ភ្នំពេញ៖ នាថ្ងៃទី៣ ខែមេសា ឆ្នាំ២០២៦ ក្រសួងពាណិជ្ជកម្មបានសម្រេចចុះបញ្ជីជាផ្លូវការនូវផលិតផលសក្តានុពលចំនួន ៤ មុខបន្ថែមទៀតជា "ម៉ាកសម្គាល់ភូមិសាស្ត្រទំនិញ (Geographical Indication - GI)" ដែលជាជំហានសំខាន់ក្នុងការជំរុញ ព្រមទាំងលើកកម្ពស់កេរ្តិ៍ឈ្មោះនិងអត្តសញ្ញាណផលិតផលខ្មែរលើឆាកអន្តរជាតិ ការពារសិទ្ធិកម្មសិទ្ធិបញ្ញារបស់សហគមន៍ផលិតករ និងបង្កើនសក្តានុពលសម្រាប់ការចុះបញ្ជីនៅទីផ្សារអន្តរជាតិនាពេលអនាគត។ផលិតផលទាំង ៤ រួមមាន៖១. សូត្រមាសភ្នំស្រុក (Phnom Srok Golden Silk)៖ ផលិតផលសិប្បកម្មត្បាញដោយដៃ មានសរសៃសូត្រល្អ ណែន ភ្លឺរលោង និងប្រើពណ៌ធម្មជាតិ ពីដំណើរការផលិតដែលគ្មានសារធាតុគីមី។២. ក្តាមថ្មកោះកុង (Koh Kong Mud Crab)៖ ក្តាមទឹកប្រៃពីតំបន់ព្រៃកោងកាង មានសាច់ណែន ស្វិត និងរសជាតិផ្អែមឆ្ងាញ់ពិសេស។៣. ស្វាយចន្ទីកំពង់ធំ (Kampong Thom Cashew Nut)៖ គ្រាប់ធំ សាច់ពេញ ស្រួយ ក្លិនឈ្ងុយបានយូរ និងមានរសជាតិឈ្ងុយបែបប៊ឺ ឬទឹកដោះគោ ដែលមានគុណភាពខ្ពស់។៤. ស្វាយឧត្តរមានជ័យ (Oddar Meanchey Mango)៖ ស្វាយមានសាច់ណែន ស្រួយ មានទឹកដម និងរសជាតិជូរអែមឆ្ងាញ់ អាចកែច្នៃបានច្រើនប្រភេទ។ផលិតផលទាំងនេះ ត្រូវបានផលិត និងប្រមូលផលនៅតំបន់ភូមិសាស្ត្រជាក់លាក់ ដែលមានលក្ខខណ្ឌធម្មជាតិ និងបច្ចេកទេសផលិតជាក់លាក់ បង្កើតឱ្យមានអត្តសញ្ញាណ និងគុណភាពពិសេស ហើយមានសក្តានុពលក្នុងការទទួលស្គាល់ និងការពារនៅលើទីផ្សារអន្តរជាតិ។សូមជម្រាបជូនថា តាមរយៈការចុះបញ្ជីជាម៉ាកសម្គាល់ភូមិសាស្ត្រទំនិញនេះ នឹងនាំមកនូវអត្ថប្រយោជន៍សំខាន់ៗ រួមមាន៖• ការការពារផ្លូវច្បាប់៖ ទប់ស្កាត់ការក្លែងបន្លំ និងធានាប្រើប្រាស់ឈ្មោះផលិតផលត្រឹមត្រូវតាមតំបន់ភូមិសាស្ត្រ• ថែរក្សាវប្បធម៌ និងប្រពៃណី៖ រក្សាទុកចំណេះដឹង និងវិធីសាស្ត្រផលិតតាមសហគមន៍• លើកកម្ពស់ទេសចរណ៍ និងបរិស្ថាន៖ ជំរុញទេសចរណ៍តាមតំបន់ផលិត និងគាំពារការផលិតស្របតាមបរិស្ថានធម្មជាតិ• ការបង្កើនតម្លៃទីផ្សារ និងនាំចេញ៖ បង្កើនតម្លៃផលិតផល និងពង្រីកសក្តានុពលប្រកួតប្រជែងលើទីផ្សារអន្តរជាតិ• បង្កើនសក្តានុពលចុះបញ្ជីអន្តរជាតិ៖ ជួយបើកផ្លូវសម្រាប់ការទទួលស្គាល់ GI នៅក្រៅប្រទេស និងការពារផលិតផលខ្មែរ នៅលើទីផ្សារសកល

ក្រសួងព្រះបរមរាជវាំង បានចេញសេចក្តីប្រកាសព័ត៌មានថា ព្រះរាជសុខភាពរបស់ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជាបានប្រសើរជាងមុនបន្តិចហើយ ប៉ុន្តែក្រុមវេជ្ជបណ្ឌិតឲ្យព្រះអង្គគង់ប្រថាប់មួយរយៈពេលទៀត ដើម្បីពិនិត្យតាមដាន និង ទទួលថែទាំព្រះរាជសុខភាពជាបន្តបន្ទាប់ទៀតនៅមន្ទីរពេទ្យ នៃរដ្ឋធានីប៉េកាំងប្រទេសចិន។ យោងតាមសេចក្តីប្រកាសព័ត៌មាន របស់ក្រសួងព្រះបរមរាជវាំង ដែលបានចេញនៅព្រឹកថ្ងៃទី២៧ ខែមេសា ឆ្នាំ២០២៦នេះ បានឲ្យដឹងថា ស្ថានភាពព្រះរាជសុខភាព ព្រះករុណាជាអម្ចាស់ជីវិតលើត្បូង ជា ទីគោរពសក្តារៈដ៏ខ្ពង់ខ្ពស់បំផុត បន្ទាប់ពីគង់ប្រថាប់នៅក្នុងមន្ទីរពេទ្យរដ្ឋធានីប៉េកាំងរយៈពេលមួយសប្តាហ៍ នេះ បានប្រសើរបន្តិចជាងមុន ក្រោយទទួលការព្យាបាលព្រះរោគដោយបានធ្វើការវះកាត់ធំ ដោយលោក លោកស្រីសាស្ត្រាចារ្យ វេជ្ជបណ្ឌិតឯកទេស គិលានុបដ្ឋាក -គិលានុបដ្ឋាយិកា ដែលពោពេញដោយបទពិ សោទបច្ចេកទេសខ្ពស់ជាច្រើនឆ្នាំនៅមន្ទីរពេទ្យរដ្ឋធានីប៉េកាំង នៃសាធារណរដ្ឋប្រជាមានិតចិន។ សេចក្តីប្រកាសព័ត៌មានរបស់ក្រសួងព្រះបរមរាជវាំង បានឲ្យដឹងទៀតថា វេជ្ជបណ្ឌិតនៅមន្ទីរពេទ្យ រដ្ឋធានីប៉េកាំង នៃសាធារណរដ្ឋប្រជាមានិតចិន បានថ្វាយព្យូសរ៉ូម ឆ្លុះអេកូព្រះទរ ព្រះបាទ និងថ្វាយព្រះឱ សថបំបាត់ការឈឺចាប់ ព្រះឱសថផ្សះមុខរបួសវះកាត់តាមពេលវេលាកំណត់ថ្វាយព្រះករុណាជាអម្ចាស់ជី វិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត។ ទន្ទឹមនឹងនេះដែរ វេជ្ជបណ្ឌិតនៅមន្ទីរពេទ្យរដ្ឋធានីប៉េកាំង បានក្រាបបង្គំទូលថ្វាយ ព្រះករុណាជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត សូមព្រះអង្គគង់ប្រ ថាប់មួយរយៈពេលទៀតដើម្បីពិនិត្យតាមដាន និងទទួលថែទាំព្រះរាជសុខភាពជាបន្តបន្ទាប់ទៀតនៅមន្ទីរពេទ្យ ។ តាមរយៈសេចក្តីប្រកាសព័ត៌មាននេះដែរ ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ ខ្ពង់ខ្ពស់បំផុត និងព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត ព្រះអង្គសូម ថ្លែងអំណរគុណ និងអរគុណថ្វាយសម្តេចព្រះសង្ឈរាជទាំងពីរគណៈប្រគេនព្រះថេរានុត្ថេរៈគ្រប់ព្រះអង្គ និងជូនសម្តេចថ្នាក់ដឹកនាំកំពូលជាតិ ថ្នាក់ដឹកនាំ និងមន្រ្តីរាជការគ្រប់ជាន់ថ្នាក់ និងបងប្អូនប្រជាពលរដ្ឋ ទាំងអស់ដែលតែងតែបានថ្វាយព្រះពរ និងបួងសួងសូមឲ្យព្រះអង្គ បានឆាប់ជាសះស្បើយពីព្រះរោគជា បន្តបន្ទាប់ជារៀងរាល់ថ្ងៃផងដែរ៕

មន្ត្រីអនុវត្តច្បាប់របស់សហរដ្ឋអាមេរិក កំពុងវាយតម្លៃឡើងវិញនូវការរៀបចំសន្តិសុខបន្ទាប់ពីខ្មាន់កាំភ្លើងម្នាក់បានបើកការបាញ់ប្រហារនៅជិតពិធីទទួលទានអាហារពេលល្ងាចរបស់សមាគមអ្នកឆ្លើយឆ្លងព័ត៌មានសេតវិមាន ដែលបង្កើនសំណួរអំពីថាតើខ្មាន់កាំភ្លើងអាចចូលទៅជិតព្រឹត្តិការណ៍ដែលចូលរួមដោយប្រធានាធិបតី លោក Donald Trump សមាជិកគណៈរដ្ឋមន្ត្រី និងសមាជិកសភា បានដោយរបៀបណា។ អតីតភ្នាក់ងារអង្គភាពសេវាចារកម្មពីររូប និងមន្ត្រីជាន់ខ្ពស់អាមេរិកបីរូប បានប្រាប់សារព័ត៌មានរ៉យទ័រកាលពីថ្ងៃអាទិត្យ ទី២៦ ខែមេសា ថា ភ្នាក់ងារសហព័ន្ធទំនងជាអនុវត្តផែនការរបស់ពួកគេដើម្បីការពារប្រធានាធិបតីដោយប្រសិទ្ធភាពកាលពីយប់ថ្ងៃសៅរ៍ ដោយបានបញ្ឈប់ខ្មាន់កាំភ្លើងដែលត្រូវបានចោទប្រកាន់មុនពេលជននេះទៅដល់ជាន់ក្រោមដីនៃសណ្ឋាគារ Washington Hilton ជាកន្លែងដែលលោក Trump ត្រូវបានរៀបចំឱ្យថ្លែងសុន្ទរកថា។ មន្ត្រីបាននិយាយថា ប៉ុន្តែការពិតដែលថា អ្នកចូលរួមមួយចំនួនអាចឮសំឡេងបាញ់កាំភ្លើងទៅលើភ្នាក់ងារអង្គភាពសេវាសម្ងាត់បានបញ្ជាក់ពីភាពងាយរងគ្រោះ ទោះបីក្រោយការប៉ុនប៉ងធ្វើឃាតពីរលើកលើលោក Trump ក្នុងអំឡុងពេលយុទ្ធនាការឆ្នាំ២០២៤ ក៏ដោយ ដែលបានជំរុញឱ្យមានវិធានការកាន់តែតឹងរ៉ឹងជុំវិញសន្តិសុខរបស់លោកប្រធានាធិបតី។ អតីតមន្ត្រីអនុវត្តច្បាប់និយាយថា មេរៀនជាក់ស្តែងបំផុតពីឧបទ្ទវហេតុនេះគឺ បុគ្គលិកសន្តិសុខអាចចាំបាច់ត្រូវពង្រីកនៅបរិវេណការពារជុំវិញប្រធានាធិបតីនៅទីសាធារណៈធំៗ ទោះបីជាវានាំឱ្យមានការរំខានជាសាធារណៈក៏ដោយ។ នៅក្នុងពិធីជប់លៀងទទួលទានអាហារពេលល្ងាចកាលពីថ្ងៃសៅរ៍ ភ្ញៀវត្រូវបានតម្រូវឱ្យឆ្លងកាត់ឧបករណ៍ត្រួតពិនិត្យម៉ាញេទិក ឬឧបករណ៍រាវរកលោហៈ ដើម្បីចូលទៅក្នុងបន្ទប់រៀបចំពិធី ប៉ុន្តែត្រូវការតែសំបុត្រដើម្បីចូលទៅក្នុងសណ្ឋាគារប៉ុណ្ណោះ។ មនុស្សជាច្រើន បានព្យាយាមចូលដោយប្រើប្រាស់សំបុត្រកាលពីឆ្នាំមុន នេះបើយោងតាមមនុស្សម្នាក់ដែលដឹងអំពីការរៀបចំព្រឹត្តិការណ៍នេះ។

រដ្ឋមន្ត្រីការបរទេសអ៊ីរ៉ង់បានទៅកាន់ទីក្រុងអ៊ីស្លាម៉ាបាដម្តងទៀតមួយរយៈខ្លីកាលពីថ្ងៃអាទិត្យ ខណៈថ្នាក់ដឹកនាំនយោបាយ និងយោធារបស់ប៉ាគីស្ថានបានប្រញាប់ប្រញាល់ចាប់ផ្តើមការចរចាបទឈប់បាញ់រវាងទីក្រុងតេអេរ៉ង់ និងទីក្រុងវ៉ាស៊ីនតោន ប៉ុន្តែប្រធានាធិបតី Donald Trump បាននិយាយថាពួកគេអាចនិយាយគ្នាតាមទូរស័ព្ទជំនួសវិញ។  ប្រព័ន្ធផ្សព្វផ្សាយរដ្ឋអ៊ីរ៉ង់បាននិយាយថា លោក Abbas Araghchi បានចាកចេញពីរដ្ឋធានីប៉ាគីស្ថានកាលពីយប់ថ្ងៃមុន ដោយបានបង្កើតភាពច្របូកច្របល់ជុំវិញការចរចាជុំទីពីរដែលរំពឹងទុកនៅទីនោះ ប៉ុន្តែលោកបានត្រឡប់មកវិញមុនពេលបន្តទៅកាន់ទីក្រុងមូស្គូកាលពីថ្ងៃអាទិត្យ ។លោកធ្លាប់បានទៅកាន់ប្រទេសអូម៉ង់ ដែលកន្លងមកជាអ្នកសម្របសម្រួលការចរចា ហើយនៅម្ខាងទៀតនៃច្រកសមុទ្រយុទ្ធសាស្ត្រ Hormuz។សេតវិមានកាលពីសប្តាហ៍មុនបាននិយាយថា ខ្លួននឹងបញ្ជូនបេសកកជនលោក Steve Witkoff និង លោក Jared Kushner ទៅកាន់ទីក្រុងអ៊ីស្លាម៉ាបាដ ដើម្បីបន្តការចរចាដោយផ្ទាល់ជាប្រវត្តិសាស្ត្រនៅដើមខែនេះ។ ប៉ុន្តែភ្លាមៗបន្ទាប់ពីការចាកចេញរបស់លោក Araghchi កាលពីថ្ងៃសៅរ៍ លោក Trump បាននិយាយថា លោកបានលុបចោលបេសកកម្មនេះ ដោយសារតែខ្វះវឌ្ឍនភាពជាមួយអ៊ីរ៉ង់។លោកTrump បានប្រាប់សារព័ត៌មាន Fox News កាលពីថ្ងៃអាទិត្យថា ប្រសិនបើពួកគេចង់ ពួកលោកអាចនិយាយគ្នាបាន ប៉ុន្តែពួកលោកនឹងមិនបញ្ជូនមនុស្សទៅទេ។ លោកបាននិយាយមុននេះនៅលើបណ្ដាញសង្គមថា អ្វីដែលពួកគេត្រូវធ្វើគឺគ្រាន់តែទូរស័ព្ទទៅរករូបលោកទៅបានហើយ។  មន្ត្រីប៉ាគីស្ថានពីររូបបាននិយាយក្នុងលក្ខខណ្ឌមិនបញ្ចេញឈ្មោះទៅកាន់ប្រព័ន្ធផ្សព្វផ្សាយថាការចរចាដោយប្រយោលរវាងភាគីទាំងពីរកំពុងដំណើរការ៕

ក្រុមអ្នកស៊ើបអង្កេតកាលពីថ្ងៃអាទិត្យ២៦មេសា បាននិយាយថា ខ្មាន់កាំភ្លើងដែលបានព្យាយាមសម្រុកចូលពិធីទទួលទានអាហារពេលល្ងាចមួយចូលរួមដោយលោក Donald Trump មានគម្រោងធ្វើឃាតប្រធានាធិបតីអាមេរិក និងមន្ត្រីជាន់ខ្ពស់ផ្សេងទៀត ខណៈការត្រួតពិនិត្យកាន់តែខ្លាំងលើសន្តិសុខនៃព្រឹត្តិការណ៍នេះ។ លោក Trump ដែលត្រូវបានភ្នាក់ងារសេវាសម្ងាត់ប្រញាប់ប្រញាល់ជម្លៀសចេញពីសាលសណ្ឋាគារនៅទីក្រុងវ៉ាស៊ីនតោន បានបង្ហោះវីដេអូខ្មាន់កាំភ្លើងដែលកំពុងព្យាយាមរត់គេចខ្លួនឆ្លងកាត់ចំណុចត្រួតពិនិត្យសន្តិសុខ។បន្ទាប់ពីការបាញ់ប្រហារតបតគ្នាមួយសន្ទុះជាមួយភ្នាក់ងារផ្សេងៗ ជនសង្ស័យវ័យ៣១ឆ្នាំ ឈ្មោះ Cole Tomas Allen ត្រូវបានឃុំខ្លួននៅកន្លែងកើតហេតុ ហើយត្រូវបានសួរចម្លើយកាលពីថ្ងៃអាទិត្យ មុនពេលជនល្មើសត្រូវចូលបង្ហាញខ្លួននៅតុលាការនៅថ្ងៃបន្ទាប់។ លោក Trump បានចែករំលែករូបថតរបស់ជនសង្ស័យដែលត្រូវបានដាក់ខ្នោះដៃនៅលើកម្រាលឥដ្ឋសណ្ឋាគារ។លោកTodd Blanche រដ្ឋអាជ្ញាស្តីទីសហរដ្ឋអាមេរិក បានប្រាប់កម្មវិធី "Face The Nation" របស់ ទូរទស្សន៍ CBS កាលពីថ្ងៃអាទិត្យថា លោកមិនបានសហការយ៉ាងសកម្មទេ។លោករំពឹងថាខ្មាន់កាំភ្លើងនឹងត្រូវបានចោទប្រកាន់ជាផ្លូវការនៅព្រឹកស្អែកក្នុងតុលាការសហព័ន្ធនៅទីក្រុងវ៉ាស៊ីនតោន។លោក Blanche បានបន្ថែមថា ពុំមានហេតុផលអ្វីបន្ថែមទៀតត្រូវបានគេដឹងអំពីការវាយប្រហារនោះទេ ដោយបញ្ជាក់ថាជនសង្ស័យ ដែលប្រដាប់ដោយកាំភ្លើងវែង កាំភ្លើងខ្លី និងកាំបិត កំពុងស្នាក់នៅសណ្ឋាគារ Washington Hilton ជាកន្លែងដែលពិធីទទួលទានអាហារពេលល្ងាចរបស់សមាគមអ្នកឆ្លើយឆ្លងព័ត៌មានសេតវិមាន ត្រូវបានធ្វើឡើងកាលពីល្ងាចថ្ងៃសៅរ៍២៥មេសា។ លោក Blanche បាននិយាយថា ពួកលោកជឿថាជនល្មើស បានធ្វើដំណើរតាមរថភ្លើងពីទីក្រុង Los Angeles ទៅ Chicago ហើយបន្ទាប់មកពី Chicago ទៅ Washington។ វាហាក់ដូចជាខ្មាន់កាំភ្លើងបានទិញអាវុធទាំងនេះក្នុងរយៈពេលពីរបីឆ្នាំកន្លងមកនេះ៕

បន្ទាប់ពីទទួលបានភាពជោគជ័យកាលពីឆ្នាំមុន ស្ថានទូតនៃសាធារណរដ្ឋឥណ្ឌូនេស៊ី នឹងរៀបចំពិធីបុណ្យផ្សាររាត្រីឥណ្ឌូនេស៊ី និងពិធីបុណ្យប៉ាសាម៉ាឡាំឥណ្ឌូនេស៊ីម្តងទៀត នៅតាមផ្លូវចតុមុខក្នុងរាជធានីភ្នំពេញ នៅថ្ងៃទី២៥ និង២៦ ខែមេសា ឆ្នាំ២០២៦នេះ ដោយរំពឹងថា នឹងមានភ្ញៀវទេសចរកាន់តែច្រើនចូលរួមក្នុងវប្បធម៌នូសាន់តារ៉ា និងភាពចម្រុះនៃម្ហូបអាហារ។ពិធីបុណ្យផ្សាររាត្រីឥណ្ឌូនេស៊ី គឺជាកម្មវិធីផ្សព្វផ្សាយសេដ្ឋកិច្ច និងវប្បធម៌រួមបញ្ចូលគ្នាដ៏សំខាន់មួយរបស់ស្ថានទូត។ ពិធីបុណ្យដែលរៀបចំឡើងនៅតាមផ្លូវចតុមុខនេះ នៅតែជាមជ្ឈមណ្ឌលវប្បធម៌ និងទេសចរណ៍ដ៏លេចធ្លោបំផុតមួយនៅក្នុងរាជធានីភ្នំពេញ នឹងក្លាយជាទីកន្លែងសម្រាប់មនុស្សមកពីគ្រប់មជ្ឈដ្ឋាន ដើម្បីរីករាយជាមួយរាត្រីចុងសប្តាហ៍ដ៏សម្បូរបែប និងពោរពេញដោយវប្បធម៌ជាមួយគ្នា។ភ្ញៀវទេសចរ នឹងមានឱកាសភ្លក់រសជាតិម្ហូបឥណ្ឌូនេស៊ីពិតៗ ស្វែងយល់ពីសម្លៀកបំពាក់បាទីក រួមជាមួយនឹងការទិញទំនិញប្រើប្រាស់ឥណ្ឌូនេស៊ីជាច្រើនប្រភេទ ខណៈពេលដែលក្នុងពេលជាមួយគ្នានេះ ភ្ញៀវទេសចរក៏នឹងជ្រមុជខ្លួននៅក្នុងការសម្តែងតន្ត្រី និងរបាំប្រពៃណីដ៏រស់រវើកនៅក្នុងរាត្រីវប្បធម៌ផងដែរ។ក្នុងនាមជាផ្នែកមួយនៃពិធីបុណ្យ ផ្សាររាត្រី ឥណ្ឌូនេស៊ី (Phsaar Reatrei Indonesia) ឆ្នាំនេះ ភោជនីយដ្ឋានឥណ្ឌូនេស៊ី ចំនួន២កន្លែងនៅកម្ពុជា ក៏នឹងទទួលបានវិញ្ញាបនបត្រ Duta Rasa Nusantara ផងដែរ ដើម្បីបង្ហាញពីការកោតសរសើរ និងការលើកកម្ពស់ប្រវត្តិសាស្ត្រម្ហូបអាហារដ៏សម្បូរបែបរបស់ប្រទេសឥណ្ឌូនេស៊ី តាមរយៈការបម្រើម្ហូបអាហារឥណ្ឌូនេស៊ីពិតប្រាកដ។ស្ថានទូតឥណ្ឌូនេស៊ីប្រចាំទីក្រុងភ្នំពេញ សង្ឃឹមថា ពិធីបុណ្យនេះ នឹងតំណាងឱ្យចំណងមិត្តភាពដ៏រឹងមាំនៃកិច្ចសហប្រតិបត្តិកា ររវាងឥណ្ឌូនេស៊ី និងកម្ពុជា។ លើសពីនេះ ការរៀបចំព្រឹត្តិការណ៍នេះ មានបំណងបង្ហាញពីភាពធន់រួមគ្នារបស់ប្រជាជនមកពីប្រទេសទាំងពីរក្នុងការប្រឈមមុខនឹងបញ្ហាប្រឈមសកលបច្ចុប្បន្ន។នៅក្នុងត្រីមាសទីមួយនៃឆ្នាំ២០២៦ ប្រទេសឥណ្ឌូនេស៊ីបានកត់ត្រាការកើនឡើង ៦,៦% ធៀបនឹងឆ្នាំមុននៃការនាំចេញទៅកាន់ប្រទេសកម្ពុជាដែលមានតម្លៃ ២៧៤.៩ លានដុល្លារអាម៉េរិក ដែលនាំមុខគេជាដៃគូពាណិជ្ជកម្មធំបំផុតទី៩ របស់កម្ពុជា។ ផលិតផលនាំចេញច្រើនជាងគេរបស់ឥណ្ឌូនេស៊ី មកកាន់ប្រទេសកម្ពុជាគឺធ្យូងថ្ម មី ម៉ូតូ និងថ្នាំពេទ្យជាដើម។លើវិស័យទេសចរណ៍ មានភ្ញៀវទេសចរឥណ្ឌូនេស៊ីជាង ៥ម៉ឺននាក់ បានមកទស្សនាប្រទេសកម្ពុជាកាលពីឆ្នាំមុន។ ផ្ទុយទៅវិញ ភ្ញៀវទេសចរកម្ពុជាជិត ១ម៉ឺន ១ពាន់នាក់ បានមកទស្សនាប្រទេសឥណ្ឌូនេស៊ីក្នុងឆ្នាំដដែល៕អត្ថបទ៖ ឈិត បូរ៉ាវី

លោក រស់ ចំណាន ទីប្រឹក្សារបស់សម្តេចតេជោ ហ៊ុន សែន បានដឹកនាំក្រុមការងារចុះជួបសំណេះសំណាល និងទទួលស្វាគមន៍យ៉ាងកក់ក្តៅបំផុតចំពោះអតីតសកម្មជនមកពីគណបក្សភ្លើងទៀនចំនួន ៧០នាក់ ស្រុកស្អាង ខេត្តកណ្តាល ប្រកាសចូលរួមជីវភាពនយោបាយជាមួយគណបក្សប្រជាជនកម្ពុជានៅព្រឹកថ្ងៃទី២៦ ខែមេសា ឆ្នាំ២០២៦។ពិធីនោះដែរ មានវត្តមាន លោក រស់ ចំណាន ទីប្រឹក្សាសម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា លោក សឿង ចក់ ក្រុមការងារពិសេស លោក ហែម ប្រសិដ្ឋ ទីប្រឹក្សាសម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា លោកបណ្ឌិត ហ៊ុន មករា ទីប្រឹក្សាសម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងក្រុមការងារពិសេសមូលដ្ឋានជាច្រើនរូបទៀតផងដែរ។លោក រស់ ចំណាន បានមានប្រសាសន៍ ផ្តាំផ្ញើការសាកសួរសុខទុក្ខពីសំណាក់ សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងជាប្រធានព្រឹទ្ធសភា សម្តេចមហាបវរធីបតី ហ៊ុន ម៉ាណែត អនុប្រធានគណបក្សប្រជាជនកម្ពុជា និងជានាយករដ្ឋមន្រ្តីនៃព្រះរាជាណាចក្រកម្ពុជា ឯកឧត្តម គួច ចំរើន សមាជិកគណៈកម្មការកណ្ដាល និងជាប្រធានគណបក្សប្រជាជនកម្ពុជាខេត្តកណ្ដាល ។លោកបានបន្តទៀតថាការសម្រេចចិត្តដ៏ត្រឹមត្រូវរបស់បងប្អូនទាំង ៧០នាក់ ក្នុងការចូលរួមរស់ជីវភាពនយោបាយជាមួយគណបក្សប្រជាជនកម្ពុជា មិនមែនជារឿងចៃដន្យឡើយ ប៉ុន្តែវាគឺជាការឆ្លុះបញ្ចាំងយ៉ាងច្បាស់នូវ៖- ឥទ្ធិពលនៃនយោបាយឈ្នះ-ឈ្នះ ជាទស្សនវិជ្ជានៃការបង្រួបបង្រួមដែលផ្ដល់នូវការទុកចិត្ត និងសុវត្ថិភាពសម្រាប់ខ្មែរគ្រប់រូប។- ជំនឿជាក់លើការអភិវឌ្ឍពិតប្រាកដ ជាការមើលឃើញជាក់ស្តែងនូវសមិទ្ធផលរីកដុះដាលពេញផ្ទៃប្រទេស ក្រោមការដឹកនាំរបស់រាជរដ្ឋាភិបាល។- ឆន្ទៈមនសិការស្នេហាជាតិ ជាបំណងប្រាថ្នាចង់ឃើញមាតុភូមិមានសុខសន្តិភាពយូរអង្វែង និងការរីកចម្រើនឥតឈប់ឈរ ឆ្ពោះទៅរកអនាគតដ៏រុងរឿង។"ការមករួមរស់ក្រោមដំបូលតែមួយនៃគណបក្សប្រជាជនកម្ពុជា គឺជាការជ្រើសរើសយកការបង្រួបបង្រួមជាតិ ជាជាងការបែកបាក់ និងការរើសយកការស្ថាបនា ជាជាងការបំផ្លិចបំផ្លាញ។"សកម្មភាពនេះ គឺជាសារដាស់តឿនដល់បងប្អូនខ្មែរគ្រប់ទិសទីថា “ឈប់ជឿការញុះញង់ ដើម្បីរួមគ្នាកសាងមាតុភូមិកម្ពុជា”។ យើងរួមគ្នាខ្ពស់មុខមាត់តែមួយ ក្នុងនាមជាខ្មែរតែមួយ ដើម្បីបន្តថែរក្សាសន្តិភាពឱ្យបានគង់វង្ស និងកសាងសង្គមជាតិឱ្យកាន់តែរឹងមាំ ក្រោមការដឹកនាំដ៏ឈ្លាសវៃ និងប្រកបដោយគតិបណ្ឌិតរបស់គណបក្សប្រជាជនកម្ពុជា។សន្តិភាពនាំមកនូវការអភិវឌ្ឍ! ការជឿជាក់នាំមកនូវភាពជោគជ័យ។គួរបញ្ជាក់ផងដែរថាប្រជាពលរដ្ឋទាំង ៧០នាក់នេះ ជាអតីតសកម្មជនមកពីគណបក្សភ្លើងទៀន - ស្ថិតនៅភូមិអូររំចេក ឃុំស្វាយប្រទាល ស្រុកស្អាង ខេត្តកណ្ដាល ចំនួន ៥៨នាក់- ស្ថិតនៅភូមិត្នោតញី ឃុំខ្ពប ស្រុកស្អាង ខេត្តកណ្ដាល ចំនួន ១២នាក់ ។ព្រមទាំងមានការចូលរួមពីអាជ្ញាធរ លោកស្រី តាត់ គីមសុខ ក្រុមបឹក្សាឃុំ លោក សៀក ចយ អនុភូមិ ផងដែរ។ពិធីនេះផងដែល ប្រជាពលរដ្ឋបានថ្លែងអំណរគុណ និង សូមបួងសួងដល់គុណព្រះរតនត្រ័យ កែវទាំងបី វត្ថុស័ក្តិសិទ្ធិក្នុងលោក និងទេវតាឆ្នាំថ្មី តាមបីបាច់ថែរក្សា និងប្រសិទ្ធិពរជ័យ សិរីមង្គល បវរមហាប្រសើរ ជន្មាយុយឺនយូរ គោរពជូន សម្តេចតេជោ ហ៊ុន សែន សម្តេចធីបតី ហ៊ុន ម៉ាណែត និងឯកឧត្តម គួច ចំរើន។ក្នុងឱកាសនោះដែរ ដោយសង្កេតឃើញនូវការខិតខំប្រឹងប្រែងបំពេញភារកិច្ចរបស់ក្រុមការងារកន្លងមក លោក រស់ ចំណាន បានឧបត្ថម្ភនូវម៉ូតូចំនួន ១គ្រឿង វិទ្យុទាក់ទងចំនួន ៤គ្រឿង ព្រមទាំងថវិកាមួយចំនួន ជូនដល់ក្រុមការងារ ដើម្បីសម្រួលដល់ការទំនាក់ទំនង និងជាមធ្យោបាយធ្វើដំណើរ ក្នុងគោលបំណងជំរុញការអនុវត្តផែនការងារឱ្យកាន់តែមានប្រសិទ្ធភាព និងទទួលបានជោគជ័យបន្ថែមទៀត។ជាចុងបញ្ចប់ លោក រស់ ចំណាន ថាការចូលរួមជីវភាពនយោបាយជាមួយគណបក្សប្រជាជនកម្ពុជា គឺជាការបង្ហាញពីស្មារតីរួបរួម និងការគាំទ្រទៅលើទិសដៅរក្សាសន្តិភាព ស្ថិរភាព និងការអភិវឌ្ឍប្រទេស ហើយការចូលរួមនេះ ជាកម្លាំងបន្ថែមសម្រាប់ការកសាងជាតិ និងការអភិវឌ្ឍន៍សង្គម កម្ពុជាយើង៕

ក្រោមគំនិតផ្តួចផ្តើម និងទឹកចិត្តដ៏ប្រពៃរបស់ ឯកឧត្តមឧបនាយករដ្ឋមន្រ្តី ហ៊ុន ម៉ានី តែងតែខ្វល់ខ្វាយយកចិត្តទុកដាក់ដល់សុខទុក្ខរបស់មន្រ្តីរាជការទាំងអស់ដែលបម្រើការងារនៅក្រោមចំណុះក្រសួងមុខងារសាធារណៈ ឯកឧត្តម បានផ្តួចផ្តើមឱ្យមានក្រុមការងារទទួលបន្ទុកអនុវត្តគម្រោងគិតគូរលើសុខុមាលភាពមន្រ្តីនៃក្រសួងមុខងារសាធារណៈ ដែលហៅកាត់ថា (MCS H+)។ កន្លងមក ក្រុមការងារ MCS H+ បានចុះសាកសួរសុខទុក្ខ និងនាំយកនូវកាដូរអនុស្សាវរីយ៍ ក៏ដូចជាថវិកាចូលរួមគាំទ្រទៅដល់សុខុមាលភាព និងការរំលែកទុក្ខផ្សេងៗជូនទៅដល់ថ្នាក់ដឹកនាំ និងមន្រ្តីរាជការប្រមាណជាង១០០ករណី រួចមកហើយ។ព្រឹកនេះ ជាភ័ព្វសំណាងរបស់មន្រ្តីរាជការក្រសួងមុខងារសាធារណៈ គឺ ឯកឧត្តមឧបនាយករដ្ឋមន្រ្តី បានផ្តល់ឱកាសឱ្យមានការពិនិត្យសុខភាពប្រចាំឆ្នាំជូនទៅដល់ថ្នាក់ដឹកនាំ និងមន្រ្តីរាជការគ្រប់ៗរូបដែលកំពុងបំពេញការងារនៅក្រោមចំណុះក្រសួងមុខងារសាធារណៈ។មានប្រសាសន៍សំណេះសំណាលក្នុងកម្មវិធីពិនិត្យសុខភាពប្រចាំឆ្នាំនាព្រឹកនេះ ឯកឧត្តមឧបនាយករដ្ឋមន្រ្តី ហ៊ុន ម៉ានី បានថ្លែងការអរគុណដល់មន្រ្តីនៃក្រសួងមុខងារសាធារណៈគ្រប់ជាន់ថ្នាក់ដែលបានខិតខំប្រឹងប្រែងបំពេញភារកិច្ចដោយអស់ពីកម្លាំងកាយចិត្តទោះក្នុងកាលៈទេសៈសុខភាពយ៉ាងណាក៏ដោយ ក៏នៅតែខិតខំបំពេញកាតព្វកិច្ចរបស់ខ្លួនឱ្យទទួលបានសមិទ្ធផលយ៉ាងច្រើន និងថ្មីៗជូនដល់ក្រសួង។ “ក្នុងវេលានេះជាការគិតគូររួមចំណែក និងការតបស្នងដល់ការខិតខំប្រឹងប្រែងរបស់មន្រ្តីរាជការនៃក្រសួងមុខងារសាធារណៈទាំងអស់ គឺខ្ញុំមានតែការផ្តល់ជូននូវការយកចិត្តទុកដាក់លើការថែទាំ ពិនិត្យតាមដានសុខភាព និងការព្យាបាលជូនដល់មន្រ្តីទាំងអស់។” សូមជម្រាបដែរថា កម្មវិធីពិនិត្យសុខភាពប្រចាំឆ្នាំនេះមានការចូលរួមគាំទ្រ ដំណើរប្រតិបត្តិការដោយសម្ព័ន្ធគ្រូពេទ្យសហភាពសហព័ន្ធយុវជនកម្ពុជា(DA-UYFC) ដែលប្រព្រឹត្តទៅរយៈពេលមួយថ្ងៃពេញ នៅសាលាភូមិន្ទរដ្ឋបាល។

(ខេត្តត្បូងឃ្មុំ) នៅរសៀលថ្ងៃទី២៦ ខែមេសា ឆ្នាំ២០២៦ ឯកឧត្តម ចាយ បូរិន ប្រធានផ្នែកឃោសនាអប់រំនៃយុវជន គណបក្សថ្នាក់កណ្តាល បានដឹកនាំគណៈប្រតិភូយុវជនគណបក្សប្រជាជនកម្ពុជាថ្នាក់កណ្តាល ចុះសួរសុខទុក្ខ និងនាំ យកអំណោយដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែត អនុប្រធានគណបក្សប្រជាជនកម្ពុជា ជាប្រធានយុវជន គណបក្សប្រជាជនកម្ពុជាថ្នាក់កណ្តាល និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អគ្គស្នងការកាយឫទ្ធិ នារីកម្ពុជា ជូនដល់ ឯកឧត្តម កង ណែម សមាជិកគណៈកម្មាធិការកណ្តាលគណបក្សប្រជាជនកម្ពុជា អតីត រដ្ឋលេខាធិការក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច បច្ចុប្បន្នជាទីប្រឹក្សារាជរដ្ឋាភិបាល នៅគេហដ្ឋាន ស្ថិតនៅភូមិពោធិ៍ស្រុក ឃុំកោងកាង ស្រុកពញាក្រែក ខេត្តត្បូងឃ្មុំ។ក្នុងឱកាសនោះ ឯកឧត្តមប្រធានគណៈប្រតិភូ បានពាំនាំការផ្តាំផ្ញើសាកសួរសុខទុក្ខ ពីសំណាក់សម្តេចអគ្គ មហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសន ប្រធានកាកបាទក្រហមកម្ពុជា សម្តេចមហាបវរធិបតី ហ៊ុន ម៉ាណែត អនុប្រធានគណបក្សប្រជាជនកម្ពុជា ជាប្រធាន យុវជនគណបក្សប្រជាជនកម្ពុជាថ្នាក់កណ្តាល និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អគ្គស្នងការ កាយឫទ្ធិនារីកម្ពុជា ព្រមទាំងថ្នាក់ដឹកនាំគណបក្សគ្រប់លំដាប់ថ្នាក់ ជូនដល់ឯកឧត្តម កង ណែម ព្រមទាំងក្រុមគ្រួសារ ដែលជានិច្ចកាលសម្ដេចតេជោ សម្ដេចកិត្តព្រឹទ្ធបណ្ឌិត សម្តេចមហាបវរធិបតី និងលោកជំទាវបណ្ឌិត តែងតែគិតគូរ យកចិត្តទុកដាក់អំពីសុខទុក្ខប្រជាជន និងថ្នាក់ដឹកនាំគ្រប់លំដាប់ថ្នាក់ ដែលធ្លាប់មានស្នាដៃ និងគុណបំណាច់ចំពោះ ប្រទេសជាតិមាតុភូមិ។ឯកឧត្តម កង ណម បានមានប្រសាសន៍ថា៖ «ខ្ញុំបាទព្រមទាំងក្រុមគ្រួសារ សូមសម្ដែងកតញ្ញូតាធម៌ និងសេចក្តីសោមនស្សចិត្តយ៉ាងក្រៃលែង គោរពជូនចំពោះ សម្តេចតេជោ សម្តេចកិត្តិព្រឹទ្ធបណ្ឌិត សម្តេចមហាបវរធិបតី និង លោកជំទាវបណ្ឌិត ដែលបានចាត់ឯកឧត្តម ចាយ បូរិន ជាតំណាងដ៏ខ្ពង់ខ្ពស់ ចុះមកសួរសុខទុក្ខ និងនាំយក អំណោយដ៏ថ្លៃថ្លា មកផ្តល់ឱ្យខ្ញុំបាទ និងក្រុមគ្រួសារដល់គេហដ្ឋានផ្ទាល់។ ខ្ញុំបាទនិងក្រុមគ្រួសារ ពិតជាមាន កិត្តិយសនិងក្តីរំភើបរីករាយឥតឧបមា ចំពោះសកម្មភាពចុះសួរសុខទុក្ខរបស់ក្រុមការងារយុវជនគណបក្សថ្នាក់កណ្ដាល ក្រោមការដឹកនាំប្រកបដោយភាពប្រាកដនិយមរបស់សម្តេចមហាបវរធិបតី ហ៊ុន ម៉ាណែត ដែលបន្តប្រតិបត្តិតាម ប្រពៃណីដ៏ល្អផូរផង់ ពីសម្ដេចតេជោ ហ៊ុន សែន ដែលតែងតែយកចិត្តទុកដាក់ពីសុខទុក្ខ ជីវភាព ផ្ដល់ភាពកក់ក្តៅ និង ក្តីសង្ឃឹមដល់ព្រឹទ្ធាចារ្យ ដែលមានគុណបំណាច់ចំពោះគណបក្ស និងប្រទេសជាតិ ស្របតាមគោលការណ៍របស់គណបក្ស ប្រជាជនកម្ពុជា»។ឯកឧត្តមក៏បានបញ្ជាក់ពីការគាំទ្រ និងមានជំនឿជឿជាក់យ៉ាងមុតមាំចំពោះរាជរដ្ឋាភិបាល អាណត្តិទី៧ នៃរដ្ឋសភា ក្រោមការដឹកនាំប្រកបដោយភាពប្រាកដនិយម និងការប្តេជ្ញាចិត្តយ៉ាងមោះមុតរបស់ សម្តេចមហា បវរធិបតី ហ៊ុន ម៉ាណែត ក្នុងការបន្តការពារ និងថែរក្សានូវសុខសន្តិភាព ស្ថិរភាពសង្គម អធិបតេយ្យជាតិ បូរណភាពទឹកដី តាមរយៈការចរចារដោយសន្តិវិធី និងការអភិវឌ្ឍសមិទ្ធផលថ្មីៗជូនជាតិមាតុភូមិ ព្រមទាំងបានគោរពជូនពរ សម្ដេច តេជោ សម្ដេចកិត្តិព្រឹទ្ធបណ្ឌិត សម្តេចមហាបវរធិបតី និងលោកជំទាវបណ្ឌិត និងសម្តេច ថ្នាក់ដឹកនាំ គណបក្សគ្រប់លំដាប់ថា្នក់ ក្នុងឱកាសឆ្នាំថ្មីប្រពៃណីជាតិខ្មែរ សូមទទួលបាននូវឧត្តមពរជ័យ សិរីមង្គល វិបុលសុខ បវរមហាប្រសើរ និងសូមមានសុខភាពល្អបរិបូរណ៍ ជន្មាយុយឺនយូរ ដើម្បីដឹកនាំនាវាកម្ពុជា ឈានឆ្ពោះទៅរកត្រើយ វឌ្ឍនភាពជានិរន្តរ៍។ក.ការងារគណបក្ស ឯកឧត្តម បានក្លាយជាសមាជិកគណៈកម្មាធិការកណ្តាល គណបក្សប្រជាជនកម្ពុជា ក្នុងមហាន្និបាតលើកទី២ នាថ្ងៃទី១១ ខែមេសា ឆ្នាំ១៩៨៩។ខ.សិក្សាវគ្គអប់រំនយោបាយ រួមមាន៖ ១)ឆ្នាំ១៩៧៨ វគ្គអប់រំទ្រឹស្ដីគ្រប់គ្រង ចាត់តាំង និងសេដ្ឋកិច្ច ចំនួន ៤វគ្គ រយៈពេល២ខែ នៅទីក្រុងហូជីមិញ ២)ឆ្នាំ១៩៨០រៀនវគ្គអប់រំទ្រឹស្តី ទស្សនវិជ្ជា គ្រប់គ្រង ចាត់តាំង យុវជន កុមារ និងសេដ្ឋកិច្ច រយៈពេល៦ខែ នៅសាលាយុវជនជាន់ខ្ពស់ វីលហែមពិច ប្រទេសអាល្លឺម៉ង់ ៣)ឆ្នាំ១៩៨២ វគ្គអប់រំទ្រឹស្ដី ទស្សនៈវិជ្ជា គ្រប់គ្រង ចាត់តាំង ដឹកនាំ និងសេដ្ឋកិច្ច រយៈពេល៦ខែ នៅទីក្រុងហាណូយ សាធារណៈរដ្ឋសង្គមនិយម វៀតណាម។គ. ប្រវត្តិការងា រួមមាន៖ ១)ឆ្នាំ១៩៧៩ ចូលរួមរណសិរ្សរួបរួមជាតិកម្ពុជា ២)ថ្ងៃទី១៩ ខែមិថុនា ឆ្នាំ ១៩៨៥ ជាអនុប្រធានយុវជនសង្គ្រោះជាតិកម្ពុជា ៣)ថ្ងៃទី១៨ ខែមីនា ឆ្នាំ១៩៨៩ អនុរដ្ឋមន្ត្រីក្រសួងកសិកម្ម ៤)ថ្ងៃទី ១៦ ខែកញ្ញា ឆ្នាំ១៩៩០ អនុប្រធានគណៈចាត់តាំងថ្នាក់កណ្តាល ៥)ថ្ងៃទី១៣ ខែមីនា ឆ្នាំ១៩៩២ អនុប្រធានទូរលេខ សម្ងាត់ក្រសួងមហាផ្ទៃ ៦)ថ្ងៃទី១២ ខែកក្កដា ឆ្នាំ១៩៩៣ អនុរដ្ឋមន្ត្រីក្រសួងមហាផ្ទៃ ៧)ថ្ងៃទី២ ខែធ្នូ ឆ្នាំ១៩៩៤ ទី ប្រឹក្សាក្រសួងមហាផ្ទៃ ៨)ថ្ងៃទី១៧ ខែវិច្ឆិកា ឆ្នាំ១៩៩៥ ទីប្រឹក្សាក្រសួងមហាផ្ទៃ ៩)ថ្ងៃទី៥ ខែធ្នូ ឆ្នាំ១៩៩៨ ទីប្រឹក្សា សម្តេច ហ៊ុន សែន ១០)ថ្ងៃទី១៧ ខែតុលា ឆ្នាំ២០០៤ អនុរដ្ឋលេខាធិការក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច ១១)ថ្ងៃទី១ ខែធ្នូ ឆ្នាំ២០០៩ រដ្ឋលេខាធិការក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការ កិច្ច ១២)ថ្ងៃទី២ ខែកញ្ញា ឆ្នាំ២០២៣ ជាទីប្រឹក្សារាជរដ្ឋាភិបាល។ជាងនេះទៅទៀត ឯកឧត្តម បានចែករំលែកបទពិសោធ និងផ្តល់អនុសាសន៍មួយចំនួន ដល់យុវជនគណបក្សដូចខាងក្រោម៖១. យុវជនត្រូវរួមសាមគ្គីគ្នាជាធ្លុងតែមួយ គ្រប់កាលៈទេសៈក្រោមការដឹកនាំរបស់គណបក្ស។២. យុវជនត្រូវចេះស្រលាញ់ រាប់អានគ្នា ជួយគ្នាទៅវិញទៅមក ដើម្បីជាកម្លាំងរឹងមាំការពារប្រទេសជាតិ។ ៣. យុវជនត្រូវរួមចំណែកកាតព្វកិច្ចការពារជាតិ ការពារសន្តិភាព សន្តិសុខសង្គម។៤. យុវជនត្រូវចូលរួមជាមួយរាជរដ្ឋាភិបាល ទប់ស្កាត់បទល្មើសគ្រប់ប្រភេទ និងប្រយុទ្ធប្រឆាំងគ្រឿងញៀន (ដើម្បីអភិវឌ្ឍន៍ប្រទេសជាតិ)។៥. វប្បធម៌នៃការសួរសុខទុក្ខ ជាប្រពៃណីដ៏ល្អផូរផង់របស់ដូនតាខ្មែរយើង សំណូមពរឱ្យបន្តបំផុស សកម្មភាពនេះ បានទូលំទូលាយដល់ភូមិ ឃុំ/សង្កាត់ ស្រុក/ខណ្ឌ និងរាជធានីខេត្ត។ឯកឧត្តមប្រធានប្រតិភូ បានកោតសរសើរ និងវាយតម្លៃខ្ពស់ចំពោះស្នាដៃ ការខិតខំប្រឹងប្រែង របស់ឯក ឧត្តម ដែលបានចូលរួមចំណែកបម្រើគណបក្សនិងប្រជាជននាពេលកន្លងមក ព្រមទាំងបានប្រគល់នូវអំណោយដ៏ថ្លៃថ្ល របស់សម្ដេចមហាបវរធិបតី និងលោកជំទាវបណ្ឌិត ជូនចំពោះឯកឧត្តម កង ណែម និងសូមបួងសួងដល់វត្ថុស័ក្តិសិទ្ធិ ក្នុងលោក ទេវតាឆ្នាំថ្មីព្រះនាម រាក្យសាទេវី តាមជួយបីបាច់ថែរក្សា ឯកឧត្ដម ព្រមទាំងក្រុមគ្រួសារ មានសុខភាព ល្អ កម្លាំងមាំមួន និងមានជន្មាយុយឺនយូរ ទទួលបាននូវពុទ្ធពរ៤ប្រការ គឺអាយុ វណ្ណៈ សុខៈ ពលៈ កុំបីប្រែក្លាយជាបការៈ ដទៃឡើយ៕

ឯកឧត្តមឧបនាយករដ្ឋមន្រ្តី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ បានផ្តួចផ្តើមគម្រោងស្តីពីការគិតគូរពីសុខមាលភាពមន្ត្រីនៃក្រសួងមុខងារសាធារណៈ (MCS.H+) ដែលតែងតែយកចិត្តទុកដាក់ ត្រៀមខ្លួនជាស្រេច និងបានចូលរួមគាំទ្រថ្នាក់ដឹកនាំ និងមន្ត្រីគ្រប់រូប នៅគ្រប់ពេលវេលា ហើយកន្លងមកអនុវត្តបានចំនួន ១១២ ករណី​ រួមមាន ការចុះសួរសុខទុក្ខមន្ត្រីដែលសម្រាកលំហែមាតុភាព/បិតុភាព កំពុងព្យាបាលជំងឺ ឬជួបគ្រោះថ្នាក់ មរណភាព ព្រមទាំងការផ្តល់ការគាំទ្រផ្សេងៗក្នុងស្ថានភាពលំបាក។ឯកឧត្តមថ្លែងថា នាថ្ងៃនេះ ក្រសួងមុខងារសាធារណៈ បានគិតគូរមួយកម្រិតទៀត ក្នុងការចូលរួមរែកបន្ទុកមួយផ្នែកលើតម្រូវការផ្នែកសុខភាពមូលដ្ឋាន ដោយផ្តោតលើការពិនិត្យតាមដានសុខភាពជូនថ្នាក់ដឹកនាំ និងមន្ត្រីនៃក្រសួងមុខងារសាធារណៈ ក្រោមកិច្ចសហការរវាង MCS.H+ និងសម្ព័ន្ធគ្រូពេទ្យសហភាពសហព័ន្ធយុវជនកម្ពុជា (DA UYFC)។ ចេញពីមូលដ្ឋានជាលើកដំបូងនេះ ក្រសួងនឹងបន្តគិតគូរជាបន្តបន្ទាប់ ក្នុងការរៀបចំជារៀងរាល់ឆ្នាំទៅមុខទៀត ដើម្បីលើកកម្ពស់សុខុមាលភាពថ្នាក់ដឹកនាំ និងមន្ត្រីឱ្យកាន់តែប្រសើរ។ឯកឧត្តម បន្តថា ដំណើរការអភិវឌ្ឍវិស័យមុខងារសាធារណៈ និងការកែទម្រង់រដ្ឋបាលសាធារណៈ កំពុងបន្តទៅមុខយ៉ាងស្វាហាប់ ជាជំហានៗដ៏រឹងមាំ ដោយមានសមិទ្ធផលជាក់ស្តែងកើតចេញពីការខិតខំប្រឹងប្រែង និងការលះបង់របស់ថ្នាក់ដឹកនាំ និងមន្ត្រីទាំងអស់ ស្របតាមចក្ខុវិស័យរបស់ សម្តេចមហាបវរធិបតីនាយករដ្ឋមន្ត្រី។ ដំណើរការដ៏វែងឆ្ងាយឆ្ពោះទៅមុខក្នុងការបំពេញបេសកកម្មបម្រើជាតិ និងប្រជាជន ពឹងផ្អែកយ៉ាងសំខាន់លើសុខភាព និងសុខុមាលភាពរបស់ថ្នាក់ដឹកនាំ និងមន្ត្រីម្នាក់ៗ ដែលជាប្រតិបត្តិករផ្ទាល់ និងកម្លាំងស្នូលដ៏សំខាន់របស់រាជរដ្ឋាភិបាល។ ឯកឧត្តមថ្លែងថា៖ ខ្ញុំនៅតែចងចាំជានិច្ច នៅពេលដំបូងដែលខ្ញុំបានចូលបំពេញការងារនៅក្រសួងមុខងារសាធារណៈ ដែលពិតជាបានយល់ច្បាស់ និងសូមវាយតម្លៃខ្ពស់ចំពោះវិជ្ជាជីវៈ ភាពទទួលខុសត្រូវ និងការបំពេញភារកិច្ចរបស់ថ្នាក់ដឹកនាំ និងមន្ត្រីគ្រប់រូប ដែលបានបង្ហាញយ៉ាងច្បាស់ថា អ្វីដែលសំខាន់បំផុតគឺការសម្រេចលទ្ធផលជាក់ស្តែងក្នុងការអនុវត្តបេសកកម្មរបស់ខ្លួន។ឯកឧត្តម បានថ្លែងអំណរគុណដល់ក្រុមការងារគ្រូពេទ្យ DA UYFC ដែលបានចូលរួមសហការយ៉ាងជិតស្និទ្ធជាមួយក្រុមការងារនៃក្រសួងមុខងារសាធារណៈ ដើម្បីផ្តល់ការពិនិត្យសុខភាពដោយឥតគិតថ្លៃ ចំនួន ៩កញ្ចប់សេវា ព្រមទាំងបានចែករំលែកអំពីការសង្គ្រោះជីវិតបឋមនៅក្នុងថ្ងៃនេះ។