឪទី អភិបាលរងស្រុកគិរីសាគរ ថ្លែងថា ៣ថ្ងៃនៃពិធីបុណ្យចូលឆ្នាំចិនវៀតណាម លំហូភ្ញៀវទេសចរគ្រប់មជ្ឈដ្ឋានបានសម្រុកចូលមកលេងកម្សាន្តច្រើនខ្លាំងមែនទែន ធៀបនឹងឆ្នាំកន្លងទៅ។ ទន្ទឹមនោះ តាមផែនការបទបញ្ជារបស់លោក ចេង មុន្នីរិទ្ធ អភិបាលស្រុកគិរីសាគរ គឺលោក ទួន ឪទី អភិបាលរងស្រុកគិរីសាគរ បានចាត់ពង្រាយកងកម្លាំងសមត្ថកិច្ចពាក់ព័ន្ធចុះល្បាតការពារសុវត្ថិភាពសន្តិសុខសណ្តាប់ធ្នាប់តាមគោលដៅទេសចរណ៍នានាក្នុងដែនគ្រប់គ្រងរបស់ខ្លួនផងដែរ ដោយមិនបាតុភាពបញ្ហាអ្វីកើតមានឡើងនោះទេ។បន្ថែមលើនេះ លោកអភិបាលរងស្រុក ក៏ពន្យល់ណែនាំដល់អ្នកទេសចរទាំងអស់ ចូលរួមថែរក្សាបរិស្ថានអនាម័យសោភ័ណ្ឌភាព ក្រោយស្នាក់នៅ ឬបរិភោគចំណីរួចរាល់ត្រូវវេចខ្ចប់ដាក់ធុងសំរាមឱ្យត្រឹមត្រូវ ដើម្បីរមណីយដ្ឋានស្រស់ស្អាត៕

អាជ្ញាធរជាតិអប្សរា រៀបចំដំឡើងបង្កាន់ដៃជណ្តើរឈើចំនួន ៣កន្លែងនៅប្រាសាទអង្គរវត្ត ដើម្បីសម្រួលសុវត្ថិភាពភ្ញៀវទេសចរ

ក្រុមការងារត្រួតពិនិត្យសេវាកម្មទេសចរណ៍(TSC) របស់នាយកដ្ឋានអភិវឌ្ឍន៍ទេសចរណ៍ និងវប្បធម៌ នៃអាជ្ញាធរជាតិអប្សរា បានដំឡើងបង្កាន់ដៃជណ្ដើរឈើចំនួនបីទីតាំង នៅប្រាសាទអង្គរវត្តក្នុងគោលបំណង ជួយសម្រួលដល់ការឡើងចុះរបស់ភ្ញៀវទេសចរឱ្យងាយស្រួល និងសុវត្ថិភាពផង។ កន្លែងទាំងបី ដែលក្រុមការងារដំឡើងបង្កាន់ដៃជណ្ដើរនោះ គឺនៅរួតព្រះពាន់ នៅចំណុចកណ្តាល និងនៅអមសងខាង នៃរួតព្រះពាន់ឡើង-ចុះរួតបាកាណ(កំពូលកណ្ដាល) របស់ប្រាសាទអង្គរវត្ត។ប្រធានក្រុមការងារពលករនៅនាយកដ្ឋានអភិវឌ្ឍន៍ទេសចរណ៍ និងវប្បធម៌ លោក ប៊ូ ផានេត ឱ្យដឹងថា ការដំឡើងបង្កាន់ដៃជណ្ដើរឈើទាំងនេះ ក្នុងគោលបំណងជួយសម្រួលដល់ការឡើងចុះរបស់ភ្ញៀវទេសចរផង និងក៏ជួយការពារគ្រោះថ្នាក់ដល់ភ្ញៀវទេសចរ ដែលអាចនឹងកើតឡើងជាយថាហេតុណាមួយផង។ ប្រការទី២ គឺជួយបង្ការកុំឱ្យភ្ញៀវទេសចរចាប់តោង ឬក៏ប៉ះផ្ទាល់ទៅលើថ្មប្រាសាទ ដែលអាចនាំឱ្យសឹករឹករិលក្បាច់ចម្លាក់ជាដើម ជាពិសេសជួយសម្រួលបានច្រើនដល់ភ្ញៀវទេសចរនៅរដូវធ្លាក់ភ្លៀងបង្ការកុំឱ្យរអិលទៀតផង។ លោក ផានេត បន្ថែមទៀតថា ការដំឡើងបង្កាន់ដៃនេះ បានប្រើឆ្អឹងដែកស្រោបឈើលើដើម្បីការពារកុំឱ្យច្រេះ និងមិនឱ្យប៉ះពាល់ដល់សោភ័ណភាពនៃប្រាសាទនោះទេ។ ក្រុមទេសចរចម្រុះជាតិសាសន៍ ព្រមទាំងមគ្គទេសក៍ទេសចរណ៍ជាច្រើន បានសម្តែងការសប្បាយចិត្តនៅពេលឃើញអាជ្ញាធរជាតិអប្សរាដំឡើងបង្កាន់ដៃជណ្ដើរទាំងនេះ។មគ្គទេសក៍ទេសចរណ៍ ភាសាជប៉ុន លោក យ៉ែម រ៉ូហ្សា បានបង្ហាញក្តីរំភើប នៅពេលដែលរូបលោកបាននាំភ្ញៀវមកទស្សនាប្រាសាទអង្គរវត្ត ចំពេលដែលក្រុមការងារ នៃអាជ្ញាធរជាតិអប្សរាបានរៀបចំដំឡើងបង្កាន់ដៃជណ្ដើរនេះរួចរាល់ហើយ។ មគ្គទេសក៍រូបនេះនិយាយថា កាលពីមុនជណ្ដើរទាំងនោះ ពិបាកឡើងចុះ ហើយនៅកន្លែងខ្លះដែលងងឹតបន្តិចផងនោះ តែងធ្វើឱ្យភ្ញៀវទេសចរមួយចំនួន ដែលមានវ័យចាស់ៗ ពិតជាពិបាកឡើងចុះ ប៉ុន្តែពេលនេះ វាពិតមានភាពងាយស្រួលជាងកាលពីមុនឆ្ងាយណាស់។ លោក យ៉ែម រ៉ូហ្សា គិតថា នេះជាគំនិតល្អ ដែលអាជ្ញាធរជាតិអប្សរាបានគិតគូរដល់សុវត្ថិភាពរបស់ភ្ញៀវទេសចរជាចម្បង ពីព្រោះតែប្រាសាទខ្ពស់ៗ ជណ្តើរក៏ច្រើនហើយកន្លែងខ្លះក៏ងងឹតថែមទៀតនោះ៕

នាវាទេសចរណ៍បរទេស ផ្ទុកអ្នកដំណើរជិត ១០០០នាក់ ចូលចតធ្វើទស្សនកិច្ច ក្នុងខេត្ដព្រះសីហនុ

ព្រះសីហនុ៖ នាយនគរបាលអន្ដោប្រវេសន៍ច្រកទ្វារកំពង់ផែអន្ដរជាតិក្រុងព្រះសីហនុ ប្រាប់ថា ថ្ងៃទី០៩ ខែកុម្ភៈ ឆ្នាំ២០២៤ មាននាវាទេសចរណ៍បរទេសខ្នាតយក្ស ឈ្មោះ SEA BOURN ENCORE សញ្ជាតិ BAHAMAS ផ្ទុកអ្នកដំណើរបម្រុះជាតិសាសន៍ ៩៨៥នាក់ ធ្វើដំណើរមកពីប្រទេសថៃ ចូលចតនៅកំពង់ផែស្វយ័តអន្ដរជាតិក្រុងព្រះសីហនុ ដើម្បីធ្វើទស្សនកិច្ចនៅខេត្ដព្រះសីហនុ រយៈពេល ១ថ្ងៃ រួចបន្ដទៅប្រទេសវៀតណាមនៅយប់ថ្ងៃដដែល។ លោកវរសេនីយ៍ បន្ដថា បន្ទាប់ពីវិបត្ដិជំងឺកូវីដ-១៩ មាននាវាទេសចរណ៍បរទេសខ្នាតយក្ស ផ្ទុកអ្នកដំណើររាប់រយ រាប់ពាន់នាក់ បានចូលចតជាបន្ដបន្ទាប់នៅកំពង់ផែស្វយ័តអន្ដរជាតិក្រុងព្រះសីហនុ ធ្វើទស្សនកិច្ចក្នុងខេត្ដព្រះសីហនុនិងក្នុងព្រះរាជាណាចក្រកម្ពុជា។ នាវាដែលចូលចតថ្ងៃនេះ បានធ្វើដំណើរមកពីប្រទេសថៃ ដែលមានផ្ទុកអ្នកដំណើរចម្រុះជាតិសាសន៍សរុបចំនួន ៩៧៧នាក់ ក្នុងនោះ មានភ្ញៀវទេសចរចំនួន ៥៦០ និងនាវិកសរុបចំនូន ៤២៥នាក់ ជាតិសាសន៍ដែលច្រើនជាងគេបង្អស់ គឺសញ្ជាតិអាមេរិក និងអង់គ្លេស។ ការចូលចតនាវាទេសចណ៍ បានផ្ដល់ឱកាសឱ្យភ្ញៀវទេសចរចម្រុះជាតិសាសន៍បានទស្សនាពីវឌ្ឍនភាពខេត្ដព្រះសីហនុ និងបានស្វែងយល់ពីវប្បធម៌រស់នៅរបស់ប្រជាពលរដ្ឋខ្មែរ ជាមួយនិងធនធានធម្មជាតិដ៏សម្បូរបែបរបស់ខេត្ដព្រះសីហនុ។ ទាំងនេះ បានបញ្ជាក់យ៉ាងច្បាស់ថា សេដ្ឋកិច្ចពិភពលោកបានដំណើរការឡើងវិញ ក្រោមដំបូលសុខសន្ដិភាពនៅព្រះរាជាណាចក្រកម្ពុជា នឹងអាចឱ្យភ្ញៀវទេសចរ បន្ដផ្សព្វផ្សាយពីខេត្ដព្រះសីហនុ ក៍ដូចជាប្រទេសកម្ពុជា ក្នុងការទាក់ទាញភ្ញៀវទេសចរ សម្រាប់លើកកម្ពស់វិស័យទេសចរណ៍នៅកម្ពុជា។ ម្យ៉ាងវិញទៀត ការចូលចតនេះ បានផ្ដល់អត្ថប្រយោជន៍មួយចំនួន ដល់ប្រជាពលរដ្ឋខេត្ដព្រះសីហនុ ដែលជាអ្នកលក់ផលិតទេសចរណ៍ ពិសេសអ្នករត់តាក់ស៊ី ឬម៉ូតូកង់បី និងម៉ូតូឌុប ។ល។

សារមន្ទីរវាយនភណ្ឌប្រពៃណីអាស៊ីតាំងបង្ហាញហូល ផាមួង ស្នាដៃអ្នកស្រុកព្រៃកប្បាស ជូនសាធារណជនបានសិក្សាស្វែងយល់

សៀមរាប៖ សារមន្ទីរវាយនភណ្ឌប្រពៃណីអាស៊ី នឹងរៀបចំពិធីតាំងពិព័រណ៍មិនអចិន្រ្តៃយ៍រយៈពេល៦ខែ ដើម្បីឱ្យសាធារណជន និងភ្ញៀវទេសចរ បានចូលទស្សនា ក៏ដូចជាសិក្សាស្វែងយល់ពីហូល ផាមួងខ្មែរ ចាស់ៗដែលជាស្នាដៃរបស់អ្នកស្រុកព្រៃកប្បាស ខេត្តតាកែវ។លោក សែន គឹមស៊ុន នាយករងស្ដីទីនៃសារមន្ទីរវាយណភណ្ឌប្រពៃណីអាស៊ី នៃអាជ្ញាធរជាតិអប្សរា បានឱ្យដឹងថា ពិព័រណ៍ខាងលើនេះ នឹងមានសមុច្ច័យជាហូល ផាមួង អាវប៉ាក់ សរុបចំនួន២១ សម្រាប់តាំងបង្ហាញ។ លោកបន្តថា ពិព័រណ៍នេះនឹងចាប់ផ្តើមពីថ្ងៃទី៩ ខែកុម្ភៈ ឆ្នាំ២០២៤ ដែលមានរយៈពេល៦ខែ។ សមុច្ច័យខាងលើ គឺសារមន្ទីរបានមកពីការបរិច្ចាគរបស់ពលរដ្ឋស្រុកព្រៃកប្បាស ខេត្តតាកែវ សរុបមានចំនួន៥១ ដែលក្នុងនោះមានសំពត់ផាមួង អាវ និងក្រណាត់ហូលជាដើម។ ក្រុមការងារសារមន្ទីរបានទៅទទួល សមុច្ច័យទាំងនោះនៅថ្ងៃទី១៨ ខែឧសភា ឆ្នាំ២០២៣ បន្ទាប់មកមានការចុះបញ្ជីរៀបចំអភិរក្ស សម្អាត និងជួសជុល មុននឹងរៀបចំឱ្យមានពិព័រណ៍បង្ហាញដល់សាធារណជនបានទស្សនា។ ក្រណាត់ហូល ផាមួងខ្លះមានអាយុកាលចន្លោះពី៤០ទៅ៦០ឆ្នាំ ដែលពលរដ្ឋបានថែទាំយ៉ាងយកចិត្តទុកដាក់ មុននិងក្នុងសម័យខ្មែរក្រហម។នេះជាដំណាក់កាលទី១នៃការរៀបចំពិព័រណ៍ដែលលោក សែន គឺមស៊ុន ពន្យល់ថា សារមន្ទីរបានរើស សមុច្ច័យចំនួន២១ក្នុងចំណោម៥១ ហើយនិងមានការបង្ហាញនៅដំណាក់កាលក្រោយៗទៀត។ លោក សែន គឹមស៊ុន អំពាវនាវឱ្យសាធារណចូលទស្សនាក្នុងពិព័រណ៍ដ៏មានសារសំខាន់នេះ ដែលជាផ្នែកមួយក្នុងការឱ្យតម្លៃ និងសិក្សាស្វែងយល់ពីស្នាដៃសិល្បៈនៃហូល ផាមួងរបស់អ្នកស្រុកព្រៃកប្បាស ខេត្តតាកែវ៕ ប្រភព៖អាជ្ញាធរអប្សរា

ខែមករាឆ្នាំ២០២៤ អ្នកដំណើរអន្តរជាតិមកកម្ពុជាកើនឡើងជាង ៤.៦%

អគ្គនាយកដ្ឋានអន្តោប្រវេសន៍ នៃក្រសួងមហាផ្ទៃបានឲ្យដឹងថា ក្នុងខែមករាឆ្នាំ២០២៤ មានភ្ញៀវអន្តរជាតិធ្វើដំណើរចូលមកប្រទេសកម្ពុជា ដើម្បីទេសចរ វិនិយោគ និងការប្រកបរបរការងារផ្សេងៗមានប្រមាណជិត ៧០ ម៉ឺននាក់ កើនឡើង ៤.៦០% ប្រៀបធៀបខែធ្នូ ឆ្នាំ២០២៣។ក្រុមភ្ញៀវអន្តរជាតិ មកប៉ែកខាងអឺរ៉ុប បានថ្លែងប្រាប់ BTV នៅថ្ងៃទី៥ ខែកុម្ភៈនេះ ថា ពួកគេធ្វើដំណើរមកកម្ពុជា នៅក្នុងផ្លូវដ៏សែនឆ្ងាយ មកកម្ពុជា នាពេលនេះ គឺមានគោលបំណងសំខាន់ដើរកម្សាន្ត និងចង់ស្គាល់ភូមិសាស្ត្រ ប្រពៃណីវប្បធម៌ ប្រជាជនប្រទេសកម្ពុជា។ ហើយតាមរយៈការដើរកម្សាន្តអស់រយៈពេលជាច្រើនថ្ងៃមកនេះ កម្ពុជាជាគោលដៅមានភាពទាក់ទាក់ ហើយពលរដ្ឋរុះរាយរាក់ទាក់។នាយឧត្តមសេនីយ កែវ វណ្ណថន អគ្គនាយករង និងជាអ្នកនាំពាក្យអគ្គនាយកដ្ឋានអន្តោប្រវេសន៍បានឲ្យដឹងថា ក្នុងខែមករា ឆ្នាំ២០២៤ អ្នកដំណើរបរទេសចូលមកកម្ពុជាតាមច្រកព្រំដែនអន្តរជាតិ ផ្លូវគោគ ផ្លូវទឹក និងផ្លូវអាកាស មាន ចំនួន ៦៩ ម៉ឺននាក់ ខណៈនៅក្នុងខែធ្នូ ឆ្នាំ២០២៣ អ្នកដំណើរបរទេសចូលមកកម្ពុជា ៦៦ ម៉ឺននាក់ ហើយតាមរយៈពេលតួលេខនេះ អ្នកដំណើរបរទេសធ្វើដំណើរចូលមកកម្ពុជា គឺមានកំណើនជារៀងរាល់ខែ គិតចាប់តាំងពីខែមករា ដើមឆ្នាំ២០២៣មក។ពាក់ព័ន្ធនឹងការធ្វើដំណើរតាមផ្លូវអាកាសវិញ ឯកឧត្តម ជា អូន រដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល បានថ្លែងថា ចាប់តាំងពីកម្ពុជា បើកដំណើរការអាកាសយានដ្ឋានអន្តរជាតិសៀមរាបអង្គរមក ព្រលានយន្តហោះថ្មីនេះ គឺបានទទួលជើងយន្តហោះខ្នាតធំដឹកអ្នកដំណើរបរទេសចុះចតជាបន្តបន្ទាប់មកពីប៉ែកខាងអឺរ៉ុប អាមេរិច និងធ្វើឲ្យអ្នកដំណើរអន្តរជាតិមានកំណើនជាបន្តបន្ទាប់។ឯកឧត្តម បន្តថា តាមរយៈការមានព្រលានយន្តហោះទទួលជើងយន្តហោះរយៈចម្ងាយឆ្ងាយនេះ រដ្ឋមន្ត្រីអាកាសចរណ៍ស៊ីវិលកម្ពុជា ក៏បានអញ្ជើញទៅបើកកិច្ចចចារ និងបានចុះហត្ថលេខា តភ្ជាប់ជើងហោះហើរត្រង់ពីបណ្តាប្រទេសជិតឆ្ងាយមកកាន់កម្ពុជាបានជិត ៥០ ជាពិសេសបណ្តាប្រទេសនៅប៉ែកអឺរ៉ុប អូស្តា្រលី ជប៉ុន ឥណ្ឌា ចិន កាណាដានិងអាមេរិចជាដើម ដើម្បីឲ្យប្រទេសទំាងនោះតភ្ជាប់ជើងយន្តហោះហោះត្រង់មកកាន់ខេត្តសៀមរាបផងដែរ៕ អត្ថបទ៖ ស៊ុម សុខជា

នៅដើមឆ្នាំនេះ កម្ពុជាទទួលគម្រោងវិនិយោគថ្មីចំនួន៣២ មានទុនវិនិយោគជាង ១៨៧ លានដុល្លារ

ក្នុងរយៈពេល១ខែ ដើមឆ្នាំ ២០២៤ នេះ, ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគថ្មីចំនួន៣២ មានទំហំទុនវិនិយោគប្រមាណជាង ១៨៧លានដុល្លារអាមេរិក និងបង្កើតការងារបានជិត ២៩ពាន់កន្លែង បន្ថែមលើកម្លាំងពលកម្មដែលមានស្រាប់។ក្រុមប្រឹក្សាអភិវឌ្ឍន៍កម្ពុជា (CDC) ចេញសេចក្តីប្រកាសព័ត៌មាន នៃសំណើសុំវិនិយោគរបស់ក្រុមហ៊ុន ក្នុងនោះគិតក្នុងរយៈ ពេល ១ ខែ ដើមឆ្នាំ ២០២៤ នេះ ក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីគម្រោងវិនិយោគ នៃគម្រោង ពង្រីកផលិតកម្មចំនួន ៣២ គម្រោង មានទុនវិនិយោគសរុបប្រមាណជាង ១៨៧ លានដុល្លារអាមេរិក គម្រោងទាំងនេះអាចបង្កើតការងារកម្លាំងពលកម្មថ្មី បានប្រមាណជិត ២៩ ពាន់កន្លែង បន្ថែមលើកម្លាំងពលកម្មដែលមានស្រាប់ ដែលជាការចូលរួមចំណែកក្នុងវិស័យការងារនៅកម្ពុជា។ជាការកត់សម្គាល់ សម្រាប់គម្រោងវិនិយោគដែលមានភាពលេចធ្លោជាងគេប្រចាំខែមករា ឆ្នាំ ២០២៤ នេះរួមមាន៖ គម្រោង បង្កើតរោងចក្រផលិតគ្រឿងអេឡិចត្រូនិកនៅស្រុកសំរោង ខេត្តតាកែវ, គម្រោងបង្កើតរោងចក្រផ្គុំ ដំឡើងម៉ូតូ កង់ រ៉ឺម៉ក (អគ្គិសនី) និងឧបករណ៍បញ្ចូល ឬសាកថ្ម នៅស្រុកកៀនស្វាយ ខេត្តកណ្តាល, គម្រោងបង្កើតរោងចក្រកែច្នៃអាលុយមីញ៉ូម ដែក និងទង់ដែង នៅស្រុកគងពិសី ខេត្តកំពង់ស្ពឺ, និងគម្រោងបង្កើតរោងចក្រតម្បាញក្រណាត់ និងកាត់ដេរសម្លៀកបំពាក់នៅស្រុកកំពង់សីលា ខេត្តព្រះសីហនុ ក្នុងនោះទុនវិនិយោគប្រមាណជាង ៧៨% មានប្រភពមកពីប្រទេសចិន, ៩,៦៥% មកពីប្រទេសសិង្ហបុរី, ៥,៣៤% មកពីសហរដ្ឋអាមេរិក, ៣,៥៥% មកពីសាធារណរដ្ឋកូរ៉, និង ២,៧៣% មកពីប្រភពក្នុងស្រុក។សូមបញ្ជាក់ថា នៅក្នុងឆ្នាំ ២០២៣ កន្លងមកនេះ កម្ពុជាបានអនុម័តគម្រោងវិនិយោគចំនួន ២៦៨ មានទុនវិនិយោគសរុបប្រមាណ ជិត ៤,៩ ពាន់លានដុល្លារអាមេរិក ក្នុងនោះបានអនុម័តគម្រោងថ្មីចំនួន ២៤៧ និងគម្រោងពង្រីកផលិតកម្មចំនួន ២១ និងគម្រោង វិនិយោគ ចំនួន ៧១ បានបណ្តាក់ទុនវិនិយោគនៅក្នុងតំបន់សេដ្ឋកិច្ចពិសេស ដោយគម្រោងវិនិយោគទាំងអស់នេះ និងអាចបង្កើត ការងារបានប្រមាណជាង ៣០ ម៉ឺនកន្លែង៕ អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

រដ្ឋមន្រ្តីសុខាភិបាល៖ «ក្មួយៗ ត្រូវខិតខំសិក្សា ដើម្បីកសាងសមត្ថភាពក្លាយជាក្តីសង្ឃឹមរបស់ក្រុមគ្រួសារ សង្គមជាតិ ជាពិសេសអ្នកជំងឺ»

ឯកឧត្តម ហេង សួរ អញ្ជើញប្រកាសមុខតំណែងប្រធានមន្ទីរការងារ និងបណ្តុះបណ្តាលវិជ្ជាជីវៈ ខេត្តឧត្តរមានជ័យ

ប្រមុខការពារជាតិអាមេរិក៖ ទីក្រុងវ៉ាស៊ីនតោន នឹងកាត់បន្ថយជំនួយយោធាដល់អ៊ុយក្រែន

ឯកអគ្គរដ្ឋទូត៖អាមេរិកលែងមើលឃើញការបង្កើតរដ្ឋប៉ាឡេស្ទីនថា ជាគោលដៅរបស់ខ្លួនទៀតហើយ

ចិន ប្រាប់អាមេរិក ឱ្យឈប់ដុតបញ្ឆេះភាពតានតឹង ខណៈបដិសេធការលើកឡើងពីកោះតៃវ៉ាន់ របស់លោក Hegseth

បេសកជនUNប្រចាំមីយ៉ាន់ម៉ា ព្រមានថា អំពើហិង្សាធ្វើឲ្យប្រទេសនេះ ស្ថិតនៅលើ«ផ្លូវឆ្ពោះទៅរកការបំផ្លាញខ្លួនឯង»

គ្រឹះស្ថានមីក្រូហិរញ្ញវត្ថុបាននឹងកំពុងចូលរួមគាំទ្រដល់ការរីកលូតលាស់ក្នុងវិស័យកសិកម្មតាមរយៈការផ្តល់កម្ចីឥណទានមានអាទិភាពខ្ពស់

ប៉ាគីស្ថានដំឡើងថវិកាការពារជាតិចំនួន ២០% បន្ទាប់ពីជម្លោះជាមួយឥណ្ឌា ប៉ុន្តែការចំណាយទូទៅ ត្រូវកាត់បន្ថយ

អង្គការគ្រូពេទ្យគ្មានព្រំដែន បិទមន្ទីរពេទ្យ នៅស៊ូដង់ខាងត្បូង បន្ទាប់ពីរងការវាយប្រហារ

ប្រភពសន្តិសុខ៖ ជនអន្តោប្រវេសន៍អាហ្វ្រិក ១៧៧នាក់ ត្រូវបានជួយសង្គ្រោះ នៅភាគខាងលិចប្រទេសយេម៉ែន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877