រដ្ឋមន្ត្រីការបរទេសអ៊ីរ៉ង់ លោក Abbas Araghchi បានជួបជាមួយប្រមុខកងទ័ពប៉ាគីស្ថាន គឺលោកសេនាប្រមុខ Asim Munir នៅទីក្រុងអ៊ីស្លាម៉ាបាដ នាថ្ងៃសៅរ៍ (ទី២៥ ខែមេសា ឆ្នាំ២០២៦) នេះ ស្របពេលមានកិច្ចប្រឹងប្រែង ដើម្បីស្តារឡើងវិញនូវការចរចាសន្តិភាពដែលជាប់គាំង រវាងសហរដ្ឋអាមេរិក និងអ៊ីរ៉ង់ ដើម្បីបញ្ចប់សង្គ្រាមរយៈពេល ៣សប្តាហ៍របស់គូជម្លោះទាំង២។យោងតាមវីដេអូខ្លីមួយដែលបានបង្ហោះដោយស្ថានទូតអ៊ីរ៉ង់ នៅលើវេទិកាបណ្ដាញសង្គម X បានបង្ហាញថា កិច្ចប្រជុំនេះក៏មានការចូលរួមផងដែរ ពីសំណាក់រដ្ឋមន្ត្រីក្រសួងមហាផ្ទៃប៉ាគីស្ថាន លោក Mohsin Naqvi ទីប្រឹក្សាសន្តិសុខជាតិ និងជាប្រធានផ្នែកស៊ើបការណ៍សម្ងាត់អន្តរសេវាកម្ម លោកឧត្តមសេនីយ៍ឯក Asim Malik អ្នកនាំពាក្យក្រសួងការបរទេសអ៊ីរ៉ង់ លោក Esmaeil Baghaei និងឯកអគ្គរដ្ឋទូតអ៊ីរ៉ង់ លោក Reza Amiri Moghadam។បើទោះបីជាស្ថានទូតមិនបានផ្តល់ព័ត៌មានលម្អិតបន្ថែមក៏ដោយ ក៏ប្រភពពីប៉ាគីស្ថានបានប្រាប់សារព័ត៌មាន Anadolu ថា ភាគីទាំង២ បានពិភាក្សាអំពីបញ្ហាទាក់ទងនឹងលទ្ធភាពដែលអាចមានកិច្ចចរចាជុំទី២ រវាងទីក្រុងវ៉ាស៊ីនតោន និងតេអេរ៉ង់ ក្នុងរយៈពេលប៉ុន្មានថ្ងៃខាងមុខ។លោក Araghchi បានទៅដល់ប៉ាគីស្ថានកាលពីយប់ថ្ងៃសុក្រ សម្រាប់អ្វីដែលមន្ត្រីប៉ាគីស្ថាន លើឡើងថា អាចបើកផ្លូវឲ្យមានការចរចាជុំទី២។ ជុំទី១ ត្រូវបានធ្វើឡើងនៅទីក្រុងអ៊ីស្លាម៉ាបាដ កាលពី ២សប្តាហ៍មុន ប៉ុន្តែមិនបានឈានដល់កិច្ចព្រមព្រៀងអ្វីឡើយ។ កិច្ចពិភាក្សាទាំងនោះបានកើតឡើងបន្ទាប់ពីប៉ាគីស្ថានបានសម្របសម្រួលឲ្យមានបទឈប់បាញ់រយៈពេល ២សប្តាហ៍ នៅថ្ងៃទី៨ ខែមេសា ដែលក្រោយមកត្រូវបានពន្យារដោយប្រធានាធិបតីអាមេរិកលោក Donald Trump៕

តុលាការបានរាយការណ៍ឲ្យដឹងថា ប្រទេសអ៊ីរ៉ង់នៅថ្ងៃសៅរ៍ (ទី២៥ ខែមេសា ឆ្នាំ២០២៦) នេះ បានប្រហារជីវិតបុរសម្នាក់ពីបទអនុវត្ត «បេសកកម្ម» តំណាងឲ្យទីភ្នាក់ងារចារកម្មអ៊ីស្រាអែល ក្នុងអំឡុងពេលមានការតវ៉ាទ្រង់ទ្រាយធំ កាលពីខែមករា។នេះគឺជាការប្រហារជីវិតចុងក្រោយបំផុត ក្នុងចំណោមការប្រហារជីវិតជាបន្តបន្ទាប់ ចាប់តាំងពីសង្គ្រាមបានផ្ទុះឡើងជាមួយអ៊ីស្រាអែល និងសហរដ្ឋអាមេរិក។ គេហទំព័រ Mizan Online របស់តុលាការ បានឲ្យដឹងថា លោក Erfan Kiani ត្រូវបានព្យួរក បន្ទាប់ពីការកាត់ទោសរបស់លោក ត្រូវបានអះអាងមិនផ្លាស់ប្ដូរដោយតុលាការកំពូលរបស់ប្រទេស។គេហទំព័រនេះបានពិពណ៌នាអំពីលោក Kiani ថា ជា «អ្នកប្រតិបត្តិការដ៏សំខាន់» ម្នាក់ នៅក្នុង «បេសកកម្មដែលប្រគល់ឲ្យដោយទីភ្នាក់ Mossad» ក្នុងអំឡុងពេលមានភាពចលាចល នៅភាគកណ្តាលខេត្ត Isfahan របស់អ៊ីរ៉ង់។តុលាការបានចោទប្រកាន់រូបគេពីបទ «បំផ្លាញទ្រព្យសម្បត្តិសាធារណៈ និងឯកជន សកម្មដុតបំផ្លាញ កាន់កាប់ និងប្រើប្រាស់គ្រាប់បែកភ្លើង កាន់អាវុធចុងស្រុច បិទផ្លូវយានយន្ត វាយប្រហារមន្ត្រី ហើយបានបង្កជាការភ័យខ្លាច និងការភ័យស្លន់ស្លោ ក្នុងចំណោមប្រជាពលរដ្ឋ»។ការប្រហារជីវិតរបស់គេ បានកើតឡើងបន្ទាប់ពីមានការកាត់ទោសដោយព្យួរកនេះ កាលថ្ងៃទី២៣ ខែមេសា ចំពោះបុរសម្នាក់ទៀតនៅក្នុងប្រទេសអ៊ីរ៉ង់ ដែលត្រូវបានផ្ដន្ទាទោសពីបទចូលជាសមាជិកនៃក្រុមប្រឆាំងដែលត្រូវបានហាមឃាត់៕

កំពង់ចាម ៖ សម្តេចតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា ក្រើនរំលឹកដល់មន្ត្រីទាំងអស់នៅមូលដ្ឋានយកចិត្តទុកដាក់រក្សាសន្តិសុខសណ្តាប់ធ្នាប់សង្គមឲ្យបានល្អ ដោយបន្តអនុវត្តគោលនយោបាយភូមិឃុំសង្កាត់មានសុវត្ថិភាព លុបបំបាត់សកម្មភាពអាណាធិបតេយ្យ និងបទល្មើសផ្សេងៗ ពិសេសបទល្មើសឆបោកតាមប្រព័ន្ធអនឡាញ(Online Scam) ។ ប្រសាសន៍ក្រើនរំលឹករបស់សម្តេចតេជោធ្វើឡើងក្នុងឱកាសជួបសំណេះសំណាលជាមួយក្រុមប្រឹក្សាខេត្ត ក្រុងស្រុក ឃុំសង្កាត់ និងមន្ត្រីមន្ទីរអង្គភាពជុំវិញខេត្តកំពង់ចាម ចំនួន១១៩៣នាក់ នៅព្រឹកថ្ងៃទី២៥ ខែមេសា ឆ្នាំ២០២៦នេះ។សម្តេចតេជោ មានប្រសាសន៍ថា ត្រូវខិតខំរក្សាសន្តិសុខសណ្តាប់ធ្នាប់សង្គមឲ្យបានល្អ ខិតខំលុបបំបាត់សកម្មភាពអាណាធិបតេយ្យ ក្មេងទំនើង ល្បែងស៊ីសង គ្រឿងញៀនជាពិសេសបង្ក្រាបអោយខានតែបាននូវការឆបោកតាមប្រព័ន្ធអនឡាញ។ សម្តេចបន្តថា ខេត្តនីមួយៗ ស្រុកនិមួយៗ ឃុំនីមួយៗ ភូមិនិមួយៗ ត្រូវធ្វើការងារនេះអោយជាប់ជាប្រចាំ ។ ទោះដោយតម្លៃណាក៏ដោយ ត្រូវបង្ក្រាបករណីបទល្មើសអនឡាញកុំអោយងើបឡើងវិញអោយសោះ ត្រូវបោសសំអាត និងលុបបំបាត់អោយអស់ពីកម្ពុជាព្រោះវាគ្រោះថ្នាក់ដល់ជាតិ និងខូចកិត្តិយសជាតិ។ទន្ទឹមនឹងនេះ សម្តេចតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា ក៏បានក្រើនរំលឹកដល់មន្ត្រីខិតខំបំពេញការងារបម្រើប្រជាជនដោយស្មោះត្រង់ ខិតខំកាត់បន្ថយឬលុបបំបាត់ការថ្នាំងថ្នាក់របស់ប្រជាជន។សម្តេចតេជោបានណែនាំដល់ មេឃុំ ជំទប់​ សមាជិកក្រុមប្រឹក្សាឃុំសង្កាត់ដែលនៅជិតជាមួយប្រជាជនត្រូវធ្វើការងារអោយបានល្អ គ្រប់ផ្នែកក៏ដូចគ្នាគឺពង្រឹងសេវាសាធារណៈ ជម្រុញល្បឿនអោយលឿនផ្តល់ជូនប្រជាពលរដ្ឋ។ សម្តេចតេជោក្រើនរលឹកថា មន្ត្រីមិនមែនជាចៅហ្វាយរបស់ប្រជាជនទេ ត្រូវចាត់ទុកថាខ្លួនជាអ្នកបម្រើដ៏ស្មោះត្រង់របស់ប្រជាជន​។ ការផ្តល់សេវាសាធារណៈនៅតែជាបញ្ហាសំខាន់ សូមបន្តខិតខំធ្វើ និងបម្រើដល់ប្រជាពលរដ្ឋអោយបានល្អ ម្យ៉ាងវិញទៀតចៀសវាងប្ដីស័ក្តិ៣ ប្រពន្ធស័ក្តិ៤ កូនស័ក្តិ៥ ដែលធ្វើឱ្យមានបញ្ហាក្នុងមូលដ្ឋាន៕ ដោយ ៖ ពៅ រក្សា  

សម្តេចតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា ណែនាំដល់មន្ត្រីថ្នាក់ដឹកនាំខេត្តកំពង់ចាម យកចិត្តទុកដាក់គ្រប់គ្រង និងមើលថែទាំដល់អតីតយុទ្ធជន និងនិវត្តជនដែលមាននៅក្នុងមូលដ្ឋាន។ ប្រសាសន៍ណែនាំរបស់សម្តេចតេជោធ្វើឡើងក្នុងឱកាសជួបសំណេះសំណាលជាមួយក្រុមប្រឹក្សាខេត្ត ក្រុងស្រុក ឃុំសង្កាត់ និងមន្ត្រីមន្ទីរអង្គភាពជុំវិញខេត្តកំពង់ចាម ចំនួន១១៩៣នាក់ នៅព្រឹកថ្ងៃទី២៥ ខែមេសា ឆ្នាំ២០២៦នេះ។សម្តេចតេជោ មានប្រសាសន៍រលឹកថា ឆ្នាំកន្លងទៅយើងបានច្របាច់បញ្ចូលគ្នា ដោយសារយើងមានសមាគមអតីតយុទ្ធជន ប៉ុន្តែយើងមិនមានសមាគមអតីតនិវត្តជននោះទេ ទើបបានជាយើងធ្វើមហាសន្និបាតមួយរៀបចំបញ្ចូលរវាងយុទ្ធជន និងនិវត្តជន។ សម្តេចតេជោបញ្ជាក់ថា «សូមកុំភ្លេចថាអតីតយុទ្ធជន និងនិវត្តជនត្រូវជួយពួកគាត់ ត្រូវមើលថែពួកគាត់ និងផ្តល់កិត្តិយសដល់ពួកគាត់។ ថ្ងៃបុណ្យថ្ងៃទាន ដូចជា៧មករាជាដើម អញ្ជើញពួកគាត់មកចូលរួមក្នុងឋានៈជាចាស់ទុំ ហើយជួនកាល១ឆ្នាំអាចចំណាយពេលធ្វើកម្មវិធីជួបពួកគាត់ម្តង ឬអញ្ជើញពួកគាត់មកសំណេះសំណាល ដែលពួកគាត់នោះហើយជាអ្នកដឹកដៃពួកយើងជំនាន់ក្រោយនេះ.....»។ សម្តេចតេជោបន្តថា «ពិតមែនតែពួកគាត់មិនឡើងថ្នាក់ធំដូចយើង ប៉ុន្តែកុំភ្លេចសិស្សសាលាខ្លះបង្អាប់គ្រូខ្លួនឯង មើលងាយគ្រូ តែមិនដឹងថាតម្លៃនៃគ្រូបង្រៀនថ្នាក់បឋមទើបអាចអោយយើងអាចទទួលបានបរិញ្ញាបត្រ។ ដូចគ្នានេះដែរមានមន្ត្រីជាន់មុនទោះសមត្ថភាព កម្រិតវប្បធម៌ទាប ប៉ុន្តែពួកគាត់នោះហើយដែលជារបាំងការពារក្នុងដំណាក់កាលសង្គ្រាម មានអាសន្នអន់ក្រ ទឹកជំនន់រាំងស្ងួតជាដើម ទើបបានយើងធ្វើសុខដុមនីយកម្ម​នៃស្ថានភាពចម្រុះ រវាងក្មេង ចាស់ ហើយជីវភាពពួកគាត់ខ្លះ មិនខ្សត់ខ្សោយពេកទេ តែយើងអាចយកយោបល់ពីពួកគាត់ ឬរៀបចំការជួបជុំណាមួយជាមួយពួកគាត់....»។សូមបញ្ជាក់ថា សម្តេចតេជោ ហ៊ុន សែន បានផ្តួចផ្តើមគំនិតឱ្យពង្រីកវិសាលភាព នៃសមាគមអតីតយុទ្ធជនកម្ពុជា ដោយបញ្ចូលនិវត្តជនជាមន្ត្រីរាជការស៊ីវិលគ្រប់លំដាប់ថ្នាក់ ចូលជាសមាជិកនៃសមាគម ដោយប្រែក្លាយទៅជាសមាគមអតីតយុទ្ធជន និងនិវត្តជនកម្ពុជា។ការរៀបចំបញ្ចូលគ្នា ឱ្យមាននូវក្របខណ្ឌនៃអតីតយុទ្ធជន និងនិវត្តជន នៅក្រោមដំបូលតែមួយនេះ ដើម្បីបង្ហាញអំពីការយកចិត្តទុកដាក់ និងការចូលរួមជាបន្តទៀត របស់អតីតយុទ្ធជន និងនិវត្តជនកម្ពុជា ដើម្បីធ្វើដំណើររួមគ្នា​៕ អត្ថបទ៖ ពៅ រក្សា

នគរបាលបានឲ្យដឹងថា ការប្រយុទ្ធគ្នាដោយកាំភ្លើង រវាងក្រុមជនជាតិភាគតិចដែលមានអរិភាពជាមួយគ្នា នៅភាគឦសានរដ្ឋមានជម្លោះ Manipur របស់ប្រទេសឥណ្ឌា បានបណ្ដាលឲ្យបុរស ៣នាក់បាត់បង់ជីវិត ដោយនេះគឺជាភាពចលាចលចុងក្រោយបំផុត នៅក្នុងតំបន់ដាច់ស្រយាល។រដ្ឋ Manipur បានជួបប្រទះនឹងការប៉ះទង្គិចគ្នាជាប្រចាំអស់រយៈពេលជិត ៣ឆ្នាំមកហើយ រវាងជនជាតិភាគតិច Meitei ដែលភាគច្រើនជាអ្នកកាន់សាសនាហិណ្ឌូ និងសហគមន៍ Kuki ដែលភាគច្រើនជាគ្រិស្តបរិស័ទ ជាជម្លោះដែលបានឆក់យកជីវិតមនុស្សជាង ២៥០នាក់។នៅក្នុងសេចក្តីថ្លែងការណ៍មួយកាលល្ងាចថ្ងៃសុក្រ (ទី២៤ ខែមេសា ឆ្នាំ២០២៦) នគរបាលរដ្ឋ Manipur បានឲ្យដឹងថា៖ «នៅក្នុងហេតុការបាញ់ប្រហារតគ្នាទៅវិញទៅមកដ៏ខ្លាំងមួយ មនុស្ស ៣នាក់បានរងរបួស ដោយសារគ្រាប់កាំភ្លើង ហើយបានបាត់បង់ជីវិត»។ការប៉ះទង្គិចគ្នាបានកើតឡើងនៅភូមិ Mullam ក្នុងតំបន់ Ukhrul ហើយនគរបាលមិនបានបញ្ជាក់ថា តើបុរសទាំងនោះមកពីសហគមន៍ណានោះទេ។នគរបាលបានបន្ថែមថា៖ «វិធានការសន្តិសុខត្រូវបានពង្រឹងនៅក្នុងតំបន់នេះ ដើម្បីទប់ស្កាត់ការកើនឡើងនូវអំពើហិង្សាបន្ថែមទៀត។ ប្រតិបត្តិការរឹតបន្តឹងនៅតែដំណើរការដដែល»៕

របាយការណ៍របស់ទីភ្នាក់ងារសារព័ត៌មានពាក់កណ្តាលផ្លូវការ Tasnim បានឲ្យដឹងថា អ្នកនាំពាក្យក្រសួងការពារជាតិម្នាក់ បាននិយាយថា សមត្ថភាពមីស៊ីលភាគច្រើនរបស់អ៊ីរ៉ង់ មិនត្រូវបានប្រើប្រាស់នោះឡើយ នៅក្នុងសង្គ្រាមជាមួយសហរដ្ឋអាមេរិក។លោកឧត្តមសេនីយ៍ Reza Talaei-Nik បាននិយាយថា «ផ្នែកសំខាន់នៃសមត្ថភាពមីស៊ីលរបស់អ៊ីរ៉ង់ នៅតែមិនទាន់ប្រើប្រាស់នោះទេ»។ នេះបើយោងតាមរបាយការណ៍របស់ទីភ្នាក់ងារសារព័ត៌មានពាក់កណ្តាលផ្លូវការមួយនេះ។ដោយលើកឡើងថា កងកម្លាំងអ៊ីរ៉ង់ បន្តរក្សាបាននូវឧត្តមភាពពេញមួយជម្លោះនេះ លោក Talaei-Nik បានបញ្ជាក់ថា៖ «កងកម្លាំងរបស់យើងបន្តរក្សាបាននូវឧត្តមភាពផ្លូវអាកាសទាំងស្រុង លើទឹកដីកាន់កាប់ដោយក្រុមគាំទ្រលទ្ធិហ្សាអឺន (អ៊ីស្រាអែល) ហើយផ្នែកខ្លះប៉ុណ្ណោះនៃសមត្ថភាពមីស៊ីលរបស់យើង ត្រូវបានប្រើប្រាស់ក្នុងអំឡុងសង្គ្រាម ៤០ថ្ងៃ»។ទាក់ទងនឹងការប្រឈមមុខដាក់គ្នាខាងកងទ័ពជើងទឹក ឧត្តមសេនីយ៍រូបនេះបានអះអាងថា នាវាចម្បាំងដែលមានអរិភាព បានដកថយរាប់រយគីឡូម៉ែត្រពីសមុទ្រអូម៉ង់ម្តងហើយម្តងទៀត អំឡុងពេលមានការឆ្លើយតបទៅនឹងសកម្មភាពយ៉ាងដាច់ណាត់ដោយកងកម្លាំងអ៊ីរ៉ង់។ការដឹកជញ្ជូនតាមច្រកសមុទ្រ Hormuz ត្រូវបានរំខានយ៉ាងខ្លាំង ចាប់តាំងពីសហរដ្ឋអាមេរិក និងអ៊ីស្រាអែល បានចាប់ផ្តើមសង្គ្រាមលើអ៊ីរ៉ង់ ចាប់ពីថ្ងៃទី២៨ ខែកុម្ភៈ ដែលធ្វើឲ្យទីផ្សារថាមពលសកលរង្គោះរង្គើ និងធ្វើឲ្យមានក្ដីបារម្ភកាន់តែខ្លាំង អំពីការខូចខាតសេដ្ឋកិច្ចយូរអង្វែង៕

រដ្ឋមន្ត្រីការបរទេសទួរគី លោក Hakan Fidan បាននិយាយថា ប្រទេសទួរគីអាចពិចារណាចូលរួមក្នុងប្រតិបត្តិការដោះមីន នៅច្រកសមុទ្រ Hormuz បន្ទាប់ពីសម្រេចបាននូវកិច្ចព្រមព្រៀងសន្តិភាព រវាងអ៊ីរ៉ង់ និងសហរដ្ឋអាមេរិក។អំឡុងពេលថ្លែងទៅកាន់អ្នកសារព័ត៌មាន នៅទីក្រុងឡុងដ្រ៍ ប្រទេសអង់គ្លេស កាលពីល្ងាចថ្ងៃសុក្រ (ទី២៤ ខែមេសា ឆ្នាំ២០២៦) លោក Fidan បានបញ្ជាក់ថា ក្រុមបច្ចេកទេសមួយ ត្រូវបានគេរំពឹងថា នឹងអនុវត្តការងារដោះមីន នៅក្នុងច្រកសមុទ្រ បន្ទាប់ពីមាននូវកិច្ចព្រមព្រៀងណាមួយ ដោយលោកបានបន្ថែមថា ទួរគីមើលឃើញកិច្ចប្រឹងប្រែងបែបនេះជាសកម្មភាពវិជ្ជមាន ដែលជាកាតព្វកិច្ចមនុស្សធម៌។លោក Fidan បាននិយាយថា ការងារដោះមីនណាមួយ នឹងត្រូវបានអនុវត្តដោយក្រុមបច្ចេកទេសមកពីប្រទេសផ្សេងៗ ដែលត្រូវបានបង្កើតឡើងបន្ទាប់ពីអាចសម្រេចបាននូវកិច្ចព្រមព្រៀងសន្តិភាព រវាងអ៊ីរ៉ង់ និងសហរដ្ឋអាមេរិក។ លោកបានបន្ថែមទៀតថា ទួរគីនឹង «មិនមានបញ្ហា» ជាមួយនឹងការចូលរួម ក្នុងប្រតិបត្តិការដោះមីនក្រោមលក្ខខណ្ឌនានាឡើយ។យ៉ាងណាក្ដី លោក Fidan បានព្រមានថា ទួរគីនឹងវាយតម្លៃឡើងវិញនូវជំហររបស់ខ្លួន ប្រសិនបើកក្រុមបច្ចេកទេសចម្រុះណាមួយនាពេលអនាគត ដែលមានការចូលរួមពីប្រទេសនានា បានក្លាយជាភាគីនៃជម្លោះថ្មី។ លោកក៏បានសង្កត់ធ្ងន់ដែរថា លោកជឿជាក់ថា បញ្ហាទាក់ទងនឹងកម្មវិធីនុយក្លេអ៊ែររបស់អ៊ីរ៉ង់អាចត្រូវបានដោះស្រាយនៅក្នុងកិច្ចចរចាជុំបន្ទាប់ នៅក្នុងប្រទេសប៉ាគីស្ថាន៕

ក្រុមអ្នកចរចាអាមេរិក គ្រោងនឹងចាកចេញទៅកាន់ប្រទេសប៉ាគីស្ថាន នាថ្ងៃសៅរ៍ (ទី២៥ ខែមេសា ឆ្នាំ២០២៦) នេះ ប៉ុន្តែប្រទេសអ៊ីរ៉ង់បានបញ្ជាក់ថា មន្ត្រីរបស់ខ្លួនមិនមានគម្រោងជួបជាមួយអាមេរិក ដើម្បីពិភាក្សាអំពីការបញ្ចប់សង្គ្រាមដែលបានសម្លាប់មនុស្សរាប់ពាន់នាក់ និងធ្វើឲ្យទីផ្សារពិភពលោកច្របូកច្របល់។សេតវិមានបានឲ្យដឹងថា បេសកជនពិសេសរបស់ប្រធានាធិបតីអាមេរិក លោក Donald Trump គឺលោក Steve Witkoff និងកូនប្រសារប្រុស លោក Jared Kushner នឹងចេញដំណើរនៅព្រឹកថ្ងៃទី២៥ ខែមេសានេះ ដើម្បីពិភាក្សាជាមួយរដ្ឋមន្ត្រីការបរទេសអ៊ីរ៉ង់ លោក Abbas Araqchi។លោក Araqchi បានទៅដល់រដ្ឋធានីអ៊ីស្លាម៉ាបាដហើយ កាលពីថ្ងៃទី២៤ ខែមេសា។ ប៉ុន្តែអ្នកនាំពាក្យក្រសួងការបរទេសអ៊ីរ៉ង់ បានបង្ហោះនៅលើវេទិកាបណ្ដាញសង្គម X ថា មន្ត្រីអ៊ីរ៉ង់មិនមានគម្រោងជួបជាមួយតំណាងអាមេរិកទេ ហើយថា ក្ដីបារម្ភរបស់ទីក្រុងតេអេរ៉ង់ នឹងត្រូវបញ្ជូនទៅអ្នកសម្របសម្រួលប៉ាគីស្ថាន។សេតវិមានមិនបានឆ្លើយតបភ្លាមៗនោះទេ ចំពោះសំណើសុំការអត្ថាធិប្បាយ ជុំវិញសេចក្តីថ្លែងការណ៍របស់អ៊ីរ៉ង់។ ទីក្រុងវ៉ាស៊ីនតោន និងតេអេរ៉ង់ កំពុងស្ថិតក្នុងភាពជាប់គាំងដែលនាំឲ្យមានខាតបង់ធំ ដោយអ៊ីរ៉ង់បានបិទច្រកសមុទ្រ Hormuz ភាគច្រើន ដែលជាធម្មតា ១ភាគ៥នៃការដឹកជញ្ជូនប្រេងសកលឆ្លងកាត់ទីនេះ ខណៈដែលសហរដ្ឋអាមេរិករារាំងការនាំចេញប្រេងរបស់អ៊ីរ៉ង់។ ជម្លោះនេះ ដែលចូលដល់សប្តាហ៍ទី៩ បានរុញឲ្យតម្លៃថាមពលហក់ឡើងដល់កម្រិតខ្ពស់បំផុតជាលើកដំបូង ក្នុងរយៈពេលច្រើនឆ្នាំ ដែលធ្វើឲ្យអតិផរណាកើនឡើង និងនាំឲ្យមានការរំពឹងទុក ដែលថា កំណើនសកលកាន់តែស្ថិតក្នុងភាពងងឹត៕

(ភ្នំពេញ)៖ នៅថ្ងៃទី២៦ ខែមេសា ឆ្នាំ២០២៦ស្អែកនេះ រាជរដ្ឋាភិបាលកម្ពុជា តាមរយៈក្រសួងការងារ និងបណ្តុះបណ្តាលវិជ្ជាជីវៈនឹងប្រារព្ធខួបអនុស្សាវរីយ៍លើកទី១៤០ នៃទិវាពលកម្មអន្តរជាតិ ១ឧសភា ឆ្នាំ២០២៦ ក្រោមអធិបតីភាពសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ដោយមានការចូលរួមពីសំណាក់ភ្ញៀវអន្តរជាតិ អង្គការសង្គមស៊ីវិលជាតិ និងអន្តរជាតិ សមាគមបុគ្គលិកសិក្សា សហជីព និងកម្មករនិយោជិតចំនួនជាង ៥ពាន់នាក់ នៅមណ្ឌលសន្និបាត និងពិព័រណ៍កោះពេជ្រ។ នៅឆ្នាំ២០២៦នេះ កម្ពុជាបានជ្រើសយកប្រធានបទ «រួមគ្នាកសាងភាពធន់​ដើម្បីការងារ​សមរម្យ» គឺជាប្រធានបទ​ដើម្បីអបអរសាទរ​ទិវាពលកម្មអន្តរជាតិ១ឧសភាដ៏មានសារសំខាន់នាពេលនេះ។ លោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបានឱ្យដឹងថា ទិវាពលកម្មអន្ដរជាតិ ១ឧសភា គឺជាព្រឹត្តិការណ៍ប្រវត្តិសាស្ត្ររបស់បងប្អូនកម្មករនិយោជិត នៅទូទាំងពិភពលោក ហើយ​ត្រូវបាន​រាជរដ្ឋាភិបាលកម្ពុជាប្រារព្ធឡើងជារៀងរាល់ឆ្នាំ ចាប់តាំងពីក្រោយថ្ងៃរំដោះ ៧ មករា ឆ្នាំ១៩៧៩ មក។ សម្រាប់អ្នកនាំពាក្យរូបនេះ ការជ្រើសរើសប្រធានបទ រួមគ្នាកសាងភាពធន់ដើម្បី ការងារសមរម្យ សម្រាប់ទិវាពលកម្មអន្ដរជាតិ ១ ឧសភា ឆ្នាំ២០២៦ នេះ គឺជាសក្ខីភាពនៃការ ប្តេជ្ញាចិត្តរបស់រាជរដ្ឋាភិបាល ក្នុងការលើកកម្ពស់ការអភិវឌ្ឍទីផ្សារការងារប្រកបដោយភាពធន់ និងចីរភាព ដោយឈរលើគោលការកែលម្អលក្ខខណ្ឌការងារ, ការធានាសិទ្ធិការងារ និងសេរីភាពអង្គការវិជ្ជាជីវៈ, ការពង្រឹងប្រព័ន្ធគាំពារសង្គម និងការលើកកម្ពស់កិច្ចសន្ទនាសង្គម ក្នុងគោលដៅបម្រើឧត្តមប្រយោជន៍របស់បងប្អូនកម្មករនិយោជិតទាំងក្នុងនិងក្រៅប្រព័ន្ធ។អ្នកនាំពាក្យក្រសួងការងារដដែលរូបនេះ បន្ថែមថាក្នុងកម្មវិធីស្អែកនេះ សម្តេចនាយករដ្ឋមន្ត្រី នឹង​ថ្លែងសារសំណេះសំណាលជាមួយបងប្អូនកម្មករនិយោជិត និងអង្គពិធីដោយរំលេចនូវ​បង្ហាញពី​វឌ្ឍនភាពនៃវិស័យការងារ និងសមិទ្ធផលកន្លងមក​របស់រាជរដ្ឋាភិបាល​ដែលបានអនុវត្តកន្លងមក និងទិសដៅទៅមុខដើម្បីឧត្តមប្រយោជន៍របស់បងប្អូនកម្មករនិយោជិត និងវិស័យទាំងមូលផងដែរ៕

ក្រចេះ ៖ គណៈបញ្ជាការឯកភាពស្រុកចិត្របុរី បានចុះរៀបចំសណ្ដាប់ធ្នាប់សាធារណៈ និងសម្រេចរុះរើ ទីតាំងលក់ដូរមួយចំនួន នៅក្រោមស្ពានមិត្តភាពចិន-កម្ពុជា មេគង្គក្រចេះ និងទីតាំងលក់ដូរក្បែរនោះ ស្ថិតនៅលើចំណីផ្លូវសាធារណៈ តាមដងផ្លូវលេខ ៣៧៧ (ខ្សែផ្លូវ ក្រចេះ ~ ឆ្លូង) ស្ថិតក្នុងឃុំបុសលាវ ស្រុកចិត្របុរី ខេត្តក្រចេះ ដើម្បីរៀបចំសណ្តាប់ធ្នាប់សាធារណៈឱ្យមានរបៀបរៀបរយឡើងវិញ ។ការចុះអនុវត្តរុះរើនេះ ធ្វើឡើងនាថ្ងៃទី២៤ ខែមេសា ឆ្នាំ២០២៦ បន្ទាប់ពីអាជ្ញាធរស្រុកបានចុះធ្វើកិច្ចសន្យាណែនាំរួចរាល់តាំងពីដើមខែមេសា ប៉ុន្តែអាជីវករមួយចំនួននៅតែបន្តការលក់ដូរដដែល ការលក់ដូរលើចំណីផ្លូវបង្កឲ្យមានការកកស្ទះ និងងាយរងគ្រោះថ្នាក់ដល់ទាំងអ្នកលក់ អ្នកធ្វើដំណើ ។ លោក សេក រុន អភិបាលរងស្រុកចិត្របុរី តំណាងលោក យិន វណ្ណៈ អភិបាល នៃគណៈអភិបាលស្រុកចិត្របុរី បានដឹកនាំកម្លាំងគណៈបញ្ជាការឯកភាព បានចុះរៀបចំសណ្តាប់ធ្នាប់ និងរុះរើដោយបង្ខំ តុ-កៅអី គ្រែ-ទូ លក់ដូរ នៅចំណុចស្ពានថ្មី ស្ថិតនៅភូមិតាលុស ឃុំបុសលាវ ស្រុកចិត្របុរី ខេត្តក្រចេះ ដោយកម្លាំងក្រុមការងារ បានធ្វើការណែនាំ មិនអនុញ្ញាតអោយបន្តចូលលក់ជាថ្មីទៀតនោះទេ ដើម្បីបង្ការហានិភ័យ នៃគ្រោះថ្នាក់ចរាចរណ៍ផ្សេងៗដល់អ្នកលក់ដូរ និងសុវត្ថិភាពចរាចរណ៍ដងផ្លូវ នៅចំណុចស្ពានថ្មី ។ លោក សេក រុន អភិបាលរងស្រុកចិត្របុរី បានឲ្យដឹងថា៖ដោយអនុវត្តបទបញ្ជាលោកអភិបាល ខ្ញុំបាទបានដឹកនាំកម្លាំងគណៈបញ្ជាការឯកភាពស្រុកចុះរៀបចំសណ្តាប់ធ្នាប់ និងរុះរើដោយបង្ខំ តុកៅអីគ្រែទូលក់ដូរ នៅចំណុចស្ពានថ្មី ភូមិតាលុស ឃុំបុសលាវ ស្រុកចិត្របុរី ខេត្តក្រចេះ ជាលទ្ធផលៈបានរុះរើសម្អាតទាំងស្រុង ពីក្រោមស្ពាន ចំណីស្ពាន ចំណីផ្លូវ និងបានណែនាំ មិនអោយចូលលក់ជាថ្មីនិងហានិភ័យនៃគ្រោះថ្នាក់ចរាចរណ៍ផ្សេងៗដល់អ្នកលក់ដូរ សូមយោគយល់ផងបងប្អូនខ្ញុំត្រូវសម្រេចចិត្តជួយរុះរើទាំងបង្ខំបែបនេះហើយ ដោយកន្លងមកបានចុះអប់រំណែនាំបងប្អូនបួនលើករួចមកហើយ រហូតដល់ធ្វើកិច្ចសន្យាជាមួយបងប្អូនថែមទៀត តែបងប្អូនមិនព្រមរុះរើចេញសោះ ដើម្បីសុវត្ថិភាព និងសណ្តាប់ធ្នាប់សាធារណៈខ្ញុំត្រូវជ្រើសរើសជួយរើទាំងបង្ខំហើយ ព្រោះរថយន្តធំៗណាស់បត់បែនចុះឡើង សូមយោគយល់ ៕ អត្ថបទ ​៖ សេង ម៉រ